ធឿន មករា - La Reine Media

តើត្រូវពិនិត្យមើលយ៉ាងណាទើបដឹងថា មិនអីទេ… នៅពេលអ្នកមានផ្ទៃពោះកើត ឧប្បត្តិហេតុដោយចៃដន្យ?

ឧប្បត្តិហេតុ គឺជារឿងដែលមិនអាចស្មានដឹងមុនថា វានឹងកើតឡើងនៅពេលណា ចំពោះអ្នកណា និងដោយរបៀបណានោះឡើយ ដូច្នេះស្ត្រីដែលកំពុងមានគភ៌ គួរតែមើលថែទាំ និងប្រុងប្រយ័ត្នខ្លួនឯងឱ្យបានល្អបំផុត និងព្យាយាមចៀសវាងពីអ្វីដែលអាចបណ្តាលឱ្យមានគ្រោះថ្នាក់ដល់ខ្លួនឯង និងកូនក្នុងផ្ទៃ ដូចជា អ្នកមានគភ៌ច្រើនតែរអិលដួលក្នុងបន្ទប់ទឹក ជាដើម ដូច្នេះគួររកបន្ទះការពារការរអិលយកមកក្រាលពីលើកម្រាលឥដ្ឋដើម្បីការពារទុកជាមុន តែបើសិនជាមានឧប្បត្តិហេតុកើតឡើងយ៉ាងនឹកស្មានមិនដល់វិញនោះ ស្ត្រីមានគភ៌ត្រូវពិនិត្យមើលខ្លួនឯងឱ្យច្បាស់លាស់ថា តើរឿងដែលកើតឡើងនោះ វាមានប៉ះពាល់អីធ្ងន់ធ្ងរដល់ខ្លួនឯង និងកូនក្នុងផ្ទៃឬក៏អត់?

វិធី 3យ៉ាងក្នុងការពិនិត្យមើលរាងកាយរបស់អ្នកមានគភ៌ក្រោយពេលកើតមានឧប្បត្តិហេតុណាមួយ ៖
1. ពិនិត្យមើលថា តើមានអាការឈឺគភ៌ដែរឬទេ?
នៅពេលមានឧប្បត្តិហេតុកើតឡើង ស្ត្រីមានគភ៌ត្រូវពិនិត្យមើលថា តើផ្ទៃពោះមានទៅបោកប៉ះនឹងអ្វីដែរឬទេ? ហើយបើមិនមានអាការឈឺចុកចាប់អ្វីទេនោះ គឺរាប់ថាជាសំណាងល្អរបស់អ្នកហើយ តែបើកើតមានអាការបន្តិចឈឺ បន្តិចបាត់ទៅវិញនោះ បញ្ជាក់ថា អាចនឹងមានការប្រសូតមុនពេលកំណត់ហើយ និងបើសិជានឈឺបែបរឹងៗក្នុងពោះជាប់រហូត នោះបញ្ជាក់ថាស្បូនអាចនឹងសកខ្លួនមុនពេលកំណត់។ តែបើសិនជាឈឺពោះខ្លាំង និងមានអាការឈឺនៅលើមាត់ស្បូន និងអាចមានការធ្លាក់ឈាមផងនោះ បើសិនជួបអាការបែបនេះ ចូរកុំបង្អង់យូរ ត្រូវប្រញាប់ទៅមន្ទីរពេទ្យជាបន្ទាន់។

2. ពិនិត្យមើលថា តើមានឈាមចេញមកតាមមាត់ស្បូនដែរឬទេ?
ព្រោះថា បើសិនមានឈាមចេញមកនោះ អាចនឹងទៅរួចដែលថា ស្បូនសកខ្លួន។ បើមានឈាមចេញមកតិច ក៏មិនសូវជាគ្រោះថ្នាក់អីប៉ុន្មានទេ និងអាចព្យាបាលបាន តែបើមានឈាមចេញមកច្រើនដែលអាចបណ្តាលឱ្យមានគ្រោះថ្នាក់ដល់ស្ត្រីមានគភ៌ខ្លួនឯងនោះ គ្រូពេទ្យអាចនឹងត្រូវឱ្យធ្វើការប្រសូតភ្លាមតែម្តង ដោយមិនបាច់គិតថា គភ៌មានអាយុប៉ុន្មានហើយនោះទេ។

3. ពិនិត្យមើលថា តើកូននៅរើល្អ និងខ្លាំងដូចមុនដែរឬទេ?
បន្ទាប់ពីអ្នកម្តាយមានគភ៌ទទួលរងឧប្បត្តិហេតុហើយ បើកូននៅក្នុងផ្ទៃនៅតែរើ ឬធាក់ដូចប្រក្រតីនោះ ប្រហែលជាគ្មានបញ្ហាអ្វីទេ តែបើកូននៅស្ងៀម លែងរើ លែងធាក់ ទោះជាធ្វើការជំរុញហើយក៏នៅតែមិនរើដដែលនោះ អ្នកម្តាយត្រូវប្រញាប់ទៅមន្ទីរពេទ្យជាបន្ទាន់ ហើយកុំបង្អង់យូរ។
ឧប្បត្តិហេតុ គឺជារឿងដែលមិនអាចការពារជាមុនបានទេ តែអាចរកវិធីចៀសវាងបានដោយការប្រុងប្រយ័ត្ន និងចៀសវាងពីទង្វើណាដែលប្រថុយប្រថាននឹងឧប្បត្តិហេតុ តែបើសិនជាកើតមានឧប្បត្តិហេតុដោយចៃដន្យណាមួយឡើងមែននោះ ចូរអ្នកមានគភ៌ទាំងឡាយចាំទុកថា មិនមានឈឺពោះ មិនមានធ្លាក់ឈាម និងកូននៅរើនិងធាក់ដូចមុនដដែល… បើមានអាការ 3យ៉ាងនេះ បញ្ជាក់ថា អ្នកម្តាយ និងកូនក្នុងផ្ទៃនៅមានសុវត្ថិភាពល្អដដែលទេ៕

July 6, 2019

ទម្លាប់មិនល្អ 5យ៉ាងធ្វើឱ្យដើមទ្រូងយារធ្លាក់ មិនស្រស់ស្អាត

ដើមទ្រូង គឺជាអវយវៈដ៏សំខាន់របស់នារីៗយើង ឯការយកចិត្តទុកដាក់មើលថែទាំវិញនោះ មិនពិបាកធ្វើឡើយ ដូច្នេះបើមិនចង់ឱ្យដើមទ្រូងយារធ្លាក់មុនអាយុទេនោះ អ្នកគួរបញ្ឈប់ទម្លាប់5យ៉ាងដូចខាងក្រោមនេះ។

