ធឿន មករា - La Reine Media

“វាលផ្កា ថេមបូ ឈិគិសៃណូ អូកៈ” ផ្ទាំងទស្សនីយភាពដែលលាតសន្ធឹងពេញកោះហុកកៃដូ

ថ្ងៃនេះ ឡារ៉ែន សូមណែនាំរដូវកាលដ៏ល្អបំផុតក្នុងការទស្សនាមន្តស្នេហ៍របស់ ; “វាលផ្កា ថេមបូឈិគិសៃណូ អូកៈ” ផ្ទាំងទស្សនីយភាពដែលលាតសន្ធឹងទូទាំងតំបន់ ប៊ិអេយ៍ កោះហុកកៃដូ។ ក្នុងរដូវក្ដៅ បណ្ដាបុប្ផាចម្រុះពណ៌នឹងរីកស្គុះស្គាយឡើង បង្កើតបានជាផ្ទាំងទស្សនីយភាពដ៏អស្ចារ្យពេញកែវភ្នែក ដែលជះពន្លឺពណ៌ឥន្ធនូ ធ្វើឱ្យបេះដូងរបស់អ្នកទេសចរញាប់ញ័ររញ្ជួយយ៉ាងពិតប្រាកដ…។

“វាលផ្កា ថេមបូ ឈិគិសៃណូ អូកៈ” ស្ថិតនៅក្នុងតំបន់ប៊ិអេយ៍ ស្រុកខាមិខាវៈ ខេត្តហុកកៃដូ។ក្នុងអំឡុង “ហ្គ្រីន ស៊ីហ្សិន” តាំងពីចុងខែមេសា ដល់ខែតុលា នឹងមានវាលផ្កា ធីវលីប ប៉ប់ពីឈូករ័ត្ន ខូស្មស់ និងផ្សេងៗទៀតរួមជាង 30ប្រភេទ គ្របដណ្ដប់ទូទាំងជួរភ្នំ ប្រៀបដូចជាកម្រាលព្រំចម្រុះពណ៌ដូច្នោះដែរ។

អំឡុងពេលដែលល្អបំផុតក្នុងការទៅទស្សនា “វាលផ្កា ថេមបូ ឈិគិសៃណូ អូកៈ” គឺ…
…ខែកក្កដា ដល់ខែកញ្ញា។ ទីកន្លែងដែលមានរូបសម្ផស្ស2 ក្នុងរដូវកាលហ្គ្រីន ស៊ីហ្សិន មួយនេះ អាចមើលឃើញផ្ទាំងទស្សនីយភាពដែលខុសប្លែកពីគ្នាក្នុងអំឡុងពេលនីមួយៗនៃឆ្នាំ តែអំឡុងពេលដែលភ្ញៀវទេសចរមកលម្ហែនៅទីនេះច្រើនបំផុត គឺអំឡុងពេលប្រមាណជា 3ខែ គឺខែកក្កដា សីហា និងកញ្ញាដែលជារដូវក្ដៅ(នៅប្រទេសជប៉ុន)។ ក្នុងអំឡុងពេលនេះ ជួរភ្នំដ៏ធំទូលាយនឹងត្រូវគ្របដណ្ដប់ដោយបុប្ផាជាច្រើនពណ៌ រហូតក្លាយជាវាលផ្កាពណ៌ឥន្ធនូ។

អំឡុងពេលនោះ ខែកក្កដានឹងមានទាំងផ្កាឡាវេនឌើរ បុប្ផាពណ៌ស្វាយស្រស់ស្អាតមើលទៅត្រជាក់ភ្នែក ផ្កាឈូករ័ត្នដែលបើកស្រទាប់រីកស្គុះស្គាយបង្អួតពន្លឺពីដួងព្រះអាទិត្យ និងផ្កាស្បៃរឿងពណ៌លឿងស្រស់មូលៗគួរឱ្យស្រឡាញ់ និងនៅមានផ្កាជាច្រើនប្រភេទទៀតរង់ចាំស្វាគមន៍លោកអ្នក។

ទស្សនីយភាពដែលត្រូវតុបតែងបន្ថែមពណ៌ដោយបុប្ផាដ៏ច្រើន រហូតហាក់ដូចជាពិធីបុណ្យតផ្ទាំងក្រណាត់ចម្រុះពណ៌ជាខ្សែវែងនេះ គឺជាភាពស្រស់ស្អាតដែលធ្វើឱ្យលោកអ្នកចង់តែលើកកាមេរ៉ាឡើងផ្ដិតយករូបភាពទាំងនោះដោយមិនចាំបាច់គិតអ្វីច្រើនឡើយ និងថែមទាំងជាផ្ទាំងទស្សនីយភាពដែលទោះជាលោកអ្នកទៅថតពីត្រង់ណា ក៏នៅតែចេញមកដូចជារូបគំនូរដែរ ទើបធ្វើឱ្យអ្នកទេសចរចំនួនដ៏ច្រើនបានមកទស្សនាទីនេះរៀងរាល់ឆ្នាំ។

ដើមផ្កាទាំងអស់នោះត្រូវបានដាំដោយភាពចំណានដើម្បីឱ្យវារីកឡើងដំណាលៗគ្នារហូតកើតចេញជាផ្ទាំងទស្សនីយភាពដ៏ស្រស់ស្អាត ដែលទោះជាស្ថិតក្នុងអំឡុងពេលចុងរដូវក្ដៅក៏ដោយ តែក៏យើងនៅតែអាចបានទស្សនាវាលផ្កាដ៏ស្រស់ស្អាតទាំងនោះបានដែរ។ ក្រោយពីផុតខែកក្កដាដែលតុបតែងដោយបុប្ផាចម្រុះពណ៌ហើយ ចាប់ពីខែកញ្ញាដែលកំពុងជិតត្រឡប់ចូលទៅដល់រដូវស្លឹកឈើជ្រុះនោះ ក៏នឹងមានផ្កា អាណេម៉ូណេជប៉ុន និងផ្កាខាលីហ្វ័រនៀប៉ុបពីឱ្យយើងបានទស្សនាវិញម្ដង ហើយជួរភ្នំទាំងនោះក៏នឹងត្រូវជ្រលក់ដោយបុប្ផាពណ៌ចម្រុះដែលចូលគ្នាយ៉ាងគួរឱ្យស្ងើចសរសើរ។

នៅក្នុងតំបន់ប៊ិអេយ៍ ហុកកៃដូនេះក៏នៅមានមណ្ឌលទេសចរណ៍ផ្សេងៗទៀត ដូចជា “បឹងពណ៌ផ្ទៃមេឃ” ដែលមានទឹកពណ៌ផ្ទៃមេឃហាក់ដូចជាទិដ្ឋភាពបន្លំភ្នែក និង “កសិដ្ឋានថូមិតៈ” ដែលជាវាលផ្កាឡាវេនឌើរដែលមានឈ្មោះល្បីនៅក្នុងប្រទេសផងដែរ។ នៅក្នុងឆ្នាំ2019 នេះ ហ្គ្រីន ស៊ីហ្សឹននឹងចាប់ផ្ដើមតាំងពីខែមិថុនា រហូតដល់ខែកញ្ញា ចំណែកឯតម្លៃចូលទស្សនាវិញភាគច្រើន គឺមិនមានបង់ថ្លៃទេ តែមានការបរិច្ចាគតាមសទ្ធា ដើម្បីទុកជាការមើលថែទាំ និងថែរក្សាវាលបុប្ផាដ៏សែនស្អាតនេះ និងថ្លៃសេវាយានជំនិះដែលដឹកអ្នកទេសចរដើរទស្សនាកម្សាន្តបន្តិចបន្តួចប៉ុណ្ណោះ៕

August 16, 2019

កម្ពុជាកំពុងជំរុញឱ្យមានការវិនិយោគបន្ថែមលើវិស័យកសិកម្មដើម្បីនាំចេញ

កសិកម្ម ជាវិស័យយុទ្ធសាស្ត្រដ៏សំខាន់មួយក្នុងសេដ្ឋកិច្ចកម្ពុជា បើទោះបីជាបច្ចុប្បន្ននេះ ឧស្សាហកម្ម និងសេវាកម្មបានចូលរួមចំណែកក្នុងការរកប្រភពចំណូលច្រើនសម្រាប់ថវិកាជាតិជារៀងរាល់ឆ្នាំក៏ដោយ។

ស្របពេលដែលវិស័យកសិកម្មនៅតែមានសារៈសំខាន់សម្រាប់កម្ពុជា ថ្មីៗនេះរដ្ឋមន្ត្រីក្រសួងពាណិជ្ជកម្ម ឯកឧត្តម ប៉ាន សូរស័ក្តិ បានខិតខំប្រឹងប្រែងក្នុងការស្វែងរកការវិនិយោគបន្ថែមពីប្រទេសដៃគូសំខាន់ៗលើការកែច្នៃផលិតផលកសិកម្មរបស់កម្ពុជា ដើម្បីនាំចេញទៅកាន់ទីផ្សារអន្តរជាតិ។

នៅក្នុងជំនួបជាមួយមន្ត្រីទទួលបន្ទុកសេដ្ឋកិច្ច និងពាណិជ្ជកម្ម អមស្ថានទូតចិនប្រចាំនៅកម្ពុជា ឯកឧត្តម ប៉ាន សូរស័ក្តិ បានលើកឡើងថា កម្ពុជាចង់បានការវិនិយោគបន្ថែមពីប្រទេសចិន លើឧស្សាហកម្មកែច្នៃ និងវេចខ្ចប់ផលិតផលកសិកម្ម ដើម្បីធ្វើពិពិធកម្មការនាំចេញទៅកាន់ទីផ្សារអន្តរជាតិ ដោយសារកម្ពុជាមានផលិតផលកសិកម្មមិនទាន់កែច្នៃច្រើន ដូចជាផ្លែស្វាយកំពង់ស្ពឺ ផ្លែមៀនប៉ៃលិន និងផ្លែឈើហូបផ្លែជាច្រើនផ្សេងទៀត។ ឯកឧត្តមបន្ថែមថា ក្រសួងពាណិជ្ជកម្មកំពុងជំរុញឱ្យមានការនាំចេញផលិតផលទៅកាន់តែទីផ្សារចិន តាមរយៈការចូលរួមព្រឹត្តិការណ៍នានា និងការបង្ហាញតាមមជ្ឈមណ្ឌលពាណិជ្ជកម្មកម្ពុជា នៅប្រទេសចិន។

រដ្ឋមន្ត្រីក្រសួងពាណិជ្ជកម្ម ក៏បានស្នើសុំឱ្យភាគីចិនជួយសម្រួលដល់ការនាំចេញផលិតផលកសិកម្មខ្មែរ និងជួយកៀងគរក្រុមហ៊ុនចិន ដែលមានឯកទេសច្បាស់លាស់មកវិនិយោគបន្ថែមនៅក្នុងប្រទេសកម្ពុជា ដើម្បីបន្តពង្រឹងទំនាក់ទំនងពាណិជ្ជកម្ម និងការវិនិយោគទ្វេភាគី។ លើសពីនេះទៅទៀត ក្រសួងនឹងបន្តសហការជាមួយគ្នាក្នុងវិស័យពាណិជ្ជកម្មអេឡិចត្រូនិក (e-commerce) ដើម្បីជំរុញការលក់ និងនាំចេញផលិតផលខ្មែរទៅកាន់ទីផ្សារអន្តរជាតិកាន់តែប្រសើរឡើង។

