ធឿន មករា - La Reine Media

បច្ចេកវិទ្យាទំនើបរបស់ OPPO អាចតេរកគ្នាបាន ទោះជាអត់សេវាសោះក៏ដោយ

OPPO បានប្រកាសចេញបច្ចេកវិទ្យាទំនាក់ទំនងថ្មីដែលទើបផលិតឡើង ដោយអាចឱ្យអ្នកប្រើប្រាស់ហៅទូរស័ព្ទ ឬផ្ញើសារទៅវិញទៅមកបានក្នុងរយៈចម្ងាយឆ្ងាយគួរសមមួយ ដោយមិនចាំបាច់ប្រើប្រាស់សេវាទូរស័ព្ទ Wi-Fi ឬ Bluetooth អ្វីនោះទេ។បច្ចេកវិទ្យានេះមានឈ្មោះថា MeshTalk ជាប្រព័ន្ធដែលមានការការពារខ្ពស់មួយ ដែល OPPO និយាយថា អាចគ្របដណ្ដប់ក្នុងរយៈចម្ងាយដល់ 3គីឡូម៉ែត្រ (នៅទីធ្លាខាងក្រៅ) ឬអាចឆ្ងាយជាងនេះ បើស្ថិតនៅក្នុងទីប្រជុំជនដែលអាចបាញ់ចេញសេវាតាមឧបករណ៍បាន។ឧបករណ៍ OPPO នឹងអាចបង្កើតបានជា Local Area Network មួយ និងអាចទំនាក់ទំនងដោយផ្ទាល់ជាមួយគ្នា ដោយមិនត្រូវការអង់តែន។

ក្រុមហ៊ុនបានអះអាងថា MeshTalk មិនមានប៉ះពាល់ដល់ថ្មរបស់ឧបករណ៍ឡើយ និងមានគម្រោងថា នឹងបញ្ចូលបច្ចេកវិទ្យានេះជាមួយ Mode Stanby 72ម៉ោង ដូច្នេះទូរស័ព្ទនឹងនៅតែអាចទំនាក់ទំនងគ្នាបាន ទោះជាពេលដែលថ្មនៅសល់តិចតួចក៏ដោយ។

ទោះមិនទាន់មានការបញ្ជាក់ថា បច្ចេកវិទ្យា MeshTalk នឹងអាចប្រើជាមួយស្មាតហ្វូន OPPO នាពេលបច្ចុប្បន្ន ឬយ៉ាងណាក្ដី ក៏ប៉ុន្តែបច្ចេកវិទ្យានេះកំពុងធ្វើការបង្ហាញមុខក្នុងកម្មវិធី MWC Shanghai ដែលកំពុងប្រព្រឹត្តធ្វើឡើងចាប់ពីថ្ងៃទី26 ដល់28 ខែមិថុនាសប្ដាហ៍នេះដែរ៕

June 27, 2019

Bill Gates ថា កំហុសធំបំផុតគឺ ការបណ្ដោយឱ្យប្រព័ន្ធដំណើរការMicrosoft ប្រកួតចាញ់ Android

លោក Bill Gates ដែលអ្នកទាំងអស់គ្នាស្គាល់ថាជាស្ថាបនិកក្រុមហ៊ុន Microsoft បានលើកឡើងពីបទពិសោធផ្ទាល់របស់ខ្លួននៅក្នុងវេទិកាមួយមានឈ្មោះថា Village Global ស្ដីពីសហគ្រិនភាព។ ក្រោយពេលប៉ះនឹងសំណួរដ៏រសើបមួយដែលពិធីការិនីបានជជីកសួរដេញដោលនោះ លោក Bill Gates បានសារភាពថា “កំហុសធំបំផុតមួយនៅក្នុងជីវិតគឺ ការបណ្ដោយឱ្យប្រព័ន្ធដំណើរការ Microsoft ប្រកួតចាញ់ Android”។ កំហុសមួយនោះបានធ្វើខាតបង់ប្រាក់ជាង 400ប៊ីលានដុល្លារ។

