ធឿន មករា - La Reine Media

ក្រសួងកសិកម្ម និងក្រុមហ៊ុនចិន គ្រោងបង្កើតមជ្ឈមណ្ឌលបង្កាត់ពូជឈើមានតម្លៃនៅកម្ពុជា

រដ្ឋលេខាធិការក្រសួងពាណិជ្ជកម្មបានឱ្យដឹងថា ការផ្តល់សុពលភាពលើឯកសារទស្សនទានយុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិក គឺជាផែនទីបង្ហាញផ្លូវមួយដល់ការអភិវឌ្ឍវិស័យពាណិជ្ជកម្មតាមប្រព័ន្ធអេឡិចត្រូនិកនៅកម្ពុជា។

លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម បានថ្លែងថា៖ “ការវិវឌ្ឍដ៏លឿននៃបច្ចេកវិទ្យាឌីជីថលបានបង្កើតឡើងនូវកាលានុវត្តភាព ក៏ដូចជាការប្រឈមជាច្រើនដែលទាមទារឱ្យមានការគិតគូរឱ្យច្បាស់លាស់លើការប្រព្រឹត្តទៅនៃការងារនានា ការពឹងផ្អែកបច្ចេកវិទ្យាជាមធ្យោបាយ ហើយការងារទាំងនេះត្រូវបានរំលេចយ៉ាងច្បាស់លាស់ប្រកបដោយចក្ខុវិស័យវែងឆ្ងាយ នៅក្នុងយុទ្ធសាស្ត្រចតុកោណដំណាក់កាលទី4 របស់រាជរដ្ឋាភិបាលអាណត្តិទី6 ត្រង់មុំទី3 ដែលតម្រូវឱ្យមានការពិនិត្យ និងត្រៀមខ្លួនសម្រាប់សេដ្ឋកិច្ចឌីជីថល និងឆ្លើយតបនឹងបដិវត្តន៍ឧស្សាហកម្មទី4”។

លោកជំទាវបន្តទៀតថា ជាកិច្ចឆ្លើយតប និងចូលរួមវិភាគទានទៅលើការសម្រេចបាននូវ គោលដៅអាទិភាពទាំងនោះ ក្រសួងពាណិជ្ជកម្មបានសម្រេចចិត្តធ្វើការរៀបចំយុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិក ដើម្បីជាផែនទីបង្ហាញផ្លូវមួយច្បាស់លាស់ដល់ការអភិវឌ្ឍវិស័យពាណិជ្ជកម្មតាមប្រព័ន្ធអេឡិចត្រូនិកនៅកម្ពុជា។

ការរៀបចំយុទ្ធសាស្ត្រនេះដែរ ក៏ជាតម្រូវការដ៏សំខាន់ និងឆ្លើយតបទៅនឹងអនុសាសន៍មួយ ចំនួនទៀតនៅក្នុងឯកសារ និងយុទ្ធសាស្ត្រផ្សេងៗ ដូចជាឯកសារ Cambodia eTrade Readiness Assessment ដែលបានរៀបចំឡើងដោយអង្គការ UNCTAD នៅឆ្នាំ2017 និងថ្មីៗនេះនៅក្នុងសមា ហរណកម្មពាណិជ្ជកម្មកម្ពុជា 2019-2023 ជាពិសេសជំពូកទី11 ស្ដីពីពាណិជ្ជកម្មអេឡិចត្រូនិក និងជំពូកទី12 ស្ដីពីសេដ្ឋកិច្ចឌីជីថល និងបដិវត្តន៍ឧស្សាហកម្មទី4។

សូមបញ្ជាក់ថា បច្ចុប្បន្នប្រព័ន្ធព័ត៌មានវិទ្យាបានដើរតួនាទីយ៉ាងសំខាន់ក្នុងកិច្ចការសម្រួលពាណិជ្ជកម្ម តាមរយៈការកាត់បន្ថយនីតិវិធីរដ្ឋបាល ជួយសន្សំថវិកា និងពេលវេលានាំចេញ-នាំចូល ព្រមទាំងធានាបាននូវតម្លាភាព និងប្រសិទ្ធភាពខ្ពស់ ស្របតាមគោលការណ៍នៃអភិបាលកិច្ចល្អ ដែលជាស្នូលនៃយុទ្ធសាស្ត្រចតុកោណដំណាក់កាលទី4 របស់រាជរដ្ឋាភិបាលកម្ពុជា។

នៅក្នុងបរិបទនៃសេដ្ឋកិច្ចឌីជីថល ប្រទេសជាច្រើនរួមទាំងកម្ពុជាបានកំពុងធ្វើកំណែទម្រង់នីតិវិធីរដ្ឋបាលដោយប្រើប្រាស់ប្រព័ន្ធព័ត៌មានវិទ្យាដើម្បីបង្កើនល្បឿន និងប្រសិទ្ធភាពនៃការដោះដូរទំនិញ និងលើកកម្ពស់ភាពប្រកួតប្រជែងរបស់ខ្លួន។

ដូច្នេះកិច្ចប្រឹងប្រែងរបស់ក្រសួងពាណិជ្ជកម្មក្នុងការធ្វើទំនើបកម្មសេវាសាធារណៈ តាមរយៈការដាក់ឱ្យប្រើប្រាស់នូវប្រព័ន្ធស្វ័យប្រវត្តិកម្មសំខាន់ៗជាមួយប្រព័ន្ធបង់ប្រាក់អេឡិចត្រូនិក និងតភ្ជាប់ទៅកាន់បញ្ជរជាតិតែមួយ ការធ្វើបច្ចុប្បន្នភាពផែនការមេបច្ចេកវិទ្យា (ITC Master Plan) ការដាក់ឱ្យដំណើរការបច្ចេកវិទ្យា Cloud និងការដាក់បញ្ចូលផែនការសកម្មភាពថ្មីៗស្តីពីកិច្ចសម្រួលពាណិជ្ជកម្មនៅក្នុងយុទ្ធសាស្ត្រសមាហរណកម្មពាណិជ្ជកម្មកម្ពុជា (CTIS) ឆ្នាំ2019-2023 ជាដើម។

លោកជំទាវ តឹករ៉េត កំរង ក៏បានបន្ថែមទៀតដែរថា៖“លើសពីនោះទៀត យុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិក ក៏ឆ្លើយតបទៅនឹងតម្រូវការរបស់វិស័យឯកជនដែលត្រូវការឯកសារមួយសម្រាប់បញ្ជាក់ជូនអំពីចក្ខុវិស័យ និងគោលនយោបាយរបស់រដ្ឋាភិបាលក្នុងការអភិវឌ្ឍវិស័យនេះ ដែលជាចលករមួយសំខាន់ក្នុងការសំដៅជំរុញនៃការធ្វើពាណិជ្ជកម្មតាមរយៈការប្រើប្រាស់បច្ចេកវិទ្យា”។