ស្របពេលជាមួយគ្នានេះដែរ ថ្មីៗនេះរដ្ឋមន្ត្រីក្រសួងកសិកម្មក៏បានជំរុញឱ្យប្រទេសបេឡារុសពិនិត្យលទ្ធភាពក្នុងការវិនិយោគលើការកែច្នៃ និងនាំចេញផលិតផលរបស់កម្ពុជាទៅបរទេសផងដែរ។

ក្នុងនោះឯកឧត្តម វេង សាខុន រដ្ឋមន្ត្រីក្រសួងកសិកម្មបានលើកឡើងថា ប្រទេសបេឡារុសជាប្រទេសដែលបានផ្គត់ផ្គង់គ្រឿងយន្តកសិកម្មមកប្រជាពលរដ្ឋកម្ពុជា ហេតុនេះយើងចង់ឱ្យប្រទេសនេះពិនិត្យលទ្ធភាពបន្ថែមដើម្បីវិនិយោគឱ្យកាន់តែធំលើការកែច្នៃផលិតផលកសិកម្មសម្រាប់នាំចេញ។

ឯកឧត្តម វេង សាខុន បានមានប្រសាសន៍ថា៖ “កម្ពុជាបានវិវឌ្ឍពីការប្រើប្រាស់កម្លាំងអូសទាញដោយគោក្របី មកការប្រើប្រាស់គ្រឿងយន្តបានជាង 97%ទៅហើយ នេះគឺជាយន្តការអាទិភាព ក្នុងការលើកកម្ពស់ទំនើបកម្មកសិកម្ម និងយន្តការពាណិជ្ជកម្ម-កសិកម្មនៃយុទ្ធសាស្ត្រអភិវឌ្ឍន៍វិស័យកសិកម្មរបស់ក្រសួង”។

រដ្ឋមន្ត្រីក្រសួងកសិកម្ម រុក្ខា ប្រមាញ់ និងនេសាទ ចង់ជំរុញឱ្យប្រទេសបេឡារុស បង្កើនការផ្គត់ផ្គង់បន្ថែមនូវគ្រឿងយន្តទំនើបៗផ្នែកកសិកម្មដើម្បីធ្វើការប្រមូលផល និងជំរុញឱ្យការធ្វើកសិកម្មកាន់តែមានប្រសិទ្ធភាពខ្ពស់ដើម្បីឆ្លើយតបជាមួយតម្រូវការសម្រាប់ការនាំចេញ។

គួរបញ្ជាក់ផងដែរថា បើយោងតាមប្រសាសន៍រដ្ឋមន្ត្រីក្រសួងកសិកម្ម រុក្ខា ប្រមាញ់ និងនេសាទកាលពីដំណាច់ខែមីនា ឆ្នាំ2019 បានបង្ហាញថា រយៈពេល 3ខែដើមឆ្នាំ2019 នេះ កម្ពុជាបាននាំចេញផលិតផលកសិកម្មសរុបជាផ្លូវការប្រមាណ1.4លានតោន។ ដោយឡែកការផ្គត់ផ្គង់បន្លែស្រស់ទៅកាន់ទីផ្សារអឺរ៉ុបមានប្រមាណជាង 50តោន។ បច្ចុប្បន្នទីផ្សារនាំចេញផលិតផលកសិកម្មសំខាន់ៗរបស់កម្ពុជា រួមមានប្រទេសបារាំងមានប្រមាណ 40% ចិនមានប្រមាណ 40% រួមទាំងទីផ្សារអឺរ៉ុប និងទីផ្សារប្រទេសក្នុងតំបន់អាស៊ានផងដែរ។ ចំណែកឯការនាំចេញចេកអំបូងលឿងពីកម្ពុជាដោយផ្ទាល់ទៅកាន់ទីផ្សារប្រទេសចិន បានចាប់ផ្ដើមជាផ្លូវការកាលពីខែមករា ឆ្នាំ2019 ក្រោយកម្ពុជា និងចិនបានចុះកិច្ចព្រមព្រៀងលើពិធីសារមួយដែលធ្វើឱ្យអាចនាំចេញទៅកាន់ប្រទេសចិនបាន ដោយប្រទេសចិនបានអនុញ្ញាតឱ្យកម្ពុជានាំចេញផ្លែចេក 30ម៉ឺនតោនក្នុង 1ឆ្នាំ៕

August 15, 2019

ព្រះមហាក្សត្រចេញព្រះរាជក្រឹត្យផ្ដល់គោរមងា «ឧកញ៉ា» ដល់លោក នួន អក

ភ្នំពេញ)៖ ព្រះករុណា ព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា បានចេញព្រះរាជក្រឹត្យត្រាស់បង្គាប់ ផ្ដល់គោមងារដល់លោក នួន អក ជា «ឧកញ៉ា»។ នេះបើតាមព្រះរាជក្រឹត្យ ដែលបណ្ដាញព័ត៌មាន Fresh News ទទួលបាននៅព្រឹកថ្ងៃទី១៥ ខែសីហា ឆ្នាំ២០១៩នេះ។

លោក នួន អក ដែលជាសហគ្រិនវ័យក្មេងមួយរូប ហើយក៏ជាគ្រូបណ្ដុះបណ្ដាលពាក់ព័ន្ធទៅនឹងការផ្លាស់ប្ដូរផ្នត់គំនិត និងភាពជោគជ័យក្នុងការធ្វើជំនួញ។

លោកឧកញ៉ាវ័យក្មេង នួន អក ក៏ជាឪពុកធម៌ និងកំពុងជួយឧបត្ថម្ភដល់មជ្ឈមណ្ឌលកុមារកំព្រាមួយកន្លែង ស្ថិតនៅក្នុងខេត្តកំពង់ស្ពឺ ដែលមានឈ្មោះថា «នួនអក ព្រៃជុំ» សម្រាប់រយះពេល២០ឆ្នាំ ដែលចិញ្ចឹមបីបាច់ថែរក្សាក្មេងៗកំព្រាចំនួន៥០នាក់។ លើសពីនេះទៅទៀត លោកក៏បាននឹងកំពុងរួមសហការជាមួយលោកស្រី ហ៊ុន ស៊ីណាតក្នុងការជួយឧបត្ថម្ភ ដល់មជ្ឈមណ្ឌលកុមារកំព្រា ខេត្តសៀមរាបផងដែរ៕

August 15, 2019

ស្របពេលច្បាប់អនុម័តក្រុមហ៊ុនក្នុងស្រុកវិនិយោគលើដំណាំឫស្សី នឹងអាចផ្គត់ផ្គង់លើទីផ្សារបាន

ដោយសារនៅក្នុងប្រទេសកម្ពុជាសម្បូរទៅដោយដើមឫស្សី និងបច្ចុប្បន្នកសិករបាននាំគ្នាដាំដើមឫស្សីជាលក្ខណៈអាជីវកម្មច្រើននោះ កាលពីខែឧសភា ឆ្នាំ2019 ឯកឧត្តម វេង សាខុន បានជួបជាមួយលោកស្រី Jiang Zehui សហប្រធានក្រុមប្រឹក្សាភិបាលនៃអង្គការអន្តរជាតិឫស្សី និងផ្តៅ ដើម្បីពិភាក្សាពីកិច្ចសហប្រតិបត្តិការ និងការចូលរួមជាសមាជិកនៃអង្គការមួយនេះ។

អង្គការបណ្ដាញអន្តរជាតិសម្រាប់ឫស្សី និងផ្ដៅ បានបង្កើតឡើងឆ្នាំ1999 ដោយមានសន្ធិសញ្ញាតម្កល់ទុកនៅអង្គការសហប្រជាជាតិ។អង្គការឬស្សី និងផ្តៅអន្តរជាតិ ហៅកាត់ថា អុីនបារINBAR ឬ International Network for Bamboo and Rattan) ដែលមានការិយាល័យកណ្តាលនៅប្រទេសចិន គឺជាអង្គការអភិវឌ្ឍន៍ពហុភាគីមួយដែលលើកកម្ពស់ការអភិវឌ្ឍប្រកបដោយនិរន្តរភាពបរិស្ថានដោយប្រើប្រាស់ដើមឫស្សី និងផ្តៅ។

យោងតាមសេចក្តីថ្លែងការណ៍របស់ INBAR បានឱ្យដឹងថា ការជួញដូរឬស្សី និងផ្តៅទៅអន្តរជាតិ មានតម្លៃជិត 2ពាន់លានដុល្លារក្នុង 1ឆ្នាំ។ INBAR បានឱ្យដឹងទៀតថា ឫស្សី និងផ្តៅ ជាផលិតផលព្រៃ មិនមែនជាឈើ មានតម្លៃបំផុតក្នុងពិភពលោកនាពេលបច្ចុប្បន្ននេះ ហើយជាសក្តានុពលតែមួយគត់ដើម្បីប្រយុទ្ធប្រឆាំងនឹងភាពក្រីក្រ ព្រមទាំងបញ្ហាប្រឈមនៃបាត់បង់ធនធានធម្មជាតិ និងផ្តល់ភាពប្រសើរឡើងនូវជីវភាពរស់នៅដល់ប្រជាជនរាប់លាននាក់នៅទូទាំងពិភពលោក។

ឯកឧត្តម វេង សុខុនរដ្ឋមន្ត្រីកសិកម្ម រុក្ខាប្រមាញ់ និងនេសាទ បានមានប្រសាសន៍ថា ចំពោះការចូលជាសមាជិកនៃអង្គការបណ្តាញអន្ដរជាតិ ឫស្សី និងផ្ដៅ កម្ពុជានឹងទទួលបានអត្ថប្រយោជន៍ជាច្រើន។

ទី1- បានស្វែងយល់អំពីដំណើរការវិវឌ្ឍនៃការដាំដុះដើមឫស្សីថា តើមានអត្ថប្រយោជន៍បែបណាទៅដល់ការធ្វើពាណិជ្ជកម្មនៅក្នុងតំបន់ ឬក៏ឆ្លើយតបទៅតាមទីផ្សារពិភពលោក។ ;ទី2-ការកសាងសមត្ថភាពរបស់មន្ដ្រីរបស់យើង ដែលពាក់ព័ន្ធទៅនឹងការដាំដុះឫស្សី ជាពិសេសរដ្ឋបាលព្រៃឈើ។ ;ទី3-ការដាំដុះឫស្សីនេះ ទាញអត្ថប្រយោជន៍សំខាន់ទៅដល់ការថែទាំបរិស្ថានបៃតងរបស់កម្ពុជាដែលមាននិរន្ដរភាពល្អប្រសើរ។

បន្ទាប់ពីជំនួបរវាងឯកឧត្ដម វេង សាខុន រដ្ឋមន្ត្រីក្រសួងកសិកម្មរក្ខា ប្រមាញ់ និងនេសាទ ជាមួយអង្គការឬស្សី និងផ្តៅអន្តរជាតិ រួចមក ក្រុមហ៊ុនក្នុងស្រុកមួយបានប្រកាសថា ខ្លួនគ្រោងនឹងពង្រីកការដាំឫស្សីលើផ្ទៃដី 1ម៉ឺនហិកតា នៅឃុំប្រធាតុ ស្រុកអូររាំងឱ ខេត្តត្បូងឃ្មុំ ហើយនឹងបង្កើតរោងចក្រកែច្នៃ ដោយប្រើវត្ថុធាតុដើមពីដើមឫស្សី និងផ្តៅ ដើម្បីផលិតជាសម្ភារ និងគ្រឿងសង្ហារិម សម្រាប់ផ្គត់ផ្គង់នឹងតម្រូវការទីផ្សារក្នុងស្រុក និងអន្តរជាតិផងដែរ។

