ធឿន មករា - La Reine Media

ក្រុមហ៊ុន Luxury Smile Beauty Group Co., LTD ផ្តល់សិទ្ធិដល់ក្រុមហ៊ុន Paradise Cosmetic ចែកចាយផលិតផលផ្តាច់មុខក្នុងទីផ្សារ

ស្របពេលដែលកម្រិតជីវភាពរបស់ប្រជាជនមានភាពប្រសើរឡើង ប្រជាជនខ្មែចាប់ផ្តើមបង្កើនគុណជីវិតដោយយកចិត្តទុកដាក់លើការបញ្ហាសម្រស់ និងភាពស្រស់ស្អាតកាន់តែខ្លាំង ក្រុមហ៊ុន Luxury Smile Beauty Group Co., LTD ដែលជាក្រុមហ៊ុនបង្កើតម៉ាកសញ្ញាដ៏ធំមួយបានផ្តល់សិទ្ធិដល់ក្រុមហ៊ុន Paradise Cosmetic ដើម្បីចែកចាយផលិតផល Paradise Facial and Body Soap ផ្តាច់មុខក្នុងទីផ្សាកម្ពុជា។

លោកឧកញ៉ា ចិត្រ សេរីសុភ័ក្ត្រ បានលើកឡើងថា ក្រុមហ៊ុន Luxury Smile Beauty Group Co., LTD ជាក្រុមហ៊ុនបង្កើតម៉ាកសញ្ញា និងចែកចាយគ្រឿងថែរក្សាសម្ផស្សដ៏ធំ ដែលមានរោងចក្រផលិតនៅប្រទេសថៃ។ បច្ចុប្បន្ននេះ ក្រៅពីការចូលរួមចំណែកក្នុងការឆ្លើយតបជាមួយនឹងតម្រូវការរបស់អតិថិជនខ្មែរ ដែលកំពុងមានតម្រូវការខ្ពស់ផ្នែកគ្រឿងរក្សាសម្ផស្សតាមរយៈការផលិត និងចែកចាយគ្រឿងសម្អាងប្រកបដោយគុណភាពខ្ពស់នៅកម្ពុជា ក្រុមហ៊ុន Luxury Smile Beauty Group Co., LTD ក៏ចាប់ផ្តើមឈានមួយជំហានថ្មីទៀតដោយជួយក្រុមហ៊ុនក្នុងស្រុកជាពិសេសសហគ្រាសខ្នាតតូច និងមធ្យម ឱ្យមានលទ្ធភាពបង្កើតម៉ាកសញ្ញាដោយខ្លួនឯង ដើម្បីចូលរួមប្រកួតប្រជែងក្នុងទីផ្សារក្នុងស្រុក។

លោកឧកញ៉ា ចិត្រ សេរីសុភ័ក្ត្រ បានមានប្រសាសន៍ថា៖ “បច្ចុប្បន្ននេះ ក្រុមហ៊ុន Luxury Smile Beauty Group Co., LTD បានយកចិត្តទុកដាក់ខ្លាំងក្នុងការជំរុញឱ្យសហគ្រាសទាំងឡាយនៅក្នុងស្រុកបង្កើតម៉ាកសញ្ញាដោយខ្លួនឯងព្រោះកាលណាពួកគាត់មានសមត្ថភាពក្នុងការបង្កើតម៉ាកសញ្ញាដោយខ្លួនឯង គាត់នឹងមានមូលដ្ឋានគ្រឹះដ៏សំខាន់មួយដើម្បីបន្តការអភិវឌ្ឍបន្ថែមទៀត។ ក្រៅពីការទទួលផលិតនូវផលិតផលស្របតាមស្តង់ដាខ្ពស់ហើយ យើងក៏ជួយដល់ក្រុមហ៊ុនថ្មីៗទាំងអស់នេះឱ្យយល់ពីសេវាផ្លូវច្បាប់ និងយុទ្ធសាស្ត្រសំខាន់ៗផ្នែកទីផ្សារ ដើម្បីធានាពីនិរន្តរភាពនៃការធ្វើអាជីវកម្ម”។

សហគ្រិនវ័យក្មេងប្រកបដោយភាពប៉ិនប្រសប់ខាងលើបានលើកឡើងផងដែរថា ក្រុមហ៊ុន Luxury Smile Beauty Group Co., LTD មានឆន្ទៈក្នុងការជួយដល់សហគ្រាសទាំងអស់ ក្រុមហ៊ុនបានរបស់លោកបានផ្តល់សិទ្ធិចែកចាយបង្កើតម៉ាកសញ្ញា ឱ្យក្លាយជាក្រុមហ៊ុនដែលមានលទ្ធភាពអភិវឌ្ឍន៍ពិតប្រាកដ ក្នុងក្តីរំពឹងយ៉ាងខ្ពស់ថា ពួកគេអាចបន្តជួយដល់ប្រជាជនកម្ពុជាជាច្រើនផ្សេងទៀត ជាពិសេសស្ត្រីឱ្យទទួលបានភាពជឿជាក់ខ្ពស់លើខ្លួនឯង និងបង្កើនចំណូលប្រចាំថ្ងៃបានយ៉ាងល្អ។

លោក គិត ស៊ីណុច តំណាងក្រុមហ៊ុន ParadiseCosmetic Cambodia Co., Ltd បានលើកឡើងថា លោកពិតជាមានសេចក្តីរីករាយនៅពេលដែលក្រុមហ៊ុនរបស់លោកទទួលបានសិទ្ធិចែកចាយផ្តាច់មុខនូវផលិតផល Paradise Facial and Body Soap ពីក្រុមហ៊ុន Luxury Smile Beauty Group Co., LTD ដែលថ្មីៗនេះត្រូវបានផលិត និងគ្រោងចែកចាយក្នុងទីផ្សាររហូតដល់ទៅ 30,000ដុំឯណោះ។ Paradise Facial and Body Soap ជាផលិតផលដែលបង្កើតឡើងតាមស្តង់ដាជប៉ុន មានគុណភាពខ្ពស់ និងផលិតឡើងដោយមានការចុះបញ្ជីត្រឹមត្រូវពីក្រសួងពាក់ព័ន្ធ ដែលធានាបានពីសុវត្ថិភាពខ្ពស់ចំពោះអ្នកប្រើប្រាស់។

លោក គិត ស៊ីណុច បាននិយាយថា៖ “ក្រៅពីការផ្តោតលើផលិតផលដែលមានគុណភាព និងសុវត្ថិភាពខ្ពស់ហើយ មូលហេតុដែលក្រុមហ៊ុនរបស់យើងនាំចូលនូវផលិតផល Paradise Facial and Body Soapនេះ គឺដើម្បីជួយដល់បងប្អូនស្ត្រីទាំងឡាយដែលចង់មានអាជីព តែមិនមានលទ្ធភាពគ្រប់គ្រាន់ក្នុងការគ្រប់គ្រងអាជីវកម្ម ក៏ដូចជាបញ្ហាដើមទុនជាដើម”។

លោក គិត ស៊ីណុច បានបន្ថែមទៀតថា កន្លងមកស្ត្រីជាច្រើនមានក្តីស្រមៃចង់ក្លាយជាសហគ្រិន តែគាត់នៅមានបញ្ហាព្រួយបារម្ភពីភាពលំបាកក្នុងការស្វែងរកផលិតផលល្អពិតប្រាកដដើម្បីប្រកបអាជីវកម្ម និងលំបាកស្វែងរកក្រុមហ៊ុនដែលទុកចិត្តបាន។ បន្ថែមពីលើនេះទៅទៀត អ្វីដែលគាត់បារម្ភផងដែរនោះគឺ គាត់មិនមានទុនច្រើនសម្រាប់ធ្វើជាម្ចាស់អាជីវកម្មម្នាក់បាន ស្របពេលដែលគាត់មិនសូវមានលទ្ធភាពក្នុងការគ្រប់គ្រងការលក់ឱ្យបានទូលំទូលាយ។ ដោយមើលឃើញពីបញ្ហាប្រឈមទាំងនេះ ទើបក្រុមហ៊ុន Paradise Cosmetic បាននាំចូលនូវផលិតផល Paradise Facial and BodySoap នេះមកកាន់ទីផ្សារដើម្បីផ្តល់ជូននូវជម្រើសល្អបំផុតសម្រាប់សុភាពនារីដែលចង់ស្វែងរកផលិតផលដែលមានគុណភាពខ្ពស់ និងមានក្រុមហ៊ុនប្រកបដោយទំនុកចិត្តខ្ពស់។ ក្រៅពីនេះ ក្រុមហ៊ុនរបស់លោកក៏ជួយសម្រេចក្តីស្រមៃដល់ស្ត្រីទាំងឡាយដែលចង់ក្លាយជាដៃគូអាជីវកម្មរបស់លោក ដោយការជួយជ្រោមជ្រែង និងផ្តល់ផលិតផលឱ្យលក់ដោយចំណាយដើមទុនតិច។ លោកបានសង្កត់ធ្ងន់ផងដែរថា ចាប់ពីថ្ងៃនេះរហូតដល់ថ្ងៃទី 31 ខែវិច្ឋិកា ឆ្នាំ2019 សាធារណជនដែលចង់ក្លាយជាដៃគូអាជីវកម្ម ឬធ្លាប់មានក្តីស្រមៃចង់ក្លាយជាម្ចាស់អាជីវកម្មលក់គ្រឿងសម្អាងទាំងអស់ អាចមកចុះឈ្មោះធ្វើជាដៃគូអាជីវកម្មជាមួយក្រុមហ៊ុន ParadiseCosmetic បានដើម្បីទទួលបានផលិតផលយកទៅលក់ដោយមិនបង់ថ្លៃជាមុន។

គួរបញ្ជាក់ផងដែរថា ក្រុមហ៊ុន Luxury Smile Beauty Grop Co., LTD ដែលជាក្រុមហ៊ុនបង្កើតម៉ាកសញ្ញា និងចែកចាយគ្រឿងសម្អាងធំជាងគេបំផុតនៅកម្ពុជា និងមានរោងចក្រផលិតយ៉ាងធំនៅប្រទេសថៃ ជាក្រុមហ៊ុនដែលបានផ្តល់សិទ្ធិចែកចាយគ្រឿងសម្អាងប្រកបដោយគុណភាព សុវត្ថិភាព និងទំនុកចិត្តខ្ពស់ ដល់ក្រុមហ៊ុនក្នុងស្រុកជាច្រើននាពេលបច្ចុប្បន្ននេះ៕

September 17, 2019

មកស្គាល់រថយន្តថ្មីមួយប្រភេទដែលទទួលបានការពេញនិយមខ្លាំងនៅកម្ពុជាពេលថ្មីៗនេះ!

