ធឿន មករា - La Reine Media

ដំណោះស្រាយចំពោះបញ្ហាស្បែកស្ងួតគ្មានសំណើម ជាមួយនឹងដឹម៉ាវ៉ាយ DRY SKIN CRÈME

មានកត្តាជាច្រើនដែលបណ្តាលឱ្យស្បែកឡើងស្ងួត ដូចជា ការប្រែប្រួលស្រទាប់ខ្លាញ់ ការធ្លាក់ចុះនូវជាតិសំណើមពីធម្មជាតិរបស់ស្បែក វ័យកាន់តែចាស់ និងតំណរពូជជាដើម។ ស្បែកស្ងួតធ្ងន់ធ្ងរ អាចបណ្តាលឱ្យកើតមានអាការរមាស់ និងរលាកស្បែក។

វិធីការពារមិនឱ្យស្បែកឡើងស្ងួតគឺត្រូវ រក្សាទុកនូវជាតិទឹកឱ្យមាននៅក្នុងស្បែកឱ្យបានច្រើន វានឹងធ្វើឱ្យស្បែកទន់ និងការពារមេរោគ ផ្សេងៗ។ ស្បែកស្ងួតត្រូវបានចែកជាពីរ គឺកត្តាខាងក្រៅនិងកត្តាខាងក្នុង។ កត្តាខាងក្រៅរួមមាន អាកាសធាតុត្រជាក់ និងមានសំណើមតិច ជាពិសេសនៅក្នុងរដូវរងាការដុសសម្អាតស្បែកញឹកញាប់ដោយប្រើសាប៊ូ និងការប្រើទឹកលាងដៃដែលមានជាតិអាល់កុលជាដើម។ កត្តាខាងក្នុង មានដូចជា បញ្ហាសុខភាពទូទៅ អាយុ តំណរពូជ ប្រវត្តិគ្រួសារ និងប្រវត្តិផ្ទាល់ខ្លួន ដែលប្រើថ្នាំដូចជា ថ្នាំព្យាបាលជំងឺហឺត អាលែកហ្ស៊ី និងជំងឺសើស្បែក ផ្សេងៗ។

តើអ្វីខ្លះជារោគសញ្ញានៃស្បែកស្ងួត?
រោគសញ្ញាចម្បងរបស់ស្បែកស្ងួតគឺអាការរមាស់។ ស្បែកស្ងួត ជាទូទៅវានឹងបណ្តាលឱ្យ ស្បែកឡើងគ្រើម ស្ងួត ក្រហមនៅលើស្បែក ហើយជាញឹកញយគឺកើតមានអាការរមាស់នៅ លើស្បែក។ ស្បែកដែលងាយរងនូវផលប៉ះពាល់ ជាងគេ គឺស្បែកនៅដៃជើង ពោះ និងកន្លែងងាយ នឹងកកិត ដូចជា ស្មងជើង និងប្រអប់ជើង។ល។ នៅពេលដែលស្បែកស្ងួតកាន់តែធ្ងន់ធ្ងរ វានឹង ធ្វើឱ្យស្បែកប្រេះបែកស្រកា។

តើស្បែកស្ងួតត្រូវបានគេធ្វើរោគវិនិច្ឆ័យដូចម្តេចខ្លះ?
ស្បែកស្ងួតអាចត្រូវបានធ្វើរោគវិនិច្ឆ័យបាន យ៉ាងងាយស្រួលនៅពេលដែលគ្រូពេទ្យពិនិត្យ មើលរាងកាយ និងត្រួតពិនិត្យមើលលើស្បែក។ ស្បែកស្ងួតអាចកើតមានលើគ្រប់ប្រភេទនៃស្បែក និងគ្រប់វ័យ គ្រប់ភេទ ដែលជាញឹកញយ ស្បែករបស់ពួកគេតែងប៉ះជាមួយនឹងម្សៅសាប៊ូ ដែលធ្វើឱ្យស្បែកឡើងស្រអាប់ ហើយវិវត្តទៅជា ស្បែកស្ងួត។ លើសពីនេះទៀតប្រវត្តិនៃការប្រើប្រាស់ថ្នាំនិងការពិនិត្យមើលទម្លាប់ប្រចាំថ្ងៃក៏ អាចធ្វើការកំណត់ការធ្វើរោគវិនិច្ឆ័យនៃស្បែក ស្ងួតបានដែរ។ ដោយផ្អែកលើប្រវត្តិនៃការប្រើប្រាស់ថ្នាំ លក្ខខណ្ឌវេជ្ជសាស្រ្តមួយចំនួនអាច ត្រូវបានគេច្រានចោល ឬពិចារណា។ ក្នុងករណី ពិបាកក្នុងការកំណត់រោគវិនិច្ឆ័យ នោះគេនឹង ច្រឹបកោសិកាស្បែក ដើម្បីយកទៅធ្វើរោគវិនិច្ឆ័យ និងធ្វើការព្យាបាលតែម្តង។

ដំណោះស្រាយ
ដឹម៉ាវ៉ាយ DRY SKIN CRÈME មានរូបមន្តផ្សំចេញពីស្រូវសាលី និងជាតិសំណើមពីធម្មជាតិ ដើម្បីព្យាបាល និងផ្តល់នូវជាតិទឹកដល់ស្បែក ដែលស្ងួត ការពារអាការរមាស់ និងរលាករោល លើស្បែក។ ក្រោយពីការប្រើដឹម៉ាវ៉ាយ DRY SKIN CRÈME នោះស្បែកអ្នកជំងឺនឹងប្រែជាទន់ មានសំណើម និងមិនប្រេះបែកស្រកាឡើយ។ ដឹម៉ាវ៉ាយ DRY SKIN CRÈME មានជាតិ សំណើមខ្ពស់ និងមានតុល្យភាព pH ដើម្បី ធានាថា អាស៊ីតធម្មជាតិរបស់ស្បែកត្រូវបានថែរក្សា និងធានាថា ស្បែកស្ងួតនឹងមិនកើតមាន ព្រមទាំងការពារស្បែកពីបាក់តេរី ឬការឆ្លងមេរោគផ្សេងៗផងដែរ។ ដោយសារតែផលិតផល នេះប្រើសម្រាប់ព្យាបាលស្បែកស្ងួត ដូចនេះវាមិនមានបន្ថែមក្លិននោះទេ ហើយក្លិនរបស់វាគឺ ជាក្លិនរបស់ស្រូវសាលី ប៉ុន្តែនៅពេលដែលអ្នក លាបនៅលើស្បែក វានឹងលែងមានក្លិនហើយ។ ដឹម៉ាវ៉ាយ DRY SKIN CRÈME ជាផលិតផលផលិតនៅប្រទេសអូស្ត្រាលី ដែលមានគុណភាព ខ្ពស់ និងគួរឱ្យទុកចិត្តបំផុត។

របៀបប្រើប្រាស់
ជាដំបូងអ្នកត្រូវងូតទឹកជម្រះខ្លួនឱ្យស្អាត មុននឹងលាប ដឹម៉ាវ៉ាយ DRY SKIN CRÈME ដើម្បីឱ្យប្រាកដថាខ្លួនប្រាណរបស់អ្នកគឺស្អាតមិនមានមេរោគនោះទេ។ អ្នកត្រូវលាបដឹម៉ាវ៉ាយ DRY SKIN CRÈME 2ដងក្នុង1ថ្ងៃគឺពេលព្រឹក ក្រោយងូតទឹករួច និងនៅពេលយប់ មុនពេល ចូលគេង ឬលាបនៅពេលដែលចាំបាច់។ ដឹម៉ាវ៉ាយ DRY SKIN CRÈME អាចលាបបានទាំង ផ្ទៃមុខ និងស្បែកដងខ្លួន ដោយប្រើបានគ្រប់ប្រភេទស្បែក និងគ្រប់វ័យ មិនថា ទារក ក្មេង ឬមនុស្សចាស់នោះទេ។ ដឹម៉ាវ៉ាយ DRY SKIN CRÈME ត្រូវបានធ្វើតេស្ត និងអនុញ្ញាតិឱ្យប្រើប្រាស់ ដោយសមាគមន៍រោគ សើស្បែករបស់ប្រទេសអូស្ត្រាលី៕

May 23, 2019

សម័យឌីជីថល គ្រូឈប់ឱ្យសិស្សទន្ទេញចាំមាត់ហើយ តែឱ្យព្យាយាមយល់ឱ្យស៊ីជម្រៅដើម្បីអភិវឌ្ឍកាន់តែខ្លាំង

ដោយសារតែរបត់នៃការរស់នៅ និងការធ្វើការងារនៅក្នុងពិភពលោកនាសម័យបច្ចុប្បន្នមានភាពប្រែប្រួលខ្លាំង ការអប់រំក៏ចាំបាច់ត្រូវតែកែទម្រង់ដើម្បីធានាថា មនុស្សនឹងមានគុណភាពកាន់តែខ្ពស់ ដើម្បីឆ្លើយតបទៅនឹងអ្វីដែលមនុស្សត្រូវការក្នុងការរស់នៅ។

ឯកឧត្តមបណ្ឌិតសភាចារ្យ ហង់ ជួនណារ៉ុន បានលើកឡើងថា យើងចង់ឱ្យសិស្សកាន់តែមានការគិតពិចារណា វិភាគនិងមានគំនិតច្នៃប្រឌិតច្រើនជាងការ-ទន្ទេញតែតាមក្បួន ឬសៀវភៅគ្រប់យ៉ាង។ចំណេះដឹងពីការទន្ទេញ មិនអាចធ្វើឱ្យយើងបង្កើតឡើងនូវស្នា ដៃថ្មី ឬសមិទ្ធផលច្នៃប្រឌិតបាននោះទេ ព្រោះសៀវភៅមិនប្រាកដថាត្រូវគ្រប់ទាំងអស់នោះទេ ហើយបើយើងទន្ទេញចាំ តែមិនយល់ នោះយើងនឹងមិនអាចយកមេរៀននោះទៅធ្វើអ្វីកើតបានឡើយ។ ជាជាង ការទន្ទេញ យើងចង់ឱ្យសិស្សព្យាយាមស្វែងយល់ពីឫសគល់នៃមេរៀន និងមូលហេតុសំខាន់ៗដែលឆ្លើយតបជាមួយនឹងការរស់នៅជាក់ស្តែង ដើម្បីពួកគេរកឃើញបញ្ហានានាដែលស៊ីគ្នាជាមួយមេរៀន ហើយប្រើប្រាស់វាទៅបំបែកឱ្យកើតចេញជាដំណោះស្រាយថ្មីៗសម្រាប់ការរស់នៅឱ្យកាន់តែប្រសើរឡើង។

ឯកឧត្តម ហង់ ជួនណារ៉ុន បានមានប្រសាសន៍ថា៖ “ប្រសិនបើយើងចេះវិភាគ ចេះពិចារណា និងបំបែកមេរៀនទាំងអស់នោះតាមរយៈការសិក្សាស្រាវជ្រាវឱ្យបានច្បាស់លាស់ នោះយើងនឹងរកឃើញវិធីជាច្រើនដើម្បីបង្កើតសមិទ្ធផលថ្មីៗ ជាពិសេសក្នុងសម័យឌីជីថលនេះ យុវជនកាន់តែមានលក្ខណៈងាយស្រួលក្នុងការសិក្សាស្រាវជ្រាវ”។