លោកបានបន្ថែមថា នៅក្នុងពិភពនៃការប្រកួតប្រជែងបង្កើតប្រព័ន្ធដំណើរការកម្មវិធី បើអ្នកផលិតបានប្រព័ន្ធដែលគេនិយមប្រើច្រើន ហើយថែមទាំងក្ដោបបានទីផ្សារទាំងមូល នោះអ្នកនឹងឈ្នះ។ ដូចគ្នាអីចឹងដែរ គ្រាដែលនៅដឹកនាំ Microsoft ការគ្រប់គ្រងរបស់លោកមិនល្អ ហាក់មានភាពរញ៉េរញ៉ៃ បង្កើតបានប្រព័ន្ធមួយដែលអ្នកប្រើប្រាស់មិននិយម ឬនិយាយឱ្យខ្លីថា ពិបាកប្រើ ផ្ទុយពី Android ដែលជាទម្រង់ Platform ស្តង់ដា Open Source។ ក្នុងដំណាក់កាលដែល Android កំពុងឡើងកូដ តើអ្នកដឹងទេ ថាទម្រង់ Platform ស្តង់ដា Open Source នោះរកចំណូលបានប៉ុន្មាន? បើអាចត្រឡប់ទៅអតីតកាលក្នុងអំឡុងពេលជោគជ័យរបស់ Microsoft វិញនោះ ពិតណាស់ លុយជាង 400ប៊ីលានដុល្លារនោះនឹងហូរចេញពីក្រុមហ៊ុន G ចូលកុងក្រុមហ៊ុន M៕

June 27, 2019

កីឡាការនីតេក្វាន់ដូ កូនកាត់ ខ្មែរ-អាមេរិកាំង ត្រៀមយកមេដាយ ពីកម្មវិធីធំៗ២នៅអូស្ត្រាលី

Casandre ដែលជាកីឡាការនីតេក្វាន់ដូជម្រើសជាតិកម្ពុជា ពេលនេះកំពុងតែនៅប្រទេសអូស្រ្តាលីហើយ ដើម្បីចូលរួមប្រកួតក្នុងកម្មវិធី ប្រកួតតេក្វាន់ដូ ចំនួន២ព្រិត្តិការណ៍នៅឯប្រទេសអូស្ត្រាលី ចាប់ពីថ្ងៃទីនេះតទៅ។

នៅថ្ងៃទី២៧ ខែមិថុនានេះ កីឡាការនីរូបស្រស់មួយនេះ នឹងចូលរួមប្រកួតក្នុងកម្មវិធី Oceania Presidents Cup G-2 មុនពេលបន្តចូលរួមប្រកួតក្នុងព្រឹត្តិការណ៍ Australian Open G-2 ជាបន្តទៀត។

Casandre ត្រូវបានគេមើលឃើញថា បានចូលរួមប្រកួតក្នុងព្រឹត្តិការណ៍ជើងឯកផ្សេងៗញឹកញាប់ ដោយពេលខ្លះឈ្នះមេដាយ ហើយពេលខ្លះក៏មិនទទួលបានលទ្ធផលល្អ ប៉ុន្តែនេះជាការត្រៀមខ្លួន និងកម្តៅសាច់ដុំសម្រាប់កម្ពុជាដើម្បីចូលរួមប្រកួតក្នុងព្រឹត្តិការណ៍កីឡាស៊ីហ្គេមចុងឆ្នាំ២០១៩នេះ៕

June 27, 2019

ចាន់ វឌ្ឃនាកា នឹងបង្ហាញខ្លួនលើកដំបូង ក្នុងជំនួបជាមួយនឹង ខេត្តសៀមរាប

កីឡាករខ្សែប្រយុទ្ធ ចាន់ វឌ្ឍនាកា នឹងត្រូវបង្ហាញខ្លួនជាលើកដំបូងនៅកម្ពុជា ក្នុងឆ្នាំ២០១៩ ក្នុងជំនួបជាមួយនឹងក្រុមខេត្តសៀមរាប ក្នុងពានរង្វាន់ HUN SEN CUP 2019 នេះបើតាមការបញ្ជាក់របស់លោក ហៅ សុជាតិ គ្រូបង្វឹកក្រុមបាល់ទាត់បឹងកេត ។ក្នុងវគ្គ១៦ក្រុមថ្នាក់ជាតិ ពានរង្វាន់សម្តេចអគ្គមហាសេនាបតីតេជោ ហ៊ុនសែន ឆ្នាំ២០១៩នេះ ក្រុមបាល់ទាត់បឹងកេត ត្រូវជូបជាមួយនឹងក្រុមខេត្តសៀមរាបចំនួន២ជើង ដើម្បីដណ្តើមកៅអីទៅវគ្គបន្ត ក្នុងពានរង្វាន់មួយនេះ។គួរបញ្ជាក់ផងដែរថា កីឡាកររូបនេះទើបតែចូលជាមួយនឹង ក្រុមបាល់ទាត់បឹងកេតសារជាថ្មី ក្នុងជើងទី២ និង ពានរង្វាន់ HUN SEN 2019 នេះ ក្រោយពីបានបញ្ចប់កុងត្រាជាមួយនឹងក្លិប PKNS FC ដែលប្រកបអាជីពនៅលីគកំពូលម៉ាឡេស៊ី៕

