ធឿន មករា - La Reine Media

កម្មករសំណង់ម្នាក់ទៀតហើយ នៅខេត្តព្រះសីហនុ ឈ្នះរង្វាន់ ១០០លានរៀល ពីភេសជ្ជៈប៉ូវកម្លាំង ខារ៉ាបាវ

ទឹកប្រាក់ ១០០លានរៀល របស់ភេសជ្ជៈប៉ូវកម្លាំង ខារ៉ាបាវ បានបន្តធ្លាក់ទៅដល់ដៃបុរសម្នាក់ដែលមានឈ្មោះ យិន តុល អាយុ ២៤ឆ្នាំ បច្ចុប្បន្នមានមុខរបរជាកម្មករសំណង់ ស្នាក់នៅផ្ទះជាមួយម្ដាយមីង ដែលស្ថិតក្នុងទីធ្លាវត្តប្រសិទ្ធី ភូមិស្ទឹងច្រាល ឃុំអូរបាក់រទេះ ស្រុកកំពង់សិលា ខេត្តព្រះសីហនុ។

នៅចំពោះមុខក្រុមការងារ ជាអ្នកតំណាងក្រុមហ៊ុនចុះទៅប្រគល់ទឹកប្រាក់ចំនួន ១០០លានរៀល ដល់កន្លែងស្នាក់នៅផ្ទាល់ដែលស្ថិតនៅទីតាំងភូមិសាស្ត្រខាងលើនេះ លោក យិន តុល បានប្រាប់ឱ្យដឹងថា សព្វថ្ងៃនេះបើនិយាយពីកម្រិតជីវភាពគ្រួសារគឺមានភាពលំបាកខ្លាំង រហូតចាកចេញពីស្រុកកំណើតដែលស្ថិតនៅស្រុកឈូក ខេត្តកំពត មកស្នាក់នៅជាមួយម្ដាយមីង ធ្វើការជាជាងសំណង់ ដើម្បីបានចំណូលផ្គត់ផ្គង់ការចំណាយប្រចាំថ្ងៃជាមួយគ្រួសារ ដែលសូម្បីតែផ្ទះស្នាក់នៅផ្ទាល់ខ្លួនក៏មិនទាន់មានផង។

លោកបានបន្តឱ្យដឹងទៀតថា៖ ដោយឡែកសម្រាប់ការឈ្នះរង្វាន់ធំពីក្រុមហ៊ុនភេសជ្ជៈប៉ូវកម្លាំង ខារ៉ាបាវ នាពេលនេះក៏ជារឿងចៃដន្យបំផុត ព្រោះតាំងពីដើមរៀងមក លោកតែងនិយាយលេងជាមួយគ្រួសារថា ថ្ងៃណាមួយលោកនឹងមានសំណាងបានឈ្នះរង្វាន់ ១០០លានពី ខារ៉ាបាវ ដូចគេមុនៗជាមិនខាន ប៉ុន្តែពេលនេះការគិត និងការនិយាយលេងនោះបានក្លាយជាការពិតហើយ។ លោកថា៖ កាលពីសប្ដាហ៍កន្លងទៅនេះ បន្ទាប់ពីសម្រាក់ពីការងារ ហើយអស់កម្លាំង លោកបានទិញភេសជ្ជ ខារ៉ាបាវ ពីអ្នកលក់ដែលស្ថិតនៅមុខវត្ត ក្បែរកន្លែងធ្វើការ និងក្បែរផ្ទះស្នាក់នៅផងដែរនោះ ចំនួនមួយកំប៉ុង ដើម្បីទទួលទាន។ លុះស្រាប់តែពេលគាស់ក្រវិលកំប៉ុងភ្លាមក៏ឃើញមានរង្វាន់១០០លានរៀលនៅនឹងក្រវិលកំប៉ុងតែម្ដង។ ភ្លាមនោះ លោកក៏បានស្រែកប្រាប់អ្នកលក់ និងមនុស្សនៅជិតគ្នាឱ្យជួយមើល ហើយក៏ទូរស័ព្ទជូនដំណឹងដល់ក្រុមហ៊ុនតាមរយៈលេខដែលមាននៅនឹងក្រវិលកំប៉ុងស្រាប់។ ក្រោយពីទទួលបានប្រាក់រង្វាន់ធំ ១០០លានរៀលនេះ លោកនឹងយកមួយចំនួនទិញដីសង់ផ្ទះ ហើយទុកមួយចំនួនទៀតសម្រាប់បង្កើតមុខរបរទ្រទ្រង់ជីវភាពគ្រួសារទៅថ្ងៃអនាគត។

សូមបញ្ជាក់ផងដែរថា ជាការថ្លែងអំណរគុណចំពោះអតិថិជន ក្រុមហ៊ុន ភេសជ្ជៈប៉ូវកម្លាំង ខារ៉ាបាវ បានបង្កើនរង្វាន់យ៉ាងសន្ធឹកសន្ធាប់នូវចំនួនទឹកប្រាក់សុទ្ធរហូតដល់ ១០០លានរៀល ចំនួន៦០ រង្វាន់ , ម៉ូតូ HONDA Dream ចំនួន៦០ រង្វាន់ , ទូរស័ព្ទដៃ iPhone ចំនួន៦០ រង្វាន់ រួមជាមួយការផ្តល់ជូនរង្វាន់1កប៉ុង រាប់លានកំប៉ុង ដោយគ្មានការកំណត់នោះទេ។ សូមចំណាំ ៖ សម្រាប់រង្វាន់ពិតប្រាកដ គឺមានតែនៅសម្បកកំប៉ុង ដែលមានអក្សរខ្មែរជាសញ្ញាសម្គាល់តែប៉ុណ្ណោះ៕

April 11, 2019

ទិញម៉ូតូ ឬកង់បី បានសំាង ជាមួយសេវាបង់រំលស់ អេ អឹម ខេ

ភ្នំពេញ៖ ថ្មីៗនេះ គ្រឹះស្ថានមីក្រូហិរញ្ញវត្ថុ អេ អឹម ខេ បានដាក់ឱ្យប្រើប្រាស់សេវាបង់រំលស់ម៉ូតូ ឬកង់បីរបស់ខ្លួនជាផ្លូវការ ជាមួយនឹងការផ្តល់ជូនពិសេសដល់អតិថិជនគឺ ទទួលបានសាំង១៥លីត្រភ្លាមៗរាល់ការបង់រំលស់នៅដៃគូលក់ម៉ូតូ ឬកង់បី អេ អឹម ខេ។ ការផ្តល់ជូនពិសេសនេះ គឺសម្រាប់តែអតិថិជន ៣០០នាក់ ដំបូងប៉ុណ្ណោះ។

អេ អឹម ខេ ទទួលបានវិញ្ញាបនបត្រភតិសន្យាពីធនាគារជាតិនៅខែ តុលា ឆ្នាំ២០១៨។ សេវាបង់រំលស់ អេ អឹម ខេ ត្រូវបានដាក់ឱ្យដំណើរការសាកល្បងតំាងពីដើម ខែមីនា ឆ្នាំ២០១៩ ដោយមានការគាំទ្រច្រើនពីអតិថិជន ព្រោះ អេ អឹម ខេ ផ្តល់ភាពងាយស្រួល សេវាកម្មរហ័សទាន់ចិត្ត ផ្តល់លក្ខខណ្ឌងាយៗ ជាពិសេសមិនត្រូវការអ្នកធានា និងទ្រព្យបញ្ចាំ និងអត្រាការប្រាក់មានតម្លាភាព។ ដោយមើលឃើញពីការគាំទ្រច្រើនរបស់អតិថិជន ទើប អេ អឹម ខេ ដាក់ឱ្យប្រើប្រាស់សេវាបង់រំលស់នេះជាផ្លូវការចាប់ពីខែ មេសា ឆ្នាំ២០១៩ នេះទៅ។

លោក សួន ពិសី ប្រធាននាយកប្រតិបត្តិអាជីវកម្ម គ្រឹះស្ថានមីក្រូហិរញ្ញវត្ថុ អេ អឹម ខេ បានឱ្យដឹងថា “តាមរយៈការដាក់ឱ្យដំណើរការសាកល្បងសេវាបង់រំលស់ អេ អឹម ខេ យើងឃើញថា មានការគាំទ្រច្រើនពីសំណាក់អតិថិជនរបស់យើង ដោយសារតែ អេ អឹម ខេ ផ្តោតសំខាន់ទៅលើសេវាកម្មរហ័សទាន់ចិត្ត លក្ខខណ្ឌងាយៗ។” លោក សួន ពិសី បានបន្ថែមដែរថា “យើងផ្តល់សេវាបង់រំលស់សម្រាប់ការទិញម៉ូតូ ឬកង់បី គឺផ្តោតសំខាន់ចំពោះអតិថិជនដែលមានបំណងយកសម្ភារទំាងនេះទៅបង្កើតប្រាក់ចំណូលក្នុងគ្រួសារ ដូចជាការរត់ម៉ូតូឌុប ឬកង់បី ឬប្រើប្រាស់នៅក្នុងអាជីវកម្មផ្សេងៗទៀត ដែលអាចបង្កើនប្រាក់ចំណូលបាន។ ដូច្នេះ បានយើងព្យាយាមបង្កើតនូវលក្ខខណ្ឌងាយៗ និងកំណត់អត្រាការប្រាក់សមរម្យនិងមានតម្លាភាព គឺដើម្បីឱ្យអថិជនមានលទ្ធភាពគ្រប់គ្រាន់ក្នុងការសាកល្បងសេវាបង់រំលស់យើង ក៏ដូចជាជួយជ្រោមជ្រែងផែនការបង្កើនប្រាក់ចំណូលពួកគេផងដែរ។”

ដើម្បីសម្រួលដល់អតិថិជនក្នុងការប្រើប្រាស់សេវាបង់រំលស់ អេ អឹម ខេ ក៏មានដៃគូពាណិជ្ជកម្មជាច្រើនកន្លែងដែលអាចឱ្យអតិថិជនជ្រើសរើសម៉ូតូ ឬកង់បី ដែលខ្លួនពេញចិត្តបាន ជាមួយេសវាបង់រំលស់ រហូតដល់ទឹកប្រាក់ចំនួន ៥.០០០ដុល្លារ និងរយៈពេលបង់រំលស់រហូតដល់៣ឆ្នាំ ។

គួររម្លឹកផងដែរថា អេ អឹម ខេ គឺជាគ្រឹះស្ថានមីក្រូហិរញ្ញវត្ថុដែលឈានមុខគេលើវិសាលភាពប្រតិបត្តិការ និងចំនួនអតិថិជនប្រាក់កម្ចី។ គិតត្រឹមខែកុម្ភៈ ឆ្នាំ២០១៩ អេ អឹម ខេ មានអតិថិជនសរុបចំនួនជាង ៧០ ម៉ឺននាក់ ជាមួយនឹងផលប័ត្រប្រាក់កម្ចីជិត ២៦០ លានដុល្លារអាមេរិក និងប្រាក់បញ្ញើជាង ១៦៥ លានដុល្លារអាមេរិក មានការិយាល័យប្រតិបត្តិការចំនួន ១៤៩កន្លែង និងមានភ្នាក់ងារជិត ៤.០០០ កន្លែងនៅទូទាំងប្រទេស។ អេ អឹម ខេ មានផលិតផល និងសេវាកម្មជាច្រើនកំពុងផ្តល់ជូនអតិថិជនដូចជា៖ សេវាប្រាក់កម្ចី ប្រាក់សន្សំ សេវាផ្ទេរប្រាក់ក្នុង និងក្រៅប្រទេស សេវាទូទាត់វិក្កយបត្រ ធានារ៉ាប់រងខ្នាតតូច ធនាគារចល័ត សេវាបើកប្រាក់បៀវត្សរ៍ ម៉ាស៊ីនដក និងដាក់ប្រាក់ដោយស្វ័យប្រវត្តិ (ATMs/CDMs)។

