ធឿន មករា - La Reine Media

ទីភ្នាក់ងារបារាំងសម្រាប់អភិវឌ្ឍន៍ (AFD) ផ្តល់ហិរញ្ញប្បទានសហប្រតិបត្តិការលើទឹកប្រាក់ចំនួន 29.1លានអឺរ៉ូដល់កម្ពុជា

ទីភ្នាក់ងារបារាំងសម្រាប់អភិវឌ្ឍន៍ (AFD) និងកម្ពុជា កាលពីពេលថ្មីៗនេះបានចុះហត្ថលេខាលើកិច្ចព្រមព្រៀងផ្ដល់ហិរញ្ញប្បទានសហប្រតិបត្តិការក្នុងទឹកប្រាក់ចំនួន 29.1លានអឺរ៉ូ ឬប្រមាណជិត 33 លានដុល្លារអាមេរិកលើគម្រោងធ្វើទំនើបកម្មលើប្រព័ន្ធបណ្តាញបញ្ជូន និងចែកចាយអគ្គិសនី ក៏ដូចជាបង្កើនប្រសិទ្ធភាព និងនិរន្តរភាពក្នុងការផ្គត់ផ្គង់ថាមពលអគ្គិសនីនៅកម្ពុជា។

ក្នុងចំណោមហិរញ្ញប្បទានសហប្រតិបត្តិការចំនួន 29.1លានអឺរ៉ូ ក្នុងនោះឥណទានសម្បទានចំនួន 25លានអឺរ៉ូពីទីភ្នាក់ងារបារាំងសម្រាប់អភិវឌ្ឍន៍និងហិរញ្ញប្បទានឥតសំណងចំនួន 4.1លានអឺរ៉ូពីសហគមន៍អឺរ៉ុប។

គម្រោងនេះនឹងដាក់ទិសដៅពង្រីក និងអភិវឌ្ឍន៍ប្រព័ន្ធគ្រប់គ្រងអគ្គិសនី ដើម្បីវិវឌ្ឍទៅរកប្រព័ន្ធឆ្លាតវៃ (Smart Grid) ដែលអាចសម្រួលបានយ៉ាងច្រើនក្នុងការគ្រប់គ្រងប្រព័ន្ធបណ្តាញអគ្គិសនីទាំងមូល ក៏ដូចជាបង្កើនប្រសិទ្ធភាព និងនិរន្តរភាពក្នុងការផ្គត់ផ្គង់ថាមពលអគ្គិសនីនៅកម្ពុជាផងដែរ។

កិច្ចព្រមព្រៀងនេះធ្វើឡើងស្របពេលដែលឯកឧត្តម អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានដឹកនាំគណៈប្រតិភូជាន់ខ្ពស់នៃក្រសួងសេដ្ឋកិច្ច និងហិរញ្ញវត្ថុបានជួបពិភាក្សាការងារទ្វេភាគីជាមួយនាយកគ្រប់គ្រងទូទៅនៃទីភ្នាក់ងារបារាំងសម្រាប់អភិវឌ្ឍន៍ អ្នកតំណាងជាន់ខ្ពស់នៃសហគមន៍អឺរ៉ុប និងស្ថាប័នពាក់ព័ន្ធមួយចំនួនទៀតរបស់ភាគីបារាំង ស្របពេលដែលគណៈប្រតិភូជាន់ខ្ពស់កម្ពុជាបានចូលរួមកិច្ចប្រជុំជាន់ខ្ពស់ស្តីពី “ចីរភាពបំណុលសម្រាប់ចីរភាពកំណើន: ចីរភាពហិរញ្ញប្បទានសម្រាប់ការអភិវឌ្ឍនៅទីក្រុងប៉ារីស ប្រទេសបារាំង កាលពីដើមខែឧសភា ឆ្នាំ2019 កន្លងទៅ។

គណៈប្រតិភូកម្ពុជាដែលដឹកនាំដោយ ឯកឧត្តម អូន ព័ន្ធមុន្នីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុក៏បានចូលរួមពិភាក្សាអំពីការផ្ដល់ហិរញ្ញប្បទានសម្រាប់គម្រោងអភិវឌ្ឍន៍ហេដ្ឋារចនាសម្ព័ន្ធរូបវ័ន្ត តម្រូវការហិរញ្ញប្បទានសម្រាប់ការអភិវឌ្ឍរបស់ប្រទេសនីមួយៗ វិធីសាស្ត្រដែលប្រទេសនីមួយៗយកទៅអនុវត្តដែលអាចទទួលបានហិរញ្ញប្បទានអភិវឌ្ឍន៍ដែលចៀសវាងបានពីការជំពាក់ច្រើនហួសហេតុ ការប្រើប្រាស់ហិរញ្ញប្បទានដោយត្រឹមត្រូវ មានតម្លាភាព និងការ-ទទួលខុសត្រូវ ក៏ដូចជាអាចធានាបាននូវគុណភាពហេដ្ឋារចនាសម្ព័ន្ធរូបវ័ន្ត និងការលើកកម្ពស់ភាពជាម្ចាស់ក្នុងដំណើរការអភិវឌ្ឍន៍របស់ប្រទេសនីមួយៗ សំដៅចូលរួមចំណែកពង្រឹងនូវស្ថិរភាពម៉ាក្រូសេដ្ឋកិច្ច និងហិរញ្ញវត្ថុ និងការអភិវឌ្ឍប្រកបដោយចីរភាព។

ឯកឧត្តម អូន ព័ន្ធមុន្នីរ័ត្ន មានប្រសាសន៍ថា កម្ពុជាបានដាក់ចេញនូវវិធានការមុតស្រួច កែទម្រង់លើគ្រប់វិស័យ ពិសេសការកសាងហេដ្ឋារចនាសម្ព័ន្ធ និងការតភ្ចាប់ដើម្បីឱ្យកម្ពុជាអាចសម្រេចបានតាមគោលដៅអភិវឌ្ឍន៍ប្រកបដោយចីរភាព ទោះបីជាហិរញ្ញប្បទានកសាងហេដ្ឋារចនាសម្ព័ន្ធកម្ពុជានៅមានកម្រិតនៅឡើយក្ដី។

ឯកឧត្តម អូន ព័ន្ធមុន្នីរ័ត្ន បានមានប្រសាសន៍បន្តថា៖“កម្ពុជាស្នើឱ្យមានការចូលរួម និងគាំទ្របន្ថែមទៀតដល់ប្រទេសកំពុងអភិវឌ្ឍន៍ក្នុងការកសាងហេដ្ឋារចនាសម្ព័ន្ធរូបវ័ន្ត តាមរយៈការដាក់ចេញនូវវិធានវិនិយោគអភិវឌ្ឍន៍ហេដ្ឋារចនាសម្ព័ន្ធជាសកលសមស្រប ដើម្បីធានាបាននូវគុណភាពហេដ្ឋារចនាម្ព័ន្ធរូបវ័ន្តល្អប្រសើរ និងមានចីរភាព”។

បន្ថែមលើកិច្ចពិភាក្សាអំពីកិច្ចសហប្រតិបត្តិការអភិវឌ្ឍន៍កម្ពុជា និងបារាំងសំដៅលើកកម្ពស់កិច្ចសហប្រតិបត្តិការអភិវឌ្ឍន៍ និងលើកកម្ពស់ការធ្វើពិពិធកម្មសេដ្ឋកិច្ចកម្ពុជា និងបារាំងនេះ គណៈប្រតិភូកម្ពុជាក៏បានជួបជាមួយលោកជំទាវ Agnes PANNIERRUNACHER រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុបារាំង ហើយឯកឧត្តម អូន ព័ន្ធមុន្នីរ័ត្ន ក៏បានគូសបញ្ជាក់ពីមូលដ្ឋានតថភាពជាក់ស្តែង និងគ្រប់ជ្រុងជ្រោយអំពីហានិភ័យចំពោះការដកជាយថាហេតុនៃការអនុគ្រោះពន្ធលើទំនិញទាំងអស់លើកលែងតែសព្វាវុធ (EBA) ដោយសហភាពអឺរ៉ុប។

លោកជំទាវ Agnes PANNIER RUNACHER រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុបារាំងមានប្រសាសន៍ថា បារាំង និងកម្ពុជា គឺជាមិត្តដ៏ល្អដែលមិនអាចកាត់ផ្តាច់ពីគ្នាបាន ហើយបារាំងនឹងនៅតែបន្តជំរុញពង្រឹង និងពង្រីកកិច្ចសហប្រតិបត្តិការទាំងផ្នែកហិរញ្ញវត្ថុ និងបច្ចេកទេសដោយតម្រង់វិស័យនៃកិច្ចសហប្រតិបត្តិការរបស់បារាំងឱ្យស្របទៅនឹងយុទ្ធសាស្ត្រអភិវឌ្ឍន៍នានារបស់កម្ពុជាជាពិសេសការអភិវឌ្ឍហេដ្ឋារចនាសម្ព័ន្ធ និងការងារកែទម្រង់ហិរញ្ញវត្ថុសាធារណៈជាដើម។

លោកជំទាវ Agnes PANNIER RUNACHER មានប្រសាសន៍ថា៖“រដ្ឋាភិបាលបារាំងបានយល់ច្បាស់អំពីផលប្រយោជន៍នៃ EBA ចំពោះកម្ពុជា និងបន្តបង្ហាញការពិតរបស់កម្ពុជាចំពោះបញ្ហានេះ”។

ដូចគ្នាដែរ លោក Pierre Amilhat ប្រធាននាយកដ្ឋានអាស៊ីនៃសហភាពអឺរ៉ុបបានឱ្យដឹងថា ការខិតខំប្រឹងប្រែងរបស់កម្ពុជាក្នុងការកែទម្រង់អភិវឌ្ឍន៍ និងការរីកចម្រើន មានការផ្លាស់ប្តូរគួរឱ្យកត់សម្គាល់។លោកថ្លែងថា ក្នុងក្របខ័ណ្ឌនៃកិច្ចសហប្រតិបត្តិការកម្ពុជា ជាមួយសហភាពអឺរ៉ុប សហភាពអឺរ៉ុប នៅតែតម្រង់ទិសនៃកិច្ចសហប្រតិបត្តិការទៅលើវិស័យអាទិភាព រួមមានដូចជា វិស័យអប់រំ កសិកម្ម កំណែទម្រង់ការគ្រប់គ្រងហិរញ្ញវត្ថុសាធារណៈ និងការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។

ស្របពេលជាមួយគ្នានេះដែរ លោក Remi Riouxនាយកចាត់ការទូទៅនៃទីភ្នាក់ងារបារាំងសម្រាប់អភិវឌ្ឍន៍ (AFD) បានមានប្រសាសន៍ថា ទីភ្នាក់ងារបារាំងសម្រាប់អភិវឌ្ឍន៍មានបំណងនឹងបង្កើនទំហំឥណទានប្រចាំឆ្នាំរបស់ខ្លួនថែមទៀតឱ្យស្របនឹងបរិការណ៍អភិវឌ្ឍន៍នៅកម្ពុជា៕