ដោយ៖ ឃូរ៉ា
ប្រភព៖ BKFC

June 27, 2019

មានដឹងទេថា ជើង Ronaldo មានតម្លៃថ្លៃជាងកំប៉េះគូទ តារាស្រី៣នាក់នេះទៅទៀត

បើតាមតារាងនៃការធានារ៉ាប់រងដងខ្លួនដែលមានតម្លៃថ្លៃជាងគេនៅលើពិភពលោកទាំង១០ តម្លៃធានារ៉ាប់រងជើងទាំង២របស់ Ronaldo ស្ថិតនៅចំណាត់ថ្នាក់លេខ២ ដែលមានតម្លៃ ១៤០លាន។ក្នុងនោះដែរ តម្លៃជើងរបស់ Ronaldo នៅមានតម្លៃក្រោមតម្លៃជើងរបស់តារាស្រី Mariah Carey ដែលមានតម្លៃធានារ៉ាប់រងដល់ទៅ ៧៥០លាន។ក្នុងនោះដែរបើយើងក្រឡេកមើលទៅលើការធានារ៉ាប់រង របស់តារាស្រី ៣ នាក់ផ្សេងៗទៀត ដូចជា Janet Jackson, Jennifer Lopez និង Kim Kardashian ដែលទិញធានារ៉ាប់រងទៅលើកំប៉េះគូទ ក្នុងតម្លៃធានារ៉ាប់រងចន្លោះពី ១៩ ទៅដល់ ៤៥ លាន គឺមានតម្លៃធានារ៉ាប់រងមិនស្មើនឹងពាក់កណ្តាលតម្លៃជើងរបស់ Christiano Roanldo ផង៕

ដោយ៖ Coura
ប្រភព៖ (allianz)

June 27, 2019

បន្ទាប់ពីប្រសូតបុត្រហើយថ្មីៗ តើអ្នកម្តាយថ្មោងថ្មីគួរបរិភោគអាហារបែបណា?

ស្ត្រីដែលទើបតែឆ្លងទន្លេហើយថ្មីៗនោះ រាងកាយស្ថិតក្នុងអំឡុងពេលដែលត្រូវទទួលបានការមើលថែទាំ និងយកចិត្តទុកដាក់យ៉ាងពិសេស ដោយសារតែស្ត្រីដែលទើបនឹងប្រសូតបុត្ររួចថ្មីៗនឹងមានអាការល្វើយខ្សោយខ្លាំងណាស់ ហើយរឹតតែការប្រសូតដោយវិធីវះកាត់ផងនោះ អ្នកម្តាយនឹងមានអាការនឿយល្វើយខ្លាំងជាងការប្រសូតតាមវិធីធម្មជាតិច្រើនដងណាស់។ លេខនេះទស្សនាវដ្តី ឡារ៉ែន សូមនាំព័ត៌មានល្អៗពាក់ព័ន្ធនឹងការបរិភោគអាហារ និងការមើលថែទាំខ្លួនមកជម្រាបជូនដូចខាងក្រោម ៖

ក្នុងរយ:ពេលដំបូង បន្ទាប់ពីប្រសូតបុត្ររួច អ្នកម្តាយគួរតមការងារផ្ទះ និងការងារណាដែលធ្ងន់ៗ គួរទុកឱ្យស្វាមីធ្វើសិនទៅ។ រឿងដែលអ្នកម្តាយថ្មីថ្មោងគួរធ្វើក្នុងអំឡុងពេលសម្រាកបំប៉នរាងកាយនោះគឺ ការសម្រាកឱ្យបានច្រើនៗ ហាត់ប្រាណបែបស្រាលៗ ហើយដែលសំខាន់នោះ គឺត្រូវបរិភោគអាហារដើម្បីសុខភាពដែលសម្បូរទៅដោយវីតាមីន និងសារធាតុរ៉ែឱ្យបានគ្រប់ចំនួន។
អាហារដែលល្អ និងស័ក្តិសមសម្រាប់អ្នកម្តាយទើបនឹងសម្រាលបុត្រហើយថ្មីៗ អ្នកជំនាញការបានណែនាំថា អ្នកម្តាយគួរតែទទួលទានអាហារដែលឧត្តមសម្បូរទៅដោយសារធាតុរ៉ែ និងវីតាមីនដូចជា អាហារពពួកសាច់សត្វ ទឹកដោះ សណ្តែកសៀង ស៊ុត បន្លែ និងផ្លែឈើស្រស់គ្រប់ប្រភេទ និងអ្វីដែលសំខាន់នោះ គឺត្រូវបរិភោគអាហារឱ្យបានគ្រប់តាមតម្រូវការរបស់រាងកាយ។ចំណែកអាហារដែលអ្នកម្តាយថ្មីថ្មោងគួរតែតមទទួលទានជាដាច់ខាតនោះគឺ ពពួកអាហារប្រឡាក់ ឬផ្អាប់ អាហារត្រាំ ឬជ្រក់ផ្សេងៗ អាហារដែលមានរសជាតិខ្លាំងៗ (ហឹរ ប្រៃ ឬផ្អែមខ្លាំង) និងអាហារដែលស្ទើរឆ្អិនស្ទើរឆៅ ព្រោះអាហារទាំងនោះអាចហុចផលប៉ះពាល់ទៅដល់ទារក ជាពិសេសចំពោះអ្នកម្តាយដែលចិញ្ចឹមកូនដោយទឹកដោះខ្លួនឯង ដែលអាចនឹងធ្វើឱ្យទារករាក និងមិនសប្បាយខ្លួនបាន៕

