ធឿន មករា - La Reine Media

ផ្លែល្ហុង មានតម្រូវការទីផ្សារខ្ពស់ តែកសិករពុំទាន់ផលិតបានគ្រប់តាមតម្រូវការ

ល្ហុងជារុក្ខជាតិមួយប្រភេទដែលងាយស្រួលដាំ ដោយសារតែវាលូតលាស់លឿន និងឆាប់ឱ្យផល តែក៏មិនស្រួលក្នុងការថែទាំប៉ុន្មានដែរ ទាល់តែមានបទពិសោធល្មមគួរសម ទើបដាំបានផលល្អ ដោយអាស្រ័យទៅតាមប្រភេទពូជ និងបច្ចេកទេសដាំដុះ។ ល្ហុងជាដំណាំដែលមានអាយុវែងគួរសម ជាទូទៅដំណាំនេះមានកម្ពស់ពី 1.5 ទៅ 2ម៉ែត្រ។

ដំណាំល្ហុងត្រូវបានប្រជាពលរដ្ឋចូលចិត្តដាំនៅគ្រប់ខេត្តក្រុងនៃប្រទេសកម្ពុជា ដោយសារតែវាអាចដុះឡើង និងរស់បាននៅលើដីក្នុងតំបន់ដែលមានសីតុណ្ហភាពមធ្យមពី 22 ទៅ 28អង្សាសេ។ ដោយឡែកដំណាំយុទ្ធសាស្រ្តមួយនេះកំពុងត្រូវបានប្រជាពលរដ្ឋសហគមន៍សំបូរមានជ័យដំាដុះដើម្បីយកផលបំពេញតម្រូវការទីផ្សារ។

លោក ប៊ួយ ចេង អនុប្រធានសហគមន៍ សំបូរមានជ័យ ស្រុកស្ទឹងត្រង់ ខេត្តកំពង់ចាមបានប្រាប់កាសែតឡារ៉ែនពាណិជ្ជថា៖“សហគមន៍របស់ខ្ញុំមិនមែនមានដាំតែដំណាំមួយមុខទេ យើងនៅមានដាំបន្លែបន្ទាប់បន្សំទៀតជាច្រើន ដូចជាប៉េងប៉ោះខ្មែរម្ទេស ម្ទេសប្លោក ត្រប់ស្រួយ ចេក ម្នាស់ ផ្កាខាត់ណាខ្ទឹមបារាំង ក្រូចឆ្មារ និងស្លឹកគ្រៃផងដែរ។ ចំណែកដំណាំល្ហុងនេះសហគមន៍យើងបានដាំនៅលើផ្ទៃដីប្រមាណជា 4ហិកតា”។

លោក ចេង បានមានប្រសាសន៍ថា ចំពោះការដាំដុះវិញ មុននឹងយកទៅដាក់ដាំក្នុងចម្ការ គេត្រូវយកគ្រាប់ពូជវាទៅបណ្ដុះសិន។ ត្រូវយកដីដែលមានជីជាតិល្អច្រកចូលក្នុងថង់ប្លាស្ទិកខ្មៅដែលត្រៀមរួចជាស្រេច បន្ទាប់មកយកគ្រាប់ពូជល្ហុងទៅត្រាំទឹករយៈពេល 2ថ្ងៃ និងផ្អាប់ទុករយៈពេល 7ថ្ងៃ (ឱ្យដុះពន្លកសៗឡើង) ទើបយកទៅដាក់ដាំបន្តនៅក្នុងថង់ពី 3-4គ្រាប់ ក្នុង1ថង់។ ក្រោយពីដាក់គ្រាប់បណ្ដុះហើយ គេត្រូវស្រោចទឹកវាឱ្យជោករៀងរាល់ថ្ងៃ ដើម្បីឱ្យកូនល្ហុងលូតលាស់បានល្អឡើង។ ចំពោះថ្នាលបណ្ដុះកូនវិញ គេត្រូវធ្វើរោងប្រក់សំណាញ់ដើម្បីជាម្លប់កុំឱ្យកូនល្ហុងត្រូវពន្លឺថ្ងៃខ្លាំងពេក។

ចំណែកឯការរៀបចំដីសម្រាប់ដាក់ដាំវិញ គេត្រូវភ្ជួរដីហាលចោលចំនួន 3-4លើក ដោយចន្លោះពី 1លើកទៅ 1លើកមានរយៈពេល 10ថ្ងៃ ដោយដាក់ជីលាមកសត្វផងដែរ។ ក្រោយពីភ្ជួរ និងរាស់ហាលដីរួចហើយ គេត្រូវលើកជារងដែលមានទទឹង 1.5ម៉ែត្រ បណ្ដោយទៅតាមស្ថានភាពដី។ នៅលើរង គេត្រូវជីករណ្ដៅជាជួរ ដោយរណ្ដៅនីមួយៗទំហំ 3តឹក 4ជ្រុង និងជម្រៅ3តឹក ដោយទុកគម្លាតពីរណ្ដៅមួយ ទៅមួយចម្ងាយ 2.5ម៉ែត្រ។ នៅក្នុងរណ្ដៅនីមួយៗ គេត្រូវដាក់ជីលាមកសត្វពុកផុយច្របល់ជាមួយដីឱ្យសព្វ។

នៅពេលដើមល្ហុងនៅតូច គេត្រូវស្រោចទឹក 1ថ្ងៃ 1ដង ដោយប្រើទុយោបាញ់ទៅលើស្លឹកដើម្បីឱ្យវាហូរធ្លាក់មកក្រោម រហូតដល់ដើមល្ហុងធំពេញវ័យ ចេញផ្កា គេត្រូវបញ្ចូលទឹកនៅតាមចន្លោះរងរៀងរាល់ 3ថ្ងៃម្តងលៃយ៉ាងណាកុំឱ្យដីស្ងួតពេក ឬក៏សើមជ្រុលពេក។

ក្រោយពេលដាំបានរយៈពេល 5ខែ យើងអាចប្រមូលផលផ្លែល្ហុងចាស់ៗលក់បានហើយ។ ការបេះត្រូវបានគេធ្វើឡើងជាបន្តបន្ទាប់ក្នុងរយៈពេល 6ខែ ទៅ1ឆ្នាំ។ ក្រោយពីប្រមូលផលឆ្នាំទី1 និងឆ្នាំទី2 រហូតដល់ដើមល្ហុងលែងសូវចេញផ្លែហើយ ទើបគេអាចកាប់ដើមចាស់ចោល និងដាំថ្មីឡើងវិញ។ ជាសរុបនៅពេលដើមល្ហុងផ្តល់ផ្លែពេញលេញ សហគមន៍អាចបេះយកទៅលក់បានប្រមាណពី 2 ទៅ3តោនក្នុង1ថ្ងៃនៅពេលដែលវាចាប់ផ្តើមផ្តល់ផល។

លោក ប៊ួយ ចេង បានឱ្យដឹងថា សហគមន៍លោកមានចម្ការល្ហុងនៅលើផ្ទៃដីដាំដុះចំនួន 4ហិកតា ស្មើដើមល្ហុងចំនួនជាង 2,000ដើមស្ថិតក្នុងភូមិសំបូរ ឃុំសូភាស ស្រុកស្ទឹងត្រង់។ បច្ចុប្បន្នចំពោះផ្ទៃដី 4ហិកតាដែលដាំដើមល្ហុងនេះ លោកអាចរកប្រាក់ចំណូលបានប្រមាណជិត 2ម៉ឺនដុល្លារសហរដ្ឋអាមេរិកក្នុង 1ឆ្នាំ។

ដោយឡែករឿងតម្លៃនៅលើទីផ្សារវិញ លោក ប៊ួយ ចេង បានប្រាប់កាសែតឡារ៉ែនពាណិជ្ជថា៖ “ល្ហុង គឺជាបន្លែដែលមានតម្លៃមិនសូវជាថ្លៃប៉ុន្មានទេ ដោយលក់ចេញក្នុង 1គីឡូបានតម្លៃចន្លោះពី1,000 ទៅ 1,200រៀលសម្រាប់ផ្លែល្ហុងខ្ចី(យកទៅធ្វើជាបន្លែស្លស្លុក) និង 1,200រៀល ទៅ 1,500រៀល សម្រាប់ផ្លែល្ហុងទុំ(យកទៅធ្វើជាបង្អែម)។ លោកបានបញ្ជាក់ថា នេះជាតម្លៃនាពេលបច្ចុប្បន្នដែលឡើងថ្លៃបានបន្តិចមកវិញ បើពីមុនវិញ យើងអាចលក់បានត្រឹមតែ 400រៀលប៉ុណ្ណោះ ក្នុង 1គីឡូក្រាម តែនៅឆ្នាំនេះយើងអាចលក់បានរាងថ្លៃបន្តិចវិញហើយ”។

លោក ប៊ួយ ចេង បានឱ្យដឹងដែរថា៖“ក្នុងពេលថ្មីៗនេះមានការផ្ទុះឡើងនូវបន្លែមានជាតិគីមី ដែលនាំចូលមកពីប្រទេសជិតខាង ទើបប្រជាពលរដ្ឋខ្មែរបានងាកមករកបន្លែក្នុងស្រុក ហើយតម្លៃក៏ចាប់ផ្ដើមបានឡើងរាងខ្ពស់បន្តិចវិញ ដោយសារបន្លែក្នុងស្រុកជាបន្លែសរីរាង្គ ជារបស់សហគមន៍ក្នុងស្រុក ដែលយើងនាំគ្នាដាំ”។

បច្ចុប្បន្នផ្លែល្ហុងរបស់សហគមន៍សំបូរមានជ័យត្រូវបានយកទៅផ្គត់ផ្គង់នៅក្នុងផ្សារក្នុងខេត្តកំពង់ចាម នៅផ្សារដើមគ និងផ្សារនាគមាសនៅភ្នំពេញ។លោកបានប្រាប់កាសែតឡារ៉ែនពាណិជ្ជថា សហគមន៍ក៏មានគោលបំណងពង្រីកការដាំដុះបន្លែផ្សេងៗទៀត ពិសេសបន្លែល្ហុងនេះដើម្បីផ្គត់ផ្គង់ឱ្យគ្រប់ទីផ្សារដែលកំពុងមានតម្រូវការខ្ពស់ ព្រោះបើទោះជាមានដំណាំល្ហុង 10ហិកតាទៀត ក៏នៅតែមិនទាន់គ្រប់តម្រូវការទីផ្សារដែរ(ទាំងទុំ ទាំងខ្ចី)។ តែពេលនេះល្ហុងកំពុងមានជំងឺរាតត្បាត ដែលមិនទាន់អាចឱ្យសហគមន៍កសិករយើងចាប់ផ្តើមធ្វើការពង្រីកការដាំដុះដំណាំនេះបាននៅឡើយ។ នេះបើតាមការបញ្ជាក់ជាចុងក្រោយរបស់លោក ប៊ួយ ចេង៕

April 23, 2019

“ពិព័រណ៍លំនៅឋានកម្ពុជា ឆ្នាំ2019” នឹងទាក់ទាញអ្នកស្វែងរកលំនៅឋានក្នុងបរិបទថ្មី

ជម្រើសលំនៅឋានច្រើនជាងមុន និងប្លែកជាងមុន គឺជាគោលបំណងនៃពិព័រណ៍អចលនទ្រព្យនៅពេលខាងមុខនេះដើម្បីលើកកម្ពស់វិស័យអចលនទ្រព្យនៅកម្ពុជាទាំងសម្រាប់ទីផ្សារក្នុងស្រុក និងលើឆាកអន្តរជាតិនេះបើតាមអគ្គនាយកនៃគេហទំព័រ realestate.com.kh ដែលបានមានប្រសាសន៍ប្រាប់ឱ្យដឹងអំពីពិព័រណ៍ដែលគេសង្ឃឹមថា ជាព្រឹត្តិការណ៍ដែលអាចផ្តល់ឱ្យអ្នកចូលរួមនូវការបញ្ចុះតម្លៃពិសេស ហើយពួកគេក៏នឹងទទួលបានចំណេះដឹងថ្មីៗពីការទិញ-លក់អចលនទ្រព្យពីវាគ្មិនជំនាញៗដែលមានបទពិសោធច្រើនក្នុងវិស័យនេះផងដែរ។