May 27, 2019

រដ្ឋាភិបាលនឹងអភិវឌ្ឍខេត្តកំពតឱ្យទៅជាខេត្តគំរូខាងផលិតផលមានគុណភាពខ្ពស់

ក្រសួងទេសចរណ៍មានបំណងធ្វើឱ្យគោលដៅទេសចរណ៍ខេត្តកំពតក្លាយជាគោលដៅគំរូខាងគុណភាពផលិតផល ទំនិញ សេវាកម្ម គ្មានទំនិញក្លែងក្លាយ និងគ្មានទំនិញអន់គុណភាព។

នៅក្នុងកិច្ចប្រជុំត្រៀមរៀបចំពិធីបុណ្យសមុទ្រលើកទី8 (ជុំទី2) កាលពីដើមខែឧសភា ឆ្នាំ2019 កន្លងទៅនេះ នៅសាលាខេត្តកំពត ឯកឧត្តម ថោង ខុន រដ្ឋមន្ត្រីក្រសួងទេសចរណ៍បានជំរុញឱ្យមានការរៀបចំ “វិថីម្ហូបអាហារ” ឬភាសាអង់គ្លេសហៅថា “Food Street” នៅទីតាំងណាមួយក្នុងពិធីបុណ្យសមុទ្រនាពេលខាងមុខឱ្យបានល្អប្រសើរ ហើយ “Food Street” នេះក៏ចាត់ទុកជាផលិតផលទេសចរណ៍អចិន្ត្រៃយ៍មួយសម្រាប់ទីក្រុងកំពតផងដែរ។ឯកឧត្តមរដ្ឋមន្ត្រីបានលើកឡើងថា ខេត្តកំពតមានសក្ដានុពលខ្ពស់សម្រាប់អភិវឌ្ឍន៍វិស័យទេសចរណ៍ ក្នុងនោះមានទីក្រុងបេតិកភណ្ឌ រមណីយដ្ឋានទេសចរណ៍ធម្មជាតិដ៏ច្រើនសម្បូរបែប និងមានតំបន់កសិ-ទេសចរណ៍ទៀតផង។

ឯកឧត្តម ថោង ខុន មានប្រសាសន៍បន្តថា អាជ្ញាធរត្រូវត្រៀមរៀបចំឱ្យមានការតាំងពិព័រណ៍ផលិតផលក្នុងស្រុកឱ្យបានសម្បូរបែបប្រកបដោយគុណភាព បើអាចធ្វើបានស្នើឱ្យមានការរៀបចំការតាំងលក់សម្លៀកបំពាក់ល្អៗដែលផលិតក្នុងស្រុក ដូចជាផលិតផល outlet ជូនប្រជាពលរដ្ឋ និងទេសចរអន្តរជាតិ នៅក្នុងពិធីបុណ្យសមុទ្រ ដើម្បីឱ្យប្រជាពលរដ្ឋមានឱកាសបានទិញយកទៅប្រើប្រាស់ក្នុងតម្លៃដ៏សមរម្យមួយ។

ឯកឧត្តម រដ្ឋមន្ត្រីថ្លែងថា៖“នាំគ្នាធ្វើឱ្យគោលដៅទេសចរណ៍កំពត ក្លាយជាគោលដៅគំរូខាងគុណភាពផលិតផល ទំនិញ និងសេវាកម្ម គ្មានទំនិញក្លែងក្លាយ និងអន់គុណភាព ព្រោះវានឹងជួយលើកកម្ពស់ទំនិញក្នុងស្រុក ដើម្បីបង្កើនចំណូលរបស់អ្នកផលិត និងកាត់បន្ថយការនាំចូល”។

ឯកឧត្តម រដ្ឋមន្ត្រី ថោង ខុន បានបន្តទៀតថា ខណៈពេលដែលខេត្តកំពតនឹងរៀបចំពិធីបុណ្យសមុទ្រនៅឆ្នាំនេះ ព្រឹត្តិការណ៍មួយដែលទាក់ទាញភ្ញៀវទេសចរជាតិ និងអន្តរជាតិជាច្រើនដែលនឹងធ្វើឱ្យខេត្តកំពតក្លាយជាខេត្តគំរូមួយសម្រាប់ការ-លក់ទំនិញក្នុងស្រុក និងបង្កើនម៉ាកផលិតផល “ផលិតនៅក្នុងប្រទេសកម្ពុជា”។

ឯកឧត្តម ថោង ខុន បានមានប្រសាសន៍ថា៖“ខេត្តនេះមានសក្តានុពលដ៏អស្ចារ្យនៅក្នុងវិស័យទេសចរណ៍ ព្រោះវាជាទីក្រុងបេតិកភណ្ឌ និងជាគោលដៅទេសចរណ៍ធម្មជាតិដ៏សំខាន់”។

លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានស្វាគមន៍នឹងការអំពាវនាវរបស់លោករដ្ឋមន្ត្រី។ លោកស្រីមានប្រសាសន៍ថា“ជាមួយនឹងចំនួនភ្ញៀវទេសចរបរទេសដែលកើនឡើងជារៀងរាល់ឆ្នាំ យើងត្រូវជំរុញផលិតផលក្នុងស្រុកដែលនឹងអនុញ្ញាតឱ្យយើងកាត់បន្ថយការនាំចូល”។

ឯកឧត្តម ថោង ខុន ក៏បានស្នើឱ្យអាជ្ញាធរពាក់-ព័ន្ធពន្លឿនការសាងសង់កំពង់ផែទេសចរណ៍ ដោយបង្កើនការធ្វើការ និងបន្ថែមចំនួនកម្មករជំនាញ និងវិស្វករផងដែរ។

លោក សយ ស៊ីណុល ប្រធានមន្ទីរទេសចរណ៍ខេត្តកំពតបានថ្លែងថា ការសាងសង់កំពង់ផែសមុទ្រនៅខេត្តកំពតនឹងចប់តាមការគ្រោងទុក។ លោកស៊ីណុល បានមានប្រសាសន៍ថា “កំពង់ផែនេះសម្រេចបានប្រហែល 25ភាគរយហើយ យើងគិតថាវានឹងត្រូវបានបញ្ចប់ទាន់ពេលវេលា នៅពេលសាងសង់ហើយ អ្នកទេសចរនឹងអាចទៅដល់ខេត្តនេះតាមនាវា”។

គួរបញ្ជាក់ថា តាមគម្រោង កំពង់ផែទេសចរណ៍អន្តរជាតិខេត្តកំពតនឹងបើកដំណើរការនៅឆ្នាំ2021។ កំពង់ផែនេះចំណាយទឹកប្រាក់ប្រមាណ 10លានដុល្លារអាមេរិកដែលវានឹងជួយជំរុញដល់កំណើនទេសចរនៅក្នុងខេត្តកំពត ជាពិសេសភ្ញៀវមកពីប្រទេសថៃ និងវៀតណាម។

គួរបញ្ជាក់ដែរថា ក្នុងអំឡុងពេល 3ខែដំបូងនៃឆ្នាំ2019 ខេត្តកំពតទទួលបានភ្ញៀវទេសចរជាង 467,900នាក់ដែលក្នុងនោះប្រហែល 57,100នាក់ គឺជាជនបរទេសដែលកើនឡើង 4.4ភាគរយ បើប្រៀបធៀបទៅនឹងរយៈពេលដូចគ្នាកាលពីឆ្នាំមុន។ដោយឡែកសម្រាប់ថ្ងៃឈប់សម្រាកក្នុងព្រះរាជពិធីបុណ្យចម្រើនព្រះជន្មព្រះករុណាសម្តេចព្រះបរមនាថ នរោត្តម សីហមុនី កាលពីថ្ងៃទី13 ដល់15 ខែឧសភា ឆ្នាំ2019 កន្លងទៅនេះ មានភ្ញៀវទេសចរទៅកម្សាន្តនៅខេត្តកំពតចំនួន 104,441នាក់៕

May 27, 2019

ក្នុងត្រីមាសទី1 ឆ្នាំ2019 ជប៉ុននាំចូលទំនិញពីកម្ពុជាប្រមាណ 454លានដុល្លារ

ការនាំចេញរបស់កម្ពុជាទៅប្រទេសជប៉ុនបានកើនឡើងប្រមាណ 16ភាគរយនៅត្រីមាសទី1 នៃឆ្នាំនេះបើធៀបនឹងរយៈពេលដូចគ្នាកាលពីឆ្នាំ2018 ។នេះបើយោងតាមរបាយការណ៍ចុងក្រោយរបស់អង្គការពាណិជ្ជកម្មក្រៅប្រទេសជប៉ុន (Jetro)។

របាយការណ៍ដដែលបានឱ្យដឹងថា ពាណិជ្ជកម្មរវាងប្រទេសទាំង2 បានឡើងដល់ 558លានដុល្លារពីខែមករា ដល់ខែមីនា ដែលកើនឡើង 16.5ភាគរយធៀបនឹងត្រីមាសដូចគ្នាកាលពីឆ្នាំមុន។ ប្រទេសកម្ពុជាបាននាំចេញទំនិញតម្លៃ 454លានដុល្លារទៅទីផ្សារជប៉ុនកើនឡើង 16ភាគរយ ខណៈការនាំចេញរបស់ជប៉ុនបានកើនឡើង 20ភាគរយស្មើនឹង104លានដុល្លារ។

អ្នកនាំពាក្យក្រសួងពាណិជ្ជកម្ម លោក ឡុង កែមវិចិត្រ បានមានប្រសាសន៍ថា ការរីកចម្រើននៃពាណិជ្ជកម្មរវាងប្រទេសទាំង2 គឺជាលទ្ធផលនៃទំនាក់ទំនងការទូតល្អក៏ដូចជាកិច្ចខិតខំប្រឹងប្រែងរបស់រដ្ឋាភិបាលកម្ពុជាដើម្បីធ្វើពិពិធកម្មទីផ្សារនាំចេញដែរ។

លោក វិចិត្រ បានលើកឡើងថា៖“ប្រទេសកម្ពុជានិងជប៉ុនមានទំនាក់ទំនងល្អ និងលើសពីនេះផលិតផលកម្ពុជាកំពុងទទួលបានការទទួលស្គាល់នៅបរទេស” តួលេខពាណិជ្ជកម្មទាំងនេះបង្ហាញពីសារៈសំខាន់នៃការកើនឡើងនៃទីផ្សារអាស៊ី ការធ្វើសមាហរណកម្មរបស់ប្រទេសក្នុងតំបន់ និងកិច្ចខិតខំប្រឹងប្រែងរបស់រដ្ឋាភិបាលដើម្បីធ្វើពិពិធកម្មទីផ្សារនាំចេញ”។

លោកបន្តថា ការធ្វើពិពិធកម្ម និងពង្រឹងការប្រកួតប្រជែង គឺជាអាទិភាពកំពូលសម្រាប់រដ្ឋាភិបាល។ លោកវិចិត្របន្ថែមថា៖ “ជប៉ុនកំពុងវិនិយោគលើវិស័យអាទិភាពជាច្រើន ជាពិសេសលើឧស្សាហកម្មធុនស្រាល និងឧស្សាហកម្មដែលត្រូវការកម្លាំងពលកម្មជំនាញ។ យើងសង្ឃឹមថា និន្នាការទាំងនេះនឹងបន្តទៅអនាគត”។