សម្រាប់ព័ត៌មានបន្ថែម៖

លោកស្រី ស៊ូសាណា សូរិនច័ន្ទ នាយិកាប្រតិបត្តិទីផ្សារ និងទំនាក់ទំនង

អាសយដ្ឋាន៖ អគារ ២៨៥ មហាវិថី យោធពលខេមរៈភូមិន្ទ (២៧១) សង្កាត់ទំនប់ទឹក ខណ្ឌចំការមន រាជធានីភ្នំពេញ

ប្រអប់សំបុត្រលេខ ៤៨០

ទូរស័ព្ទលេខ៖ ០២៣ ៩៩៣ ០៦២/២២៤ ៧៦៣

សារអេឡិចត្រូនិក៖ [email protected]

April 11, 2019

បាត់ដំបងផលិតពូជដំឡូងមីដែលគ្មានជំងឺ និងសត្វល្អិត បានទិន្នផលរហូតដល់ 30តោនក្នុង 1ហិកតា

មជ្ឈមណ្ឌលបណ្តុះ និងចែកចាយពូជដំឡូងមី នៃសាកលវិទ្យាល័យបាត់ដំបងទទួលបានជោគជ័យក្នុងការស្រាវជ្រាវ និងផលិតពូជដំឡូងមីដែលគ្មានជំងឺ និងសត្វល្អិត ហើយទិន្នផលទទួលបានលើសដំឡូងមីធម្មតារហូតដល់ 30ភាគរយ។

មជ្ឈមណ្ឌលបណ្តុះ និងចែកចាយពូជដំឡូងមី នៃសាកលវិទ្យាល័យបាត់ដំបងស្ថិតក្រោមគម្រោងអភិវឌ្ឍន៍ និងផ្សព្វផ្សាយប្រព័ន្ធផលិតកម្មប្រកបដោយនិរន្តរភាពតាមរយៈការគ្រប់គ្រងសត្វល្អិតចង្រៃលើដំណាំដំឡូងមីនៅប្រទេសវៀតណាមកម្ពុជា និងថៃរបស់ប្រទេសជប៉ុន។ គម្រោងនេះមានរយៈពេល 5ឆ្នាំដែលចាប់ផ្តើមនៅឆ្នាំ2015 នឹងបញ្ចប់នៅឆ្នាំ2020 ដែលមានទឹកប្រាក់ប្រមាណជិត 5លានដុល្លារ ជាជំនួយឥតសំណងពីរដ្ឋាភិបាលជប៉ុន។

លោកបណ្ឌិត ស្រ៊ាន ពៅ ព្រឹទ្ធបុរសនៃមហាវិទ្យាល័យកសិកម្ម និងកែច្នៃអាហារ នៃសាកលវិទ្យាល័យបាត់ដំបង និងជាអ្នកអនុវត្តគម្រោងផ្ទាល់បានឱ្យដឹងថា ដំឡូងមីជាដំណាំយុទ្ធសាស្រ្តលំដាប់ទី2 បន្ទាប់ពីស្រូវ ហើយបច្ចុប្បន្នវាក្លាយជាដំណាំឧស្សាហកម្មលើកស្ទួយវិស័យសេដ្ឋកិច្ចជាតិរបស់ប្រទេសកម្ពុជា។

លោកបណ្ឌិតថ្លែងថា បច្ចុប្បន្នតាមរយៈគម្រោងអភិវឌ្ឍន៍ និងផ្សព្វផ្សាយប្រព័ន្ធផលិតកម្មប្រកបដោយនិរន្តរភាព តាមរយៈការគ្រប់គ្រងសត្វល្អិតចង្រៃលើដំណាំដំឡូងមី មជ្ឈមណ្ឌលបាននិងកំពុងតែធ្វើការអនុវត្តការសិក្សាស្រាវជ្រាវទៅលើរឿង4សំខាន់ៗ។ ទី1 ការសិក្សាលើកត្តាសត្វល្អិតដែលមាននៅលើដំឡូងមី។ ទី2 ផ្តោតលើជំងឺដែលបង្កឡើងទៅលើដំណាំដំឡូងមី។ ទី3 បច្ចេកទេសផលិតពូជដែលគ្មានជំងឺ ដើម្បីក្លាយជាពូជមួយដែលដាំដុះលើដីកសិករឱ្យមានប្រសិទ្ធភាពខ្ពស់ និងប្រាកដថាគ្មានជំងឺ និងទី4 ផ្តោតទៅលើបច្ចេកទេសនៃការផ្សព្វផ្សាយបច្ចេកទេសគ្រប់គ្រងសត្វល្អិតលើដំឡូងមីថា តើយើងគួរផ្សព្វផ្សាយចែករំលែកនូវចំណេះដឹងបែបណាឱ្យកសិករទទួលបានប្រសិទ្ធភាពខ្ពស់?។

លោកបណ្ឌិតបានរៀបរាប់ថា មកដល់ពេលនេះវាជាឆ្នាំទី3 របស់គម្រោងហើយដែលផលិតពូជដំឡូង-មីដែលគ្មានជំងឺ ដែលពូជនោះយើងផលិតបាន 1ឆ្នាំមកហើយ។ លោកបន្តថា មជ្ឈមណ្ឌលមានពូជសំខាន់ៗដែលកសិករនិយមដាំដុះ ដូចជា ពូជរ៉ាយ៉ង79 និង60 ដែលពូជទាំងអស់នេះ មជ្ឈមណ្ឌលផលិតឡើងដោយគ្មានជំងឺ និងសត្វល្អិត។

លោកបណ្ឌិតបានបន្ថែមថា៖ “យើងចុះតាមដានរៀងរាល់ 2សប្តាហ៍ម្តង យើងផលិតពូជមួយដែលមានសុខភាពល្អ និងគ្មានជំងឺជាប្រភពឱ្យកសិករយកទៅដាំដុះនៅលើដីចម្ការរបស់ពួកគាត់”។

លោកបណ្ឌិតបានបន្ថែមទៀតថា មជ្ឈមណ្ឌលបានចែកចាយទៅឱ្យកសិករដើម្បីដាំដុះបន្ត។ បើប្រៀបធៀបជាមួយពូជធម្មតា ពូជដែលមជ្ឈមណ្ឌលផលិតនេះ មានមើមធំល្អ មានទិន្នផលកើនឡើងពី 20ទៅ 30ភាគរយ ធៀបនឹងដំឡូងមីធម្មតា។

លោកបណ្ឌិត ស្រ៊ាន ពៅ ក៏បានឱ្យដឹងដែរថា នៅកម្ពុជាមានពូជដំឡូងមីជាង 20ពូជ ប៉ុន្តែការដាំដុះអាស្រ័យតាមតំបន់ ដែលភាគច្រើននៅពាយព្យ ប្រជាជនដាំពូជរ៉ាយ៉ង ពីប្រទេសថៃ និងភាគខាងត្បូង និងកើត ពួកគេភាគច្រើនយកពូជមកពីប្រទេសវៀតណាម។

បើតាមលោកបណ្ឌិត ស្រ៊ាន ពៅ ដំឡូងមីមិនអាចដាំដុះនៅលើដីដែលជាំទឹកបានទេ ដូច្នេះយើងឃើញថា នៅតំបន់ខ្ពង់រាប ការដាំដុះដំឡូងមីនៅលើដីដែលមិនជាំទឹក និងមានដីក្រហមល្បាយខ្សាច់ និងដីខ្មៅ គឺស័ក្តិសមបំផុតសម្រាប់ដំណាំដំឡូងមី។

លោកបន្តថា គម្រោងនេះ គឺផ្អែកលើការស្រាវជ្រាវ ហើយភាគី JICA បានជួយលើការកសាងសមត្ថភាព បង្កើនសមត្ថភាពសិក្សាស្រាវជ្រាវ និងបណ្តុះបណ្តាលនៅប្រទេសជប៉ុន នៅសាកលវិទ្យាល័យនានានៅប្រទេសជប៉ុន និងឧបត្ថម្ភឧបករណ៍មួយចំនួនសម្រាប់ធ្វើការពិសោធ និងមន្ទីរពិសោធន៍មួយផងដែរ ដើម្បីវិភាគជំងឺដែលកើតឡើងលើដំឡូងមី។

លោកបណ្ឌិតបានបញ្ជាក់ថា ឆ្នាំនេះ មជ្ឈមណ្ឌលគ្រោងឱ្យគាត់ពង្រីកការចែកចាយពូជបន្តទៀតគឺធ្វើយ៉ាងណាសហការជាមួយកសិករ បង្កើនការដាំដុះពូជពីមជ្ឈមណ្ឌលឱ្យបាន 100ហិកតានៅប៉ុន្មានឆ្នាំខាងមុខ ព្រោះពូជដែលផលិតដោយមជ្ឈមណ្ឌលអាចទទួលទិន្នផលបានប្រមាណ 30តោនក្នុង 1ហិកតា។ លោកបន្ថែមថា ក្នុង 1ហិកតា កសិករអាចដាំបានជាង 10,000គុម្ព ដោយកសិករនឹងចំណាយអស់ជាមធ្យម 1,000ដុល្លារអាមេរិក រាប់ទាំងការរៀបចំដី ពូជ និងជីផង។ ដោយឡែកកសិករអាចរកចំណូលបានមកវិញប្រមាណពី 2ទៅ 3ពាន់ដុល្លារ។

លោកបន្តថា “ខ្ញុំគិតថា 2ឆ្នាំចុងក្រោយនេះ ទីផ្សារដំឡូងមីមានតម្លៃខ្ពស់មែនទែន។ កសិករគាត់សប្បាយចិត្តលើតម្លៃរបស់ដំឡូងមី។ សម្រាប់ប៉ុន្មានឆ្នាំមុន តម្លៃវាធ្លាក់ចុះមែន ប៉ុន្តែឥឡូវ 2ឆ្នាំចុងក្រោយនេះ តម្លៃល្អឡើងវិញ ប៉ុន្តែកសិករប្រឈមមុខនឹងជំងឺលើដំណាំ ដូច្នេះកសិករមិនអាចលក់បានថ្លៃ ហើយទិន្នផលក៏ធ្លាក់ចុះ។ ខ្ញុំគិតថា សាកលវិទ្យាល័យបាត់ដំបងជាសាកលវិទ្យាល័យដែលកំពុងសិក្សាលើជំងឺដំឡូងមីនោះមានការសប្បាយចិត្តក្នុងការផ្តល់ជំនាញ និងបច្ចេកទេសពាក់ព័ន្ធនឹងដំឡូងមី។ យើងមានបច្ចេកទេសថ្មីៗទៀតដើម្បីការពារដី”។

