Author: ធឿន មករា

ការត្រៀមរបស់ប្រើប្រាស់សម្រាប់ទារកទើបនឹងកើត
សម្រាប់អ្នកម្តាយថ្មីថ្មោង ការត្រៀមរៀបចំរបស់ប្រើប្រាស់ ទុកសម្រាប់កូនតូចជាទីស្រឡាញ់ ដែលទើបនឹងបើកភ្នែកមើលពិភពលោកថ្មីៗនោះ គឺជារឿងសំខាន់ខ្លាំងណាស់ តែសូមអ្នកម្តាយក្មេងវ័យ កុំបារម្ភអី ថ្ងៃនេះយើងមានអត្តបទល្អៗ មកជម្រាបជូន ដើម្បីជាជំនួយស្មារតីដល់អ្នកម្តាយក្នុងការមើលថែទាំកូនតូចយ៉ាងមានសុវត្ថិភាព…សូមតាមដានដូចតទៅ៖
1-ខោកន្ទបទឹកនោម យ៉ាងតិចណាស់2ឡូ
ដោយសាតែទារកដែលទើបនឹងកើត រហូតដល់អាយុ 3ខែ ត្រូវបញ្ចេញទឹកនោមក្នុង 1ថ្ងៃ ពី 12-18ដង(មិនរាប់ពេលយប់)នោះ ដូច្នេះត្រូវមានខោកន្ទបទឹកនោម ទុកសម្រាប់ផ្លាស់ឱ្យកូនតូច ប្រមាណជា 12-20ខោ និងត្រូវមានទុកសម្រាប់ បោកប្រើផ្លាស់ប្តូរមួយចំនួនទៀតផង តែបើមិនសូវមានពេលវេលាបោកទេនោះ គួរមានខោកន្ទបសម្រាប់កូន ប្រមាណជា 3ឡូទើបសមល្មម។
2-ក្រណាត់កន្ទប (រាង 4ជ្រុង) យ៉ាងតិច 6-12បន្ទះ
បើមានខោកន្ទបទឹកនោមចំនួនច្រើនហើយ គួរតែមានក្រណាត់កន្ទប រាង 4ជ្រុងទុកប្រើបន្តិចបន្តួចក៏បាន ដើម្បីទុកសម្រាប់ជូតខ្លួនកូនតូច ឬសម្រាប់ក្រាលពីក្រោមខ្លួនកូន។
3-ដបទឹកដោះគោ ចំនួន 5 (សម្រាប់ទារកដែលបៅដោះម្តាយ) និង 12ដប (សម្រាប់ទារកដែលបៅទឹកដោះគោ)
-ដបទឹកដោះគោខ្នាតតូច ចំនួន5 (សម្រាប់ទារកដែលបៅដោះម្តាយ) ទុកសម្រាប់ដាក់ទឹកឆ្អិនឱ្យកូនតូចបៅ និងទុកសម្រាប់លាង ប្រើផ្លាស់ប្តូរ ។
-ដបទឹកដោះគោខ្នាតធំ ចំនួន12 (សម្រាប់ទារកដែលបៅទឹកដោះគោ) ទុកសម្រាប់ដាក់ទឹកឆ្អិនឱ្យកូនតូចបៅ និងទុកសម្រាប់ឆុងទឹកដោះគោឱ្យកូនតូចបៅ ព្រមទាំងទុកសម្រាប់លាងប្រើផ្លាស់ប្តូរ។
4-ច្រាសលាងដបទឹកដោះ ចំនួន1
គួរជ្រើសរើសទិញច្រាស ដែលខាងចុងមានសរសៃច្រាសធ្វើពីប្លាស្ទិក ព្រោះអាចដុសសម្អាតកំណកម្សៅទឹកដោះគោបានស្អាតជាងច្រាសដែលខាងចុងជាអេប៉ុង។
5-ពូកគេងប្រភេទអេប៉ុង ដែលដាក់ឱ្យកូនតូចគេង ហើយមិនទ្រុឌទៅក្រោមជ្រៅពេក
ដោយសាតែ បើប្រើពូកដែលទន់ និងទ្រុឌចុះទៅក្រោមខ្លាំងពេក អាចនឹងធ្វើឱ្យសាច់ពូកខ្ទប់មុខ ឬខ្ទប់ច្រមុះកូនតូច នៅពេលដែលដាក់កូនតូចឱ្យគេងផ្អៀង ឬគេងផ្កាប់នោះ តែក៏មិនគួរជ្រើសរើសយកពូកណាដែលរឹងជ្រុលពេកដែរ។
6-ក្រណាត់កៅស៊ូ សម្រាប់ទ្រាប់ 1បន្ទះ
ក្រណាត់កៅស៊ូ ទុកសម្រាប់ទ្រាប់ពីក្រោម មិនឱ្យទឹកនោមកូនតូច ហូរជ្រាបទៅដល់ពូក តែគួរយកក្រណាត់កន្ទបរាង 4ជ្រុងមកដាក់ទ្រាប់ពីក្រោមខ្លួនកូនតូចជាមុនសិន ដើម្បីកុំឱ្យក្រណាត់កៅស៊ូ ប៉ះជាប់ផ្ទាល់នឹងខ្លួនកូនតូច ជាហេតុបណ្តាលឱ្យកូនតូចក្តៅស្អុះ និងបែកញើសបាន។
7-អាវទារក មានខ្សែចងពីក្រោយ ចំនួន 6-10អាវ
អាវដែលមានខ្សែចងពីក្រោយ គឺជាអាវដែលល្អសម្រាប់ទារកទើបនឹងកើត ដោយសាតែវាងាយស្រួលពាក់ តែអ្នកម្តាយ មិនគួរមានច្រើនពេកទេ ព្រោះទារកទើបកើតថ្មី រហូតដល់អាយុ 1ខែ ឆាប់ធំធាត់ខ្លាំងណាស់។
8-កន្សែងសម្រាប់រុំខ្លួនទារក ចំនួន2
មិនគួរមានច្រើនពេកទេ ដោយសារតែភាគច្រើន អ្នកម្តាយត្រូវប្រើប្រាស់កន្សែងរុំខ្លួនទារកនេះ តែក្នុងអំឡុងពេលដែលទារកទើបនឹងកើតថ្មី រហូតដល់អាយុបាន 1ខែប៉ុណ្ណោះ។
9-មួក ស្រោមដៃ ស្រោមជើង
ចូរជ្រើសរើសយកមួកណា ដែលសមល្មមនឹងក្បាលកូនតូច មិនរលុងខ្លាំងពេក និងគួរមានយ៉ាងតិច2 សម្រាប់ពាក់គេងពេលយប់។ ស្រោមដៃត្រូវមានយ៉ាងតិច 4-6គូ និងស្រោមជើងយ៉ាងតិច 3គូ ទុកសម្រាប់ពាក់ពេលគេងយប់ និងពេលចេញទៅក្រៅផ្ទះ។
10-ចានអាងសម្រាប់ផ្ងូតទឹកកូនតូច ចំនួន1
គួរផ្ងូតទឹកកូនតូច ដោយទឹកក្តៅអ៊ុនៗជានិច្ច