គួរកត់សម្គាល់ដែរថា ការនាំចេញរបស់កម្ពុជាភាគច្រើន គឺសម្លៀកបំពាក់ ផលិតផលស្បែកជើង និងគ្រឿងអេឡិចត្រូនិក ដូចជាអាគុយទូរស័ព្ទជាដើម។

យោងតាមក្រសួងពាណិជ្ជកម្មកម្ពុជាបានឱ្យដឹងថាប្រទេសជប៉ុនភាគច្រើននាំចេញគ្រឿងម៉ាស៊ីន រថយន្តនិងគ្រឿងអេឡិចត្រូនិកមកកម្ពុជា ក៏ដូចជាសាច់គោ ដែក និងថ្នាំពេទ្យផងដែរ។យោងតាមរបាយការណ៍របស់អង្គការពាណិជ្ជកម្មក្រៅប្រទេសជប៉ុន (Jetro)បានឱ្យដឹងថា កាលពីឆ្នាំមុនប្រទេសជប៉ុនបាននាំចូលទំនិញពីកម្ពុជាកើនឡើង 27.3ភាគរយ ដោយទំនិញតម្លៃសរុបជាង 1.6ពាន់លានដុល្លារត្រូវបានបញ្ជូនទៅប្រទេសជប៉ុន ខណៈដែលកម្ពុជាបានទិញទំនិញពីជប៉ុនចំនួនប្រហែល 421លានដុល្លារ កើនឡើង17.8ភាគរយ៕

May 27, 2019

កម្ពុជាទទួលបានហិរញ្ញប្បទាន $1,000លានបន្ថែមពីធនាគារពិភពលោកសម្រាប់រយៈពេល 5ឆ្នាំ

គណៈប្រតិភូនៃក្រុមប្រឹក្សានាយកប្រតិបត្តិប្រចាំធនាគារពិភពលោកបានបង្ហាញថា ក្រុមប្រឹក្សានេះនឹងពិនិត្យអនុម័តក្របខ័ណ្ឌភាពជាដៃគូជាមួយកម្ពុជារយៈពេល 5ឆ្នាំខាងមុខទៀត គឺចាប់ពីឆ្នាំ2019 ដល់ឆ្នាំ2023 ដោយគ្រោងនឹងផ្តល់ហិរញ្ញប្បទានប្រមាណ1,000លានដុល្លារអាមេរិកបន្ថែមទៀតដល់កម្ពុជា។

ឯកឧត្តម វង្សី វិស្សុត រដ្ឋមន្ត្រីស្តីទីនៃក្រសួងសេដ្ឋកិច្ច និងហិរញ្ញវត្ថុ បានលើកឡើងថា ទោះបីជាកិច្ចសហប្រតិបត្តិការ និងភាពជាដៃគូរវាងកម្ពុជា និងធនាគារពិភពលោកត្រូវជួបប្រទះនឹងភាពរអាក់រអួលមួយរយៈក្តី តែភាពជាដៃគូនេះត្រូវបានស្តារឡើងវិញនៅប៉ុន្មានឆ្នាំចុងក្រោយនេះ ដែលធ្វើឱ្យស្ថានភាពកាន់តែប្រសើរឡើងរហូតមកដល់ពេលនេះ។ ស្របពេលជាមួយគ្នានេះដែរ ធនាគារពិភពលោកក៏បានផ្តល់នូវអនុសាសន៍លើវិស័យសំខាន់ៗមួយចំនួនផងដែរ ដើម្បីតម្រង់ទិសការអភិវឌ្ឍឱ្យកាន់តែប្រសើរឡើង។

ឯកឧត្តម វង្សី វិស្សុត បានមានប្រសាសន៍ថា៖ “ក្នុងកិច្ចខិតខំប្រឹងប្រែងអស់រយៈពេលជិត 10ឆ្នាំកន្លងមកយើងបានធ្វើប្រក្រតីកម្ម និងពង្រឹងទំនាក់ទំនងកិច្ចសហប្រតិបត្តិការនេះឡើងវិញ”។

ឯកឧត្តមបានលើកឡើងផងដែរថា យើងសង្ឃឹមថា ធនាគារពិភពលោកនឹងអាចពង្រឹងសារៈសំខាន់នៃតួនាទីរបស់ខ្លួនឡើងវិញក្នុងកិច្ចអភិវឌ្ឍនៅកម្ពុជា ហើយនឹងក្លាយទៅជាដៃគូអភិវឌ្ឍន៍ដ៏ធំ និងសំខាន់ជាថ្មីម្តងទៀតជាមួយរាជរដ្ឋាភិបាលកម្ពុជា។

ក្នុងជំនួបជាមួយគណៈប្រតិភូប្រឹក្សានាយកប្រតិបត្តិប្រចាំធនាគារពិភពលោក ឯកឧត្តម វង្សី វិស្សុត បានបង្ហាញពីចំណុចសំខាន់ៗមួយចំនួននៃស្ថានភាពសេដ្ឋកិច្ចរបស់កម្ពុជាក្នុងរយៈពេល 20ឆ្នាំចុងក្រោយនេះផងដែរ ដោយក្នុងនោះកម្ពុជាសម្រេចបានកំណើនសេដ្ឋកិច្ចខ្ពស់ក្នុងរង្វង់ជាមធ្យម7.7% ក្នុង 1ឆ្នាំ និងបានប្រែក្លាយខ្លួនជាប្រទេសចំណូលមធ្យមកម្រិតទាបកាលពីឆ្នាំ2015។ ចំពោះ ផលិតផលក្នុងស្រុកសម្រាប់មនុស្សម្នាក់ៗបានកើនឡើង 4ដង ពីប្រមាណ 417ដុល្លារអាមេរិកក្នុងឆ្នាំ2004 ដល់ប្រមាណ 1,563 ដុល្លារអាមេរិកនៅឆ្នាំ2018។ ទន្ទឹមនឹងនេះ អត្រានៃភាពក្រីក្របានធ្លាក់ចុះពីជាង 53%នៅឆ្នាំ2004 មកនៅត្រឹមប្រមាណ13.4% នៅឆ្នាំ2014 និងប្រហែល10% នៅឆ្នាំ2018។ចំពោះទំហំពាណិជ្ជកម្មអន្តរជាតិវិញ យើងឃើញថា មានកំណើនជាវិជ្ជមាន ពីចំនួន17,723 លានដុល្លារអាមេរិកនៅក្នុងឆ្នាំ2013 ដល់ប្រមាណ 31,638លានដុល្លារអាមេរិកនៅក្នុងឆ្នាំ2018។

បន្ថែមពីលើនេះ កម្ពុជាក៏មានស្ថានភាពវិជ្ជមានផងដែរក្នុងការប្រមូលពន្ធដែលជួយឱ្យរាជរដ្ឋាភិបាលកាន់តែមានលទ្ធភាពក្នុងការបង្កើនចំណាយលើវិស័យអាទិភាព និងវិស័យលើកកម្ពស់ប្រសិទ្ធភាព និងផលិតភាពសេដ្ឋកិច្ច។ បើគិតចាប់ពីឆ្នាំ2013 ដល់ឆ្នាំ2018 ថវិកាចំណាយក្នុងវិស័យអប់រំបានកើន 3.2ដង ចំណែកឯវិស័យសុខាភិបាលបានកើនចំនួន 2.5ដង និងវិស័យកសិកម្មបានកើនឡើងចំនួន 3ដង ព្រមទាំងចំណាយវិនិយោគសាធារណៈដែលហិរញ្ញប្បទានដោយថវិកាជាតិបានកើន 3.5ភាគរយផងដែរ។ ឯកឧត្តមលើកឡើងផងដែរថា ដើម្បីសម្រេចទិសដៅរបស់កម្ពុជាក្នុងការប្រែក្លាយខ្លួនឱ្យទៅជាប្រទេសមានចំណូលមធ្យមកម្រិតខ្ពស់នៅឆ្នាំ2050 រាជរដ្ឋាភិបាលចាំបាច់ត្រូវបង្កើនកិច្ចខិតខំថែមទៀតក្នុងការធ្វើពិពិធកម្មសេដ្ឋកិច្ច និងលើកកម្ពស់សមត្ថភាពប្រកួតប្រជែងនៃសេដ្ឋកិច្ចជាតិ។ ក្នុងទិសដៅនេះ កម្ពុជាកំពុងជួបនូវបញ្ហាប្រឈមជារចនាសម្ព័ន្ធមួយចំនួន រួមមាន៖ ពិពិធកម្មមូលដ្ឋានសេដ្ឋកិច្ចនៅតូចចង្អៀត ភាពប្រកួតប្រជែងនៅទន់ខ្សោយ កង្វះពលកម្មជំនាញ កង្វះហេដ្ឋារចនាសម្ព័ន្ធរូបវ័ន្ត និងកំណើនឆាប់រហ័សនៃនគរូបនីយកម្មជាដើម ដែលតម្រូវឱ្យមានការបង្កើនការវិនិយោគបន្ថែមដើម្បីបំពេញគម្លាតទាំងនេះ។ ឯកឧត្តមក៏បានលើកឡើងផងដែរថា ស្ថានភាពបំណុលសាធារណៈរបស់កម្ពុជាមានចីរភាព និងហានិភ័យកម្រិតទាប ខណៈស្ថាប័នហិរញ្ញវត្ថុអន្តរជាតិធំៗបានចាត់ទុកថា ជាប្រទេសគំរូក្នុងការគ្រប់គ្រងបំណុលសាធារណៈនៅក្នុងតំបន់។ទោះបីបច្ចុប្បន្នមានដៃគូ និងប្រទេសកាន់តែច្រើនចង់ឱ្យកម្ពុជាខ្ចីប្រាក់ក្តី តែកម្ពុជានឹងមិនខ្ចីឡើយ ប្រសិនបើមិនចាំបាច់ និងមិនឆ្លើយតបនឹងតម្រូវការ និងអាទិភាពទេនោះ។

គណៈប្រតិភូនៃក្រុមប្រឹក្សានាយកប្រតិបត្តិ (Board of Directors) ប្រចាំធនាគារពិភពលោក បានមកបំពេញបេសកកម្មនៅកម្ពុជារយៈពេល 5ថ្ងៃ ចាប់ពីថ្ងៃទី8 ដល់ថ្ងៃទី13 ខែឧសភា ឆ្នាំ2019 ដើម្បីសិក្សាស្វែងយល់អំពីវឌ្ឍនភាព ព្រមទាំងបញ្ហាប្រឈមរបស់ប្រទេសជាសមាជិក និងការរៀបចំតម្រង់ទិសជាយុទ្ធសាស្ត្រនៃប្រតិបត្តិការរបស់ធនាគារពិភពលោក ដើម្បីជួយគាំទ្រប្រទេសជាសមាជិកដោះស្រាយឱ្យចំបញ្ហាប្រឈមទាំងនោះ។