ឯកឧត្ដមរដ្ឋមន្ត្រីក្រសួងអប់រំ បានលើកឡើងផងដែរថា ប្រសិនបើយើងមានគំនិត ចេះវិភាគ នោះយើងនឹងអាចធ្វើរឿងធំៗបានជាច្រើន។ គំនិតខ្លះ យើងឃើញថា មនុស្សកាលពីបួនដប់ឆ្នាំមុនគ្រាន់តែស្រមើស្រមៃប៉ុណ្ណោះ តែប៉ុន្មានឆ្នាំក្រោយមក វាបានក្លាយជាការពិតព្រោះមនុស្សព្យាយាមសិក្សាស្វែងយល់ និងរកវិធីសាស្ត្រដើម្បីធ្វើវាឱ្យបាន។ ហេតុនេះនៅកម្ពុជា យើងក៏បានលើកទឹកចិត្តឱ្យមានការរៀបចំវិធីសាស្ត្ររៀន និងបង្រៀនដើម្បីឱ្យសិស្សទទួលបានចំណេះដឹងកាន់តែខ្លាំង និងស៊ីជម្រៅ តាមរយៈការសិក្សាស្រាវជ្រាវជាក់ស្តែង។

ក្រោយការធ្វើកំណែទម្រង់ប្រព័ន្ធអប់រំ ក្រសួងអប់រំ យុវជន និងកីឡា មិនត្រឹមតែរឹតបន្តឹងការប្រឡងមធ្យមសិក្សាទុតិយភូមិតែមួយមុខគត់នោះទេ តែក្រសួងក៏បានដាក់បញ្ចូលនូវកម្មវិធីសំខាន់ៗជាច្រើនផងដែរដើម្បីឱ្យសិស្សកាន់តែមានគុណភាព ទាំងសម្រាប់ការប្រឡង និងសម្រាប់ការរស់នៅនាថ្ងៃអនាគត។ ដើម្បីឱ្យសិស្សកាន់តែមានសមត្ថភាពផ្នែកវិទ្យាសាស្ត្រ វិស្វកម្ម និងគណិតវិទ្យា ក្រសួងអប់រំបានរៀបចំឱ្យមានកម្មវិធី STEM ធំៗនៅក្នុងពិព័រណ៍ប្រចាំឆ្នាំ និងជំរុញឱ្យមានការបណ្តុះបណ្តាលជំនាញនេះកាន់តែខ្លាំងនៅតាមបណ្តាខេត្តនានា។ ក្រៅពីនេះ ក្រសួងអប់រំក៏បានរៀបចំឱ្យមានសាលាជំនាន់ថ្មី ដើម្បីបណ្តុះបណ្តាលសិស្សកម្ពុជាឱ្យមានសមត្ថភាពលើផ្នែកវិទ្យាសាស្ត្រ បំណិនជីវិត និងជំនាញចាំបាច់នានាសម្រាប់សតវត្សរ៍ទី21ផងដែរ។

ឯកឧត្តម អុឹម កុច រដ្ឋលេខាធិការ ក្រសួង អប់រំ យុវជន និងកីឡា បានលើកឡើងថា ការសិក្សារបស់សិស្សបច្ចុប្បន្ននេះ ចាំបាច់ត្រូវតែមានការផ្លាស់ប្តូរជាវិជ្ជមានព្រោះឥឡូវនេះពេលខ្លះមនុស្សលែងមានទំនាក់ទំនងជាមួយមនុស្សហើយ តែមនុស្សទំនាក់ទំនងជាមួយម៉ាស៊ីន (internet of thing)។ សិស្សានុសិស្សចាំបាច់ត្រូវសិក្សាឱ្យបានកាន់តែស៊ីជម្រៅ គឺរៀនដើម្បីចេះរស់នៅ និងរៀនដើម្បីចេះរៀនប្រកបដោយភាពច្នៃប្រឌិត។ ហេតុនេះការសិក្សាចាំបាច់ត្រូវខិតខំប្រឹងប្រែងក្នុងការសិក្សាស្រាវជ្រាវបន្ថែមឱ្យកាន់តែមានប្រសិទ្ធភាព។ បច្ចុប្បន្ននេះ ប្រភពព័ត៌មាន និងចំណេះដឹងមានគ្រប់ទីកន្លែង បើមិនច្បាស់យើងគ្រាន់តែប្រើស្មាតហ្វូននៅក្នុងទូរស័ព្ទដែរបស់យើងក៏អាចស្រាយចម្ងល់ទាំងអស់នោះបានដែរ។

ឯកឧត្តម រដ្ឋលេខាធិការបានមានប្រសាសន៍ផងដែរថា យកល្អ សិស្សនិស្សិតគួរព្យាយាមស្វែងរកឱកាសអនុវត្តឱ្យបានច្រើន ស្របពេលដែលយើងសិក្សាពីសៀវភៅ ឬពីសាលា។ នៅពេលយើងធ្វើការងារ យើងនឹងមើលឃើញបញ្ហាជាច្រើនដែលយើងមិនទាន់យល់ច្បាស់ពីអ្វីដែលយើងធ្លាប់រៀន ពេលនោះហើយជាឱកាសល្អក្នុងការស្រាវជ្រាវបន្ថែមដើម្បីដោះស្រាយបញ្ហា ហើយក៏អាចឱ្យយើងកាន់តែមានសមត្ថភាពខ្លាំងសម្រាប់ប្រកួតប្រជែងក្នុងទីផ្សារបាន នៅពេលដែលយើងបញ្ចប់ការសិក្សា៕

May 23, 2019

ដាំស្លឹកគ្រៃ ចំណាយតិច ចំណូលច្រើន មានតម្រូវការទីផ្សារខ្ពស់ តែមានភាពប្រកួតប្រជែងច្រើន

ស្លឹកគ្រៃ ជាប្រភេទដំណាំបន្លែដែលងាយស្រួលដាំ និងទទួលបានផលប្រសើរជាងដំណាំផ្សេងៗទៀត ហើយក៏មានតម្រូវការច្រើនក្នុងការដាំស្លហូបចុកប្រចាំថ្ងៃរបស់ប្រជាជនខ្មែរយើងផងដែរ។ ដោយសារតែដំណាំប្រភេទនេះមានទីផ្សារល្អ គួបផ្សំនឹងស្ថានភាពដីក្នុងតំបន់មានអំណោយផលល្អផងនោះ ទើបកសិករក្នុងសហគមន៍កសិកម្ម “សំបូរមានជ័យ” ខេត្តកំពង់ចាមចាប់អារម្មណ៍ងាកមកជំរុញការដាំស្លឹកគ្រៃវិញម្ដង នាពេលបច្ចុប្បន្ន។

លោក អេង ថុង ប្រធានសហគមន៍កសិកម្ម “សំបូរមានជ័យ” ជាអ្នកប្រកបរបរដាំស្លឹកគ្រៃម្នាក់ក្នុងចំណោមកសិករជាច្រើនគ្រួសារទៀតដែលរស់នៅក្នុងភូមិសំបូរ ឃុំសូភាស ស្រុកស្ទឹងត្រង់ខេត្តកំពង់ចាមបានមានប្រសាសន៍ឱ្យកាសែតឡារ៉ែនពាណិជ្ជដឹងថា ស្លឹកគ្រៃ គឺជាប្រភេទដំណាំដែលងាយស្រួលដាំ និងផ្តល់ផលលឿនដោយវានឹងផ្តល់ផលក្នុងអំឡុងពេលត្រឹមតែ 3ខែប៉ុណ្ណោះ។

លោកបានប្រាប់ទៀតថា ស្លឹកគ្រៃ ភាគច្រើនគេចាប់ផ្តើមដាំនារដូវទឹកសម្រក គឺក្នុងអំឡុងខែធ្នូ ឬដើមខែមករា។ ការដាំស្លឹកគ្រៃមិនសូវជាលំបាកក្នុងការថែទាំ ឬបាញ់ថ្នាំសម្លាប់សត្វល្អិតដូចដំណាំផ្សេងទៀតឡើយ ដោយគេគ្រាន់តែដាក់ជី និងស្រោចទឹកក្នុង 1សប្តាហ៍ម្តង ដើមស្លឹកគ្រៃនឹងលូតលាស់បានល្អ ហើយអាចកាត់លក់បាននៅត្រឹមតែរយៈពេល 3ខែប៉ុណ្ណោះ។ នៅពេលស្លឹកគ្រៃចាស់កាត់លក់អស់ គេចាប់ផ្តើមភ្ជួរដី និងដាំស្លឹកគ្រៃថ្មីទៀតភ្លាមៗតែម្ដង ដោយមិនបាច់រង់ចាំរដូវវស្សាចូលមកដល់នោះទេ ព្រោះដំណាំមួយនេះ ទោះជារដូវណាក៏អាចដាំដុះបានដែរ សំខាន់ឱ្យតែមានទឹកស្រោចគ្រប់គ្រាន់។

លោក អេង ថុង បានឱ្យដឹងថា មុននឹងដាំស្លឹកគ្រៃ គេត្រូវជ្រើសរើសយកពូជល្អៗ គល់ធំៗយកមកកាត់ឫសចាស់ចោល ហើយយកទៅផ្សាំបណ្តុះឫសថ្មីនៅលើដីដែលមានទឹកសើមៗ ឬស្រោចទឹកពីលើជាប្រចាំ។ នៅពេលផ្សាំបានចន្លោះពី 4ថ្ងៃទៅ 1សប្តាហ៍ ស្លឹកគ្រៃចាប់ផ្តើមដុះឫសថ្មី ហើយអាចយកទៅដាក់ដាំបាន ដោយគេដាំមួយគុម្ពតែ 1ដើម ឬ 2ដើម(1គល់ ឬ 2គល់) ហើយត្រូវដាំជាជួរឱ្យត្រង់ស្មើក្នុងចន្លោះឆ្ងាយពីគ្នា 3 – 4សង់ទីម៉ែត្រ អាស្រ័យទៅតាមសណ្ឋានដី។

ក្រោយពីដាំ គេគ្រាន់តែមើលថែដាក់ជី និងបាញ់ទឹកបង្ហូរតាមចន្លោះរងនីមួយៗក្នុង 1សប្តាហ៍ម្តង នោះដើមស្លឹកគ្រៃនឹងលូតលាស់បានល្អ និងមិនមានសត្វល្អិតណាមកយាយីរំខានដំណាំប្រភេទនេះទេ ដោយសារវាមានក្លិនឈួល និងរសជាតិហឹរប្រហើរហ្នឹងឯង។

