ធឿន មករា - La Reine Media

ហ្វាំងឡង់ មិនត្រឹមតែមានប្រព័ន្ធអប់រំល្អទេ តែថែមទាំងជាប្រទេសមានសុភមង្គលបំផុតលើលោក

កាលពីឆ្នាំមុន ហ្វាំងឡង់បានក្លាយជាប្រទេសដ៏ល្បីល្បាញមួយផ្នែកអប់រំ ដែលពិភពលោកស្ងើចសរសើរព្រោះប្រទេសនេះបានទទួលចំណាត់ថ្នាក់លេខ1 ផ្នែកអប់រំ។ នៅឆ្នាំ 2019 នេះប្រទេសហ្វាំងឡង់បានបង្កើតកំណត់ត្រាល្អបំផុតថ្មីមួយទៀតរបស់ខ្លួន គឺបានក្លាយជាប្រទេសដែលប្រជាជនមានសេចក្តីសុខបំផុតលើពិភពលោក។នេះបើយោងតាមរបាយការណ៍សុភមង្គលពិភពលោកប្រចាំឆ្នាំ2019 (WorldHappiness Report 2019)។

ហ្វាំងឡង់ ហាក់ដូចជាប្រទេសអច្ឆរិយៈមួយដែលអាចអភិវឌ្ឍខ្លួនបានល្អឥតខ្ចោះពីប្រទេសដែលមានមនុស្សធ្វើអត្តឃាតលំដាប់ថ្នាក់លេខ2 លើពិភពលោកកាលពីប្រមាណជាង 20ឆ្នាំមុន មកជាប្រទេសដែលប្រជាជនមានភាពរីករាយបំផុត។ ការប្រែក្លាយស្ថានភាពបែបនេះ មិនមែនជារឿងងាយនោះទេ តែវាបានកើតឡើងហើយសម្រាប់ប្រទេសមួយនេះ។

មូលហេតុសំខាន់ដែលធ្វើឱ្យមានការកែប្រែប្រកបដោយប្រសិទ្ធភាពខ្ពស់នេះ គឺរដ្ឋាភិបាលបានចាប់ផ្តើមយកចិត្តទុកដាក់ខ្លាំងលើការអប់រំមនុស្ស ទាំងការអប់រំចំណេះជំនាញ និងការអប់រំពីវិធីសាស្ត្ររស់នៅប្រកបដោយភាពស្ងប់សុខ។ ការអប់រំដោយមិនដាក់សម្ពាធ ហើយផ្តល់ឱកាសឱ្យក្មេងៗស្វែងយល់ពីស្ថានភាពជាក់ស្តែងនៃជីវិត និងសិក្សាតាមក្តីស្រឡាញ់ត្រូវបានគេដាក់ឱ្យអនុវត្តនៅគ្រប់គ្រឹះស្ថានអប់រំទាំងអស់នៅក្នុងប្រទេស។ លើសពីនេះទៅទៀត ស្ថាប័នអប់រំរបស់ប្រទេសនេះ ក៏បានបង្រៀនមនុស្សឱ្យចាប់ផ្តើមចេះសហការល្អ និងកាត់បន្ថយការប្រកួតប្រជែង ដែលធ្វើឱ្យមនុស្សចាប់ផ្តើមមានស្មារតីចេះជួយគ្នាកាន់តែច្រើនឡើង និងមិនចង់មានចង់បានហួសហេតុ រហូតដល់កេងប្រវ័ញ្ចគ្នាទៀតផង។

បន្ទាប់ពីការអប់រំ ប្រជាជននៅប្រទេសហ្វាំងឡង់ ចាប់ផ្តើមចេះស្វែងរកសេចក្តីសុខជាមួយធម្មជាតិ ហើយរីករាយជាមួយនឹងអាកាសធាតុត្រជាក់ក្នុងសហគមន៍របស់ពួកគេ។ ប្រជាជនចេះសម្របខ្លួនបានល្អ ហើយថែរក្សាធម្មជាតិ ដែលធ្វើឱ្យបរិស្ថានជុំវិញខ្លួនពោរពេញដោយភាពស្រស់ស្រាយ និងគ្មានការបំផ្លិចបំផ្លាញធម្មជាតិដើម្បីអភិវឌ្ឍន៍ឡើយ ព្រោះពួកគេយល់ថា ការអភិវឌ្ឍ គឺដើម្បីសេចក្តីសុខ ហេតុនេះប្រសិនបើគេស្រឡាញ់ធម្មជាតិ ការថែរក្សាទ្រង់ទ្រាយដើមនៃធម្មជាតិ គឺជាសេចក្តីសុខដែលគ្មានអ្វីមកជំនួសបានឡើយ។

ក្រៅពីនេះ អ្វីដែលប្រទេសដ៏អស្ចារ្យនេះអាចធ្វើបាន គឺការពង្រឹងប្រសិទ្ធភាពនៃការបម្រើសេវាសាធារណៈ ដោយការកាត់បន្ថយអំពើពុករលួយជាអតិបរមា ហើយផ្តល់ជូននូវសេវាសាធារណៈល្អឥតខ្ចោះដែលសូម្បីតែសេវាឯកជននៃប្រទេសមួយចំនួនក៏មិនអាចធ្វើបានល្អដូចផង។ ចាប់ផ្តើមពីភាពប្រសើរឡើងនៃសេវាសាធារណៈធ្វើឱ្យប្រជាជនចាប់ផ្តើមជឿទុកចិត្តកាន់តែខ្លាំងលើរដ្ឋបាលតំបន់របស់គេ ហើយរីករាយសហការដើម្បីផ្តល់ពន្ធ បើទោះបីជាពន្ធលើផ្នែកខ្លះមានតម្លៃថ្លៃក៏ដោយ ជាពិសេសពន្ធលើប្រព័ន្ធសន្តិសុខសង្គម។

បន្តិចម្តងៗ ប្រជាជននៃប្រទេសហ្វាំងឡង់ចាប់ផ្តើមទម្លាប់រស់នៅដោយភាពស្កប់ស្កល់ និងឈានជំហានជាបន្តបន្ទាប់ទៅជួយអ្នកដទៃឱ្យបានច្រើនថែមទៀត។ ប្រជាជនមិនសូវខ្វល់ពីផលប្រយោជន៍ផ្ទាល់ខ្លួននោះទេ តែគេមានទម្លាប់ជួយគ្នា និងថែរក្សាសម្បត្តិសាធារណៈបានល្អ។

គួរបញ្ជាក់ផងដែរថា របាយការណ៍សុភមង្គលពិភពលោកប្រចាំឆ្នាំ2019 (World Happiness Report2019) បានវាយតម្លៃប្រទេសនីមួយៗលើពិភពលោកដោយផ្តោតលើចំណុចសំខាន់មួយចំនួនដូចជា ប្រាក់ចំណូលរបស់ប្រជាជន សេរីភាព ការជឿទុកចិត្ត សុខភាព និងអាយុសង្ឃឹមរស់ (life expectancy) ការគាំទ្រពីសង្គម និងសមភាពយេនឌ័រក្នុងសង្គម។

នៅក្នុងតារាងប្រទេសដែលមានសុភមង្គលបំផុតលើពិភពលោកនៅឆ្នាំនេះ គឺប្រទេសហ្វាំងឡង់ឈរនៅលំដាប់ថ្នាក់លេខ1។ ប្រទេសដាណឺម៉ាកឈរនៅលំដាប់ថ្នាក់លេខ2 ន័រវេយ៍ឈរនៅលំដាប់ថ្នាក់លេខ3 អៀកឡង់ឈរនៅលំដាប់ថ្នាក់លេខ4 ប្រទេសហូឡង់ឈរនៅលំដាប់ថ្នាក់លេខ5 ប្រទេសស្វ៊ីសស្ថិតនៅលំដាប់ថ្នាក់លេខ6 និងប្រទេសស៊ុយអែតស្ថិតនៅលំដាប់ថ្នាក់លេខ7៕

July 1, 2019

វិធីធ្វើឱ្យទារកទើបនឹងកើត ឆាប់ចំណាំមុខឪពុកម្តាយ

តើប្រិយមិត្តអ្នកអាន និងប្អូនៗដែលជាអ្នកម្ដាយថ្មោងថ្មីធ្លាប់នឹកឆ្ងល់ដែរទេថា តើទារកដែលទើបនឹងកើតអាចសម្លឹងមើលបានឆ្ងាយប៉ុនណា? និងតើទារកចូលចិត្តសម្លឹងមើលអ្វីជាពិសេសដែរឬទេ? លេខនេះអ្នកគ្រូ ឆវី មានលទ្ធផលនៃការស្រាវជ្រាវវិភាគមួយដែលនឹងបកស្រាយបញ្ជាក់ប្រាប់យើងអំពីចម្ងល់ទាំងអស់ខាងលើនេះបានដូចតទៅ ៖

បន្ទាប់ពីទារកបានប្រសូតចេញមកហើយ ជាប្រក្រតីទារកអាចសម្លឹងឃើញវត្ថុផ្សេងៗបានក្នុងចម្ងាយ 1ហ៊្វុត(ប្រមាណជាកន្លះម៉ែត្រ) និងអាចសម្លឹងមើលមួយកន្លែងបានយូរប្រមាណជា 4–10វិនាទី ហើយការវិវឌ្ឍទៅមុខនៃការមើលឃើញរបស់ទារកនោះអាចរៀបរៀងជាដំណាក់កាលបានដូចតទៅ ៖ទារកទើបនឹងកើតអាចចំណាំមុខឪពុកម្តាយបានក្រោយពេលកើត 4ថ្ងៃ។លុះអាយុបាន1ខែ ទារកអាចមើលឃើញរបស់របរផ្សេងៗបានក្នុងចម្ងាយ 15អុីញ(ប្រមាណជិត 4តឹក) ហើយដៃចាប់ផ្តើមឈោងទៅប៉ះវត្ថុដែលខ្លួនមើលឃើញនោះ។ពេលទារកអាយុបាន3ខែ ចាប់ផ្តើមចេះបែងចែករយៈចម្ងាយ ឆ្ងាយ-ជិតបាន ហើយពេលអាយុ4ខែ ទារកអាចសម្រួលការមើលឃើញរបស់ខ្លួនបានយ៉ាងពេញលេញ។