គួរបញ្ជាក់ថា ដំឡូងមីត្រូវបានដាំដុះនៅតំបន់ត្រូពិក និងអនុតំបន់ត្រូពិក។ បច្ចុប្បន្ន ប្រទេសនៅក្នុងតំបន់អាស៊ី គឺជាតំបន់ដាំដុះធំទី2 បន្ទាប់ពីប្រទេសក្នុងតំបន់អាហ្វ្រិក ហើយការប្រើប្រាស់ដំឡូងមីកំពុងកើនឡើងខ្លាំងសម្រាប់ឧស្សាហកម្មចំណីអាហារ និងសម្ភារឧស្សាហកម្មផ្សេងៗដែលប្រើប្រាស់ម្សៅដំឡូងមី រួមមានដូចជា ក្រដាស ប្លាស្ទិក និងធ្វើជាវត្ថុធាតុដើមសម្រាប់ផលិតកម្មជីវៈអេតាណុល។

មូលហេតុមួយនៃការកើនឡើងចំពោះការដាំដុះដំឡូងមី គឺដោយសារការកើនឡើងនូវផលិតកម្មប្រើប្រាស់ដំឡូងមីនៅក្នុងប្រទេសថៃ វៀតណាម និងកម្ពុជា។ដំឡូងមីក្នុងប្រទេសទាំងនេះបានចូលរួមចំណែកយ៉ាងសំខាន់ក្នុងការធ្វើឱ្យប្រសើរឡើងដល់ជីវភាពកសិករខ្នាតតូចតាមរយៈដំណាំដ៏មានគុណតម្លៃនេះ និងបានធ្វើឱ្យវិស័យឧស្សាហកម្មអាចបង្កើតការងារបានច្រើនឆ្ពោះទៅរកការអភិវឌ្ឍប្រកបដោយចីរភាព និងការអភិវឌ្ឍសេដ្ឋកិច្ចជាតិទាំងមូល៕

April 11, 2019

នៅឆ្នាំ2021 បន្ទប់សណ្ឋាគារនៅខេត្តព្រះសីហនុ នឹងកើនដល់ជិត 1ម៉ឺនបន្ទប់

រដ្ឋមន្ត្រីក្រសួងទេសចរណ៍ បានព្យាករថា តាមសន្ទស្សន៍នៃសក្តានុពល និងការវិនិយោគលើ វិស័យសេវាស្នាក់នៅខេត្តព្រះសីហនុនឹងមានបន្ទប់សណ្ឋាគារកើនឡើងដល់ជិត 1ម៉ឺនបន្ទប់ក្នុងឆ្នាំ2021 ដើម្បីឆ្ពោះទៅដល់ការរៀបចំ និងអភិវឌ្ឍខេត្តព្រះសីហនុក្នុងការត្រៀមខ្លួនធ្វើជាម្ចាស់ផ្ទះក្នុងការរៀបចំពិធីបុណ្យសមុទ្រឆ្នាំ2020 និងកិច្ចប្រជុំកំពូលអាស៊ាន (ASEAN Summit) ក្នុងឆ្នាំ2022។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានថ្លែងឱ្យដឹងថា៖“ការវិនិយោគលើវិស័យសេវាស្នាក់នៅ និងសណ្ឋាគារបានកើនឡើងជាមធ្យម 3.5ពាន់បន្ទប់ក្នុង 1ឆ្នាំ ដែលបន្ទប់សណ្ឋាគារ អាចនឹងកើនឡើងដល់ជិត 1ម៉ឺនបន្ទប់ក្នុងឆ្នាំ2021 ដើម្បីគាំទ្រដល់ការរីកចម្រើនវិស័យទេសចរណ៍យ៉ាងលឿនរហ័ស និងជាបន្តបន្ទាប់នៅខេត្តព្រះសីហនុ”។

ឯកឧត្តមបន្តថា ខណៈដែលវិស័យទេសចរណ៍កម្ពុជាបាននាំមកនូវចំណូលក្នុងសេដ្ឋកិច្ចជាតិប្រមាណជាង 4ពាន់លានដុល្លារកាលពីឆ្នាំ2018 កន្លងមកនេះ យើងក៏ត្រូវគិតគូរពីការធ្លុះធ្លាយសេដ្ឋកិច្ច (Econo mic Leakages) ក្នុងវិស័យទេសចរណ៍ ដោយចំណូលទេសចរណ៍ប្រមាណ 25% ត្រូវបានធ្លាយចេញទៅវិញ ដែលភាគច្រើនកើតឡើងដោយសារការនាំចូលផលិតផលពីបរទេស ដូចជា បន្លែផ្លែឈើ សាច់ ស្រា គ្រឿងសង្ហារិម វត្ថុសិប្បកម្មផ្សេងៗ-ល- ដើម្បីទ្រទ្រង់ដល់កំណើនយ៉ាងខ្លាំងនៃការអភិវឌ្ឍវិស័យទេសចរណ៍នៅកម្ពុជា។

ជាមួយគ្នានេះ ឯកឧត្តម ថោង ខុន បានដាក់ទិសដៅដោយត្រូវព្យាយាមកាត់បន្ថយអត្រានៃការធ្លុះធ្លាយឱ្យបានយ៉ាងតិច 10%បន្ថែមទៀត(ឱ្យមកនៅត្រឹម 5%ដែលជាកម្រិតទូទៅរបស់បណ្តាប្រទេសគោលដៅទេសចរណ៍នានា)។ ឯកឧត្តមរដ្ឋមន្ត្រី បានបញ្ជាក់៖“បើយើងអាចកាត់បន្ថយការធ្លុះធ្លាយបានប្រមាណ 10% បន្ថែមទៀត គឺយើងអាចចំណេញបានប្រមាណ 400លានដុល្លារពីការនាំចូលរបស់ទាំងនេះសម្រាប់តែបម្រើឧស្សាហកម្មទេសចរណ៍”។

ឯកឧត្តមរដ្ឋមន្ត្រីក្រសួងទេសចរណ៍បានបន្តទៀតថា ការជំរុញការប្រើប្រាស់ផលិតផលក្នុងស្រុកក្នុងឧស្សាហកម្មទេសចរណ៍នឹងឆ្លើយតបនឹងកំណើនតម្រូវការ តាមរយៈកំណើននៃការមកដល់នៃភ្ញៀវទេសចរអន្តរជាតិ និងកំណើននៃការធ្វើដំណើររបស់ភ្ញៀវទេសចរក្នុងស្រុក គឺពិតជាមានសារៈសំខាន់ជាយុទ្ធសាស្រ្តដែលទាមទារឱ្យមានការចូលរួមពីគ្រប់ភាគីពាក់ព័ន្ធទាំងអស់ ទាំងផ្នែករដ្ឋ ផ្នែកឯកជន និងដៃគូអភិវឌ្ឍន៍។

ផ្នែកឯកជននៅក្នុងវិស័យទេសចរណ៍ត្រូវបន្តគាំទ្រ និងប្រើប្រាស់ផលិតផលក្នុងស្រុកឱ្យបានជាអតិបរមា ខណៈដែលផលិតករក្នុងស្រុកបាននិងកំពុងបន្តពង្រឹងផលិតកម្ម ទាំងលើទិដ្ឋភាពបរិមាណ និងគុណភាព ប្រកបដោយតម្លៃប្រកួតប្រជែង។ ការរៀបចំ“អន្តរការី” ក៏មានសារៈសំខាន់ក្នុងការដើរតួជាអ្នកផ្គូផ្គងភ្ជាប់ទំនាក់ទំនងរវាងផ្នែកផ្គត់ផ្គង់ និងផ្នែកតម្រូវការ ដោយធ្វើជាអ្នកធានាសម្រាប់ភាគីទាំង2។ ឯកឧត្តមរដ្ឋមន្ត្រីក៏បានសើ្នឱ្យមានការជំរុញរៀបចំខ្សែក្រវាត់បៃតងនៅជុំវិញតំបន់ គោលដៅទេសចរណ៍សំខាន់ៗក្នុងព្រះរាជាណាចក្រកម្ពុជា តាមរយៈការដាំដំណាំ ការចិញ្ចឹមសត្វ វារីវប្បកម្ម ការជំរុញសកម្មភាពសិប្បកម្ម សហគ្រាសធុនតូច និងមធ្យម ដើម្បីធានាដល់ការផ្គត់ផ្គង់ផលិតផលក្នុងស្រុកសម្រាប់ឧស្សាហកម្មទេសចរណ៍ ពិសេសនៅតាមរមណីយដ្ឋាន សណ្ឋាគារ និងភោជនីយដ្ឋាននានា។

ឯកឧត្ដមរដ្ឋមន្ត្រីក៏បានផ្តល់អនុសាសន៍ដល់រដ្ឋបាលខេត្ត រដ្ឋបាលក្រុង មន្ទីរទេសចរណ៍ ក្រុមការងារទាំង5 ព្រមទាំងមន្ទីរ និងអង្គភាពពាក់ព័ន្ធត្រូវសហការគ្នាបន្តអនុវត្តភារកិច្ច និងដោះស្រាយបញ្ហាប្រឈមតាមជំនាញ និងអនុវត្តច្បាប់ជាចម្បងប្រកបដោយប្រសិទ្ធភាព។ ក្រសួងទេសចរណ៍បាន និងកំពុងរៀបចំផែនការបណ្តុះបណ្តាលធនធានមនុស្ស និងពង្រឹងគុណភាពបុគ្គលិកជំនាញតាមរយៈការបើកវគ្គបណ្តុះបណ្តាលជាប្រចាំ និងជំរុញដល់គ្រប់មូលដ្ឋានអាជីវកម្មទេសចរណ៍ធ្វើការបើកវគ្គពង្រឹងសមត្ថភាពនៅមូលដ្ឋានផ្ទាល់ (In house training)។

សូមបញ្ជាក់ថា នៅឆ្នាំ2018 កន្លងមកនេះ ចំនួនភ្ញៀវទេសចរបរទេស មកកម្ពុជាមានចំនួន 6.2លាននាក់កើនឡើង11% ដោយឡែកទេសចរអន្តរជាតិមកខេត្តព្រះសីហនុមានចំនួន 58ម៉ឺននាក់កើន24% ដែលបង្កើតការងារដោយផ្ទាល់ចំពោះប្រជាពលរដ្ឋចំនួន 17ម៉ឺននាក់ ចំណែកទេសចរណ៍បរទេស សម្រាប់ 3ខែដើមឆ្នាំ2019 នេះ មានចំនួន 20ម៉ឺននាក់ កើនឡើង25%។ បច្ចុប្បន្ន មូលដ្ឋានសេវាស្នាក់នៅមានចំនួន 9,697បន្ទប់ ក្នុងនោះសណ្ឋាគារកម្រិតផ្កាយ5 មានចំនួនប្រមាណ 2,000បន្ទប់៕

April 11, 2019

គម្រោងទាំងនេះនឹងបញ្ចុះតម្លៃពិសេសនៅក្នុងពិព័រណ៍លំនៅដ្ឋាននៅកោះពេជ្រ

អ្នកទិញ និងអ្នកចាប់អារម្មណ័ទិញអចលនទ្រព្យជាច្រើននាក់នឹងចូលរួមនៅក្នុងពិព័រណ៍លំនៅដ្ឋាន ឆ្នាំ២០១៩ នេះ។ នៅក្នុងឱកាសដ៏អស្ចារ្យនេះ សម្រាប់អ្នកដែលមានដឹងប្រាកដជាទទួលបាន អត្ថប្រយោជន៍ជាច្រើនពីការបញ្ចុះតម្លៃដ៏ច្រើនគម្រោងលំនៅដ្ឋានធំៗនៅក្នុងប្រទេសកម្ពុជា។

