Author: ធឿន មករា

LG ឌីហ្សាញគ្រែគេង បំពាក់អេក្រង់ OLED ឆ្លាតវៃ បញ្ជាដោយសំឡេង ដូចក្នុងរឿងហូលីវូដ
ក្នុងព្រឹត្តិការណ៍ CES 2021 ក្រុមហ៊ុនទាំងអស់ ដែលមានឈ្មោះចូលរួម បានបញ្ចេញ Prototype (គំរូ) ផលិតផលរបស់ខ្លួន។ ជាក់ស្ដែងក្រុមហ៊ុនផលិតគ្រឿងអេឡិចត្រូនិកធំបំផុតមួយ របស់កូរ៉េខាងត្បូង LG បានបញ្ចេញឱ្យឃើញ នូវគំនិតច្នៃប្រឌិតថ្មីសន្លាងមួយគឺ គ្រែគេងឆ្លាតវៃ ភ្ជាប់ជាមួយនឹងអេក្រង់ហូតឡើងបញ្ជាដោយសំឡេង ហាក់បីដូចជានៅក្នុងខ្សែភាពយន្តហូលីវូដដូច្នេះដែរ។
លោក Jong-sun Park ជាអនុប្រធានផ្នែកផលិតអេក្រង់របស់ LG បានបង្ហាញចំណាប់អារម្មណ៍ថា៖ “ជាមួយនឹងផលិតផលនេះ វាអាចឱ្យយើងរីកចម្រើនទៅមុខ ទៅកាន់ជំនាន់ចុងក្រោយនៃអេក្រង់ ដែលយើងមានលទ្ធផលគ្រប់គ្រាន់ ក្នុងការផ្លាស់ប្តូរបែបផែននៃការផលិតអេក្រង់”
សូមជម្រាបជូនផងដែរថា អេក្រង់ទំហំ 55អ៊ីញ ត្រូវបានគេចាប់អារម្មណ៍ខ្លាំង ព្រោះមានតួនាទី ដូចនឹងអេក្រង់កុំព្យូទ័រ នៅចុងជើងរបស់យើងតែម្ដង ពេលមុន ឬក្រោយក្រោកពីគេងមក អាចបញ្ជាបាន មិនចាំបាច់រង់ចាំយូរឡើយ។ មកទល់ពេលនេះ មិនទាន់មានព័ត៌មានច្រើន អំពីគ្រែគេងដ៏ទំនើបមួយនេះនៅឡើយ៕
January 11, 2021
ញាក់ភ្នែក រឿងនេះពាក់ព័ន្ធនឹងសុខភាព ឬលាភសំណាង?
ញាក់ភ្នែក អាការនេះយើងប្រហែលជាធ្លាប់ស្គាល់ច្បាស់ណាស់ ជាពិសេសដែលគេប្រាប់ថា បើញាក់ភ្នែកខាងឆ្វេង គឺប្រផ្នូលល្អ តែបើញាក់ភ្នែកស្តាំវិញ បញ្ជាក់ថា រឿងមិនល្អកំពុងតែជិតកើតឡើងហើយ តែចំពោះរឿងសុខភាពវិញ តើញាក់ភ្នែកជាសញ្ញាប្រាប់ពីហេតុការ ឬគ្រាន់តែជាភាពខុសប្រក្រតីបន្តិចបន្តួចរបស់រាងកាយ?។
ញាក់ភ្នែកកើតមកពីអ្វី?
ញាក់ភ្នែក ឬស្បែកភ្នែកញាក់ មិនថាតែញាក់ភ្នែកឆ្វេង ឬស្តាំនោះទេ ខាងវេជ្ជសាស្រ្តបានចាត់ទុកថា អាការញាក់ភ្នែកបណ្តាលមកពីសាច់ដុំនៅម្តុំបរិវេណភ្នែកពង្រឹងខ្លួន ដែលកើតចេញពីការញាក់ដែលខុសប្រក្រតីរបស់សរសៃប្រសាទនៅម្តុំនោះ ដោយបច្ច័យដែលធ្វើឱ្យកើតអាការញាក់ភ្នែកនោះមានទាំងការគេងសម្រាកមិនបានគ្រប់គ្រាន់ ការទទួលទានតែ ឬកាហ្វេក្នុងបរិមាណច្រើនជ្រុលពេក ឬភាពតានតឹងធុញថប់ និងកង្វល់ក្នុងអារម្មណ៍ក៏ធ្វើឱ្យភ្នែកញាក់ទាំងឆ្វេង ទាំងស្តាំបានដែរ។
ញាក់ភ្នែកញឹកញាប់ និងច្រើនថ្ងៃ មានគ្រោះថ្នាក់ដែរឬទេ?