លោកជំទាវ តឹករ៉េត កំរង បានបញ្ជាក់ថា៖“ការរៀបចំយុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិកនៅវេលានេះ ជាការមួយដ៏ត្រឹមត្រូវ គាប់ជួនជាមួយនឹងការជិតសម្រេចបាននូវច្បាប់ស្ដីពីពាណិជ្ជកម្មតាមប្រព័ន្ធអេឡិចត្រូនិក ហើយសេចក្ដីព្រាងច្បាប់ស្ដីពីពាណិជ្ជកម្មតាមប្រព័ន្ធអេឡិចត្រូនិកនេះបានឆ្លងផុតកិច្ចប្រជុំជាមួយគណៈកម្មការជំនាញនៃរដ្ឋសភារួចហើយ បន្ទាប់ទៀតនឹងត្រូវបញ្ជូនបន្តដើម្បីស្នើសុំការអនុម័តដោយរដ្ឋសភាក្នុងពេលដ៏ខ្លីខាងមុខនេះ”៕

September 20, 2019

លើកកម្ពស់ទីផ្សារទេសចរណ៍ដោយជំរុញកម្ពុជាជាគោលដៅទេសចរណ៍ តាមរយៈ ពិព័រណ៍ អន្តរជាតិ

តំណាងគណៈប្រតិភូមកពីក្រសួងទេសចរណ៍បានលើកកម្ពស់ប្រទេសកម្ពុជាឱ្យក្លាយជាគោលដៅទេសចរណ៍ក្នុងអំឡុងពិធីតាំងពិព័រណ៍ទេសចរណ៍អន្តរជាតិលើកទី15 នៅទីក្រុងហូជីមិញ ប្រទេសវៀតណាមដែលបានប្រព្រឹត្តទៅកាលពីថ្ងៃទី4 ដល់ទី7 ខែកញ្ញា ឆ្នាំ2019 កន្លងទៅ។ ក្រសួងទេសចរណ៍កម្ពុជាដែលបានចូលរួមដែរនោះ ក៏បានរៀបចំពិធីជប់លៀងមួយដែលមានឈ្មោះថា “រាត្រីកម្ពុជាឆ្នាំ2019” យ៉ាងអធិកអធមនៅកណ្ដាលក្រុងហូជីមិញ ដើម្បីបង្កើននូវការផ្សព្វផ្សាយពីគោលដៅ និងសក្ដានុពលទេសចរណ៍របស់កម្ពុជាទៅកាន់ក្រុមហ៊ុនទីភ្នាក់ងារទេសចរណ៍ និងភ្ញៀវទេសចរវៀតណាម ក៏ដូចជាជំរុញកិច្ចសហប្រតិបត្តិការលើវិស័យទេសចរណ៍ផងដែរ។

ថ្លែងនៅក្នុងកម្មវិធី“រាត្រីកម្ពុជាឆ្នាំ2019”ដែលធ្វើឡើងនៅខាងក្រៅពិព័រណ៍នេះ ឯកឧត្តម ថោងខុន រដ្ឋមន្ត្រីក្រសួងទេសចរណ៍បានមានប្រសាសន៍ថា “ក្រសួងបានព្យាយាមបង្កើនប្រជាប្រិយភាពរបស់ព្រះរាជាណាចក្រកម្ពុជានៅបរទេសតាមរយៈការចូលរួមពិព័រណ៍ទេសចរណ៍ជុំវិញពិភពលោក។

យើងរំពឹងថា កម្ពុជានឹងស្វាគមន៍វិនិយោគិន និងភ្ញៀវទេសចរមកពីជុំវិញពិភពលោកជាពិសេស យើងអាចរំពឹងថា នឹងមានប្រជាជនមកពីប្រទេសវៀតណាមកាន់តែច្រើន ព្រោះយើងមានផលិតផលទេសចរណ៍ថ្មីៗកំពុងរង់ចាំពួកគេ”។

នៅក្នុងពិធីតាំងពិព័រណ៍នៅទីក្រុងហូជីមិញនេះ អ្នកចូលរួមក្នុងវិស័យទេសចរណ៍មកពីប្រទេសកម្ពុជានិងវៀតណាមបានពិភាក្សា និងធ្វើការជាមួយគ្នាដើម្បីលើកកម្ពស់ទីផ្សារទេសចរណ៍របស់ប្រទេសទាំង2។ ពួកគេបានពិភាក្សាលើកស្ទួយប្រទេសដែលជាទិសដៅតែមួយក្រោមពាក្យស្លោក“ស្រុក2 គោលដៅតែ1” នេះបើយោងតាមការបង្ហោះនៅលើទំព័រហ្វេសប៊ុករបស់ក្រសួងទេសចរណ៍។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍បានមានប្រសាសន៍ថា៖ “ក្រៅពីសក្តានុពលនៃទេសចរណ៍វប្បធម៌ និងធម្មជាតិដ៏សម្បូរបែបហើយ កម្ពុជាមានឆ្នេរសមុទ្រប្រវែង 420គីឡូម៉ែត្រ និងមានមោទនភាពដែលបានក្លាយជាសមាជិកក្លិបឆ្នេរសមុទ្រដែលស្អាតជាងគេលើពិភពលោកដូចវៀតណាមដែរ ដែលស័ក្តិសមនឹងការប្រសិទ្ធនាមថា“កម្ពុជា ព្រះរាជាណាចក្រអច្ឆរិយៈផ្តល់ភាពកក់ក្តៅ” ហើយរាជរដ្ឋាភិបាលក៏បានដាក់ចេញនូវគោលនយោបាយជាតិស្តីពីអេកូទេសចរណ៍ដើម្បីជំរុញវិស័យអេកូទេសចរណ៍ និងទេសចរណ៍សហគមន៍សំដៅទាក់ទាញទេសចរក្នុងតំបន់”។នាដើមឆ្នាំ2019 នេះ ចំពោះការធ្វើដំណើរដោយប្រើប្រាស់យានយន្តផ្ទាល់ខ្លួន (self-driving tour)ពីវៀតណាមមកកម្ពុជា គឺមិនតម្រូវឱ្យបង់ប្រាក់កក់ ឬធានារ៉ាប់រងទេ និងអាចវិលចូលទៅវៀតណាមវិញតាមច្រកអន្តរជាតិរបស់កម្ពុជាណាមួយក៏បាន។

យោងតាមស្មារតីនៃកិច្ចសហប្រតិបត្តិការច្រករបៀងខាងត្បូងនៃមហាអនុតំបន់ទន្លេមេគង្គ កម្ពុជាមានគោលបំណងក្នុងការបង្កើតផ្លូវសមុទ្រជាមួយវៀតណាម។ ប្រទេសកម្ពុជា និងប្រទេសវៀតណាមបានព្រមព្រៀងសហប្រតិបត្តិការលើវិស័យទេសចរណ៍សមុទ្រនៅពេលដែលកំពង់ផែទេសចរណ៍នៅខេត្តកំពតដែលត្រូវបានគេរំពឹងថា នឹងបញ្ចប់ការសាងសង់នៅឆ្នាំ2021 ដែលជាការរួមចំណែកដ៏សំខាន់មួយដល់ការអនុវត្តសេចក្តីប្រកាសអាស៊ានស្តីពីវិស័យទេសចរណ៍តាមនាវា។