កាលពីពេលថ្មីៗនេះគេសង្កេតឃើញមានរថយន្តថ្មីមួយប្រភេទដែលទើបនឹងមកដល់ប្រទេសកម្ពុជា ថ្វីត្បិតរថយន្តនេះទើបនឹងមានដាក់លក់ក្នុងទីផ្សារ កម្ពុជាក៏ពិតមែន តែវាទទួលបានការពេញនិយមពីសំណាក់អ្នកប្រើប្រាស់រថយន្តគួរឲ្យកត់សម្គាល់ផងដែរ។ រថយន្តនេះទើបតែមកដល់ទីផ្សារកម្ពុជាមិនបានប៉ុន្មានខែផង តែយើងឃើញមានចំនួនរថយន្តដែលចរាចរណ៍នៅលើផ្លូវមិនតិចនោះទេ។បើតាមឲ្យដឹង រថយន្តនេះត្រូវបាននាំចូល និងចែកចាយដោយក្រុមហ៊ុន RMA Cambodia វាជាប្រភេទរថយន្ត SUV ធន់កណ្ដាល ទំនើប ទាន់សម័យ និងមានតម្លៃសមរម្យទៀតផង។ ដោយសារតម្លៃសមរម្យ ហើយថែមទាំងមានបច្ចេកវិទ្យាទំនើបទៀតនោះ ធ្វើឲ្យរថយន្តនេះទទួលបានការគាំទ្រយ៉ាងច្រើនកុះករ និងក្លាយជាដៃគូរប្រគួតប្រជែងដ៏ខ្លាំងសម្រាប់ទីផ្សាររថយន្តថ្មី ក៏ដូចជាទីផ្សាររថយន្តមួយតឹកផងដែរ ព្រោះឥឡូវនេះអ្នកមានលុយត្រឹមតែ 2ម៉ឺនជាងក៏អាចជិះរថយន្តថ្មីគាស់កែសបានដែរ។ បើតាមការឲ្យដឹងពីក្រុមហ៊ុន RMA Cambodia រថយន្តនេះត្រូវបានអតិថិជនកុម្ម៉ង់ទិញយ៉ាងច្រើន ដោយតាមតួលេខពីក្រុមហ៊ុន មានជាង 400 គ្រឿងហើយមកទល់ពេលនេះ។ រថយន្ត SUV ដែលមានឈ្មោះបោះសំលេងមួយនេះជាផលិតផលរបស់ក្រុមហ៊ុន Ford ដែលមានឈ្មោះថា Ford Ecosport ម៉ូដែលឆ្នាំ 2020។ Ford Ecosport ស៊េរីថ្មី 2020 ត្រូវបានរចនារូបរាងថ្មីទាំងស្រុង ទាំងរូបរាងផ្នែកខាងក្នុង ខាងក្រៅ និងជាពិសេសបំពាក់ទៅដោយបច្ចេកវិទ្យាទំនើបៗចុងក្រោយជាច្រើនសំរាប់ជួយសំរួលដល់ការបើកបររបស់លោកអ្នករួមមាន៖ បញ្ឆេះរថយន្តដោយពុំចាំបាច់ប្រើសោរ, បច្ចេកវិទ្យា SYNC 3 និងអេក្រង់ Touch Screen 8 អ៊ីង ,កាមេរ៉ាក្រោយជំនួយចូលចត និងអាច Zoom បាន ចង្កៀងមុខភ្លឺច្បាស់ល្អ ជាមួយនឹងភ្លើង LED បំភ្លឺពេលថ្ងៃ និងមានបំពាក់ហ្វាកូដអូតូ សេនសឺ 8 គ្រាប់ ខាងមុខ និងខាងក្រោយជំនួយចូលចត ប្រព័ន្ធទប់លំនឹងពេលឡើងចំណោត, ប្រព័ន្ធហ្វ្រាំង ABS និងប្រព័ន្ធទប់លំនឹងរថយន្តពេលបើកបរលើផ្លូវកោង និងរអិល, មានពោងសុវត្ថិភាពចំនួន 6 និងចង្កូតបូមអេឡិចត្រូវនិច ធូរងាយស្រួលបើកបរជាដើម។
រថយន្តនេះស័ក្តិសមបំផុតសម្រាប់អ្នកបើកបរក្នុងទីក្រុង អ្នកទើបនឹងចាប់ផ្ដើមមានគ្រួសារហើយមានសមាជិកតិច និងសម្រាប់សិស្សនិស្សិតផងដែរ។ Ford Ecosport ទាំងទំនើប និងទាន់សម័យ ហើយតម្លៃវិញកាន់តែពិសេស ត្រឹមតែ $29,900 ឬលោកអ្នកអាចបង់មុនត្រឹមតែ $5,980 និងបង់ប្រចាំខែត្រឹមតែ $397 តែប៉ុណ្ណោះ ដូចនេះសម្រាប់សិស្សដែលទើបនឹងបញ្ចប់ការប្រឡងសញ្ញាបត្រមធ្យមសិក្សាទុតិយភូមិថ្មីៗនេះ ឪពុកម្ដាយដែលមានបំណងទិញរថយន្តឲ្យកូនៗ អាចពិចារណាទិញរថយន្ត SUV មួយនេះឲ្យកូនៗជាទីស្រលាញ់បាន ហើយមិនចាំបាច់ឈឺក្បាលចំណាយពេលនាំជាងទៅCheck មើលម៉ាស៊ីន និងជើងក្រោម ហើយទ្រាំប្រើរថយន្តចាស់ៗទៀតនោះទេ បើរថយន្តថ្មីតម្លៃធូរប៉ិននឹង លក្ខខណ្ឌបង់រំលោះធូរប៉ិននឹងហើយនោះ ម្យ៉ាងទៀតរាល់ការទិញរថយន្ត Ford ពីក្រុមហ៊ុន Ford អ្នកក៏បានទទួលបានការធានាពីក្រុមហ៊ុនផ្ទាល់ថែមទៀតផង។

September 17, 2019

តើអ្នកឆ្លងទន្លេអាចតុបតែងមុខចូលបន្ទប់ប្រសូតបានដែរឬទេ? តើត្រូវស្អាតបែបណា កុំឱ្យគ្រូពេទ្យស្ដីឱ្យ?

នៅតែជាចំណុចមួយដែលមានការជជែកតវ៉ាគ្នាបានជានិច្ច សម្រាប់ករណី “តុបតែងមុខចូលបន្ទប់ប្រសូត” ដូច្នេះនៅថ្ងៃនេះ ឡារ៉ែន នឹងមកបកស្រាយចម្ងល់ដែលថា ការពិតទៅ តើស្រ្តីមានផ្ទៃពោះដែលត្រូវប្រសូតបុត្រអាចតុបតែងមុខចូលបន្ទប់ប្រសូតបានដែរឬទេ? និងតើបែបណាអាចធ្វើបាន ដោយមិនទៅទើសទែង ឬរំខានការប្រតិបត្តិភារកិច្ចរបស់គ្រូពេទ្យរហូតមានគ្រោះថ្នាក់ដល់កូន ជូនស្រ្តីមានផ្ទៃពោះដែលកំពុងត្រៀមខ្លួនប្រសូតបុត្រទាំងអស់ឱ្យបាត់ងឿងឆ្ងល់ដូចខាងក្រោម…។

ការតុបតែងមុខមាត់ចូលបន្ទប់ប្រសូតនេះ ជារឿងមួយដែលស្រ្តីមានគភ៌ជាច្រើនប្រហែលជាធ្លាប់នឹកឆ្ងល់ខ្លះមកហើយមិនខានថា តើការពិតទៅ “អាចបានទេ?” “ហេតុអីត្រូវហាម?” និង“ហេតុអីអ្នកខ្លះធ្វើបាន ហើយអ្នកខ្លះទៀតធ្វើមិនបាន?” ព្រោះអំឡុងពេលដែលបានឃើញមុខកូនជាលើកដំបូង គឺជាអំឡុងពេលសំខាន់បំផុតក្នុងជីវិតដែលនរណាៗក៏ចង់រក្សារូបភាពនោះទុកជាអនុស្សាវរីយ៍ ដែលមនុស្សជាម្ដាយខ្លួនឯងក៏ចង់ថតរូបលើកដំបូងជាមួយកូនក្នុងបែបនេះដែល “មើលទៅមិនស្លេកស្លាំង ឬទ្រុឌទ្រោម” ដែរ។ ដូច្នេះ ការបានដឹងពីការកំណត់ និងច្បាប់ទម្លាប់ផ្សេងៗ នឹងធ្វើឱ្យស្រ្តីមានផ្ទៃពោះអាចប្រតិបត្តិខ្លួនបានយ៉ាងត្រឹមត្រូវ និងសមរម្យឡើងផងដែរ។