លោកបានបន្តថា កសិករនៅក្នុងភូមិរបស់លោកកន្លងមក មិនមានទម្លាប់ដាំស្លឹកគ្រៃទេ ប៉ុន្តែសព្វថ្ងៃបាននាំគ្នាជំរុញការដាំស្លឹកគ្រៃបន្ថែមលើការដាំដំណាំផ្សេងៗទៀតដូចជា ល្ហុង ពោត សណ្តែក ចេកស្រូវ ម្នាស់ និងឪឡឹក ជាដើម ដោយសារតែស្លឹកគ្រៃមានតម្រូវការទីផ្សារខ្ពស់ទាំងស្លឹក និងគល់ និងមានការបញ្ជាទិញច្រើនទៀតផង។

លោកប្រធានសហគមន៍រូបនេះបានអះអាងថា៖“ ដំណាំស្លឹកគ្រៃនេះ ក្នុង 1ឆ្នាំយើងអាចដាំវាបានពី3 ទៅ 4ដង។ ចំណែកតម្លៃរបស់វាសម្រាប់ការបោះដុំទៅឱ្យម៉ូយដែលទៅយកដល់ចម្ការ គឺស្ថិតក្នុងចន្លោះពី 1,000រៀល ទៅ1,200រៀលក្នុង 1គីឡូក្រាម។ តែយ៉ាងណាក៏ដោយ ស្លឹកគ្រៃបានតម្លៃខ្ពស់តែនៅរដូវប្រាំងប៉ុណ្ណោះ តែនឹងធ្លាក់ថ្លៃនៅរដូវវស្សាដោយសាររដូវវស្សាមានភ្លៀងធ្លាក់ច្រើន ស្លឹកគ្រៃដុះលូតលាស់ល្អ មិនចាំបាច់ចំណាយលុយទិញប្រេងបូមទឹកស្រោចដូចរដូវប្រាំងនោះទេ(ចំណាយទុនតិច)”។ លោកបានបញ្ជាក់ថា បើលក់ក្នុងតម្លៃខាងលើលោកទទួលបានកម្រៃប្រមាណ 8,400,000រៀល(8លាន4សែនរៀល)ក្នុង 1ថ្ងៃ។

លោកបានឱ្យដឹងទៀតថា៖“ចំពោះការផលិតស្លឹកគ្រៃ សហគមន៍របស់យើងធ្វើឡើងដោយរៀបចំជាផែនការ ដោយត្រូវផលិតបន្លែស្លឹកគ្រៃឱ្យបាន 1000តោនក្នុងឆ្នាំ2019 នេះ ព្រោះកាលពីឆ្នាំ2018កន្លងទៅ សហគមន៍ផលិតបានតែ 470តោនប៉ុណ្ណោះដោយមានផ្ទៃដីផលិតជាង 30ហិកតា ដូច្នេះយើងបានចាប់ពង្រីកផ្ទៃដី និងបង្កើនបច្ចេកទេសការដាំដុះថែមទៀត ហើយវានឹងចាប់ផ្តើមឱ្យផលនៅសប្តាហ៍ក្រោយនេះដែរ”។

លោកបានបញ្ជាក់ថា បច្ចុប្បន្នទីផ្សារត្រូវការស្លឹកគ្រៃ(ទាំងគល់ និងស្លឹក)ប្រមាណជា 70តោនក្នុង 1ថ្ងៃតែសហគមន៍ផ្ទាល់បានផលិតស្លឹកគ្រៃ យកទៅលក់ ក្នុង1ថ្ងៃ បានត្រឹមតែ 3,50 – 7តោនប៉ុណ្ណោះ។

លោកក៏បានបញ្ជាក់ផងដែរថា៖“មានសហគមន៍ជាច្រើននៅខេត្តកណ្តាល ដូចជានៅអរិយក្សត្រ និងសហគមន៍នៅពេជ្រនិល-គីរីរម្យក៏គេបានដាំស្លឹកគ្រៃ និងនាំយកមកលក់នៅផ្សារដើមគរ និងផ្សារនាគមាសនៅភ្នំពេញដូចសហគមន៍យើងដែរ នេះជាការប្រកួតប្រជែងមួយដែរ។ មិនតែប៉ុណ្ណោះ ខាងវៀតណាមក៏បាននាំចូលស្លឹកគ្រៃមកលក់នៅផ្សារនាគមាស និងផ្សារដើមគរផងដែរ ហើយតម្លៃលក់ក៏មិនខុសគ្នាប៉ុន្មានដែរ ហើយផលិតផលរបស់វៀតណាមធំៗជាងរបស់ក្នុងស្រុកបន្តិច តែមិនសូវមានក្លិនឈ្ងុយដូចរបស់ខ្មែរយើងដាំទេ”។

លោក អេង ថុង មានប្រសាសន៍ថា ប្រជាជនក្នុងសហគមន៍របស់លោកមានសមាជិកចំនួន 60គ្រួសារដែលប្រកបរបរដាំស្លឹកគ្រៃនេះ។ លោកបានបញ្ជាក់ថា ប្រជាជនក្នុងភូមិបាននាំគ្នាងាកមកដាំស្លឹកគ្រៃមានរយៈពេលជាង 3ឆ្នាំមកហើយ។ ការដាំស្លឹកគ្រៃ បានធ្វើឱ្យពួកគាត់មានជីវភាពធូរធារជាងមុនច្រើន ខណៈស្លឹកគ្រៃងាយស្រួលថែទាំ មិនសូវហត់ និងមានតម្រូវការទីផ្សារខ្ពស់។ ដោយឡែកចំពោះមានការបញ្ជាទិញវិញ គឺមានក្រុមហ៊ុនម៉ាឡេស៊ីមួយបានបញ្ជាទិញចំនួន 8តោនក្នុង 1ខែ និងមានផ្សារនៅខេត្តសៀមរាប រួមទាំងឈ្មួញជនជាតិកូរ៉េក៏បានបញ្ជាទិញដែរ។

ហេតុដូចនេះលោកនឹងរៀបចំឱ្យស្របទៅតាមគម្រោងដែលលោកមាន ដោយនឹងពង្រីកផ្ទៃដីផលិតឱ្យគ្រប់ 60ហិកតា(គឺត្រូវការផ្ទៃដីថែមប្រមាណ 30ហិកតា)ទើបអាចទទួលបរិមាណគ្រប់ចំនួន1,000តោនដែលសហគមន៍បានគ្រោងទុក។

ឯកសារកសិកម្មរបស់អង្គការអភិវឌ្ឍន៍កសិកម្មធម្មជាតិកម្ពុជាស្ដីពីអត្ថប្រយោជន៍នៃដំណាំស្លឹកគ្រៃ បានបង្ហាញថា ស្លឹកគ្រៃជារុក្ខជាតិដែលមានស្លឹកវែងៗ ក្លិនប្រហើរឈ្ងុយ ដុះបែកជាគុម្ព ស្លឹក និងគល់វាប្រើជាគ្រឿងផ្សំក្នុងអាហារ ជួយបន្ថែមក្លិនក្រអូបឱ្យម្ហូបមានរសជាតិឈ្ងុយឆ្ងាញ់ ហើយដំណាំស្លឹកគ្រៃនេះក៏ជាឱសថបុរាណដែលជួយបន្ថយជាតិពុលក្នុងរាងកាយ ព្រមទាំងជួយបន្ថយសម្ពាធឈាមដែលឡើងខ្ពស់ ប៉ូវភ្នែក ប៉ូវឆ្អឹង និងធ្មេញផងដែរ។ លើសពីនេះ ស្លឹកគ្រៃក៏មានគុណតម្លៃជាច្រើន និងសម្បូរទៅដោយសារធាតុដែលមានប្រយោជន៍ជាច្រើនមុខ ដូចជាសារធាតុរ៉ែ វីតាមីន និងអង់ហ្ស៊ីម រួមនឹងជីវជាតិសំខាន់ៗច្រើនទៀតដែលរាងកាយមនុស្សត្រូវការជាចាំបាច់ ដើម្បីឱ្យមានសុខភាពល្អ៕

May 23, 2019

បរិមាណទំនិញឆ្លងកាត់កំពង់ផែស្វយ័តខេត្តព្រះសីហនុ បានកើនឡើងខ្ពស់ក្នុងឆ្នាំ2018 និងបន្តកើនឡើងទៀតនៅឆ្នាំនេះ

កំពង់ផែស្វយ័តខេត្តព្រះសីហនុ កំពុងអភិវឌ្ឍការសាងសង់កំពង់ផែតាមជំហានៗ ដោយបានចូលរួមនៅក្នុងការកែទម្រង់តាមរយៈការបញ្ចុះតម្លៃការលើកដាក់ ព្រមទាំងថ្លៃBonus និងការមិនយកថ្លៃឈ្នួលបំផ្លាស់ទីចំណតនាវា ជាដើម ដែលប្រការនេះបានធ្វើឱ្យថ្លៃឡូជីស្ទិកមានកម្រិតទាបជាងមុន និងពង្រីកនូវភាពប្រកួតប្រជែងរបស់កម្ពុជាទាំងមូល សំដៅទៅរកការកើនឡើងនៃការធ្វើពាណិជ្ជកម្មអន្តរជាតិ និងទទួលបានកំណើនខ្ពស់ក្នុងឆ្នាំ2018។

ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូនបានបញ្ជាក់ថា៖ “វាជាមោទនភាពយ៉ាងខ្លាំងរបស់ប្រទេសកម្ពុជា ដោយបរិមាណទំនិញឆ្លងកាត់ បានកើនឡើងខ្ពស់ក្នុងឆ្នាំ2018 ពោលគឺមានកំណើន22.08% ក្នុងនោះបរិមាណកុងតឺន័រឆ្លងកាត់មានកំណើន17.70% ធៀបនឹងឆ្នាំ2017។ រីឯចំណូលអាជីវកម្មសរុប សម្រេចបានប្រមាណ 72លានដុល្លារអាមេរិក”។

ឯកឧត្តមទេសរដ្ឋមន្ត្រីបានបញ្ជាក់ថា៖“ផ្អែកលើកំណើនសេដ្ឋកិច្ចដ៏រឹងមាំ និងកំណើនបរិមាណទំនិញឆ្លងកាត់កំពង់ផែ កំពង់ផែស្វយ័តក្រុងព្រះសីហនុនឹងរំពឹងថា បរិមាណកុងតឺន័រដែលឆ្លងកាត់កំពង់ផែនឹងកើនលើស 700,000 TEUs នៅឆ្នាំ2020 និងលើស 1,000,000 TEUs នៅឆ្នាំ2023 ដែលនាំឱ្យតម្រូវការអភិវឌ្ឍន៍ និងសាងសង់កំពង់ផែ ត្រូវសម្រេចឱ្យបានទាន់ពេលវេលា និងប្រើប្រាស់យុទ្ធសាស្ត្រគ្រប់ជ្រុងជ្រោយ ដោយបញ្ចុះតម្លៃលើកដាក់ទំនិញបញ្ចុះតម្លៃសេវាឡូជីស្ទិក ពង្រឹងនូវប្រសិទ្ធភាពគ្រប់គ្រង និងប្រតិបត្តិការកំពង់ផែ និងកតា្តផ្សេងៗដើម្បីពង្រឹងការប្រកួតប្រជែងក្នុងតំបន់ និងសកលលោក”។

