ធឿន មករា - La Reine Media

នៅឆ្នាំ2020 ក្រុងភ្នំពេញនឹងលែងខ្វះភ្លើងអគ្គិសនីប្រើប្រាស់ហើយ

ប្រមុខរដ្ឋាភិបាលកម្ពុជាបានប្រកាសថា នៅឆ្នាំ2020 ខាងមុខនេះ នៅក្នុងរាជធានីភ្នំពេញ នឹងលែងខ្វះខាតភ្លើងអគ្គិសនីប្រើប្រាស់ដូចឆ្នាំនេះទៀតហើយ ដោយរដ្ឋាភិបាលកម្ពុជាសម្រេចបញ្ជាទិញអគ្គិសនីដើរដោយធ្យូងថ្មមកពីប្រទេស2 ចំនួន 400មេហ្គាវ៉ាត់។ រដ្ឋាភិបាលបានអនុម័តរួចហើយនូវការបញ្ជាទិញអគ្គិសនីដើរដោយធ្យូងថ្មពីប្រទេសចំនួន2 គឺប្រទេសហ្វាំងឡង់ចំនួន 200មេហ្គាវ៉ាត់ និងអាល្លឺម៉ង់200មេហ្គាវ៉ាត់ សរុបមានចំនួន 400មេហ្គាវ៉ាត់ ដើម្បីផ្គត់ផ្គង់នៅក្នុងរាជធានីភ្នំពេញ។ សម្តេចនាយករដ្ឋមន្រ្តីបានមានប្រសាសន៍ថា យើងត្រូវតែរៀបផែនការថ្មីចំពោះវិស័យអគ្គិសនីនៅកម្ពុជាដើម្បីឆ្លើយតបទៅនឹងការរីកចម្រើនរបស់កម្ពុជា និងការដោះស្រាយការលំបាករបស់ប្រជាពលរដ្ឋដែលកំពុងជួបកង្វះខាតអគ្គិសនីប្រើប្រាស់។

សម្តេចនាយករដ្ឋមន្រ្តីបានថ្លែងបន្តថា ការខ្វះភ្លើងប្រើប្រាស់ក្នុងឆ្នាំ2019 នេះ គឺជាមេរៀនសម្រាប់កម្ពុជា ខណៈប្រទេសនេះពឹងផ្អែកខ្លាំងលើប្រភពថាមពលវារីអគ្គិសនី ដែលជួបបញ្ហាខ្វះខាតទឹកក្នុងការផលិតអគ្គិសនីកាលពីរដូវប្រាំងកន្លងទៅថ្មីៗនេះ។

សម្តេចតេជោហ៊ុន សែន បានលើកឡើងយ៉ាងដូច្នេះថា៖ “យើងនៅមានបញ្ហាទាក់ទិននឹងការខ្វះទឹកទៅលើការប្រើប្រាស់វារីអគ្គិសនី ដែលធ្វើឱ្យវារីអគ្គិសនីរបស់យើង គ្មានស្ថិរភាពនៅក្នុងការផ្គត់ផ្គង់។ ឆ្នាំនេះជាបទពិសោធផ្តល់មេរៀនឱ្យយើងច្រើន ដែលយើងត្រូវខិតខំរកវិធីដោះស្រាយ ដើម្បីកុំឱ្យជួបបញ្ហាច្រំដែលនេះនៅឆ្នាំខាងមុខ”។

សម្តេចនាយករដ្ឋមន្រ្តីបានបន្តទៀតថា៖ “វារីអគ្គិសនីរបស់យើងមានកម្លាំងប្រមាណជិត 1,400មេហ្គាវ៉ាត់ ក៏ប៉ុន្តែការផលិត ថ្ងៃខ្លះបានត្រឹមតែ100 ឬ200មេហ្គាវ៉ាត់ទេ។ ថ្ងៃខ្លះបានទៅដល់ 600មេហ្គាវ៉ាត់ឃើញថា គ្រាន់បើបន្តិច ប៉ុន្តែមិនបានគ្រប់ម៉ោងនោះទេ”។

ប្រមុខរាជរដ្ឋាភិបាលបញ្ជាក់ថា រាជធានីភ្នំពេញត្រូវតែត្រៀមអគ្គិសនី 400មេហ្គាវ៉ាត់ទុក។ ក្នុងនោះភ្លើង (ថាមពលអគ្គិសនីដើរដោយប្រេងខ្មៅ) 200មេហ្គាវ៉ាត់ នឹងត្រូវទិញពីហ្វាំងឡង់ និង 200មេហ្គាវ៉ាត់ទៀត ទិញពីអាល្លឺម៉ង់ ត្រឹមខែតុលាខាងមុខនេះ។ការត្រៀមទុកនេះ គឺទុកប្រើក្នុងពេលដែលវារីអគ្គិសនីបញ្ចេញថាមពលមិនគ្រប់ ខណៈដែលតម្រូវការភ្លើងក្នុងរាជធានីភ្នំពេញ កើនដល់ជាង 1ពាន់មេហ្គាវ៉ាត់។ “ឆ្នាំក្រោយ គឺភ្នំពេញគ្មានហេតុផលនិយាយថា ខ្វះអគ្គិសនី ហើយត្រូវកាត់ទេ”។

សម្តេចតេជោហ៊ុន សែន ក៏បានបញ្ជាក់ទៀតដែរថា សម្រាប់ឆ្នាំនេះផងដែរយើងក៏នឹងបើកដំណើរការរោងចក្រអគ្គិសនីដើរដោយធ្យូងថ្មចំនួន 3ផ្សេងទៀត ក្នុងនោះរោងចក្រចំនួន1 មានសមត្ថភាពអាចផលិតបាន 373គីឡូវ៉ាត់ម៉ោង និងមួយទៀតចំនួន 370គីឡូវ៉ាត់ម៉ោង ហើយនឹងដាក់ដំណើរការថ្ងៃនេះ មានចំនួន 130គីឡូវ៉ាត់ម៉ោង។

សម្តេចនាយករដ្ឋមន្រ្តីបានបញ្ជាក់ទៀតថា ក្នុងដំណើរទស្សនកិច្ចនៅក្នុងប្រទេសជប៉ុន សម្តេចក៏បានជួបចរចាជាមួយនាយករដ្ឋមន្ត្រីជប៉ុន ស៊ិនហ្សូ អាបេដើម្បីផ្តល់ជំនួយដល់ការលើកកម្ពស់វិស័យអគ្គិសនីនៅកម្ពុជាផងដែរ តាមរយៈការបញ្ជាទិញ និងការតបណ្តាញអគ្គិសនីពីប្រទេសឡាវមកផ្គត់ផ្គង់នៅកម្ពុជា៕

June 13, 2019

ក្រសួង៖ ទិន្នន័យគំនូរឧស្សាហកម្ម និងកម្មសិទ្ធិបញ្ញាកម្ពុជា ភ្ជាប់ទៅនឹងប្រព័ន្ធទិន្នន័យអាស៊ាន-សហភាពអឺរ៉ុប ជាផែនការអភិវឌ្ឍន៍ឧស្សាហកម្ម ប្រកបដោយចីរភាព

គំនូរឧស្សាហកម្មត្រូវបានយកចិត្តទុកដាក់ និងប្រើប្រាស់យ៉ាងសកម្មនៅក្នុងទីផ្សារសម្រាប់ការលក់ផលិតផល ការផ្សព្វផ្សាយពាណិជ្ជកម្មទាក់ទាញអតិថិជនឱ្យចាប់អារម្មណ៍លើផលិតផលរបស់ខ្លួនដែលជាកត្តាសំខាន់សម្រាប់ការប្រកួតប្រជែងទីផ្សារនាពេលបច្ចុប្បន្ន។ នេះបើតាមការអះ អាងរបស់មន្ត្រីជាន់ខ្ពស់នៃក្រសួងឧស្សាហកម្ម និងសិប្បកម្ម។

ឯកឧត្តម ភោគ សុវណ្ណរិទ្ធ រដ្ឋលេខាធិការក្រសួងឧស្សាហកម្ម និងសិប្បកម្មបានមានប្រសាសន៍ថា ក្រសួងបាននិងកំពុងអនុវត្តយ៉ាងសកម្មនូវផែនការអភិវឌ្ឍន៍ឧស្សាហកម្មប្រកបដោយចីរភាពក្នុងការរួមចំណែកអភិវឌ្ឍសេដ្ឋកិច្ចជាតិឱ្យរីកចម្រើនប្រកបដោយបរិយាប័ន្ន។

ឯកឧត្តមបានបញ្ជាក់ថា៖“ជាក់ស្តែងផ្នែកកម្មសិទ្ធិឧស្សាហកម្ម ក្រសួងបានបន្តខិតខំពង្រីកកិច្ចការពារកម្មសិទ្ធិបញ្ញា ពង្រីកកិច្ចសហប្រតិបត្តិការជាមួយអង្គការអន្តរជាតិ និងបណ្តាអង្គភាពកម្មសិទ្ធិបញ្ញាលើពិភពលោកសំដៅធ្វើយ៉ាងណាឱ្យការងារប្រកាសនីយបត្រ តក្កកម្ម គំនូរឧស្សាហកម្មដំណើរការស៊ីសង្វាក់គ្នាជាមួយអន្តរជាតិ និងទទួលបានការទាក់ទាញការចុះបញ្ជីការពារកម្មសិទ្ធិបញ្ញានៅកម្ពុជាកាន់តែច្រើនឡើង”។

ឯកឧត្តមបានបន្តថា៖“នៅក្នុងក្របខ័ណ្ឌអាស៊ានយើងមានការសហការជាមួយបណ្តាអង្គភាពកម្មសិទ្ធិបញ្ញានៅក្នុងតំបន់អាស៊ាន យើងមានគម្រោងរបស់សហគមន៍អឺរ៉ុបជួយគាំពារខាងផ្នែកកម្មសិទ្ធិបញ្ញាតំបន់អាស៊ាន”។

ថ្ងៃនេះគម្រោងជួយគាំទ្រការធ្វើសមាហរណកម្មអាស៊ានលើផ្នែកកម្មសិទ្ធិបញ្ញារបស់សហ ភាពអឺរ៉ុប ARISE+IPR (The Enhanced ASEAN Regional Intergration Suuport from TheEuropean Unionfor Intellectual Property) បានសហការជាមួយក្រសួងឧស្សាហកម្ម និង សិប្បកម្ម រៀបចំសិក្ខាសាលាគំនូរឧស្សាហកម្ម និងដាក់ឱ្យដំណើការទិន្នន័យគំនូរឧស្សាហកម្មកម្ពុជា ភ្ជាប់ទៅនឹងប្រព័ន្ធទិន្នន័យអាស៊ាន និងកម្មសិទ្ធិបញ្ញាសហភាពអឺរ៉ុបដើម្បីជាប្រយោជន៍ដល់កិច្ចការពារកម្មសិទ្ធិបញ្ញា”។

