Author: ធឿន មករា

ការមើលថែទាំសុខភាពប្រអប់មាត់ សម្រាប់ស្ត្រីមានគភ៌
ការមានសុខភាព ដែលល្អក្នុងអំឡុងពេលមានគភ៌ គឺជារឿងមួយដែលស្ត្រីគ្រប់រូបចង់បាន…
ស្ត្រីមានគភ៌ អាចមានក្តីកង្វល់ចំពោះការប្រែប្រួលផ្សេងៗរបស់រាងកាយ និងតែងខំប្រឹងមើលថែទាំសុខភាពគភ៌ និងកូននៅក្នុងផ្ទៃឱ្យបានល្អបំផុត តែយ៉ាងណាក៏ដោយ ចូរស្ត្រីមានគភ៌ កុំភ្លេចពីសុខភាពប្រអប់មាត់ឱ្យសោះ ព្រោះវាមានផលប៉ះពាល់ដល់សុខភាពរបស់ទារកនៅក្នុងផ្ទៃ។
1. ការប្រែប្រួលរបស់អ័រម៉ូន ក្នុងអំឡុងពេលមានគភ៌មានផលប៉ះពាល់ ដល់ការកើតរោគរលាកអញ្ចាញធ្មេញ កាន់តែងាយជាងប្រក្រតី ការមានកំណកកំបោរច្រើន អាចធ្វើឱ្យកើតរោគធ្មេញពុក រលាក និងហើមអញ្ចាញធ្មេញ មានចេញឈាមទៀតផង។
2. មានរបាយការណ៍មួយបញ្ជាក់ថា មេរោគបាក់តេរី ដែលធ្វើឱ្យកើតសភាវរលាកអញ្ចាញធ្មេញនោះ អាចឆ្លងចូលទៅក្នុងលោហិត ជំរុញឱ្យមានអ័រម៉ូន Prostaglandin E2 កើនឡើង ដោយអ័រម៉ូននេះនឹងកើតមាន នៅពេលជិតគ្រប់កំណត់ឆ្លងទន្លេ ទើបគេតែងប្រទះឃើញនៅលើមាតា ដែលមានសភាវរលាកអញ្ចាញធ្មេញធ្ងន់ធ្ងរ ច្រើនតែឆ្លងទន្លេមុនពេលកំណត់ ហើយនិងទារកកើតមកមានទម្ងន់ខ្លួនតិច។
3. អាការក្អួតចង្អោរបណ្តាលមកពីការចាញ់ផ្ទៃពោះញឹកញាប់ ធ្វើឱ្យមានអាស៊ីតពីក្រពះអាហារ ចេញបញ្ច្រាស់មកក្នុងប្រអប់មាត់ បើមិនលាងជាតិអាស៊ីតនោះចេញជាបន្ទាន់ទេ អាចធ្វើឱ្យអវយវៈក្នុងប្រអប់មាត់សឹករេចបាន។
4. ការបរិភោគអាហារដែលមានរសជាតិជូរញឹកញាប់ ក៏មានផលធ្វើឱ្យធ្មេញសឹកពុកបានដែរ។
5. ស្ត្រីមានគភ៌ ច្រើនតែបរិភោគតិចៗ តែច្រើនដង ការបរិភោគញឹកញាប់ បរិភោគបង្អែម និងអាហារដែលជាប់ធ្មេញ នឹងធ្វើឱ្យងាយកើតរោគធ្មេញពុក៕
6. សម្រាប់ទារក ធ្មេញទឹកដោះនឹងចាប់ផ្តើមដុះតាំងពីមានអាយុ នៅក្នុងគភ៌មារតាបាន 4-6សប្តាហ៏។ ការកកើតធ្មេញ ត្រូវការសារធាតុអាហារច្រើនប្រភេទ ដូចគ្នានឹងការរីកលូតលាស់របស់រាងកាយដែរ ជាពិសេសសារធាតុរ៉ែ ពពួកកាល់ស្យូម ផូស្វ័រ ដែលវានឹងទៅស្រោបធ្មេញ ធ្វើឱ្យសាច់ធ្មេញមានភាពរឹងមាំ។
ការណែនាំសម្រាប់ស្ត្រីមានផ្ទៃពោះ
1. ដុសធ្មេញ និងប្រើខ្សែអំបោះខាត់ធ្មេញរៀងរាល់ថ្ងៃ យ៉ាងហោចណាស់ 1ថ្ងៃ 2ដង ព្យាយាមដុសខាត់ឱ្យស្អាត ទាំងក្នុងប្រឡោះធ្មេញ និងម្តុំជើងអញ្ចាញធ្មេញ និងគួរខ្ពុរមាត់ ឬដុសធ្មេញរាល់លើកក្រោយពេលបរិភោគអាហាររួច។
