កាលពីការបញ្ជាក់ពីគណនីហ្វេសប៊ុករបស់កីឡាករ អេរិក ប៉ែនភារុន ម្ចាស់ខ្សែក្រវាត់ WBA Asia បានឱ្យដឹងថា ខ្លួនបានត្រៀមខ្លួនរួចជាស្រេចហើយក្នុងការប្រកួតនាចុងសប្តាហ៍នេះក្នុងប្រភេទទម្ងន់ធ្ងន់មួយនៅប្រទេសហ្វីលីពីន។
កីឡាករប្រដាល់សកលខ្មែរ សញ្ជាតិអាមេរិក អេរិក ប៉ែនភារុន នឹងឡើងប្រកួតជាលើកទី4 របស់គេនៅថ្ងៃទី3 ខែសីហា ឆ្នាំ2019 នៅឯប្រទេសហ្វីលីពីន ជាមួយអ្នកលេងកណ្ដាប់ដៃមកពីឥណ្ឌូនេស៊ី David Koswara។
គួរបញ្ជាក់ផងដែរថា កីឡាកររូបនេះមានឪពុកម្តាយជាអ្នកខេត្តកំពត ក្រោយមកក៏ទៅរស់នៅសហរដ្ឋអាមេរិក ដែលចុងក្រោយកីឡាកររូបនេះបានមកហាត់ប្រដាល់នៅប្រទេសវៀតណាម ដោយប្រកួតមិនដែលចាញ់ឡើយជាមួយនឹងស្ថិតិការប្រកួត 3លើក ឈ្នះទាំង 3លើក៕
Author: ធឿន មករា
អេរិក ប៉ែនភារុន កូនខ្មែរ សញ្ជាតិអាមេរិកាំង ត្រូវជួបកីឡាករឥណ្ឌូនេស៊ី នៅលើទឹកដីហ្វីលីពីន
ស៊ីហ្គេមឆ្នាំនេះ ធឿន ធារ៉ា នឹងបង្ហាញមុខនៅហ្វីលីពីនក្នុងវិញ្ញាសាប្រដាល់បុរាណ
ជើងខ្លាំងប្រដាល់គុនខ្មែរ ធឿន ធារ៉ា នឹងត្រូវប្រកួតតំណាងឱ្យកម្ពុជាដើម្បីចូលរួមក្នុងព្រឹត្តិការណ៍កីឡាស៊ីហ្គេម លើកទី៣30 ឆ្នាំ2019 នៅឯប្រទេសហ្វីលីពីនក្នុងប្រភេទកីឡាប្រដាល់បុរាណ។
ចំពោះកីឡាប្រដាល់បុរាណនេះ កាលពី SEA GAMES ឆ្នាំ2017 កម្ពុជាធ្វើបានយ៉ាងល្អ ដោយប្រកួតក្នុង 5វិញ្ញាសា ទទួលបានមេដាយមាស 1គ្រឿង មេដាយប្រាក់ 1គ្រឿង និងមេដាយសំរិទ្ធ 2គ្រឿង។
គួរបញ្ជាក់ដែរថា ការប្រកួតកីឡាអាស៊ីអាគ្នេយ៍លើកទី30 ឆ្នាំ2019 នឹងចាប់ផ្តើមនៅថ្ងៃទី30 ខែវិច្ឆិកា ឆ្នាំ2019 និង បិទបញ្ចប់ទៅវិញនៅថ្ងៃទី11 ខែធ្នូ ឆ្នាំ2019៕
កាន់តែងាយស្រួល និងមានទំនុកចិត្តជាមួយនឹងបណ្ដាញ ការិយាល័យទូទាំងប្រទេស និងបច្ចេកវិទ្យាទំនើបរបស់ប្រាសាក់
ប្រាសាក់ដែលជាគ្រឹះស្ថានហិរញ្ញវត្ថុធំជាងគេនៅកម្ពុជា ត្រូវបានគេកត់សម្គាល់ឃើញថា កំពុងមានសម្ទុះខ្លាំងក្នុងទីផ្សារ ស្របពេលដែលស្ថាប័នហិរញ្ញវត្ថុប្រកបដោយសក្តានុពលមួយនេះ កំពុងពង្រីកបណ្តាញការិយាល័យរបស់ខ្លួនជាច្រើនសាខាលើផ្ទៃប្រទេស។
រហូតមកដល់បច្ចុប្បន្ននេះ ប្រាសាក់បានក្លាយជាគ្រឹះស្ថានហិរញ្ញវត្ថុដែលមានសាខាច្រើនជាងគេនៅកម្ពុជា និងផ្តល់ភាពងាយស្រួលជូនអតិថិជនក្នុងការទទួលបានសេវាហិរញ្ញវត្ថុដែលផ្តល់នូវភាពរីកចម្រើន។
ក្រៅពីការផ្តល់ការបម្រើសេវានៅតាមសាខា ប្រាសាក់បានដាក់ឱ្យប្រើប្រាស់សេវាធនាគារចល័ត ដែលអនុញ្ញាតឱ្យអតិថិជនអាចធ្វើប្រតិបត្តិការធនាគារដោយខ្លួនឯងតាមទូរស័ព្ទដៃ និងកុំព្យូទ័របានយ៉ាងងាយស្រួលគ្រប់ពេលវេលា និងទីកន្លែង។ ជាងនេះទៅទៀត អតិថិជនក៏អាចដកប្រាក់ និងចាត់ចែងសាច់ប្រាក់ជាមួយនឹងម៉ាស៊ីនអេធីអឹមប្រាសាក់បាន 24 ម៉ោងក្នុង 1 ថ្ងៃ 7 ថ្ងៃក្នុង 1 សប្តាហ៍ផងដែរ។
លោក សាយ សូនី នាយកប្រតិបត្តិរបស់ប្រាសាក់ បានលើកឡើងថា ការផ្តល់ជម្រើសក្នុងការបម្រើសេវាច្រើនបែបនេះ និងការធ្វើទំនើបកម្មបច្ចេកវិទ្យាឌីជីថលរបស់ប្រាសាក់គឺឆ្លើយតបតាមតម្រូវការអតិថិជន និងទៅឱ្យកាន់តែជិតអតិថិជនថែមទៀត។ ហើយនេះគឺជាការបង្ហាញពីការប្តេជ្ញាចិត្តខ្ពស់ និងកិច្ចខិតខំប្រឹងប្រែងរបស់ប្រាសាក់ ក្នុងការបម្រើសេវាកម្មជូនអតិថិជនទាំងអស់ឱ្យកាន់តែប្រសើរឡើង និងកាន់តែងាយស្រួលឡើង ទាំងការផ្តល់កម្ចី ផ្តល់សេវាប្រាក់បញ្ញើសន្សំ ចាត់ចែងសាច់ប្រាក់ ផ្ទេរប្រាក់ និងទូទាត់ផ្សេងៗ។
លោកសូនីក៏បានថ្លែងអំណរគុណដល់អតិថិជនទាំងអស់ដែលតែងតែគាំទ្រនិងប្រើប្រាស់សេវាហិរញ្ញវត្ថុប្រាសាក់។
សូមបញ្ជាក់ថា ប្រាសាក់ផ្តល់សេវាហិរញ្ញវត្ថុជាច្រើនប្រភេទរួមមាន៖ សេវាឥណទាន ប្រាក់បញ្ញើសន្សំ ទូទាត់វិក្កយបត្រទឹក ទូទាត់វិក្កយបត្រភ្លើង ផ្ទេរប្រាក់ ប្តូរប្រាក់ ទិញកាតទូរស័ព្ទ សេវាបើកប្រាក់បៀវត្ស សេវាទូទាត់រហ័ស សេវាអេធីអឹម ម៉ាស៊ីនឆូតកាត សេវាធនាគារចល័ត និងសេវាបញ្ជាក់សមតុល្យគណនី ដែលគ្របដណ្តប់នៅទូទាំងប្រទេស។
សម្រាប់ព័ត៌មានបន្ថែម៖ www.prasac.com.kh
ចង់បានសក់ស្រស់ស្អាតគួរធ្វើដូចម្តេចខ្លះ?