លោក Thomas O’Sullivan នាយកប្រតិបត្តិនៃគេហទំព័រអចលនទ្រព្យ realestate.com.kh ដែលជាអ្នករៀបចំកម្មវិធីនេះបានមានប្រសាសន៍ថា៖“មានវិនិយោគិនបរទេសមួយចំនួនមិនទាន់បានស្គាល់ ឬយល់ដឹងពីស្ថានភាពនៃការអភិវឌ្ឍវិស័យអចលនទ្រព្យ និងសំណង់នៅកម្ពុជាទេ។ ហេតុនេះកម្មវិធីនេះនឹងជួយជំរុញទីផ្សារអចលនទ្រព្យនៅកម្ពុជាឱ្យកាន់តែប្រសើរឡើងទាំងនៅក្នុងស្រុក និងនៅលើទីផ្សារអន្តរជាតិ។ តាមរយៈកម្មវិធីនេះនឹងធ្វើឱ្យជនបរទេសកាន់តែច្រើនចាប់អារម្មណ៍ក្នុងការទិញអចលនទ្រព្យនៅកម្ពុជា”។

លោកបានបន្ថែមថា កម្មវិធីនេះអាចនិយាយបានថា ជាពេលវេលាដ៏ល្អមួយសម្រាប់អ្នកស្វែងរកទិញអចលនទ្រព្យក៏ដូចជាការវិនិយោគផងដែរ ពិសេសយើងផ្តោតការផ្សព្វផ្សាយទៅលើអ្នកមានជីវភាពមធ្យមដែលនៅមានតម្រូវការលំនៅឋានច្រើនក្នុងប្រទេសកម្ពុជា។ លោកបានបញ្ជាក់ថា៖ “កម្មវិធីនេះនឹងប្រមូលផ្តុំនូវគម្រោងអចលនទ្រព្យថ្មីៗ ព្រមទាំងក្រុមហ៊ុនជាច្រើនដែលមានឥទ្ធិពល និងដើរតួនាទីសំខាន់នៅក្នុងទីផ្សារអចលនទ្រព្យនៅកម្ពុជា”។

លោក ម៉ឹក ចិន្តា ស្ថាបនិកគេហទំព័រ Realestate.com.kh ពិព័រណ៍នេះផ្តល់ឱ្យអ្នកចូលរួមនូវអត្ថប្រយោជន៍ចំនួន 4សំខាន់ៗគឺ ទី1-វេទិកានេះល្អបំផុតសម្រាប់អ្នកមានបំណងចង់ទិញលំនៅឋាន មិនថាផ្ទះ ដី ខុនដូ ឬបុរីនោះទេ និងមានជម្រើសផ្សេងៗទៀត ដូចជា រថយន្តម៉ាកល្បីៗ គ្រឿងសង្ហារិម និងការរចនាដេគ័រ។ ទី2-ល្អបំផុតសម្រាប់អ្នកដែលមានបំណងចង់ស្វែងយល់អំពីភាពរីកចម្រើននៃទីផ្សារលំនៅឋាននៅកម្ពុជា។ ទី3-ល្អបំផុតសម្រាប់អ្នកដែលចង់ស្វែងរកគម្រោងលំនៅឋានជាច្រើនក្នុងពេលតែមួយ និងទី4-ល្អបំផុតសម្រាប់អ្នកចង់ចូលរួមស្វែងយល់ជាមួយវគ្គសិក្ខាសាលាអប់រំអំពីវិស័យអចលនទ្រព្យជាមួយប្រធានបទល្អៗ ដែលនឹងធ្វើបទបង្ហាញដោយវាគ្មិនល្បី។

សេចក្តីប្រកាសព័ត៌មានបានឱ្យដឹងថា ក្នុងពិព័រណ៍នីមួយៗមានការចូលរួមយ៉ាងសកម្មពីសំណាក់អ្នកវិនិយោគ ម្ចាស់គម្រោង អ្នកអភិវឌ្ឍន៍ និងអ្នកចូលរួមរាប់ពាន់នាក់នឹងបានចូលរួមនៅក្នុងវេទិកាដ៏ធំអស្ចារ្យមួយនេះ។ ជាការពិតណាស់ នៅក្នុងពិព័រណ៍លើកទី1 មានការទិញលក់នៅនឹងកន្លែងគិតជាទឹកប្រាក់ជាង 3លានដុល្លារ។ លើកទី2 បានជាង20លានដុល្លារ និងលើកទី3 លក់បានជាង 20លានដុល្លារ។

ដូច្នេះវាជាវេទិកាទិញ-លក់អចលនទ្រព្យដ៏មានប្រសិទ្ធភាព និងជោគជ័យបំផុតនៅក្នុងប្រវត្តិសាស្ត្រនៃទីផ្សារអចលនទ្រព្យកម្ពុជា។ ដោយសម្លឹងឃើញពីសក្តានុពលនៃទីផ្សារ និងតម្រូវការអចលនទ្រព្យដ៏ច្រើនពីអ្នកទិញក្នុងស្រុក និងអន្តរជាតិ Realestate.com.kh នឹងនៅតែបន្តជំរុញការទិញ-លក់លំនៅឋាននៅកម្ពុជា តាមរយៈពិព័រណ៍ដ៏ធំនេះ។

លោក សួស ចិន្តា អគ្គលេខាធិការនៃសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានប្រាប់ថា វិស័យអចលនទ្រព្យ និងសំណង់កំពុងដើរតួនាទីយ៉ាងសំខាន់ក្នុងការជួយជំរុញកំណើនសេដ្ឋកិច្ចរបស់ប្រទេសកម្ពុជា។ លោកថ្លែងថា កម្មវិធីនេះនឹងអាចទាក់ទាញចំណាប់អារម្មណ៍យ៉ាងច្រើនពីសំណាក់អ្នកវិនិយោគបរទេស។

លោកបន្តថ្លែងថា៖ “ដោយសារកម្ពុជាមានស្ថិរភាពនយោបាយល្អ និងច្បាប់មានភាពអនុគ្រោះច្រើនសម្រាប់វិនិយោគិនបរទេសនោះ ដូច្នេះតាមរយៈពិព័រណ៍នេះនឹងអាចជួយទាក់ទាញជនបរទេសឱ្យចូលមកទិញ និងបណ្តាក់ទុននៅកម្ពុជាបានជាច្រើនទៀត”។

លោកបានបញ្ជាក់ថា៖“យោងតាមសមាគមអភិវឌ្ឍន៍លំនៅឋាន និងរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា៖“តម្រូវការលំនៅឋាននៅតែខ្ពស់ គឺការសាងសង់អត់ទាន់គ្រប់តាមតម្រូវការទេ ដោយសារកំណើនសេដ្ឋកិច្ចរបស់ប្រទេស និងកំណើនការងារ។ តម្រូវការវិស័យសំណង់ និងអចលនទ្រព្យនេះនឹងបន្តរីកចម្រើនលើសពី 5ឆ្នាំទៅមុខទៀត។ បើយើងគិតទៅ 5ឆ្នាំទៀត ប្រទេសយើងអាចនៅមានគម្រោងធំៗជាច្រើនទៀត ពោលគឺរបាយនេះមិនទាន់ឆ្អែតទេ រហូតទៅដល់ឆ្នាំ2030។ ដូចនេះអចលនទ្រព្យ គឺកំពុងតែចាប់ផ្តើមបើយើងប្រៀបធៀបទៅនឹងប្រទេសជិតខាងយើង និងប្រទេសអភិវឌ្ឍន៍មួយចំនួន”។

លោក សួស ចិន្តា បានបញ្ជាក់ទៀតថា៖“បញ្ហាប្រឈម យើងនៅតែមាន ដោយយើងត្រូវតែសាងសង់ប៉ុន្មានដើម្បីជាការផ្គត់ផ្គង់ទៅនឹងតម្រូវការទីផ្សារនៃវិស័យអចលនទ្រព្យឱ្យគ្រប់គ្រាន់ដល់ប្រជាជន ហើយ1ឆ្នាំយើងត្រូវលក់បានប៉ុន្មាន និងសាងសង់បានប៉ុន្មាន? និងការលក់ចេញទៅនោះថ្លៃប៉ុន្មាន? ព្រោះយើងផ្តោតទៅលើលំនៅឋានសមរម្យដែលប្រជាជនយើងអាចមានលទ្ធភាពទិញបាន។ នេះជាការរៀបចំមួយរបស់ក្រសួងសេដ្ឋកិច្ច និងហិរញ្ញវត្ថុកំពុងតែរៀបចំចងក្រងហើយ ដើម្បីកុំឱ្យមានហានិភ័យទាក់ទងទៅនឹងតម្លៃអចលនទ្រព្យនៅលើទីផ្សារ និងការវិនិយោគ និងការប្រើប្រាស់កម្ចីជាដើម៕

April 23, 2019

យុវជនគួរបង្កើនភាពប្រាកដនិយម និងមិនគួរធ្វើអាជីវកម្មដោយពឹងតែលើការគាំទ្រពីអ្នកជុំវិញខ្លួនទេ

បច្ចុប្បន្ន ដោយសារតែចរន្តនៃការអភិវឌ្ឍរបស់សង្គម និងកំណើននៃការអប់រំបានធ្វើឱ្យយុវជនមានឱកាសច្រើនក្នុងការអភិវឌ្ឍខ្លួនឯងពីសិស្សនិស្សិតក្លាយជាអ្នកធ្វើការងារ និងពីអ្នកជំនាញក្នុងការងារទៅជាម្ចាស់អាជីវកម្ម។ ថ្វីដ្បិតតែចរន្តវិជ្ជមាននេះបានកើតឡើងច្រើន និងធ្វើឱ្យមនុស្សវ័យក្មេងជាច្រើនទទួលបានជោគជ័យក្នុងមុខរបរក៏ពិតមែន តែក៏មានយុវជនមិនតិចទេមានការសោកស្តាយដោយសារតែការខាតបង់ទាំងពេលវេលា ធនធាន និងកិត្តិយសនៅក្នុងមុខរបរអាជីវកម្ម ដោយសារតែខ្វះភាពប្រាកដនិយម និងកង្វះការយល់ដឹងមួយចំនួន។

លោក ធុល រិទ្ធី សហស្ថាបនិក Small World និងកុំព្យូទ័រ Koompi បានលើកឡើងថា យុវជនកម្ពុជាគួរពឹងផ្អែកលើសមត្ថភាព និងភាពប្រាកដនិយមច្រើន ជាងការធ្វើការងារ ឬចេញរកស៊ីដោយពឹងផ្អែកតែលើការគាំទ្រពីមនុស្សជុំវិញខ្លួន ពេលខ្លះយើងចង់ឱ្យគេគាំទ្រយើង តែយើងមិនបានបង្កើតផលិតផលឱ្យមានគុណភាពខ្ពស់ និងដោះស្រាយបញ្ហារបស់មនុស្សទូទៅឡើយ ដូច្នេះវាធ្វើឱ្យអាជីវកម្មនោះបើកបានក្នុងរយៈពេលខ្លី ក៏បិទទៅវិញ។ អ្វីដែលអាចធ្វើបាន គឺយុវជន ឬអ្នករកស៊ីថ្មីៗគួរមើលពីចរន្ត ឬតម្រូវការរបស់មនុស្សជាទូទៅឱ្យបានធំទូលាយ កុំសម្លឹងមើលតែទីផ្សារជុំវិញខ្លួន ឬធ្វើតាមគេ ព្រោះអាជីវកម្មច្រើនណាស់ដែលបើកដោយពឹងលើទីផ្សារមនុស្សប៉ុន្មាននាក់ជុំវិញខ្លួននោះត្រូវដួលរលំទៅវិញព្រោះ អ្នកជុំវិញខ្លួន ដូចជា មិត្តភក្តិ ឬបងប្អូនមិនប្រាកដថាអាចគាំទ្រផលិតផល ឬសេវាកម្មរបស់យើងយូរអង្វែងនោះទេ ប្រសិនបើយើងមិនព្រមអភិវឌ្ឍ និងប្រើប្រាស់ចំណុចគោលច្បាស់លាស់ណាមួយដើម្បីផ្តល់ផលប្រយោជន៍ពិតប្រាកដដល់អតិថិជន។