លោក ង៉ែត វិបុល អគ្គនាយករងនៃអគ្គនាយកដ្ឋានកម្មសិទ្ធិបញ្ញាក្រសួងឧស្សាហកម្ម និងសិប្បកម្មបានថ្លែងឱ្យដឹងថា៖“គោលបំណងសិក្ខាសាលានាថ្ងៃនេះ គឺដើម្បីបំប៉នចំណេះដឹង និងស្វែងយល់បន្ថែមទៀតអំពីគំនូរឧស្សាហកម្ម ដែលជាផ្នែកមួយដ៏សំខាន់នៃកម្មសិទ្ធិបញ្ញា និងជាមួយគ្នានេះដែរ ជាការដាក់ឱ្យដំណើរការទិន្នន័យគំនូរឧស្សាហកម្មកម្ពុជា តភ្ជាប់ជាមួយទិន្នន័យគំនូរឧស្សាហកម្មក្នុងតំបន់អាស៊ានទៅសហភាពអឺរ៉ុបដែលជាប្រយោជន៍សម្រាប់ការប្រើប្រាស់ក្នុងកិច្ចការពារកម្មសិទ្ធិបញ្ញា”។

ការសុំការពារគំនូរឧស្សាហកម្ម គឺមានសារៈសំខាន់ និងផ្តល់ផលប្រយោជន៍ជាច្រើនដល់ អ្នក គូរ តក្កករ រោងចក្រ សហគ្រាសធុនតូច និងមធ្យម(SMEs)សិប្បករ ធុរជនពីការលួចចម្លងគំនូរឧស្សាហកម្ម ការរចនាម៉ូដរបស់ផលិតផលដោយគ្មានការអនុញ្ញាត។ នៅប្រទេសកម្ពុជាយើងបច្ចុប្បន្ន មានច្បាប់ប្រកាសនីយបត្រតក្កកម្ម វិញ្ញាបនបត្រម៉ូដែលដែលមានប្រ-យោជន៍ និងប្រកាសអំពីការចុះបញ្ជីប្រើប្រាស់គំនូរឧស្សាហកម្មនេះ។

គំនូរឧស្សាហកម្មមួយដែលបានទទួលកិច្ចការពារ យើងឱ្យមានសិទ្ធិពេញលេញក្នុងការប្រើប្រាស់ធ្វើអាជីវកម្ម និងមានសិទ្ធិហាមឃាត់អ្នកធ្វើតាម អ្នកលួចចម្លងគំនូរឧស្សាហកម្មដែលដាក់លក់លើទីផ្សារដោយគ្មានការអនុញ្ញាតពីម្ចាស់ដើមស្របច្បាប់។ នេះបើតាមលោកវិបុលបានបញ្ជាក់។

លោកអគ្គនាយករងរូបនេះបានបញ្ជាក់ថា៖“នាយកដ្ឋានកម្មសិទ្ធិឧស្សាហកម្មបានដំណើរការ ទទួលពាក្យសុំការពារ និងផ្តល់កិច្ចការពារជូនអ្នកដាក់ពាក្យស្នើសុំចាប់ពីឆ្នាំ2008 ដល់ឆ្នាំ2018 យើងទទួលបានចំនួន 243ពាក្យសុំ និងបានចុះបញ្ជីចំនួន 672គំនូរឧស្សាហកម្ម”។

លោកបានឱ្យដឹងទៀតថា៖“ការចុះបញ្ជីគំនូរឧស្សាហកម្ម គឺឈរលើមូលដ្ឋានលក្ខខណ្ឌថ្មី ដែលផ្តល់កិច្ចការពារសរុបចំនួន15ឆ្នាំ (ដោយម្តងអាចធ្វើអាជីវកម្មរយៈពេល 5ឆ្នាំ) និងបន្តបាន 3ដង”។

លោក វិបុល បានបន្តថា៖“យើងទទួលបានការសុំចុះបញ្ជីភាគច្រើនមកពីបរទេសប្រមាណ80% រីឯតក្កករ អ្នកឌីហ្សាញ សហគ្រាសធុនតូច និងមធ្យមក្នុងស្រុកមានតែ 20%ទេ។ ដូច្នេះយើងចង់ឱ្យមានការចាប់អារម្មណ៍ពី SMEs ក្នុងស្រុកដើម្បីដាក់ពាក្យសុំការពារគំនូរឧស្សាហកម្ម ហេតុនេះហើយទើបក្រសួងឧស្សាហកម្ម និងសិប្បកម្ម បន្តការបណ្តុះបណ្តាល ផ្សព្វផ្សាយ អំពីសារប្រយោជន៍នៃកម្មសិទ្ធិបញ្ញា និងអ្នកពាក់ព័ន្ធឱ្យបានដឹង និងចូលរួមការពារកម្មសិទ្ធិបញ្ញារបស់ខ្លួនជាបន្តបន្ទាប់”។

លោក ង៉ែត វិបុល បានបញ្ជាក់ឱ្យដឹងទៀតថា៖“រាជរដ្ឋាភិបាលកម្ពុជាបានចូលជាសមាជិករបស់កិច្ចព្រមព្រៀងទីក្រុងឡាអេផងដែរអំពីការចុះបញ្ជីគំនូរឧស្សាហកម្មអន្តរជាតិតាំងពីឆ្នាំ2017 មក ហើយឆ្នាំ2018 យើងបានទទួលការសុំការពារចំនួន 250គំនូរឧស្សាហកម្មពីប្រព័ន្ធអន្តរជាតិនេះហើយចំនួននៃការសុំចុះបញ្ជីនេះ អាចមានការកើនឡើងបន្តទៀតនៅឆ្នាំ2019 នេះ”។

លោក Tiago Guerreiro ជាប្រធានគម្រោង ARISE+IPR បានថ្លែងថា៖“ការសុំចុះបញ្ជីការពារគំនូរឧស្សាហកម្មនៅក្នុងទីក្រុងឡាអេ គឺជាការផ្តល់តម្លៃការងាររបស់ SMEs ផ្ទាល់ ដោយបានប្រើជាប្រចាំឱ្យក្រុមហ៊ុនរបស់ខ្លួន ហើយឆ្លើយតបទៅនឹងផលិតផលក្នុងស្រុកសរុប(ផ.ស.ស) GDP របស់ប្រទេសផ្ទាល់ខ្លួនផងដែរ”។

លោក Tiago Guerreiro បានបញ្ជាក់ថា៖ “នៅបណ្តាប្រទេសអឺរ៉ុបចាប់ពីឆ្នាំ2003 មក ការទទួលខុសត្រូវលើកម្មសិទ្ធិបញ្ញាត្រូវបានត្រួតពិនិត្យមើលថា តើសហគ្រាស SMEs 1 មានភាពត្រឹមត្រូវដែរឬទេ? ប្រសិនបើ SMEsនោះមានភាពត្រឹមត្រូវហើយ យើងត្រូវតែចុះបញ្ជីការពារសិទ្ធិឱ្យគេ ដែលបច្ចុប្បន្នមានចំនួន 2.5លានដែលបានចុះបញ្ជីហើយ ហើយយើងបានការពារកម្មសិទ្ធិបញ្ញារបស់គេ។ ក្នុងការការពារគំនូរឧស្សាហកម្មនេះ យើងក៏មានការការពារចំនួនរាប់លាននៅសហគមន៍អឺរ៉ុប ព្រោះថាការការពារគំនូរឧស្សាហកម្ម និងកម្មសិទ្ធបញ្ញានាំឱ្យមានការរីកចម្រើនខាងសេដ្ឋកិច្ច និងឱកាសការងារ ដែលនាំឱ្យមាន12% នៃឱកាសការងារនៅអឺរ៉ុប និងការប្រកួតប្រជែងនាពេលបច្ចុប្បន្ន រួមជាមួយនឹងការងារការពារកម្មសិទ្ធិបញ្ញានេះ SMEs តូចៗក៏អាចធានាបាននូវប្រាក់ចំណូលរបស់ខ្លួនឱ្យមានស្ថិរភាពបានដែរ”។

សូមបញ្ជាក់ថា នៅតំបន់អាស៊ានមានប្រទេសចំនួន3 រួមមានកម្ពុជា ប្រ៊ុយណេ និងប្រទេសសិង្ហបុរីដែលបានចុះកិច្ចព្រមព្រៀងលើការចុះបញ្ជីជាខ្នាតអន្តរជាតិនូវគំនូឧស្សាហកម្មកម្មសិទ្ធិបញ្ញាក្រុងឡាអេ៕

June 13, 2019

៩ ខែនៃការប្រែប្រួល

នៅពេលអ្នកម្តាយចាប់ផ្តើមមានគភ៌នឹងចាប់ផ្តើមមើលឃើញការប្រែប្រួលតាំងពីសប្តាហ៍ដំបូង រាងកាយរបស់អ្នកម្តាយនឹងបញ្ជូនសញ្ញាប្រាប់ពីអាការផ្សេងៗឱ្យបានដឹង ហើយសញ្ជាតិញ្ញាណនោះ អ្នកម្តាយខ្លួនឯងក៏អាចសម្របសម្រួលសភាពរាងកាយត្រៀមទប់ទល់នឹងកូនតូចនៅក្នុងផ្ទៃបានដែរ។ ការប្រែប្រួលនៃសភាពរាងកាយរបស់អ្នកម្តាយមានគភ៌ ទោះជាមិនបានត្រៀមខ្លួនជាមុនមែន តែអ្នកម្តាយអាចសម្រួលសភាពបានដោយអត្តនោម័តិ ទោះជាមិនបានទាំងអស់ក៏ដោយ តែក៏អាចសម្រួលសភាពបានដោយធម្មជាតិដែរ។ ឥឡូវយើងនាំគ្នាមកមើលថា នៅក្នុងខែនីមួយៗដែលមានកូនតូចនៅក្នុងគភ៌ តើរាងកាយរបស់អ្នកម្តាយមានការប្រែប្រួលយ៉ាងណាខ្លះ?