អាការញាក់ភ្នែកគរាន់តែជាភាពខុសប្រក្រតីក្នុងអំឡុងពេលខ្លីៗក៏ពិតមែន ប៉ុន្តែលោកវេជ្ជបណ្ដិតជំនាញផ្នែកចក្ខុបានប្រាប់ថា បើសិនជាភ្នែកញាក់ញឹកញាប់ និងយូរលើស 1 សប្តាហ៍ ឬមានអាការញាក់ភ្នែករួមជាមួយការញាក់របស់សាច់ដុំនៅកន្លែងផ្សេងទៀត ដូចជារង្វះមាត់ និងថ្ពាល់ និងមានអាការភ្នែកក្រហម ឬមានអាចម៍រួមជាមួយផង រួមទាំងបើការញាក់ភ្នែកនោះមានភាពធ្ងន់ធ្ងរដល់ថ្នាក់ធ្វើឱ្យស្បែកភ្នែកបិទផងនោះ ករណីទាំងនេះពេទ្យជំនាញខាងភ្នែកបានណែនាំឱ្យមកពិនិត្យអាការនៅមន្ទីពេទ្យដើម្បីរកមើលមូលហេតុពិតប្រាកដ។
ញាក់ភ្នែកបែបណាដែលចាត់ទុកថា កើតជំងឺ
វេជ្ជបណ្ឌិតជំនាញខាងភ្នែកបានរៀបរាប់ថា អាការញាក់ភ្នែកអាចចាត់ចូលក្នុងក្រុមជំងឺបានដូចគ្នា ដោយក្រុមទីមួយហៅថា Essential Blepharospasm ដែលអ្នកជំងឺនឹងមានអាការញាក់ភ្នែកចំពោះតែបរិវេណស្បែកភ្នែកតែម្យ៉ាង និងច្រើនតែញាក់តែម្ខាងប៉ុណ្ណោះក្នុងរយៈដំបូង ប៉ុន្តែបន្ទាប់ពីញាក់យូរៗម្តង តមកភ្នែកនឹងញាក់ញឹកញាប់ឡើង មានភាពខ្លាំងក្លាឡើង និងចាប់ផ្តើមរាលដាលទៅញាក់លើភ្នែកម្ខាងទៀត ដែលពេទ្យក៏ប្រាប់ថា ជាជំងឺដែលគ្មានមូលហេតុ និងអាចគ្មានគ្រោះថ្នាក់ធ្ងន់ធ្ងរអ្វីឡើយ គ្រាន់អាចសាងភាពរំខាន និងសាងឧបសគ្គក្នុងការរស់នៅបន្តិចបន្តួចប៉ុណ្ណោះ។
ចំណែកសភាវមួយទៀតគឺ Hemi facial Spasm ដោយអាការនឹងមានទាំងញាក់ភ្នែក និងសាច់ដុំផ្ទៃមុខរាលដាលទៅដល់បំពង់កផ្នែកខាងញាក់នោះដំណាលគ្នាទៀតផង។ សភាវនេះ គ្រូពេទ្យបានដាស់តឿនឱ្យប្រយ័ត្ន ដោយសារតែជាអាការដែលបង្ហាញបានថា មានភាពខុសប្រក្រតីកើតឡើងជាមួយសរសៃប្រសាទគូទី 7 នៅក្នុងខួរក្បាលរបស់អ្នក ដែលជាសរសៃប្រសាទគ្រប់គ្រងការធ្វើការងាររបស់សាច់ដុំលើផ្ទៃមុខ ដោយអាការខុសប្រក្រតីដែលថានេះអាចកើតបានទាំងសរសៃឈាមបរិវេណសរសៃប្រសាទនោះកោង-ង ឬមានសាច់ដុះទៅសង្កត់សរសៃប្រសាទរហូតក្លាយជាមូលហេតុរបស់ការញាក់ភ្នែក និងសាច់ដុំផ្សេងទៀតញាក់ផងដែរ។ ទាំងអស់នេះការវិនិច្ឆ័យរោគដំណាក់កាលដំបូងត្រូវអាស្រ័យការស្គែនខួរក្បាលដើម្បីរកមើលភាពមិនសមប្រកបរបស់សរសៃប្រសាទដើម្បីឱ្យពេទ្យធ្វើការព្យាបាលជាបន្ត។
អូខេ! ស្គាល់ពីមូលហេតុរបស់ការញាក់ភ្នែករួចហើយ ឥឡូវយើងនាំគ្នាមកមើលពីជំនឿ និងពាក្យទំនាយអំពីការញាក់ភ្នែកនេះវិញម្តង។
ញាក់ភ្នែកនៅពេលព្រឹក(រាប់ចាប់ពីពេលភ្ញាក់ពីគេង ជិតភ្លឺ)
- ញាក់ភ្នែកខាងស្តាំ ៈ នឹងមានញាតិមិត្តបងប្អូនពីស្រុកឆ្ងាយមករក។
- ញាក់ភ្នែកខាងឆ្វេង ៈ នឹងមានការឈ្លោះប្រកែកតវ៉ា ឬមានរឿងក្តៅក្រហាយកើតឡើង។
ញាក់ភ្នែកនៅពេលព្រឹក(ម៉ោង 09ៈ00 – 12ៈ00)
- ញាក់ភ្នែកខាងស្តាំ ៈ នឹងញាតិមិត្តបងប្អូនពីស្រុកក្រៅ ឬពីតាមខេត្តនាំលាភមកឱ្យ។
- ញាក់ភ្នែកខាងឆ្វេង ៈ នឹងមានកើតរឿងមិនល្អនៅក្នុងក្រុមគ្រួសារ។
ញាក់ភ្នែកនៅពេលរសៀល(13ៈ00 – 16ៈ00)
- ញាក់ភ្នែកខាងស្តាំ ៈ រឿងដែលកំពុងគិត ឬកំពុងធ្វើនឹងទទួលបានជោគជ័យ។
- ញាក់ភ្នែកខាងឆ្វេង ៈ នឹងមានមនុស្សភេទផ្ទុយនឹកដល់ ឬអាចនឹងមករក។