តើស្រ្តីមានផ្ទៃពោះអាចតុបតែងមុខចូលបន្ទប់ប្រសូតបានទេ?
ភាគច្រើន “បន្ទប់វះកាត់ ឬបន្ទប់ប្រសូត” តែងមានច្បាប់វិន័យក្នុងការប្រតិបត្តិយ៉ាងតឹងរឹងដើម្បីភាពស្អាតមានអនាម័យ និងសុវត្ថិភាពរបស់អ្នកជំងឺ ដូច្នេះហើយទើបមន្ទីរពេទ្យភាគច្រើនមិនអនុញ្ញាតឱ្យស្រ្តីមានផ្ទៃពោះតុបតែងមុខមាត់ លាបក្រចកដៃ ជើងចូលបន្ទប់ប្រសូតក្នុងគ្រប់ករណីទាំងអស់ លើកលែងតែគ្រូពេទ្យអនុញ្ញាត។ តែមន្ទីរពេទ្យឯកជនខ្លះអាចអនុលោមឱ្យស្រ្តីមានផ្ទៃពោះអាចតុបតែងមុខមាត់ពេលប្រសូតបុត្របាន តែទាំងអស់នេះ ស្រ្តីមានផ្ទៃពោះគួរតែសួរនាំគ្រូពេទ្យជាមុនថា តើអាចតុបតែងមុខមាត់ចូលបន្ទប់ប្រសូតបានដែរឬទេ? ព្រោះមិនដូច្នោះទេ ស្ត្រីមានគភ៌អាចនឹងត្រូវគ្រូពេទ្យបញ្ជាឱ្យទៅលាងមុខចេញមិនខាន។

ហេតុផលក្នុងការហាមតុបតែងមុខមាត់ លាបក្រចករបស់អ្នកមានផ្ទៃពោះខណៈចូលបន្ទប់ប្រសូត
– ហាមតុបតែងមុខមាត់ : ព្រោះខណៈពេលធ្វើការប្រសូត រាងកាយរបស់ស្ត្រីមានគភ៌នឹងមានការប្រែប្រួលស្ថិតក្នុងសភាវផ្សេងៗ ដូច្នេះការមិនតុបតែងលាបមុខលាបមាត់ គឺដើម្បីឱ្យគ្រូពេទ្យ ឬអ្នកជំនួយការគ្រូពេទ្យអាចសង្កេតមើលទឹកមុខ ពណ៌បបូរមាត់របស់ស្រ្តីមានគភ៌ថា តើមានពណ៌បៃតង ស្វាយ ស្លេកស្លាំងពីការបាត់បង់ឈាម ខ្វះខ្យល់អុកស៊ីហែ្ស៊ន ឬកើតសភាវពិបាកដកដង្ហើម ឬអត់ហ្នឹងឯង។
– ហាមលាបក្រចកដៃ : ព្រោះពេលខ្លះគ្រូពេទ្យនឹងសង្កេតមើលលើក្រចកដៃរបស់ស្រ្តីមានគភ៌ថា តើមានការបាត់បង់ឈាម បាត់បង់ជាតិទឹកអស់ច្រើនដែរឬទេ? មើល Capillary refill (ចុចលើក្រចក ដើម្បីសង្កេតមើលភាពខុសប្រក្រតី មើលថា តើពេលចុចហើយ ក្រចកនឹងត្រឡប់មកជាពណ៌ផ្កាឈូកវិញឬទេ?)។

– បន្ទប់វះកាត់ ឬបន្ទប់ប្រសូត គឺជាទីកន្លែងគ្មានមេរោគ : ការនាំយកវត្ថុប្លែកចម្លែកពីខាងក្រៅចូលទៅ ភាពប្រថុយក្នុងការឆ្លងមេរោគក៏នឹងមានច្រើនឡើងដែរ ព្រោះសូម្បីតែគ្រូពេទ្យ ឬឆ្មបក៏នៅប្ដូរសម្លៀកបំពាក់ថ្មី ប្ដូរស្បែកជើងថ្មីគ្រប់ពេលដែលចូលធ្វើការក្នុងបន្ទប់នេះ។ ការដែលបន្ទប់វះកាត់ ឬបន្ទប់ប្រសូតមានច្បាប់វិន័យក្នុងការប្រតិបត្តិដែលតឹងរឹងច្រើនបែបនេះ គឺដើម្បីភាពស្អាត មានអនាម័យ និងសុវត្ថិភាពរបស់អ្នកជំងឺទាំងអស់។

ចង់ស្រស់ស្អាតពេលចូលបន្ទប់ប្រសូតបែបមិនខុសរបៀបវិន័យ ត្រូវធ្វើយ៉ាងណា?
ក្នុងករណីដែលគ្រូពេទ្យអនុញ្ញាត ស្ត្រីមានគភ៌អាចតុបតែងមុខមាត់ចូលបន្ទប់ប្រសូតបាន តែគួរជាការតុបតែងមុខមាត់បែបស្រាលៗ ថ្លាៗ មិនតុបតែងបែបពោរពេញហូរហៀរ ដិតខ្លាំង លាបម្សៅទ្រនាប់បែបក្រាស់ឃ្មឹកនោះទេ ព្រោះដូចដែលបានរៀបរាប់ប្រាប់ពីខាងដើមរួចមកហើយថា អាចនឹងធ្វើឱ្យពិបាកដល់ការសង្កេតមើលអាការផ្សេងៗ តែបើសិនជាគ្រូពេទ្យមិនអនុញ្ញាតទេ ស្រ្តីមានគភ៌អាចនឹងគូសចិញ្ចើម តរោមភ្នែកតាំងពីមុនដល់ថ្ងៃប្រសូត និងប្រើ Application តុបតែងរូបភាព ជួយឱ្យរូបភាពចេញមកស្រស់ស្អាតជាងស្ថានភាពពិតនៅពេលនោះបាន… អាហ្នឹងមិនបានខុសនឹងបម្រាមទេ៕

September 17, 2019

ប្រធាន CVEA ៖ ទីផ្សារអចលនទ្រព្យនៅកម្ពុជា នៅតែចង់កៀរគរអ្នកវិនិយោគអន្តរជាតិ ជាពិសេសជប៉ុន

យើងឃើញហើយថា នាពេលបច្ចុប្បន្ននេះ ប្រព័ន្ធបច្ចេកវិទ្យា Digital ត្រូវបានក្លាយទៅជាឧបករណ៍មួយដ៏មានសារៈសំខាន់មួយដែលរួមចំណែកយ៉ាងសកម្មផងដែរក្នុងការជួយជំរុញដល់ការទិញ-លក់ឱ្យកាន់តែមានប្រសិទ្ធភាពខ្ពស់ឡើងនៅក្នុងទីផ្សារអចលនទ្រព្យផងដែរ និងជាការបង្ហាញពីការអភិវឌ្ឍបែបថ្មីក្នុងសម័យបច្ចេកវិទ្យា និងជំរុញឱ្យមានលំហូរចូលនៃការវិនិយោគបរទេសមកក្នុងវិស័យអចលនទ្រព្យនៅកម្ពុជា។

សក្តានុពលវិស័យអចលនទ្រព្យនៅកម្ពុជានាពេលបច្ចុប្បន្ន ត្រូវបានក្រុមអ្នកវិនិយោគបរទេស ជាពិសេសវិនិយោគិនជនជាតិចិនបានដាក់ទុនវិនិយោគច្រើនជាងគេ។ ជាពិសេសគម្រោងសំណង់អគារខ្ពស់ៗនៅក្នុងរាជធានីភ្នំពេញ និងខេត្តដែលមានសក្ដានុពលធំៗមួយចំនួន សុទ្ធតែជាគម្រោងអភិវឌ្ឍន៍របស់វិនិយោគិនចិនច្រើនជាងគេទាំងអស់។ តែយ៉ាងណាក្តី បើនិយាយពីវិនិយោគិនបរទេសនៅកម្ពុជា ជប៉ុន គឺជាអ្នកវិនិយោគធំទី2 បន្ទាប់ពីចិន ដូច្នេះការទាក់ទាញវិនិយោគិនជប៉ុនមកបណ្ដាក់ទុននៅកម្ពុជា គឺជារឿងល្អប្រសើរ និងផ្ដល់ប្រយោជន៍ច្រើនដល់កម្ពុជា។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ឬ CVEA បានមានប្រសាសន៍ឱ្យដឹងមុនពេលទៅចូលរួមសន្និសីទអចលនទ្រព្យពិភពលោកនៅប្រទេសជប៉ុនថា៖ “វិនិយោគិនជប៉ុន គឺជាអ្នកវិនិយោគដ៏ហ្មត់ចត់ ហើយមុននឹងគេដាក់ទុនវិនិយោគលើអ្វីមួយគេបានសិក្សាច្បាស់លាស់ណាស់ពីទីផ្សារ និងសក្ដានុពលនៃវិស័យដែលគេបម្រុងនឹងវិនិយោគនោះ។ កត្តាទាំងនេះហើយដែលជំរុញឱ្យពួកយើងត្រូវទាក់ទាញវិនិយោគិនជប៉ុនមកវិនិយោគលើវិស័យអចលនទ្រព្យនេះឱ្យបានច្រើននៅក្នុងប្រទេសកម្ពុជា ដើម្បីផ្ដល់នូវប្រាក់ចំណូលដល់ជាតិរបស់យើង ក៏ដូចជាប្រាក់ចំណូលដល់ប្រជាពលរដ្ឋកម្ពុជាផងដែរ”។