លោក ធុល រិទ្ធី បាននិយាយថា“សម្រាប់ខ្ញុំ ខ្ញុំមិនចង់បានការគាំទ្រទេ តែខ្ញុំចង់ឱ្យអតិថិជន ឬអ្នកប្រើប្រាស់ទទួលបានប្រយោជន៍ និងយល់ច្បាស់ពីផលិតផលរបស់ខ្ញុំ ប្រសិនបើពួកគាត់ទិញកុំព្យូទ័រ Koompi ដើម្បីតែគាំទ្រ សូមកុំទិញអីល្អជាង ព្រោះវាមិនមានតម្លៃសម្រាប់គាត់នោះទេ ហើយគាត់នឹងបោះបង់វាចោល ប្រសិនបើគាត់មិនចេះប្រើ ឬប្រើមិនកើត តែប្រសិនបើគាត់ចាប់អារម្មណ៍ចង់ប្រើ ដើម្បីធ្វើការងារ និងដើម្បីដោះស្រាយបញ្ហានានា ឬគិតថាវាមានប្រយោជន៍សម្រាប់គាត់នោះ ចាំទិញ”។

សហគ្រិន និងជាអ្នកជំនាញបច្ចេកវិទ្យាខាងលើបានលើកឡើងផងដែរថា មុនសម្រេចចិត្តរកស៊ី យុវជនត្រូវគិតឱ្យបានល្អិតល្អន់ និងគិតឱ្យច្បាស់ពីចរន្តដែលអាចនឹងកើតឡើងនៅថ្ងៃអនាគត កុំរកស៊ីបើកតែហាងកាហ្វេតាមគ្នា នោះយើងនឹងមិនអាចបង្កើតផលិតផលបានល្អ ខុសប្លែកពីគេបាននោះទេ យកល្អប្រសិនបើមិនទាន់មានបទពិសោធ និងចំណេះដឹងគ្រប់គ្រាន់គួរធ្វើការឱ្យគេដើម្បីរៀនសូត្រពីជំនាញ វិធីសាស្រ្តធ្វើអាជីវកម្ម និងទុកឱកាសសម្រាប់ការសិក្សាពីតម្រូវការជាក់ស្តែងរបស់មនុស្សជាមុនសិន មុននឹងឈានទៅបង្កើតអាជីវកម្មណាមួយដែលមានតម្លៃ មានភាពច្បាស់លាស់ និងអាចជួយដល់មនុស្សទូទៅ ហើយត្រូវចាំឱ្យបានច្បាស់ថា កុំពឹងតែលើការគាំទ្ររបស់គេ តែត្រូវច្បាស់ពីគុណសម្បត្តិរបស់ផលិតផលដែលយើងផលិតឡើង ទើបយើងអាចឈរជើងបានយូរ។

ទីប្រឹក្សាសេដ្ឋកិច្ច និងជាអ្នកពិគ្រោះ និងផ្តល់យោបល់ជាន់ខ្ពស់ផ្នែកទីផ្សារ លោក ង៉ែត ជូ បានលើកឡើងថា ប្រជាជនខ្មែរ ជាពិសេសយុវជនគួរបង្កើតបង្កើតភាពរឹងមាំទាំងផ្នែកចំណេះដឹង និងហិរញ្ញវត្ថុឱ្យបានខ្លាំងជាមុនសិន មុននឹងចាប់ផ្តើមអាជីវម្ម ការធ្វើអាជីវកម្មមិនមែនជារឿងលំបាកពេកទេ តែក៏មិនងាយស្រួលពេកដែរ ព្រោះវាទាមទារឱ្យមានបទពិសោធ ចំណេះដឹង ភាពឆ្លាតវៃ និងភាពហ្មត់ចត់ដើម្បីធ្វើឱ្យអាជីវកម្មនោះដើរទៅមុខបានដោយរលូន។ ការសិក្សាពីការអាន ការប្រឹក្សាជាមួយអ្នកជំនាញ និងស្វែងយល់ពីព័ត៌មានឱ្យបានច្រើន ជាផ្នែកសំខាន់មួយដែលយុវជនគួរធ្វើដើម្បីអាចក្លាយជាម្ចាស់អាជីវកម្មដែលរឹងមាំ។

លោក ង៉ែត ជូ បាននិយាយថា ជារឿយៗប្អូនៗយុវជនតែងប្រាប់ខ្ញុំថា គាត់បង្កើតអាជីវកម្មព្រោះខ្ជិលធ្វើការឱ្យគេ ចង់ក្លាយជាអ្នកមាន ឬចង់បង្កើតស្នាដៃដោយខ្លួនឯង ជាដើម ខ្ញុំសូមផ្តល់យោបល់ថា គោលបំណងទាំងនេះពិបាកនឹងធ្វើឱ្យជោគជ័យណាស់ ព្រោះមិនបានចូលរួមដោះស្រាយបញ្ហាសង្គមនោះទេ។

អ្នកជំនាញខាងលើបានផ្តល់ដំបូន្មានផងដែរថាប្រសិនបើចង់ឱ្យអាជីវកម្មមានភាពរឹងមាំ និងមានដំណើរការល្អ លុះត្រាតែអាជីវកម្មនោះឆ្លើយតបនឹងសេចក្តីត្រូវការពិតប្រាកដរបស់មនុស្សក្នុងសង្គម ព្រោះបើមនុស្សមានបញ្ហា គាត់នឹងស្វែងរកដំណោះស្រាយ ហេតុនេះប្រសិនបើយើងអាចបង្កើតដំណោះស្រាយល្អ និងមានលក្ខណពិសេសខុសពីគេនោះ យើងនឹងទទួលបានអតិថិជនច្រើន ហើយស្ថិតស្ថេរយូរអង្វែងទៀតផង ប្រសិនបើយើងព្យាយាមអភិវឌ្ឍសមត្ថភាពខ្លួនឯងបានច្បាស់លាស់ មានអ្នកប្រឹក្សាល្អ ទទួលយកយោបល់គេ និងមានការសេពគប់ត្រឹមត្រូវ ហើយថែមទាំងមានធនធានគ្រប់គ្រាន់សម្រាប់ធានាពីនិរន្តរភាពនៃអាជីវកម្មផងនោះ យើងនឹងអាចក្លាយជាអ្នកដែលចូលរួមដោះស្រាយបញ្ហារបស់មនុស្សបានល្អ នៅពេលនោះប្រាក់ចំណូល និងធនធាន វានឹងមកតាមក្រោយ តែប្រសិនបើយើងមានភាពមិនច្បាស់លាស់ ហើយចេះតែធ្វើអាជីវកម្មតាមគ្នា និងមានហេតុផលដដែលៗដូចមនុស្សទូទៅដែរនោះ យើងនឹងស្តាយក្រោយម្តងហើយម្តងទៀត ដោយសារតែចង់ឆាប់ជោគជ័យខ្លាំងពេក៕

;

April 22, 2019

ក្រុមហ៊ុន Signatures of Asia ចុះ MoU ជាមួយសមាគមកសិកម្ម និងក្រុមហ៊ុន 6ទៀតដើម្បីជួយវិស័យកសិកម្មឱ្យមាននិរន្តរភាព

ដើម្បីលើកកម្ពស់ជីវភាព និងប្រាក់ចំណូលដល់កសិករខ្នាតតូច និងលើកកម្ពស់ចង្វាក់តម្លៃកសិផលប្រកបដោយនិរន្តរភាព ក្រុមហ៊ុន Signatures of Asia ដែលជាក្រុមហ៊ុននាំចេញអង្ករសរីរាង្គ រួមទាំងកសិផលជាច្រើនមុខផ្សេងទៀតនោះ បានចុះអនុស្សរណៈយោគយល់គ្នា (MoU) ជាមួយសមាគម និងក្រុមហ៊ុនចំនួន6 ផ្សេងទៀត ដើម្បីជួយលើកស្ទួយវិស័យកសិកម្មឱ្យកាន់តែរីកចម្រើនរឹងមាំថែមទៀត។

ភាពជាដៃគូលើចង្វាក់តម្លៃ និងកសិកម្មប្រកបដោយនិរន្តរភាពនេះ មានគោលបំណងធ្វើឱ្យមានអ្នកពាក់ព័ន្ធកាន់តែច្រើនដើម្បីចូលរួមក្នុងខ្សែចង្វាក់តម្លៃទាំងមូល និងជួយកាត់បន្ថយបញ្ហាប្រឈមដែលកើតមានឡើងចំពោះកសិករ ដូចជា ការគាំទ្រផ្នែកហិរញ្ញវត្ថុ បច្ចេកវិទ្យា បច្ចេកទេសកសិកម្ម ធាតុចូលកសិកម្ម និងការទទួលបានទីផ្សារថ្មីៗជាដើម។

ភាពជាដៃគូលើចង្វាក់តម្លៃ និងកសិកម្មប្រកបដោយនិរន្តរភាពនេះនឹងមានការចូលរួមពីអ្នកផ្តត់ផ្គង់ធាតុចូល អ្នកគាំទ្រ បច្ចេកទេស បច្ចេកវិទ្យាកសិកម្ម និងម៉ាស៊ីន ការធានារ៉ាប់រងលើដំណាំ អ្នកកែច្នៃ អ្នកនាំចេញ អ្នកនាំចូល និងស្ថាប័នធនាគារ និងហិរញ្ញវត្ថុ។

ម៉ូដែលលើចង្វាក់តម្លៃ និងកសិកម្មដែលមាននិរន្តរភាពនេះត្រូវបានចុះហត្ថលេខាដោយក្រុមហ៊ុន Signatures of Asia ជាមួយសហគមន៍កសិកម្មនៅតាមបណ្ដាខេត្តនានា ក្រុមហ៊ុន Bayon Heritage Holding Group វិទ្យាស្ថានស្រាវជ្រាវ និងអភិវឌ្ឍន៍កម្ពុជា អង្គការទស្សនពិភពលោក ក្រុមហ៊ុនកសិកម្មឈ្លាសវៃ ក្រុមហ៊ុនហ្វូតតេ ក្រុមហ៊ុននាំចូលផលិតផលកសិកម្មសរីរាង្គរបស់ប្រទេសហូឡង់ DOENS Foods International និងគ្រឹះស្ថានមីក្រូហិរញ្ញវត្ថុ AMK។

លោក ចាន់ សុឃាំង អគ្គនាយកនៃក្រុមហ៊ុន Signatures of Asia បានឱ្យដឹងថា ការសហការ ប្រមូលផ្តុំដៃគូទាំងអស់ទាក់ទងនឹងវិស័យកសិកម្មនេះ គឹធ្វើយ៉ាងណាទ្រទ្រង់វិស័យកសិកម្មឱ្យមានចីរភាព ដែលនឹងផ្សារភ្ជាប់តាំងពីការដាំដុះ រហូតដល់ទីផ្សារ ហើយដើម្បីបង្ហាញឱ្យអ្នកដែលបានធ្វើការដាំដុះទាំងអស់ ឱ្យគាត់បានដឹងថា តើគាត់គួរដាំដុះដំណាំប្រភេទណា ដែលមានតម្លៃខ្ពស់ទៀតផង។

លោកបានបន្តទៀតថា ក្រុមហ៊ុន Signatures of Asia បានចុះអនុស្សរណៈយោគយល់គ្នានៅពេលនេះ គឺក្នុងគោលបំណងធ្វើយ៉ាងណាឱ្យមានការអភិវឌ្ឍទៅលើវិស័យកសិកម្មកាន់តែខ្លាំងឡើងថែមទៀត ហើយដៃគូពាក់ព័ន្ធដែលបានចុះ MoU នៅពេលនេះ មានសហគមន៍ខ្លះ ធ្វើកសិកម្មទាក់ទងនឹងស្រូវសរីរាង្គ សហគមន៍ខ្លះធ្វើពាក់ព័ន្ធនឹងស្ករត្នោត និងសហគមន៍ខ្លះទៀត គឺកំពុងតែគិតគូរលើដំណាំសរីរាង្គដូចជា សណ្តែកខៀវ ម្រេច និងស្វាយចន្ទីជាដើម។