គ្រប់គ្នាសុទ្ធតែចង់បានសក់ដែលមានសុខភាពល្អ វែង រលោង រលាស់ស្អាតទាំងអស់ ប៉ុន្តែគួរឱ្យសោកស្តាយដែលភាពស្រស់ស្អាតនេះមិនអាចផ្តល់ឱ្យមនុស្សគ្រប់គ្នាបានទេ ព្រោះថា បើមានត្រឹមតែចិត្តចង់បាន ប៉ុន្តែមិនព្រមព្យាយាមអនុវត្តតាមការណែនាំទេនោះ ក៏ទុកដូចជាគ្មានន័យអ្វីដែរ។ ទំព័រនេះ ឡារ៉ែន សូមជម្រាបថា សក់ស្អាត ទន់រលោង មានសំណើម ព្រមទាំងរឹងមាំដូចបំណង ប្រសិនបើអ្នកអនុវត្តតាមការណែនាំមួយចំនួនដូចខាងក្រោមនេះ៖
ចៀសវាងរបស់ក្តៅ : វាអាចនឹងពិបាកបន្តិចសម្រាប់អ្នកដែលត្រូវការលេងម៉ូដសក់ជាប្រចាំ ប៉ុន្តែបើអាចអ្នកគួរតែកាត់បន្ថយខ្លះទៅ។ ប្រើផលិតផលជំនួយសក់មុននឹងក្រោយពេលធ្វើសក់ ក៏ជារឿងមួយដែលអ្នកគួរតែយកចិត្តទុកដាក់ដូចគ្នាដែរ។
តម្រឹមសក់ : សក់លាបពណ៌ងាយនឹងបែកចុងជាទីបំផុត ដូច្នេះអ្នកគួរតែតម្រឹមវាជារៀងរាល់ខែ (ត្រឹមតែកន្លះអីុញក៏បាន ប្រសិនបើអ្នកបារម្ភខ្លាចថាវាមិនងាយវែង)។
អប់សក់ : បន្ទាប់ពីកក់សក់រួច អ្នកគួរតែបន្ថែមការការពារ និងថែរក្សាសក់ ដោយការអប់សក់ ព្រោះថាការអប់សក់ត្រូវបានគេទុកថា ជាវិធីបន្ថែមសំណើម និងភាពភ្លឺរលោងដល់សក់ និងជួយកាត់បន្ថយសក់បែកចុងផងដែរ។
ប្រដាប់ចងសក់ : កុំប្រើកៅស៊ូ ឬដង្កៀបគាបសក់ដែលតឹងខ្លាំងពេក ព្រោះវាអាចបណ្តាលឱ្យសក់បាក់ ឬដាច់បានយ៉ាងងាយ។
ក្រាសសិតសក់ : “ការប្រើក្រាសសិតសក់ធ្មេញរង្វើល នៅតែល្អជាងក្រាសសិតសក់ធ្មេញញឹកជានិច្ច” សូមចងចាំប្រយោគមួយឃ្លានេះទុក ហើយក៏ត្រូវធ្វើតាមផងដែរ។
ស្វែងរកផលិតផលដែលត្រូវនឹងប្រភេទសក់ : មានផលិតផលច្រើនប្រភេទណាស់ដែលដាក់លក់នៅលើទីផ្សារ ប៉ុន្តែមិនមែនគ្រប់ផលិតផលដែលអ្នកយកមកប្រើសុទ្ធតែមានប្រយោជន៍ចំពោះសក់របស់អ្នកនោះទេ ដូច្នេះសូមកុំភ្លេចជ្រើសរើសផលិតផលណាដែលមានគុណភាពល្អ ជាពិសេសបំផុតគឺវាស័ក្តិសមជាមួយសភាពសក់របស់អ្នក៕
ហេង ស្រីពេជ្រ ឡើងកូដការងារសម្តែង តែត្អូញត្អែររឿងគូអនាគត
តារាសម្តែងដែលលេចមុខស្ទើរគ្រប់រឿងជាតួអង្គបែបអ្នកមាន លោកស្រី លោកជំទាវ ព្រោះមានសាច់ឈាមស័ក្តិសម សាច់ទ្រលុតទ្រលន់ ហេង ស្រីពេជ្រ កាន់តែលេចធ្លោនឹងការងារសិល្បៈ បន្ទាប់ពីតារាស្រីរូបនេះ ទទួលបានឱកាសសម្តែងជាច្រើនបន្តបន្ទាប់។ ទោះជាយ៉ាងណា នាងនៅតែប្រកាសថា មិនមានបុរសណាម្នាក់ ដែលធ្វើឱ្យនាងបាក់ចិត្តស្រឡាញ់នៅឡើយទេ។
ដូចប្រិយមិត្តអ្នកអានបានស្គាល់ហើយថា តារាស្រី ហេង ស្រីពេជ្រ នៅតែមានសន្ទុះការងារថ្មីៗនៅក្នុងទីផ្សារសម្តែង បើទោះជានាងហែលការងារនេះយូរឆ្នាំបែបណា ក៏គេនៅតែមើលឃើញថា បណ្តាផលិតករតាមផលិតកម្មល្បីៗជាច្រើននៅតែធ្វើការទំនាក់ទំនងយកនាងមកចូលរួមសម្តែង។ ជាការពិតណាស់ អស់រយៈពេលជាង7ខែមកហើយនៅក្នុងឆ្នាំ2019នេះ តារាបានសាច់ប្រកបដោយដើមទ្រូងធំល្អ ហេង ស្រីពេជ្រ បានចុះកុងត្រាថតរឿងប៉ុន្មានរឿងដែរ ដោយនាងបញ្ជាក់ថា រវល់ច្រើននឹងការងារសម្តែងស្ទើររកពេលសម្រាកគ្មាន ប៉ុន្តែក៏មិនមានសល់ធនធានអ្វីច្រើនដូចគេដែរ ព្រោះតែត្រូវចំណាយគ្រប់សព្វ និងត្រូវរ៉ាប់រងជួយគ្រួសារផងដែរ។ ស្រីពេជ្រ ដែលតស៊ូការងារដើម្បីគ្រួសារ ហើយក៏ប្រាថ្នាតែបុរសល្អមើលថែនោះបានឱ្យដឹងថា នាងចង់ងាកមកបន្ថែមអាជីពជាពិធីការិនីមួយទៀត បន្ទាប់ពីធ្វើកិច្ចការនេះបានប៉ុន្មានដង។
