ធឿន មករា - La Reine Media

រ៉ូបូតនឹងដណ្តើមការងារមនុស្សប្រមាណជា 20លានកន្លែងនៅឆ្នាំ2030

បច្ចុប្បន្ននេះ នៅក្នុងចង្វាក់ផលិតកម្មសំខាន់ៗបានចាប់ផ្តើមប្រើប្រាស់ម៉ាស៊ីនស្វ័យប្រវត្តិ ឬrobot ជំនួសមនុស្សហើយ ព្រោះវាមានភាពងាយស្រួល ចំណាយតិច មិនបារម្ភពីគ្រោះថ្នាក់ មិនចេះរអ៊ូរទាំ និងធ្វើការងារបានពេញ 24ម៉ោង រាល់ថ្ងៃដោយគ្មានការសម្រាក។ បន្ថែមពីលើនេះដោយសារតែវត្តមាននៃបញ្ញាសិប្បនិម្មិត ឬAI បានធ្វើឱ្យគ្រឿងយន្តកាន់តែមានភាពឆ្លាតវៃ ហើយមានសមត្ថភាពអាចធ្វើការងារជាច្រើនផ្សេងទៀតក្រៅពីការងារប្រើប្រាស់កម្លាំងសុទ្ធសាធនៅក្នុងពិភពលោក។

យោងតាមការសិក្សាថ្មីៗនេះដោយអ្នកសេដ្ឋកិច្ចបានលើកឡើងថា នៅឆ្នាំ2030 គ្រឿងយន្តនឹងទាញយកការងារក្នុងចង្វាក់ផលិតកម្មប្រមាណជាង 20លានការងារ។ តាមការសិក្សាថ្មីៗនេះពីផ្នែកស្រាវជ្រាវសេដ្ឋកិច្ចនៃសាកលវិទ្យាល័យ Oxford បានឱ្យដឹងថា នៅរយៈពេល 11ឆ្នាំទៀត គ្រាន់តែនៅប្រទេសចិនតែមួយ អាចនឹងប្រើប្រាស់ចំនួនរ៉ូបូតដល់ទៅជាង14លានគ្រឿង ដើម្បីធ្វើការងារក្នុងចង្វាក់ផលិតកម្មនានា។ ក្រុមអ្នកស្រាវជ្រាវសេដ្ឋកិច្ចទាំងអស់នោះបានបង្ហាញពីចរន្តនៃថ្ងៃអនាគតផងដែរថា ការធ្វើស្វ័យប្រវត្តិកម្មការងារលើពិភពលោកនឹងកើនឡើង 3ដង ហើយនឹងបន្តកើនឡើងបន្តបន្ទាប់ទៀតដែលវាអាចនឹងប៉ះពាល់ដល់ការងាររបស់មនុស្ស។

ជាលទ្ធផលនៃការធ្វើស្វ័យប្រវត្តិកម្មនេះ ត្រូវបានគេរំពឹងទុកថា វានឹងធ្វើឱ្យសក្តានុពលសេដ្ឋកិច្ចនឹងកើនឡើងខ្លាំង ព្រោះប្រសិទ្ធភាពនៃការផលិតកើនឡើង តែទន្ទឹមនឹងនេះ ប្រទេសក្រីក្រដែលមានប្រជាជនមានចំណេះដឹងទាបអាចនឹងប៉ះពាល់។ កម្មករជំនាញតិចនឹងអស់ការងារ ហើយជំនួសមកវិញនូវម៉ាស៊ីនស្វ័យប្រវត្តិដែលទាមទារឱ្យមនុស្សត្រូវបោះបង់ការងារនោះព្រោះអ្នកវិនិយោគនឹងចាំបាច់ត្រូវតែប្រើប្រាស់ម៉ាសុីនដើម្បីអាចប្រកួតប្រជែងជាមួយចង្វាក់ផលិតកម្មដទៃបានលើពិភពលោក។ ការងារដែលធ្វើដដែលៗនឹងត្រូវបាត់បង់ ព្រោះការងារទាំងអស់នោះត្រូវបានគេចម្លងទៅជាប្រព័ន្ធមួយដែលម៉ាស៊ីនអាចធ្វើបានដូចគ្នា។

ទោះជាយ៉ាងនេះក្តី ទន្ទឹមនឹងក្តីព្រួយបារម្ភសម្រាប់ការផ្លាស់ប្តូរដ៏ធំដែលអាចនឹងកើតមានឡើងក្នុងសេដ្ឋកិច្ចពិភពលោកនេះ អ្នកជំនាញសំខាន់ៗក៏បានបញ្ជាក់ផងដែរថា ស្របពេលដែលអាជីពចាស់ៗត្រូវបាត់បង់អាជីពថ្មីៗក៏នឹងកើតឡើងដែរ។ អ្វីដែលរដ្ឋាភិបាល និងប្រជាជនត្រូវធ្វើ គឺផ្លាស់ប្តូរការអប់រំ បច្ចេកវិទ្យា និងអភិវឌ្ឍន៍សមត្ថភាពឱ្យស្របទៅនឹងរបត់ទីផ្សារជំនាន់ថ្មី។ទន្ទឹមនឹងរបត់បដិវត្តន៍ឧស្សាហកម្មទី4 ត្រូវបានគេអនុវត្ត ពិភពលោកក៏បានបង្កើតប្រព័ន្ធអប់រំ 4.0 ដើម្បីបណ្តុះបណ្តាលមនុស្សឱ្យទទួលបាននូវចំណេះដឹងថ្មីដើម្បីត្រៀមខ្លួនទុកជាមុនផងដែរ។

ប្រសិនបើប្រទេសណាអាចបត់បែនបានជាមួយនឹងចរន្តថ្មីនេះ នោះមានន័យថា គេនឹងនៅតែមានឱកាសក្នុងការប្រកួតប្រជែងកាន់តែទូលំទូលាយ ហើយរក្សាបាននូវលំនឹងសម្រាប់ទីផ្សារការងារ។ ស្ថានភាពវិជ្ជមាននឹងនៅតែកើតមានឡើងក្នុងទីផ្សារការងារ គ្រាន់តែទាមទារឱ្យមនុស្សត្រូវខិតខំប្រឹងប្រែងបន្ថែមឱ្យបានកាន់តែខ្លាំងឡើងលើការអភិវឌ្ឍសមត្ថភាព ដែលមានលក្ខណៈស៊ីជម្រៅ និងភាពជាក់លាក់ខ្លាំងជាងមុន។ ប្រជាជនគួរចាប់ផ្តើមផ្សាំុខ្លួន និងចេះទាញយកផលប្រយោជន៍វិជ្ជមានពីបច្ចេកវិទ្យាដើម្បីទប់ស្កាត់ជាមួយនឹងផលប៉ះពាល់អវិជ្ជមានដែលធ្វើឱ្យបច្ចេកវិទ្យាគ្រប់គ្រងបាន ហើយអាចគ្រប់គ្រងបច្ចេកវិទ្យាដើម្បីជាប្រយោជន៍។ អភិវឌ្ឍសមត្ថភាពក្នុងការគិតពិចារណា ភាពជាអ្នកដឹកនាំ ការបង្កើតថ្មី និងការដឹកនាំការងារជាក្រុមជាដើម ដើម្បីក្លាយជាមនុស្សដែលពិភពលោកនៅតែត្រូវការ ព្រោះចំណេះដឹងទាំងអស់នេះម៉ាស៊ីនមិនអាចជំនួសមនុស្សបាននោះទេ៕

August 9, 2019

Leaderland English Academy ជម្រើសថ្មីក្នុងការសិក្សាដែលផ្តល់ជំនាញសំខាន់ៗ 4មុខក្នុងពេលតែមួយ

ការជ្រើសរើសសាលាសិក្សាផ្នែកភាសា ជារឿងចម្បងមួយដែលអាណាព្យាបាលជាច្រើនកំពុងពិចារណា ព្រោះគោលបំណងសំខាន់របស់គាត់ គឺចង់ឱ្យកូនៗក្លាយជាមនុស្សដែលមានសមត្ថភាពថ្មីៗដែលឆ្លើយតបជាមួយនឹងទីផ្សារការងារនៅថ្ងៃអនាគត។ សាលារៀន Leaderland English Academy ជាសាលាបង្រៀនភាសាដែលឆ្លើយតបបានយ៉ាងល្អជាមួយនឹងតម្រូវការ និងក្តីប្រាថ្នារបស់អាណាព្យាបាលគ្រប់រូប។

លោក ប៉ិច ប៉ូឡែន អគ្គនាយកក្រុមហ៊ុន វេសឡាញ អេឌ្យូខេសិន គ្រុប បានលើកឡើងថា ក្នុងចំណោមសាលាភាសាល្អៗទាំងអស់នៅកម្ពុជា Leaderland English Academy អាចជាជម្រើសថ្មីមួយដែលអាចផ្តល់ឱ្យនូវចំណេះដឹងសំខាន់ៗចំនួន 4មុខ ក្នុងពេលតែមួយ គឺចំណេះដឹងផ្នែកភាសាច្បាស់លាស់ ចំណេះដឹងផ្នែកសហគ្រិនភាព ចំណេះដឹងភាពជាអ្នកដឹកនាំ និងចំណេះដឹងផ្នែកបច្ចេកវិទ្យា។ ការបញ្ចូលគ្នានូវកញ្ចប់បណ្តុះបណ្តាលទាំងអស់នេះ គឺត្រូវធ្វើឡើងដោយភ្ជាប់ការបណ្តុះបណ្តាលឱ្យសិស្សានុសិស្សអាចសិក្សាផង និងអនុវត្តផងជាមួយគ្នា ដើម្បីបង្កើតជាប្រភេទនៃការអប់រំថ្មីមួយដែលអាចធ្វើឱ្យសិស្សចេះទាំងភាសា មានជំនាញជាសហគ្រិនភាព មានភាពជាអ្នកដឹកនាំ និងមានជំនាញបច្ចេកវិទ្យាក្នុងពេលតែមួយ។