1. ពាក់អាវទ្រនាប់ខុសខ្នាត ឬមិនចូលចិត្តពាក់តែម្តង
អាវទ្រនាប់គឺជាគ្រឿងតុបតែងកាយដែលសំខាន់បំផុតរបស់នារីៗក៏អាចថាបានដែរ ទោះជាគ្មានអ្នកណាមើលឃើញមែន តែបើសិនយើងជ្រើសរើសអាវទ្រនាប់ដែលសមល្មមនឹងខ្នាតនោះ ក្រៅពីពាក់ហើយសប្បាយខ្លួន មិនទើសទែងធុញថប់ហើយ នៅជួយឱ្យដើមទ្រូងរបស់យើងនៅចំកន្លែង និងមិនឆាប់យារទៀតផង។ នារីៗជាច្រើនចូលចិត្តជ្រើសរើសពាក់អាវទ្រនាប់ដែលមានទំហំតូចជាងបន្តិច ព្រោះគិតថា នឹងជួយរុញឱ្យដើមទ្រូងមើលទៅឃើញណែន និងជិតគ្នាឡើង តែហ្នឹងគឺជាការធ្វើបាបដើមទ្រូងខ្លួនឯងទៅវិញទេ។ អាវទ្រនាប់មានច្រើនបែបច្រើនម៉ូដឱ្យជ្រើសរើស ដូច្នេះចូរជ្រើសរើសឱ្យបានស័ក្តិសមក្នុងការប្រើប្រាស់ និងខ្នាតដែលត្រឹមត្រូវជាមួយខ្លួនអ្នកប្រសើរជាង។

2. ទទួលទានទឹកតិច
ការទទួលទានទឹកល្អចំពោះសុខភាព និងគួរជាទឹកធម្មតាប៉ុណ្ណោះ ទឹកជាអង្គប្រកបសំខាន់ក្នុងរាងកាយ និងសំខាន់ចំពោះស្បែករបស់យើង បើទទួលទានទឹកតិចនឹងហុចផលធ្វើឱ្យដើមទ្រូងមិនណែនមូលក្បំ ស្បែកឆាប់ជ្រួញយារ និងមានស្នាមមុនអាយុ។

3. មិនលាបគ្រីមការពារពន្លឺថ្ងៃលើដើមទ្រូង
រដូវក្តៅបែបនេះ ជួនកាលក៏ពាក់អាវវាលកធំ អាវអត់ស្មា ឬសូម្បីតែឈុតហែលទឹកផ្សេងៗក៏ដោយ នៅពេលពន្លឺថ្ងៃចាំងមកប៉ះស្បែកយើងដោយត្រង់នោះ វាប្រៀបដូចជាយើងបណ្តោយឱ្យពន្លឺថ្ងៃចូលមកបំផ្លាញស្បែកបរិវេណនោះផងដែរ ហើយដើមទ្រូងក៏ដូចគ្នាដែរ វានឹងបង្កឱ្យកើតបញ្ហាជ្រីវជ្រួញមុនអាយុ និងកាន់តែឆាប់យារធ្លាក់ទៀតផង។

4. ជក់បារី
ការជក់បារីហុចផលជារួមដល់រាងកាយ ហើយរាងកាយគ្រប់ផ្នែកនឹងយារធ្លាក់ទាំងអស់ មិនលើកលែងសូម្បីតែដើមទ្រូងក៏ដោយ ព្រោះបារីធ្វើឱ្យអុីឡាស្ទីនរបស់ស្បែកថយចុះ ភាពក្មេងវ័យក៏នឹងរលាយបាត់អស់ដែរ។

5. ទម្ងន់ខ្លួនឡើងចុះៗញឹកញាប់
ការសម្រកទម្ងន់ធ្វើឱ្យកើតមានផលប៉ះពាល់ដូចជា ក្នុងខណៈដែលទម្ងន់ខ្លួនរបស់អ្នកស្រកចុះហើយនោះ រឿងដំបូងគេដែលស្រកចុះទៅដែរនោះ គឺទំហំរបស់ដើមទ្រូង ដែលពេញទៅដោយជាតិខ្លាញ់ហ្នឹងឯង ដូច្នេះហើយទើបការថែរក្សាទម្ងន់ខ្លួនឱ្យនៅទៀងទាត់ជាការប្រសើរបំផុត៕

July 6, 2019

ចុងឆ្នាំនេះប្រជាជនខ្មែរអាចប្រើប្រាក់រៀលនៅក្នុងប្រទេសថៃបានយ៉ាងងាយតាមរយៈ QR Code

ក្នុងសម័យនៃបដិវត្តន៍ឧស្សាហកម្មទី4 នេះ ពិភពលោកចាប់ផ្តើមប្រើប្រាស់បច្ចេកវិទ្យាកាន់តែច្រើនឡើង ដោយក្នុងនោះបច្ចេកវិទ្យាហិរញ្ញវត្ថុ (Fintech)ក៏កំពុងចាប់ផ្តើមរីកលូតលាស់យ៉ាងលឿនពី 1ថ្ងៃទៅ 1ថ្ងៃផងដែរ។ នៅកម្ពុជា បណ្តាធនាគារធំៗជាច្រើនបានចាប់ផ្តើមប្រើប្រាស់បណ្តាញបច្ចេកវិទ្យាក្នុងការទូទាត់សាច់ប្រាក់ជាមួយនឹងក្រុមហ៊ុន ឬដៃគូពាណិជ្ជកម្មនៅក្នុងស្រុក។ រហូតមកដល់ពេលថ្មីៗនេះក្រោមការផ្ចុងផ្តើមនិងសម្របសម្រួលពីធនាគារជាតិនៃកម្ពុជា និងធនាគារកណ្តាលថៃ បានជំរុញឱ្យបណ្តាញធនាគារធំៗមួយចំនួននៅកម្ពុជា បង្កើតកិច្ចសហការទូទាត់សាច់ប្រាក់ឆ្លងប្រទេសតាមរយៈប្រព័ន្ធ QR Code ដើម្បីសម្រួលដល់តម្រូវការនៃប្រទេសទាំង2។