ញាក់ភ្នែកនៅពេលល្ងាច(17ៈ00 – 19ៈ00)
- ញាក់ភ្នែកខាងឆ្វេង ៈ នឹងមានសាច់ញាតិបងប្អូន ឬមិត្តជិតដិតដែលនៅឆ្ងាយមកលេង។
- ញាក់ភ្នែកខាងស្តាំ ៈ នឹងបានជួបសាច់ញាតិ ឬមិត្តភ័ក្តិដែលបែកគ្នាយូរដោយមិននឹកស្មានដល់។
ញាក់ភ្នែកនៅពេលយប់(19ៈ00 តទៅ)
- ញាក់ភ្នែកខាងឆ្វេង ៈ នឹងមានតំណឹងល្អមកដល់នៅពេលព្រឹកស្អែកឡើង ឬនឹងបានទទួលលាភពីស្នាដៃដែលបានធ្វើពីមុន
- ញាក់ភ្នែកខាងស្តាំ ៈ នឹងមានរឿងឈ្លោះប្រកែកជាមួយមនុស្សក្នុងគ្រួសារ។
ភ្នែកញាក់ខាងឆ្វេង ឬខាងស្តាំ គឺគ្រាន់តែជាអាការខុសប្រក្រតីរបស់សាច់ដុំប៉ុណ្ណោះ តែបើអ្នកណាជឿលើពាក្យចាស់បុរាណដែលប្រាប់ថាជាប្រផ្នូលអាក្រក់ ឬប្រាប់ពីដំណឹងល្អនោះក៏មិនមែនជារឿងប្លែកអ្វីដែរ គ្រាន់តែកុំទៅជឿជ្រុលពេករហូតដល់ភ្លេចសង្កេតមើលភាពខុសប្រក្រតីរបស់រាងកាយទៅបានហើយ៕
January 8, 2021
ស្មាតហ្វូន Mi 11 របស់ Xiaomi ប្រើពេលត្រឹមតែ 5នាទីប៉ុណ្ណោះ លក់បានជាង 35ម៉ឺនគ្រឿង
ក្រុមហ៊ុន Xiaomi អាចលក់ស្មាតហ្វូន Mi 11 បានជាង 35ម៉ឺនគ្រឿង ដោយប្រើពេលត្រឹមតែ 5នាទី ដែលគិតជាទឹកប្រាក់វិញ គឺលើសពី 1.5ពាន់លានយន់ (ឬប្រមាណ 230លានដុល្លារ)។
ក្រុមហ៊ុន បានចាប់ផ្ដើមបើកការលក់លើកដំបូងក្នុងប្រទេសចិន ដែលទទួលបានជោគជ័យខ្លាំងបំផុត កាលពីថ្ងៃទី1 ខែមករា ឆ្នាំ2021 កន្លងទៅ។
Xiaomi ទើបនឹងបង្ហាញរូបរាងស្មាតហ្វូន Mi 11 ជាផ្លូវការកាលពីចុងឆ្នាំ2020 កន្លងទៅ ជាស្មាតហ្វូនដំបូងគេក្នុងលោក ដែលមានប្រើប្រាស់បន្ទះឈីប Snapdragon 888 របស់ក្រុមហ៊ុន Qualcomm និងមានបង្កប់បច្ចេកវិទ្យាស្គែនចង្វាក់បេះដូងថែមទៀតផង។
លក្ខណសម្បត្តិរបស់ Mi 11 មានថ្មទំហំ 4600mAh, អាចសាកថ្មកម្លាំង 55W និងសាកដោយឥតប្រើខ្សែកម្លាំង 50W ។ ប្រើប្រាស់អេក្រង់ AMOLED ទំហំ 6.81អ៊ីញ ដែលមានកម្រិតបង្ហាញ 2K និងមាន Refresh Rate 120Hz។ វាមានកាមេរ៉ាក្រោយ 3គ្រាប់ ដែលកាមេរ៉ាមេ ទំហំ 108MP, កាមេរ៉ា Ultrawide ទំហំ 13M, កាមេរ៉ា Macro ទំហំ 5MP, កាមេរ៉ា Selfie ទំហំ 20MP និងមានជម្រើស RAM ទំហំ 8GB ឬ 12GB ជាមួយអង្គផ្ទុក 128GB ឬ 256GB ។
Xiaomi mi 11 ជម្រើស RAM 8GB និងមេម៉ូរី 128/256GB និង 1ទៀត គឺ RAM 12GB មេម៉ូរី 256GB និងដាក់លក់ក្នុងតម្លៃប្រមាណជា 610ដុល្លារ៕
January 8, 2021
ឆ្នាំងសាកល្បឿនលឿនដាច់គេ 135W របស់ Huawei ត្រៀមចេញហើយ តែមិនច្បាស់ថាសម្រាប់ទូរស័ព្ទ ឬកុំព្យូទ័រ
ថ្មីៗនេះ ឆ្នាំងសាកល្បឿនលឿនកម្លាំង 135W Super fast របស់ក្រុមហ៊ុន Huawei បានលេចចេញវត្តមាន បញ្ជាក់ដោយវិញ្ញាបនបត្រ 3C (China Compulsory Certificate) តែយ៉ាងណាមិញ គេនៅពុំទាន់ដឹងច្បាស់នៅឡើយថា តើវានឹងត្រូវយកទៅប្រើជាមួយទូរស័ព្ទ ឬក៏កុំព្យូទ័រយួរដៃ របស់ Huawei ឬក៏ឧបករណ៍ផ្សេងទៀត?។
ស្របពេលនេះដែរ ទូរស័ព្ទលំដាប់កំពូល Huawei P50 Pro+ ក៏ត្រៀមនឹងប្រកាសចេញដូចគ្នា។ បើសិនជាបែបនេះពិតមែន ភាគរយដែលខ្ពស់នោះគឺ ឆ្នាំងសាកល្បឿនលឿនកម្លាំង 135W អាចនឹងយកទៅប្រើជាមួយ P50 ជាមិនខានឡើយ។