ក្រុមហ៊ុន អាន ម៉ាឌី គ្រុប បានចេញសេចក្តីប្រកាសមួយបញ្ជាក់អំពីគម្រោងការដែលក្រុមហ៊ុនមាន ដែលប្រកាសនេះបានធ្វើឡើងប៉ុន្មានថ្ងៃតែប៉ុណ្ណោះ បន្ទាប់ពីព្រឹទ្ធសភាបានចេញសេចក្តីប្រកាសមួយបង្កើតបណ្តាញអន្តរជាតិសម្រាប់ឫស្សី និងផ្តៅក្រោយពីបានអនុម័តច្បាប់ដែលបានបញ្ជូនមកពីរដ្ឋសភាជាតិ។

លោកឧកញ៉ា អាន ម៉ាឌី ប្រធានក្រុមប្រឹក្សានាយក បានមានប្រសាសន៍ថា៖“ក្រុមហ៊ុនដំបូងឡើយ បានធ្វើការដាំដុះលើផ្ទៃដីតែ 25ហិកតាប៉ុណ្ណោះ។ លោកបានបន្ថែមថា ដីចម្ការនេះនឹងពង្រីករហូតដល់ 1ម៉ឺនហិកតាដើម្បីដាំឫស្សី និងផ្តៅ ព្រោះទិន្នផលវាមានសក្តានុពលយ៉ាងខ្លាំងនៅក្នុងទីផ្សារជាសកល”។

“ហេតុនេះហើយទើបក្រុមហ៊ុនមានគម្រោងបង្កើតរោងចក្រកែច្នៃមួយ ដើម្បីផលិតសម្ភារតុបតែង និងគ្រឿងសង្ហារិមផងដែរ”។ នេះបើយោងតាមប្រសាសន៍លោកឧកញ៉ា អាន ម៉ាឌី ដែលបានបញ្ជាក់ប្រាប់រដ្ឋមន្ត្រីក្រសួងកសិកម្មក្នុងអំឡុងពេលដំណើរទស្សនកិច្ចរបស់លោកនៅក្នុងចម្ការឫស្សីរបស់ក្រុមហ៊ុន។លោកឧកញ៉ា លឹម ហេង អនុប្រធានក្រុមហ៊ុនអាន ម៉ាឌី បានបញ្ជាក់ប្រាប់ឡារ៉ែនពាណិជ្ជថា៖“ការដាំដុះដើមឫស្សី គឺយើងប្រមូលផលរហូត។ នៅពេលដែលយើងដាំដុះបានរយៈពេល 4ឆ្នាំយើងនឹងទទួលបានផល(ដើមឬស្សីចាប់ផ្តើមចាស់ដែលអាចយកទៅប្រើការបាន)ជាបន្ដបន្ទាប់”។

លោកឧកញ៉ាបានបន្ថែមថា៖“បច្ចុប្បន្ននេះ ដើមឫស្សីត្រូវបានគេយកទៅកែច្នៃជាសម្ភារ និងគ្រឿងសង្ហារិម ។ ឫស្សីភាគច្រើន គឺដុះនៅក្នុងតំបន់សើម ហើយវាក៏មានលទ្ធភាពដុះនៅតំបន់ដែលដីមានសំណើម និងនៅជើងភ្នំ។ ក្រុមហ៊ុនខ្ញុំ បាននាំចេញគំរូដើមឬស្សីសម្រាប់កែច្នៃទៅប្រទេសម៉ាឡេស៊ីរួចហើយ ដោយក្រុមហ៊ុនខ្ញុំមានចម្ការឬស្សីនៅខេត្តរតនគីរី 2-3ពាន់ហិកតាដែរ សម្រាប់ការនាំចេញនេះ និងបានធ្វើការដាំឬស្សីនៅតាមខេត្តផ្សេងទៀតជាច្រើន”។

លោកឧកញ៉ាបានបញ្ជាក់ថា៖“ចំពោះគុណភាពដើមឬស្សីរបស់ខ្មែរយើងនេះ ក្រុមហ៊ុនគ្រឿងសង្ហារិមលំដាប់ពិភពលោក បានទទួលស្គាល់នូវគុណភាពថា មានសាច់ក្រាស់ ស្វិតល្អ អាចទទួលយកបានក្នុងការកែច្នៃជាគ្រឿងសង្ហារិម ព្រោះជាការកាត់បន្ថយការប្រើប្រាស់ឈើ ដើម្បីកុំឱ្យមានបទល្មើសព្រៃឈើ ដោយងាកមកប្រើប្រាស់ដើមឬស្សីវិញ”។

លោកឧកញ៉ា លឹម ហេង បានបញ្ជាក់ទៀតថា៖“ដោយសារយើងពុំទាន់មានតួលេខក្នុងស្រុកយើងអំពីចំនួននៃការប្រើប្រាស់ដើមឬស្សីទេ និងពិបាកក្នុងការប៉ាន់ស្មាន។ បើយើងមានផលិតផល យើងលក់ជាក់ស្តែងទើបអាចប៉ាន់ស្មានបាន ព្រោះនិរន្តរភាពនៃការផ្គត់ផ្គង់ឬស្សី និងផ្តៅនេះ មិនទាន់មានស្ថិរភាពទេ ព្រោះមាននៅពលរដ្ឋ និងសហគមន៍ខ្លះ តួលេខនៅរាយប៉ាយ យើងមិនទាន់មានរបាយការណ៍ច្បាស់លាស់នៅឡើយ។ តែខ្ញុំសង្ឃឹមថា ប្រសិនបើមានដំណើរការ នៅថ្ងៃខាងមុខការផ្គត់ផ្គង់ឬស្សី នឹងគ្រប់គ្រាន់សម្រាប់ទីផ្សារក្នុងស្រុក”។ជារួមគម្រោងវិនិយោគនេះ គឺកំពុងឆ្លើយតបទៅនឹងគោលនយោបាយនៃការអភិវឌ្ឍវិស័យកសិកម្មឆ្នាំ 2019-2023 និងជាពិសេសចូលរួមយ៉ាងសកម្មក្នុងការអនុវត្តច្បាប់ស្តីពី ;“ការបង្កើតអង្គការបណ្តាញអន្តរជាតិសម្រាប់ឫស្សី និងផ្តៅ”។ ម្យ៉ាងវិញទៀតគម្រោងនេះ នឹងចូលរួមអភិវឌ្ឍធនធានឫស្សី ប្រកបដោយនិរន្តរភាព ទាញប្រយោជន៍ សម្រាប់សង្គម សេដ្ឋកិច្ច បរិស្ថានបៃតង និងបង្កើតគម្របព្រៃឈើផងដែរ៕

ចំណែកលោក សុវណ្ណ ពិសិដ្ឋ នាយកប្រតិបត្តិសមាគមផ្ដៅកម្ពុជា បានឱ្យដឹងថាសមាគមលោកមានសមាជិក និងបណ្ដាញ ទាំងសិប្បកម្មកែច្នៃ សហ-គមន៍តាមមូលដ្ឋាន និងដៃគូសហការជាអង្គការអន្តរជាតិជាដើម។ លោកប្រាប់ថា ពីមុនសមាគមនេះគ្របដណ្ដាប់6ខេត្ត តែដោយសារខ្វះថវិកាសមាគមនេះបានចងក្រងសហគមន៍តែនៅខេត្តចំនួន3ប៉ុណ្ណោះ ដែលរួមមានខេត្តកោះកុង ព្រះសីហនុ និងខេត្តកំពត។

លោក សុវណ្ណ ពិសិដ្ឋ អះអាងថា សមាគមមានបច្ចេកទេស យកផលពីអនុផលឫស្សី ផ្ដៅ ដើម្បីធានានិរន្តរភាពរបស់វាមិនឱ្យបាត់បង់។ បណ្ដាញសហគមន៍ក្នុង3ខេត្តនេះ មានវិសាលភាពលើផ្ទៃដីជាង8ពាន់ហិកតា ដែលអាចទទួលផលឫស្សី ផ្ដៅ ប្រមាណជាង3000តោនក្នុង1ឆ្នាំ តែសមាគមទើបតែអាចទាញផលបាន 300តោនក្នុង1ឆ្នាំប៉ុណ្ណោះ។ សូមជម្រាបដែរថា យោងតាមសេចក្តីប្រកាសរបស់ព្រឹទ្ធសភា ដីប្រហែល4ម៉ឺនហិកតានឹងត្រូវផ្តល់ជូនដើម្បីលើកទឹកចិត្តកសិករឱ្យដាំ និងកែច្នៃឫស្សី និងផ្តៅ ហើយនឹងបង្កើតបណ្តាញទីផ្សារអន្ដរជាតិមួយ សម្រាប់លក់ផលិតផលរបស់ពួកគេ។

សេចក្តីប្រកាសព័ត៌មានរបស់ព្រឹទ្ធសភាបាននិយាយថា ការផ្ដួចផ្ដើមនេះគឺសំដៅផ្សព្វផ្សាយឱ្យមានការដាំដុះឫស្សី និងផ្តៅ និងការកែច្នៃនៅកម្ពុជាហើយរដ្ឋាភិបាលនឹងសហការជាមួយនឹងអង្គការក្រៅរដ្ឋាភិបាលអន្តរជាតិ ដើម្បីធានាបាននូវភាពជោគជ័យ។សេចក្តីថ្លែងការណ៍បានបញ្ជាក់ថា ការផ្តល់ដីសម្បទាន និងយន្តការទីផ្សារនឹងធ្វើឱ្យប្រសើរឡើងនូវជីវភាពរបស់កសិករ និងជួយអភិរក្សដើមឈើ និងព្រៃឈើ៕

August 15, 2019

អ្នកជំនាញ៖ ការវិនិយោគលើអចលនទ្រព្យឱ្យទទួលបានប្រាក់ចំណេញមិនមែនជារឿងងាយស្រួល

អ្នកជំនាញវិស័យអចលនទ្រព្យនៅកម្ពុជាបានរួមគ្នាចែករំលែកបទពិសោធអំពីប្រធានបទ“ការវិនិយោគលើវិស័យអចលនទ្រព្យប្រកបដោយប្រសិទ្ធភាព និងទទួលបានប្រាក់ចំណេញ” ដែលការចែករំលែកបទពិសោធអំពីអ្នកជំនាញទាំងនេះបានធ្វើឱ្យអ្នកចូលរួមប្រឡូកក្នុងវិស័យអចលនទ្រព្យ យល់ថា ការវិនិយោគលើអចលនទ្រព្យមិនមែនជាការងាយទេដើម្បីត្រូវការទទួលបាននូវជោគជ័យនោះ។

លោក ម៉ាន់ ច័ន្ទឌី អគ្គនាយកក្រុមហ៊ុន Premium Housing Co., Ltd បានធ្វើបទបង្ហាញអំពី របៀបប្រើប្រាស់ទុនវិនិយោគក្នុងវិស័យអចលនវត្ថុ ដោយលោកបានលើកបង្ហាញពីកត្តាមួយចំនួន ដែលអ្នកប្រឡូកក្នុងវិស័យនេះគួរធ្វើ ដោយត្រូវប្រើប្រាស់ទុនបែបណាដើម្បីឱ្យទទួលបានផលចំណេញ និងធ្វើការរកស៊ីបានយូរអង្វែង។

