ធឿន មករា - La Reine Media

នាំកូនទៅលេងក្រៅផ្ទះ ដើម្បីរៀនយល់ដឹងពីអ្វីៗដែលថ្មី

នៅពេលឈប់សម្រាកច្រើនថ្ងៃជាប់ៗគ្នា គ្រួសារជាច្រើនតែងជ្រើសរើសយកការធ្វើដំណើរទៅកម្សាន្តនៅតាមបណ្តាខេត្ត និងឆ្លៀតឱកាសនាំកូនៗទៅប៉ះពាល់នឹងធម្មជាតិ ដែលវាអាចជួយឱ្យកូនតូចៗបានរៀនយល់ដឹងពីអ្វីថ្មីៗដែលខុសប្លែកគ្នាពីក្នុងផ្ទះ តែបើសិនជាគ្មានពេលវេលាច្រើនទេនោះ ថ្ងៃឈប់សម្រាកសៅរ៍ អាទិត្យ ឬពេលល្ងាចៗ ក៏អាណាព្យាបាលអាចនាំកូនតូចដើរលេងកម្សាន្តនៅតាមសួនច្បារសាធារណៈក្បែរៗផ្ទះក៏ជាការមួយល្អដែរ។ព្រោះការបណ្តោយឱ្យក្មេងៗបាននៅជិតនឹងធម្មជាតិ និងសភាពជុំវិញខ្លួនដែលប្លែកថ្មី ក្រៅពីនឹងធ្វើឱ្យពួកគេមានអារម្មណ៍ស្រស់ថ្លា បានហាត់ប្រាណកណ្តាលខ្យល់អាកាសបរិសុទ្ធហើយនោះ នៅបានជួយឱ្យពួកគេត្រៀមខ្លួនសម្រាប់ការរៀនយល់ដឹងពីអ្វីដែលថ្មីៗថែមទៀតផង។…តែមុននឹងនាំកូនចេញទៅលេងខាងក្រៅផ្ទះនោះ ចាំបាច់ត្រូវមានការត្រៀមខ្លួនបន្តិចសិន ៖

– ត្រៀមឱ្យរួចរាល់មុនចេញទៅខាងក្រៅផ្ទះ
ចង់ចេញទៅលេងនៅខាងក្រៅផ្ទះម្តង ត្រូវតែត្រៀមឱ្យបានរួចរាល់ជាមុនសិន ប្រសើរជាងទៅដើររកទិញនៅពេលក្រោយ ដែលអាចនឹងធ្វើឱ្យមិនទាន់ចិត្តកូនតូចបាន។ សម្រាប់អាហារដែលគួរត្រៀមយកទៅជាមួយ ដើម្បីទុកបម្រុងពេលកូនឃ្លាន គួរតែជាអាហារដែលងាយស្រួលញ៉ាំដូចជានំស៊ែនវិច និងនំប៊ីស្គីត -ល- ដែលពេលណាកូនឃ្លានភ្លាម អ្នកម្ដាយអាចយកចេញមកឱ្យកូនញ៉ាំបានភ្លែត។ ក្រៅពីនេះគួរត្រៀមក្រដាសជូតដៃ ខោទឹកនោម(សម្រាប់ក្មេងតូច) រទេះរុញកូនតូច និងកន្ទេលសម្រាប់ក្រាលអង្គុយលេងផង។

– ពិនិត្យមើលទីកន្លែង
ពេលទៅដល់គោលដៅហើយ មុននឹងបណ្តោយឱ្យកូនរត់លេង លោកឪពុកអ្នកម្តាយគួរតែធ្វើការពិនិត្យមើលបរិវេណម្តុំៗនោះជាមុនសិនថា តើមានសុវត្ថិភាព ឬក៏អត់? ដូចជាមានដុំឥដ្ឋ អំបែងកែវ ឬវត្ថុដែលអាចនឹងបង្កឱ្យមានគ្រោះថ្នាក់ដែរឬទេ? បើជាទីធ្លាសម្រាប់កុមាររត់លេង គួរតែពិនិត្យមើលកម្រាលទីធ្លានោះថាជាផ្ទៃរាបស្មើ ឬក៏មិនមែន តើមានជង្ហុក ឬរណ្តៅតូចៗដែលអាចនឹងធ្វើឱ្យកូនជំពប់ជើងដួលដែរឬទេ? ផ្ទៃដី ឬកម្រាលរឹងពេកដែលអាចបណ្តាលឱ្យមានបញ្ហាពេលកូនរអឹលធ្លាក់ពីលើឧបករណ៍ ឬក៏អត់? និងត្រូវពិនិត្យមើលឧបករណ៍គ្រឿងលេងទាំងនោះផងថា តើមានភាពរឹងមាំ ឬមានចំណុចណាមួយស្រួច មុត ដែរឬទេ?

– រៀនជាមួយនឹងធម្មជាតិ
ក្មេងៗមានភាពចង់ដឹង ចង់ឃើញនូវអ្វីៗជុំវិញខ្លួនគេស្រាប់ទៅហើយ រឹតតែពេលបានមកនៅកណ្តាលធម្មជាតិដែលមានទាំងវាលស្មៅ ដើមឈើ ផ្ទៃមេឃ សត្វបក្សីបក្សា និងសត្វល្អិតផ្សេងៗក្នុងពេលដែលអ្នកម្តាយដឹកដៃគេដើរលេងផងនោះ គេអាចនឹងមានសំនួរជាច្រើនសួរឡើង ដែលអ្នកម្តាយអាចនឹងសៀតស៊កនូវចំណេះដឹង និងបង្ហាត់បង្ហាញពីការចេះសង្កេតដល់កូនបាន។

– វិវឌ្ឍនាការស័ក្តិសមនឹងវ័យដោយធម្មជាតិ
ការបណ្តោយឱ្យកុមារបានរត់លេងនៅក្នុងទីធ្លាដែលស្រឡះ កណ្តាលវាលនោះ នឹងជួយឱ្យកុមារមានទីធ្លាសម្រាប់ការរៀនយល់ដឹងមួយដែលមានភាពខុសប្លែកពីក្នុងបន្ទប់រៀន ឬក្នុងផ្ទះ។ កុមារនឹងបានរៀនយល់ដឹងកាន់តែច្រើនបែបច្រើនយ៉ាងឡើង តាមរយៈស្ថានភាពជុំវិញខ្លួនដែលប្លែកថ្មីជានិច្ច ដូចជា ដើមឈើ ស្លឹកឈើផ្កាដែលមានពណ៌ល្អៗ និងចំនួនវត្ថុដែលខុសពីគ្នាទៅតាមរដូវកាល និងថែមទាំងបានសប្បាយរីករាយតាមរយៈការលេង ដែលនឹងធ្វើឱ្យកុមារមានអារម្មណ៍ល្អ នាំទៅរកការវិវឌ្ឍខាងអារម្មណ៍ ឬ EQ ដ៏ល្អទៀតផង។ ក្រៅពីនោះ ការធ្វើចលនារបស់រាងកាយរបស់កូនយ៉ាងពេញទំហឹងតាមរយៈការរត់លេង មិនថាតែការរត់ លោត ហក់តោង ឬឡើងនោះក្ដី វាប្រៀបដូចជាការហាត់ប្រាណដែលនឹងធ្វើឱ្យកូនមានសុខភាពល្អ សាច់ដុំមាំមួនទៀតផង។

* ចំណុចគួរប្រយ័ត្នក្នុងការនាំកូនចេញទៅលេងខាងក្រៅផ្ទះ
ទោះជាការលេងនៅខាងក្រៅផ្ទះនេះមានចំណុចល្អច្រើនមែនក៏ដោយ តែក៏មានចំណុចគួរប្រយ័ត្នប្រយែងដែរ ជាពិសេស គឺការវង្វេងបាត់តែម្តង ដូច្នេះដើម្បីចៀសវាងនូវការសោកស្តាយនៅពេលក្រោយ ឬការកើតមានឡើងនូវបញ្ហាជាយថាហេតុណាមួយនោះ លោកឪពុក ឬអ្នកម្តាយគួរប្រុងប្រយ័ត្នដូចតទៅ ៖
1. កុំនាំកូនទៅលេងនៅកន្លែងណាដែលមានមនុស្សច្រើនណែនណាន់តាន់តាប់ពេក (ព្រោះអាចនឹងវង្វេងគ្នាដោយសារហ្វូងមនុស្ស)។
2. កុំបណ្តោយកូនឱ្យរត់លេងតែឯងដោយមិនបានរវីរវល់មើលឱ្យសោះ ទោះជាកន្លែងដែលទៅលេងនោះនៅជិតផ្ទះក៏ដោយ។
3. មិនផ្ញើកូនជាមួយនឹងមនុស្សចាស់ជរា ដែលមិនអាចមើលក្មេងដែលស្ថិតក្នុងវ័យរពឹសបាន។
4. ព្យាយាមនៅក្បែរកូនជានិច្ច ឬកុំបណ្តោយឱ្យកូនបាត់ពីខ្សែភ្នែកឱ្យសោះ។

– នៅពេលដែលកូនលេងជក់រហូតភ្លេចហត់
រឿងចុងក្រោយដែលឡារ៉ែនចង់ផ្តាំលោកឪពុកអ្នកម្តាយទាំងអស់ សម្រាប់ការនាំកូនៗចេញទៅលេងនៅខាងក្រៅផ្ទះនោះគឺ ក្នុងអំឡុងពេលដែលកូនៗបានលេងនោះ ពួកគេអាចនឹងសប្បាយយ៉ាងភ្លេចខ្លួន រហូតលែងមានអារម្មណ៍ហត់ គ្មានអារម្មណ៍ថា ហេវ ដូច្នេះលោកឪពុកអ្នកម្តាយត្រូវចាំសង្កេតមើលថា បើឃើញកូនចាប់ផ្តើមហត់ ឬនៅមិនទាន់បានញ៉ាំអី និងមិនបានញ៉ាំទឹកយូរហើយនោះ គួរតែប្រាប់ឱ្យកូនឈប់សម្រាកបន្តិច ដើម្បីបន្ថែមថាមពលសិន សឹមទៅលេងសប្បាយបន្តទៀត៕

October 2, 2019

បើកូននៅតូច 2-3ខួប តើត្រូវ “ដាក់ទោស” បែបណាល្អដោយមិនបាច់វាយ?

វិធីការដាក់ទោសដោយការ “វាយ” មិនថាតែវាយតិចស្រាលៗ វាយខ្លាំងៗ ឬវាយកំប៉េះគូទនោះទេ គឺសុទ្ធតែជាការប្រើអំពើហិង្សាដែលមិនបង្កឱ្យកើតមានការផ្លាស់ប្ដូរទង្វើរបស់កូនឡើយ តែបែរជារឹតតែធ្វើឱ្យកូនតតាំង និងអាចនឹងមានផលអាក្រក់ទៅលើទង្វើច្រងេងច្រងាងរបស់កូននាពេលអនាគតបានទៀតផង។ ដូច្នេះថ្ងៃនេះ ឡារ៉ែន នឹងមកជម្រាបជូនអ្នកម្ដាយទាំងឡាយថា បើកូនឌឺរឹងយ៉ាងគ្មានហេតុផល ឬមានទង្វើដែលមិនស័ក្តិសមណាមួយ តើឪពុកម្ដាយអាចដាក់ទោសកូនបែបណាបានខ្លះ ដើម្បីជាការបង្រៀនឱ្យគេដឹងថា អ្វីដែលគេកំពុងធ្វើហ្នឹងមិនមែនជារឿងដែលត្រឹមត្រូវទេ និងមិនចាំបាច់ត្រូវប្រើអំពើហិង្សាគ្រប់គ្រងទង្វើខុសបន្តិចបន្តួចរបស់កូនឡើយ។