ខែទី១ : បាត់រដូវ តែក៏មិនប្រាកដទាំងអស់ដែរសម្រាប់ស្ត្រីខ្លះដែលរដូវមកមិនទៀងទាត់ តែអ្នកអាចត្រួតពិនិត្យមើលថាមានគភ៌ ឬគ្មានតាមរយៈការពិនិត្យទឹកនោម ដោយឈុតឧបករណ៍សម្រាប់ពិនិត្យ ឬតាមរយៈលោកគ្រូពេទ្យក៏បាន បន្ទាប់ពីបាត់រដូវ2សប្តាហ៍។ ក្រៅពីនេះ អ្នកអាចមានអាការក្អួតចង្អោរ និងឈឺសុដន់ទៀតផង។

ខែទី២ : មានអារម្មណ៍ចង់ក្អួតចង្អោរ វិលមុខ និងមានអារម្មណ៍ចង់ក្អួតខ្លាំងជាងខែដំបូងទៅទៀត ឆាប់ហត់ បត់ជើងតូចញឹកញាប់ ឈឺសុដន់ ធុំក្លិនអ្វីប្លែកមិនបាន និងមានអារម្មណ៍ឆាប់ប្រែប្រួល។ល។

ខែទី៣ : អាការនៅតែដូចកាលពីខែទី1 និងខែទី2 ដដែល អាការចាញ់កូនអាចថយចុះ តែនៅតែឆាប់ខឹងឆេវឆាវមួម៉ៅដដែល និងចាប់ផ្តើមមានបញ្ហាទល់លាមកខ្លះៗហើយ ព្រោះការរំកិលខ្លួនរបស់លាមកនៅក្នុងពោះវៀនធំដំណើរការយឺតដូច្នេះគួរទទួលទានបន្លែ និងផ្លែឈើស្រស់ឱ្យបានច្រើន។

ខែទី៤ : ពោះចាប់ផ្តើមរីកកាន់តែធំឡើង មានអារម្មណ៍នឹកឃ្លានញឹកញាប់ អារម្មណ៍ឆេវឆាវឆាប់មួម៉ៅថយចុះ។

ខែទី៥ : សុដន់ឡើងធំ អាចមានទឹកដោះថ្លាៗហូរចេញមក ចាប់ផ្តើមជួបនឹងបញ្ហាផ្សេងៗ ដូចជា មានធ្លាក់-សច្រើន ឈឺខ្នង ឬមានឈាមចេញតាមជើងធ្មេញ។

ខែទី៦ : អំឡុងពេលនេះ ពោះនឹងកាន់តែធំឡើងហើយទម្ងន់ខ្លួនក៏កាន់តែកើនឡើងយ៉ាងឆាប់រហ័សផងដែរ ក្បាលដោះនឹងទល់ឡើង ចេញញើសច្រើន និងមានអារម្មណ៍ថាក្តៅ ដូច្នេះគួរទទួលទានទឹកស្អាតឱ្យបានច្រើន។

ខែទី៧ : ចាប់ផ្តើមមានអារម្មណ៍ក្តៅផ្សានៅម្តុំចុងដង្ហើម បន្ទាប់ពីទទួលទានអាហារឆ្អែត មានអារម្មណ៍ថាអាហារមិនសូវរំលាយ ប្រគ្រីវកាច់នៅលើជើងក្បាលពោះរបស់អ្នកម្តាយខ្លះចាប់ផ្តើមឡើងសង្វារ។

ខែទី៨ : អុីកអៀកខ្លាំង ពេលខ្លះដកដង្ហើមមិនសូវបានពេញលេញ ព្រោះកូនខ្លួនកាន់តែធំឡើងរហូតទៅប្រជ្រៀតនឹងអវយវៈផ្សេងទៀតនៅក្នុងពោះអ្នកម្តាយ និងបត់ជើងតូចកាន់តែញឹកឡើង។

ខែទី៩ : មានអារម្មណ៍ធ្ងន់ៗខាងក្រោមពោះ(ថ្ងាស) អាចមានអាការឈឺពោះតឿនប្រាប់ឱ្យដឹងមុន រមាស់ និងតឹងៗនៅលើស្បែកក្បាលពោះ ដៃជើងហើម ហត់ល្វើយ ចង់តែគេងសម្រាក និងនៅសប្តាហ៍ចុងក្រោយនៃខែនេះ អ្នកម្តាយត្រូវត្រៀមខ្លួនជួបមុខកូនសម្លាញ់ហើយ៕

June 13, 2019

ស្រ្តីមានគភ៌ត្រូវត្រៀមខ្លួនឱ្យបានស្រេច1ខែមុនពេលប្រសូត

នៅសល់ពេល 1ខែទៀតមុនឆ្លងទន្លេ គឺជាអំឡុងពេលនៃការទន្ទឹងរង់ចាំរបស់ស្រ្តីមានគភ៌គ្រប់រូប ដែលមានទាំងការរំភើបចិត្តផង ទាំងត្រេកអរផង ព្រោះជិតបានឃើញមុខកូនសម្លាញ់ តែខណៈពេលជាមួយគ្នាក៏មានអារម្មណ៍នឹកភ័យខ្លាចនឹងក្តីឈឺចាប់ដែលនឹងកើតមានឡើង ហើយនិងរឿងផ្សេងៗជាច្រើនទៀត។ តែអ្វីទាំងអស់នេះ គ្រូពេទ្យជំនាញខាងសម្ភពនឹងមកជម្រាបអនាគតអ្នកម្តាយថ្មោងថ្មី ដែលនៅមិនទាន់មានបទពិសោធក្នុងរឿងនេះថា តើត្រូវត្រៀមខ្លួនយ៉ាងណាខ្លះមុនពេលប្រសូតដូចខាងក្រោមនេះ៖

ឈានចូលដល់ខែទី ៩
ក្នុងអំឡុងពេលនេះ គ្រូពេទ្យនឹងណាត់ឱ្យទៅពិនិត្យគភ៌កាន់តែញឹកញាប់ឡើងរៀងរាល់សប្តាហ៍ ដើម្បីពិនិត្យមើលភាពត្រៀមខ្លួនជាស្រេចរបស់ស្រ្តីមានគភ៌ និងអាការផ្សេងៗដែលកើតមានឡើងថា តើប្រក្រតី ឬក៏អត់? ក្នុងអំឡុងពេលនេះ ស្រ្តីមានគភ៌នឹងមានអាការឈឺពោះរាងធ្ងន់ៗនៅម្តុំក្រោមផ្ចិតនៅពេលដើរ ជើងនឹងហើមឡើង មានអារម្មណ៍ឈឺផ្សាៗនៅត្រង់ចុងដង្ហើមដោយសារតែអាស៊ីតរំលាយអាហារហូរបញ្រ្ចាស់ឡើង ព្រោះទំហំក្បាលពោះដែលធំឡើង ធ្វើឱ្យក្រពះត្រូវបានរុញឡើងមកលើ អាហារមិនសូវរំលាយ ឆ្អល់ណែនពោះ និងជួនកាលអាចត្រូវភ្ញាក់ឡើងកណ្តាលយប់ ព្រោះតែប្រគ្រីវកាច់ជើង រហូតដល់ត្រូវដាស់លោកប្តីឱ្យជួយរឺតជើងឱ្យទៀតផង។

ត្រៀមខ្លួនជាស្រេច មុនពេលប្រសូត
ការត្រៀមរួចជាស្រេចទាំងរាងកាយ ផ្លូវចិត្ត និងរបស់របរប្រើប្រាស់ផ្សេងៗ នឹងជួយឱ្យស្រ្តីមានគភ៌ទៅប្រសូតបុត្របានយ៉ាងជឿជាក់ក្នុងចិត្ត និងមានអារម្មណ៍ធូរស្រាល ដូច្នេះ តើត្រូវត្រៀមរឿងអ្វីខ្លះនោះ សូមតាមដានជាបន្ត…៖

១. មន្ទីរពេទ្យ
- ប្រឹក្សាជាមួយគ្រូពេទ្យជានិច្ច បើសិនមានបញ្ហាអ្វីគួរឱ្យសង្ស័យពាក់ព័ន្ធនឹងគភ៌របស់ខ្លួន។
– អាចនឹងត្រូវសាកល្បងជិះរថយន្ត ដើម្បីប៉ាន់ស្មានរយ:ពេលធ្វើដំណើរពីផ្ទះទៅមន្ទីរពេទ្យ ឬរកមើលផ្លូវណាផ្សេងដែលងាយស្រួល និងលឿនជាងគេ ទុកបម្រុងនៅថ្ងៃឈឺពោះប្រសូតឱ្យរួចជាស្រេច។

២. ត្រៀមរាងកាយ
– រឿងអាហារការហុបចុក គួរបរិភោគអាហារណាដែលមានប្រូតេអុីនច្រើន តែកាត់បន្ថយអាហារណាដែលមានរសជាតិខ្លាំងៗ ដូចជា ប្រៃខ្លាំង ជូរខ្លាំង ជាពិសេស ហឹរ ព្រោះវានឹងធ្វើឱ្យស្រ្តីមានគភ៌ហើម។ គួរទទួលបន្លែផ្លែឈើរួមជាមួយផង ដើម្បីកាត់បន្ថយអាការណែនឆ្អល់ពោះ។
– គួរញ៉ាំថ្នាំបំប៉នតាមដែលគ្រូពេទ្យឱ្យមកឱ្យគ្រប់ ដូចជា ថ្នាំបំប៉នលោហិត វីតាមីនរួម និងកាល់ស្យូមជាដើម ព្រោះក្នុងអំឡុងពេលប្រសូត អ្នកម្តាយត្រូវបាត់បង់ឈាមច្រើន ហើយការញ៉ាំថ្នាំបំប៉ននឹងជួយធ្វើឱ្យអ្នកម្តាយឆាប់ស្រួលខ្លួនឡើងវិញផង។
– រកទិញរបស់របរប្រើប្រាស់ចាំបាច់ៗ ទាំងរបស់ម្តាយ និងរបស់កូនតូចទុកជាស្រេច ព្រោះក្រោយពេលប្រសូតរួច ម្តាយមិនអាចមានពេលទៅដើររកទិញបានទេ។