លោក ប៉ិច ប៉ូឡែន បាននិយាយថា៖“យើងផ្តល់ជូនកម្មវិធីទាំងអស់នេះ ដោយសារតែយើងមើលឃើញថា ការសិក្សាតែផ្នែកភាសា មិនទាន់គ្រប់គ្រាន់នៅឡើយទេក្នុងការធ្វើឱ្យសិស្សក្លាយជាមនុស្សខ្លាំង និងមានសមត្ថភាពខ្ពស់ម្នាក់។ ហេតុនេះការផ្តល់ជម្រើសថ្មីនេះ អាចជាគំនិតល្អមួយសម្រាប់អាណាព្យាបាលក្នុងការពិចារណា ដើម្បីជួយកូនៗឱ្យក្លាយជាមនុស្សខ្លាំងពិតប្រាកដទាំងចំណេះដឹង អាកប្បកិរិយា អត្តចរិត និងផ្នត់គំនិតសម្រាប់សតវត្សរ៍ទី21នេះ”។

អ្នកជំនាញអប់រំខាងលើបានលើកឡើងផងដែរថា យើងនឹងធ្វើការអប់រំសិស្សរបស់យើងដោយគ្រូល្អៗខាងផ្នែកភាសាដែលមានបទពិសោធច្បាស់លាស់ ដើម្បីធ្វើយ៉ាងណាឱ្យសិស្សបានសិក្សាផ្ទាល់ជាមួយគ្រូជនជាតិដើម និងជាមួយកម្មវិធីសិក្សាដែលទទួលស្គាល់ជាអន្តរជាតិ។ ក្រៅពីនេះ សាលាក៏មានវគ្គសិក្សាផ្នែកសហគ្រិនភាព ដោយមាននៅក្នុងកម្មវិធីសិក្សាផង និងមានការចូលរួមធ្វើបទបង្ហាញពីបុគ្គលសំខាន់ៗនៅក្នុងសាលសន្និសីទរបស់សាលាផ្ទាល់ផង។ លោកបន្ថែមថា មានអ្នកជំនួញធំៗ ម្ចាស់ក្រុមហ៊ុនសហគ្រាស រួមទាំងស្ថាបនិកផលិតផលប្រកបដោយគុណតម្លៃជាច្រើននឹងត្រូវបានអញ្ជើញឱ្យមកចែករំលែក និងជួបជាមួយសិស្សផ្ទាល់ដើម្បីឱ្យសិស្សកាន់យល់ដឹងពីសហគ្រិនភាព ដោយជួបជាមួយអ្នកអនុវត្តផ្ទាល់ៗតែម្តង។ ក្រៅពីនេះ យើងក៏មានរៀបចំកម្មសិក្សាទៅកាន់ស្ថាប័នធំៗនៅក្នុងប្រទេស ដើម្បីផ្តល់ឱកាសឱ្យសិស្សបានស្វែងយល់ពីវិធីសាស្ត្រធ្វើការងារ រួមទាំងវិធីសាស្ត្រនៃការគ្រប់គ្រងអាជីវកម្មបែបស្តង់ដាទាំងអស់នោះផងដែរ។

បន្ថែមពីលើនេះ លោក ប៉ិច ប៉ូឡែន បានលើកឡើងថា ចំពោះជំនាញភាពជាអ្នកដឹកនាំវិញ យើងនឹងធ្វើការបណ្តុះបណ្តាលសិស្សឱ្យក្លាយជាមនុស្សខ្លាំងតាមរយៈកម្មវិធីទម្លាប់ល្អទាំង 7យ៉ាងរបស់បុគ្គលមានប្រសិទ្ធភាពខ្ពស់ រួមទាំងកម្មវិធីល្បីៗជាច្រើនផ្សេងទៀត។ លើសពីនេះទៅទៀត សិស្សក៏មានលំហាត់ និងមេរៀនជាច្រើនដែលទាមទារឱ្យធ្វើការងារជាក្រុម ធ្វើបទបង្ហាញ និងដឹកនាំសកម្មភាពមួយចំនួនដើម្បីផ្សាំុខ្លួន បណ្តុះភាពជាអ្នកដឹកនាំឱ្យបានរួចរាល់ មុនពេលចាប់ផ្តើមអាជីពការងារពិតប្រាកដរបស់ខ្លួននៅថ្ងៃអនាគត។ ចំណែកឯបច្ចេកវិទ្យាវិញ ក៏ជាផ្នែកពិសេសមួយដែរដែលសាលាផ្តល់ជូន ព្រោះលោកមើលឃើញថា អនាគតទៅ ក្នុងបដិវត្តន៍ឧស្សាហកម្ម 4.0 នេះ បច្ចេកវិទ្យា ជាផ្នែកសំខាន់ដែលសិស្សចាំបាច់ត្រូវតែចេះដើម្បីទាញយកការងារ និងអាចប្រកួតប្រជែងបានជាមួយប្រទេសក្នុងតំបន់។ ហេតុនេះហើយទើបសាលាបំពាក់ដោយបច្ចេកវិទ្យាទំនើបៗដូចជាកុំព្យូទ័រ ទូរទស្សន៍ឆ្លាតវៃ ក្តារខៀនឆ្លាតវៃ រួមទាំងការប្រើប្រាស់កម្មវីធី Virtual Reality (VR) និង AR (Argument Reality) ដើម្បីឱ្យសិស្សស្គាល់ និងសិក្សាដោយផ្ទាល់ជាមួយបច្ចេកវិទ្យាទំនើបៗទាំងអស់នេះ។

សាលាភាសាអង់គ្លេស Leaderland English Academy គឺជាសាលារៀនដែលទំនើបឈានមុខមួយ នៅក្នុងប្រទេសកម្ពុជា ដែលបាននាំយកមកនូវការបង្រៀន បែបបច្ចេកវិទ្យាសម័យទំនើប តាមរយៈប្រព័ន្ធបច្ចេកវិទ្យាបំពាក់លើភ្នែក ដែលមានឈ្មោះថា Virtual Reality (VR) ជាច្រើនគ្រឿង ពីក្រុមហ៊ុន SilVRgrow TECHNOLOGY PTE LTD ដែលជាក្រុមហ៊ុនបច្ចេកវិទ្យា អប់រំឈានមុខគេ ដែលមានឧបករណ៍សម្រាប់បច្ចេកវិទ្យា VR និង AR។ ដោយមានការិយាល័យកណ្តាលនៅប្រទេសសិង្ហបុរី ក្រុមហ៊ុនបានផ្តល់ជូននូវដំណោះស្រាយការសិក្សាថ្មី ដល់សាលារៀនកម្រិតបឋម និងមធ្យមសិក្សានៅអាស៊ីអាគ្នេយ៍ ហើយបច្ចុប្បន្ននេះ មានប្រទេសជឿនលឿន និងកំពុងអភិវឌ្ឍន៍ជាច្រើននៅលើពិភពលោក កំពុងតែដាក់ដំណើរការបច្ចេកវិទ្យា VR មួយនេះ ក្នុងនោះក៏មានប្រទេសកម្ពុជាយើងផងដែរ គឺនៅសាលាភាសាអង់គ្លេស លីដឺលែន នេះផ្ទាល់តែម្តង។

សាលាភាសា លីដឺលែន គឺជាបុត្រសម្ព័ន្ធរបស់ក្រុមហ៊ុន វេសឡាញ អេឌ្យូខេសិន គ្រុប និងមានទីតាំងស្ថិតនៅអគារលេខ9 ផ្លូវលេខ362 ភូមិដើមម៉ាក់ក្លឿ សង្កាត់ច្បារអំពៅ1 ខណ្ឌមានជ័យ រាជធានីភ្នំពេញ។ វគ្គសិក្សាថ្មី នឹងចាប់ផ្តើមនៅថ្ងៃទី1 ខែសីហា ឆ្នាំ2019។កម្មវិធីបង្រៀនភាសាអង់គ្លេស របស់សាលាភាសា លីដឺលែន រួមមាន៖ 1៖ General English Program 2៖ English for Academic Purposes 3៖ English for Business និង 4៖ TOEFL / IELTS Preparation៕

August 9, 2019

តោះលេងម៉ូដសក់រួញមានមន្តស្នេហ៍ម្តងមើល៎

នៅក្នុងទំព័រម៉ូដសក់របស់ទស្សនាវដ្តី ឡារ៉ែន លេខនេះសូមយកចិត្តនារីៗយើងដែលស្រឡាញ់ និងចូលចិត្តម៉ូដសក់អ៊ុតរួញ ឬការលេងម៉ូដសក់រួញម្តង។ សូមក្រឡេកមើលម៉ូដសក់រួញនៅក្នុងទំព័រនេះ ពិតជាស្រស់ស្អាត និងជួយឱ្យអ្នកទទួលបាននូវមន្តស្នេហ៍មិនតិចទេ មើលចុះសក់រួមមានទៅអន់អី អាចលេងម៉ូដសក់បានជាច្រើនម៉ូដ ចងក៏បាន ទម្លាក់ពាក់កណ្តាលក៏បាន ទម្លាក់រំសាយក៏បាន ផ្លុំម៉ូដបន្ថែមក៏បាន គឺពិតជាស្អាតខ្លាំងណាស់ អាចលេងម៉ូដសម្រាប់ដំណើរកម្សាន្តក៏បាន ទៅធ្វើការតាមធម្មតាក៏បាន ឬក៏ទៅចូលរួមនៅក្នុងកម្មវិធីតូចធំផ្សេងៗក៏បាន គឺស្អាតពេញចិត្តតែម្តង ហើយបើនារីៗដែលមានទម្រង់មុខពងក្រពើ ឬរាងតូចវិញគឺកាន់តែស្អាត និងសមនឹងមុខរបស់អ្នកតែម្តង។ សក់រួចស្អាតៗ! ស្អាតពេញចិត្តគ្រប់គ្នា៕

August 9, 2019

សមាគមធនាគារនៅកម្ពុជាចាប់ផ្តើមប្រើប្រាស់ Visa’s EMV® Chip Standards ដើម្បីធានាសុវត្ថិភាព នៃប្រតិបត្តិការក្នុងស្រុក