ក្មេងអាយុតិចជាង 1ឆ្នាំ គ្មានហេតុផលអ្វីដែលត្រូវដាក់ទោសកូនឡើយ
គ្មានហេតុផលអ្វីសោះឡើយក្នុងការដាក់ទោសកូនដែលមានអាយុស្ថិតក្នុងអំឡុង 1-3 ខួបព្រោះកូនក្នុងវ័យតេះតះនេះមានឱកាសតិចណាស់ក្នុងការធ្វើរឿងអ្វីមួយដែលសមគួរទទួលយក ច្រើនជាងការដាក់ទោសត្រឹមតែបន្តិចបន្តួច ដូច្នេះបើឪពុកម្ដាយចង់ដាក់ទោសកូន ត្រូវតែនឹកឃើញជាប់ជានិច្ចថា ការដាក់ទោសនោះត្រូវតែជារឿងដែលចាំបាច់បំផុតប៉ុណ្ណោះ។
- ដើម្បីឱ្យបានផលល្អ : បើកូនមានទង្វើដែលមិនល្អ ការដាក់ទោសគួរតែធ្វើឡើងភ្លាមៗ កុំពន្យារពេល មិនដូច្នោះទេ ការតភ្ជាប់គ្នារវាងទង្វើមិនល្អ និងលទ្ធផលរបស់ទង្វើនោះនឹងរលប់បាត់ពីគំនិតរបស់ក្មេង ដែលនឹងធ្វើឱ្យក្មេងមិនយល់ថាតើគេធ្វើខុសអ្វី ហេតុអីបានដាក់ទោសគេ?
– ភាពធ្ងន់ធ្ងររបស់ទោស : ត្រូវឱ្យសមល្មមនឹងទង្វើខុសនោះ។
– កុំសម្លុតថានឹងបោះបង់កូនចោល ហើយដើរចេញជាដាច់ខាត : មិនត្រឹមតែធ្វើឱ្យកូនតូចមានអារម្មណ៍តានតឹង មិនយល់ន័យនោះទេ តែនៅធ្វើឱ្យឪពុកម្ដាយធ្វើខុសនឹងពាក្យសម្ដីទៀតផង។

វិធីការដាក់ទោសដោយមិនចាំបាច់ “វាយ”
1. ឈប់បង្ហាញពីសេចក្ដីស្រឡាញ់ : កូនត្រូវការសេចក្ដីស្រឡាញ់ និងការទទួលយកពីឪពុកម្ដាយខ្លាំងបំផុត ហើយដូចគ្នាដែរ កូននឹងគ្មានសេចក្ដីសុខឡើយ បើត្រូវឪពុកម្ដាយធ្វើព្រងើយដាក់។ លោកអ្នកអាចដាក់ទោសកូនដោយវិធីនេះបាន អាចនឹងក្នុងរយៈពេលខ្លីៗ 30 ឬ 60វិនាទី រួចពន្យល់យ៉ាងខ្លីៗឱ្យកូនបានដឹងថា អ្នកមិនសប្បាយចិត្តចំពោះទង្វើដែលមិនស័ក្តិសមរបស់កូន ដូចជា “យើងមិនវាយអ្នកដទៃ” ជាដើម។
2. ដំឡើងសំឡេង ធ្វើសំឡេងមាំៗ : តែមិនគួរប្រើវិធីនេះញឹកញាប់ពេកទេ និងគួរធ្វើនៅពេលណាដែលបន្ទាន់ៗប៉ុណ្ណោះ មិនដូច្នោះទេ សំឡេងមាំៗរបស់អ្នកដែលកូនធ្លាប់ស្ដាប់បង្គាប់នោះ នឹងត្រូវថយចុះភាពស័ក្តិសិទ្ធិ និងក្រោយពីធ្វើសំឡេងមាំៗហើយ ត្រូវព្យាយាមមិនខឹងយូរឡើយ ព្រោះធម្មជាតិរបស់ក្មេងតូច ផ្លូវចិត្តរបស់គេនឹងត្រឡប់ទៅរកសភាវប្រក្រតីវិញក្នុងរយៈពេលតែមិនប៉ុន្មាននាទីប៉ុណ្ណោះ។
3. ទទួលបានសិទ្ធិពិសេស ឬរបស់លេង : គួរប្រាប់កូនតូចជាមុនថា គេត្រូវតែបញ្ឈប់ទង្វើមិនល្អ និងត្រូវប្រាប់ថា នឹងដាក់ទោសគេយ៉ាងណា ដូចជា “បើកូនមិនឈប់គប់របស់លេងចោលទេ កូននឹងលែងបានរបស់លេងទៀត” ឬ “ព្រោះកូនមិនចេះចែករបស់លេងឱ្យគេលេងផង នឹងមិនបានលេងទាំងពីរនាក់”។ អ្វីដែលសំខាន់គឺ “ប្រាប់” ហើយ ឪពុកម្ដាយត្រូវរក្សាពាក្យសម្ដីផងមិនដូច្នោះទេ កូននឹងចងចាំថា លោកអ្នកមិនបានធ្វើមែនទែនទេ(គ្រាន់តែសម្លុត) ហើយលើកក្រោយគេនឹងធ្វើទៀត ឬមានទង្វើមិនល្អជាញឹកញាប់។
**កុំព្យាយាមសម្លុតថានឹងដាក់ទោសកាន់តែធ្ងន់ឡើង ដូចជា “បើកូនមិនឈប់ កូននឹងមិនបានទៅលេងផ្សារអុីអនទេថ្ងៃនេះ” បើកូននៅតែមិនឈប់ “ឈប់ភ្លាម! បើនៅតែមិនឈប់ទៀត នឹងលែងបានទៅលេងផ្សារអុីអនមួយអាទិត្យតែម្ដង” បែបនេះ គឺជាការកំណត់កំហុសដែលធំជ្រុលពេកសម្រាប់ក្មេង។
4. សុំពេលសម្រាក : តិចនិកនេះបានផលល្អបំផុតជាមួយក្មេងអាយុ 2ខួប ចាប់ផ្ដើមពីការដាស់តឿនជាមុនថា តើមានទង្វើណាខ្លះដែលនឹងហុចផលដល់ “ពេលសម្រាក”។ នៅពេលកើតមានទង្វើនោះឡើង កូនត្រូវទៅអង្គុយនៅកៅអីក្មេងរពឹស ឬទៅក្នុងបន្ទប់របស់គេភ្លាមតែម្ដង។ ពេលវេលាសម្រាកគួរតែខ្លី និងពាក់ព័ន្ធនឹងកំហុស ដូចជា “កូននឹងត្រឡប់មកលេងវិញបាន នៅពេលស្រួលបួលឡើងវិញ”។

ក្រៅពីនេះ ការវាយកំប៉េះគូទដើម្បីដាក់ទោសសម្រាប់ក្មេងតូចវិញ អ្នកជំនាញផ្នែកកុមារមិនណែនាំឱ្យធ្វើតទៅទៀតទេ ព្រោះបើសិនជាអាចជ្រើសរើសវិិធីផ្សេងបាន ក៏គួរតែចៀសវាងការដាក់ទោសដោយការវាយ ព្រោះទោះជាវាយគូទតិចៗ ក៏ជាការប្រើអំពើហិង្សាគ្រប់គ្រងកំហុសបន្តិចបន្តួចរបស់កូន ដែលមិនហុចផលល្អដល់កូនឡើយ និងថែមទាំងធ្វើឱ្យឪពុកម្ដាយខ្លួនឯងមានអារម្មណ៍ខុសទៀតផង ពេលដាក់ទោសកូនដោយការវាយ៕

October 2, 2019

LG ប្រែក្លាយពីទូរទឹកកកធម្មតា មកជាទូរទឹកកកដែលទំនើបអស្ចារ្យដាច់គេក្នុងពេលបច្ចុប្បន្ន

ឥទ្ធិពលនៃសម្ភារៈក្នុងផ្ទះបាយរបស់ LG បន្ដធ្វើឱ្យមានសក្ដានុពលទីផ្សារ
ជានិរន្ដរ៍និងយូរអង្វែងនៅជុំវិញពិភពលោក។

មានមនុស្សតិចណាស់ដែលនឹងដាក់ឈ្មោះទូទឹកកកដែលមិនសាបសូន្យមួយនេះ ជារបស់របរក្នុងផ្ទះដែលបានផ្លាស់ប្តូរជីវិតគ្រួសារគេ។ ប៉ុន្តែការច្នៃប្រឌិតទូទឹកកកក្នុងរយៈពេល 60 ឆ្នាំចុងក្រោយនេះបានផ្លាស់ប្តូរឧបករណ៍នេះពីសម្ភារៈផ្ទះបាយកម្រិតទាបទៅជាផលិតផលដែលមានមុខងារខ្ពស់មានលក្ខណៈ ergonomic និងមិនប៉ះពាល់ដល់បរិស្ថាននាសព្វថ្ងៃនេះ។ ជាមួយនឹងការជឿនលឿនផ្នែកបច្ចេកវិទ្យានៅក្នុងទូទឹកកកសព្វថ្ងៃអតិថិជនបានប្រើប្រាស់ផលិតផលទាំងនេះជាមួយស្តង់ដារខ្ពស់ជាងមុន។ ហើយដើម្បីបំពេញតាមការរំពឹងទុករបស់អតិថិជនដែលកំពុងមានតម្រូវការនាពេលបច្ចុប្បន្ននេះ អ្នកផលិតគ្រឿងប្រើប្រាស់កំពុងផ្តោតការយកចិត្តទុកដាក់ខ្ពស់ជាងមុនលើការបង្កើនភាពងាយស្រួលតាមរយៈការកែលម្អការប្រើប្រាស់និងភាពងាយស្រួល។

គ្រឿងប្រើប្រាស់កំពុងវិវឌ្ឍន៍ទៅនឹងតម្រូវការអតិថិជននៅពេលដែលវាលេចចេញមក ហើយអ្នកផលិតដែលមានគំនិតច្នៃប្រឌិតបំផុតគឺជាអ្នកដែលអាចព្យាករណ៍ពីនិន្នាការអ្នកប្រើប្រាស់និងបំពេញតាមតម្រូវការរបស់ពួកគេមុនពេលពួកគេកើតឡើង។ ជាពេលវេលាថ្មីម្តងទៀតក្រុមហ៊ុនអេឡិចត្រូនិច LG បានបង្កើតកេរ្តិ៍ឈ្មោះក្នុងនាមជាក្រុមហ៊ុនដែលមិនភ័យខ្លាចក្នុងការជំរុញព្រំដែននៃការច្នៃប្រឌិតនិងអនុសញ្ញាប្រឈមនោះឡើយ។ ការប្តេជ្ញាចិត្តរបស់ខ្លួនចំពោះការងារជាប់លាប់ដើម្បីនាំមកនូវលក្ខណៈពិសេសនៃភាពងាយស្រួលដល់អ្នកប្រើប្រាស់ ដែលបានបង្កើតចេញនូវផលិតផល Home Bar និងទូរទឹកកក InstaView Door-in-Door™ ដោយភ្ជាប់មកជាមួយកុំប្រែសស័រទំនើបពិសេស ដើម្បីបង្កើនប្រសិទ្ធភាពនិងដំណើរការថាមពលទូទៅ។

នៅឆ្នាំ 1998 ក្រុមហ៊ុន LG បានណែនាំនូវ Home Bar ដែលតំណាងឱ្យការខិតខំប្រឹងប្រែងរបស់ក្រុមហ៊ុនក្នុងការនាំមកនូវភាពងាយស្រួលនិងការផ្ទុកប្រកបដោយប្រសិទ្ធភាព។ វាបានផ្តល់ឱ្យម្ចាស់នូវកន្លែងទំនេរដែលមានលក្ខណៈប្លែកៗគ្នា ដែលអាចត្រូវបានប្រើជារបារផ្ទះ ធ្នើ ឬសូម្បីតែទូទឹកកក។ ជំនួសឱ្យការផ្លាស់ប្តូរភេសជ្ជៈតែមួយទៅក្នុងបញ្ជរផ្ទះបាយបន្ទាប់ពីបើកឧបករណ៍ទាំងមូលដើម្បីយកវាចេញអ្នកប្រើអាចដករ៉ាកែតចេញហើយចាក់ភេសជ្ជៈរបស់ពួកគេដោយមិនផ្លាស់ប្តូរជំហានតែមួយ។ ប្រសិនបើអ្នកប្រើប្រាស់ចង់ទុកភេសជ្ជៈនិងអាហារសម្រន់ដែលនៅសល់របស់ពួកគេសម្រាប់ពេលក្រោយពួកគេអាចទុករបស់របរទាំងនោះនៅក្នុងកន្លែងស្តុកទុកដើម្បីងាយស្រួលក្នុងពេលសម្រាប់ការញ៉ាំពេលក្រោយ។