លោកជំទាវ ជា សិរី អគ្គនាយិកាបច្ចេកទេសនៃធនាគារជាតិនៃកម្ពុជា បានបញ្ជាក់ថា ការដាក់ឱ្យប្រើប្រាស់ប្រព័ន្ធទូទាត់សាច់ប្រាក់រៀល និងប្រាក់បាតតាមប្រព័ន្ធ QR Code នេះបានផ្តល់ផលប្រយោជន៍ជាច្រើនដល់ប្រទេសកម្ពុជា ដោយក្នុងនោះវានឹងជំរុញការប្រើប្រាស់រៀលកាន់តែប្រសើរឡើង ព្រោះបច្ចុប្បន្ននេះប្រសិនបើមិនជំរុញបែបនេះទេ ប្រជាជននឹងនៅតែប្រើប្រាស់ប្រាក់ដុល្លារ ឬប្តូរជាប្រាក់បាតដើម្បីប្រើប្រាស់នៅប្រទេសថៃដដែល។ ក្រៅពីនេះ QR Code អាចប្រើប្រាស់បានលុះត្រាតែប្រជាជនមានគណនេយ្យជាប្រាក់រៀលជាមុនសិន ទើបអាចទូទាត់នៅប្រទេសថៃបាន។ ក្រៅពីនេះ វាក៏ជួយសម្រួលផងដែរដល់អតិថិជនក្នុងការទូទាត់ប្រាក់ ព្រោះអតិថិជនអាចទូទាតត់ដោយងាយស្រួល មិនចាំបាច់កាន់សាច់ប្រាក់សុទ្ធតាមខ្លួនដែលអាចប្រឈមនឹងហានិភ័យនៃការបាត់បង់នោះទេ។ លើសពីនេះទៅទៀត ការធ្វើបែបនេះក៏នឹងអាចកាត់បន្ថយហានិភ័យអត្រាប្តូរប្រាក់បានផងដែរ ព្រោះកាលណាប្តូរប្រាក់ គឺធ្វើឱ្យខាតបង់ការកាត់ទឹកនៅពេលប្តូរ ហើយចាយមិនអស់ ក៏ត្រូវខាតម្តងទៀតនៅពេលប្តូរត្រឡប់មកវិញ។ ម្យ៉ាងវិញទៀត ការប្រើប្រាស់ QR Code វិញយើងមិនបាច់ប្តូរចុះប្តូរឡើងទេ គឺអាចចាយបានដោយសេរី។

លោកជំទាវ ជា សិរី បានមានប្រសាសន៍ថា៖ “ការទូទាត់តាមរយៈ QR Code រវាងកម្ពុជា និងថៃនេះនឹងអាចចាប់ផ្តើមនៅចុងឆ្នាំ2019 នេះ ព្រោះការងារធំៗយើងបានសម្រេចរួចអស់ទៅហើយ”។

លោកជំទាវ បានលើកឡើងផងដែរថា ការទូទាត់សាច់ប្រាក់ដោយប្រើប្រាស់ QR Code នេះមិនតម្រូវឱ្យប្រជាជនបង់ថ្លៃសេវាទូទាត់នោះទេ ព្រោះយើងធ្វើតាមរយៈធនាគារ នឹងធនាគារ។ ចំណែកឯអត្រាប្តូរប្រាក់នៃការទូទាត់វិញ គឺធនាគារ នឹងធនាគារ គេនឹងប្តូរឱ្យនៅពេលទូទាត់នោះតែម្តង តាមប្រព័ន្ធច្បាស់លាស់ ហេតុនេះប្រជាជននៃប្រទេសទាំង2 នឹងមានលក្ខណៈងាយស្រួលក្នុងការទូទាត់សាច់ប្រាក់ជាមួយគ្នា។ ការធ្វើបែបនេះអាចជួយដល់សេដ្ឋកិច្ចឱ្យមានការរីកលូតលាស់បានល្អប្រសើរផងដែរ ព្រោះប្រជាជន និងប្រជាជន អាចចរាចរសាច់ប្រាក់របស់ខ្លួនដោយងាយ ដែលធ្វើឱ្យទំហំនៃការផ្លាស់ប្តូរទំនិញ ឬចាយវាយកើនឡើង។ក្រៅពីនេះ វាក៏អាចងាយស្រួលផងដែរចំពោះការទាក់ទាញភ្ញៀវទេសចររវាងប្រទេសទាំង2។

ធនាគារចំនួន 3 នៅកម្ពុជាដែលស្ថិតក្នុងគម្រោងនៃការទូទាត់ប្រាក់រវាងកម្ពុជា និងថៃតាមរយៈ QRCode នេះ មានដូចជា ធនាគារអេស៊ីលីដា ធនាគារពាណិជ្ជកម្មក្រៅប្រទេស និងធនាគារកម្ពុជាពាណិជ្ជ។

គួរបញ្ជាក់ផងដែរថា បច្ចុប្បន្ននេះការប្រកួតប្រជែងបច្ចេកវិទ្យាហិរញ្ញវត្ថុ (Fintech) បានជំរុញឱ្យធនាគារទាំងក្នុងស្រុក និងក្រៅស្រុកជាច្រើនចាប់ផ្តើមបង្កើតសេវាកម្មបន្ថែមដោយឥតគិតថ្លៃតាមរយៈទូរស័ព្ទដៃ (Mobile Apps) ឬតាមរយៈបណ្តាញអុិនធើណិត ដើម្បីទាក់ទាញអតិថិជន និងសម្រួលដល់ការទូទាត់សម្រាប់អតិថិជនដោយមិនចាំបាច់កាន់សាច់ប្រាក់ផ្ទាល់នោះទេ។ ការធ្វើបែបនេះនឹងធ្វើឱ្យការទូទាត់កាន់តែមានភាពងាយស្រួល ទូលំទូលាយ តែក៏ជាកត្តាប្រឈមផងដែរសម្រាប់ប្រជាជន ព្រោះថា ប្រសិនបើយើងមិនអាចគ្រប់គ្រងការចាយវាយបានល្អទេនោះ ចរន្តទឹកប្រាក់របស់យើងក្នុង 1ខែៗនឹងហូរចេញយ៉ាងលឿនជាមួយភាពងាយស្រួល និងឆាប់រហ័សនៃការទូទាត់នេះផងដែរ៕

July 5, 2019

ទស្សនៈពីការត្រៀមខ្លួនរបស់កម្ពុជា ក្នុងការចូលមកដល់របស់បដិវត្តន៍ឧស្សាហកម្មទី4

មជ្ឈមណ្ឌលអភិវឌ្ឍន៍កម្ពុជាបានរៀបចំកម្មវិធីកិច្ចសន្ទនាដោយមានការពិភាក្សារួមគ្នាពីសំណាក់វាគ្មិនល្បីៗចំនួន 4រូប និងមានការចួលរួមពីវាគ្មិនមកពីស្ថាប័នរដ្ឋ និងឯកជនលើប្រធានបទស្ដីពី “កម្ពុជាឧស្សាហកម្ម4.0”។