លោកបានបន្ដថា៖“ការវិនិយោគលើអចលនទ្រព្យ ឱ្យទទួលបានប្រាក់ចំណេញមិនមែនជារឿងងាយស្រួលនោះឡើយ។ គឺត្រូវបែងចែកប្រភេទវិនិយោគរួមមាន៖ ការផ្ដោតការវិនិយោគជាចម្បងលើអចលនទ្រព្យប្រភេទផ្ទះដែលជាអចលនទ្រព្យមានតម្រូវការកើនឡើងគ្រប់ពេល។ អាចខ្ចីប្រាក់ពីធនាគារមកធ្វើការវិនិយោគបានច្រើន និងការប្រាក់ទាប ហើយអចលនទ្រព្យប្រភេទផ្ទះនេះ អាចឱ្យយើងរកកម្រៃបានពីការជួលបន្ថែមជាដើម”។

លោកបានបញ្ជាក់ថា ដោយចាប់ផ្ដើមពីទុនវិនិយោគបន្ដិចបន្ដួចសិនមុននឹងបន្ថែមដើមទុនឱ្យកើនឡើង ជាវិធីល្អមួយដែលអាចឱ្យយើងដកស្រងបទពិសោធពីកំហុសឆ្គងក្នុងការវិនិយោគលើកក្រោយៗទៀត។ ការជ្រើសរើសផ្ទះដែលមានអ្នកជិតខាងល្អ ប្រសើរជាផ្ទះដែលមានទីតាំងល្អ វានឹងជួយឱ្យផ្ទះមានតម្លៃល្អទៅថ្ងៃក្រោយ។ ជ្រើសរើសអចលនទ្រព្យដែលមនុស្សភាគច្រើនចង់រស់នៅ និងមានតម្រូវការជួលច្រើន។

លោកក៏បានឱ្យដឹងដែរថា៖ “យើងត្រូវទិញអចលនទ្រព្យឱ្យបានក្នុងតម្លៃទាប ដែលអាចជាផ្ទះចាស់ឬម្ចាស់អចលនទ្រព្យមានបញ្ហាហិរញ្ញវត្ថុ ដោយព្យាយាមចរចាតម្លៃឱ្យបានទាបជាងទីផ្សារដើម្បីឱ្យយើងបានចំណេញតាំងពីយើងចាប់ផ្តើមទិញ និងត្រូវវិនិយោគលើអចលនទ្រព្យដែលនៅជិតយើង ព្រោះគឺជាទីតាំងយើងស្គាល់ ហើយវាងាយស្រួលស្រាវជ្រាវតម្លៃទិញ-លក់នៅកន្លែងនោះបានច្បាស់”។ ដើម្បីឱ្យប្រាកដក្នុងចិត្ត មុននឹងសម្រេចចិត្តទិញ ត្រូវអង្កេតតាមដានអចលនទ្រព្យគោលដៅគ្រប់ពេលវេលា ដើម្បីឱ្យដឹងពីអ្វីដែលបានកើនឡើងក្នុងកន្លែងនោះ ឬតំបន់នោះថាតើ នឹងមានហាងលក់ដូរកំពុងសង់ ឬក៏មានគម្រោងសាងសង់អគារខ្ពស់ដែរឬទេ? ហើយត្រូវធ្វើផែនការគ្រប់យ៉ាងឱ្យបានហ្មត់ចត់ និងដំណើរការតាមជំហានមួយៗច្បាស់លាស់មុនពេលសម្រេចចិត្ត ដោយគិតតាមក្បួនខ្នាតឱ្យបានល្អិតល្អន់ជាមុន។ យើងត្រូវគិតថាទិញយកមកធ្វើអ្វី? បានផលតបស្នងត្រឡប់មកវិញប៉ុន្មាន? សម្រាប់តម្លៃអចលនទ្រព្យទាំងនោះ ដើម្បីឱ្យមានលំហូរសាច់ប្រាក់វិជ្ជមាន”។ នេះបើតាមការបញ្ជាក់របស់លោក ម៉ាន់ ច័ន្ទឌី។

លោក សន សៀប អគ្គនាយកក្រុមហ៊ុន Key Real Estate Co.Ltd ក៏បានបង្ហាញពីការវាយតម្លៃអចលនទ្រព្យមុនពេលវិនិយោគដែរ ដោយលោកបានលើកឡើងថា៖ “មុនពេលវិនិយោគគួរមើលពីទីតាំង ទំហំ ជម្រៅ ក្បាលដី និងរូបរាងដីជាដើម ដើម្បីឱ្យការវិនិយោគមានដំណើរការល្អប្រសើរ ដោយផ្តោតទៅលើចំណុច2 គឺ៖ ទី1-រូបមន្តប្រៀបធៀប ទី2-រូបមន្តវិនិយោគ។ គឺយើងត្រូវប្រមូលព័ត៌មាន ដើម្បីឱ្យដឹងពីទីផ្សារ ដោយពិចារណាទៅលើតម្លៃណាមួយដែលសមស្របសម្រាប់យើងអាចធ្វើការវិនិយោគបាន។ ពោលគឺយើងយកមកវិភាគតាមទិន្នន័យទីផ្សារ បន្ទាប់មកគឺយើងបានតម្លៃទីផ្សារដែលយើងត្រូវយកមកធ្វើការវិនិយោគ”។ លោក សន សៀប ក៏បានបន្ថែមទៀតដែរថា៖“កត្តាដែលយើងគួរវាយតម្លៃមុនវិនិយោគ គឺ ដើម្បីឱ្យដឹងពីកត្តានៃការលក់ត្រឡប់ទៅវិញ ដោយបានមកពីការលក់ ឬជួល និងមានភាពងាយស្រួលក្នុងការទទួលបានផលចំណេញថា តើយើងត្រូវធ្វើការវិនិយោគលំនៅដ្ឋាន ខុនដូ អាផាតមិន ឬក៏ផ្ទះល្វែង ដែលការពិចារណា គឺស្ថិតនៅលើអ្នកវិនិយោគខ្លួនឯងដែលបានវិភាគទៅតាមទិន្នន័យទីផ្សារដែលបានប្រមូលមក”។

លោក ព្រាប កុល នាយកប្រតិបត្តិអង្គការតម្លាភាពកម្ពុជាបានបង្ហាញពីការកសាងទំនុកចិត្ត រវាងភ្នាក់ងារអចលនទ្រព្យ និងវិនិយោគិន ដើម្បីភាពជោគជ័យក្នុងការវិនិយោគម្រោងធំ។ គឺការកសាងទំនុកចិត្តត្រូវមានភាពស្មោះត្រង់ ត្រូវមានការធ្វើការងារជាក្រុមដើម្បីបន្ថែមនូវទំនុកចិត្តសម្រាប់ដៃគូម្ខាងទៀត ការគោរពពេលវេលា ការបង្ហាញពីទឹកដមនៃការទំនាក់ទំនងរវាងគ្នា និងការគោរពចំពោះដៃគូម្ខាងទៀតជាដើម។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ក៏បានធ្វើបទបង្ហាញពីការវិនិយោគលើវិស័យអចលទ្រព្យប្រកបដោយប្រសិទ្ធភាព និងទទួលបានប្រាក់ចំណេញខ្ពស់ផងដែរ ដោយលោកលើកឡើងថា៖ “ដើម្បីវិនិយោគលើអចលនទ្រព្យ ទទួលបានប្រាក់ចំណេញត្រូវវិនិយោគដោយមើលទៅលើស្ថានភាពផ្លូវ និងទីតាំងឱ្យសមស្របនឹងតម្រូវការជាក់ស្ដែង។

ដោយឡែក សម្រាប់ទិញដើម្បីរស់នៅ ត្រូវមើលពីភាពចូលចិត្តនៃការរស់នៅ មានន័យថា អ្នកខ្លះចូលចិត្តរស់នៅតាមដងទន្លេ ចំណែកអ្នកខ្លះទៀតចូលចិត្តរស់នៅតាមតំបន់ស៊ីវីល័យ ដូច្នេះក្នុងនាមយើងជាអ្នកលក់ គួរតែណែនាំបង្ហាញពីផលប្រយោជន៍ក្នុងតំបន់ផ្សេងគ្នាទាំងនេះ។ ដូច្នេះក្នុងនាមជាអ្នកជំនាញត្រូវយល់ឱ្យច្បាស់អំពីស្ថានភាព និងតម្រូវការរបស់អតិថិជនច្បាស់លាស់ ទើបអាចឱ្យដំណើរការនៃការលក់ទទួលបានផលល្អ និងចំណេញថវិកា”។

អ្នកជំនាញវិស័យអចលនទ្រព្យខាងលើក៏បានថ្លែងពីសកម្មភាពមួយចំនួននៅក្នុងវិស័យអចលនទ្រព្យផងដែរ ដោយលើកឡើងពីនៅការវាយតម្លៃខុសពីការពិតដែលផ្ទុយពីវិជ្ជាជីវៈ ដែលទង្វើបែបនេះអាចកើតមានចំពោះក្រុមមួយចំនួនតូចដែលបង្កកើតឡើងដោយមិនស្របច្បាប់ ឬមិនបានទទួលបានការបណ្តុះបណ្តាលជំនាញជាអ្នកអាជីពដែលករណីវាយតម្លៃអចលនវត្ថុខ្ពស់ជាងតម្លៃក្នុងទីផ្សារដើម្បីទទួលបានប្រយោជន៍ទាំងសងខាងនេះ មិនមែនមានតែក្នុងប្រទេសយើងនោះទេ នៅតាមបណ្តាប្រទេសនានាលើសកលលោកក៏ធ្លាប់កើតមានដែរ រហូតមានស្ថាប័នដែលជាក្រុមហ៊ុនជំនាញក្នុងវិស័យនេះបានចងក្រងជាក្រមសីលធម៌ និងតម្រូវឱ្យគោរពអនុវត្តទាំងអស់គ្នា។

បច្ចុប្បន្ននេះនៅកម្ពុជា មិនទាន់មានច្បាប់កំណត់ពីកម្រិតនៃការទទួលទោសពីការវាយតម្លៃអចលនទ្រព្យខុសនោះទេ គឺមានតែការបង្កើតជាច្បាប់វិជ្ជាជីវៈ និងក្រមសីលធម៌ដែលបង្កើតឡើងដោយសមាគមជំនាញដែលពាក់ព័ន្ធក្រោមការរួមគ្នាបង្កើតតែប៉ុណ្ណោះ។ ជាដំណោះស្រាយ និងអាចគេចផុតពីករណីទាំងអស់នេះ ទាំងម្ចាស់ក៏ដូចជាស្ថាប័នហិរញ្ញវត្ថុ (ធនាគារម្ចាស់បំណុល) ដែលពាក់ព័ន្ធ គួរតែស្វែងរកក្រុមហ៊ុនជំនាញ ឬភ្នាក់ងារវាយតម្លៃស្របច្បាប់ធ្វើជាដៃគូ ចៀសវាងការខាតបង់ផលប្រយោជន៍៕

August 15, 2019

វិធី 7យ៉ាង សាងភាពឆ្លាតវៃដល់កូនតាំងពីនៅក្នុងផ្ទៃ

វិធីមើលថែទាំខ្លួនក្នុងអំឡុងពេលមានគភ៌របស់អ្នកម្តាយហុចផលដល់ភាពឆ្លាតវាងវៃខាងសតិបញ្ញារបស់កូនតូចនៅក្នុងគភ៌។ ខាងក្រោមនេះគឺវិធី 7យ៉ាងក្នុងការសាងភាពឆ្លាតវៃដល់កូនតូចដែលនៅក្នុងផ្ទៃ…តើមានអ្វីខ្លះនោះសូមតាម-ដានដូចតទៅ។