11-អេប៉ុងប្រភេទទន់ ចំនួន 1ដុំ
ទុកសម្រាប់ដុសសម្អាតខ្លួនកូន យ៉ាងថ្នមៗ
12-សំឡី ទុកសម្រាប់ជូតគូទកូនតូច 1កញ្ចប់ និងដុំសំឡី ដែលមានដង 1កញ្ចប់តូច
សំឡី 1កញ្ចប់ធំ ទុកសម្រាប់ជូតគូទកូនតូច ក្រោយពេលកូនជុះរួច និងទុកជូតអវយវៈផ្សេងៗ ឯដុំសំឡីដែលមានដង ទុកសម្រាប់ជូតកន្លែងរន្ធច្រមុះ រន្ធត្រចៀក…ល…របស់កូនតូច។
13-សាប៊ូដុសខ្លួនសម្រាប់ទារក និងសាប៊ូកក់សក់សម្រាប់ទារក
ចូរជ្រើសរើសប្រើសាប៊ូទឹកក្នុងដប បែបមានក្បាលសង្កត់ ព្រោះងាយស្រួលក្នុងការប្រើប្រាស់៕
January 20, 2021
ឥណ្ឌា បង្ហាញគម្រោងជំនួយ និងវិនិយោគជាច្រើននៅកម្ពុជា
ក្នុងឱកាសចូលជួបសម្តែងការគួរសមជាមួយសម្តេចអគ្គមហាពញាចក្រី ហេង សំរិន ប្រធានរដ្ឋសភា លោកជំទាវបណ្ឌិត ដេវីយ៉ានី ឧត្តាំ ខូប្រាហ្គាដ (H.E. Mrs. Devyani Uttam Khobragade) ឯកអគ្គរដ្ឋទូត ដែលទើបតែងតាំងថ្មី នៃសាធារណរដ្ឋឥណ្ឌា ប្រចាំនៅព្រះរាជាណាចក្រកម្ពុជា បានជម្រាបសម្តេចពីគម្រោងជំនួយ និងការវិនិយោគជាច្រើន របស់ប្រទេសឥណ្ឌានៅកម្ពុជា។ ពិសេសលោកជំទាវ បានប្តេជ្ញាចិត្តនៅក្នុងការពង្រឹងពង្រីកចំណងមិត្តភាព កិច្ចសហប្រតិបត្តិការជាប្រពៃណី ដែលមានតាំងពីយូរលង់ណាស់មកហើយ រវាងប្រទេសទាំង2 ឱ្យកាន់តែរឹងមាំថែមទៀត ទាំងនៅស្ថាប័ននីតិប្បញ្ញត្តិ និងនីតិប្រតិបត្តិ។
នៅក្នុងជំនួបសវនាការ នាព្រឹកថ្ងៃទី២០ ខែមករា ឆ្នាំ២០២១នេះ លោកជំទាវបណ្ឌិត ដេវីយ៉ានី ឧត្តាំ ខូប្រាហ្គាដ បានលើកឡើងថា ឥណ្ឌាមានគម្រោងចូលរួមជួយជួសជុលអភិរក្សប្រាសាទព្រះវិហារ ដែលជាបេតិកភណ្ឌពិភពលោក ចូលរួមជំរុញលើកកម្ពស់ការប្រើប្រាស់ទឹកស្អាតនៅជនបទ និងជួយដល់វិស័យសុខាភិបាល ការប្រយុទ្ធប្រឆាំងជំងឺគ្រុនចាញ់ និងការកសាងសមត្ថភាពសមាជិក-សមាជិកានៃរដ្ឋសភា និងមន្ត្រីរាជការ ជាដើម។
ជាមួយគ្នានេះ លោកជំទាវ បានប្តេជ្ញាថា នឹងខិតខំជំរុញដល់អ្នកវិនិយោគិនពីប្រទេសឥណ្ឌា មកបណ្ដាក់ទុននៅកម្ពុជា ក្នុងវិស័យសុខាភិបាល ជំរុញឱ្យមានជើងហោះហើរត្រង់ រវាងប្រទេសទាំង2។ លោកជំទាវ ឯកអគ្គរដ្ឋទូត បានជម្រាប សម្តេចដែរថា ឥណ្ឌានឹងលើកកម្ពស់ការទំនាក់ទំនងរវាងប្រជាជន និងប្រជាជន តាមបែបឌីជីថល នៅក្នុងនោះមាន ប្រជាជនកម្ពុជា និងប្រជាជនឥណ្ឌា ប្រជាជនឥណ្ឌា និងប្រជាជនក្នុងតំបន់អាស៊ាន ហើយឥណ្ឌា នឹងកសាងផ្លូវគមនាគមន៍ដ៏ធំមកកាន់បណ្តាប្រទេសសមាជិកអាស៊ានផងដែរ។
លោកជំទាវ ឯកអគ្គរដ្ឋទូត បានជម្រាប សម្តេចប្រធានរដ្ឋសភា ផងដែរថា ចំពោះសំណើរបស់សម្តេចនាយករដ្ឋមន្ត្រី ដែលបានស្នើដល់ប្រទេសឥណ្ឌា ជួយផ្តល់ជំនួយមនុស្សធម៌វ៉ាក់សាំងការពារកូវីដ-១៩ ដល់ប្រទេសកម្ពុជានោះ លោកជំទាវ នឹងរាយការណ៍ជូនថ្នាក់ដឹកនាំឥណ្ឌាបានជ្រាប និងសម្រេចនៅក្នុងកិច្ចការនេះ។
សម្តេចអគ្គមហាពញាចក្រី ហេង សំរិន បានគាំទ្របេសកកម្មការទូតថ្មី របស់លោកជំទាវ នៅកម្ពុជា។ សម្តេចបានលើកឡើងថា បេសកកម្មនេះ ពិតជាមានសារៈសំខាន់ខ្លាំងណាស់ ក្នុងការបន្តរួមចំណែកលើកកម្ពស់ទំនាក់ទំនង ចំណងមិត្តភាព និងកិច្ចសហប្រតិបត្តិការរវាងប្រទេសយើងទាំង2 ដែលមានស្រាប់ ឱ្យកាន់តែល្អប្រសើរ ថែមឡើងមួយកម្រិតទៀត។
កម្ពុជា-ឥណ្ឌា មានទំនាក់ទំនង និងកិច្ចសហប្រតិបត្តិការលើវិស័យការទូតនេះ ជាមួយគ្នាជាយូរយារណាស់មកហើយ ទាំងផ្នែកសិល្បៈ វប្បធម៌ និងជំនឿសាសនា។ សម្តេចប្រធានរដ្ឋសភា បានមានប្រសាសន៍ថា ឥណ្ឌាជាប្រទេសមួយ ក្នុងចំណោមប្រទេសមិនច្រើនទេ ដែលបានគាំទ្រដល់រដ្ឋាភិបាលកម្ពុជា នៅក្រោយថ្ងៃរំដោះ ៧មករា ឆ្នាំ១៩៧៩ ខណៈប្រទេសជាច្រើន ពិសេសប្រទេសលោកខាងលិច បានហ៊ុមព័ទ្ធសេដ្ឋកិច្ចកម្ពុជា។
