ធឿន មករា - La Reine Media

ទទួលបានភាពស្រស់ស្អាត ដោយវីតាមីន 7ប្រភេទ

ផ្ទៃមុខស្រស់ស្អាតតែម្យ៉ាងមិនគ្រប់គ្រាន់ទេ តែស្បែកក៏ត្រូវតែស្អាតដូចគ្នាដែរ ហើយមានវិធីច្រើនណាស់ ដើម្បីឱ្យស្បែកស្អាត ដែលក្នុងនោះមានទាំងការថែសម្រស់តាមរយៈការប្រើប្រាស់ផលិតផល ការជំនួយស្បែកតាមបែបធម្មជាតិដូចជា ការខាត់ ឬការទទួលទានជាដើម។ លេខនេះ ឡារ៉ែន សូមណែនាំអ្នកឱ្យងាកមកថែរក្សាសម្រស់តាមរយៈការដាក់បញ្ចូលវីតាមីនវិញម្តង ហើយវីតាមីនទាំងនោះមានដូចជា៖

1. វីតាមីន A : និយាយដល់វីតាមីន A ធ្វើឱ្យគិតដល់ភាពភ្លឺថ្លានៃភ្នែក ប៉ុន្តែអ្នកដឹងទេថាក្រៅពីភ្នែកហើយនោះវាក៏ជួយថែរក្សាស្បែកផងដែរ។ បើអ្នកជាមនុស្សម្នាក់ក្នុងចំណោមអ្នកផ្សេងទៀតដែលមានស្បែកស្ងួតនោះ វីតាមីន A ពិតជាក្លាយជាមិត្តដែលយល់ចិត្តអ្នកបំផុតក្នុងការជួយកម្ចាត់សភាពស្បែកស្ងួត ជួយស្តារ និងជួសជុលជាលិកាស្បែកធ្វើឱ្យស្បែករលោងមានសំណើម និងស្រស់ស្រាយ។

2. វីតាមីន B Complex : មិនថាវាជា វីតាមីន B1, B2, B3, B5, B6, B7, B9 ឬជា B12 នោះទេគឺសុទ្ធតែមានគុណប្រយោជន៍សម្រាប់សម្រស់ និងសុខភាពរបស់យើងគ្រប់គ្នា។ ស្បែក សក់ ក្រចក ឈាម ភ្នែក… សុទ្ធតែទទួលបានប្រយោជន៍ជាច្រើនពីវីតាមីនទាំងប៉ុន្មានខាងលើនេះ។ អាហារដែលសម្បូរទៅដោយប្រភពវីតាមីន B ទាំងអស់នេះ ដូចជាបន្លែស្លឹកបៃតង រុក្ខជាតិពពួកសណ្តែក និងគ្រាប់សណ្តែកផ្សេងៗ សាច់សត្វ ត្រី ផលិតផលធ្វើពីទឹកដោះគោ ធញ្ញជាតិ ចេក ស៊ុត ស្រូវ និងស្រូវអូត ហើយវីតាមីន B ប្រភេទខ្លះរាងកាយអាចផលិតបានដោយខ្លួនឯង។

3. វីតាមីន C និង E : មានបញ្ហាស្បែកជ្រួញ ព្រោះត្រូវកម្តៅថ្ងៃខ្លាំងមែនទេ? អីុចឹង សូមជ្រើសយកវីតាមីន C និង E ចុះ ព្រោះវាមាននាទីជួយកែបញ្ហាស្បែកជ្រីវជ្រួញដែលជាមូលហេតុនាំឱ្យអ្នកចាស់ជាងវ័យ ជួយការពារស្បែកពីកម្តៅថ្ងៃ បន្ថយស្នាមរលាករោលពីកាំរស្មី UVB។

4. វីតាមីន K : សម្រាប់អ្នកដែលមានបញ្ហារង្វង់ភ្នែកខ្មៅ គួរទទួលយកវីតាមីន K មកធ្វើជាគ្រូពេទ្យព្យាបាល ព្រោះវាមានចំណែកជួយការពារកុំឱ្យឈាមកកស្ទះ ធ្វើឱ្យអ្នកអាចកាត់បន្ថយស្នាមខ្មៅ និងស្នាមជាំ ប៉ុន្តែមិនចាំបាច់ដាក់បញ្ចូលទៅក្នុងរាងកាយច្រើនពេកនោះទេ ព្រោះការពិតទៅពោះវៀនតូចរបស់អ្នកក៏អាចបង្កើតវីតាមីន K ដោយខ្លួនឯងបាន ដោយអ្នកគ្រាន់តែបន្ថែមត្រឹមតែ100មីក្រូក្រាមក្នុងមួយថ្ងៃ តាមរយៈអាហារពពួកបន្លែស្លឹកបៃតង (ជាពិសេសស្ពៃប្រ៊ូខូលី និងផ្ទី) ប្រេងសណ្តែកសៀង កាហេ្វ សាច់សត្វ ទឹកដោះគោ គឺចាត់ទុកថាគ្រប់គ្រាន់ទៅហើយ។

5. រ៉ែធាតុទង់ដែង និងស័ង្កសី : សម្រាប់អ្នកដែលខ្លាចភាពជ្រីវជ្រួញគួរតែបានទទួលរ៉ែធាតុដូចជា ទង់ដែង និងស័ង្កសី។ វាមានចំណែកជួយឱ្យស្បែកតឹងណែន ដោយសារតែរ៉ែធាតុទង់ដែងមានចំណែកជួយក្នុងការបង្កើតសរសៃទឹកប្រូតេអុីន ក្នុងពេលដែលរ៉ែធាតុស័ង្កសីជួយជួសជុលសរសៃទឹកប្រូតេអីុនដែលសឹករេចរិល កាត់បន្ថយការផលិតជាតិខ្លាញ់ និងកាត់បន្ថយការកើតមុន ជួយពង្រឹងការលូតលាស់របស់កោសិកា និងព្យាបាលមុនទៀតផង។

6. Q10 : ជាខូអង់ហ្ស៊ីមដ៏សំខាន់ក្នុងការធ្វើជាសារធាតុទប់ស្កាត់រ៉ាឌីកាល់សេរី ឬជួយការពាររ៉ាឌីកាល់សេរីដែលកើតពីកាំរស្មី UV ធ្វើឱ្យស្បែករបស់អ្នកភ្លឺថ្លា បង្អង់ភាពចាស់។ អាហារដែលជាប្រភពQ10នេះគឺ ត្រីសមុទ្រទឹកជ្រៅ ប្រេងសណ្តែក ស៊ុត ត្រីសាឌីន ត្រីស្បៃកា សណ្តែកសៀង សាច់គោ ថ្លើម និងបេះដូង។

7. អាស៊ីដអាល់ហ្វាឡៃប៉ូអុីក : រាប់ថាជាសារធាតុទប់ស្កាត់រ៉ាឌីកាល់សេរីកម្រិតកំពូលតែម្តង មិនតែប៉ុណ្ណោះថែមទាំងមានចំណែកជួយក្នុងការបង្កើនប្រសិទ្ធភាពដំណើរការរបស់សារធាតុទប់ស្កាត់រ៉ាឌីកាល់សេរីផ្សេងៗដូចជា វីតាមីន C វីតាមីន E គ្លុយតាថៃអូន ឬ Q10 ប៉ុន្តែគុណសម្បតិ្តរបស់អាស៊ីដអាល់ហ្វាប៉ូអីុកនោះអាចរលាយបានទាំងក្នុងទឹក និងខ្លាញ់ ហើយថែមទាំងអាចជ្រាបឆ្លងកាត់ភ្នាស់ស្រោមកោសិកាចូលទៅបានជ្រៅដល់កម្រិត ជាភាពខុសគ្នាពីសារធាតុទប់ស្កាត់រ៉ាឌីកាល់សេរីផ្សេងៗ ដែលធ្វើឱ្យអាស៊ីដអាល់ហ្វាឡៃប៉ូអីុកច្រើនតែត្រូវបានគេនាំយកមកប្រើដើម្បីបំពេញជំនួស។ ប្រភពអាហារដែលសម្បូរទៅដោយអាស៊ីដអាល់ហ្វាឡៃប៉ូអីុក មានដូចជា សាច់ក្រហម និងគ្រឿងក្នុង។ ចំណែកក្នុងបន្លែវិញមានខ្លះៗដែរ ប៉ុន្តែមិនច្រើនណាស់ណាទេ ដូចជា ដំឡូងបារាំង ការ៉ុត និងផ្ទីជាដើម។ចាប់ផ្តើមងាកមករកវីតាមីនទាំង7មុខនេះពីពេលនេះតទៅ គឺមានន័យថា ចាប់ផ្តើមវាយដណ្តើមយកភាពស្រស់ស្អាតមកធ្វើជាកម្មសិទ្ធិរបស់អ្នក៕