ទន្ទឹមនឹងការខិតខំជំរុញការផ្សព្វផ្សាយ ការពង្រឹង និងអភិវឌ្ឍន៍ផលិតផលទេសចរណ៍ ការ សម្រួលការធ្វើដំណើរ និងដឹកជញ្ជូន កម្ពុជាក៏យកចិត្តទុកដាក់ពង្រឹងគុណភាពសេវាកម្មទេសចរណ៍ស្តង់ដាបៃតងផងដែរ។ តាមរយៈចលនាប្រឡងប្រណាំងរមណីយដ្ឋានស្អាត សេវាកម្មល្អ បដិសណ្ឋារកិច្ចល្អនិងការបណ្តុះបណ្តាលអប់រំវិជ្ជាជីវៈ“បុគ្គលិកម្នាក់ជំនាញមួយ” និង“សេវា1 ស្តង់ដា1” ឱ្យស្របតាមស្តង់ដាអាស៊ាន។ នេះបើតាមឯកឧត្តមរដ្ឋមន្ត្រីក្រសួងទេសចរណ៍ដែលបានបញ្ជាក់។

ឯកឧត្តមរដ្ឋមន្ត្រីក៏បានអញ្ជើញវិនិយោគិន និងភ្ញៀវទេសចរគ្រប់ជាតិសាសន៍ ជាពិសេសជនជាតិវៀតណាមទៅវិនិយោគ និងទស្សនានៅកម្ពុជា ដោយឯកឧត្តមបានអះអាងថា “កម្ពុជានឹងទទួលបានវិនិយោគិន និងទេសចរពីគ្រប់ទិសទី ពិសេសទេសចរវៀតណាមឱ្យកាន់តែច្រើនថែមទៀត ដើម្បីជំរុញចំនួនភ្ញៀវទេសចរ។ ក្រសួងក៏កំពុងខិតខំជំរុញប្រទេសកម្ពុជាជាគោលដៅទេសចរណ៍តាមរយៈការចូលរួមពិព័រណ៍អន្តរជាតិ។ កិច្ចខិតខំប្រឹងប្រែងទាំងនេះមានសារៈសំខាន់ណាស់ក្នុងការជំរុញវិស័យទេសចរណ៍”។

កិច្ចសហប្រតិបត្តិការលើវិស័យទេសចរណ៍រវាងប្រទេសទាំង2 មានការរីកចម្រើនគួរឱ្យកត់សម្គាល់ពី 1ឆ្នាំទៅ 1ឆ្នាំតាមរយៈការអនុវត្តកិច្ចសហប្រតិបត្តិការទ្វេភាគីស្តីពីកិច្ចសហការផ្សព្វផ្សាយរួមគ្នា “ប្រទេស2 គោលដៅតែ1” ដែលជាផ្នែកមួយនៃផែនការយុទ្ធសាស្ត្រសម្រេចបាននូវការទទួលបានភ្ញៀវទេសចរវៀតណាមឱ្យបានចំនួន 1លាននាក់មកកម្ពុជា និងភ្ញៀវទេសចរកម្ពុជា 50ម៉ឺននាក់ទៅប្រទេសវៀតណាមនៅឆ្នាំ2020។កាលពីឆ្នាំ2018 ប្រទេសកម្ពុជាទទួលបានភ្ញៀវទេសចរអន្តរជាតិចំនួន 6.2លាននាក់ កើនឡើង 10.7% ពី 1ឆ្នាំទៅ 1ឆ្នាំ។ ក្នុងចំណោមនោះមានភ្ញៀវទេសចរចំនួនប្រមាណ 800,000នាក់ជាជនជាតិវៀតណាម។

ទន្ទឹមគ្នានឹងការតាំងពិព័រណ៍ទេសចរណ៍អន្តរជាតិនេះដែរ វេទិកាស្តីពីការចាប់ផ្តើមអាជីវកម្មទេសចរណ៍ឆ្លាតវៃ (Startup Tourism Forum) ក្នុងចក្ខុវិស័យពិភពលោកក៏ត្រូវបានធ្វើឡើងកាលពីថ្ងៃទី4 ដល់ទី6 ខែកញ្ញា ឆ្នាំ2019 នាទីក្រុងហូជីមិញ សាធារណរដ្ឋសង្គមនិយមវៀតណាមផងដែរ។

ឯកឧត្តម សូ វិសុទ្ធី អនុរដ្ឋលេខាធិការក្រសួងទេសចរណ៍បានបង្ហាញចំណាប់អារម្មណ៍ក្នុងវេទិកាស្តីពីការចាប់ផ្តើមអាជីវកម្មទេសចរណ៍ឆ្លាតវៃដោយប្រើប្រាស់ប្រព័ន្ធបច្ចេកវិទ្យា (SmartTourism Startup) គឺជាឱកាសដ៏ប្រសើរបំផុតមួយដែលថ្នាក់ដឹកនាំ និងប្រតិភូមកពីប្រទេសកម្ពុជា ឡាវ មីយ៉ាន់ម៉ា ថៃ និងវៀតណាម(CLMTV) ជួបគ្នាដើម្បីពិភាក្សាផ្លាស់ប្តូរបទពិសោធ និងព័ត៌មានជាមួយនឹងអ្នកជំនាញ ធុរជន និងវិនិយោគិន អំពីកាវិវឌ្ឍថ្មីៗដ៏ឆាប់រហ័សនៃបច្ចេកវិទ្យាដែលពិភពលោកកំពុងប្រឈមនាពេលបច្ចុប្បន្ន ក៏ដូចជាពង្រឹងកិច្ចសហប្រតិបត្តិការ និងផ្សព្វផ្សាយទេសចរណ៍រួមគ្នា “ប្រទេស5 គោលដៅទេសចរណ៍តែ1” សំដៅប្រើប្រាស់អត្ថប្រយោជន៍ និងនវានុវត្តន៍ថ្មីនៃបច្ចេកវិទ្យាដើម្បីធ្វើឱ្យមានភាពងាយស្រួលរលូនប្រកបដោយភាពឆ្នាតវៃ និងចីរភាពដល់វិស័យទេសចរណ៍ និងឧត្តមភាពប្រកួតប្រជែងក្នុងយុគសម័យនៃបដិវត្តន៍ឧស្សាហកម្មទី4។

តាមរបាយការណ៍ពីក្រសួងទេសចរណ៍បានបង្ហាញថា សម្រាប់រយៈពេល 7ខែនៃឆ្នាំ2019 នេះកម្ពុជាទទួលបានភ្ញៀវទេសចរអន្តរជាតិជាង 3.8លាននាក់ កើនឡើង 11.1% ធៀបនឹងរយៈពេលដូចគ្នាក្នុងឆ្នាំ2018 ដោយតាមការព្យាករនៅឆ្នាំ2020កម្ពុជានឹងអាចទទួលបានភ្ញៀវទេសចរអន្តរជាតិប្រមាណ 7លាននាក់ និងបង្កើតការងារដោយផ្ទាល់ប្រមាណជិត 1លាននាក់។ ទន្ទឹមនេះ តម្រូវការផ្សេងៗក្នុងឧស្សាហកម្មមួយនេះនឹងមានការកើនឡើងបន្ថែមទៀត ដោយក្នុងនោះតម្រូវការបន្ទប់ស្នាក់នៅលំដាប់ស្ដង់ដាអាចនឹងកើនឡើងក្នុងរង្វង់ប្រមាណ7,000 ទៅ 16,000បន្ទប់នៅឆ្នាំ2020 ខាងមុខនេះ៕