June 27, 2019

20ឆ្នាំទៀតបដិវត្តន៍ឧស្សាហកម្មអាចប៉ះពាល់ទីផ្សារការងារប្រមាណ57% នៅកម្ពុជា

មួយរយៈពេលចុងក្រោយនេះ របត់បច្ចេកវិទ្យាបានផ្លាស់ប្តូរយ៉ាងឆាប់រហ័ស ស្របពេលដែលបដិវត្តន៍ឧស្សាហកម្មទី4 បានចូលមកដល់ ដែលធ្វើឱ្យមានការផ្លាស់ប្តូរយ៉ាងឆាប់រហ័សនូវរបៀបរបបការងារ និងអាជីពនានាលើពិភពលោក។ វត្តមានបច្ចេកវិទ្យា និងបញ្ញាសិប្បនិម្មិតនាពេលថ្មីៗនេះបានធ្វើឱ្យម៉ាស៊ីនកាន់តែឆ្លាតវៃឡើង ហើយការធ្វើការងារទាំងឡាយមានប្រសិទ្ធភាពល្អជាងមនុស្សទៀតផង ដែលវាជាចរន្តមួយធ្វើឱ្យមនុស្សអាចនឹងបាត់បង់ការងារជាច្រើនមុខនៅក្នុងអំឡុងពេលប្រមាណជាជាង 20ខាងមុខទៀត។

រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ ឯកឧត្តម ពេជ សោភ័ន បានលើកឡើងថា តាមរយៈការស្រាវជ្រាវរបស់វិទ្យាស្ថានអន្តរជាតិបានឱ្យដឹងថា នៅឆ្នាំ2030 ការងារប្រមាណ 30% នៅលើពិភពលោកនឹងប្រឈមជាមួយហានិភ័យនៃការផ្លាស់ប្តូរ ឬបាត់បង់ការងារដោយសាបដិវត្តន៍ផ្នែកឧស្សាហកម្មនេះ។ ចំពោះការងារដែលប្រឈមខ្លាំងនោះ កើតឡើងចំពោះអ្នកដែលទទួលបានការអប់រំទាប។ ក្នុងនោះដែរ អង្គការអន្តរជាតិខាងការងារ (ILO) ក៏បានបង្ហាញរបាយការណ៍ផងដែរថា តាមការប៉ាន់ប្រមាណរយៈពេល 20ឆ្នាំខាងមុខនេះ ពាក់កណ្តាលនៃពលករក្នុងប្រទេសកម្ពុជា វៀតណាម ថៃ ឥណ្ឌូនេស៊ី និងហ្វីលីពីន បើគិតជាចំនួនមនុស្សប្រមាណ 130លាននាក់នឹងប្រឈមហានិភ័យនៃការបាត់បង់ការងារ។

ឯកឧត្តម ពេជ សោភ័ន បានមានប្រសាសន៍ថា៖ “បដិវត្តន៍ឧស្សាហកម្មនឹងធ្វើឱ្យដំណើរការនៃផលិតកម្មនៅតាមបណ្តារោងចក្រសហគ្រាសទាំងអស់ប្រែក្លាយពីការប្រើប្រាស់កម្លាំងពលកម្មដោយមនុស្ស ទៅជាការប្រើប្រាស់គ្រឿងយន្តស្វ័យប្រវត្តិ ឬកម្លាំងគ្រឿងចក្រវិញ។ ILO បានប៉ាន់ប្រមាណថា ប្រសិនបើគ្មានការប្រែប្រួល ផលប៉ះពាល់នៅកម្ពុជាអាចនឹងប៉ះពាល់ដល់ 57%នៅក្នុងរយៈពេល20ឆ្នាំក្រោយ ដែលនេះជាកត្តាសំខាន់មួយដែលចាំបាច់ត្រូវមានការដោះស្រាយដោយការពង្រឹងផ្នែកអប់រំបណ្តុះបណ្តាលវិជ្ជាជីវៈ”។