កិច្ចពិភាក្សាស្ដីពី “កម្ពុជាឧស្សាហកម្ម4.0” ធ្វើឡើងក្នុងគោលបំណងបង្កើនការយល់ដឹងដល់ប្រជាជនកម្ពុជា ពិសេសសិស្ស-និស្សិតអំពីឧស្សាហកម្ម4.0 និងចូលរួមចំណែកដល់ការអភិវឌ្ឍគោលនយោបាយប្រទេសកម្ពុជា ឆ្ពោះទៅរកយុគសម័យថ្មីនៃភាពរីកចម្រើនរបស់បច្ចេកវិទ្យា។

សូមជម្រាបថា បដិវត្តន៍ឧស្សាហកម្មទី4 អាចឆ្ពោះមកបាន ក៏មានការឆ្លងកាត់នូវបដិវត្តន៍ឧស្សាហកម្មទី1 ទី2 និងទី3។ ដោយបដិវត្តន៍ឧស្សាហកម្មទី1កើតឡើងរវាងឆ្នាំ1760 និងឆ្នាំ1840 ហើយផលិតកម្មមេកានិកបង្ហាញខ្លួនលើកដំបូង តាមរយៈការបង្កើតម៉ាស៊ីនដើរដោយចំហាយទឹកគួបផ្សំជាមួយនឹងការប្រើប្រាស់ផ្លូវរថភ្លើង។ បដិវត្តន៍ឧស្សាហកម្មទី2 បង្ហាញខ្លួននៅចុងសតវត្សរ៍ទី19 តាមរយៈរបកគំហើញថាមពលអគ្គិសនី និងការបង្កើតខ្សែចង្វាក់ផលិតកម្មក្នុងរោងចក្រ និងបដិវត្តន៍ឧស្សាហកម្មទី3 បានកើតឡើងផ្អែកលើកការអភិវឌ្ឍន៍ផ្នែកបច្ចេកវិទ្យា ប្រព័ន្ធអ៊ីនធើណិត ព័ត៌មានវិទ្យា (IT) សឺមីកុងឌុចទ័រ និងកុំព្យូទ័រភាវូបនីយកម្ម។

លោកស្រី ចម និមល រដ្ឋលេខាធិការក្រសួងពាណិជ្ជកម្ម បានលើកឡើងថា ក្នុងក្របខ័ណ្ឌក្រសួងពាណិជ្ជកម្ម ក៏បាននិងកំពុងត្រៀមខ្លួនរួចជាស្រេច ដើម្បីទទួលយកនូវឧស្សាហកម្ម4.0នេះ ព្រមទាំងមានទិសដៅ2 ធំៗ ដោយក្នុងនោះទិសដៅទី1 បានអនុវត្តរួចមកហើយ ហើយទី2-កំពុងអនុវត្តក្នុងពេលឆាប់ៗនេះ។

លោកស្រីបន្ដថា៖“ទិសដៅទី1 ដែលក្រសួងពាណិជ្ជកម្មបានរៀបចំនោះគឺ ការចុះបញ្ជីអនឡាញទាំងការចុះបញ្ជីកម្មសិទ្ធិបញ្ញា ការចុះបញ្ជីអាជីវកម្មព្រមទាំងអាជ្ញាប័ណ្ណនាំចេញផ្សេងៗ ខាងក្រសួងពាណិជ្ជកម្មបាននិងកំពុងរៀបចំប្រព័ន្ធអនឡាញដែលអាចទទួលបានការឆ្លើយតប ការដាក់ពាក្យ និងការឆ្លើយតបបែបរហ័សក្នុងរយៈពេល 1-3ថ្ងៃនៃថ្ងៃធ្វើការ”។

ក្រៅពីការសម្រួលទាំងនេះ ក្រសួងបានរៀបចំប្រតិភូកាន់អំណាចដល់អាជ្ញាធរថ្នាក់ក្រោមជាតិ ដើម្បីឱ្យុពួកគាត់មានលទ្ធភាពក្នុងការជួយពង្រីកការបណ្ដុះបណ្ដាលពីរបៀបរបបនៃការចុះបញ្ជី ដើម្បីសម្រួលដល់អាជីវកម្មទូទាំងប្រទេស។

លោកស្រីបានបញ្ជាក់ថា៖“ចំណែកទិសដៅទី2 គឺជាការរៀបចំប្រព័ន្ធអនឡាញក្នុងក្រសួងតែម្ដងគឺជាប្រព័ន្ធមួយសម្រាប់ឆែករបាយការណ៍សម្រាប់ការវិវឌ្ឍរបស់អង្គភាពនីមួយៗ ក្រោមស្ថាប័នពាណិជ្ជកម្មទាំងមូល ដូចជារបាយការណ៍របស់អគ្គនាយកដ្ឋាន នៃអគ្គនាយកដ្ឋានពាណិជ្ជកម្មក្រៅប្រទេស ពាណិជ្ជកម្មក្នុងប្រទេសថា តើពួកគាត់បានដំណើរការដល់ណា ឬវិវឌ្ឍយ៉ាងណាបន្ថែមទៀត?“។

លោក ជី សិលា នាយកប្រតិបត្តិក្រុមហ៊ុនសប្បាយ ឌីជីថល បានឱ្យដឹងថា ;“សម្រាប់គំនិតខ្ញុំៗគិតថា បដិវត្តន៍ឧស្សាហកម្ម4.0នេះ នឹងផ្ដល់ភាពងាយស្រួលខ្លាំងមែនទែន ដែលអាចនិយាយបានថា មិនចាំបាច់ឱ្យមនុស្សនិយាយទេ ត្រឹមតែគិតក៏អាចផ្ដល់ទៅដល់បាន ប៉ុន្ដែសម្រាប់ភាពកាន់តែងាយស្រួលនេះ ក៏មានផលអវិជ្ជមានបន្ដិចផងដែរ គឺកាន់តែងាយស្រួល តែធ្វើឱ្យមនុស្សកាន់តែខ្ជិល”។