នៅក្នុងដំណើរទស្សនកិច្ចនោះ គណៈប្រតិភូបានផ្លាស់ប្តូរមតិយោបល់ពាក់ព័ន្ធបញ្ហាបរិស្ថាន និងបញ្ហានគរូបនីយកម្មនៅតាមទីក្រុង ព្រមទាំងការអប់រំនៅក្នុងកម្រិតមធ្យមសិក្សាដែលបច្ចុប្បន្នទោះបីជាអត្រានៃការចូលរៀនមានកម្រិតខ្ពស់ក៏ដោយ តែការបោះបង់ចោលការសិក្សាក៏នៅតែជាបញ្ហាប្រឈមនៅឡើយ។ ទន្ទឹមនឹងនេះ ការបន្តលើកកម្ពស់គុណភាពឧត្តមសិក្សា ពិសេសការគាំទ្រដល់ការសិក្សា និងស្រាវជ្រាវលើមុខជំនាញវិទ្យាសាស្ត្រពិត(STEM) គឺជាមូលដ្ឋានមិនអាចខ្វះបានសម្រាប់គាំទ្រដល់សេដ្ឋកិច្ចឌីជីថលនៅកម្ពុជា៕

May 27, 2019

ការរីកចម្រើនក្នុងវិស័យសំណង់ជំរុញឱ្យតម្លៃអចលនទ្រព្យកម្ពុជាកើនជារៀងរាល់ឆ្នាំ

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានថ្លែងបញ្ជាក់ថា វិស័យអចលនទ្រព្យកម្ពុជានឹងនៅតែរឹងមាំល្អសម្រាប់ 5ឆ្នាំទៅមុខទៀត ហើយតម្លៃអចលនទ្រព្យនៅកម្ពុជានឹងតែបន្តកើនឡើង ដែលគិតជាមធ្យម កើនពី10% ទៅ15% ជារៀងរាល់ឆ្នាំដោយស្ថានភាពអចលនទ្រព្យនៅកម្ពុជានឹងនៅតែមានភាពរឹងមាំខ្លាំងក្លា ហើយវិស័យនេះវាអាចជាក្ដីរំពឹងសម្រាប់អ្នកដែលត្រូវការវិនិយោគលើវិស័យអចលនទ្រព្យ។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានថ្លែងបញ្ជាក់ថា៖ “មូលហេតុដែលអចលនទ្រព្យបន្តឡើងថ្លៃពី10% ទៅ15% បន្ថែមនោះ គឺមានកត្តាចំនួន3។ ទី1- វិស័យលំនៅឋាន ទី2- វិស័យដីធ្លី និងទី3 វិស័យទិញ-ជួលផ្សេងៗ ដែលកត្តាទាំងនេះហើយ ដែលនាំឱ្យកម្ពុជាបន្តការឡើងថ្លៃអចលនទ្រព្យនៅរៀងរាល់ឆ្នាំតទៅមុខទៀត។ បើធៀបនឹងប្រទេសជិតខាង ដូចជាប្រទេសថៃ វៀតណាម និងបណ្ដាប្រទេសផ្សេងៗនៅក្នុងតំបន់អាស៊ាននេះ សម្រាប់កម្ពុជាតម្លៃអចលនទ្រព្យនៅមិនទាន់ខ្ពស់នៅឡើយទេ បើទោះបីមានការកើនឡើងឥតឈប់ឈរក្តី”។

លោកបានបន្តថា សម្រាប់វិស័យលំនៅឋាននៅកម្ពុជា គឺត្រូវការបន្ថែមទៀត ព្រោះថា បើធៀបចំនួនប្រជាជន និងចំនួនខ្នងផ្ទះ គឺមិនទាន់សមាមាត្រគ្នានៅឡើយទេ។ ចំពោះចំនួនខ្នងផ្ទះនៅរាជធានីភ្នំពេញ មានប្រហែលជា 1លានខ្នងផ្ទះ និងចំនួនប្រជាជនដែលមានប្រហាក់ប្រហែលជាជាង 2លាននាក់ ដូចនេះសម្រាប់កម្រិតនៃការកើនឡើង គឺនៅតែកើនឡើងបន្តទៀតដដែល។

លោកបានបន្ថែមថា មួយវិញទៀតចំនួនខ្នងផ្ទះនេះ គឺត្រូវការបន្ថែមទៀត ដោយសារតែចំនួនប្រជាជនមានការកើនឡើងជារៀងរាល់ថ្ងៃ និងត្រូវរៀបការ ហើយត្រូវការផ្ទះថ្មីសម្រាប់គ្រួសារថ្មីផងដែរ ទើបត្រូវទាមទារឱ្យមានផ្ទះបន្ថែមទៀត ដូចនេះលំនៅឋាននៅតែជាកត្តាសំខាន់សម្រាប់ ការអភិវឌ្ឍនៅកម្ពុជា ជាពិសេសលំនៅឋានសាងសង់ថ្មីៗដូចជា បុរីផ្ទះល្វែង និងវីឡាជាដើម។

លោក ច្រឹក សុខនីម ក៏បានបញ្ជាក់ផងដែរថា វិស័យអចលនទ្រព្យរបស់កម្ពុជានឹងនៅតែមានភាពរឹងមាំសម្រាប់រយៈពេល 5ឆ្នាំទៅមុខទៀត ដោយផ្អែកទៅលើមូលដ្ឋានតម្លៃសេដ្ឋកិច្ចក្នុងកំណើនរង្វង់7% ជាមួយនឹងមូលដ្ឋាននៃការគាំពារពីរាជរដ្ឋាភិបាល ដោយមានស្ថិរភាពនយោបាយល្អ និងមូលដ្ឋានតម្លៃនៃការវិនិយោគពីក្រៅប្រទេសផងដែរ។

ទន្ទឹមនេះផងដែរមូលនិធិរូបិយវត្ថុអន្ដរជាតិ IMF (International Monetary Fund) បានកោតសរសើរដល់ការបោះជំហានរបស់ប្រទេសកម្ពុជាក្នុងការបង្កើនបរិយាប័ន្នហិរញ្ញវត្ថុដែលមានកំណើនឥណទានក្នុងវិស័យអចលនទ្រព្យជាបណ្តាញគន្លឹះទាក់ទងនឹងឥណទាន និងកំណើនសេដ្ឋកិច្ចដែលជំរុញដោយធនាគារ។ នេះបើយោងតាម លោកស្រី Christine Lagarde នាយិកាគ្រប់គ្រងរបស់ IMF។

ទាក់ទងទៅនឹងលំនឹងនៃលំហូរទុនអចលនទ្រព្យវិញ របាយការណ៍របស់ IMF ដែលបានចេញផ្សាយថ្មីៗនេះបានរកឃើញថា ដើមទុនបានបន្តហូរចូលក្នុងវិស័យសំណង់យ៉ាងគំហុក។ ការវិនិយោគលើផ្នែកសំណង់នៅក្នុងវិស័យអចលនទ្រព្យ គិតជាទឹកប្រាក់ជាង 1.36ពាន់លានដុល្លារនៅក្នុងត្រីមាសទី1ដើមឆ្នាំនេះ។ ការវិនិយោគអចលនទ្រព្យនៅកម្ពុជាបានទទួលផលប្រយោជន៍ពី7% ទៅ8% ត្រឡប់មកវិញសម្រាប់ការវិនិយោគ។ របាយការណ៍ដដែលក៏បានឱ្យដឹងដែរថា កំណើនឥណទានក្នុងវិស័យអចលនទ្រព្យដែលជាបណ្តាញគន្លឹះទាក់ទងនឹងឥណទាន និងកំណើនសេដ្ឋកិច្ចមានកម្រិតជាមធ្យមប្រហែល35% ចាប់តាំងពីឆ្នាំ2016 ដែលជំរុញដោយធនាគារមួយចំនួន។

របាយការណ៍ក៏បានបង្ហាញផងដែរថា អ្នកអភិវឌ្ឍន៍ត្រូវផ្តល់លក្ខខណ្ឌកម្ចីងាយស្រួលសម្រាប់អ្នកទិញក្នុងស្រុក ដើម្បីឈានជើងចូលទីផ្សារ ហើយវិធានការត្រួតពិនិត្យតឹងរ៉ឹងចាំបាច់ត្រូវធ្វើនៅពេលអនាគត។ វិស័យធនាគារ ក៏បានកើនឡើងខ្លាំងដោយសារផ្នែកអចលនទ្រព្យនៅកម្ពុជា ហើយការវិនិយោគលើអចលនទ្រព្យ និងគម្រោងអភិវឌ្ឍន៍ គឺជាកត្តាជំរុញ ដ៏សំខាន់សម្រាប់កំណើនរបស់ធនាគារ។

ជាមួយគ្នានេះដែរ ឯកឧត្តម ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានមានប្រសាសន៍ថា៖“កំណើននគរូបនីយកម្ម និងសំណង់បានកើនឡើងយ៉ាងឆាប់រហ័ស ជាក់ស្តែងចំនួនប្រជាជននៅក្នុងរាជធានី-ក្រុង និងទីប្រជុំជនមានចំនួនប្រមាណ 4.5លាននាក់ និងនៅឆ្នាំ2030 នឹងបន្តកើនដល់ 7.92លាននាក់ស្មើនឹង54%។ ទិន្នន័យនេះបង្ហាញថា ក្នុងរយៈពេល 15ឆ្នាំ តម្រូវការលំនៅឋាន សំណង់អគារ និងទីប្រជុំជននឹងមានចំនួនប្រមាណ 80ម៉ឺនលំនៅឋានដែលគិតជាមធ្យម គឺ 5ម៉ឺនលំនៅឋានសម្រាប់ 1ឆ្នាំ”។

ឯកឧត្តមរដ្ឋលេខាធិការ បានបន្ថែមថា ដើម្បីគាំទ្រដល់ការរីកចម្រើននគរូបនីយកម្មនេះ រាជរដ្ឋាភិបាលបានដាក់ឱ្យអនុវត្ត ដោយបានកំណត់ច្បាស់លាស់ពីតំបន់ដែលមានសក្តានុពលសម្រាប់ការអភិវឌ្ឍ និងតំបន់អភិវឌ្ឍន៍អចលនទ្រព្យឱ្យឆ្លើយតបទៅនឹងកំណើនប្រជាជន និងការអភិវឌ្ឍសេដ្ឋកិច្ច ដែលមានជាអាទិ៍ ប៉ូលអភិវឌ្ឍន៍រាជធានីភ្នំពេញ ប៉ូលអភិវឌ្ឍន៍សៀមរាប ប៉ូលអភិវឌ្ឍន៍ខេត្តព្រះសីហនុ ប៉ូលអភិវឌ្ឍន៍ក្រុង និងទីប្រជុំជនតាមបណ្តោយព្រំដែន តាមបណ្តោយអ័ក្សនៃការអភិវឌ្ឍ ដោយបានសម្រេចនិងដាក់ឱ្យប្រើប្រាស់ជាបន្តបន្ទាប់នូវគោលការណ៍ប្រើប្រាស់ដីតាមលំដាប់អាទិភាព។