July 22, 2019

ការប្រកួតសប្តាហ៏ទី 16 នេះ កីឡដ្ឋានវិសាខា ស្រូបយកអ្នកទស្សនាបាន 5,500នាក់

ការប្រកួតក្នុងសប្តាហ៍ទី16 នៃពានរង្វាន់ជម្រើសជើងឯក មិត្តហ្វូន ខេមបូឌាន ឆ្នាំ2019 នេះ ការប្រកួតរវាងក្លិបបាល់ទាត់ វិសាខា ជាមួយ ភ្នំពេញក្រោន នៅថ្ងៃអាទិត្យ ទី21 ខែកក្កដា ឆ្នាំ2019 កន្លងទៅនេះ បានក្លាយជាការប្រកួតដែលមានអ្នកទស្សនាច្រើនជាងគេបង្អស់នៅក្នុងលីកកំពូលរបស់កម្ពុជា ដោយមានវត្តមានរបស់អ្នកគាំទ្រដែលបានទៅចូលរួមទស្សនាផ្ទាល់សរុបចំនួន 5,500នាក់នៅកីឡដ្ឋានវិសាខា។តាមរយៈរបាយការណ៍អំពីការប្រកួតនេះ ក្រុមអ្នកទស្សនាភាគច្រើន គឺជាអ្នកគាំទ្រក្រុមទាំង2 គឺភ្នំពេញក្រោន និងវិសាខា។ ចំពោះលទ្ធផលគឺ ក្រុមម្ចាស់ផ្ទះវិសាខា បានយកឈ្នះក្រុមភ្ញៀវក្នុងលទ្ធផលប្រកៀកប្រកិតគ្នា 4ទល់នឹង3។
គួរបញ្ជាក់ផងដែរថា មកទល់នឹងពេលនេះ ក្រុមព្រះខ័នរាជស្វាយរៀងកំពុងកាន់កាប់កំពូលតារាងលីកកំពូលកម្ពុជា ខណៈដែលវិសាខាកំពុងឈរនៅលំដាប់ថ្នាក់លេខ4 ឯក្រុមភ្នំពេញក្រោនវិញ កំពុងតែឈរនៅលំដាប់ថ្នាក់ទី6 នៃតារាងពិន្ទុលីកកំពូលកម្ពុជារដូវកាល2019 នេះ៕

July 22, 2019

ទីបំផុត Pacquiao ធ្វើឱ្យ Keith Thurman ភ្លក្សរសជាតិចាញ់លើកដំបូងក្នុងឆាកជីវិត

នៅព្រឹកថ្ងៃទី21 ខែកក្កដា ឆ្នាំ2019 កន្លងទៅ អ្នកប្រដាល់វាយមិនដែលចាញ់ Keith Thurman បានឡើងសង្វៀនដើម្បីវាយការពារខ្សែក្រវាត់ WBA (super) welterweight របស់ខ្លួនជាមួយជើងខ្លាំងរបស់អាស៊ី Manny Pacquiao។

ស្ដេចប្រដាល់នៅអាស៊ី Manny pacquiao បើទោះជាអាយុច្រើនបន្តិចក្ដី ប៉ុន្តែនៅតែល្អដដែល ដោយបានយកឈ្នះអ្នកប្រដាល់មិនដែលចាញ់របស់អាមេរិក Keith Thurman នេះ និងដណ្ដើមយកខ្សែក្រវាត់ WBA (super) welterweightបានសម្រេចដោយពិន្ទុមិនឯកច្ឆន្ទ(2ទល់នឹង1)។
ជាលទ្ធផលបន្ទាប់ពីការប្រកួតដំណើរការចប់ចុងចប់ដើម 12ទឹកពេញ ស្តេចប្រដាល់ហ្វីលីពីនបានយកឈ្នះកីឡាករអាមេរិកាំងដោយពិន្ទុមិនឯកច្ឆន្ទ ដោយចៅក្រម 1រូបឱ្យកីឡាករអាមេរិកឈ្នះ(114ទល់113) និងចៅក្រម 2រូបទៀតឱ្យអ្នកប្រដាល់ហ្វីលីពីនជាអ្នកឈ្នះ(115ទល់112 និង115ទល់112 ដូចគ្នា)៕

July 22, 2019

កាសែតឡារ៉ែន ពាណិជ្ជ លេខ 182

[easy_media_download url=”https://www.lareine.com.kh/wp-content/uploads/2019/08/LRPN_182-Final-For-Web.pdf” force_dl=”1″]

July 21, 2019

ពិតជាកក្រើកចំពោះព្រឹត្តិការណ៍នៃការសម្ពោធ vivo S1 កាលពីយប់ម្សិលមិញ

ភ្នំពេញថ្ងៃទី២០ ខែកញ្ញា ឆ្នាំ២០១៩ ក្នុងស្ទុឌីយ៉ូទូរទស្សន៍ហង្សមាស HDTV ផ្សារទំនើបអ៊ីអនម៉លសែនសុខស៊ីធី ក្រុមហ៊ុន vivo បានធ្វើកម្មវិធីសម្ពោធជាផ្លូវការទៅលើម៉ូឌែល vivo S1 ដែលជាម៉ូឌែលថ្មីរបស់ខ្លួន នៃស្មាតហ្វូនត្រកូល S ដំបូងគេបង្អស់ដែលមានវត្តមាននៅលើទីផ្សារប្រទេសកម្ពុជាផងដែរ ជាមួយនឹងព្រឹត្តិការនៃការប្រគំតន្ត្រី vivo S1Concert។ សម្រាប់ព្រឹត្តិការ vivo S1 Concert នេះដែរមានការចូលរួមយ៉ាងច្រើន កុះករពីសំណាក់មហាជន និងជាពិសេសក៏មានការចូលរួមពីតារាតំណាង របស់ក្រុមហ៊ុន vivo គឺកញ្ញា សុខ ពិសី កញ្ញា ឡូរ៉ា ម៉ម តែមិនមានវត្តមានរបស់លោក ព្រាប សុវត្ថិ នោះទេព្រោះតែ គាត់ជាប់ធុរៈផ្ទាល់ខ្លួន។ ប៉ុន្តែ លោក ព្រាប សុវត្ថិ ក៏បានចេញវីឌីអូ សូមអភ័យទោស សម្រាប់ការខកខានមិនបាន ចូលរួមនិងសូមអបអរសាទរ ដល់ការសម្ពោធម៉ូឌែល vivo S1 ឲ្យមានជោគជ័យក្នុងការលក់ផងដែរ។
មិនតែប៉ុណ្ណោះក៏បានឃើញមានវត្តមានចូលរូមដោយតារាល្បីមួយចំនួនទៀតចូលរួមផងដែរគឺលោក ខេមរៈ សិរីមន្ត លោក ហ្សូណូ លោក នី រតនា ហើយនិងតារាចម្រៀងវ័យក្មេងទាំងពីរដួង ពេជ្រ ថៃ និង សុខ សុជាតា រួមទាំងមានការចូលរួមពីសំណាក់តារាកិត្តិយសជាច្រើនដួងផ្សេងទៀតដូចជា៖លោក យ៉ារ៉ូ និងកញ្ញា Daa Dao។
ហើយចំពោះស្មាតហ្វូន vivo S1 នេះដែរត្រូវបានធ្វើការប្រកាសនៅក្នុងថ្ងៃសម្ពោធនេះជាមួយនឹងកញ្ចប់តម្លៃត្រឹម $299 តែប៉ុណ្ណោះ។ វាជាតម្លៃមួយដ៏សាកសមដែលមិនខ្ពស់ពេក ហើយក៏មិនទាបពេកដែរ។ សម្រាប់មិត្តៗយុវវ័យប្រហែលជាមិនមើលរំលងចំពោះម៉ូឌែល vivo S1 នេះទេ។ បើនិយាយពីការរចនាទៅលើ S1 នេះវិញគឺសុទ្ធសឹងតែមានភាពឆ្នៃប្រឌិតខ្ពស់។
ទាំងនេះជាលក្ខណៈសម្បត្តិមួយចំនួនរបស់ vivo S1៖

– មានរូបរាងបែប Gradient

– មានអេក្រង់ជាប្រភេទឆកបែបតំណក់ទឹក ទំហំ 6.38 អ៊ីញ ជាប្រភេទSuper AMOLED អាចបង្ហាញរូបភាពបានក្នុងកម្រិត 1080×2340FHD+ លាតសន្ធឹងប្រមាណ 90% នៃផ្ទៃខាងមុខ និងមានកម្រិត Aspect Ratio 19.5:9

– ដំណើរការដោយ Android 9.0 Oreo និងស្រោបខ្លួនដោយFunTouch OS 9

– ដំណើរការដោយប្រពន្ធ័ octa-core ដែលរចនាមកមានទំហំ 12nm និងមានល្បឿន 2.0GHz

– ដំណើរការស៊ីមកាតបានពីរ + ទ្រទ្រង់ 4G

– មានរ៉េមទំហំ 6GB និងមានអង្គផ្ទុកទិន្នន័យក្នុងម៉ាស៊ីន 128GB + ថែមក្រៅបាន 256GB

– កាមេរ៉ាក្រោយ 3 គ្រាប់ (16MP + 8MP + 2MP) Ai Super Wide-Angle Camera និងកាមេរ៉ាមុខទំហំ 32MP