សម្តេចបានលើកឡើងថា រដ្ឋសភាកម្ពុជា មានការពេញចិត្ត ដោយសង្កេតឃើញពីវឌ្ឍនភាពនៃទំនាក់ទំនង និងកិច្ចសហប្រតិបត្តិការទ្វេភាគី រវាងប្រទេសយើងទាំង2 កម្ពុជា-ឥណ្ឌា មានការរីកចម្រើនឥតឈប់ឈរ ទាំងវិស័យ នយោបាយ ការទូត សេដ្ឋកិច្ច ពាណិជ្ជកម្ម សង្គមកិច្ច វប្បធម៌ អប់រំ សុខាភិបាល និងការអភិវឌ្ឍធនធានមនុស្ស។
ក្នុងនាមរដ្ឋសភាកម្ពុជា សម្តេចអគ្គមហាពញាចក្រី ហេង សំរិន បានថ្លែងអំណរគុណដល់ប្រទេសឥណ្ឌា ដែលរយៈពេលកន្លងមកនេះ បានជួយបណ្តុះបណ្តាលធនធានមនុស្ស រយៈពេលខ្លី និងវែង ដល់និស្សិត និងមន្ត្រីកម្ពុជា ជាង 1ពាន់នាក់ និងសូមស្នើឥណ្ឌា បន្តជួយបណ្តុះបណ្តាលជំនាញផ្សេងៗបន្ថែមទៀត។ សម្តេចប្រធានរដ្ឋសភាបានគូសបញ្ជាក់ថា រដ្ឋសភាកម្ពុជាសូមអបអរសាទរ រដ្ឋាភិបាលប្រទេសទាំង2 ដែលបានចុះកិច្ចព្រមព្រៀង និងអនុស្សរណៈជាមួយគ្នា ក្នុងកិច្ចសហប្រតិបត្តិការលើវិស័យអាទិភាពជាច្រើន និងបានត្រៀមចុះហត្ថលេខាលើឯកសារសំខាន់ៗជាច្រើនទៀត។
លោកជំទាវ ដេវីយ៉ានី ឧត្តាំ ខូប្រាហ្គាដ បានស្នើសុំសម្តេច បន្តពង្រឹងពង្រីកកិច្ចសហប្រតិបត្តិការរវាងសភាប្រទេសទាំង2 ឱ្យកាន់តែរឹងមាំថែមទៀត និងបានគោរពអញ្ជើញសម្តេចដឹកនាំគណៈប្រតិភូរដ្ឋសភាកម្ពុជា ទៅបំពេញទស្សនកិច្ចនៅប្រទេសឥណ្ឌាក្រោយពេលជំងឺកូវីដ-១៩ បានធូរស្រាល។
សម្តេចប្រធាន បានទទួលយកសំណើនេះ និងបានគូសបញ្ជាក់ថា រដ្ឋសភាកម្ពុជា បានធ្វើកិច្ចសហប្រតិបត្តិការជាច្រើនជាមួយរដ្ឋសភាឥណ្ឌា នៅក្នុងក្របខ័ណ្ឌក្រុមមិត្តភាពសភាទាំង2 តាមរយៈការផ្លាស់ប្តូរទស្សនកិច្ច ការគាំទ្រគ្នាទៅវិញទៅមក នៅលើវេទិកាអន្តរសភានានា នៅក្នុងតំបន់ និងសកលលោក ដែលមានជាអាទិ៍ អន្តរសភាអាស៊ាន និងសហភាពអន្តរសភា(IPU) ជាដើម៕

January 20, 2021
ហេតុអ្វីបានសាលារៀននៅប្រទេសជប៉ុន តម្រូវឱ្យកូនសិស្ស ដើរទៅរៀនដោយខ្លួនឯង?
មានមនុស្សជាច្រើន ប្រហែលជាធ្លាប់បានឃើញកូនសិស្សជប៉ុននាំគ្នាដើរទៅរៀនជាក្រុមៗ ដោយមានកូនសិស្សណា ដែលធំជាងគេដើរដឹកដៃកូនសិស្សតូចៗ បន្តកន្ទុយគ្នា ជាខ្សែយ៉ាងគួរឱ្យស្រឡាញ់ នេះគឺជាទិដ្ឋភាពដែលគេតែងបានឃើញជាទូទៅនៅក្នុងប្រទេសជប៉ុន និងនៅក្នុងខ្សែភាពយន្តតុក្កតាជប៉ុន ជាច្រើនរឿងក៏មានបែបហ្នឹងដូចគ្នាដែរ។
មូលហេតុដែលសាលារៀនជាច្រើន កំណត់ឱ្យកុមារត្រូវដើរទៅសាលាដោយខ្លួនឯង និងហាមអាណាព្យាបាលដឹកឡានជូនទៅរៀន(ជាធម្មតាជនជាតិជប៉ុន តែងដាក់ឱ្យកូនចូលរៀននៅសាលា ដែលនៅជិតផ្ទះស្រាប់ហើយ)ទោះជាឋានៈជីវភាពមាន ឬក្រក៏ដោយ ក៏ត្រូវតែដើរទៅសាលារៀនចម្ងាយប្រហែលជា 2-3គីឡូម៉ែត្រ ពីផ្ទះដែរ នោះគឺដោយសារតែ ការឱ្យកុមារបានដើរទៅសាលារៀនដោយខ្លួនឯងនេះ ធ្វើឱ្យកើតចំណុចល្អៗជាច្រើន ចំពោះជីវិតកូនសិស្សជប៉ុន ដែលមានដូចជា៖
- ជួយកែបញ្ហាចរាចរណ៍នាពេលព្រឹក នៅមុខសាលារៀន ពេលដែលអាណាព្យាបាលដឹកកូនទៅដល់។
- កាត់បន្ថយភារកិច្ចរបស់អាណាព្យាបាល ដោយមិនចាំបាច់ជូនកូនទៅសាលា នៅពេលព្រឹក។
- ជួយបង្កើនសម្ព័ន្ធភាពរវាងកុមារ ដែលមានផ្ទះនៅក្នុងភូមិជាមួយគ្នា ឱ្យបានស្គាល់គ្នា ចេះជួយគ្នា មិនបោះបង់ចោលគ្នា ដោយការឱ្យក្មេងធំៗមើលថែការពារក្មេងតូចៗ និងដើរទៅសាលាជាមួយគ្នា។
- បង្ហាត់ឱ្យមានភាពទៀងពេលវេលា បើក្មេងណាម្នាក់យឺតយ៉ាវ មិត្តភក្តិឯទៀត ត្រូវតែរង់ចាំនៅមុខផ្ទះ រហូតទាល់តែក្មេងនោះចេញមក ទើបដើរទៅជាមួយគ្នា ដូច្នេះធ្វើឱ្យអ្នកណា ក៏មិនចង់យឺតពេល ដែលនាំឱ្យមិត្តភក្តិរង់ចាំខ្លួនដែរ។