ឯកឧត្តម ប៉ែន សុផល បានបន្តថា ឆ្លើយតបនឹងតម្រូវការខាងលើ យើងទទួលបានកំណើនប្រកបដោយប្រសិទ្ធភាព ដើម្បីការអភិវឌ្ឍប្រកបដោយចីរភាព ដោយយើងទទួលបាននូវច្បាប់នគរូបនីយកម្ម ច្បាប់សំណង់ថ្មី និងការធ្វើវិសោធនកម្មច្បាប់ភូមិបាល អនុក្រឹត្យស្តីពីការជួសជុល និងអភិវឌ្ឍន៍ឆ្នេរសមុទ្រ និងក្របខ័ណ្ឌគតិយុត្ត និងបទប្បញ្ញត្តិ បទដ្ឋានជាច្រើនទៀត ដើម្បីឱ្យស្របទៅនឹងការអភិវឌ្ឍបច្ចេកវិទ្យាសេដ្ឋកិច្ចសង្គម វប្បធម៌ និងកិច្ចការពារបរិស្ថាន ក្នុងបរិបទសមាហរណកម្ម និងគោលដៅអភិវឌ្ឍន៍ប្រកបដោយចីរភាព។

ឯកឧត្តមក៏បានបញ្ជាក់បន្ថែមផងដែរថា៖“ជាផ្លែផ្កានៃនគរូបនីយកម្ម ការអភិវឌ្ឍអចលនទ្រព្យ និងសំណង់បានក្លាយជាសសរស្តម្ភជំរុញកំណើនសេដ្ឋកិច្ចកម្ពុជា ជាក់ស្តែងទុនវិនិយោគសំណង់ក្នុងរយៈពេល 10ឆ្នាំ គិតពីឆ្នាំ2000 ដល់ឆ្នាំ2019 មានកំណើន 4.3ពាន់លានដុល្លារ។ ក្នុងឆ្នាំ2018 មាន5,755លានដុល្លារ និងក្នុងរយៈពេល 4ខែដើមឆ្នាំ2019 នេះមាន 2,742លានដុល្លារ គឺមានកំណើន67% បើធៀបទៅនឹងរយៈពេលដូចគ្នាក្នុងឆ្នាំ2018”។

ជាមួយគ្នានេះក្រសួងបានធ្វើទំនើបកម្មក្នុងការ-ផ្តល់ព័ត៌មាន ដោយបានដាក់ឱ្យប្រើប្រាស់កម្មវិធីព័ត៌មានវិទ្យា“សំណង់នៅកម្ពុជា (Cambodia Construction App)” ដើម្បីលើកកម្ពស់ព័ត៌មាន សាធារណៈ ព័ត៌មានអំពីការអភិវឌ្ឍសំណង់អចលន-ទ្រព្យគ្រប់ជ្រុងជ្រោយនៅក្នុង APP របស់ក្រសួង។

ឯកឧត្តម ប៉ែន សុផល បានបញ្ជាក់ទៀតថា៖“ការរីកចម្រើន និងការវិនិយោគវិស័យអចលនទ្រព្យបានបង្ហាញឱ្យឃើញថា កម្ពុជាបន្តស្ថិតនៅលើវិថីដ៏ត្រឹមត្រូវ មានវិបុលភាពលើគ្រប់វិស័យ និងលើកកម្ពស់តួនាទីវិស័យឯកជន និងការអភិវឌ្ឍវិស័យអចលនទ្រព្យ ធ្វើឱ្យទីផ្សារអចលនទ្រព្យនៅកម្ពុជាមានកំណើនយ៉ាងឆាប់រហ័សប្រដំប្រសងនឹងទីផ្សារក្នុងតំបន់អាស៊ានដែរ”៕

May 27, 2019

GMAC ៖ ការវិនិយោគកំពុងកើនឡើង ប៉ុន្តែមានល្បឿនយឺត

យោងតាមមន្ត្រីសមាគមរោងចក្រកាត់ដេរនៅកម្ពុជា (The Garment Manufacturers Association in Cambodia ឬGMAC) បានឱ្យដឹងថា ការវិនិយោគលើវិស័យកាត់ដេរ និងស្បែកជើងដែលជាសសរស្ដម្ភមួយនៃសេដ្ឋកិច្ចកម្ពុជាកំពុងកើនឡើងយឺតៗ ក្នុងឆ្នាំ2019 ធៀបនឹងឆ្នាំ2018។

ការកើនឡើងដ៏យឺតនេះ ទំនងជាលទ្ធផលនៃការសម្រេចចិត្តរបស់សហភាពអឺរ៉ុបក្នុងការពិនិត្យឡើងវិញនូវស្ថានភាពរបស់ប្រព័ន្ធអនុគ្រោះពន្ធ អ្វីៗគ្រប់យ៉ាងលើកលែងតែអាវុធ (Everything-but-arms ឬEBA) របស់កម្ពុជាក៏ដូចជាការបង្កើនប្រាក់ឈ្នួលអប្បបរមារបស់វិស័យនេះផងដែរ។

លោកកាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរកម្ពុជាបានឱ្យដឹងថា វិនិយោគិនមួយចំនួនអាចចាប់ផ្តើមអនុវត្តវិធីសាស្ត្រតាមនីតិវិធីរបស់ខ្លួន។លោកបានថ្លែងថា ឧស្សាហកម្មនេះនៅតែទទួលបានការវិនិយោគផ្ទាល់ពីបរទេស (foreign direct investment ឬ FDI) ប៉ុន្តែកំណើននេះបានថយចុះ។

លោកម៉ូនីកាមានប្រសាសន៍ថា៖“ ជាការពិតយើងកំពុងប្រឈមនឹងបញ្ហាផ្ទៃក្នុងដ៏សំខាន់មួយចំនួន ប៉ុន្តែមានកត្តាខាងក្រៅមួយចំនួនដែលកំពុងជួយប្រទេសកម្ពុជា។ ការបង្កើតសង្គ្រាមពាណិជ្ជកម្ម រវាងសហរដ្ឋអាមេរិក និងចិន គឺជាក្តីព្រួយបារម្ភទូទាំងពិភពលោក ប៉ុន្ដែវាបានធ្វើឱ្យកម្ពុជាមានការពេញនិយម ដោយសារតែរោងចក្រដែលត្រូវបំផ្លាស់ប្តូរទីចេញពីប្រទេសចិន ដើម្បីចៀសវាងពីការបង់ពន្ធ”។ លោកបានថ្លែងបន្តថា កត្តាផ្សេងទៀតដែលនាំឱ្យក្រុមហ៊ុនបំផ្លាស់ទីចេញពីប្រទេសចិន គឺការដំឡើងប្រាក់ឈ្នួល និងការផ្គត់ផ្គង់កម្លាំងពលកម្មមិនគ្រប់គ្រាន់ ជាពិសេសនៅក្នុងឧស្សាហកម្មមានតម្លៃទាបដូចជាសម្លៀកបំពាក់ និងស្បែកជើង។ ក្នុងអំឡុងពេល 4ខែដំបូងនៃឆ្នាំនេះ រោងចក្រថ្មីចំនួន25 បានចូលរួមក្នុងសមាគម បើប្រៀបធៀបទៅនឹងអំឡុងពេលដូចគ្នានេះក្នុងឆ្នាំ 2018 ដែលមានចំនួនដល់ទៅ40។ ចំនួនសមាជិកដែល រួមបញ្ចូលទាំងសហគ្រាស រោងចក្រកាត់ដេរសម្លៀកបំពាក់-ស្បែកជើង និងទំនិញសម្ភារធ្វើដំណើរ គឺមានជិតដល់ 600។ ខណៈពេលដែលវិស័យកាត់ដេរនៅតែធ្វើបានល្អ វិស័យស្បែកជើងក៏កំពុងធ្វើឱ្យប្រសើរឡើងជាមួយនឹងការពង្រីករោងចក្រក្នុងស្រុកដែលមានស្រាប់ និងកំពុងជ្រើសរើសពលករបន្ថែមទៀត។

លោកបានបន្ថែមទៀតថា ការនាំចេញទំនិញទៅកាន់សហរដ្ឋអាមេរិក នៅក្រោមជំពូក 42 បានកើនឡើង100% ក្នុងរយៈពេល 2ខែដំបូងនៃឆ្នាំនេះ បើប្រៀបធៀបទៅនឹងរយៈពេលដូចគ្នា កាលពីឆ្នាំ2018 ដែលសរុបជាទឹកប្រាក់ មានប្រមាណ 111លានដុល្លារអាមេរិក។

ក្នុងអំឡុងឆ្នាំ2017 ទំនិញដែលមានតម្លៃ 186លានដុល្លារត្រូវបាននាំចេញពីកម្ពុជាទៅកាន់សហរដ្ឋអាមេរិក ខណៈនៅឆ្នាំ2018 តួលេខនេះបានកើនឡើងដល់ 416លានដុល្លារ។ លោក ម៉ូនីកា បានមានប្រសាសន៍ថា សម្រាប់ឆ្នាំនេះវាអាចលើសពី 600លានដុល្លារ។

លោកឧកញ៉ា វ៉ាន់ ស៊ូអៀង ប្រធានសមាគមរោងចក្រកាត់ដេរកម្ពុជាបានថ្លែងក្នុងអំឡុងកិច្ចប្រជុំប្រចាំឆ្នាំរបស់សមាគមនេះថា ការវិនិយោគលើការផលិតទំនិញសម្ភារធ្វើដំណើរនឹងកើនឡើង 2ខ្ទង់ក្នុងរយៈពេល 2ឆ្នាំខាងមុខ។

លោកឧកញ៉ាបានបន្តថា៖“នៅពេលដែលការរៀបចំគម្រោងចម្រុះ (The Multifibre Arrangement ឬ MFA) ត្រូវបានលុបចោល គេមានការព្រួយបារម្ភថា វិស័យកាត់ដេរនៅកម្ពុជានឹងមិនរួចខ្លួនទេ ប៉ុន្តែក្រុមហ៊ុននៅអឺរ៉ុប កាណាដា ហុងកុង និងអាមេរិក នៅតែរក្សាការទិញពីកម្ពុជា ដោយផ្អែកលើការប្តេជ្ញាចិត្តយ៉ាងរឹងមាំរបស់រដ្ឋាភិបាលចំពោះបទដ្ឋានពលកម្មខ្ពស់ដែលត្រូវបានបញ្ចូលក្នុងការអនុវត្តកម្មវិធីរបស់គម្រោងរោងចក្រកាន់តែប្រសើរនៅកម្ពុជារបស់អង្គការពលកម្មអន្តរជាតិ(Better Factories Cambodia ឬ BFC)”។