សំនួរដែលជួបប្រទះញឹកញាប់ : តើទារកចូលចិត្តសម្លឹងមើលអ្វីខ្លាំងបំផុត?
មានលទ្ធផលនៃការស្រាវជ្រាវវិភាគរបស់ Dr. Robert Fantz អ្នកស្រាវជ្រាវផ្នែកការប្រព្រឹត្តរបស់ទារកដែលបានសិក្សាអំពីរឿងថា តើទារកចូលចិត្តសម្លឹងមើលអ្វី និងបានធ្វើការសាកល្បងរហូតទទួលបានលទ្ធផលដ៏គួរឱ្យចាប់អារម្មណ៍ដូចតទៅ ៖
1. ទារក ចូលចិត្តសម្លឹងផ្ទៃមុខរបស់ឪពុកម្តាយដែលបង្ហាញនូវសេចក្តីស្រឡាញ់ ភាពទន់ភ្លន់ ព្រោះពេលដែលទារកសម្លឹងមើលនោះ ទារកនឹងសម្លឹងត្រង់ចំកែវភ្នែករបស់ឪពុក និងម្តាយ ព្រោះស្នាមញញឹម និងខ្សែភ្នែកដ៏ស្រទន់របស់ឪពុកម្តាយបានបង្កើតនូវភាពកក់ក្តៅដល់ទារក។
2. ទារកចូលចិត្តសម្លឹងមើលវត្ថុដែលមានចលនាច្រើនជាងវត្ថុដែលនៅស្ងៀមមួយកន្លែង។
3. ទារកចូលចិត្តសម្លឹងមើលវត្ថុដែលមានពណ៌ផ្ទុយគ្នាយ៉ាងច្បាស់ៗ ដូចជា ពណ៌សផ្ទុយគ្នានឹងពណ៌ខ្មៅ ជាដើម។

តើយើងអាចជួយជំរុញការវិវឌ្ឍប្រព័ន្ធការមើលឃើញរបស់កូនតូចបានតាមរបៀបណា?
តិចនិកងាយៗដែលឪពុកម្តាយអាចជួយជំរុញការវិវឌ្ឍការមើលឃើញរបស់កូនបាន មានដូចខាងក្រោម ៖
1. ព្យាយាមមើលមុខកូនឱ្យបានញឹកញាប់ ព្រោះកែវភ្នែករបស់មនុស្សមានរាងមូល និងមានភាពផ្ទុយគ្នាយ៉ាងច្បាស់រវាងភ្នែកពណ៌ស និងប្រស្រីភ្នែកពណ៌ខ្មៅ ហើយអ្វីដែលសំខាន់បំផុតនោះគឺ កែវភ្នែកអាចរំកិលទៅឆ្វេង ស្តាំ លើក្រោមបានទៀតផង។
2. ផ្លាស់ប្ដូរឥរិយាបថដំណេករបស់កូន ដើម្បីឱ្យទារកបានមើលឃើញសភាពជុំវិញខ្លួនដែលមានការប្រែប្រួល។
3. រករូបថតមុខឪពុកម្តាយមកដាក់ក្បែរៗកន្លែងគេងរបស់កូន ដើម្បីឱ្យកូនបានមើលឃើញនិងចំណាំមុខបានកាន់តែឆាប់ឡើង។
4. ព្យួររបស់ផ្សេងៗដូចជា រូបបក្សីក្រដាសជាដើម នៅក្នុងទីតាំងដែលទារកអាចមើលឃើញនិងលូកដៃចាប់ប៉ះបាន។
5. ព្យាយាមលេងជាមួយកូនឱ្យបានញឹកញាប់ដូចជាឱ្យកូនមើលរូបខ្លួនឯងនៅក្នុងកញ្ចក់ ព្រមទាំងនិយាយលេងជាមួយកូនផង។ហ្វឹកហាត់ការមើលឃើញដល់កូនតាំងពីកំណើតបែបនេះ ដល់ពេលធំឡើងកូននឹងក្លាយជាមនុស្សដែលមានខ្សែភ្នែកមុតស្រួចមិនខាន។ ដោយបំណង និងក្តីប្រាថ្នាដ៏ល្អ ពីអ្នកគ្រូ ឆវី និងទស្សនាវដ្តី ឡារ៉ែន៕

July 1, 2019

អ្នកជំនាញកសិកម្មចង់ឱ្យពលរដ្ឋដាំបន្លែតាមផ្ទះដើម្បីលើកកម្ពស់សុខភាពខ្លួនឯង

ដោយជាប់បំពេញការងារនៅតាមការិយាល័យ ការងារជួញដូរ ក៏ដូចជាការធ្វើអាជីវកម្មប្រកបរបរចិញ្ចឹមជីវិតផ្សេងៗ បានធ្វើឱ្យប្រជាពលរដ្ឋជាច្រើនបានឃ្លាតចេញពីការងារកសិកម្មកាន់តែច្រើនឡើងៗពីមួយថ្ងៃទៅមួយថ្ងៃដោយមិនដឹងខ្លួន នេះបើតាមការលើកឡើងរបស់ស្ថាបនិកអង្គការសេដាក។

លោក យ៉ង សាំងកុមារ ទីប្រឹក្សាកសិកម្ម និងជាស្ថាបនិកអង្គការសេដាកមានប្រសាសន៍ថា និន្នាការនៃការចាកចេញពីការងារកសិកម្មកាន់តែច្រើននេះ មិនមែនមានតែនៅក្នុងប្រទេសកម្ពុជាយើងនោះទេ តែជានិន្នាការសកលនៅទូទាំងពិភពលោកតែម្តង ដោយហេតុថាការងារកសិកម្ម កសិករមិនសូវរកប្រាក់កម្រៃបានច្រើន ខណៈដែលសេដ្ឋកិច្ចកាន់តែរីកចម្រើន មនុស្សចេះតែធ្វើចំណាកស្រុករកការងារធ្វើ ទៅតាមការិយាល័យ ការងារសំណង់ ក៍ដូចជាការប្រកបរបរជួញដូរផ្សេងៗទៀត។

ទោះជាមានការងារធ្វើ ទទួលបានប្រាក់កម្រៃច្រើនក៏ដោយ ប៉ុន្តែពលរដ្ឋគួរចំណាយពេលរៀបចំសួនដាំបន្លែនៅតាមផ្ទះ ឱ្យបានគ្រប់គ្នាៗ បើសិនជាមានដីសេសសល់ឬអាចរៀបចំសួនដាំលើដំបូលផ្ទះក៏បាន។ ការដាំបន្លែនៅតាមផ្ទះ វាបានផ្តល់នូវអត្ថប្រយោជន៍ជាច្រើនសម្រាប់គ្រួសារនីមួយៗ ពិសេសប្រជាពលរដ្ឋរស់នៅក្រុងភ្នំពេញ។ អត្ថប្រយោជន៍នៅត្រង់ថា នៅពេលគាត់ឆ្លៀតពេលមួយម៉ោង ក្រោយពេលចេញពីធ្វើការឬមុនពេលទៅធ្វើការ មករៀបចំសួននៅតាមផ្ទះសម្រាប់ដាំបន្លែ គឺយើងបានបញ្ចេញកម្លាំងពលកម្ម បញ្ចេញញើសបញ្ចេញជាតិពុលចេញពីក្នុងខ្លួន ប្រៀបដូចការធ្វើលំហាត់ប្រាណ ដើម្បីទទួលបានសុខភាពល្អផងដែរ ហើយចំណាយពេលមួយថ្ងៃកន្លះម៉ោង ឬមួយម៉ោងសម្រាប់ធ្វើការថែទាំដាក់ជីស្រោចទឹករៀងរាល់ថ្ងៃ ភ្លេចៗខ្លួនយើងទទួលបានបន្លែហូបនៅផ្ទះខ្លួនឯង មិនបាច់ចំណាយលុយទិញនៅផ្សារ អស់លុយហើយចង់មិនចង់ ទិញចំបន្លែមិនមានសុវត្ថិភាព ឬទិញមិនបានបន្លែសរីរាង្គមកទទួលទាន អស់លុយហើយបន្លែមិនឆ្ងាញ់ ឬប៉ះចំបន្លែគីមីប៉ះពាល់សុខភាពទៀតផង។