2. បើមានអាការចាញ់កូន ក្អួតចង្អោរ គួរខ្ពុរមាត់ដោយទឹកស្អាត ឬទឹកថ្នាំខ្ពុរមាត់ ផ្លួអូរ៉ាយ ដើម្បីកាត់បន្ថយបរិមាណអាស៊ីតដែលចេញពីក្រពះ និងហាមដុសធ្មេញ រយះពេល 30នាទីបន្ទាប់ពីក្អួត ព្រោះអាស៊ីតដែលចេញមកនោះ វាធ្វើឱ្យស្រទាប់ធ្មេញខាងលើទន់ផុយ បើសិនដុសធ្មេញភ្លាមៗ នឹងធ្វើឱ្យធ្មេញឆាប់សឹករេចរិលអស់។
3. បរិភោគអាហារឱ្យគ្រប់ 5ប្រភេទក្រុម ដើម្បីសុខភាពរបស់ម្តាយ និងកូនក្នុងផ្ទៃ។ កាល់ស្យូមជាសារធាតុអាហារសំខាន់ក្នុងការសាងធ្មេញរបស់ទារក ដោយបានទទួលកាល់ស្យូមតាមរយៈឈាមរបស់ម្តាយ ដូច្នេះម្តាយគួរបរិភោគកាល់ស្យូមឱ្យបានគ្រប់គ្រាន់។
4. គួរចៀសវាងអាហារផ្អែមៗ ឬអាហារណាដែលស្អឹតជាប់ធ្មេញ ដើម្បីការពារធ្មេញពុក។
5. គួរទៅត្រួតពិនិត្យធ្មេញរៀងរាល់ 6ខែម្តង ហើយបើមានអាការឈឺ ហើម រលាកអញ្ចាញធ្មេញ គួរតែទៅទទួលការព្យាបាលជាបន្ទាន់ ព្រោះសុខភាពក្នុងប្រអប់មាត់របស់មាតា មានផលប៉ះពាល់ដល់សុខភាពរបស់ទារក។
មេរោគបាក់តេរី នៅក្នុងប្រអប់មាត់ម្តាយ អាចបញ្ជូនបន្តទៅដល់កូនបាន ការមានសុខភាពប្រអប់មាត់ល្អ គ្មានធ្មេញពុក ឬរលាកអញ្ចាញធ្មេញ នឹងជួយកាត់បន្ថយបរិមាណមេរោគបាក់តេរីដល់ទារកបាន៕
January 15, 2021
Bayern Munich ធ្លាក់ពីពាន DFB-Pokal ត្រឹមវគ្គ 32ក្រុមចុងក្រោយ
កាលពីព្រឹកទៀបភ្លឺ ថ្ងៃព្រហស្បតិ៍ ទី14 ខែមករា ក្លិបបាល់ទាត់ FC Bayern Munich បានធ្លាក់ចេញពីពានរង្វាន់ DFB-Pokal 2021-2022 ក្រោយពីចាញ់ក្រុម Holstein Kiel ដោយបាល់ប៉េណាល់ទីកាត់សេចក្តី។
ការប្រកួតរវាងក្រុមខាងលើនេះ បានធ្វើឡើងនៅពានរង្វាន់ DFB-Pokal ឬហៅស្រួលស្ដាប់ថា Cup របស់អាល្លឺម៉ង់។ ការប្រកួតនេះ ក្រុម Bayern Munich បាននាំមុខមុន ដោយ Gnabry នៅនាទីទី14 មុនពេល Bartels របស់ក្រុម Holstein តាមស្មើបានវិញ នៅនាទី37។ ការប្រកួតឈានចូលតង់ទី2 Sane បានបើកការនាំមុខជាថ្មីម្ដងទៀត ឱ្យ Bayern Munich តែយ៉ាងណាមិញ ជិតចប់ការប្រកួត Wahl ក៏រកគ្រាប់បាល់តាមស្មើវិញបាន នៅនាទី90+5។