រាជធានីភ្នំពេញ, ថ្ងៃទីពុធ ៧កើត ខែស្រាពណ៍ ឆ្នាំកុរ ឯកស័ក ២៥៦៣ ត្រូវនឹងថ្ងៃទី៧ ខែសីហា ឆ្នាំ២០១៩ – សមាគមធនាគារនៅកម្ពុជា និង ក្រុមហ៊ុន វីសា ដែលជាក្រុមហ៊ុនបច្ចេកវិទ្យាទូទាត់សាច់ប្រាក់តាមប្រព័ន្ធឌីជីផលដែលឈានមុខគេ នៅក្នុងពិភពលោក និងធនាគារអេស៊ីលីដា ភីអិលស៊ី បានចុះហត្ថលេខា ដើម្បីជួយដល់បណ្តាញអន្ដរធនាគាររបស់កម្ពុជាដែលមានឈ្មោះថា Cambodian Shared Switch (CSS) ដើម្បី ទទួលបានសិទ្ធិក្នុងការប្រើប្រាស់បច្ចេកវិទ្យាសុវត្ថិភាព EMV chip[1] ជំនួសការប្រើ Magnetic Stripe សម្រាប់ការទូទាត់វិញ។

កិច្ចព្រមព្រៀងនេះផ្តល់ជូនដល់សមាជិកសមាគមធនាគារនៅកម្ពុជា អាចប្រើប្រាស់ជាមួយនឹងស្តង់ដារបន្ទះឈីបសុវត្ថិភាព Visa’s EMV® និងកម្មវិធីសម្គាល់អ្នកប្រើប្រាស់រួម [Application Identifier (AID)] ពីធនាគារអេស៊ីលីដា សម្រាប់ប្រភេទកាតប្រើទូទាត់ក្នុងស្រុក កាតម៉ាស៊ីនអេធីអឹម និងនៅកន្លែងលក់ដូរផ្សេងៗ ដើម្បីធានាបានថាពួកគេនឹងទទួលបាននូវស្តង់ដារឈីបដែលត្រូវបានទទួលស្គាល់ជាលក្ខណៈអន្តរជាតិ។

លោកបណ្ឌិត អ៊ិន ចាន់នី ប្រធានសមាគមធនាគារនៅកម្ពុជា បានមានប្រសាសន៍ថា “នៅពេលបញ្ចប់ការផ្លាស់ប្តូរ ធនាគារ និងធុរកិច្ចក្នុងស្រុកនឹងទទួលបានការការពារយ៉ាងខ្ពស់ប្រឆាំងនឹងការក្លែងបន្លំ ហើយប្រាកដជាលែងក្លាយជាគោលដៅនៃការលួច និងរំលោភបំពានទិន្នន័យតទៅទៀតដែរ។ តាមរយៈការទទួលយក Visa’s EMV chip យើងនឹងអាចពង្រឹងប្រតិបត្តិការក្នុងស្រុក និងតាមបណ្តាញម៉ាស៊ីនអេធីអឹមរបស់យើងដែលផ្តល់នូវសុវត្ថិភាពកាន់តែច្រើនក្នុងការផ្តល់ សេវាកម្មហិរញ្ញវត្ថុទូទាំងប្រទេស ។”

អ្នកស្រី ជុំ ម៉ូនីកា នាយិកាគ្រប់គ្រងវីសាប្រចាំប្រទេសកម្ពុជា បានមានប្រសាសន៍ថា “អ្នកកាន់តែមានជំនឿចិត្តនូវគ្រប់ប្រតិបត្តិការទាំងអស់។ ដោយសារការទូទាត់តាមរយៈឌីជីថលមានការរីកចម្រើននៅក្នុងប្រទេស យើងបានធ្វើការប្តេជ្ញាចិត្ត ដើម្បីធានាសុវត្ថិភាពជូនដល់ប្រជាជន កម្ពុជា នៅពេលដែលពួកគាត់ធ្វើប្រតិបត្តិការ គ្រប់ពេលវេលា និងគ្រប់ទីកន្លែង។ ការដាក់ឲ្យមានការប្រើប្រាស់ Visa’s EMV chip standards សម្រាប់ធនាគារក្នុងស្រុក និងគ្រឹះស្ថានមីក្រូហិរញ្ញវត្ថុ ដែលទទួលប្រាក់សន្សំ នឹងផ្តល់អត្ថប្រយោជន៍ដល់ឧស្សាហកម្មទាំងមូល ខណៈយើងធ្វើការរួមគ្នាដើម្បីរក្សាស្តង់ដាសុវត្ថិភាពអោយខ្ពស់បំផុតតាមដែលអាចធ្វើទៅបាន។”

ចំពោះកាត EMV មានបង្កប់នូវ microprocessor ដែលបង្កើតកូដប្រតិបត្តិការថ្មីរាល់លើក នៅពេលដែលកាតត្រូវបានប្រើប្រាស់។ ដំណោះស្រាយឈានមុខនៃការប្រឆាំងនឹងការក្លែងបន្លំនេះ ផ្តល់ជូននូវសុវត្ថិភាពដ៏រឹងមាំដែលប្រភេទកាត magnetic stripe ពីមុនមិនមាន។

លោក គីមទី កោមលី អគ្គនាយករងបច្ចេកទេសទី១នៃធនាគារជាតិនៃកម្ពុជាបានមានប្រសាសន៍ថា ”យើងសូមសរសើរដល់ ក្រុមហ៊ុនវីសា និងសមាគមធនាគារនៅកម្ពុជា សម្រាប់ការសហការរបស់ពួកគេក្នុងការពង្រឹងសន្តិសុខក្នុងការទូទាត់នៅក្នុងប្រទេសកម្ពុជា។ យើងប្តេជ្ញាជំរុញអនាគតនៃការទូទាត់គ្មានសាច់ប្រាក់សម្រាប់ប្រទេសកម្ពុជាដែលឈរលើហេដ្ឋារចនាសម្ពន្ធ័ទូទាត់លំដាប់ពិភពលោក ហើយការប្រកាសថ្ងៃនេះគឺជាជំហានសំខាន់ក្នុងការសម្រេចនូវចក្ខុវិស័យនេះ”។

ប្រទេសកម្ពុជាបន្តទទួលបានកំណើនយ៉ាងរឹងមាំនៃការទូទាត់តាមប្រព័ន្ធឌីជីថល ហើយក៏មានការកើនឡើងនូវចំណង់ចំណូលចិត្តក្នុងចំណោមអ្នកប្រើប្រាស់ផងដែរ ដើម្បីទទួលយកវិធីសាស្រ្តទូទាត់បែបថ្មីនេះ។ យោងលើការសិក្សាស្រាវជ្រាវអំពីឥរិយាបទក្នុងការទូទាត់របស់អតិថិជនប្រើប្រាស់វីសាកាត ឃើញថាប្រជាពលរដ្ឋកម្ពុជាប្រហែល 1/3 រំពឹងថាការទូទាត់ប្រាក់តាមរយៈប្រព័ន្ធឌីជីថលនឹងមានប្រជាប្រិយភាពកើនឡើង ដោយសារតែវាមានភាពងាយស្រួល និងសុវត្ថិភាព បើប្រៀបធៀបជាមួយនឹងការប្រើសាច់ប្រាក់សុទ្ធ ហើយទន្ទឹមនឹងនោះដែរប្រជាជនកម្ពុជា 54% ជឿជាក់ថាសេដ្ឋកិច្ចនឹងវិវត្តទៅ ដោយមិនចាំបាច់ប្រើសាច់ប្រាក់សុទ្ធនៅក្នុងរយៈពេលប្រាំពីរឆ្នាំ[2] ខាងមុខនេះ។

លើសពីនេះទៀតដើម្បីជួយដល់ធនាគារក្នុងស្រុកជាមួយនឹងការពង្រឹងក្នុងការប្រើប្រាស់ EMV chip standards ក្រុមហ៊ុន វីសា តែងតែបន្តការអភិវឌ្ឍយុទ្ធសាស្រ្តនានា ដែលត្រូវបានរចនាឡើង ដើម្បីគ្របគ្រងហានិភ័យ និងភាពច្នៃប្រឌិត។ ក្នុងនោះផងដែរ វាពាក់ព័ន្ធនឹងវិធានការទប់ស្កាត់ការទប់ស្កាត់ការក្លែងបន្លំ ការការពារអតិថិជនពីការគំរាមកំហែង ហើយភាពជាដៃគូនេះហើយដែលអនុញ្ញាតឱ្យក្រុមហ៊ុន វីសា បង្កើតនូវប្រព័ន្ធសុវត្ថិភាពដែលត្រូវបានណែនាំដោយបច្ចេកវិទ្យាច្នៃប្រឌិត ដូចជា EMV chip នេះ។

ក្រុមហ៊ុន វីសា រួមជាមួយស្ថាប័នហិរញ្ញវត្ថុ និងដៃគូពាណិជ្ជកម្មរបស់ខ្លួនបានវិនិយោគជាប្រចាំនៅលើការរីកចម្រើនលើការទូទាត់តាមរយៈឌីជីថលនៅក្នុងប្រទេសកម្ពុជា។ ហើយនេះបានរួមបញ្ចូលទាំងផលិតនិងការប្រើប្រាស់កាតបន្ថែម ការអប់រំដល់អ្នកប្រើប្រាស់និងអាជីវកលើអត្ថប្រយោជន៍នៃការទូទាត់តាមរយៈប្រព័ន្ធអេឡិចត្រូនិក និងការណែនាំអំពីការ ច្នៃប្រឌិតថ្មីៗទាក់ទងទៅនឹងការទូទាត់ដូចជាការទូទាត់តាមរយៈការស្កេន QR កូដជាដើម។