ប្រាកដណាស់ បើសិនជាទិញបន្លែតាមផ្សារខាងក្រៅនានា ក្នុងក្រុងភ្នំពេញ ភាគច្រើនជាបន្លែមានសារធាតុគីមី បន្លែមិនមានសុវត្ថិភាព នាំចូលមកពីទីផ្សារក្រៅប្រទេស ជាពិសេសនាំចូលពីប្រទេសជិតខាង ដូចជាប្រទេសថៃ និងវៀតណាមជាដើម ឬជាបន្លែផលិតក្នុងស្រុកដែលគ្មានការត្រួតពិនិត្យពីមន្ត្រីជំនាញកសិកម្ម។ បន្លែសុវត្ថិភាពឬបន្លែសរីរាង្គ ត្រូវគេរកទិញបាននៅតាមតែផ្សារបន្លែសរីរាង្គ ឬផ្សារទំនើបមួយចំនួនប៉ុណ្ណោះនៅក្នុងក្រុងភ្នំពេញ។ លោកថាដើម្បីចៀសវាងការចំណាយប្រាក់ទិញបន្លែនៅខាងក្រៅ ប្រជាពលរដ្ឋគួរលៃលកដីនៅសល់ក្បែរផ្ទះ រៀបចំសួនបន្លែ ហើយរកល្បាយដីពីជនបទមកដាំនៅលើដំបូលផ្ទះដោយខ្លួនឯងក៏បាន ដែលជាកត្តាធ្វើឱ្យគ្រួសារ ទទួលបានផលចំណេញច្រើននឹកស្មានមិនដល់។ អត្ថប្រយោជន៍គ្រួសារដូចជា មិនចំណាយប្រាក់ទិញ បន្លែនៅផ្សារ ហើយទទួលបានបន្លែឆ្ងាញ់បន្លែធម្មជាតិពិតៗ ជួយឱ្យសុខភាពយើងល្អប្រសើរឡើងទៀតផង។

ដោយមើលឃើញតម្រូវការបន្លែធម្មជាតិ ទទួលទានសម្រាប់សុខភាពល្អ ស្ថាបនិកអង្គការសេដាកខាងលើ បានរៀបចំដីកសិកម្មចំនួន45ហិកតា នៅស្រុកត្រាំកក់ ខេត្តតាកែវ ដើម្បីពុះឡូត៍លក់ទៅឱ្យអតិថិជន នៅក្នុងក្រុងភ្នំពេញ។ ពុះឡូត៍នោះមិនមែនសម្រាប់សាងសង់ផ្ទះរស់នៅដូចដីឡូត៍ នៅជាយក្រុងនោះទេ ការពុះឡូត៍នោះមានទំហំ 20×40ម៉ែត្រ បង់រំលស់មួយខែ120ទៅដល់150ដុល្លារ សម្រាប់រៀបចំសួនដាំបន្លែ ដោយមានអ្នកថែទាំនៅទីនោះស្រាប់។គ្រាន់តែទិញដីពុះឡូត៍នោះ អតិថិជនចំណាយប្រាក់បង់ប្រចាំខែប្រហែលមួយឆ្នាំប៉ុណ្ណោះ នឹងបានផលជាបន្លែត្រឡប់មកវិញ ពោលគឺបន្ទាប់ពីមួយឆ្នាំក្រោយមក បន្លែនឹងចាប់ផ្តើមឱ្យផល អាចបេះយកមកទទួលទានគ្រួសារផ្ទាល់ខ្លួនផង ប្រមូលផលយកមកលក់បន្តឱ្យអ្នកជិតខាងយើងបានផង។

ក្នុងបរិមាណដីទំហំ20ម៉ែត្រគុណនឹង40ម៉ែត្រនោះ អតិថិជនអាចជ្រើសរើសបន្លែដែលខ្លួនពេញចិត្តសម្រាប់ដាំ តិចបំផុតឱ្យបានចាប់ពី10មុខឡើងទៅ ដោយនៅតាមរងសងខាងភាគច្រើនគេដាំស្តៅ និងម្រុំ ល្ហុង ចេក ស្រកានាគ ត្រសក់ សណ្តែកកួរ ដើមពោតបារាំងឬហៅថាដើមអូក្រា ស្លឹកគ្រៃ រំដេង រមៀត ខ្ញី ខ្ទឹមជាដើម។ល។ ក្រោយពីដំណាំទាំងនេះទទួលបានផលហើយ លោកបានរៀបចំរថយន្តដឹកយកមកដាក់ ទុកនៅផ្សារសេដាក ក្នុងខណ្ឌទួលគោកក្រុងភ្នំពេញជារៀងរាល់សប្តាហ៍ ដើម្បីឱ្យម្ចាស់សួនបន្លែនីមួយៗទៅយកមកទទួលទាន ឬសម្រាប់លក់បន្តទៅឱ្យអ្នកជិតខាង ឬលក់នៅតាមផ្សារបន្លែសរីរាង្គផ្សេងៗក៏បាន។

ហើយលើសពីនេះ លោកតែងរៀបចំដំណើរកម្សាន្តកសិទេសចរណ៍ ជាមួយសមាជិកសហគមន៍ជារៀងរាល់ខែ ដោយជួលរថយន្តក្រុង ដឹកសមាជិកទាំងអស់ទៅលេងចម្ការ បេះបន្លែផ្លែឈើ ស្ទូចត្រីធ្វើម្ហូបអាហារទទួលទានលក្ខណៈជាក្រុម ជារៀងរាល់ខែទៀតផង។ ព្រោះថាបរិមាណដីទំហុំ45ហិកតានេះ លោកកាត់យកពាក់កណ្តាលប៉ុណ្ណោះសម្រាប់ពុះឡូត៍ លក់ជូនអតិថិជនសម្រាប់ធ្វើដំណាំកសិកម្មនេះ នៅសល់ពាក់កណ្តាល លោកទុកសម្រាប់ជីកស្រះចិញ្ចឹមត្រី មានទាំងត្រីធម្មជាតិ មានទាំងត្រីផ្តល់ចំណីធម្មជាតិថែមទៀត ដែលសមាជិកអាចទៅស្ទូចយកមកធ្វើម្ហូបបាន ដោយមិនគិតលុយ ហើយសម្រាប់អ្នកមិនមែនជាសមាជិកក៏ទៅស្ទូចបានដែរ តែត្រូវបង់លុយខ្លះឱ្យថ្លៃពលកម្មអ្នកថែទាំទីនោះ។ នៅសល់ពីការធ្វើស្រះចិញ្ចឹមត្រី លោកទុកដីដាំព្រៃឈើបន្ថែមពីព្រៃធម្មជាតិ ធ្វើផ្លូវកាត់ព្រៃនីមួយៗឱ្យស្អាត សម្រាប់ធ្វើដំណើរកម្សាន្តក្នុងព្រៃ ដោយដាំដើមឈើអមសងខាងផ្លូវ ផ្លូវខ្លះដាំដើមក្ងោកសុទ្ធ ផ្លូវខ្លះដាំដើមអង្គាបុស្សសុទ្ឋ ដើមរំដួលដើមលឿងរាជ ដើមកកោះ បេង ក្រញូង និងដើមឈើរផ្សេងៗទៀត។

គួរបញ្ជាក់ថា សម្រាប់គម្រោងនេះបានចាប់ផ្តើមប្រមាណជា2ទៅ3ខែប៉ុណ្ណោះ មានអតិថិជនគ្រាំទ្រទិញអស់ប្រមាណជា 100ឡូត៍រួចទៅហើយ ហើយនៅសល់ប្រមាណជា50ឡូត៍ទៀតប៉ុណ្ណោះ។ ដើម្បីឱ្យគ្រួសារមានសុខភាពល្អ ពលរដ្ឋគួរទិញសួនបន្លែនេះ ទុកដាំដំណាំ ព្រោះថាយើងចំណាយប្រាក់តែមួយឆ្នាំដំបូងប៉ុណ្ណោះ ចាប់ពីឆ្នាំទី2យើង អាចបានបន្លែទទួលទានខ្លួនឯង ហើយលក់បានប្រាក់កម្រៃ សម្រាប់បង់ថ្លៃដីប្រចាំខែវិញហើយ៕

July 1, 2019

វិនិយោគិនបរទេសកំពុងចាប់យកឱកាសវិនិយោគលើវិស័យអចលនទ្រព្យ សំណង់ និងទីផ្សារស្ថាបត្យកម្ម

ស្របពេលប្រទេសកម្ពុជាកំពុងទទួលបានការអភិវឌ្ឍយ៉ាងលោតផ្លោះលើវិស័យសំណង់ និងអចលនទ្រព្យ វិនិយោគិនដែលកំពុងចាប់យកឱកាសវិនិយោគលើវិស័យនេះកំពុងទទួលបានប្រាក់ចំណេញខ្ពស់ រួមទាំងរួមចំណែកធ្វើឱ្យមានកំណើនសេដ្ឋកិច្ច និងការកើនឡើងនៃប្រាក់ចំណូលរបស់ប្រជាពលរដ្ឋ ដែលជាចលករជួយជំរុញការវិនិយោគលើគម្រោងនានាឱ្យនៅតែបន្តធ្វើឱ្យការពង្រីកមូលដ្ឋានអាជីវកម្មរបស់ពួកគេលើវិស័យនេះ (Investment Fund) កាន់តែមានភាពរឹងមាំខ្លាំងឡើង។

ជាមួយគ្នានេះដែរនៅត្រឹមពាក់កណ្តាលឆ្នាំ2019 នេះ វិស័យសំណង់ និងអចលនទ្រព្យនៅកម្ពុជាមានអ្នកវិនិយោគអន្តរជាតិចូលមកសិក្សា និងរកឱកាសវិនិយោគកាន់តែច្រើន ដែលក្នុងនោះមាន ដូចជាក្រុមហ៊ុនមកពីប្រទេសចិន ជប៉ុន និងកូរ៉េជាដើម ដែលគេរំពឹងថា នឹងមានវត្តមានក្រុមហ៊ុនបរទេសថ្មីៗចូលមកបន្ថែមទៀតនៅកម្ពុជា និងកាន់តែជួយជំរុញឱ្យវិស័យមួយនេះមានការអភិវឌ្ឍកាន់ខ្លាំងក្លា។