September 20, 2019

ពណ៌ក្រចកដ៏ស្រស់ស្អាត ម៉ូដក្រចក បែបទាន់សម័យសម្រាប់នារីៗទាន់សម័យ

សម្រាប់ខែថ្មីនេះ នារីៗយើងអាចលេងម៉ូដក្រចក និងតុបតែងពណ៌ក្រចកឱ្យពេញចិត្តសម្រាប់លម្អកាយសប្បាយចិត្ត និងអាចលេងម៉ូដក្រចកបង្អួតអ្នកនៅជុំវិញខ្លួនថែមទៀតផង។ ម៉ូដក្រចកទាំងអស់នេះក៏អាចតុបតែងសម្រាប់ចូលរួមនៅក្នុងកម្មវិធីតូចធំជាច្រើនទៀតផងដែរ គឺស្អាតៗ ត្រូវចិត្តគ្រប់គ្នា។ តោះនារីៗទាំងអស់ កុំភ្លេចផ្លាស់ប្តូរពណ៌ក្រចក និងម៉ូដក្រចកឱ្យស្រស់ស្អាតសមចិត្តបន្តិចណា៎!!

September 20, 2019

ងៀតសាច់គោឆ្ងាញ់កំពង់ចាម កំពុងល្បី និងលក់ដាច់ខ្លាំងនៅទីផ្សារក្នុងស្រុក ដល់ថ្នាក់ធ្វើមិនទាន់

ក្នុងចំណោមឈ្មួញត្រីងៀតធំៗនៅខេត្តកំពង់ចាមលោក សុខ ឃីម ម្ចាស់“សិប្បកម្មត្រីងៀតឆ្ងាញ់កំពង់ចាម” ជាអ្នកកែច្នៃផលិតផលត្រីធ្វើជាត្រីងៀតដែលត្រូវបានគេទទួលស្គាល់។ លោក សុខឃីម រស់នៅភូមិកំប៉ាល ឃុំសណ្តែក ស្រុកបាធាយ ខេត្តកំពង់ចាមដែលធ្លាប់បានប្រាប់ ឡារ៉ែន ពាណិជ្ជថា ផលិតផលត្រីងៀតឆ្ងាញ់កំពង់ចាមរបស់លោកទទួលបានចំណាប់អារម្មណ៍ច្រើនពីអតិថិជនក្នុងស្រុក ក៏ដូចជាក្រៅស្រុកដែរ ដោយមានការជាវនិងបញ្ជាទិញជាហូរហែមកនោះ ឥឡូវនេះ លោកក៏មានងៀតសាច់គោឆ្ងាញ់កំពង់ចាម ជាផលិតផលថ្មីដែលបានចេញលក់នៅលើទីផ្សារក្នុងស្រុករួចហើយ។

ដោយសារថា អ្នករស់នៅជាប់ទន្លេមេគង្គមានជំនាញខាងការកែច្នៃត្រីស្រស់ទៅជាអាហារបម្រុងដែលអាចរក្សាទុកបរិភោគបានយូរ មានដូចជា ប្រហុក ផ្អក ត្រីឆ្អើរ ត្រីងៀត ត្រីប្រឡាក់ជាដើមនោះ សាច់ងៀតគោឆ្ងាញ់កំពង់ចាម ក៏ជាអាហារបម្រុងដ៏ពេញនិយមមួយដែរ ដែលសម្រាប់ទីផ្សារក្នុងស្រុកត្រូវបានអតិថិជនចាប់ផ្តើមបញ្ជាទិញ និងកំពុងចាប់អារម្មណ៍ជាវផលិតផលរបស់លោកក្នុងចំនួនច្រើនឡើងជាលំដាប់។

អ្នកស្រី ម៉ៃយ៉ា ជាប្រពន្ធ លោកសុខ ឃីម បានប្រាប់ ឡារ៉ែន ពាណិជ្ជ ថា៖“ប្រមាណជា 2-3ឆ្នាំចុងក្រោយនេះ ក្រៅពីអាជីវកម្មត្រីងៀតលក្ខណៈគ្រួសាររបស់ខ្ញុំហើយ ខ្ញុំបានពង្រីកខ្លួនដោយបានធ្វើការផ្សព្វផ្សាយតាមហ្វេសប៊ុក និងYouTube ដោយគ្រួសារខ្ញុំបានធ្វើសាច់ងៀតគោដំណាលគ្នានឹងការធ្វើត្រីងៀតផងដែរ ធ្វើឱ្យមានការទទួលស្គាល់ច្រើនឡើង ហើយទីផ្សារក៏មានការរីកចម្រើនធំជាងមុនដែរ”។

អ្នកស្រី ម៉ៃយ៉ា វ័យ 26ឆ្នាំ ម្ចាស់សិប្បកម្មត្រីងៀតឆ្ងាញ់កំពង់ចាម ក៏បានរំឭកឱ្យដឹងផងដែរថា យើងទើបតែចាប់ផ្តើមធ្វើងៀតសាច់គោក្នុងឆ្នាំនេះទេ។ ការធ្វើសាច់គោងៀតដំបូងនេះ គឺមានតែប្រមាណជា 20 – 30គីឡូក្រាមប៉ុណ្ណោះ ពោលគឺ ធ្វើក្នុង1ថ្ងៃតែ 3 ទៅ 4គីឡូប៉ុណ្ណោះ។ តែមកដល់ពេលបច្ចុប្បន្ន ថ្ងៃខ្លះយើងធ្វើលក់បានក្នុង 1ថ្ងៃរហូតដល់ 10គីឡូក៏មាន ហើយ 2ខែចុងក្រោយនេះ យើងលក់បានដល់ជាង 50គីឡូឯណោះក្នុង 1ខែ។ ឯសាច់គោដែលយកមកផលិតជាសាច់ងៀតវិញនោះ គឺយើងបាននាំយកមកពីបងប្អូនគាត់ជាអ្នកកាប់គោនៅក្នុងខេត្ត ហើយសាច់ងៀតដែលត្រូវធ្វើនោះ គឺធ្វើឡើងពីសាច់គោស្រស់ៗ ថ្មីៗ និងសាច់ល្អៗ។

អ្នកស្រី ម៉ៃយ៉ា បានឱ្យដឹងទៀតថា៖“ការកែច្នៃសាច់គោធ្វើជាសាច់ងៀត គឺមិនចាំបាច់មានរដូវកាលទេ គឺអាចធ្វើបានរាល់ថ្ងៃ ឱ្យតែមានសាច់ល្អ ប៉ុន្តែឥឡូវឱ្យតែមានអ្នកបញ្ជាទិញ គឺយើងត្រូវរៀបចំធ្វើឱ្យម៉ូយជាបន្តបន្ទប់ ដោយសាច់ងៀតមួយចំនួនធំត្រូវលក់ទៅម៉ូយនៅភ្នំពេញ ហើយក៏មានមួយចំនួនទៀត នាំទៅខេត្តផ្សេងៗផងដែរ គឺមាននាំចេញទៅស្ទើរគ្រប់ខេត្តក្រុងក្នុងស្រុកខ្មែរយើង”។