ឯកឧត្តមរដ្ឋលេខាធិការក៏បានលើកឡើងផងដែរថា បច្ចុប្បន្ននេះរាជរដ្ឋាភិបាលថៃមានគោលដៅធ្វើស្វ័យប្រវត្តិកម្មលើរោងចក្រផលិតកម្ម ឬកម្មន្តសាលនៅរយៈពេល 5ឆ្នាំខាងមុខនេះ។ បញ្ហានេះក៏បានធ្វើឱ្យទីផ្សារពលកម្មនៅក្នុងប្រទេសថៃជួបបញ្ហាប្រឈមផងដែរ ដូចដែលសារព័ត៌មានបាងកកប៉ុស្តិ៍បានផ្សាយនៅឆ្នាំ2019 នេះថា មានពលករថៃប្រមាណជា 40ម៉ឺនទៅ50ម៉ឺននាក់ ក្នុងចំណោមពលករ 38លាននាក់នឹងប្រឈមនឹងហានិភ័យនៃការផ្លាស់ប្តូរការងារ។ ដោយសារតែចរន្តនេះបានធ្វើឱ្យគេប៉ាន់ប្រមាណថា នៅឆ្នាំនេះ សន្ទស្សន៍អ្នកគ្មានការងារធ្វើនៅប្រទេសថៃនឹងមានរហូតដល់ទៅ 1.3% ខណៈនៅឆ្នាំ2018 មានត្រឹមតែ 1%តែប៉ុណ្ណោះ។ ងាកមកកម្ពុជាវិញយើងក៏ចាំបាច់ត្រូវការការដោះស្រាយផងដែរ ចំពោះបញ្ហានេះ ព្រោះថា ចំពោះអ្នកសិក្សាផ្នែក TVET អាចនឹងបាត់បង់ការងារធ្វើប្រមាណ 30% ប្រសិនបើយើងមិនផ្លាស់ប្តូរវិធីក្នុងការបណ្តុះបណ្តាលទេនោះ។

ឯកឧត្តមរដ្ឋលេខាធិការើក៏បានលើកឡើងផងដែរថា បច្ចុប្បន្ននេះសូម្បីតែការផ្តល់សេវាតាក់ស៊ីសេវាធនាគារ-ហិរញ្ញវត្ថុ ការលក់-ទិញ ឬការកក់សេវាកម្មផ្សេងៗ ក៏ត្រូវបានធ្វើតាមបណ្តាញបច្ចេកវិទ្យាដែរ។ កត្តានេះបានធ្វើឱ្យការរស់នៅរបស់មនុស្សសម័យថ្មីមានភាពងាយស្រួល តែទន្ទឹមនឹងនេះក៏វាជាក្តីបារម្ភផងដែរ ចំពោះការបាត់បង់ការងារ ព្រមទាំងការបង្វែរការបណ្តាក់ទុនវិនិយោគត្រឡប់ទៅប្រទេសអភិវឌ្ឍន៍ដែលជាប្រភពដើមនៃទុនវិញដោយសារការប្រើប្រាស់បច្ចេកវិទ្យាស្វ័យប្រវត្តិកម្ម និងបញ្ញាសិប្បនិម្មិត (AI)។ ទោះជាយ៉ាងនេះក្តីរាជរដ្ឋាភិបាលកម្ពុជាក៏បានធ្វើការផ្សព្វផ្សាយ និងបញ្ចេញសកម្មភាពជាច្រើនផងដែរដើម្បីដោះស្រាយបញ្ហានេះ ដោយបានជំរុញឱ្យយុវជនជាច្រើនចាប់ផ្តើមស្វែងយល់ និងសិក្សាពីជំនាញនានាដែលអាចឆ្លើយតបបានល្អនឹងទីផ្សារការងារនាពេលអនាគត។

គួរបញ្ជាក់ផងដែរថា ទន្ទឹមនឹងក្តីព្រួយបារម្ភចំពោះបញ្ហាបច្ចេកវិទ្យាធ្វើឱ្យបាត់បង់ការងារ វាក៏ជះឥទ្ធិពលផងដែរដល់សង្គមដែលបណ្តុះបណ្តាលធនធានមនុស្សមិនស្របតាមតម្រូវការ ព្រោះពីមុនអ្នកវិនិយោគចាប់អារម្មណ៍វិនិយោគលើប្រទេសដែលមានមនុស្សច្រើនដើម្បីធ្វើការងារផលិតកម្មសម្រាប់នាំចេញ។ ហេតុនេះហើយទើបបណ្តាប្រទេសអ្នកមានជាច្រើនបានបោះទុន និងទីតាំងរោងចក្រច្រើននៅប្រទេសកំពុងអភិវឌ្ឍន៍ តែក្រោយពេលនឹងមានការផ្លាស់ប្តូររបត់នៃបច្ចេកវិទ្យានាប៉ុន្មានឆ្នាំខាងមុខនេះ គឺអាចនឹងផ្លាស់ប្តូរគំនិត ដោយងាកចំណាប់អារម្មណ៍ទៅវិនិយោគលើប្រទេសណាដែលមានធនធានមនុស្សខ្លាំងផ្នែកបច្ចេកវិទ្យា សម្រាប់គ្រប់គ្រងម៉ាស៊ីនធ្វើការងាររបស់គេឱ្យបានកាន់តែច្រើន និងមានប្រសិទ្ធភាពទៅវិញ ខណៈសារៈសំខាន់នៃកម្លាំងពលកម្មជំនាញតិច ឬគ្មានជំនាញសោះត្រូវបានកាត់បន្ថយ។ បញ្ហានេះបានជំរុញឱ្យបណ្តាប្រទេសជាច្រើនខិតខំប្រឹងប្រែងផ្លាស់ប្តូរប្រព័ន្ធនៃការអប់រំឱ្យស្របទៅនឹងបរិបទថ្មីនេះ ដើម្បីអនាគតធនធានមនុស្សផង និងដើម្បីដេញតាមតម្រូវការនៃការប្រកួតប្រជែងក្នុងបដិវត្តន៍ឧស្សាហកម្មផង៕