ទោះបីជាការងារសម្ដែងហាក់ជោគជ័យខ្លាំងក៏ពិតមែន ក៏តារាស្រីរូបនេះនៅតែត្អូញត្អែរថា នៅមិនមានស្នេហាគ្រាន់បានផ្អែមល្ហែមដូចគេសោះ។នាងទទួលស្គាល់ថា រហូតមកដល់ពេលនេះក៏មានបុរសខ្លះទាក់ទងមកដែរ ប៉ុន្តែមិនមានបុរសណាប្រាកដប្រជាសោះ បានត្រឹមលេបខាយសម្តីតែប៉ុណ្ណោះ។ នាងថា វ័យក៏កាន់តែច្រើនគួរសម មិត្តភក្កិ គ្រួសារក៏សួរច្រើនអំពីរឿងគូអនាគត ប៉ុន្តែមិនដឹងថាឆ្លើយយ៉ាងម៉េច បានត្រឹមតែអៀន។ នាងថ្លែងថា ប្រហែលជាគ្មានបុរសណាក្លាហាន ស្មោះស្ម័គ្រ និងព្រមទទួលយកនាង យកមកធ្វើជាគូអនាគតពិតប្រាកដទេមើលទៅ។
យ៉ាងណាមិញតារាស្រីដែលត្រូវប៉ាន់តួម្ដាយនិងតួលោកជំទាវរូបនេះ បានអះអាងថា មិនខុសអីពីក្តីប្រាថ្នារបស់នារីទូទៅនោះទេ គឺសុំឱ្យគេស្រឡាញ់នាងស្មោះ ពិតប្រាកដ ស្រឡាញ់ក្រុមគ្រួសារនាង និងមានចរិតថ្លៃថ្នូរ ឯទ្រព្យសម្បត្តិ ឬអ្វីផ្សេងទៀតនោះ គឺជារឿងក្រោយប៉ុណ្ណោះ។ នាងបន្តថា មួយទៀតដែលនាងចង់បានដែរនោះ គឺសូមកុំប្រកាន់ថានាង ជាអ្នកសិល្បៈ ហើយបើកសិទ្ធិសេរីភាពឱ្យនាងប្រឡូកក្នុងការងារសិល្បៈ សុំតែស្រឡាញ់នាងពិតប្រាកដ គឺបានហើយ៕
បុព្វលាភក្រុមហ៊ុនធានារ៉ាប់រងនៅកម្ពុជានឹងបន្តកើនឡើង ខណៈការពង្រឹងទីផ្សារត្រូវបានជំរុញ
រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានបញ្ជាក់ឱ្យដឹងថា ចំនួនបុព្វលាភក្រុមហ៊ុនធានារ៉ាប់រងនៅកម្ពុជា មានការរីកធំធាត់យ៉ាងឆាប់រហ័ស ដោយមានបុព្វលាភធានារ៉ាប់រងដុលសរុប35% ជាមធ្យមក្នុង1ឆ្នាំ ហើយរយៈពេល 5ឆ្នាំចុងក្រោយនេះ កើនឡើងដល់ 196,4លានដុល្លារក្នុងឆ្នាំ2018។
លោកជំទាវ ងួន សុខា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបញ្ជាក់ថា បុព្វលាភក្រុមហ៊ុនធានារ៉ាប់រងកម្ពុជា ត្រូវបានព្យាករថា កើនឡើងដល់260លានដុល្លារនៅចុងឆ្នាំនេះ។ លោកជំទាវក៏បានបញ្ជាក់ផងដែរថា ជាមួយកំណើនទីផ្សារក្នុងឆ្នាំ2018នេះ គ្រឹះស្ថានធានារ៉ាប់រងទាំងអស់បានបង្កើតការងារពេញម៉ោង 3ពាន់កន្លែង និងការងារក្រៅម៉ោង 9ពាន់កន្លែង។
ការលើកឡើងបែបនេះ របស់លោកជំទាវរដ្ឋលេខាធិការធ្វើឡើងក្នុងឱកាសដែលលោកជំទាវអញ្ជើញចូលរួមក្នុងកម្មវិធី “ទិវាធានារ៉ាប់រងលើកទី1” រៀបចំឡើងកាលថ្ងៃទី25 ខែកក្កដា ឆ្នាំ2019 ក្រោមការចូលរួមពីឯកឧត្តមអគ្គបណ្ឌិត-សភាចារ្យ អូន ព័ន្ធមុនីរ័ត្ន ឧបនាយករដ្ឋមន្ដ្រី រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ រួមទាំងភ្ញៀវកិត្តិយសជាច្រើនទៀត។
ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន បានឱ្យដឹងថា៖ “ខ្ញុំពិតជាមានសេចក្តីរីករាយ ដោយបានឃើញថា វិស័យធានារ៉ាប់រងបាន និងកំពុងបន្តរីកចម្រើនទៅមុខគួរជាទីមោទនៈជាមួយនឹងការបោះជំហានទៅមុខប្រកបដោយភាពរឹងមាំ។ នេះគឺជាសក្ខីកម្មមួយបង្ហាញយ៉ាងច្បាស់នូវទំនាក់ទំនងនៃការបែងចែកផ្លែផ្កានៃការរីកចម្រើនរបស់សេដ្ឋកិច្ចជាតិជាមួយការអភិវឌ្ឍនៃវិស័យធានារ៉ាប់រង”។