– ប្រព័ន្ធសុវត្ថិភាព: បច្ចេកវិទ្យាស្កេនក្រយៅដៃនៅលើអេក្រង់ + ស្កេនមុខ

– មានកម្លាំងថ្ម 4500 mAh
– មានជម្រើសពណ៌ថ្មី 2 ពណ៌គឺ ពណ៌ផ្កាឈូកបែកទឹកសមុទ្រខៀវ(Skyline Blue) និងពណ៌ខ្មៅបែកស្វាយ (Diamond Black)
ជាមួយនឹងគ្នានេះដែរ ចំពោះស្មាតហ្វូន vivo S1 នេះគឺត្រូវបានបើកឲ្យធ្វើកុម្មង់ចាប់ពីថ្ងៃទី២១ នេះតទៅរហូតដល់ថ្ងៃទី២៦ ខែ កក្កដា ឆ្នាំ២០១៩។
សម្រាប់កម្មវិធីនៃការ Pre-Order នៅថ្ងៃទី២១ នេះដែរនឹងធ្វើឡើងនៅផ្សារទំនើបអ៊ីអនម៉ល សែនសុខស៊ីធី ជាន់ផ្ទាល់ដី Center Court ជិត Brown Coffee ដែលធ្វើឡើងចាប់ពីម៉ោង១០ ព្រឹក រហូតដល់ម៉ោង១០យប់។ មិនតែប៉ុណ្ណោះព្រមទាំងមានការចូលរួមដោយតារាចម្រៀង Original Song លោក ថេនា និងតារាសម្តែងលោក យ៉ារ៉ូ និងកញ្ញា ដាដាវ។ សម្រាប់អ្នកដែលធ្វើការកុម៉្មង់ទុកមុន Vivo S1 លោកអ្នកនឹងទទួលបាននូវកាដូបន្ថែម កែវពង្រីកមើល Video លើទូរសព្ទ័ដៃ Sim Smartដែលមានតម្លៃ $54 ដោយឥតគិតថ្លៃ ជាមួយនឹងគម្រោង Smart ធំហ្មង១២ សប្តាហ៍ចាប់ពីថ្ងៃទី២១ រហូតទៅដល់ថ្ងៃទី២៦ ខែកក្កដា ឆ្នាំ២០១៩។

ចំពោះអ្នកដែលបានមកធ្វើការកុម្ម៉ង់ទុកមុននូវស្មាតហ្វូន vivo S1 ផ្ទាល់នៅឯផ្សារទំនើបអ៊ីអនម៉លសែនសុខស៊ីធី ថ្ងៃទី២១ ខែកក្កដា ឆ្នាំ២០១៩លោកអ្នកនឹងមានឱកាសពិសេសបន្ថែមលើសពីនេះទៅទៀតជាមួយនឹងការទទួលបាននូវការចាប់ឆ្នោតផ្សងសំណាង១ សន្លឹកដែលមានឱកាសឈ្នះ១០០% រួមមានដូចជា៖

– ទូទឹកកក

– កាស ប្ល៊ូធូ

– ម៉ាស៊ីនគាបផ្លែឈើ និងរង្វាន់ផ្សេងៗជាច្រើនទៀត…!

រួសរាន់ឡើងសម្រាប់អតិថិជនដែលតែងតែគាំទ្រទៅលើផលិតផលស្មាតហ្វូន vivo ធ្វើការកុម្ម៉ង់ស្មាតហ្វូន vivo S1 ឥឡូវនេះលោកអ្នកនឹងមានឱកាសឈ្នះរង្វាន់យ៉ាងសន្ធឹកសន្ធាប់ពី vivo។ ប្រញាប់ឡើងសំណាងនឹងអាចក្លាយជារបស់អ្នក!!

July 21, 2019

ត្រៀមខ្លួនធ្លាក់បាក់ឌុបឱ្យហើយទៅ បើនៅតែមិនព្រមបញ្ឈប់សកម្មភាពអសកម្មមួយចំនួន

ការប្រឡងមធ្យមសិក្សាទុតិយភូមិ គឺជាការប្រឡងដ៏សំខាន់ និងជាជំហានដំបូងបំផុតដើម្បីចាប់ផ្តើមជីវិតអាជីពទៅថ្ងៃអនាគត ហេតុនេះសិស្សានុសិស្សទូទាំងប្រទេសកំពុងខិតខំប្រឹងប្រែងខ្លាំងដើម្បីសម្រេចជំហានដ៏តឹងតែងមួយនេះ។ ទោះជាយ៉ាងនេះក្តី សិស្សានុសិស្សនៅកម្ពុជាជាច្រើនក្នុងសម័យថ្មីនេះ នៅដិត-ជាប់ជាមួយនឹងអារម្មណ៍ និងទម្លាប់អវិជ្ជមានជាច្រើនដែលរំខានខ្លាំងដល់ការដណ្តើមយកជ័យជម្នះក្នុងការប្រឡងបាក់ឌុប។

ទម្លាប់អាក្រក់ទាំងអស់នោះ មានចំណែកយ៉ាងសំខាន់ពាក់ព័ន្ធនឹងបច្ចេកវិទ្យា ទម្លាប់នៃការរស់នៅ និងផ្នត់គំនិតដែលធ្វើឱ្យពួកគេលំបាកគ្រប់គ្រងខ្លួនឯង ហើយខ្ជះខ្ជាយពេលវេលាសិក្សាកាន់តែខ្លាំង ដែលអាចធ្វើឱ្យពួកគេត្រូវស្តាយក្រោយបន្ទាប់ពីទទួលបានលទ្ធផលអវិជ្ជមាន។

1. ញៀនបណ្តាញសង្គម
បច្ចុប្បន្ននេះ ដោយសារតែបច្ចេកវិទ្យាកាន់តែទំនើប ធ្វើឱ្យតម្លៃឧបករណ៍អេឡិចត្រូនិកទំនើបៗ ដូចជាទូរស័ព្ទដៃស្មាតហ្វូន និងTablet ជាដើម មានតម្លៃកាន់តែធូរថ្លៃដែលអាចឱ្យសិស្សានុសិស្សស្ទើរគ្រប់គ្នាទិញមកប្រើ មិនថានៅទីក្រុង ឬទីជនបទនោះទេ។ ការប្រើប្រាស់ឧបករណ៍ទំនើបៗទាំងអស់នោះ មានគុណសម្បត្តិច្រើនដែលអាចធ្វើឱ្យសិស្សទទួលបានព័ត៌មាន និងប្រភពចំណេះដឹងកាន់តែទូលំទូលាយ តែអ្វីដែលជាការរំខាន គឺកម្មវិធីកម្សាន្តមានច្រើន និងទាក់ទាញយុវជនខ្លាំងជាងកម្មវិធីអប់រំ ហេតុនេះហើយទើបសិស្សានុសិស្សមួយចំនួនធំបានញៀនជាមួយនឹងការកម្សាន្តទាំងនោះស្ទើរដកខ្លួនមិនរួចមុនពេលត្រៀមប្រឡង។

កត្តានេះអាចធ្វើឱ្យអារម្មណ៍របស់សិស្សមិនស្ងប់ ហើយខ្ជះខ្ជាយពេលវេលានៅមុខបណ្តាញសង្គម ឬចំណាយពេលនៅជាមួយវាដល់យប់ជ្រៅ ដែលធ្វើឱ្យស្ថានភាពកាន់តែដុនដាបទៅ។ ហេតុនេះបើមិនចង់ធ្លាក់បាក់ឌុបទេ បេក្ខជនគួរត្រៀមដកខ្លួនចេញឱ្យឆ្ងាយពីឧបករណ៍អេឡិចត្រូនិកឱ្យហើយ ប្រសិនបើដឹងខ្លួនឯងច្បាស់ថា មិនអាចគ្រប់គ្រងវាបាន ដើម្បីទុកពេលស្ងប់ស្ងាត់សមរម្យមួយសម្រាប់សង្ខេប និងរំឭកមេរៀនត្រៀមប្រឡង។

2. រកចំណុចចាប់ផ្តើមមិនឃើញ
សិស្សភាគច្រើនមានទម្លាប់ខ្ជះខ្ជាយ និងកុហកខ្លួនឯងច្រើន ដែលនេះកើតមកពីបញ្ហានៃការគ្រប់គ្រងខ្លួនឯងមិនបានល្អ ដែលធ្វើឱ្យពួកគេត្រូវឆ្លងកាត់ដំណាក់កាលទឹកដល់ច្រមុះច្រើនដងពេលជិតប្រឡងសំខាន់ម្តងៗ។ កត្តានេះធ្វើឱ្យសិស្ស រកចំណុចចាប់ផ្តើមមិនឃើញដើម្បីរៀបចំមេរៀនដែលគរជុំវិញខ្លួន ហើយរកខ្លួនឯងមិនឃើញថា តើត្រូវចាប់ផ្តើមមុខវិជ្ជាណាមុន? ហើយអ្វីដែលខ្លួនឯងខ្លាំង និងអ្វីដែលត្រូវបំពេញបន្ថែម?។