ដោយសារនេះ ជាការប្រកួតវគ្គជម្រុះ ដូច្នេះការប្រកួតត្រូវបានពន្យារពេល ដល់ការទាត់ប៉េណាល់ទី។ ការទាត់ប៉េណាល់ទីនេះ ក្រុមទាំង2 ស៊ុតចូលដូចគ្នាដល់ទៅ 5គ្រាប់។ តែអ្វីដែលគួរឱ្យសោកស្តាយសម្រាប់ Bayern Munich នោះគឺ គ្រាប់ទី6 កីឡាករ Marc Roca បែរជាស៊ុតមិនចូល ធ្វើឱ្យក្រុមជើងឯកចាស់ Bayern Munich ធ្លាក់ពីពាននេះត្រឹមវគ្គ 32ក្រុមចុងក្រោយ ដែលវាបានក្លាយជាកំណត់ត្រាដ៏អាក្រក់បំផុតរបស់ក្លិប ដ៏ខ្លាំងជាងគេរបស់អាល្លឺម៉ង់មួយនេះ៕

January 15, 2021
កំពូលអាហារ5យ៉ាង ប្រឆាំងនឹងរោគម៉ៃក្រេន ( រោគប្រកាំង )
ម៉ៃក្រេន គឺជាអាការរបស់រោគឈឺក្បាលមួយប្រភេទដែលសាងនូវក្តីឈឺពើត និងក្តីរំខានដល់អ្នកជំងឺ ហើយមូលហេតុពិតប្រាកដរបស់ការឈឺក្បាលម៉ៃក្រេននេះ មិនទាន់មាននរណាដឹងយ៉ាងពិតប្រាកដនៅឡើយ តែគេជឿថា អាចបណ្តាលមកពីអ្នកជំងឺកើតអាការតបស្នងនឹងសភាពបរិស្ថានខាងក្រៅ ដូចជា ធាតុអាកាស ក្លិន សំឡេង ក្តីធុញថប់ ឬសារជាតិជំរុញពីអាហារ ទៅធ្វើឱ្យរលាកសរសៃឈាម និងកើតការពង្រីកខ្លួននាំឱ្យមានអាការឈឺពើតមួយចំហៀងក្បាលជាប្រចាំ។
ថ្ងៃនេះ យើងសុំណែនាំពីការញ៉ាំវិតាមីន ឬអាហារបំប៉ន ដែលអាចមានចំណែកជួយក្នុងការបំបាត់ ឬកាត់បន្ថយអាការឈឺចាប់របស់រោគម៉ៃក្រេនបាន បើមិនច្រើន ក៏តិចដែរ មកជម្រាបជូនមិត្តអ្នកអានដូចតទៅ ៖
- គ្រាប់ល្ពៅ និងគ្រាប់អាល់ម៉ុន៖ មានសារធុតុម៉ាញេស្យូមខ្ពស់ ជាសារធាតុដែលមនុស្សកើតរោគម៉ៃក្រេន តែងខ្វះច្រើនគ្នាណាស់ ទើបធ្វើឱ្យខួរក្បាលសេនស៊ីធីហ្វ ត្រូវជំរុញដោយអ្វីជុំវិញខ្លួន ដែលខ្លាំងៗបានយ៉ាងងាយបំផុត ជាហេតុធ្វើឱ្យឈឺពើតពេញក្បាលឡើងតែម្តង។
- ត្រីសាលម៉ុន៖ ដោយសារជាតិអាស៊ីតខ្លាញ់ អូមេហ្កា3 ដែលមាននៅក្នុងសាច់ត្រី ប្រេងម្កាក់ និងសណ្តែកសៀង ជួយការពារអាការឈឺក្បាល កាត់បន្ថយការរលាកក្នុងប្រព័ន្ធឈាមរត់ បំប៉នខួរក្បាលឱ្យកាន់តែឆ្លាតឡើងថែមទៀតផង។
- ខ្ញី៖ សារធាតុ ប្រូស្តាគ្លែនដីនស៏ ជាសារធាតុដែលជួយរម្ងាប់ការឈឺចាប់ ដែលមាននៅក្នុងមើមខ្ញី ជួយឱ្យអាការឈឺក្បាលបានធូរស្រាល និងថែមទាំងជួយកាត់បន្ថយអាការក្អួតចង្អោបានទៀតផង។
- បន្លែប្រូកខូលី៖ មានសារជាតិម៉ាញេស្យូម ជួយបន្ធូរសរសៃឈាមតូចៗ ធ្វើឱ្យឈាមហូរវិលបានល្អ កាត់បន្ថយការបង្រួញខ្លួនឡើងរឹង របស់សាច់ដុំលើគល់ក កាត់ផ្តាច់មូលហេតុនៃការឈឺក្បាលបាន៕
January 15, 2021
PSG គ្រោងដាក់ Neymar ចូលលេងវិញភ្លាមៗ ក្រោយជាពីរបួស