ឯកឧត្តមអគ្គបណ្ឌិតសភាចារ្យបានបញ្ជាក់ថា៖“វិស័យធានារ៉ាប់រងកំពុងក្លាយជាសសរស្តម្ភមួយទៀតនៃវិស័យហិរញ្ញវត្ថុមិនមែនធនាគារ ហើយវិស័យនេះកំពុងជំរុញឱ្យមានការរីកចម្រើនលើវិស័យជាច្រើនផ្សេងទៀត។ ជាក់ស្តែងបុព្វលាភធានារ៉ាប់រងអាចត្រូវបានប្រើប្រាស់ជាមូលនិធិសន្សំក្នុងប្រព័ន្ធធនាគារ ឬអាចជាមូលនិធិវិនិយោគលើទីផ្សារមូលធន និងការវិនិយោគផ្សេងទៀតជាដើម”។
លោកជំទាវ ងួន សុខា បានឱ្យដឹងដែរថា“ជាមួយកំណើននៃការរីកធំធាត់នៃវិស័យធានារ៉ាប់រងនៅកម្ពុជានេះក៏ឃើញថា មានក្រុមហ៊ុនធានារ៉ាប់រងចំនួន31ក្រុមហ៊ុន ដោយក្នុងនោះ 13ក្រុមហ៊ុន ជាក្រុមហ៊ុនធានារ៉ាប់រងទូទៅ 11ក្រុមហ៊ុនជាក្រុមហ៊ុនធានារ៉ាប់រងអាយុជីវិត និង 7ក្រុមហ៊ុនជាក្រុមហ៊ុនធានារ៉ាប់រងខ្នាតតូច។ ក្នុងនោះក៏មានក្រុមហ៊ុនធានារ៉ាប់រងបន្ដចំនួន1 ប្រតិបត្តិករសុខភាពចំនួន3 ក្រុមហ៊ុនវាយតម្លៃហានិភ័យធានារ៉ាប់រងចំនួន3 ក្រុមហ៊ុនជើងសាធានារ៉ាប់រងចំនួន16 និងក្រុមហ៊ុនភ្នាក់ងារធានារ៉ាប់រងចំនួន22”។
លោកជំទាវបន្ថែមថា ក្រុមហ៊ុនទាំងអស់មានគ្រប់ប្រភេទ ទាំងក្រុមហ៊ុនបរទេស100% និងក្រុមហ៊ុនក្នុងស្រុក100% និងក្រុមហ៊ុនចម្រុះ។ ក្រុមហ៊ុនធានារ៉ាប់រងទាំងអស់មានទ្រព្យសកម្ម 427,3លានដុល្លារអាមេរិក និងមូលនិធិភាគហ៊ុនិកចំនួន 243.9លានដុល្លារអាមេរិកក្នុងឆ្នាំ2018។
លោកជំទាវ ងួន សុខា បញ្ជាក់ថា សម្រាប់ឆ្នាំ2018 ទីផ្សារធានារ៉ាប់រងកម្ពុជាបានធានាហានិភ័យ (Sum Insured) ចំនួន 218ប៊ីលានដុល្លារអាមេរិកក្នុងបណ្ណសន្យារ៉ាប់រងចំនួន 2.7លានប័ណ្ណ ក្នុងនោះប័ណ្ណសន្យារ៉ាប់រងទូទៅចំនួន 132ពាន់ប័ណ្ណ ប័ណ្ណ-សន្យារ៉ាប់រងអាយុជីវិត 383ពាន់ប័ណ្ណ និង 2.2លានប័ណ្ណសន្យារ៉ាប់រងខ្នាតតូច។
ក្នុងការធានាហានិភ័យទាំងអស់នេះ ក្រុមហ៊ុនធានារ៉ាប់រងបានរៀបចំបង្កើតផលិតផលធានារ៉ាប់រងគ្រប់ប្រភេទ សម្រាប់អតិថិជនមានដូចជា៖ ផលិតផលធានារ៉ាប់រងលើទ្រព្យសម្បត្តិ អគ្គិភ័យ ផលិតផល ;ធានារ៉ាប់រងវិស្វកម្ម ផលិតផលធានារ៉ាប់រង ការដឹកជញ្ជូនទំនិញ ផលិតផលធានារ៉ាប់រងយានយន្តផលិតផលធានារ៉ាប់រងសុខភាព ផលិតផលធានារ៉ាប់រងគ្រោះថ្នាក់បុគ្គល ផលិតផលធានារ៉ាប់រងអាយុជីវិតមានកាលកំណត់ ផលិតផលធានារ៉ាប់រងអាយុជីវិតមួយជីវិតកាលជាដើម។
ឯកឧត្តម អូន ព័ន្ធមុនីរ័ត្ន បានបញ្ជាក់ដែរថា៖“ទន្ទឹមនេះវិស័យធានារ៉ាប់រងបានចូលរួមចំណែកក្នុងការកសាងភាពស៊ាំ ដើម្បីទប់ទល់នឹងវិបត្តិ បណ្តាលមកពីគ្រោះមហន្តរាយ ពិសេសគ្រោះធម្មជាតិដែលបណ្តាលមកពីការប្រែប្រួលអាកាសធាតុនេះ កំពុងក្លាយជាប្រធានបទដ៏សំខាន់ ;សម្រាប់តំបន់ និងពិភពលោក។ ប្រទេសកម្ពុជាជាសមាជិកស្ថាបនិករបស់គម្រោងគ្រប់គ្រង គ្រោះមហន្ដរាយនៅអាស៊ីអាគ្នេយ៍ ដែលគម្រោងនេះត្រូវបានគាំទ្រ ដោយប្រទេសជប៉ុន និងធនាគារពិភពលោក”។
លោក យក់ ចំរើនឬទ្ធិ អគ្គនាយកក្រុមហ៊ុនធានារ៉ាប់រង ហ្វ័រតេ បានមានប្រសាសន៍ប្រាប់ឡារ៉ែនពាណិជ្ជថា៖“ការរៀបចំកម្មវិធី “ទិវាធានារ៉ាប់រងលើកទី1”នេះ គឺជាការផ្តួចផ្តើមថ្មីមួយដែលបណ្តាប្រទេសមួយចំនួនក៏គេធ្លាប់ធ្វើដែរ ដើម្បីទាក់ទាញទីផ្សារធានារ៉ាប់រង ទាក់ទាញចំណាប់អារម្មណ៍ពីប្រជាពលរដ្ឋឱ្យដឹងថា យើងមានធានារ៉ាប់រង យើងមានការគ្រប់គ្រងច្បាស់លាស់ និងផ្តល់ទំនុកចិត្តទៅដល់ទីផ្សារធានារ៉ាប់រង ពិសេសទៅដល់ពលរដ្ឋដែលចង់ប្រើសេវាធានារ៉ាប់រង”។