របាយការណ៍របស់ក្រសួងរៀបចំដែនដី នគរូបនីយកម្ម និងសំណង់បានបង្ហាញថា សំណង់លំនៅឋានសរុបក្នុងឆ្នាំ2018 មានចំនួន 2,420គម្រោង មានផ្ទៃក្រឡាសរុបចំនួន 4,682,565ម៉ែត្រការ៉េ មានទុនវិនិយោគ 1,835,416,912ដុល្លារ ស្មើនឹង18,471ខ្នងផ្ទះ ចំណែកគម្រោងអគារខ្ពស់ៗចាប់ពី5ជាន់ឡើងទៅនៅរាជធានីភ្នំពេញក្នុងឆ្នាំ2018 មានចំនួន 110អគារ និងបណ្ដុំលំនៅឋានមានលក្ខណៈជាបុរីនៅរាជធានីភ្នំពេញក្នុងឆ្នាំ2018 ចំនួន 28ទីតាំង។

ឯកឧត្តម ឡៅ ទិព្វសីហា រដ្ឋលេខាធិការក្រសួងរៀបចំដែនដីនគរូបនីយកម្ម និងសំណង់បាន ឱ្យដឹងថា ការផ្តល់ទស្សនទានថ្មីលើវិស័យស្ថាបត្យកម្មនិងសំណង់អគារបានដាក់ចេញនូវគោលនយោបាយលើកទឹកចិត្តឱ្យមានសំណង់អគារទំនើបខ្ពស់ៗនៅលើទីតាំងនានាដែលសមស្រប ដូចជានៅភ្នំពេញអគារខ្ពស់ៗដែលមានកម្ពស់ចាប់ពី 5ជាន់ឡើងទៅមានចំនួន 1,241អគារ ការបើកទូលាយនៃផ្ទៃដីរាជធានីភ្នំពេញជាង 678គីឡូម៉ែត្រការ៉េ និងការអភិវឌ្ឍទីក្រុងរណបថ្មី និងបុរីលំនៅឋាន ឬបណ្តុំលំនៅឋានមានលក្ខណៈបុរីចំនួន 257ទីតាំង ដើម្បីបន្ថែមកន្លែងរស់នៅ កន្លែងធ្វើការងារ និងការផ្លាស់ប្តូរមុខមាត់រាជធានីភ្នំពេញ ទីក្រុង និងជនបទឱ្យក្លាយជាទីក្រុងទំនើប។

ឯកឧត្តមលើកឡើងថា ការតាំងបង្ហាញផលិតផលសេវាកម្ម និងបច្ចេកវិទ្យាថ្មីៗពាក់ព័ន្ធវិស័យស្ថាបត្យកម្ម និងសំណង់ពិតជាបានរួមចំណែកយ៉ាងសំខាន់ក្នុងការបង្កើតទីផ្សារថ្មីនៃសំណង់ ហើយក៏ជួយទាក់ទាញវិនិយោគិនបរទេសមកវិនិយោគក្នុងវិស័យសំណង់ និងស្ថាបត្យកម្មនៅកម្ពុជាផងដែរ។

កត្តានេះបានផ្តល់កាលានុវត្តភាព និងជាកម្លាំងចលករថ្មីមួយថែមទៀតក្នុងការជំរុញការអភិវឌ្ឍវិស័យស្ថាបត្យកម្ម និងសំណង់នៅកម្ពុជាឱ្យកាន់តែល្អប្រសើរឡើង និងជាសញ្ញាមួយនៃការទាក់ទាញ កៀរគរអ្នកវិនិយោគទុនក្នុងស្រុក និងក្រៅស្រុកមកធ្វើការបណ្តាក់ទុនលើវិស័យស្ថាបត្យកម្ម និងសំណង់។

ឯកឧត្តមក៏ធ្លាប់បានលើកឡើងដែរថា នៅក្នុងឆ្នាំនេះ យើងសង្កេតឃើញមានគម្រោងវិនិយោគថ្មីៗពីអ្នកវិនិយោគក្នុងស្រុក និងលំហូរទុនវិនិយោគផ្ទាល់ពីបរទេសមានការកើនឡើង។ ឯកឧត្តមបានឱ្យដឹងថា នៅត្រឹមដំណាច់ឆ្នាំ2019នេះ អាចមានគម្រោងសំណង់អគារពាណិជ្ជកម្មមួយចំនួន ក៏ដូចជាគម្រោងអគារផ្សារទំនើបផងដែរនឹងបញ្ចប់គម្រោងរបស់ខ្លួន ដែលជាកត្តាមួយជំរុញឱ្យវិស័យនេះមានការកើនឡើងជាលំដាប់។

ជាមួយគ្នានេះដែរ ការរីកចម្រើននៃវិស័យសំណង់នៅកម្ពុជាបានទាក់ទាញឱ្យមានក្រុមហ៊ុនផ្នែកស្ថាបត្យកម្ម និងរចនាទាំងក្នុងស្រុក និងបរទេសលេចឡើងយ៉ាងច្រើននាពេលបច្ចុប្បន្ន។ នេះបើតាមការលើកឡើងរបស់អ្នកជំនាញ។

លោក ស៊ិន សុជាតិ ប្រធានសមាគមស្ថាបត្យករកម្ពុជាបានមានប្រសាសន៍ថា ចំនួនក្រុមហ៊ុន និងអ្នកជំនាញក្នុងវិស័យស្ថាបត្យកម្មនៅកម្ពុជាបានកើនឡើងយ៉ាងច្រើននាពេលបច្ចុប្បន្ន ដែលកំណើននេះមានទំនាក់ទំនងយ៉ាងជិតស្និទ្ធជាមួយនឹងការរីកចម្រើននៃបច្ចេកវិទ្យា។ លោកលើកឡើងថា គ្រប់ការងារទាំងអស់សូម្បីតែប្រព័ន្ធលូបង្ហូរទឹកកខ្វក់ក៏មានទំនាក់ទំនងជាមួយនឹងការងារស្ថាបត្យកម្មដែរ។ លោកថ្លែងថា៖“វិស័យស្ថាបត្យកម្មនៅកម្ពុជាកំពុងមានដំណើរការល្អជាលំដាប់ តែការរីកចម្រើននេះក៏ត្រូវការរួមចំណែកពីបច្ចេកវិទ្យាផងដែរ”។

លោក ថង លិនថោង ប្រធានក្រុមហ៊ុនសិក្សាប្លង់ស្ថាបត្យកម្ម និងសាងសង់ A-SmileArt Architecture & Construction បានលើកឡើងថា ទីផ្សារស្ថាបត្យកម្មបានរីកចម្រើនយ៉ាងឆាប់រហ័សក្នុងរយៈពេលប្រហែល 10ឆ្នាំចុងក្រោយនេះ។ ប្រជាជនកម្ពុជាយល់កាន់តែច្រើនពីសារៈប្រយោជន៍ប្លង់ដែលរចនាឡើងដោយអ្នកជំនាញ។

លោកបន្តថា ការងារស្ថាបត្យកម្មពិតជាមានសារៈសំខាន់ណាស់ក្នុងការជួយលើកកម្ពស់មុខមាត់សំណង់របស់ប្រទេស ហើយការរចនាដែលត្រឹមត្រូវល្អក៏នឹងជួយធ្វើឱ្យកាត់បន្ថយថវិកាសម្រាប់ចំណាយលើការសាងសង់ផងដែរ។

លោកថ្លែងថា៖ “ពីមុនមកការងារស្ថាបត្យកម្មមិនសូវមានគេឱ្យតម្លៃប៉ុន្មានទេ រហូតដល់មានអ្នកខ្លះគិតថា ជាការងាររបស់វិស្វករទៀតផង តែនៅពេលនេះមានម្ចាស់សំណង់ជាច្រើនបានមករកស្ថាបត្យករឱ្យជួយ ទោះជាត្រូវចំណាយលុយច្រើនក៏ដោយ។ ទីផ្សារការងារស្ថាបត្យកម្មកំពុងមានដំណើរការល្អ”។

ទោះយ៉ាងណា លោក លិនថោង ក៏បានលើកឡើងដែរថា ភាពរីកចម្រើននាពេលនេះ ក៏បានទាក់ទាញឱ្យក្រុមហ៊ុនបរទេសជាច្រើនចូលមករកស៊ីនៅកម្ពុជាផងដែរ ដែលការណ៍នេះទាមទារឱ្យស្ថាបត្យករក្នុងស្រុកត្រូវខិតខំពង្រឹងសមត្ថភាពរបស់ខ្លួនបន្ថែមទៀត៕

July 1, 2019

តិចនិក ក្នុងការស្ងោរម្ហូបអាហារ សម្រាប់បងៗស្ត្រីមេផ្ទះ

ឡារ៉ែន ជឿថា បងៗស្ត្រីមេផ្ទះទាំងឡាយច្បាស់ជាធ្លាប់ចម្អិនម្ហូបអាហារបែបស្ងោរមកជាច្រើនដងហើយ ដែលជួនកាលក៏ឆ្ងាញ់ និងជួនកាលទៀតក៏ដូចជាមិនសូវត្រូវមាត់សមាជិកក្នុងផ្ទះ ជាពិសេសលោកប្ដីប៉ុន្មានឡើយ ដូច្នេះខាងក្រោមនេះ គឺជាតិចនិកល្អៗក្នុងធ្វើម្ហូប ឬចម្អិនអាហារបែបស្ងោរដែល ឡារ៉ែន យកមកជម្រាបជូនដូចតទៅ ៖