កីឡាករខ្សែប្រយុទ្ធ Neymar JR របស់ក្លិប Paris Saint Germain (PSG) ត្រូវបានគេប្រទះឃើញថា បានធ្វើការហ្វឹកហាត់ជាមួយនឹងក្រុមរបស់ខ្លួនសាជាថ្មីវិញហើយ កាលពីថ្ងៃអង្គារ ទី12 ខែមករា ឆ្នាំ2021 កន្លងទៅ។
ការចូលហ្វឹកហាត់សាជាថ្មីនេះ ត្រូវបានគេដឹងថា Neymar JR បានជាសះស្បើយ 100% ហើយ។ ខាងក្លិប បានអះអាងថា Neymar មានកម្លាំងពេញ និងអាចចូលលេងបាននៅប្រកួតក្រោយនេះ នៅថ្ងៃទី14 ខែមករា ខាងមុខនេះ ដែល PSG ត្រូវជួបជាមួយនឹង Marsille ក្នុងការប្រកួតលីគកំពូលបារាំង។
គួររំឭកដែរថា Neymar JR បានសម្រាកព្យាបាលអស់រយៈពេលជាង 1ខែមកហើយ ដោយរងរបួសកាលពីថ្ងៃទី14 ខែធ្នូ ឆ្នាំកន្លងទៅ ក្នុងការប្រកួតលីគកំពូលបារាំង ទល់នឹងក្រុម Lyon៕

January 14, 2021
Ozil នឹងទៅលេងនៅលីគ ប្រទេសតួរគី ឬមិនទេក៏អាមេរិក ក្រោយចាកចេញពី Arsenal
ខ្សែបម្រើប្រយុទ្ធដ៏ល្បីល្បាញ Mesut Ozil របស់ក្លិប Arsenal បានបង្ហើបឱ្យដឹងអំពីគម្រោងក្រោយការចាកចេញពី Arsenal។ កីឡាករអាល្លឺម៉ង់រូបនេះ បាននិយាយថា រូបគេចង់ទៅលេងនៅលីគកំពូលអាមេរិក ឬ លីគកំពូលតួរគី។
Ozil ចង់ចាកចេញពី Arsenal នៅពេលនេះតែម្តង។ ចំពោះលីគកំពូលអាមេរិក គេមិនច្បាស់ថា នឹងទៅក្លិបមួយណានៅឡើយទេ តែប្រសិនបើគេផ្លាស់ទៅកាន់លីគកំពូលតួរគីវិញ គេនឹងទៅលេងឱ្យក្លិប Fenerbahce ជាក្លិបដែលរូបគេតែងតែគាំទ្រតាំងពីតូចមក។
សូមជម្រាបផងដែរថា កីឡាករវ័យ 32ឆ្នាំរូបនេះ ត្រូវបានលោក Mikel Arteta ដែលជាគ្រូនៅ Arsenal ដកឈ្មោះចេញពីក្រុមកីឡាករ សម្រាប់ប្រកួតក្នុងគ្រប់កម្មវិធីរបស់ក្លិបតាំងពីចុងឆ្នាំ2020 ហេតុនេះហើយមានផ្លូវតែមួយគត់សម្រាប់កីឡាកររូបនេះ គឺចាកចេញពីក្លិបក្នុងទីក្រុងឡុងដ៍មួយនេះតែប៉ុណ្ណោះ៕

January 14, 2021
កូវីដ-19 រាតត្បាតមែន តែឆ្នាំ2020 Apple នៅតែកើបលុយរាប់ពាន់លានដុល្លារពី App Store
ថ្មីៗនេះ របាយការណ៍ពីអ្នកវិភាគ នៅទីភ្នាក់ងារព័ត៌មាន CNBC បានបង្ហាញថា នៅក្នុង ឆ្នាំ2020 Apple រកចំណូលបានច្រើនជាង 64ពាន់លានដុល្លារ ពី App Store ទីផ្សារកម្មវិធីរបស់ខ្លួន។