បន្ទះឈីបស្តង់ដារ EMV ជាស្តង់ដារឧស្សាហកម្មជាសកលសម្រាប់ប្រតិបត្តិការទូទាត់ដ៏មានសុវត្ថិភាពត្រូវបានបង្កើតឡើងដោយ EMVCo ដែលជាកម្មសិទ្ធិរួមគ្នារបស់ American Express, Discover, JCB, MasterCard, UnionPay និង Visa ។

###

អំពីសមាគមធនាគារនៅកម្ពុជា(ABC)

សមាគមធនាគារនៃកម្ពុជា ត្រូវបានបង្កើតឡើងនៅឆ្នាំ១៩៩៤ និងត្រូវបានទទួលស្គាល់ដោយរាជរដ្ឋាភិបាលកម្ពុជា គឺជាស្ថាប័នផ្លូវការតំណាងឲ្យវិស័យធនាគារឯកជននៅកម្ពុជា។ ក្នុងឆ្នាំ១៩៩៧ ABC ត្រូវបានទទួលស្គាល់ជាផ្លូវការពីទីស្តីការគណៈរដ្ឋមន្ត្រី។ ABC បានក្លាយជាសមាជិកទី៨ នៃសមាគមធនាគារអាស៊ាន (ABA) នៅក្នុងឆ្នាំ១៩៩៩។ ABC ត្រូវបានដំណើរការក្រោមក្របខ័ណ្ឌនៃច្បាប់ស្តីពីគ្រឹះស្ថានធនាគារនិងហិរញ្ញវត្ថុ ឆ្នាំ ១៩៩៩ នឹងមាត្រា នានាដែលត្រូវបានអនុម័តនៅថ្ងៃទី ២៨ ខែសីហាឆ្នាំ ២០០១ ព្រមទាំងបានចុះបញ្ជីនៅធនាគារជាតិនៃកម្ពុជានៅថ្ងៃទី២ ខែតុលាឆ្នាំ ២០០១។ ទីបំផុតនៅថ្ងៃទី២៣ ខែវិច្ឆិកាឆ្នាំ ២០១២ ABC បានចុះឈ្មោះជាផ្លូវការជាមួយក្រសួងមហាផ្ទៃ។

សមាគម មានគោលបំណងគាំទ្រដល់ការអភិវឌ្ឍវិស័យធនាគារនៅកម្ពុជាដែលមានភាពរឹងមាំ។ អេប៊ីស៊ី បានដើរតួនាទីយ៉ាងសកម្ម និងសំខាន់ក្នុងការជំរុញការសន្ទនាប្រកបដោយការស្ថាបនា និងកិច្ចសហប្រតិបត្តិការជាមួយសមាជិកធនាគារជាតិនៃកម្ពុជា និងអ្នកពាក់ព័ន្ធដទៃទៀតនៅថ្នាក់ជាតិនិងថ្នាក់តំបន់ដើម្បីពង្រឹងសមត្ថភាព និងដោះស្រាយបញ្ហាប្រឈមដែលបានកើតឡើង ទាំងនៅថ្នាក់ជាតិនិងថ្នាក់តំបន់។ ដើម្បីលើកស្ទួយសុខភាពហិរញ្ញវត្ថុ និងវិជ្ជាជីវៈជំនាញរបស់ធនាគារ និងស្ថាប័នហិរញ្ញវត្ថុ ដែលគាំទ្រដល់កំណើនសេដ្ឋកិច្ចយ៉ាងឆាប់រហ័សប្រកបដោយតុល្យភាព និងនិរន្តរភាពហើយដែលសមស្របនឹងសមាហរណកម្មសេដ្ឋកិច្ចអាស៊ាន។

បច្ចុប្បន្ន ABC មានសមាជិកចំនួន ៦៥ រួមមានធនាគារពាណិជ្ជកម្មចំនួន ៤៥ ធនាគារឯកទេសចំនួន ១៥ សមាគមមីក្រូហិរញ្ញវត្ថុកម្ពុជា ០១ (CMA) និងការិយាល័យតំណាងធនាគារចំនួន ០៤ ដែលមានទីតាំងនៅប្រទេសកម្ពុជា។

អំពីក្រុមហ៊ុនVisa
Visa Inc. (NYSE: V) គឺជាក្រុមហ៊ុននាំមុខគេក្នុងបច្ចេកវិទ្យាទូទាត់សាច់ប្រាក់តាមរយៈឌីជីថល។ បេសកកម្មរបស់យើងគឺផ្សាភ្ជាប់ពិភពលោកទាំងមូលតាមរយៈការតភ្ជាប់បណ្តាញទូទាត់ប្រាក់ប្រកបដោយភាពច្នៃប្រឌិតថ្មី អាចទុកចិត្តបាន និងមានសុវត្ថិភាពបំផុត ជាមួយអ្នកប្រើប្រាស់ អាជីវករ និងជួយឲ្យសេដ្ឋកិច្ចមានការរីកចម្រើន។ បណ្តាញទំនើបឈានមុខគេបំផុតមួយរបស់ពិភពលោកគឺ VisaNet របស់យើង ផ្តល់ការទូទាត់ដែលអាចទុកចិត្តបាននិងមានសុវត្ថិភាពនៅទូទាំងពិភពលោក នឹងមានលទ្ធភាពគ្រប់គ្រងប្រតិបត្តិការជាង ៦៥,០០០ប្រតិបត្តិការក្នុងមួយវិនាទី។ ក្រុមហ៊ុនផ្តោតការយកចិត្តទុកដាក់ឥតឈប់ឈរលើការច្នៃប្រឌិត ដែលនេះជាកត្តាជម្រុញដល់ភាពរីកចម្រើនយ៉ាងឆាប់រហ័សនៃការធ្វើពាណិជ្ជកម្មដែលបានផ្សារភ្ជាប់ទៅនឹងឧបករណ៍អេទ្បិចត្រូនិចណាក៏បាន និងជាកម្លាំងមួយនៅពីក្រោយការកសាងនូវក្តីសុបិន្តរបស់អនាគត cashless សម្រាប់មនុស្សគ្រប់គ្នានៅគ្រប់ទីកន្លែង។ នៅពេលដែលពិភពលោកផ្លាស់ប្តូរពី analog ទៅឌីជីថល វីសាក៏កំពុងតែពង្រឹងលើស្លាកសញ្ញា ផលិតផល បុគ្គលិក និង បណ្តាញរបស់ខ្លួនរួចជាស្រេចដើម្បីចូលរួមជាមួយនឹងការផ្លាស់ប្តូរពាណិជ្ជកម្មនាថ្ងៃអនាគត។

ព័ត៌មានបន្ថែមសូមចូលមើលគេហទំព័រ usa.visa.com/aboutvisa, visacorporate.tumblr.com និង @VisaNews.

អំពីធនាគារអេស៊ីលីដាភីអិលស៊ី

សព្វថ្ងៃធនាគារអេស៊ីលីដាភីអិលស៊ី កំពុងផ្តល់ជូនសេវាកម្មធនាគារអេឡិចត្រូនិក ឥណទាន ប្រាក់បញ្ញើ សេវាផ្ទេរប្រាក់ក្នុងស្រុក និងអន្តរជាតិ ហិរញ្ញវត្ថុពាណិជ្ជកម្ម ការគ្រប់គ្រងសាច់ប្រាក់ ការប្តូរប្រាក់ និងសេវាកម្មធនាគារជាច្រើនទៀត។ លើសពីនេះទៅទៀតធនាគារមានអេស៊ីលីដាយូនីធី ទាន់ចិត្ត ដែលជាកម្មវិធី FinTech ដំណើរការលើស្មាតហ្វូន អាចឱ្យអតិថិជនធ្វើប្រតិបត្តិការធនាគារគ្រប់ទីកន្លែង និងគ្រប់ពេលវេលា។ ស្ទើរតែគ្រប់ប្រភេទទាំងអស់នៃទូរស័ព្ទដៃឆ្លាតវៃដែលដំណើរការដោយប្រព័ន្ធ iOS ឬ Android អាចភ្ជាប់ជាមួយសេវាកម្មអេស៊ីលីដាយូនីធីទាន់ចិត្ត។ អ្នកអាចប្រើប្រាស់លើទូរស័ព្ទចល័តគ្រប់ប្រភេទ សម្រាប់ការផ្ទេរប្រាក់តាមរយៈសេវាកម្មនេះ ។

ធនាគារអេស៊ីលីដាភីអិលស៊ី មានក្រុមហ៊ុនបុត្រសម្ព័ន្ធចំនួន ៤ ដែលត្រូវបានគេស្គាល់ថាអេស៊ីលីដាស៊ីឃ្យួរឹធីភីអិលស៊ី វិទ្យាស្ថានពាណិជ្ជសាស្ត្រអេស៊ីលីដា ធនាគារអេស៊ីលីដាឡាវ អិលធីឌី និងអេស៊ីលីដា អឹមអេហ្វអាយ ខូអិលធីឌីដែលមានការិយាល័យតំណាងនៅប្រទេសមីយ៉ាន់ម៉ា។ គិតត្រឹមខែមិថុនាឆ្នាំ ២០១៩ ធនាគារអេស៊ីលីដាភីអិលស៊ី មានទ្រព្យសម្បត្តិសរុបចំនួន ៦,០៨ ប៊ីលានដុល្លារអាមេរិក សមតុល្យឥណទានសរុបចំនួន ៣,៧០ ប៊ីលានដុល្លារ និងប្រាក់បញ្ញើសន្សំសរុបចំនួន ៤,១៥ ប៊ីលានដុល្លារ។

សម្រាប់ពត៌មានបន្ថែមសូមចូលទៅកាន់៖ www.acledabank.com.kh

ព័ត៌មានបន្ថែម សូមទាក់ទងមក:

For further media information, please contact:

ABC:

Sochinda CHAN (Ms.), Head of Regional Relationships

Email: [email protected]

Mobile: +855 93 807 338

Desk Phone: +855 23 230 611

ACLEDA Bank Plc.:

Mr. Phal Sokchamreoun,

VP & Deputy Head of Marketing Division

E-mail: [email protected]

Mobile: +855 15 800 903

Visa

Trang Nguyen

Visa Worldwide Pte. Limited

Phone: +84 28 3520 7439

Email: [email protected]

Sovannary Kry

Red Dot, on behalf of Visa Inc.