៣. ត្រៀមខ្លួនប្រសូត
ក្នុងករណីដែលស្ត្រីមានគភ៌មិនមានលក្ខណៈខុសប្រក្រតីខាងរាងកាយ ឬខាងវេជ្ជសាស្រ្តណាដែលតម្រូវឱ្យប្រសូតដោយការវះកាត់ទេនោះ ស្ត្រីមានគភ៌គួរតែប្រសូតតាមវិធីធម្មជាតិ។
– កំណត់ផែនការក្រោយពេលប្រសូតទុកជាមុនថា តើត្រូវពន្យារកំណើត ឬលែងយកបុត្រទៀត ឬយ៉ាងណា? បើត្រូវពន្យារកំណើត(លែងយកបុត្រទៀត) គួរតែប្រាប់គ្រូពេទ្យឱ្យបានដឹងជាមុន ដើម្បីភាពងាយស្រួលក្នុងការត្រៀមខ្លួនរបស់គ្រូពេទ្យ ក្នុងការបំពេញតម្រូវការរបស់អ្នកប្រសូត។

៤. ត្រៀមចិត្ត ត្រៀមថ្លើមទុកជាស្រេច
– ស្រ្តីមានគភ៌(ពេលគ្រប់ខែ)ត្រូវត្រៀមខ្លួនទប់ទល់នឹងសភាវសោកសៅក្នុងចិត្តដែលអាចកើតឡើងក្រោយពេលប្រសូតរួច ដែលមានដូចជា អាចនឹងយំខ្សឹកខ្សួលពេញមួយថ្ងៃ ភ័យខ្លាចប្តីលែងស្រឡាញ់ និងត្រូវបោះបង់ចោល ខ្លាចខ្លួនលែងស្អាតដូចកាលពីពេលមុនជាដើម-ល- និងកុំភ្លេចសួរពីវិធីកែបញ្ហានេះជាមួយគ្រូពេទ្យដើម្បីទុកប្រតិបត្តិតាមផង។

អាការប្រាប់ឱ្យដឹងខ្លួន មុនពេលប្រសូតដែលស្រ្តីមានគភ៌ត្រូវតែដឹង…
១. ឈឺពោះយ៉ាងខ្លាំងជាប់ជានិច្ច រៀងរាល់ 3នាទីម្ដង និងឈឺម្តងៗប្រហែលជា 40វិនាទី។
២. មានឈាមចេញមកតាមរន្ធស្បូន (អាការនេះទោះមិនឈឺពោះក៏ដោយ ក៏ត្រូវទៅមន្ទីរពេទ្យដែរ)។
៣. មានទឹកភ្លោះហូរចេញមកតាមរន្ធស្បូន (អាការនេះទោះមិនឈឺពោះក៏ដោយ ក៏ត្រូវប្រញាប់ទៅមន្ទីរពេទ្យដែរ) ព្រោះថង់ទឹកភ្លោះអាចបែកទៅហើយ បើទុកចោលយូរអាចនឹងធ្វើឱ្យឆ្លងមេរោគទៅដល់ទារកបាន។

សភាវជ្រៀតជ្រែកមិនល្អដែលអាចកើតឡើង នៅពេលគ្រប់ខែ(មុនជិតដល់ពេលប្រសូត)
១. មានធ្លាក់ឈាម ជាសភាវដែលសុកធ្លាក់ចុះមកទាប ដោយសុកនឹងរំកិលមកតោងនៅម្តុំមាត់ស្បូន ឬផ្នែកក្រោមរបស់មាត់ស្បូន ធ្វើឱ្យមាត់ស្បូនដាច់រហែក ហើយមានឈាមហូរជ្រាបចេញមក។
២. សម្ពាធឈាមឡើងខ្ពស់ ជាដើមហេតុរបស់សភាវគភ៌មានជាតិពុល នឹងធ្វើឱ្យអ្នកម្តាយហើមជើង ហើមមុខ អ្នកខ្លះមានឈឺក្បាលទៀតផង ដែលជាហេតុអាចបណ្ដាលឱ្យស្រ្តីមានគភ៌ប្រកាច់ ឬបែកសរសៃឈាមក្នុងខួរក្បាល។ឭ
៣. ទារកក្នុងគភ៌លែងសូវរើ ដែលអាចមានមូលហេតុមកពីសុកចាប់ផ្តើមធ្វើការខ្សោយ ឬខ្សែទងសុករុំ-កទារក ដែលជាសភាវគ្រោះថ្នាក់ចំពោះទារកខ្លាំងណាស់ ពេលជួបអាការដែលរៀបរាប់មកខាងលើនេះ ចូរប្រញាប់ទៅជួបគ្រូពេទ្យភ្លាមជាបន្ទាន់។
នៅពេលត្រៀមរាងកាយរួចរាល់ ត្រៀមចិត្តរួចរាល់ហើយ… ពេលនេះអនាគតអ្នកម្ដាយថ្មោងថ្មីអាចទៅប្រសូតបុត្រដោយភាពជឿជាក់បានហើយ។ ក្តីឈឺចាប់ដែលកើតឡើងក្នុងពេលប្រសូត នឹងរលាយបាត់អស់ នៅពេលដែលអ្នកម្តាយថ្មោងថ្មីបានឃើញមុខកូនសម្លាញ់ ហើយវានឹងក្លាយជាក្តីរំភើបសោមនស្សពេញក្នុងចិត្តវិញមិនខាន(អ្នកគ្រូ ឆវី សូមជួយជាកម្លាំងចិត្ត) និងខាងក្រោមនេះគឺ ការត្រៀមសម្ភារសម្រាប់ចូលមន្ទីរសម្ភព…៖

សម្រាប់អនាគអ្នកម្តាយ
១. ប័ណ្ណពិនិត្យសុខភាពគភ៌ និងអត្តសញ្ញាណប័ណ្ណ
២. សំឡីអនាម័យ និង អាវក្នុងសម្រាប់បំបៅកូន
៣. សម្លៀកបំពាក់ម្តាយសម្រាប់ស្លៀកពេលចេញពីមន្ទីរពេទ្យ
៤. អាហារ និងភេស្ជជៈ (ព្រោះក្រោយពេលឆ្លងទន្លេរួច អ្នកម្តាយនឹងឃ្លានខ្លាំងណាស់)
៥. កូនកាបូបតូចមួយសម្រាប់ដាក់គ្រឿងសម្អាង
៦. កន្សែងជូតមុខ និងកន្សែងពោះគោសម្រាប់ជូតខ្លួន
៧. កាមេរ៉ាថតរូប ក្នុងករណីដែលខាងមន្ទីរពេទ្យអនុញ្ញាតឱ្យថតរូបបាន។

សម្រាប់ទារក
១. ក្រណាត់កន្ទប
២. ខោអាវកូនតូច (សម្រាប់ទារកទើបកើត)
៣. ទឹកសាប៊ូសម្រាប់បោកជម្រះផ្សេងៗ
៤. កូនខ្នើយសម្រាប់ទ្រាប់ក្បាលកូនពេលបីបំបៅដោះ
៥. ក្រណាត់ ឬកន្សែងសម្រាប់រុំខ្លួនកូនសម្លាញ់ពេលត្រឡប់ទៅផ្ទះវិញ៕

June 13, 2019

ហេតុផល3យ៉ាង “ហាមដកស្កូវ”

តើអ្វីនឹងកើតឡើង បើសិននៅសុខៗស្រាប់តែឃើញសរសៃសក់ពណ៌សលេចធ្លោឡើង?… ប្រហែលជាទប់ចិត្តមិនបានក្នុងការដកវាចេញឡើយ… តែមនុស្សជាច្រើនអាចនឹងត្រូវថ្លឹងថ្លែងក្នុងចិត្តខ្លះដែរ ព្រោះធ្លាប់បានឮពាក្យចាស់ៗនិយាយថា ការដកសក់ស្កូវ 1សរសៃ វានឹងដុះឡើង 1សរសៃ(ដកមិនចេះអស់) តែហ្នឹងគ្រាន់តែជា “ពាក្យនិយាយតៗគ្នា” ដែលគ្មានភស្តុតាងខាងវិទ្យាសាស្ត្រមកធានាឡើយ ហើយអុីចឹង ចម្លើយដែលពិតប្រាកដនោះគឺជាអ្វី?
“រឿងពិត” ដែលនឹងកើតឡើងពេលអ្នកដកសក់ស្កូវ៖

១. សក់កំបុត : បើដកសរសៃសក់ ឬសរសៃរោមណាមួយយ៉ាងរហ័សចេញពីស្បែកមិនថានៅលើផ្នែកណាមួយនៃរាងកាយនោះឡើយ គឺជាការរុកកួនរំខានស្បែកឱ្យបែក ឬអាចធ្វើឱ្យសាច់ភ្នាសនៅម្ដុំសរសៃសក់នោះខូចខាត និងអាចហុចផលប៉ះពាល់ដល់ឫសសក់ទៀតផង។ វេជ្ជបណ្ឌិតជំនាញខាងស្បែក អធិប្បាយថា ការរុកកួនរំខានស្បែកបែបនេះ មានផលអាក្រក់ច្រើនណាស់ ជាពិសេសបញ្ហាដែលជួបប្រទះច្រើនបំផុតក៏គឺ រោមកំបុតឬសក់កំបុត ព្រោះបើសាច់ភ្នាសស្បែកខូចខាតនៅពេលសរសៃសក់ដុះឡើងថ្មី នឹងមិនអាចងើបចេញផុតពីក្រោមស្រទាប់ស្បែកបានឡើយ ហើយនឹងដុះលូតលាស់នៅខាងក្នុងនោះ ក្លាយជាសរសៃសក់កំបុតនៅទីបំផុត។
រោម ឬសរសៃសក់កំបុតអាចបង្កឱ្យកើតអាការឈឺក្រហាយស្បែក ចំណែកនៅលើអ្នកដែលមានសរសៃរោម ឬសក់រាងរឹងៗ អាចនឹងធ្វើឱ្យកើតមានអាការរលាកក្លាយជាពងបែក និងឈឺខ្លាំងទៀតផង។

២. សក់ស្ដើង : ពេលកញ្ឆក់សរសៃសក់ស្កូវចេញខ្លាំងៗ អាចហុចផលឱ្យស្បែកក្បាល និងឫសសក់ខូចខាតអស់ខ្លះ។ វេជ្ជបណ្ឌិតជំនាញដដែលបានរៀបរាប់ថា វិនាទីនៃការឈឺចាប់ដែលត្រូវកញ្ឆក់ដកសក់ស្កូវនោះ អាចជាពេលវេលាដែលសរសៃឈាមក្រហមពង្រីកខ្លួនបញ្ចេញប្រតិកម្មជាមួយភាពឈឺចាប់ត្រឹមតែបន្តិចបន្តួចដែលរាងកាយបានទទួល និងហុចផលទៅដល់ឫសសក់។
ទោះជាអ្វីដែលអាចកើតឡើងតិចបំផុតមែនតែបើលោកអ្នកដក ទាញ ឬកញ្ឆក់សក់ស្កូវជាប់គ្នាខ្លាំងៗ ការឈឺចាប់ដែលកើតឡើងចំពោះស្បែកក្បាលនេះក៏អាចធ្វើឱ្យសក់ដុះមកស្ដើង ក្រវែង ឬអាចលែងមានសក់ស្កូវថ្មីៗឡើងមកទៀតតែម្ដងក៏មាន។

