ធឿន មករា - La Reine Media

ធនាគារពិភពលោក៖ កំណើនសេដ្ឋកិច្ចកម្ពុជានឹងធ្លាក់មកនៅត្រឹម 7%

ធនាគារពិភពលោក World Bank បានឱ្យដឹងនៅក្នុងរបាយការណ៍សេដ្ឋកិច្ចអាស៊ីអាគ្នេយ៍ របស់ខ្លួនថា នៅឆ្នាំ2019 នេះ សេដ្ឋកិច្ចរបស់កម្ពុជានឹងថយចុះមកនៅត្រឹម 7% ធ្លាក់ចុះពី 7.5%កាលពីឆ្នាំ2018។ ក្រុមការងារធនាគារពិភពលោក (World Bank Group) បានបញ្ជាក់នៅក្នុងរបាយការណ៍នេះថា ការធ្លាក់ចុះនេះ គឺជាលទ្ធផលនៃការព្រួយបារម្ភទាក់ទងនឹងតម្លៃថាមពលខ្ពស់ និងការចំណាយដឹកជញ្ជូននៅក្នុងប្រទេស រួមជាមួយការព្រួយបារម្ភជុំវិញកម្លាំងពលកម្មគ្មានជំនាញ។

ទស្សនវិស័យយូរអង្វែងរបស់ប្រទេសកម្ពុជាពឹងផ្អែកលើសមត្ថភាពរបស់ប្រទេសក្នុងការយកលំហូរចូលវិនិយោគទុនដោយផ្ទាល់ពីបរទេស (FDI) ខណៈកំពុងជំរុញការវិនិយោគក្នុងស្រុក។តម្លៃថាមពល និងការដឹកជញ្ជូនដែលមានតម្លៃថោក កម្លាំងពលកម្មដែលមានជំនាញ និងការផ្សារភ្ជាប់គ្នារវាងខ្សែចង្វាក់ផ្គត់ផ្គង់នឹងមានសារៈសំខាន់ដើម្បីរក្សាការប្រកួតប្រជែង។

ការថមថយអានុភាពនៃកំណើនសេដ្ឋកិច្ចកម្ពុជានៅឆ្នាំ2019 ដល់ឆ្នាំ2021 ត្រូវបានធនាគារពិភពលោកភ្ជាប់ទៅនឹងទីផ្សារសហភាពអឺរ៉ុប។ សហភាពអឺរ៉ុបដែលបានប្រកាសព្យូរជាបណ្តោះ អាសន្ននូវភាពអនុគ្រោះពន្ធសម្រាប់កម្ពុជាលើគ្រប់មុខទំនិញ ឬ Everything-but-arms EBA។ របាយការណ៍ដដែលបានឱ្យដឹងថា៖ “ការបាត់បង់ចំណូលពី EBA ដែលបច្ចុប្បន្នផ្តល់ឱ្យប្រទេសកម្ពុជានូវការមិនបង់ពន្ធនឹងមិនមានកូតាពីសហភាពអឺរ៉ុបអាចនាំឱ្យមានកំណើននាំចេញយឺត”។ បើតាមធនាគារពិភពលោកទីផ្សារសហភាពអឺរ៉ុបបានរួមចំណែកជាង 1ភាគ3 នៃមុខទំនិញនាំចេញសំខាន់ៗរបស់កម្ពុជាដែលមានសម្លៀកបំពាក់ ស្បែកជើង និងទោចក្រយានយន្ត។ អាស្រ័យហេតុនេះការបាត់បង់ភាពអនុគ្រោះ EBA ទំនងជាអាចធ្វើឱ្យកំណើននៃការនាំចេញថយល្បឿនមកវិញ។

ម្យ៉ាងទៀតការថមថយនៃកំណើនសេដ្ឋកិច្ចកម្ពុជាត្រូវបានធនាគារពិភពលោកអះអាងថា ដោយសារតែកម្ពុជាពឹងពាក់ខ្លាំងលើការហូរចូលមូលធនពីប្រទេសចិន ហើយការធ្លាក់ចុះយ៉ាងគំហុករបស់សេដ្ឋកិច្ចក្នុងកាលៈទេសៈណាមួយនឹងជះផលមិនល្អមកលើទស្សនវិស័យនៃកំណើនសេដ្ឋកិច្ចរបស់កម្ពុជាផងដែរ។

លោក លី សុដេត (Ly Sodeth) សេដ្ឋវិទូជាន់ខ្ពស់នៃធនាគារពិភពលោកប្រចាំនៅកម្ពុជា បានថ្លែងថា៖“ជារួមយើងរំពឹងថា កំណើនសេដ្ឋកិច្ចនៅឆ្នាំនេះនឹងយឺតជាងចុងឆ្នាំមុន”។ កំណើនសេដ្ឋកិច្ចរបស់កម្ពុជាបានកើនឡើងកាលពីឆ្នាំមុនដល់ 7.5% ខ្ពស់ជាងការព្យាករដំបូងរបស់ធនាគារ7%”។

លោក លី សុដេត បានបន្ថែមថា៖“ការនាំចេញសម្លៀកបំពាក់ និងស្បែកជើងដែលមានចំនួនជាង2ភាគ3នៃការនាំចេញសរុបរបស់កម្ពុជាបានកើនឡើងខ្ពស់ក្នុងរយៈពេល 4ឆ្នាំ គឺកើនឡើង 17.6%នៅក្នុងឆ្នាំ2018 កើនឡើងពីកំណើន8.3% ដែលបានបង្ហាញនៅក្នុងឆ្នាំ2017”។ កម្មវិធីបញ្ជាទិញសំខាន់ដែលជាការពិត ការនាំចេញសម្លៀកបំពាក់ និងស្បែកជើងទៅសហរដ្ឋអាមេរិក និងសហភាពអឺរ៉ុបបានកើនឡើងយ៉ាងឆាប់រហ័ស ជាមួយនឹងទីផ្សារសហរដ្ឋអាមេរិក កើនឡើងលឿនជាងទីផ្សារអឺរ៉ុប។ នោះជាកត្តាសំខាន់នៅពីក្រោយកំណើនផលិតផលក្នុងស្រុកសរុបដែលរំពឹងទុកកាលពីឆ្នាំមុន”។

លោក Andrew D.Mason ប្រធានសេដ្ឋវិទូប្រចាំតំបន់អាស៊ីបូព៌ា និងប៉ាស៊ីហ្វិករបស់ធនាគារពិភពលោកបានមានប្រសាសន៍ថា កម្ពុជាត្រូវតែយកឈ្នះលើបញ្ហាប្រឈមនេះដើម្បីបន្តមានកំណើនខ្ពស់ក្នុងពេលប៉ុន្មានឆ្នាំខាងមុខនេះ។

លោក Mason បានមានប្រសាសន៍ថា៖“ការសម្លឹងមើលទៅមុខវានឹងមានសារៈសំខាន់ សម្រាប់កម្ពុជាក្នុងការបន្តពង្រឹងភាពប្រកួតប្រជែងរបស់ខ្លួននៅលើទីផ្សារពិភពលោក ដើម្បីរក្សាអត្រាកំណើនខ្ពស់ក្នុងពេលអនាគត។ នេះមានន័យថា វាត្រូវខិតខំកាត់បន្ថយចំណាយលើការធ្វើជំនួញកែលម្អបរិយាកាសធុរកិច្ច ហើយសំខាន់បំផុតគឺពង្រឹងធនធានមនុស្ស និងជំនាញកម្លាំងពលកម្មរបស់ខ្លួន។ ក្នុងរយៈពេលខ្លី ខ្ញុំសូមនិយាយថា វាមិនមែនជាការព្រួយបារម្ភទេ ដែលយើងមើលឃើញពីការធ្លាក់ចុះបន្តិចបន្តួចនៃកំណើននោះទេ”។

នៅចំពោះមុខ ការខ្វះភាពប្រាកដប្រជាបែបនេះវិធានការចាំបាច់រួមមាន ការរក្សាបញ្ជីប្រាក់បៀវត្សរ៍សាធារណៈកុំឱ្យរីកមាឌតទៅទៀត ពង្រឹងសមត្ថភាពឃ្លាំមើល និងត្រៀមឆ្លើយតបវិបត្តិក្នុងវិស័យហិរញ្ញវត្ថុ ចាត់វិធានការប្រុងប្រយ័ត្នផ្នែកម៉ាក្រូសេដ្ឋកិច្ចថែមទៀត ក៏ដូចជាការដាក់កំហិតដល់ធនាគារក្នុងការផ្តល់កម្ចីឲ្យផ្នែកសំណង់ និងអចលនទ្រព្យជាដើម។ នេះជាការលើកឡើងរបស់ធនាគារពិភពលោក។

បើតាមធនាគារពិភពលោក ថ្លៃចំណាយនៅក្នុងការធ្វើធុរកិច្ចក៏ជាឧបសគ្គមួយដល់ការពង្រីកការវិនិយោគ និងសហគ្រិនភាពនៅក្នុងស្រុកផងដែរខណៈកម្ពុជាជាប់លេខរៀងទី183 ក្នុងចំណោម190ប្រទេសនៃការវាស់ស្ទង់ភាពងាយស្រួលក្នុងការចាប់ផ្តើមធុរកិច្ច។