June 27, 2019

រដ្ឋមន្ត្រីទេសចរណ៍ក្នុងតំបន់ សន្យាជំរុញកិច្ចសហប្រតិបត្តិការ

រដ្ឋមន្ត្រីទេសចរណ៍កម្ពុជា ឡាវ មីយ៉ាន់ម៉ា ថៃនិងវៀតណាម បានព្រមព្រៀងគ្នាក្នុងកិច្ចប្រជុំសំខាន់ចំនួន2 គឺកិច្ចប្រជុំលើកទី 4 របស់រដ្ឋមន្ត្រីទេសចរណ៍ ដែលបានជំរុញកិច្ចសហប្រតិបត្តិការ ACMECS ជាពិសេសផ្នែកទេសចរណ៍ សាសនា និងម្ហូបអាហារ និងទេសចរណ៍បើកបរដោយខ្លួនឯង និងកិច្ចប្រជុំរដ្ឋមន្ត្រីទេសចរណ៍ CLMV (កម្ពុជា ឡាវ មីយ៉ាន់ម៉ា និងវៀតណាម ឬ Cambodia Laos Myanma Viet Nam) លើកទី5 ដែលរៀបចំឡើងនៅខេត្តឈៀងម៉ៃប្រទេសថៃ។ នេះបើតាមការឱ្យដឹងពីឯកឧត្ដមរដ្ឋមន្ត្រីក្រសួងទេសចរណ៍។

ឯកឧត្តម ថោង ខុន រដ្ឋមន្ត្រីទេសចរណ៍កម្ពុជាបានមានប្រសាសន៍ថា៖“កិច្ចសហប្រតិបត្តិការត្រូវផ្តោតលើទេសចរណ៍ សាសនា និងម្ហូបអាហារ។ បណ្តាប្រទេសជាសមាជិក បានកែលម្អហេដ្ឋារចនាសម្ព័ន្ធ និងការតភ្ជាប់រាងកាយរបស់ពួកគេជាមួយគ្នា ដើម្បីឆ្លើយតបទៅនឹងនិន្នាការទេសចរណ៍សកល-លោក រួមទាំងដំណើរទេសចរណ៍បើកបរដោយខ្លួនឯងនៅទូទាំងប្រទេស”។

ឯកឧត្តម ថោង ខុន ក៏បានមានប្រសាសន៍ នៅលើទំព័រហ្វេសប៊ុករបស់ក្រសួងផងដែរថា៖“ប្រទេសដែលស្ថិតនៅក្រោម CLMV និង ACMECS មានសក្តានុពលយ៉ាងខ្លាំងក្នុងវិស័យពុទ្ធសាសនា និងទេសចរណ៍ ដែលមានប្រវត្តិ និងវប្បធម៌ដ៏អស្ចារ្យ ដែលជាកត្តាសំខាន់ក្នុងការទាក់ទាញភ្ញៀវទេសចរ”។

សូមបញ្ជាក់ថា យុទ្ធសាស្ត្រកិច្ចសហប្រតិបត្តិការ សេដ្ឋកិច្ចមេគង្គ – ចៅផៈយ៉ា – មេគង្គ) (Ayeyawady-Chao Phraya-Mekong Economic Cooperation Strategy ឬ ACMECS គឺជាអង្គការនយោបាយ សេដ្ឋកិច្ច និងវប្បធម៌ដែលមានសមាសភាពពីប្រទេសថៃ ឡាវ វៀតណាម កម្ពុជា និងមីយ៉ាន់ម៉ា។ ចំណែក CLMV គឺតំណាងឱ្យប្រទេសកម្ពុជា ឡាវ ភូមា មីយ៉ាន់ម៉ា និងវៀតណាម។