ឯកឧត្តមទេសរដ្ឋមន្ត្រី បានបន្តថា៖“ថ្មីៗនេះ កំពង់ផែស្វយ័តក្រុងព្រះសីហនុ ក៏បានចូលរួមគាំទ្រដល់កិច្ចសម្រួលពាណិជ្ជកម្ម និងធុរកិច្ចនៅកម្ពុជាសំដៅជំរុញភាពប្រកួតប្រជែង និងបង្កើនល្បឿននៃការធ្វើពិពិធកម្មសេដ្ឋកិច្ចជាតិ ដើម្បីធានាឱ្យបាននូវចីរភាពកំណើនសេដ្ឋកិច្ចសម្រាប់រយៈពេលខាងមុខ តាមរយៈវិធានការបញ្ចុះថ្លៃការលើកដាក់ Lo-Lo ចំនួន10% បញ្ចុះថ្លៃ Bonus ពី 7,50 ដុល្លារ មក 5ដុល្លារអាមេរិក ក្នុងមួយ Box និងកែសម្រួលមិនគិតថ្លៃឈ្នួលបំផ្លាស់ទីនាវា (Shifting)”។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក៏បានចាត់ទុកកំពង់ផែក្រុងព្រះសីហនុថាជាអង្គសេដ្ឋកិច្ចដ៏សំខាន់ និងមិនអាចខ្វះបានផងដែរក្នុងការធ្វើពាណិជ្ជកម្មរបស់កម្ពុជា ជាមួយនឹងពិភពលោកទាំងមូល ក៏ដូចជាការអភិវឌ្ឍសេដ្ឋកិច្ចជាតិ។

កំពង់ផែក្រុងព្រះសីហនុក៏ជាតួអង្គដែលទទួលបាននូវអត្ថប្រយោជន៍ដោយផ្ទាល់ពីការកែទម្រង់ខាងលើ តាមរយៈវិធានការនៃការរំកិលកាំកុងត្រូលចេញពីច្រកទ្វារព្រំដែន និងការរំសាយអង្គភាពកាំសាបដែលនេះជាការចូលរួមចំណែកធ្វើឱ្យប្រតិបត្តិការរបស់ផែមានភាពរលូនជាងមុន និងស្របតាមនិយាមប្រតិបត្តិការនៃកំពុងផែអន្តរជាតិទូទៅ។

ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានគូសបញ្ជាក់ថា ជាការពិតហើយថា ការធ្វើឱ្យប្រសើរឡើងនូវហេដ្ឋារចនាសម្ព័ន្ធ ក៏ដូចជាការពង្រឹង និងកសាងសមត្ថភាពផ្សេងៗទៀត របស់កំពង់ផែស្វយ័តក្រុងព្រះសីហនុ គឺជាអាទិភាពនៅក្នុងទិសដៅយុទ្ធសាស្ត្រអភិវឌ្ឍន៍ជាតិរបស់រាជរដ្ឋាភិបាលកម្ពុជា ដើម្បីលើកកម្ពស់គុណភាពសេវាកម្ម និងភាពប្រកួតប្រជែងរបស់កម្ពុជានៅក្នុងតំបន់ និងសកលលោក។

ឯកឧត្តមបន្ដថា ការធ្វើឱ្យសេវាមានតម្លៃសមរម្យ ប្រកបដោយប្រសិទ្ធភាព និងទទួលបាននូវជំនឿទុកចិត្តពីសំណាក់អតិថិជនដែលជាក្រុមហ៊ុននាវាដឹកជញ្ជូន ក៏ដូចជាអ្នកប្រើប្រាស់សេវាកំពង់ផែទាំងអស់ នឹងចូលរួមចំណែកយ៉ាងសកម្មក្នុងការបង្កើនចំណូលថវិកាជាតិ និងសកម្មភាពពាណិជ្ជកម្មអន្តរជាតិ ព្រមទាំងផ្តល់ឱកាសការងារជាច្រើន ជូនប្រជាពលរដ្ឋ សំដៅលើកកម្ពស់កម្រិតជីវភាពរស់នៅរបស់ពួកគាត់ឱ្យកាន់តែប្រសើរឡើងថែមទៀត។

ឯកឧត្តមទេសរដ្ឋមន្ដ្រីបានបន្ថែមថា តាមរយៈចំណតផែកុងតឺន័រថ្មីជម្រៅទឹក 14,5ម៉ែត្របាន អនុញ្ញាតឱ្យនាវាដឹកជញ្ជូនកុងតឺន័រធុនធំក្នុងតំបន់អាចចូលចតនៅកំពង់ផែស្វយ័តក្រុងព្រះសីហនុបាន ហើយចំពោះជម្រៅទឹកសម្រាប់កំពង់ផែត្រូវបានដោះស្រាយព្រមទាំងតម្លៃដឹកជញ្ជូនតាមសមុទ្រ (Ocean FreightCost) ក៏មានតម្លៃប្រហាក់ប្រហែលនឹងប្រទេសផ្សេងៗក្នុងតំបន់ដែរ។ ជាមួយគ្នានេះ គម្រោងនឹងចាប់ផ្ដើមសាងសង់នៅឆ្នាំ2020 និងបញ្ចប់នៅឆ្នាំ2023ឬឆ្នាំ2024 ដែលមានទឹកប្រាក់សរុប 203លានដុល្លារ។

ឯកឧត្តមស៊ុន ចាន់ថុល បានបន្ដទៀតថា កំពង់ផែស្វយ័តក្រុងព្រះសីហនុទទួលបាននូវការគាំទ្រពីរាជរដ្ឋាភិបាលជប៉ុន តាមរយៈទីភ្នាក់ងារ JICA ចាប់ពីឆ្នាំ1999 ដល់ឆ្នាំ2019 ដែលរាជរដ្ឋាភិបាលជប៉ុនបានផ្តល់ឥណទានសម្បទានសម្រាប់ស្តារ និងអភិវឌ្ឍន៍កំពង់ផែព្រះសីហនុប្រមាណ 382 លានដុល្លារអាមេរិក បន្ថែមលើថវិកាវិនិយោគផ្ទាល់របស់កំពង់ផែប្រមាណ 22លានដុល្លារអាមេរិក ៕

May 23, 2019

ប្រាសាក់ បន្តដំឡើងអត្រាការប្រាក់បញ្ញើសន្សំខ្ពស់រហូតដល់ 8%

ប្រាសាក់ ដែលជាគ្រឹះស្ថានហិរញ្ញវត្ថុធំជាងគេនៅកម្ពុជា បន្តផ្ដល់អត្រាការប្រាក់បញ្ញើសន្សំខ្ពស់រហូតដល់ 8% ព្រមជាមួយការផ្ដល់ការទូទាត់ថ្លៃទឹក ថ្លៃភ្លើង ផ្ទេរប្រាក់ ផ្ទេរប្រាក់ទៅអ្នកគ្មានគណនី ទិញកាតទូរស័ព្ទ ដោយមិនគិតកម្រៃសេវា។

លោក សាយ សូនី នាយកប្រតិបត្តិគ្រប់គ្រងទីផ្សាររបស់ប្រាសាក់ បានឱ្យដឹងថា ការផ្ដល់ជូនអត្រាការប្រាក់ខ្ពស់រហូតដល់ 8% លើគណនីបញ្ញើមានកាលកំណត់នេះ គឺឆ្លើយតបតាមសំណូមពរអតិថិជនដែលមានបំណងវិនិយោគជាមួយប្រាសាក់។ ក្រៅពីការផ្តល់អត្រាការប្រាក់បញ្ញើសន្សំខ្ពស់ជាងគេ ប្រាសាក់ផ្តល់ជូនរយៈពេលដាក់សន្សំចាប់ពី 1 ខែរហូតដល់ 60 ខែ តាមលំហូរទឹកប្រាក់របស់អតិថិជន។

លោកបន្តទៀតថា ដើម្បីសម្រួលដល់ការប្រើប្រាស់សេវាបញ្ញើសន្សំ អតិថិជនរបស់ប្រាសាក់ទទួលបានបន្ថែមលើការប្រើប្រាស់សេវាផ្សេងៗដោយមិនគិតកម្រៃ លើការទូទាត់ថ្លៃទឹក ថ្លៃភ្លើង ផ្ទេរប្រាក់ទៅដៃគូជំនួញ ផ្ទេរប្រាក់ទៅអ្នកគ្មានគណនី ទិញកាតទូរស័ព្ទ ពិនិត្យសមតុល្យគណនី ពិនិត្យអត្រាប្តូរប្រាក់ ភ្ជាប់សេវាធនាគារចល័ត និងទទួលបានប័ណ្ណអេធីអឹមដ៏ស្រស់ស្អាត ហើយអាចឱ្យអតិថិជនធ្វើប្រតិបត្តិការទាំងនេះបានគ្រប់ទីកន្លែង និងពេលវលា។ ដូច្នេះសូមបើកគណនីនៅប្រាសាក់ដើម្បីទទួលនូវសេវាទាំងនេះដោយរីករាយ។

សូមបញ្ជាក់ផងដែរថា ប្រាសាក់ មានអាជ្ញាប័ណ្ណប្រកបអាជីវកម្មទទួលប្រាក់បញ្ញើពីសាធារណជន ពីធនាគារជាតិនៃកម្ពុជា។ សន្សំប្រាក់នៅប្រាសាក់ សាច់ប្រាក់របស់លោកអ្នកខិតខំប្រឹងប្រែងធ្វើការដើម្បីលោកអ្នក! ប្រាសាក់រីកចម្រើនជាមួយគ្នា!