លោកស្រី វិចតូរីយ៉ា ក្វាក្វា អនុប្រធានធនាគារពិភពលោកទទួលបន្ទុកតំបន់អាស៊ីបូព៌ា និងប៉ាស៊ីហ្វិក មានប្រសាសន៍ថា៖ “កំណើនសេដ្ឋកិច្ចមានភាពធន់របស់តំបន់នេះ គួរតែជួយកាត់បន្ថយភាពក្រីក្រដែលបានធ្លាក់នៅកម្រិតទាបរួចទៅហើយក្នុងប្រវត្តិសាស្ត្រ ឱ្យមកនៅកាន់តែទាបថែមទៀត ។ តាមពិតទៅ យើងរំពឹងទុកថា នៅត្រឹមឆ្នាំ2021 ភាពក្រីក្រធ្ងន់ធ្ងរនឹងធ្លាក់ចុះច្រើនមកនៅក្រោម3%”។

លោកស្រីមានប្រសាសន៍បន្តទៀតថា៖ “យ៉ាងណាក៏ដោយ ស្របពេលគ្នានេះពលរដ្ឋប្រហែល 500លាននាក់ក្នុងតំបន់នេះ នៅតែបន្តខ្វះសន្តិសុខផ្នែកសេដ្ឋកិច្ច ហើយប្រឈមនឹងហានិ ភ័យដែលងាយធ្លាក់ចុះទៅក្នុងភាពក្រីក្រវិញ ត្រង់នេះជាការក្រើនរំឭកសំខាន់មួយអំពីទំហំនៃបញ្ហាប្រឈមដែលមានចំពោះអ្នកធ្វើគោលនយោបាយនៅតាមប្រទេសនីមួយៗ”។

របាយការណ៍ធ្វើទឡ្ហីករណ៍ថា ប្រពលភាពរបស់ហានិភ័យមួយចំនួនក៏រំលេចឱ្យឃើញផង ដែរនូវភាពចាំបាច់ក្នុងការបន្តធ្វើការវិនិយោគទៅលើជំនួយឧបត្ថម្ភផ្នែកសង្គមកិច្ច និងកម្មវិធីធានា រ៉ាប់រងដើម្បីការពារពលរដ្ឋដែលងាយរងគ្រោះបំផុត។ បច្ចុប្បន្ននេះ តំបន់អាស៊ីបូព៌ា និងប៉ាស៊ីហ្វិកដែលកំពុងអភិវឌ្ឍន៍មានអត្រាគ្របដណ្តប់របស់ជំនួយផ្នែកសង្គមកិច្ចទាបជាងគេក្នុងចំណោមពលរដ្ឋ20%ដែលក្រីក្របំផុត បើប្រៀបទៅនឹងតំបន់កំពុងអភិវឌ្ឍន៍ដទៃទៀត៕

May 4, 2019

ដឹងប្រវត្តិត្រួសៗពីកំពូលឌីជេ Diplo ដឹងតែញ័រប្រាណចង់រាំ EDM នៅថ្ងៃ ១០ នេះហ្មង!

សម្រាប់ចូលចិត្តតន្ត្រីប៉ែកអឺរ៉ុប ពិសេសចង្វាក់ EDM ប្រាកដជាស្គាល់កំពូលឌីជេលំដាប់ពិភពលោក Diplo ដែលជាអ្នកនៅពីក្រោយចម្រៀងដ៏កក្រើកជាច្រើនរបស់តារាល្បីៗទាំងអឺរ៉ុប និងអាស៊ី។ ថ្ងៃ១០ ឧសភា ២០១៩ នេះ Diplo នឹងធ្វើដំណើរមកកម្ពុជាដើម្បីធ្វើការសម្ដែងជាលើកដំបូងបំផុត តាមរយៈ ការរៀបចំដោយក្រុមហ៊ុន Sabay ។ នេះគឺជាព្រឹត្តិការណ៍ប្រចាំប្រវត្តិសាស្ត្រមួយដែលមនុស្សគ្រប់គ្នាមិនគួររំលង ពិសេសសម្រាប់អ្នកស្រឡាញ់វិស័យតន្ត្រី។ ហើយអ្នកនឹងរឹតតែទាក់ចិត្តចង់ចូលរួមទៀត បើដឹងពីជារឿងរ៉ាវដ៏អស្ចារ្យមួយចំនួនពីឌីជេចាស់វស្សារូបនេះ។

Diplo បានសាងស្នាដៃជាច្រើនក្នុងឧស្សាហកម្មតន្រ្តី បូករួមទាំងការផលិតភ្លេងផ្ទាល់ខ្លួន ការសហការជាមួយកំពូលតារាចម្រៀងល្បីៗ និងអ្នកតន្រ្តីផ្សេងៗ។ លោកត្រូវបានគេស្គាល់ថា ជាឌីជេជើងចាស់ ដែលបានធ្វើឲ្យអ្នកគាំទ្ររីករាយតាមប្រភេទតន្រ្តីជាច្រើនចង្វាក់ដូចជា EDM, Dancehall, Hip Hop, Trap, Moombahton, Electro house និង Pop។

ផលិតករតន្ត្រីរូបនេះបានបំបែកកំណត់ត្រាលើអាជីពរបស់ខ្លួនជាច្រើនលើក ដោយលោកបានឈ្នះពានធំៗជាច្រើនដូចជា MTV European Music Awards, American Music Award for Collaboration of the year ជាដើម។ ក្រៅពីនោះ Diplo ក៏ជាម្ចាស់ពាន Grammy ដល់ទៅ ៣ ហើយក្នុងនោះមានពាន Best Dance Recording ដែលទទួលបានពីបទ “Electricity” ច្រៀងដោយ Dua Lipa និង Mark Ronson ទៀតផង។

បទចម្រៀងល្បីៗមួយជាច្រើនដែលកើតចេញពីទឹកដៃរបស់លោក បានធ្វើឲ្យកក្រើកទឹកចិត្តអ្នកស្រឡាញ់តន្រ្តីពេញពិភពលោកដូចជា “Where Are Ü Now” ច្រៀងដោយ Justin Bieber, Lean On You ច្រៀងដោយ MØ, ”Thunderclouds” ច្រៀងដោយ LSD, “Electricity” ច្រៀងដោយ Silk City និង Dua Lipa, Doctor Pepper” ច្រៀងដោយ CL, “Close To Me” ដោយ Ellie Goulding, Cold Water ដោយ Justin Bieber និង Bubble Butt ដោយ Bruno Mars, 2 Chainz, Tyga & Mystic ជាដើម។

ក្រៅពីជាប់ក្នុងតារាងកំពូលឌីជេទាំង ១០ លំដាប់ពិភពលោកហើយ បុរសវ័យ ៤០ ឆ្នាំនេះក៏ត្រូវបានប្រសិទ្ធនាមជាឌីជេដែលមានតម្លៃខ្លួនខ្ពស់ជាងគេដោយទស្សនាវដ្ដី Forbes ផងដែរ។ មានន័យថា វាជាឱកាសដ៏កម្របំផុត ក្នុងការទទួលបានបទពិសោធន៍រាំលេងជាមួយស្នាដៃរបស់ចាក់ភ្លេងផ្ទាល់ៗរបស់លោក។

កម្មវិធី DIPLO Live in Phnom Penh នឹងរៀបចំឡើងនៅថ្ងៃទី ១០ ឧសភា ២០១៩ នៅ Sound Club ចាប់ពីម៉ោង ១០ យប់តទៅ។ បើចង់ចូលរួម កុំភ្លេចចូលទៅទិញសំបុត្រតាមរយៈ PiPay ជាមួយតម្លៃពិសេសៗដូចជា៖

– Early Bird = ១៥ ដុល្លារ (ចាប់ពីថ្ងៃនេះដល់ថ្ងៃទី៥ ឧសភា ២០១៩)
– Regular = ១៨ ដុល្លារ (ចាប់ពីថ្ងៃទី៦ ដល់ ១០ ឧសភា ២០១៩)
– Gate Price = ២០ ដុល្លារ (នៅថ្ងៃកម្មវិធី ប្រសិនបើនៅសល់)

សម្រាប់ព័ត៌មានលម្អិត សូមចូលទៅកាន់៖

– វិបសាយ៖ diplo.sabay.com

– ទូរសព្ទលេខ៖ 070 555 930

– Facebook៖ [DIPLO Live in Phnom Penh](https://www.facebook.com/events/440865839997170/)

– អ៊ឺម៉ែល៖ [email protected]