ជាមួយគ្នានេះការងាររបស់ក្រុមហ៊ុនជាមួយអ្នកផ្គត់ផ្គង់នៅកម្ពុជាបានរួមចំណែកដល់ការនាំចេញសម្លៀកបំពាក់ ស្បែកជើង និងទំនិញសម្ភារធ្វើដំណើរ 9.5ពាន់លានដុល្លារពីប្រទេសកម្ពុជាកាលពីឆ្នាំមុន។ សព្វថ្ងៃនេះការនាំចេញសម្លៀកបំពាក់ ស្បែកជើង និងទំនិញសម្ភារធ្វើដំណើរ មានចំនួនជាង 1ភាគ3 នៃផលិតផលក្នុងស្រុកសរុបរបស់កម្ពុជា។ វាតំណាងឱ្យពាក់កណ្តាលនៃការនាំចេញសរុបរបស់កម្ពុជា។

បើតាមឯកឧត្តម អុិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈបានថ្លែងបញ្ជាក់ថា៖“កម្ពុជាជាប់ចំណាត់ថ្នាក់ទី 5 ក្នុងតំបន់អាស៊ាននៅពេលមានប្រាក់ខែអប្បបរមាខ្ពស់។ នៅក្នុងប្រទេសកម្ពុជាប្រាក់ឈ្នួលអប្បបរមាសម្រាប់វិស័យកាត់ដេរបច្ចុប្បន្នមានតម្លៃ 182ដុល្លារក្នុង 1ខែ”។

យោងតាមរបាយការណ៍ចុងក្រោយរបស់ BFCបានបង្ហាញថា ចំនួនកម្មករមិនទាន់គ្រប់អាយុនៅក្នុងវិស័យកាត់ដេរបានធ្លាក់ចុះច្រើន ពី 74ករណីនៅឆ្នាំ2014 ដល់10ករណីគិតត្រឹមឆ្នាំមុន។ គម្រោងរោងចក្រកាន់តែប្រសើរនៅកម្ពុជា (BFC) បាននិយាយថាវានឹងមិនអាចទៅរួចទេបើគ្មានការចូលរួមពីក្រសួងការងារ និងក្រសួងពាណិជ្ជកម្ម ក៏ដូចជាសមាគមរោងចក្រកាត់ដេរនៅកម្ពុជា (GMAC) នោះ។

តាមរបាយការណ៍រដ្ឋាភិបាលកម្ពុជាបានបង្ហាញថា ក្នុងឆ្នាំ2018 កន្លងទៅ ការនាំចេញសរុបរបស់កម្ពុជា ទៅកាន់សហភាពអឺរ៉ុប មានទឹកប្រាក់សរុបប្រមាណ 4,670លានដុល្លារអាមេរិក ក្នុងនោះសម្លៀកបំពាក់មានប្រមាណ 3,653លានដុល្លារអាមេរិក ស្បែកជើងមានប្រមាណ 508លានដុល្លារអាមេរិក អង្ករ 177លានដុល្លារអាមេរិក និងទោចក្រយាន មានប្រមាណ 331លានដុល្លារអាមេរិក។

គួរបញ្ជាក់ថា ការប៉ាន់ស្មានរបស់ធនាគារពិភពលោកលើកំណើនសេដ្ឋកិច្ចកម្ពុជារយៈពេល 3ឆ្នាំខាងមុខនេះបានព្យាករថា កំណើននាំចេញនឹងកើន9%ក្នុងឆ្នាំ2019 កើន 8.6%នៅឆ្នាំ2020 និង 8.1%នៅឆ្នាំ2021។ ក្នុងនោះដែរ ធនាគារពិភពលោកក៏បានព្យាករដែរថា ការវិនិយោគផ្ទាល់ពីបរទេស (FDI)រំពឹងថា នឹងកើន 10.4%នៅឆ្នាំ2019 ឆ្នាំ2020រំពឹងថា កើន 9.3% និងកើន 9.2% នៅឆ្នាំ2021៕

May 27, 2019

ការនាំចូលប្រេងឥន្ធនៈកើនឡើង 10% នៅឆ្នាំ2018

យោងតាមក្រសួងរ៉ែ និងថាមពលបានឱ្យដឹងថា កម្ពុជាបាននាំចូលផលិតផលប្រេងចំនួន 2.5 លានតោននៅឆ្នាំ2018 ពោលគឺកើនឡើង10% បើធៀបនឹងរយៈពេលដូចគ្នាកាលពីឆ្នាំមុន។

ឯកឧត្តម សុខ ខាវ៉ាន រដ្ឋលេខាធិការក្រសួងរ៉ែនិងថាមពលបានថ្លែងនៅក្នុងសន្និសីទមួយស្តីពីវិស័យប្រេង និងឧស្ម័ននៅសណ្ឋាគារសុខាថា ប្រេងម៉ាស៊ូត និងប្រេងសាំង គឺជាផលិតផលប្រេងដែលនាំចូលច្រើនបំផុតមកពីប្រទេសសិង្ហបុរី ថៃ និងវៀតណាម។

ឯកឧត្តមបានបន្ថែមថា បច្ចុប្បន្នក្រុមហ៊ុនប្រេងក្នុងស្រុក និងអន្តរជាតិចំនួន 15 ជាក្រុមហ៊ុននាំចូលផលិតផលប្រេងពីបរទេស។ ក្រុមហ៊ុនទាំងនេះបានចែកចាយផលិតផលដល់អ្នកប្រើប្រាស់តាមរយៈស្ថានីយប្រេងសាំងតូចៗចំនួន 3,778ទីតាំង និងស្ថានីយប្រេងធំៗចំនួន 29ទីតាំងនៅទូទាំងប្រទេស និងមានស្ថានីយប្រេងឥន្ធនៈ ;liquefied petroleum gasLPG ចំនួន 103ទីតាំង។

ឯកឧត្តម សុខ ខាវ៉ាន បានចង្អុលបង្ហាញថា៖“រដ្ឋាភិបាលបានបើកចំហទីផ្សារដែលអនុញ្ញាតឱ្យវិស័យឯកជន និងដៃគូអភិវឌ្ឍន៍ចូលរួមក្នុងការវិនិយោគ ការរុករក ការផលិត ការចម្រាញ់ ការនាំចេញ ការដឹកជញ្ជូន និងការចែកចាយប្រេង និងផលិតផលប្រេងកាត។ ឥឡូវនេះសម្រាប់ខ្សែទឹកខាងលើ យើងមានប្លុក A ដែលកំពុងស្ថិតនៅក្រោមការអភិវឌ្ឍ។ យើងក៏មានប្លុកផ្សេងទៀតជាច្រើន ដែលផលិតកម្មនឹងមកដល់ ដោយស្ថិតក្រោមការចរចាក្នុងតំបន់ទាមទារ ត្រួតស៊ីគ្នា”។

ឯកឧត្តម បានបន្ថែមថា៖“យើងជឿជាក់យ៉ាងមុតមាំថា នៅលើឆ្នេរសមុទ្ររបស់យើង យើងមានការរំពឹងទុកដ៏គួរឱ្យរំភើបសម្រាប់ការស្រាវជ្រាវបន្ថែម។ សកម្មភាពរុករកភាគច្រើន គឺនៅឈូងសមុទ្រដោយមានជម្រើសនៅតាមឆ្នេរសមុទ្រដែលមិនត្រូវបានរុករក”។

យោងតាមការសិក្សាមួយពីវិទ្យាស្ថានស្រាវជ្រាវសេដ្ឋកិច្ចអាស៊ាន និងអាស៊ីបូព៌ា ឬ ERIA) (The Economic Research Institute for Asean and East Asia) ពីឆ្នាំ2012 ដល់ឆ្នាំ2016 តម្រូវការផលិតផលប្រេងបានកើនឡើងជាមធ្យម7.2% ក្នុង 1ឆ្នាំ ដែលនេះបើយោងតាមសន្ទស្សន៍ វាជាអត្រាកំណើនខ្ពស់ បើប្រៀបធៀបទៅនឹងតំបន់ និងផ្នែកផ្សេងទៀតនៃពិភពលោក។

លោក Shigeru Kimura អ្នកផ្តល់ប្រឹក្សារបស់ERIA ស្តីពីកិច្ចការថាមពលបានមានប្រសាសន៍ថា៖“តម្រូវការប្រេងនៅកម្ពុជាមាន 1.9MTOE(one million tonne of oil equivalent) ស្មើនឹង 1លានតោននៅឆ្នាំ2015 ហើយនឹងកើនឡើងដល់ 4,8 MTOE នៅត្រឹមឆ្នាំ2040”។លោកបានបន្តថា ចាប់ពីឆ្នាំ2015 ដល់ឆ្នាំ2040 ឧស្ម័ន LPG ទំនងជាជួបប្រទះតម្រូវការកើនឡើងខ្ពស់បំផុត និងតាមក្រោយដោយប្រេងសាំង ប្រេងម៉ាស៊ូត និងប្រេងឥន្ធនៈដទៃទៀត។

ប្រទេសកម្ពុជារំពឹងថា នឹងកាត់បន្ថយប្រេងឆៅ ដំបូងរបស់ខ្លួននៅចុងឆ្នាំនេះ។ ប្រេងនឹងត្រូវបានគេយកចេញពីអណ្តូងប្រេងអប្សរា ដែលមានទីតាំងស្ថិតនៅក្នុងប្លុក A នៃអាងប្រេងរបស់ខ្មែរនៅឈូងសមុទ្រថៃ ដែលត្រូវបានគេស្គាល់ថា ជាតំបន់ផលិតប្រេងដំបូងគេបង្អស់នៅកម្ពុជា។

ប៉ុន្តែជារឿងដែលគួរឱ្យសោកស្តាយ ដែលការសាងសង់រោងចក្រចម្រាញ់ប្រេងឆៅ តម្លៃ 620 លានដុល្លារត្រូវបានពន្យារពេល។ បើតាមក្រសួងរ៉ែ និងថាមពលបានឱ្យដឹងថា ការសាងសង់រោងចក្រចម្រាញ់ប្រេងកំពុងដំណើរការយឺតជាងការរំពឹងទុក ខណៈគម្រោងនេះគ្រោងនឹងបញ្ចប់នៅឆ្នាំ2022។

លោក កូ ស៊ីឡា អនុប្រធាននាយកដ្ឋានបច្ចេកវិទ្យាប្រេង បានឱ្យដឹងថា ដំណាក់កាលដំបូងនៃរោងចក្រចម្រាញ់ប្រេងកាតដែលមានទីតាំងនៅលើផ្ទៃដីចំនួន 365ម៉ែត្រការ៉េនៅខេត្តព្រះសីហនុ និងខេត្តកំពតដែលនឹងត្រូវបញ្ចប់នៅចុងឆ្នាំ2019 នឹងត្រូវពន្យារពេល។

លោកបានថ្លែងឱ្យដឹងនៅក្នុងសន្និសីទស្តីពីវិស័យប្រេង និងឧស្ម័នថា រោងចក្រនេះបានចាប់ផ្តើមសាងសង់នៅឆ្នាំ2017 ដោយដំណើរការមានភាពយឺតយ៉ាវ។ រោងចក្រនេះនឹងចំណាយអស់ប្រមាណ 620លានដុល្លារ ហើយនឹងអាចដំណើរការប្រេងឆៅបាន 3លានតោនក្នុង 1ឆ្នាំ ដែលនឹងត្រូវប្រើប្រាស់សម្រាប់ការផ្គត់ផ្គង់ទីផ្សារក្នុងស្រុក។