លោកបានមានប្រសាសន៍បន្តថា៖ “នៅក្នុងកិច្ចប្រជុំសន្និសីទអចលនទ្រព្យពិភពលោកនៅប្រទេសជប៉ុនលើកនេះ ខ្ញុំរំពឹងថានឹងហុចផលល្អមកកម្ពុជាច្រើន ជាពិសេសក្នុងវិស័យអចលនទ្រព្យ ហើយសមាជិករបស់សមាគមដែលនឹងចូលរួមប្រជុំក្នុងសន្និសីទនេះ ក៏បានត្រៀមខ្លួនរួចជាស្រេចហើយក្នុងការផ្សព្វផ្សាយ និងបង្ហាញពីសក្ដានុពលនៃវិស័យអចលនទ្រព្យដល់វិនិយោគិនដែលចូលរួមក្នុងសន្និសីទនោះដែរ ក្នុងនោះជប៉ុន គឺជាគោលដៅសម្រាប់ការផ្សព្វផ្សាយរបស់ពួកយើង”។

លោកឧកញ៉ា លឹម ហេង អនុប្រធានសភាពាណិជ្ចកម្មកម្ពុជា បានមានប្រសាសន៍អំពីសក្ដានុពលរបស់វិស័យនេះដែរថា វិស័យអចលនទ្រព្យសម្រាប់វិនិយោគិនបរទេស គឺនៅមានការចាប់អារម្មណ៍ និងមានសម្ទុះខ្លាំងឥតស្រកស្រុតក្នុងប៉ុន្មានឆ្នាំកន្លងមកនេះ គឺមិនមែនមានតែអ្នកវិនិយោគខ្មែរក្នុងស្រុកតែម្នាក់ឯងទេ គឺមានការចូលរួមដោយផ្ទាល់ពីវិនិយោគិនបរទេស ដែលក្នុងនោះយើងឃើញមានចិន ជប៉ុន កូរ៉េ ថៃ ម៉ាឡេស៊ី និងបណ្តាប្រទេសមួយចំនួនទៀត តែដោយឡែកនៅប៉ែកខាងអឺរ៉ុបនៅមានចំនួនតិចនៅឡើយ។

លោកឧកញ៉ាបានបញ្ជាក់ថា៖ “អ្វីដែលជំរុញឱ្យមានវិនិយោគិនបរទេសមកប្រឡូកក្នុងវិស័យអចលនទ្រព្យក្នុងប្រទេសយើង គឺទី1-កត្តាសន្តិភាព និងស្ថិរភាពនយោបាយ។ ទី2-ពាក់ព័ន្ធនឹងប្រព័ន្ធច្បាប់ គឺច្បាប់វិនិយោគរបស់យើងបានបើកចំហឱ្យគេមកវិនិយោគ បើកក្រុមហ៊ុន និងមានសិទ្ធិកាន់កាប់ភាគហ៊ុន100% និងការលើកទឹកចិត្តចំពោះពន្ធលើប្រាក់ចំណេញ(មិនបង់ពី 3ទៅ 9ឆ្នាំ)សម្រាប់អ្នកវិនិយោគនៅកម្ពុជា ដែលនេះជាកត្តាទាក់ទាញ។ ទី3-ក្នុងក្របខ័ណ្ឌអាស៊ាន យើងជាសមាជិក សហគមន៍សេដ្ឋកិច្ចអាស៊ានមួយដែរ ហើយក៏ជាសមាជិករបស់អង្គការពាណិជ្ជកម្មពិភពលោក (WTO) មួយដែរ។ ទី4-ចំពោះតម្លៃដីក្នុងវិស័យអចលនទ្រព្យនេះ បើប្រៀបធៀបទៅនឹងបណ្តាប្រទេសជិតខាងក្នុងតំបន់ ដូចជាថៃ វៀតណាម ជាដើម គឺយើងនៅមានតម្លៃទាបជាងគេ ដែលអាចឱ្យវិនិយោគិនបរទេសគេមកវិនិយោគវិស័យនេះបានប្រាក់ចំណេញ។ កត្តាទាំងនេះហើយដែលធ្វើឱ្យវិស័យអចលនទ្រព្យនៅកម្ពុជាមានសក្ដានុពល និងនៅតែអាចកៀរគរអ្នកវិនិយោគអន្តរជាតិបាន”។

លោក ច្រឹក សុខនីម ក៏បានបញ្ជាក់បន្ថែមទៀតដែរថា “យើងនឹងលើកយកប្រធានបទថា “ហេតុអ្វីត្រូវវិនិយោគនៅកម្ពុជា” មកពិភាក្សានៅពេលនោះ ដោយក្នុងនោះយើងបានត្រៀមក្នុងការពន្យល់ពួកគេឱ្យបានយល់ពីកម្ពុជារួចរាល់ហើយ។ បច្ចុប្បន្ន កម្ពុជាមានលំហូរសាច់ប្រាក់ល្អ ហើយការផ្ដល់អាទិភាពឱ្យវិនិយោគិនបរទេសនៅកម្ពុជាក៏មានលក្ខណៈខុសពីប្រទេសដទៃទៀតក្នុងតំបន់អាស៊ានដែរ។ ហើយចំណុចសំខាន់ដែលវិនិយោគិនបរទេសគួរតែចូលមករកស៊ីនៅក្នុងប្រទេសកម្ពុជានោះ គឺជនបរទេសមានសិទ្ធិបើកក្រុមហ៊ុន និងកាន់កាប់ភាគហ៊ុន100%។ ទាំងនេះហើយដែលវិនិយោគិនបរទេសគួរតែមកវិនិយោគនៅកម្ពុជា”។

គួរបញ្ជាក់ថា បច្ចុប្បន្ននៅក្នុងប្រទេសកម្ពុជាមានគម្រោងរបស់ជប៉ុនធំៗមួយចំនួនដែលទទួលបានការគាំទ្រពីរដ្ឋាភិបាល ដូចជាគម្រោងផ្សារទំនើប អ៊ីអន ម៉ល ភ្នំពេញ ដែលរហូតមកដល់ពេលនេះមានផ្សារទំនើប អ៊ីអន ម៉ល សែនសុខ ក៏បានបើកដំណើរការហើយដែរ និងកំពុងរៀបចំដំណើរការសាងសង់គម្រោងផ្សារទំនើប អ៊ីអន ម៉លទី3 ទៀតផងដែលនឹងស្ថិតនៅប៉ែកខាងត្បូងនៃរាជធានីភ្នំពេញ និងនៅមានគម្រោងវិនិយោគជាច្រើនទៀតដែលជប៉ុនបានបោះទុនវិនិយោគនៅក្នុងប្រទេសកម្ពុជា ហើយក៏ទទួលបានការគាំទ្រពីប្រជាពលរដ្ឋកម្ពុជាផងដែរ៕

September 16, 2019

កាសែតឡារ៉ែន ពាណិជ្ជ លេខ 190

[easy_media_download url=”https://www.lareine.com.kh/wp-content/uploads/2019/11/LRPN_190_Final_For_Web.pdf” force_dl=”1″]

September 16, 2019

RDB ជំរុញការសាងសង់រោងម៉ាស៊ីនកិន និងឃ្លាំងស្តុកស្រូវ ដើម្បីនាំចេញអង្ករឱ្យបាន 1លានតោន

រោងម៉ាស៊ីនកិនស្រូវ ដែលត្រូវបានជ្រើសរើសនៅក្នុងខេត្តចំនួន3 រួមមានខេត្តបាត់ដំបង ខេត្តកំពង់ធំ និងខេត្តព្រៃវែង ត្រូវបានផ្តល់ប្រាក់កម្ចីចំនួន 10លានដុល្លារដោយធនាគារអភិវឌ្ឍន៍អាស៊ី (the Asian Development Bank ;ឬ ADB) ដើម្បីសាងសង់ឃ្លាំងស្តុក និងឡសម្ងួតស្រូវ។

គម្រោងរោងម៉ាស៊ីនកិនស្រូវ បានចុះហត្ថលេខាលើកិច្ចព្រមព្រៀងជាមួយធនាគារអភិវឌ្ឍន៍ជនបទ(Rural Development Bank ឬ RDB) និងកម្មវិធីអភិវឌ្ឍន៍វិស័យពាណិជ្ជកម្មស្រូវធន់នឹងអាកាសធាតុ (ស្រូវ – អេសឌីភី) របស់ក្រសួងសេដ្ឋកិច្ច និងហិរញ្ញវត្ថុ។ ក្រោមកិច្ចព្រមព្រៀងនេះរោងម៉ាស៊ីនកិនស្រូវនឹងសាងសង់កន្លែងស្តុក និងឡសម្ងួត ដោយប្រើប្រាក់កម្ចីរបស់ ADB និងជាកិច្ចព្រមព្រៀងមានសារៈសំខាន់ក្នុងការសម្រេចគោលដៅរបស់រដ្ឋាភិបាលដើម្បីឈានដល់ការនាំចេញអង្ករឱ្យបាន1លានតោនក្នុង 1ឆ្នាំ។

ឃ្លាំងស្តុក និងឡសម្ងួតស្រូវ ធ្លាប់ត្រូវបានសាងសង់នៅខេត្តបាត់ដំបង កំពង់ធំ ព្រៃវែង និងតាកែវ ដែលជាផ្នែកមួយនៃមូលនិធិបន្ទាន់របស់ RDB ដែលជាគម្រោងដឹកនាំដោយរាជរដ្ឋាភិបាលដើម្បីជួយដល់វិស័យនេះ។ មូលនិធិបន្ទាន់របស់ RDB មានទឹកប្រាក់ចំនួន 30លានដុល្លារ។ ប្រាក់កម្ចីក្នុងគម្រោងនេះត្រូវតែសងក្នុងរយៈពេល 10ឆ្នាំ ជាមួយនឹងអត្រាការប្រាក់5%។ គំនិតផ្តួចផ្តើម នេះមានគោលបំណងដើម្បីបង្កើនសមត្ថភាពផ្ទុករបស់រោងម៉ាស៊ីនកិនស្រូវនៅរដូវប្រមូលផល និងបង្កើនតម្លៃស្រូវសម្រាប់កសិករផង។