ទោះយ៉ាងណា ចំណូលក្នុង ឆ្នាំ2020 ជាចំនួនកើនឡើង ដ៏សន្ធឹកសន្ធាប់មួយ ដ្បិតក្នុង ឆ្នាំ2018 គឺរកបានតែ 48.5លានដុល្លារ និងមានកំណើនត្រឹមតែ 3.1% ប៉ុណ្ណោះ បើធៀបទៅនឹង ឆ្នាំ2019។ ចំណូលនេះមានការកើនឡើងដល់ទៅ 28% បើប្រៀបធៀបទៅ ឆ្នាំ2019 ដែលរកបានត្រឹម 50ពាន់លានដុល្លារប៉ុណ្ណោះ។
អ្នកវិភាគដដែលនោះ បានបន្ថែមថា ការលក់កម្មវិធីនៅលើ App Store មានសម្ទុះកើនឡើង ខណៈមានការរាតត្បាតនៃ ជំងឺកូវីដ-19 ដោយមនុស្សចាប់ផ្ដើមសម្រាកនៅផ្ទះ មានពេលវេលាច្រើន និងចំណាយលុយទៅលើកម្មវិធីផ្សេងៗ ដែលលេចធ្លោជាងគេជា ផលិតផលហ្គេម។
App Store គឺជាទីផ្សារកម្មវិធីរបស់ Apple បង្កើតឡើងតាំងពី ឆ្នាំ2008 បន្ទាប់ពី iPhone ដំបូងបានប្រកាសចេញ។ នៅឆ្នាំនោះផងដែរ ក្រុមហ៊ុនបច្ចេកវិទ្យាដ៏ធំរបស់អាមេរិកខាងលើ បានចំណាយថវិកាប្រមាណ 200ពាន់លានដុល្លារ ទៅលើអ្នកអភិវឌ្ឍន៍កម្មវិធី ដើម្បីផលិតកម្មវិធីគាំទ្រលើប្រព័ន្ធប្រតិបត្តិការ iOS របស់ខ្លួន៕
January 14, 2021
Telegram ក្លាយជាកម្មវិធី ដែលមានអ្នកទាញយកប្រើ ច្រើនជាងគេលំដាប់ទី2 នៅសហរដ្ឋអាមេរិក
បន្ទាប់ពីលោកប្រធានាធិបតី Donald Trump ត្រូវបានផ្អាកពីការប្រើប្រាស់គណនី Twitter និង Facebook ក្រោយការលុកលុយវិមានកាពីតូល ហ៊ីលល៍ ដ៏សាហាវដោយអ្នកគាំទ្ររបស់លោក ដែលប្រដាប់ដោយអាវុធ និងហានិភ័យនៃការញុះញង់ឱ្យមានអំពើហិង្សារួចមក កាលពីថ្ងៃចន្ទ ប្រជាជនប្រហែល 545,000នាក់នៅសហរដ្ឋអាមេរិក បានទាញយកកម្មវិធី Telegram នៅចន្លោះថ្ងៃពុធ (ទី6មករា) និងថ្ងៃអាទិត្យ(ទី10មករា) ដែលមានចំនួនជិត 3ដង បើប្រៀបធៀបនឹងរយៈពេលដូចគ្នាកាលពីសប្តាហ៍មុនហ្នឹង។
អ្នកប្រើប្រាស់ WhatsApp ជាច្រើនលាននាក់ ក៏បានធ្វើការបោះបង់ចោលកម្មវិធីផ្ញើសារមួយនេះ មុនការអាប់ឌែត គោលការណ៍ថ្មី ដែលបង្ខំឱ្យអ្នកប្រើប្រាស់ចែករំលែកព័ត៌មាន របស់ពួកគេជាមួយ Facebook។ ការអាប់ឌែតថ្មី របស់ WhatsApp ដែលនឹងមកដល់នៅថ្ងៃទី8 ខែកុម្ភៈខាងមុខនេះ នឹងប៉ះពាល់ដល់អ្នកប្រើប្រាស់ទាំងអស់ ដែលមិនមែនរស់នៅក្នុងតំបន់អឺរ៉ុប និងចក្រភពអង់គ្លេស ដែលតំបន់ 2នេះ មានច្បាប់តឹងរ៉ឹងការពារព័ត៌មានរបស់អ្នកប្រើប្រាស់។