រដ្ឋមន្ត្រីទេសចរណ៍ ACMEC ក៏បានអបអរសាទរកំណើនទេសចរអន្តរជាតិមកទស្សនាប្រទេសជាសមាជិក ACMECS ដែលមានចំនួន 67.71លាននាក់ ក្នុងឆ្នាំ2018 កើនឡើង 10.61%បើធៀបនឹងឆ្នាំ2017។ យោងតាមក្រសួងទេសចរណ៍បានឱ្យដឹងថា ចំនួនអ្នកទេសចរក្នុងប្រទេស CLMV មានចំនួនសរុប 29.44លាននាក់ កើនឡើង 13.96%។ ទេសចរណ៍ផ្ទៃក្នុង CLMV (Intra-CLMV Traveler) មាន ២.៥៨លាននាក់ ស្នើនឹង 9% នៃទេសចរអន្តរជាតិសរុប។

ឯកឧត្ដមរដ្ឋមន្ត្រីបានលើកឡើងទៀតថា ប្រទេសសមាជិកទាំងអស់មានសក្តានុពលផ្នែកព្រះពុទ្ធសាសនា ម្ហូបអាហារប្រកបលក្ខណៈពិសេស បង្ហាញអំពីអរិយធម៌ វប្បធម៌ ការរស់នៅស្រដៀងៗគ្នា ដែលកត្តាទាំងនេះ គឺជាភាពទាក់ទាញទេសចរដ៏សំខាន់ ឆ្លើយតបនឹងនិន្នាការទេសចរណ៍បច្ចុប្បន្ន ព្រមទាំងចូលរួមដល់ការលើកកម្ពស់វិស័យព្រះពុទ្ធសាសនាដែលជាកេរដំណែលរបស់មនុស្សជាតិផងដែរ។

ទន្ទឹមនឹងនេះ ប្រទេសជាសមាជិកមានការអភិវឌ្ឍហេដ្ឋារចនាសម្ព័ន្ធផ្លូវថ្នល់ដែលតភ្ជាប់គ្នាទៅវិញទៅមករវាងប្រទេស ACMEC និង CLMV បានកាន់តែប្រសើរឡើង ដែលនឹងអាចចូលរួមជំរុញវិស័យទេសចរណ៍បើកបរដោយខ្លួនឯង (Self-Driving Tour) កាន់តែខ្លាំងក្លាថែមទៀត ឆ្លើយតបនឹងនិន្នាការទេសចរណ៍សកលលោក ដែលការបើកបរដោយខ្លួនឯងឆ្លងពីប្រទេសមួយទៅប្រទេសមួយទៀតនេះកំពុងតែទទួលបានការពេញនិយម។

ឯកឧត្តម ថោង ខុន ក៏បានឱ្យដឹងដែរថា៖“នៅក្នុងកិច្ចប្រជុំ រដ្ឋមន្ត្រីទេសចរណ៍បានព្រមព្រៀងគ្នាបង្កើតផែនការសកម្មភាពស្តីពីកិច្ចសហប្រតិបត្តិការទេសចរណ៍គ្របដណ្តប់ឆ្នាំ2019-2023 ដែលនឹងផ្តោតលើការតភ្ជាប់រវាងផ្លូវ និងច្រករបៀង ក៏ដូចជាសកម្មភាពទីផ្សារ និងទេសចរណ៍ប្រកបដោយចីរភាព”។

រដ្ឋមន្ត្រីទេសចរណ៍ CLMV ក៏បានឯកភាពគ្នាបន្តជំរុញការផ្សព្វផ្សាយឱ្យបានកាន់តែខ្លាំងថែមទៀត ដោយបានដាក់ចេញនូវផែនការសកម្មភាពនៃកិច្ចសហប្រតិបត្តិការទេសចរណ៍ CLMV ឆ្នាំ2019-2021ក្នុងនោះរួមមានសកម្មភាពសំខាន់ ដូចជា៖ 1-ការសម្រួលការធ្វើដំណើរក្នុងតំបន់។ 2-ការកសាងសមត្ថភាព។ 3- ជំរុញការចូលរួមពីភាគីឯកជន និងប្រជាពលរដ្ឋមូលដ្ឋាន។ 4- ការអភិវឌ្ឍផលិតផលទេសចរណ៍ថ្មី និង5-ជំរុញសុវត្ថិភាពទេសចរណ៍។

កិច្ចប្រជុំក៏បានព្រមព្រៀងលើកកម្ពស់កិច្ចសហប្រតិបត្ដិការទេសចរណ៍បន្ថែមទៀតនៅក្រោមកម្មវិធីទិសដៅ 4ប្រទេស“ប្រទេស4 គោលដៅតែ1” ដោយមានគោលដៅសម្រួលដល់ការធ្វើ ដំណើរ បង្កើតផលិតផលទេសចរណ៍ថ្មី លើកកម្ពស់សុវត្ថិភាពអ្នកទេសចរ និងបង្កើនកិច្ចសហប្រតិបត្តិការជាមួយវិស័យឯកជន៕