អ្នកផ្គត់ផ្គង់សំខាន់ៗបានលើកឡើងថា បច្ចុប្បន្ន តម្រូវការអង្ករសរីរាង្គនៅសហភាពអឺរ៉ុប និងទីផ្សារសំខាន់ៗដទៃទៀត ដូចជាសហរដ្ឋអាមេរិក អូស្ត្រាលី និងចិនកំពុងតែកើនឡើង នៅពេលអ្នកប្រើប្រាស់មានការផ្តោតលើបរិស្ថាន និងសុខភាព។

លោក កាន់ គន្ធី អនុប្រធានក្រុមហ៊ុន Amru Riceបានមានប្រសាសន៍ថា ក្រុមហ៊ុនបានចុះ កិច្ចសន្យាកសិកម្មជាមួយកសិករប្រមាណជា 5,000នាក់(5,000គ្រួសារ)ហើយនៅឆ្នាំនេះ ក្រុមហ៊ុនមានបំណងនាំចេញអង្ករសរីរាង្គចំនួន 2ម៉ឺនតោនទៅកាន់ទីផ្សារបរទេសដែល 80 ទៅ 90%នឹងត្រូវបញ្ជូនទៅសហគមន៍អឺរ៉ុប។ យើងកំពុងផ្តល់អាទិភាពដល់ផលិតកម្មស្រូវសរីរាង្គ និងស្រូវដែលផលិត ក្រោមកម្មវិធីស្រូវនិរន្តរភាព។ ពូជស្រូវទាំងនេះនឹងធ្វើឱ្យប្រទេសកម្ពុជាកាន់តែមានភាពអាចប្រកួតប្រជែងបានជាមួយបណ្តាប្រទេសដែលផលិតស្រូវខ្លាំងៗ ដូចជាថៃ វៀតណាម និងឥណ្ឌា ជាដើម។

លោក គន្ធី បានពន្យល់ថា ការកើនឡើងនៃតម្រូវការស្រូវសរីរាង្គត្រូវបានជំរុញដោយការព្រួយបារម្ភលើផលប៉ះពាល់បរិស្ថាននៃការដាំដុះស្រូវ និងផ្តោតសំខាន់ទៅលើផ្នែកសុខភាពអ្នកប្រើប្រាស់ដែលមិនចង់ប្រើប្រាស់ថ្នាំសម្លាប់សត្វល្អិត និងសារធាតុគីមីផ្សេងទៀតដែលត្រូវបានប្រើក្នុងវិស័យកសិកម្ម។

ប្រទេសកម្ពុជា ជាប្រទេសនាំចេញអង្ករសរីរាង្គធំជាងគេលំដាប់ទី5 ទៅកាន់សហភាពអឺរ៉ុប កាលពីឆ្នាំមុន ដោយក្រុមហ៊ុនក្នុងស្រុកជឿជាក់ថា ការនាំចេញនឹងបន្តកើនឡើងនៅប៉ុន្មានឆ្នាំខាងមុខនេះ។យោងតាមតួលេខពីសហគមន៍អឺរ៉ុប ដែលបានចែករំលែកជាមួយសហព័ន្ធស្រូវអង្ករកម្ពុជា បាននាំចេញអង្ករសរីរាង្គចំនួន 8,467តោនទៅប្លុកអឺរ៉ុបកាលពីឆ្នាំមុន ដែលតំណាងឱ្យ 3,9%នៃការនាំចូលអង្ករសរីរាង្គរបស់សហភាពអឺរ៉ុប។ សហរដ្ឋអាមេរិក ក៏ជាប្រទេសនាំចេញអង្ករសរីរាង្គធំជាងគេទៅកាន់សហភាពអឺរ៉ុបផងដែរ ដែលមានចំនួនជិត 70%នៃទីផ្សារអង្ករសរីរាង្គ។

អ្នកនាំចេញអង្ករក្នុងស្រុកបានឱ្យដឹងថា បរិមាណអង្ករសរីរាង្គរបស់កម្ពុជាដែលបានដឹកជញ្ជូនទៅកាន់ប្លុកអឺរ៉ុប បានកើនឡើងក្នុងឆ្នាំនេះ។ មានប្រហែល 90%នៃការនាំចេញអង្ករសរីរាង្គរបស់កម្ពុជាទៅកាន់សហគមន៍អឺរ៉ុបកាលពីឆ្នាំមុន។ ដោយតម្រូវការអង្ករសរីរាង្គនៅសហភាពអឺរ៉ុបកើនឡើងប្រហែល15% ជារៀងរាល់ឆ្នាំនោះ អង្ករសរីរាង្គរបស់កម្ពុជាត្រូវបានងាយស្វែងរកនៅក្នុងសហគមន៍អឺរ៉ុប ព្រោះវាមានគុណភាពល្អ និងអាចតាមដានបាន។ ចំពោះអង្ករផ្កាម្លិះសរីរាង្គ 1តោន មានតម្លៃ 1,500ដុល្លារ ខណៈអង្ករសសរីរាង្គ និងសរីរាង្គវែងត្រូវបានលក់ក្នុងតម្លៃប្រហែល 950ដុល្លារក្នុង 1តោន។

ក្រុមហ៊ុនក្នុងស្រុកបាននាំចេញអង្ករជាចម្បង 3ប្រភេទ គឺអង្ករក្រអូប (493,597តោនត្រូវបាននាំចេញ ឬស្មើនឹង 78.8%នៃការនាំចេញអង្ករសរុប) អង្ករពណ៌សគ្រាប់វែង (105,990តោន ឬ16.9%) និងស្រូវរដូវវែង (26,638តោន ឬ 4.2%)។ ទីផ្សារធំបំផុតសម្រាប់អង្ករកម្ពុជា គឺសហភាពអឺរ៉ុបដែលបាននាំចូលជិត 270,000តោន ស្មើនឹង 42.9%នៃការនាំចេញសរុប។

យោងតាមរបាយការណ៍របស់ក្រសួងកសិកម្មបានឱ្យដឹងថា ការនាំចេញអង្ករសរុបរបស់កម្ពុជាបានកើនឡើង 3.7%ក្នុងរយៈពេល 7ខែនៃឆ្នាំនេះ ដែលឈានដល់ 308,013តោន។ ក្រសួងកសិកម្មក៏បានឱ្យដឹងទៀតដែរថា ពន្ធគយបានដាក់សម្ពាធលើតម្លៃអង្ករកម្ពុជានៅសហភាពអឺរ៉ុប ដែលជាការរារាំងយ៉ាងខ្លាំងដល់ការប្រកួតប្រជែងរបស់ខ្លួន។ ក្រសួងក៏បានបញ្ជាក់នៅក្នុងសេចក្តីប្រកាសព័ត៌មានដែរថា ជាមួយនឹងពន្ធគយទាំងនេះ វិស័យស្រូវអង្ករត្រូវតែផ្តោតលើការកាត់បន្ថយថ្លៃដើម ដើម្បីប្រកួតប្រជែងនៅអឺរ៉ុប ហើយរាជរដ្ឋាភិបាលកម្ពុជា នៅតែបន្តជួយលើអាជីវកម្មស្រូវអង្ករ ជាពិសេសជួយដល់ក្រុមហ៊ុនទាំងអស់ក្នុងការកាត់បន្ថយតម្លៃផលិតកម្មកែច្នៃ និងដឹកជញ្ជូន ដើម្បីធ្វើឱ្យអង្ករក្នុងស្រុកមានតម្លៃអាចប្រកួតប្រជែងបាន៕

September 16, 2019

តុបតែងមុខបែបនារីបស្ចិមប្រទេសវិញម្តងខែកញ្ញានេះ

ខែនេះតុបតែងបែបនារីទាន់សម័យនៃបស្ចិមប្រទេសវិញម្តង ដើម្បីសាកល្បងមើលថា មុខមាត់របស់អ្នកត្រូវជាមួយនឹងការតុបតែងបែបណាមួយដែរ? តោះចឹងសាកតុបតែងភ្នែកបែបពណ៌ក្រមៅៗ បបូរមាត់បែបពណ៌ដិតៗ និងពណ៌ថ្ពាល់បែបស្លេកៗម្តងមើល៎ ដើម្បីឱ្យដឹងថា នារីនៅប៉ែកបស្ចិមប្រទេសគេតុបតែងមុខមាត់ដូចមេ្ត៉ចដែរ។ ដូច្នេះសូមសាកម្តងតុបតែងតាមនារីសម័យថ្មីទាំងអស់គ្នាណា៎…!