- បង្កើនភាពទទួលខុសត្រូវរបស់ក្មេងធំៗ ដែលត្រូវមើលថែការពារ ក្មេងតូចៗទាំងពេលទៅ និងពេលមក។
- ពេលខ្លះគេតែងឃើញលោកគ្រូ ឬតំណាងអាណាព្យាបាល ផ្លាស់គ្នាមកឈរមើលការពារនៅតាមផ្លូវបំបែកជា4ធំៗ ពេលក្រុមកូនសិស្សឆ្លងថ្នល់ផងដែរ។
ដូច្នេះយើងបានឃើញហើយថា គ្រាន់តែការផ្លាស់ប្តូរ ឱ្យកូនសិស្សដើរទៅសាលារៀនដោយខ្លួនឯងនោះ នឹងទទួលបានអ្វីល្អៗជាច្រើន លើការអភិវឌ្ឍរបស់កុមារ បង្កើនភាពទទួលខុសត្រូវ ភាពមានទឹកចិត្ត ចេះអត់ធ្មត់ និងចេះជួយយកអាសាគ្នាទៅវិញទៅមក រួមទាំងបង្កើនភាពសាមគ្គីគ្នាទាំងកូនសិស្ស ទាំងឪពុកម្តាយ អាណាព្យាបាល និងលោកគ្រូ-អ្នកគ្រូ ធ្វើឱ្យសង្គមជប៉ុនមានភាពស្រឡាញ់គ្នា ចេះធ្វើការងារជាក្រុម និងកើតមានការសាមគ្គីគ្នា និងជួយគ្នាអភិវឌ្ឍប្រទេសជាតិ នៅទីបំផុត៕
January 20, 2021
របស់សំខាន់ 3យ៉ាង ដែល Samsung បានដកចេញពីស្មាតហ្វូនឆ្លាតវៃ ជំនាន់ថ្មី Galaxy S21 Series
Samsung ដែលទើបនឹងប្រកាសចេញស្មាតហ្វូនឆ្លាតវៃ ជំនាន់ថ្មី Galaxy S21 Series បានភ្ជាប់មកជាមួយលក្ខណសម្បត្តិពិសេសៗជាច្រើន ក៏ដូចជាការទទួលបានមុខងារថ្មីៗ មួយចំនួនផ្សេងទៀត ដូចជាបន្ថែមការគាំទ្រប៊ិច S Pen ឱ្យត្រកូល S (Galaxy S21 Ultra) របស់ខ្លួនជាលើកដំបូង ជាដើម តែក្នុងនោះ Samsung ក៏បានដកចេញផងដែរ នូវរបស់សំខាន់ 3យ៉ាង មានដូចជា៖ ក្បាលឆ្នាំងសាកល្បឿនលឿនកម្លាំង 25W, កាសខ្សែ AKG និង microSD។
Samsung បានដកចេញពីប្រអប់ របស់ Galaxy S21 Series គឺក្បាលឆ្នាំងសាកល្បឿនលឿនកម្លាំង 25W ដែលជា វត្ថុដំបូងគេ កំពុងទទួលបានការចាប់អារម្មណ៍ខ្លាំង ឯរបស់បន្ទាប់ដែលត្រូវដកចេញដែរនោះ គឺកាសខ្សែ AKG ដែលធ្លាប់ឃើញមាននៅក្នុងប្រអប់របស់ Galaxy S10 និង S20 Series កន្លងមក។ មានន័យថា នៅក្នុងប្រអប់របស់ Galaxy S21 Series បានភ្ជាប់មកជាមួយសៀវភៅណែនាំ, ខ្សែ USB-C និងម្ជុលចាក់ SIM មួយប៉ុណ្ណោះ។
សម្រាប់មួយតួខ្លួន លើស្មាតហ្វូនដែល Samsung បានដកចេញពី Galaxy S21 Series ទី3 នោះគឺ រន្ធបន្ថែម microSD មានន័យថា ម្ចាស់ Galaxy S21 Series ទាំងអស់ មិនចាំបាច់បារម្ភ រឿងបន្ថែមមេម៉ូរី ពីខាងក្រៅនោះទេ។
សម្រាប់ម៉ូដែលខ្ពស់ជាងគេ Galaxy S21 Ultra ក៏មិនអាចគាំទ្របច្ចេកវិទ្យាសាកថ្មល្បឿនលឿនកម្លាំង 45W ដូចទៅនឹង S20 Ultra ដែរ។ សរុបមក Samsung យកចិត្តដាក់ទៅលើ Galaxy S21 Series របស់ខ្លួនខ្លាំងមែនទែន ដោយពួកវាទទួលបានលក្ខណសម្បត្តិថ្មីៗជាច្រើន គួរឱ្យចាប់អារម្មណ៍ ប៉ុន្តែជាមួយគ្នានោះដែរ Samsung ក៏បានដកលក្ខណសម្បត្តិមួយចំនួន ដែលអ្នកប្រើប្រាស់មិនចង់ឱ្យដកចេញពី Galaxy S21 Series ផងដែរ៕
January 20, 2021
Store របស់ Huawei ឈ្មោះ “App Gallery” ឌីហ្សាញ អាប់ឌែតថ្មី ស្អាតទាក់ទាញជាងមុន
ក្រុមហ៊ុន Huawei បានបញ្ចេញនូវ App Gallery ដែលជាបណ្ដុំកម្មវិធីផ្ដាច់មុខ ឬ Huawei Store កាលពីម្សិលមិញនេះ ដោយឌីហ្សាញអាប់ឌែតថ្មី លើផ្ទាំង Interface និងមុខងារផ្សេងៗទៀត។
មុខងារថ្មីមួយ គឺ Feature Tab អាប់ឌែតរបៀបប្រើប្រាស់ គឺ scroll អូសឡើងលើ, បន្ថែមកម្មវិធីថ្មីបំផុត-ចាស់បំផុត និងកម្មវិធីណាល្បីជាងគេជាមួយនឹង រូបភាព, ការណែនាំ(guide) និងអត្ថបទខ្លីៗទាក់ទងនឹង app នោះ។ វាក៏បានផ្ដល់ភាពងាយស្រួលដល់អ្នកប្រើប្រាស់ ដែលនឹងអាចមើលឃើញ Card-style feed ផងដែរ។
មាតិកាថ្មីនេះ ត្រូវបានគ្រប់គ្រងយ៉ាងយកចិត្តទុកដាក់ ដោយ Editor ដើម្បីឱ្យអ្នកប្រើប្រាស់អាចងាយយល់ និងអ្វីដែលពួកគេចង់បានពី កម្មវិធីដែលពួកគេចង់ដោនឡូត។ ជាមួយគ្នានោះ ការអាប់ឌែតថ្មី ក៏មានចំណុចបញ្ចុះតម្លៃ ថែមទៀតដូចជា៖ Cashback discount, Lucky draw និង Challenges with reward សម្រាប់ឱ្យអ្នកប្រើប្រាស់់អាចទិញ ឬសាកល្បងកម្មវិធីថ្មី។ ម្យ៉ាងទៀត វាក៏មានមុខងារដូច Store ដទៃដែរ គឺ reviews និង rating ឱ្យផ្កាយដល់កម្មវិធីដែលអ្នកគិតថា ល្អប្រើ។
សូមជម្រាបជូនដែរថា App Gallery របស់ Huawei មកទល់ពេលនេះ ទទួលបានអ្នកប្រើប្រាស់ជាប្រចាំថ្ងៃ ឡើងដល់ 500លាននាក់ គិតចាប់តាំងការប្រកាសចេញកាលពីឆ្នាំមុន។ បច្ចុប្បន្ន App Gallery បានដាក់ដំណើរការទូទាំងអឺរ៉ុបរួចរាល់ហើយ និងជាពិសេសការអាប់ឌែតថ្មីខាងលើ នឹងបង្ហាញមុខឆាប់ៗនេះនៅលើ Store ប្រទេសអឺរ៉ុបដូចជា៖ ស្វ៊ីស, ន័រវែស, ហ្វាំងឡង់, ដាណឺម៉ាក, រ៉ូម៉ានី, សាធារណរដ្ឋឆែក, ប៉ូឡូញ, ប៊ុលការី, ប៉ូឡូញ, តួរគី, អូទ្រីស, លីទុយអានី, ហុងគ្រី និងអ៊ុយក្រែន ជាដើម៕
January 20, 2021
រឿងតូចតាច 8យ៉ាង ដែលយើងគួរធ្វើឱ្យបានញឹកញាប់
នៅក្នុងក្បួនតម្រាពេទ្យរបស់ចិនបានបង្រៀនថា មានកាយវិការ 8យ៉ាង ដែលយើងគួរធ្វើនៅក្នុងជីវឹតប្រចាំថ្ងៃ ដើម្បីឱ្យមានសុខភាពល្អ កាយវិការទាំងអស់នោះគឺ៖
1.ធ្វើចលនាកែវភ្នែក៖ ការផ្ចង់ខ្សែភ្នែក ទៅរកចំណុចណាមួយរយៈពេលយូរ គឺជាការធ្វើបាបកែវភ្នែកដោយផ្ទាល់ យ៉ាងហោចណាស់ នៅរៀងរាល់ 1ម៉ោងម្តង មនុស្សម្នាក់ៗគួរធ្វើលំហាត់ប្រាណខ្សែភ្នែក ដោយការបើកភ្នែកសម្លឹងមើលទៅលើពិតាន រួចហើយបង្វិលកែវភ្នែកសន្សឹមៗទៅខាងឆ្វេង រួចចុះទៅក្រោម ហើយរេទៅខាងស្តាំ មុននឹងវិលទៅសម្លឹងមើលខាងលើវិញ។ ធ្វើបែបហ្នឹងឱ្យបានច្រើនដង សាច់ដុំភ្នែក នឹងបានរឹងមាំ។
2.លេបទឹកមាត់៖ ការលេបទឹកមាត់ញឹកញាប់ គឺជាការធ្វើលំហាត់ប្រាណសាច់ដុំបំពង់ក ជួយជំរុញប្រព័ន្ធរំលាយអាហារឱ្យធ្វើការតាមប្រក្រតី។
3.សិតសក់៖ ទោះជាការសិតសក់ញឹកញាប់ មិនបានជួយឱ្យសក់ស្អាតឡើងមែន តែវាជាការជួយម៉ាស្សាសរសៃប្រសាទលើខួរក្បាល ធ្វើឱ្យភ្នែកភ្លឺច្បាស់ ឫសសរសៃសក់រឹងមាំឡើង ព្រោះមានលោហិតហូរទៅចិញ្ចឹមស្បែកក្បាល រៀងរាល់ពេលដែលយើងសិតសក់ជានិច្ច។
4.ធ្វើម៉ាស្សាត្រចៀក៖ នៅនឹងត្រចៀករបស់យើង មានសរសៃប្រសាទដែលតភ្ជាប់ជាមួយក្រលៀន។ ការទាញ ផ្ទាត់ ច្របាច់ ឬត្រដុសស្លឹកត្រចៀកញឹកញាប់ នឹងជួយជំរុញការធ្វើការងាររបស់ក្រលៀនដោយផ្ទាល់ ជួយការពារអាការវិលមុខ និងការបានឮអ្វីផ្តេសផ្តាស់។
5.កម្រើកអណ្តាត ពេលអង្គុយទំនេរៗ៖ បើបានយកអណ្តាតរុញក្រអូមមាត់ខាងលើផងនោះ នឹងជួយជំរុញការបញ្ចេញទឹកមាត់ ធ្វើឱ្យប្រអប់មាត់ស្អាត និងបំបាត់ក្លិនមាត់បានទៀតផង។
6.ខ្ជឹបរន្ធគូទ៖ ជាវិធីបំបាត់អាការឆ្អល់ពោះដ៏ងាយបំផុត។ ចូរខ្ជឹបរន្ធគូទ ក្នុង 1ថ្ងៃឱ្យបាន 3ឈុត ក្នុង1ឈុតពី 50-100ដង ព្រោះរៀងរាល់ពេល ដែលយើងខ្ជឹបរន្ធគូទ ពោះវៀននឹងពង្រឹងខ្លួន កម្ចាត់វត្ថុខូចៗដែលនៅសេសសល់មិនឱ្យរាតត្បាតបំផ្លាញរាងកាយរបស់យើង។
7.ខាំធ្មេញ៖ ការខាំធ្មេញស្រាលៗញឹកញាប់ នឹងជួយធ្វើឱ្យធ្មេញរឹងមាំ និងជួយជំរុញការផលឹតទឹករំលាយអាហារ។ អ្នកដែលមានបញ្ហារឿងពោះវៀន ចូរកុំខកខានឱ្យសោះ។
8.ត្រដុសថ្ពាល់ និងផ្ទៃមុខ៖ គឺជាកន្លែងដែលខ្វះការហាត់ប្រាណខ្លាំងបំផុត ទាំងវាជាវិធីមួយដ៏សែនងាយបំផុត ដោយគ្រាន់តែត្រដុសបាតដៃទាំងសងខាង ហើយយកបាតដៃមកដុសមុខស្រាលៗ នឹងជួយជំរុញលំហូរវិលរបស់លោហិត ធ្វើឱ្យឈាមហូរមកចិញ្ចឹមផែនថ្ពាល់ទាំងសងខាងបានកាន់តែច្រើនឡើង ធ្វើឱ្យផ្ទៃមុខស្អាតស្រស់ថ្លា៕