ទម្លាប់នេះ រំខានខ្លាំងណាស់ដល់អារម្មណ៍របស់បេក្ខជនត្រៀមប្រឡង ព្រោះគេមើលឃើញថា ខួរក្បាលនៅទទេស្អាត ហើយគ្រប់មុខវិជ្ជាទាំងអស់សុទ្ធតែត្រូវអនុវត្ត និងទន្ទេញច្រើនស្មើៗគ្នា។ ស្ថានភាពបែបនេះ ធ្វើឱ្យអារម្មណ៍ភ័យព្រួយនៅដក់ជាប់ក្នុងខ្លួនជានិច្ច ហើយរៀនមុខវិជ្ជាមួយស្តាយមុខវិជ្ជាមួយ ហើយធ្វើឱ្យមានអារម្មណ៍ច្របូកច្របល់ រហូតមិនអាចរំឭកមេរៀនគ្រប់មុខទាំងអស់បាន ដែលនេះជាកត្តាខ្ពស់បំផុតធ្វើឱ្យទទួលលទ្ធផលអវិជ្ជមាន។ ហេតុនេះប្រសិនបើមិនចង់ប្រឡងធ្លាក់ សិស្សគួរចាប់ផ្តើមស្វែងរកពេលវេលាស្ងប់ស្ងាត់សមរម្យមួយ ដោយកុំព្រួយបារម្ភខ្លាំងពេក ហើយចាប់ផ្តើមសង្កេតពីខ្លួនឯងថា តើមុខវិជ្ជាណាខ្លះដែលចេះច្រើនហើយ ហើយមុខវិជ្ជាណាខ្លះនៅខ្សោយខ្លាំង។ បន្ទាប់មកបែងចែកពេលវេលា និងវិធីសាស្ត្ររំឭកដោយដាក់ដាច់ដោយឡែកពីគ្នារវាងមុខវិជ្ជាវិទ្យាសាស្ត្រពិត និងមុខវិជ្ជាវិទ្យាសាស្ត្រសង្គម។ សម្រាប់មុខវិជ្ជាវិទ្យាសាស្ត្រពិត គួរចាប់ផ្តើមអនុវត្តលំហាត់ស្រាលៗជាមុន ដើម្បីលើកទឹកចិត្តខ្លួនឯង និងផ្សាំុជាមួយនឹងលំហាត់ឱ្យបានល្អ មុននឹងចាប់ផ្តើមអនុវត្តជាមួយគំរូវិញ្ញាសាប្រឡង។ ចំណែកឯមុខវិជ្ជាវិទ្យាសាស្ត្រសង្គម ក្នុង 1មេរៀនប្រហែលជាមានត្រឹមតែ 7 ឬ 8ជំពូកប៉ុណ្ណោះ ហើយក្នុង 1ជំពូកអាចមានមេរៀន3 ឬ4ទៅតាមជាក់ស្តែង។ ហេតុនេះប្រសិនបើចាប់យកសៀវភៅកម្រាស់ជាង 100ទំព័រមកអានទាំងអស់ប្រាកដជាទឹកចូលច្រមុះមិនខាន ហេតុនេះគួរសាកល្បងសង្ខេបមេរៀនជាសំណួរ-ចម្លើយ ឬសង្ខេបជាចំណុចសំខាន់ខ្លីៗជាចំណុចៗ ឬអាចគូសជាគំនូសចំណាំ (Mindmaps) ដើម្បីងាយស្រួលមើល ហើយខ្លី។ បន្ទាប់ពីធ្វើបានហើយ យើងអាចតម្រៀបវាទៅតាមជំពូកក្នុងមេរៀន ដែលយ៉ាងច្រើនសល់ត្រឹម 15ទំព័រទៅ 20ទំព័រប៉ុណ្ណោះ ហេតុនេះយើងអាចចំណាយពេលត្រឹមតែ 1ម៉ោងក្នុង 1ថ្ងៃជាប់ៗគ្នាត្រឹមតែជាង1សប្តាហ៍ នឹងអាចចងចាំបានច្រើនហួសពីការស្មាន។

3. សេពគប់មិត្តភក្តិខ្ជីខ្ជា
ការសេពគប់មិត្តភក្តិ គឺជារឿងសំខាន់មួយដែលអាចទាញយើងឱ្យទទួលបានលទ្ធផលបរាជ័យបាន។ មិត្តភក្តិខ្ជីខ្ជាជាច្រើន អាចនឹងក្លាយជាកម្លាំងជំរុញឱ្យយើងមានទំនុកចិត្តខុសរឿង ឬស្លន់ស្លោជ្រុល ហេតុនេះប្រសិនបើដឹងខ្លួនច្បាស់ថា កំពុងស្ថិតក្នុងដំណាក់កាលបែបនេះ គួរប្រញាប់ដកខ្លួនដើម្បីទៅជិតអ្នកដែលមានទម្លាប់ល្អ។ វាអាចជារឿងលំបាកបន្តិច ប្រសិនបើភ្លាមៗយើងត្រូវផ្លាស់ប្តូរការសេពគប់ ហើយពេលខ្លះយើងបារម្ភថា អ្នកខ្លាំងៗអាចនឹងចៀសសពីយើងដែលធ្លាប់ខ្ជីខ្ជា តែស្ថានភាពពិត មិនប្រាកដថាបែបនេះទេ។

ការសាកល្បងចាប់ផ្តើមសួរ និងទំនាក់ទំនងជាមួយមិត្តភក្តិដែលហ្មត់ចត់ មិនអាក្រក់ដូចយើងគិតពេកនោះទេ តែអ្វីដែលគួរឱ្យបារម្ភនោះ គឺយើងខ្លួនឯងអាចតាំងចិត្តល្អបានកម្រិតណាក្នុងបញ្ឈប់ទម្លាប់អាក្រក់របស់ខ្លួនឯង។ ប្រសិនបើយើងមិនចង់ធ្លាក់ ហើយមានឆន្ទៈចង់ប្រឡងជាប់ពិតប្រាកដ អាចសាកល្បងចូលក្នុងចំណោមអ្នកប្រឹងប្រែងរៀន ដើម្បីទទួលយករបៀបល្អៗដែលគេប្រើប្រាស់សម្រាប់ទទួលបានលទ្ធផលល្អឬយ៉ាងហោចណាស់ក៏យើងបានស្តាប់ពីអ្វីដែលគេចែករំលែកពេលជួបជុំម្តងៗ ដែលធ្វើឱ្យយើងកាន់តែឆាប់ចងចាំបានល្អនូវចំណុចសំខាន់ៗនៃមេរៀន៕

July 20, 2019

រដ្ឋមន្ត្រីក្រសួងកសិកម្មនឹងជំរុញការនាំចេញសម្បុកត្រចៀកកាំទៅកាន់ទីផ្សារប្រទេសចិន

សម្បុកត្រចៀកកាំកំពុងតែមានសុក្តានុពលនៅឯទីផ្សារប្រទេសចិន រដ្ឋមន្ត្រីក្រសួងកសិកម្មកម្ពុជាកំពុងរៀបចំនីតិវិធីដើម្បីឈានទៅដល់ការនាំចេញ ខណៈពេលដែលអាជីវកម្មមួយនេះកំពុងរីកដុះដាលឡើងដូចផ្សិត។

ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា សម្បុកត្រចៀកកាំមានតម្លៃខ្ពស់ និងមានគាំទ្រពីភាគីខាងចិន ក្រោយពីបានជួបពិភាក្សាកាលពីពេលកន្លងមក។ឯកឧត្តមបានមានប្រសាសន៍ថា៖ “ក្រោយពីជំនួបពិភាក្សាជាមួយភាគីខាងចិន មន្ត្រីគយចិនបានបង្ហាញពីការគាំទ្រសម្បុកត្រចៀកកាំរបស់ប្រទេសយើង ដូចនេះយើងនឹងធ្វើការងារជាមួយភាគីចិន ចំពោះការកំណត់នីតិវិធីសម្រាប់ការនាំចេញ”។ ឯកឧត្តម បន្តថា “ការរៀបចំនីតិវិធីនេះ នឹងមិនខុសគ្នាពីការធ្វើនីតិវិធីនៃការនាំចេញចេកទៅកាន់ទីផ្សារប្រទេសចិនទេ”។

សម្បុកត្រចៀកកាំមានតម្លៃខ្ពស់ និងជាផលិតផលសុក្តានុពលមួយដ៏ធំសម្រាប់វិស័យកសិកម្ម ហើយក៏ជាកត្តាជំរុញសេដ្ឋកិច្ចជាតិផងដែរ។ បើអ្នកវិនិយោគផ្ទះអភិរក្សសត្វត្រចៀកកាំ និងក្រុមហ៊ុនសម្អាតសម្បុកត្រចៀកកាំអនុវត្តទៅតាមស្តង់ដារ និង នីតិវិធីរបស់ភូតគាមអនាម័យរបស់ប្រទេសចិននោះ ការនាំចេញសម្បុកត្រចៀកកាំនឹងកើតឡើងនាពេលឆាប់ៗខាងមុខនេះ។ឯកឧត្តមបានបញ្ជាក់ថា៖ “វានឹងមិនចំណាយពេលយូរដើម្បីឈានទៅដល់ការសម្រេចនាំចេញសម្បុកត្រចៀកកាំនោះទេ ប្រសិនបើយើងអាចបំពេញទៅលក្ខខណ្ឌរបស់ភាគីចិន”។