May 3, 2019

កម្ពុជា-ចិននឹងចុះ MOU នាំអង្ករចេញ 40ម៉ឺនតោនទៅកាន់ទីផ្សារប្រទេសចិន

ក្រសួងពាណិជ្ជកម្មតាមរយៈក្រុមហ៊ុន ហ្គ្រីនត្រេដដែលជាសេនាធិការបានធ្វើការពិភាក្សាជាមួយក្រុមហ៊ុនសាជីវកម្ម COFCO នៃសាធារណរដ្ឋប្រជាមានិតចិនកាលពីថ្ងៃទី12 ខែមេសា ឆ្នាំ2019 រួចហើយលើការរៀបចំអនុស្សរណៈនៃការយោគយល់គ្នា (MOU) សម្រាប់ពាណិជ្ជកម្មទំនិញអង្ករកម្ពុជាចូលទៅកាន់ទីផ្សារប្រទេសចិន។ នេះបើយោងតាមសេចក្តីជូនដំណឹងរបស់ក្រសួងពាណិជ្ជកម្ម ចេញផ្សាយថ្ងៃទី24 ខែមេសា ឆ្នាំ2019។

សេចក្តីជូនដំណឹងរបស់ក្រសួងពាណិជ្ជកម្មបានឱ្យដឹងថា ដើម្បីជំរុញការនាំចេញអង្ករទៅកាន់ទីផ្សារអន្តរជាតិស្របតាមគោលនយោបាយរបស់រាជរដ្ឋាភិបាល និងពង្រឹងកិច្ចសហប្រតិបត្តិការពាណិជ្ជកម្មទ្វេភាគីកម្ពុជា-ចិននឹងចុះអនុស្សរណៈនៃការយោគយល់គ្នា (MOU) លើពាណិជ្ជកម្មអង្ករ ប្រមាណ 40ម៉ឺនតោននាំចេញទៅកាន់ទីផ្សារប្រទេសចិននៅក្នុងវេទិកាខ្សែក្រវាត់ និងផ្លូវលើកទី2 នៅក្នុងប្រទេសចិន។

សេចក្តីជូនដំណឹងដដែលបានបន្តថា ជាលទ្ធផលភាគីទាំង2 បានឯកភាពគ្នាលើសចេក្តីព្រាងអនុស្សរណៈដើម្បីចុះហត្ថលេខានៅក្នុងវេទិកាខ្សែក្រវាត់ និងផ្លូវលើកទី 2 ដែលដឹកនាំដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជានៅទីក្រុងប៉េកាំងនៃសាធារណរដ្ឋប្រជាមានិតចិន នៅថ្ងៃទី27 ខែមេសា ឆ្នាំ2019។

ចំណុចសំខាន់ៗនៅក្នុងអនុស្សរណៈដែលភាគីទាំង2 បានចុះហត្ថលេខាមានដូចតទៅ៖
– ពាណិជ្ជកម្មអង្ករ៖ ភាគីចិនយល់ព្រមទិញអង្ករ ផ្កាម្លិះ អង្ករក្រអូប អង្ករស និងចុងអង្កររបស់ប្រទេសកម្ពុជាក្នុងបរិមាណ 40ម៉ឺនតោន ចាប់ពីខែសីហា ឆ្នាំ2019 រហូតដល់ចុងខែធ្នូ ឆ្នាំ2020។

– យន្តការអនុវត្តន៍៖ អនុស្សរណៈនេះនឹងចូលជាធរមានភ្លាម បន្ទាប់ពីគូភាគីទាំង2 អនុវត្តបញ្ចប់ដោយជោគជ័យនូវអនុស្សរណៈដំបូងដែលបានចុះហត្ថលេខា កាលពីថ្ងៃទី11 ខែមករា ឆ្នាំ2018 ស្តីពីការចូលអង្ករចំនួន 30ម៉ឺនតោន។

– យន្តការត្រួតពិនិត្យធុរកិច្ច៖ គូភាគីទាំង2 នឹងបង្កើតយន្តការត្រួតពិនិត្យធុរកិច្ចរួម ដើម្បីតាមដានការអនុវត្តអនុស្សរណៈរៀងរាល់ត្រីមាស ដើម្បីដោះស្រាយបញ្ហាប្រឈមនានា ដែលអាចកើតឡើងជាយថាហេតុ អំឡុងពេលអនុស្សរណៈនៃការយោគយល់គ្នានេះ។

យោងតាមរបាយការណ៍ផ្លូវការបានឱ្យដឹងថា ការនាំចេញអង្កររបស់កម្ពុជាទៅកាន់ប្រទេសចិនបានកើនឡើង59% នៅត្រីមាសទី1 ឆ្នាំនេះ ដោយបាននាំចេញអង្ករចំនួន 75,214តោនទៅប្រទេសចិននៅត្រីមាសដំបូងឆ្នាំ2019 ដែលកើនឡើង59% ធៀបនឹងរយៈពេលដូចគ្នាកាលពីឆ្នាំមុន។

របាយការណ៍របស់លេខាធិការដ្ឋានសេវាច្រកចេញចូលតែមួយសម្រាប់ការនាំចេញអង្ករបានឱ្យដឹងថា ប្រទេសចិនជាអ្នកទិញស្រូវអង្ករធំជាងគេនៅក្នុងអំឡុងពេលពីខែមករា ដល់ខែមីនា ឆ្នាំនេះដោយបានបន្ថែមថា ការនាំចេញទៅកាន់ប្រទេសចិនមានចំនួន 44%នៃការនាំអង្ករចេញសរុបរបស់ប្រទេស។

យោងតាមរបាយការណ៍បានឱ្យដឹងថា ប្រទេសអាស៊ីអាគ្នេយ៍បាននាំចេញអង្ករសរុបចំនួន170,821តោនក្នុងរយៈពេល 3ខែដំបូងនៃឆ្នាំនេះកើនឡើង6% ធៀបនឹងរយៈពេលដូចគ្នាកាលពីឆ្នាំមុន។

តួលេខបានបង្ហាញថា តំបន់នេះបាននាំចេញអង្ករ 51,552តោនទៅទីផ្សារអឺរ៉ុបក្នុងអំឡុងពេលនេះពោលគឺ ធ្លាក់ចុះ33% ដោយសារតែសហភាពអឺរ៉ុបបានដាក់ពន្ធលើអង្ករពីប្រទេសកម្ពុជាកាលពីដើមឆ្នាំនេះ ក្នុងគោលបំណងដើម្បីទប់ស្កាត់ការនាំចូលអង្ករពីព្រះរាជាណាចក្រកម្ពុជា៕

May 3, 2019

រាជរដ្ឋាភិបាលរៀបចំគោលនយោបាយអភិវឌ្ឍន៍វិស័យទេសចរណ៍

រាជរដ្ឋាភិបាលកម្ពុជាបានចាប់ផ្តើមរៀបចំគោលនយោបាយអភិវឌ្ឍន៍វិស័យទេសចរណ៍ហើយ ដើម្បីចូលរួមចំណែកក្នុងការអភិវឌ្ឍវិស័យទេសចរណ៍ដែលជាជន្ទល់ទ្រទ្រង់កំណើនសេដ្ឋកិច្ចជាតិឱ្យកាន់តែរឹងមាំ និងប្រកបទៅដោយនិរន្តរភាព។

យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ(ចុះថ្ងៃទី19-04-19)បានឱ្យដឹងថា ដោយហេតុថាផលិតផលទេសចរណ៍កម្ពុជានៅមានកម្រិត បើធៀបនឹងប្រទេសជិតខាង កម្ពុជាត្រូវធ្វើពិពិធកម្មផលិតផលទេសចរណ៍ជាចាំបាច់សំដៅលើកកម្ពស់ភាពប្រកួតប្រជែងនៃវិស័យទេសចរណ៍កម្ពុជា ជាពិសេសទេសចរណ៍បែបវប្បធម៌ និងធម្មជាតិដែលជាផលិតផលឈានមុខគេរបស់កម្ពុជា។

សេចក្តីប្រកាសព័ត៌មានដដែលបន្តថា ការលើកកម្ពស់សេវាមួយស្តង់ដារមួយ គឺជាបទដ្ឋាននៃសេវាទេសចរណ៍ឱ្យស្របទៅតាមស្តង់ដារអាស៊ាន ស្របពេលដែលទស្សនវិស័យនៃបុគ្គលិកម្នាក់ជំនាញមួយ ជាការគិតគូថ្មី សំដៅរួមចំណែកដល់ការអភិវឌ្ឍធនធានមនុស្សក្នុងវិស័យទេសចរណ៍នៅកម្ពុជាតាមរយៈការបង្កើនចំនួន និងគុណភាពនៃសាលាបណ្តុះបណ្តាលវិជ្ជាជីវៈទេសចរណ៍។

ក្រសួងទេសចរណ៍បានរៀបចំវិធានការក្នុងការលើកស្ទួយវិស័យទេសចរណ៍កម្ពុជាតាមរយៈការអភិវឌ្ឍផលិតផលទេសចរណ៍ ការលើកកម្ពស់សេវាមួយស្តង់ដារមួយ បុគ្គលិកម្នាក់ជំនាញមួយ និងទេសចរណ៍វៃឆ្លាត(Smart Tourism)។