លោក សុឃាំង បានបន្តថា នៅពេលដែលក្រុមហ៊ុនបានចាប់ដៃគ្នាជាដៃគូហើយ គឺយើងនឹងមានការទ្រទ្រង់ច្រើនជាងអ្វីដែលធ្លាប់ធ្វើពីមុនៗមក ដែលនៅពេលនេះមានស្ថាប័នមីក្រូហិរញ្ញវត្ថុ AMK បានត្រៀមកញ្ចប់ថវិកាទ្រទ្រង់រួចហើយ សម្រាប់សហគមន៍ទាំង15 ដែលបានចុះអនុស្សរណៈយោគយល់គ្នានេះ ដើម្បីត្រៀមជួយផ្នែកហិរញ្ញប្បទាន ធ្វើយ៉ាងណាឱ្យគាត់អាចមានជាទុនផលិតដំណាំដាំដុះបានជាច្រើនជាងមុនផងដែរ។

លោក សុឃាំង ក៏បានស្នើដល់សហគមន៍ដែលមានសក្តានុពលក្នុងការផលិតកសិផលសរីរាង្គទាំងឡាយអាចមកទំនាក់ទំនងនឹងក្រុមហ៊ុន Signatures of Asia ដើម្បីធ្វើការពិភាក្សា ស្វែងរកផលិតផលដែលមានសក្តានុពលអាចធ្វើការដាំដុះបាន ហើយក្រុមហ៊ុននឹងទទួលទិញក្នុងតម្លៃដែលសមរម្យ និងនាំយកទៅលក់នៅលើទីផ្សារអន្តរជាតិតែម្តង។

លោក សុឃាំង ថ្លែងថា៖“យើងបានចុះហត្ថលេខាលើអនុស្សរណៈយោគយល់គ្នាជាមួយភាគីពាក់ព័ន្ធផ្សេងៗ ហើយនាពេលខាងមុខនេះ យើងនឹងចុះកិច្ចព្រមព្រៀងផលិតកម្មកសិកម្មតាមកិច្ចសន្យាជាមួយសហគមន៍កសិកម្មចំនួន15 ទូទាំងប្រទេស”។

លោកបន្តថា ជាមួយនឹងកិច្ចសហការភាពជាដៃគូនេះ នឹងគាំទ្រកសិករបានច្រើនជាងមុន ខណៈយើងមានដៃគូខាងមីក្រូហិរញ្ញវត្ថុ អេ អឹម ខេ (AMK) ក្នុងការផ្តល់ជាហិរញ្ញប្បទាន ព្រមជាមួយដៃគូបញ្ជាទិញដែលគួរឱ្យទុកចិត្តក្នុងការផ្តល់ទំនុកចិត្តដល់កសិករ និងធានាថា កសិករមានទីផ្សារមួយពិតប្រាកដ។

លោក សុឃាំង បានឱ្យដឹងថា រហូតមកទល់ពេលនេះ ក្រុមហ៊ុនបានធ្វើការជាមួយសហគមន៍កសិកម្ម នៅខេត្តព្រះវិហារ ខេត្តស្ទឹងត្រែង ខេត្តកំពង់ស្ពឺ ខេត្តកំពង់ធំ បន្ទាយមានជ័យ កំពង់ឆ្នាំង តាកែវ ស្វាយរៀង និងកោះកុង។

លោក Joeri Valckenier Von Geusau អ្នកបញ្ជាទិញពីក្រុមហ៊ុន Doens Food Ingredients B.V. របស់ប្រទេសហូឡង់បានឱ្យដឹងថា ក្រុមហ៊ុនរបស់លោកនឹងនាំចូលផលិតផលកសិកម្មពីកម្ពុជាដើម្បីយកទៅកែច្នៃ និងលក់នៅសហគមន៍អឺរ៉ុប និងសហរដ្ឋអាមេរិក ដោយក្រុមហ៊ុនរបស់លោកនឹងស្វែងដំណាំសក្តានុពលនៅកម្ពុជាបន្ថែមទៀត។

លោក Joeri ថ្លែងថា ក្នុងរយៈពេលពី3 ទៅ 3ឆ្នាំទៀត ក្រុមហ៊ុនរបស់លោកនឹងស្វែងរកការនាំចេញដំណាំកសិកម្មសរីរាង្គពីកម្ពុជាដែលមានដូចជា អង្ករសរីរាង្គ ប្រមាណ 7,500 ទៅ 10,000តោន ស្ករត្នោត(100 ទៅ 200តោន) ស្ករអំពៅ (2,500តោន) ស្វាយចន្ទី 1,500 ទៅ 2,000តោន មើមរមៀត 200 ទៅ 500តោន សណ្តែកសៀង 2,500 ទៅ 5,000តោន និងម្រេចប្រមាណជា 500តោន។

លោក Joeri បានបន្តថា៖“អ្វីដែលយើងនឹងធ្វើ គឺធានាថា រាល់ផលិតផលត្រូវតែស្អាត និងមានសុវត្ថិភាពសម្រាប់អតិថិជនបរិភោគ ដូច្នេះយើងបានធ្វើការត្រួតពិនិត្យមុននឹងដឹកជញ្ជូនឡើងកប៉ាល់ ដើម្បីធ្វើឱ្យប្រាកដថា ផលិតផលដែលបានបម្រើដល់អតិថិជនរបស់យើងនឹងទទួលបានសុវត្ថិភាពក្នុងការទទួលទាន ហើយវាក៏ជួយបង្កើនចំណេះដឹងដល់កសិករអំពីតម្រូវការរបស់អឺរ៉ុប និងអាមេរិកផងដែរ”៕

April 22, 2019

IMF ថា សេដ្ឋកិច្ចកម្ពុជាឆ្នាំនេះនឹងសម្រេចបានកំណើនត្រឹម 6.8%

ថ្វីដ្បិតតែសេដ្ឋកិច្ចកម្ពុជាមានកំណើនក្នុងរយៈពេលប៉ុន្មានឆ្នាំកន្លងមកនេះដោយសម្រេចបានប្រមាណជាង7% ក្ដី ប៉ុន្តែមន្ត្រីជាន់ខ្ពស់នៃមូលនិធិរូបិយប័ណ្ណអន្តរជាតិ International Monitary Fund ឬ IMFបានព្យាករថា សេដ្ឋកិច្ចកម្ពុជាក្នុងឆ្នាំ2019 នឹងសម្រេចបានកំណើនត្រឹមតែ 6,8% ដែលជាការថយចុះមួយ ខណៈឆ្នាំ2018 កន្លងមកនេះ សេដ្ឋកិច្ចកម្ពុជាសម្រេចបានកំណើន 7.5%។

ក្នុងជំនួបជាមួយឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា ក្រុមបេសកកម្មរបស់មូលនិធិរូបិយវត្ថុអន្តរជាតិដែលដឹកនាំដោយលោក Jarkko Turunen អនុប្រធានការិយាល័យនៃនាយកដ្ឋានអាស៊ីប៉ាស៊ីហ្វិក (APD) ដែលបានមកទស្សនកិច្ចកម្ពុជា បានបង្ហាញសុទិដ្ឋិនិយមលើការរីកចម្រើននៃសេដ្ឋកិច្ចកម្ពុជានាឆ្នាំ2019 និងក្នុងរយៈកាលមធ្យម ដោយប៉ាន់ស្មានថា កំណើនសេដ្ឋកិច្ចកម្ពុជានៅឆ្នាំ2018 សម្រេចបានក្នុងអត្រា7.5% និងព្យាករថា សេដ្ឋកិច្ចកម្ពុជាមានអត្រា6.8% នៅឆ្នាំ2019 និងក្នុងរង្វង់7% នៅឆ្នាំ2020។

មន្ត្រីជំនាញ IMF បានបន្តឱ្យដឹងថា អតិផរណាត្រូវបានព្យាករថា ;នឹងបន្តមានកម្រិតទាបក្នុងរង្វង់ 3% ទាំងក្នុងរយៈកាលខ្លី និងមធ្យមជាមួយនឹងស្ថិរភាពអត្រាប្តូរប្រាក់ល្អប្រសើរ។ ចំណែកឯទុនបម្រុងអន្តរជាតិនឹងបន្តរក្សាបានកម្រិតប្រមាណ 5ខែនៃការនាំចេញទំនិញ និងសេវានៃឆ្នាំបន្ទាប់។ ទន្ទឹមនេះ វិស័យធនាគារនឹងបន្តរក្សាបានវឌ្ឍនភាព និងស្ថិរភាពជាមួយនឹងនិន្នាការកំណើនឥណទានថយចុះសន្សឹមៗ ក្នុងអត្រាសមស្របទៅនឹងការរីកចម្រើនរបស់សេដ្ឋកិច្ច។

ទោះជាយ៉ាងណា កាលពីពេលថ្មីៗនេះលោកស្រី នាវ ច័ន្ទថាណា ទេសាភិបាលរងនៃធនាគារជាតិនៃកម្ពុជាបានអះអាងថា សេដ្ឋកិច្ចកម្ពុជានៅឆ្នាំ2019 នេះនឹងសម្រេចបានកំណើន7%ដោយសារការរីកចម្រើននៃវិស័យទេសចរណ៍ កសិកម្ម វាយនភណ្ឌវិស័យសំណង់ និងអចលនទ្រព្យ និងវិស័យសេវាកម្មដែលកំពុងមានការរីកចម្រើននៅកម្ពុជា។

ជាមួយគ្នានេះដែរ ក្រុមការងាររូបិយវត្ថុអន្តរជាតិក៏បានជម្រាបជូនរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុកម្ពុជានៅក្នុងជំនួបដោយឡែកមួយផ្សេងទៀតថា ទោះបីសេដ្ឋកិច្ចកម្ពុជានៅតែបន្តកំណើនរឹងមាំជាមធ្យមប្រមាណត្រឹម 6.5% ទៅ7% ក្នុង 1ឆ្នាំសម្រាប់រយៈពេលខ្លី និងមធ្យមខាងមុខ ស្របទៅនឹងស្ថានភាពល្អប្រសើរនៃលទ្ធផលអនុវត្តន៍ផ្នែកសារពើពន្ធក្ដី តែហានិភ័យសម្រាប់កម្ពុជាកាន់តែមានទំហំធំជាងមុន ដែលរួមមានលទ្ធផលនៃការដក EBA ដោយសហភាពអឺរ៉ុប សង្គ្រាមពាណិជ្ជកម្មរវាងអាមេរិក និងចិន ការចាកចេញរបស់ប្រទេសអង់គ្លេសពីសហភាពអឺរ៉ុប (Brexit) ជាដើម។ ដោយហេតុថា ជាទូទៅផ្អែកលើលទ្ធផលនៃសកម្មភាពសេដ្ឋកិច្ចជារួមនាចុងឆ្នាំ2018 និងដើមឆ្នាំ2019 នេះ កំណើនសេដ្ឋកិច្ចសកល និងក្នុងតំបន់មាននិន្នាការថមថយចុះ។

ឯកឧត្តមអគ្គបណ្ឌិតសភាចារ្យ អូន ព័ន្ធមុន្នីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានស្វាគមន៍យ៉ាងកក់ក្តៅចំពោះការសិក្សាវាយតម្លៃបឋមអំពីស្ថានភាពម៉ាក្រូសេដ្ឋកិច្ចកម្ពុជាដែលរៀបចំដោយក្រុមបេសកកម្មការងារនៃមូលនិធិរូបិយវត្ថុអន្តរជាតិ(International Monetary Fund Staff Visit Mission) នៅទីស្តីការក្រសួងសេដ្ឋកិច្ច និងហិរញ្ញវត្ថុ។

ឯកឧត្តមអគ្គបណ្ឌិតសភាចារ្យបានជម្រាបជូនក្រុមការងារអំពីភាពខុសគ្នានៃលទ្ធផលព្យាករកំណើនសេដ្ឋកិច្ចឆ្នាំ2020 របស់រាជរដ្ឋាភិបាល និងលទ្ធផលព្យាកររបស់ក្រុមការងារមូលនិធិរូបិយវត្ថុអន្តរជាតិថា ដោយសារកម្ពុជាបានដាក់បញ្ចូលផលប៉ះពាល់អវិជ្ជមាននៃការដក EBA ដោយសហភាពអឺរ៉ុបទៅក្នុងការព្យាករសេដ្ឋកិច្ចតែម្ដង ដោយរួមទាំងមានរៀបចំជាកញ្ចប់អន្តរាគមន៍ ដើម្បីបង្កើតការងារជូនប្រជាពលរដ្ឋ និងជំរុញសេដ្ឋកិច្ចកម្ពុជាឱ្យមកនៅអត្រា 6.5%វិញ ខណៈមូលនិធិរូបិយវត្ថុអន្តរជាតិចាត់ទុកការដក EBA ត្រឹមតែជាហានិភ័យប៉ុណ្ណោះ ពោលគឺមិនបានដាក់បញ្ចូលផ្ទាល់ទៅក្នុងលទ្ធផលព្យាករនោះទេ។

អគ្គបណ្ឌិតសភាចារ្យ អូន ព័ន្ធមុន្នីរ័ត្ន ក៏បានធ្វើការថ្លែងអំណរគុណ ចំពោះការបន្តផ្តល់ជំនួយបច្ចេកទេសពីសំណាក់មូលនិធិរូបិយវត្ថុអន្តរជាតិ ក្នុងការកសាងសមត្ថភាពមន្ត្រីកម្ពុជាឱ្យកាន់តែមានជំនាញ និងចំណេះដឹងល្អប្រសើរជាងមុន ជាពិសេសការផ្ដល់ជំនួយបច្ចេកទេសលើការចងក្រងស្ថិតិជារួមរបស់រាជរដ្ឋាភិបាលដែលមានសារៈសំខាន់សម្រាប់ការវិភាគ វាយតម្លៃ និងរៀបចំគោលនយោបាយឱ្យកាន់តែមានប្រសិទ្ធភាពជាងមុន៕

April 22, 2019

កាសែតឡារ៉ែន ពាណិជ្ជ លេខ 170

[easy_media_download url=”https://www.lareine.com.kh/wp-content/uploads/2019/04/LRPN_170-Final-For-Web.pdf” force_dl=”1″]

April 21, 2019

មូលហេតុអ្វីខ្លះដែលនាំឱ្យកើតមានសាលាជំនាន់ថ្មីនៅកម្ពុជា?