បន្ទាប់ពីទទួលបានជោគជ័យនៃ Home Bar ក្រុមហ៊ុន LG ពិនិត្យមើលវិធីផ្សេងទៀតដែលផលិតផលរបស់ខ្លួនអាចបង្កើនភាពងាយស្រួលដល់អ្នកប្រើប្រាស់ ដើម្បីធ្វើឱ្យអតិថិជនភ្ញាក់ផ្អើលនិងរីករាយមួយកម្រិតថែមទៀត។ ការស្រាវជ្រាវបានបង្ហាញថាអតិថិជនក្រុមហ៊ុន LG បានបើកទូរទឹកកករបស់ពួកគេជាធម្មតាជាមធ្យមចំនួន 79 ដងក្នុងមួយថ្ងៃមួយ 1 ។ ទោះបីជាការពិតបែបនេះក៏ដោយ ក៏អតិថិជន 4 នាក់ក្នុងចំណោម 10 នាក់មានបញ្ហាក្នុងការចងចាំនូវអ្វីដែលមាននៅក្នុងទូទឹកកករបស់ពួកគេ ដែលជាហេតុធ្វើឱ្យអាហារដែលខូចត្រូវបានគេបោះចោល។ 2 បញ្ហាទាំងនេះបានជំរុញឱ្យក្រុមហ៊ុន LG បង្កើតទូរទឹកកកទ្វារនៅក្នុងទ្វារ™ ច្នៃប្រឌិតថ្មីក្នុងឆ្នាំ 2010 លើកដំបូងនៃប្រភេទ ទ្វារមួយនៅក្នុងទ្វារ™ ការច្នៃប្រឌិតរបស់ក្រុមហ៊ុន LG បានធ្វើឱ្យវាមានភាពងាយស្រួលក្នុងការរៀបចំធាតុចូលដំណើរការជាញឹកញាប់នៅក្នុងទូទឹកកកដើម្បីឱ្យមានភាពងាយស្រួលដោយគ្មានការបើកទ្វារទាំងមូលនិងមិនធ្វើអោយបាត់បង់ខ្យល់ត្រជាក់ច្រើននោះទេ។ តាមរយៈការបន្ថយចំនួនដងដែលទ្វារធំត្រូវបានបើក ម្ហូបអាហារនឹងនៅស្រស់បានយូរ។ ដោយឈានដល់កម្រិតមួយនេះក្រុមហ៊ុន LG បានណែនាំពីទូរទឹកកកទ្វារភ្លោះដំបូងបង្អស់របស់ពិភពលោក ដើម្បីផ្តល់ភាពងាយស្រួលទ្វេដងនិងអនុញ្ញាតឱ្យមានភាពបត់បែនកាន់តែច្រើនក្នុងការរៀបចំទុកដាក់ម្ហូបអាហារ។

ជាមួយនឹងប្រសិទ្ធភាពស្ថិតក្នុងចំណាត់ថ្នាក់កំពូលនៃបញ្ជីអាទិភាពរបស់ LG អ្នកស្រាវជ្រាវបានរកឃើញថាថាមពលអគ្គិសនីពី 50-120 គីឡូវ៉ាត់ម៉ោងត្រូវបានខ្ជះខ្ជាយជារៀងរាល់ឆ្នាំពីការបាត់បងខ្យល់ត្រជាក់នៅពេលណាទ្វារទូរទឹកកកត្រូវបានបើក។ ៣ ដូច្នេះពេលនេះក្រុមហ៊ុន LG បានបង្កើតនូវទូរទឹកកកទ្វារនៅក្នុងទ្វារ InstaView ដើម្បីឱ្យសមាជិកគ្រួសារបានឃើញអ្វីដែលនៅក្នុងទូទឹកកកដោយមិនចាំបាច់បើកអ្វីទាំងអស់។ គោះពីរដងលើទ្វារដែលមានតម្លាភាពនឹងបំភ្លឺផ្ទៃខាងក្នុងដែលអាចមើលឃើញច្បាស់ពីអ្វីដែលនៅខាងក្នុង។ ការឆ្លើយតបរបស់សាធារណជនបានធ្វើឱ្យនាយកប្រតិបត្តិក្រុមហ៊ុន LG មានការភ្ញាក់ផ្អើលយ៉ាងខ្លាំងនៅពេលដែលអតិថិជនបានឃើញទូទឹកកកនៅក្នុងហាងឬនៅក្នុងបន្ទប់តាំងបង្ហាញ ពួកគេមិនអាចទប់ទល់នឹងឱកាសគោះទ្វារបានឡើយ។ ទូទឹកកកបានក្លាយជាផ្នែកនៃការសន្ទនាពីព្រោះជាមូលដ្ឋានគ្រឹះ LG InstaView Door-in-Door ™ បានផ្លាស់ប្តូររបៀបដែលអ្នកប្រើប្រាស់ទូរទឹកកក: ពីការបើកទ្វារដើម្បីមើលឃើញពីអ្វីដែលអាចមើលឃើញនៅខាងក្នុងមុនពេលបើកទ្វារ។

វប្បធម៌ផ្ទះបាយថ្មីត្រូវបានបង្កើតឡើងដោយមាន LG’s Home Bar, Door-in-Door™ and InstaView Door-in-Door™ ហេតុដូច្នេះហើយទើបធ្វើឱ្យមានសំណួរថាតើ LG នឹងបង្កើតអ្វីបន្ទាប់? បើទោះបីជាធ្លាប់ជាអ្នកត្រួសត្រាយនិងជាឈានមុខដ៏មានឥទ្ធិពលម្នាក់នៅក្នុងឧស្សាហកម្មទូទឹកកកពិភពលោកក៏ដោយ ក៏ក្រុមហ៊ុន LG មិនទាន់ទទួលបានជោគជ័យគ្រប់គ្រាន់នោះទេ ដោយបន្តប្តេជ្ញាចិត្តក្នុងការអភិវឌ្ឍឧបករណ៍ប្រើប្រាស់ក្នុងផ្ទះដែលលើសពីការរំពឹងទុករបស់អតិថិជននិងផ្ដល់ភាពរីករាយចំពោះគ្រួសារទូទាំងពិភពលោក។ ជានិច្ចកាល LG តែងគិតគូរពីតម្រូវការនិងភាពងាយស្រួលរបស់អ្នកប្រើប្រាស់លើសអ្វីៗទាំងអស់ ដោយក្រុមហ៊ុននៅតែបន្តបង្កើតភាពភ្ញាក់ផ្អើលជាមួយនឹងផលិតផលថ្មីនិងបច្ចេកវិទ្យាប្លែកៗសម្រាប់សម្ភារៈផ្ទះបាយ។

1 ផ្អែកលើការស្រាវជ្រាវអតិថិជនខាងក្នុង។
២ ផ្អែកលើការស្ទង់មតិធ្វើឡើងដោយក្រុមហ៊ុន LG អេឡិចត្រូនិកសហរដ្ឋអាមេរិក។
៣ វិទ្យាស្ថានវិទ្យាសាស្ត្រស្បៀងអាហារនិងកសិកម្មនៅសាកលវិទ្យាល័យ Florida, https://www.goodhousekeeping.com/home/a19095/refrigerator-door-wastes-energy/

សូមអតិថិជនទាំងអស់អញ្ជើញមកទស្សនានូវការដាក់តាំងបង្ហាញផលិតផលគ្រប់សាខា LG BRANDSHOP មានទីតាំងសរុបចំនួន 10 សាខាទូទាំងប្រទេសកម្ពុជា ដែលរាជធានីភ្នំពេញ មាន 4 សាខា និងតាមបណ្ដាខេត្តមួយចំនួនដូចជា សាខាខេត្តកំពង់ចាម សាខាខេត្តសៀមរាប សាខាខេត្តបាត់ដំបង សាខាក្រុងព្រះសីហនុ សាខាខេត្តកណ្ដាល និង សាខាក្រុងកំពត ។

ទំនិញមានគុណភាព តម្លៃសមរម្យ សេវាកម្មល្អ
ពត៌មានបន្ថែមសូមទំនាក់ទំនង មកកាន់សេវាកម្ម 023 222 699
Website: https://www.ggear.com.kh
Facebook: LG BrandShop Cambodia
Youtube: https://bit.ly/LGbrandshopCambodia

Best Quality Product Suitable Price Good Service
For more information please feel free to contact our hotline 023 222 699

October 1, 2019

5រឿងសំខាន់ដែលកូនត្រូវធ្វើឱ្យបានមុនអាយុ3ឆ្នាំ ដើម្បីត្រៀមខ្លួនចូលរៀនមត្តេយ្យ

ក្មេងតូចក្នុងវ័យ 3ឆ្នាំ ជាអំឡុងវ័យដែលឪពុកម្ដាយទាំងឡាយចាប់ផ្ដើមបញ្ជូនកូនទៅសាលាហើយ ដូច្នេះទើបថ្ងៃនេះ ឡារ៉ែន មានភារកិច្ចសំខាន់ដែលឪពុកម្ដាយនឹងត្រូវបង្ហាត់វិន័យដល់កូនឱ្យចេះជួយខ្លួនឯងក្នុងកិច្ចការងារប្រចាំថ្ងៃផ្សេងៗឱ្យបានមុនពេលគេចូលដល់វ័យរៀន ដើម្បីឱ្យកូនបានត្រៀមខ្លួនរួចជាស្រេចមុនចូលរៀនមត្តេយ្យ និងដើម្បីឱ្យខ្លួនគេមិនក្លាយជាបន្ទុកចំពោះអ្នកគ្រូនៅឯសាលា… ដូច្នេះយើងនាំគ្នាមកមើលថា តើមានរឿងអ្វីខ្លះដែលកូនត្រូវធ្វើឱ្យបានមុនអាយុ 3ឆ្នាំ?

1. បង្ហាត់ឱ្យកូនឈប់ស្រឡាញ់ដបទឹកដោះគោការដែលកូនអាយុជិត 3ឆ្នាំហើយ តែនៅតែស្រឡាញ់ដបទឹកដោះគោ ដើរកាន់ដបទឹកដោះគោគ្រប់ពេលវេលា ឬគេងមិនលក់ បើខ្វះដបទឹកដោះគោជាដើមនោះ មិនត្រឹមតែនឹងធ្វើឱ្យធ្មេញរបស់កូនមានបញ្ហានោះទេ តែនៅប្រថុយនឹងការកើតជំងឺពុកធ្មេញទៀតផង និងថែមទាំងមានផលប៉ះពាល់ដល់ការចូលរៀនត្រៀមមត្តេយ្យរបស់កូនទៀតផង។ ដូច្នេះ នៅពេលកូនឈានចូលដល់វ័យហាត់ដើរ ឬក្នុងអំឡុងវ័យ 1-2ខួប អ្នកម្ដាយគួរចាប់ផ្ដើមបង្ហាត់ឱ្យកូនឈប់ស្រឡាញ់ដបទឹកដោះគោ ហើយបែរមកញ៉ាំទឹកដោះគោតាមរយៈបំពង់បឺត ឬកែវវិញម្ដងបានហើយ។

2. បង្ហាត់ឱ្យកូនចេះអង្គុយអុឺអុឹសក្នុងកន្ថោរក្មេងមួយចំនួនមិនព្រមចូលបន្ទប់ទឹកក្នុងអំឡុងពេលនៅសាលារៀនឡើយ ព្រោះគេមិនចេះអង្គុយលើកន្ថោរ ព្រោះធ្លាប់ស្លៀកតែខោទឹកនោម ដូច្នេះមុនអាយុ 3ខួប ឪពុកម្ដាយគួរតែបង្ហាត់កូនឱ្យចេះជួយខ្លួនឯងក្នុងរឿងនេះ ដែលការបង្ហាត់កូនឱ្យចេះអង្គុយបន្ទោបង់លើកន្ថោរនេះ ក្មេងវ័យ 3ខួបអាចហាត់រៀនបានហើយ គ្រាន់តែឪពុកម្ដាយត្រូវមានពេលវេលានៅចាំនាំកូនទៅអង្គុយបន្ទោបង់លើ កន្ថោរ ឬនាំទៅចូលបន្ទប់ឱ្យបានជាប់លាប់ រហូតទាល់តែកូនហាត់ចេះ។ នៅពេលគេចេះចូលបន្ទប់ទឹកបានហើយ លុះដល់វ័យចូលរៀន គេនឹងចេះមើលថែទាំខ្លួនឯងបានមិនខាន។