អ្នកស្រីបានបញ្ជាក់ថា៖“នៅឆ្នាំនេះ ខ្ញុំធ្វើសាច់គោងៀតបានច្រើនជាងការរំពឹងទុក ព្រោះថាការបញ្ជាទិញសាច់គោងៀតរបស់ខ្ញុំមិនមែនមានតែអ្នកនៅក្នុងស្រុកទេ តែនៅមានអ្នកនៅក្រៅស្រុកក៏បានបញ្ជាទិញច្រើនគួរសមដែរ ដោយគាត់បានមកផ្ទាល់ខ្លួនឯង ហើយយើងរៀបចំវេចខ្ចប់ជូនគាត់។ សម្រាប់ការបញ្ជាទិញពីអ្នកនៅក្រៅស្រុក គឺមានអ្នក-អាណិកជនពីប្រទេសអាមេរិក កាណាដា អូស្ត្រាលី អុីតាលី ជប៉ុន និងកូរ៉េទៀតផង ហើយវាក៏ជាទីផ្សារដែលអាចរីកចម្រើននៅពេលខាងមុខបាន”។

អ្នកស្រីបានបញ្ជាក់ថា៖“សិប្បកម្មខ្ញុំមិនមែនមានតែផលិតផលត្រីងៀតតែមួយមុខទេ តែខ្ញុំមានផលិតផលកែច្នៃច្រើនមុខទៀត ដូចជាងៀតត្រីរ៉ស់ ងៀតត្រីឆ្តោ ងៀតត្រីកន្ធរ ត្រីប្រឡាក់ ប្រហុក ផ្អក ត្រីផាត់ និងងៀតសាច់គោនេះ ជាដើម ហើយងៀតសាច់គោនេះ និងផលិតផលកែច្នៃពីត្រីជាច្រើនមុខទៀត ក៏ត្រូវបានគេចាប់ផ្តើមបញ្ជាទិញច្រើនឡើង ដែលអាចនឹងធ្វើឱ្យយើងធ្វើមិនទាន់ ដោយក្នុង ខែកក្កដា និងសីហាជាខែដែលមានគេបញ្ជាទិញគ្រប់មុខ ហើយច្រើនៗទៀត”។

ពាក់ព័ន្ធនឹងតម្លៃលើទីផ្សារវិញ អ្នកស្រី ម៉ៃយ៉ាបាននិយាយបន្តថា បន្ទាប់ពីច្នៃរួច សាច់គោងៀតនឹងលក់ចេញក្នុងតម្លៃ 1គីឡូក្រាមថ្លៃ 11ម៉ឺនរៀល(ឬ27$) សម្រាប់សាច់បន្ទះសំប៉ែត រីឯសាច់ងៀតមូលតម្លៃ 1គីឡូក្រាម 10ម៉ឺនរៀល(ឬ25$)។ តម្លៃនេះបើគិតនៅលើទីផ្សារ វាមិនជាថ្លៃជាងសិប្បកម្មកែច្នៃដទៃទៀតទេ ដោយសារតែផលិតផលរបស់យើងមានអនាម័យ និងមានការទទួលស្គាល់ពីអតិថិជន ដែលពួកគាត់អាចទទួលយកបាន។

អ្នកស្រី ម៉ៃយ៉ា ក៏បានឱ្យដឹងដែរថា បច្ចុប្បន្នការ-បញ្ជាទិញ បើគិតជាមធ្យម គឺប្រមាណជា 30គីឡូក្រាមដែរក្នុង 1ខែសម្រាប់សាច់ងៀតមូល ដូច្នេះបើគិតជាប្រាក់ ក៏ប្រមាណជា 3,000,000រៀលដែរ(30គីឡូ x 100.000រៀល)។

ចំពោះការបញ្ជាទិញទៅក្រៅប្រទេសវិញ អ្នកស្រី ម៉ៃយ៉ា បានឱ្យដឹងថា៖“សម្រាប់ងៀតសាច់គោនេះ ខ្ញុំទទួលបានការបញ្ជាទិញទៅក្រៅប្រទេសច្រើនគួរសមដែរ ហើយម្ចាស់អ្នកទិញ គេមកបញ្ជាទិញផ្ទាល់ ដោយយើងនឹងលក់ក្នុងតម្លៃដូចអ្នកមកទិញក្នុងស្រុកដែរ(25-27$)។ យើងមិនអាចផ្ញើតាមប៉ុស្តិ៍ប្រៃសណីយ៍ទៅក្រៅប្រទេសបានទេ(សម្រាប់សាច់គោងៀត)ទាល់តែអ្នកទិញមកទិញយកទៅដោយខ្លួនឯងផ្ទាល់ មិនដូចផលិតផលត្រី-ងៀតដែលយើងអាចផ្ញើតាមប៉ុស្តិ៍បាន”។

អ្នកស្រី ម៉ៃយ៉ា បានបញ្ជាក់ពីគោលបំណងអាជីវកម្មទៅថ្ងៃមុខរបស់អ្នកស្រីថា៖“ខ្ញុំមានគម្រោងពង្រីកសិប្បកម្មធ្វើត្រីងៀត និងសាច់ងៀតរបស់ខ្ញុំឱ្យធំជាងនេះ តែនៅពុំទាន់បានសម្រេចចេញជារូបរាងនៅឡើយទេ។ ប៉ុន្តែខ្ញុំគិតថា វានឹងចេញជារូបរាងនាពេលឆាប់ៗនេះ ដោយយើងចង់ស្វែងរកទីតាំងណាមួយឱ្យងាយស្រួលក្នុងការធ្វើការចែកចាយទៅកាន់ទីផ្សារក្នុងស្រុក ក៏ដូចជាទីផ្សារក្រៅស្រុកដែរ និងដើម្បីសម្រួលដល់ការបញ្ជាទិញឱ្យបានកាន់តែច្រើនឡើងៗជាលំដាប់”៕

September 19, 2019

គម្រោងវិនិយោគសាធារណៈឆ្លើយតបទៅនឹងផែនការយុទ្ធសាស្ត្រអភិវឌ្ឍន៍ជាតិ និងកំណើនម៉ាក្រូសេដ្ឋកិច្ច

គណៈរដ្ឋមន្ត្រីបានផ្តល់ភ្លើងខៀវដល់កម្មវិធីវិនិយោគសាធារណៈដែលនឹងអនុញ្ញាតឱ្យរដ្ឋាភិបាលនិងដៃគូអភិវឌ្ឍន៍ចំណាយទុន 14.4ពាន់លានដុល្លារក្នុងគម្រោងជាង 600គម្រោងក្នុងរយៈពេល 3ឆ្នាំខាងមុខ។ ចំនួននេះ គឺខ្ពស់ជាងកម្មវិធីវិនិយោគសាធារណៈចុងក្រោយចំនួន 9ពាន់លានដុល្លារដែលត្រូវបានអនុម័តដោយគណៈរដ្ឋមន្ត្រី។