May 23, 2019

កំណើនសេដ្ឋកិច្ច ជំរុញការចាប់ផ្តើមអនុសញ្ញាស្តីពីការទាមទារសំណងធានារ៉ាប់រង

សិក្ខាសាលា “អនុសញ្ញាទាមទារសំណងនៅអាស៊ី” បានចាប់ផ្តើមដើម្បីភ្ជាប់អ្នកពាក់ព័ន្ធនៅក្នុងវិស័យធានារ៉ាប់រង ពិភាក្សាអំពីបញ្ហាប្រឈមនានា និងលើកកម្ពស់ការអនុវត្តល្អបំផុតក្នុងការទាមទារសំណង។

យោងតាមអ្នករៀបចំកម្មវិធីនេះបានបញ្ជាក់ថា គឺជាព្រឹត្តិការណ៍ដ៏ទូលំទូលាយមួយដែលផ្តល់នូវឱកាសដែលមិនធ្លាប់មាន ដើម្បីអភិវឌ្ឍន៍ និងបង្កើនទំនាក់ទំនង និងចែករំលែកការយល់ដឹងពីអ្នកមានជំនាញឈានមុខគេពីវិស័យជាច្រើនដែលត្រូវបានគេប្រារព្ធធ្វើឡើងនៅក្រោមប្រធានបទ “ការច្នៃប្រឌិត និងការជឿនលឿនខាងវិទ្យាសាស្ត្រនៅក្នុងពាក្យបណ្តឹង” ហើយបានផ្តោតលើតំបន់អាស៊ីដោយអ្នកចូលរួមជាតំណាងក្រុមហ៊ុនធានារ៉ាប់រង ឈ្មួញកណ្តាល អ្នកសម្របសម្រួលធានារ៉ាប់រង ការបាត់បង់ ទីប្រឹក្សាអាជីព មេធាវី អ្នកផ្គត់ផ្គង់ និងអ្នកផ្តល់សេវាកម្មជាដើម។

ឯកឧត្តម ម៉ី វ៉ាន់ អគ្គនាយកនៃអគ្គនាយកដ្ឋានឧស្សាហកម្មហិរញ្ញវត្ថុ នៃក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា៖“ព្រឹត្តិការណ៍នេះផ្តល់ចំណេះដឹងផ្នែកធានារ៉ាប់រងដល់សាធារណជន។ វានឹងជួយឱ្យយល់អំពីតួនាទីរបស់អ្នកសម្របសម្រួលដែលជួយដោះស្រាយ និងគណនាអត្រានៃសំណងធានារ៉ាប់រងនៅពេលមានការទាមទារ”។ លោកបានបន្ថែមថា ព្រឹត្តិការណ៍នេះបង្ហាញថាឧស្សាហកម្មនេះមានសមត្ថភាពប្រឈមនឹងហានិភ័យដែលមិនរំពឹងទុក។

ឯកឧត្តមអគ្គនាយកបានថ្លែងថា វិស័យធានារ៉ាប់រងបានរីកចម្រើនយ៉ាងខ្លាំងក្នុងប៉ុន្មានឆ្នាំថ្មីៗនេះ ដែលនេះជាលទ្ធផលនៃកំណើនសេដ្ឋកិច្ចជាតិ និងកំណើនប្រាក់ចំណូលរបស់ប្រជាជន។

យោងតាមសមាគមធានារ៉ាប់រងកម្ពុជា (IAC)បានឱ្យដឹងថា ប្រាក់ចំណូលសរុបមានចំនួន 196.4លានដុល្លារកាលពីឆ្នាំមុន ធៀបនឹងឆ្នាំមុនមួយទៀតដែលមានចំនួន 151.6លានដុល្លារ។ ការលក់បានពីការធានារ៉ាប់រងទូទៅបានកើនឡើង 15% ដោយការធានារ៉ាប់រងអាយុជីវិតបានកើនឡើងជាង 50%។គិតត្រឹមឆ្នាំ2018 មានក្រុមហ៊ុនធានារ៉ាប់រងអាយុជីវិតចំនួន 12 និងក្រុមហ៊ុនធានារ៉ាប់រងអាយុជីវិតចំនួន 8កំពុងប្រតិបត្តិការនៅក្នុងប្រទេស។

ប្រធានសមាគមធានារ៉ាប់រង លោក ហ៊ុយ វ៉ាថារ៉ូបានប្រាប់ថា៖“យើងមានសុទិដ្ឋិនិយមថា ទីផ្សារធានារ៉ាប់រងនៅកម្ពុជានឹងបន្តកើនឡើង យើងមានសក្តានុពលដ៏អស្ចារ្យសម្រាប់កំណើនខ្ពស់ ស្របតាមកំណើនសេដ្ឋកិច្ចឆាប់រហ័សរបស់ប្រទេស។ កំណើនសេដ្ឋកិច្ចនេះកំពុងបង្កើនប្រាក់ចំណូលរបស់ប្រជាជនដែលនាំឱ្យមានតម្រូវការខ្ពស់ខាងការធានារ៉ាប់រង”។

លោក យក់ ចំរើនឬទ្ធិ អគ្គនាយកក្រុមហ៊ុនធានារ៉ាប់រងហ្វ័រតេ(Forte)បានមានប្រសាសន៍ឱ្យដឹងថា៖“ជាធម្មតាការធានារ៉ាប់រង វាមានអនុសញ្ញារបស់វា និងមានទៅតាមតំបន់ដោយឡែកពីគ្នា ព្រោះការធានារ៉ាប់រងវាមិនមានអ្វីកំណត់ជាក់លាក់ទេដោយសារយើងមានការធានារ៉ាប់រងតាមប្រទេសរៀងៗខ្លួនដែលត្រូវអនុវត្ត”។

លោកបានបញ្ជាក់ទៀតថា ដូច្នេះយើងត្រូវការទាមទារអនុសញ្ញានេះដើម្បីឱ្យមានការកំណត់ជាក់លាក់ ឬអនុវត្តជានិន្នាការរួម ដូចជាតំបន់អាស៊ីត្រូវមានអនុសញ្ញាមួយ និងតំបន់អាស៊ានក៏ត្រូវមានអនុសញ្ញាមួយសម្រាប់អនុវត្តនូវការធានារ៉ាប់រងនេះ។ ចំពោះការទាមទារសំណងធានារ៉ាប់រងពីមុនការធ្វើប្រតិបត្តិការជាលិខិត ឬក្រដាសស្នាមគឺធ្វើឡើងដោយសំណេរដៃ តែបច្ចុប្បន្នដោយសារការវិវឌ្ឍនៃឌីជីថល គឺអាចមានការរៀបចំលិខិតស្នាមទៅជាប្រព័ន្ធអនឡាញវិញ ដែលជាការសម្របទៅតាមវិវឌ្ឍនាការនេះ។ ដូច្នេះបានជាយើងត្រូវសិក្សាពីបញ្ហានេះថា តើត្រូវមានអ្វីដែលជាភាពប្រឈម ការលំបាក និងងាយស្រួលយ៉ាងណា?ដើម្បីឱ្យការទាមទារសំណងធានារ៉ាប់រងទទួលស្គាល់ដោយច្បាប់សម្រាប់ប្រទេសយើង។

លោក យក់ ចំរើនឬទ្ធិ បានបន្ថែមទៀតថា ចំពោះមុខរបរធានារ៉ាប់រង វាវិវឌ្ឍទៅតាមពេលវេលា និងកាលៈទេសៈ ដូច្នេះចំពោះចំណុចខ្វះខាតដែលកើតមាន គេតែងរៀបចំសិក្ខាសាលាដើម្បីស្វែងយល់។ ដោយឡែកធានារ៉ាប់រងក្នុងប្រទេសយើង មានការវិវឌ្ឍលឿនទៅតាមការរីកចម្រើនរបស់វិទ្យាសាស្ត្រសង្គមរបស់យើង។

លោក ចំរើនឬទ្ធិ បន្តថា៖“នៅពេលដែលវិទ្យាសាស្ត្រជឿនលឿន មានអ្វីវិវឌ្ឍន៍ថ្មី ធានារ៉ាប់រងក៏ត្រូវវិវឌ្ឍទៅតាមភាពជឿនលឿននោះដែរ ដូចសាររបស់ពិភពលោកបានគូសបញ្ជាក់ថា នៅក្នុងពិភពលោកយើងនេះ បើសិនជាគ្មានការធានារ៉ាប់រងទេពិភពលោកនឹងអចលនា គឺគ្មានអ្វីធ្វើចលនាទេ ព្រោះថា រថយន្តនឹងមិនទៅមុខរួចទេ បើគ្មានការធានារ៉ាប់រង។ សូម្បីតែរថភ្លើង ឬយន្តហោះ បើគ្មានការធានារ៉ាប់រង គេមិនអាចហោះ ឬបើកបរបានឡើយ។ ទំនិញផ្សេងៗ បើគ្មានការធានារ៉ាប់រង ក៏មិនអាចបញ្ជូនចេញបានដែរ។ វាមានអនុសញ្ញាច្រើនទៅតាមប្រភេទនីមួយៗ ដូច្នេះវាមាននូវចំណុចខ្វះខាតច្រើនដែលត្រូវបញ្ចូលបន្ថែម សម្រាប់ការទាមទារសំណងនៃការធានារ៉ាប់រងនេះ។

លោក យក់ ចំរើនឬទ្ធិ បានបញ្ជាក់ថា៖“ដោយបច្ចុប្បន្នកំណើនសេដ្ឋកិច្ចបាននិងកំពុងបង្កើនប្រាក់ចំណូលរបស់ប្រជាជនដែលនាំឱ្យមានតម្រូវការខ្ពស់សម្រាប់ការធានារ៉ាប់រង ដូចនេះអនុសញ្ញាទាមទារសំណងការធានារ៉ាប់រងនៅអាស៊ី បានចាប់ផ្តើមដើម្បីភ្ជាប់អ្នកពាក់ព័ន្ធនៅក្នុងវិស័យធានារ៉ាប់រងឱ្យមានការទទួលខុសត្រូវខ្ពស់ និងជឿជាក់ថា ឧស្សាហកម្មនេះមានសមត្ថភាពប្រឈមនឹងហានិភ័យបាន”៕

May 21, 2019

ផុតពីអាកាសធាតុក្តៅខ្លាំង ក្រសួងចេញសេចក្តីណែនាំការពារខ្យល់រន្ទះនៅតាមគ្រឹះស្ថានអប់រំ

ផុតពីរដូវក្តៅខ្លាំងមួយរយៈពេលចុងក្រោយនេះមក បញ្ហាគ្រោះធម្មជាតិនៅតែជាកត្តាប្រឈម និងហានិភ័យសម្រាប់ការសិក្សារបស់សិស្សានុសិស្សទូទាំងប្រទេសនៅឡើយ។ ថ្មីៗនេះក្រសួងអប់រំ យុវជន និងកីឡាបានចេញសេចក្តីណែនាំស្តីពីវិធានការការពារខ្លួនពីភ្លៀង ផ្គរ រន្ទះ ខ្យល់កន្ត្រាក់នារដូវភ្លៀងនៅតាមគ្រឹះស្ថានសិក្សាសាធារណៈ និងឯកជននៅទូទាំងប្រទេសដើម្បីដាក់ឱ្យបុគ្គលិកសិក្សាទាំងអស់អនុវត្តក្នុងគោលបំណងកាត់បន្ថយផលប៉ះពាល់ពីធម្មជាតិដល់សិស្សានុសិស្ស។

សេចក្តីប្រកាសបានបញ្ជាក់ថា បច្ចុប្បន្ននេះអាកាសធាតុមានការប្រែប្រួល និងមានភ្លៀង ផ្គរ រន្ទះ ខ្យល់កន្ត្រាក់ខ្លាំងដែលជាហេតុបណ្តាលឱ្យមានគ្រោះថ្នាក់ដល់អាយុជីវិតមនុស្ស សត្វ រុក្ខជាតិជាដើម។ ដើម្បីបង្ការគ្រោះថ្នាក់ដែលអាចកើតមាននៅរដូវភ្លៀងនេះ សូមគ្រឹះស្ថានអប់រំទាំងអស់ជួយណែនាំដល់សិស្សដើម្បីចៀសវាងគ្រោះថ្នាក់នៅពេលសង្កេតឃើញមានដុំពពកធំៗ និងកម្ពស់ខ្ពស់ឈរត្រង់ពីលើ និងមានពណ៌ខ្មៅ អាចនឹងមានរន្ទះ ភ្លៀង ព្រិល (កូនដុំទឹកកក)ឬអាចមានគ្រោះថ្នាក់ផ្សេងៗទៀតជាយថាហេតុ។