បើយោងតាមលោក ណាង សុធី ប្រធានសហព័ន្ធសម្បុកត្រចៀកកាំកម្ពុជាបានឱ្យដឹងថា អាជីវកម្មសម្បុកត្រចៀកកាំរបស់កម្ពុជាបានបង្ហាញពីកំណើនខ្ពស់ក្នុងរយៈពេល 2ឆ្នាំចុងក្រោយនេះ បន្ទាប់ពីរដ្ឋាភិបាលកម្ពុជា និងប្រទេសចិន មានការឯកភាពគ្នាជាគោលការណ៍រួចហើយ ដោយគ្រាន់តែនៅមិនទាន់មាននីតិវិធី និងពិធីសារជាមួយគ្នាតែប៉ុណ្ណោះ។ ប្រទេសចិន គឺជាទីផ្សារធំជាងគេសម្រាប់សម្បុក-ត្រចៀកកាំនៅទូទាំងពិភពលោក ការនាំចេញផលិតផលនេះពីកម្ពុជាទៅកាន់ទីផ្សារចិនជាផ្លូវការអាចនឹងកើតឡើងក្នុងពេលឆាប់។

លោកថ្លែងថា៖ “ខ្ញុំជឿជាក់ថា ការនាំចេញសម្បុកត្រចៀកកាំនឹងកើតឡើងឆាប់ៗ ខណៈពេលដែលសម្បុកត្រចៀកកាំកម្ពុជាមានគុណភាពខ្ពស់រួចជាស្រេចហើយ”។ បើតាមលោក សុធី បច្ចុប្បន្ននិន្នាការនៃការចិញ្ចឹមសត្វត្រចៀកកាំបានស្ទុះឡើងយ៉ាងលឿននៅតាមបណ្តាខេត្តតាមដងទន្លេសាបនិងខេត្តជាប់មាត់សមុទ្រ ជាពិសេសក្នុងខេត្តកោះកុង ស្របពេលដែលមានបច្ចេកវិទ្យាថ្មីៗសម្រាប់ការចិញ្ចឹមដែលមានភាពងាយស្រួលជាងមុន។

លោកបានប៉ាន់ប្រមាណថា បច្ចុប្បន្នមានផ្ទះអភិរក្សត្រចៀកកាំ ចន្លោះពី 3,000-5,000 ផ្ទះទូទាំងប្រទេសកម្ពុជា ហើយសម្បុកត្រចៀកកាំកាន់តែមានទីផ្សារល្អ។ បច្ចុប្បន្នសម្បុកត្រចៀកកាំមិនទាន់សម្អាត មានតម្លៃចន្លោះពី 800ដុល្លារ ទៅ 1,000ដុល្លារ ក្នុង1គីឡូក្រាម ចំណែកសម្បុកដែលសម្អាតរួច មានតម្លៃចន្លោះពី 1,500ដុល្លារ រហូតដល់ 3,000ដុល្លារ អាស្រ័យទៅលើគុណភាព។

លោកបានបន្តថា “ទីផ្សារត្រចៀកកាំនៅតែមានសក្តានុពលល្អ សម្រាប់អ្នកវិនិយោគទុនក្នុងស្រុកដើម្បីផ្គត់ផ្គង់ទៅទីផ្សារចិន”។

តាមការប៉ាន់ស្មានរបស់សហព័ន្ធសម្បុកត្រចៀកកាំកម្ពុជា ក្នុង 1ខែ កម្ពុជាអាចប្រមូលផលសម្បុកត្រចៀកកាំ បានយ៉ាងតិចចន្លោះពី 1,500គីឡូក្រាម ទៅ 2,000គីឡូក្រាម។លោក ទេព សុជាតិ ម្ចាស់ផ្ទះអភិរក្សត្រចៀកកាំ 1កន្លែងស្ថិតក្នុងខេត្តកំពង់ឆ្នាំង បាននិយាយថា កំណើនផ្ទះអភិរក្សត្រចៀកកាំមានការកើនឡើងយ៉ាងច្រើនគួរឱ្យកត់សម្គាល់ ខណៈដែលលោកបានបណ្តាក់ទុនក្នុងអាជីពនេះអស់រយៈពេល 2ឆ្នាំមកហើយ។

លោកសម្រេចចាប់យកអាជីវកម្មនៃការចិញ្ចឹមសត្វត្រចៀកកាំ ពីព្រោះវាមិនសូវប្រើកម្លាំងពលកម្មច្រើន មានតម្លៃទីផ្សារខ្ពស់ ហើយមានការចំណាយទុនតែពេលដំបូងសម្រាប់ការទិញដី និងការកសាងផ្ទះ ព្រមទាំងរៀបចំបច្ចេកទេសផ្ទះឱ្យសត្វត្រចៀកកាំរស់នៅប៉ុណ្ណោះ ហើយបច្ចុប្បន្ននេះលោកអាចប្រមូលសម្បុកត្រចៀកកាំបានប្រមាណជា 2គីឡូក្រាមក្នុង1ខែ។

លោកបានបន្តទៀតថា៖ “ការចិញ្ចឹមសត្វត្រចៀកកាំ ជាមុខរបរមួយទទួលបានផលច្រើន អាចថា តកូនតចៅបាន ហើយមិនមានការព្រួយបារម្ភពីហិរញ្ញវត្ថុនៅវ័យជរាទៀតផង”៕

July 20, 2019

ឆមាសដើមឆ្នាំនេះ កម្ពុជាទទួលបានជើងហោះហើរកើនឡើង15%

មួយរយៈចុងក្រោយនេះ វិស័យអាកាសចរណ៍ស៊ីវិលកម្ពុជា ទទួលបានការហោះហើរត្រង់មកពីបណ្តាប្រទេសនានាច្រើនជាងមុន ជាពិសេសពីប្រទេសដែលស្ថិតនៅក្នុងតំបន់អាស៊ានតែម្ដង ដូចជាប្រទេសចិន សាំងហ្គាពួរ ម៉ាឡេស៊ី ឥណ្ឌូនេស៊ី ហ្វីលីពីន ថៃ វៀតណាម ឡាវ ជាដើម ដែលការណ៍នេះកាន់តែជួយជំរុញឱ្យវិស័យមួយនេះកាន់តែមានភាពល្អប្រសើរឡើង ដែលជាលទ្ធផល ក្នុងរយៈពេល6ខែដើមឆ្នាំ2019នេះ កម្ពុជាទទួលបានជើងហោះហើរសរុបរហូតដល់ 20,433លើក កើនឡើងប្រមាណ 15% បើធៀបទៅនឹងរយៈពេលដូចគ្នាកាលពីឆ្នាំមុន។

ឯកឧត្តម ស៊ិន ចាន់សិរីវុត្ថា អ្នកនាំពាក្យ រដ្ឋលេខាធិការដ្ឋានអាកាសចរស៊ីវិល បានមានប្រសាសន៍ឱ្យដឹងតាមទូរស័ព្ទថា៖“នៅក្នុងរយៈពេល 6ខែដើមឆ្នាំ2019 កន្លងទៅនេះ វិស័យដឹកជញ្ជូនតាមផ្លូវអាកាសរបស់កម្ពុជាទទួលបានលទ្ធផលល្អប្រសើរជាងឆ្នាំកន្លងទៅ ដោយចំនួនជើងហោះហើរបានកើនឡើង15% ហើយចំនួនអ្នកធ្វើដំណើរក៏មានការកើនឡើង 25%ដែរ”។

ឯកឧត្តមបន្តឱ្យដឹងថា៖“ក្នុងរយៈពេល 6ខែដើមឆ្នាំនេះ ព្រលានយន្តហោះអន្តរជាតិភ្នំពេញ មានការហោះហើរសរុបចំនួន 4,589ជើង ដោយការហោះហើរអន្តរជាតិមានចំនួន 1,648លើក ហើយក្នុងស្រុកមានចំនួន 2,941លើក។ ព្រលានយន្តហោះខេត្តសៀមរាប មានការហោះហើរអន្តរជាតិចំនួន 8,189លើក និងជើងហោះហើរក្នុងស្រុក 2,776លើក។ ដោយឡែក ព្រលានយន្តហោះខេត្តព្រះសីហនុ មានការហោះហើរសរុបចំនួន 4,151លើក ក្នុងនោះការហោះហើរអន្តរជាតិមានចំនួន 2,638លើក ហើយក្នុងស្រុកមានចំនួន 1,513លើក និងជើងហោះហើរជាលក្ខណៈជួល (Charter Fly) មានចំនួន 728លើក”។

ជាមួយនឹងការកើនឡើងនៃជើងហោះហើរនេះ គេក៏សង្កេតឃើញថា ចំនួនភ្ញៀវទេសចរ ក៏មានការកើនឡើងផងដែរ ជាពិសេសភ្ញៀវទេសចរចិនជាង 1.1លាននាក់ បានមកទស្សនាកម្ពុជាក្នុងរយៈពេល 5ខែដំបូងនៃឆ្នាំនេះ គឺកើនឡើង 40% ធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមរបាយការណ៍របស់ក្រសួងទេសចរណ៍កម្ពុជា។

របាយការណ៍នេះបានបន្តឱ្យដឹងថា ប្រទេសចិននៅតែជាប្រភពភ្ញៀវទេសចរបរទេសច្រើនជាងគេនៅកម្ពុជា ដែលមានចំនួន 38% នៃចំនួនភ្ញៀវបរទេសសរុបមកកម្ពុជាក្នុងអំឡុងខែមករាដល់ខែឧសភាឆ្នាំនេះ។