សម្រាប់កាលបរិច្ឆេទប្រកាសចេញ ក៏ពុំទាន់ប្រកាសឱ្យដឹងដែរ។ ដូច្នេះមានតែរង់ចាំតាមដានទាំងអស់គ្នាជាបន្តទៀត៕
January 8, 2021
កំពូលអ្នកតាមដាន ទស្សន៍ទាយថា ឆ្នាំ2021 នេះ Apple នឹងបញ្ចេញផលិតផល AR Glasses
ថ្មីៗនេះ លោក Kuo កំពូលអ្នកតាមដានខាងតិចណូឡូជី បានបង្ហោះសារលើ Twitter បង្ហើបឱ្យដឹង ពីផលិតផលក្នុងឆ្នាំ2021 ដែលខាងក្រុមហ៊ុនអាចនឹងបញ្ចេញ ដែលមានដូចជា វ៉ែនតាឆ្លាតវៃ AR Glasses, កម្មវិធី AirTags ,កាស AR Headset, និងផលិតផលជាច្រើនទៀត ដូចជា iPad Pro , Mac បំពាក់ដោយ Mini-LED displays ទំហំ 12.9អ៊ិញ លើ iPad Pro ជាដើម។
សូមជម្រាបជូនផងដែរ លោក Kuo ដែលត្រូវបានគេដាក់ឈ្មោះក្រៅឱ្យលោកថា ជាកំពូលអ្នកតាមដានព័ត៌មានតិចណូឡូជី និងជារឿយៗ តែងតែទស្សន៍ទាយ អំពីផលិតផលដែលត្រៀមចេញថ្មីៗរបស់ក្រុមហ៊ន Apple ជាក់ស្ដែង ដែលមានដូចជា iMac ជាដើម៕
January 8, 2021
កាស AirPods Max ប្រណីត ច្នៃស្រោបមាស និងអាលុយមីញ៉ូម តម្លៃ ពាន់ដុល្លារឡើង
ថ្មីៗនេះ ក្រុមហ៊ុន Cavir បានបញ្ចេញផលិតផលម៉ូដែលពិសេស (Edition) ដូចសព្វមួយដង ដែលម្ដងនេះ គឺជា កាស AirPods Max របស់ក្រុមហ៊ុន Apple។
កាស AirPods Max តម្លៃធម្មតា 549ដុល្លារ ប៉ុន្តែម៉ូដែលពិសេស ដែលរចនាបន្ថែម តម្លៃ 6,720ដុល្លារ រីឯប្រអប់សាកភ្លើងវិញ តម្លៃ 107ដុល្លារ។ កាសម៉ូដែលពិសេសនេះ បំពាក់ដោយមាស 18ការ៉ាត់ និងស្រោបអាលុយមីញ៉ូមទូទាំងតួកាស និងប្រអប់។ សម្រាប់លក្ខណសម្បត្តិផ្សេងៗ វាដូចនឹងកាសធម្មតាដែរ។
គួររំឭកផងដែរថា ក្រុមហ៊ុន Cavir តែងតែផលិតសម្ភារថ្លៃៗ និងប្រណីតរបស់ Apple មិនដែលដាច់នោះទេ មានទាំង iPhone ស្រោបពេជ្រ នាឡិកា ឬកុំព្យូទ័រជាដើម៕
January 8, 2021
របស់មិនល្អ ពេលមានផ្ទៃពោះរបស់ស្រ្តី
ស្រ្តីមានផ្ទៃពោះត្រូវតែប្រយ័ត្នឱ្យបានច្រើនលើគ្រប់ៗរឿង ជាពិសេសក្នុងត្រីមាសដំបូង(1-3 ខែដំបូង) រឹតតែត្រូវប្រយ័ត្នខ្លាំងជាងអំឡុងពេលណាទាំងអស់ ព្រោះជារយៈពេលដែលអាចនឹងកើតការរលូតបានយ៉ាងងាយ។ ជាអំឡុងពេលដែលកូនកំពុងសាងអវយវៈ និងកំពុងតោងជាប់នឹងជញ្ជាំងស្បូន។ ក្នុងអំឡុងពេលមានគភ៌ ប្រព័ន្ធការពារជំងឺរបស់អ្នកម្តាយនឹងធ្លាក់ចុះទាប ដែលនេះជាការសម្របសម្រួលខ្លួន ដើម្បីបន្ថយការបដិសេធគភ៌ ដែលប្រៀបដូចជារឿងប្លែកចម្លែកមួយដែរ។
ដូច្នេះ យើងនឹងមើលឃើញថា ស្រ្តីមានគភ៌មានឱកាសឆ្លងមេរោគបានយ៉ាងងាយជាងមនុស្សធម្មតាទូទៅ និងនៅពេលឆ្លងមេរោគហើយ ក៏នឹងកើតមានសភាវជ្រៀតជ្រែកពីជំងឺផ្សេងៗកាន់តែងាយឡើង ដូចជា បើឆ្លងមេរោគគ្រុនផ្តាសាយធំ ឱកាសក្នុងការកើតសភាវរលាកសួតមានខ្ពស់ជាងមនុស្សប្រក្រតីទូទៅ។ ប្រព័ន្ធរំលាយអាហារ ក៏ដូចគ្នាដែរ បើបានទទួលអាហារដែលមិនស្អាត ស្ទើរឆៅ ស្ទើរឆ្អិននោះ ក៏នឹងធ្វើឱ្យងាយមានការឆ្លងមេរោគក្នុងប្រព័ន្ធរំលាយអាហារ ដែលជាមូលហេតុធ្វើឱ្យស្រ្តីមានគភ៌មានអាការរាករូស ក្អួតចង្អោរ ឈឺពោះ និងត្រូវមកគេងសម្រាកព្យាបាលនៅក្នុងមន្ទីរពេទ្យ ដើម្បីបញ្ចូលសេរ៉ូមជំនួសជាតិទឹកដែលបានបាត់បង់ចេញពីរាងកាយដោយសារការក្អួត ឬបន្ទោបង់រាកជាទឹកច្រើនៗដង និងញ៉ាំថ្នាំសម្លាប់មេរោគ។ ដូច្នេះស្រ្តីមានគភ៌គួរតែផ្តល់ភាពសំខាន់ និងផ្ចិតផ្ចង់រឿងអាហារការហូបចុកឱ្យបានដិតដល់ជាពិសេស ដោយសារតែ បើសិនជាមានអាការធ្ងន់ធ្ងរខ្លាំងរហូតដល់រាងកាយទប់ទល់នឹងការឆ្លងមេរោគលែងរួច (ដូចជា ធ្ងន់ធ្ងររហូតទទួលទានអាហារ និងទឹកមិនបាន រហូតធ្វើឱ្យតុល្យភាពទឹក និងសារធាតុរ៉ែក្នុងរាងកាយខុសប្រក្រតី)នោះ រាងកាយអាចនឹងកាត់បន្ថយបន្ទុកការធ្វើការងារ ដោយការទម្លាក់កូនចេញ ដែលធ្វើឱ្យកើតមានការរលូតតាមមកហ្នឹងឯង។
ដូច្នេះហើយទើបអ្នកម្តាយដែលកំពុងមានគភ៌ គួរចៀសវាងអាហារទាំងនេះ ទោះជាក្នុងអំឡុងពេលមុនមានផ្ទៃពោះអាចទទួលទានបានក៏ដោយ ព្រោះសភាពរាងកាយស្ថិតក្នុងអំឡុងពេលដែលខុសប្លែកពីគ្នា។ គួរចៀសវាងអាហារឆៅ ដូចជា សាច់ត្រីឆៅផ្សេងៗ តែបើចង់ទទួលទានខ្លាំងមែនទែននោះ ក៏ត្រូវជ្រើសរើសហាងណាដែលជឿទុកចិត្តបានក្នុងរឿងភាពស្អាត និងអនាម័យ។
ចំណែក ទឹកតែ កាហ្វេ បើឈប់ញ៉ាំក្នុងខណៈពេលតាំងគភ៌បាន គឺជារឿងល្អខ្លាំងណាស់ ព្រោះទោះជាកាហ្វេអ៊ីននៅក្នុងទឹកតែ និងកាហ្វេគ្មានចំណែកធ្វើឱ្យកើតភាពពិការចំពោះកូននៅក្នុងផ្ទៃក៏ដោយ តែវាមានចំណែកជំរុញការធ្វើការងាររបស់បេះដូងស្ត្រីគភ៌ឱ្យធ្វើការកាន់តែខ្លាំងឡើង ព្រោះជាប្រក្រតី បេះដូងរបស់ស្រ្តីនឹងធ្វើការកើនឡើង 10 – 15ភាគរយស្រាប់ហើយក្នុងអំឡុងពេលមានគភ៌។ ការបន្ថែមបរិមាណកាហ្វេអ៊ីនចូលទៅទៀត អាចនឹងធ្វើឱ្យស្ត្រីមានគភ៌មានអារម្មណ៍ញ័រដើមទ្រូង ឆាប់ហត់ និងថាមពលផ្សេងៗដែលគួរបានបញ្ជូនទៅឱ្យកូនក្នុងផ្ទៃ អាចត្រូវបាននាំទៅប្រើក្នុងការធ្វើការងាររបស់ម្តាយវិញ ធ្វើឱ្យកូនក្នុងផ្ទៃបានទទួលសារជាតិអាហារផ្សេងៗថយចុះ ហើយបើស្ថិតក្នុងអាការបែបនេះក្នុងរយៈពេលវែង អាចនឹងហុចផលឱ្យកូនក្នុងគភ៌មានខ្លួនតូច ចម្រើនធំធាត់យឺត និងមានទម្ងន់ខ្លួនតិចនៅពេលកើតដំបូង។
ចំពោះស្រ្តីមានគភ៌ដែលញៀនកាហ្វេខ្លាំង ឬអ្នកខ្លះបើមិនបានញ៉ាំហើយ នឹងមានអាការឈឺក្បាលនោះ សូមណែនាំថា អាចញ៉ាំបានក្នុង 1ថ្ងៃ 1កែវ ដែលនេះជាបរិមាណដែលអាចទទួលយកបាន ឬជ្រើសរើសញ៉ាំកាហ្វេប្រភេទដែលចម្រាញ់យកជាតិកាហ្វេអ៊ីនចេញ គឺជាការល្អបំផុត៕
January 8, 2021
ប្រុសៗ សូមស្តាប់ខាងនេះ! ប្រព័ន្ធ WiFi ធ្វើឱ្យទឹកមេជីវិតចុះខ្សោយ
ប្រព័ន្ធ WiFi ហុចផលប៉ះពាល់ដល់សក្តានុពលរបស់ទឹកមេជីវិតរបស់បុរសៗណា ដែលច្រើនតែដាក់ កុំព្យូទ័រ Labtopលេងនៅលើភ្លៅ ព្រោះអាចនឹងធ្វើឱ្យពិបាកក្នុងការមានកូន។
កាលពីចុងខែកន្លងទៅនេះ ទីភ្នាក់ងារព័តមានរ៉យទ័របានរាយការណ៍ថា អ្នកវិទ្យាសាស្រ្តជនជាតិអាមេរិក និងអាហ្សង់ទីន បានបង្ហើបឱ្យដឹងថា មនុស្សប្រុសដែលចូលចិត្តដាក់កុំព្យូទ័រ Labtop នៅលើភ្លៅ ខណៈពេលភ្ជាប់ប្រព័ន្ធ WiFi នោះ អាចប្រថុយប្រថាននឹងសភាវពិបាកមានកូន ក្រោយពីស្រាវជ្រាវរកឃើញថា ប្រព័ន្ធ WiFi ហុចផលប៉ះពាល់ដល់សក្តានុពលរបស់ទឹកមេជីវិតរបស់មនុស្សប្រុស។