Phone: +855 11 733 368

Email: [email protected]

[1] EMV® is a registered trademark or trademark of EMVCo LLC in the United States and other countries

[2] The Visa Consumer Payment Attitudes Study 2018 was conducted by Intuit Research on behalf of Visa in August 2018. The research was conducted amongst 4,000 consumers in Indonesia, Malaysia, Philippines, Singapore, Thailand, Vietnam, Myanmar, and Cambodia.

លោក Chris Clark ប្រធានប្រចាំតំបន់អាស៊ីប៉ាស៊ីហ្វិក នៃក្រុមហ៊ុន វីសា

August 8, 2019

គ្រឿងសម្អាង និងការថែរក្សាសម្ផស្សដែលត្រូវហាមឃាត់ក្នុងអំឡុងពេលមានគភ៌

ការផ្លាស់ប្តូរប្រែប្រួលរបស់ស្រ្តីមានគភ៌ថ្មោងថ្មីដែលមើលឃើញច្បាស់នោះគឺ រូបរាងដែលចេះតែរីកធំឡើងជារៀងរាល់ខែ អាចធ្វើឱ្យអ្នកដែលទើបតែតាំងគភ៌ជាលើកដំបូងលែងមានភាពជឿជាក់លើខ្លួនឯង រួមទាំងផ្ទៃមុខ សាច់ស្បែករបស់ខ្លួនក៏អាចនឹងប្រែប្រួលទៅតាមនោះដែរ តែអ្វីដែលសំខាន់នោះគឺ អ្នកមានគភ៌លើកដំបូងអាចមិនសូវមានទំនុកចិត្តលើផលិតផលគ្រឿងសម្អាងដែលកំពុងប្រើនោះថា តើវាមានសុវត្ថិភាពចំពោះកូនសម្លាញ់ដែលនៅក្នុងផ្ទៃ ឬក៏អត់? ដូច្នេះថ្ងៃនេះយើងនាំគ្នាមកមើលទាំងអស់គ្នាថា តើផលិតផលថែរក្សាសម្ផស្សណាខ្លះដែលត្រូវហាមឃាត់ក្នុងខណៈមានគភ៌។

1. គ្រីមថែបំប៉នស្បែកមិនគួរប្រើគ្រឿងសម្អាងដែលស្ថិតក្នុងក្រុម Whitening និងផលិតផលបំបាត់មុន ស្នាមអុច ស្នាមជាំខ្មៅផ្សេងៗ និងដែលមានគ្រោះថ្នាក់បំផុតនោះគឺ Retinol ឬអាស៊ីតវីតាមីន A ដោយសារតែវាអាចជ្រាបចូលទៅក្នុងក្រសែឈាម និងអាចបណ្តាលឱ្យទារកនៅក្នុងគភ៌រលូត ឬពិការបាន តែពពួកគ្រីមការពារកម្តៅថ្ងៃអាចនៅប្រើបាន។

2. ថ្នាំព្យាបាលមុនព្រោះការព្យាបាលមុននឹងមានសារធាតុ Roaccutane ដែលមានប្រសិទ្ធភាពក្នុងការព្យាបាលខ្ពស់ ទើបចាំបាច់ត្រូវស្ថិតនៅក្រោមការគ្រប់គ្រងរបស់ពេទ្យយ៉ាងតឹងរឹង និងហាមប្រើប្រាស់នៅលើស្ត្រីមានគភ៌ ដោយសារតែថ្នាំមួយនេះអាចបង្កឱ្យមានគ្រោះថ្នាក់ដល់ទារកក្នុងគភ៌ និងត្រូវបញ្ឈប់ការប្រើប្រាស់ថ្នាំប្រភេទនេះប្រមាណជា 1-2 ខែជាមុនសិន ទើបអាចមានគភ៌បាន។

3. ការជ្រលក់ពណ៌សក់ លាបពណ៌សក់ ពន្យឺតសក់ ឬអ៊ុតសក់អ្វីទាំងអស់នេះ មានសារធាតុម្យ៉ាងដែលអាចនឹងធ្វើឱ្យយើងកើតអាការប្រតិកម្មចាញ់បាន ដូចជាថា បើយើងកើតប្រតិកម្មចាញ់ និងមានស្នាមរបួស ឬដំបៅនៅលើស្បែកក្បាល វាអាចនឹងធ្វើឱ្យកើតការឆ្លងមេរោគរាលដាលកាន់តែលឿនឡើង ស្រួលមិនស្រួលអាចនឹងហុចផលអាក្រក់ដល់កូននៅក្នុងគភ៌ទៀតផង ដូច្នេះទើបយើងមិនណែនាំឱ្យស្រ្តីមានគភ៌ទៅធ្វើពណ៌សក់ក្នុងអំឡុងពេលនោះឡើយ។

4. ខាត់ស្បែកមុខ និងស្បែកដងខ្លួនជាពិសេសការខាត់ស្បែកដោយសារធាតុគីមី អាចធ្វើឱ្យកើតប្រតិកម្មចាញ់ និងឡើងកន្ទួល ឬជួនកាលអាចនឹងឆ្លងមេរោគបានដោយងាយបើស្ត្រីមានគភ៌មានរបួស ឬដំបៅនៅតាមរាងកាយផងនោះ។ ដូច្នេះយើងសូមណែនាំថា បើអ្នកមានគភ៌ចង់ខាត់ ឬធ្វើម៉ាស្សាដងខ្លួននោះ គួរប្រឹក្សាជាមួយគ្រូពេទ្យជាមុនសិន ព្រោះសារធាតុមួយចំនួននៅក្នុងផលិតផលទាំងនោះអាចនឹងធ្វើឱ្យរលាកក្រហាយ និងមានផលប៉ះពាល់ដល់កូនក្នុងផ្ទៃបានយ៉ាងងាយ។

5. ធ្វើម៉ាស្សាមុខដោយឧបករណ៍ដែលមានទាំង អាល់ត្រាសូនិក បេប៊ីហ្វេស ភ្លើងពណ៌ផ្សេងៗ ព្រោះតារាងដែកឆក់អគ្គិសនី នឹងហុចផលធ្វើឱ្យគភ៌រលូតបាន។ ទាំងអស់នេះរួមទាំងគ្រឿងប្រើប្រាស់អគ្គិសនីផ្សេងៗទៀតផង ដូចជា ប្រដាប់ផ្លុំសក់ ប្រដាប់បឺតធូលីដី ឆ្នាំងម៉ៃក្រូវេហ្វ និងអ្វីក៏ដោយដែលមានម៉ូទ័រ ឬឌីណាម៉ូភ្លើង អ្នកមានគភ៌គួរតែនៅឱ្យឆ្ងាយៗពីរបស់ទាំងអស់នោះ។

6. លាបពណ៌ក្រចកសារធាតុគីមីនៅក្នុងថ្នាំលាបក្រចកនឹងមានផលប៉ះពាល់ដល់វិវឌ្ឍនាការរបស់ទារកនៅក្នុងផ្ទៃ និងសូម្បីតែកូនង៉ាដែលទើបនឹងកើតក៏ដោយ។

7. ចាក់ Botoxការចាក់សារធាតុនេះចូលទៅក្នុងស្បែក នឹងធ្វើឱ្យសាច់ដុំពិការ លែងធ្វើការ ជារឿងដែលត្រូវបានហាមជាដាច់ខាត សម្រាប់ស្រ្តីមានគភ៌ទាំងឡាយ។

8. ស្ពង់ចំហាយទឹក និងសោណាធ្វើឱ្យរាងកាយរបស់អ្នកមានផ្ទៃពោះបាត់បង់ជាតិទឹកក្នុងអំឡុងពេលនោះ ទើបមិនគួរធ្វើសោណាក្នុងអំឡុងពេលមានគភ៌ឡើយ ព្រោះអាចនឹងធ្វើឱ្យកើតខ្យល់គ វិលមុខបានយ៉ាងងាយបំផុត។ ក្រៅពីនេះនៅមានការសិក្សាស្រាវជ្រាវមួយទៀតបានប្រាប់ថា ក្រោយពីចំហុយសោណាបានប្រមាណជា 1-2 ម៉ោងមក នឹងធ្វើឱ្យ IQ របស់យើងធ្លាក់ចុះទៀតផង ដោយសារតែការបាត់បង់ជាតិទឹកក្នុងរាងកាយហ្នឹងឯង។

មូលហេតុផ្សេងៗទាំងអស់នេះអាចធ្វើឱ្យអ្នកមានផ្ទៃពោះមើលថែទាំកូននៅក្នុងផ្ទៃបានយ៉ាងមានសុវត្ថិភាព តែយ៉ាងណាក៏ដោយ ក៏ស្រ្តីមានគភ៌ត្រូវតែស៊ូទ្រាំដែរ ដើម្បីឱ្យជីវិតដ៏តូចមួយដែលនៅក្នុងខ្លួនរបស់អ្នកមានសុខភាពល្អ នៅពេលបើកភ្នែកមើលពិភពលោកនេះ៕

August 8, 2019

អ្នកជំនាញចែករំលែកវិធីសាស្ត្រជោគជ័យ ក្នុងការវិនិយោគវិស័យអចលនទ្រព្យកម្ពុជា

ការចាប់ផ្តើមជីវិតអាជីវកម្មលើវិស័យអចលនទ្រព្យ មិនមែនជារឿងងាយស្រួលពេកទេក្នុងការធ្វើឱ្យសម្រេចបានជោគជ័យលើវិស័យនេះ។ជាការពិតមានអ្នកប្រឡូកក្នុងវិស័យនេះច្រើនណាស់នៅកម្ពុជា តែបុគ្គលទទួលបានជោគជ័យដែលយើងបានឃើញ មានតិចតួចណាស់ ព្រោះងាយស្រួលចាប់ផ្តើម តែពិបាកធ្វើឱ្យជោគជ័យ ដោយសារតែឧបសគ្គមួយចំនួនធំ គឺកើតចេញពីសហគ្រិនខ្លួនឯងតែម្តង។