លោក អ៊ុង លុយណា អគ្គនាយករងនៃអគ្គនាយកដ្ឋានថវិកា នៃក្រសួងសេដ្ឋកិច្ច និងហិរញ្ញវត្ថុបានឱ្យដឹងថា ការចូលមកររបស់ឧស្សាហកម្ម4.0 នេះនឹងជួយដល់វិស័យសេដ្ឋកិច្ចជាតិច្រើន។ ជាក់ស្ដែងដូចក្នុងវិស័យកសិកម្មអាចធ្វើឱ្យមានឱកាសក្នុងការ-បង្កើនផលិតភាពរបស់យើង ឧទាហរណ៍ថា ពីមុនយើងធ្វើស្រែចម្ការបានទិន្នផលទាប ប៉ុន្ដែពេលឧស្សាហកម្ម4.0ចូលមក នឹងធ្វើឱ្យផលិតផលកសិកម្មហ្នឹងកាន់តែល្អប្រសើរឡើង។ លោកបន្ដថា ចំណែកឯការគ្រប់គ្រងរបស់រាជរដ្ឋាភិបាលវិញ ក៏កាន់តែងាយស្រួលផងដែរ ដោយរាជរដ្ឋាភិបាលគ្រប់គ្រង និងការបែងចែកធនធាន កាន់តែមានប្រសិទ្ធភាពជាងមុនជាដើម។

ឯកឧត្តមបណ្ឌិតសភាចារ្យ អូន ព័ន្ធមុនីរ័ត្ន ធ្លាប់បានមានប្រសាន៍ថា៖“សម្រាប់បណ្តាប្រទេសកំពុងអភិវឌ្ឍន៍ដូចជាកម្ពុជា បច្ចេកវិទ្យាថ្មី ផ្តល់ឱកាសដល់ការលោតទម្លាក់ដំណាក់កាលប្រពៃណី នៃការអភិវឌ្ឍ។ ក្នុងបរិបទនៃសកលភាវូបនីយកម្ម និងសមាហរណកម្មសកលលោក កម្ពុជាពិតជាមិនអាចចៀសវាងផលប៉ះពាល់នៃបដិវត្តន៍ឧស្សាហកម្ម 4.0 បានទេ ហើយទាមទារឱ្យរដ្ឋាភិបាលផ្តោតលើការចាប់យកឱកាសក៏ដូចជាគ្រប់គ្រងហានិភ័យផងដែរ”៕

July 5, 2019

ការបង្ហាញម៉ូដនាឡិកា លេខ 134

July 5, 2019

ម៉ូដសម្លៀកបំពាក់នារីម៉ាក LOOKSWOMEN លេខ 134

July 5, 2019

តើប្រទេសដែលល្បីខាងប្រជាជនមានសេចក្តីសុខ ភាគច្រើនមានលក្ខណៈពិសេសអ្វីខ្លះ?…

មិនមែនទ្រព្យសម្បត្តិ ឥទ្ធិពល ឬភាពល្បីល្បាញនោះទេ ដែលធ្វើឱ្យមនុស្សមានសេចក្តីសុខពិតប្រាកដនោះ ហេតុនេះហើយទើបគេសង្កេតឃើញថា ប្រទេសតូចៗមួយចំនួនបានដណ្តើមតំណែងជាប្រទេសដែលប្រ-ជាជនមានសេចក្តីសុខក្នុងសន្ទស្សន៍ល្អៗពីប្រទេសមហាអំណាចធំៗដែលមានការអភិវឌ្ឍឆាប់រហ័ស។ មនុស្សភាគច្រើនប្រហែលជាគិតថាអាមេរិក ចិន ឬប្រទេសដែលមានឧស្សាហកម្មធំៗ មានឥទ្ធិពលខាងសេដ្ឋកិច្ចក្នុងពិភពលោក ជាប្រទេសដែលមានពិន្ទុផ្នែកប្រជាជនមានសេចក្តីសុខខ្ពស់ជាងគេលើពិភពលោកហើយមើលទៅ តែតាមពិតទៅ នៅក្នុងតារាងនៃប្រទេសមានសេចក្តីសុខជាងគេលើពិភពលោកសម្រាប់ឆ្នាំ 2019 (world happiness report) បានបង្ហាញថា អាមេរិកស្ថិតនៅលើចំណាត់ថ្នាក់លេខ18 ចិនស្ថិតនៅក្នុងចំណាត់ថ្នាក់លេខ86 អង់គ្លេសស្ថិតនៅក្នុងចំណាត់ថ្នាក់លេខ19 និងប្រទេសធំៗមួយចំនួនទៀតមិនមែនស្ថិតនៅចន្លោះចាប់ពីលេខ1 ដល់លេខ10នោះទេ។ ផ្ទុយមកវិញ ប្រទេសតូចមួយចំនួនៗ ដែលប្រទេសខ្លះមិនសូវមាន GDP ខ្ពស់ផង តែបែរជាស្ថិតនៅក្នុងចំណាត់ថ្នាក់កំពូលៗនៃតារាងទៅវិញ។

ប្រទេសមួយចំនួនដែលបានប្រែក្លាយខ្លួនពីប្រទេសលំបាក និងគ្មានសេចក្តីសុខបានបង្ហាញពីវិធីសាស្ត្រដើម្បីជំរុញឱ្យមានការប្រែប្រួលយ៉ាងល្អប្រសើរសម្រាប់នាំភាពសុខសាន្តពិតប្រាកដមកជូនប្រជាជន។ នៅឆ្នាំ1948 ប្រទេស Costa Rica បានកាត់បន្ថយ ឬលុបចោលមិនឱ្យមានកងយោធាច្រើន ដើម្បីទុកថវិកាឱ្យបានកាន់តែច្រើនសម្រាប់ចំណាយទៅលើផ្នែកអប់រំ ដែលជាលទ្ធផលមកដល់បច្ចុប្បន្ននេះ ស្ថានភាពនៃការរស់នៅរបស់ប្រជាជនបានល្អប្រសើរឡើងខ្លាំងជាងប្រទេសអ្នកមានមួយចំនួន ដូចជាចក្រភពអង់គ្លេស និងអាមេរិកជាដើម។ នៅក្នុងឆ្នាំ2017 ពួកគេបានវិនិយោគថវិកាប្រមាណ 7.4% នៃផលិតផលក្នុងស្រុកសរុប (GDP) ទៅលើវិស័យអប់រំ។ ការធ្វើបែបនេះ គឺធ្វើឱ្យប្រជាជនចាប់ផ្តើមមានកម្រិតនៃការយល់ដឹងខ្ពស់ឡើង ហើយកាត់បន្ថយស្ថានភាពអនាធិបតេយ្យ និងអំពើទុច្ចរិតនៅក្នុងសង្គម និងនាំមកនូវការកើនឡើងនូវសុចរិតភាព និងប្រសិទ្ធភាពការងារដែលមិនយូរមិនឆាប់ ពួកគេអាចរៀបចំប្រព័ន្ធសេវាសាធារណៈបានយ៉ាងល្អ រួមទាំងទទួលបានធនធានមនុស្សល្អៗយ៉ាងច្រើនសម្រាប់អភិវឌ្ឍន៍ប្រទេសទៀតផង។