៣. ខាតពេលវេលា(ដកទៅ ក៏អត់ប្រយោជន៍) : ការដកសក់ស្កូវមិនមានកើតប្រយោជន៍អ្វីឡើយ ក្រៅតែពីកែបញ្ហាបានតែម្ដងម្កាលប៉ុណ្ណោះ ព្រោះក្រោយពីលោកអ្នកចាត់ការទាញដកសក់ពណ៌សនោះចេញហើយ វដ្តរបស់ឫសសក់នឹង Reset ឡើងវិញដោយខ្លួនឯង ហើយសរសៃសក់ថ្មីក៏នឹងដុះឡើងមកជំនួសនៅទីតាំងចាស់ ដោយនៅតែជាសក់ពណ៌សដដែល ដោយសារតែកោសិកាពណ៌នៅក្នុងឫសសក់បានងាប់បាត់ទៅហើយហ្នឹងឯង ទើបសក់ដែលដុះមកថ្មីនោះខ្វះពណ៌ ធ្វើឱ្យក្លាយជាសក់ស្កូវ(ពណ៌ស)ដោយគ្មានថ្ងៃវិលត្រឡប់មកជាសក់ពណ៌ខ្មៅវិញឡើយ។
វេជ្ជបណ្ឌិតជំនាញដដែលថែមទាំងបានបញ្ជាក់ទៀតថា គឺជារឿងដែលគួរឱ្យសោកស្ដាយណាស់ ដែលមិនមានការរកឃើញថា តើមានអាហារប្រភេទពិសេសណា ឬអាហារបំប៉នពិសេសប្រភេទណាដែលអាចបំប៉នដើម្បីពន្យារ ឬទប់ស្កាត់ការកើតសក់ស្កូវបានឡើយ។
ដូច្នេះ វិធីការពារកុំឱ្យសក់ឡើងពណ៌ស ឬស្កូវមុនអាយុ ឬពន្យារការកើតសក់ស្កូវនោះ គឺការចៀសវាងពីបច្ច័យដែលជាដើមហេតុ មិនថាតែការមិនជក់បារី ហើយបែរមកយកចិត្តទុកដាក់លើអាហារការហូបចុក និងគេងលក់សម្រាកឱ្យបានគ្រប់គ្រាន់ ថែទាំសភាពផ្លូវចិត្ត កុំឱ្យភាពឆាប់ខឹងមួម៉ៅច្រើនមកកាត់បន្ថយទាំងសុខភាពកាយ និងចិត្ត៕

June 13, 2019

តើពេលណាមិនគួរងូតទឹក?

រឹតតែអាកាសធាតុក្ដៅខ្លាំង រឹតតែធ្វើឱ្យយើងចង់តែនៅក្នុងទីកន្លែងត្រជាក់ៗ តែបើសិនជាមានញើសចេញពេញមួយថ្ងៃហើយនោះ ប្រហែលជាគ្មានអ្វីដែលធ្វើឱ្យយើងមានអារម្មណ៍ស្រស់ថ្លាជាងការបានងូតទឹកឡើយ តែក៏មានពេលខ្លះដែលយើងអាចនឹងត្រូវរង់ចាំសិនដែរ ទោះជាក្ដៅបែកញើសស្អិតខ្លួនប៉ុនណាក៏ដោយ ព្រោះអាចនឹងកើតផលអាក្រក់ដល់រាងកាយបាន។

តើពេលណាដែលយើងមិនគួរងូតទឹក?
១. ទើបតែមកពីក្ដៅ/ជួបធាតុអាកាសក្ដៅហប់ ឬក្ដៅខ្លាំង
ជាពិសេសអ្នកដែលមានសម្ពាធឈាមទាបការងូតទឹកភ្លាមៗក្រោយពេលប៉ះនឹងធាតុអាកាសក្ដៅ ស្បែកកំពុងនៅក្ដៅភាយនៅឡើយ បើសិនងូតទឹកភ្លាមៗ អាចធ្វើឱ្យរាងកាយសម្រួលសីតុណ្ហភាពលឿនជ្រុលពេក រហូតធ្វើឱ្យប្រថុយនឹងការកើតខ្យល់គបាត់បង់ស្មារតីបាន ដូច្នេះគួរអង្គុយសម្រាកនៅក្នុងបន្ទប់ ឬទីម្លប់រហូតទាល់តែបាត់ក្ដៅជាមុនសិន សឹមទៅងូតទឹកទើបប្រសើរជាង។

២. ក្រោយទទួលទានអាហាររួច
ក្រោយទទួលទានអាហារ លោហិតភាគច្រើននឹងហូរទៅបំពេញនៅឯប្រព័ន្ធរំលាយអាហារ បើសិនទៅងូតទឹកនៅពេលហ្នឹង ក៏នឹងត្រូវមានលោហិតមួយចំណែកបែងចែកទៅចិញ្ចឹមអវយវៈផ្នែកផ្សេងៗផងដែរ ធ្វើឱ្យប្រព័ន្ធរំលាយអាហារធ្វើការមិនបានពេញទំហឹង អាចហើមពោះ ឬអាហារមិនរំលាយជាដើម។

៣. ក្រោយហាត់ប្រាណ
គួរឱ្យចម្លែកចិត្តដែរ ដែលឃើញមនុស្សជាច្រើន ពេលហាត់ប្រាណយ៉ាងជោកជាំរួច ក៏ដើរទៅងូតទឹកតែម្ដង…។ ការពិតវិញយើងគួរអង្គុយសម្រាកឱ្យបាត់ហត់សិន ឬឱ្យខ្លួនប្រាណស្ងួតញើសល្មមសមរម្យសិន រួចសឹមទៅងូតទឹក ព្រោះការងូតទឹកក្រោយហាត់ប្រាណយ៉ាងជោកជាំហើយភ្លាមៗ អាចជាហេតុបណ្ដាលឱ្យលោហិតទៅចិញ្ចឹមបេះដូង និងខួរក្បាលបានមិនគ្រប់គ្រាន់ក្នុងអំឡុងពេលងូតទឹក និងបណ្ដាលឱ្យកើតខ្យល់គបាត់បង់ស្មារតីបាន។

៤. ក្រោយញ៉ាំគ្រឿងស្រវឹង
ក្រោយញ៉ាំភេសជ្ជៈមានជាតិអាល់កុល ជាតិអាល់កុលនឹងទៅទប់ស្កាត់ការធ្វើការរបស់ថ្លើម ធ្វើឱ្យការបញ្ចេញជាតិគ្លុយកូសចេញមកក្នុងក្រសែឈាមថយចុះ តែអំឡុងពេលងូតទឹក រាងកាយនឹងត្រូវការគ្លុយកូសរឹតតែច្រើនឡើង ដូច្នេះហើយទើបការងូតទឹកក្រោយញ៉ាំគ្រឿងស្រវឹង ធ្វើឱ្យបរិមាណជាតិស្ករនៅក្នុងឈាមមិនគ្រប់គ្រាន់ ធ្វើឱ្យប្រថុយនឹងការកើតអាការវិលមុខ ងងឹតមុខ ស្រវាំងភ្នែក រាងកាយគ្មានកម្លាំងកំហែង និងប្រថុយនឹងការខ្យល់គដួលក្នុងបន្ទប់ទឹកបាន។

៥. ពេលឈឺ មានគ្រុនក្ដៅខ្លួន
ប្រហែលជាបានដឹងទាំងអស់គ្នារួចមកហើយថា អ្នកជំងឺដែលមានអាការគ្រុនក្ដៅខ្លួនគួរតែជូតខ្លួន ដើម្បីសម្អាតខ្លួនប្រាណសិនរហូតទាល់តែអាការគ្រុនក្ដៅខ្លួនថយចុះ។ មិនមែនដោយសារតែអ្នកជំងឺគ្មានកម្លាំងទៅងូតទឹកនោះទេ តែដោយសារតែអំឡុងពេលដែលយើងមានជំងឺ សីតុណ្ហភាពរាងកាយនឹងឡើងខ្ពស់ដល់ 38 – 40អង្សាC និងធ្វើឱ្យបរិមាណដុតបំផ្លាញកម្ដៅក្នុងរាងកាយកើនឡើង 20% ទើបធ្វើឱ្យរាងកាយហាក់ដូចជាចុះទន់ខ្សោយបើសិនងូតទឹក អាចកើតគ្រោះថ្នាក់ដល់រាងកាយ ងងឹតមុខ ស្រវាំងភ្នែក បាត់បង់ស្មារតី រហូតដល់ប្រកាច់ទៀតផង៕

June 13, 2019

ប្រយ័ត្ន! ទម្លាប់អាក្រក់មួយចំនួនធ្វើឱ្យនារីៗប្រឈមមុខនឹងជំងឺអាក្រក់

មិនថាតែនៅក្នុងអតីតកាល ឬបច្ចុប្បន្នកាលឡើយ យើងនៅតែមើលឃើញថា នារីៗនៅតែមានទម្លាក់អាក្រក់មួយចំនួនដូចជា ទទួល-ទានស្រា ភេស្ជជៈជាតិអាល់កុល ប្រភេទស្រាបៀរ វ៉ាញ ឬសូម្បីតែស្រាថ្នាំ ជក់បារី-ល- នឹងមានសញ្ញាថា នារីៗចាប់ផ្តើមមានកើតជំងឺកាចសាហាវដោយមិនបានដឹងខ្លួនជាមុន។ ថ្ងៃទស្សនាវដ្ដី ឡារ៉ែន សូមជម្រាបជូននូវទម្លាប់អាក្រក់មួយចំនួនដែលនារីៗគួរគិតពិចារណាឡើងវិញ ក្នុងការថែទាំសុខភាពរបស់ខ្លួន។