1.ធ្វើអារម្មណ៍ឱ្យល្អស្រស់ស្រាយជានិច្ច : ដើម្បីឱ្យរាងកាយបានបញ្ចេញសារធាតុនៃសេចក្តីសុខចេញមក និងបញ្ជូនបន្តទៅដល់កូន ធ្វើឱ្យកូនមានការវិវឌ្ឍដែលល្អទាំងខួរក្បាល(IQ) និងអារម្មណ៍(EQ) តែបើស្ត្រីមានគភ៌មានអារម្មណ៍មួម៉ៅធុញថប់ច្រើនវិញនោះរាងកាយនឹងបញ្ចេញសារធាតុ អាឌ្រីណាលីន ជំនួសវិញ ដែលនឹងហុចផលដល់កូននៅពេលកើតមក ក្លាយជាក្មេងងង៉ក់យំរករឿងច្រើន ពិបាកចិញ្ចឹម និងមានវិវឌ្ឍនាការយឺត។

2. ទទួលទានអាហារឱ្យបានសមរម្យ : ជាពិសេសអាហារដែលសម្បូរទៅដោយអាស៊ីតខ្លាញ់មិនកក ដូចជា DHA , AA និងARA ដែលមានច្រើននៅក្នុងសាច់ត្រីសមុទ្រផ្សេងៗ ដែលជាអង្គប្រកបសំខាន់មួយរបស់សាច់ខួរក្បាលរបស់កូនដល់ទៅ 60%។

3. ហាត់ប្រាណ : ពេលស្ត្រីមានគភ៌ហាត់ប្រាណ កូននៅក្នុងផ្ទៃក៏នឹងធ្វើចលនាតាមចង្វាក់ការហាត់ប្រាណរបស់អ្នកម្តាយដែរ ដែលការធ្វើចលនានេះនឹងជួយជំរុញប្រព័ន្ធសរសៃប្រសាទរបស់កូនឱ្យវិវឌ្ឍបានល្អឡើង។

4 . អង្អែលក្បាលពោះ : នឹងជួយជំរុញប្រព័ន្ធសរសៃប្រសាទ និងខួរក្បាលផ្នែកទទួលដឹងពីអារម្មណ៍របស់កូនឱ្យមានការវិវឌ្ឍកាន់តែល្អឡើង។ ដោយទិចនិកងាយៗ គឺចូរអង្អែលក្បាលពោះខ្លួនឯងជារាងរង្វង់មូល ទៅមកពីខាងណាមុនក៏បានដែរ។

5 . និយាយលេងជាមួយកូនក្នុងគភ៌ឱ្យបានញឹកញាប់ : ប្រព័ន្ធប្រសាទការស្តាប់របស់កូននឹងចាប់ផ្តើមធ្វើការនៅពេលដែលគភ៌របស់អ្នកមានអាយុបានប្រមាណជា 5ខែ។ ការនិយាយលេងជាមួយកូនដោយសំឡេងដ៏ទន់ភ្លន់ប្រយោគដដែលៗនឹងជួយឱ្យប្រព័ន្ធសរសៃប្រសាទ និងខួរក្បាលដែលគ្រប់គ្រងការឮ នឹងវិវឌ្ឍល្អឡើង និងត្រៀមខ្លួនជាស្រេចសម្រាប់ការឮក្រោយពេលប្រសូតចេញមកហើយ។

6. ស្តាប់បទភ្លេងសប្បាយៗ : មិនថាស្ត្រីមានគភ៌ស្តាប់បទភ្លេងអ្វីក៏ដោយ កូនតូចក៏នឹងបានស្តាប់តាមនោះដែរ បើរឹតតែជាបទភ្លេងបែបសប្បាយៗ ឬបទភ្លេងក្លាស់ស៊ិកផងនោះ នឹងរឹតតែជួយជំរុញឱ្យបណ្តាញប្រព័ន្ធប្រសាទដែលធ្វើការពាក់ព័ន្ធនឹងការស្តាប់ឮរបស់កូនតូច វិវឌ្ឍកាន់តែល្អឡើង ហើយនៅពេលដែលកូនប្រសូតចេញមកនឹងមានសមត្ថភាពខាងការរៀងលំដាប់ការគិតនៅក្នុងខួរក្បាលមានអារម្មណ៍ធូរស្រាល និងចងចាំរឿងរ៉ាវផ្សេងៗបានល្អទៀតផង។

7. បញ្ចាំងភ្លើងចំក្បាលពោះ : នៅពេលដែលគភ៌មានអាយុបាន 7ខែ កូនតូចអាចប្រិចភ្នែកបានហើយ។ ការបញ្ចាំងភ្លើងចំក្បាលពោះខ្លួនឯង នឹងធ្វើឱ្យកោសិកាខួរក្បាល និងសរសៃប្រសាទផ្នែកទទួលរូបភាព និងការមើលឃើញរបស់កូនតូចមានការវិវឌ្ឍកាន់តែល្អឡើង និងត្រៀមខ្លួនជាស្រេចសម្រាប់ការមើលឃើញក្រោយពេលកើតចេញមក៕

August 15, 2019

មន្ត្រីបង្ហាញការព្រួយបារម្ភចំពោះប្រាក់កម្ចីរបស់អ្នកអភិវឌ្ឍន៍អចលនទ្រព្យ

និន្នាការកើនឡើងនៃការផ្តល់ប្រាក់កម្ចីដោយក្រុមហ៊ុនអភិវឌ្ឍន៍អចលនទ្រព្យកម្ពុជាបានទាក់ទាញចំណាប់អារម្មណ៍របស់មន្ត្រីពីធនាគារកណ្តាលរបស់ប្រទេសកម្ពុជា ធ្វើឱ្យមន្ត្រីដឹកនាំនៅទីនោះ បានជំរុញឱ្យអ្នកទិញត្រូវប្រុងប្រយ័ត្ន និងពិចារណាពីអត្រាការប្រាក់មុនពេលពួកគេចុះហត្ថលេខាលើកិច្ចព្រមព្រៀង។

លោកជំទាវ ជា សិរី អគ្គនាយិកាបច្ចេកទេសនៃធនាគារជាតិនៃកម្ពុជា បានមានប្រសាសន៍ថា៖“វិស័យអចលនទ្រព្យនៅកម្ពុជាមានការកើនឡើងយ៉ាងខ្លាំងនៅក្នុងតម្រូវការប្រាក់កម្ចីទិញផ្ទះដោយសារថា គូស្វាមីភរិយាវ័យក្មេងកាន់តែច្រើនកំពុងតែស្វែងរកកម្ចីសម្រាប់ទិញផ្ទះផ្ទាល់របស់ខ្លួន”។

លោកជំទាវបានជំរុញឱ្យអ្នកទិញអចលនទ្រព្យធ្វើការស្រាវជ្រាវដោយខ្លួនឯងមុនពេលដាក់ប្រាក់បញ្ញើ។ ព្រោះការយកប្រាក់កម្ចីដាក់បញ្ចាំដោយផ្ទាល់ពីអ្នកអភិវឌ្ឍន៍ ជាធម្មតានឹងមកជាមួយអត្រាការប្រាក់ដែលខ្ពស់ជាងធនាគារ។

លោកជំទាវបានលើកឧទាហរណ៍ពីផ្ទះល្វែងសម្រាប់ជួលនៅតំបន់បឹងកេងកង2 ដែលតម្លៃនៃការជួលមានតម្លៃ 450ដុល្លារក្នុង 1ខែ។ ជាអគារដែលមានគ្រឿងសង្ហារិមពេញលេញនេះមានទាំងផ្ទះមួយ និងមានបន្ទប់2 ជាកន្លែងដែលមានផាសុកភាព ដោយឧបករណ៍ប្រើប្រាស់ជាច្រើនត្រូវបានដាក់បញ្ចូល។ ក្នុងករណីខ្លះអ្នកអភិវឌ្ឍន៍អចលនទ្រព្យកំពុងទាក់ទាញអតិថិជនឱ្យដាក់បញ្ចាំ ឬបង់ប្រាក់ជាមុនសម្រាប់ការទិញគេហដ្ឋាន ដោយលើកលែងការបង់ប្រាក់ទាប ឬការចែងដំណឹងផ្សេងទៀត។

លោកជំទាវបានមានប្រសាសន៍ថា៖ “អ្នកអភិវឌ្ឍន៍គម្រោងមួយចំនួនមិនចង់ជួយសម្រួលដល់ប្រាក់កម្ចីរបស់ធនាគារទេ ពីព្រោះពួកគេចង់ឱ្យអ្នកទិញខ្ចីពីពួកគេ។ មានករណីខ្លះ អ្នកអភិវឌ្ឍន៍មានគោលបំណងពន្យារពេលប្រាក់កម្ចីធនាគារ ឬមិនសហការជាមួយអ្នកទិញដែលខ្ចីប្រាក់ពីធនាគារ។

អ្នកអភិវឌ្ឍន៍ខ្លះគ្រាន់តែចង់ឱ្យអ្នកទិញចិញ្ចឹមពួកគេដោយប្រើប្រាក់កម្ចីដែលមានអត្រាការប្រាក់ខ្ពស់ 18% ក្នុង 1ឆ្នាំ”។ដោយសារអ្នកអភិវឌ្ឍន៍អចលនទ្រព្យស្ថិតនៅក្រោមដែនសមត្ថកិច្ចរបស់ក្រសួងសេដ្ឋកិច្ច និងហិរញ្ញវត្ថុនៅកម្ពុជា ធនាគារជាតិនៃកម្ពុជាមិនដែលរាប់បញ្ចូលប្រាក់កម្ចីទិញផ្ទះរបស់អ្នកអភិវឌ្ឍន៍នៅក្នុងទិន្នន័យផ្តល់ប្រាក់កម្ចីផ្លូវការនោះទេ។

ប្រជាប្រិយភាពនៃប្រាក់កម្ចីហ៊ីប៉ូតែក(ប្រាក់កម្ចីបញ្ចាំ)ដែលចេញដោយអ្នកអភិវឌ្ឍន៍បានផ្ទុះឡើងនៅក្នុងប្រទេសកម្ពុជាក្នុងរយៈពេលប៉ុន្មានឆ្នាំចុង-ក្រោយនេះ។ ជាធម្មតាទាំងអស់នេះ គឺជាកិច្ចសន្យារយៈពេល 30ឆ្នាំ ហើយកម្រតម្រូវឱ្យមានការបង់រំលស់ណាស់។ ទោះបីប្រាក់កម្ចីហ៊ីប៉ូតែកទាំងនេះ ដំបូងមើលទៅគួរឱ្យចាប់អារម្មណ៍សម្រាប់អ្នកទិញក៏ដោយ តែក៏អត្រាការប្រាក់ជារឿយៗ នឹងកើនឡើងទ្វេដង ឬ 3ដងនៃតម្លៃបិទស្លាកផ្ទះ។

ទន្ទឹមនឹងនេះដែរ ធនាគាររបស់ប្រទេសកម្ពុជាជាធម្មតាតម្រូវឱ្យមានការបង់រំលស់យ៉ាងតិច 30%និងមានការត្រួតពិនិត្យរយៈពេលវែងលើប្រវត្តិឥណទាន និងសមត្ថភាពក្នុងការបង់។ ទោះយ៉ាងណាអត្រាការប្រាក់សម្រាប់ប្រាក់កម្ចីមានទ្រព្យបញ្ចាំទាំងនេះ ជាធម្មតាមានរយៈពេលប្រហែល 7% ទៅ12%។