3. បង្ហាត់ឱ្យកូនចេះញ៉ាំបាយដោយខ្លួនឯងក្មេងក្នុងវ័យ 2.5 – 3ឆ្នាំដែលចូលរៀនសាលាមត្តេយ្យនឹងត្រូវញ៉ាំអាហារពេលថ្ងៃត្រង់ដំណាលគ្នា និងញ៉ាំដោយខ្លួនឯង មិនមានអ្នកមកអង្គុយបញ្ចុកដូចពេលនៅផ្ទះនោះទេ ដូច្នេះឪពុកម្ដាយគួរបង្ហាត់ឱ្យកូនមានវិន័យ ចេះញ៉ាំបាយដោយខ្លួនឯង ដួសបាយញ៉ាំខ្លួនឯងបានតាំងពីនៅតូច លុះដល់វ័យចូលសាលា គេនឹងបានជួយខ្លួនឯងដោយមិនក្លាយជាបន្ទុកចំពោះអ្នកគ្រូនៅឯសាលា។

4. បង្ហាត់ឱ្យកូនចេះដុសសម្អាតធ្មេញសុខភាពប្រអប់មាត់របស់កូនជារឿងសំខាន់ ដែលឪពុកម្ដាយត្រូវយកចិត្តទុកដាក់ និងមិនអាចបណ្ដែតបណ្ដោយបាន ដូច្នេះការបង្រៀនកូនឱ្យមានវិន័យ ចេះដុសសម្អាតធ្មេញនៅពេលព្រឹក ធ្វើឱ្យក្លាយជាទម្លាប់ប្រចាំថ្ងៃ កូនក៏នឹងចេះដុសសម្អាតធ្មេញខ្លួនឯង ក្លាយជាក្មេងស្រឡាញ់ភាពស្អាត ធ្មេញមិនពុក និងមានធ្មេញរឹងមាំ។ ពេលដល់វ័យចូលសាលា ក្មេងមត្តេយ្យត្រូវដុសសម្អាតធ្មេញមុនពេលគេង កូនក៏អាចមើលថែទាំខ្លួនឯងបាន។

5. បង្ហាត់ឱ្យកូនចេះមើលថែទាំរបស់ជាធម្មជាតិរបស់ក្មេងតូច ជាពិសេសក្មេងក្នុងវ័យមត្តេយ្យ គេនឹងនៅហួងហែងរបស់លេង គិតតែពីលេង និងតែងជក់ចិត្តនឹងការលេង រហូតអាចភ្លេចរបស់របរប្រើប្រាស់ផ្ទាល់ខ្លួន ដូច្នេះទើបឪពុកម្ដាយគួរបង្ហាត់ឱ្យកូនចេះចាំចំណាំរបស់របររបស់ខ្លួនឯង ឱ្យដឹងថា បានដាក់របស់របរខ្លួនឯងនៅត្រង់ណា និងអាចប្រាប់បានថា អ្វីជារបស់ខ្លួនឯង ដើម្បីឱ្យគេចេះមើលថែទាំរបស់របររបស់ខ្លួនឯងបាន មិនដូច្នោះទេ ពេលដល់វ័យចូលសាលា លោកឪពុកអ្នកម្ដាយច្បាស់ជានឹងត្រូវអស់លុយទិញរបស់របរឱ្យកូនម្ដងហើយម្ដងទៀតជាប់រហូតជាមិនខាន៕

October 1, 2019

ឱ្យកូនបៅដោះហើយ ដោះនឹងយារធ្លាក់មែនឬ? ស្វែងយល់ពីវិធីការពារសុដន់យារធ្លាក់ក្រោយពេលកូនលែងបៅ

“សុដន់ ឬដោះ” ត្រូវបានធម្មជាតិសាងឡើងដើម្បីផលិតទឹកដោះឱ្យកូនដែលជាទារកទើបនឹងកើត តែខណៈពេលជាមួយគ្នា ក៏ជាផ្នែកមួយដែលធ្វើឱ្យស្ត្រីមានមន្តស្នេហ៍ក្នុងខ្សែភ្នែកបុរសដែរ ដូច្នេះហើយទើបមានស្ត្រីជាម្ដាយមួយចំនួនកង្វល់បារម្ភរឿងសុដន់យារធ្លាក់ក្រោយពេលមានកូន និងឱ្យកូនបៅទឹកដោះគោ ជំនួសការឱ្យកូនបៅទឹកដោះខ្លួនឯង ព្រោះតែយល់ថា “ឱ្យកូនបៅដោះយូរៗទៅ នឹងធ្វើឱ្យដោះធ្លាក់យារ!!” ទាំងការពិតវិញ ចង់ឱ្យកូនបៅដោះ ឬមិនឱ្យកូនបៅដោះ ក៏សុដន់ស្ត្រីជាម្ដាយត្រូវតែយារធ្លាក់គ្រប់តែគ្នាហ្នឹង… បើមិនចេះមើលថែទាំខ្លួន។

មូលហេតុបណ្ដាលមកពីអ្វី?
– គ្រាន់តែមានគភ៌ ក៏យារបាត់ទៅហើយ : សុដន់របស់មនុស្សស្រីនឹងចាប់ផ្ដើមយារតាំងពីពេលចាប់ផ្ដើមតាំងគភ៌ម្ល៉េះ។ មូលហេតុ មកពីទំហំរបស់ “សុដន់” ដែលនឹងមានការរីកធំឡើង ដើម្បីត្រៀមជាស្រេចក្នុងការផលិតទឹកដោះឱ្យកូន និងបរិវេណក្បាលសុដន់ក៏នឹងធំឡើង និងមានពណ៌ស្រអាប់ឡើងដែរ។ សរសៃឈាមខ្មៅនឹងមានខ្នាតធំឡើង រហូតមើលឃើញយ៉ាងច្បាស់ ដូច្នេះទោះជាក្រោយពេលឆ្លងទន្លេ មិនបានឱ្យកូនបៅដោះក៏ដោយ ក៏នៅតែយារដូចគ្នា ដោយនឹងចាប់ផ្ដើមយារធ្លាក់ចុះម្ដងបន្តិចៗ ហើយនឹងខ្លាំង ឬតិចប៉ុនណា អាស្រ័យលើទំហំរបស់សុដន់ បរិមាណខ្លាញ់ក្នុងខ្លួន និងអាយុរបស់ស្រ្តីខ្លួនឯង។– ក្រុមអ្នកម្ដាយដែលមានទឹកដោះច្រើនខ្លាំងពេក : ស្ត្រីជាម្ដាយដែលឡើងដោះខ្លាំង មានឱកាសសុដន់រីកយារខ្លាំងជាងស្ត្រីជាម្ដាយដែលមានសុដន់តូច ព្រោះសុដន់ក៏ដូចប៉ឺតប៉ោងដែរ ពេលវាប៉ោង វាក៏ណែនខ្លាំង ពេលឈប់ឱ្យកូនបៅដោះ វាក៏ធូរស្ពេតខ្លាំងដូចគ្នា។ តែទាំងអស់នេះ ក៏មិនមែនមានន័យថា វានឹងកើតឡើងចំពោះស្ត្រីជាម្ដាយគ្រប់គ្នានោះដែរ ព្រោះបើសិនជាស្ត្រីជាម្ដាយមើលថែទាំខ្លួនឯងបានល្អ ចេះហាត់ប្រាណពង្រឹងសាច់ដុំសុដន់ ទោះជាកូនញឹក(ច្រើន) ឬឱ្យកូនបៅដោះរយៈពេលយូរប៉ុនណា ក៏សុដន់អាចនឹងត្រឡប់មកតែងណែនដូចដើមបានដែរ។

បច្ច័យផ្សេងៗទៀតដែលមិនពាក់ព័ន្ធនឹងការឱ្យកូនបៅដោះ
1. បារី : មិនជឿ ក៏ត្រូវតែជឿដែរថា បារីជាវត្ថុគ្រោះថ្នាក់ដែលធ្វើឱ្យស្រ្តីសុដន់យារខ្លាំងជាងឱ្យកូនបៅទៅទៀត។
2. អាយុ : មិនថានឹងមានកូន ឬមិនមានកូននោះទេ នៅពេលមនុស្សស្រីអាយុកើនច្រើនឡើង “ភាពចាស់ជរា” នឹងធ្វើឱ្យសុដន់យារធ្លាក់ទៅតាមវ័យជាបណ្ដើរៗ។
3. អម្បូរពូជ : បើសិនជាម្ដាយ ឬលោកយាយរបស់អ្នកមានអម្បូរពូជសុដន់យារធ្លាក់ អ្នកខ្លួនឯងក៏មានភាគរយខ្ពស់ក្នុងការដែលសុដន់នឹងយារធ្លាក់បានដូចគ្នា។
4. ភាពធាត់ : ស្រ្តីមានគភ៌មិនគួរបណ្ដោយខ្លួនឱ្យធាត់ជ្រុលពេកទេ! ព្រោះទម្ងន់ខ្លួនដែលឡើងលឿន ចុះលឿន នឹងធ្វើឱ្យស្បែកយារធ្លាក់ដែលមិនមែនត្រឹមតែសុដន់ប៉ុណ្ណោះទេ គឺទូទាំងដងខ្លួនតែម្ដង។
5. ពាក់អាវទ្រនាប់ដែលមិនសមល្មមនឹងសុដន់ : រឹបណែនជ្រុល ឬរលុងជ្រុលពេករហូតមិនអាចទទួលទ្រទម្ងន់របស់សុដន់បាន។មកដល់ពេលនេះហើយ ឡារ៉ែន ជឿថា ស្រ្តីដែលមានកូន មិនថាទីបំផុតទៅ សុដន់នឹងតឹងណែន ឬនឹងយារធ្លាក់ក្ដី ក៏ប្រហែលជាមិនសំខាន់ស្មើនឹងការបំបៅដោះកូនដែរ ព្រោះខ្លាំងជាងការបំបៅដោះកូនដើម្បីឱ្យកូនបានទទួលសារធាតុអាហារដែលមានប្រយោជន៍ពីទឹកដោះម្ដាយនោះ ការលើកកូនបីឱ្យបៅដោះ គឺជាការបញ្ជូនក្ដីស្រឡាញ់ ភាពកក់ក្ដៅដែលគ្មានវិធីណាល្អស្មើនឹងវិធីនេះឡើយ៕

October 1, 2019

ឆមាសទី1 ឆ្នាំនេះ ទេសចរពិភពលោកកើនឡើង4% តំបន់អាស៊ីបង្ហាញកំណើនខ្លាំង ខណៈកម្ពុជាត្រូវការភាពទាក់ទាញបន្ថែម

សន្និបាតលើកទី23 របស់អង្គការទេសចរណ៍ពិភពលោក (UNWTO) បានប្រារព្ធធ្វើឡើងនៅទីក្រុង សេន ភីតធើស្បឺក (Saint Petersburg) ប្រទេសរុស្ស៊ី កាលពីថ្ងៃទី9 ដល់ទី13 ខែកញ្ញា ឆ្នាំ2019។ សន្និបាតនេះបានឱ្យដឹងថា រយៈពេល 6ខែដើមឆ្នាំ2019 នេះ ពិភពលោកទាំងមូលទទួលបានកំណើនភ្ញៀវទេសចរ បើធៀបនឹងរយៈពេលដូចគ្នានៅឆ្នាំ2018។ នេះបើតាមគណៈប្រតិភូរបស់ក្រសួងទេសចរណ៍កម្ពុជាដែលបានទៅចូលរួម។

លោក ថោង រដ្ឋសក្តិ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិនៃក្រសួងទេសចរណ៍បានឱ្យដឹងថា អង្គការទេសចរណ៍ពិភពលោកបានបង្ហាញអំពីកំណើនទេសចរបើធៀបនឹងរយៈពេលដូចគ្នានៅឆ្នាំ2018 គឺក្នុងរយៈពេល 6ខែដើមឆ្នាំ2019 ពិភពលោកទទួលបាន ភ្ញៀវទេសចរប្រមាណ 671លាននាក់ក្នុងកំណើន 4%។