លោកស៊ីឡាក៏បានបញ្ជាក់ដែរថា៖“រោងចក្រដែលកំពុងត្រូវបានបង្កើតឡើងដោយក្រុមហ៊ុនប្រេងឥន្ទនៈគីមីកម្ពុជា នឹងទំនងជាដំណើរការប្រេងដែលបានមកពីតំបន់ប្រេងអប្សរា ដោយត្រូវបានកំណត់ថា ជាទុនបម្រុងប្រេងដំបូងគេរបស់ប្រទេសនេះ។ ប្រសិនបើរោងចក្រចម្រាញ់ប្រេងមិនទាន់បញ្ចប់ នៅពេលតំបន់ប្រេងអប្សរាក្លាយជាផលិតផលដែលរំពឹងថា នឹងកើតឡើងក្នុងឆ្នាំនេះ ប្រេងឆៅនឹងត្រូវលក់ចេញទៅក្រៅប្រទេស។ ប៉ុន្តែមិនទាន់មានផែនការនៅឡើយទេ ក្នុងការកសាងហេដ្ឋារចនាសម្ព័ន្ធដែលត្រូវការតភ្ជាប់តំបន់អប្សរា និងរោងចក្រចម្រាញ់ប្រេង”។

ឯកឧត្តម ស៊ាង ថៃ អ្នកនាំពាក្យក្រសួងពាណិជ្ជកម្មបានបញ្ជាក់ឱ្យដឹងថា បច្ចុប្បន្ននេះកម្ពុជាបាននាំចូលប្រេងឥន្ធនៈពីប្រទេសជាច្រើនមកផ្គត់ផ្គង់លើទីផ្សារប្រទេសកម្ពុជា ដូចជាមកពីប្រទេស វៀតណាម ប្រទេសថៃ ប្រទេសសិង្ហបុរី ប្រទេសម៉ាឡេស៊ី ប្រទេសអារ៉ាប់រួម សហរដ្ឋអាមេរិក ចិន កូរ៉េ ប្រទេសអាល្លឺម៉ង់ ហុងកុង ហ្វីលីពីន ជប៉ុន អូស្ត្រាលី អេស្ប៉ាញឥណ្ឌា អុីតាលី ហូឡង់ តួកគី ប៉ូឡូញ ចក្រភពអង់គ្លេស កាណាដា ប្រទេសអារ៉ាប៊ីសាអូ៊ឌីត និងប្រទេសប៊ែលហ្ស៊ិក។ ក្នុង 1ឆ្នាំ កម្ពុជានាំចូលប្រេងឥន្ធនៈប្រមាណជាង 2លានតោនគិតជាទឹកប្រាក់ប្រមាណជាង 1ពាន់លានដុល្លារអាមេរិក៕

May 27, 2019

កាសែតឡារ៉ែន ពាណិជ្ជ លេខ 174

[easy_media_download url=”https://www.lareine.com.kh/wp-content/uploads/2019/05/LRPN_174-Final-For-Web.pdf” force_dl=”1″]

May 26, 2019

ធនាគារជាតិនៃកម្ពុជា និងស្ថាប័នសំខាន់ៗកំពុងយកចិត្តទុកដាក់លើការអប់រំពីហិរញ្ញវត្ថុដល់កុមារ និងស្ត្រី

ចំណេះដឹងផ្នែកហិរញ្ញវត្ថុ ជាបំណិនជីវិតដ៏មានសារៈសំខាន់សម្រាប់ប្រជាជនក្នុងពិភពលោកនាពេលបច្ចុប្បន្ន ខណៈប្រទេសអភិវឌ្ឍន៍ជាច្រើនកំពុងប្រឹងប្រែងបណ្តុះបណ្តាលចំណេះដឹងស្តីពីការគ្រប់គ្រងហិរញ្ញវត្ថុដល់ប្រជាពលរដ្ឋចាប់តាំងពីវ័យកុមាររហូតដល់ធំ ដើម្បីឱ្យពួកគេអភិវឌ្ឍជីវភាពបានល្អដែលនាំឱ្យសេដ្ឋកិច្ចរបស់សង្គមមានការរីកចម្រើន។

លោកជំទាវ ជា សិរី អគ្គនាយិកាបច្ចេកទេសនៃធនាគារជាតិនៃកម្ពុជា បានលើកឡើងថា ការអប់រំហិរញ្ញវត្ថុមានសារៈសំខាន់ខ្លាំងណាស់សម្រាប់ប្រជាជនកម្ពុជាគ្រប់រូប ជាពិសេសកុមារ និងស្ត្រី។ ចំពោះកុមារយើងនឹងធ្វើការបណ្តុះបណ្តាលពួកគាត់ឱ្យគាត់មានទម្លាប់សន្សំ និងគ្រប់គ្រងហិរញ្ញវត្ថុបានល្អពីក្មេងឱ្យហើយ នៅពេលពួកគាត់ធំឡើង គាត់នឹងអាចក្លាយជាមនុស្សដែលមានភាពរឹងមាំផ្នែកហិរញ្ញវត្ថុ ដែលអាចចៀសផុតពីបញ្ហាបំណុល ឬបញ្ហាជាច្រើនចំពោះជីវភាព។ ការអប់រំកុមារចាប់ពីវ័យក្មេង មានប្រសិទ្ធភាព និងពេលវេលាយូរជាងមនុស្សនៅវ័យផ្សេងៗទៀត។ ចំណែកឯស្ត្រីវិញ រឹតតែសំខាន់ទៅទៀតចំពោះការសិក្សាស្វែងយល់ពីការគ្រប់គ្រងហិរញ្ញវត្ថុ ព្រោះតាមរយៈការសិក្សាជាច្រើនបញ្ជាក់ថា ស្ត្រីជាអ្នកត្រូវការចំណាយច្រើនក្នុងសេដ្ឋកិច្ចគ្រួសារ ហេតុនេះប្រសិនបើស្ត្រីមានចំណេះដឹងផ្នែកហិរញ្ញវត្ថុ គាត់នឹងអាចជួយស្ថានភាពហិរញ្ញវត្ថុក្នុងគ្រួសាររបស់គាត់ឪ្យរឹងមាំបាន ដោយសារគាត់អាចបែងចែកចំណាយ និងចំណូលបានល្អ។

លោកជំទាវ ជា សិរី មានប្រសាសន៍ថា៖ “នៅពេលនេះយើងបានចុះអនុស្សរណៈជាមួយក្រសួងអប់រំ យុវជន និងកីឡា ដើម្បីបញ្ជ្រាបការយល់ដឹងផ្នែកហិរញ្ញវត្ថុដល់សិស្សចាប់ពីថ្នាក់ទី1 រហូតដល់ថ្នាក់ទី12 ហើយយើងក៏សហការជាមួយក្រសួងកិច្ចការនារីផងដែរ ដោយសារយើងគិតថាបច្ចុប្បន្ននេះសហគ្រិនជាស្រ្តីអាចមានឧបសគ្គមួយចំនួនក្នុងការទទួលបានសេវាហិញ្ញវត្ថុ”។

គួរបញ្ជាក់ថាកាលពីថ្ងៃទី 23 ខែមេសា ឆ្នាំ 2019 ធនាគារជាតិនៃកម្ពុជា បានប្រារព្ធកម្មវិធីចុះហត្ថលេខាលើអនុស្សណៈយោគយល់គ្នាជាមួយក្រសួងអប់រំ យុវជននិងកីឡា និងក្រសួងកិច្ចការនារីដើម្បីផ្តល់ចំណេះដឹងផ្នែកហិរញ្ញវត្ថុដល់កុមារ និងស្ត្រីឱ្យកាន់តែមានប្រសិទ្ធភាព។ បើតាមការបញ្ជាក់របស់ឯកឧត្តម អុឹម កុច រដ្ឋលេខាធិការក្រសួងអប់រំ យុវជន និងកីឡា បានឱ្យដឹងថាតាម រយៈកិច្ចព្រមព្រៀងនេះក្រសួងអប់រំ នឹងរៀបចំផែនការដាក់បញ្ចូលចំណេះដឹងផ្នែកហិរញ្ញវត្ថុទៅក្នុងមុខវិជ្ជាគណិតវិទ្យា គេហសេដ្ឋកិច្ចវិទ្យា បំណិនជីវិតតាមមូលដ្ឋាន និងមុខវិជ្ជាសីលធម៌ពលរដ្ឋវិជ្ជា ដើម្បីផ្តល់ចំណេះដឹងផ្នែកហិរញ្ញវត្ថុ និងបង្កើតទម្លាប់សន្សំឱ្យបានល្អដល់សិស្សានុសិស្ស។

ឯកឧត្តម អុឹម កុច បានមានប្រសាសន៍ថា៖ “ដើម្បីបញ្ជ្រាបចំណេះដឹងផ្នែកហិរញ្ញវត្ថុទៅដល់សិស្សានុសិស្ស យើងនឹងរៀបចំឱ្យមានលំហាត់ ចំណោទពីការគិតលុយ ឬនិយាយពីលុយនៅក្នុងនោះ។ក្រៅពីនេះនៅក្នុងអត្ថបទអំណានក៏យើងនឹងបង្ហាញឱ្យសិស្សយល់ពីមេរៀន និងផលប៉ះពាល់មួយចំនួនពាក់ព័ន្ធនឹងការប្រើប្រាស់លុយ ឬខ្ចីលុយគេមិនមានផែនការដែលនាំឱ្យមានវិបត្តិបំណុលវណ្ឌកផងដែរ។ ជារួមយើងនឹងធ្វើការរៀបចំកម្មវិធីអប់រំ ដោយបង្កប់អត្ថន័យអប់រំនៅក្នុងនោះដើម្បីឱ្យសិស្សានុសិស្សចេះរៀបចំផែនការហិរញ្ញវត្ថុបានល្អនៅថ្ងៃអនាគត”។

ឯកឧត្តម អុឹម កុច បានលើកឡើងផងដែរថាក្រសួងអប់រំនឹងរៀបចំធ្វើយ៉ាងណាឱ្យការបណ្តុះបណ្តាលពីហិរញ្ញវត្ថុកាន់តែមានភាពទាក់ទាញ និងច្នៃប្រឌិតសម្រាប់កុមារតូចៗឱ្យចូលចិត្តរៀនពីការគ្រប់គ្រងហិរញ្ញវត្ថុ។ ម្យ៉ាងវិញទៀត នៅពេលពួកគេធំឡើង គេក៏អាចនឹងបង្កើតទម្លាប់ល្អលើផ្នែកហិរញ្ញវត្ថុដល់មនុស្សជាច្រើន និងបន្តបន្តាប់បន្ថែមទៀត ដែលធ្វើឱ្យការគ្រប់គ្រងហិរញ្ញវត្ថុរបស់ប្រជាជនកាន់តែប្រសើរ។ នៅពេលប្រជាជនម្នាក់ៗមានជីវភាពប្រសើរឡើង នោះសេដ្ឋកិច្ចសង្គម ក៏នឹងល្អទៅតាមនោះដែរ។