ជាមួយគ្នានេះ ការអភិវឌ្ឍវិស័យទេសចរណ៍វៃឆ្លាតសំដៅដល់ការធ្វើឌីជីថលរូបនីយកម្ម(Digitalization)ក្នុងដំណើរការនៃការគ្រប់គ្រង និងអភិវឌ្ឍន៍វិស័យទេសចរណ៍ ការធ្វើដំណើរ បដិសណ្ឋារកិច្ច និងឧស្សាហកម្មម្ហូបអាហារជាដើម។

វិធានការខាងលើត្រូវបានគាំទ្រដោយអភិក្រម4 ដែលជាគោលការណ៍គ្រឹះនៃផែនការអភិវឌ្ឍន៍វិស័យទេសចរណ៍ រួមមានការពង្រឹងយន្តការស្ថាប័ន ការផ្សព្វផ្សាយក្នុងប្រទេស និងក្រៅប្រទេស និងការសម្របសម្រួលការធ្វើដំណើរ និងការដឹកជញ្ជូនទេសចរណ៍។

សូមបញ្ជាក់ថា ក្រសួងសេដ្ឋកិច្ច និងហិរញ្ញវត្ថុដែលបានបើកកិច្ចប្រជុំស្តីពីគោលនយោបាយអភិវឌ្ឍន៍វិស័យទេសចរណ៍កម្ពុជាក្រោមអធិបតីភាពឯកឧត្តម អូន ព័ន្ធមុន្នីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុដែលមានការចូលរួមពីមន្ត្រីបច្ចេកទេសរបស់ក្រសួងស្ថាប័នពាក់ព័ន្ធជាច្រើន បានគាំទ្រចំពោះវិធានការរបស់ក្រសួងទេសចរណ៍កម្ពុជាដែលបានដាក់ចេញនូវរបៀបវារៈចំនួន3 ជាសំខាន់គឺ៖ 1-វិធានការចាំបាច់ដើម្បីលើកស្ទួយវិស័យទេសចរណ៍។ 2-ការលើកទឹកចិត្តដល់គោលនយោបាយទេសចរណ៍ផ្ទះសម្រាប់ទេសចរណ៍វ័យចំណាស់ និង3-ការរៀបចំផែនការមេអភិវឌ្ឍន៍ខេត្តរតនគិរីឱ្យទៅជាសមាហរណកម្មពិសេស និងការរៀបចំផែនការមេ និងផែនការសកម្មភាពជម្រុញអភិវឌ្ឍន៍ខេត្តកែបឱ្យក្លាយជា“តំបន់ទេសចរណ៍សម្រាកលម្ហែកម្រិតខ្ពស់” ;និងជាតំបន់ទេសចរណ៍ធម្មជាតិ។

ចំពោះវិធានការទី1 និងទី2 ក្នុងការលើកស្ទួយវិស័យទេសចរណ៍នោះ រាជរដ្ឋាភិបាលកម្ពុជាតាមរយៈក្រសួងទេសចរណ៍បាន និងកំពុងអនុវត្តជាបណ្តើរៗហើយ តែដោយឡែកចំពោះវិធានការទី3 ការរៀបចំប្លង់មេដើម្បីដាំបន្លែ និងផ្កា ពិសេសរៀបចំសាងសង់ព្រលានយន្តហោះនៅខេត្តមណ្ឌលគិរីដើម្បីលើកកម្ពស់វិស័យទេសចរណ៍ និងការដឹកជញ្ជូននោះនឹងមានការពិភាក្សាបន្ថែមទៀត។

ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍បានមានប្រសាសន៍ថា ក្នុងការដឹកនាំមន្ត្រីក្រសួងជួបប្រជុំជាមួយឯកឧត្តមបណ្ឌិសភាចារ្យ អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុដើម្បីពិភាក្សា និងរៀបចំផែនការមេអភិវឌ្ឍន៍នៅខេត្តមណ្ឌលគិរី និងបណ្តាខេត្តមួយចំនួនទៀតនោះ គឺសម្រាប់ខេត្តមណ្ឌលគិរី ជាខេត្តមានលក្ខខណ្ឌអាកាសធាតុល្អប្រសើរ ដែលអាចដាំបន្លែ និងផ្កាសម្រាប់ផ្គត់ផ្គង់ក្នុងស្រុក ព្រោះបច្ចុប្បន្នយើងបាននាំចូលបន្លែ និងផ្កាជាច្រើនពីប្រទេសជិតខាង។

ឯកឧត្តមបណ្ឌិតបន្តថា៖“នៅក្នុងផែនការនេះ គឺរដ្ឋាភិបាលនឹងសាងសង់ព្រលានយន្តហោះខ្នាតតូចមួយដើម្បីដឹកជញ្ជូនភ្ញៀវទេសចរទៅទស្សនានៅខេត្តនេះ និងសម្រាប់ដឹកជញ្ជូនទំនិញ បន្លែ ផ្កាសម្រាប់ផ្គត់ផ្គង់ទីផ្សារទេសចរណ៍ដទៃទៀត។ លោកបន្តថា ការសម្រេចផែនការនេះនឹងធ្វើឱ្យកម្ពុជាចំណេញច្រើន ដោយកាត់បន្ថយការធ្លុះធ្លាយលើវិស័យទេសចរណ៍បានច្រើន”។

ឯកឧត្តម ថោង ខុន បានបន្តថា ផែនការនេះនឹងបញ្ចប់ការសិក្សាក្នុងរយៈពេល 6ខែ ហើយនៅពេលសិក្សាចប់ រដ្ឋាភិបាលនឹងអនុវត្តផែនការដោយកសាងហេដ្ឋារចនាសម្ព័ន្ធនានាដើម្បីផ្តល់ឱកាស និងលើកទឹកចិត្តដល់វិស័យឯកជនឱ្យចូលរួមក្នុងការវិនិយោគលើគម្រោងនេះ។

ដោយឡែកចំពោះវិធានការទី3 ដដែលនេះ រាជរដ្ឋាភិបាលក៏បាននិងកំពុងរៀបចំខេត្តកែបឱ្យក្លាយជាតំបន់ទេសចរណ៍កម្រិតខ្ពស់ ដែលការអភិវឌ្ឍខេត្តកែបឱ្យក្លាយទៅជាតំបន់ទេសចរណ៍សម្រាកលម្ហែកម្រិតខ្ពស់នេះ គឺរាប់បញ្ចូលទាំងទីក្រុងឆ្នេរខ្សាច់ កោះ ផ្សារ កំពង់ផែទេសចរណ៍ ភូមិដ្ឋានប្រជាពលរដ្ឋ មូលដ្ឋានអាជីវកម្មសេវាកម្មទេសចរណ៍ ក៏ដូចជារមណីយដ្ឋានទេសចរណ៍នានាផងដែរ ប៉ុន្តែអាចនឹងមិនមានការបង្កើតឱ្យមាន “កាស៊ីណូ” និងរោងចក្រសហគ្រាសឡើយ។

ឯកឧត្តមរដ្ឋមន្ត្រីក្រសួងទេសចរណ៍បានមានប្រសាសន៍ឱ្យដឹងថា កន្លងមករាជរដ្ឋាភិបាលបានគិតបែបនេះ ហើយបាននិងកំពុងចាប់ផ្តើមរៀបចំផែនការមេដើម្បីរៀបចំខេត្តកែបជាតំបន់ទេសចរណ៍កម្រិតខ្ពស់ និងជាតំបន់ទេសចរណ៍បៃតង ជាពិសេសការរៀបចំហេដ្ឋារចនាសម្ព័ន្ធនានា ដើម្បីបម្រើវិស័យទេសចរណ៍ឱ្យបានល្អប្រសើរក្នុងការផ្តល់សេវាកម្ម និងការធ្វើបដិសណ្ឋារកិច្ចឱ្យបានកាន់តែល្អសម្រាប់ភ្ញៀវទេសចរផងដែរ។

ឯកឧត្តម ថោង ខុន បានបញ្ជាក់ថា៖“ហេតុនេះហើយទើបរាជរដ្ឋាភិបាលកម្ពុជាកំពុងត្រៀមរៀបចំខេត្តកែបឱ្យទៅជាតំបន់ទេសចរណ៍កម្រិតខ្ពស់ ជាតំបន់ទេសចរណ៍បៃតងដោយមិនអនុញ្ញាតឱ្យមានរោងចក្រសហគ្រាស និងការវិនិយោគកាស៊ីណូនៅក្នុងខេត្តនេះទេ”។

ក្រសួងទេសចរណ៍ក៏បានលើកទឹកចិត្តឱ្យមានការបង្កើតលំនៅឋានទី2 សម្រាប់ភ្ញៀវទេសចរវ័យចំណាស់ ឬចូលនិវត្តន៍នៅខេត្តកែបនេះផងដែរ ដើម្បីឱ្យពួកគេពន្យារពេលក្នុងការទស្សនា និងស្នាក់នៅក្នុងរយៈពេលយូរក្នុងប្រទេសកម្ពុជា ដែលជំរុញឱ្យពួកគេមានការចំណាយច្រើន។