September 16, 2019

កម្ពុជា-ម៉ាឡេស៊ី បង្ហាញទំនាក់ទំនងមិត្តភាព និងកិច្ចសហប្រតិបត្តិការជំរុញវិស័យសេដ្ឋកិច្ច ពាណិជ្ជកម្ម វិនិយោគ និងទេសចរណ៍

ប្រមុខរាជរដ្ឋាភិបាលកម្ពុជា និងនាយករដ្ឋមន្ត្រីនៃប្រទេសម៉ាឡេស៊ី បានសម្ដែងនូវការពេញចិត្តចំពោះការរីកចម្រើនគួរឱ្យកត់សម្គាល់នៃទំនាក់ទំនងមិត្តភាព និងកិច្ចសហប្រតិបត្តិការទ្វេភាគីរវាងកម្ពុជា និងម៉ាឡេស៊ីលើវិស័យសេដ្ឋកិច្ច ពាណិជ្ជកម្ម វិនិយោគ ទេសចរណ៍ អប់រំ ការងារ និងវប្បធម៌-ល- និងប្ដេជ្ញាពង្រឹង និងពង្រីកថែមទៀតនូវកិច្ចសហប្រតិបត្តិការជិតស្និទ្ធ ដើម្បីផលប្រយោជន៍ ប្រជាជននៃប្រទេសទាំង2 ក្នុងការរួមចំណែកដល់សន្តិភាព ស្ថិរភាពក្នុងតំបន់ និងនៅលើពិភពលោក។

សម្ដេចតេជោ ហ៊ុន សែន នាយករដ្ឋមន្ត្រី បានថ្លែងក្នុងសន្និសីទសារព័ត៌មានរួមគ្នាក្នុងដំណើរទស្សនកិច្ចលើកទី1 របស់ឯកឧត្ដម ម៉ាហាធា ម៉ូហាម៉ាដ ថាទស្សនកិច្ចផ្លូវការ និងជាប្រវត្តិសាស្ត្រនេះ គឺជាតឹកតាងបង្ហាញអំពីមិត្តភាព សាមគ្គីភាព និងភាពរឹងមាំនៃទំនាក់ទំនងទ្វេភាគីកម្ពុជា-ម៉ាឡេស៊ី។ សម្ដេចតេជោនាយករដ្ឋមន្ត្រីនៃកម្ពុជា បានអបអរសាទរយ៉ាងកក់ក្ដៅចំពោះសមិទ្ធផលដ៏ធំធេងដែលប្រទេសម៉ាឡេស៊ីសម្រេចបានក្រោមមាគ៌ាដឹកនាំដ៏ក្លៀវក្លារបស់ឯកឧត្ដមនាយករដ្ឋមន្ត្រី ម៉ាហាធា ម៉ូហាម៉ាដ។

សម្ដេចតេជោជឿជាក់ថា ជាមួយសម្ទុះនៃការអភិវឌ្ឍ និងគោលដៅទំនើបកម្ម ព្រមទាំង គោលនយោបាយអភិវឌ្ឍន៍លើគ្រប់វិស័យ ប្រទេសម៉ាឡេស៊ីនឹងសម្រេចបានគោលដៅឈានទៅរកឋានៈជាប្រទេសអភិវឌ្ឍន៍ ជាខ្លាសេដ្ឋកិច្ចក្នុងតំបន់អាស៊ីហើយនឹងចូលរួមដើរតួនាទីកាន់តែសកម្ម និងសំខាន់ថែមទៀតនៅក្នុងតំបន់ និងនៅលើឆាកអន្តរជាតិ។

សម្ដេចតេជោនាយករដ្ឋមន្ត្រីក៏បានថ្លែង អបអរសាទរចំពោះទិវាបុណ្យឯករាជ្យជាតិលើកទី62 របស់ប្រទេសម៉ាឡេស៊ី ក៏ដូចជាទិវាផ្សារភ្ជាប់ទំនាក់ទំនងការទូតរវាងប្រទេសកម្ពុជា និងម៉ាឡេស៊ី ថាជាព្រឹត្តិការណ៍ដែលកើតឡើងនៅថ្ងៃតែមួយ គឺ31 ខែសីហា ឆ្នាំ1957។

បច្ចុប្បន្នទំនាក់ទំនងពាណិជ្ជកម្ម និងវិនិយោគរវាងប្រទេសទាំង2(កម្ពុជា-ម៉ាឡេស៊ី)មាន លក្ខណៈល្អប្រសើរ និងមានវត្តមានធុរកិច្ចម៉ាឡេស៊ីជាច្រើននៅកម្ពុជា។ ក្នុងឆ្នាំ2018 ទំហំពាណិជ្ជ កម្មនៃប្រទេសទាំង2 មានចំនួនប្រមាណជា 500លានដុល្លារអាមេរិក ហើយគ្រាន់តែក្នុងឆមាសទី1 ឆ្នាំ2019 ទំហំនេះបានកើនឡើងដល់ជាង 400លានដុល្លារអាមេរិក។ដើម្បីបង្កើនទំហំពាណិជ្ជកម្ម និងវិនិយោគកម្ពុជា-ម៉ាឡេស៊ី ខ្ញុំ និងឯកឧត្ដម ម៉ាហាធា ម៉ូហាម៉ាត់ បានឯកភាពឱ្យស្ថាប័នពាក់ព័ន្ធ ប្រទេសទាំង2 រិះរកវិធីពង្រីកសហប្រតិបត្តិការក្នុងវិស័យនេះបន្ថែមទៀត។

តាមរយៈដំណើរទស្សនកិច្ចនេះ កម្ពុជា និងម៉ាឡេស៊ីបានចុះហត្ថលេខាលើកិច្ចព្រមព្រៀងស្តីពីពន្ធត្រួតគ្នា (DTA) ការចៀសវាងយកពន្ធត្រួតគ្នា និងការទប់ស្កាត់ការគេចវេះពន្ធលើប្រាក់ ចំណូល និងការចុះហត្ថលេខាលើអនុស្សរណៈយោគយល់គ្នាស្តីពីកិច្ចសហប្រតិបត្តិការនៅក្នុងវិស័យទេសចរណ៍ ដើម្បីជំរុញពាណិជ្ជកម្ម និងវិនិយោគរវាងប្រទេសទាំង2។ ក្រៅពីនេះ ក៏មានអនុស្សរណៈយោគយល់គ្នាជាច្រើនទៀតដែលកំពុងរៀបចំ និងត្រៀមចុះហត្ថលេខារវាងថ្នាក់ដឹកនាំនៃប្រទេសទាំង2។

ដោយឡែកចំពោះវិស័យទេសចរណ៍ គឺជាវិស័យដ៏មានសារៈសំខាន់ និងប្រកបដោយសក្តានុពលច្រើន ហើយវិស័យនេះត្រូវបានចាត់ទុកថា ជាវិស័យអាទិភាពដែលប្រទេសទាំង2 អាចទទួលបានផលប្រយោជន៍ពីគ្នាទៅវិញទៅមក។

កាលពីឆ្នាំ2018 កម្ពុជាទទួលបានភ្ញៀវទេសចរអន្តរជាតិជាង 6.2លាននាក់ កើន10.7% ក្នុងនោះទេសចរជាតិម៉ាឡេស៊ីមានចំនួនជាង 20ម៉ឺននាក់កើន12,2%។ ក្នុងរយៈពេល 6ខែដើមឆ្នាំ 2019នេះ កម្ពុជាទទួលបានភ្ញៀវទេសចរអន្តរជាតិជាង 3,3លាននាក់ កើនឡើង11.2% ក្នុងនោះទេសចរជាតិម៉ាឡេស៊ី មានចំនួនជាង 9ម៉ឺននាក់ កើន7%។ ដោយឡែកប្រជាជនកម្ពុជាក៏បានទៅទស្សនាប្រទេសម៉ាឡេស៊ីជាច្រើនម៉ឺននាក់ផងដែរ។

បច្ចុប្បន្នមានការហោះហើរត្រង់ចំនួន 58ជើងក្នុង 1សប្តាហ៍ ពីប្រទេសម៉ាឡេស៊ីមកព្រលានយន្តហោះអន្តរជាតិទាំង3 របស់កម្ពុជា ក្នុងនោះរួមមានព្រលានយន្តហោះអន្តរជាតិខេត្តព្រះសីហនុមានចំនួន 7ជើងក្នុង 1សប្តាហ៍។ ព្រលានយន្តហោះអន្តរជាតិខេត្តសៀមរាប មានចំនួន 11ជើងក្នុង 1សប្តាហ៍ និងព្រលានយន្តហោះអន្តរជាតិភ្នំពេញមានចំនួន 40ជើងក្នុង 1សប្តាហ៍។

ទំហំពាណិជ្ជកម្មរបស់កម្ពុជាជាមួយម៉ាឡេស៊ី នៅតែមានគម្លាតធំ ដោយក្នុងនោះការនាំចេញរបស់កម្ពុជាទៅម៉ាឡេស៊ីក្នុងរយៈពេល 4ឆ្នាំចុងក្រោយ សម្រេចបាន 571លានដុល្លារ ខណៈការនាំចេញរបស់ម៉ាឡេស៊ីមកកម្ពុជាមានរហូត 1.36ពាន់លានដុល្លារ។ នេះបើយោងតាមរបាយការណ៍របស់ក្រសួងពាណិជ្ជកម្ម។

របាយការណ៍ដដែលបង្ហាញថា នៅឆ្នាំ2018 ពាណិជ្ជកម្មរវាងកម្ពុជា និងម៉ាឡេស៊ីមានតម្លៃជាង514លានដុល្លារ ក្នុងនោះកម្ពុជានាំចេញជាង 129លានដុល្លារ ចំណែកការនាំចូលមានតម្លៃជាង 385លានដុល្លារ។ រយៈពេល 6ខែ ឆ្នាំ2019 ការនាំចេញពីកម្ពុជាមានតម្លៃ 60.64 លានដុល្លារ ខណៈការនាំចូលមានរហូតដល់ 255លានដុល្លារ៕

September 16, 2019

ក្រោយដឹងលទ្ធផលបាក់ឌុប សិស្សគួរជ្រើសរើសផ្លូវដើរបែបណា?