ក្រោយពីការធ្វើកំណែទម្រង់ប្រព័ន្ធអប់រំនៅកម្ពុជាការបង្កើតសាលាជំនាន់ថ្មីត្រូវបានគេមើលឃើញថា បានក្លាយជាចំណុចអាទិភាពមួយក្នុងចំណោមចំណុចចម្បងជាច្រើនផ្សេងទៀតដើម្បីឈានទៅរកការអភិវឌ្ឍ និងការប្រកួតប្រជែងលើវិស័យអប់រំក្នុងតំបន់។

ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងថា កម្ពុជាបង្កើតសាលាជំនាន់ថ្មីឡើងដើម្បីឆ្លើយតបនឹងនិន្នាការសំខាន់ចំនួន 3 គឺ ទី1 ប្រទេសកម្ពុជាជាប្រទេសដែលកើតចេញពីប្រទេសដែលមានប្រាក់ចំណូលទាប ទៅជាប្រទេសដែលមានប្រាក់ចំណូលមធ្យមកម្រិតទាប ហើយគោលដៅនៃយុទ្ធសាស្ត្រចតុកោណរបស់រាជរដ្ឋាភិបាល គឺចង់ឱ្យប្រទេសកម្ពុជាឈានទៅជាប្រទេសដែលមានចំណូលមធ្យមកម្រិតខ្ពស់នៅឆ្នាំ 2030 និងក្លាយជាប្រទេសដែលមានចំណូលខ្ពស់នៅឆ្នាំ2050។ ចំណែកឯនិន្នាការទី2 គឺប្រជាជនកម្ពុជាជាង50% គឺជាប្រជាជនដែលមានអាយុក្រោម 30ឆ្នាំ ហេតុនេះយុវជនត្រូវការជំនាញ ត្រូវការចំណេះដឹងដើម្បីក្លាយខ្លួនទៅជាពលករមួយដែលមានគុណភាព អាចចូលរួមនៅក្នុងការអភិវឌ្ឍសង្គមបាន។

ឯកឧត្តម ហង់ ជួនណារ៉ុន មានប្រសាសន៍ថា៖ “យើងជាប្រទេសដែលមានចំនួនយុវជនច្រើន ដែលនេះជាចំណុចខ្លាំងរបស់យើង តែអ្វីដែលយើងត្រូវធ្វើជាចម្បងគឺការកែច្នៃ និងបណ្តុះបណ្តាលធនធានជំនាន់ថ្មីរបស់យើងឱ្យមានជំនាញស្របទៅនឹងតម្រូវការជាក់ស្តែងក្នុងសង្គម និងបរិបទសកលដែលកំពុងមានការអភិវឌ្ឍយ៉ាងឆាប់រហ័ស”។

រដ្ឋមន្ត្រីក្រសួងអប់រំ យុវជន និងកីឡា បានលើកឡើងផងដែរថា និន្នាការសំខាន់ទី3 គឺបច្ចេកវិទ្យាបច្ចុប្បន្ននេះកំពុងមានការរីកចម្រើនយ៉ាងឆាប់រហ័ស ហើយយើងក៏កំពុងស្ថិតក្នុងបដិវត្តន៍ឧស្សាហកម្មទី4 (Industry revolution 4.0) ដែលទាមទារឱ្យប្រព័ន្ធអប់រំត្រូវតែដើរឱ្យទាន់សភាពការណ៍ និងមានប្រព័ន្ធអប់រំវៃឆ្លាតទៀតផង។ ហេតុនេះការបង្កើតសាលាជំនាន់ថ្មីនេះជាដំណោះស្រាយយ៉ាងសំខាន់ដើម្បីឱ្យកម្ពុជាសម្រេចបាននូវគោលដៅសំខាន់ៗ និងស្របទៅតាមបរិបទសង្គមដែលកំពុងត្រូវការការអប់រំបែបទំនើប។

ក្រៅពីនេះយើងមើលឃើញហើយថា កម្ពុជាមានបញ្ហាគម្លាតជំនាញ ហេតុនេះការបង្កើតសាលាជំនាន់ថ្មីជាប្រព័ន្ធមួយដែលអាចកាត់បន្ថយគម្លាតជំនាញ និងធ្វើឱ្យយុវជនមានជំនាញ មានបច្ចេកទេសគ្រប់គ្រាន់ដើម្បីងាយស្រួលបន្តទៅថ្នាក់ឧត្តមសិក្សា។ នៅពេលដែលយុវជនបានត្រៀមខ្លួនល្អ មានមូលដ្ឋានគ្រឹះរឹងមាំ គាត់អាចនឹងអភិវឌ្ឍខ្លួនបានកាន់តែទូលំទូលាយក្នុងការសិក្សាស្រាវជ្រាវ នៅកម្រិតឧត្តមសិក្សា ទាំងការសិក្សាក្នុងសាលា និងការស្រាវជ្រាវតាមបណ្តាញបច្ចេកវិទ្យា។

អគ្គនាយករង នៃអគ្គនាយកដ្ឋានអប់រំ និងជាប្រធានក្រុមប្រឹក្សាភិបាលកម្មវិធីសាលាជំនាន់ថ្មី ឯកឧត្តម ឡោ ឆវណ្ណា បានលើកឡើងថា ដើម្បីឱ្យការអប់រំកាន់តែអភិវឌ្ឍបានលឿន យើងបានធ្វើទំនើបកម្មដោយការបំពាក់ឧបករណ៍បង្រៀនអេឡិចត្រូនិក ប្រើ LCD តុ កៅអីសម្រាប់រៀនស្អាត និងមានកន្លែងដាក់សម្ភារជំនួយដល់ការបង្រៀនត្រឹមត្រូវសម្រាប់ថ្នាក់រៀនទាំងមូលនៅក្នុងសាលាជំនាន់ថ្មី។ ក្រៅពីនេះសាលារៀនជំនាន់ថ្មីក៏ជាសាលាដែលមានបន្ទប់ពិសោធន៍វិទ្យាសាស្ត្រសម្រាប់អនុវត្តជាក់ស្តែងលើគ្រប់មុខវិជ្ជាទាំងអស់ ដែលសិស្សអាចចូលទៅអនុវត្តក្រោយពេលរៀនទ្រឹស្តីចប់។ ការពិសោធនេះអាចធ្វើឱ្យសិស្សរបស់យើងមានទម្លាប់ល្អ និងយល់មេរៀនកាន់តែស៊ីជម្រៅមុនពេលពួកគេចូលទៅថ្នាក់ឧត្តមសិក្សា។ ក្រៅពីនេះដើម្បីឆ្លើយតបនឹងការអភិវឌ្ឍផ្នែកបច្ចេកវិទ្យា យើងក៏បានរៀបចំឱ្យមានបន្ទប់កុំព្យូទ័រដែលសិស្សអាចរៀនបានមិនត្រឹមតែក្នុងប្រព័ន្ធអប់រំទេ តែគាត់អាចសិក្សាស្រាវជ្រាវពីខាងក្រៅដើម្បីដាក់បញ្ចូលក្នុងសាលារៀនជំនាន់ថ្មីនេះបានទៀតផង។

ឯកឧត្តម ឡោ ឆវណ្ណា បានមានប្រសាសន៍ថា៖ “សាលាជំនាន់ថ្មីនេះក៏ត្រូវរៀបចំឱ្យមានស្តង់ដាល្អដោយគិតគូរទាំងសិស្ស និងសាស្ត្រាចារ្យ ព្រោះយើងក៏បានរៀបចំបន្ទប់សម្រាប់សាស្ត្រាចារ្យ ដែលក្រោយពីបង្រៀនចប់ គាត់អាចមកសម្រាកនៅបន្ទប់សាស្ត្រាចារ្យ ពិភាក្សា ដោះស្រាយលើបញ្ហាដែលគាត់ជួបប្រទះផងដែរ”។

អ្នកជំនាញអប់រំខាងលើបានលើកឡើងផងដែរថា សម្រាប់ប្រព័ន្ធថ្មីនេះ ក្រៅពីការគិតគូរពីបច្ចេកទេស និងភាពងាយស្រួលហើយ យើងក៏បានរៀបចំឱ្យមានបណ្ណាល័យទំនើប ដែលគេតែងនាំគ្នានិយាយថា បណ្ណាល័យសតវត្សរ៍ទី21 ដោយយើងបំពាក់ដោយសៀវភៅគ្រប់ប្រភេទច្រើនមុខ។ ក្រៅពីនោះក៏មានបំពាក់ទៅដោយ Internet ដើម្បីឱ្យសិស្សស្រាវជ្រាវបាន ហើយយើងក៏មាន Tablet សម្រាប់ឱ្យសិស្សប្រើប្រាស់បានទៀតផង។ លើសពីនេះទៅទៀតយើងក៏បានរៀបចំឱ្យមានក្លិបសិក្សារបស់សិស្ស និងនិស្សិត ដែលចូលរៀននៅក្នុងសាលារៀនជំនាន់ថ្មី ដែលក្រោយពីគាត់រៀនចប់ម៉ោងរៀនរបស់គាត់ គាត់នឹងអាចចូលទៅក្នុងក្លិបសិក្សាបាន។ កន្លងមកក្លិបសិក្សានេះត្រូវបានគេបង្កើតឡើងមានដូចជា ក្លិបឌីហ្សាញ កាត់តរូបភាព កាត់តវីដេអូ ក្លិបអ្នកនិពន្ធ ក្លិបគណិតវិទ្យា ក្លិបគីមីវិទ្យា និងមានក្លិបខ្លះឈានទៅដល់ការបង្កើតរូប៉ូត (Robot) ថែមទៀតផង។ ក្រៅពីនេះសាលារៀនជំនាន់ថ្មីក៏បានរៀបចំឱ្យមានការប្រឹក្សាអាជីពដើម្បីតម្រង់ទិសរបស់សិស្សចាប់ពីក្មេងរហូតដល់ចូលឧត្តមសិក្សាផងដែរ។គួរបញ្ជាក់ផងដែរថា សាលារៀនជំនាន់ថ្មីជាសាលាគំរូសាកល្បងដែលក្រសួងរៀបចំនៅក្នុងសាលាគំរូមួយចំនួនដែលមានលក្ខខណ្ឌគ្រប់គ្រាន់សម្រាប់បញ្ចូលនូវប្រព័ន្ធ និងវិធីសាស្ត្រអប់រំតាមបែបទំនើប ហើយជំហានបន្តបន្ទាប់ក្រសួងគ្រោងនឹងយកគំរូនេះដាក់បញ្ចូលទៅក្នុងសាលារៀននានានៅក្នុងប្រទេសឱ្យបានកាន់តែច្រើនថែមទៀត៕

April 19, 2019

តើត្រូវធ្វើដូម្តេច ដើម្បីដំណើរការម៉ាស៊ីនត្រជាក់ តាមរយៈទូរស័ព្ទដៃរបស់អ្នក?