January 18, 2021
Ford Territory 2021 ជារថយន្តដែលស្អាត ឆ្លាត ទំនើបលើសគេ
បើនិយាយពីក្រុមហ៊ុន Ford លោកអ្នកប្រាកដជាគិតដល់រថយន្ត Pick Up មុនគេដោយសារតែភាពល្បីល្បាញ និងការទទួលស្គាល់គុណភាពពីសំណាក់អតិថិជនអ្នកប្រើប្រាស់ ប៉ុន្តែថ្មីៗនេះយើងសង្កេតឃើញថារថយន្ត SUV មួយម៉ូឌែលរបស់ Ford ត្រូវបានទទួលការចាប់អារម្មណ៍យ៉ាងខ្លាំងទាំងនៅទ្វីបអឺរ៉ុប ទ្វីបអាស៊ីក៏ដូចជាក្នុងទីផ្សារប្រទេសកម្ពុជាផងដែរ នោះគឺ រថយន្ត Ford Territory 2021។
រថយន្ត Ford Territory ត្រូវបានបង្កើត និងឌីហ្សាញឡើងនៅក្នុងប្រទេសអូស្ត្រាលី ហើយត្រូវបានធ្វើការតេស្តផ្នែកសុវត្ថិភាព សមត្ថភាព និងបច្ចេកវិទ្យាថ្មីៗយ៉ាងម៉ត់ចត់ពីសំណាក់វិស្វករជំនាញរបស់ Ford ដោយធ្វើការតេស្តបើកសាកល្បងនៅលើផ្លូវរហូតដល់ទៅជាង 6.8 លានគីឡូម៉ែត្រឯណោះ ទម្រាំតែក្រុមហ៊ុន Ford សម្រេចចិត្តលក់រថយន្តដ៏ទំនើបមួយនេះក្នុងទីផ្សារ។ ដូច្នេះហើយគ្រប់ចំណុចនៃរថយន្តនេះពិតជាមានភាពពិសេស គឺមិនត្រឹមតែស្អាតតែប៉ុណ្ណោះទេ ហើយថែមទាំងមានសមត្ថភាពខ្ពស់ និងបច្ចេកវិទ្យាឆ្លាតវៃលើសពីការរំពឹងទុកផងដែរ។
រូបរាងផ្នែកខាងក្រៅនៃរថយន្ត Ford Territory មើលទៅមានភាពទាក់ទាញ និងស៊ីវិល័យខ្លាំងមែនទែនដែលផ្នែកខាងមុខបានរំលេចមកជាមួយប៉ាណាបែបសំណាញ់ពណ៍ខ្មៅរលោង អមជាមួយនឹងការរចនានូវចង្កៀងម៉ូដថ្មីដែលមានរូបរាងប្លែកខុសពីរថយន្ត SUV ដ៏ទៃ។ ចំណែកឯដំបូលខាងលើជាប្រភេទដំបូលកញ្ចក់ធំពីមុខដល់ក្រោយដែលអាចបើក/បិទបាន (Panoramic Moonroof)។ ចំពោះពោងសុវត្ថិភាពរបស់រថយន្តនេះវិញគឺមានរហូតទៅដល់ 6 ឯណោះដែលនៅចំហៀងសងខាងរថយន្តជាប្រភេទវែងពីមុខដល់ក្រោយ។
ផ្នែកចំហៀងមើលទៅមានទំហំសមល្មមពេញខ្នាតជារថយន្ត SUV ខ្នាតកណ្តាល រួមជាមួយនឹងយ៉ាន់ស្ព័រអាលុយមីញ៉ូមទំហំ 18 អ៊ីង ហើយចំណុចមួយដែលគួរអោយកត់សម្គាល់នោះគឺ ផ្នែកខាងក្រោយ មើលទៅខ្ពស់ជាងផ្នែកខាងមុខដែលមើលទៅដូចរថយន្តស្ព័រ រីឯផ្នែកខាងក្រោយនៃរថយន្តក៏មានបំពាក់ជូននូវបំពង់ស៊ីមាំងរហូតដល់ទៅ 2 ដែលកាន់តែលើកសម្រស់រថយន្តនេះថែមមួយកម្រិតទៀត។ ជុំវិញរថយន្ត Ford Territory មានបំពាក់នូវសេនស័រជំនួយក្នុងការចូលចតរហូតដល់ទៅ 12 គ្រាប់ និងកាមេរ៉ាសុវត្ថិភាពជុំវិញរថយន្តរហូតដល់ទៅ 4 គ្រាប់ដែលជាប្រភេទកាមេរ៉ា 360^o កម្រិតខ្ពស់ដែលផ្តល់ជូននូវរូបភាពច្បាស់ល្អ។
រថយន្ត Ford Territory 2021 ត្រូវបានបំពាក់ជាមួយនឹងម៉ាស៊ីន EcoBoost ជំនាន់ថ្មីទំហំ 1.5L ដែលអាចផលិតកម្លាំងសេះបានរហូតដល់ទៅ 143PS និងកម្លាំងរមួលបានដល់ទៅ 225 N.M ។ ជាមួយនឹងប្រអប់លេខ 8 វគ្គអូតូជំនាន់ថ្មីដែលធ្វើអោយការបើកបរកាន់តែមានភាពរលូន និងចូលលេខបានល្អជាងមុន។មុខងារថ្មី 2 ដែលរថយន្ត Ford Territory 2021 មាននោះគឺប្រព័ន្ធហ្វ្រាំងដៃអេឡិចត្រូនិច និងប៊ូតុង Sport Mode សម្រាប់អោយលោកអ្នកបើកបរនៅផ្លូវឆ្ងាយ និងមានល្បឿនលឿន។ម្យ៉ាងវិញទៀតលោកអ្នកក៏អាចចេញចូលរថយន្តដោយប្រើនូវប្រព័ន្ធសោឆ្លាតវៃ / ចុចបញ្ឆេះរថយន្ត និងអាចចេញចូលដោយគ្រាន់តែចុចប៊ូតុងមួយនៅលើដៃទ្វា។
រីឯកៅអីរថយន្តមានទម្រង់ក្តោបបែបស្ព័រ ពណ៍ខ្មៅបង្កប់ថ្នេរពណ៍ស ដែលអង្គុយទៅហាប់ណែនមានផាសុកភាព អមជាមួយនឹងតាបឡូពណ៏ខ្មៅបង្កប់ជាមួយថ្នេរពណ៍សដែលមើលទៅស៊ីគ្នាមែនទែន លើសពីនេះទៅទៀតក៏មានបន្ទះឈើប្រណិតនៅខាងក្រោមតាបឡូ និងដៃទ្វាទាំងសងខាងផងដែរ ដែលកាន់តែផ្តល់នូវភាពទាក់ទាញ និងប្រណិតភាពថែមមួយកម្រិតទៀត។ លើសពីនេះទៅទៀតរថយន្ត Ford Territory 2021 ក៏មានបំពាក់នូវមុខងារក្តៅ ត្រជាក់នៅលើកៅអីផ្នែកខាងមុខទាំងសងខាងដែលអាចធ្វើការសារ៉េបាន 3 កម្រិតផងដែរ។