ប្រទេសប៊ូតាន ត្រូវបានគេស្គាល់ថា ជាប្រទេសមួយដែលស្ងប់ស្ងាត់ ដែលមាន GDP តិច តែមានភាពល្បីល្បាញរហូតពិភពលោកចាត់ទុកប្រទេសមួយនេះថា ជាដែនដីនៃសេចក្តីសុខ។ ប៊ូតាន បានបំភ្លេចចោល GDP តែផ្តោតសំខាន់លើការកសាងគុណភាពរបស់មនុស្ស ព្រោះពួកគេអាចបណ្តុះផ្នត់គំនិតមនុស្សឱ្យចេះរស់នៅជាមួយធម្មជាតិ និងពឹងពាក់ធម្មជាតិដោយការទាញផលប្រយោជន៍ប្រកបដោយនិរន្តរភាព។ ពួកគេចេះរស់នៅក្នុងជីវភាពរីករាយជាមួយនឹងធនធានដែលពួកគេទទួលបានពីធម្មជាតិ ហើយចេះសោយសុខជាមួយជីវិតដែលរស់នៅបែបសហគមន៍ និងចេះជួយគ្នាគ្រប់កាលៈទេសៈ។ ដោយសារតែបែបនេះហើយ ទើបធ្វើឱ្យប្រទេសប៊ូតាន បានក្លាយជាតំបន់ដ៏ស្មោះត្រង់ចំពោះគ្នា ហើយជាកន្លែងដែលប្រជាជនអាចបង្កបង្កើនផលដំណាំសុខភាពច្រើនជាងគេ។ ចំពោះបរិស្ថានវិញ ក៏ជាប់លំដាប់ថ្នាក់ខ្ពស់បំផុតដែលជាហេតុធ្វើឱ្យប្រជាជនមានសុខភាពល្អ និងមិនចំណាយច្រើនលើការព្យាបាលជំងឺ និងមានថាមពលគ្រប់គ្រាន់សម្រាប់ការសិក្សាពីចំណុចល្អៗនៃការរស់នៅ ដើម្បីបន្តភាពរីកចម្រើនដោយមិនអាចអវត្តមានបាននូវផ្នត់គំនិតរក្សាសេចក្តីសុខសម្រាប់មនុស្សគ្រប់គ្នា និងសង្គមសួនរួម។

ចំពោះប្រទេសនូវែលសេឡង់វិញ ពួកគេបានផ្តោតសំខាន់លើការផ្តល់សេវារក្សាសុខភាពផ្លូវចិត្ត និងចំណាយថវិកាច្រើនដើម្បីអភិវឌ្ឍផ្នែកដ៏សំខាន់នេះ។ក្នុងចំណោមថវិការាប់ពាន់លានដុល្លារនោះរដ្ឋាភិបាលក៏ផ្តោតការយកចិត្តទុកដាក់ខ្លាំងផងដែរ លើការជួយស្តារគ្រួសារដែលទទួលរងអំពើហិង្សា និងកុមារក្រីក្រ ព្រោះគេផ្តោតការយកចិត្តទុកដាក់ខ្លាំងលើកុមារ ដែលជាធនធានសំខាន់សម្រាប់អនាគតសង្គម។ ការធ្វើបែបនេះជាគោលការណ៍សំខាន់មួយនៃគោលដៅរបស់រដ្ឋាភិបាលដែលចង់វិនិយោគយូរអង្វែងដើម្បីស្វែងរកសុភមង្គលសម្រាប់ប្រជាជន ប្រសើរជាងការកើនឡើងនៃសេដ្ឋកិច្ចតែមួយមុខហើយការរស់នៅរបស់ប្រជាជនកាន់តែលំបាកទៅវិញ៕

July 5, 2019

នំបញ្ចុកខ្មែរបង្ហាញខ្លួននៅទីស្នាក់ការ អង្គការពាណិជ្ជកម្មពិភពលោក

ប្រមុខរាជរដ្ឋាភិបាលកម្ពុជា បានសម្ដែងនូវការរីករាយ ដែលនំបញ្ចុកខ្មែរបានបង្ហាញខ្លួននៅទីស្នាក់ការ អង្គការពាណិជ្ជកម្មពិភពលោ(World Trade Organization-WTO) នៅក្នុងកម្មវិធីសង្គម និងវប្បធម៌ នារាត្រីថ្ងៃទី 03 ខែកក្កដា ឆ្នាំ2019 នៅទីក្រុងហ្សឺណែវ ប្រទេសស្វីសនោះ។នេះបើតាមសរសេរនៅលើ បណ្ដាញទំនាក់ទំនងសង្គម ហ្វេសប៊ុក របស់សម្ដេចតេជោ ហ៊ុន សែន នាថ្ងៃទី 04 ខែកក្កដា ឆ្នាំ2019 ។

សម្ដេចតេជោបានបញ្ជាក់ថា៖» ខ្ញុំពិតជារីករាយ ដែលនំបញ្ចុកខ្មែរបានមកដល់ទីស្នាក់ការអង្គការពាណិជ្ជកម្មពិភពលោក (WTOកាលពីយប់មិញ នៅក្នុងកម្មវិធីសង្គម និងវប្បធម៌។ ដូចយើងដឹងហើយថា នំបញ្ចុកគឺជាអត្តសញ្ញាណនំរបស់ជាតិយើង ដែលបង្ហាញពីសាមគ្គីភាពស្អិតរមួតវេញត្របាញ់ចូលគ្នាដូចជាចង្វាយនំបញ្ចុក ដែលមានគ្រឿងផ្សំជាច្រើននាំមកនូវក្លិនដ៏ឈ្ងុយ និងរសជាតិដ៏ឆ្ងាញ់ពិសាដែលនាំមកនូវសុខភាពពិតៗ»។