កម្មវិធីវិនិយោគសាធារណៈឆ្នាំ2017-2019 ដែលត្រូវបានអនុម័តកាលពីឆ្នាំ2016 មានទឹកប្រាក់ចំនួន 5.23ពាន់លានដុល្លារសម្រាប់វិនិយោគលើ 519គម្រោង។ កម្មវិធីវិនិយោគសាធារណៈសម្រាប់ឆ្នាំ2020-2022 ត្រូវបានអនុម័តកាលពីសប្តាហ៍មុននៅក្នុងកិច្ចប្រជុំគណៈរដ្ឋមន្ត្រីស្ថិតក្រោមអធិបតីភាពរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី។ឯកឧត្តម ផៃ ស៊ីផាន អ្នកនាំពាក្យរដ្ឋាភិបាលបានមានប្រសាសន៍នៅលើទំព័រហ្វេសប៊ុករបស់លោកថា កម្មវិធីនេះនឹងធានាបាននូវការបន្តកំណើនសេដ្ឋកិច្ចរបស់កម្ពុជា។ កម្ពុជា គឺជាប្រទេស មួយក្នុងចំណោមប្រទេសដែលមានសេដ្ឋកិច្ចរីកចម្រើនលឿនបំផុតនៅអាស៊ី។

ឯកឧត្តមមានប្រសាសន៍ថា៖“គោលបំណងរបស់កម្មវិធី គឺដើម្បីធានាកំណើនសេដ្ឋកិច្ចក្នុងរង្វង់7% ក្នុង 1ឆ្នាំ និងកាត់បន្ថយភាពក្រីក្របន្ថែមទៀតតាមរយៈការវិនិយោគលើវិស័យកសិកម្ម និងការអភិវឌ្ឍជនបទ។ ថវិកាចំនួន 53.8%នឹងត្រូវទៅដល់គម្រោងហេដ្ឋារចនាសម្ព័ន្ធ ហើយថវិកាដែលនៅសល់នឹងប្រើសម្រាប់គម្រោងផ្នែកហិរញ្ញវត្ថុសង្គម និងសេវាកម្ម”។

ចំពោះទំហំទឹកប្រាក់ដែលរាជរដ្ឋាភិបាល និងដៃគូអភិវឌ្ឍន៍ត្រូវចំណាយចំនួន 14.4ពាន់លានដុល្លារ ដែលជាការចំណាយដ៏ធំបំផុតនេះនឹងមកដល់ដោយត្រូវបានបែងចែកនៅឆ្នាំ2020 ជាមួយនឹងទឹកប្រាក់ចំនួន 4.5ពាន់លានដុល្លារនៅឆ្នាំ2021 ចំនួន 5.1ពាន់លានដុល្លារ និង 4.8ពាន់លានដុល្លារត្រូវបានរក្សាទុកដោយឡែកសម្រាប់ឆ្នាំ2022។ ដោយមូលនិធិនេះនឹងទៅដល់ការអនុវត្តគម្រោងវិនិយោគចំនួន608គម្រោងដែលក្នុងនោះមាន 171គម្រោងកំពុងដំណើរការ ហើយត្រូវការថវិកាបន្ថែម។នេះបើតាមតួលេខពីក្រសួងរៀបចំដែនដី នគរូបនីយកម្ម និងសំណង់។

គម្រោងទាំងនេះរួមមានគម្រោងហេដ្ឋារចនាសម្ព័ន្ធសំខាន់ៗ ដូចជាផ្លូវអាកាសយានដ្ឋាន ទំនប់ទឹក កំពង់ផែ ស្ពាន និងគំនិតផ្តួចផ្តើមដើម្បីអភិវឌ្ឍវិស័យជលផល កសិកម្ម សុខភាព និងថាមពលរបស់ប្រទេសកម្ពុជា។រហូតមកដល់ពេលនេះ រដ្ឋាភិបាល និងដៃគូអភិវឌ្ឍន៍បានប្តេជ្ញារួមគ្នាសម្រាប់ទឹកប្រាក់ចំនួន 8.4ពាន់លានដុល្លារ ដោយរដ្ឋាភិបាលកំពុងស្វែងរកថវិកាចំនួន 6ពាន់លានដុល្លារបន្ថែមទៀតដើម្បី ចំណាយទៅលើកម្មវិធីទាំងមូល ហើយគេយល់ថា ដៃគូអភិវឌ្ឍន៍ទាំងនេះរួមមានប្រទេសចិន ជប៉ុនកូរ៉េខាងត្បូង និងសហគមន៍អឺរ៉ុបដែលស្ថិតក្នុងចំណោមប្រភពវិនិយោគ និងជំនួយអភិវឌ្ឍន៍ធំជាងគេ។

ទាក់ទងនឹងតុល្យភាព 6ពាន់លានដុល្លារ រដ្ឋាភិបាលរំពឹងថា នឹងទាញយកជំនួយមិនត្រឹមតែ ពីដៃគូអភិវឌ្ឍន៍របស់ខ្លួន ឬរដ្ឋាភិបាលបរទេសប៉ុណ្ណោះទេ ប៉ុន្តែថែមទាំងវិស័យឯកជនទៀតផង។

នៅក្នុងការថ្លែងកាលពីខែមុន លោក ចូន ចាន់នាយកប្រតិបត្តិក្រុមហ៊ុនហ្គោលវូល ខូអិលធីឌី ដែលជាអ្នកគ្រប់គ្រងការវិនិយោគក្នុងស្រុក បានមានប្រសាសន៍ថា ពួកគេបានត្រៀមខ្លួនជាដៃគូ ជាមួយរដ្ឋាភិបាលដើម្បីស្វែងរកប្រភពមូលនិធិសម្រាប់គម្រោងធំៗនៅក្នុងវិស័យហេដ្ឋារចនាសម្ព័ន្ធ និងថាមពល។

សូមបញ្ជាក់ថា កម្មវិធីវិនិយោគសាធារណៈនេះត្រូវបានរៀបចំឡើងដោយក្រសួងផែនការដោយផ្អែកលើធាតុចូលពីក្រសួង និងទីភ្នាក់ងាររដ្ឋាភិបាលផ្សេង។ ជាសរុប បរិមាណទុនតាមឆ្នាំ របស់កម្មវិធីវិនិយោគសាធារណៈ 3ឆ្នាំរំកិល 2020-202 រួមមាន៖ ឆ្នាំ2020 ចំនួន4,556លានដុល្លារអាមេរិក។ ឆ្នាំ2021ចំនួន 5,104ដុល្លារអាមេរិក និងឆ្នាំ2022 ចំនួន 4,827លានដុល្លារអាមេរិក។

បរិមាណទុនសរុបចំនួន 14,487លានដុល្លារអាមេរិក រួមបញ្ចូលនូវបរិមាណទុនដែលបានសន្យាផ្តល់ដោយរាជរដ្ឋាភិបាលកម្ពុជា និងដៃគូអភិវឌ្ឍន៍រួចហើយមានចំនួន 8,597លានដុល្លារអាមេរិក)ក្នុងនោះពីរាជរដ្ឋាភិបាលកម្ពុជាចំនួន 529.8លានដុល្លារអាមេរិក និងពីដៃគូអភិវឌ្ឍន៍ចំនួន 8,067.5លានដុល្លារអាមេរិក) ដោយត្រូវការទុនបន្ថែមចំនួន 5,889.7លានដុលា្លរអាមេរិក)។