អ្នកប្រើប្រាស់នៅក្រៅពីតំបន់ទាំង 2ខាងលើ នឹងតម្រូវផ្ដល់សិទ្ធសម្រាប់ឱ្យ Facebook ចូលយកព័ត៌មានរបស់ពួកគេ មានរួមបញ្ចូលលេខទូរស័ព្ទ និងព័ត៌មានអំពីការទំនាក់ទំនងរបស់ពួកគេ ជាមួយអ្នកដទៃ។ ទាល់តែព្រមផ្ដល់សិទ្ធិ ទើបពួកគេអាចបន្តប្រើប្រាស់ WhatsApp បានតទៅទៀត។ ការទាមទារនេះ នឹងត្រូវអនុវត្តលើគ្រប់អ្នកប្រើប្រាស់ទាំងអស់ ទោះបីជាពួកគេមិនមានគណនី Facebook ក្ដី។
ពេល WhatsApp ប្រកាសអំពីផែនការ នៃការផ្លាស់ប្ដូរនេះភ្លាម បានធ្វើឱ្យ Telegram មានកំណើនចំនួនទាញយកជិត 1.7លានដងភ្លាមៗ ហើយកម្មវិធី Signal (ជាកម្មវិធីផ្ញើសារដែលលោក Elon Musk ណែនាំឱ្យប្រើប្រាស់) មានកំណើនចំនួនទាញយក 1.2លានដង។
ដោយឡែកចំនួនទាញយកកម្មវិធី WhatsApp ក្នុងរយៈពេល 7ថ្ងៃដំបូង នៃឆ្នាំ2021 មានការធ្លាក់ចុះចំនួន 13% មកនៅត្រឹម 10.3លានដង ប្រសិនបើធៀបនឹងអំឡុងពេល 7ថ្ងៃមុន។ ការសម្រេចចិត្តរបស់ WhatsApp នាពេលនេះ គឺខុសគ្នាទាំងស្រុង ប្រៀបនឹងពេលដែល Facebook ទើបទិញ WhatsApp ដំបូងក្នុងឆ្នាំ2014 ក្នុងទំហំទឹកប្រាក់ 19ពាន់លានដុល្លារ។
ពេលនោះ WhatsApp បានធានាថា ទិន្នន័យរបស់អ្នកប្រើប្រាស់ នឹងបន្តនៅជាឯកជន ហើយមិនចែករំលែកជាមួយ Facebook នោះទេ។ ការផ្លាស់ប្ដូរគោលការណ៍នេះ បានចាប់ផ្ដើមលេចចេញដំបូងកាលពីឆ្នាំ2016 ពេលដែល WhatsApp ចាប់ផ្ដើមចែករំលែកទិន្នន័យជាមួយ Facebook ជាលក្ខណៈ Default ដែលពេលនោះអ្នកប្រើប្រាស់ អាចមានសិទ្ធបិទមិនឱ្យមានការចែករំលែកបាន។
នៅថ្ងៃទី8 ខែកុម្ភៈខាងមុខនេះ អ្នកប្រើប្រាស់ WhatsApp នឹងមិនមានជម្រើសអ្វីឡើយ គឺត្រូវតែទទួលយកការផ្លាស់ប្ដូរ ដែលតម្រូវឱ្យមានការចែករំលែកទិន្នន័យរបស់ខ្លួនជាមួយ Facebook ប្រសិនបើពួកគេចង់ប្រើប្រាស់ WhatsApp ជាបន្ត៕
January 13, 2021
SONY បង្ហាញផលិតផលដំបូងបង្អស់ ជាដ្រូន ថតវីដេអូ (មានវីដេអូ)
ថ្មីៗនេះ ក្រុមហ៊ុន Sony បានដាក់បង្ហាញឱ្យឃើញ ការឌីហ្សាញផលិតផល Drone ជំនាន់ដំបូងគេស្របពេលដែលដ្រូននោះ មានបំពាក់មកជាមួយនូវម៉ាស៊ីនថតស៊េរី Alpha Series ថែមទៀតផង។
Drone ជំនាន់ដំបូងគេរបស់ Sony ម៉ូដែលនេះ នៅមិនទាន់មានព័ត័មានច្រើនពីលក្ខណសម្បត្តិ និងតម្លៃរបស់វានៅឡើយទេ តែគេបានដឹងថា វាមានជើងទម្រ អាចបត់ឡើងលើបាន នៅពេលកំពុងហោះហើរ និងបត់ចុះក្រោមវិញ រៀងរាល់ពេលដែលវាចុះចត។ វាជាផលិតផលពិសេសមួយ ដែលធ្វើឡើងសម្រាប់ទីផ្សារអ្នកផលិតវីដេអូ កម្រិតខ្ពស់ ឬកម្រិត Professional ក្នុងវិស័យភាពយន្តជាដើម។