តិចនិកស្ងោរបន្លែផ្សេងៗឱ្យឆ្ងាញ់ពិសា1. ព្យាយាមប្រើទឹកឱ្យតិចបំផុតតាមដែលអាចធ្វើទៅបានក្នុងការស្ងោរបន្លែ។
2. មុននឹងយកបន្លែមកដាក់ស្ងោរ គួររង់ចាំឱ្យទឹកពុះជាមុនសិន សឹមដាក់បន្លែចូលទៅ មិនគួរដាក់ត្រាំស្ងោរនៅក្នុងឆ្នាំងតាំងពីដំបូងទីឡើយ។
3.បន្លែពណ៌បៃតងគួរធ្វើឱ្យឆ្អិនដោយវិធីស្រុស ឬដាក់ចូលទៅក្នុងទឹកពុះ ហើយពេលទឹកពុះម្តងទៀតចូរលើកចុះភ្លាមតែម្ដង។
4. បន្លែមើម ដូចជា មើមស្ពៃ មើមឆៃថាវ មើមការ៉ុត គួរស្ងោរនៅក្នុងទឹកពុះតិចៗ និងគួរស្ងោរទាំងមូល វានឹងជួយរក្សាគុណប្រយោជន៍ខាងអាហារបានច្រើនជាងការហាន់ជាដុំៗរួចដាក់ស្ងោរ។
5. រាល់ពេលស្ងោរបន្លែ គួរបិទគម្របឆ្នាំង ដើម្បីឱ្យទឹកឆាប់ពុះ និងបន្លែកាន់តែឆាប់ឆ្អិនព្រោះបន្លែកាន់តែនៅក្នុងទឹកក្តៅយូរ គុណប្រយោជន៍ខាងអាហារកាន់តែថយចុះ។ធ្វើតាមតិចនិកដ៏ងាយៗខាងលើនេះ ក្រៅពីបងៗទទួលបានបន្លែស្ងោរដែលឆ្ងាញ់ជាងអ្នកដទៃហើយ នៅបានទទួលគុណប្រយោជន៍ខាងអាហារយ៉ាងពេញបរិបូរណ៍ទៀតផង។

វិធីស្ងោរត្រីមិនឱ្យធំុក្លិនឆ្អាបវិធីងាយៗក្នុងការស្ងោរត្រីមិនឱ្យមានក្លិនឆ្អាបក្នុងទឹកស្ងោរនោះគឺ ចូរដាក់ស្លឹកតែចិនចូលទៅក្នុងឆ្នាំងស្ងោរប្រមាណ6-7សន្លឹក ហើយបើបានដំមើមខ្ទឹមក្រហម 2-3 មើមឱ្យបែក រួចដាក់ចូលទៅផងនោះ នឹងរឹតតែបង្កើនរសជាតិសម្លស្ងោរត្រីរបស់បងៗឱ្យកាន់តែឈ្ងុយឆ្ងាញ់ បាត់អស់ក្លិនឆ្អាប និងទទួលទានកាន់តែស្និទ្ធទៀតផង។

ទិចនិកស្ងោរផ្លែពោតឱ្យទន់ ផ្អែម ឆ្ងាញ់ផ្លែពោតគឺជាបន្លែផ្លែឈើដែលងាយឆ្អិនជាទីបំផុត ដូច្នេះយើងមិនគួរប្រើពេលវេលាក្នុងការស្ងោរយូរពេកឡើយ ព្រោះនឹងធ្វើឱ្យសាច់គ្រាប់់ផ្លែពោតឡើងស្វិតជ្រួញញ៉ាំលែងឆ្ងាញ់។តិចនិកក្នុងការស្ងោរពោតឱ្យញ៉ាំឆ្ងាញ់គឺ ៖
– ចូរដាក់ទឹកដោះគោឆៅ 1កូនចានទឹកជ្រលក់ទៅក្នុងទឹកស្ងោរពោត។
– ដាក់ស្ករសចូលទៅ 1ស្លាបព្រាកាហ្វេ។
– ដាំទឹកឱ្យពុះដោយប្រើភ្លើងខ្លាំង។
– រង់ចាំឱ្យទឹកនៅក្នុងឆ្នាំងពុះខ្លាំងជាមុនសិន សឹមយកផ្លែពោតដាក់ចូលទៅដោយតម្រៀបគ្នានៅក្នុងឆ្នាំងស្ងោរនោះ។
– បន្ទាប់មកស្ងោរបន្តទៀតរយៈពេល 3នាទីទៀត។
– ពេលនោះផ្លែពោតនឹងឆ្អិនល្អ។
– ចូរស្រង់ផ្លែពោតឡើងមក ហើយយកអំបិល-សមកលាបពីលើបន្តិច។ តែប៉ុណ្ណឹង អ្នកនឹងបានផ្លែពោតស្ងោរដែលទន់ផ្អែម ឈ្ងុយឆ្ងាញ់សម្រាប់ទទួលទានហើយ។

វិធីស្ងោរស៊ុតមិនឱ្យសាច់ស៊ុតហៀរចេញតាមសម្បកដែលប្រេះបែកសម្បកស៊ុតប្រេះបែកក្នុងអំឡុងពេលស្ងោរក៏ជាបញ្ហាមួយដែរ ជាពិសេសពេលស្ងោរស៊ុតម្តងៗច្រើនគ្រាប់ដើម្បីបកដាក់ក្នុងខសាច់ជ្រូកជាដើម ដែលធ្វើឱ្យស៊ុតស្ងោរចេញមកមានរូបរាងមិនស្អាត។ យើងមានវិធីល្អៗដើម្បីការពារមិនឱ្យសាច់ស៊ុតហៀរចេញតាមសម្បកស៊ុតដែលប្រេះបែកនោះមកជម្រាបជូន ៖
ដំបូងបង្អស់បងៗស្ត្រីមេផ្ទះត្រូវជ្រើសរើសយកស៊ុតណាដែលថ្មី សម្បកគ្មានស្នាមប្រេះ និងស្អាត។ ពេលស្ងោរចូរដាក់ទឹកឱ្យលិចស៊ុតទាំងអស់តាំងពីដំបូង ឯតិចនិកសំខាន់ គឺស្ថិតនៅលើការដាក់ទឹកក្រូចឆ្មារបន្តិចចូលទៅក្នុងទឹកស្ងោរនោះ ដោយទឹកក្រូចឆ្មារនេះវានឹងជួយមិនឱ្យសាច់ស៊ុតហៀរចេញពីសម្បក ឬក៏ដាក់អំបិលចូលទៅក្នុងទឹកស្ងោរនោះប្រហែល 1ស្លាបព្រាបាយក៏បានដូចគ្នា ព្រោះអំបិលវានឹងជួយការពារមិនឱ្យសាច់ស៊ុតហៀរចេញមកតាមស្នាមប្រេះនៅលើសម្បកហ្នឹងឯង។
តិចនិកទាំងអស់ខាងលើ ទស្សនាវដ្តី ឡារ៉ែន មិនមានចុះបញ្ជីកម្មសិទ្ធិបញ្ញាទេ ហេតុនេះបងៗស្ត្រីមេផ្ទះអាចចែករំលែកតៗគ្នាបានសូមអរគុណ៕

July 1, 2019

5ហេតុផល ដែលនារីខ្លះមិនរៀបការ

មិនមែនមនុស្សស្រីគ្រប់គ្នាសុទ្ធតែត្រូវការ ឬប្រាថ្នាក្នុងការនិយាយថា “ចាស យល់ព្រម” នោះទេ… តើព្រោះហេតុអីទៅ?

1. ព្រោះការមិនរៀបការ មិនមែនបានន័យថា អ្នកនឹងត្រូវនៅម្នាក់ឯងនោះទេ
នៅពេលរៀបការ យ៉ាងហោចណាស់ក៏អ្នកនឹងមានមនុស្សម្នាក់នៅក្បែរកាយជានិច្ច តែខ្ញុំចង់ប្រាប់ថា តឱ្យមិនបានរៀបការ ក៏អ្នកនៅតែមានមនុស្សម្នាក់នៅក្បែរកាយបានដែរ មានមនុស្សឱ្យស្រឡាញ់… ឱ្យជឿទុកចិត្ត… ឱ្យសើចជាមួយគ្នា… ឱ្យឈ្លោះគ្នា… ឱ្យនឹកគ្នា… រួមទាំងពឹងពាក់គ្នាទៅវិញទៅមកទៀតផង។ ដោយសារតែការមិនរៀបការមិនបានមានន័យថា អ្នកត្រូវតែនៅម្នាក់ឯងនោះទេ តែអ្នកនៅមានពួកម៉ាក មិត្តភក្តិ មានមនុស្សស្រឡាញ់ បងប្អូន អ្នកជិតខាង និងមិត្តរួមការងារ គ្រាន់តែអ្នកមិនបាននៅជាមួយគូគ្រងប៉ុណ្ណោះឯង។ ជួនកាលអ្នកអាចកំពុងសេពគប់មើលចិត្តមើលថ្លើមគ្នា 2ឆ្នាំ ឬ5ឆ្នាំ ក៏តាមហ្នឹងទៅ ឬអ្នកអាចមិនបានត្រូវការគូស្នេហ៍ អ្នកនិយមចូលចិត្តក្នុងការសប្បាយរីករាយជាមួយបណ្ដាពួកមិត្តភក្តិច្រើនជាង ចូលចិត្តធ្វើដំណើរកម្សាន្ត និងជួបមនុស្សម្នាថ្មីប្លែកៗ និងចូលចិត្តធ្វើការងារដើម្បីជួយសង្គមជាដើម… ដូច្នេះឃើញហើយឬនៅថា អ្នកមិនចាំបាច់ត្រូវរៀបការ ក៏បានដែរ…។

2. ព្រោះស្នេហា គឺជាប្រស្នាដ៏អាថ៌កំបាំងមួយ
ការរៀបការ គឺជាកិច្ចសន្យាដែលមានចំណងរវាងគ្នា។ មានអត្ថន័យសាមញ្ញៗ ងាយៗ ហើយខ្ញុំក៏មិនត្រូវការនិយមន័យស្នេហាក្នុងន័យរបស់ធុរកិច្ច ឬច្បាប់ទម្លាប់អ្វីៗទាំងអស់។ ភាពស្រស់ស្អាតរបស់ស្នេហាគ្មាននិយមន័យមួយដោយឡែកតែឯងនោះទេ ហើយតែងតែប្រែប្រួលជានិច្ចទៀតផង។