ភ្នំពេញ៖ នៅក្នុងអត្ថបទលើកមុនយើងបាននាំលោកអ្នកមកស្គាល់អ្វីទៅជា LG Smart ThinQ និងប្រយោជន៍របស់វា។ ដូចបានជំរាបពីលើកមុនរួចមកហើយថា បច្ចេកវិទ្យាវៃឆ្លាតរបស់ LG Smart ThinQ គឺជាមុខងារមួយ វាជួយសម្រួលដល់អ្នកប្រើប្រាស់ ក្នុងការបញ្ជារ ឬគ្រប់គ្រប់ឧបករណ៍អេឡិចត្រូនិច LG តាមរយៈទូរស័ព្ទស្មាតហ្វូន ឬ Tablet ដែលអនុញ្ញាតអោយអ្នកប្រើប្រាស់អាច បិទ-បើកដំណើរការឧបករណ៍អេឡិចត្រូនិចរបស់ LG បានដូចជា ម៉ាស៊ីនត្រជាក់ ម៉ាស៊ីនបោកគក់ ទូរទស្សន៍ ទូទឹកកកជាដើម ពីគ្រប់ទីកន្លែងត។ កម្មវិធីវៃឆ្លាត LG Smart ThinQ ជួយឲ្យលោកអ្នកដឹងពីការប្រើប្រាស់ថាមពលអគ្គីសនី ថាតើលោកអ្នកប្រើប្រាស់អស់ប៉ុន្មានគីឡូវ៉ាត់ម៉ោង ក្នុងការប្រើប្រាស់ប្រចាំថ្ងៃ ប្រចាំសប្តាហ៍ និងប្រចាំខែទៀតផង។ ជាអាចជួយលោកអ្នកដឹងនូវពេលវេលានៃការសំអាត Filter សំអាតម៉ាស៊ីត្រជាក់ផងដែរ ជាពិសេសទៀតវាមានបូករួមបញ្ចូលគ្នាជាមួយមុខងារ Smart Diagnosis នឹងធ្វើអោយលោកអ្នកពិនិត្យដឹងនូវបញ្ហាបច្ចេកទេសដែលកើតមានឡើងនៅលើឧបករណ៍ភ្លាម ដោយមិនចាំបាច់រង់ចាំជាងបច្ចេសមកពិនិត្យនោះឡើយ។ LG Smart ThinQ បានជួយសម្រួលដល់ការរស់នៅ និងការប្រើប្រាស់ឧបករណ៍អេឡិចត្រនិចនៅក្នុងផ្ទះរបស់លោកអ្នកបានយ៉ាងល្អ មិនថាលោកអ្នកស្ថិតនៅទីណាក៏ដោយ។

នាពេលនេះ យើងខ្ញុំសូមបង្ហាញពីរបៀបភ្ជាប់កម្មវិធី Smart ThinQ រវាងទូរស័ព្ទស្មាតហ្វូន (Smart Phone) ទៅនឹងម៉ាស៊ីនត្រជាក់ LG Dual Cool ។ លោកអ្នកអាចស្វែងយល់ពីរបៀបភ្ជាប់កម្មវិធីតាមរយៈវីដេអូខាងលើនេះ ឬសំរាយនៅក្នុងអត្ថបទខាងក្រោម៖

លោកអ្នកគ្រាន់ចូលទៅដោតឡូតកម្មវិធី LG Smart ThinQ ដោយមិនគិតថ្លៃតាមរយៈ App Store ប្រសិនបើលោកអ្នកប្រើប្រាស់ទូរស័ព្ទ iOS និង ដោតឡូតកម្មវិធីពី Play Store ប្រសិនបើលោកអ្នកប្រើប្រាស់ទូរស័ព្ទ Android។ បន្ទាប់មកចុះឈ្មោះតាមរយៈ Google Account ឬ Facebook ឬក៏ LG Account ហើយបន្ទាប់មកលោកអ្នកនឹងបានឃើញផ្ទាំងមួយលេចចេញមក និង តម្រូវអោយលោកអ្នកជ្រើសរើសពាក្យថា Select All និងបន្ទាប់មកទៀតលោកអ្នកត្រូវបំពេញថ្ងៃខែឆ្នាំកំនើត រួចចុចនៅលើពាក្យថា OK។

បន្ទាប់មកលោកអ្នកត្រូវធ្វើការ Register Products នៅក្នុងកម្មវិធីនេះដោយចុចទៅលើសញ្ញាបូក រួចលោកអ្នកធ្វើការជ្រើសរើសយកពាក្យថា OK និងបន្ទាប់មកទៀតវានឹងលោតចេញផ្ទាំងមួយ ដែលតម្រូវអោយជ្រើសរើសឧបករណ៍ប្រើប្រាស់ ប្រសិនបើវាជាប្រភេទម៉ាស៊ីនត្រជាក់ជាប់ជញ្ជាំង យើងត្រូវជ្រើសរើសពាក្យថា Wall – Mounted Type

បន្ទាប់មកទៀតយើងត្រូវធ្វើតាមជំហ៊ាននីមួយៗ ដូចខាងក្រោមនេះ ៖

ជំហ៊ានទី 1៖ លោកអ្នកត្រូវធ្វើការចុចប៊ូតុងសម្រាប់ឧបករណ៍បញ្ជារ ដោយរាប់ពីខាងលើមកវាគឺជាប៊ូតុងទី3 ទាំងសងខាង ដែលមានពាក្យថា Energy Ctrl និង Jet Mode ដោយលោកអ្នកចុចប៊ូតុងនេះអោយចជាប់ក្នុងរយៈពេល 3វិនាទី យើងនឹងបានលឺសំឡេង Wi-Fi នៅលើម៉ាស៊ីនត្រជាក់ រួចលោកអ្នកត្រលប់ទៅចុចពាក្យថា YES នៅលើ App ក្នុងទូរស័ព្ទរបស់លោកអ្នកវិញ។

ជំហ៊ានទី 2៖ ចំណុចនេះយើងខ្ញុំសូមបញ្ជាក់ថា ប្រសិនបើលោកអ្នកប្រើប្រាស់ទូរស័ព្ទប្រភេទ iOS លោកអ្នកត្រូវធ្វើការ Register Network ប៉ុន្តែចំពោះលោកអ្នកដែលប្រើប្រាស់ប្រព័ន្ធ Android គឺមិនមាននោះទេ គឺវានឹងភ្ជាប់ជាលក្ខណៈអូតូតែម្តង។

ជំហ៊ានទី 3៖ គឺលោកអ្នកត្រូវរង់ចាំភ្ជាប់ App ដែលនៅលើទូរស័ព្ទជាមួយនឹងម៉ាស៊ីត្រជាក់របស់លោកអ្នក ហើយនៅពេលដែលវាដំណើរការបានដល់ 100% ពេលនោះលោកអ្នកនឹងបានឃើញព៌តមាន ដែលទាក់ទងទៅនឹងម៉ាស៊ីត្រជាក់របស់លោកអ្នកជាក់ជាមិនខាន។

សូមបញ្ជាក់ផងដែរថាលោកអ្នកអាចប្រើប្រាស់កម្មវីធីនេះដើម្បីបញ្ជារម៉ាស៊ីនត្រជាក់ LG តាមរយៈទូរស័ព្ទដៃ & Tablet លុះត្រាតែទូរស័ព្ទដៃលោកអ្នកមានភ្ជាប់ Internet ហើយទីតាំងដែលតម្លើង (នៅផ្ទះ ការិយាល័យ ជាដើម ) ម៉ាស៊ីនត្រជាក់ក៏មានភ្ជាប់ Wi-Fi ផងដែរ។

April 19, 2019

មហាសង្ក្រាន្តឆ្នាំថ្មី 3ថ្ងៃបានជំរុញវិស័យទេសចរណ៍របស់ប្រទេសកម្ពុជាយ៉ាងខ្លាំង

យោងតាមស្ថិតិរបស់ក្រសួងទេសចរណ៍បានបង្ហាញថា ក្នុងរយៈពេល 3ថ្ងៃ នៃព្រឹត្តិការណ៍មហាសង្ក្រាន្តឆ្នាំថ្មីប្រពៃណីខ្មែរពីថ្ងៃទី14 -16 ខែមេសា ឆ្នាំ2019 កម្ពុជាទទួលបានភ្ញៀវទេសចរសរុបជាង 4.72លាននាក់ កើនឡើង 67.02% បើធៀបនឹងឆ្នាំមុន។

របាយការណ៍បឋមរបស់មន្ទីរទេសចរណ៍រាជធានី-ខេត្ត និងតាមការវាយតម្លៃជំហានដំបូងបានឱ្យដឹងថា ភ្ញៀវទេសចរ និងបងប្អូនប្រជាពលរដ្ឋខ្មែរដែលបានដើរកម្សាន្តនៅតាមគោលដៅទេសចរណ៍សំខាន់ៗ និងតាមទីកន្លែងប្រារព្ធព្រឹត្តិការណ៍មហាសង្ក្រាន្តនៅរាជធានី និងខេត្តនាឱកាសបុណ្យចូលឆ្នាំថ្មីប្រពៃណីជាតិខ្មែរ រយៈពេល 3ថ្ងៃកន្លងមកនេះមានចំនួនសរុបប្រមាណ 4,726,602នាក់ កើនឡើង67.02% ក្នុងនោះភ្ញៀវជាតិមានចំនួន 4,639,341នាក់ កើនឡើង 66.40% ភ្ញៀវអន្តរជាតិមានចំនួន 83,123នាក់ កើនឡើង 98.27%។

អ្វីដែលជាការណ៍គួរឱ្យកត់សម្គាល់នោះគឺ តួលេខខាងលើគ្រាន់តែជាការប៉ាន់ស្មានជំហានដំបូងសម្រាប់គោលដៅទេសចរណ៍សំខាន់ៗ និងតាមទីកន្លែងប្រារព្ធព្រឹត្តិការណ៍សង្ក្រាន្តសំខាន់ៗតែប៉ុណ្ណោះ នៅមិនទាន់គិតពីចំនួនបងប្អូនប្រជាពលរដ្ឋនៅតាមគោលដៅបន្ទាប់បន្សំនានាដូចជានៅតាមវត្តអារាម សាលារៀន ភូមិ ឃុំ ស្រុក និងទីប្រជុំជននានាដែលមានចំនួនមិនតិចជាង 3លាននាក់បន្ថែមទៀតនោះនៅឡើយ។

ស្របពេលប្រជាពលរដ្ឋកម្ពុជាបានដើរកម្សាន្តច្រើនក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ 3ថ្ងៃកន្លងមកនេះ រដ្ឋមន្ត្រីក្រសួងទេសចរណ៍កម្ពុជាបានអះអាងថា ប្រជាជនកម្ពុជាអាចចំណាយប្រាក់សរុបប្រមាណជិត 500លានដុល្លារអាមេរិក។

ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍បានមានប្រសាសន៍ឱ្យដឹងថា ក្នុងរយៈពេល 3ថ្ងៃនេះ ប្រជាពលរដ្ឋកម្ពុជាបានធ្វើដំណើរកម្សាន្តនៅតាមបណ្តាខេត្តនានា ពិសេសបណ្តាខេត្តរៀបចំពិធីមហាសង្ក្រានឆ្នាំថ្មីចំនួនប្រមាណជា 4.7លាននាក់ ប៉ុន្តែចំនួននេះមិនទាន់រាប់នៅតាមវត្តអារាម និងការកម្សាន្តនៅតាមផ្ទះ ឬតាមរមណីយដ្ឋាន ឬក្រោមដើមឈើនៅតាមតំបន់ជនបទនានានៅឡើយទេ។ បើគិតទាំងប្រជាជនដែលទៅកម្សាន្តនៅតាមវត្តវ៉ា-អារាម និងតាមផ្ទះបងប្អូនទូទាំងប្រទេសផងនោះ គឺអាចមានប្រជាជនកម្ពុជាប្រមាណដល់ទៅ 7លាននាក់ឯណោះដែលបានចូលរួមអបអរសាទរក្នុងពិធីបុណ្យប្រពៃណីជាតិខ្មែរនេះ។