សម្ដេចតេជោបានបន្ថែមថា៖» យើងចូលរួមឱ្យតម្លៃ លើកតម្កើងម្ហូបអាហារ និងនំចំណីខ្មែរឱ្យបានកាន់តែទូលំទូលាយនៅក្នុងពិធីសំខាន់ៗតូច ធំ ទាំងក្នុង និងក្រៅប្រទេស។ សម្ដេចតេជោក៏សូមអរគុណ និងជូនពរបងប្អូនជនរួមជាតិជួបតែសេចក្តីសុខ និងសំណាងល្អគ្រប់ទីកន្លែង»។

គួរបញ្ជាក់ដែរថា ក្នុងខណៈដឹកនាំគណៈប្រតិភូទៅចូលរួមកិច្ចប្រជុំ «ត្រួតពិនិត្យឡើងវិញជាសកល លើជំនួយសម្រាប់ពាណិជ្ជកម្ម ឆ្នាំ2019 » នារាត្រីថ្ងៃទី 03 ខែកក្កដា ឆ្នាំ2019 សម្តេចអគ្គ មហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានអញ្ជើញជាអធិបតីដ៏ខ្ពង់ខ្ពស់ ក្នុងពិធីបើកកម្មវិធីព្រឹត្តិការណ៍សង្គម និងវប្បធម៌ ដែល ប្រារព្វធ្វើឡើងនៅទីស្នាក់ការកណ្តាល អង្គការពាណិជ្ជកម្មពិភពលោក ក្នុងទីក្រុងហ្សឺណែវ សហព័ន្ធស្វីស។

ក្នុងពីធីនោះ ក៏មានការអញ្ជើញចូលរួមពី ឯកឧត្តម រ៉ូប៊ែរតូ អាហ្សេវ៉េឌូ អគ្គនាយកអង្គការពាណិជ្ជកម្មពិភពលោក ព្រមទាំងវត្តមាន ឯកឧត្តម លោកជំទាវ អនុប្រធានាធិបតី និងតំណាងប្រទេសនៃសមាជិកអង្គការពាណិជ្ជកម្មពិភពលោកជាច្រើនរូប។

ក្នុងព្រឹត្តិការណ៍ដ៏មានអត្ថន័យជាប្រវត្តិសាស្រ្ត និងក្នុងនាមជាប្រទេសម្ចាស់ផ្ទះ ដែលរៀបចំ ព្រឹត្តិការណ៍សង្គម និងវប្បធម៌ សម្តេចអគ្គមហាសេនាបតីតេជោ ហ៊ុន សែន និងថ្នាក់ដឹកនាំទាំងអស់នៃប្រទេសជាសមាជិក អង្គការពាណិជ្ជកម្មពិភពលោក អញ្ជើញពិសារនំបញ្ចុក និងបង្អែមប្រពៃណីជាតិខ្មែរ ដែលរៀបចំដោយអ្នកចុងភៅមកពីប្រទេសកម្ពុជា និងប្រជាពលរដ្ឋនៅសហភាពអឺរ៉ុប។

ជាមោទនភាពសម្រាប់ប្រទេសកម្ពុជា ថ្នាក់ដឹកនាំ នៃអង្គការពាណិជ្ជកម្មពិភពលោក និងថ្នាក់ដឹកនាំនៃប្រទេសជាសមាជិក អង្គការពាណិជ្ជកម្មពិភពលោកដែលមានវត្តមានក្នុងព្រឹត្តិការណ៍សង្គម និងវប្បធម៌ គឺសុទ្ធតែសម្ដែងនូវការកោតសរសើរចំពោះរស់ជាតិ នៃម្ហូបប្រពៃណីជាតិខ្មែរគឺ«នំបញ្ចុក»ដែលមានរស់ជាត់ឈ្ងុយឆ្ងាញ់ពិសានេះផងដែរ៕

July 5, 2019

ករណីជំងឺប៉េស្តជ្រូកអាហ្រ្វិក ASF ត្រូវបានរកឃើញក្នុងទីតាំងថ្មី

រដ្ឋមន្រ្តីក្រសួងកសិកម្មបានថ្លែងឱ្យដឹងថា ក្រសួងរបស់លោកបានសម្រេចកំណត់តំបន់ផ្ទុះជំងឺប៉េស្តជ្រូកអាហ្រ្វិក ASF នៅក្នុងភូមិចំនួន2 ក្នុងខេត្តត្បូងឃ្មុំនៅជិតព្រំដែនប្រទេសវៀតណាម ដើម្បីបង្ការ និងទប់ស្កាត់កុំឱ្យមានការរីករាលដាលទៅដល់តំបន់ដទៃទៀតនៅកម្ពុជា។ នេះបើយោងតាមប្រកាសរបស់ក្រសួងកសិកម្ម រុក្ខាប្រមាញ់ និងនេសាទ ចុះថ្ងៃទី2 ខែកក្កដា ឆ្នាំ2019។

ឯកឧត្តម វេង សាខុន រដ្ឋមន្រ្តីក្រសួងកសិកម្មបានថ្លែងថា ការរកឃើញករណីនេះបានជំរុញឱ្យអគ្គនាយកដ្ឋានសុខភាពសត្វ និងផលិតកម្មស្បៀងត្រូវធ្វើ«សកម្មភាពជាបន្ទាន់» នៅក្នុងភូមិកំពង់សេរី និងភូមិសោយ ក្នុងឃុំមៀន ស្រុកអូររាំងឪ ខេត្តត្បូងឃ្មុំ។

ក្នុងសេចក្តីប្រកាស ឯកឧត្តម វេង សាខុន បានបញ្ជាឱ្យអគ្គនាយកដ្ឋានសុខភាពសត្វ និងផលិតកម្មសត្វ ត្រូវចាត់វិធានការបសុព្យាបាលជាបន្ទាន់នៅតំបន់ផ្ទុះជំងឺប៉េស្តជ្រូកអាហ្រ្វិកនេះនៅ តំបន់ខាងលើ ក្នុងនោះត្រូវបំផ្លាញចោលចំពោះសត្វជ្រូកគ្រប់ប្រភេទក្នុងតំបន់ផ្ទុះជំងឺទៅតាមវិធានការបសុព្យាបាល។

ជាមួយគ្នានេះ ត្រូវផ្អាកលើការទិញ ការលក់ និងការដឹកជញ្ជូនសត្វជ្រូក សាច់ជ្រូក និង ផលិតផលមានដើមកំណើតពីសត្វជ្រូកគ្រប់ប្រភេទ ចូល-ចេញ ឬឆ្លងកាត់ និងដាក់តំបន់នេះជា តំបន់ត្រួតពិនិត្យ និងតាមដាន។ ឯកឧត្តមរដ្ឋមន្រ្តីក៏បានឱ្យផ្អាកជាបណ្តោះអាសន្នចំពោះការចិញ្ចឹម ទិញ លក់ និងដឹកជញ្ជូនសត្វជ្រូក សាច់ជ្រូក និងផលិតផលមានដើមកំណើតពីសត្វជ្រូកគ្រប់ប្រភេទ នៅក្នុងតំបន់ផ្ទុះជំងឺប៉េស្តជ្រូកអាហ្រ្វិកនេះផងដែរ។