១. បណ្ដោយខ្លួនឱ្យធាត់ពេក
ធាត់ ឬឡើងគីឡូ បន្ទាប់ពីឈានចូលដល់វ័យអស់រដូវ អាចជាកត្តាហានិភ័យចំពោះជំងឺមហារីកសុដន់។ មុនដល់វ័យអស់រដូវ អ័រម៉ូន អឺស្រ្ដូហ្សែន របស់ស្រ្តីភាគច្រើនបានផលិតនៅក្នុងក្រពេញអូវែ និងជាលិកាខ្លាញ់មានតិចតួចបំផុត។ ប៉ុន្ដែបន្ទាប់ពីក្រពេញអូវែឈប់ផលិតអ័រម៉ូន អឺស្រ្ដូហ្សែន ក្រោយពេលអ្នកអស់រដូវ គឺមានតែជាលិកាខ្លាញ់ប៉ុណ្ណោះ ជាប្រភពចម្បងក្នុងការផលិតអរម៉ូន អឺស្រ្ដូហ្សែន។ ពេលសម្បូរជាលិកាខ្លាញ់ កម្រិតអ័រម៉ូន អឺស្រ្ដូហ្សែន ក៏កើនឡើងតាមដែរ ជាហេតុបង្កឱ្យមានហានិភ័យខ្លាំងចំពោះសុខភាព។ មួយវិញទៀត នារីៗដែលធាត់ជ្រុល តែងមានកម្រិតអ័រម៉ូនអាំងស៊ុយលីនខ្ពស់នៅក្នុងឈាម វាក៏ជាមូលហេតុនាំឱ្យមានជំងឺមហារីកសុដន់ដូចគ្នាដែរ។

២. ខ្ចិលហាត់ប្រាណ
ភាពអសកម្មរាងកាយ (អត់ធ្វើលំហាត់ប្រាណ) ជាកត្តាហានិភ័យក្នុងការកើតមានជំងឺកាចសាហាវមួយចំនួន ប៉ុន្ដែការធ្វើសកម្មភាពរាងកាយ អាចការពារអ្នកពីជំងឺមហារីកសុដន់ ក្រោយពេលអស់រដូវ តាមរយៈការជះឥទ្ធិពលពីការដុតកម្ដៅរបស់អ័រម៉ូន Steroid នៃក្រពេញបញ្ចេញខាងក្នុង និងការរលាករបស់វា ដែលធ្វើឱ្យកាត់បន្ថយជាតិខ្លាញ់នៅក្នុងខ្លួនបាន និងប្រព័ន្ធភាពស៊ាំដំណើរការបានកាន់តែប្រសើរឡើងថែមទៀត។ ធ្វើសកម្មភាពរាងកាយ ត្រូវបានគេអះអាងថាអាច ជួយកាត់បន្ថយហានិភ័យមហារីកសុដន់ឱ្យចុះមកនៅត្រឹម25% ទៅ 30%ប៉ុណ្ណោះ។ អ្នកជំនាញនិយាយថា ស្ត្រីដើរយឺតៗពី 1 ម៉ោង ទៅ2ម៉ោងកន្លះ ក្នុងមួយសប្តាហ៍ អាចជួយកាត់បន្ថយហានិភ័យបានដល់ទៅ18%។ ទំនាក់ទំនងរវាងលំហាត់ប្រាណទៀងទាត់ និងការថយចុះហានិភ័យក្រោយពេលអស់រដូវ ត្រូវបានគេបញ្ជាក់យ៉ាងច្បាស់។ មានន័យថា អសកម្មរាងកាយអាចនាំអ្នកឈានទៅរកការកើតជំងឺមហារីកសុដន់។

៣. ចូលចិត្តទទួលទានស្រា
ក្នុងចំណោមនារីៗនៅក្នុងប្រទេសអភិវឌ្ឍជុំវិញពិភពលោក កើតមានជំងឺមហារីកសុដន់ 4% បណ្តាលមកពីពួកគេជាអ្នកទទួលទានស្រា។ របាយការណ៍ផ្សេងទៀតបានបង្ហាញថា កំណើនអាចកើនដល់ទៅ10% បើអ្នកបន្ថែមការទទួលទានស្រា នោះសារធាតុអេតាណុល 10ក្រាមដែលមានក្នុងស្រានឹងត្រូវបានបញ្ចូលទៅក្នុងរាងកាយរបស់អ្នករាល់ថ្ងៃ។ ទំនាក់ទំនងរវាងគ្រឿងស្រវឹង និងហានិភ័យនៃការកើតមានជំងឺមហារីកសុដន់ គឺបង្ហាញយ៉ាងច្បាស់ថា ការទទួលទានស្រាកាន់តែច្រើន ហានិភ័យក្នុងការកើតមានជំងឺមហារីកក៏មានកាន់តែខ្ពស់ដែរ។

៤. ជក់បារីជក់បារី
ក៏ជាមូលហេតុបង្កឱ្យកើតមានជំងឺកាចសាហាវផ្សេងៗ ដែលភាគច្រើនជាជំងឺមហារីក ក្នុងនោះក៏មានមហារីកសុដន់ផងដែរ។ ក្លិនឈ្ងុយនៃសារធាតុអុីដ្រូកាបូន ដែលមាននៅក្នុងថ្នាំជក់ ជាមូលហេតុបង្កកើតមានជាសារធាតុវិទ្យុសកម្មជំរុញឱ្យកើតមហារីក។ របាយការណ៍ក្រុមគ្រូពេទ្យពិភពលោកបានបង្ហាញថា នារីៗដែលធ្លាប់ជក់បារីពីមុន អាចនឹងកើតមានជំងឺមហារីកសុដន់ជាងនារីធម្មតា 10% នៅក្នុងឆ្នាំកន្លងទៅនេះ។

៥. ប្រើវិធីពន្យារកំណើត
វិធីពន្យារកំណើតមានច្រើនសណ្ឋាន ដូចជា ថ្នាំលេប ថ្នាំចាក់ ជ័រដាក់ក្នុងស្បូន ជ័រដាក់ក្រោមស្បែក និងកងដាក់ក្នុងស្បូន សុទ្ធតែអាចឈានទៅរកជំងឺមហារីកសុដន់ទាំងអស់។ អ្នកវិទ្យាសាស្រ្ដបានបញ្ជាក់ថា នារីៗដែលប្រើវិធីពន្យារកំណើតអាចប្រឈមនឹងជំងឺមហារីកសុដន់ ជាងស្រ្ដីដែលមិនប្រើប្រាស់។ តែបើស្រ្ដីដែលឈប់ប្រើ (ឈប់ពន្យារកំណើត) ចន្លោះពី 5-10ឆ្នាំ ទៅតាមទម្រង់នៃការពន្យារកំណើត នឹងមិនមានហានិភ័យកើតមានមហារីកសុដន់នោះទេ៕

June 12, 2019

ពិភពលោកកំពុងព្យាយាមដោះស្រាយបញ្ហាប្លាស្ទិកដើម្បីកាត់បន្ថយហានិភ័យ…

បញ្ហាប្លាស្ទិក បានក្លាយជាប្រធានបទក្តៅដែលប្រទេសនីមួយៗកំពុងប្រកាសអាសន្ន ហើយព្យាយាមគ្រប់លទ្ធភាពដើម្បីអប់រំប្រជាជនឱ្យចូលរួមដោះស្រាយ ព្រោះពី 1ឆ្នាំទៅ 1ឆ្នាំ ធនធានជីវៈចម្រុះជាច្រើននៅក្នុងមហាសមុទ្រជាច្រើនបានបាត់បង់ដោយសារកាកសំណល់ប្លាស្ទិក។ ក្រៅពីនេះ បញ្ហាប្រែប្រួលអាកាសធាតុ ក៏មានធាតុផ្សំមួយសំខាន់ផងដែរមកពីភាពខ្ជះខ្ជាយនៃកាកសំណល់ប្លាស្ទិក ដែលត្រូវចំណាយពេលរាប់រយឆ្នាំដើម្បីរលាយនៅក្នុងដី។

ដើម្បីដោះស្រាយបញ្ហាសំណល់ប្លាស្ទិក ប្រទេសណ័រវេយ៍ (Norway) រួមជាមួយបណ្តាប្រទេសជាច្រើនផ្សេងទៀតបានចាប់ផ្តើមផ្តល់រង្វាន់ដល់ប្រជាជនដែលបានយកដបប្លាស្ទិកទៅប្រើប្រាស់ឡើងវិញ ឬយកទៅដាក់ក្នុងធុងសំរាមឆ្លាតវៃដើម្បីទទួលបានពិន្ទុហើយប្តូរបានជាសាច់ប្រាក់ សម្រាប់ការប្រមូលទៅកែច្នៃឡើងវិញ។ ប្រទេសនេះ បានដំឡើងថ្លៃពន្ធក្នុងការនាំចូលប្លាស្ទិកទៅក្នុងទីផ្សារ ដើម្បីយកប្រាក់ទាំងអស់នេះ មកឱ្យប្រជាជនដែលបានត្រឡប់របស់របរប្រើប្រាស់ប្លាស្ទិកទាំងអស់នោះមកកាន់កន្លែងកែច្នៃវិញ។ការអនុវត្តសកម្មភាពបែបនេះ បានចាប់ផ្តើមធ្វើឱ្យប្រជាជនយកចិត្តទុកដាក់កាន់តែខ្លាំង និងកាន់តែរីករាយក្នុងការប្រើប្រាស់ប្លាស្ទិក ឬគ្រប់គ្រងសំណល់ប្លាស្ទិកដែលបានប្រើប្រាស់រួចឱ្យមានរបៀបរៀបរយ។

ជាលទ្ធផលសំខាន់នៃសកម្មភាពផ្តល់ការលើកទឹកចិត្តដល់អ្នកផ្តល់ប្លាស្ទិកសម្រាប់ប្រើប្រាស់ឡើងវិញនេះ ប្រទេស ណ័រវេយ៍ ទទួលបានដបប្លាស្ទិក 97% ដើម្បីយកទៅកែច្នៃឡើងវិញ ហើយកាត់បន្ថយបាននូវបញ្ហាដែលកើតឡើងពីការខ្ជះខ្ជាយ និងសំរាមបានយ៉ាងច្រើនហួសពីការស្មាន។ គំរូប្រភេទនេះក៏ត្រូវបានប្រទេសមួយចំនួនផ្សេងទៀតយកគំរូតាមផងដែរ។ នៅកម្ពុជា យើងក៏មានក្រុមយុវជនបង្កើតធុងសំរាមឆ្លាតវៃផងដែរ ដើម្បីដាក់ឱ្យប្រជាជនប្រើប្រាស់ និងទទួលបានរង្វាន់ពីការបែងចែកប្រភេទសំរាមឱ្យបានត្រឹមត្រូវ ដោយទទួលបានពិន្ទុសម្រាប់បញ្ចុះតម្លៃក្នុងហាងដៃគូជាច្រើននៅកម្ពុជា។ ម្យ៉ាងវិញទៀត នៅតាមផ្សារទំនើបក៏មានសកម្មភាពជាវិជ្ជមានមួយផ្សេងទៀតផងដែរ គឺកាត់បន្ថយការប្រើប្រាស់ប្លាស្ទិក ក្រសួងបរិស្ថានបានតម្រូវឱ្យផ្សារទាំងអស់នោះគិតថ្លៃបន្ថែម 0.1$ លើថ្លៃថង់ដែលបានប្រើប្រាស់ និងជំនួសមកវិញនូវការលក់ស្បោងក្រណាត់ដែលអាចប្រើប្រាស់បានច្រើនដងផងដែរ។