លោក ថោង រដ្ឋសក្តិ បានបន្តថា ក្នុងចំណោមកំណើនទេសចរដែលពិភពលោកទទួលបាននោះរួមមាន៖ នៅតំបន់មជ្ឈិមបូព៌ាកើនឡើង 8% នៅអាស៊ីប៉ាស៊ីហ្វិកកើនឡើង 6% នៅទ្វីបអឺរ៉ុបកើនឡើង 4% នៅទ្វីបអាហ្វ្រិកកើនឡើង 3% និងនៅទ្វីបអាមេរិកកើនឡើង 2%។ រីឯនៅក្នុងតំបន់អាស៊ីអាគ្នេយ៍ តំបន់អាស៊ីទក្សិណ និងតំបន់អាស៊ី-បូព៌ា ក៏មានការកើនឡើងចាប់ពី 1-5% ផងដែរ។លោកអគ្គនាយកបានបន្ថែមថា កំណើនទេសចរពិភពលោក 4% នេះ គឺស្របទៅនឹងការរំពឹងទុករបស់អង្គការទេសចរណ៍ពិភពលោកដែលបានព្យាករទុកកាលពីឆ្នាំមុន ហើយក៏ជាចរន្តសេដ្ឋកិច្ចដ៏សំខាន់សម្រាប់ពិភពលោកទាំងមូលផងដែរ។

អង្គការទេសចរណ៍ពិភពលោកបានបញ្ជាក់ទៀតថា កត្តាដែលជំរុញឱ្យមានកំណើនទេសចរយ៉ាងដូច្នេះ ក៏ដោយសារមានការចូលរួមពីវិស័យពាក់ព័ន្ធមួយចំនួនដូចជា ផលិតផលទេសចរណ៍ថ្មីៗត្រូវបានបង្កើតឡើង ការជួយសម្រួលមធ្យោបាយធ្វើដំណើររបស់ទេសចរ ពិសេសគឺការធ្វើដំណើរតាមផ្លូវអាកាស គួបផ្សំនឹងតម្លៃសំបុត្រយន្តហោះក៏មានភាពសមរម្យល្អជាងមុន ហើយទិដ្ឋាការសម្រាប់ភ្ញៀវទេសចរ ក៏ត្រូវបានសម្របសម្រួលឱ្យភាពងាយស្រួលជាងមុនផងដែរ។

ប៉ុន្តែទោះបីជាតួលេខបង្ហាញថា ទេសចរពិភពលោកមានការវិវឌ្ឍតាមការរំពឹងទុកដែលនាំមកនូវចរន្តសេដ្ឋកិច្ចដ៏សំខាន់ក៏ដោយ ក៏ភាពបារម្ភនៅតែកើតមាន ព្រោះទន្ទឹមនឹងការអបអរសាទរ ចំពោះកំណើននេះ អង្គការទេសចរណ៍ពិភពលោកក៏មានការព្រួយបារម្ភអំពីផលប៉ះពាល់ដល់វិស័យទេសចរណ៍ ដែលបណ្ដាលមកពីវិបត្តិសង្គ្រាមពាណិជ្ជកម្មរវាងសហរដ្ឋអាមេរិក និងមហាយក្សចិន ការចាកចេញរបស់ចក្រភពអង់គ្លេសពីសហភាពអឺរ៉ុប(Brexit) ព្រមទាំងបញ្ហាមួយចំនួនដែលកើតចេញពីបដិវត្តន៍ឧស្សាហកម្ម 4.0 ផងដែរ។

ដោយឡែកវិស័យទេសចរណ៍របស់កម្ពុជាបាននិងកំពុងមានការធ្លាក់ចុះចំនួនភ្ញៀវទេសចរ ដែលដើម្បីដោះស្រាយបញ្ហានេះ រាជរដ្ឋាភិបាលកម្ពុជាតាមរយៈគណៈកម្មការអន្តរក្រសួងបានដាក់ចេញនូវយុទ្ធសាស្ត្រចំនួន4 សំដៅជំរុញកំណើនភ្ញៀវទេសចរឡើងវិញ។

ឯកឧត្តម ថោង ខុនរដ្ឋមន្ត្រីក្រសួងទេសចរណ៍បានថ្លែងឱ្យដឹងថា៖“អង្គប្រជុំគណៈកម្មការ អន្តរក្រសួងបានប្រកាសដាក់ចេញគម្រោងផែនការមេសម្រាប់អភិវឌ្ឍន៍វិស័យទេសចរណ៍ខេត្តសៀមរាប និងផែនការសកម្មភាពការងារអនុវត្តចំពោះមុខរយៈពេលខ្លី ឆ្នាំ2019-2020 ក្រោមទិសស្លោក “ប្រែក្លាយបញ្ហាប្រឈមទៅជាឱកាស”។ ចំណែកផែនការយុទ្ធសាស្ត្រទាំង4 ដែលនឹងជួយស្តារឡើងវិញនូវកំណើនភ្ញៀវទេសចរមកទស្សនាខេត្តសៀមរាបនោះ គឺរួមមាន៖1-ពិពិធកម្មផលិតផលទេសចរណ៍ថ្មី និងការពន្យារពេលស្នាក់នៅរបស់ភ្ញៀវទេសចរ។ 2-បង្កើតភាពប្រកួតប្រជែង។ 3-បង្កើនការតភ្ជាប់ និង 4-បង្កើតអត្តសញ្ញាណថ្មីនៃតំបន់សៀមរាប។

លោកជំទាវ ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានប្រាប់ ឡារ៉ែនពាណិជ្ជថា កម្ពុជាត្រូវការការកែខៃ ត្រូវការការចូលរួមទាំងអស់គ្នាក្រោយពីមានការធ្លាក់ចុះភ្ញៀវទេសចរនៅខេត្តសៀមរាប ទាំងវិស័យឯកជន ទាំងវិស័យសាធារណៈត្រូវរៀបចំហេដ្ឋារចនាសម្ព័ន្ធ ដែលជាចំណុចខ្វះខាតក្នុងវិស័យទេសចរណ៍ឡើងវិញ។

លោកជំទាវប្រធានសមាគមបានបញ្ជាក់ថា៖“យើងក៏អបអរសាទរនូវអ្វីដែលជាយុទ្ធសាស្ត្ររបស់រាជរដ្ឋាភិបាល តែយើងត្រូវការផលិតផលថ្មីៗបន្ថែមទៀត និងការថែទាំ ដែលការពិតយើងមានទេសចរណ៍ដ៏សម្បូរបែប ទេសចរណ៍វប្បធម៌ ទេសចរណ៍ធម្មជាតិ ទេសចរណ៍អេកូឡូស៊ី ដែលយើងត្រូវបន្ថែមនូវសេវាកម្មគោលដៅដែលអាចឱ្យភ្ញៀវទៅដល់ តែមិនបានចាយលុយនៅតំបន់ទេសចរណ៍នោះ”។

លោកជំទាវ ឆាយ ស៊ីវលីន ក៏បានបញ្ជាក់បន្ថែមផងដែរថា៖“ដូច្នេះយើងត្រូវពង្រឹងនូវអ្វីដែលជាសក្តានុពលរបស់តំបន់ទេសចរណ៍ចាស់ៗដែលយើងមាន រួមទាំងអនាម័យ ភាពស្អាតបាត មានបរិស្ថានល្អ ហើយក្រុមហ៊ុនទេសចរណ៍ ក៏ត្រូវពង្រឹងសេវាកម្មរបស់ខ្លួនដោយផ្តោតលើគុណភាព និងភាពស្មោះត្រង់ដើម្បីទាក់ទាញភ្ញៀវទេសចរ”។

“ប្រសិនបើយើងអាចរួមគ្នាជំរុញនូវផលិតផលទេសចរណ៍ថ្មីៗឱ្យបានកាន់តែឆាប់ និងពង្រឹងនូវអ្វីដែលជាសក្តានុពលទេសចរណ៍របស់យើងបាន យើងនឹងទទួលបានភ្ញៀវទេសចរត្រឡប់មកវិញ និងមានកំណើនភ្ញៀវទេសចរ ជាក់ជាមិនខាន”។ នេះបើតាមអ្វីលោកជំទាវ ឆាយ ស៊ីវលីន បានបញ្ជាក់។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានប្រាប់ឡារ៉ែន ពាណិជ្ជថា៖“ពាក់ព័ន្ធនឹងការធ្វើយ៉ាងណាឱ្យភ្ញៀវទេសចរឱ្យមានការកើនឡើងនោះ សំខាន់គឺការផ្សព្វផ្សាយទេសចរណ៍ដែលយើងមាន ព្រោះភ្ញៀវដែលយើងផ្តោតជាសំខាន់ គឺភ្ញៀវបរទេស ហើយយើងត្រូវការផ្សព្វផ្សាយអំពីទេសចរណ៍ឱ្យបានទូលំទូលាយ ដើម្បីដណ្តើមចំណែកទីផ្សារទេសចរណ៍នៅក្នុងទីផ្សារអន្តរជាតិ។ នេះជាចំណុចទី1”។

លោកឧកញ៉ាបានបន្តថា៖“ចំណុចទី2 ទាក់ទងនឹងបញ្ហាសេវាបម្រើឱ្យវិស័យទេសចរណ៍ គឺឱ្យបានល្អ ឱ្យស្អាត ឱ្យមានគុណភាព និងតម្លៃសមរម្យ ដើម្បីភ្ញៀវទេសចរមកលេង គេបានប្រាប់តៗឱ្យគ្នាគេមកលេង វាដូចជាការផ្សព្វផ្សាយបន្តដែរ”។

លោកឧកញ៉ាក៏បានបញ្ជាក់ដែរថា៖“យើងមានសក្តានុពលទេសចរណ៍ តែយើងបានបង្ហាញភ្ញៀវទេសចរ និងបានបង្ហាញយ៉ាងណាខ្លះ? នេះក៏ដូចជាការបង្ហាញរបស់អ្នកលក់ផលិតផលដែលបានផ្សព្វផ្សាយតាមបណ្តាញព័ត៌មានដែរ។ ដូចនេះយើងក៏ត្រូវមានការផ្សព្វផ្សាយពីសក្តានុពលទេសចរណ៍របស់យើង ដើម្បីជាការទាក់ទាញភ្ញៀវទេសចរផង និងអ្នកវិនិយោគផងដែរ។ ព្រោះគេអាចឃើញទេសភាពតំបន់យើងល្អ ឆ្នេរសមុទ្រយើងស្អាត គេអាចមកធ្វើការវិនិយោគផងដែរ”។

លោកឧកញ៉ា លឹម ហេង បានបញ្ជាក់ទៀតថា៖“យើងបានធ្វើការផ្សព្វផ្សាយនៅតាមប្រទេសនីមួយៗកន្លងមកហើយ ដែលនេះជាការល្អ តែយើងត្រូវការផ្សព្វផ្សាយបែបសកល។ យើងត្រូវមាន Online chanal ឬ Website ណាមួយជាពិសេសសម្រាប់ផ្សព្វផ្សាយឯកសារដែលបម្រើឱ្យទេសចរណ៍ជាសកលនេះ វានឹងអាចទាក់ទាញភ្ញៀវអន្តរជាតិដែលយើងចង់បាន”៕

September 30, 2019

កិច្ចប្រជុំក្រុមប្រឹក្សាតំបន់ ជំរុញការធ្វើពាណិជ្ជកម្មសេរីអាស៊ាន (AFTA)

រដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ និងជារដ្ឋមន្ត្រីក្រុមប្រឹក្សាតំបន់ ពាណិជ្ជកម្មសេរីអាស៊ានរបស់កម្ពុជា បានដឹកនាំគណៈប្រតិភូក្រសួងសេដ្ឋកិច្ច និងហិរញ្ញវត្ថុចូលរួមក្នុងកិច្ចប្រជុំក្រុមប្រឹក្សាតំបន់ពាណិជ្ជកម្មសេរីអាស៊ានលើកទី33 (33rd ASEAN Free Trade Area (AFTA) Council Meeting) ដែលបានប្រព្រឹត្តទៅកាលពីដើមខែកញ្ញា ឆ្នាំ2019 នៅទីក្រុងបាងកក ព្រះរាជាណាចក្រថៃ។

ឯកឧត្តម វង្សី វិស្សុត ដែលបានដឹកនាំគណៈប្រតិភូក្រសួងសេដ្ឋកិច្ច និងហិរញ្ញវត្ថុចូលរួមកិច្ចប្រជុំនេះបានឱ្យដឹងថា កិច្ចប្រជុំត្រូវរៀបចំឡើងទន្ទឹមគ្នានឹងកិច្ចប្រជុំរដ្ឋមន្ត្រីសេដ្ឋកិច្ចអាស៊ានលើកទី 51 (51stAEM Meeting) និងកិច្ចប្រជុំពាក់ព័ន្ធដែលត្រូវបានរៀបចំឡើង កាលពីថ្ងៃទី3-10 ខែ កញ្ញា ឆ្នាំ2019។