លោក អគ្គនាយកក្រុមហ៊ុនធានារ៉ាប់រង ហ្វ័រតេ បានបញ្ជាក់ឱ្យដឹងថា៖“ក្នុងគោលបំណងដ៏ពិសេសនោះ គឺទី1-ចង់បញ្ជាក់ថា ទីផ្សារធានារ៉ាប់រងត្រូវបានរាជរដ្ឋាភិបាលយកចិត្តទុកដាក់ថែបំប៉ន។ ទី2-គឺជាអត្ថន័យសម្រាប់ក្រុមហ៊ុនធានារ៉ាប់រងទាំងអស់រួមគ្នា ដើម្បីផ្លាស់ប្តូរយោបល់គ្នាដាក់តាំងបង្ហាញផលិតផលធានារ៉ាប់រងដែលកន្លងមកពុំដែលបានធ្វើរួមគ្នាទេ ដូច្នេះគឺធ្វើឱ្យប្រជាជនយល់កាន់តែច្បាស់ដែលយើងចង់ធ្វើឱ្យវិស័យធានារ៉ាបរងនេះត្រូវបានទទួលចំណាប់អារម្មណ៍កាន់តែខ្លាំង”។
លោក យក់ ចំរើនឬទ្ធិ អគ្គនាយកក្រុមហ៊ុនហ្វ័រតេបានបញ្ជាក់ឱ្យដឹងទៀតថា៖“ខ្ញុំគិតថាក្នុងពេលកន្លងមកនេះ បើយើងថាប្រជាពលរដ្ឋមានការយល់ដឹងពីសេវាធានារ៉ាប់រងនេះឱ្យទូលំទូលាយពេក ក៏មិនមែនដែរ តែការទទួលយកសេវានេះ គឺឃើញថាមានការកើនឡើង ដោយសារតែការប្រតិបត្តិការកន្លងមករបស់វិស័យធានារ៉ាប់រងបានធ្វើឱ្យប្រជាពលរដ្ឋបានយល់ដឹងពីមុខរបរធានារ៉ាប់រង និងទីផ្សាររបស់វា ដែលជាតឹកតាងនោះ គឺយើងទទួលបានកំណើនបុព្វលាភធានារ៉ាប់រងនៅកម្ពុជាមានការរីកធំធាត់រហូតដល់ជិត 200លានដុល្លារ និងបានធ្វើការព្យាករថា នៅដំណាច់ឆ្នាំ និងកើនដល់ 260លានដុល្លារ ដែលយើងឃើញថា ទីផ្សារធានារ៉ាប់រងយើងមានការ-រីកចម្រើនខ្លាំង”៕
គយរកចំណូលសរុបបានប្រមាណជាង 5.9 ទ្រីលានរៀលក្នុងឆមាសទី1 ឆ្នាំនេះ
អគ្គនាយកដ្ឋានគយ និងរដ្ឋាករកម្ពុជា (អ.គ.រ) មានប្រារព្ធកិច្ចប្រជុំបូកសរុបការងារគយ និងរដ្ឋាករប្រចាំឆមាសទី1 ឆ្នាំ2019 ក្រោមអធិបតីភាពរបស់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដោយបានបង្ហាញថា នៅក្នុងឆមាសទី1 ឆ្នាំ2019 ចំណូលសរុបមានប្រមាណជាង 5.9ទ្រីលានរៀល កើនឡើង 25.5% ធៀបនឹងរយៈពេលដូចគ្នាក្នុងឆ្នាំ2018។
ក្នុងរបាយការណ៍បូកសរុបការងារគយ និងរដ្ឋាករឯកឧត្តមបណ្ឌិត គុណ ញឹម ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយដ្ឋានគយ និងរដ្ឋាករកម្ពុជាបានបង្ហាញថា សម្រាប់ឆមាសទី1 ឆ្នាំ2019 ចំណូលសរុបមានប្រមាណជាង 5.9ទ្រីលានរៀល(ប្រមាណ 1,475 លានដុល្លារអាមេរិក) កើនឡើង 25.5% (ប្រមាណ 300លានដុល្លារអាមេរិក)ធៀបរយៈពេលដូចគ្នាក្នុងឆ្នាំ2018។
លទ្ធផលចំណូលនេះត្រូវបានប៉ាន់ប្រមាណជា 65% នៃផែនការឆ្នាំ ដែលកំណត់ដោយច្បាប់ស្តីពីហិរញ្ញវត្ថុសម្រាប់ការគ្រប់គ្រងប្រចាំឆ្នាំ2019។ បើប្រៀបធៀបនឹងរយៈពេលដូចគ្នាក្នុងឆ្នាំ2018លទ្ធផលចំណូលតាមប្រភេទពន្ធ និងអាករសំខាន់ៗដែលប្រមូលដោយគយ មានកំណើនគួរឱ្យុកត់សម្គាល់ ក្នុងនោះពន្ធគយ(ពន្ធនាំចូល)មានកំណើនជាង 33.8%, អាករពិសេសកើន 31.1% និងអាករលើតម្លៃបន្ថែម (VAT)កើន 28.6%។
គួរបញ្ជាក់ថា មុខទំនិញជាប្រភពចំណូលសំខាន់ៗរួមមាន៖ 1-យានយន្ត និងគ្រឿងចក្រគ្របដណ្តប់ប្រមាណជាង 52%នៃចំណូលសរុប។ 2-ប្រេងឥន្ធនៈ និងថាមពលប្រមាណ 17.1% នៃចំណូលសរុប និង 3-ទំនិញចម្រុះ និងគ្រឿងសំណង់មានប្រមាណ 29.5%នៃចំណូលសរុប។