ក្រសួងបានធ្វើការណែនាំឱ្យសិស្សចៀសវាងការជិះម៉ូតូបណ្ដើរនិយាយទូរស័ព្ទបណ្ដើរ ឬអង្គុយក្រោមដើមឈើ ជាដើម និងគួរបង្អោនខ្លួនដោយរក្សាចម្ងាយ4ម៉ែត្រពីមែកឈើ។ ក្រៅពីនេះសិស្សមិនគួរអង្គុយក្នុងតង់នៅពេលមានបាតុភូតធម្មជាតិបែបនេះកើតឡើង ហើយសិស្សគួរបង្អោនខ្លួនដោយបញ្ឈរជង្គង់ទាំងពីរដាក់ជិតគ្នា និងយកដៃខ្ទប់ត្រចៀកទាំងសងខាងដើម្បីការពាររន្ទះ។ ប្រសិនបើកំពុងស្ថិតក្នុងទីវាលត្រូវចេញពីកន្លែងដែលមានទឹក ឬទីវាលស្រឡះឱ្យឆ្ងាយ ហើយត្រូវសម្ងំ ឬរត់ចូលផ្ទះជាប្រញាប់ និងប្រសិនបើកំពុងស្ថិតនៅក្នុងរថយន្តវិញ ក៏ជាចំណុចសុវត្ថិភាពមួយដែរតែមិនត្រូវយកដៃ ឬខ្លួនប្រាណទៅប៉ះចង្កូត ឬទ្វារឡាននោះទេ។

ចំពោះគ្រឿងអគ្គិសនី ឬទូរស័ព្ទគួរដាក់នៅឱ្យឆ្ងាយក្នុងចម្ងាយប្រមាណ 1ម៉ែត្រពីប្រភពអគ្គិសនី និងមិនត្រូវប្រើប្រាស់ឧបករណ៍អគ្គិសនី និងឧបករណ៍អេឡិចត្រូនិកនោះទេក្នុងពេលកំពុងភ្លៀងខ្លាំងដែលអាចនឹងមានផ្គររន្ទះខ្លាំង។ សម្រាប់គ្រឿងអលង្ការប្រភេទលោហៈគួរកុំពាក់ ហើយត្រូវពាក់ទ្រនាប់ជើងរាល់ពេលរត់លេង ឬដើរលេងជាដើម។ ក្រៅពីនេះកុំឈរនៅក្បែរមាត់បង្អួច ឬបង្គោលភ្លើង ឬអង់តែនជាដើម។បើមានលទ្ធភាពគួរបំពាក់ឧបករណ៍ការពាររន្ទះនៅតាមអគារនានា និងត្រូវអប់រំសិស្ស ឬកុមារមិនឱ្យលេងក្រោមដើមឈើ និងកុំធ្វើដំណើរក្នុងពេលភ្លៀងខ្លាំង។

ក្រសួងអប់រំ ក៏បានបង្ហាញផងដែរនូវវិធីសង្គ្រោះបឋមដល់ជនរងគ្រោះដោយសាររន្ទះដោយត្រូវពិនិត្យមើលចង្វាក់ដង្ហើម និងបេះដូងជនរងគ្រោះ។ ប្រសិនបើជនរងគ្រោះមិនដកដង្ហើម ត្រូវផ្លុំខ្យល់ដោយប្រើមាត់នឹងមាត់ជាមួយជនរងគ្រោះរហូតដល់ជនរងគ្រោះដកដង្ហើមឡើងវិញ។ ប្រសិនបើជនរងគ្រោះបាត់ចង្វាក់ជីពចរ ត្រូវធ្វើចលនាបេះដូងដោយយកបាតដៃទាំង2សង្កត់-ដកៗលើឆ្អឹងសន្ទះទ្រូងរហូតទាល់តែបេះដូងរបស់ជនរងគ្រោះមានចលនាឡើងវិញដោយការស្ទាបជីពចរ។ ម្យ៉ាងវិញទៀតត្រូវក្រាលកន្ទេល ឬបាវឆ្នូតឱ្យជនរងគ្រោះដេកពីលើ កុំឱ្យជនរងគ្រោះដេកនៅផ្ទាល់ដី ឬត្រាំទឹក និងកុំឱ្យខ្លួនប្រាណជនរងគ្រោះត្រជាក់ខ្លាំងពេក។

បន្ថែមពីលើនេះ ប្រសិនបើឃើញមានបាក់ឆ្អឹង ឬហូរឈាម សូមចល័តជនរងគ្រោះដោយប្រុងប្រយ័ត្នខ្លាចក្រែងបង្កគ្រោះថ្នាក់បន្ថែម។ ទាំងអស់គ្នាគួរមានទំនាក់ទំនងជាមួយអ្នកពាក់ព័ន្ធទាំងអស់នៅតាមមូលដ្ឋានគ្រឹះស្ថានសិក្សាក្នុងការទប់ស្កាត់គ្រោះមហន្តរាយផ្សេងៗ។ ក្នុងករណីមានជំងឺ ឬហានិភ័យសុខភាពក្នុងរដូវភ្លៀងនេះ សូមរាយការណ៍តាមរយៈបុគ្គលិកសុខាភិបាលដែលនៅជិតបំផុត ឬសមត្ថកិច្ចពាក់ព័ន្ធនៅតាមមូលដ្ឋានរបស់ខ្លួនដើម្បីដោះស្រាយ និងទទួលបានការជួយសង្គ្រោះបន្ទាន់៕

May 20, 2019

កាសែតឡារ៉ែន ពាណិជ្ជ លេខ 173

[easy_media_download url=”https://www.lareine.com.kh/wp-content/uploads/2019/08/LRPN_173-Final-For-Web.pdf” force_dl=”1″]

May 19, 2019

អ្វីខ្លះជាឱកាស និងកត្តាប្រឈមរបស់កម្ពុជាក្នុងបដិវត្តន៍ឧស្សាហកម្មជំនាន់ថ្មី?…

កម្ពុជាជាប្រទេសមួយក្នុងចំណោមបណ្តាប្រទេសទាំងអស់លើពិភពលោកដែលកំពុងយកចិត្តទុកដាក់លើការបណ្តុះបណ្តាលធនធានមនុស្សដើម្បីឆ្លើយតបទៅនឹងបរិបទឌីជីថល និងផ្នែកសំខាន់ៗជាច្រើនទៀតនៃបដិវត្តន៍ឧស្សាហកម្ម។ កម្ពុជាមានចំណុចជាច្រើនអំណោយផលសម្រាប់ការអភិវឌ្ឍខ្លួនឆ្លើយតបនឹងបម្រែបម្រួលយ៉ាងឆាប់រហ័សនេះ តែទោះជាយ៉ាងនេះក្តីក៏មានកត្តាប្រឈមជាច្រើនដែលទាមទារឱ្យមានកិច្ចខិតខំប្រឹងប្រែងខ្លាំងបំផុតដើម្បីដោះស្រាយ។

1. ឱកាសរបស់កម្ពុជា
ឯកឧត្តមបណ្ឌិតសភាចារ្យ ណាត ប៊ុនរឿន រដ្ឋលេខាធិការក្រសួងអប់រំ យុវជន និងកីឡា បានលើកឡើងថា ប្រទេសកម្ពុជាមានទាំងកត្តាកាលានុវត្តភាព និងកត្តាប្រឈមជាច្រើនក្នុងវិស័យធនធានមនុស្សដែលយើងបានដឹងច្បាស់ និងត្រៀមខ្លួនកែប្រែកត្តាប្រឈមទាំងអស់នោះឱ្យមានភាពប្រសើរឡើង។ បើនិយាយពីកាលានុវត្តភាព យើងឃើញថា កម្ពុជាបានភ្ជាប់ឱកាសរបស់ខ្លួនជា 3កម្រិត គឺកម្រិតសកល កម្រិតជាតិ និងកម្រិតក្រសួងអប់រំ។ កម្រិតសកល គឺយើងបានភ្ជាប់ទំនាក់ទំនងល្អ និងអនុវត្តទៅតាមចលនាសំខាន់ៗទាំងថ្នាក់ពិភពលោក និងថ្នាក់តំបន់។ នៅឆ្នាំ1990 កម្ពុជាបានចាប់ផ្តើមក្នុងចលនាសកលមួយស្តីពីការអប់រំសម្រាប់ទាំងអស់គ្នាដែលធ្វើឡើងនៅប្រទេសថៃហើយនៅឆ្នាំ 2015 មានចលនាថ្មីមួយទៀតគឺគោលដៅអភិវឌ្ឍន៍សហសវត្សរ៍ 2015។ បន្ទាប់មកទៀតនាពេលថ្មីៗនេះជាអន្តរជាតិមានចលនាថ្មីមួយទៀតហៅថា គោលដៅអភិវឌ្ឍន៍ប្រកបដោយចីរភាព2030 ហេតុនេះកម្ពុជាបានចូលរួម និងតាមទាន់គ្រប់ចលនាសំខាន់ៗរបស់សកលលោក ដែលនេះជាឱកាសមួយផងដែរ។

ឯកឧត្តម ណាត ប៊ុនរឿន មានប្រសាសន៍ថា៖ “បើមើលតាមចរន្តទាំងអស់នេះយើងឃើញថា កម្ពុជានៅមិនឆ្ងាយពីពិភពលោកទេ ដែលនេះជាឱកាសសម្រាប់កម្ពុជាក្នុងការចូលរួម និងខិតខំប្រឹងប្រែងត្រៀមខ្លួនអភិវឌ្ឍទៅតាមចរន្តសកល”។

ឯកឧត្តមរដ្ឋលេខាធិការបានលើកឡើងផងដែរថា ចំណុចមួយផ្សេងទៀតដែលជាចំណុចសំខាន់របស់កម្ពុជា គឺគោលដៅអភិវឌ្ឍន៍ប្រកបដោយចីរភាព2030 គឺស្របទៅនឹងគោលដៅរបស់កម្ពុជាដែលចង់ក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ2030 ហើយស្របជាមួយគ្នានេះកម្ពុជាក៏មានគោលដៅអភិវឌ្ឍន៍សំខាន់ៗរបស់ខ្លួនផងដែរដោយផ្តោតលើសមធម៌ បរិយាប័ន្ន គុណភាពអប់រំ សិក្សាពេញមួយជីវិត និងសម្រាប់ទាំងអស់គ្នា។ ហេតុនេះចាប់ពីថ្ងៃនេះទៅ បើនិយាយពីប្រព័ន្ធអប់រំ គឺគេចាប់ផ្តើមផ្តោតលើគុណភាពជាចម្បង។