ក្រោយពីទទួលបានលទ្ធផលនៃការប្រឡងមធ្យមសិក្សាទុតិយភូមិហើយ អ្វីដែលសិស្សត្រូវគិតបន្តគឺ រៀបចំផ្លូវដើរសម្រាប់ជីវិតក្រោយមធ្យមសិក្សា ដែលដំណាក់កាលនេះជាដំណាក់កាលចាប់ផ្តើមដ៏សំខាន់សម្រាប់រៀបចំជីវិតទៅថ្ងៃអនាគត។ លោក ប៉ិច បូឡែន អគ្គនាយកក្រុមហ៊ុន វេសឡាញ អេឌ្យូខេសិន គ្រុប បានលើកឡើងថា សិស្សានុសិស្សទាំងអស់ដែលបានទទួលលទ្ធផលទាំងជាប់ និងមិនទាន់ជាប់ គួរកុំគិតថា លទ្ធផលនៃការប្រឡងបាក់ឌុបនេះជាការកំណត់វាសនារបស់យើងឱ្យសោះ តែគួរគិតថា វាគ្រាន់តែជាដំណាក់កាលនៃការវាស់ស្ទង់សមត្ថភាពមុននឹងបន្តដំណើរទៅមុខទៀតតែប៉ុណ្ណោះ។

នៅក្នុងដំណាក់កាលនេះ បេក្ខជនទាំងអស់សុទ្ធតែត្រូវបន្តដំណើរទៅមុខដូចគ្នាទាំងអស់ គ្រាន់តែអ្នកជាប់គេមានផ្លូវផ្សេងដើម្បីបន្តដំណើរ ហើយអ្នកមិនបានជាប់ត្រូវបន្តដំណើរដោយវិធីផ្សេងតែប៉ុណ្ណោះ។ តែទោះជាយ៉ាងនេះក្តី អ្វីដែលសំខាន់បំផុតនោះ គឺមិនមែនមើលតែលទ្ធផលចំពោះមុខនោះទេ អ្វីដែលសិស្សានុសិស្សគួរគិត គឺលទ្ធផលនៅថ្ងៃអនាគតថា តើយើងនឹងអាចក្លាយជាមនុស្សបែបណា? ហើយធ្វើការងារនៅទីណានៅថ្ងៃខាងមុខ?។

លោក ប៉ិច បូឡែន បាននិយាយថា៖ “សម្រាប់អ្នកដែលបានប្រឡងជាប់ អាចបន្តការសិក្សាទៅថ្នាក់ឧត្តមសិក្សាដើម្បីចាប់យកអាជីពនានាទៅតាមសមត្ថភាព តែអ្នកមិនទាន់ជាប់ក៏មិនមែនអស់ផ្លូវនោះដែរ។ ប្អូនៗអាចត្រឡប់ទៅសិក្សាសាជាថ្មីម្តងទៀត ព្រោះមានមនុស្សច្រើនណាស់ដែលអាចត្រឡប់ទៅសិក្សាសាជាថ្មី ហើយមកដល់ពេលបច្ចុប្បន្ននេះ ពួកគេទទួលបានជោគជ័យក្នុងជីវិត តែប្រសិនបើប្អូនៗមិនចង់ត្រឡប់ទៅសិក្សានៅថ្នាក់វិទ្យាល័យម្តងទៀតនោះ ប្អូនៗក៏អាចចូលទៅក្នុងសាលាបណ្តុះបណ្តាលវិជ្ជាជីវៈ ឬចូលទៅសិក្សាថ្នាក់បរិញ្ញាបត្ររង មុននឹងបន្តថ្នាក់បរិញ្ញាបត្រ ឬបរិញ្ញាបត្រជាន់ខ្ពស់ជាដើមបាន”។

លោក បូឡែន ក៏បានលើកឡើងផងដែរថា ទន្ទឹមនឹងប្អូនៗគិតគូរពីផ្លូវដែលត្រូវបន្តដំណើរនោះ ការជ្រើសរើសអាជីពការងារក៏ជាផ្នែកមួយសំខាន់ដែរដែលត្រូវយកចិត្តទុកដាក់ ព្រោះការចាប់ផ្តើមឈានជើងចូលក្នុងសាកលវិទ្យាល័យ គឺជាការចាប់ផ្តើមជ្រើសរើសផ្លូវដើរដ៏វែងឆ្ងាយសម្រាប់ជីវិត។ ប្រសិនបើប្អូនចាប់ផ្តើមដើរលើផ្លូវខុស នោះប្អូនៗអាចនឹងខាតពេលវេលា ឬជួបឧបសគ្គច្រើនដែលរាំងស្ទះដល់ដំណើរការនៃការរស់នៅ និងការអភិវឌ្ឍ ព្រោះការសិក្សាកម្រិតឧត្តមសិក្សាមិនមែនរៀនដើម្បីបានឡើងថ្នាក់នោះទេ តែជាការរៀនដើម្បីប្រកបរបរវិជ្ជាជីវៈ ឬរៀនដើម្បីក្លាយជាអ្នកជំនាញដែលមានអាជីពមួយច្បាស់លាស់។

អ្នកជំនាញអប់រំខាងលើបានបន្ថែមទៀតថា ការជ្រើសរើសអាជីពការងារគួរសិក្សាឱ្យបានច្បាស់លាស់ ហើយរើសយកជំនាញណាដែលត្រូវជាមួយចំណង់ចំណូលចិត្ត និងទីផ្សារការងារដែលសង្គមកំពុងត្រូវការ។ ប្អូនៗគួរមើលពីបរិបទសង្គមថា តើសង្គមត្រូវការអ្វី? ហើយសង្គមបត់ទៅណាខ្លះ? ទាំងអស់នេះ គឺដើម្បីធានាថា ក្រោយពេលបញ្ចប់ការសិក្សាយើងអាចទទួលបានការងារដ៏សមរម្យមួយសម្រាប់ជីវិតខ្លួនឯងផង និងដើម្បីចូលរួមជាធនធានមនុស្សប្រកបដោយសក្តានុពលសម្រាប់ដោះស្រាយបញ្ហាសង្គមផង។ បច្ចុប្បន្ននេះ ជំនាញដែលកម្ពុជាកំពុងត្រូវការ គឺជំនាញវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា ហេតុនេះប្រសិនបើប្អូនៗសិស្សានុសិស្សមានទេពកោសល្យ ឬស្រឡាញ់ផ្នែកវិទ្យាសាស្ត្រពិត ប្អូនៗអាចជ្រើសរើសអាជីពការងារណាដែលជាប់ពាក់ព័ន្ធនឹងជំនាញទាំងអស់នេះ ព្រោះកម្ពុជាជាប្រទេសដែលកំពុងស្ថិតក្នុងក្រសែភ្នែករបស់អ្នកវិនិយោគបរទេស។

បច្ចុប្បន្ននេះ អ្នកវិនិយោគជាច្រើនបានបណ្តាក់ទុនបើករោងចក្រសហគ្រាស និងចង្វាក់ផលិតកម្មជាច្រើននៅកម្ពុជា ហើយចរន្តនេះធ្វើឱ្យយើងត្រូវការធនធានមនុស្សផ្នែកវិទ្យាសាស្ត្រជាច្រើនដើម្បីបំពេញតម្រូវការនៃទីផ្សារការងារ។ ក្រៅពីនេះ កម្ពុជាក៏ជាប្រទេសដែលកំពុងមានតម្រូវការផងដែរផ្នែកគីមីចំណីអាហារ និងកសិកម្ម ព្រោះប្រទេសយើងជាប្រទេសដែលមានមូលដ្ឋានគ្រឹះសំខាន់ផ្នែកកសិកម្មជាយូរយារណាស់មកហើយ។ រហូតមកដល់ពេលបច្ចុប្បន្ន ទន្ទឹមនឹងយើងមានដីកសិកម្មច្រើន យើងចង់ឱ្យយុវជនជំនាន់ថ្មីកែប្រែខ្លួនឱ្យក្លាយជាអ្នកជំនាញផ្នែកកសិកម្ម ដែលអាចប្រើប្រាស់បច្ចេកទេសថ្មីៗ ឬវិទ្យាសាស្ត្រដើម្បីធ្វើទំនើបកម្មលើវិស័យកសិកម្ម ដែលអាចទាញផលប្រយោជន៍ពីធនធានដែលយើងមានស្រាប់បានកាន់តែច្រើន។

លោក ប៉ិច បូឡែន បាននិយាយថា៖ “ក្រៅពីនេះ កម្ពុជាក៏កំពុងត្រូវការផងដែរលើជំនាញហិរញ្ញវត្ថុ ហើយជំនាញហិរញ្ញវត្ថុដែលយើងត្រូវការសម្រាប់បម្រើឱ្យវិស័យពាណិជ្ជកម្មពិតប្រាកដនោះគឺជំនាញជាក់លាក់នៅក្នុងវិស័យហិរញ្ញវត្ថុដ៏ធំទូលាយនេះ ដូចជាជំនាញវិភាគហិរញ្ញវត្ថុ ឬជំនាញក្នុងការប្រើ-ប្រាស់បច្ចេកវិទ្យាដើម្បីគ្រប់គ្រងហិរញ្ញវត្ថុរបស់ស្ថាប័នវិនិយោគដែលមានភាពចម្រុះជាតិសាសន៍ជាដើម”។