ចង្កូតរថយន្ត Ford Territory ជាចង្កូតបូមអេឡិចត្រូនិច ដែលមានភាពធូរងាយស្រួលក្នុងការបើកបរ ហើយនៅលើចង្កូតផ្ទាល់ក៏មានប៊ូតុងជាច្រើន ដែលបំពាក់នូវប្រព័ន្ធបញ្ជាដោយសម្លេង (Voice Command) និងកុងទ័រឌីជីថលម៉ូដថ្មីស្រឡាងទំហំ 10 អ៊ីងដែលអាចប្តូររូបរាងបាន 3ជម្រើស៖ Sport, Fashion និង Classic Mode។ ហើយខាងក្នុងរថយន្តមានភ្លើងពណ៏លំអរបានរហូតដល់ 7ពណ៍ (Ambient Lighting) ដែលផ្តល់នូវសោភ័ណភាពពេលលោកអ្នកធ្វើដំណើរពេលយប់។
ចំណុចពិសេសថ្មីមួយទៀតនោះគឺ អេក្រង់ Touch Screen ជំនាន់ថ្មីរហូតទៅដល់ 10 អ៊ីងបែងចែកជា 4 ផ្នែកអាចពង្រីកបង្រួមបាន សម្រាប់បញ្ជាគ្រប់គ្រងប្រព័ន្ធម៉ាស៊ីនត្រជាក់ វិទ្យុ តន្ត្រី និងការកំសាន្តផ្សេងៗ បន្ថែមពីលើនេះលោកអ្នកក៏អាចភ្ជាប់ផ្ទាល់ជាមួយ Apple CarPlay, Android Auto និង Google Map។ ជាមួយនឹងអេក្រង់ Touch Screen 10 អ៊ីងជំនាន់ថ្មីនេះលោកអ្នកអាចមើលកាមេរ៉ា 360^o បានមួយជុំវិញរថយន្តយ៉ាងត្រជាក់ភ្នែក និងផ្តល់នូវទិន្នន័យរូបភាពច្បាស់ខ្លាំងមែនទែន។ រថយន្តនេះក៏មានរន្ធ USB 2 សម្រាប់សាកថ្មឧបករណ៍អេឡិចត្រូនិចផ្សេងៗ និងប្រព័ន្ធសាកថ្មឥតខ្សែ (Wireless Charging) ផងដែរ។
ចំណុចថ្មីអស្ចារ្យមួយទៀតនោះគឺមាន Mouse សម្រាប់បញ្ជាផ្ទាល់ទៅអេក្រង់ Touch Screen 10 អ៊ីង អមជាមួយនឹងប៊ូតុងសម្រាប់គ្រប់គ្រងវិទ្យុ តន្ត្រី និងការកំសាន្តផ្សេងៗ ដែលវាជាមុខងារថ្មីមួយទៀតដែលផ្តល់ភាពងាយស្រួលសម្រាប់អ្នកប្រើប្រាស់។ រថយន្ត Ford Territory 2021 នេះត្រូវបានបំពាក់មកជាមួយប្រព័ន្ធបន្សុទ្ធខ្យល់កម្រិត PM 2.5 (PM 2.5 Fabric Filter) ដែលប្រព័ន្ធនេះច្រោះយកតែខ្យល់ល្អចូលក្នុងរថយន្តតែប៉ុណ្ណោះ គឺការពារវីរុស បាក់តេរីផ្សេងៗមិនអោយជ្រាបចូលក្នុងរថយន្តបាន។
រថយន្ត Ford Territory 2021 បំពាក់ទៅដោយប្រព័ន្ធសុវត្ថិភាព និងបច្ចេកវិទ្យាទំនើបៗចុងក្រោយឈានមុខគេរបស់ Ford ដែលមានឈ្មោះថា Ford Co-Pilot 360^TM ដែលក្នុងនោះរួមមានដូចជា៖
- ប្រព័ន្ធជំនួយចូលចតដោយស្វ័យប្រវត្តបែបអក្សរ (T) និងអក្សរ (P) (Active Park Assist System)
- ប្រព័ន្ធកាមេរ៉ាសុវត្ថិភាព 360^o ដឺក្រេកម្រិតខ្ពស់ (High Definition 360 Degree Camera)
- សេនស័រជំនួយចូលចតរហូតដល់ទៅ 12 គ្រាប់ (12 Sensors)
- ប្រព័ន្ធផ្តល់ដំណឹងគ្រោះថ្នាក់ផ្នែកចំហៀង (Blind Spot Information System)
- ប្រព័ន្ធផ្ដល់សញ្ញាគ្រោះថ្នាក់ពេលមានឧបសគ្គ ឬអ្នកថ្មើរជើងឆ្លងកាត់ និងប្រព័ន្ធចាប់ហ្វ្រាំងបន្ទាន់ដោយស្វ័យប្រវត្ត (Pre-Collision Assist with Autonomous Emergency Braking)
- ប្រព័ន្ធផ្តល់ដំណឹងនៅពេលបើកបរចេញពីគន្លងផ្លូវ (Lane Keeping System)
- ប្រព័ន្ធបន្ថយល្បឿន និងរក្សាគំលាតសុវត្ថិភាពដោយស្វ័យប្រវត្ត (Adaptive Cruise Control)
- ប្រព័ន្ធទប់លំនឹងរថយន្តពេលបើកបរលើផ្លូវកោង រអិល និងបញ្ជៀសការក្រឡាប់ (Electronic Stability Control)
- ប្រព័ន្ធហ្វ្រាំង ABS និងEBD (ABS and EBD)
- ប្រព័ន្ធទប់លំនឹងកុំឲ្យរអិលថយក្រោយពេលឡើងចំណោត (Hill Launch Assist)
- និងប្រព័ន្ធសុវត្ថិភាព បច្ចេកវិទ្យាទំនើបៗចុងក្រោយជាច្រើនទៀត។