នៅប្រទេសឥណ្ឌាវិញ គេចាប់ផ្តើមប្រើប្រាស់ប្លាស្ទិកដែលគេបោះចោលជាច្រើនពីគំនរសំរាម ដើម្បីច្នៃចេញជាវត្ថុប្រើប្រាស់ថ្មីៗ ដូចជាការប្រើប្រាស់បច្ចេកវិទ្យាច្នៃសំណល់ប្លាស្ទិកឱ្យទៅជាកៅស៊ូចាក់លើផ្លូវ ដែលរហូតមកដល់ថ្មីៗនេះតាមរបាយការណ៍ដែលផ្សាយចេញពីកាសែត The Gardian បានឱ្យដឹងថា ឥណ្ឌាបានធ្វើផ្លូវ 33,700គីឡូម៉ែត្រ ពីសំណល់ប្លាស្ទិក។ តាមប្រភពដដែលបានបញ្ជាក់ថា ក្នុងចម្ងាយ1គីឡូម៉ែត្រ ឥណ្ឌាប្រើប្រាស់ថង់ប្លាស្ទិកប្រមាណ 1លានថង់ ហេតុនេះផ្លូវមួយខ្សែៗគឺអាចកាត់បន្ថយសំណល់ខ្ជះខ្ជាយពីប្លាស្ទិករាប់ពានលានថង់។ ចំពោះតម្លៃវិញ បើប្រៀបធៀបជាមួយនឹងផ្លូវកៅស៊ូ គឺចំណេញថវិកាចំនួន 8% ហើយគុណភាព គឺទទួលយកបាន។

ងាកមកទីក្រុង London វិញ អាជ្ញាធរបានលើកទឹកចិត្តប្រជាជនឱ្យប្រើដបទឹកតែមួយ ឬសន្សំដបទឹក ដោយដាក់ធុងទឹកស្អាត ឬទឹកបរិសុទ្ធនៅទីសាធារណៈ ដើម្បីឱ្យប្រជាជនយកដបរបស់ខ្លួនទៅប្រើហើយមិនបាច់ចំណាយលុយទិញទឹកសុទ្ធដែលនាំឱ្យចំណាយដបប្លាស្ទិកច្រើន។ ការធ្វើបែបនេះគឺដោយសារតែគេសង្កេតឃើញថាដបទឹក រួមទាំងសំណល់ប្លាស្ទិកប្រមាណ 8លានតោនបានហូរចូលទៅមហាសមុទ្រជារៀងរាល់ឆ្នាំ ព្រោះបើតាមការស្មានជារៀងរាល់ឆ្នាំដបប្លាស្ទិកត្រូវបានគេផលិតប្រមាណ 2ទ្រីលានដប ហេតុនេះប្រសិនបើគ្រប់គ្រងមិនល្អវានឹងហូរចូលទៅក្នុងទឹក។ បញ្ហានេះអាចបណ្តាលឱ្យខូចគុណភាពទឹក ហើយប្រភេទសត្វក្នុងទឹកចាប់ផ្តើមពុលឬងាប់ដោយសារស៊ីប្លាស្ទិកទាំងអស់នោះ។

ការចូលរួមកាត់បន្ថយការប្រើប្រាស់ប្លាស្ទិក បានក្លាយជារឿងដ៏សំខាន់ និងអាចឱ្យមនុស្សម្នាក់ៗក្លាយជាវីរបុរស (Hero) សង្គ្រោះពិភពលោក ព្រោះមិនត្រឹមតែសត្វទេដែលប៉ះពាល់ខ្លាំងដល់ជីវិត តែមនុស្សរាប់លាននាក់ក៏កំពុងជួបប្រទះដោយផ្ទាល់ និងប្រយោលពីបញ្ហាប្លាស្ទិកនេះដែរ៕

June 12, 2019

ការបណ្តុះបណ្តាលបច្ចេកទេស និងវិជ្ជាជីវៈកំពុងក្លាយជាប្រធានបទសំខាន់សម្រាប់កម្ពុជា…

ការបណ្តុះបណ្តាលបច្ចេកទេសនិងជំនាញវិជ្ជាជីវៈ កំពុងក្លាយជាប្រធានបទសំខាន់សម្រាប់ការរៀបចំធនធានមនុស្សនៅកម្ពុជា ព្រោះយើងកំពុងខ្វះធនធានផ្នែកបច្ចេកទេសជាច្រើនដើម្បីបំពេញសេចក្តីត្រូវការនៃទីផ្សារការងារបច្ចុប្បន្ន។

នៅថ្ងៃទី15-16 ខែមិថុនាខាងមុខនេះ ក្រសួងការងារ និងបណ្តុះបណ្តាលវិជ្ជាជីវៈគ្រោងនឹងរៀបចំទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ (TVET day) លើកទី2នៅអគារពិព័រណ៍កោះពេជ្រ ដោយរំពឹងថានឹងមានអ្នកចូលរួមប្រមាណ 3ម៉ឺននាក់ក្រោមប្រធានបទ “TVET អាចធ្វើបាន”។

ឯកឧត្តម ពេជ សោភ័ន រដ្ឋលេខា-ធិការក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថាកម្មវិធី TVET Day នេះជាកម្មវិធីដ៏មានសារៈសំខាន់ដែលក្រសួងព្យាយាមធ្វើការផ្សព្វផ្សាយ និងរំពឹងទុកថាអាចផ្តល់ផលប្រយោជន៍ជាវិជ្ជមានដល់សិស្សានុសិស្សចំណេះទូទៅ សិស្ស-និស្សិតដែលកំពុងសិក្សានៅក្នុងគ្រឹះស្ថានអប់រំបណ្តុះបណ្តាលបច្ចេកទេស និងយុវជនជាច្រើនផ្សេងទៀតដែលកំពុងសិក្សានៅកម្ពុជា។ កម្មវិធីនេះនឹងបើកឱ្យចូលរួមដោយឥតគិតថ្លៃ ដើម្បីផ្តល់ឱកាសឱ្យប្រជាជនកម្ពុជាកាន់តែច្រើនបានចូលរួម និងស្វែងយល់ពីការជ្រើសរើសអាជីពវិជ្ជាជីវៈ និងបច្ចេកទេស។

ឯកឧត្តម ពេជ សោភ័ន បានមានប្រសាសន៍ថា៖ “សាធារណជន និងសិស្សានុសិស្សដែលចូលរួមក្នុងកម្មវិធី TVET Day នឹងទទួលបានព័ត៌មានសំខាន់ៗស្តីពីការបណ្តុះបណ្តាលបច្ចេកទេស និងវិជ្ជាជីវៈ ព្រមទាំងទទួលបានព័ត៌មានពីអាហារូបករណ៍នៅតាមគ្រឹះស្ថាននានាទូទាំងប្រទេស។ លើសពីនេះទៅទៀត ក៏នឹងទទួលបានព័ត៌មានស្តីពីទីផ្សារការងារក្នុងវិស័យនេះយ៉ាងច្រើនផងដែរ”។

ឯកឧត្ដមក៏បានលើកឡើងផងដែរថា កម្ពុជាកំពុងព្យាយាមយ៉ាងយកចិត្តទុកដាក់ដើម្បីអភិវឌ្ឍសមត្ថភាពរបស់ប្រជាជនខ្មែរ និងជំរុញការផ្សព្វផ្សាយឱ្យកាន់តែខ្លាំងពីសារៈសំខាន់នៃជំនាញបច្ចេកទេសជាច្រើនដែលកម្ពុជាកំពុងត្រូវការ។ លក្ខណៈពិសេសរបស់កម្ពុជា គឺយើងមានធនធានមនុស្សវ័យក្មេងច្រើនតែយើងនៅមានកត្តាប្រឈមមួយចំនួនគឺបញ្ហាជំនាញរបស់ពួកគេ។ ហេតុនេះប្រសិនបើយើងបណ្តុះបណ្តាលធនធានមនុស្សរបស់យើងឱ្យមានជំនាញច្បាស់លាស់ នោះយើងនឹងទទួលបានការចាប់អារម្មណ៍កាន់តែខ្លាំងពីវិនិយោគិនទាំងក្នុង និងក្រៅប្រទេស។

យោងតាមការបញ្ជាក់ពីក្រសួងការងារ និងបណ្តុះបណ្តាលវិជ្ជាជីវៈបានឱ្យដឹងថា កម្មវិធី TVET Day នៅឆ្នាំនេះ នឹងធ្វើឡើងក្នុងគោលបំណងសំខាន់ដើម្បីលើកកម្ពស់ជីវភាពប្រជាពលរដ្ឋ តាមរយៈកាត់បន្ថយភាពក្រីក្រដោយការប្រើប្រាស់ជំនាញវិជ្ជាជីវៈដែលទទួលបានការបណ្តុះបណ្តាលត្រឹមត្រូវដល់ប្រជាជន ព្រោះបើប្រៀបធៀបអ្នកដែលទទួលបានការបណ្តុះបណ្តាល ហើយមានជំនាញបច្ចេកទេស និងវិជ្ជាជីវៈច្បាស់លាស់ ពួកគេមានប្រាក់ឈ្នួលខ្ពស់ជាងអ្នកជំនាញ។ ក្រៅពីនេះ កម្មវិធីនេះក៏អាចលើកស្ទួយគោលនយោបាយ និងចក្ខុវិស័យជាតិបានយ៉ាងប្រសើរផងដែរ ព្រោះការអភិវឌ្ឍ និងការផ្សព្វផ្សាយវិស័យ TVET ជាឧបករណ៍សំខាន់ក្នុងការជំរុញការអនុវត្តគោលនយោបាយជាតិកម្ពុជា ដែលបានកំណត់ទិសដៅថា នៅឆ្នាំ2030 កម្ពុជានឹងក្លាយជាប្រទេសដែលមានចំណូលមធ្យមកម្រិតខ្ពស់ និងនៅឆ្នាំ2050 កម្ពុជានឹងក្លាយជាប្រទេសមានចំណូលខ្ពស់។ ម្យ៉ាងវិញទៀតវិស័យ TVET ក៏ចូលរួមក្នុងការអនុវត្តគោលនយោបាយជាតិអភិវឌ្ឍន៍វិស័យឧស្សាហកម្ម គោលនយោបាយជាតិស្តីពីមុខរបរ និងការងារ គោលនយោបាយជាតិស្តីពីការបណ្តុះបណ្តាលបច្ចេកទេស និងវិជ្ជាជីវៈ ដើម្បីធ្វើយ៉ាងណាប្រែក្លាយកម្លាំងពលកម្មក្នុងទម្រង់ជាអតិពលកម្មទៅជាកម្លាំងដែលមានជំនាញ។