វេទិកាអចលនទ្រព្យនេះនឹងធ្វើនៅសាលពិព័រណ៌កោះពេជ្រនៅថ្ងៃទី ២៦ និង២៧ ខែមេសា បន្ទាប់ពីបុណ្យចូលឆ្នាំខ្មែររួច។

ក្រៅពីការបញ្ចុះតម្លៃ ប្រសិនបើអ្នកទិញអចលនទ្រព្យនៅថ្ងៃពិព័រណ៍នេះ អ្នកនឹងមានឱកាស ឈ្នះរង្វាន់សំបុត្រយន្តហោះ សម្រាប់ធ្វើដំណើរទៅប្រទេសហ្វីលីពីន ឬស្នាក់នៅសណ្ឋាគារ ដោយឥតគិតថ្លៃ។

លើសពីនេះទៀត ការផ្តល់ជូនដ៏ច្រើនទាំងនេះនឹងមាននៅកន្លែងតែមួយ ក្នុងរយៈពេលពីរថ្ងៃ ដើម្បីឲ្យអ្នកអាចធ្វើការសម្រេចចិត្ត និងចរចាទៅតាមអ្វីដែលអ្នកចង់បាន។

ខាងក្រៅមនេះ គឺជាការផ្តល់ជូនពិសេសៗ ដែលនឹងផ្តល់ជូននៅក្នុងពិព័រណ៍ខាងមុខ។

បញ្ចុះតម្លៃ

យោងតាម ឌីជេ ណាណា ជាអ្នកតំណាងសម្រាប់ព្រឹត្តិការណ៍នេះ ការបញ្ចុះតម្លៃនេះគឺជាផ្នែកដ៏សំខាន់មួយ នៅក្នុងពិព័រណ៍នេះ។

ឌីជេណាណា និយាយថា “នៅពេលដែលយើងមើលឃើញពីការបញ្ចុះ ១% ឬ ០.៥% មើលទៅដូចជាមិនច្រើននោះទេ។ ប៉ុន្តែប្រសិនបើអ្នកទិញផ្ទះ ទទួលបានការបញ្ចុះតម្លៃ ១ %នោះ អ្នកអាចសន្សំបានជាង ១,០០០ ដុល្លារឯណោះ។”

បុរី ផេន សៀរ រេស៊ីឌិននិងផ្តល់ជូនការបញ្ចុះតម្លៃ៥% ពីគ្រប់យូនីតទាំងអស់។

ជាមួយគ្នានេះដែរ ក្រុមហ៊ុន Star Gold ជាក្រុមហ៊ុនអភិវឌ្ឍអចលនទ្រព្យដ៏ល្អបំផុតនៅប៉ោយប៉ែត នឹងផ្តល់ជូនការបញ្ចុះតម្លៃរហូតដល់ ៥ % ចំពោះការបង់រំលស់របស់អ្នក។

គម្រោង Urban Village ដែលជាលំនៅដ្ឋានដ៏អស្ចារ្យមួយនៅក្នុងទីក្រុងភ្នំពេញ នឹងដាក់លក់យូនីត លំនៅដ្ឋាននៅក្នុងកម្មវិធីនេះ។ ក្នុងរយៈពេលពីរថ្ងៃនេះ អ្នកអាចទទួលបានការបញ្ចុះតម្លៃរហូតដល់ ៥៥,០០០ ដុល្លារ សម្រាប់ចំនួន ៥ យូនីតពិសេស។ សូមកុំខកខានឲ្យសោះ!

បុរីឌឹផ្លរ៉ា ក៏ចូលរួមនៅក្នុងពិព័រណ៍នេះដែរ។ ប្រសិនបើអ្នកទិញយូនីតពីបុរី ឌឹ ផ្លរ៉ា នៅក្នុងកម្មវិធីនេះ អ្នកអាចសន្សំប្រាក់បានរហូតដល់ ៣,០០០ ដុល្លារ។ នេះជាផលចំណេញដ៏ច្រើនរបស់អ្នក!

ចំណែកលំនៅដ្ឋាន អារ៉ាតា ហ្កាដិន រ៉េស៊ីដិនស៍នឹងមានវត្តមាននៅនៅឯពិព័រណ៍នេះដែរ។ ប្រសិនបើអ្នកទិញផ្ទះពីអារ៉ាតាហ្កាដិននៅក្នុងពិព័រណ៍នេះ អ្នកអាចទទួលការបញ្ចុះតម្លៃពី ៥០០ ដុល្លារ ទៅ ២% ភ្លាមៗ។

បន្ថែមរង្វាន់

បន្ថែពីលើរង្វាន់ដែល Realestate.com.kh នឹងត្រូវផ្តល់ជូននៅពេលចុះឈ្មោះ (ចុះឈ្មោះមុន) អ្នកអភិវឌ្ឍន៍ជាច្រើននឹងផ្តល់រង្វាន់ជាច្រើនដល់អ្នកទិញផងដែរ។

ខុនដូ Seven Residences ជ្រើសរើសអ្នកទិញដើម្បីចាប់រង្វាន់ ជ្រើសរើសអ្នកឈ្នះ ដែលអ្នកអាចឈ្នះ រង្វាន់ធំរហូតដល់ ២៧,៧៧៧ ដុល្លារ ឬឈ្នះគ្រឿងបរិក្ខារក្នុងផ្ទះដោយឥតគិតថ្លៃ។

គម្រោង V House ក៏ផ្តល់ជូនការចាប់រង្វាន់ដល់អតិថិជនផងដែរ។ ទិញយូនីត នៅកម្មវិធីនេះ អ្នកអាចឈ្នះទូរស័ព្ទ iPhone XS ទូរទស្សន៍មួយគ្រឿង និងគ្រឿងបរិក្ខារផ្សេងៗ ឬការផ្តល់ជូនសេវាគ្រប់គ្រងអចលនទ្រព្យរយៈមួយឆ្នាំដោយឥតគិតថ្លៃ។

ប៉ុន្តែរង្វាន់នៅមានច្រើនជាងនេះទៀត។ Realestate.com.kh នឹងផ្តល់រង្វាន់ជាច្រើន

នៅក្នុងព្រឹត្តិការណ៍នេះ។ អ្នកអាចឈ្នះទូរស័ព្ទ Samsung Galaxy A50 មួយគ្រឿង ប័ណ្ណបញ្ចុះតម្លៃ សម្រាប់ការស្នាក់នៅសណ្ឋាគារ Lumiere នៅភ្នំពេញ ឬ ស្ពីកឃ័រ JBL ។

វិធីបីយ៉ាងដើម្បីចុះឈ្មោះ

If you are going to buy property you’re almost guaranteed to get some freebies. But even if you

don’t there will be great prizes to those who register soon. Registering is simple. Here are three

ways you can do it:

ប្រសិនបើអ្នកមានបំណងទិញអចលនទ្រព្យអ្នកនឹងទទួលបានការធានាលើការផ្តល់ជូនច្រើនបំផុត។ ប៉ុន្តែទោះបីជាអ្នកមិនទិញ អ្នកក៏នៅតែអាចរង្វាន់ដ៏អស្ចារ្យ ដោយគ្រាន់តែចុះឈ្មោះនៅពេលនេះ។ ការចុះឈ្មោះគឺសាមញ្ញ និងមានបីរបៀបដែលអ្នកអាចធ្វើបាន៖

១. ចូលទៅកាន់គេហទំព័រ Realestate.com.kh ដើម្បីចុះឈ្មោះ។

២. ជជែកជាមួយ Realestate.com.kh លើហ្វេសប៊ុក ហើយធ្វើតាមការណែនាំដ៏ងាយស្រួល។

៣. ទាញយក Realestate.com.kh នៅលើ WeChat របស់អ្នក។

វេទិកាអចលនទ្រព្យលើនេះនឹងធ្វើឲ្យថ្ងៃចុងសប្តាហ៍របស់មានភាពសប្បាយរីករាយ ជាមួយនឹងការស្វែងយល់ពីភាពរីកចម្រើននៃទីផ្សារអចលនទ្រព្យកម្ពុជា។ សូមអញ្ជើញមកទទួលយកការបញ្ចុះតម្លៃ ការផ្តល់រង្វាន់ និងការស្វែងរកជម្រើសលំនៅដ្ឋាន ពិតប្រកដរបស់អ្នក។

ស្វែងរកព័ត៌មានថ្មីៗ ឬការផ្តល់ជូនពិសេសពីពិព័រណ៍លំនៅដ្ឋានកម្ពុជា សូមចូលទៅកាន់ Realestate.com.kh!

April 11, 2019

សហគមន៍អឺរ៉ុបចុះបញ្ជីការពារម៉ាកសម្គាល់ភូមិសាស្រ្តស្ករត្នោតកំពង់ស្ពឺជាផ្លូវការ

សហគមន៍អឺរ៉ុបបានចុះបញ្ជីការពារ និងទទួលស្គាល់ស្ករត្នោតកំពង់ស្ពឺ ជាម៉ាកសម្គាល់ភូមិសាស្រ្ត នៅក្នុងទីផ្សារសហគមន៍អឺរ៉ុបជាផ្លូវការហើយ បន្ទាប់ពីប្រើរយៈពេលជាច្រើនឆ្នាំក្នុងការត្រួតពិនិត្យពាក្យស្នើសុំ និងដោះស្រាយវិវាទនានា។

ស្ករត្នោតកំពង់ស្ពឺត្រូវបានដាក់ចូលទៅក្នុងបញ្ជីការពារម៉ាកសម្គាល់ភូមិសាស្រ្ត (PGI) របស់សហគមន៍អឺរ៉ុបនៅថ្ងៃទី2 ខែមេសា ឆ្នាំ2019។ វាមានន័យថា គ្រប់ផលិតផលស្ករត្នោតកំពង់ស្ពឺដែលមានលក់នៅលើទីផ្សារអឺរ៉ុប គឺមានប្រភព កែច្នៃ និងផលិតនៅក្នុងខេត្តកំពង់ស្ពឺ ក្នុងស្រុកចំនួន3 រួមមានស្រុក សំរោងទង ស្រុកឧដុង្គ និងស្រុកអង្គស្នួល។

លោក អប់ រ៉ាឌី ប្រធាននាយកដ្ឋានកម្មសិទ្ធិបញ្ញា នៃក្រសួងពាណិជ្ជកម្មបានឱ្យដឹងថា ផលិតផលស្ករត្នោតកំពង់ស្ពឺដែលបានចុះបញ្ជីការពារនៅសហគមន៍អឺរ៉ុបនេះ គឺជាផលិតផលសម្គាល់ភូមិសាស្រ្តទី2ហើយ បន្ទាប់ពីម្រេចខេត្តកំពតដែលត្រូវបានចុះបញ្ជីទទួលស្គាល់ និងការពារជាផលិតផលសម្គាល់ភូមិសាស្រ្តកាលពីខែកុម្ភៈ ឆ្នាំ2016 កន្លងមក។