ដោយនៅក្នុងកិច្ចប្រជុំក្រុមប្រឹក្សាតំបន់ពាណិជ្ជកម្មសេរីអាស៊ានលើកទី33នេះ បណ្តារដ្ឋមន្ត្រីក្រុមប្រឹក្សាតំបន់ពាណិជ្ជកម្មសេរីអាស៊ាន (AFTA Council Ministers) បានធ្វើការកត់សម្គាល់ និងវាយតម្លៃខ្ពស់លើវឌ្ឍនភាពនៃការធ្វើសមាហរណកម្មសេដ្ឋកិច្ចតំបន់ ស្ថិតក្រោមក្របខ័ណ្ឌផែនការមេ សហគមន៍សេដ្ឋកិច្ចអាស៊ានឆ្នាំ2025 (AEC Blueprint 2025)។

តាមរយៈការធ្វើសេរីភាវូនីយកម្មពន្ធគយអាស៊ានដោយអនុលោមតាមការសន្យា និងកាតព្វកិច្ចក្រោមកិច្ចព្រមព្រៀងពាណិជ្ជកម្មទំនិញអាស៊ាន(ATIGA) ដែលក្នុងនោះ អត្រាពន្ធគយលើបន្ទាត់ពន្ធចំនួន 98.6%នៃបន្ទាត់ពន្ធសរុបអាស៊ាន ត្រូវបានលុបបំបាត់ គិតត្រឹមឆ្នាំ2019 នេះ។ បន្ថែមពីនេះ អង្គប្រជុំក៏បានពិនិត្យ និងពិភាក្សាផ្លាស់ប្តូរមតិយោបល់លើវឌ្ឍនភាព និងបញ្ហា ប្រឈមមួយចំនួននៅក្នុងការអនុវត្តកិច្ចព្រមព្រៀងពាណិជ្ជកម្មទំនិញអាស៊ាន (ATIGA) រួមមានកិច្ចសម្រួលពាណិជ្ជកម្ម វិធានដើមកំណើតទំនិញ ការធ្វើសេរីភាវូនីយកម្មពន្ធគយ និងការលុបបំបាត់របាំងពាណិជ្ជកម្មក៏ដូចជាការធ្វើសមាហរណកម្មគយជាដើម។ នេះបើតាមគណៈប្រតិភូបានបញ្ជាក់ប្រាប់។

ក្នុងការឆ្លើយតបទៅនឹងបញ្ហាប្រឈមខាងលើនេះ អង្គប្រជុំបានផ្តល់អនុសាសន៍ឱ្យក្រុមការងារពាក់ព័ន្ធរបស់អាស៊ាន បន្តស្វែងរកនូវដំណោះស្រាយដែលសមស្រប និងអាចទទួលយកបាន ដោយឈរលើស្មារតីយោគយល់ និងសាមគ្តីភាពរបស់អាស៊ាន ព្រមទាំងបានអំពាវនាវឱ្យប្រទេសជាសមាជិកអាស៊ានទាំងអស់គោរព និងអនុវត្តការសន្យា និងកាតព្វកិច្ចទាំងឡាយ ដូចមានចែងនៅក្នុងកិច្ចព្រមព្រៀងពាណិជ្ជកម្មទំនិញអាស៊ាន (ATIGA) ឱ្យបានខ្ជាប់ខ្ជួន និងមានប្រសិទ្ធភាពខ្ពស់ សំដៅកាត់បន្ថយ និងចៀសវាងនូវជម្លោះរវាងសមាជិកដែលអាចកើតឡើង ជាយថាហេតុពីការអនុវត្តកិច្ចព្រមព្រៀងនេះ។

ក្រៅពីនេះ អង្គប្រជុំក៏បានពិនិត្យ និងអនុម័តលើឯកសារសំខាន់ៗចំនួន3 ដែលនឹងផ្តល់ អាណត្តិកិច្ចឱ្យបណ្តាប្រទេសជាសមាជិកអាស៊ានទាំងអស់អាចអនុវត្តនូវការប្រើប្រាស់វិក្កយបត្រ សម្រាប់ធ្វើប្រតិវេទន៍ស្វ័យបញ្ជាក់ប្រភពដើមទំនិញទូទាំងតំបន់អាស៊ាន (ASEAN-Wide Self-Certification) ក៏ដូចជាអាចចាប់ផ្តើមដំណើរការនៃការពិនិត្យឡើងវិញនូវកិច្ចព្រមព្រៀងពាណិជ្ជកម្មទំនិញអាស៊ាន (ATIGA) ផងដែរ។

ឯកឧត្តម ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់ឡារ៉ែនពាណិជ្ជថា៖“កិច្ចប្រជុំ ក្រុមប្រឹក្សាតំបន់ពាណិជ្ជកម្មសេរីអាស៊ាន AFTA Council Meeting គឺក្រសួងសេដ្ឋកិច្ចជាអ្នកទទួលខុសត្រូវនៅក្នុងរឿងទាក់ទងពន្ធដារទាំងអស់ តែក្រសួងពា-ណិជ្ជកម្ម នៅក្នុងទំនាក់ទំនងពាណិជ្ជកម្មនៅក្នុងកិច្ចការអាស៊ានក៏មានការទទួលខុសត្រូវដែរ ព្រោះរដ្ឋមន្ត្រីសេដ្ឋកិច្ចអាស៊ាន ជារដ្ឋមន្ត្រីក្រសួងពាណិជ្ជកម្ម តែនៅក្រោមនេះក៏មានក្រុមប្រឹក្សា2 ទៀត គឺក្រុមប្រឹក្សា (AFTA Council) ក្រុមប្រឹក្សាតំបន់ពាណិជ្ជកម្មសេរីអាស៊ាន (ដែលទាក់ទងនឹងការកាត់ពន្ធ) និងAIM Council (ដែលទាក់ទងនឹងការវិនិយោគ)”។

ឯកឧត្តម បានបញ្ជាក់ទៀតថា៖“ដូច្នេះ AFTA Council ក្រសួងសេដ្ឋកិច្ចជាអ្នកទទួលខុសត្រូវ ឯ AEM Council ក្រសួងពាណិជ្ជកម្មជាអ្នកទទួល-ខុសត្រូវ។ នេះជារចនាសម្ពន្ធកិច្ចការអាស៊ានទាក់ទងនឹងកិច្ចប្រជុំពាក់ព័ន្ធនឹងពាណិជ្ជកម្មសេរីភាវូប-នីយកម្មអាស៊ាន។ បើនិយាយពីកិច្ចការនេះ ឱ្យស៊ីជម្រៅ វាមានTime Fram របស់វា។ ពោលគឺ សម្រាប់ប្រទេសអាស៊ានទាំង10 ប្រទេសណាត្រូវកាត់ពន្ធនៅឆ្នាំណា ហើយនឹងកាត់អស់នៅឆ្នាំណា? ពិសេសប្រទេស4 កម្ពុជា វៀតណាម ឡាវ មីយ៉ាន់ម៉ាគេទុកឱ្យនៅក្រោយគេបន្តិច”។

ឯកឧត្តម បានបញ្ជាក់ទៀតថា៖“ពាណិជ្ជកម្មចំពោះទំនិញដែលចរាចរណ៍ប្រើប្រាស់រាល់ថ្ងៃ ក៏ត្រូវបានចែកចេញជាក្រុមផងដែរ ព្រោះវាមានដល់រាប់ម៉ឺនមុខ។ ហេតុនេះការចែកជា 4ក្រុម សម្រាប់ទំនិញទាំងអស់ គឺក្រុមទី1-ដាក់ចេញទៅ គឺត្រូវកាត់ពន្ធ មិនសូវពិបាកទេ។ ក្រុមទី2-កាត់ពន្ធបណ្តើរ។ ទី3-ជាក្រុមមានការពិចារណាខ្លាំង ដូចជាទំនិញប្រងសាំងឡាន ជារបស់រសើប គេទុកកាត់យកពន្ធ និងក្រុមទី4-ជាទំនិញទាក់ទងសន្តិសុខ និងវប្បធម៌(មានវីដេអូអាសអាភាស និងគ្រាប់កាំភ្លើងជាដើម)”។

ឯកឧត្តម ស៊ាង ថៃ បានបញ្ជាក់បន្ថែមទៀតថា៖“ដូច្នេះទំនិញដែលហូរទៅហូរមកដោយសេរីគឺស្ថិតនៅក្នុងក្រុមទី 1-2-3ប៉ុណ្ណោះ ដូច្នេះកិច្ចប្រជុំដែលបានធ្វើឡើង គឺចាំបាច់ត្រូវតែពិភាក្សាដោយថ្លឹងថ្លែងពីបញ្ហាប្រឈមរបស់ប្រទេសនីមួយៗ ទាក់ទងនឹងសន្តិសុខជាសំខាន់ និងជាផលប្រយោជន៍នៃការធ្វើពាណិជ្ជកម្ម រវាងប្រទេសនឹងប្រទេសក្នុងតំបន់អាស៊ាន ដែលមានកិច្ចសហប្រតិបត្តិការ និងកិច្ចព្រមព្រៀងជាមួយគ្នា”៕

September 30, 2019

កុំហាមក្មេងមិនឱ្យលេង តែត្រូវបញ្ចៀសកុំឱ្យលេងអ្វីផ្សេងក្រៅពីបច្ចេកវិទ្យា

ក្មេងតូចៗជាវ័យរពឹសបំផុត ព្រោះវ័យនេះជាវ័យដែលកំពុងមានការវិវឌ្ឍយ៉ាងឆាប់រហ័សទាំងផ្នែករាងកាយ និងប្រាជ្ញាស្មារតី។ ជាធម្មតា ប្រសិនបើយើងទម្លាប់ក្មេងឱ្យចូលចិត្តអ្វី នោះផ្នត់គំនិត រួមទាំងឥរិយាបថរបស់ក្មេងតូចៗនឹងបត់ទៅតាមនោះដែរ។

កន្លងមក បញ្ហាប្រឈមដែលកំពុងកើតឡើងលើពិភពលោក ជាពិសេសអាណាព្យាបាលនៅកម្ពុជា គឺអាណាព្យាបាលបានបណ្តោយឱ្យក្មេងតូចៗប្រើប្រាស់ឧបករណ៍អេឡិចត្រូនិកដើម្បីបញ្ឈប់ភាពគួរឱ្យរំខានរបស់ពួកគេនៅក្នុងផ្ទះ ឬនៅកន្លែងប្រកបអាជីវកម្មជាដើម។ ការធ្វើបែបនេះ ត្រូវបានគេមើលឃើញថា បានបង្កើតផលប៉ះពាល់អវិជ្ជមានជាច្រើន ដែលមកដល់ពេលនេះ វាបានបង្ហាញផលប៉ះពាល់ជាបណ្តើរៗហើយចំពោះគ្រួសារមួយចំនួន ដូចជាកូនមិនសូវនិយាយស្តី ឆាប់ខឹង មួម៉ៅច្រើន ឬក្លាយជាមនុស្សញៀនជាមួយនឹងបច្ចេកវិទ្យាជាដើម។ ក្រៅពីនេះ ផលប៉ះពាល់ចំពោះរាងកាយក៏កើតមានច្រើនផងដែរ ដូចជាបញ្ហាភ្នែក និងបញ្ហាប្រព័ន្ធភាពស៊ាំនឹងជំងឺក៏ថយចុះ ដោយសារពួកគេមិនសូវបញ្ចេញសកម្មភាពច្រើន ព្រោះពួកគេចំណាយពេលច្រើនពេកនៅមុខអេក្រង់ទូរស័ព្ទ។