ក៏ប៉ុន្តែ “តាមការស្វែងយល់ពីបច្ចុប្បន្នភាពនៃវិស័យអចលនទ្រព្យអ្នកមានភាគច្រើននៅស្រុកខ្មែរ គឺមានដោយសារវិស័យអចលនទ្រព្យ ហើយនៅលើលោកនេះមាន4%នៃអ្នកមានគ្រប់គ្រងទ្រព្យសម្បត្តិដល់ទៅ90%ក្នុងពិភពលោក ជាពិសេសអ្នកមានទាំងនេះ គឺមានដោយសារវិស័យអចលនទ្រព្យ។

នោះគឺជាជោគជ័យក្នុងវិស័យនេះ ដែលមាននៅក្នុងទីផ្សារអចលនទ្រព្យ។ បច្ចុប្បន្នភាពប្រកួតប្រជែង ដើម្បីទាក់ទាញប្រជាប្រិយភាព ការជឿទុកចិត្ត គាំទ្រពីអតិថិជន ហើយក្រៅពីនោះគេមិនដែលបានឃើញ និងកម្រឃើញ អ្នកធ្វើជំនួញជោគជ័យណាមួយបានបង្ហាញពីយុទ្ធសាស្ត្រជោគជ័យរបស់ខ្លួនដែលខ្លួនបានទទួលជោគជ័យនោះដែរ។

លោកសន សៀបនាយកប្រតិបត្តិក្រុមហ៊ុនអចលនទ្រព្យឃី (KEY REA ESTATE CO.,LTD) បានប្រាប់ឡារ៉ែនពាណិជ្ជថា៖“ខ្ញុំពុំបានគិតថា ភាពជោគជ័យក្នុងអាជីវកម្ម ឬយុទ្ធសាស្ត្រជោគជ័យក្នុង វិស័យអចលនទ្រព្យមានទំហំប៉ុនណានោះទេ។ព្រោះដោយសារថាវិស័យអចលនទ្រព្យមានភាពទូលំទូលាយណាស់ វាមានកត្តាចូលរួមជាច្រើន ទើបអាចសម្រេចជោគជ័យបាន”។

លោក នាយកប្រតិបត្តិបានបញ្ជាក់ថា៖“ខ្ញុំគិតថាយើងមិនត្រូវចាប់អារម្មណ៍ទៅលើអ្វីច្រើនពេកទេ។ ការឆ្លងកាត់ការងារជាច្រើនមក គឺយើងបានផ្តោតលើការងារ ហើយផ្តោតលើផែនការដែលយើងបានរៀបចំ ទាំងផែនការរយៈពេលវែង រយៈពេលខ្លីរបស់យើង។ផែនការនោះគឺយើងបានកំណត់ថាយើងត្រូវធ្វើអ្វីខ្លះដើម្បីទទួលបានលទ្ធផលមកវិញ។ផែនការនោះមានចំណូល ចំណាយ ធ្វើការពង្រឹង និងអភិវឌ្ឍធនធានមនុស្សរបស់យើង រួមទាំងតំបន់ ដែលជាទិសដៅត្រូវវិនិយោគ។

លោកសន សៀបបានបញ្ជាក់ថា៖“នៅក្នុងការធ្វើផែនការ ក៏យើងមានគម្រោងប្លង់គោលដែលបានមកពីការស្រាវជ្រាវ និងសិក្សាពីគម្រោងប្លង់ដែលត្រូវអភិវឌ្ឍ ដែលគោលដៅអភិវឌ្ឍន៍របស់រាជរដ្ឋាភិបាលផងដែរ ព្រោះបើយើងមិនយកព័ត៌មានសំខាន់ៗ មកដាក់ក្នុងគម្រោងផែនការទេ គឺយើងនឹងមានការអនុវត្តទៅខុស។ព្រោះការវិភាគការតាមដាន និងសិក្សាស្វែងយល់ពីរបត់នៃទីផ្សារអចលនទ្រព្យពេលកន្លងមក និងបច្ចុប្បន្នបានល្អិតល្អន់ អាចជួយអ្នកបាន ។

លោកសន សៀបបានបញ្ជាក់ទៀតថា៖“ខ្ញុំពុំមានទ្រឹស្តី ពាក់ព័ន្ធនឹងយុទ្ធសាស្ត្រអ្វីច្រើនទេ គឺធ្វើនិងគិត តាមការមានបទពិសោធ តាមចំណេះដឹង តាមការមានព័ត៌មានពីការស្រាវជ្រាវ ជាមួយដៃគូខាងក្រៅ និងក្រុមការងារ ខាងក្នុងក្រុមហ៊ុន។យើងគិតតែខំប្រឹងធ្វើតាមទិសដៅការងាររបស់យើងៗខំប្រឹងធ្វើ តែមានការវាយតម្លៃក្នុង1ឆ្នាំម្តងដើម្បីស្វែងយល់ពីលទ្ធផលដែលយើងទទួលបាន និងចាប់ផ្តើមគិតពីការងារសម្រាប់ឆ្នាំខាងមុខទៀត។

ដោយឡែកសហគ្រិន ក្នុងវិស័យផ្គត់ផ្គង់សម្ភារសំណង់ម្នាក់ ក៏បានចែករំលែកបទពិសោធយុទ្ធសាស្ត្រក្នុងការដឹកនាំគ្រប់គ្រងអាជីវកម្ម និងគន្លឹះសំខាន់ៗមួយចំនួនដល់អ្នកធ្វើជំនួញ ឬម្ចាស់អាជីវកម្មវ័យក្មេងដទៃទៀត ក៏ដូចជាដៃគូរបស់ខ្លួន ដើម្បីធ្វើយ៉ាងណាឱ្យការធ្វើអាជីវកម្មរបស់ពួកគេ បើកទ្វាររកស៊ីបានយូរអង្វែង និងទទួលបានជោគជ័យ។

លោកហួត ជា បានក្លាយជាម្ចាស់ក្រុមហ៊ុនផ្គត់ផ្គង់សម្ភារសំណង់ដ៏ធំមួយ នៅក្នុងព្រះរាជាណាចក្រកម្ពុជាបានលើកឡើងថា ការបើកអាជីវកម្មមានភាពងាយស្រួល តែការរក្សាគ្រប់គ្រងអាជីវកម្មឱ្យមាននិរន្តរភាពមិនមានភាពងាយស្រួលនោះទេ នៅពេលដែលអាជីវកម្មចាប់ផ្តើមបើកភ្លាម បញ្ហាជាច្រើនបានក្លាយជាលំហាត់ មករកម្ចាស់អាជីវកម្មឱ្យធ្វើការដោះស្រាយប្រសិនបើម្ចាស់អាជីវកម្ម គ្មានសមត្ថភាពដោះស្រាយនោះទេ អាជីវកម្មនោះនឹងត្រូវបិទទ្វារជាក់ជាមិនខានឡើយ។

លោកហួត ជា បានមានប្រសាសន៍ថា៖“សម្រាប់ខ្ញុំៗទី1ឆន្ទៈ ទី2គំនិត នៅពេលដែលមានឆន្ទៈ និងគំនិតហើយគឺបន្ទាប់មកយើងអនុវត្តនូវអ្វីដែលជាឆន្ទៈនិងគំនិតរបស់យើង។ដូច្នេះសូមបងប្អូនយុវវ័យ កុំគិតថាដល់តែមានទុនគ្រប់គ្រាន់ ឬដល់មានលុយគ្រប់គ្រាន់ សំខាន់គឺ គំនិតយើងទេ ដែលជួយយើងឱ្យមានទិសដៅ។បន្ទាប់មកគឺភាពស្មោះត្រង់ជាទុនរបស់យើងមួយផងដែរ”។

លោកបានបញ្ជាក់ដែរថា៖“ការក្លាយជាអ្នកជំនួញបាន នោះគឺយើងត្រូវមានចំណុច3ជាសំខាន់់គឺទី1-សុខភាព ទី2-មានគុណធម៌ ទី3-គឺមានគំនិតបានមកពីការអប់រំ ក្លាយជាចំណេះដឹង ទើបយើងអាចក្លាយជាអ្នកជំនួញមួយល្អ ជាងអ្នកជំនួញដទៃទៀត ដែលគេអាចមានចំណុចខ្វះខាត”។

លោកហួត ជាបានបញ្ជាក់ទៀតថា៖“ដើម្បីក្លាយខ្លួន ជាអ្នកជំនួញដ៏រឹងមាំបាន ទាល់តែអ្នកត្រូវតែមានគំនិត ”ចក្ខុវិស័យ“ កំណត់គោលដៅច្បាស់លាស់ សម្រាប់អនាគតនៃគម្រោងវិនិយោគរបស់អ្នក។ចេះប៉ាន់ប្រមាណ ទៅលើតម្លៃនៃប្រតិបតិ្តករពង្រឹងសមត្ថភាពគ្រប់គ្រង ក្តាប់ឱកាសទទួលយកព័ត៌មានជាក់លាក់ វិភាគពីភាពអាចទៅរួច និងពង្រីកយន្តការអាជីវកម្ម្ មានចក្ខុវិស័យត្រឹមត្រូវ នឹងដើរទៅតាមផែនការអនាគតក្នុងទិសដៅតែមួយ”។

ជាសរុបទៅការវិនិយោគនៅក្នុងវិស័យអចលនទ្រព្យ គឺពិតជាត្រូវទាមទារឱ្យវិនិយោគិនខ្លួនឯងថ្លឹងថ្លែងឱ្យបានគ្រប់ជ្រុងជ្រោយ។ ក្នុងនាមជាបុគ្គលជោគជ័យ មិនថាផ្នែកណាក៏ដោយ ជាពិសេសផ្នែកអចលនទ្រព្យ ត្រូវតែមានផែនការសកម្មភាពប្រចាំថ្ងៃ ប្រចាំខែប្រចាំឆ្នាំ។ ជាពិសេសក្រុមការងារ ត្រូវបែងចែកទៅតាមជំនាញ ទើបទទួលបានជោគជ័យលើបេសកកម្មរបស់ខ្លួន។ សម្រាប់វិនិយោគថ្មីថ្មោង អ្នកពិតជាមិនអាចធ្វើការសម្រេចចិត្ត ដោយខ្វះការប្រឹក្សាយោបល់ពីអ្នកជំនាញបានទេ៕