សម្រាប់តម្លៃនៃរថយន្ត Ford Territory 2021 ក្នុងទីផ្សារប្រទេសកម្ពុជាគឺមានតម្លៃពិសេសត្រឹមតែ $49,900 តែប៉ុណ្ណោះ ហើយការផ្តល់ជូននេះមានសុពលភាពមុនថ្ងៃសម្ពោធរថយន្តនេះជាផ្លូវការតែប៉ុណ្ណោះ ដូច្នេះសូមបងប្អូនទាំងអស់ប្រញាប់រួសរាន់ឡើង។ ចង់ដឹងថាតើប្រព័ន្ធសុវត្ថិភាព និងបច្ចេកវិទ្យាទំនើបៗចុងក្រោយទាំងនេះមានភាពអស្ចារ្យយ៉ាងណានោះ សូមទស្សនាវីដេអូនេះទាំងអស់គ្នា៖
January 15, 2021
Barcelona គ្រោងនាំយក Agüero មក La Liga វិញ
Agüero កីឡាករខ្សែប្រយុទ្ធអាហ្សង់ទីនរូបនេះ ប្រហែលជានឹងចាកចេញពី ManCity ក្រោយបញ្ចប់រដូវកាល 2021 នេះហើយ និងក៏ប្រហែលជានឹងមិនបន្តកុងត្រាជាមួយនឹងក្លិប ManCity របស់គេទៀតឡើយ។ មូលហេតុនេះ នឹងធ្វើឱ្យក្លិបថ្មីណាមួយរបស់គេ មិនចាំបាច់ត្រូវចំណាយប្រាក់សូម្បីតែ 1សេន ដើម្បីទិញយកកីឡាករដ៏ល្អមួយនេះឡើយ។
ក្នុងនោះ Barcelona បានដាក់ការចាប់អារម្មណ៍លើអតីតកីឡាកររបស់ Atletico Madrid រូបនេះ ដើម្បីនាំយកមកអេស្ប៉ាញវិញ ។ Aguero កាលពីពេលមុននេះ បានរង់ចាំការផ្ដល់កុងត្រាថ្មីពី City ដែលជាកន្លែងគេលេងអស់រយៈពេលដល់ទៅ ៩ឆ្នាំទៅហើយ។
ការពិតទៅ ManCity ក៏មានបំណងទុកកីឡាកររូបនេះដែរ ក៏ប៉ុន្តែរូបគេ គឺជាកីឡាករដែលស៊ីថ្លៃបំផុត នៅក្នុងក្រុម ហើយក៏មានវ័យជ្រេណាស់ទៅហើយដែរ (វ័យ ៣២ឆ្នាំ)។ ដូច្នេះ ប្រសិនបើចង់បន្តកុងត្រាថ្មី ក្លិបត្រូវរ៉ាប់រងទៅលើការបន្ថែមប្រាក់ខែ និងអត្ថប្រយោជន៍ជាច្រើនទៀតសម្រាប់រូបគេ៕

January 15, 2021
Ronaldo ក្លាយជាកីឡាករលំដាប់ពិភពលោក អាចមកពី Barcelona បដិសេធ
កីឡាករខ្សែប្រយុទ្ធ Christiano Ronaldo ត្រូវបានគេដឹងថា បានឡើងជើងខ្លាំង កាលពីអំឡុងឆ្នាំ2005 ពោលគឺ ក្រោយពេលដែលគេបានផ្លាស់ទៅនៅ Manchester United កាលពីឆ្នាំ2003។ ដោយសារតែឱកាសដ៏ល្អមួយ បានធ្វើឱ្យគេល្បីល្បាញនៅ ManU រហូតដល់ឡើងជើងខ្លាំងនៅ Real Madrid និងក្លាយជាកីឡាករលំដាប់ពិភពលោកដល់សព្វថ្ងៃនេះ។
កាលគ្រានោះ ក្នុងឆ្នាំ2003 ភ្នាក់ងារកីឡាកររបស់ Ronaldo បានដាក់សំណើសុំទៅលេងនៅ Barcelona តែត្រូវក្លិបមួយនេះបដិសេធ ដែលវាបានធ្វើឱ្យកីឡាកររូបនេះ ប្តូរចិត្តទៅលេងនៅ ManU វិញ។
អតីតប្រធានក្លិប Barcelona លោក Laporta បានបញ្ជាក់ថា៖ “ទោះជាកាលនោះ ភ្នាក់ងារកីឡាករមួយនោះ មកប្រាប់យើងថា គេលក់ឱ្យទៅ ManU ក្នុងតម្លៃ 23លានដុល្លារ តែលក់ឱ្យយើងតែក្នុងតម្លៃ 20លានទេ ក៏យើងនៅតែមិនព្រមដែរ ដោយសារតែពេលនោះ យើងបានទិញយក Ronaldinho រួចទៅហើយ”៕

January 15, 2021
West Ham United នាំយកអតីតតារាសិច មកដឹកនាំក្រុមរបស់ខ្លួន
West Ham United បានធ្វើការតែងតាំង អ្នកស្រី Eve Vorley អតីតតួសម្ដែងរឿងអាសអាភាស និងជាអ្នកដឹកនាំសម្ដែងរឿងនេះផ្ទាល់ ធ្វើជាសមាជិកក្រុមប្រឹក្សាភិបាលរបស់ក្លិប ដែលមានឋានៈស្មើ អ្នកដឹកនាំក្លិបក្នុងថ្ងៃនេះ។ នេះបើយោងតាមការចុះផ្សាយរបស់កាសែត Daily Mail។
អ្វីដែលគួរឱ្យចាប់អារម្មណ៍ខ្លាំងនោះគឺ Eve Vorley ត្រូវបានគេស្គាល់ថា ជាតារាសិច ដ៏ល្បីឈ្មោះកាលពីជំនាន់វីដេអូ ស-ខ្មៅ ដោយក្នុងនោះ 2រឿង របស់នាង គឺ «horny housewives» និង «lesbian nurse» បានក្លាយជាវីដេអូដែលលក់ឌីសដាច់ខ្លាំង កាលពីជំនាន់ឆ្នាំ1990។
គួរឱ្យដឹងដែរថា Eve Vorley បានចាកចេញពីវិស័យនេះអស់ជាច្រើនឆ្នាំមកហើយ ក្រោយមកបានទាក់ទងជាមួយនឹងលោក David Sullivan ដែលជាប្រធានក្លិប Westham United តាំងពីឆ្នាំ 2010 មក៕
January 15, 2021