លោកជំទាវ ច័ន្ទ សូរីយ៍ រដ្ឋលេខាធិការក្រសួងកិច្ចការនារីបានលើកឡើងថា ការគាំទ្រផ្នែកហិរញ្ញវត្ថុមានសារៈសំខាន់ខ្លាំងណាស់សម្រាប់ស្ត្រី ព្រោះបើទោះបីវាមិនមែនជាមធ្យោបាយតែមួយគត់ក្នុងការអភិវឌ្ឍអាជីវកម្ម និងជីវភាពរស់នៅរបស់ស្ត្រីក៏ដោយ តែជាចំណែកសំខាន់ ឬជាចំណុចចម្បងក្នុងការធ្វើឱ្យមានភាពប្រសើរឡើងទាំងផ្នែកអាជីវកម្ម និងការរស់នៅប្រចាំថ្ងៃ។

លោកជំទាវ ច័ន្ទ សូរីយ៍ បានមានប្រសាសន៍ថា៖ “ការដាក់បញ្ចូលកម្មវិធីហិរញ្ញវត្ថុសម្រាប់ស្ត្រី និងសហគ្រិនស្ត្រីនេះ នឹងអាចធ្វើឱ្យស្ត្រីនៅតាមសហគមន៍ និងបណ្តាញស្ត្រីរបស់ក្រសួងកិច្ចការនារីមានការយល់ដឹងកាន់តែច្រើន ដែលអាចធ្វើឱ្យគាត់មានមធ្យោបាយល្អក្នុងការពង្រីកអាជីវកម្មរបស់ខ្លួនឱ្យកាន់តែប្រសើរឡើងតាមរយៈការប្រើប្រាស់ឥណទានត្រឹមត្រូវ”។

លោកជំទាវរដ្ឋលេខាធិការបានលើកឡើងផងដែរថា តាមរយៈគម្រោងនេះស្ត្រីកម្ពុជានឹងទទួលបានការផ្តល់តម្លៃកាន់តែខ្លាំងព្រោះនៅពេលដែលស្ត្រីមានលទ្ធភាព និងសមត្ថភាពកាន់ខ្លាំង គាត់នឹងកាន់តែមានភាពសកម្មក្នុងតួនាទីរកប្រាក់ចំណូលដែលនាំឱ្យមានភាពអង់អាចផ្នែកសេដ្ឋកិច្ច ដែលនាំឱ្យគាត់មានឥទ្ធិពលកាន់តែច្រើនក្នុងការចូលរួមចំណែកឱ្យសុខុមាលភាពរបស់ពួកគេ និងគ្រួសារកាន់តែប្រសើរឡើង៕

May 25, 2019

របត់ចុងក្រោយនៃអុីនធើណិតនឹងផ្លាស់ប្តូរអ្វីខ្លះក្នុងពិភពលោក?

បច្ចុប្បន្ននេះ មនុស្សចាប់ផ្តើមឈានមួយជំហានថ្មីទៀតពីការទំនាក់ទំនងរវាងមនុស្ស និងមនុស្ស ទៅជាទំនាក់ទំនងរវាងមនុស្ស និងម៉ាស៊ីន ព្រោះការងារជាច្រើនម៉ាស៊ីនអាចឆ្លើយឆ្លង ឬផ្តល់ព័ត៌មានបានយ៉ាងលម្អិត។

ថ្វីដ្បិតតែការងារខ្លះត្រូវបានគេមើលឃើញថាអាច ប៉ះពាល់ដល់ទីផ្សារការងាររបស់មនុស្សនៅពេលដែលគ្រប់យ៉ាងក្លាយជាស្វ័យប្រវត្តិក៏ដោយ តែចរន្តថ្មីនៃអុីនធើណិត (Internet of things) ក៏អាចផ្តល់ផលវិជ្ជមាន និងភាពងាយស្រួលជាច្រើនសម្រាប់ការរស់នៅផងដែរ។ ខាងក្រោមនេះជាចំណុចមួយចំនួនដែលបង្ហាញថា ពិភពលោកនឹងមានការប្រែប្រួល ហើយអុិនធើណិតនឹងអភិវឌ្ឍការរស់នៅរបស់មនុស្សនាថ្ងៃអនាគត ឱ្យទទួលបានលទ្ធផលល្អហួសពីការរំពឹងទុក។

1. ទីក្រុងឆ្លាតវៃ
តាមរបាយការណ៍របស់អង្គការសហប្រជាជាតិ បានឱ្យដឹងថា ជាងពាក់កណ្តាលនៃប្រជាជននៅលើពិភពលោកបច្ចុប្បន្ននេះកំពុងរស់នៅក្នុងទីក្រុង បានកើនឡើងពីចំនួន 34% នៅទសវត្សរ៍ឆ្នាំ1960 ទៅជា 66%នាពេលបច្ចុប្បន្ន។ ទីក្រុងបានក្លាយជាកន្លែងប្រណីតសម្រាប់ការរស់នៅរបស់មនុស្ស តែវាក៏ជាកន្លែងដែលបានចូលរួមចំណែកយ៉ាងធំក្នុងការធ្វើឱ្យមានបម្រែបម្រួលអាកាសធាតុផងដែរ។ ហេតុនេះហើយទើបមនុស្សចាំបាច់ត្រូវព្យាយាមគ្រប់លទ្ធភាពដើម្បីធ្វើយ៉ាងណាកាត់បន្ថយផលប៉ះពាល់នៅក្នុងទីក្រុងឱ្យបានកាន់តែច្រើន ដើម្បីធ្វើឱ្យការរស់នៅកាន់តែប្រសើរ។

ដោយសារបច្ចេកវិទ្យាកាន់តែទំនើប គ្រប់ទីកន្លែងសុទ្ធតែមានប្រព័ន្ធអុីនធើណិត ហេតុនេះទីក្រុងនានានឹងត្រូវគេចាប់ផ្តើមធ្វើវាឱ្យក្លាយជាទីក្រុងឆ្លាតវៃ។ទីក្រុងឆ្លាតវៃនេះ ជាទីក្រុងដែលគេដាក់ឱ្យបច្ចេកវិទ្យាជាអ្នកធ្វើការងារជាច្រើនឱ្យបានឆាប់រហ័ស ចំណេញពេលវេលា កាត់បន្ថយការចំណាយ និងធនធានជាច្រើនផ្សេងទៀត ដូចជាប្រើប្រព័ន្ធផ្គត់ផ្គង់ទឹកឆ្លាតវៃ ប្រើប្រាស់អំពូលភ្លើងឆ្លាតវៃដើម្បីសន្សំអគ្គិសនី ការរៀបចំចំណតយានយន្តឆ្លាតវៃដើម្បីកាត់បន្ថយការខ្ជះ-ខ្ជាយទីធ្លា ជាដើម។ ការកាត់បន្ថយភាពខ្ជះខ្ជាយទាំងអស់នេះនឹងធ្វើឱ្យការបំពុលបរិយាកាសកាន់តែថយចុះហើយគុណភាពនៃការរស់នៅកាន់តែល្អប្រសើរឡើង។

2. ជួយឱ្យខ្យល់ និងទឹកស្អាតជាងមុន
ការប្រើប្រាស់បណ្តាញអុីនធើណិតបែបថ្មីនេះ (Internet of things) អាចជួយអភិវឌ្ឍផ្នែកសុខភាពសាធារណៈបាន។ យោងតាមការសិក្សាថ្មីៗនេះ បានឱ្យដឹងថា ខ្យល់ពុល និងទឹកមិនស្អាតបានធ្វើឱ្យមានមនុស្សស្លាប់ប្រមាណ 9លាននាក់ទូទាំងពិភពលោកក្នុងឆ្នាំ2015។ ទីក្រុងបច្ចុប្បន្នពោរពេញដោយការបំពុល ព្រោះកំណើននៃរោងចក្រឧស្សាហកម្ម និងយានយន្ត ហេតុនេះនៅក្នុងទីក្រុងធំៗមួយចំនួនដែលកំពុងប្រឈមជាមួយបញ្ហាទាំងអស់នោះ បានប្រើប្រាស់ប្រព័ន្ធស្វ័យប្រវត្តិ (sensor) ដើម្បីប្រាប់ព័ត៌មានដល់កន្លែងស្នាក់នៅរបស់ប្រជាជននៅពេលកម្រិតនៃការបំពុលពីអាកាសធាតុបានកើនឡើងខ្ពស់។

នៅក្នុងប្រទេសមួយចំនួន ដូចជាទីក្រុងឡុងដ៍នៃប្រទេសអង់គ្លេស គេបានដាក់ដំណើរការប្រព័ន្ធផ្តល់ព័ត៌មាននៅក្នុងទូរស័ព្ទស្មាតហ្វូនដើម្បីបង្ហាញដល់ប្រជាជនឱ្យបានដឹងពីបញ្ហាជាតិពុលក្នុងបរិយាកាស។ នេះជាចំណុចល្អមួយដែលអាចកាត់បន្ថយផលប៉ះពាល់ដល់ការរស់នៅរបស់មនុស្ស។

3.កសិកម្មកាន់តែឆ្លាតវៃ
ទោះជាសេដ្ឋកិច្ច និងបច្ចេកវិទ្យាដើរដល់ណាក៏ដោយ កសិកម្មនៅតែជាចំណុចដែលត្រូវគិតគូរដដែលព្រោះមនុស្សអាចមិនប្រើប្រាស់ឧបករណ៍ទំនើបបាន តែមិនអាចអត់អាហារបាននោះទេ។ ការធ្វើកសិកម្មបែបប្រពៃណី ថ្វីដ្បិតតែអាចផ្គត់ផ្គង់តម្រូវការមនុស្សបានតែវាក៏នៅមិនទាន់មានលក្ខណៈល្អប្រសើរខ្លាំងនៅឡើយសម្រាប់មនុស្ស ព្រោះកសិកម្មប្រពៃណីមានចំណុចខាតបង់ច្រើនដែលអ្នកដាំដុះអាចកាត់បន្ថយបាន។ឭ

ការដាំដុះបែបថ្មី គឺអាចប្រើប្រាស់បច្ចេកវិទ្យាដើម្បីត្រួតពិនិត្យពីកម្រិតនៃការដាំដុះដែលអាចធ្វើឱ្យចំនួនខូចនៃគ្រាប់ធញ្ញជាតិកាត់បន្ថយបាន ហើយវាក៏ធ្វើឱ្យចំណេញធនធានផងដែរ ខណៈបរិមាណទឹក និងជីត្រូវបានគេត្រួតពិនិត្យជាប់ជាប្រចាំឱ្យមានតុល្យភាពតាមរយៈម៉ាស៊ីនស្វ័យប្រវត្តិ។ តាមរយៈការប្រើប្រាស់ Internet of things ទិន្នន័យកសិកម្មនឹងអាចចំណេញច្រើនព្រោះកសិករធ្វើតិច តែទទួលបានផលច្រើន៕

May 25, 2019

Author: ធឿន មករា