បើតាមឯកឧត្តម ថោង ខុន ក្រៅពីគម្រោងអភិវឌ្ឍន៍ខេត្តកែបនេះ រាជរដ្ឋាភិបាលក៏បានសម្រេចលើការសិក្សារៀបចំ “ខេត្តកំពតទៅជាតំបន់ទេសចរណ៍វប្បធម៌បេតិកភណ្ឌ និងកសិ-ទេសចរណ៍”ក្នុងពេលដែលរាជរដ្ឋាភិបាលបាននិងកំពុងសាងសង់កំពង់ផែទេសចរណ៍អន្តរជាតិមួយ ក្នុងគម្រោងកិច្ចសហប្រតិបត្តិការមហាអនុតំបន់ទន្លេមេគង្គដែលអាចនឹងបញ្ចប់នៅដើមឆ្នាំ2020 ខាងមុខផងដែរ៕

May 3, 2019

កាសែតឡារ៉ែន ពាណិជ្ជ លេខ 171

[easy_media_download url=”https://www.lareine.com.kh/wp-content/uploads/2019/04/LRPN_171-Final-For-Web.pdf” force_dl=”1″]

April 28, 2019

ឆ្នាំ2050 មនុស្សលើពិភពលោកជាង22% នឹងក្លាយជាមនុស្សចាស់ តើនឹងមានអ្វីកើតឡើង?

បញ្ហាអាយុរបស់ប្រជាជនមិនទាន់ក្លាយជាបញ្ហាប្រឈមខ្លាំងនោះទេសម្រាប់កម្ពុជា ព្រោះប្រទេសយើងមានប្រជាជនវ័យក្មេងច្រើនជាងគេក្នុងតំបន់។ បញ្ហានេះបានធ្វើឱ្យប្រទេសកម្ពុជាកំពុងស្ថិតក្នុងចំណាប់អារម្មណ៍របស់អ្នកវិនិយោគ និងបណ្តាប្រទេសមួយចំនួនក្នុងតំបន់ ខណៈពេលដែលប្រទេសអភិវឌ្ឍន៍នានាដូចជាជប៉ុនជាដើមកំពុងប្រឈមនឹងបញ្ហាចំនួនមនុស្សចាស់កាន់តែច្រើនឡើងៗ តែទោះជាយ៉ាងនេះក្តី កំណើនប្រជាជននឹងចាប់ផ្តើមកើនឡើងពី 1ឆ្នាំទៅ 1ឆ្នាំ ហើយចំនួនប្រជាជនវ័យក្មេងដ៏ច្រើននាពេលបច្ចុប្បន្ននឹងក្លាយជាមនុស្សចាស់នៅប្រមាណជាង 30ឆ្នាំទៅមុខទៀត ដែលវាអាចនឹងក្លាយជាបញ្ហាប្រឈមសម្រាប់យើងទាំងអស់គ្នា ដែលទាមទារឱ្យមានការគិតគូរ និងត្រៀមខ្លួនដោះស្រាយ។

យោងតាមប្រភពពីធនាគារ Deutsche Bank ដែលបានដកស្រង់ការផ្សាយដោយវេទិកាសេដ្ឋកិច្ចពិភពលោកបានឱ្យដឹងថា បច្ចុប្បន្ននេះនៅលើពិភពលោកមានមនុស្សវ័យច្រើនជាង 65ឆ្នាំ និងតិចជាង 5ឆ្នាំកាន់តែកើនឡើងជាបន្តបន្ទាប់ ដែលចំនួននេះបានបង្កើតនូវក្តីព្រួយបារម្ភសម្រាប់គ្រប់ប្រទេសទាំងអស់ក្នុងពិភពលោក។ ទន្ទឹមនឹងនេះទិន្នន័យរបស់អង្គការសហប្រជាជាតិក៏បានបញ្ជាក់ដែរថា មនុស្សចំនួន22% នៅលើពិភពលោកនឹងមានអាយុច្រើនជាង 60ឆ្នាំ ដែលជាអាយុត្រូវចូលនិវត្តន៍នៅឆ្នាំ 2050ខាងមុខនេះ។ បញ្ហានេះបានក្លាយជាកត្តាប្រឈមធំមួយសម្រាប់វិស័យសេដ្ឋកិច្ចនៅលើពិភពលោក នាថ្ងៃអនាគត បើទោះបីជាសេដ្ឋកិច្ចបច្ចុប្បន្ននេះកំពុងមានការអភិវឌ្ឍ និងប្រែប្រួលយ៉ាងលឿនដោយសារវត្តមាននៃបច្ចេកវិទ្យាយ៉ាងណាក៏ដោយ។

ទិន្នន័យដែលចេញដោយវេទិកាសេដ្ឋកិច្ចពិភពលោកបានបញ្ជាក់ថា បញ្ហាប្រឈមដែលអាចនឹងកើតឡើង គឺចំនួនមនុស្សចាស់ដ៏ច្រើននេះនឹងធ្វើឱ្យរដ្ឋាភិបាលនៃប្រទេសនីមួយៗត្រូវបង្កើនការចំណាយលើវិស័យសុខាភិបាល និងការថែទាំសុខភាពមនុស្សចាស់ព្រោះមនុស្សចាស់ត្រូវតែទៅមន្ទីរពេទ្យច្រើនជាងវ័យកណ្តាល។ ក្រៅពីនេះ មនុស្សចាស់ដែលចូលនិវត្តន៍ និងឈប់ធ្វើការងារកាន់តែមានចំនួនច្រើនឡើងៗ ដែលធ្វើឱ្យចំណូលរបស់គាត់ថយចុះ ហើយការបង់ពន្ធលើប្រាក់ចំណូលក៏ត្រូវធ្លាក់ចុះផងដែរ។ កត្តានេះធ្វើឱ្យរដ្ឋាភិបាលនៃប្រទេសនីមួយៗត្រូវបង្កើនការចំណាយស្របពេលដែលចំណូលមួយផ្នែកតូចត្រូវថយចុះ។

ដើម្បីឆ្លើយតបនឹងបញ្ហានេះ រដ្ឋាភិបាលនៃប្រទេសនីមួយៗចាំបាច់ត្រូវខិតខំប្រឹងប្រែងក្នុងការអភិវឌ្ឍធនធានមនុស្សដល់ប្រជាជនជំនាន់ថ្មី ជាពិសេសប្រជាជនសកម្ម ឱ្យធ្វើការងារកាន់តែខ្លាំង និងបង្កើនប្រសិទ្ធភាពការងារឱ្យកាន់តែខ្ពស់ដើម្បីប្រមូលធនធានទប់ទល់នឹងការចំណាយ។ បញ្ហានេះត្រូវបានគេមើលឃើញថា វានឹងក្លាយជាកត្តាប្រឈមក្នុងវិស័យសេដ្ឋកិច្ចនៅក្នុងសតវត្សរ៍ទី21នេះ ដែលវាមិនត្រឹមតែទាមទារឱ្យយកចិត្តទុកដាក់ខ្លាំងសម្រាប់រដ្ឋាភិបាលប៉ុណ្ណោះទេ តែយុវជនខ្លួនឯងក៏ត្រូវតែដឹង និងត្រៀមខ្លួនសម្រាប់ខិតខំដើម្បីបង្កើនប្រសិទ្ធភាពការងារផងដែរ។

ម្យ៉ាងវិញទៀត បញ្ហាដែលអាចនឹងកើតឡើងមួយផ្សេងទៀតគឺ មនុស្សចាស់នៅគ្រប់ប្រទេសទាំងអស់លើពិភពលោកត្រូវបានគេមើលឃើញថា ចូលចិត្តសន្សំច្រើនជាងចំណាយលុយរបស់គាត់ ដែលបញ្ហានេះធ្វើឱ្យសេដ្ឋកិច្ចនៅលើពិភពលោកនាពេលអនាគតអាចមានកំណើនយឺត។

ទោះជាយ៉ាងនេះក្តី ដើម្បីត្រៀមខ្លួនដោះស្រាយជាមួយបញ្ហាទាំងអស់នេះ បណ្តាប្រទេសមួយចំនួនដែលកំពុងប្រឈមជាមួយនឹងបញ្ហាទាំងអស់នេះបានចាប់ផ្តើមខិតខំប្រឹងប្រែងរិះរកវិធីសាស្ត្រដើម្បីសម្រាលបន្ទុក និងប្រែក្លាយបញ្ហាឱ្យទៅជារឿងល្អសម្រាប់មនុស្សជាតិទូទៅនៅថ្ងៃអនាគត។