យោងតាមទិន្នន័យចុងក្រោយរបស់ការិយាល័យក្រេឌីតខេមបូឌា (KBB) ប្រាក់កម្ចីមានទ្រព្យបញ្ចាំពីស្ថាប័នផ្តល់ប្រាក់កម្ចីទូទាំងប្រទេសមានចំនួន 3,2ពាន់លានដុល្លារនៅចុងខែមីនា។ នេះបង្ហាញពីការកើនឡើង 34% ធៀបនឹងរយៈពេលដូចគ្នាកាលពីឆ្នាំមុន។ ដោយការអនុវត្តប្រាក់កម្ចីមានទ្រព្យបញ្ចាំដែលផ្តល់ដោយស្ថាប័នហិរញ្ញវត្ថុ គឺពិតជាល្អប្រសើរនៅក្នុងទីផ្សារប្រទេសកម្ពុជា។ និន្នាការនេះកំពុងកើនឡើងក្នុងល្បឿនដូចឆ្នាំមុន ហើយស្របនឹងកំណើនឧស្សាហកម្មទូទៅ។

អ្នកជំនាញផ្នែកអចលនទ្រព្យនៅកម្ពុជាបាននិយាយថា គូស្វាមីភរិយាវណ្ណៈកណ្តាលវ័យក្មេងកំពុងតែជំរុញតម្រូវការប្រាក់កម្ចីមានទ្រព្យបញ្ចាំក្នុងប្រទេស។ ពួកគេនិយាយថា មានមនុស្សកាន់តែច្រើនចង់រស់នៅដាច់ដោយឡែកពីឪពុកម្តាយនៅពេលពួកគេធំពេញវ័យ។

ដូច្នេះធនាគារគួរពិចារណាបន្ថែមអំពីគម្រោងអភិវឌ្ឍន៍អចលនទ្រព្យដែលបានរចនាឡើង ដើម្បីរកប្រាក់ចំណូល ឬប្រាក់ចំណេញពីការលក់ ឬការជួលអចលនទ្រព្យនោះ។ ត្រូវមានការប្រុងប្រយ័ត្នច្រើននៅពេលធ្វើការជាមួយគម្រោងអភិឌ្ឍន៍អចលនទ្រព្យ។ ដោយធនាគារមានកាតព្វកិច្ចមួយចំពោះភាគទុនិក (អតិថិជនដែលតម្កល់ប្រាក់) ក្នុងការគ្រប់គ្រងហានិភ័យ ដើម្បីធានាថា ពួកគេអាចការពារពីការខាតបង់ហិរញ្ញវត្ថុ អាចរក្សាប្រាក់តម្កល់របស់អតិថិជនដោយសុវត្ថិភាព ធានាលើស្ថិរភាពនៃប្រព័ន្ធហិរញ្ញវត្ថុនិងបង្កើតប្រាក់ចំណេញ។ ដូច្នេះពួកគេអាចយកប្រាក់នោះទៅវិនិយោគ និងផ្តល់ជាភាគលាភដល់ភាគហ៊ុនិក និងបង្កើនតម្លៃភាគហ៊ុនបន្ថែមទៀត។

ទាក់ទងនឹងហានិភ័យឥណទាន អ្នកជំនាញផ្នែកអចលនទ្រព្យក៏បានលើកឡើងដែរថា គ្រប់សំណើកម្ចីឥណទានត្រូវបានសិក្សា និងត្រួតពិនិត្យដោយក្រុមអ្នកវិភាគដោយធ្វើការវិភាគវាយតម្លៃលើកម្រិតនៃហានិភ័យនៃគម្រោងនីមួយ។ នៅពេលធនាគារអនុម័តលើប្រាក់កម្ចីដល់អ្នកអភិវឌ្ឍន៍ ពួកគេគិតអំពី “ហានិភ័យ”។ ចំណែកអ្នកអភិវឌ្ឍន៍វិញ ប្រហែលជាមិនគិតច្រើនអំពីហានិភ័យនោះទេ។ អ្នកអភិវឌ្ឍន៍ជាធម្មតាគិតអំពីប្រាក់ចំណេញនៃការវិនិយោគអចលនទ្រព្យ កេរ្តិ៍ឈ្មោះ ក្រុមហ៊ុនអភិវឌ្ឍន៍ និងគម្រោង និងរូបភាព ឬចំណុចល្អៗនៃគម្រោង និងអ្នកសាងសង់តែប៉ុណ្ណោះ៕

August 14, 2019

ធនាគារជាតិ៖ ផ្នែកមីក្រូហិរញ្ញវត្ថុរក្សាបាននូវកំណើនខ្ពស់

ធនាគារជាតិនៃកម្ពុជា (NBC) បានរាយការណ៍ពីលទ្ធផលហិរញ្ញវត្ថុដ៏រឹងមាំ ដោយបានបញ្ជាក់នៅក្នុងរបាយការណ៍ចុងក្រោយរបស់ខ្លួនថា ប្រាក់កម្ចី និងកំណើនប្រាក់បញ្ញើនៅក្នុងវិស័យហិរញ្ញវត្ថុនៅកម្ពុជានៅតែមានកម្រិតខ្ពស់ក្នុងឆមាសទី 1នៃឆ្នាំនេះ ដែលជាលទ្ធផលនៃការគ្រប់គ្រងម៉ាក្រូសេដ្ឋកិច្ច និងស្ថិរភាពនយោបាយ។

របាយការណ៍របស់ធនាគារជាតិនៃកម្ពុជាបានឱ្យដឹងថា ប្រាក់កម្ចីក្នុងវិស័យធនាគារ និងមីក្រូហិរញ្ញវត្ថុបានកើនឡើងប្រហែល 22.4%នៅក្នុងឆមាសទី1 កើនឡើង 27,7ពាន់លានដុល្លារ។ តម្លៃនៃប្រាក់កម្ចីបានកើនឡើងដល់ 21,5ពាន់លានដុល្លារក្នុងវិស័យធនាគារ និង 6,2ពាន់លានដុល្លារក្នុងឧស្សាហកម្មមីក្រូហិរញ្ញវត្ថុ។

ឥណទានសរុបរបស់ធនាគារមានជាង 21ប៊ីលានដុល្លារអាមេរិក និងបានផ្តល់ទៅកាន់វិស័យ សេដ្ឋកិច្ចសំខាន់ដូចជាការជួញដូររាយ 16% ការជួញដូរដុំ11%ការខ្ចីទិញលំនៅឋានជាកម្មសិទ្ធិផ្ទាល់ ខ្លួន 10% កសិកម្ម 9% សំណង់10% តម្រូវការផ្ទាល់ខ្លួន 8% ការ-ជួញដូរអចលនទ្រព្យ 7% និងកម្មន្ត សាលកម្ម 5%។ គ្រឹះស្ថានមីក្រូហិរញ្ញវត្ថុបានផ្តល់ឥណទានសរុបមានទឹកប្រាក់ 6,2 ប៊ីលានដុល្លារអាមេរិកទៅកាន់ក្រុមគ្រួសារ 36% វិស័យកសិកម្ម20% វិស័យពាណិជ្ជកម្ម18% សេវា13% និងសំណង់ 3%។

ឯកឧត្តមជា ចាន់តូ ទេសាភិបាលធនាគារជាតិនៃកម្ពូជាបានមានប្រសាសន៍ថា វិស័យធនាគារ និងមីក្រូហិរញ្ញវត្ថុបន្តដើរតួនាទីយ៉ាងសំខាន់ និងសកម្មក្នុងការជំរុញកំណើនសេដ្ឋកិច្ច និងកាត់បន្ថយភាពក្រីក្រ និងវិសមភាព។ ការផ្តល់ជូនសេវាកម្មហិរញ្ញវត្ថុបន្តពង្រីកនៅក្នុងប្រទេស បង្កើតឱកាសកាន់តែច្រើនសម្រាប់ប្រជាជននៅទីក្រុង និងជនបទ និងលើកកម្ពស់ជីវភាពរស់នៅរបស់ពួកគេ។

ឯកឧត្តមមានប្រសាសន៍ថា៖“ ដោយសារកំណើននេះ បទប្បញ្ញត្តិនៃវិស័យនេះចាំបាច់ត្រូវពង្រឹងរួមជាមួយចំណេះដឹងផ្នែកហិរញ្ញវត្ថុ។ កត្តាម៉ាក្រូ និងមីក្រូសេដ្ឋកិច្ចទាំងអស់ត្រូវតែមាន ដើម្បីកាត់បន្ថយហានិភ័យចំពោះស្ថិរភាពហិរញ្ញវត្ថុ”។

វិស័យធនាគារបានចូលរួមចំណែក និងគាំទ្រដល់ការពង្រឹងបណ្តាញសុវត្ថិភាពហិរញ្ញវត្ថុក៏ដូចជាកិច្ចសហប្រតិបត្តិការក្នុងតំបន់។ ឧទាហរណ៍នេះគឺជាក្របខ័ណ្ឌអាស៊ាន និងអាស៊ានបូក3 (ចិន កូរ៉េខាងត្បូង និងជប៉ុន) ដែលមានគោលបំណងជំរុញការអភិវឌ្ឍវិស័យហិរញ្ញវត្ថុ និងលើកកម្ពស់ការដាក់បញ្ចូលហិរញ្ញវត្ថុ និងស្ថិរភាពហិរញ្ញវត្ថុនៅក្នុងតំបន់។

លោកបណ្ឌិត អុិន ចាន់នី នាយកប្រតិបត្តិធនាគារអេស៊ីលីដា បានឱ្យដឹងថា អេស៊ីលីដាកំពុងផ្តោតលើការជួយសហគ្រាសធុនតូច និងមធ្យមឱ្យរីកចម្រើន។

“ធនាគារអេស៊ីលីដាបាន និងកំពុងរីកចម្រើនដោយសារសកម្មភាពផ្តល់ប្រាក់កម្ចី ដើម្បីគាំទ្រសហគ្រាសធុនតូច និងមធ្យមនៅកម្ពុជា។ យើងមិនខ្វល់អំពីប្រាក់កម្ចីធំទេ។ យើងចង់ជួយអតិថិជនសហគ្រាសធុនតូច និងមធ្យមរបស់យើងឱ្យរីកចម្រើន។ ឥឡូវនេះយើងកំពុងផ្តល់ប្រាក់កម្ចីប្រហែល 6ពាន់លានដុល្លារដល់សហគ្រាសធុនតូច និងមធ្យម ហើយយើងនឹងបន្តដើរលើផ្លូវនេះ”។

ចាប់ពីខែមករា ដល់ខែមិថុនា ប្រាក់បញ្ញើនៅអេស៊ីលីដាឈានដល់ជាង4 ពាន់លានដុល្លារ ខណៈប្រាក់កម្ចីមានចំនួនលើសពី 3,5ពាន់លានដុល្លារ។ ប្រាក់ចំណេញរបស់ធនាគារបន្ទាប់ពីបង់ពន្ធប្រហែល60លានដុល្លារ។

លោកបណ្ឌិត អុិន ចាន់នី បានកត់សម្គាល់ថា ការរីកចម្រើននេះគឺជាលទ្ធផលនៃការសង្កត់ធ្ងន់ថ្មីរបស់ធនាគារទៅលើឌីជីថល និងការប្តេជ្ញាចិត្ត ក្នុងការ-អភិវឌ្ឍបច្ចេកវិទ្យាហិរញ្ញវត្ថុ ឬហិរញ្ញវត្ថុ ដែលមានសមត្ថភាពក្នុងការកែលម្អសេវាកម្ម។