ដោយអ្នកវិទ្យាសាស្រ្តមកពីស្ថាប័នវេជ្ជសាស្រ្តការបន្តពូជ នេសសេនធីស ក្នុងប្រទេសអាហ្សង់ទីន រួមជាមួយស្ថាប័នវេជ្ជសាស្រ្ត វើជីនៀ សហរដ្ឋអាមេរិក បានរួមគ្នាធ្វើការស្រាវជ្រាវពាក់ព័ន្ធនឹងផលប៉ះពាល់របស់ WiFi ចំពោះសភាវការបន្តពូជរបស់មនុស្សប្រុស ដោយនាំយកទឹកមេជីវិតពីមនុស្សប្រុសដែលមានសុខភាពល្អក្នុងអំឡុងអាយុពី 26 – 45ឆ្នាំ ចំនួន 29នាក់ មកដាក់ជិត និងឆ្ងាយពីកុំព្យូទ័រ Labtop ដែលបានភ្ជាប់ប្រព័ន្ធ WiFi រយៈពេល 4ម៉ោង។
លទ្ធផលនៃការសាកល្បងបានបង្ហាញថា បន្ទាប់ពី 4ម៉ោងកន្លងផុតទៅ ទឹកមេជីវិតដែលដាក់នៅជិតកុំព្យូទ័រ Labtopនោះ បញ្ឈប់ការធ្វើចលនា ដល់ទៅ 25ភាគរយ ចំណែក 9ភាគរយទៀត រកឃើញថា ឌីអឹនអេ ត្រូវបានបំផ្លាញ ចំែណកទឹកមេជីវិតដែលដាក់នៅឆ្ងាយពីកុំព្យូទ័រ Labtopវិញ បញ្ឈប់ការធ្វើចលនាត្រឹមតែ 14ភាគរយ និងមានត្រឹមតែ 3ភាគរយប៉ុណ្ណោះ ដែលឌីអឹនអេ ត្រូវបានបំផ្លាញ។
តាមរយៈការស្រាវជ្រាវនេះ បានបង្ហាញឱ្យឃើញថា បើសិនមនុស្សប្រុសប្រើការកុំព្យូទ័រ Labtop និងតភ្ជាប់ប្រព័ន្ធ WiFi អុីនធើណេតហើយដាក់នៅលើភ្លៅនោះ នឹងហុចផលធ្វើឱ្យពិបាកក្នុងការមានកូន តែក៏គួរសង្កេតដែរថា ការងារស្រាវជ្រាវមួយនេះ មិនបាននិយាយពីកម្តៅដែលចេញពីកុំព្យូទ័រ Labtop នោះឡើយ ទាំងដែលកម្តៅ ក៏ជាបច្ច័យមួយដែលបំផ្លាញសក្តានុពលរបស់ទឹកមេជីវិតដែរនោះ។
យ៉ាងណាក៏ដោយ ខាងលោកវេជ្ជបណ្ឌិត រ៉ូប៊ើត អូអាតេស ដែលជាអ្នកឯកទេសខាងប្រព័ន្ធបន្តពូជ និងប្រព័ន្ធបញ្ចេញទឹកមូត្រ បានផ្តល់ទស្សនៈថា លទ្ធផលនៃការស្រាវជ្រាវនេះ គ្រាន់តែជាចំណាប់អារម្មណ៍មួយក្នុងន័យវិទ្យាសាស្រ្តប៉ុណ្ណោះ តែសម្រាប់រូបលោកវិញ វាគ្មានភាពពាក់ព័ន្ធអីក្នុងខាងជីវវិទ្យារបស់មនុស្សឡើយ៕
January 8, 2021
ផ្ទះដែលមានសុខភាពល្អ មានលក្ខណៈបែបណា?
” ផ្ទះ ” គឺជាបច្ច័យមួយក្នុងចំណោមបច្ច័យទាំង ៤ របស់មនុស្ស តែភាពសំខាន់របស់ផ្ទះ មិនមែនគ្រាន់តែជាកន្លែងសម្រាប់ស្នាក់អាស្រ័យនៅប៉ុណ្ណោះទេ ការមើលថែទាំឱ្យផ្ទះស្អាត មានសុវត្ថិភាព ងាយស្រួលដល់ការរស់នៅយ៉ាងមានសេចក្តីសុខទាំងកាយ និងចិត្ត នឹងរឹតតែធ្វើឱ្យអ្នកស្នាក់អាស្រ័យមានសុខភាពល្អ និងមានគុណភាពជីវិតកាន់តែល្អប្រសើរឡើង ដូច្នេះថ្ងៃនេះយើងនាំគ្នាមកធ្វើឱ្យផ្ទះរបស់យើងក្លាយជាផ្ទះមានសុខភាពល្អទាំងអស់គ្នា ។
គោលការណ៍ចម្បងនៃផ្ទះមានសុខភាពល្អដែលគួរយកចិត្តទុកដាក់នោះគឺ គ្មានធូលីដី ស្រឡះសប្បាយ គ្មានសារធាតុពុល ដែលយើងអាចធ្វើបានដោយវិធីដូចខាងក្រោមនេះ ៖
គ្មានធូលីដី
- ក្នុងបន្ទប់គេង ជាពិសេសនៅម្តុំក្បាលតំណេក មិនគួរមានធ្នើរ ឬថ្នាក់ដាក់ឥវ៉ាន់ឡើយ ព្រោះនៅពេលមានថ្នាក់ដាក់ ច្បាស់ជាត្រូវមានឥវ៉ាន់ដាក់មិនខាន រួចហើយវានឹងក្លាយជាប្រភពប្រមូលសន្សំធូលីដីបានយ៉ាងងាយ ។
- តុធ្វើការ បើនៅក្នុងបន្ទប់គេងផងនោះ គួរឱ្យនៅឆ្ងាយពីក្បាលតំណេក ព្រោះមានការស្រាវជ្រាវវិភាគមួយបានរកឃើញថា តុធ្វើការមានមេរោគបាក់តេរីច្រើនជាងនៅក្នុងបន្ទប់ទឹករាប់សឹបដងឯណោះ ។