ព្រះតេជគុណ គូ សុភាព សាស្រ្តាចារ្យនៃសាកលវិទ្យាល័យបញ្ញាសាស្រ្តបានមានសង្ឃដីកាថា កុំឃាត់ក្មេងមិនឱ្យលេង ទៅមិនរួចទេ! ព្រោះក្មេងជាវ័យដែលត្រូវលេង តែអ្វីដែលយើងអាចធ្វើបានគឺបញ្ចៀសក្មេងកុំឱ្យលេងឧបករណ៍អេឡិចត្រូនិក តាមរយៈការកំណត់វិន័យ រួមទាំងការបង្វែរក្មេងឱ្យមានសកម្មភាពជាវិជ្ជមានផ្សេងៗទៀត។ មិនថាតែក្មេងទេដែលអាចរងផលប៉ះពាល់ តាមពិតទៅទូរស័ព្ទ ឬឧបករណ៍អេឡិចត្រូនិកក៏ប៉ះពាល់ខ្លាំងផងដែរដល់មនុស្សធំតាមរយៈ Notification ដែលតែងតែលោត និងធ្វើឱ្យយើងចង់តាមដានជាប់ជានិច្ច។ ចំណុចនេះអាចធ្វើឱ្យយើងទាំងអស់គ្នាមានបញ្ហាផ្លូវចិត្ត ដោយសារតែហត់នឿយ និងជក់ខ្លាំងពេកជាមួយនឹងកម្មវិធីដែលកំពុងទាក់ទាញឱ្យយើងប្រើប្រាស់ដោយគ្មានពេលទំនេរនេះ។

ព្រះតេជគុណ គូ សុភាព បានមានសង្ឃដីកាថា៖“គ្រួសារនីមួយៗគួរមានទម្លាប់ និងវិន័យមួយចំនួនចំពោះការរឹតត្បិតការលេងឧបករណ៍អេឡិចត្រូនិក ជាពិសេសទូរស័ព្ទ នៅក្នុងពេលវេលាសំខាន់ៗ ដូចជានៅតុបាយជុំគ្នាហាមដាច់ខាតមិនឱ្យលេងទូរស័ព្ទ”។

សម្រាប់ក្មេងតូចៗ ព្រះតេជគុណបានបញ្ជាក់ថា ព្រះតេជគុណមានក្មួយតូចដែលជក់ខ្លាំងជាមួយទូរស័ព្ទ ហើយមិនខ្លាចអ្នកណាទាំងអស់។ ក្រោយមកជីដូនរបស់គាត់បានដកឧបករណ៍អេឡិចត្រូនិកទាំងអស់មិនឱ្យលេង។ ជាលទ្ធផល ដំបូងឡើយគាត់មិនសប្បាយចិត្តខ្លាំង តែក្រោយពេលស្ងាត់មួយរយៈគាត់ចាប់ផ្តើមលេង និងសកម្មដូចក្មេងទូទៅ ព្រោះធម្មជាតិរបស់ក្មេងទាំងអស់ចូលចិត្តលេងច្រើន។ ចំពោះអាណាព្យាបាល គួរព្យាយាមផ្តាច់កូនពីឧបករណ៍អេឡិចត្រូនិក ហើយស្វែងរកវិធីសាស្រ្តក្នុងការបង្កើតសកម្មភាពបែបណាដែលមានភាពទាក់ទាញ និងសប្បាយជាងការលេងទូរស័ព្ទ ដើម្បីឱ្យក្មេងរីករាយជាមួយនឹងអ្វីដែលជារឿងវិជ្ជមានសម្រាប់ជីវិតរបស់ពួកគេ។

បច្ចុប្បន្ននេះ ដោយមើលឃើញពីគុណវិបត្តិកាន់តែច្រើនលើឧបករណ៍អេឡិចត្រូនិក អាណាព្យាបាលបានផ្លាស់ប្តូរផ្នត់គំនិតដែលគិតថា ក្មេងតូចៗចេះលេងទូរស័ព្ទជាក្មេងឆ្លាតវៃ និងដឹងរឿងច្រើន មកគិតថា វាអាចជាឧបករណ៍ដ៏គ្រោះថ្នាក់ ប្រសិនបើពួកគាត់គ្រប់គ្រងការលេងរបស់កូនមិនបានល្អ។ ហើយផលប៉ះពាល់អវិជ្ជមាននៃការលេងទូរស័ព្ទនេះ នឹងធ្វើឱ្យអាណាព្យាបាលស្តាយក្រោយនៅថ្ងៃខាងមុខ។ ហេតុនេះហើយ ទើបអាណាព្យាបាលមួយចំនួនចាប់ផ្តើមភ្ញាក់ខ្លួន និងព្យាយាមចំណាយពេលកាន់តែច្រើនដោយការដកខ្លួនពីការលេងឧបករណ៍អេឡិចត្រូនិកមកនៅជាមួយកូនៗដើម្បីជាគំរូ និងដើម្បីបង្ហាញពីការគិតគូរដល់អនាគតរបស់កូនតូចៗ៕

September 29, 2019

ធនាគារពិភពលោក ផ្តល់ជំនួយអភិវឌ្ឍន៍ចំនួន 1ពាន់លានដុល្លារ ក្នុងក្របខ័ណ្ឌកិច្ចសហការភាពជាដៃគូ ជំរុញកិច្ចអភិវឌ្ឍន៍សេដ្ឋកិច្ច

ក្រសួងសេដ្ឋកិច្ច និងហិរញ្ញវត្ថុបានប្រកាសថា ធនាគារពិភពលោក (WB) បានអនុម័តជាផ្លូវការនូវទឹកប្រាក់ចំនួន 1ពាន់លានដុល្លារដើម្បីអភិវឌ្ឍវិស័យអាទិភាពមួយចំនួននៅក្នុងប្រទេសកម្ពុជា។ ហិរញ្ញប្បទាននេះបានផ្តល់ជូនក្នុង“ក្របខ័ណ្ឌភាពជាដៃគូប្រចាំប្រទេសសម្រាប់ឆ្នាំ2019-2023”(CountryPartnership Framework – CPF 2019-2023)។ នេះបើយោងតាមសេចក្តីថ្លែងការណ៍ដែលបានចេញផ្សាយបន្ទាប់ពីកិច្ចប្រជុំរវាងរដ្ឋមន្ត្រីសេដ្ឋកិច្ច និងហិរញ្ញវត្ថុជាមួយអនុប្រធានធនាគារពិភពលោក។

លោកស្រី វិចតូរៀ ខ្វាខ្វា Victoria Kwakwa អនុប្រធានធនាគារពិភពលោក ទទួលបន្ទុកតំបន់អាស៊ីបូព៌ា និងប៉ាស៊ីហ្វិក ក្នុងជំនួបជាមួយឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថ្លែងអំណរគុណដល់ឯកឧត្តមរដ្ឋមន្ត្រីដែលបានផ្តល់កិច្ចសហការយ៉ាងសកម្មជាមួយ WB ក្នុងការរៀបចំឯកសារ “ក្របខ័ណ្ឌនៃភាពជាដៃគូរវាងរាជរដ្ឋាភិបាលជាមួយ WB ឆ្នាំ2019-2023” បានដោយជោគជ័យ និងឈានដល់ការអនុម័តដាក់ឱ្យអនុវត្តជាផ្លូវការ កាលពីពេលថ្មីៗនេះទៀតផង ដែលទាំងនេះជាសក្ខីភាពបង្ហាញអំពីកិច្ចសហការក្នុងភាពជាដៃគូ និងស្មារតីគោរពភាពជាម្ចាស់លើកិច្ចអភិវឌ្ឍន៍របស់រាជរដ្ឋាភិបាល។

យោងតាមសេចក្តីថ្លែងការណ៍បានបញ្ជាក់ថា៖“កម្មវិធីនេះ គឺជាក្របខ័ណ្ឌកិច្ចសហប្រតិបត្តិការរយៈពេលមធ្យម រវាងរាជរដ្ឋាភិបាលកម្ពុជា និងធនាគារពិភពលោក ដែលនឹងផ្តល់ប្រាក់កម្ចីដើម្បីគាំទ្រដល់ការអភិវឌ្ឍ ជាពិសេសយុទ្ធសាស្ត្រចតុកោណដំណាក់កាលទី 4 របស់រដ្ឋាភិបាល”។

ក្របខ័ណ្ឌនេះផ្តោតសំខាន់ទៅលើប្រសិទ្ធភាពរបស់រដ្ឋ និងជំរុញការអភិវឌ្ឍវិស័យឯកជន។ វានឹងដោះស្រាយបញ្ហាប្រឈមជាច្រើនទាក់ទងនឹងការគាំទ្រដល់វិស័យហិរញ្ញវត្ថុ និងធុរកិច្ចរបស់ប្រទេសកម្ពុជា ក៏ដូចជាការលើកកម្ពស់ប្រសិទ្ធភាពនៃវិស័យសាធារណៈ ហើយក៏នឹងគាំទ្រផងដែរ ដល់ការអភិវឌ្ឍធនធានមនុស្ស និងផ្តោតលើការលើកកម្ពស់ផលិតភាពកសិកម្ម និងពង្រឹងការប្រើប្រាស់ធនធានធម្មជាតិប្រកបដោយនិរន្តរភាព។

យោងតាមរបាយការណ៍របស់ធនាគារពិភពលោកដែលបានចេញផ្សាយនៅក្នុងខែឧសភាបានឱ្យដឹងថា ក្របខ័ណ្ឌភាពជាដៃគូនឹងគាំទ្រដល់ការរីកចម្រើនរបស់ប្រទេសកម្ពុជាទៅដំណាក់កាលបន្ទាប់នៃការអភិវឌ្ឍរបស់ខ្លួន និងឆ្លុះបញ្ចាំងពីការវិវឌ្ឍនៃការចូលរួមរបស់ធនាគារពិភពលោកនៅក្នុងប្រទេស។

របាយការណ៍ក៏បានបញ្ជាក់ដែរថា៖“កម្មវិធីនេះឆ្លុះបញ្ចាំងពីអាទិភាពរបស់រដ្ឋាភិបាល ហើយនឹងដោះស្រាយបញ្ហាប្រឈមរបស់ប្រទេសក្នុងការធ្វើពិពិធកម្មសេដ្ឋកិច្ចមានកំណត់ការធ្វើនគរូបនីយកម្មកើនឡើងយ៉ាងឆាប់រហ័សកង្វះខាតធនធានមនុស្ស និងគម្លាតហេដ្ឋារចនាសម្ព័ន្ធ”។

សូមរំឭកថា កាលពីថ្ងៃទី30 ខែឧសភា ឆ្នាំ2019 ធនាគារពិភពលោកបានអនុម័ត “ក្របខ័ណ្ឌនៃភាពជាដៃគូរវាងរាជរដ្ឋាភិបាលជាមួយ WB ឆ្នាំ2019-2023” (Country Partnership Framework – CPF 2019-2023)ដែលគ្រោងទឹកប្រាក់សរុបចំនួនប្រមាណ 1,000លានដុល្លារអាមេរិកដែលឯកសារនេះ គឺជាក្របខ័ណ្ឌកិច្ចសហប្រតិបត្តិការពេញលេញ រយៈពេលមធ្យម រវាងរាជរដ្ឋាភិបាលកម្ពុជាជាមួយធនាគារពិភពលោក និងត្រូវបានរៀបចំដើម្បីរួមចំណែកផ្តល់ហិរញ្ញប្បទានគាំទ្រការអនុវត្តយុទ្ធសាស្ត្រចតុកោណដំណាក់កាលទី4 ផែនការយុទ្ធសាស្ត្រអភិវឌ្ឍន៍ជាតិ និងតម្រូវការអាទិភាពរបស់កម្ពុជា។

ឯកឧត្តមអគ្គបណ្ឌិតសភាចារ្យ ក៏បានថ្លែងអំពីស្ថានភាពសេដ្ឋកិច្ច ដែលកម្ពុជាកំពុងសម្រេចបាននូវស្ថិរភាពម៉ាក្រូសេដ្ឋកិច្ចរឹងមាំ ជាមួយនឹងកំណើនសេដ្ឋកិច្ចខ្ពស់។ កម្ពុជាកំពុងបន្តដំណើរយ៉ាងស្វាហាប់តម្រង់ទិសឆ្ពោះទៅរកចក្ខុវិស័យឆ្នាំ2050 ដើម្បីប្រែក្លាយខ្លួនទៅជាប្រទេសអភិវឌ្ឍន៍ ដោយបានកំណត់យកឆ្នាំ2030 ជាឆ្នាំគោល ដែលត្រូវសម្រេចឱ្យបាននូវលទ្ធផលជាសារវ័ន្តនៃកំណែទម្រង់សំខាន់ៗ និងការប្រែក្លាយខ្លួនជាប្រទេសមានចំណូលមធ្យមកម្រិតខ្ពស់។