ឯកឧត្តមបានមានប្រសាសន៍ថា៖«ខ្ញុំបានប្រាប់មន្រ្តីក្រសួងដើម្បីកំណត់អត្តសញ្ញាណសត្វ ជ្រូកឆ្លងមេរោគ ត្រូវផ្អាកការជួញដូរសាច់ជ្រូកនៅជុំវិញតំបន់ដែលរងផលប៉ះពាល់ ហើយតំបន់ទាំងនេះត្រូវតែបង្កើនការត្រួតពិនិត្យ និងត្រូវចាត់វិធានការថែមទៀត ដើម្បីតាមដាន និងរារាំងការដឹកជញ្ជូនជ្រូកនៅចម្ងាយ 10គីឡូម៉ែត្រពីភូមិទាំង2» ។

ឯកឧត្តម តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាព និងផលិតកម្មសត្វបានលើកឡើងថា ដោយសារតែការរីករាលដាលនៃជំងឺនេះក្រុមការងារមួយកំពុងតាមដានព្រំដែនកម្ពុជា -វៀតណាមដើម្បីពិនិត្យមើលថា តើសត្វជ្រូកឆ្លងចូលមកក្នុងប្រទេសកម្ពុជាយ៉ាងដូចម្តេច?

ឯកឧត្តមបានកត់សម្គាល់ថា លទ្ធផលបឋមនៃដំណើរការតាមដានបានបង្ហាញថា ការបង្ករោគអាចមកពីផលិតផលសាច់ជ្រូកដែលត្រូវបានលក់នៅលើម៉ូតូតាមបណ្តោយព្រំដែនជាមួយវៀតណាម។

សូមជម្រាបជូនថា ជំងឺប៉េស្តជ្រូកអាហ្រ្វិកនេះមិនឆ្លងទៅមនុស្សទេ យោងតាមក្រសួងបានឱ្យដឹងថា ទោះបីជាមានវត្តមានរបស់ ASF នៅខេត្តត្បូងឃ្មុំក៏ដោយ ក៏ជំងឺនេះមិនអាចចម្លង និងប៉ះពាល់ដល់មនុស្សទេ ប៉ុន្តែជំងឺនេះបណ្តាលឱ្យសត្វជ្រូកឈឺ និងងាប់មានអត្រាខ្ពស់រហូតដល់100% ដែលបង្កការខាតបង់យ៉ាងធ្ងន់ធ្ងរដល់អ្នកចិញ្ចឹមជ្រូកតែប៉ុណ្ណោះ។ គេបានកត់សម្គាល់ថា ក្រសួងមានការព្រួយបារម្ភខ្លាំងអំពីផលប៉ះពាល់ខាងសេដ្ឋកិច្ច។

បច្ចុប្បន្ន មិនមានវិធីព្យាបាលជំងឺនេះឱ្យជាសះស្បើយ និងមិនទាន់មានថ្នាំបង្ការ ឬការព្យាបាលណាមួយដែលមានប្រសិទ្ធភាពនៅឡើយទេ ដូច្នេះនៅពេលដែលសត្វជ្រូកឆ្លងជំងឺនេះ វិធាន ការតែមួយគត់ គឺកម្ទេចហ្វូងជ្រូកដែលមានមេរោគទាំងនោះចោលតែម្ដង។

កាលពីខែមេសា ក្រសួងកសិកម្មបានឱ្យដឹងថា ជំងឺប៉េស្តជ្រូកអាហ្វ្រិកបានផ្ទុះឡើងជាលើក ដំបូងនៅក្នុងភូមិសោមកានិញ ឃុំសោមធំ ស្រុកអូរយ៉ាដាវ ខេត្តរតនគិរី។ បន្ទាប់ពីមានសត្វជ្រូកប្រហែល 400ក្បាលបានងាប់កាលពីថ្ងៃទី22 ខែមីនា ឆ្នាំ2019 ខណៈជ្រូក 193ក្បាលផ្សេងទៀតត្រូវបានកម្ទេចក្រោយរកឃើញជំងឺប៉េស្តជ្រូកអាហ្វ្រិកនេះ។

ហេតុការណ៍នេះបានជំរុញឱ្យមន្ត្រីកសិកម្មនៅតាមខេត្តជាប់ព្រំដែនជាមួយវៀតណាមបង្កើនការការពារការនាំចូលផលិតផលសាច់ជ្រូក និងបានបាញ់ថ្នាំសម្លាប់មេរោគនៅក្នុងកសិដ្ឋានចិញ្ចឹមជ្រូកផងដែរដោយភ័យខ្លាចការរីករាលដាលនៃមេរោគ ASF៕

July 5, 2019

Joao Felix ក្លាយជាកីឡាករវ័យក្មេងថ្លៃជាងគេលើលោកទី២ បន្ទាប់ពី Kylian Mbappe

កាលពីពេលថ្មីៗនេះ Joao Felix ដែលជាខ្សែប្រយុទ្ធរបស់ក្លិប Benfica បានទៅដល់ទឹកដីអេស្ប៉ាញ និងក្លាយជាកីឡាកររបស់ Atletico Madrid ជាផ្លូវការហើយ។

កីឡាករសញ្ជាតិព័រទុយហ្គាល់ វ័យ១៩ឆ្នាំរូបនេះ បានផ្ទេរទៅកាន់ក្លិបថ្មីក្នុងតម្លៃខ្លួន ១២៦លានអ៊ឺរ៉ូ ក្លាយជាកីឡាករវ័យក្មេងថ្លៃបំផុតលើលោកបន្ទាប់ពី កីឡាករសញ្ជាតិបារាំង Kylian Mbappe។

គួរបញ្ជាក់ផងដែរថា Felix ទើបជាប់ឈុតធំ របស់ក្លិប Benfica ដំបូងកាលពីខែសីហាឆ្នាំកន្លទៅតែប៉ុណ្ណោះ តែស៊ុតបញ្ចូលទី១៥គ្រាប់ និងជួយ Benfica ឈ្នះជើងឯកលីគនៅរដូវកាលមុន៕

July 5, 2019

Author: ធឿន មករា