នៅប្រទេសមួយចំនួន គឺចាប់ផ្តើមរៀបចំ និងបង្កើតជំនាញថ្មីៗជាច្រើនដើម្បីឱ្យមនុស្សចាស់អាចមានលទ្ធភាពធ្វើការងារដែលស្របនឹងវ័យរបស់ពួកគាត់។ ការធ្វើបែបនេះនឹងធ្វើឱ្យមនុស្សចាស់មានលទ្ធភាពកាន់តែខ្ពស់ និងកាត់បន្ថយភាពឯកោបានទៀតផង។ ម្យ៉ាងវិញទៀតដើម្បីដោះស្រាយបញ្ហាសេដ្ឋកិច្ចដែលកើតឡើងនៅថ្ងៃអនាគត មនុស្សក៏ចាប់ផ្តើមរិះរកច្រកបន្ថែមដើម្បីទប់ស្កាត់ និងធ្វើឱ្យកាន់តែប្រសើរឡើងលើវិស័យគាំពារមនុស្សចាស់ដោយចំណាយតិចតែទទួលបានផលិតភាពខ្ពស់។

ចំពោះបច្ចេកវិទ្យាវិញ ដោយសារបច្ចុប្បន្ននេះការធ្វើស្វ័យប្រវត្តិកម្មចាប់ផ្តើមត្រូវបានគេប្រើប្រាស់ច្រើននោះ វាក៏ជាច្រកសំខាន់មួយដែលអាចឱ្យមនុស្សចាស់ប្រើប្រាស់វា និងទទួលយកផលប្រយោជន៍ពីវាបានកាន់តែច្រើនផងដែរ។ ជាក់ស្តែងនៅប្រទេសជប៉ុន មានហាងមួយបានចាប់ផ្តើមឱ្យមនុស្សដែលមានពិការភាព ប្រើប្រាស់មនុស្សយន្តឱ្យធ្វើការជំនួសដើម្បីបង្កើតការងារដល់ពួកគេ និងបង្កើតប្រាក់ចំណូល ដោយពួកគេគ្រាន់តែនៅបញ្ជាមនុស្សយន្តពីលើគ្រែ ឬកន្លែងរស់នៅរបស់ពួកគេប៉ុណ្ណោះ៕

April 27, 2019

1ត្រីមាសដើមឆ្នាំ កម្ពុជានាំចេញផលិតផលកសិកម្ម ទៅកាន់ទីផ្សារបរទេសជាង 1.4លានតោន និងបន្លែស្រស់ជាង 50តោន

បើទោះបីជាកម្ពុជារងសម្ពាធពីបណ្ដាប្រទេសធំៗមួយចំនួនលើការនាំចេញផលិតផលផ្សេងៗក៏ដោយ តែសម្រាប់ផលិតផលកសិកម្មកម្ពុជានៅតែមានភាពល្អប្រសើរដដែល ជាក់ស្ដែងក្នុងរយៈពេល 3ខែដើមឆ្នាំ2019 នេះ កម្ពុជាបាននាំចេញផលិតផលកសិកម្មសរុបជាផ្លូវការប្រមាណ1.4លានតោន។ ដោយឡែកការផ្គត់ផ្គង់បន្លែស្រស់ទៅកាន់ទីផ្សារអឺរ៉ុបមានប្រមាណជាង 50តោន។ នេះបើយោងតាមប្រសាសន៍រដ្ឋមន្ត្រីក្រសួងកសិកម្ម រុក្ខា ប្រមាញ់ និងនេសាទកាលពីដំណាច់ខែមីនា ឆ្នាំ2019។

ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខា ប្រមាញ់ និងនេសាទបានបញ្ជាក់ថា៖“បូករួមទាំងផលិតផលកសិកម្មដទៃទៀត មានអង្ករ និងដំឡូងមីជាដើមនោះ កម្ពុជាបាននាំចេញទិន្នផលកសិកម្មទៅកាន់ទីផ្សារបរទេសរហូតដល់ទៅប្រមាណជា 2លានតោនក្នុងពេលជិត 3ខែកន្លងមកនេះ។ តាមទិន្នន័យដែលគិតត្រឹមថ្ងៃទី25 ខែមីនាកន្លងទៅក៏មានការបែងចែកជា 2ផងដែរ ពោលគឺការនាំចេញផលិតផលកសិកម្មជាផ្លូវការមានជាង 1.4លានតោន និងការនាំចេញក្រៅផ្លូវការជាង 1លានតោនទៀត”។

ឯកឧត្តមរដ្ឋមន្ត្រីបានបន្ថែមថា សម្រាប់ផលិតផលចេកអំបូងលឿងដែលកម្ពុជាទើបតែទទួលបានកូតានាំចេញទៅកាន់បណ្ដាប្រទេសមួយចំនួននោះក៏ឃើញថាមានភាពល្អប្រសើរផងដែរ ក្នុងនោះនៅរយៈពេលដូចគ្នាដែរនេះ ការនាំចេញចេកអំបូងរបស់កម្ពុជាទៅកាន់ទីផ្សារអន្តរជាតិ សម្រេចបានប្រមាណ 1.6ម៉ឺនតោន និងផ្លែស្វាយបានជិត 1.5ម៉ឺនតោនទៅកាន់ទីផ្សារលើពិភពលោក ក្នុងនោះក៏មានប្រទេសរុស្ស៊ី ប្រទេសអាមេរិក និងបណ្ដាប្រទេសអឺរ៉ុបផងដែរ។

ឯកឧត្តមមន្ត្រីបន្តថា បច្ចុប្បន្នទីផ្សារនាំចេញផលិតផលកសិកម្មសំខាន់ៗរបស់កម្ពុជា រួមមានប្រទេសបារាំងមានប្រមាណ 40% ចិនមានប្រមាណ 40% រួមទាំងទីផ្សារអឺរ៉ុប និងទីផ្សារប្រទេសក្នុងតំបន់អាស៊ានផងដែរ។ ដោយឡែកការនាំចេញចេកអំបូងលឿងពីកម្ពុជាដោយផ្ទាល់ទៅកាន់ទីផ្សារប្រទេសចិន បានចាប់ផ្ដើមជាផ្លូវការកាលពីខែមករា ឆ្នាំ2019 ក្រោយកម្ពុជា និងចិនបានចុះកិច្ចព្រមព្រៀងលើពិធីសារមួយដែលអាចនាំចេញទៅកាន់ប្រទេសចិនបាន ដោយប្រទេសចិនបានអនុញ្ញាតឱ្យកម្ពុជានាំ-ចេញផ្លែចេក 30ម៉ឺនតោនក្នុង 1ឆ្នាំ។

ឯកឧត្តម វេង សាខុន បានមានប្រសាសន៍ទៀតថា៖ “ជំហានថ្មីមួយទៀតរបស់កម្ពុជានោះគឺដោយសារតែមានកិច្ចសហការជាមួយក្រុមហ៊ុនអាកាសចរណ៍មួយ ឆ្នាំ2019 នេះកម្ពុជាក៏បាននាំចេញបន្លែស្រស់ទៅកាន់បណ្ដាប្រទេសអឺរ៉ុប ដូចជាប្រទេសបារាំង និងអង់គ្លេស ដែលរហូតមកដល់ពេលនេះ កម្ពុជាបាននាំចេញបន្លែស្រស់ទៅកាន់ប្រទេសទាំងនោះជាការសាកល្បងបានប្រមាណជាង 50តោនហើយ នេះមិនទាន់បូកបញ្ចូលការនាំចេញក្រៅផ្លូវការទៅកាន់ប្រទេសជិតខាង ដូចជាវៀតណាម និងថៃនៅឡើយផង”។

ឯកឧត្តមរដ្ឋមន្ត្រី រំពឹងថា នៅពេលដែលរដ្ឋាភិបាលបានរៀបចំអាកាសយានដ្ឋានបានល្អ និងធំជាងមុននោះ វានឹងអនុញ្ញាតឱ្យយន្តហោះធំៗអាចចុះចតបាន ហើយក៏អាចដឹកជញ្ជូនផលិតផលកសិកម្មទៅកាន់ទីផ្សារអន្តរជាតិបានកាន់តែច្រើនឡើងដែរ។

ឯកឧត្តមរដ្ឋមន្ត្រីក្រសួងកសិកម្ម រុក្ខា ប្រមាញ់ និងនេសាទបានបន្តថា៖ “ ការនាំចេញក្រៅផ្លូវការនៃកសិផលរបស់កម្ពុជាទៅវៀតណាម ជាពិសេសការនាំចេញស្រូវ គិតត្រឹមរយៈជាង 2ខែ 25ថ្ងៃនៃដើមឆ្នាំ2019 នេះ មានចំនួន 1លានសែន2ម៉ឺនតោន ដែលជាតួលេខមិនបានកត់ត្រាពីស្ថាប័នគយ ”។

ឯកឧត្តមបន្តទៀតថា សម្រាប់ផលិតផលកសិកម្មដែលកម្ពុជាផលិតបានក្នុងឆ្នាំ2018-ដើមឆ្នាំ2019 នេះ សរុបប្រមាណ 27លានតោន ហើយជាក់ស្ដែងនៅតាមដងផ្លូវជាតិសំខាន់ៗ គេឃើញមានការដឹកជញ្ជូនផលិតផលកសិកម្មចេញទៅក្រៅប្រទេស និងពីបណ្ដាខេត្តមករាជធានីភ្នំពេញជាដើម ។