August 7, 2019

កម្ពុជាការនាំចេញកើនឡើង 15% ក្នុងរយៈពេល5 ខែដំបូងនៃឆ្នាំ2019

យោងតាមរបាយការណ៍ចុងក្រោយបំផុតរបស់ក្រសួងសេដ្ឋកិច្ច និងហិរញ្ញវត្ថុបានឱ្យដឹងថា ការនាំចេញក្នុងរយៈពេល 5 ខែដំបូងនៃឆ្នាំ2019នេះ បានកើនឡើងជាង 15 % រហូតដល់ 5,3 ពាន់ លានដុល្លារ។ក្នុងអំឡុងពេលដូចគ្នាតម្លៃនៃការនាំចូលបានកើនឡើងដល់ 8,2 ពាន់លានដុល្លារដែលកើនឡើង 21.5 %បើប្រៀបធៀបទៅនឹងរយៈពេលដូចគ្នាកាលពីឆ្នាំមុន។

របាយការណ៍បានឱ្យដឹងថា កំណើននាំចេញត្រូវបានគាំទ្រដោយតម្រូវការខ្ពស់នៅអាមេរិកដោយមានការកើនឡើងនៃការដឹកជញ្ជូនទំនិញ។របាយការណ៍បានឱ្យដឹងថាការនាំចេញទៅសហភាពអឺរ៉ុបបានធ្លាក់ចុះបើធៀបនឹងរយៈពេលដូចគ្នាកាលពីឆ្នាំមុន។ សហភាពអឺរ៉ុបបច្ចុប្បន្ននេះមាន 34%នៃការនាំចេញសរុបរបស់កម្ពុជា។

របាយការណ៍នេះក៏បានកត់សម្គាល់ផងដែរថា៖“ការពន្លឿនគំរូអាជីវកម្មការធ្វើពិពិធកម្មសេដ្ឋកិច្ច និងការពង្រីកទីផ្សារគោលដៅបានធ្វើឱ្យប្រទេសកម្ពុជាអាចបង្កើតកំណើន និងកាត់បន្ថយសម្ពាធពីហានិភ័យខាងក្រៅ។នេះនឹងធានាថាប្រទេសនេះអាចទ្រទ្រង់កំណើននេះនាពេលអនាគត”។

យោងតាមក្រសួងពាណិជ្ជកម្មអាមេរិក កាលពីឆ្នាំមុន កម្ពុជាគឺជាអ្នកផ្គត់ផ្គង់ទំនិញ ធំបំផុតទី 57 របស់សហរដ្ឋអាមេរិក។ ការនាំចូលទំនិញពីកម្ពុជាមានចំនួនសរុប 3,8 ពាន់លានដុល្លារក្នុងឆ្នាំ 2018 ដែលកើនឡើង 24.8 %ពីឆ្នាំ1ទៅ1ឆ្នាំ។

ចំណែកសហរដ្ឋអាមេរិក ភាគច្រើននាំចូលសម្លៀកបំពាក់ត្បាញ និង ផលិតផលត្បាញអំពីស្បែក ផលិតផលស្បែកជើងស្បែក និងផលិតផលកសិកម្ម។

ចាប់តាំងពីឆ្នាំ 2016 ប្រទេសកម្ពុជាទទួលបានអត្ថប្រយោជន៍ ដោយមិនគិតពន្ធ លើការនាំចេញទំនិញ ដូចជាសម្លៀកបំពាក់ កាបូបស្ពាយ និងកាបូបនាំចេញទៅសហរដ្ឋអាមេរិកក្រោមគម្រោង GS។ ក្រសួងពាណិជ្ជកម្ម បានដាក់ញត្តិទៅសហរដ្ឋអាមេរិក ដើម្បីពង្រីកគ្រោងការ នាំចេញសម្លៀកបំពាក់ និងស្បែកជើង។

លោកឧកញ៉ាលឹម ហេងអនុប្រធានសភាពាណិជ្ជកម្មកម្ពុជា បានប្រាប់ឡារ៉ែនថាការងារជាច្រើនទៀតគឺត្រូវការដើម្បីធ្វើឱ្យកម្ពុជាមានការប្រកួតប្រជែងពិតប្រាកដនៅលើទីផ្សារអន្តរជាតិ។

លោកឧកញ៉ាបានកត់សម្គាល់ថា ការធ្វើពិពិធកម្មផលិតផលគឺជាគន្លឹះដើម្បីជំរុញការនាំចេញ របស់ប្រទេស។ភាគច្រើននៃការនាំចេញរបស់យើង នៅតែបន្តនៅក្នុងវិស័យកាត់ដេរ និងកសិកម្ម។ លោកឧកញ៉ា លឹម ហេងបានថ្លែងថា៖“ យើងរំពឹងថា តួលេខនៃការនាំចេញនឹងបន្តកើនឡើងខណៈដែលសេដ្ឋកិច្ច បន្តពង្រីក។ យើងត្រូវតែពង្រឹងខ្លួនយើងដើម្បីប្រកួតប្រជែងជាមួយប្រទេសជិតខាងហើយទាក់ទាញ ការវិនិយោគបន្ថែមទៀតនៅក្នុងប្រទេស”។

ផលិតផលនាំចេញសំខាន់ៗរួមមាន សម្លៀកបំពាក់ និងស្បែកជើង កង់ កៅស៊ូ អង្ករ ដំឡូងមី ម្រេច ប្រេងដូង និងគ្រាប់ស្វាយចន្ទីជាដើម។ការនាំចេញរបស់កម្ពុជាក្នុងឆ្នាំ2018មានចំនួន11,2 ពាន់លានដុល្លារ ពោលគឺកើនឡើង 4 %លើសការនាំចេញកាល-ពីឆ្នាំ 2017 ។តួលេខនៃការនាំចេញ នេះ មានការកើនឡើង បើធៀបនឹងរយៈពេលដូចគ្នាឆ្នាំ2017មានត្រឹមតែ10,777 លានដុល្លារ។ដោយឡែសម្រាប់ការនាំចូលរបស់កម្ពុជាវិញ ក៏មានចំនួនច្រើនផងដែរ ដោយមាន ចំនួន13,771លានដុល្លារ កើនឡើងជាងឆ្នាំ2017 ដែលមានត្រឹមតែ13,019លានដុល្លារ។

ជាមួយគ្នានេះការនាំចេញតាមរយៈប្រទេសអាស៊ាន ដែលកម្ពុជាជាសមាជិកមួយដែរ ក៏មានការនាំចេញគួរឱ្យកត់សម្គាល់។ យោងតាមតួលេខ ដែលបានចេញផ្សាយដោយទីក្រុងប៉េកាំង កាលពីដើមខែនេះទំហំពាណិជ្ជកម្មរវាងចិន និងបណ្តាប្រទេសអាស៊ាន មានទំហំទឹកប្រាក់291,8ពាន់លានដុល្លារក្នុងរយៈពេល 6 ខែដំបូង នៃឆ្នាំ2019 កើនឡើង 4% ធៀបរយៈពេលដូចគ្នាកាលពីឆ្នាំមុន។

ប្លុកអាស៊ានដែលមានសមាជិក10ប្រទេស គឺជាដៃគូពាណិជ្ជកម្មដ៏ធំបំផុតទី2 របស់ចិននៅ ក្នុងរយៈពេលនេះ បន្ទាប់ពីសហភាពអឺរ៉ុប។ ទិន្នន័យនេះត្រូវបានចេញផ្សាយ ស្របពេលរដ្ឋាភិបាលក្រុងប៉េកាំង រៀបចំធ្វើកិច្ចចរចាជុំចុងក្រោយបំផុត នៃកិច្ចចរចាភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) នៅក្នុងទីក្រុង Zhengzhou ដែលជារដ្ឋធានីនៃខេត្ត Henan ប្រទេសចិន៕

August 7, 2019

ធនាគារជាតិនៃកម្ពុជា សាកល្បងកម្មវិធីបង់ប្រាក់ចល័តថ្មី

ធនាគារជាតិនៃកម្ពុជាបានប្រកាសថា កំពុងធ្វើតេស្តប្រព័ន្ធកម្មវិធីបង់ប្រាក់ចល័តដែលគេឱ្យឈ្មោះថា“ប្រព័ន្ធបាគង” (Bakong) ដោយយោងតាមធនាគារកណ្តាល ប្រព័ន្ធថ្មីនេះនឹងជួយសម្រួលដល់ការផ្ទេរប្រាក់ និងការបង់ប្រាក់(នៅទូទាំងប្រទេស) ស្របពេលដែលមានការបង្កើនការដាក់បញ្ចូលហិរញ្ញវត្ថុនៅក្នុងប្រទេស។

ធនាគារជាតិនៃកម្ពុជាបានឱ្យដឹងក្នុងសេចក្តីថ្លែងការណ៍ថា៖“គម្រោងនេះមានគោលបំណងផ្តល់សេវាធនាគារទៅដល់តំបន់ដែលមិនមានធនាគារ ជាពិសេសនៅតំបន់ជនបទ”។ ធនាគារកណ្តាលបានឱ្យដឹងទៀតថា៖ “ប្រព័ន្ធនេះមានសុវត្ថិភាពងាយស្រួល ឆាប់រហ័ស និងមិនគិតថ្លៃ ដោយបានកត់សម្គាល់ថា ប្រព័ន្ធនេះ គឺជាគំនិតផ្តួចផ្តើមរបស់ធនាគារជាតិនៃកម្ពុជាផ្ទាល់។ ”ប្រព័ន្ធ Bakong» គឺជាសេវាផ្ទេរប្រាក់តាមម៉ាស៊ីនដែលមានស្រាប់ និងអាចរកបានសម្រាប់អតិថិជនលក់រាយរបស់ធនាគារដែលចូលរួមនៅក្នុងប្រទេសកម្ពុជា”។