សហស្ថាបនិកស្ថាប័នអប់រំខាងលើក៏បានលើកឡើងផងដែរថា ប្រសិនបើប្អូនៗសិស្សានុសិស្សមានទេពកោសល្យផ្នែកវិទ្យាសាស្ត្រសង្គមវិញ ប្អូនៗអាចពិចារណាលើជំនាញមួយចំនួនដែលកម្ពុជាកំពុងត្រូវការ ដូចជាជំនាញទេសចរណ៍ ជាដើម ព្រោះកម្ពុជាបច្ចុប្បន្ននេះជាប្រទេសដែលមានសក្តានុពលខ្លាំងខាងផ្នែកទេសចរណ៍។ បើប្រៀបធៀបជាមួយប្រទេសក្នុងតំបន់ កម្ពុជាជាប្រទេសដែលអំណោយផលច្រើនផ្នែកទេសចរណ៍ ទាំងទេសចរណ៍វប្បធម៌ និងទេសចរណ៍ធម្មជាតិ ដែលធ្វើឱ្យកំណើនភ្ញៀវទេសចរកាន់តែច្រើនចូលមកកម្ពុជា។ ចរន្តនេះធ្វើឱ្យវិស័យនេះត្រូវការកម្លាំងពលកម្មជាច្រើន ដើម្បីបំពេញការងារ និងស្រូបទាញយកផលប្រយោជន៍កាន់តែច្រើនសម្រាប់ការអភិវឌ្ឍ៕

September 16, 2019

រដូវភ្លៀងប្រយ័ត្នជំងឺភ្នែកក្រហម

ជំងឺភ្នែកក្រហម ឬហៅថា “រោគរលាកស្បែកត្របកភ្នែក” ជាស្ថានភាពឆ្លងមេរោគចូលភ្នែក ហើយជំងឺនេះច្រើនតែជួបប្រទះឆ្លងមកពីវីរុសបង្កឡើង ឬក៏បណ្ដាលមកពីការប្រតិកម្មនឹងសារធាតុអ្វីម្យ៉ាង ដោយមានអាការធ្វើឱ្យភ្នែកឡើងក្រហម។ ជំងឺនេះច្រើនកើតឡើងដោយចៃដន្យ ដំបូងកើតលើភ្នែកតែម្ខាងទេ បន្ទាប់មកក៏ឆ្លងរាលដាលទៅភ្នែកម្ខាងទៀត។ ជំងឺភ្នែកក្រហមនេះងាយនឹងកើតឡើងខ្លាំងណាស់ ហើយក៏ងាយឆ្លងរាលដាលពីមនុស្សម្នាក់ទៅមនុស្សម្នាក់ទៀតក្នុងផ្ទះ ឬក្នុងសហគមន៍ជាមួយគ្នាផងដែរ។ រហូតមកទល់ពេលនេះ មិនទាន់មានវ៉ាក់សាំងអាចចាក់បង្ការ ហើយក៏មិនទាន់មានថ្នាំព្យាបាលឱ្យជាក់លាក់នៅឡើយទេ ចំពោះអ្នកដែលធ្លាប់មានជំងឺភ្នែកក្រហមម្ដងហើយ ក៏អាចនឹងឈឺឡើងវិញទៀតដែរ ក្រោយពីជាសះស្បើយបាន3-4ខែ។

ជំងឺនេះ ធម្មតាច្រើនកើតមានក្នុងចុងរដូវក្ដៅរហូតដល់ចុងរដូវភ្លៀង ខណៈពេលអាកាសធាតុប្ដូរផ្លាស់ពីក្ដៅទៅភ្លៀង ដែលមានកម្រិតសំណើមខ្ពស់។ នេះក៏ជាឱកាសដែលរាងកាយមនុស្សយើង ជាពិសេសចំពោះអ្នកដែលមានរាងកាយងាយទទួលអារម្មណ៍នឹងអាកាសធាតុ ឆាប់ហេវហត់ ប្រព័ន្ធធន់នឹងជំងឺមានភាពទន់ខ្សោយ ជាដើមគឺងាយនឹងកើតជំងឺបំផុត។ អាការរោគច្រើនជួបប្រទះ គឺអ្នកឈឺមានអារម្មណ៍ពិបាកទ្រាំនៅត្រង់ភ្នែក បន្ទាប់មក នោះមានអាការគ្រើមៗដូចមានគ្រាប់ខ្សាច់នៅក្នុងភ្នែក ចេញអាចម៍ភ្នែកច្រើន ពេលព្រឹកក្រោកពីដំណេកពិបាកបើកភ្នែក ពីព្រោះអាចម៍ភ្នែកនៅជាប់ភ្នែកទាំងពីរ ហើយអាចម៍ភ្នែកមានពណ៌បៃតង ឬពណ៌លឿងតាមសភាពនៃអាការរោគ។ ត្របកភ្នែកហើម ភ្នែកក្រហម ឈឺ ចុកចាប់ឡើងគ្រើមៗចេញពីទឹកភ្នែក។ល។

ដើម្បីការពារសុខភាពភ្នែករបស់អ្នកមិនឱ្យកើតជំងឺនេះ អ្នកត្រូវប្រត្តិបត្តិតាមវិធីល្អៗមួយចំនួនដូចខាងក្រោមនេះ៖
1.កុំញី ឬជូតភ្នែកដោយដៃមិនស្អាត ព្រោះវាអាចនឹងធ្វើឱ្យឆ្លងមេរោគមួយចំនួនទៅក្នុងភ្នែករបស់អ្នក។ ជាការពិតទម្លាប់នេះច្រើនកើតឡើងចំពោះក្មេងៗ ដូចនេះ មាតាបិតាគ្រប់រូបចាំបាច់ត្រូវថែរក្សាក្មេងៗឱ្យនៅឆ្ងាយពីកន្លែងដែលមានដក់ទឹក។
2.ប្រសិនបើអ្នកទទឹកខ្លួនដោយទឹកភ្លៀងក្នុងពេលធ្វើដំណើរ អ្នកត្រូវចាំថា ពេលទៅដល់ផ្ទះ ឬកន្លែងណាមួយ អ្នកគួរតែលាងភ្នែករបស់អ្នកជាមួយទឹកស្អាត និងជូតសម្អាតជាមួយកន្សែងស្ងួតជាចាំបាច់ និងឱ្យបានលឿនបំផុតតាមតែអាចធ្វើទៅបាន។
3. ពាក់វ៉ែនតាជាប្រចាំនូវរាល់ពេលចេញទៅខាងក្រៅ ព្រោះការពាក់វ៉ែនតាមិនមែនសម្រាប់តែការពារកម្តៅថ្ងៃនោះទេ។ ក្នុងករណីដែលអ្នកមានទម្លាប់ ចូលចិត្តពាក់លែន អ្នកគួរតែសម្អាតវាជាប្រចាំ និងឱ្យបានទៀងទាត់ ដើម្បីចៀសវាងការងាយនឹងចម្លងមេរោគ។4. បើមានអ្នកកើតមានបញ្ហាភ្នែក ត្រូវចៀសវាងការប្រើប្រាស់របស់ផ្ទាល់ខ្លួន ដូចជា កន្សែង ឬកន្សែងដៃរួមគ្នាជាដាច់ខាត។
5. បង្កើនភាពស៊ាំ ការពាររាងកាយ ដោយចៀសវាងការទទួលទានអាហារនៅខាងក្រៅញឹកញាប់ ហើយបែរមកទទួលទានអាហារដែលចម្អិនដោយខ្លួនឯងនៅផ្ទះ ជាមួយនឹងបន្លែស្រស់ៗបែបធម្មជាតិ និងផ្លែឈើតាមរដូវកាលជាការប្រសើរបំផុត។
6. ករណីមានអាការរមាស់ភ្នែក ដំបូងអ្នកគ្រាន់តែលាងសម្អាតភ្នែកជាមួយទឹកត្រជាក់ បើមិនមានការធូរស្រាល សូមចៀសវាងប្រើប្រាស់ថ្នាំបន្តក់ភ្នែកដោយខ្លួនឯង។ អ្នកគួរតែទៅជួបជាមួយគ្រូពេទ្យ ដើម្បីពិនិត្យ និងឱ្យគ្រូពេទ្យចេញវេជ្ជបញ្ជាត្រឹមត្រូវ ក្នុងការប្រើប្រាស់ថ្នាំ។7. ត្រូវលាងសម្អាតដៃរបស់អ្នកជាមួយសាប៊ូដុំជាប្រចាំ ពិសេសក្នុងរដូវភ្លៀង ព្រោះវាអាចសម្លាប់មេរោគបានរហូតដល់99%។ ក្រៅពីនេះ អ្នកក៏អាចប្រើអាល់កុលលាងបានដូចគ្នា ដែលវាផ្តល់នូវប្រសិទ្ធភាពបានរហ័ស ប៉ុន្តែគ្រាន់តែវាមិនមានប្រសិទ្ធភាពសម្រាប់វីរុសប៉ុណ្ណោះ។

យកល្អអ្នកជំងឺគប្បីការពារភ្នែក ដោយកុំយកដៃដែលមិនស្អាតមកប៉ះ ឬញីភ្នែក ត្រូវលាងសម្អាតដៃគ្រប់ពេលមុននឹងប៉ះពាល់ភ្នែក មិនប្រើប្រាស់កន្សែងជូតមុខ ឬជូតខ្លួនរួមជាមួយអ្នកដែលកើតជំងឺភ្នែកក្រហម ហើយចំណុចសំខាន់បំផុតត្រូវការពារមិនឱ្យជំងឺឆ្លងរាលដាលពីខ្លួនឯងទៅអ្នកដទៃ។ ជានិច្ចកាល ការការពារតែងតែប្រសើរជាងការព្យាបាល ដូចនេះ អ្នកចាំបាច់ត្រូវធ្វើតាមការណែនាំដូចខាងលើ នោះអ្នកនឹងទទួលបាននូវការរក្សាសម្រស់ និងសុខភាពភ្នែករបស់អ្នកបានយ៉ាងល្អប្រសើរបំផុត៕

September 16, 2019

Author: ធឿន មករា