ជាមួយនឹងលទ្ធផលដ៏ល្អប្រសើរនេះ អ.គ.រ ក៏បានសម្រេចនូវសមិទ្ធផលនានាផ្សេងទៀតដូចជាការចូលរួមកសាងបទប្បញ្ញ្តត្តិ និងគោលនយោបាយពាក់ព័ន្ធនឹងគយ ការធ្វើវិចារណកម្មអត្រាពន្ធគយលើទំនិញមួយចំនួន ការពង្រឹងការងារបង្ការ និងបង្ក្រាបអំពើរត់គេចពន្ធ ការចូលរួមទប់ស្កាត់ការលាងសម្អាតប្រាក់ និងការលើកកម្ពស់កិច្ចសម្រួលពាណិជ្ជកម្មតាមរយៈការចូលរួមអនុវត្តវិធានការកែទម្រង់មុតស្រួចរបស់រាជរដ្ឋាភិបាលពាក់ព័ន្ធនឹងគយ ដូចជាការអនុវត្តកម្រៃផ្លូវការនៃការផ្តល់សេវាសាធារណៈរបស់ អ.គ.រ ការកាត់បន្ថយកម្រៃស្គែន និងបរិមាណកុងតឺន័រដែលត្រូវឆ្លងកាត់ការត្រួតពិនិត្យដោយម៉ាស៊ីនស្គែន ការផ្សព្វផ្សាយគោលនយោបាយលើកទឹកចិត្តដល់សហគ្រាសធុនតូច និងមធ្យម(SMEs) និងការជំរុញយ៉ាងសកម្មលើការអភិវឌ្ឍប្រព័ន្ធបញ្ជរតែមួយរបស់ជាតិ និងប្រព័ន្ធបញ្ជរតែមួយអាស៊ាន ហើយបានដាក់ឱ្យអនុវត្តជំហានដំបូងនៃប្រព័ន្ធទាំង 2នេះចាប់ពីថ្ងៃទី1 ខែកក្កដា ឆ្នាំ2019 ជាដើម។
ឯកឧត្តម អូន ព័ន្ធមុនីរ័ត្ន ឧបនាយករដ្ឋមន្ត្រីបានលើកឡើងនូវចំណុចសំខាន់ៗមួយចំនួនដែល “អគរ” ត្រូវអនុវត្ត រួមមាន៖ 1-ត្រូវបន្តជំរុញផ្ដល់កិច្ចសម្រួលពាណិជ្ជកម្ម និងបន្តលើកកម្ពស់អនុលោមភាពវិស័យឯកជន។ 2-បន្តពង្រឹងយន្ដការពិគ្រោះយោបល់ជាមួយវិស័យឯកជនក្នុងការអនុវត្តវិធានការនានារបស់រាជរដ្ឋាភិបាល។ 3-រៀបចំកសាងផែនការសកម្មភាពសម្រាប់ឆ្នាំ2020 នៃការងារគយ និងរដ្ឋាករ ដោយឈរលើយុទ្ធសាស្ត្រកៀរគរចំណូលសម្រាប់ឆ្នាំ2019-2023 ឱ្យបានមុនដំណាច់ឆ្នាំ2019។ 4-ពង្រឹងកិច្ចសហប្រតិបត្តិការជាមួយអគ្គនាយកដ្ឋានពន្ធដារ និងអគ្គនាយកដ្ឋានពាក់ព័ន្ធផ្សេងទៀតក្រោមឱវាទក្រសួងសេដ្ឋកិច្ច និងហិរញ្ញវត្ថុលើយន្តការចែករំលែកគ្នាទៅវិញទៅមកនូវទិន្នន័យស្ថិតិដោយស្វ័យប្រវត្តិតាមមធ្យោបាយអេឡិចត្រូនិក៕
U15 កម្ពុជា ធ្លាក់ចេញពីពាន U15 អាស៊ាន ក្រោយចាញ់ថៃ 4ទល់នឹង0
កាលពីថ្ងៃទី1 ខែសីហា ឆ្នាំ2019 កម្ពុជាបានបន្តចាញ់ ថៃយ៉ាងដំណំក្នុងលទ្ធផល 0ទល់នឹង4 ក្នុងការប្រកួតពានរង្វាន់ AFF U15 Boy Championship 2019 នៅប្រទេសថៃ។
ក្នុងវគ្គទី1 ក្រុមកម្ពុជាធ្វើបានយ៉ាងល្អ ដោយបានការពារទីរបស់ខ្លួនយ៉ាងល្អ តែមកភ្លាត់ស្នៀតនៅចុងវគ្គទី1 ដែលធ្វើឱ្យលទ្ធផលក្នុងវគ្គទី1 នេះ ក្រុមថៃបាននាំមុខ 1ទល់នឹង0។ ចូលមកដល់តង់ទី2 កម្ពុជាហាក់បាត់បង់ម្ចាស់ការនៅចុងម៉ោង ធ្វើឱ្យក្រុមថៃអាចរកគ្រាប់បាល់បានផ្ទួនៗ រហូតដល់ទៅ 3គ្រាប់ និងជាលទ្ធផល ក្រុមកម្ពុជាបានចាញ់ថៃដោយលទ្ធផល 0ទល់នឹង4។
គួររំឭកផងដែរថា កម្ពុជាបានឆ្លងកាត់ 3ប្រកួត ចាញ់ទាំងអស់ និងលែងមានឳកាសឡើងទៅវគ្គបន្តហើយ តែនៅសល់ 2ប្រកួតទៀតជាមួយនឹងប្រ៊ុយណេ និងឡាវ៕
Erocham ផ្តល់អនុសាសន៍ពីការវិវឌ្ឍនៃវិស័យអចលនទ្រព្យ
សភាពាណិជ្ជកម្មសហគមន៍អឺរ៉ុបប្រចាំកម្ពុជាហៅកាត់ថា “EuroCham កម្ពុជា” បានបញ្ចេញសៀវភៅ White Book ដែលបញ្ជាក់នូវការស្នើសុំបង្កើតគោលនយោបាយផ្សេងៗ ក្នុងគោល បំណងជួយដល់រដ្ឋាភិបាលកម្ពុជាដើម្បីធ្វើឱ្យមានភាពប្រសើរឡើងក្នុងការធ្វើពាណិជ្ជកម្ម និងទាក់ ទាញការវិនិយោគពីទ្វីបអឺរ៉ុបចូលមកក្នុងព្រះរាជាណាចក្រកម្ពុជា។
នៅក្នុងសៀវភៅ White Book បានបញ្ជាក់ពីការស្នើសុំមួយចំនួន ក្នុងគោលបំណងធ្វើឱ្យវិស័យអចលនទ្រព្យនៅកម្ពុជា មានប្រសិទ្ធភាពបន្ថែមទៀត។ EuroCham បានទទួលស្គាល់ថា វិស័យអចលនទ្រព្យ និងការសាងសង់ “គឺជាវិស័យមួយដែលមានការអភិវឌ្ឍលឿនបំផុតនៅកម្ពុជា និងជាប្រភពនៃកំណើនសេដ្ឋកិច្ចដ៏សំខាន់”។