June 27, 2019

ក្លិបលីគកំពូលបារាំងចំនួន៣ កំពុងប្រជែងគ្នាយកយុវជន១៣ឆ្នាំមួយរូប របស់កម្ពុជា

យុវជនកម្ពុជា ជៀន ហ្វីលីព ដែលមានវ័យ១៣ឆ្នាំ បច្ចុប្បន្នកំពុងហាត់ជាមួយក្រុម F.C.M GARGES នៅបារាំង មានទម្រង់លេងយ៉ាងល្អនៅប្រទេសបារាំង ដែលកំពុងធ្វើអោយក្លិបយក្សរបស់លីគកំពូលបារាំងចំនួន៣ មានការចាប់អារម្មណ៍ និងកំពុងទាក់ទងមកកាន់រូបគេ។ក្លិបនៅលីគកំពូលប្រទេសបារាំងដែលកំពុងមានការចាប់អារម្មណ៍មកលើកីឡាកររូបនេះ មានដូចជា Stade De REIMS, Nantes និង Lille ដែលកំពុងតែមានវត្តមាននៅក្នុងលីគកំពូលរបស់បារាំង។

ថ្វីត្បិតតែមានការចាប់អារម្មណ៍ពីសំណាក់ក្លិបអាជីពជាច្រើនមែនពិត តែពុករបស់គេឈ្មោះថា សឹង សុភ័ណ្ឌ (ហៅដឺ) មានស្រុកកំណើតនៅភូមិស្វាយគយ ឃុំពន្លៃ ស្រុកបរិបូណ៌ ខេត្តកំពង់ឆ្នាំង បាននឹងកំពុងពិចារណាចំពោះអនាគតរបស់កូនខ្លួន ថាតើគួរទៅលេងនៅឯណា នៅពេលមានក្លឹបច្រើនចង់បានដូច្នេះ។ ស្របពេល ហ្វីលីព វិញនៅក្មេង ខ្លាចគេ មិនទាន់រឹងមាំ និងសាមីខ្លួនមិនចង់រស់នៅឆ្ងាយពីគ្រួសារនៅឡើយ។ ប្រសិនបើ រូបគេបន្ដធ្វើបានយ៉ាងល្អដូច្នេះទៀត ហើយអាចមានឱកាសបានទៅហ្វឹកហាត់ជាមួយក្រុមធំៗ អនាគតប្រាកដជាល្អមិនខាន។

June 27, 2019

កីឡា៥ប្រភេទរបស់កម្ពុជា ត្រៀមចូលរួមក្នុងកម្មវិធី ASEAN School Games 2019

ព្រឹត្តិការណ៍ 11th ASEAN School Games 2019 នឹងប្រព្រឹត្តចាប់ពីថ្ងៃទី១៧ ដល់ថ្ងៃទី២៥ ខែកក្កដា ឆ្នាំ២០១៩ នៅទីក្រុង Semareng (ជ្វាកណ្តាល) ប្រទេសឥណ្ឌូនេស៊ី ដែលព្រឹត្តិការណ៍ដដែលនេះ មានកីឡាចំនួន ៩ប្រភេទដាក់ឲ្យប្រកួតប្រជែង ដូចជាអត្តពលិកម្ម, វាយសី, បាល់បោះ, សីដក់, ហែលទឹក, វាយកូនបាល់, វាយកូនឃ្លីលើតុ, បាល់ទះ និង Pencak Silat។ក្នុងព្រឹត្តិការណ៍នេះកម្ពុជា និងចូលរួមផងដែរដោយ ត្រៀមបញ្ជូនអត្តពលិក និង គ្រូបង្វឹកចំនួន ៤៣រូប ចូលរួមក្នុងកម្មវិធីនេះ ដោយនឹងចូលរួមប្រកួតក្នុងកីឡាចំនួន៥ ដែលមានដូចជា កីឡាវាយកូនឃ្លីលើតុ កីឡាអត្តពលកម្ម កីឡាហែលទឹក កីឡាវាយសី និង កីឡាវាយកូនបាល់។ព្រឹត្តិការណ៍នេះមានប្រទេសចំនួន ១០ចូលរួម រួមមានម្ចាស់ផ្ទះឥណ្ឌូនេស៊ី, ថៃ, វៀតណាម, ម៉ាឡេស៊ី, មីយ៉ាន់ម៉ា, កម្ពុជា, ព្រុយណេ, ឡាវ, ហ្វីលីពីន និងសិង្ហបុរី ខណៈទីម័រខាងកើត ពុំមានវត្តមានឡើយ។

June 27, 2019

Author: ធឿន មករា