ចំពោះឱកាសនៅថ្នាក់តំបន់វិញ ឯកឧត្តមបានលើកឡើងថា ក្រៅពីការប្រជុំប្រមុខរដ្ឋាភិបាលអាស៊ាន យើងក៏មានការប្រជុំជាទៀងទាត់រវាងរដ្ឋមន្ត្រីអប់រំនៅអាស៊ានផងដែរ ដើម្បីជជែកគ្នា ពិភាក្សា និងដឹងថា តើយើងស្ថិតនៅកម្រិតណា? ហើយខ្វះខាតអ្វីខ្លះ? និងត្រូវបន្តអភិវឌ្ឍអ្វីខ្លះបន្ថែមទៀត?។ ចំណែកឯកម្រិតជាតិវិញ គឺកម្ពុជាមានចក្ខុវិស័យ2030 និង2050 ដែលផ្តោតសំខាន់លើសេដ្ឋកិច្ចឌីជីថល និងសង្គមឌីជីថល ដែលក្នុងនោះអ្វីដែលចាំបាច់សម្រាប់យើងដើម្បីសម្រេចគោលដៅគឺការអប់រំ។ ក្រៅពីនេះទៀតកម្ពុជាក៏មានគោលនយោបាយអភិវឌ្ឍន៍ឧស្សាហកម្ម2015-2025 ដែលយើងអាចនឹងឈានទៅការប្រកួតប្រជែងជាមួយបណ្តាប្រទេសមួយចំនួន ជាមួយនឹងកំណើនសេដ្ឋកិច្ចចំនួន 7%។ ឱកាសមួយផ្សេងទៀតគឺចំនួនប្រជាជនបច្ចុប្បន្ន ប្រមាណជា 15លាននាក់ ឬអាចកើនដល់16លាននាក់ បន្ទាប់ពីធ្វើជំរឿនគេបានរកឃើញថា ប្រជាជនដែលប្រើប្រាស់ទូរស័ព្ទ មានរហូតដល់ទៅ 117% ដោយឡែកអ្នកប្រើប្រាស់អុីនធើណិតមាន 68% ដែលចំណុចនេះបានបង្ហាញថា ប្រជាជនយើងបានសម្របខ្លួនរួចជាស្រេចជាមួយនឹងបច្ចេកវិទ្យា។ ចំពោះកម្លាំងពលកម្មវិញ យើងឃើញថាប្រជាជនកម្ពុជាចន្លោះពី 15ឆ្នាំ ដល់ 64ឆ្នាំ មានដល់ទៅ 8លាននាក់ ក្នុងចំណោមប្រជាជនចំនួន 15លាននាក់ជាង ដែលនេះជាចំណុចអំណោយផលយ៉ាងសំខាន់ក្នុងការអភិវឌ្ឍ។

ចំពោះឱកាសក្នុងលក្ខខណ្ឌក្រសួងវិញគឺ យើងមានចក្ខុវិស័យអប់រំរបស់ខ្លួន មានរចនាសម្ព័ន្ធអប់រំមានខ្លឹមសារអប់រំ និងមានលទ្ធផលអប់រំដែលថ្មីៗនេះបន្ទាប់ពីបានធ្វើការកែទម្រង់ប្រព័ន្ធអប់រំ ជាពិសេសការប្រឡងបាក់ឌុប យើងមើលឃើញថា ប្រជាជន និងសាធារណជន និងអន្តរជាតិមានការទទួលស្គាល់ជាវិជ្ជមាន។ លើសពីនេះទៅទៀតក្រសួងក៏បានរៀបចំឱ្យមានសាលាជំនាន់ថ្មី មានការរៀបចំការគ្រប់គ្រងតាមសាលារៀនបែបថ្មី មានរៀបចំកម្មវិធីវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) រួមទាំងកម្មវិធីអប់រំបច្ចេកទេស និងប្រឹក្សាអាជីពជាដើម។ លើសពីនេះទៅទៀតបច្ចុប្បន្ននេះសាលាចំណេះដឹងទូទៅនៅកម្ពុជាមានសិស្សប្រមាណជាង 3លាននាក់ និងមានគ្រូរហូតដល់ទៅ 9,2817នាក់ ស្របពេលដែលយើងក៏មានដៃគូអភិវឌ្ឍន៍ជាច្រើនគាំទ្រ និងជួយដល់ក្រសួង។

សម្រាប់ពេលបច្ចុប្បន្ននេះ ដើម្បីឆ្លើយតបទៅនឹងបរិបទឌីជីថល ក្រសួងអប់រំ យុវជន និងកីឡា ក៏បានរៀបចំកម្មវិធីអន្តរជាតិចំនួន 3ដើម្បីដាក់ឱ្យនិស្សិតកម្ពុជាសិក្សាគឺទី1 បង្កើតឱ្យមានបរិញ្ញាបត្រសេដ្ឋកិច្ចឌីជីថល ទី2 ផ្នែកវិស្វកម្មទីក្រុងឆ្លាត (smart city) និងទី3គឺផ្នែកបច្ចេកវិទ្យាហិរញ្ញវត្ថុ។

2. កត្តាប្រឈមក្នុងបរិបទបច្ចេកវិទ្យាចំពោះកត្តាប្រឈមវិញ
ឯកឧត្តមបណ្ឌិតសភាចារ្យ ណាត ប៊ុនរឿន បានបញ្ជាក់ថា ការកែទម្រង់ ឬអភិវឌ្ឍន៍វិស័យអប់រំមិនអាចធ្វើបានក្នុងរយៈពេលមួយយប់នោះទេ ហើយក៏មិនអាចធ្វើយូរអូសបន្លាយដូចរឿងមួយពាន់មួយយប់ដែរ ហេតុនេះយើងត្រូវការពេលវេលា និងដោះស្រាយឧបសគ្គជាច្រើន។ ការរៀបចំប្រព័ន្ធអប់រំត្រូវតែប្រុងប្រយ័ត្ន មិនអាចយកមនុស្សមួយជំនាន់ទៅសាកល្បងបានទេ ព្រោះមនុស្សជាកុមារ ជាយុវជនមិនមែនជាសត្វកណ្តុរដែលត្រូវពិសោធនោះទេ។ ការចាប់ផ្តើមរៀបចំប្រព័ន្ធអប់រំគឺត្រូវចាប់ផ្តើមធ្វើជាជំហានៗដោយប្រុងប្រយ័ត្នបំផុត ចាប់ផ្តើមពីតូចបំផុតតែត្រូវកំណត់ពីគុណភាព។

ឯកឧត្តមបញ្ជាក់ផងដែរថា ដូចយើងបានមើលឃើញហើយថា ឱកាសល្អរបស់យើង គឺយើងមានគ្រឹះស្ថានសិក្សារហូតដល់ទៅ 125គ្រឹះស្ថាន ទាំងរដ្ឋ និងឯកជន តែចំនួននិស្សិតដែលចប់បរិញ្ញាបត្រជាន់ខ្ពស់តែ 1%ប៉ុណ្ណោះដែលរៀនផ្នែកវិស្វកម្ម និងបច្ចេកវិទ្យា និងនិស្សិតដែលសិក្សាផ្នែកវិទ្យាសាស្ត្រតែ 2% ប៉ុណ្ណោះ។ ហើយលើសពីនេះទៅទៀតនិស្សិតដែលបញ្ចប់ថ្នាក់បណ្ឌិតថ្មីៗនេះ 100% ជាអ្នករៀនវិទ្យាសាស្ត្រពិត ដែលនេះជាកត្តាប្រឈមរបស់កម្ពុជាក្នុងបដិវត្តន៍ឧស្សាហកម្មទី4។

ចំពោះបញ្ហាគ្រូបង្រៀនវិញ យើងឃើញថា យើងមានគ្រូ 92,817នាក់ តែក្នុងនោះមានជាង 70,000នាក់មានគុណវុឌ្ឍិទាបជាងបរិញ្ញាបត្រ។ ចំណែកឯសិស្សដែលសិក្សាថ្នាក់មធ្យមសិក្សាចំណេះទូទៅវិញ មានតែ 22%ប៉ុណ្ណោះដែលបានបញ្ចប់ការសិក្សា។ ដោយឡែកការបារម្ភរបស់យើងមួយទៀត គឺគ្រូឧត្តមសិក្សាដែលកំពុងបង្រៀនទាំង 125គ្រឹះស្ថាន មានកម្រិតគុណវុឌ្ឍិបណ្ឌិតតែ 8.10%តែប៉ុណោះ ក្រៅពីនោះគឺបញ្ចប់ត្រឹមថ្នាក់បរិញ្ញាបត្រជាន់ខ្ពស់ និងថ្នាក់បរិញ្ញាបត្រ។

បើមើលទៅលើ់បញ្ហាប្រឈមក្នុងវិស័យពលកម្មវិញ យើងឃើញហើយថា កម្លាំងពលកម្មដែលមានអាយុចាប់ពី 15-64ឆ្នាំ មានដល់ទៅ 8លាននាក់លើ 15លាននាក់ តែក្នុងនោះនៅពេលវិភាគដល់កម្រិតអប់រំវិញយើងឃើញថា ក្នុងចំណោម 8លាននាក់នោះ មានអ្នកមិនបានចូលរៀន ឬចូលរៀនបានតិចតួចមានត្រឹមតែ 13.5% ដែលបញ្ហានេះប៉ះពាល់ដល់ផលិតភាពការងារផងដែរ ព្រោះពួកគាត់ប្រើកម្លាំងសុទ្ធសាធ ឬប្រើបញ្ញាតិចតួចបំផុត។ ក្រៅពីនេះ អ្នកដែលបានចប់បឋមសិក្សាមានចំនួន 27% ហើយអ្នកដែលចប់អនុវិទ្យាល័យមានចំនួន 14% ស្របពេលដែលអ្នកបញ្ចប់វិទ្យាល័យមានតែ 6%ប៉ុណ្ណោះ។ ក្នុងចំណោមនោះ អ្នកដែលបានបញ្ចប់មហាវិទ្យាល័យមានចំនួនតិចជាងគេ គឺ 5% ដែលនេះជាបញ្ហាប្រឈមមួយពាក់ព័ន្ធនឹងផលិតភាពការងារ។

បញ្ហាប្រឈមមួយថ្មីទៀត គឺរឿងគុណតម្លៃប្រពៃណី និងគុណតម្លៃសង្គមទំនើប មានន័យថា យើងមានបញ្ហាគម្លាតរវាងមនុស្សចាស់ និងចំណេះដឹងថ្មី។ បច្ចុប្បន្ននេះជាសម័យបច្ចេកវិទ្យា ដែលមនុស្សអាចផ្តល់សេវា ទទួលសេវា និងប្រើប្រាស់បណ្តាញបច្ចេកវិទ្យា តែមនុស្សចាស់នៅមិនទាន់អាចប្រើប្រាស់បាននៅឡើយ ដែលនេះជាបញ្ហាប្រឈម។ តែទោះជាយ៉ាងនេះក្តីយើងក៏មានបញ្ហាប្រឈមផងដែរចំពោះមនុស្សថ្មី និងចំណេះដឹងចាស់វិញ មានន័យថា នៅពេលដែលបច្ចេកវិទ្យាទំនើបពេក មនុស្សជំនាន់ថ្មីប្រើប្រាស់បច្ចេកវិទ្យាខ្លាំងជ្រុល ធ្វើឱ្យពួកគេបាត់បង់ការទំនាក់ទំនង លែងចេះសំពះគ្នាជាដើម ឬគម្លាតរវាងគ្រួសារកាន់តែឆ្ងាយពីគ្នាដែលនាំឱ្យមានបញ្ហា៕