EuroCham បាននិយាយថា ខណៈដែលព្រះរាជាណាចក្រកម្ពុជាកំពុងតែមានទ្រព្យធនកាន់តែច្រើន ក៏នឹងមានតម្រូវការយ៉ាងច្រើនផងដែរសម្រាប់ការសាងសង់លំនៅឋាន និងអគារពាណិជ្ជកម្មថ្មីៗ ដែលនឹងរួមវិភាគទានត្រឡប់មកវិញដល់កំណើនសេដ្ឋកិច្ចរបស់ប្រទេសកម្ពុជា។ ប៉ុន្តែវានឹងត្រូវការ “ការត្រួតពិនិត្យនិយតកម្ម និងការដឹកនាំក្នុងវិស័យសាធារណៈកម្រិតខ្ពស់”។
នៅក្នុងការបោះពុម្ពផ្សាយនេះ ក៏បានបង្ហាញពីតម្រូវការសម្រាប់ស្តង់ដានៃការវាស់វែងជាសកល សម្រាប់វិស័យអចលនទ្រព្យ ខណៈពេលដែលជំរុញឱ្យរដ្ឋាភិបាលបង្កើនការត្រួតពិនិត្យហិរញ្ញវត្ថុលើគម្រោងអភិវឌ្ឍន៍លំនៅឋានស្របតាមរដ្ឋជាសមាជិកអាស៊ានផ្សេងទៀត ដែលនឹងជួយការពារអតិថិជនឱ្យបានគ្រប់គ្រាន់ក្នុងករណីដែលមានគម្រោងវិបត្តិសេដ្ឋកិច្ច។
សៀវភៅក៏បាននិយាយផងដែរថា អ្នកពិគ្រោះយោបល់ដែលជាប់ពាក់ព័ន្ធនៅក្នុងគម្រោងសាងសង់នៅក្នុងប្រទេស គួរតែត្រូវបានតម្រូវឱ្យមានការធានារ៉ាប់រងខាងការទទួលខុសត្រូវស៊ីវិលជាចាំបាច់ ហើយរដ្ឋាភិបាលគួរតែអនុញ្ញាតឱ្យអ្នកអភិវឌ្ឍន៍ រៀបចំកន្លែងចតរថយន្តក្នុងខុនដូជាឯកតាឯកជន ខណៈពេលដែលអនុញ្ញាតឱ្យចេញវិញ្ញាបនបត្រកម្មសិទ្ធិឯកជនសម្រាប់កន្លែងចតរថយន្ត។“នៅក្នុងបរិបទនៃការសាងសង់ ក្រុមហ៊ុនសំណង់ទាំងអស់ដែលកំពុងប្រតិបត្តិការនៅក្នុងប្រទេសកម្ពុជាគួរតែត្រូវមានមន្ត្រីសុវត្តិភាពរបស់ពួកគេទទួលយកសុវត្ថិភាពការងារ និងការបណ្តុះបណ្តាលសុខភាព មុនពេលចាប់ផ្តើមគម្រោងថ្មី ខណៈពេលដែលកំពុងអនុវត្តបទប្បញ្ញត្តិ ដែលតម្រូវឱ្យមានសម្ភារសាងសង់ដែលផលិតនៅប្រទេសកម្ពុជាដើម្បីទទួលបានការធ្វើតេស្តធានាគុណភាពឯករាជ្យមុនពេលលក់”។
លោក Arnaud Darc ប្រធាន Eurocham បាន មានប្រសាសន៍ថា៖“កំណែទម្រង់ទាំងនេះនឹងជួយលើកកម្ពស់បរិយាកាសធុរកិច្ចកម្ពុជា ក្នុងប៉ុន្មានឆ្នាំខាងមុខនេះ ដែលជំរុញឱ្យមានលំហូរនៃការធ្វើពាណិជ្ជកម្ម និងការវិនិយោគកាន់តែច្រើនឡើងទៅ និងមកពីអឺរ៉ុប និងតំបន់ផ្សេងៗទៀត។ យើងជឿជាក់ថា ការអនុម័តអនុសាសន៍របស់យើងនឹងធានានូវការឆ្លើយតបដ៏រឹងមាំ និងថាមវន្តពីវិស័យឯកជនទៅនឹងតម្រូវការផ្លាស់ប្តូរនៃទីផ្សារក្នុងស្រុក និងអន្តរជាតិ”។
ការផ្ដល់យោបល់គោលនយោបាយសំខាន់បំផុត របស់សភាពាណិជ្ជកម្មអឺរ៉ុប គឺគួរតែមានការអនុវត្ត ការត្រួតពិនិត្យផ្នែកហិរញ្ញវត្ថុឱ្យបានតឹងរ៉ឹងទៅលើអ្នកវិនិយោគ។ “នៅក្នុងគោលបំណងដើម្បី កាត់បន្ថយហានិភ័យផ្នែកហិរញ្ញវត្ថុ។ ជាមួយនឹងវិស័យអចលនទ្រព្យ និងសំណង់ បណ្តាប្រទេសជាច្រើនត្រូវតែមានតម្រូវការដើមទុនជាអប្បបរមា ដែលត្រូវតែមានការព្រមព្រៀងគ្នាមុនពេលដែលលិខិតអនុញ្ញាតសាងសង់ត្រូវបានចេញផ្សាយសម្រាប់គម្រោងមួយ។ អ្នកវិនិយោគត្រូវតែបង្ហាញឱ្យឃើញថា ដើមទុននេះ គឺស្មើនឹងភាគរយណាមួយច្បាស់លាស់នៃតម្លៃគម្រោងពិតប្រាកដ“គម្រោងកិច្ចការអ្នក-អភិវឌ្ឍន៍ដោយមានដើមទុនចាប់ផ្តើមមិនគ្រប់គ្រាន់ គឺផ្តល់ជាហានិភ័យខ្ពស់នៅក្នុងទីផ្សារអចលនទ្រព្យនៅកម្ពុជា និងបង្កការរាលដាលដល់សេដ្ឋកិច្ចជាតិទាំងមូល”។