លោកបានបន្តថា ការចុះបញ្ជីទទួលស្គាល់ស្ករត្នោតកំពង់ស្ពឺចូលទៅក្នុងបញ្ជីការពារម៉ាកសម្គាល់ភូមិសាស្រ្ត(PGI) របស់សហគមន៍អឺរ៉ុបនេះ នឹងជួយឱ្យស្ករត្នោតរបស់ខ្មែរមានមូលដ្ឋានគ្រឹះរឹងមាំ និងបង្កើនតម្លៃបន្ថែមដល់ផលិតផលស្ករត្នោតកំពង់ស្ពឺ ហើយនឹងជួយទប់ស្កាត់ពីការក្លែងបន្លំបំពានទៅលើ ផលិតផលស្ករត្នោតកំពង់ស្ពឺផងដែរ។

លោក រ៉ាឌី ថ្លែងថា៖“សហគមន៍អឺរ៉ុបនឹងចាត់វិធានការផ្លូវច្បាប់ណាមួយ បើសិនជាមានការក្លែងបន្លំម៉ាកស្ករត្នោតកំពង់ស្ពឺនៅសហគមន៍អឺរ៉ុប មួយវិញទៀតវាក៏នឹងជួយឱ្យផលិតផលស្ករត្នោតមានកេរ្តិ៍ឈ្មោះល្បីនៅលើទីផ្សារសហគមន៍អឺរ៉ុបផងដែរ”។

លោកបន្តថា វាក៏នឹងជួយឱ្យតម្លៃស្ករត្នោតកំពង់ស្ពឺមានលំនឹងល្អនៅលើទីផ្សារអឺរ៉ុប ហើយបន្ថែមលើនេះ វានឹងជួយលើកកម្ពស់ជីវភាពរបស់ប្រជាកសិករអ្នកឡើងត្នោតនៅខេត្តកំពង់ស្ពឺផងដែរ។ លោកបន្តថា ការចុះបញ្ជីទទួលស្គាល់ស្ករត្នោតកំពង់ស្ពឺចូលទៅក្នុងបញ្ជីការពារម៉ាកសម្គាល់ភូមិសាស្រ្ត (PGI) របស់សហគមន៍អឺរ៉ុបនេះ ក៏ជាមធ្យោបាយមួយជួយឱ្យមានតម្លៃបន្ថែមខ្ពស់ដល់កសិករដែរ។

លោកបានបន្តទៀតថា បើធៀបនឹងប្រទេសផ្សេងៗ កម្ពុជាទើបតែមានផលិតផល2ទេ ដែលបានចុះបញ្ជីនៅសហគមន៍អឺរ៉ុប។ លោកបន្ថែមថា វាក៏ជាការជំរុញឱ្យកសិករពង្រីក និងពង្រឹងផលិតកម្មស្ករត្នោតផងដែរ។ លោក រ៉ាឌី បញ្ជាក់ថា៖“ការចុះបញ្ជីនេះនឹងមានសុពលភាព 20ថ្ងៃក្រោយ បន្ទាប់ពីការទទួលស្គាល់របស់សហគមន៍អឺរ៉ុប”។

លោក សំ សារឿន ប្រធានសមាគមអភិវឌ្ឍន៍ស្ករត្នោតខេត្តកំពង់ស្ពឺ (KSPSPA) បានឱ្យដឹងថា តម្រូវការស្ករត្នោតកំពង់ស្ពឺនៅទីផ្សារសហគមន៍អឺរ៉ុបមានរហូតដល់ជាង 350តោនក្នុង 1ឆ្នាំៗ ប៉ុន្តែលោកមានការបារម្ភអំពីទិន្នផល និងបរិមាណស្ករត្នោតដែលផលិតបាននៅក្នុងឆ្នាំនេះ ស្របពេលដែល អាកាសធាតុក្តៅខ្លាំងដែលធ្វើឱ្យទិន្នផល និងបរិមាណស្ករត្នោតធ្លាក់ចុះ។

លោកបន្តថា រហូតមកទល់ពេលនេះ កសិករផលិតស្ករត្នោតនៅខេត្តកំពង់ស្ពឺដែលជាសមាជិករបស់សមាគមកំពុងផលិតស្ករត្នោតបានប្រមាណជាង 60តោនហើយ ដោយសារតែអាកាសធាតុក្តៅខ្លាំងពេក បរិមាណទឹកត្នោតថយចុះ និងធ្វើឱ្យទឹកត្នោតឆាប់ជូរ។ លោកបន្ថែមទៀតថា បើអាកាសធាតុក្រោម 30អង្សានោះ ទិន្នផលនឹងទទួលបានខ្ពស់។ លោករំពឹងថា ឆ្នាំនេះយើងនឹងផលិតបានប្រមាណជា 100តោន។

លោកសារឿនបានថ្លែងទៀតថា៖“ការទទួលបានការចុះបញ្ជីនៅអឺរ៉ុបនេះ គឺយើងទទួលបានភាពជោគជ័យមួយកម្រិតទៀត ដោយយើងនឹងមានទីផ្សារធំសម្រាប់ប្រជាកសិករអ្នកឡើងត្នោត ហើយពេលនេះតម្លៃស្ករត្នោតកំពង់ស្ពឺនៅមានតម្លៃថេរនៅឡើយ ប៉ុន្តែឆ្នាំក្រោយតម្លៃអាចនឹងឡើងបន្តិច”។

លោកសារឿនបានថ្លែងបន្តថា បច្ចុប្បន្ននេះតាមរយៈការចុះកិច្ចព្រមព្រៀងជាមួយក្រុមហ៊ុនក្នុងស្រុកនានា ធ្វើឱ្យតម្លៃស្ករត្នោតកំពង់ស្ពឺមានទីផ្សារល្អដោយក្នុង 1គីឡូក្រាមស្ករត្នោត កសិករអាចលក់បានក្នុងតម្លៃចាប់ពី 5,200រៀល ដល់ 6,000រៀលតាមតំបន់ និងតាមក្រុមហ៊ុនបញ្ជាទិញ។

បើតាមលោក សារឿន ក្នុង 1គីឡូស្ករត្នោត កសិករត្រូវចំណាយថ្លៃដើមប្រមាណជា 5,050រៀល ហើយនៅពេលនេះ តម្រូវការស្ករត្នោតសរីរាង្គមានជាង75ភាគរយ ដោយហេតុថា ការនាំចេញភាគច្រើនទៅបរទេស ដូច្នេះអ្នកបញ្ជាទិញអត់ស្គាល់ស្ករ GI ដែលជាផលិតផលស្ករត្នោតសម្គាល់ភូមិសាស្រ្តនោះទេ។ លោកបន្តថា ដើម្បីបំពេញតម្រូវការទីផ្សារ លោកក៏បានបែងចែកប្រភេទដើមត្នោតដើម្បីចាត់ទុកជា ត្នោតសរីរាង្គ និង GI។

លោក សារឿន បន្តថា ក្នុងឆ្នាំ2009 ដើមត្នោតមានជាង 1លានដើមនៅស្រុកឧដុង្គ សំរោងទងអង្គស្នួល ដោយឡែកនៅឆ្នាំ2010 ដើមត្នោតមានការថយចុះ នៅពេលមានសកម្មភាពទិញដីធ្វើការអភិវឌ្ឍ។

លោក សារឿន បានបន្តទៀតថា៖ “ដើម្បីផលិតបានស្ករ 300តោនយើងត្រូវមានសមាជិកជាង 200គ្រួសារ ទៅ 250គ្រួសារ។ យើងគ្រោងពង្រីកថែមទៀត ព្រោះសមត្ថភាពរបស់ខេត្តកំពង់ស្ពឺអាចផលិតបានលើស 500តោន នេះបើរាប់បញ្ចូលទាំងការផលិតតាមស្តង់ដា និងមិនតាមស្តង់ដា ប៉ុន្តែសមាគម ផ្តោតតែតួលេខផលិតរបស់កសិករដែលស្ថិតក្នុងសមាគមប៉ុណ្ណោះ។គួរបញ្ជាក់ថា កាលពីខែកុម្ភៈ ឆ្នាំ2016 ម្រេចកំពតក្លាយជាផលិតផលទី1 របស់កម្ពុជាដែលទទួលបាន វិញ្ញាបនបត្រផលិតផលសម្គាល់ភូមិសាស្រ្ត (GI) ពីសហគមន៍អឺរ៉ុប។ ក្នុងន័យថា រាល់ផលិតផលដែលបានដាក់លក់នៅអឺរ៉ុប គឺមានឈ្មោះថា ម្រេចកំពត ដែលមានប្រភពដើមនៅខេត្តកំពត និងខេត្តជាប់គ្នា គឺខេត្តកែប៕

April 11, 2019

ក្រុមបាល់ទះនារីសហរដ្ឋអាមេរិកឈ្នះជើងឯកបាល់ការប្រកួតទះឆ្នេរខ្សាច់ស្រាបៀអាន់ឆ័រលើកទី២នៅខេត្តបាត់ដំបង

បាត់ដំបង៖ក្រុមបាល់ទះនារីមកពីសហរដ្ឋអាមេរិក ដណ្តើមមេដាយមាសនៃព្រឹត្តិការណ៍ការប្រកួតបាល់ទះឆ្នេរខ្សាច់អន្តរជាតិស្រាបៀរអាន់ឆ័រលើកទី២ផ្នែកនារីនៅខេត្តបាត់ដំបង បន្ទាប់ពីក្រុមនេះបានយកឈ្នះក្រុមបាល់ទះនារីមកពីប្រទេសក្រិចដោយលទ្ធផល២សិតទល់០នៅវគ្គផ្តាច់ព្រ័ត្រនៅល្ងាចថ្ងៃទី ៧ ខែមេសា ឆ្នាំ២០១៩ នៅបរិវេណវាលបែកចាន ទីរួមខេត្តបាត់ដំបង។

ក្នុងឱកាសពិធីប្រគល់រង្វាន់ជូនក្រុមជយលាភីដោយមានការអញ្ជើញចូលរួមជាអធិបតីពីលោក ស សុខា រដ្ឋលេខាធិការនៃក្រសួងអប់រំ យុវជន និងកីឡា និងជាអនុប្រធានទី១នៃសហព័ន្ធកីឡាបាល់ទះកម្ពុជា លោក ងួន រតនៈ អភិបាលនៃគណៈអភិបាលខេត្តបាត់ដំបង លោក Chris Liu នាយកផ្នែកបច្ចេកទេស សហព័ន្ធកីឡាបាល់ទះអន្តរជាតិ (FI VB) លោក Moon Yoo នាយកផ្នែកទីផ្សារ នៃក្រុមហ៊ុនស្រាបៀរអាន់ឆ័រ អ្នកនាង Justina Vincent នាយកម៉ាកសញ្ញាស្រាបៀរអាន់ឆ័រ និងលោក ហ៊ុយ វុទ្ធី នាយកទំនាក់ទំនងកិច្ចការសហគ្រាស។
ក្រុមជើងឯកបានទៅលើក្រុមសហរដ្ឋអាមេរិក ឈ្នះមេដាយមាស និងប្រាក់រង្វាន់១០០០ដុល្លារ ក្រុមជើងឯករងបានទៅលើក្រុមប្រទេសក្រិចទទួលបានមេដាយប្រាក់ និងប្រាក់រង្វាន់៧០០ដុល្លារ និងក្រុមចំណាត់ថ្នាក់លេខ៣បានទៅលើក្រុមប្រទេសជប៉ុនបានត្រឹមមេដាយសំរឹទ្ធ និងប្រាក់រង្វាន់ ៥០០ដុល្លារ។ ក្រុមទទួលជ័យលាភីទាំងបីក្រុមនេះមានសិទ្ធិលេងសម្រាប់វគ្គផ្តាច់ព្រ័ត្រក្នុងក្របខណ្ឌ FI VB World Tour ក្នុងព្រឹត្តិការណ៍កីឡាអូឡាំពិក២០២០ ប្រទេសជប៉ុន ដើម្បីឈានរកទៅជើងឯកពិភពលោក។