3. ព្រោះភាពស្ថិតស្ថេរគង់វង្សដ៏ពិតប្រាកដចេញមកពីការដឹងថា ខ្លួនឯងជាអ្នកណា និងត្រូវការអ្វី?
នៅពេលអ្នកមានអារម្មណ៍ខកបំណងជាមួយនឹងរឿងរ៉ាវផ្សេងៗដែលកើតឡើងនៅក្នុងជីវិត ចូរកុំគិតថា ការរៀបការនឹងអាចបញ្ឈប់អ្វីៗទាំងអស់នោះបានឱ្យសោះ។ ការមានមនុស្សដែលស្រឡាញ់ និងបារម្ភអំពីយើង ដូចជា ឪពុកម្ដាយ បងប្អូន សាច់ញាត់ មិត្តរួមការងារ និងមិត្តភក្តិជិតស្និទ្ធទៅវិញទេ ដែលជាភាពស្ថិតស្ថេរគង់វង្សដ៏ធំធេងបំផុតលើសអ្វីៗទាំងអស់ ដែលអ្នកមិនចាំបាច់ត្រូវបានមកពីគូអាពាហ៍ពិពាហ៍នោះឡើយ។

4. ព្រោះអ្នកអាចលែងលះវិញបាន…
នាងខ្ញុំ និងគូស្នេហ៍ សេពគប់គ្នាមក10ឆ្នាំហើយ ហើយនៅពេលណាយើងមានបញ្ហានឹងគ្នា (មិនខុសពីគូស្នេហ៍ដទៃទេ) យើងក៏មានសេរីភាពក្នុងការបញ្ចប់សម្ពន្ធភាពបានគ្រប់ពេលវេលា។ ក្នុងអំឡុងពេលដែលអស់សង្ឃឹម និងសោកសៅបំផុតនោះ នាងខ្ញុំបែរជាមានអារម្មណ៍សប្បាយចិត្ត ដោយសារតែនាងខ្ញុំអាចសម្រេចចិត្តគ្រប់យ៉ាងដើម្បីខ្លួនឯងបានយ៉ាងពេញលេញ។

5. ព្រោះអ្នកអាចរៀបការនៅពេលណាក៏បាន មិនចាំបាច់ត្រូវប្រញាប់ទេ…
នាងខ្ញុំមិនមែនជាមនុស្សពពួកប្រឆាំងនឹងការរៀបអាពាហ៍ពិពាហ៍ទេ ហើយរឿងហ្នឹងក៏មិនមែនជាបញ្ហាដែរ… វាគ្រាន់តែជាកម្មវិធីមួយប៉ុណ្ណោះ។ ចំណុចសំខាន់គឺ យើងនៅតែបើកចំហទាំងក្នុងរឿងការរៀបការ និងសម្ពន្ធភាព។ យើងត្រៀមរួចរាល់ជានិច្ចក្នុងការបើកទទួលយកផ្នត់គំនិត អារម្មណ៍ និងបទពិសោធផ្សេងៗ ទាំងរបស់យើង និងរបស់អ្នកដទៃ។ មិនសំខាន់ថា អ្នកស្ថិតនៅក្នុងសម្ពន្ធភាពរយៈពេលវែង ឬសម្ពន្ធភាពបញ្ចប់បែបឈឺចាប់ ឬទើបចាប់ផ្ដើមស្នេហាជាថ្មី ឬពេញចិត្តក្នុងការនៅតែម្នាក់ឯងនោះទេ គ្មានអ្នកណាដឹងឡើយថា អានាគតនឹងទៅជាយ៉ាងណា? ដូច្នេះ ទុកឱ្យវាក្លាយជាការសម្រេចចិត្តរបស់យើងផ្ទាល់ក្នុងការឈានទៅមុខឆ្ពោះទៅរកការផ្សងព្រេងជាថ្មីទៀត៕

July 1, 2019

បង្ហាត់ជំនាញ ចាំបាច់ខ្លះដល់កូន មុនចូលរៀន…

បន្ទាប់ពីកូនតូចបានរៀនយល់ដឹងខ្លះៗជាបន្តបន្ទាប់ក្នុងអំឡុងពេល1ឆ្នាំដំបូងហើយ ពេលឆ្លងចូលដល់ឆ្នាំទី2-3 យើងអាចនិយាយបានថា ជាអំឡុងពេលនៃការសន្សំចំណេះ-ដឹងផ្សេងៗ និងរំលាយចំណេះដឹងទាំងនោះឱ្យចូលជាមួយនឹងសមត្ថភាពរបស់កុមារ និងបង្កឱ្យកើតជាជំនាញផ្សេងៗដែលចាំបាច់ត្រូវប្រើពេលចូលសាលារៀនលើកដំបូងបំផុតក្នុងជីវិតរបស់គេ។

នៅក្នុងវ័យនេះ គឺជាអំឡុងពេលមួយសំខាន់ណាស់ដែលអ្នកម្តាយត្រូវបង្ហាត់បង្រៀនរឿងជាច្រើនដល់កូន ជាពិសេសបំផុតជំនាញផ្សេងៗដែលត្រូវប្រើពេលនៅក្នុងសាលា… តើមានអ្វីខ្លះនោះ? សូមតាមដានដូចតទៅ ៖
– ការចែករំលែក : ដើម្បីឱ្យកូនបានស្គាល់ពីភាពមានទឹកចិត្ត និងចេះចែករំលែកការលេងជាមួយមិត្តភក្តិយ៉ាងមានសេចក្តីសុខ និងប្រកបដោយសុវត្ថិភាព។
– ការចេះជួយខ្លួនឯង : ដូចជាការចេះស្លៀកពាក់ខោអាវ ពាក់ស្រោមជើង ពាក់ស្បែកជើងដោយខ្លួនឯង ជាដើម។
– ការធ្វើបានតាមបញ្ជាស្រួលៗរបស់អ្នកគ្រូ : ដូចជាយកសៀវភៅទៅដាក់លើតុ ប្រមូលសៀវភៅដាក់ចូលកាបូប-ល-។
– ការហាត់ឆ្លើយតប : ពេលមានសិស្សដទៃមកនិយាយជាមួយ។
– បង្ហាត់ឱ្យចេះស្តាប់គ្រូ និងឆ្លើយតប។
– អាចនៅជាមួយសាច់ញាតិ ឬអ្នកមើលថែបានដោយមិនស្រែកយំ ក្នុងអំឡុងពេលដែលម្តាយមិននៅ។
– ចេះថែទាំ និងសម្អាតរាងកាយបានដោយខ្លួនឯង។
– ចេះប្រាប់ ពេលចង់ចូលបន្ទប់ទឹក ឬចង់បត់ជើងធំ។
– ចេះប្រាប់ឈ្មោះពិត និងឈ្មោះលេងរបស់ខ្លួនឯងបាន រួមទាំងស្គាល់ឈ្មោះរបស់ឪពុកម្តាយទៀតផង។
– អាចអង្គុយធ្វើកិច្ចការរបស់សាលាយ៉ាងស្ងាត់ស្ងៀមបានច្រើននាទី។

ជំនាញទាំងអស់ខាងលើនេះ គឺជាអ្វីដែលអ្នកម្តាយត្រូវបង្ហាត់ឱ្យកូនចេះ និងដឹងតាំងពីពេលនៅផ្ទះឱ្យហើយជាស្រេច ដោយត្រូវចាប់ផ្តើមបង្ហាត់ម្តងបន្តិចៗ ប្រមាណជា 3-4 ខែមុនពេលដែលកូនត្រូវចូលសាលារៀនលើកដំបូង ដើម្បីពេលដល់ថ្ងៃកូនចូលរៀនមែនទែន កូននឹងបានដើរចូលសាលាយ៉ាងពើងទ្រូង និងជឿជាក់លើខ្លួនឯងយ៉ាងខ្លាំងថា ច្បាស់ជាគ្មានបញ្ហាអ្វីទាំងអស់ ហើយអ្នកម្ដាយខ្លួនឯងក៏សប្បាយចិត្ត និងមិនមានការបារម្ភ៕

July 1, 2019

មិនធម្មតា កូនខ្មែរវ័យក្មេង ៣ រូប អតីតពលករនៅកូរ៉េ ក្លាយជាម្ចាស់បុរី សុកគាស៊ីធី

កំពង់ធំ ៖ កូនខ្មែរវ័យក្មេងចំនួន ៣រូប ដែលធ្លាប់ជាអតីតពលករបម្រើការងារនៅប្រទេសកូរ៉េខាងត្បូងកាលពីប៉ុន្មានឆ្នាំមុននោះ ពេលនេះបានអភិវឌ្ឍខ្លួនក្លាយជាម្ចាស់បុរីលំនៅដ្ឋានបែបទំនើប ដែលជាជំនួញក្នុងវិស័យអចលនទ្រព្យកំពុងតែមានសក្ដានុពល និងមានប្រជាប្រិយភាពនៅក្នុងខេត្តកំពង់ធំ នៃព្រះរាជាណាចក្រកម្ពុជា។