EuroCham បន្តថា៖“យើងសូមណែនាំដល់រាជរដ្ឋាភិបាល(កម្ពុជា) ក្នុងការអភិវឌ្ឍបន្ថែមទៀត ក្នុងការគ្រប់គ្រងសារពើពន្ធនៅក្នុងវិស័យអចលនទ្រព្យ និងសំណង់ ដើម្បីជាការកំណត់លក្ខខណ្ឌតម្រូវលើមូលធនអប្បបរមា សម្រាប់គម្រោងអភិវឌ្ឍន៍ និងកំណត់ដំណាក់កាលមូលនិធិ ដែលនឹងអាចបញ្ចេញទៅក្នុងគម្រោងនីមួយ”។
EuroCham ចង់ឱ្យមានការត្រួតពិនិត្យពីភាពប្រថុយប្រថានផ្សេងៗ នៅលើវិស័យអចលនទ្រព្យ ដោយអះអាងបន្ថែមថា៖ “យើងណែនាំឱ្យមានការពិគ្រោះយោបល់ជាមួយវិស័យឯកជន ដើម្បីពិភាក្សាលើមធ្យោបាយដែលមានប្រសិទ្ធភាពបំផុតក្នុងការគ្រប់គ្រង ដោយដាក់កំណត់លើរយៈពេលដែលអចលនទ្រព្យមួយអាចត្រូវបានលក់បន្ត ឬបន្ថែមពន្ធទៅលើអចលនទ្រព្យដែលត្រូវបានលក់បន្តក្នុងរយៈពេលកំណត់ណាមួយដើម្បីកាត់បន្ថយហានិភ័យក្នុងការទិញអចលនទ្រព្យតៗគ្នា”។
EuroCham ក៏បានអំពាវនាវឱ្យរដ្ឋាភិបាលធ្វើការកំណត់ស្តង់ដាជាសកលជាផ្លូវការនៃការវាស់វែងអចលនទ្រព្យនៅក្នុងប្រទេសកម្ពុជាដោយកត់សម្គាល់ថា ៖ “កង្វះនៃស្ដង់ដាក្នុងការវាស់វែង អាចបង្កើតជាការយល់ច្រឡំ និងដោយក្នុងករណីអាក្រក់បំផុត វាពិតជាបង្កើតជាការអនុវត្តដែលមាន ការយល់ច្រឡំ និងខុសឆ្គង។ នៅចុងក្រោយមានតែអ្នកទិញទេ ដែលជាអ្នកដែលខាតបង់ដោយសារភាពមិនច្បាស់លាស់នេះ ដែលវាអាចនឹងប៉ះពាល់ដល់ទំនុកចិត្តនៅក្នុងទីផ្សារនេះ”។
EuroCham ក៏បានអំពាវនាវឱ្យរដ្ឋាភិបាលធ្វើការពិគ្រោះយោបល់ជាមួយវិស័យឯកជន ដើម្បីធានាឱ្យបានការអនុម័តឱ្យមានស្តង់ដារការសាងសង់ដោយមានសុវត្ថិភាព និងគុណភាពនៅក្នុងប្រទេសកម្ពុជា។ បទដ្ឋាន ឬការពិចារណាត្រូវធ្វើឡើង ដោយប្រៀបធៀបទៅលើស្តង់ដានៅក្នុងបណ្តាប្រទេសផ្សេងទៀត ដើម្បីបង្កើតស្តង់ដារថ្មីសម្រាប់វិនិយោគិនដើម្បីបង្កើនការសម្របខ្លួន និងតម្លៃវិញ្ញាបនបត្រ ព្រមទាំងផ្តល់ទំនុកចិត្តដល់វិនិយោគិនទូទៅ។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) បានប្រាប់ឡារ៉ែនពាណិជ្ជតាមទូរស័ព្ទថា៖ “ការផ្តល់អនុសាសន៍របស់ EuroCham ក្នុងវិស័យអចលនទ្រព្យកម្ពុជា ជារឿងល្អមួយ វាជាអនុសាសន៍សម្រាប់យើងយកមកពិចារណា ក្នុងវិស័យអចលនទ្រព្យរបស់យើង តែខ្ញុំសុំមិនផ្តល់មតិទៅលើអនុសាសន៍របស់គេទេ”។
លោក ច្រឹក សុខនីម បានបញ្ជាក់ថា៖“ពាក់ព័ន្ធក្នុងរឿងសំណង់ក្នុងវិស័យអចលនទ្រព្យនេះជាមួយនឹងវិធានការផ្លូវច្បាប់មួយចំនួន ខ្ញុំគិតថា រដ្ឋាភិបាលយើង គាត់បានធ្វើជាបណ្តើរៗហើយ តាមរយៈមន្ត្រីកាន់ការងារផ្ទាល់។ ទី1-យើងត្រូវពង្រឹងការអនុវត្តច្បាប់បន្ថែមទៀត។ ទី2-គ្រប់គ្រងភាពអនាធិបតេយ្យក្នុងការសាងសង់អគារជារឿងចាំបាច់ និងសំខាន់។ រាជរដ្ឋាភិបាលគួរតែពង្រឹង និងពន្លឿនច្បាប់ហ្នឹងឡើង ពេលគេស្នើសុំ យើងត្រូវតែមានការទុកឱកាសឱ្យគាត់អាចមានពេល ហើយត្រូវពន្លឿនពេលវេលា ឱ្យគាត់អាចសាងសង់ទាន់ពេលវេលាដែរ។ ទី3-នៅពេលដែលមានការសាងសង់ គួរតែរៀបចំឱ្យមានការគ្រប់គ្រងហានិភ័យ តាមរយៈការទិញធានារ៉ាប់រងដើម្បីនៅពេលដែលប្រឈមនឹងបញ្ហា គឺអាចមានលទ្ធភាពសំណងសងទៅដល់ជនរងគ្រោះ សងទៅភាគីអ្នកពាក់ព័ន្ធ និងសំណងដល់អ្នកជិតខាងផងដែរថា តើត្រូវសងកម្រិតបែបណា? ព្រោះយើងមានតែនៅក្នុងច្បាប់ តែយើងចង់ឱ្យមានការទទួលខុសត្រូវទៅដល់បុគ្គលដែលមានសមត្ថភាពដែលអាចគ្រប់គ្រងបាន”៕