ឯកឧត្តមបន្តថា៖“បើគិតជាមធ្យម ប្រជាជនម្នាក់ចំណាយ 100ដុល្លារ ដូច្នេះការចំណាយសម្រាប់បុណ្យនេះគឺមានប្រមាណ 470លានដុល្លារ ហើយចំនួននេះមិនទាន់គិតពីការចំណាយរបស់អ្នកកម្សាន្តនៅតាមវត្តអារាម និងតាមលំនៅដ្ឋាននានានៅឡើយហើយការរៀបចំពិធីបុណ្យចូលឆ្នាំថ្មីប្រពៃណីជាតិខ្មែរឆ្នាំនេះមានលក្ខណពិសេសបំផុត គឺនៅតាមបណ្ដាខេត្តនីមួយៗមានរៀបចំតំបន់ត្រជាក់ដែលអាជ្ញាធរខេត្តទាំងនោះបានរៀបចំជូនភ្ញៀវទេសចរ និងប្រជាពលរដ្ឋ ព្រមទាំងមានការបាញ់ទឹក និងរាំកម្សាន្តទៀតផង”។

ឯកឧត្តមរដ្ឋមន្ត្រីបានបន្តថា៖“ការរៀបចំទីកន្លែងសម្រាប់កម្សាន្តនេះមានភាពទាក់ទាញ និងអាចប្រកួតប្រជែងជាមួយប្រទេសជិតខាងយើងបាន ហើយអ្វីដែលពិសេសគឺ យុវជនបានភ្ជាប់សកម្មភាពនេះជាមួយវប្បធម៌ “យុវជនជាសសរទ្រូង” ផងដែរ”។

ឯកឧត្តមបានបន្តថា ប្រជាជនមានភាពសប្បាយរីករាយខ្លាំងណាស់ ពួកគេពេញចិត្តនឹងសន្តិភាព និងការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ហើយការរៀបចំឆ្នាំនេះ អាចយកមកធ្វើជាមូលដ្ឋានសម្រាប់ឆ្នាំក្រោយឱ្យកាន់តែល្អប្រសើរថែមទៀត។

ឯកឧត្ដមបានបន្តទៀតថា អ្វីៗវាបញ្ជាក់ច្បាស់នៅពេលនេះ ទោះបីកន្លងមកគេធ្លាប់និយាយថា នៅស្រុកខ្មែរហាក់ដូចមានបុណ្យចូលឆ្នាំច្រើន តែពេលនេះគេបានឃើញ និងបញ្ជាក់ច្បាស់ថា ខ្មែរ គឺជាខ្មែរ គឺជាប្រជាជាតិមួយដែលធ្លាប់មានអម្បូរពូជពង្ស និងវប្បធម៌ប្រពៃណីដ៏ថ្លៃថ្នូររុងរឿង។ ក្រោមម្លប់នៃសន្តិភាព និងការរីកចម្រើន ជីវភាពរស់នៅរបស់បងប្អូនប្រជាពលរដ្ឋមានការអភិវឌ្ឍ ដែលបានធ្វើឱ្យពួកគាត់សប្បាយរីករាយ ព្រមទាំងបានធ្វើឱ្យការរៀបចំពិធីបុណ្យចូលឆ្នាំថ្មីប្រពៃណីជាតិឆ្នាំនេះប្រព្រឹត្តទៅបានយ៉ាងល្អ និងឆ្លុះបញ្ចាំងពីអត្តសញ្ញាណខ្មែរពិត។

សូមបញ្ជាក់ផងដែរថា នៅក្នុងពិធីបុណ្យចូលឆ្នាំថ្មីប្រពៃណីជាតិ 3ថ្ងៃកន្លងមកនេះ នៅក្នុងខេត្តបាត់ដំបងទទួលបានភ្ញៀវទេសចរច្រើនជាងគេ ដែលមានរហូតចំនួន 995,219នាក់ កើនឡើង 42.21%បើធៀបនឹងឆ្នាំ2018 ដែលមានចំនួន 699,213 នាក់(តាមស្ថិតិរបស់មន្ទីរទេសចរណ៍ខេត្តបាត់ដំបង) ក្នុងនោះមានភ្ញៀវទេសចរអន្តរជាតិមានចំនួន 852នាក់ កើនឡើង 2.77% ធៀបនឹងឆ្នាំ2018 ដែលមានចំនួន 829នាក់។

បន្ទាប់ពីខេត្តបាត់ដំបង គឺខេត្តស្វាយរៀង ដែលទទួលបានភ្ញៀវទេសចរចំនួនជាង 46.75ម៉ឺននាក់ ក្នុងនោះភ្ញៀវជាតិជាង 46.74ម៉ឺននាក់ និងភ្ញៀវអន្តរជាតិចំនួន 32នាក់។ ដោយឡែកខេត្តសៀមរាប គឺស្ថិតនៅលេខ3 ដែលទទួលបានភ្ញៀវជាង 38.66ម៉ឺននាក់ ក្នុងនោះភ្ញៀវជាតិ 36ម៉ឺននាក់ និងអន្តរជាតិជាង 2.6ម៉ឺននាក់។

ក្រៅពីនេះ រាជធានី-ខេត្តដែលទទួលបានភ្ញៀវទេសចរសរុបក្នុងអំឡុងពិធីចូលឆ្នាំខ្មែរ 3ថ្ងៃនេះរួមមាន៖
1-កំពង់ចាម៖ ជាង 33.26ម៉ឺននាក់។ 2-ព្រៃវែង៖ ជាង 31.92ម៉ឺននាក់។ 3-កណ្តាល៖ ជាង 31.62ម៉ឺននាក់។ 4-កំពង់ធំ៖ ជាង 21.75ម៉ឺននាក់។ 5-ភ្នំពេញ៖ ជាង 20.81ម៉ឺននាក់។ 6-ព្រះសីហនុ៖ ជាង19.14ម៉ឺននាក់។ 7-បន្ទាយមានជ័យ៖ ជាង 16.54ម៉ឺននាក់។ 8-កំពង់ឆ្នាំង៖ ជាង 16.08ម៉ឺននាក់។ 9-កែប៖ ជាង14.59ម៉ឺននាក់។ 10-កំពត៖ ជាង 13.71ម៉ឺននាក់។ 11-ព្រះវិហារ៖ ជាង 13.59ម៉ឺននាក់។ 12-ក្រចេះ៖ ជាង 12.34ម៉ឺននាក់។ 13-កំពង់ស្ពឺ៖ ជាង11.73ម៉ឺននាក់។ 14-ប៉ៃលិន៖ ជាង 8.2ម៉ឺននាក់។ 15-រតនគិរី៖ ជាង 7.8ម៉ឺននាក់ និងខេត្តក្រៅពីនោះមានក្រោម 6 ទៅ 5ម៉ឺននាក់។

មួយវិញទៀត ចំនួនភ្ញៀវទេសចរក្នុងស្រុកដែលទៅទស្សនានៅឯក្រៅប្រទេសក៏មានកំណើនកើនឡើងគួរឱ្យកត់សម្គាល់ផងដែរ បើទោះបីជាក្រសួងទេសចរណ៍មិនទាន់ចេញរបាយការណ៍បញ្ជាក់ពីចំនួនភ្ញៀវទេសចរក្នុងស្រុកទៅទស្សនានៅឯបរទេសយ៉ាងណាក្ដី តែក៏ភ្នាក់ងារទេសចរណ៍ក្នុងស្រុក និងក្រុមហ៊ុនទេសចរណ៍ក្នុងស្រុកមួយចំនួនបានមើលឃើញពីសញ្ញាវិជ្ជមានរបស់ភ្ញៀវទេសចរក្នុងស្រុកដែលចេញទៅកម្សាន្តនៅបរទេសក្នុងអំឡុងពេល3ថ្ងៃនៃពិធីបុណ្យចូលឆ្នាំខ្មែរនៅក្នុងឆ្នាំនេះដែរ។

លោក ធួន ស៊ីណាន ប្រធានក្រុមហ៊ុនទេសចរណ៍ B2B និងជាប្រធានសមាគមទេសចរណ៍អាស៊ីប៉ាស៊ីហ្វិកនៅកម្ពុជាបានឱ្យដឹងថា ក្នុងអំឡុងពេល3ថ្ងៃនៃពិធីបុណ្យចូលឆ្នាំប្រពៃណីខ្មែរឆ្នាំនេះ សំបុត្រយន្តហោះចេញពីកម្ពុជាឆ្ពោះទៅកាន់គោលដៅទេសចរណ៍មួយចំនួននៅជប៉ុន កូរ៉េ និងប្រទេសជិតខាងត្រូវបានកក់ពេញដោយភ្ញៀវទេសចរក្នុងស្រុក។ លោកបន្តថា សូម្បីតែគោលដៅទេសចរណ៍ទៅប្រទេសសិង្ហបុរី និងថៃក៏ពិបាកកក់សំបុត្រយន្តហោះដែរក្នុងរយៈពេល 3ថ្ងៃនៃពិធីបុណ្យចូលឆ្នាំខ្មែរកន្លងទៅថ្មីៗនេះ។

លោកស៊ីណានថ្លែងថា៖“កំណើនប្រជាជនកម្ពុជាដើរហើរនាពេលបច្ចុប្បន្ន មិនថាក្នុងស្រុកទេ ក្រៅស្រុកក៏ច្រើនសន្ធឹកសន្ធាប់ណាស់ដែរ កំណើននេះកើនឡើងលើសពីការរំពឹងទុក។ ដោយឡែកតាមក្រុមហ៊ុនទេសចរណ៍នីមួយៗមិនសូវប្រមូលភ្ញៀវបានច្រើនប៉ុន្មាននោះទេ ប៉ុន្តែប្រជាជនកម្ពុជាធ្វើដំណើរកម្សាន្តទៅជុំវិញពិភពលោកដោយខ្លួនឯង តាមរយៈប្រព័ន្ធឌីជីថលច្រើនជាង”។

លោកបន្តថា ប្រព័ន្ធឌីជីថល បណ្តាញសង្គម បានជំរុញឱ្យមានកំណើននៃការដើរលេងរបស់ប្រជាជនកម្ពុជាទៅបរទេស នៅពេលដែលពួកគេឃើញមានតំបន់ទេសចរណ៍ថ្មីៗនៅក្រៅប្រទេស ការអភិវឌ្ឍថ្មីៗ ដូច្នេះអ្នកដែលមានធនធានគេនឹងធ្វើដំណើរកម្សាន្តទៅប្រទេសទាំងអស់នោះ។ លោកបានបន្តទៀតថា ប្រព័ន្ធសង្គមឌីជីថលនេះហើយដែលបានជំរុញឱ្យប្រជាជនកម្ពុជាចេញដំណើរទៅកម្សាន្តនៅក្រៅប្រទេស។

លោក ស៊ីណាន បញ្ជាក់ថា៖“ក្រុមហ៊ុនរបស់ខ្ញុំផ្ទាល់បានបញ្ជូនទេសចរក្នុងស្រុកទៅក្រៅប្រទេសចំនួន 4ក្រុម ដែលមានភ្ញៀវសរុប 180នាក់ ក្នុងនោះប្រទេសវៀតណាម 85នាក់ ថៃ 40នាក់ កោះបាលីឥណ្ឌូនេស៊ី 35នាក់ តូក្យូជប៉ុន 20នាក់”។

ដោយឡែកលោកស្រី សុខ គន្ធា នាយកប្រតិបត្តិនៃក្រុមហ៊ុនទេសចរណ៍ ស្កាយឃីង បានឱ្យដឹងថា ក្រុមហ៊ុនរបស់លោកស្រីបានបញ្ជូនភ្ញៀវទេសចរក្នុងស្រុកទៅកាន់បរទេសចំនួន 10ក្រុមក្នុងអំឡុងពេល 3ថ្ងៃនៃពិធីបុណ្យចូលឆ្នាំប្រពៃណីខ្មែរកន្លងទៅថ្មីៗនេះ ដែលក្នុងនោះមាន 3ក្រុមបានទៅអឺរ៉ុប ក្រៅពីនេះនៅតំបន់អាស៊ី និងប្រទេសជិតខាងរបស់កម្ពុជា។