សមាសភាពកូនខ្មែរ ដែលបានប្រែក្លាយជីវិតពីភាពជាពលករបម្រើការងារនៅក្នុងប្រទេសកូរ៉េ រកចំណូលដោយការប្ដូរកម្លាំងកាយ មកជាម្ចាស់បុរីលំនៅដ្ឋានបែប ទំនើប សុកគា ស៊ីធី ទាំង៣នាក់ដូចបានលើកឡើងខាងលើនេះ រួមមាន ទី១- លោក ស៊ឺន សុកគា អាយុ២៦ឆ្នាំ បច្ចុប្បន្នជាស្ថាបនិក និងជានាយកក្រុមហ៊ុន , ទី២- លោក ចាន់ ឃីន អាយុ២៥ឆ្នាំ បច្ចុប្បន្នជាស្ថាបនិក និងជានាយកផ្នែកទីផ្សារ , ទី៣- លោក ផុន សាមាន អាយុ២៦ឆ្នាំ បច្ចុប្បន្នជាស្ថាបនិក និងជានាយកផ្នែកទីផ្សារ ដែលអ្នកទាំង៣បានសហការគ្នាចូលប្រឡូកនៅក្នុងវិស័យអចលនទ្រព្យ ដោយការបោះទុនវិនិយោគ និងអភិវឌ្ឍវិស័យលំនៅដ្ឋាន ក៏ដូចជាវិស័យដីធ្លីផងដែរ។

លោក សុឺន សុកគា ដែលជាស្ថាបនិក និងមានមុខតំណែងជានាយកគ្រប់គ្រងក្រុមហ៊ុនបុរី សុកគា ស៊ីធី បានប្រាប់ឱ្យដឹងថា លោកធ្លាប់ធ្វើការនៅប្រទេសកូរ៉េអស់រយៈពេល២ឆ្នាំ៨ខែ ។ លោកបានបញ្ជាក់ថា “ការដែលផ្តាច់ខ្លួនពីការធ្វើបានប្រាក់ខែរាប់ពាន់ដុល្លារ មកចាប់ផ្តើមអាជីវកម្មផ្ទាល់វាមិនមែនជាការងាយទេ”។ លោកបន្តទៀតថា “យើងត្រូវប្រឈមនឹងបញ្ហាជាច្រើន ប៉ុន្តែយើងត្រូវតែជំនះឱ្យបាន ដូចជា កត្តាគ្រួសារ កត្តាសង្គម ភាពប្រឈមជាមួយមនុស្ស និងអ្នកធ្វើជំនួញក្នុងវិស័យតែមួយដែលកំពុងស្ថិតនៅជុំវិញខ្លួនយើង ហើយជាពិសេសនោះគឺខ្លួនឯងផ្ទាល់តែម្តង”។

ស្រដៀងគ្នានេះ លោក ចាន់ ឃីន ដែលជាស្ថាបនិក និងមានមុខតំណែងជានាយកផ្នែកទីផ្សារ បានប្រាប់ឱ្យដឹងផងដែរថា លោកធ្លាប់បម្រើការងារជាពលករនៅក្នុងប្រទេសកូរ៉េអស់រយៈពេល ៣ឆ្នាំ៦ខែ ។ លោកបានបន្តឱ្យដឹងទៀតថា “គ្រប់យ៉ាងគឺស្ថិតនៅក្នុងដៃរបស់យើង បើមើលឃើញថាមានឱកាសដែលល្អហើយ មិនគួរណាយើងបោះបង់នោះទេ ប៉ុន្តែយើងត្រូវតែសិក្សាឱ្យបានលម្អិត និងច្បាស់លាស់ដើម្បីអាចទាញយកផលចំណេញពីវាឱ្យបាន”។ លោកបានបន្តទៀតថា “និយាយឱ្យចំទៅ ដូចជាខ្ញុំផ្ទាល់ ដែលខ្ញុំតែងតែសម្លឹងមើលពីឱកាសនៅជុំវិញខ្លួនខ្ញុំ បើឃើញថាល្អហើយ មានសុវត្ថិភាពថែមទៀតនោះ ខ្ញុំនឹងចាប់យកឱកាសនោះមកកាន់ក្នុងដៃតែម្ដង”។

ដោយឡែក លោក ផុន សាមាន ដែលជាស្ថាបនិក និងជានាយកផ្នែកទីផ្សារនៃបុរី សុកគា ស៊ីធី មួយរូបដែរនោះ បានប្រាប់ឱ្យដឹងថា លោកក៏ជាអតីតពលករបម្រើការងារនៅក្នុងប្រទេសកូរ៉េ រយៈពេល ២ឆ្នាំ១០ខែ ប៉ុន្តែពេលនេះ ខ្ញុំបានផ្លាស់ប្ដូរជីវិតរបស់ខ្ញុំពីភាពជាពលករ មកជាអ្នកជំនួញ។ លោកបានបញ្ជាក់ថា “យើងគួរតែចេះផ្តល់តម្លៃនៃពេលវេលាផ្ទាល់ខ្លួន និងការចាត់ចែងចំណូលចំណាយឱ្យបានល្អ បើមិនដូច្នេះទេ រយៈពេលដែលយើងរស់នៅប្រទេសកូរ៉េអាចនឹងមិនរីកចំរើន ឬក៏ត្រលប់មកស្រុកខ្មែរវិញដោយមិនសល់អ្វីទាល់តែសោះ”។ លោកបានបញ្ជាក់ថា “ហេតុនេះយើងគួរតែចាប់ផ្តើមក្នុងការកំណត់គោលដៅ និងពេលវេលាឱ្យបានច្បាស់លាស់ ដើម្បីអាចបង្កើនលទ្ធភាពផ្ទាល់ខ្លួន រួមជាមួយសមិទ្ធផលនានានៅពេលយើងត្រលប់មកប្រទេសវិញ”។

នៅត្រឹមរយៈពេលប៉ុន្មានឆ្នាំចុងក្រោយនៃការជ្រៀតខ្លួនចូលមកប្រឡូកនៅក្នុងវិស័យអចលនទ្រព្យ អតីតពលករទាំង៣រូប បានសម្រេចនូវសមិទ្ធផលរបស់ខ្លួនគួរឱ្យជាទីមោទនៈ។ ជាក់ស្ដែង ក្រៅពីការវិនិយោគទៅលើគម្រោងអភវឌ្ឍបុរីលំនៅដ្ឋានបែបទំនើប សុកគា ស៊ីធី ដែលមានទីតាំងស្ថិតនៅ ស្រុកសន្ទុក ខេត្តកំពង់ធំ នាពេលនេះ ពួកគេក៏ទទួលបានភាពជោគជ័យរួចជាស្រេចទៅលើគម្រោងដីឡូតិ៍ចំនួន៤ ហើយក៏កំពុងបន្តបង្កើតគម្រោងថ្មីៗមួយចំនួនទៀតផងដែរ៕

June 29, 2019

ស្វាគមន៍អូនជ្រុយ Huawei nova4 មកកាន់ទីផ្សារប្រទេសកម្ពុជាជាមួយតម្លៃគួរឲ្យភ្ញាក់ផ្អើល!

ភ្នំពេញ ថ្ងៃទី 29 មិថុនា ឆ្នាំ 2019 ៖ ស្មាតហ្វូន Huawei nova4 បានបង្ហាញខ្លួនជាផ្លូវការនៅប្រទេសកម្ពុជា ក្នុងសន្និសីទសារព័ត៌មានកាលពីម្សិលមិញ ជាមួយនិងការប្រកាសពីតម្លៃដ៏រំជើបរំជួល ត្រឹមតែ $399 តែប៉ុណ្ណោះ។ បើយើងនិយាយពី ស្មាតហ្វូនប្រភេទអេក្រង់ប្រជ្រុយដែលមានលក់នៅលើទីផ្សារនាពេលបច្ចុប្បន្ន តម្លៃគឺចាប់ពី $800 ទៅជាង $900 ប៉ុន្តែ Huawei nova4 វិញ មានតម្លៃត្រឹមតែជាង $300 និងមានចំណុចពិសេសៗជាច្រើន៖

1. ការរចនាអេក្រង់ប្រជ្រុយលាតកប់កែមជាមួយកំរិតបង្ហាញ Fullview Display ទំហំ 4 អ៊ីញ ដែលការចោះ អេក្រង់សម្រាប់កាមេរ៉ាមុខមានទំហំតូចត្រឹមតែ 4.5mm មិនធ្វើឲ្យអ្នកមានអារម្មណ៍រំខានដោយសារស្នាមចោះនេះឡើយ។
2. ដំណើរការដោយអង្គចងចាំ ( RAM) 8 GB និងអង្គផ្ទុកទិន្ន័យ (ROM) 128GB។ បើប្រៀបធៀបទៅនិងស្មាតហ្វូនដទៃដែលមានតម្លៃប្រហាក់ប្រហែល Huawei nova4 មាន RAM និង ROM ធំជាង។
3. បន្ទះឈីប Kirin 970 ដែលធ្វើឲ្យស្មាតហ្វូននេះដំណើរការបានលឿន មិនរំអាករអួល និងជួយសន្សំសំចៃថ្ម ថែមទាំងដំណើរការដោយ GPU Turbo 2.0 ដែលផ្តល់បទពិសោធន៍ក្នុងការលេងហ្គេមបានយ៉ាងរលូន និងល្អឥត ខ្ចោះ។

Huawei nova4 បំពាក់ដោយកាមេរ៉ាមុខបែប AI ទំហំ 25MP និងកាមេរ៉ាក្រោយ3 គ្រាប់ ដែលកាមេរ៉ាទីមួយមានទំហំ 16MP អាចថតរូបបែប Ultra Wide Angle កាមេរ៉ាទីពីរទំហំ 20MP ថតរូបបែប Wide Angle និងកាមេរ៉ាទីបីដែលថតរូប Bokeh។ Huawei nova4 មានលក់នៅលើទីផ្សារហើយ ដែលមានការថែមជូន Bluetooth Speaker និងស៊ីម Smart លេខពិសេសជាមួយគម្រោង Smart ThomMong 12 សប្តាហ៍ឥតគិតថ្លៃ។ អ្នកអាចរកទិញបាននៅតាមបណ្តាហាងទូរសព្ទនានាទូទាំងប្រទេស។