កត្តាសំខាន់មួយផ្សេងទៀតគឺ ដោយសារតែបច្ចុប្បន្ននេះបដិវត្តន៍ឧស្សាហកម្មទី4បានចូលមកដល់ហេតុនេះ វិស័យ TVET ជាផ្នែកយ៉ាងសំខាន់ដែលជួយកម្ពុជាឱ្យវិវឌ្ឍខ្លួនឱ្យទាន់បដិវត្តន៍សកលថ្មីនេះ។ វិស័យនេះនឹងចូលរួមចំណែកតាមរយៈការជំរុញឱ្យរោងចក្រសហគ្រាសនៅកម្ពុជាប្រើបញ្ញាសិប្បនិម្មិត (AI Technology) មនុស្សយន្ត (Tobot) និងសម្ភារបរិក្ខារដ៏ទៃផ្សេងទៀតដែលកម្ពុជាត្រូវការ។ ប្រសិនបើមិនពង្រឹងវិស័យ TVET ទេ កម្លាំងពលកម្មកម្ពុជាប្រមាណជាង 50% នឹងត្រូវជួបបញ្ហាបាត់បង់ការងារក្នុងរយៈពេល 20ឆ្នាំខាងមុខនេះ៕

June 12, 2019

ជំងឺ៣ប្រភេទក្នុងរដូវក្ដៅដែល “មនុស្សចាស់” គួរប្រយ័ត្ន

ខណៈដែលប្រទេសយើងកំពុងប្រឈមនឹងសភាវអាកាសធាតុដែលក្ដៅហប់ ហួតហែងដោយសារតែសីតុណ្ហភាពដែលកើនខ្ពស់ឡើង ដែលអាចធ្វើឱ្យកើតរោគភ័យផ្សេងៗឡើងបាននោះ ជាហេតុធ្វើឱ្យយើងត្រូវមើលថែទាំសុខភាពរបស់អ្នកដែលស្ថិតនៅក្នុងក្រុមប្រថុយនឹងការកើតរោគភ័យផ្សេងៗ ដូចជា អ្នកមានជំងឺប្រចាំកាយ កូនក្មេង ស្រ្តីមានគភ៌ និងជាពិសេសមនុស្សចាស់ សុទ្ធតែជាក្រុមដែលត្រូវផ្ដល់ភាពសំខាន់ជាពិសេស ដោយសារតែជាក្រុមមនុស្សដែលមានសុខភាពរាងកាយមិនសូវរឹងមាំ ងាយនឹងឈឺថ្កាត់ជាងមនុស្សក្នុងវ័យកំលោះក្រមុំ បើសិនជាត្រូវប្រឈមនឹងធាតុអាកាសក្ដៅយូរៗទៅ។លោកគ្រូពេទ្យជំនាញផ្នែកជំងឺមនុស្សចាស់ជរាបានឱ្យដឹងថា ក្នុងអំឡុងពេលដែលប្រទេសយើងត្រូវប្រឈមនឹងសភាវធាតុអាកាសក្ដៅហប់ហួតហែងដូចសព្វថ្ងៃនេះ ជំងឺដែលមនុស្សចាស់ត្រូវប្រយ័ត្នប្រយែង និងជួបប្រទះញឹកញាប់នោះមានដូចជា៖

១. ជំងឺខ្យល់គដោយសារកម្ដៅ ឬហ៊ីតស្រ្តូក (Heat Stroke)
ជំងឺខ្យល់គដោយសារកម្ដៅ បណ្ដាលមកពីការដែលមនុស្សចាស់ស្ថិតនៅក្នុងសភាពបរិស្ថានដែលមានសីតុណ្ហភាពខ្ពស់ និងបានទទួលកម្ដៅខ្លាំងជ្រុលពេក បណ្ដាលឱ្យការធ្វើការងាររបស់ប្រព័ន្ធឈាមរត់ និងប្រព័ន្ធខួរក្បាលខុសប្រក្រតី ដែលសញ្ញាដាស់តឿនដ៏សំខាន់របស់ជំងឺហ៊ីតស្រ្តូកនេះគឺ គ្មានចេញញើស មុខឡើងក្រហម ខ្លួនប្រាណក្ដៅឡើងជារឿយៗ មានអារម្មណ៍ស្រេកទឹកខ្លាំង វិលមុខ ឈឺក្បាល ក្អួតចង្អោរ ដកដង្ហើមដង្ហក់ សាច់ដុំឡើងរឹង ភាំងៗ ប្រស្រីភ្នែករីកធំ អារម្មណ៍ដឹងខ្លួនថយចុះ អាចប្រកាច់ និងបាត់ស្មារតី។ បើមិនបានទទួលការជួយសង្គ្រោះយ៉ាងត្រឹមត្រូវទាន់ពេលវេលាទេនោះ បេះដូងអាចនឹងឈប់ធ្វើការ និងអាចបណ្ដាលឱ្យស្លាប់បាន។
សម្រាប់ការការពារ និងមើលថែទាំមនុស្សចាស់ គឺមិនគួរបណ្ដោយឱ្យស្ថិតនៅក្រោមកម្ដៅថ្ងៃនាពេលថ្ងៃត្រង់ ឬចៀសវាងពីធ្វើកិច្ចការងារនៅកណ្ដាលវាលក្នុងអំឡុងពេលរសៀលរហូតដល់ម៉ោង 4ល្ងាច តែបើមានភាពចាំបាច់ចៀសមិនរួចដែលត្រូវតែប៉ះពាល់នឹងកម្ដៅថ្ងៃនោះ គួរប្រើកន្សែងពោះគោជ្រលក់ទឹកជូតខ្លួនដើម្បីបន្ថយកម្ដៅក្នុងខ្លួន និងគួរក្រេបទឹកបរិសុទ្ធឱ្យបានញឹកញាប់បំផុតក្នុងថ្ងៃដែលធាតុអាកាសក្ដៅខ្លាំង ពាក់វ៉ែនតាការពារពន្លឺថ្ងៃ និងបាំងឆ័ត្រមុនពេលចេញពីផ្ទះ គួរស្លៀកសម្លៀកបំពាក់ដែលមានពណ៌ស្រាលៗ ធំទូលាយ ស្ដើងៗស្រាលៗ និងអាចបំភាយកម្ដៅ និងការពារកម្ដៅថ្ងៃបានល្អ។

២. ជំងឺរាករូស

ក្នុងអំឡុងអាកាសធាតុក្ដៅបែបនេះ មេរោគផ្សេងៗនឹងរីកធំធាត់យ៉ាងល្អ ជាពិសេសចំណីអាហារនឹងឆាប់ជូរផ្អូមជាងប្រក្រតី ដែលបើសិនញ៉ាំចំណីអាហារមិនស្អាត អាការរាករូសនឹងកើតឡើងបានយ៉ាងងាយ។ ឯវិធីការពារគឺ គួរប្រកាន់ខ្ជាប់គោលការណ៍ញ៉ាំអាហារក្ដៅៗ មានស្លាបព្រាសម្រាប់ដួសម្ហូបដោយឡែក លាងសម្អាតដៃដើម្បីកាត់បន្ថយការឆ្លងមេរោគ និងមិនញ៉ាំអាហារដែលទុកចោលយូរ ឬបើទទួលទានមិនអស់ គួររក្សាទុកនៅក្នុងទូទឹកកក ដើម្បីកុំឱ្យអាហារនោះជូរផ្អូម។

៣. ជំងឺស្បែកឈឺក្រហាយផ្សា ក្រហម ឡើងកន្ទួល
ជំងឺស្បែកកើតឡើងពីការប៉ះពាល់នឹងកម្ដៅថ្ងៃរយៈពេលយូរដោយគ្មានវត្ថុការពារ នឹងធ្វើឱ្យស្បែករបស់មនុស្សចាស់កើតអាការក្ដៅខ្លោច ក្រហាយផ្សា និងឡើងកន្ទួល ដូច្នេះគួរទទួលទានទឹកឱ្យបានច្រើនជាងប្រក្រតី ដើម្បីសាងភាពស្រស់ថ្លា និងសំណើមដល់ស្បែក និងលាបគ្រីមការពារកម្ដៅថ្ងៃមុនចេញទៅប៉ះពន្លឺថ្ងៃប្រមាណ 20នាទី និងគួរលាបថែមទៀតរៀងរាល់ 2 – 4ម៉ោងម្ដង ដើម្បីការពារស្បែកពីកម្ដៅថ្ងៃ។
ទាំងអស់នេះការមើលថែទាំមនុស្សចាស់គួរយកចិត្តទុកដាក់លើរឿងសុខភាពគ្រប់ផ្នែកដោយការរៀបចំទីកន្លែងឱ្យមានខ្យល់អាកាសចេញចូលស័ក្តិសមសម្រាប់មនុស្សចាស់ ចៀសវាងភាពសើមផ្អាប់ ព្រោះអាចជាប្រភពបណ្ដុះមេរោគ និងធ្វើឱ្យមិនស្រួលខ្លួន ក្រៅពីនេះ ត្រូវមើលថែទាំសភាវខាងអារម្មណ៍របស់មនុស្សចាស់ ដោយត្រូវមើលថែយ៉ាងចិត្តត្រជាក់ រួមទាំងសាងបរិយាកាសឱ្យស្រស់ថ្លារីករាយជាប់ជានិច្ច និងបើសង្កេតឃើញមានអាការខុសប្រក្រតីណាមួយរបស់មនុស្សចាស់ដែលបង្កដោយជំងឺអ្វីម្យ៉ាងនោះ គួរប្រញាប់នាំទៅជួបគ្រូពេទ្យដើម្បីព្យាបាល និងរិះរកវិធីការពាររួមគ្នា៕

June 12, 2019

Author: ធឿន មករា