ឯកឧត្តម ថោង ខុន រដ្ឋមន្ត្រីទេសចរណ៍កម្ពុជាបានមានប្រសាសន៍ថា ចិនគឺជាទីផ្សារដ៏ធំមួយសម្រាប់វិស័យទេសចរណ៍កម្ពុជា។ លោកបានបន្តថា៖“យើងសង្ឃឹមថា នឹងទាក់ទាញភ្ញៀវទេសចរចិនប្រហែល 2.6លាននាក់ក្នុងឆ្នាំ2019 នេះ និងចំនួន 3លាននាក់នៅឆ្នាំ2020 ហើយចំនួននេះនឹងកើនដល់ 5លាននាក់នៅឆ្នាំ2025 និងរហូតដល់ 8លាននាក់នៅឆ្នាំ2030”។ យោងតាមរបាយការណ៍នេះបានឱ្យដឹងថា ភ្ញៀវទេសចរអន្តរជាតិចំនួន 2.89លាននាក់បានធ្វើដំណើរមកកាន់ប្រទេសកម្ពុជា ក្នុងរយៈពេល 5ខែដំបូងនៃឆ្នាំនេះ គឺកើនឡើង 11.4% ធៀបនឹងរយៈពេលដូចគ្នាកាលពីឆ្នាំមុន។

កាលពីឆ្នាំ2018 កម្ពុជាទទួលបានភ្ញៀវទេសចរបរទេសចំនួន 6.2លាននាក់ ក្នុងនោះភ្ញៀវទេសចរជនជាតិចិនមានចំនួន 2លាននាក់ ហើយកម្ពុជាទទួលបានប្រាក់ចំណូលសរុបចំនួន 4.35ពាន់លានដុល្លារអាមេរិក ពីវិស័យទេសចរណ៍ ដោយវិស័យនេះរួមចំណែក 12,7% ដល់ផលិតផលក្នុងស្រុកសរុបកម្ពុជា។ នេះបើតាមលោករដ្ឋមន្ត្រីបានបញ្ជាក់់។

លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានមានប្រសាសន៍ថា៖ “នៅពេលដែលវិស័យហោះហើរកាន់តែមានភាពទូលំទូលាយ វានឹងជួយជំរុញឱ្យកម្ពុជាកាន់តែមានឱកាសអូសទាញបណ្តាភ្ញៀវទេសចរ ក៏ដូចជាអ្នកវិនិយោគនានាឱ្យចូលមកស្វែងយល់ពីកម្ពុជា ដើម្បីរកឱកាសវិនិយោគ”។

លោកស្រីបានបញ្ជាក់ថា៖“ពេលនេះកម្ពុជាកំពុងតែមានភាពទាក់ទាញលើវិស័យហោះហើរកាន់តែច្រើន ខណៈដែលបណ្តាប្រទេសនានានៅលើសកលលោកក៏កំពុងតែពិចារណាភ្ជាប់ជើងហោះហើរត្រង់មកកម្ពុជាដែរ។ ខ្ញុំក៏សូមបង្ហាញពីភាពសាទរជាមួយនឹងសមិទ្ធផលដែលវិស័យអាកាសចរណ៍ស៊ីវិលកម្ពុជាទទួលបាននៅពេលនេះ”។ ស្របគ្នានេះដែរ កិច្ចប្រជុំកម្រិតអគ្គនាយកទេសចរណ៍អាស៊ានលើកទី50 (ASEAN NTOs) ជាផ្លូវការនៅខេត្តសៀមរាប ក៏បានជំរុញដល់គ្រប់ភាគីពាក់ព័ន្ធនៅកម្ពុជាឱ្យចូលរួមជំរុញនូវកិច្ចសហប្រតិបត្តិការក្នុងការអភិវឌ្ឍវិស័យទេសចរណ៍នេះឡើង ដោយលើកទឹកចិត្តឱ្យមានការបង្កើតផលិតផលទេសចរណ៍ថ្មីៗ និងពង្រីកការហោះហើរត្រង់បន្ថែមឱ្យបានច្រើនតាមដែលអាចធ្វើទៅបាន ដើម្បីទាក់ទាញភ្ញៀវទេសចរឱ្យកាន់តែច្រើន និងទាក់ទាញការតភ្ជាប់ការហោះហើរត្រង់ពីបណ្ដាប្រទេសគោលដៅនានា។ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានលើកឡើងពីបញ្ហាប្រឈមមួយចំនួនដែលប្រទេសសមាជិកអាស៊ានត្រូវមានកិច្ចសហប្រតិបត្តិការដោះស្រាយរួមគ្នា ក្នុងនោះត្រូវជំរុញការធ្វើដំណើរទស្សនាកម្សាន្តផ្ទៃក្នុងអាស៊ានឱ្យបានផុសផុលឡើង សំដៅធ្វើយ៉ាងណាឱ្យទទួលបានកំណើនជាមធ្យម 4%ក្នុង 1ឆ្នាំ និងជំរុញឱ្យទេសចរ អាចធ្វើដំណើរទស្សនាកម្សាន្តបានដោយខ្លួនឯង ពិសេសដំណើរកម្សាន្តឆ្លងប្រទេស។

យោងតាមរបាយការណ៍របស់អង្គការទេសចរណ៍ពិភពលោកបានបង្ហាញថា ពេញមួយឆ្នាំ2018 តំបន់អាស៊ានទាំងមូលទទួលបានភ្ញៀវទេសចរប្រមាណ 135លាននាក់ កើនឡើង 7.6%៕

July 20, 2019

សិចជួយសាងភាពរឹងមាំដល់រាងកាយ

មនុស្សគ្រប់រូបស្ទើរតែគ្មានអ្នកណាម្នាក់ហារមាត់និយាយប្រកែកដាច់អហង្ការមិនព្រមទទួលយកក្ដីសុខស្រួលពីចំណងមត្រីភាពនៃគូស្នេហានោះទេ។ ជាមួយនឹងភាពរីករាយពីតម្រេកតណ្ហានេះ តើលោកអ្នកបានជ្រាបពីអត្ថប្រយោជន៍បន្ថែមអ្វីខ្លះ ដែលទទួលបានពីសុខភាពផ្លូវភេទ? បើចង់ដឹង សូមអានអត្ថបទដែលបង្ហាញពីភាពល្អប្រសើរនៃសម្ពន្ធមេត្រីភាពដូចខាងក្រោមនេះ។

1. ជួយអ្នកឱ្យបានដឹងពីសុខភាពភ្នែក : អ្នកជំនាញការខាងផ្នែកសុខភាពផ្លូវ-ភេទម្នាក់នៅមន្ទីរពេទ្យ Spire Liverpoo បានប្រាប់ឱ្យដឹងថា ការរួមភេទអាចជួយបន្ធូរសាច់ដុំ និងធ្វើឱ្យធូរស្រាលភាពតឹងសាច់ដុំនៅក,ស្មា ក៏ដូចជាសាច់ដុំដទៃទៀតនៅលើសរីរាង្គដែលមានដូចជា សាច់ដុំនៅភ្នែកក៏ត្រូវការបានសម្រាក។ អាស្រ័យហេតុនេះ ប្រសិនបើកម្រិតមើលឃើញរបស់លោកអ្នកហាក់មានអាការព្រិល ស្រវាំង ក្រោយពេលធ្វើការរួមភេទនោះ មានន័យថា វាមានតម្លៃប្រហាក់ប្រហែលទៅនឹងមេរៀន ឬសញ្ញាមួយដែលអាចឱ្យអ្នកបានដឹងពីសុខភាពនៃចក្ខុប្រសាទរបស់អ្នក។

2. ជួយអ្នកប្រឆាំងតបនឹងជំងឺបេះដូង : ការរួមភេទមានឥទ្ធិពលយ៉ាងធំមួយចំពោះបេះដូងរបស់លោកអ្នក។ រឿងនេះត្រូវបានគេរំឭកជាញឹកញ៉យនៅក្នុងបណ្តាសិក្សាស្រាវជ្រាវផ្សេងៗពីគ្នា។ ផ្អែកតាមការស្រាវជ្រាវមួយរបស់មហាវិទ្យាល័យ Gueen នៅ Belfastកាលពីពេលកន្លងទៅបានបង្ហាញថា ការរួមភេទ3ដងក្នុងមួយសប្តាហ៍ អាចជួយកាត់បន្ថយពាក់កណ្តាលនៃគ្រោះថ្នាក់ដែលបណ្តាលមកពីការវាយប្រហាររបស់ជំងឺបេះដូង ឬឈាមកកនៅក្នុងខួរក្បាល។ ដោយឡែកការស្រាវជ្រាវមួយផ្សេងទៀតនៅអុីស្រាអែលក៏បានឱ្យដឹងដែរថាចំពោះស្ត្រីប្រសិនបើសម្រេចដល់ចំណុចកំពូល2ដងក្នុងមួយសប្តាហ៍ នោះលទ្ធភាពនៃការកើតជំងឺបេះដូងអាចមានតិចជាងដល់ទៅ30% ធៀបនឹងអ្នកមិនចូលចិត្តការរួមភេទ ឬមិនសម្រេចបានភាពស្រណុកសុខស្រួល។ ពេលស្ត្រីមានអារម្មណ៍នឿយណាយជាមួយសិច នោះវាអាចប្រឈមជាមួយគ្រោះថ្នាក់នៃការកើតជំងឺបេះដូង។បើតាមលោកវេជ្ជបណ្ឌិតប្រឹក្សាជំនាញផ្នែកបេះដូងនៅមន្ទីរពេទ្យ London Bridge និងជានាយករបស់សមាគមប្រឹក្សាផ្លូវភេទបានឱ្យដឹងថា ប្រសិនបើអ្នកមានអាយុលើសពី50ឆ្នាំ និងលើសទម្ងន់ ភាពប្រឈមជាមួយគ្រោះថ្នាក់នៃជំងឺបេះដូងនឹងឈានមកដល់ បើទោះជាលោកអ្នកបានចំណាយពេលទៅលើការហាត់ប្រាណក៏ដោយ។ បណ្តាបញ្ហានានាក្រៅរង្វង់អាពាហ៍ពិពាហ៍ ក៏អាចធ្វើឱ្យមានកំណើនគ្រោះថ្នាក់នៃជំងឺបេះដូងផងដែរ។