“ប្រព័ន្ធបាគង”ជាប្រព័ន្ធដែលអនុញ្ញាតឱ្យប្រជាពលរដ្ឋ Download យកពីក្នុងទូរស័ព្ទ Smart Phone មកប្រើប្រាស់ដោយបំពេញតាមលក្ខខណ្ឌដែលបានកំណត់ក្នុងកម្មវិធី។ បន្ទាប់ពីបង្កើតរួចរាល់យើងទៅរកធនាគារដែលជាដៃគូជាមួយនឹងប្រព័ន្ធបាគងនេះ ដោយប្រាប់ភ្នាក់ងារធនាគារថា ចង់ដាក់បញ្ចូលលុយក្នុងប្រព័ន្ធបាគង នោះខាងធនាគារជាដៃគូនឹងដាក់បញ្ចូលប្រាក់ចូលទៅក្នុងប្រព័ន្ធបាគង ដោយប្រើប្រាស់បានទៅតាមប្រព័ន្ធ QR Code ទៅតាមទីកន្លែងណាដែលបញ្ជាក់ថា មានប្រើប្រាស់ប្រព័ន្ធបាគង។

សូមជម្រាបថា លោកជំទាវ ជា សិរី អគ្គនាយិកាបច្ចេកទេសនៃធនាគារជាតិនៃកម្ពុជា បានប្រជុំជាមួយគណៈកម្មការទូទាត់នៃសមាគមធនាគារនៅកម្ពុជា និងតំណាងគ្រឹះស្ថានផ្តល់សេវាទូទាត់ ដើម្បីពិភាក្សាអំពីគម្រោងបាគងដែលជាគំនិតផ្តួចផ្តើមថ្មីរបស់ធនាគារជាតិនៃកម្ពុជាពាក់ព័ន្ធនឹងករណីសិក្សាពីលទ្ធភាពនៃការដាក់ឱ្យប្រើប្រាស់រូបិយវត្ថុអេឡិចត្រូនិកសម្រាប់ប្រតិបត្តិការទូទាត់អន្តរធនាគារ។ជាក់ស្តែង ការលេចចេញជារូបរាងនៃការដាក់ឱ្យដំណើរការសាកល្បងកម្មវិធី“ប្រព័ន្ធបាគង” NBC បានសហការជាមួយធនាគារជាដៃគូចំនួន 4ដំបូងគេរួមមានធនាគារអេស៊ីលីដា ធនាគារ FTB ធនាគារវឌ្ឍន: និងធនាគារឯកទេសវីង។

នៅក្នុងការដាក់ឱ្យដំណើរការសាកល្បង “ប្រព័ន្ធបាគង” ត្រូវបានគូសបញ្ជាក់ថា គឺជាដំណើរវឌ្ឍនភាពក្នុងយុគសម័យថ្មីរបស់វិស័យហិរញ្ញវត្ថុនៅកម្ពុជា។ ធនាគារជាតិនៃកម្ពុជាពិតជាមានមោទនភាពណាស់ដែលបានក្លាយជាប្រទេសដំបូងគេក្នុងការដាក់ដំណើរការប្រព័ន្ធបច្ចេកវិទ្យា Blockchain ដ៏ទំនើបចុងក្រោយគេក្នុងវិស័យហិរញ្ញវត្ថុ ដើម្បីផ្តល់លទ្ធភាពក្នុងការធ្វើ និងជំរុញបរិយាប័ន្នហិរញ្ញវត្ថុសំដៅផ្តល់សេវាហិរញ្ញវត្ថុសម្រាប់ប្រជាជនកម្ពុជាគ្រប់រូប។

ធនាគារជាតិនៃកម្ពុជាបានឱ្យដឹងថា ប្រព័ន្ធនេះអនុញ្ញាតឱ្យផ្ទេរប្រាក់រៀល ឬដុល្លារអាមេរិក“អ្នកប្រើលែងត្រូវការស្គាល់តួលេខច្រើននៃគណនីធនាគាររបស់អ្នកទទួលទៀតហើយ ដោយឥឡូវនេះពួកគេអាចផ្ទេរប្រាក់ដោយផ្ទាល់ទៅលេខទូរស័ព្ទរបស់ពួកគេ ឬស្គែនកូដ QR តាមរយៈកម្មវិធី ប្រព័ន្ធបាគង ឬតាមរយៈសេវាកម្មធនាគារផ្សេងទៀត ដែលផ្តល់ដោយធនាគារសមាជិក។ វាឥតគិតថ្លៃ និងអាចប្រើបាន 24/7ក្នុងរយៈពេល 365 ថ្ងៃ”។

លោកស្រី សូផន ណារី នាយិការងប្រតិបត្តិរបស់ធនាគារអេស៊ីលីដា បានប្រាប់ថា ប្រព័ន្ធថ្មីនេះស្រដៀងទៅនឹងកាបូបឌីជីថលរបស់ធនាគារអេស៊ីលីដា។លោកស្រីបាននិយាយថា កម្មវិធី Toan Chet របស់អេស៊ីលីដាមានឈ្មួញប្រហែល 20%ដោយមានអតិថិជនជាង 980.000 នាក់ ទទួលយកការទូទាត់តាមរយៈកម្មវិធី។ ពោលជាមធ្យមមាន 69,671ប្រតិបត្តិការត្រូវបានធ្វើឡើងតាមរយៈកម្មវិធីរៀងរាល់ថ្ងៃជាមធ្យម 17,740,211ដុល្លារក្នុង 1ថ្ងៃ។

លោកស្រីបានមានប្រសាសន៍ថា៖“យើងនឹងភ្ជាប់ប្រព័ន្ធរបស់យើង គឺអេស៊ីលីដាទាន់ចិត្ត Toan Chet ទៅនឹង ”ប្រព័ន្ធបាគង” ដែលកម្មវិធីនេះនឹងអនុញ្ញាតឱ្យអតិថិជនរបស់យើងផ្ទេរប្រាក់តាមរយៈប្រព័ន្ធបាគង។ វាមិនមែនជាកម្មវិធីនៃការប្រកួតប្រជែងនោះទេ គឺបាគងបាននាំធនាគារទាំងអស់មកជាមួយគ្នា ដោយនិយាយអំពីការតភ្ជាប់គ្នា និងធ្វើការជាមួយគ្នា”។

កាលពីខែកុម្ភៈ ធនាគារកណ្តាលនៃប្រទេសកម្ពុជា និងថៃបានចុះហត្ថលេខាលើអនុស្សរណៈ នៃការយោគយល់គ្នា (MOU) ដើម្បីបង្កើតប្រព័ន្ធទូទាត់ដែលមានមូលដ្ឋានលើកូដ QR ។ យោងតាម តំណាងធនាគារកណ្តាលបានឱ្យដឹងថា ប្រព័ន្ធទូទាត់នាពេលខាងមុខមានបំណងសម្រួលការផ្លាស់ប្តូរឆ្លងកាត់ព្រំដែនក្នុងរូបិយប័ណ្ណក្នុងស្រុក។

កាលពីខែមិថុនា ធនាគារជាតិនៃកម្ពុជាបានប្រកាសថា ធនាគារក្នុងស្រុកចំនួន2 និងធនាគារ ថៃមួយបានចូលរួមជាមួយប្រព័ន្ធទូទាត់ប្រាក់តាម QR ដែលធនាគារកណ្តាលកំពុងអភិវឌ្ឍជាមួយ ប្រទេសថៃ។ ធនាគារនេះបានឱ្យដឹងថា ធនាគារ FTB ធនាគារអេស៊ីលីដា និងធនាគារពាណិជ្ជ Siam Com mercial Bank(SCB) នឹងក្លាយជាធនាគារឧបត្ថម្ភក្នុងគម្រោងនេះ៕

August 7, 2019

អង្គរថាយហ្គើរ ត្រៀមជួលកីឡដ្ឋានថ្មីមួយ មកធ្វើជាទឹកដីរបស់ខ្លួន នៅរដូវកាលក្រោយ

កាលពីពេលថ្មីៗនេះ ក្លិបបាល់ទាត់ “គិរីដងរែក” ដែលជាក្លិបពាក់កណ្តាលអាជីពនៅខេត្តសៀមរាបបានប្រកាសថា ខ្លួនជិតបញ្ចប់ការសាងសង់កីឡដ្ឋានដ៏ស្រស់ស្អាតថ្មីមួយរបស់ក្លិបហើយ។

បើតាមការគ្រោងទុកកីឡដ្ឋាននេះ និងបញ្ចប់ការសាងសង់រួចរាល់នៅដើមឆ្នាំ2020 ហើយកីឡដ្ឋាននេះអាចនឹងផ្ទុកអ្នកទស្សនាបានខ្ទង់ 5ពាន់នាក់ ដែលបានចំណាយលុយក្នុងការសាងសង់អស់ប្រមាណជា 50ម៉ឺនដុល្លារ។ដោយសារតែក្លិបមួយនេះមិនទាន់មានគម្រោងចូលរួមក្នុងលីកកំពូលកម្ពុជានៅឡើយនោះ ទើបក្លិបមានគម្រោងនឹងដាក់កីឡដ្ឋានមួយនេះនៅក្នុងការចរចាជួលឱ្យអង្គរថាយហ្គើរ ដែលជាក្លិបបាល់ទាត់ដែលលេងនៅក្នុងលីកកំពូលរបស់កម្ពុជា និងមានមូលដ្ឋាននៅខេត្តសៀមរាបនេះស្រាប់ដើម្បីយកមកធ្វើជាទឹកដីរបស់ពួកគេ៕

August 7, 2019

ការបង្ហាញម៉ូដនាឡិកាម៉ាក G-Shock លេខ 134

August 7, 2019

Author: ធឿន មករា