ឯកឧត្តមក៏បានបញ្ជាក់ទៀតដែរថា សេដ្ឋកិច្ចកម្ពុជាត្រូវបានវាយតម្លៃថា អាចសម្រេចបានកំណើនខ្ពស់រហូតដល់7.5% ក្នុងឆ្នាំ2018 និងតាមការព្យាករ កំណើនសេដ្ឋកិច្ចនេះនឹងអាចនៅតែសម្រេចបានប្រមាណ 7% ក្នុងឆ្នាំ2019 នេះ។

ឯកឧត្តមរដ្ឋមន្ត្រីក៏បានកោតសរសើរចំពោះធនាគារពិភពលោកដែលមានសុឆន្ទៈខ្ពស់ និងពិតប្រាកដក្នុងការចូលរួមចំណែកដល់កិច្ចអភិវឌ្ឍន៍នៅកម្ពុជាឈានឆ្ពោះទៅគោលដៅឆ្នាំ2030 និង ឆ្នាំ2050 ក្នុងក្របខ័ណ្ឌនៃកិច្ចសហប្រតិបត្តិការដែលកាន់តែរឹងមាំជាងមុន។

សូមបញ្ជាក់ថា កាលពីដើមសប្តាហ៍នេះ លោកស្រី Kwakwa បានជួបជាមួយសម្តេចនាយករដ្ឋមន្ត្រី ហ៊ុន សែន និងបានមានប្រសាសន៍កោតសរសើរយ៉ាងខ្លាំងទៅលើការអភិវឌ្ឍយ៉ាងឆាប់រហ័សរបស់កម្ពុជា និងកិច្ចខិតខំប្រឹងប្រែងរបស់រាជរដ្ឋាភិបាល។លោកស្រីបានថ្លែងថា៖ “ក្នុងនាមធនាគារពិភពលោក ខ្ញុំសូមអបអរសាទរប្រទេសកម្ពុជាចំពោះសមិទ្ធផលដ៏អស្ចារ្យរបស់ខ្លួន”។

លោកស្រី Kwakwa ក៏បានកត់សម្គាល់ និងបានទទួលស្គាល់អំពីកំណើនសេដ្ឋកិច្ចជាមួយនឹងល្បឿននៃការអភិវឌ្ឍយ៉ាងឆាប់រហ័សរបស់ប្រទេសកម្ពុជា ដែលអាចជំរុញ និងរក្សាបានកំណើនសេដ្ឋកិច្ចជាប់ជាប្រចាំក្នុងរង្វង់ 7% នាពេលប៉ុន្មានឆ្នាំចុងក្រោយនេះ ក៏ដូចជាការថយចុះនូវភាពក្រីក្រ និងអត្រាមរណភាពរបស់ទារកនៅពេលកើត។ នេះជាជោគជ័យដែលបញ្ជាក់ថា កម្ពុជាកំពុងតែបោះជំហាននៅលើផ្លូវមួយដ៏ត្រឹមត្រូវ៕

September 28, 2019

មនុស្សម្នាក់ៗគួររកឱ្យឃើញភាពឆ្នើមរបស់ខ្លួនឯងដើម្បីអភិវឌ្ឍបានលឿន

ក្នុងការរស់នៅ មនុស្សមួយចំនួនតែងតែប្រាថ្នាចង់ក្លាយជាមនុស្សដែលនាំមុខគេ ឬលេខមួយគ្រប់កាលៈទេសៈ មិនថាការសិក្សា ការរស់នៅ ការធ្វើការងារ ឬការធ្វើអាជីវកម្មនោះទេ។ ពួកគេតែងតែព្យាយាមគ្រប់លទ្ធភាពដើម្បីធ្វើការប្រកួតប្រជែង បើទោះបីជាពេលខ្លះវិធីសាស្ត្រនោះល្អ ឬមិនល្អក្តី។ ការធ្វើបែបនេះបានធ្វើឱ្យបុគ្គលខ្លះនឿយហត់ខ្លាំង ហើយធ្វើឱ្យជីវិតបាត់បង់លំនឹង ដោយសារតែរស់ក្នុងការប្រកួតប្រជែងខ្លាំងជ្រុល ព្រោះអ្វីដែលពួកគេកំពុងធ្វើ គឺជាការយល់ច្រឡំពីពាក្យថាជាភាពឆ្នើម។

លោក ប៉ិច បូឡែន អគ្គនាយកក្រុមហ៊ុន វេសឡាញ អេឌ្យូខេសិនគ្រុប បានលើកឡើងថា ភាពឆ្នើមសម្រាប់មនុស្សម្នាក់ មិនមែនសំដៅលើការទទួលបានលេខមួយដាច់គេគ្រប់មុខនោះទេ តែវាអាស្រ័យលើចំណុចពិសេសផ្ទាល់ខ្លួនប្លែកគេរបស់មនុស្សម្នាក់ៗ ដែលធ្វើឱ្យគេចងចាំពីយើង។ មនុស្សម្នាក់ៗ បើទោះបីជាម្ចាស់អាជីវកម្ម ឬជាបុគ្គលិកគេក៏ដោយ គួរចាំបាច់មានចំណុចខ្លាំងផ្ទាល់ខ្លួនយ៉ាងហោចណាស់ 1រឿង ដើម្បីឱ្យគេទទួលស្គាល់ និងពឹងពាក់បាន។ ជាឧទាហរណ៍ មានបុគ្គលិកពូកែមួយចំនួនគាត់មិនខ្លាំងទាំងអស់គ្រប់មុខនោះទេ តែគាត់ខំខ្លាំងផ្នែកបច្ចេកវិទ្យា ដែលគ្រប់គ្នាចាប់តាំងពីមុខតំណែងតូចរហូតដល់អគ្គនាយក ពេលត្រូវការជំនួយផ្នែកបច្ចេកវិទ្យាត្រូវតែនឹកឃើញដល់គាត់។ ហេតុនេះការចាប់យកអត្តសញ្ញាណ ឬភាពខ្លាំងផ្ទាល់ខ្លួនអាចធ្វើឱ្យយើងក្លាយជាមនុស្សដែលគេត្រូវការគ្រប់កាលៈទេសៈ ហើយថែមទាំងអាចជាឱកាសក្នុងការអភិវឌ្ឍបានយ៉ាងល្អទៀតផង។

លោក ប៉ិច បូឡែន បាននិយាយថា៖ “ប្រសិនបើយើងកំពុងធ្វើការងារក្នុងឋានៈតួនាទីណាមួយដែលមានគ្នា10នាក់ យើងគួរតែដឹងខ្លួនឯងឱ្យច្បាស់ថា យើងមានចំណុចល្អប្លែកអ្វីខ្លះខុសពីអ្នកដទៃដែលកំពុងធ្វើការងារក្នុងលំដាប់ដូចគ្នានេះ។ ហើយប្រសិនបើ ប្រធានស្ថាប័នចង់ទាញយើងឡើងទៅកាន់តំណែងប្រសើរជាងនេះ តើយើងមានចំណុចឆ្នើមអ្វីដែលធ្វើឱ្យគេនឹកឃើញយើងមិនអាចខ្វះបាន”។

លោកបានបន្ថែមទៀតថា មនុស្សគ្រប់គ្នា មិនថាកំពុងធ្វើការងារក្នុងស្ថាប័នរដ្ឋ ឬឯកជននោះទេ គួរចាប់ផ្តើមស្វែងរកចំណុចឆ្នើម ឬលក្ខណៈពិសេសផ្ទាល់ខ្លួនមួយដើម្បីជាអត្តសញ្ញាណរបស់ខ្លួនឯង និងជាចំណុចដែលធ្វើឱ្យយើងអភិវឌ្ឍបានលឿននៅក្នុងស្ថាប័ន។ នៅពេលដែលយើងដឹងពីចំណុចខ្លាំងបំផុតរបស់យើងមួយច្បាស់ហើយ នោះយើងនឹងងាយស្រួលក្នុងការបន្តអភិវឌ្ឍសមត្ថភាពពិសេសនេះ ជាមួយនឹងចំណេះ ជំនាញ និងបុគ្គលិកលក្ខណៈឱ្យបានល្អបន្ថែមទៀត។ ការអភិវឌ្ឍចំណុចខ្លាំងនៃអត្តសញ្ញាណនេះក៏ចាំបាច់ឱ្យស្របនឹងគោលដៅជីវិតរបស់យើងផងដែរ ទើបអាចធានាថា ការរីកចម្រើននៃជីវិតរបស់យើងនេះនឹងកើតមានយូរអង្វែងប្រកបដោយនិរន្តរភាពថែមទៀតផង។ ការគិតពីចំណុចនេះនឹងធ្វើឱ្យយើងមើលឃើញផ្លូវដ៏សំខាន់សម្រាប់ភាពថ្កុំថ្កើងដោយមិនបាច់រវល់គិតច្រើនពីការប្រកួតប្រជែងជាមួយអ្នកដទៃទេ តែត្រូវយកថាមពលទាំងអស់នោះមកអភិវឌ្ឍសមត្ថភាពផ្ទាល់ខ្លួនឱ្យបានជាប់ជាប្រចាំ។

លោក ពេជ្រ ពិសាល សហស្ថាបនិក Daily Plus បានលើកឡើងថា អត្តសញ្ញាណផ្ទាល់ខ្លួនមានសារៈសំខាន់ខ្លាំងណាស់សម្រាប់មនុស្សម្នាក់ៗ ព្រោះការធ្វើការងារក្នុងក្រុមការងារមួយចាំបាច់ត្រូវការអ្នកខ្លាំងលើផ្នែកផ្សេងៗគ្នាដើម្បីបូកបញ្ចូលគ្នាឱ្យសម្រេចជោគជ័យ។ ការយកតែអ្នកណាម្នាក់ដែលចេះសព្វគ្រប់មកធ្វើការងារទាំងអស់តែម្នាក់ឯង មិនហៅថាក្រុមការងារនោះទេ ហេតុនេះប្រសិនបើយើងត្រូវបានគេទទួលស្គាល់ថា យើងមានចំណុចខ្លាំងណាដែលជាអត្តសញ្ញាណហើយនោះ យើងនឹងក្លាយជាមនុស្សដែលមានតម្លៃគ្រប់ពេល បើទោះបីជាយើងស្ថិតក្នុងតំណែងណាក៏ដោយ ព្រោះភាពខ្លាំងរបស់យើងជាកម្លាំងមួយក្នុងចំណោមភាពខ្លាំងរបស់សមាជិកដទៃផ្សេងទៀតដែលនាំឱ្យស្ថាប័នទៅមុខបានល្អ។

លោក ពេជ្រ ពិសាល បាននិយាយថា៖ “មនុស្សម្នាក់ៗសុទ្ធតែកើតមកជាមួយនឹងភាពខ្លាំងរៀងៗខ្លួន គ្រាន់តែមនុស្សជាច្រើនមិនបានផ្តោតការយកចិត្តទុកដាក់សម្រួចចំណុចសក្តានុពលនេះ ហើយបណ្តោយវាក្លាយជាចំណុចសាមញ្ញៗ ឬចេះស្ទើរៗលើគ្រប់មុខ”។

លោក ពិសាល បានបន្ថែមទៀតថា អ្វីដែលយើងអាចធ្វើបាន គឺព្យាយាមស្វែងយល់បន្តិចម្តងៗនៅពេលដែលយើងកំពុងធ្វើការងារថាតើអ្វីជាចំណុចដែលយើងអាចផ្តោតបាន ហើយចំណុចណាជាសក្តានុពលពីកំណើតដែលយើងមានខុសពីគេ ហើយគេអត់យើងមិនបាន។ ខ្មែរយើងតែងនិយាយថា អ្នកចេះដប់មិនស្មើអ្នកប្រសប់មួយ មានន័យថា ចំណេះទូទៅចេះមួយរយជំពូកក៏នៅតែអាចចាញ់អ្នកច្បាស់លាស់តែម្នាក់ដែរ ប្រសិនបើអ្នកពូកែរឿងទូទៅនោះគ្មានអត្តសញ្ញាណច្បាស់លាស់ដែលអាចយកទៅប្រើការបាន។ ការផ្តោតលើចំណុចខ្លាំងតែមួយនេះ អាចធ្វើឱ្យយើងចំណេញទាំងពេលវេលា និងថាមពលដើម្បីធ្វើការអភិវឌ្ឍបានយ៉ាងល្អ និងលឿន៕

September 28, 2019

Author: ធឿន មករា