3. ជួយឆ្អឹងរបស់អ្នកឱ្យរឹងមាំ : ផ្អែកតាមការស្រាវជ្រាវរបស់ក្រុមអ្នកវិទ្យាសាស្ត្រអាមេរិកបានចង្អុលបង្ហាញថា ស្ត្រីនៅដំណាក់កាលអស់រដូវ ហើយតែងមានការរួមភេទរាល់សប្តាហ៍នោះ កម្រិតអ័រម៉ូនផ្លូវភេទនឹងខ្ពស់ជាងទ្វេដងធៀបនឹងស្ត្រីផ្សេងដែលមិនធ្វើដូច្នេះ ខណៈដែលប្រភេទអ័រម៉ូននេះមានឥទ្ធិពលយ៉ាងប្រសើរទៅដល់ឆ្អឹង ជាពិសេសអាចបញ្ចៀសភាពគ្រោះថ្នាក់នៃជំងឺឆ្អឹងស្ពោត។

4. ធ្វើឱ្យមានលទ្ធភាពក្នុងការបង្កើតកូន : ស្ត្រីគ្រប់រូបតែងតែសួរថា ប្រវែងរបស់អវយវៈភេទរបស់បុរសមានឥទ្ធិពលទៅដល់លទ្ធភាពបង្កើតកូនឬទេ? ចម្លើយដ៏ល្អប្រសើរនោះគឺ “ទេ”។ វេជ្ជបណ្ឌិត Arun Ghosh បានឱ្យដឹងថា ផ្ទុយពីកង្វល់ខាងលើ បរិមាណនៃការរួមភេទ ដែលលោកអ្នកមានគឺសំខាន់ណាស់។នេះមានន័យថា ប្រសិនបើលោកអ្នកកាន់តែចូលចិត្តការរួមភេទ មេជីវិតរបស់លោកអ្នកក៏កាន់តែល្អ ហើយលទ្ធភាពបង្កើតកូនរបស់អ្នកនឹងកាន់តែល្អឡើងដែរ។

5. មានលទ្ធភាពទប់ស្កាត់មហារីកក្រពេញប្រូស្តាត : ក្រុមអ្នកស្រាវជ្រាវនៅមហាវិទ្យាល័យ Nottingham បានរកឃើញថា បុរសមានជីវភាពផ្លូវភេទជាប្រចាំនៅក្នុងវ័យ50ឆ្នាំ គឺមានអត្រានៃការប្រឈមនឹងការកើតមហារីកក្រពេញប្រូស្តាតតិចជាង។ ទំនាក់ទំនងនេះត្រូវបានលើកឡើងក្រោយការស្រាវជ្រាវមួយចង្អុលបង្ហាញថា អ្នកបួសតែងមានគ្រោះថ្នាក់កើតជំងឺមហារីកក្រពេញប្រូស្តាតខ្ពស់ជាងមនុស្សធម្មតា។

6. ជួយអ្នកញៀនបារីឱ្យបោះបង់បារីយ៉ាងឆាប់រហ័ស : អ្នកអាចនឹងភ្ញាក់ផ្អើលពេលដឹងថានេះជាវិធីដ៏សាមញ្ញ ដើម្បីឱ្យវីរៈ-បុរសលើគ្រែរបស់អ្នកបោះបង់ទម្លាប់ជក់បារីបានយ៉ាងមានប្រសិទ្ធភាព។ សួរថា ម៉េចបានការរួមភេទអាចជួយឱ្យបុរស ដែលនិយមជក់បារីបោះបង់បារីបានលឿនរហ័សទាន់ចិត្តនោះ គឺថាបែបនេះ អ្នកអាចរំឮកគេថាបារីអាចធ្វើឱ្យ “អាច្រម៉ក់” របស់គេកាន់តែស្វិតទៅ និងអាចបង្កជាជំងឺអសមត្ថភាពផ្លូវភេទបាន។ ត្រឹមតែពាក្យប៉ុន្មានម៉ាត់នេះ គេនឹងយកចិត្តទុកដាក់លើការបោះបង់បារីទៅហើយ។ ក្រៅពីនេះការជក់បារីក៏ត្រូវបានចាត់ទុកថា ជាមូលហេតុបង្កជាអាការច្របូកច្របល់ចំពោះភាពឡើងរឹងនៃអង្គជាតិ ព្រោះវាធ្វើឱ្យក្រិនរឹងសរសៃឈាម និងរារាំងចរាចរឈាមល្អផងដែរ។ ការស្រាវជ្រាវលើបុរសជនជាតិចិនចំនួន7.000នាក់ ត្រូវបានប្រកាសលើទស្សនាវដ្តីរោគរាតត្បាតអាមេរិក ដោយបង្ហាញថា ប្រសិនបើអ្នកជក់បារីច្រើនលើសពី10-20ដើមក្នុងមួយថ្ងៃ នោះគ្រោះថ្នាក់នៃការខ្វិនលិង្គ (លិង្គងាប់) នឹងមានអត្រាខ្ពស់បំផុត៕

July 20, 2019

តាមរយៈពាណិជ្ជកម្ម សមាជិក WTO សន្យាផ្តល់ជំនួយដល់បណ្តាប្រទេសអភិវឌ្ឍន៍តិចតួច

សមាជិកអង្គការពាណិជ្ជកម្មពិភពលោកចំនួន6 បានសន្យារួមបញ្ចូលគ្នានូវទឹកប្រាក់ចំនួន 13 លានដុល្លារ ដើម្បីផ្តល់ជាហិរញ្ញប្បទានដល់ក្របខ័ណ្ឌចម្រុះដែលរួមបញ្ចូល Enhanced Integrated Frameworkឬ EIF ដែលនេះជាការបង្ហាញយ៉ាងសំខាន់នូវការគាំទ្រដល់ពាណិជ្ជកម្មជាឧបករណ៍អភិវឌ្ឍន៍។

ការសន្យានេះត្រូវបានធ្វើឡើងនៅថ្ងៃដែលសម្ដេចនាយករដ្ឋមន្ត្រី ហ៊ុន សែន បានថ្លែងទៅកាន់ សមាជិកអង្គការពាណិជ្ជកម្មពិភពលោក និងដៃគូអភិវឌ្ឍន៍នានានៅឯអង្គការពិគ្រោះយោបល់ពិភពលោក សម្រាប់ជំនួយពាណិជ្ជកម្មសកលនៅទីក្រុងហ្សឺណែវ ប្រទេសស្វីស ដែលសម្តេចបានអំពាវនាវ សុំឱ្យមានការគាំទ្រដល់ប្រទេសអភិវឌ្ឍន៍តិចតួច (Less Deverlopment Country ឬ LDC) នៅពេលពួកគេខិតខំលុបបំបាត់ភាពក្រីក្រ និងបង្កើនទ្រព្យសម្បត្តិជាតិ។

យោងតាមសេចក្តីថ្លែងការណ៍របស់អង្គការសហប្រជាជាតិ ប្រទេសអូស្ត្រាលី ដាណឺម៉ាក ហ្វាំងឡង់ អាល្លឺម៉ង់ ជប៉ុន និងស៊ុយអែត បានប្រកាសពីការប្តេជ្ញាចិត្តថ្មីចំពោះ EIF ក្នុងអំឡុងពេល ពិនិត្យឡើងវិញនូវជំនួយសម្រាប់ពាណិជ្ជកម្មសកល។

លោកស្រី Cecilia Scharp នាយកនៃអង្គការអន្តរជាតិ និងជំនួយផ្នែកគោលនយោបាយ នៅ ទីភ្នាក់ងារអភិវឌ្ឍន៍អន្តរជាតិស៊ុយអ៊ែត(Sida)បានប្រកាសអំពីការរួមចំណែកដល់ EIF ចំនួន 5លាន 4សែនក្រូណា(ប្រាក់ស៊ុយអែត)ឬស្មើនឹង 5,4លានដុល្លារអាមេរិក។ ទឹកប្រាក់នេះនាំមកនូវចំនួនសរុបនៃការគាំទ្ររបស់ស៊ុយអែដដល់ទៅ 150លានក្រូណាសម្រាប់ឆ្នាំ2017-2022។