ក្រៅពីការបង្ហាញខ្លួនជាផ្លូវការរបស់ Huawei nova4 ក្រុមហ៊ុន Huawei ប្រចាំប្រទេសកម្ពុជា ក៏បានប្រកាសពីស្មាតហ្វូន P30 Pro ពណ៍ថ្មី Amber Sunrise ផងដែរ។ ពណ៍ថ្មីនេះ ពិតជាស្រស់ស្អាត កាលីប ទាន់សម័យ ដែលជាពណ៍ថ្មីដំបូងគេបង្អស់នៅក្នុងទីផ្សារស្មាតហ្វូន។ Huawei P30 Pro Amber Sunrise មានតម្លៃ $999 ដែលអ្នកអាចរកទិញបាននៅលើតែ Facebook pages និង Instagram រកអាយដូលរបស់អ្នក អ្នកនាងឱក សុគន្ធកញ្ញា និងលោក នីកូ ប៉ុណ្ណោះ។

សម្រាប់ព័ត៌មានបន្ថែម សូមចូលទៅកាន់
Website: https://consumer.huawei.com/kh/
Facebook: Huawei Mobile (https://bit.ly/2ePDMSq)

June 29, 2019

កម្ពុជាស្នើអង្គការអន្តរជាតិជួយបន្តអភិវឌ្ឍវិស័យការងារ និងបណ្តុះបណ្តាលវិជ្ជាជីវៈឱ្យទាន់បដិវត្តន៍ឧស្សាហកម្មសម័យថ្មី

ប្រព័ន្ធការងារ និងបណ្តុះបណ្តាលវិជ្ជា-ជីវៈនៅកម្ពុជានាពេលបច្ចុប្បន្ននេះ ចាប់ផ្តើមមានសម្ទុះវិជ្ជមានគួរឱ្យគាត់សម្គាល់បន្ទាប់ពីបានសហការជាមួយដៃគូអភិវឌ្ឍន៍ជាច្រើន ដំណាលគ្នាដែលក្រសួងការងារ និងបណ្តុះបណ្តាលវិជ្ជាជីវៈក៏អនុវត្តនូវគោលនយោបាយសំខាន់ៗដើម្បីអភិវឌ្ឍឱ្យកាន់តែប្រសើរ។

ពាក់ព័ន្ធនឹងវិស័យការងារ កម្ពុជាបានចូលជាសមាជិករបស់អង្គការអន្តរជាតិខាងការងារ (ILO)អស់រយៈពេលជាង 50ឆ្នាំមកហើយ ដោយក្នុងនោះយើងទទួលបានផលប្រយោជន៍ជាច្រើនលើការអភិវឌ្ឍការងារ។ទោះជាយ៉ាងនេះក្តីក៏កម្ពុជានៅតែត្រូវការការជួយជ្រោមជ្រែងទាំងបច្ចេកទេស និងថវិកាជាច្រើនបន្ថែមទៀតពីដៃគូអភិវឌ្ឍសំខាន់ៗ។

នៅក្នុងសន្និសីទអន្តរជាតិខាងការងារ នាពេលថ្មីៗនេះ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ឯកឧត្តម អុិត សំហេង បានស្នើដល់ដៃគូអភិវឌ្ឍន៍នានា ពិសេសអង្គការអន្តរជាតិខាងការងារ (ILO)ឱ្យបន្តជួយអភិវឌ្ឍដើម្បីឆ្លើយតបនឹងរបត់បដិវត្តន៍ឧស្សាហកម្មទី4 (Industry Revolution 4.0)។ ក្នុងនោះឯកឧត្តមបានលើកឡើងថា ស្របពេលដែលប្រភេទការងារមួយចំនួនបាន និងកំពុងមានការផ្លាស់ប្តូរនៅក្នុងដំណើរការវិវឌ្ឍផ្នែកបច្ចេកវិទ្យា និងបដិវត្តន៍ឧស្សាហកម្ម4.0 កម្ពុជាជឿជាក់ថាគ្រប់ភាគីពាក់ព័ន្ធនឹងចូលរួមជាមួយកម្ពុជា ដើម្បីដាក់ចេញជាវិធានការ និងដំណោះស្រាយចំពោះបញ្ហាប្រឈមនានាដែលកើតឡើងក្នុងទីផ្សារកម្ពុជា និងការងារនាពេលអនាគត។|

ឯកឧត្តម អុិត សំហេង មានប្រសាសន៍ថា៖ “ដើម្បីសម្រេចគោលដៅប្រកបដោយចីរភាព ជាពិសេសគោលដៅទី8 ដែលនិយាយពីការងារសមរម្យ នៅក្នុងបដិវត្តន៍ឧស្សាហកម្មទី4 ប្រទេសជាសមាជិក ILO ចាំបាច់ត្រូវធានាឱ្យបានថា កម្មករនិយោជិត និងយុវជនទទួលបានចំណេះដឹងទូទៅ និងបណ្តុះបណ្តាលបច្ចេកទេសនិងវិជ្ជាជីវៈប្រកបដោយគុណភាព និងឱកាសទទួលបានការសិក្សាពេញមួយជីវិតដើម្បីទទួលបានជំនាញមួយដែលអាចឆ្លើយតបជាមួយតម្រូវការជាក់ស្តែងនៃទីផ្សារការងារ”។

ឯកឧត្តមរដ្ឋមន្ត្រីបានសង្កត់ធ្ងន់ផងដែរថា ក្នុងន័យនេះប្រទេសជាសមាជិកអង្គការអន្តរជាតិខាងការងារគប្បីបផ្តោតលើការបណ្តុះបណ្តាលជំនាញ សមត្ថភាពដល់កម្លាំងពលកម្ម ដើម្បីបង្កើនផលិតភាព និងបង្រួមគម្លាតនៃជំនាញឱ្យបានកាន់តែច្រើន។ ក្រៅពីនេះយើងក៏ត្រូវពង្រឹងសេវានៃការផ្តល់ព័ត៌មានពីទីផ្សារការងារ និងសេវាស្វែងរកការងារឱ្យកាន់តែមានភាពទូលំទូលាយ ស្របពេលដែលយើងបង្កើនគុណភាពអប់រំ និងបណ្តុះបណ្តាលវិជ្ជាជីវៈ ដើម្បីចាប់យកអត្ថប្រយោជន៍ជាច្រើនសម្រាប់ប្រជាជន។ ចំណុចចម្បងមួយផ្សេងទៀតគឺ យើងចាំបាច់កាត់បន្ថយផលប៉ះពាល់អវិជ្ជមាននៃការប្រែប្រួលពិភពការងារ និងដើម្បីឆ្លើយតបនឹងតម្រូវការជំនាញ។ កម្ពុជាសង្ឃឹមថាអង្គការអន្តរជាតិខាងការងារនៅតែបន្តមានតួនាទីសំខាន់ និងជាស្ថាប័នត្រីភាគីមួយដែលចូលរួមចំណែកយ៉ាងសំខាន់ក្នុងការប្រែក្លាយបញ្ហាប្រឈមនៅក្នុងបដិវដ្តឧស្សាកម្ម ទៅជាឱកាសសម្រាប់ប្រជាជនគ្រប់រូប។

ជាចំណុចវិជ្ជមានអង្គការអន្តរជាតិខាងការងារបានបន្តគម្រោងរោងចក្រកាន់តែប្រសើរនៅកម្ពុជាដែលហៅកាត់ថា ILO-BFC ដើម្បីពង្រឹងលក្ខខណ្ឌការងារ ផលិតភាព ការបញ្ជាទិញ និងទាក់ទាញអ្នកវិនិយោគបន្ថែមមកកម្ពុជា។

លោក Dan Rees នាយកគម្រោងការងារល្អប្រសើរជាសកលនៃអង្គការអន្តរជាតិខាងការងារ ILOបានលើកឡើងថា អង្គការ ILO នឹងបន្តកិច្ចសហការជាមួយកម្ពុជាបន្តទៀត ដើម្បីបង្ហាញសាធារណជនឱ្យបានដឹងពីភាពវិជ្ជមាននៃកិច្ចសហការប្រកបដោយនិរន្តរភាព។ លោកក៏បានវាយតម្លៃជាវិជ្ជមានផងដែរចំពោះការខិតខំប្រឹងប្រែងរបស់កម្ពុជាក្នុងការពង្រឹងសុខដុមនីយកម្មក្នុងទំនាក់ទំនងវិជ្ជាជីវៈ។

គួរបញ្ជាក់ថា ថ្មីៗនេះកម្ពុជាក៏កំពុងយកចិត្តទុកដាក់ខ្លាំងផងដែរលើការបណ្តុះបណ្តាលវិជ្ជាជិវៈ ជាពិសេសពាក់ព័ន្ធនឹងបច្ចេកវិទ្យា ព្រោះយើងកំពុងត្រូវការធនធានជាច្រើនដើម្បីបំពេញតម្រូវការការងារសម្រាប់ក្រុមហ៊ុនក្នុងស្រុក និងក្រុមហ៊ុនបរទេស។ ម្យ៉ាងវិញទៀត ការរៀបចំជំរុញការបណ្តុះបណ្តាលនេះ ក៏ដើម្បីធ្វើការប្រកួតប្រជែងជាមួយបណ្តាប្រទេសក្នុងតំបន់ដើម្បីជំរុញកំណើនសេដ្ឋកិច្ចឱ្យកាន់តែប្រសើរ និងដើម្បីសម្រេចគោលដៅអភិវឌ្ឍន៍ឱ្យក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ 2030៕

June 29, 2019

Author: ធឿន មករា