យោងតាមវិស័យដូចបានកំណត់ក្នុងផែនការយុទ្ធសាស្ត្រអភិវឌ្ឍន៍ជាតិឆ្នាំ2019-2023 រួមមាន៖- 6.5%នៃតម្រូវការចំណាយវិនិយោគសាធារណៈសរុបសម្រាប់អនុវត្តគម្រោងក្នុងវិស័យសង្គមកិច្ច។

– 32.7% នៃតម្រូវការចំណាយវិនិយោគសាធារណៈ សរុបសម្រាប់អនុវត្តគម្រោងក្នុងវិស័យសេដ្ឋកិច្ច។

– 53.8% នៃតម្រូវការចំណាយវិនិយោគសាធារណៈ សរុបសម្រាប់អនុវត្តគម្រោងក្នុងវិស័យហេដ្ឋា រចនាសម្ព័ន្ធ។

– 7.0% នៃតម្រូវការចំណាយវិនិយោគសាធារណៈ សរុបសម្រាប់អនុវត្តគម្រោងក្នុងវិស័យសេវា និងកម្មវិធីអន្តរវិស័យ។

ដោយឈរលើក្របខ័ណ្ឌទស្សនៈរួមដែលកំណត់ពីតួនាទីដ៏សំខាន់មិនអាចខ្វះបាននៃការវិនិយោគក្នុងការជំរុញកំណើនសេដ្ឋកិច្ច យើងអាចធ្វើសេចក្តីសន្និដ្ឋានជារួមបានថា ការធានាឱ្យមាននូវកម្មវិធីវិនិយោគសាធារណៈមួយ ដែលនឹងត្រូវរួមចំណែកក្នុងការធ្វើឱ្យមានកំណើនសេដ្ឋកិច្ចជាតិទាំងមូល ក៏ដូចជាធ្វើជាឧបករណ៍ផ្នែកគោលនយោបាយសម្រាប់ប្រែក្លាយគោលនយោបាយអាទិភាពជាតិឱ្យទៅជាការពិតជាក់សែ្តង គឺជាប្រការចាំបាច់នៅក្នុងដំណើរការនៃការរៀបចំគោលនយោបាយអភិវឌ្ឍន៍សង្គមសេដ្ឋកិច្ច។ ក្នុងនេះដើម្បីសម្រេចបាននូវចំណុចគោលដៅនៃកំណើនម៉ាក្រូសេដ្ឋកិច្ចជារួម និងតាមវិស័យនៅក្នុងដំណាក់ការផែនការយុទ្ធសាស្ត្រអភិវឌ្ឍន៍ជាតិឆ្នាំ2019-2023៕

September 19, 2019

ធារី ចន្ថាប៊ីន កាន់តែSweetខ្លាំងជាមួយប្រពន្ធ និងកូន

បើតាមការបញ្ជាក់ពីកីឡាករ ធារី ចន្ថាប៊ីន បានបង្ហើបប្រាប់ថា រូបគេបានជាសះស្បើយពីរបួសហើយ ដូច្នេះរូបគេអាចនឹងមានវត្តមានឡើងវិញនៅក្នុងទីលានបាល់ទាត់ក្នុងក្រុមអាជីពរបស់គេ និងក្រុមជម្រើសជាតិផងដែរ ប្រសិនបើមានការកោះហៅ៕

ទោះបីជាមិនអាចលេងបាននៅលើទីលានមែន តែឆ្លៀតក្នុងពេលវេលាសម្រាកថែមុខរបួសរបស់ខ្លួន កីឡាកររូបនេះតែងតែបានផ្តល់នូវសេចក្តីស្រឡាញ់ដ៏ពេញលេញក្នុងនាមជាឪពុក និងប្តីដ៏ល្អជូនទៅមនុស្សសំខាន់ទាំង2 របស់គេ គឺកូន និង ប្រពន្ធ ក្នុងនោះដែរគេក៏បានបង្ហាញរូបភាពក្នុងដំណើរកម្សាន្តជាមួយនឹងក្រុមគ្រួសារដ៏គួរឱ្យច្រណែនទៀតផង។

គួរបញ្ជាក់ដែរថា កីឡាករកូនកាត់ខ្មែរ-បារាំង ធារី ចន្ថាប៊ីន បានបាត់មុខពីទីលានបាល់ទាត់អស់រយៈពេលប្រមាណជា 2ខែមកហើយ ទាំងក្នុងក្រុម Terenganu របស់លីកកំពូលរបស់ម៉ាឡេស៊ី និងក្រុមជម្រើសជាតិកម្ពុជា ដោយសារមានរបួសជង្គង់ចាប់តាំងពីខែកក្កដា ឆ្នាំ2019 មក៕

September 19, 2019

មានហើយ Link ទស្សនាការប្រកួតរបស់ក្រុមកម្ពុជាក្នុងពានរង្វាន់ AFC U16

ក្នុងវគ្គជម្រុះពានរង្វាន់ AFC U16 Championship 2020 ដែលនឹងចាប់ផ្តើមពីថ្ងៃទី18 ដល់ទី22 ខែកញ្ញា ឆ្នាំ2019 នេះនៅទីក្រុងវៀងចន្ទន៍ ប្រទេសឡាវ ក្រុមយុវជនជម្រើសជាតិកម្ពុជាអាយុក្រោម 16ឆ្នាំកម្ពុជាបានស្ថិតនៅក្នុងពូល J រួមជាមួយនឹងប្រទេសចំនួន3 ផ្សេងទៀត មាន ម៉ាឡេស៊ី ឡាវ និងជប៉ុន។

ចំពោះការប្រកួត AFC U16 Championship 2020 វគ្គជម្រុះ Group J រវាង ក្រុមបាល់ទាត់ជម្រើសជាតិម៉ាឡេស៊ីអាយុក្រោម 16ឆ្នាំនឹងក្រុមយុវជនគោព្រៃកម្ពុជាអាយុក្រោម 16ឆ្នាំដែរនោះ នឹងធ្វើឡើងនៅល្ងាចថ្ងៃទី18 ខែកញ្ញា ឆ្នាំ2019 នេះ វេលាម៉ោង 6:30ល្ងាចនៅពហុកីឡដ្ឋានជាតិ KM16។

លិងក៍សម្រាប់ទស្សនាការប្រកួតគឺ៖ https://mycujoo.tv/video/lao-football-federation?id=73613&fbclid=IwAR3sU4qjVv67BuDPJEHezFs2oZ0tCMn9To4Uk18gcoLI9ow837wv0KZaGf4

September 19, 2019

បន្តិចទៀតពហុកីឡដ្ឋានជាតិនឹងមានកៅអីស៊េរីថ្មីសម្រាប់ក្រុមប្រកួត ហើយកៅអីថ្មីសម្រាប់ទស្សនិកជន