លោកស្រីបានថ្លែងថា៖“ទាំងនេះ ទាក់ទងទៅនឹងគុណភាពផលិតផល បទដ្ឋាន ស្តង់ដារ កម្រិតនៃសមត្ថភាពប្រកួតប្រជែង សមត្ថភាព ស្ថាប័ន លទ្ធភាពចូលទីផ្សារ យុទ្ធសាស្ត្រ និងគោលនយោបាយសមស្រប។ ប្រទេសស៊ុយអ៊ែតមានមោទនភាពក្នុងនាមជាម្ចាស់ជំនួយក្នុងការរួមចំណែកដល់កិច្ចខិតខំប្រឹងប្រែងរបស់ EIF ក្នុងការជួយដល់បណ្តាប្រជាពលរដ្ឋក្រីក្រ ក្នុងការលើកកម្ពស់ពាណិជ្ជកម្ម និងជាយន្តការសម្រាប់ការអភិវឌ្ឍកំណើន និងការលុបបំបាត់ភាពក្រីក្រ”។

EIF ធ្វើការងារដើម្បីធ្វើឱ្យប្រសើរឡើងនូវពាណិជ្ជកម្មក្នុងភាពជាដៃគូជាមួយរដ្ឋាភិបាលលទ្ធិប្រជាធិបតេយ្យ ស្ថាប័នអភិវឌ្ឍន៍ និងអង្គការមិនមែនរដ្ឋាភិបាល ក៏ដូចជាគំនិតផ្តួចផ្តើមជំនួយ សម្រាប់ពាណិជ្ជកម្ម។ EIF ធ្វើការចាប់ពីតំបន់អាហ្វ្រិក និងអាមេរិក ទៅអាស៊ី និងប៉ាស៊ីហ្វិកដោយបានជួយដល់ប្រទេសចំនួន 41 ធ្វើសមាហរណកម្មពាណិជ្ជកម្មទៅក្នុងផែនការអភិវឌ្ឍន៍ជាតិរបស់ខ្លួនខណៈដែលគាំទ្រដល់សហគ្រាសខ្នាតតូចជាមធ្យម 1,300សហគ្រាស និងស្ត្រីជាង 35.000នាក់។

ការចូលរួមក្នុងពាណិជ្ជកម្មសកល គឺមានសារៈសំខាន់សម្រាប់ការអភិវឌ្ឍ។ ទោះបីជាយ៉ាងណាក៏ដោយមានឧបសគ្គ និងឧបសគ្គមួយចំនួនដែលត្រូវយកឈ្នះលើបណ្ដាប្រទេសក្រីក្រដើម្បីចូល រួមប្រកបដោយអត្ថន័យ និងសមភាពនៅក្នុងពាណិជ្ជកម្មអន្ដរជាតិ។

លោក Ratnakar Adhikari នាយកប្រតិបត្តិរបស់ EIF បានមានប្រសាសន៍ថា៖“ការប្តេជ្ញា ចិត្ត ដែលបានគ្រោងទុកទាំងនេះពីម្ចាស់ជំនួយរបស់យើងនឹងជួយយ៉ាងច្រើនដល់បណ្តាប្រទេសអភិវឌ្ឍន៍តិចតួចដែលកំពុងធ្វើការនៅក្នុងបរិយាកាសពាណិជ្ជកម្មដ៏លំបាក និងនៅក្នុងការវិវឌ្ឍនៃការផ្លាស់ប្តូររបស់ពិភពលោក។ រយៈពេល 10ឆ្នាំ EIF បានធ្វើការជាមួយរដ្ឋាភិបាល LDC ហើយយើងបានឃើញ ភាពជោគជ័យជាបណ្តើរ។ ប៉ុន្តែយើងត្រូវការកិច្ចខិតខំប្រឹងប្រែងបន្ថែមទៀត ហើយយើងសង្ឃឹមថា អ្នកដទៃនឹងចូលរួមជាមួយពួកយើង ក្នុងការដាក់ប្រទេសអភិវឌ្ឍន៍តិចតួចនៅក្នុងកៅអីអ្នកបើកបរសម្រាប់ការអភិវឌ្ឍរួមគ្នា”។

យោងតាមសេចក្តីថ្លែងការណ៍បានឱ្យដឹងថា ការប្តេជ្ញាចិត្តថ្មីដែលបានគ្រោងទុក គឺដើម្បី EIF ធ្វើការដោះស្រាយដោយផ្ទាល់នូវកង្វះខាតពាណិជ្ជកម្ម របស់បណ្តាប្រទេសអាស៊ីអាគ្នេយ៍ តាមរយៈវិធីសាស្ត្ររួម ដែលជាការស្រាវជ្រាវផ្អែកលើភ័ស្តុតាងយុទ្ធសាស្ត្រ តាមវិស័យដែលផ្តោតលើការធ្វើពិពិធកម្មសេដ្ឋកិច្ច និងការសម្របសម្រួលរបស់រដ្ឋាភិបាលដែលធ្វើឱ្យមានការងារដោយផ្ទាល់នៅនឹងកន្លែង។

ប្រទេសអភិវឌ្ឍន៍តិចតួចចំនួន 47 នៅលើពិភពលោក មានប្រជាជនច្រើនជាង 1,000លាននាក់។ទោះយ៉ាងណាក៏ដោយ ទំហំរួមរបស់ពួកគេនៃពាណិជ្ជកម្មសកល គឺតិចជាង 1%។ នេះបើយោងតាមអង្គការពាណិជ្ជកម្មពិភពលោក។ ប្រជាជាតិ LDCមានភាពងាយរងគ្រោះ ដោយសារវិបត្តិ នៅខាងក្រៅដូចជាការប្រែប្រួលតម្លៃទំនិញ ខណៈពេលដែលប្រទេសអភិវឌ្ឍន៍តិចតួចបំផុតក្នុង កំណើនផលិតផលក្នុងស្រុកសរុប របស់ប្រជាជនម្នាក់ៗស្ថិតនៅក្រោមអត្រាដែលចាំបាច់ដើម្បីលុបបំបាត់ភាពក្រីក្រខ្លាំង។

សម្ដេចនាយករដ្ឋមន្ត្រីកម្ពុជា បានមានប្រសាសន៍ថា៖“រដ្ឋាភិបាលមានបំណងផ្លាស់ប្តូរប្រទេសកម្ពុជាទៅជាប្រទេស ដែលមានប្រាក់ចំណូលខ្ពស់ជាងមុននៅឆ្នាំ2030 និងស្រុកដែលមានប្រាក់ចំណូលខ្ពស់ជាងឆ្នាំ2050។ ដើម្បីសម្រេចបាន ខ្ញុំសូមអំពាវនាវដល់សមាជិកទាំងអស់នៃអង្គការពាណិជ្ជកម្មពិភពលោក និងដៃគូអភិវឌ្ឍន៍ដើម្បីបន្តគាំទ្រដល់ពួកយើង និងបណ្ដាប្រជាជាតិអភិវឌ្ឍន៍ដទៃទៀតដើម្បីជួយយើងបង្កើនការប្រកួតប្រជែងរបស់យើង”។

លោកឧកញ៉ា លឹម ហេង បានមានប្រសាសន៍ថា៖“នៅក្នុងគោលការណ៍របស់អង្គការពាណិជ្ជកម្មពិភពលោក ប្រទេសជាសមាជិកគ្រប់ប្រទេសតែងមានការផ្លាស់ប្តូរទំនិញទៅវិញទៅមកដោយ ដោយស្មើភាព និងដោយស្របច្បាប់។ ទន្ទឹមនឹងនេះគេក៏ជួយអភិវឌ្ឍដល់ប្រទេសក្រីក្រមួយចំនួនដែរដែលហៅថា ប្រទេសដែលមានការអភិវឌ្ឍតិចតួចដូចជាប្រទេសយើង ជាដើម”។

លោកឧកញ៉ា បានបន្តទៀតថា៖“ដូចជាប្រទេសយើង កន្លងមកបានក្លាយជាប្រទេសមានចំណូលមធ្យមកម្រិតទាប ដែលក្នុងកម្រិតនេះគេបានអញ្ជើញសម្តេចនាយករដ្ឋមន្ត្រីធ្វើបទបង្ហាញពីការអភិវឌ្ឍប្រទេស គឺគេបានទទួលស្គាល់ថា យើងមានការរីក-ចម្រើន ហើយជាកិច្ចសម្រួលពាណិជ្ជកម្ម គឺគេបានផ្តល់ឱ្យការអនុគ្រោះពន្ធ ដូចជា EBA GSP ជាដើម ក្នុងការទ្រទ្រង់សេដ្ឋកិច្ច”។

ឧកញ៉ា លឹមហេងបានបញ្ជាក់ទៀតថា៖“ដូច្នេះប្រទេសជាសមាជិកត្រូវទទួលផលប្រយោជន៍ពីWTO យើងជាប្រទេសអភិវឌ្ឍន៍តិចតួចនៅឡើយ យើងក៏បានអំពាវនាវសុំឱ្យមានការគាំទ្រ ហើយសមាជិក WTO មួយចំនួនក៏បានសន្យាផ្តល់ជំនួយ ដូចដែលយើងឃើញហើយថា សហគមន៍អឺរ៉ុបក៏បានជួយយើងចំនួន 10ពាន់លានដុល្លារសម្រាប់រយៈពេល 5ឆ្នាំទៅមុខទៀតផងដែរ៕

July 19, 2019

Author: ធឿន មករា