សូមជម្រាបជូនផងដែរថា ចំពោះគំនិតផលិត Drone ជំនាន់ដំបូងនេះ ក៏ធ្លាប់ត្រូវបាន SONY បង្ហើបឱ្យដឹងម្ដងរួចមកហើយដែរ កាលពីឆ្នាំ2020 តែវាទើបនឹងលេចរូបរាងឡើងនៅឆ្នាំ2021 សម្រាប់ដាក់តាំងក្នុងព្រឹត្តិការណ៍តាំងពិព័រណ៍បច្ចេកវិទ្យា CES 2021។ ដ្រូនដំបូងគេនេះ មានឈ្មោះថា Sony’s Airpeak ដែលមានសមត្ថភាពខ្ពស់ប្រហាក់ប្រហែលនឹងដ្រូន របស់ក្រុមហ៊ុន DJI ដូច្នោះដែរ។
ខាងក្រោមនេះជាវីដេអូ ដែល Sony បានបង្ហាញ៖
*វីដេអូទី1 ដាក់បង្ហាញអំពី Drone ផ្ទាល់
*វីដេអូទី2 យកទៅឱ្យថតរថយន្ដ VISION-S
January 13, 2021
មិនបាច់ទៅណាឆ្ងាយទេ! តាមរយៈវីង អ្នកអាចផ្ញើ ឬដកប្រាក់បានជិត១៩៥ប្រទេស
មិនចាំបាច់ធ្វើដំណើរឆ្ងាយ និងឈរតម្រង់ជួរនាំតែខាតពេលវេលាទៀតទេ ឥឡូវនេះលោកអ្នកអាចផ្ញើប្រាក់ពីកម្ពុជាទៅសាច់ញាត្តិរបស់អ្នកជិត១៩៥ប្រទេសតាមរយៈភ្នាក់ងារវីងដែលមានស្លាកសញ្ញា វេស្ទើនយូនៀន (Western Union) ព្រមទាំងមានឱកាសឈ្នះរង្វាន់ជាច្រើនផ្សេងទៀត។
ជាមួយកិច្ចសហប្រតិបត្តិការរវាង ធនាគារឯកទេសវីង និង Western Union លោកអ្នកគ្រាន់តែទៅកាន់ភ្នាក់ងារវីងដែលមានស្លាកសញ្ញា Western Union ដោយភ្ជាប់ជាមួយនឹងគណនីវីង បន្ទាប់មកបំពេញសំណុំបែបបទផ្ទេរប្រាក់ នោះលោកអ្នកអាចផ្ញើប្រាក់ពីកម្ពុជា ទៅជិត១៩៥ប្រទេសបានយ៉ាងងាយស្រួលបំផុត។
កាន់តែពិសេសទៅទៀតនោះ អ្នកក៏អាចដកប្រាក់បញ្ញើរពីបរទេស តាមរយៈភ្នាក់ងារវីងបានយ៉ាងរហ័សផងដែរ។ ប្រសិនបើអ្នកមិនចង់ដកសាច់ប្រាក់ទេ លោកអ្នកគ្រាន់តែប្រើ លេខកូដទៅវីង (Code2Wing) ដោយចូលទៅក្នុងកម្មវិធី Wing Money App បន្ទាប់មកជ្រើសរើស “ផ្ទេរប្រាក់” បន្ទាប់មកទៀតជ្រើសរើស “លេខកូដទៅវីង” និង ជ្រើសរើស Western Union និងបញ្ចូលលេខកូដ១០ខ្ទង់ដែលបានពីអ្នកផ្ញើ នោះទឹកប្រាក់នឹងរត់ចូលទៅក្នុង គណនីវីងរបស់អ្នកដោយស្វ័យប្រវត្តិ។
គួរបញ្ចាក់ផងដែរថា រាល់ការធ្វើប្រតិបត្តិការ Western Union ជាមួយវីងលោកអ្នកនឹងមានឱកាសឈ្នះរង្វាន់ Airpod ចំនួន៣រង្វាន់ និងនាឡិកា Apple Watch ចំនួន១រង្វាន់ ជារៀងរាល់ខែ រួមទាំងរង្វាន់ធំ iPad Pro ចំនួន១គ្រឿងផងដែរ។ ការផ្តល់ជូនដ៏ពិសេសនេះ នឹងរាប់ចាប់ពីខែធ្នូ ឆ្នាំ២០២០ រហូតដល់ខែកុម្ភៈឆ្នាំ២០២១។