ឯកឧត្តមបានបន្តទៀតថា៖“សម្រាប់ផលិតផលស្រូវអង្ករដែលជាផលិតផលកសិកម្មដ៏សំខាន់ គេសង្កេតឃើញថា ទីផ្សារអឺរ៉ុបនៅតែជាទីផ្សារសំខាន់ដោយក្នុងនោះ 30%នៃការនាំចេញអង្ករសរុបបាននាំចេញទៅបណ្ដាប្រទេសអឺរ៉ុប ហើយក្នុងចំណោមបណ្ដាប្រទេសនៅអឺរ៉ុបនោះដែរ ប្រទេសបារាំងជាអ្នកបញ្ជាទិញច្រើនជាងគេ ដែលមានរហូតដល់ទៅ 40%នៃចំនួននាំចូលទៅទីផ្សារអឺរ៉ុបទាំងមូល។ ក្រៅពីនោះនៅមានទីផ្សារចិន និងបណ្ដាទីផ្សារនៅក្នុងតំបន់អាស៊ានមួយចំនួនផងដែរ”។

ដោយឡែកឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ក៏បានស្នើដល់បណ្ដាវិនិយោគិនបរទេសនានាឱ្យបណ្ដាក់ទុនវិនិយោគលើវិស័យកសិកម្ម ជាពិសេសការកែច្នៃកសិផលក្នុងស្រុក ដើម្បីនាំចេញជាជាងនាំចេញផលិតផលមុនសម្រេចទៅកាន់ទីផ្សារអន្តរជាតិ៕

April 27, 2019

ក្រុមហ៊ុនធានារ៉ាប់រងអាយុជីវិត ដាយ អ៊ិឈិ ឡាយហ្វ៍ គ្រុប បានប្រកាសបើកសម្ពោធជាផ្លូវការនូវក្រុមហ៊ុន ដាយ អ៊ិឈិ ឡាយហ្វ៍ (ខេមបូឌា) ម.ក ជាក្រុមហ៊ុនធានារ៉ាប់រងអាយុជីវិតជប៉ុនដំបូងគេនៅព្រះរាជាណាចក្រកម្ពុជា

រាជធានីភ្នំពេញ – ពិធីបើកសម្ពោធក្រុមហ៊ុនធានារ៉ាប់រងជីវិត ដាយ អ៊ិឈិ ឡាយហ្វ៍ (ខេមបូឌា) ម.ក ។

ដាយ អ៊ិឈិ ឡាយហ្វ៍ (ខេមបូឌា) ម.ក ដែលប្រព្រឹត្តទៅនៅថ្ងៃពុធ ទី24 ខែមេសា ឆ្នាំ2019 នៅការិយាល័យ កណ្តាលរបស់ខ្លួន ដែលមានទីតាំងស្ថិតនៅអគារ Vattanac Capital ក្នុងរាជធានីភ្នំពេញ។

ក្រុមហ៊ុនធានារ៉ាប់រងជីវិត ដាយ អ៊ិឈិ ឡាយហ្វ៍ (ខេមបូឌា) ម.ក គឺជាក្រុមហ៊ុនបុត្រសម្ព័ន្ធ 100% របស់ក្រុមហ៊ុនដាយ អ៊ិឈិ ឡាយហ្វ៍ ហូលឌីង (“Dai-ichi Life Group”) ដែលមានទីស្នាក់ការនៅទីក្រុងតូក្យូ ប្រទេសជប៉ុន ដែលត្រូវបានបង្កើតឡើងនៅក្នុងឆ្នាំ1902។ ក្រុមហ៊ុន ដាយ អ៊ិឈិ ឡាយហ្វ៍ គ្រុប (Dai-ichi Life Group) មានប្រតិបត្តិការធានារ៉ាប់រងនៅក្នុងប្រទេសចំនួន7 គឺនៅប្រទេសជប៉ុន សហរដ្ឋអាមេរិក អូស្ត្រាលី វៀតណាម ឥណ្ឌា ឥណ្ឌូនេស៊ី និងប្រទេសថៃ។ ការបង្កើតក្រុមហ៊ុនធានារ៉ាប់រងជីវិត ដាយ អ៊ិឈិ ឡាយហ្វ៍ ;(ខេមបូឌា) ម.ក គឺជាប្រទេសទី8 ដែលមានប្រតិបត្តិការធានារ៉ាប់រងអាយុជីវិតរបស់ក្រុមហ៊ុន Dai-ichi Life Group។

ដាយ អ៊ិឈិ ឡាយហ្វ៍ (ខេមបូឌា) ម.ក គឺជាក្រុមហ៊ុនធានារ៉ាប់រងអាយុជីវិតរបស់ជប៉ុនដំបូងគេបង្អស់នៅក្នុងប្រទេសកម្ពុជា ដែលមានបេសកកម្មចូលរួមចំណែកក្នុងសង្គម និងសហគមន៍កម្ពុជាតាមរយៈការផ្តល់ជូននូវការធានារ៉ាប់រងអាយុជីវិត និងសេវាកម្មដែលពាក់ព័ន្ធ។ ដាយ អ៊ិឈិ ឡាយហ្វ៍ (ខេមបូឌា) ម.ក គឺជាសមាជិករបស់ក្រុមហ៊ុនធានារ៉ាប់រងអាយុជីវិត ដាយ អ៊ិឈិ ឡាយហ្វ៍ គ្រុប នឹងមានវត្តមាននៅក្បែរប្រជាជនកម្ពុជា និងមនុស្សជាទីស្រឡាញ់របស់ពួកគេអស់មួយជីវិត៕

April 24, 2019

គ្រូបង្រៀនម្នាក់មានសំណាងបានឈ្នះរង្វាន់ ១០០លានរៀល ពីភេសជ្ជៈប៉ូវកម្លាំង ខារ៉ាបាវ

ទឹកប្រាក់ ១០០លានរៀល របស់ភេសជ្ជៈប៉ូវកម្លាំង ខារ៉ាបាវ បានបន្តធ្លាក់ទៅដល់ដៃបុរសម្នាក់ដែលមានឈ្មោះ ថាំ ស៊ីនួន អាយុ ៣៣ ឆ្នាំ បច្ចុប្បន្នមានមុខរបរជាគ្រូបង្រៀននៅសាលាបឋមសិក្សា ស្ទឹងតូចក្រោម ស្រុកសំឡូត ខេត្តបាត់ដំបង។

នៅចំពោះមុខក្រុមការងារ ជាអ្នកតំណាងក្រុមហ៊ុនចុះទៅប្រគល់ទឹកប្រាក់ចំនួន ១០០លានរៀល លោក ថាំ ស៊ីនួន បានប្រាប់ឱ្យដឹងថា បច្ចុប្បន្ននេះ លោកមានមុខរបរជាគ្រូបង្រៀននៅឯស្រុកសំឡូត ខេត្តបាត់ដំបង ប៉ុន្តែកាលពីអំឡុងបុណ្យចូលឆ្នាំប្រពៃណីខ្មែរ លោកបានមកលេងស្រុកកំណើតដែលស្ថិតនៅភូមិព្រៃផ្អាវ ឃុំរនាម ស្រុកទ្រាំង ខេត្តតាកែវ ហើយទិញខារ៉ាបាវពីផ្ទះអ្នកលក់ដែលស្ថិតនៅក្បែរផ្ទះទទួលទាន លុះពេលគាស់ក៏ស្រាប់តែឃើញមានរង្វាន់១០០លានរៀលនៅនឹងក្រវិលកំប៉ុងតែម្ដង។ លោកបានបន្តទៀតថា សព្វថ្ងៃនេះបើនិយាយពីកម្រិតជីវភាពគ្រួសារគឺមានភាពលំបាកគួរសម ព្រោះគ្មានមុខរបរអ្វីក្រៅពីមានអាជីពជាគ្រូបង្រៀនតែប៉ុណ្ណោះ ហើយក៏ពិការភាពដៃម្ខាងទៀត។ លោកបានបន្តឱ្យដឹងទៀតថា ចំពោះការឈ្នះរង្វាន់នេះវាគឺជារឿងចែដន្យបំផុត គ្រាន់តែឃើញត្រូវរង្វាន់លោកមានអារម្មណ៍រំភើបសប្បាយចិត្តជាខ្លាំង ហើយក៏ស្រែកប្រាប់អ្នកជិតខាងឱ្យជួយពិនិត្យមើល និងទូរស័ព្ទជូនដំណឹងដល់ក្រុមហ៊ុនតាមរយៈលេខដែលមាននៅនឹងក្រវិលកំប៉ុងស្រាប់។ លោកថា ក្រោយពីទទួលបានប្រាក់រង្វាន់ធំ ១០០លានរៀលនេះ លោកនឹងយកមួយចំនួនទិញសង់បំណុលគេ និងទិញដីសង់ផ្ទះ ហើយទុកមួយចំនួនទៀតសម្រាប់ទ្រទ្រង់ជីវភាពគ្រួសារទៅថ្ងៃអនាគត។