ចំពោះព័ត៌មានលម្អិតអំពីព្រឹត្តិការណ៍កីឡាបាល់ទះឆ្នេរខ្សាច់អន្តរជាតិនេះ សូមចូលមើលទំព័រហេ្វសបុករបស់ស្រាបៀរអាន់ឆ័រ៖ https://www.facebook.com/AnchorBeerKH/។

ពិសាដោយការទទួលខុសត្រូវ៕

April 11, 2019

ត្រីមាសទី1 ចំណូលពីការលក់សំបុត្រចូលទស្សនាអង្គរវត្តបានធ្លាក់ចុះប្រមាណ 9.3ភាគរយ

ចំណូលពីការលក់សំបុត្រចូលទស្សនាប្រាសាទអង្គរវត្តបានធ្លាក់ចុះប្រមាណ 9.3ភាគរយក្នុងអំឡុងពេលត្រីមាសទី1 ឆ្នាំ2019នេះ ដែលគិតជាទឹកប្រាក់ប្រមាណជាជិត 36លានដុល្លារអាមេរិក។ តួលេខនេះបានបង្ហាញថា នេះគឺជាការធ្លាក់ចុះលើកដំបូងចាប់តាំងពីរដ្ឋាភិបាលគ្រប់គ្រងលើតម្លៃពីការលក់សំបុត្រចូលទស្សនារមណីដ្ឋានអង្គរវត្តកាលពីឆ្នាំ2016។

បើយោងតាមរបាយការណ៍ពីគ្រឹះស្ថានអង្គរ ក្នុងត្រីមាសទី1 (មករា-មីនា)ឆ្នាំនេះ ចំនួនភ្ញៀវទេសចរបរទេសទៅទស្សនាប្រាសាទអង្គរវត្តមានការធ្លាក់ចុះប្រមាណ 8.2ភាគរយ ដែលមានចំនួនត្រឹមតែ 787.900នាក់។ ដោយឡែកនៅខែមីនាកន្លងទៅ ការលក់សំបុត្រចូលទស្សនាអង្គរមានត្រឹមតែ 10.8លានដុល្លារអាមេរិក ថយចុះ 10.64ភាគរយ បើធៀបនឹងរយៈពេលដូចគ្នាកាលពីខែមីនា ឆ្នាំមុន ហើយ ភ្ញៀវទេសចរបរទេសមកទស្សនានៅខែមីនា មានចំនួនជាង 24ម៉ឺននាក់ ថយចុះ 9.24ភាគរយ។

ប្រធានសមាគមទីភ្នាក់ងារទេសចរណ៍កម្ពុជា (CATA) លោកស្រី ឆាយ ស៊ីវលីន បានឱ្យដឹងថា ការធ្លាក់ចុះនៃចំណូលតំបន់ទេសចរណ៍ប្រាសាទអង្គរវត្ត គឺដោយសារតែភ្ញៀវទេសចរដែលទៅទស្សនាអង្គរវត្តមានការធ្លាក់ចុះ បើធៀបជាមួយរយៈពេលមុនៗ មួយវិញទៀតទេសចរមួយចំនួនបានកាត់បន្ថយចូលការទស្សនាអង្គរវត្តពី 2 ទៅ 3ថ្ងៃមកនៅត្រឹម 1ថ្ងៃវិញ។

លោកស្រី ស៊ីវលីន បានមានប្រសាសន៍ទៀតថា ដោយសារកម្ពុជាបានធ្វើការផ្សព្វផ្សាយទិសដៅទេសចរណ៍ផ្សេងៗទៀត ទើបធ្វើឱ្យទេសចរបរទេសមួយចំនួនងាកទៅទស្សនាទីតាំងផ្សេងៗក្រៅពីប្រាសាទអង្គរ ដូចជាទៅក្បាលស្ពាន និងភ្នំគូលែន ជាដើម។

លោកស្រីបន្តថា៖“យើងគួរតែពង្រឹងគុណភាពសេវាកម្ម ស្ថាប័នសាធារណៈត្រូវចូលរួមពង្រឹងសេវាកម្ម និងផ្តល់ការសហការជាមួយដៃគូជាឯកជន បង្កើតសោភណភាពតាមរមណីយដ្ឋានវប្បធម៌មួយចំនួនទៅលើសម្រស់បេតិកភណ្ឌ យើងចង់បានភាពស្រស់ស្អាត សួនបៃតង និងបន្ថែមរមណីយដ្ឋានកែច្នៃបន្ថែមទៀត ក៏ដូចជារមណីយដ្ឋានត្រូវបង្កើនឱ្យអស់សក្តានុពលដើម្បីទាក់ទាញភ្ញៀវទេសចរ”។

គួរបញ្ជាក់ថា នៅឆ្នាំ2018 គ្រឹះស្ថានអង្គរបានប្រកាសពីតម្លៃថ្មីសម្រាប់ជនបរទេសចូលទស្សនាអង្គរវត្ត ដោយបានដំឡើងថ្លៃពី 20ដុល្លារ ទៅ 37ដុល្លារអាមេរិកសម្រាប់រយៈពេល 1ថ្ងៃ។ ពី 40ដុល្លារ ទៅ 62ដុល្លារសម្រាប់រយៈពេល 3ថ្ងៃ និង 60ដុល្លារ ទៅ 72ដុល្លារសម្រាប់រយៈពេល 7ថ្ងៃ។ ដោយឡែកកាល ពីឆ្នាំមុនដដែល អង្គរវត្តអាចរកចំណូលបានជាង 116លានដុល្លារអាមេរិក ដែលមានកំណើន 8ភាគរយជារៀងរាល់ឆ្នាំ។

បើយោងតាមក្រសួងទេសចរណ៍ កម្ពុជាទទួលបានភ្ញៀវបរទេសមកទស្សនាប្រមាណជា 1.2លាននាក់ ក្នុងអំឡុងពេល 2ខែឆ្នាំនេះ កើនប្រមាណជា10ភាគរយ។ ដោយឡែកនៅឆ្នាំ2018 ភ្ញៀវបរទេសមកទស្សនាកម្ពុជាមានប្រមាណជា 6.2លាននាក់ កើនឡើង 11ភាគរយ ដែលអាចបង្កើតប្រាក់ចំណូល បានជាង 4.3ប៊ីលានដុល្លារអាមេរិកចាក់ចូលទៅក្នុងសេដ្ឋកិច្ចកម្ពុជា ដូចនេះរដ្ឋាភិបាលបានដាក់គោលដៅក្នុងការទាក់ទាញភ្ញៀវទេសចរបរទេសឱ្យបាន 6.6លាននាក់នៅឆ្នាំនេះ និង 7លាននាក់នៅឆ្នាំ2020។

គួររំឭកផងដែរថា ដោយឡែក គម្រោងជួសជុលស្ពានហាលនៅពីមុខប្រាសាទអង្គរវត្ត នឹងត្រូវបញ្ចប់ក្នុងឆ្នាំ2020ខាងមុខនេះ ហើយស្ពានហាលនេះអាចនឹងដាក់ដំណើរការជូនទេសចរជាតិ និងអន្តរជាតិឡើងវិញ។

គម្រោងជុសជុលស្ពានហាលនៅពីមុខប្រាសាទអង្គរត្រូវបានធ្វើឡើងក្រោមជំនួយរបស់រដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុន ហៅកាត់ថា JICA ក្នុងទឹកប្រាក់ប្រមាណ 80ម៉ឺនដុល្លារអាមេរិក។ ការជួសជុលស្ពានហាល គឺធ្វើឡើងតែម្ខាងប៉ុណ្ណោះ ដែលមានប្រវែងជាង 100ម៉ែត្រ។

លោក អន សុភាព ប្រធានគម្រោងជុសជុលស្ពានហាល ប្រាសាទអង្គរវត្ត បានឱ្យដឹងថា អាជ្ញាធរអប្សរា បានចុះហត្ថលេខាលើអនុស្សរណៈយោគយល់គ្នា (MOU)ជាមួយជប៉ុនដើម្បីធ្វើការជួសជុលស្ពានហាលចាប់ពីឆ្នាំ2016 មក ហើយគ្រោងនឹងបញ្ចប់នៅឆ្នាំ2020។ លោកថ្លែងថា ស្ពានហាលនេះ ចំណាយពេលច្រើនទៅលើផ្នែកបុរាណវិទ្យា ដើម្បីស្វែងយល់ពីរចនាសម្ព័ន្ធខាងក្នុងស្ពាន វត្តថ្មដី ដែលការសិក្សាស្រាវជ្រាវនេះចំណាយពេលជិត 1ឆ្នាំ ដោយឡែកនៅដើមឆ្នាំ2018 យើងបានចាប់ផ្តើមជួសជុល ចាក់បេតុង យើងនឹងប្រឹងប្រែងបញ្ចប់ឱ្យបាននៅឆ្នាំ2020 តាមផែនការកំណត់។

លោកបន្តថា បើតាមអ្នកជំនាញជប៉ុន បេតុងដែលអ្នកជំនាញជប៉ុនចាក់ធ្វើជាគ្រឹះស្ពាននោះ អាចមានអាយុកាលប្រមាណជា 500 ទៅ 600ឆ្នាំ។

លោកសុភាពថ្លែងថា៖ “មួយផ្នែកធំនៃស្ពាននេះត្រូវបានបារាំងជួសជុលនៅឆ្នាំ1960 ដល់1966 ខណៈដែលមួយផ្នែកទៀតត្រូវបានជួសជុលពីឆ្នាំ1996 ដល់2007 ហើយគម្រោងនេះបានសម្រាក រហូតដល់2016 ទើបចាប់ផ្តើមធ្វើឡើងវិញ។ លោកបន្តថា ប្រវែងនៅសល់ប្រមាណជា 110ម៉ែត្រក្នុងចំណោម 200ម៉ែត្រ ដែលយើងបានធ្វើរួចរាល់ 90ម៉ែត្រហើយ។ ស្ពានហាល អាចនឹងដាក់ដំណើរការជូនភ្ញៀវទេសចរជាតិ និងអន្តរជាតិឡើងវិញ”៕

April 11, 2019

វិស័យធនាគារ និងផ្សារមូលបត្រ រួមគ្នាលើកទឹកចិត្តក្រុមហ៊ុនចុះបញ្ជីទទួលបានប្រាក់កម្ចីការប្រាក់ទាប