ក្រុមការងារ ធនាគារឯកទេសវីងនឹងធ្វើការទំនាក់ទំនងទៅអ្នកដែលមានសំណាងឈ្នះរង្វាន់ទាំងនេះ៕
January 12, 2021
Lenovo បញ្ចេញផលិតផលវ៉ែនតាឆ្លាតវៃ 3D និង AR អាចបង្ហាញម្ដង 5ផ្ទាំងកម្មវិធី លើកុំព្យូទ័រ
ក្នុងព្រឹត្តិការណ៍ CES 2021 ជាព្រឹត្តិការណ៍ដាក់តាំងពិព័រណ៍បច្ចេកវិទ្យាដ៏ធំ នាដើមឆ្នាំ2021 នេះ ក្រុមហ៊ុនទាំងអស់ ដែលមានឈ្មោះចូលរួម បានបញ្ចេញ Prototype (គំរូ) ផលិតផលរបស់ខ្លួន ក៏ដូចជាដាក់បង្ហាញផលិតផលរបស់ពួកគេ ជាបណ្តើរៗហើយដែរ។
ជាក់ស្ដែងក្រុមហ៊ុន Lenovo ដែលល្បីល្បាញខាងផលិតគ្រឿងអេឡិចត្រូនិកយូរឆ្នាំមកហើយនោះ ក៏បានបង្ហាញឱ្យឃើញពី វ៉ែនតាឆ្លាតវៃ ThinkReality A3 ដែលក្នុងនោះ វាមាន 2ជម្រើស ទៅតាមប្រភេទអ្នកប្រើប្រាស់ ដែលសុទ្ធតែមានសមត្ថភាព 3D visualizations និង AR-guided ដូចគ្នា។
Lenovo ក៏បានបញ្ជាក់ដែរថា គោលដៅនៃការផលិតវ៉ែនតាឆ្លាតវៃខាងលើនេះ មិនមែនសម្រាប់លក់ឱ្យអតិថិជនទូទៅនោះទេ ផ្ទុយទៅវិញគឺ គោលដៅសម្រាប់សហគ្រាស។
លក្ខណសម្បត្តិវ៉ែនតា AR ទាំង ២ម៉ូដែល ស្ទើរតែដូចគ្នាទាំងស្រុង គ្រាន់តែថា វាទាំង2 ត្រូវបានធ្វើឡើង ដើម្បីតម្រូវទៅតាមករណី នៃការប្រើប្រាស់ផ្សេងគ្នា។
សម្រាប់ម៉ូដែល ThinkReality A3 បំពាក់មកជាមួយនឹងឈីប Snapdragon XR1 សម្រាប់វ៉ែនតាឆ្លាតវៃ និង 1ទៀត ម៉ូដែលThinkReality A3 PC Edition ដែលត្រូវបានបង្កើតឡើង សម្រាប់ឱ្យវាភ្ជាប់ជាមួយនឹង PC តែម្ដង ដើម្បីធ្វើការប្រើប្រាស់វា ឱ្យអាចធ្វើការបង្ហាញកម្មវិធីនៅលើ Windows បាន5 នៅលើផ្ទៃបង្ហាញនិម្មិតនៃវ៉ែនតានោះ។
ថាមពលថ្ម របស់វា អាស្រ័យទៅលើឧបករណ៍ ដែលនឹងតភ្ជាប់មកជាមួយប៉ុណ្ណោះ ដោយធ្វើបែបនេះ នឹងជួយឱ្យវា កាន់តែស្រាលងាយស្រួលពាក់ ប៉ុន្តែអ្នកប្រើត្រូវការភ្ជាប់វាដោយប្រើខ្សែ USB-C 3.1 ទៅកាន់ឧបករណ៍ដែលភ្ជាប់ជាមួយនោះ។
សូមជម្រាបជូនដែរថា Lenovo មិនទាន់បញ្ជាក់ពីតម្លៃរបស់ ThinkReality A3 ទាំង 2ម៉ូដែលខាងលើនៅឡើយទេ ប៉ុន្តែត្រូវបានគេរំពឹងថា វ៉ែនតាឆ្លាតវៃនោះ នឹងបង្ហាញខ្លួន នៅអំឡុងពាក់កណ្ដាលឆ្នាំ2021 ខាងមុខនេះ៕
January 11, 2021