- គ្រឿងតុ កៅអី នៅក្នុងផ្ទះ ដូចជា កៅអី ឬកៅអីសាឡុង គួរជ្រើសរើសប្រើប្រភេទដែលរុំដោយស្បែក ព្រោះមិនសូវសន្សំធូលីដី ថែមទាំងងាយស្រួលសម្អាតទៀតផង ។
- កម្រាលព្រំ បើមិនចាំបាច់ទេ មិនគួរមានទេ ព្រោះជាកន្លែងសន្សំធូលីដីបានដោយងាយ ។
- វាំងនន បើសឹនជ្រើសរើសប្រើវាំងននដែលជាវត្ថុផ្សេងៗក្រៅពីផ្ទាំងក្រណាត់នោះ គឺជាការល្អ ដូចជាវាំងននបែបស្លាបព្រឹលជាដើម ព្រោះវាងាយស្រួលសម្អាត ។
ស្រឡះសប្បាយ
- មិនគួរបើកម៉ាស៊ីនត្រជាក់ពេញមួយថ្ងៃនោះទេ ព្រោះក្រៅពីអស់លុយច្រើនហើយ នៅធ្វើឱ្យខ្យល់អាកាសធម្មជាតិមិនអាចបក់ចេញចូលមកក្នុងផ្ទះ ឬក្នុងបន្ទប់បានឡើយ ។
- គួរបើកបង្អួច ដើម្បីឱ្យខ្យល់អាកាសបរិសុទ្ធចេញចូល និងពន្លឺពីធម្មជាតិបានឆ្លងកាត់ចូលមកក្នុងផ្ទះ ឬក្នុងបន្ទប់ឱ្យបានញឹកញាប់ផង ។
គ្មានសារធាតុពុល
- តុ ទូ កៅអី ដូចជា ទូដាក់ខោអាវ ឬទូដាក់ឥវ៉ាន់ គួរប្រើប្រាស់ទូឈើធម្មជាតិ មិនគួរប្រើប្រាស់បែបឈើសឹប្បនិម្មិតឡើយ ជាពិសេសឈើ Particle board ព្រោះវាមានចំណែកផ្សំរបស់ Formaldehyde ដែលមានផលប៉ះពាល់ដល់ប្រព័ន្ធដង្ហើមរបស់មនុស្សបាន ។
- ថ្នាំលាបផ្ទះ ឬថ្នាំលាបឈើផ្សេងៗ គួរជ្រើសរើសថ្នាំដែលមានគុណសម្បត្តិ និងមានសុវត្ថិភាពចំពោះសុខភាព ។
- បន្ទប់គេង ដែលមានបន្ទប់ទឹកនៅខាងក្នុង មិនគួរធ្វើប្រឡោះខ្យល់នៅលើទ្វាបន្ទប់ទឹកឡើយ ព្រោះមេរោគបាក់តេរី និងវត្ថុកខ្វក់ផ្សេងៗពីខាងក្នុងបន្ទប់ទឹកនឹងចូលមកក្នុងបន្ទប់គេងបានតាមរយៈប្រឡោះខ្យល់ទាំងនោះ ។ គួរជ្រើសរើសប្រើទ្វាដែលជិត និងបំពាក់កង្ហារបឺតខ្យល់ចេញពីបន្ទប់ទឹកផង ។
January 8, 2021
8 សំណួរសំខាន់ៗ របស់អ្នកដែលចង់ចិញ្ចឹមកូនដោយទឹកដោះខ្លួនឯង
អ្នកម្តាយថ្មោងថ្មីជាច្រើននាក់ ប្រហែលជាមានកង្វល់ច្រើនក្នុងរឿង “ការចិញ្ចឹមកូនដោយទឹកដោះម្តាយ” ព្រោះមានអ្នកម្តាយជាច្រើននាក់ ដែលប្រសូតបុត្ររួចហើយ ទឹកដោះមិនបានហូរចេញមកភ្លាមៗ ឯអ្នកម្តាយខ្លះទៀត ក៏អាចនឹងមានកង្វល់ពាក់ព័ន្ធនឹងរាងកាយ និងសុខភាពរបស់ខ្លួនឯងថា តើខ្លួនបានត្រៀមរួចរាល់ក្នុងការបំបៅទឹកដោះកូនហើយឬនៅ?ជាដើម ទើបកើតចេញជាសំណួរផ្សេងៗពាក់ព័ន្ធនឹងការបំបៅដោះកូនថា តើការបំបៅទឹកដោះកូនបែបនេះអាចធ្វើបានឬទេ?។ ដូច្នេះយើងនាំគ្នាមកមើលថា តើសំនួរទាំងនោះមានអ្វីខ្លះ?។
1-បៅដោះម្តាយហើយ កូនក្អែ ក្អួតចេញមកវិញ នេះបញ្ជាក់ថា កូនមានប្រតិកម្មចាញ់ជាមួយទឹកដោះម្តាយឬទេ? និងត្រូវបញ្ឈប់ការបំបៅទឹកដោះកូនឬទេ?
រឿងនេះមិនអីទេ…បើកូនក្អែទឹកដោះចេញមកវិញ ចូរគិតមុនគេថា តើអ្នកម្តាយឱ្យកូនបៅទឹកដោះច្រើនពេកទេដឹង? និងដែលឃើញកូនស្រែកយំញឹកញាប់នោះ កូនអាចនឹងមិនបានឃ្លានមឹមទេ តែអាចបណ្តាលមកពីមូលហេតុផ្សេងទៀត។ បើកូនស្រែកយំ ក៏គួរតែពដើរលេងខ្លះផង មិនមែនឃើញកូនស្រែកយំហើយ គិតតែពីលើកកូនមកបំបៅដោះតែម្យ៉ាងនោះទេ ព្រោះនេះមិនមែនជារឿងល្អប៉ុន្មានឡើយ។
2-ម្តាយកើតប្រតិកម្មចាញ់(អាលែកហ្ស៊ី)នៅលើរាងកាយ តើឱ្យកូនបៅទឹកដោះបានឬទេ?