ធនាគារវិនិយោគ និងអភិវឌ្ឍន៍កម្ពុជា និងធនាគារកាណាឌីយ៉ា ភីអិលស៊ី ដែលជាភ្នាក់ងារទូទាត់សាច់ប្រាក់ក្នុងប្រតិបត្ដិការនៅក្នុងប្រទេសកម្ពុជាបានបើកដំណើរការសេវាថ្មីសម្រាប់ក្រុមហ៊ុនដែលបានចុះបញ្ជីនៅក្នុងផ្សារមូលបត្រកម្ពុជា (ផ. ម. ក) the Cambodia Securities Exchange CSX ដើម្បីទាក់ទាញក្រុមហ៊ុនជាច្រើនឱ្យចូលរួមជាមួយ CSX នៅក្នុងការដេញថ្លៃ ធនាគារក៏នឹងត្រូវបានផ្តល់ប្រាក់កម្ចី និងគណនីបញ្ញើមានកាលកំណត់ ជាមួយអត្រាការប្រាក់ពិសេស។ សេវាថ្មីនេះ ត្រូវបានប្រកាសនៅផ្សារហ៊ុនកម្ពុជា។

ឯកឧត្តម ស៊ូ សុជាតិ អគ្គនាយកគណៈកម្មការមូលបត្រ the Securities and ExchangeCommission of Cambodia SECC បានមានប្រសាសន៍នៅក្នុងព្រឹត្តិការណ៍នេះថា៖“ប្រសិនបើ ក្រុមហ៊ុនចុះបញ្ជីចង់បង្កើនដើមទុន ពួកគេត្រូវបង្កើនដើមទុនតាមរយៈការចេញបណ្ណភាគហ៊ុន ឬស្នើសុំភ្នាក់ងារទូទាត់សាច់ប្រាក់សម្រាប់ប្រាក់កម្ចីដែលមានអត្រាការប្រាក់ពិសេស”។

ឯកឧត្តមបានឱ្យដឹងថា៖“សេវាកម្មថ្មីនេះនឹងលើកទឹកចិត្តឱ្យក្រុមហ៊ុនជាច្រើនចូលរួមជាមួយ CSX ហើយក្រុមហ៊ុនចុះបញ្ជីត្រូវតែបំពេញតាមតម្រូវការដ៏តឹងរ៉ឹងរបស់ SECC បើមិនដូច្នោះទំនងជាមិនទទួលបានប្រាក់កម្ចីទេ។ ក្រុមហ៊ុនចុះបញ្ជីត្រូវតែបំពេញតាមតម្រូវការរបស់ SECC ទាក់ទងនឹងតម្លាភាពគណនេយ្យភាព អភិបាលកិច្ចល្អ និងការគ្រប់គ្រងល្អ។ ក្រុមហ៊ុនទាំងនេះ គឺជាអតិថិជនដ៏ល្អសម្រាប់ធនាគារ ដូច្នេះវាសមហេតុផលដែលពួក-គេអាចទទួលបានការគាំទ្រផ្នែកហិរញ្ញវត្ថុដោយមានលក្ខខណ្ឌពិសេស”។

ឯកឧត្តម ហុង សុហួរ អគ្គនាយកក្រុមហ៊ុនផ្សារមូលបត្រកម្ពុជាមានប្រសាសន៍ថា នៅពេលខាងមុខនេះយើងនឹងមានធនាគារច្រើនទៀត ដែលខ្លះជាភ្នាក់ងារទូទាត់សាច់ប្រាក់ពាក់ព័ន្ធនឹងមូលបត្រ និងខ្លះទៀតមិនពាក់ព័ន្ធដែលនឹងឯកភាពផ្តល់ជាការលើកទឹកចិត្ត។ ដូចនេះក្រុមហ៊ុនចុះបញ្ជីមានជម្រើសកាន់តែច្រើនក្នុងការសម្រេចចិត្តទទួលសេវាកម្មរបស់ធនាគារ។ បើតាមឯកឧត្តមអគ្គនាយក សេចក្តីថ្លែងការណ៍រួមស្តីពីការលើកទឹកចិត្តដល់ក្រុមហ៊ុនចុះបញ្ជីនៅផ្សារមូលបត្រកម្ពុជាពីភ្នាក់ងារទូទាត់សាច់ប្រាក់ពាក់ព័ន្ធនឹងមូលបត្រ បានបញ្ជាក់ឱ្យឃើញកាន់តែច្បាស់ពីភាពបំពេញឱ្យគ្នាទៅវិញទៅមកនៃវិស័យធនាគារ និងវិស័យមូលបត្រ ដែលកន្លងមកតែងតែមានការយល់ច្រឡំថា វិស័យទាំង2 នេះមានការប្រកួតប្រជែងគ្នា។

លោក Jong Weon Han អនុប្រធានរបស់ CSX បានឱ្យដឹងថា សេវាថ្មីនេះបង្កើតការរួមបញ្ចូលគ្នារវាងវិស័យធនាគារ និងមូលបត្រ។ លោក Weon Han បានថ្លែងថា៖“ការលើកទឹកចិត្តបានបង្ហាញថា វិស័យធនាគារ និងវិស័យមូលបត្រអាចបំពេញឱ្យគ្នាទៅវិញទៅមក ហើយក្រុមហ៊ុនចុះបញ្ជីនឹងមិនត្រឹមតែទទួលបានការទុកចិត្តពីវិនិយោគិនប៉ុណ្ណោះទេ តែថែមទាំងពង្រឹងទំនុកចិត្ត និងកិច្ចសហប្រតិបត្តិការជាមួយដៃគូរបស់ខ្លួនទៀតផង”។

លោក Raymond Sai Say Guan អគ្គនាយកធនាគារកាណាឌីយ៉ាថ្លែងថា កំណើនសេដ្ឋកិច្ច ដ៏រឹងមាំរបស់ប្រទេសកម្ពុជាឆ្លុះបញ្ចាំងពីទំនុកចិត្ត និងស្ថិរភាពអាជីវកម្មដ៏រឹងមាំនៅក្នុងប្រទេស ដោយលោកបានបន្ថែមថា ក្រុមហ៊ុនជាច្រើនទំនងជានឹងចូលរួមជាមួយ CSX នាពេលអនាគត។

លោក Guan បានមានប្រសាសន៍ថា៖“ធនាគារកាណាឌីយ៉ាមានសេចក្តីរីករាយក្នុងការសហការជាមួយគណៈកម្មការមូលបត្រកម្ពុជា ក៏ដូចជាផ្សារហ៊ុនកម្ពុជាដើម្បីគាំទ្រតម្រូវការហិរញ្ញវត្ថុ និង ធនាគាររបស់ក្រុមហ៊ុនចុះបញ្ជី និងការរីកចម្រើននៃទីផ្សារមូលបត្រ”។

លោកបានបន្ថែមថា ធនាគារអេស៊ីលីដាដែលជាភ្នាក់ងារទូទាត់សាច់ប្រាក់នៅកម្ពុជានឹងចាប់ផ្តើមផ្តល់សេវាស្រដៀងគ្នានេះក្នុងពេលឆាប់ៗនេះ។ លោកបន្ថែមថា ធនាគារ 2 បន្ថែមទៀតនឹងទទួលបានអាជ្ញាប័ណ្ណភ្នាក់ងារទូទាត់សាច់ប្រាក់ក្នុងឆ្នាំនេះ ព្រោះថា សេវាទាំងនេះផ្តល់ឱកាសដល់ក្រុមហ៊ុនដែលស្វែងរកមូលធនសម្រាប់រយៈពេលខ្លី ឬរយៈពេលវែងដើម្បីទទួលបានអត្រាការប្រាក់ទាបជាងក្រុមហ៊ុនមិនចុះបញ្ជី។

លោក ស៊ូ សុជាតិ អគ្គនាយកគណៈកម្មការមូលបត្រកម្ពុជា បញ្ជាក់ថា “ទីផ្សារមូលបត្របង្កើននូវទំនុកចិត្តអនុញ្ញាតឱ្យទីផ្សារធនាគារកាន់តែមានភាពរឹងមាំ។ ទីផ្សារធនាគារវិញ ប្រសិនបើកម្ចីថយ ការដាក់ប្រាក់បញ្ញើវានឹងថយដោយខ្លួនឯង ដូច្នេះការបង្កើនកម្ចី និងការដាក់ប្រាក់បញ្ញើ គឺជាចំណុចដែលធ្វើឱ្យធនាគារកាន់តែរឹងមាំ។ ដូចនេះជាចំណុចមួយ វាមានទំនាក់ទំនងរវាងគ្នាទៅវិញទៅមកជាមួយវិស័យមូលបត្រ”។

អគ្គនាយកគណៈកម្មការមូលបត្រកម្ពុជាបានលើកឡើងថា៖“អ្វីដែលជាគោលបំណងរបស់រាជរដ្ឋាភិបាលដែលបង្កើតទីផ្សារមូលធនឡើង គឺដើម្បីផ្តល់ជម្រើសបន្ថែម យើងមិនមែនបង្កើតឱ្យមានការប្រកួតប្រជែងគ្នាទេ។ យើងបង្កើតនូវជម្រើសបន្ថែមដើម្បីឱ្យក្រុមហ៊ុននានាអាចរកហិរញ្ញប្បទានពីទីផ្សារមូលបត្រ និងពីយន្តការដែលមានស្រាប់”។ លោកបញ្ជាក់ថា៖“នៅលើសកលលោកនេះមិនដែលមានទីផ្សារតែម្ខាងនោះទេ គឺមានទីផ្សារ2 ហើយខ្ញុំក៏មិនទាន់ឃើញទីផ្សារមូលបត្ររីកចម្រើន ហើយទីផ្សារធនាគារដួលរលំដែរ។ ខ្ញុំធ្លាប់ឃើញតែទីផ្សារមូលបត្រកាន់តែរឹងមាំ ធនាគារគឺកាន់តែខ្លាំង”។

ឯកឧត្តម ហុង សុហួរ បញ្ជាក់ថា “វិស័យធនាគារដែលរីកចម្រើននឹងនាំឱ្យវិស័យមូលបត្រអាចរីកចម្រើន ពីព្រោះគ្រឹះស្ថានធនាគារមានប្រាក់ចំណេញច្រើននឹងទទួលបានការចាប់អារម្មណ៍ពីអ្នកវិនិយោគភាគហ៊ុន។ បញ្ច្រាស់មកវិញ ពេលដែលវិស័យមូលបត្ររីកចម្រើននោះ ធនាគារអាចផ្តល់កម្ចីកាន់តែច្រើនជាងមុន គុណភាពកម្ចីកាន់តែល្អជាងមុន ហើយធនាគារកាន់តែមានជម្រើសបង្កើតចំណូលបានច្រើនជាងមុន”។

ឯកឧត្តមបន្តថា ការផ្តល់ជូននូវអត្រាការប្រាក់ពិសេសនេះ គឺជាអត្ថប្រយោជន៍មួយក្នុងអត្ថប្រយោជន៍ជាច្រើនផ្សេងទៀតដែលមាន ដូចជាការអនុគ្រោះបំណុលពន្ធ ការកាត់បន្ថយពន្ធលើប្រាក់ចំណេញ50% រយៈពេល 3ឆ្នាំ ការទទួលបានហិរញ្ញប្បទានរយៈពេលវែងមិនមែនជាបំណុល ការទទួលបានការទទួលស្គាល់កាន់តែច្រើនឡើង សមត្ថភាពប្រកួតប្រជែងល្អជាងមុន។