គណៈកម្មការប្រតិបត្តិរបស់សហព័ន្ធកីឡាបាល់ទាត់កម្ពុជាបានបើកការប្រជុំជុំវិញផែនការសម្រាប់អភិវឌ្ឍន៍សហព័ន្ធ។ ដោយក្នុងនោះមានការលើកឡើងនូវចំណុចសំខាន់ៗមួយចំនួនដូចជា៖

-ការត្រៀមកែលម្អពហុកីឡដ្ឋានជាតិ ដោយសហព័ន្ធនឹងដាក់សំណើទៅកាន់ក្រសួងសេដ្ឋកិច្ច និងហិរញ្ញវត្ថុសម្រាប់ការគាំទ្រផ្នែកហិរញ្ញវត្ថុក្នុងការរៀបចំកៅអីអង្គុយរបស់ទស្សនិកជន កៅអីបច្ចេកទេសរបស់កីឡាករ អាជ្ញាកណ្ដាល និងកម្រិតពន្លឺនៅទូទាំងពហុកីឡដ្ឋានជាតិ ដើម្បីឱ្យស្របតាមលក្ខណៈស្តង់ដាបច្ចេកទេសរបស់សហព័ន្ធកីឡាបាល់ទាត់ពិភពលោក (FIFA ) និងសហព័ន្ធកីឡាបាល់ទាត់ទ្វីបអាស៊ី (AFC)។

គួរបញ្ជាក់ថា រាល់ការប្រកួតម្តងៗ កម្ពុជាតែងតែជួបបញ្ហាជាមួយនឹងមន្ត្រីដឹកនាំការប្រកួតមកពីសហព័ន្ធកីឡាបាល់ទាត់ពិភពលោកជាប់ជានិច្ច៕

September 19, 2019

ក្រុមហ៊ុន VIVO ប្រកាសផ្លូវការ ស្មាតហ្វូន “អេក្រង់ទឹកធ្លាក់” កោងខ្លាំងមិនធ្លាប់មាន

ក្រុមហ៊ុនផលិតទូរស័ព្ទ VIVO បានប្រកាសចេញជាផ្លូវការនូវស្មាតហ្វូនជំនាន់ចុងក្រោយ 2ម៉ូដែល គឺ NEX 3 និង NEX 3 5G នៅលើទីផ្សារប្រទេសចិន កាលពីថ្ងៃទី17 ខែកញ្ញា កន្លងទៅថ្មីៗនេះ។ងាកមកមើលពីរូបរាងរបស់ស្មាតហ្វូននេះវិញ ទាំង NEX 3 និង NEX 3 5G បំពាក់អេក្រង់ទំហំ 6.8អ៊ិញ FullHD+ ប្រភេទ AMOLED (ដូចស្មាតហ្វូនដទៃដែរ) ប៉ុន្តែរូបរាងវារាងកោងខ្លាំង ដែលក្រុមហ៊ុនឱ្យឈ្មោះថា “Waterfall FullView Display” សូម្បីតែ Samsung ដែលជាជើងខ្លាំងខាងផលិតអេក្រង់ AMOLED នេះក៏ដោយ ក៏មិនធ្លាប់មានយកមកដាក់លើស្មាតហ្វូនរបស់ខ្លួននៅឡើយដែរ (Samsung ធ្លាប់ប្រកាសចេញអេក្រង់ Edge តែមិនកោងដល់ម្លឹងដែរ)។

ស្មាតហ្វូន VIVO NEX 3 នេះដែរ មានបំពាក់កាមេរ៉ាចំនួន3 នៅផ្នែកខាងក្រោយ ដែលមានកាមេរ៉ាមេ 64MP និងកាមេរ៉ា 2ទៀតមានកម្រិត 13MP ជាប្រភេទ Wide-Angle និង Telephoto។

ឯកាមេរ៉ាមុខ Selfie ជាប្រភេទ Pop-Up (ហូតឡើងលើ)មានបង្កប់ក្នុងតួខ្លួនដែលមានទំហំ 16 MP មានបំពាក់មុខងារ Portrait Master ហើយវាមានសមត្ថភាពថតរូបភាពប្រភេទ Wide បានទៀតផង។ ប្រើបន្ទះឈីបចុងក្រោយបង្អស់គឺ Snapdragon 855 Plus ថាមពលថ្មទំហំ 4500mAh និងកម្លាំងសាកថ្មល្បឿនលឿនដល់ 44វ៉ាត់។ស្មាតហ្វូនថ្មីសន្លាងទាំង2 នេះរាងថ្លៃបន្តិចហើយ គ្រាន់តែតម្លៃចាប់ផ្តើមនៅចិន (ជម្រើស RAM 8GB/128GB) គឺ 705ដុល្លារ(4,998យន់) ចំណែកម៉ូដែល 5G (ជម្រើស RAM 8GB/256GB) គឺ 805ដុល្លារ(5,698យន់) និងម៉ូដែល 5G (ជម្រើស RAM 12GB/256GB) គឺ 875ដុល្លារ(6,198យន់)៕

សូមទស្សនាវីដេអូបង្ហាញរូបរាងពេញខាងក្រោមនេះ៖

September 19, 2019

គូប្រជែង PCX ចេញថ្មី មានប្រព័ន្ធហ្វ្រាំង ABS តម្លៃល្មមគិតគូរបាន

កាលពីពេលថ្មីៗនេះ ក្រុមហ៊ុន Yamaha បានប្រកាសចេញម៉ូដែល Nmax ABS ឆ្នាំ2019 ដែលមានជម្រើស 2ពណ៌ថ្មីឱ្យជ្រើសរើស(ប្រផេះលាយខ្មៅ និងសលាយខ្មៅ) ព្រមទាំងប្រកាសឱ្យដឹងពីតម្លៃច្បាស់ៗទៀតផង។

ចំពោះ Yamaha NMax ស៊េរីថ្មីនេះ មិនមានមានការកែប្រែរូបរាងខាងក្រៅប៉ុម្មានទេ នៅតែមានប្រើកុងទ័រឌីជីថល គួបផ្សំនឹងការបន្ថែមជម្រើសពណ៌ថ្មីតែប៉ុណ្ណោះ។រីឯលក្ខណសម្បត្តិផ្សេងៗលើម៉ូតូនេះ ក៏មិនសូវខុសពីជំនាន់ប៉ុន្មានដែរ មានដូចជា ដំណើរការដោយម៉ាស៊ីនចំណុះ 155CC ជាមួយបច្ចេកវិទ្យាសន្សំសំចៃសាំង Blue Core អាចផលិតកម្លាំងបាន 15សេះ។ ហ្វ្រាំងម៉ូតូជាប្រភេទហ្វ្រាំងថាស ហើយម៉ូដែលនេះក៏មានជម្រើសជាហ្វ្រាំង ABS ផងដែរ។ ប្រើសម្បកកង់គ្មានពោះវៀន និងមានបំពាក់ដោយអំពូលភ្លើង LED ទៀតផង។ វាអាចផ្ទុកប្រេងឥន្ធនៈបាន 6.6លីត្រ និងមានទម្ងន់ 127គីឡូក្រាម។

ចំពោះតម្លៃចាប់ផ្តើមគឺ 3,200ដុល្លារ៕

September 19, 2019

Author: ធឿន មករា