អាចឱ្យកូនបៅទឹកដោះបានតាមប្រក្រតី…តែត្រូវកាត់បន្ថយអាហារណាដែលជំរុញឱ្យកើតប្រតិកម្ម ដូចជា សណ្តែក ផលិតផលធ្វើអំពីទឹកដោះ ស៊ុត អាហារសមុទ្រ និងម្សៅសាលី ជាដើម។
3-មានកូនភ្លោះឱ្យកូនបៅទឹកដោះម្តាយ តើគ្រប់គ្រាន់ឬទេ?
បើអ្នកម្តាយមានគភ៌កូនភ្លោះនោះ រាងកាយនឹងទទួលដឹងបានដោយខ្លួនឯងតាមធម្មជាតិ ហើយរាងកាយនឹងផលិតទឹកដោះចេញមកឱ្យគ្រប់គ្រាន់ជាមួយតម្រូវការរបស់កូនទាំងពីរយ៉ាងពិតប្រាកដ។
4-ដោះខ្វាក់ ក្បាលដោះខ្លី តើបំបៅទឹកដោះកូនបានឬទេ?
បាន! នៅពេលពិនិត្យគភ៌ គ្រូពេទ្យនឹងបានដឹងរឿងទាំងនេះស្រេចទៅហើយ ហើយនិងណែនាំពីវិធីការបំបៅទឹកដោះកូនដែលត្រឹមត្រូវឱ្យអ្នកម្តាយយកទៅប្រតិបត្តិដោយខ្លួនឯង។ អ្នកម្តាយមិនចាំបាច់មានកង្វល់អំពីរឿងនេះទេ ព្រោះកូននឹងចេះរិះរកវិធីបឺតជញ្ជក់ទឹកដោះពីម្ដាយបានដោយខ្លួនឯង ហើយនឹងស៊ាំធ្លាប់ជាមួយដោះរបស់អ្នកម្តាយដោយឯកឯង។
5-កូនបៅទឹកដោះម្តាយហើយ បន្ទោបង់មិនប្រក្រតី
មិនដែលមានករណីបែបហ្នឹងទេ…ព្រោះទឹកដោះម្តាយងាយរំលាយណាស់ ធ្វើឱ្យប្រព័ន្ធការបន្ទោបង់របស់កូនធ្វើការល្អ ក្រពះធ្វើការបានល្អ កូននឹងមិនឆ្អល់ពោះ ពោះមិនឡើងរឹងណែន មិនតឹងថប់ ឬក្អួតទេ តែកូននឹងគេងលក់ស្រួល និងបៅទឹកដោះស្រួលទៀតផង។
6-កូនខ្លួនឡើងពណ៌លឿង តើត្រូវតែបានទទួលទឹកដោះម្តាយភ្លាមឬ?
ទារកភាគច្រើន ខ្លួននឹងឡើងពណ៌លឿង បណ្តាលមកពីការធ្វើការរបស់ថ្លើម និងទឹកប្រមាត់ដែលធ្វើការមិនទាន់បានល្អ។ បើទឹកដោះរបស់អ្នកម្តាយនៅមិនទាន់មានក្នុងអំឡុងពេលដំបូងៗក៏មិនអីដែរ តែបើទឹកដោះចាប់ផ្តើមមានហើយ គួរឱ្យកូនបានបៅទឹកដោះម្តាយភ្លាមៗ ដើម្បីកាត់បន្ថយអាការខ្លួនលឿងរបស់កូន។
7-ម្តាយមិនស្រួលខ្លួន កើតជំងឺផ្តាសាយ តើអាចបំបៅទឹកដោះកូនបានឬទេ?
អាចបំបៅកូនបានតាមប្រក្រតី…លើកលែងតែពេលអ្នកម្តាយគ្រុនក្តៅខ្លួនខ្លាំង ព្រោះអាការគ្រុនក្តៅបណ្ដាលពីមេរោគបាក់តេរី អាចធ្វើឱ្យកូនឈឺថ្កាត់បាន តែបើអ្នកម្តាយគ្រាន់តែក្អក ហៀរសំបោរ ឬឈឺកនោះ អាចបំបៅទឹកដោះកូនតូចបានតាមប្រក្រតី និងមិនគួរទិញថ្នាំមកលេបដោយខ្លួនឯងទេ ព្រោះថ្នាំខ្លះមានផលប៉ះពាល់ដល់ទារកដែលបៅទឹកដោះម្តាយ។ គួរទៅប្រឹក្សាជាមួយគ្រូពេទ្យ មុនពេលទិញថ្នាំជានិច្ច។
8-អ្នកម្តាយដែលធ្វើការវះកាត់បំប៉ោងសុដន់ តើអាចបំបៅទឹកដោះកូនបានឬទេ?
អាចបំបៅទឹកដោះកូនបានដូចប្រក្រតី…តែនៅក្នុងអំឡុងពេលដែលដោះស្ទះ នឹងមានអារម្មណ៍ថា ថប់ៗ និងតឹងណែនជាងប្រក្រតី តែនៅពេលកូនបៅបានមួយរយៈហើយនោះ សុដន់នឹងត្រឡប់មកជាប្រក្រតីវិញ និងមិនយារធ្លាក់នោះឡើយ។
ជំនឿទាំងឡាយពាក់ព័ន្ធនឹងការបំបៅទឹកដោះកូន ជារឿងដែលមនុស្សភាគច្រើននិយាយតៗគ្នាមក ទើបធ្វើឱ្យអ្នកម្តាយថ្មីថ្មោងមួយចំនួនកើតការសង្ស័យ និងអាចយល់ច្រឡំបានដូចគ្នា៕
January 8, 2021