យោងតាមសេចក្តីប្រកាសព័ត៌មាន គណៈកម្មការមូលបត្រកម្ពុជាបានបង្ហាញថា មកដល់បច្ចុប្បន្ននេះ គណៈកម្មការមូលបត្រកម្ពុជាមានក្រុមហ៊ុនចុះបញ្ជីមូលបត្រកម្មសិទ្ធិចំនួន5 ដែលមានមូលបត្រទីផ្សារប្រមាណជាង 2.13ទ្រីលានរៀល ឬស្មើប្រមាណ 534.34លានដុល្លារអាមេរិក ប្រៀបធៀបនឹងចុងឆ្នាំ2018 មូលធនទីផ្សារមានប្រមាណ 1.21ទ្រីលានរៀល ស្មើប្រមាណ 304.76លានដុល្លារអាមេរិក៕

April 11, 2019

អ្នកជំនាញបង្ហាញពីមូលហេតុ និងប្រភេទសហគ្រាសដែលគួរធ្វើសវនកម្មនៅកម្ពុជា

សហគ្រាសជាច្រើននៅប្រទេសកម្ពុជាមានការរីកចម្រើនគួរឱ្យកត់សម្គាល់ទាំងទំហំ ទ្រព្យសកម្ម និងចំនួនបុគ្គលិកជាដើម។ ស្ថានភាពនេះតម្រូវឱ្យម្ចាស់សហគ្រាសទាំងនោះចាំបាច់ត្រូវព្យាយាមស្វែងយល់ឱ្យបានកាន់តែច្បាស់ពីចំណុចសំខាន់ៗ ដែលគួរអនុវត្តដើម្បីឱ្យសហគ្រាសរបស់ខ្លួនស្របទៅតាមលក្ខខណ្ឌច្បាប់គណនេយ្យ សវកម្ម និងពន្ធដារជាដើម។

នៅថ្ងៃនេះឡារ៉ែនពាណិជ្ជបានមកជួបសម្ភាសជាមួយលោក សាន្ត ចន្ទកុម្ភៈ នាយកក្រុមហ៊ុន Apollo Investment & Consulting Co., Ltd. ដែលជាគណនេយ្យករជំនាញ និងសវនករអាជីព ដើម្បីចែករំលែកចំណេះដឹងលម្អិតពីសវនកម្មនៅកម្ពុជា។

តើសវនកម្មមានប៉ុន្មានប្រភេទដែរ?
មែនទែនទៅ សវនកម្មមានច្រើនប្រភេទ។ សវនកម្ម មានដូចជាសវនកម្មទៅលើគុណភាព សវនកម្មផ្ទៃក្នុង សវនកម្មហិរញ្ញវត្ថុ និងសវនកម្មពន្ធដារ ជាដើម ហើយជាទូទៅម្ចាស់សហគ្រាសធុនមធ្យម និងធុនធំតម្រូវឱ្យធ្វើសវនកម្មហិរញ្ញវត្ថុជាទៀងទាត់។ សហគ្រាសទាំងនោះក៏អាចនឹងត្រូវបានធ្វើសវកម្មពន្ធដារដោយមន្ត្រីពន្ធដារផងដែរ។

តើលោកអាចពន្យល់បានទេថា អ្វីទៅជាសវនកម្មហិរញ្ញវត្ថុ និងសវនកម្មពន្ធដារ?
សវនកម្មហិរញ្ញវត្ថុនិយាយឱ្យសាមញ្ញ គឺជាការធ្វើការងារទៅលើការពិនិត្យរបាយការណ៍ហិរញ្ញវត្ថុរបស់សហគ្រាស ឬអង្គភាពនោះដើម្បីធានាដោយសមហេតុសមផលថា របាយការណ៍នោះត្រឹមត្រូវអាចយកជាការបានដោយគ្មានកំហុស ឬការកេងបន្លំជាដើម។ ការងារដែលបានធ្វើលើរឿងនេះ គឺមិនមែនមានន័យថា ឱ្យតែធ្វើ គឺដឹងតែធានា100%ថា របាយការណ៍នោះត្រឹមត្រូវ100%នោះទេដោយសារតែហានិភ័យវិជ្ជាជីវៈ និងការលាក់ព័ត៌មានសម្ងាត់ជាដើម។ ចំណែកសវនកម្មពន្ធដារ គឺធ្វើឡើងតាមការកំណត់របស់មន្ត្រីពន្ធដារដើម្បីធានាថា ការបង់ពន្ធរបស់សហគ្រាសនោះត្រឹមត្រូវ និងមិនមានការកេងបន្លំពន្ធដារជាដើម។

តើសហគ្រាសប្រភេទណាដែលគេតម្រូវឱ្យធ្វើសវនកម្មហិរញ្ញវត្ថុ និងសវនកម្មពន្ធដារ?
ចំពោះសវនកម្មហិរញ្ញវត្ថុ សហគ្រាសនីមួយៗអាចធ្វើវាដោយគោលការណ៍ស្ម័គ្រចិត្ត ឬតម្រូវដោយភាគហ៊ុនិកជារៀងរាល់ឆ្នាំ។ លើសពីនេះទៅទៀត បើតាមច្បាប់កំណត់ រាល់សហគ្រាសណាដែលមានលក្ខខណ្ឌ2 ក្នុងចំណោមលក្ខខណ្ឌ3 សំខាន់ៗមួយចំនួន ដូចជា៖
1. សហគ្រាសដែលមានផលរបរចាប់ពី 3.000.000.000រៀល។
2. ទ្រព្យសកម្មសរុបចាប់ពី 2.000.000.000រៀល។
3. មានបុគ្គលិកច្រើនជាង 100នាក់ឡើងទៅ។

សហគ្រាសនោះចាំបាច់តម្រូវឱ្យធ្វើសវនកម្មហិរញ្ញវត្ថុ។ ហើយគ្រប់ក្រុមហ៊ុនដែលមានសិទ្ធិធ្វើសវនកម្មទៅលើសហគ្រាសទាំងនេះ ត្រូវទទួលស្គាល់ដោយវិទ្យាស្ថានគណនេយ្យករជំនាញ និងសវនករ (KICPAA) និងក្រុមប្រឹក្សាជាតិគណនេយ្យ។

ចំពោះសវនកម្មពន្ធដារវិញមានលក្ខណៈសំខាន់ៗមួយចំនួនដូចជា សវនកម្មពេញលេញ (Comprehensive Audit) សវនកម្មមានកម្រិត (Limited Audit) ឬសវនកម្មនៅនឹងកន្លែងពន្ធដារជាដើម (Desk Audit)។ ការធ្វើសវនកម្មទាំងនេះ គឺជាសិទ្ធិផ្តាច់មុខរបស់អគ្គនាយកដ្ឋានពន្ធដារ និងសាខាពន្ធដារតាមខណ្ឌ ឬខេត្តនីមួយៗ តែសហគ្រាសនីមួយៗក៏មានសិទ្ធិស្នើឱ្យមានការធ្វើសវនកម្មទាំងនេះផងដែរ។

ក្នុងនោះសវនកម្មពេញលេញមានន័យថា ជាការរៀបចំត្រួតពិនិត្យនូវគ្រប់ផ្នែកទាំងអស់របស់របាយការណ៍ហិរញ្ញវត្ថុ។ ហើយបច្ចុប្បន្ននេះអ្នកដែលធ្វើការត្រួតពិនិត្យភាគច្រើនលើប្រភេទសវនកម្មនេះ គឺសវនករពន្ធដារដែលមកពីអគ្គនាយកដ្ឋានពន្ធដារដែលធ្វើកិច្ចការនេះ។ ចំណែកឯសវនកម្មមានកម្រិត និងសវនកម្មនៅនឹងកន្លែង គឺភាគច្រើនត្រូវបានធ្វើឡើងដោយសវនករពន្ធដារនៅតាមខណ្ឌ និងខេត្តនីមួយៗ។

តើការធ្វើសវនកម្មហិរញ្ញវត្ថុមានប្រយោជន៍អ្វីខ្លះចំពោះសហគ្រាស?
ការធ្វើសវនកម្មហិរញ្ញវត្ថុមានប្រយោជន៍ច្រើនណាស់ចំពោះសហគ្រាសដូចជា ទី1 គឺវាអាចជួយពង្រឹងតម្លាភាពហិរញ្ញវត្ថុ ព្រោះសហគ្រាសដែលត្រួវបានគេធ្វើសវនកម្មហិរញ្ញវត្ថុច្រើនតែមានប្រព័ន្ធគ្រប់គ្រងហិរញ្ញវត្ថុរឹងមាំ ដូច្នេះហើយក្រុមហ៊ុនអាចមានភាគហ៊ុនិកច្រើន តែសមាជិកម្នាក់ៗអាចមានទំនុកចិត្តខ្ពស់លើសហគ្រាសនោះ ដែលជាកត្តាធ្វើឱ្យកាត់បន្ថយជម្លោះ និងមានការអភិវឌ្ឍបានលឿន។ ម្យ៉ាងវិញទៀតសវនករអាជីពអាចនឹងផ្តល់អនុសាសន៍ល្អៗដើម្បីជួយកែលម្អចំណុចខ្វះខាតជាដើម ដែលវាអាចធ្វើឱ្យយើងមើលឃើញកាន់តែច្បាស់ពីចំណុចគួរកែលម្អក្នុងការគ្រប់គ្រងហិរញ្ញវត្ថុរបស់ស្ថាប័ន។ រឿងពិសេសមួយទៀតគឺអាចគេចផុតពីបញ្ហាបង់ពន្ធខុស ឬប្រកាសពន្ធខុសជាដើម។

ចំណុចសំខាន់ទី2 គឺអាចបង្កើនតម្លៃរបស់សហគ្រាសនោះ ព្រោះមិនថាពេលដែលសហគ្រាសនោះចង់ខ្ចីលុយបន្ថែម ឬពេលដែលសហគ្រាសនោះចង់រកទុនវិនិយោគបន្ថែមនោះ សហគ្រាសដែលមានរបាយការណ៍សវនកម្មហិរញ្ញវត្ថុច្បាស់លាស់ ភាគច្រើនអាចទទួលបានកម្ចីដែលមានការប្រាក់ទាប។ អ្នកវិនិយោគច្រើនតែឱ្យតម្លៃដល់សហគ្រាសដែលមានរបាយការណ៍សវនកម្មហិរញ្ញវត្ថុ និងផ្តល់តម្លៃខ្ពស់ជាងសហគ្រាសធម្មតា និងចំណុចសំខាន់ចុងក្រោយ គឺកសាងទំនុកចិត្តរវាងអ្នកគ្រប់គ្រង ព្រោះថា ប្រសិនជារបាយការណ៍ហិរញ្ញវត្ថុត្រូវបានធ្វើសវនកម្ម និងទទួលបានលទ្ធផលត្រឹមត្រូវ និងគួរឱ្យទុកចិត្តបាន ម្ចាស់សហគ្រាស និងអ្នកគ្រប់គ្រងសហគ្រាសនោះក៏នឹងមានទំនុកចិត្តចំពោះគ្នាផងដែរ ដែលវាអាចធ្វើឱ្យអាជីវកម្មទទួលបានលទ្ធផលវិជ្ជមានជាប់ជាប្រចាំ៕

April 10, 2019

Author: ធឿន មករា