សូមបញ្ជាក់ផងដែរថា ជាការថ្លែងអំណរគុណចំពោះអតិថិជន ក្រុមហ៊ុន ភេសជ្ជៈប៉ូវកម្លាំង ខារ៉ាបាវ បានបង្កើនរង្វាន់យ៉ាងសន្ធឹកសន្ធាប់នូវចំនួនទឹកប្រាក់សុទ្ធរហូតដល់ ១០០លានរៀល ចំនួន៦០ រង្វាន់ , ម៉ូតូ HONDA Dream ចំនួន៦០ រង្វាន់ , ទូរស័ព្ទដៃ iPhone ចំនួន៦០ រង្វាន់ រួមជាមួយការផ្តល់ជូនរង្វាន់1កប៉ុង រាប់លានកំប៉ុង ដោយគ្មានការកំណត់នោះទេ។ សូមចំណាំ ៖ សម្រាប់រង្វាន់ពិតប្រាកដ គឺមានតែនៅសម្បកកំប៉ុង ដែលមានអក្សរខ្មែរជាសញ្ញាសម្គាល់តែប៉ុណ្ណោះ៕

April 24, 2019

3ខែដើមឆ្នាំ2019 អគ្គនាយកដ្ឋានគយ និងរដ្ឋាករកម្ពុជាប្រមូលចំណូលកើនប្រមាណ20%

ក្នុងរយៈពេល 3ខែដើមឆ្នាំ2019នេះ អគ្គនាយកដ្ឋានគយ និងរដ្ឋាករកម្ពុជាបានប្រមូលចំណូលពន្ធបានប្រមាណ 712លានដុល្លារ ដែលចំណូលនេះបានកើនឡើងប្រមាណជា20% បើប្រៀបធៀបនឹងរយៈពេលដូចគ្នាក្នុងឆ្នាំ2018 កន្លងមក។ នេះបើតាមព័ត៌មានរបស់អគ្គនាយកដ្ឋានគយ និងរដ្ឋាករកម្ពុជា។

ឯកឧត្តមបណ្ឌិត គុណ ញឹម ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជាបានមានប្រសាសន៍ថា៖“ក្នុងរយៈពេល 3ខែដើមឆ្នាំ2019នេះ អគ្គនាយកដ្ឋានគយ និងរដ្ឋាករកម្ពុជាបានប្រមូលចំណូលពន្ធបានប្រមាណ 712លានដុល្លារ បើប្រៀបធៀបក្នុងរយៈពេលដូចគ្នាកាលពីឆ្នាំ2018 គឺតួលេខនេះមានកំណើនប្រមាណ20% ដែលជាកំណើនមួយល្អប្រសើរ”។

ឯកឧត្តមបានបញ្ជាក់ថា គិតត្រឹមរយៈពេល 5ឆ្នាំចុងក្រោយ គិតចាប់ពីឆ្នាំ2013 ដល់ឆ្នាំ2018 យើងឃើញថា ចំណូលឆ្នាំ2013 ស្មើនឹងជិត 3ដង(X 2.5)ដែលជាលទ្ធផលនៃការប្រមូលចំណូលពន្ធក្នុងឆ្នាំ2018 គឺមានការកើនឡើងជិត 3ដងឯណោះដែលយកចំណូលពន្ធទាំងនោះមកធ្វើការអភិវឌ្ឍប្រទេសជាតិ។

ឯកឧត្ដម គុណ ញឹម បានមានប្រសាសន៍បន្ថែមថា ក្នុងរយៈពេល 5ឆ្នាំចុងក្រោយនេះ អគ្គនាយកដ្ឋានគយ និងរដ្ឋាករកម្ពុជាបានអនុវត្ដនូវវិធានការកែទម្រង់ និងទំនើបកម្មច្រើនរបស់អគ្គនាយកដ្ឋានគយ និងរដ្ឋាករកម្ពុជាដែលស្ដែងឡើងតាមរយៈការប្រមូលចំណូល ការបង្កកិច្ចសម្រួលពាណិជ្ជកម្ម និងការវិនិយោគបានយ៉ាងល្អប្រសើរ។

ជាមួយគ្នានេះដែរ ឯកឧត្តមបណ្ឌិតបានបន្ថែមថា សម្រាប់កិច្ចប្រតិបត្តិការរបស់គយដែលកំពុងអនុវត្ដនាពេលបច្ចុប្បន្ននេះ អគ្គនាយកដ្ឋានគយ និងរដ្ឋាករកម្ពុជាក៏បានរៀបចំផែនការប្រតិបត្តិការលម្អិតប្រចាំឆ្នាំបន្ថែមទៀតដែលត្រូវដកស្រង់ចេញពីផែនការយុទ្ធសាស្ដ្រ និងកម្មវិធីការងារកំណែទម្រង់ទំនើបកម្មគយផង យុទ្ធសាស្ដ្រកៀរគរចំណូលរបស់រាជរដ្ឋាភិបាលផង ជាពិសេសច្បាប់ហិរញ្ញវត្ថុសម្រាប់គ្រប់គ្រងប្រចាំឆ្នាំផង។

ឯកឧត្តមបណ្ឌិតបានពន្យល់ថា សម្រាប់ឆ្នាំ2018កន្លងមកនេះ ការប្រមូលពន្ធអាករ និងចំណូលចូលថវិកាជាតិរបស់អគ្គនាយកដ្ឋានគយ និងរដ្ឋាករកម្ពុជាគឺបានល្អប្រសើរដែលចាត់ទុកថា ជាឆ្នាំដែលបានប្រមូលពន្ធបានខ្ពស់បំផុត បើប្រៀបធៀបជាមួយបណ្ដាឆ្នាំកន្លងមក។ កត្ដាគន្លឹះដែលធ្វើឱ្យអគ្គនាយកដ្ឋានគយ និងរដ្ឋាករប្រមូលពន្ធបានល្អប្រសើរ និងកើនឡើងនេះ ដោយសារតែកត្ដាស្ថិរភាពនយោបាយដែលបង្កលក្ខខណ្ឌឱ្យកិច្ចដំណើរការពាណិជ្ជកម្មក៏ដូចជាការវិនិយោគមានដំណើរការល្អប្រសើរ។

ជាលទ្ធផលក្នុងឆ្នាំ2018 ការប្រមូលថវិកាចូលជាតិ គឺមានប្រមាណជាង 2,500លានដុល្លារ បើប្រៀបធៀបទៅនឹងឆ្នាំ2017 មានកំណើនប្រមាណ32% ដែលជាកំណើនមួយខ្ពស់។ ទន្ទឹមនេះ ប្រភេទពន្ធអាករសំខាន់ៗដែលប្រមូលបានដោយអគ្គនាយកដ្ឋានគយ និងរដ្ឋាករកម្ពុជា គឺមានពន្ធគយ ឬពន្ធនាំចូលមានអាករពិសេសលើទំនិញមួយចំនួន និងអាករលើតម្លៃបន្ថែម(VAT)។ ឯកឧត្តមបណ្ឌិតបានបន្ដទៀតថា ក្នុងប្រភេទពន្ធសំខាន់ៗទាំង3 រួមមានពន្ធគយកើនឡើងប្រមាណ20% អាករពិសេសកើនឡើងរហូតដល់ប្រមាណ35% និងអាករលើតម្លៃបន្ថែមគឺកើនឡើងប្រមាណជាង30%។

សូមបញ្ជាក់ថា ដើម្បីងាយស្រួលក្នុងការតាមដានការគ្រប់គ្រងប្រភពចំណូលដែលប្រមូលបាននេះ អគ្គនាយកដ្ឋានគយ និងរដ្ឋាករកម្ពុជា បានបែងចែកទំនិញជា 3ក្រុមមុខទំនិញ ទី1-គឺយានយន្ដ និងគ្រឿងចក្រ។ ទី2-មុខទំនិញចម្រុះ រួមទាំងគ្រឿងសំណង់ផងដែរ និងក្រុមទំនិញទី3- គឺផលិតផលប្រេងឥន្ធនៈ និងថាមពល។

ឯកឧត្តមបណ្ឌិត គុណ ញឹម បានអះអាងបន្ថែមថា បើពិនិត្យមើលពីប្រភពចំណូលតាមក្រុមទំនិញទាំង 3មុខនេះយើងឃើញថា យានយន្ដបានដើរតួនាទីក្នុងលំដាប់ទី1 ដែលស្រូបយកចំណូលបានប្រមាណជាង 46%នៃចំណូលសរុបដែលប្រមូលបានក្នុងឆ្នាំ2018 កន្លងទៅ។ ដោយឡែកទី2 មុខទំនិញចម្រុះ រួមទាំងគ្រឿងសំណង់ផង និងកម្រៃផ្សេងៗនោះ បានដើរតួនាទីប្រមាណ35% នៃចំណូលសរុបដែលប្រមូលបាន ហើយក្រុមទី3 គឺផលិតផលប្រេងឥន្ធនៈ និងថាមពល ដើរតួនាទីប្រមាណ19%៕

April 24, 2019

Author: ធឿន មករា