លោកបានមានប្រសាសន៍ថា៖“ធនាគារ ពិតជាទទួលបានអត្ថប្រយោជន៍ពីស្ថានភាពម៉ាក្រូសេដ្ឋកិច្ចមានស្ថិរភាព ដែលអាចជួយឱ្យមានកំណើននៅក្នុងវិស័យហិរញ្ញវត្ថុ។ កាលពីឆ្នាំមុន សេដ្ឋកិច្ចប្រទេសកម្ពុជាបានកើនឡើង7.5 % ហើយនៅឆ្នាំនេះរដ្ឋាភិបាលបានព្យាករថា នឹងមានអត្រាកំណើន 7.1% ដូច្នេះវិស័យហិរញ្ញវត្ថុ និងសេដ្ឋកិច្ចនឹងបន្តកើនឡើងក្នុងល្បឿនមួយយ៉ាងលឿន”។

យោងតាមធនាគារជាតិនៃកម្ពុជា វិស័យធនាគារនិងហិរញ្ញវត្ថុបន្តរីកចម្រើនទាំងទំហំ និងវិសាលភាពដោយបច្ចុប្បន្នវិស័យធនាគារ និងស្ថាប័នមីក្រូហិរញ្ញវត្ថុរួមមាន៖ធនាគារពាណិជ្ជ44 ធនាគារឯកទេស15 គ្រឹះស្ថានមីក្រូហិរញ្ញវត្ថុទទួលប្រាក់បញ្ញើពីសាធារណជន7 គ្រឹះស្ថានមីក្រូហិរញ្ញវត្ថុ មិនទទួលប្រាក់បញ្ញើ74 ប្រតិបត្តិករឥណទានជនបទចំនួន254 ក្រុមហ៊ុនភតិសន្យាហិរញ្ញវត្ថុ15 អ្នកដំណើរការតតិយភាគី4 និងគ្រឹះស្ថានសេវាទូទាត់16។

ចំណែកទ្រព្យសកម្មសរុបនៅក្នុងវិស័យធនាគារ និងមីក្រូហិរញ្ញវត្ថុបានកើនឡើង19.2% ឈានដល់ 180ទ្រីលានរៀល ឬស្មើ 44.8ពាន់លានដុល្លារអាមេរិក ដែលគាំទ្រដោយកំណើនដើម ទុន20% កំណើនមូលនិធិកម្ចី17% និងកំណើនប្រាក់បញ្ញើអតិថិជន22%។ បច្ចុប្បន្នមានការិយាល័យធនាគារ និងមីក្រូហិរញ្ញវត្ថុចំនួន 2,367 នៅក្នុងប្រទេសកម្ពុជា និងម៉ាស៊ីនអេធីអឹមចំនួន 2,228 គ្រឿង។

លោក ចូវ សោភ័ណ្ឌ នាយកប្រតិបត្តិសមាគមមីក្រូហិរញ្ញវត្ថុមានប្រសាសន៍ថា គិតត្រឹមឆមាសទី1 ដើមឆ្នាំ2019 នេះការផ្តល់ឥណទាននៅក្នុងវិស័យមីក្រូហិរញ្ញវត្ថុជារួម មានទឹកប្រាក់ជាង 6ពាន់លានដុល្លារអាមេរិក មានកំណើនប្រមាណ16%។ អ្នកប្រើប្រាស់សេវាឥណទានមានជាង 2,1 លាននាក់ហើយប្រាក់បញ្ញើសន្សំទទួលពីអតិថិជនមានប្រមាណ2,543លានដុល្លារ មានកំណើនជាង 20%, អ្នកប្រើប្រាស់សេវាប្រាក់បញ្ញើសន្សំមានជាង 2,5លាននាក់។

កាលពីឆ្នាំ2018 ឆមាសទី1 ដូចគ្នាការផ្តល់ឥណទានមានកំណើនប្រមាណ 12% ហើយប្រាក់បញ្ញើសន្សំមានកំណើនប្រមាណ 12.83%។ ឥណទានមិនដំណើរការជាមធ្យមមានអត្រាប្រមាណជា 1% មានន័យថា អតិថិជនមានលទ្ធភាពសងត្រឡប់បានល្អ និងទៀងទាត់៕

August 14, 2019

ការបង្កើតភូតគាមអនាម័យអេឡិចត្រូនិក (E-Phyto Sysytem) កំពុងត្រូវបានធ្វើនៅកម្ពុជា

ក្រសួងកសិកម្ម រុក្ខាប្រមាញ់ និងនេសាទ បាននិងកំពុងយកចិត្តទុកដាក់ក្នុងរៀបចំបង្កើត ប្រព័ន្ធភូតគាមអនាម័យអេឡិចត្រូនិក (E-Phyto Sysytem)ដើម្បីជំរុញការធ្វើពាណិជ្ជកម្ម និងផ្តល់ភាពងាយស្រួលដល់អ្នកនាំចេញដែលត្រូវការនាំចេញផលិតផលកសិកម្ម។

វិញ្ញាបនបត្រអនាម័យ និងភូតគាមអនាម័យ (E-Phyto) ជាឯកសារចាំបាច់សម្រាប់ការនាំចេញផលិតផលកសិកម្ម ដូចជាផ្លែឈើស្រស់ បន្លែស្រស់ រុក្ខជាតិស្រស់ ត្រី សត្វរស់ និងផលិតផលកសិកម្មដទៃផ្សេងទៀតដែលតម្រូវដោយប្រទេសនាំចូល។

វិញ្ញាបនបត្រនេះបញ្ជាក់ថា ផលិតផលនាំចេញទាំងនោះគ្មានផ្ទុកសត្វល្អិតបង្កជំងឺ ឬសត្វល្អិតចង្រៃដែលអាចបំផ្លាញផលដំណាំ។ អ្នកនាំចូលត្រូវទទួលខុសត្រូវក្នុងការបំពេញទៅតាមលក្ខខណ្ឌអនាម័យនិងភូតគាមអនាម័យ។

ប្រធាននាយកដ្ឋានការពារដំណាំ អនាម័យ និងភូតគាមអនាម័យ នៃអគ្គនាយកដ្ឋានកសិកម្ម បានបញ្ជាក់ឱ្យដឹងថា៖“នៅពេលនេះសម្រាប់ការស្នើសុំការធ្វើវិញ្ញាបនបត្រអនាម័យ និងភូតគាមអនាម័យ អាចធ្វើតាមប្រព័ន្ធអនឡាញ តាមច្រកបញ្ជរជាតិតែមួយបាន។ កម្ពុជាពិតជាមានឆន្ទៈក្នុងការរៀបចំឱ្យមានប្រព័ន្ធភូតគាមអនាម័យ អេឡិចត្រូនិក(E-Phyto)នេះ ដោយអគ្គនាយកដ្ឋានកសិកម្ម ប្រឹងប្រែងសាកល្បងធ្វើការងារនេះ 2-3ឆ្នាំមកហើយដោយសម្រេចបានមួយជំហាន ស្ថិតក្នុងគម្រោងបញ្ជរជាតិតែមួយ ដែលដឹកនាំអនុវត្តន៍ដោយអគ្គនាយកដ្ឋានគយ និងរដ្ឋាករកម្ពុជា”។

លោកបណ្ឌិត កែ មុន្ធីវុធ ប្រធាននាយកដ្ឋានការពារដំណាំ អនាម័យ និងភូតគាមអនាម័យ បានបញ្ជាក់ទៀតថា៖ “ដើម្បីធ្វើឱ្យមានការប្រើប្រាស់ប្រព័ន្ធ E-Phyto ពេញលេញយើងត្រូវការរៀបប្រព័ន្ធការងារបច្ចេកទេសនិងធនធានមនុស្ស។ បច្ចុប្បន្ននេះយើងអាចធ្វើការងាររដ្ឋបាល ដោយដាក់ពាក្យស្នើសុំវិញ្ញាបនបត្រអនាម័យ និងភូតគាមអនាម័យតាមប្រព័ន្ធអនឡាញដូច្នេះយើងកំពុងតែស្វែងរកដៃគូ ដើម្បីប្រមូលធនធានបន្តធ្វើការងារនេះដែលចាំបាច់ត្រូវមានដៃគូ ហើយដៃគូដែលបានជួយយើងមានអង្គការ CAVAC និង FAO”។

លោកប្រធាននាយកដ្ឋានរូបនេះបានឱ្យដឹងទៀតថា៖ “យើងចង់ឱ្យមានការប្រើប្រាស់ប្រព័ន្ធE-Phyto នៅ 2ឆ្នាំទៀតយ៉ាងយូរ ដើម្បីឱ្យទាន់សភាពការណ៍ និងសម្រួលពាណិជ្ជកម្ម”។

យ៉ាងណាក៏ដោយលោក មុន្ធីវុធ បានលើកឡើងដែរថា បើទោះបីជាកម្ពុជាមាន E-Phyto ក៏មិនប្រាកដថា អាចសម្រួលដល់ការធ្វើពាណិជ្ជកម្ម ពេញលេញនោះបានដែរ ដរាបណាប្រទេសដែលកម្ពុជាធ្វើពា-ណិជ្ជកម្មជាមួយ បានប្រើប្រាស់ប្រព័ន្ធ E-Phyto នេះដូចគ្នា ហើយចំពោះប្រទេសដែលមិនទាន់មានប្រព័ន្ធនេះ គឺនៅតែប្រើប្រាស់ក្រដាសធម្មតាក្នុងការបំពេញទម្រង់នាំចេញនាំចូលនោះ។បើតាមលោក កែ មុន្ធីវុធ នៅក្នុងតំបន់អាស៊ាន មានតែ 2ប្រទេសប៉ុណ្ណោះ ដែលឈានមុខ មានប្រើប្រាស់នូវប្រព័ន្ធ E-Phyto គឺប្រទេសឥណ្ឌូនេស៊ី និងម៉ាឡេស៊ី។

លោក កែ មុន្ធីវុធ បានឱ្យដឹងថា ប្រព័ន្ធ E-Phyto នេះនឹងជួយរួមចំណែកដល់ការលុបបំបាត់នូវការបន្លំឯកសារដែលផ្តល់នូវទំនុកចិត្តក្នុងការធ្វើពាណិជ្ជកម្មកាន់តែខ្លាំង ក្នុងការកាត់បន្ថយពេលវេលារត់ឯកសារ និងកាត់បន្ថយបញ្ហាមួយចំនួន ដែលធ្វើឱ្យប៉ះពាល់ដល់ការប្រកួតប្រជែងក្នុងការធ្វើពាណិជ្ជកម្ម។

ដោយឡែកការត្រួតពិនិត្យសុវត្ថិភាពចំណីអាហារនេះ សម្រាប់ផលិតផលក្នុងស្រុកក៏មានការយកចិត្តទុកដាក់ខ្ពស់ដែរ ដោយមានមជ្ឈមណ្ឌលប្រមូលផ្តុំ ពិនិត្យគុណភាព និងចែកចាយបន្លែមួយថ្មីត្រូវបានដាក់សម្ពោធឱ្យប្រើប្រាស់នៅខេត្តកណ្តាល ដែលមជ្ឈមណ្ឌលនេះជាជំនួយឥតសំណងរបស់រដ្ឋាភិបាលជប៉ុនដែលមានតម្លៃជាង 10ម៉ឺនដុល្លារ។

ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានថ្លែងអំណរគុណ ចំពោះប្រជាជន និងរដ្ឋាភិបាលជប៉ុនដែលតែងតែគាំទ្រ និងជួយឧបត្ថម្ភទាំងធនធានថវិកា និងអ្នកបច្ចេកទេស ជាបន្តបន្ទាប់ចំពោះកម្ពុជា លើគ្រប់វិស័យជាប្រចាំ និងគ្រប់កាលៈទេសៈ ដែលសក្ខីភាពជាក់ស្តែង បានផ្តល់ឱកាស ដល់ប្រជាកសិករយើងកែប្រែទម្លាប់ពីការផលិតសម្រាប់បម្រើសេចក្ដីត្រូវការរបស់ខ្លួនជាការផលិតសម្រាប់ធ្វើពាណិជ្ជកម្ម និងបំពេញតម្រូវការនៃទីផ្សារ ពោលគឺពី“កសិករ ទៅជាកសិពាណិជ្ជករ”។

ឯកឧត្តមបានគូសបញ្ជាក់ថា ការប្រែប្រួលនេះក៏បានប្រែក្លាយសហគមន៍កសិកម្មទៅជាកម្លាំងចលករមួយយ៉ាងសំខាន់ ដែលនាំឱ្យមានការផ្លាស់ប្ដូរជាវិជ្ជមាននៅក្នុងសេដ្ឋកិច្ចសង្គមជនបទកម្ពុជាផងដែរ។ មួយវិញទៀតប្រជាជនកម្ពុជាក៏បានផ្លាស់ប្តូរឥរិយាបថមកបរិភោគចំណីអាហារ ដែលមានស្តង់ដាប្រកបដោយគុណភាព និងសុវត្ថិភាពខ្ពស់ ជាពិសេសផលិតផលបន្លែ និងផ្លែឈើជាដើម។

ឯកឧត្តម វេង សាខុន បានបញ្ជាក់ទៀតថា៖“មជ្ឈមណ្ឌលប្រមូលផ្តុំ ត្រួតពិនិត្យគុណភាព និងចែកចាយបន្លែនេះ គឺមានសារៈសំខាន់ និងចាំបាច់បំផុតទាំងពេលបច្ចុប្បន្ន ក៏ដូចជាសម្រាប់ពេលអនាគតសំដៅធានាបាននូវគុណភាព សុវត្ថិភាពផលិតផល ដែលអាចប្រកួតប្រជែងលើទីផ្សារ ធានាសុខុមាលភាពសាធារណៈ និងភាតរបរិស្ថាន និងពិតជាស្របតាមគោលនយោបាយអភិវឌ្ឍន៍វិស័យកសិកម្មរបស់ក្រសួងក្នុងការជំរុញផលិតភាព គុណភាព និងសុវត្ថិភាពសម្រាប់ផ្គត់ផ្គង់ទីផ្សារក្នុងស្រុក និងក្រៅស្រុក៕

August 14, 2019

រយៈពេល 5ខែ ដើមឆ្នាំ2019 កម្ពុជាទទួលបានទេសចរអន្តរជាតិជិត 3លាននាក់

យោងតាមរបាយការណ៍របស់ក្រសួងទេសចរណ៍បានឱ្យដឹងថា រយៈពេល 5ខែ ឆ្នាំ2019 កម្ពុជាទទួលបានភ្ញៀវទេសចរអន្តរជាតិចំនួន 2,888,461នាក់ កើនឡើង 11.4% បើធៀបនឹងរយៈពេលដូចគ្នានៅឆ្នាំ2018 ប៉ុន្តែភ្ញៀវទេសចរអន្តរជាតិដែលចូលតាមអាកាសយានដ្ឋានអន្តរជាតិសៀមរាប មានការធ្លាក់ចុះខ្លះ។

ក្នុងចំណោមភ្ញៀវទេសចរអន្តរជាតិដែលមកទស្សនាកម្ពុជាទាំងនោះ រួមមាន៖1- ចូលតាមផ្លូវអាកាសចំនួន 2,018,935នាក់កើនឡើង 16.9% ក្នុងនោះចូលតាមច្រកទ្វារអន្តរជាតិភ្នំពេញចំនួន 923,771នាក់ កើនឡើង17.6%។ តាមច្រកទ្វារអន្តរជាតិសៀមរាបចំនួន 846,267នាក់ ថយចុះ 4.5% និងតាមច្រកទ្វារអន្តរជាតិខេត្តព្រះសីហនុចំនួន 248,897នាក់ កើនឡើង 344.9%។2-ចូលតាមផ្លូវគោកចំនួន 785,774នាក់ ថយចុះ 1.1%។3-ចូលតាមផ្លូវទឹកចំនួន 83,752នាក់ កើនឡើង 15.4%។

គួរកត់សម្គាល់ថា ភ្ញៀវដែលចូលតាមច្រកទ្វារអន្តរជាតិខេត្តព្រះសីហនុមានចំនួនកើនឡើងរហូតដល់ 391.8% តាមរបាយការណ៍នោះបានបង្ហាញថា ភ្ញៀវទេសចរចិននៅតែឈរលំដាប់ថ្នាក់លេខ1 បន្ទាប់មកភ្ញៀវមកពីវៀតណាម ឡាវ ថៃ កូរ៉េ អាមេរិក ជប៉ុន អង់គ្លេស បារាំង និងម៉ាឡេស៊ី។ តាមតួលេខសម្រាប់ 5ខែដើមឆ្នាំ2019 នេះ ភ្ញៀវទេសចរចិនធ្វើដំណើរមកកាន់ប្រទេសកម្ពុជា មានចំនួន 1,103,570 នាក់ ស្មើនឹង 38.2% នៃចំនួនសរុប កើនឡើងប្រមាណ 40% និងឈរលំដាប់លេខ1។ ចំណែកភ្ញៀវទេសចរវៀតណាមមានចំនួន 322,756 នាក់ ស្មើនឹង 11.2% ថយចុះ០.4% ឈរលំដាប់ថ្នាក់លេខ2។

ទន្ទឹមនោះ ភ្ញៀវទេសចរមកពីប្រទេសឡាវដែលឈរលំដាប់ថ្នាក់លេខ3 មានចំនួន 187,954 នាក់ ស្មើនឹង6.5% នៃចំនួនសរុប កើនឡើង 5.8% ខណៈដែលភ្ញៀវមកពីប្រទេសថៃឈរលំដាប់ថ្នាក់លេខ4 មានចំនួន 150,396នាក់ ស្មើនឹង 5.2% នៃចំនួនសរុប កើនឡើង 10.8% ហើយភ្ញៀវមកពីកូរ៉េឈរលំដាប់ថ្នាក់លេខ5 មានចំនួន 150,396នាក់កើនឡើង 10.4%។

ចំពោះតំបន់ទេសចរណ៍អន្តរជាតិផ្ទៃក្នុងដែលជាតំបន់អាទិភាពសំខាន់ៗក្នុងរយៈពេល 5ខែ ដើមឆ្នាំ2019 នេះ គឺតំបន់ភ្នំពេញ ទទួលបានភ្ញៀវអន្តរជាតិចំនួន 1,770,620 នាក់កើន ឡើង 27.6% ធៀបនឹងឆ្នាំ2018។ តំបន់សៀមរាបអង្គរ ទទួលបានភ្ញៀវអន្តរជាតិចំនួន 1,117,841នាក់ ស្មើនឹង 32.6% ថយចុះ 7.3% ។

ដោយឡែកតំបន់ឆ្នេរសមុទ្រទទួលបានភ្ញៀវទេសចរអន្តរជាតិចំនួន 504,495នាក់ ស្មើនឹង14.7% កើនឡើង 22% ខណៈដែលតំបន់អេកូទេសចរណ៍ភូមិភាគឥឦសាន ទទួលបាន 38,432 នាក់ កើនឡើងជិត 11% ធៀបនឹងឆ្នាំ2018។ តំបន់ប្រាសាទព្រះវិហារ ទទួលបានភ្ញៀវទេសចរអន្តរជាតិចំនួន27,712នាក់ ថយចុះ 1.3% ធៀបនឹងឆ្នាំ2018។

របាយការណ៍ដដែលក៏បានបង្ហាញផងដែរនូវចំនួនអ្នកទេសចរកម្ពុជាដែលចេញទៅក្រៅប្រទេសក្នុងរយៈពេល 5ខែ ដើមឆ្នាំ2019 ផងដែរ គឺមានចំនួន 842,754នាក់ កើនឡើងជិត 4% ធៀបនឹងរយៈពេលដូចគ្នាកាលពីឆ្នាំ2018។ជាមួយគ្នានេះដែរ ឯកឧត្ដមបណ្ឌិត ម៉ៅ ហាវណ្ណាល់ រដ្ឋលេខាធិការនៃរដ្ឋលេខាធិការដ្ឋានអាកាសចរស៊ីវិលបានបញ្ជាក់ថា៖ “នៅឆ្នាំ2018 ព្រះរាជាណាចក្រកម្ពុជា បានដឹកជញ្ជូនអ្នកដំណើរ តាមផ្លូវអាកាសប្រមាណ 10លាននាក់ជាមួយនឹងអត្រាកំណើន 23% បានផ្តល់ការងារធ្វើដោយផ្ទាល់ និងប្រយោលបានជាង 1.7លាននាក់ និងបានចូលរួមចំណែកក្នុងចំណូលសេដ្ឋកិច្ចប្រមាណជា 2.7ពាន់លានដុល្លារសហរដ្ឋអាមេរិក។ ក្នុងនោះ ក្រុមហ៊ុនអាកាសចរណ៍អន្តរជាតិ អង្គរអ៊ែរ បានចូលរួមចំណែកប្រមាណ 10% នៃលទ្ធផលដ៏ល្អនេះ”។

រដ្ឋមន្ត្រីក្រសួងទេសចរណ៍ ឯកឧត្ដម ថោង ខុនបានមានប្រសាសន៍ថា យើងមានបញ្ហាជាច្រើនដែលត្រូវពិភាក្សា ប៉ុន្តែបញ្ហាសំខាន់មុនគេ គឺសៀមរាបត្រូវការការអភិវឌ្ឍផលិតផលទេសចរណ៍ថ្មីៗបន្ថែមទៀត ដើម្បីទាក់ទាញភ្ញៀវទេសចរ និងពន្យារការស្នាក់នៅរបស់ពួកគេ។ លោកបានបន្តទៀតថា កាលពីឆ្នាំ2018 កន្លងមក ដើម្បីទ្រទ្រង់កំណើនភ្ញៀវទេសចរមកកម្សាន្តនៅខេត្តសៀមរាប រាជរដ្ឋាភិបាលបានសម្រេចបង្កើតក្រុមការងារអន្តរក្រសួងមួយ ដើម្បីសិក្សារៀបចំផែនការមេអភិវឌ្ឍន៍ទេសចរណ៍ខេត្តសៀមរាបដែលមានក្រសួងទេសចរណ៍ជាប្រធាន ហើយបច្ចុប្បន្នក្រុមការងារជំនាញ បាននិងកំពុងសិក្សារៀបចំផែនការមេនេះយ៉ាងសកម្ម។

ផែនការមេ នឹងផ្តោតជាសំខាន់លើការអភិវឌ្ឍខេត្តសៀមរាប ជាពិសេសក្រុងសៀមរាបជាទីក្រុងទេសចរណ៍ ជាទីក្រុងបេតិកភណ្ឌ និងជាទីក្រុងដែលគិតគូរពីបរិស្ថាន (Eco-City) ដែលត្រូវធ្វើសមាហរណកម្មទាំងលើទិដ្ឋភាពសេដ្ឋកិច្ច សង្គម វប្បធម៌ បរិស្ថាន និងស្ថាបត្យកម្ម និងការធ្វើសមាហរណកម្មជាមួយផែនការគ្រប់គ្រងតំបន់អង្គរ (TMP) របស់អាជ្ញាធរជាតិអប្សរាផងដែរ៕

August 14, 2019

Author: ធឿន មករា