លោកស្រី គន្ធា បានបន្ថែមថា៖“យើងបានបញ្ជូនទេសចរកម្ពុជាទៅក្រៅប្រទេសជាង 10ក្រុម ឆ្នាំនេះល្អជាងឆ្នាំមុន ចំនួនមនុស្សអត់កើនទេ ប៉ុន្តែភ្ញៀវចេញទៅទស្សនាគោលដៅទេសចរណ៍ឆ្ងាយៗ ដូចជានៅអឺរ៉ុបមានច្រើនជាងមុន ហើយគាត់ចាយលុយច្រើនជាងមុន”៕

April 18, 2019

ADB៖ គុណភាពធនធានមនុស្ស ជាកត្តាគន្លឹះដើម្បីទាក់ទាញ និងរក្សាកំណើនសេដ្ឋកិច្ចរយៈពេលវែង

ដំណាលគ្នានឹងពេលដែលប្រទេសកម្ពុជាបានកំណត់គោលដៅអភិវឌ្ឍន៍ឱ្យក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ2030 និងឆ្នាំ2050 រួមទាំងរក្សាបានកំណើនសេដ្ឋកិច្ចប្រមាណ7% ក្នុង 1ឆ្នាំ យើងក៏ជួបប្រទះនូវបញ្ហាជាច្រើនដែលរាំងស្ទះដល់ការអភិវឌ្ឍសេដ្ឋកិច្ច ដូចជាការដកប្រព័ន្ធអនុគ្រោះពន្ធអ្វីៗគ្រប់យ៉ាងលើកលែងតែអាវុធ (EBA) សង្គ្រាមពាណិជ្ជកម្មនៅក្នុងតំបន់ រួមទាំងបញ្ហាមួយចំនួនផ្សេងទៀត។

ស្ថិតក្នុងបរិបទបែបនេះ ធនាគារអភិវឌ្ឍន៍អាស៊ីបានចេញសេចក្ដីបញ្ជាក់ថា កំណើនសេដ្ឋកិច្ចទំនងជានឹងថមថយចុះបន្តិច ប៉ុន្តែនៅតែជាកំណើនដ៏រឹងមាំ។យោងតាមរបាយការណ៍ថ្មីមួយរបស់ធនាគារអភិវឌ្ឍន៍អាស៊ី (ADB) ដែលចេញផ្សាយនាពេលថ្មីៗនេះបានបញ្ជាក់ថា កំណើនសេដ្ឋកិច្ចរបស់កម្ពុជា ត្រូវបានរំពឹងទុកថានឹងកើនឡើងប្រមាណ 7%នៅឆ្នាំ2019 នេះ ហើយនឹងថយចុះមកត្រឹម 6.8%នៅឆ្នាំក្រោយ។ បញ្ហានៃការថយចុះបន្តិចនៃកំណើនសេដ្ឋកិច្ចនេះ ត្រូវបានគេមើលឃើញថា កើតចេញពីចរន្តនៃការថយចុះកំណើនរបស់ប្រទេសអភិវឌ្ឍន៍ជឿនលឿន និងប្រទេសដែលជាទីផ្សារនាំចេញរបស់កម្ពុជាមានការថយចុះ ហើយភ្ញៀវទេសចរក៏មានការថយចុះខ្លះផងដែរ។ ទោះជាយ៉ាងនេះក្តី ក៏គេសង្កេតឃើញថា កម្ពុជានៅតែអាចដោះស្រាយបញ្ហាប្រឈមសំខាន់ៗទាំងអស់នោះបានដែរ តាមរយៈការរៀបចំ និងពង្រឹងវិស័យធនធានមនុស្ស។

លោកស្រី Sunniya Darrani-Jamal នាយិកាធនាគារអភិវឌ្ឍន៍អាស៊ី (ADB) ប្រចាំនៅកម្ពុជាបានលើកឡើងថា ប្រទេសកម្ពុជានឹងរក្សាបាននូវកំណើនសេដ្ឋកិច្ចរឹងមាំក្នុងរយៈពេល 2ឆ្នាំទៅមុខទៀត បើទោះបីជាប្រឈមនឹងបញ្ហាមួយចំនួនក៏ដោយ។ កត្តាសំខាន់ដែលអាចទាក់ទាញ និងរក្សាឱ្យបាននូវកំណើនក្នុងរយៈពេលវែង គឺកត្តាធនធានមនុស្សរបស់កម្ពុជាដែលរួមបញ្ចូលទាំងជំនាញបច្ចេកទេ ស និងជំនាញវិជ្ជាជីវៈដែលអាចឆ្លើយតបនឹងតម្រូវការរបស់វិស័យឯកជន។

ទាក់ទឹងនឹងបញ្ហាធនធានមនុស្ស យោងតាមរបាយការណ៍របស់ធនាគារអភិវឌ្ឍន៍អាស៊ី (ADB) ឆ្នាំ2019 បានបញ្ជាក់ថា វាជាបញ្ហាដ៏សំខាន់មួយសម្រាប់កម្ពុជា ព្រោះកម្ពុជានៅមានបញ្ហាគម្លាតជំនាញដែលកើតឡើងដោយសារភាពមិនស៊ីចង្វាក់គ្នារវាងជំនាញរបស់ប្រជាជនកម្ពុជា និងទីផ្សារការងារជាក់ស្តែង។ បញ្ហានេះកើតឡើងដោយសារតែការជ្រើសរើសជំនាញមិនស៊ីចង្វាក់គ្នាជាមួយនឹងតម្រូវការជាក់ស្តែងដែលកំពុងត្រូវការក្នុងទីផ្សារជាក់ស្តែង។

របាយការណ៍ដដែលបានបញ្ជាក់ផងដែរថា កម្ពុជាត្រូវការគ្រូបង្រៀនដែលមានគុណភាពខ្ពស់ច្រើននាក់បន្ថែមទៀត និងត្រូវការការគាំទ្រផ្នែកហិរញ្ញវត្ថុដល់សិស្សក្រីក្រដែលរៀនពូកែ និងរៀនជំនាញដែលត្រូវនឹងយុគសម័យឌីជីថល។

រដ្ឋលេខាធិការក្រសួងអប់រំ យុវជន និងកីឡា ឯកឧត្តម អុឹម កុច បានបញ្ជាក់ថា កម្ពុជាកំពុងព្យាយាមគ្រប់លទ្ធភាពដើម្បីធ្វើកំណែទម្រង់ប្រព័ន្ធអប់រំឱ្យមានលក្ខណៈកាន់តែខ្លាំង តាមរយៈការបណ្តុះបណ្តាលគ្រូបន្ថែម និងការបញ្ចូលជំនាញសម្រាប់សតវត្សរ៍ទី21 ដើម្បីឱ្យសិស្សអាចមានជំនាញឆ្លើយតបជាមួយនឹងទីផ្សារការងារដែលសង្គមត្រូវការជាក់ស្តែង។ ក្រៅពីនេះនៅតាមសាលារៀនយើងក៏បានចំណាយថវិកាជាច្រើនដើម្បីលើកកម្ពស់មុខវិជ្ជា វិទ្យាសាស្ត្រ បច្ចេកវិទ្យាវិស្វកម្ម និងគណិតវិទ្យា (STEM) ដើម្បីឱ្យសិស្សបានយល់ពីតម្លៃសំខាន់នៃមុខវិជ្ជាទាំងអស់នេះនៅក្នុងសង្គមកម្ពុជាដែលកំពុងតែត្រូវការកម្លាំងពលកម្មប្រភេទនេះដើម្បីអភិវឌ្ឍឱ្យកាន់តែខ្លាំង។

ឯកឧត្តម អុឹម កុច មានប្រសាសន៍ថា៖ “កម្ពុជាកំពុងជំរុញឱ្យសិស្សទាំងអស់ចេះទាំងជំនាញវិជ្ជាជីវៈសម្រាប់ចិញ្ចឹមជីវិត និងចេះទាំងជំនាញទន់ដើម្បីធ្វើការងារប្រកបដោយប្រសិទ្ធភាពខ្ពស់ ព្រោះជំនាញបច្ចេកទេសជាជំនាញដែលអាចឱ្យមនុស្សធ្វើការងារបាន តែមិនប្រាកដថាអាចឱ្យមនុស្សអភិវឌ្ឍបានលឿននោះទេ ហេតុនេះការត្រូវការជំនាញសម្រាប់សតវត្សរ៍ទី21 ដើម្បីបន្ថែមឱ្យពួកគេក្លាយជាមនុស្សស្វាហាប់ ចេះសហការល្អ និងមានភាពច្នៃប្រឌិតកាន់តែខ្ពស់”។

ពាក់ព័ន្ធនឹងបញ្ហាជំនាញនេះផងដែរ ឯកឧត្តម ពេជ សោភ័ន រដ្ឋលេខាធិការនៃក្រសួងការងារ និងបណ្តុះបណ្តាលវិជ្ជាជីវៈ ក៏បានលើកឡើងផងដែរថា កម្ពុជាពិតជាត្រូវការអ្នកជំនាញបច្ចេកទេស ដើម្បីឆ្លើយតបជាមួយនឹងចរន្តរបស់សង្គមដែលកំពុងមានភាពរីកចម្រើនខ្លាំងផ្នែកសំណង់ បច្ចេកទេសអេឡិចត្រូនិក ម្ហូបអាហារ និងផ្នែកផ្សេងៗទៀត។ ការអភិវឌ្ឍនៃវិស័យទាំងអស់នោះ បានបង្កើតឱ្យមានតម្រូវការធនធានមនុស្សជាច្រើននាក់ ដើម្បីចាក់បញ្ចូលឱ្យបានគ្រប់គ្រាន់ទៅក្នុងទីផ្សារ។

ឯកឧត្តម ពេជ សោភ័ន បានមានប្រសាសន៍ថា៖ “កម្ពុជាត្រូវការអ្នកជំនាញ ហើយបើគិតឱ្យលម្អិតយើងមើលឃើញថា អ្នកជំនាញដែលយើងត្រូវការមិនមែនមានតែកម្រិតឧត្តមសិក្សាខ្ពស់ៗដូចជាវិស្វករ ឬអ្នកជំនាញខ្ពស់ៗខ្លាំងនោះទេ តែយើងក៏ត្រូវការផងដែរនូវអ្នកជំនាញបច្ចេកទេស អ្នកបច្ចេកទេសជាន់ខ្ពស់ និងកម្លាំងពលកម្មជំនាញដែលបច្ចុប្បន្ននេះយើងនៅត្រូវការជាច្រើនបន្ថែមទៀត”។

ឯកឧត្តមរដ្ឋលេខាធិការក៏បានលើកឡើងនូវកត្តាប្រឈមមួយចំនួនផងដែរដែលយើងកំពុងជួបប្រទះ និងខិតខំដោះស្រាយ នោះគឺកង្វះខាតកម្លាំងពលកម្មជំនាញ ធ្វើឱ្យយើងត្រូវចំណាយធនធានដើម្បីជួលអ្នកជំនាញពីខាងក្រៅ។ ឯកឧត្តមបានបញ្ជាក់ថា ដោយមើលឃើញពីបញ្ហានេះហើយ ទើបកម្ពុជាបានជំរុញយ៉ាងសកម្មលើការបណ្តុះបណ្តាលបច្ចេកទេស និងវិជ្ជាជីវៈ (TVET) ដើម្បីឱ្យយុវជនកម្ពុជាអាចចាប់យកឱកាសអភិវឌ្ឍន៍សមត្ថភាព ហើយបំពេញក្នុងទីផ្សារការងារ ព្រោះជំនាញខ្លះប្រជាជនខ្មែរយើងអាចធ្វើបានមិនចាំបាច់ពឹងកម្លាំងពលកម្មពីខាងក្រៅនោះទេ តែយុវជនរបស់យើងខ្លះរៀនផុតអស់ ឬទាបជាងជំនាញដែលត្រូវការ។ ទោះជាយ៉ាងនេះក្តី យើងឃើញថា អ្នកជំនាញបច្ចេកទេសរបស់យើងក៏ត្រូវបានបណ្តុះបណ្តាលច្រើនផងដែរពី 1ឆ្នាំទៅ 1ឆ្នាំ ដើម្បីសម្រេចគោលដៅយូរអង្វែង៕

April 11, 2019

Author: ធឿន មករា