May 17, 2019

យុវជនគួរព្យាយាមប្រើប្រាស់បច្ចេកវិទ្យាដើម្បីដោះស្រាយបញ្ហាសង្គមឱ្យមានប្រសិទ្ធភាពខ្ពស់

យុវជនជាកម្លាំងចលករដ៏សំខាន់ក្នុងការចូលរួមលើដំណោះស្រាយបញ្ហាប្រឈមនានាក្នុងសង្គម ដូចជាបញ្ហាអប់រំពីគ្រោះថ្នាក់ចរាចរណ៍ ការសម្អាតបរិស្ថានសង្គម វប្បធម៌ និងបញ្ហាជាច្រើនផ្សេងទៀតទៅតាមជំនាញ និងទេពកោសល្យរបស់ពួកគេ។ រឿងដែលពេញនិយមសម្រាប់យុវជនក្នុងការចូលរួមចំណែកដោះស្រាយបញ្ហាប្រឈមនៅជុំវិញខ្លួនរបស់ពួកគេ គឺការបង្កើតក្រុម ហើយនាំគ្នាអប់រំប្រជាជន ឬបង្កើតសកម្មភាពប្លែកៗដើម្បីឱ្យមនុស្សជាច្រើនបានមើលឃើញ និងបន្តសកម្មភាពវិជ្ជមានទាំងអស់នោះ។ ការធ្វើសកម្មភាពទាំងអស់នោះត្រូវបានគេមើលឃើញថា ជារឿងគំរូ និងជាចរន្តវិជ្ជមានសម្រាប់សង្គម តែនៅក្នុងយុគសម័យថ្មីនេះ យុវជនមានវិធីសំខាន់មួយផ្សេងទៀតដែលចំណាយប្រាក់តិច សន្សំពេលវេលា និងដោះស្រាយបញ្ហាបានច្រើន គឺប្រើប្រាស់បណ្តាញបច្ចេកវិទ្យា។

កញ្ញា សៀក ឡេង អ្នកសម្របសម្រួលកម្មវិធី Techno Innovation Challenge បានលើកឡើង ថា យុវជនកម្ពុជាគួរព្យាយាមសិក្សាស្វែងយល់ និងប្រើប្រាស់បច្ចេកវិទ្យាដើម្បីដោះស្រាយបញ្ហានានាក្នុងសង្គមព្រោះវាជាវិធីដែលអាចដោះស្រាយបញ្ហាបានយ៉ាង ឆាប់រហ័ស ចំណាយធនធានតិច និងមានប្រសិទ្ធភាពខ្ពស់។ បច្ចុប្បន្ននេះមានបញ្ហាជាច្រើនដែលយុវជនអាចចូលរួមប្រើប្រាស់បច្ចេកវិទ្យាដោះស្រាយ បាន ដូចជាបញ្ហាបរិស្ថាន បញ្ហាកសិកម្មបញ្ហាចំណីអាហារ និងបញ្ហាជាច្រើនផ្សេងទៀតដែលកើតឡើងនៅជុំវិញខ្លួនយើង ហើយមិនទាន់ត្រូវបានគេដោះស្រាយប្រកបដោយនិរន្តរភាពនៅឡើយ។

កញ្ញា សៀក ឡេង បាននិយាយថា៖ “តាមពិតយុវជនយើងជាច្រើនសុទ្ធតែមានសមត្ថភាពក្នុងការប្រើប្រាស់បច្ចេកវិទ្យាដើម្បីដោះស្រាយបញ្ហា ដូចជាការបង្កើត Apps ឬប្រមូលផ្តុំគ្នាបង្កើតគម្រោងឆ្លាតវៃនានាដើម្បីដោះស្រាយបញ្ហា ព្រោះការអប់រំបច្ចុប្បន្ននេះមានភាពទូលំទូលាយ ហើយវត្តមាននៃអុីនធើណិតអាចធ្វើឱ្យសិស្ស-និស្សិតសិក្សាពីចម្ងាយក៏បានដែរ”។

កញ្ញា សៀក ឡេង បានបញ្ជាក់ផងដែរថា បច្ចុប្បន្ននេះមិនថាយើងនៅទីណានោះទេ យើងសុទ្ធតែអាចប្រើប្រាស់បច្ចេកវិទ្យា ដើម្បីទាញយកប្រភពព័ត៌មានជាច្រើននៅក្នុងពិភពលោក ឬអាចទាញយកមេរៀនជាច្រើនដើម្បីសិក្សាដោយខ្លួនឯង ហើយច្នៃបច្ចេកទេសទាំងអស់នោះឱ្យត្រូវនឹងតម្រូវការជាក់ស្តែងនៅក្នុងសង្គម។ ក្រៅពីនេះ យុវជនដែលមានមូលដ្ឋានគ្រឹះផ្នែកបច្ចេកវិទ្យាខ្លះហើយ ក៏អាចអភិវឌ្ឍសមត្ថភាពរបស់ខ្លួនឯងបានផងដែរ តាមរយៈការចូលរួមក្នុងកម្មវិធីប្រកួតប្រជែងនានា ដែលក្នុងនោះមានអ្នកជំនាញជាច្រើនចាំជួយផ្តល់ជំនួយដល់ពួកគាត់ ដូចជាកម្មវិធី Techno Innovation ជាដើម ដែលយើងផ្តល់ឱកាសឱ្យយុវជនប្រើប្រាស់បច្ចេកវិទ្យាដើម្បីប្រកួតប្រជែង តែក៏ផ្តល់អ្នកជំនាញដើម្បីណែនាំពួកគាត់ដែលអនុញ្ញាតឱ្យគាត់កាន់តែមានសមត្ថភាពខ្លាំងក្នុងការបង្កើតនវានុវត្តន៍ផងដែរ។ ក្រោយពេលពួកគាត់បានទទួលការណែនាំ និងបណ្តុះបណ្តាលហើយ គាត់ក៏អាចយកគំរូនៃគម្រោងទាំងអស់នោះទៅបង្កើតជាអាជីវកម្មប្រកបដោយភាពច្នៃប្រឌិតខ្ពស់ថែមទៀតផង ព្រោះគំនិតច្នៃប្រឌិតដោយប្រើបច្ចេកវិទ្យាទាំងអស់នោះសុទ្ធតែផ្តល់ភាពងាយស្រួល និងជាជម្រើសឆ្លាតវៃសម្រាប់មនុស្សទូទៅ។

លោក អ៊ុន មាសសម្បត្តិ សហស្ថាបនិកនៃគម្រោងអាជីវកម្មដែលមានឈ្មោះថា WeChoul ;បានលើកឡើងថា នៅក្នុងសង្គមមានបញ្ហាជាច្រើនកើតឡើង ដោយក្នុងនោះមានបញ្ហាខ្លះមិនមែនជាបញ្ហាធំនោះទេ គ្រាន់តែយើងមិនទាន់មានវិធីសាស្ត្រសម្រួល ឬដោះស្រាយឱ្យបានងាយស្រួលប៉ុណ្ណោះ។ នៅពេលបញ្ហាតូចៗទាំងអស់នោះកើតឡើងដដែលៗយូរទៅ វានឹងក្លាយជាបញ្ហារ៉ាំរ៉ៃ ហើយប្រសិនបើអ្នកណាអាចដោះស្រាយវាបាន នោះយើងនឹងក្លាយជាមនុស្សដែលស្ថិតក្នុងការចងចាំ ឬក្លាយជាអ្នកដោះស្រាយបញ្ហាដែលមនុស្សគ្រប់គ្នាទទួលស្គាល់។ ក្នុងចំណោមសកម្មភាពនានា ការប្រើប្រាស់បច្ចេកវិទ្យាដើម្បីដោះស្រាយបញ្ហាជាវិធីសាស្ត្រល្អ និងមានភាពងាយស្រួលជាងគេ។

លោក អ៊ុន មាសសម្បត្តិ បាននិយាយថា៖ “សូមកុំខ្លាចបញ្ហា ឬគិតថាការប្រើប្រាស់បច្ចេកវិទ្យាជារឿងលំបាកខ្លាំងពេកដែលយើងធ្វើមិនបាន។ ឱ្យតែយើងមើលឃើញពីបញ្ហា ហើយមានឆន្ទៈក្នុងការចូលរួមដោះស្រាយ នោះយើងនឹងមានវិធីជាច្រើនដើម្បីធ្វើវាឱ្យបានមិនខាន”។

អ្នកបង្កើតសេវាកម្មដោយប្រើប្រាស់បច្ចេកវិទ្យាខាងលើបានលើកឡើងផងដែរថា ដំបូងឡើយក្រុមរបស់លោកក៏មិនសូវមានអ្នកខ្លាំងផ្នែកបច្ចេកវិទ្យាដែរតែលោកបានមើលឃើញបញ្ហារួមមួយរបស់ប្រជាជនខ្មែរ ឬភ្ញៀវទេសចរណ៍ដែលកំពុងខ្វះខាតផ្នែកជួលយានជំនិះនៅតំបន់កម្សាន្ត។ បន្ទាប់ពីកំណត់បញ្ហាហើយ លោកចាប់ផ្តើមស្វែងរកជំនួយនានា និងស្រាវជ្រាវបន្ថែមរហូតដល់បង្កើតបានជាសេវាកម្មថ្មីមួយសម្រាប់ជួលម៉ូតូដោយប្រើប្រាស់បច្ចេកវិទ្យា។ លោកបានបន្ថែមផងដែរថា មូលហេតុសំខាន់ដែលលោកប្រើប្រាស់បច្ចេកវិទ្យា ព្រោះក្រុមរបស់លោកមានគ្នាតិចមិនអាចជួយភ្ញៀវទេសចរណ៍ម្តងម្នាក់ៗឱ្យទទួលបានសេវាកម្មជួលម៉ូតូបានគ្រប់ៗគ្នានោះទេ ហើយក៏មិនអាចជួយអាជីវករដែលដាក់ជួលម៉ូតូឱ្យភ្ញៀវបានគ្រប់គ្នាដោយការទាក់ទងដោយផ្ទាល់បានដែរ។ ហេតុនេះការប្រើប្រាស់បច្ចេកវិទ្យា ជាជម្រើសឆ្លាតវៃ ដែលអាចធ្វើឱ្យគ្រប់ភាគីភ្ជាប់ទំនាក់ទំនងជាមួយគ្នាបានល្អ ចំណេញពេលវេលា និងថវិកាតិច៕

May 17, 2019

Author: ធឿន មករា