ធឿន មករា - La Reine Media

កម្មវិធីអបអរសាទរការប្រកួតប្រជែងក្នុងកម្មវិធី ABC Lions of Fashion បាបន្តប្រារព្ធធ្វើឡើងយ៉ាងជោគជ័យនៅភោជនីយដ្ឋាន Friend House

រាជធានីភ្នំពេញ៖ កាលពីថ្ងៃទី ០៤ ខែតុលា ឆ្នាំ២០១៩ ស្រាបៀរ ABC អិចស្ត្រាស្តោត បានបន្តរៀបចំកម្មវិធីអបអរសាទរការប្រកួតប្រជែងក្នុងកម្មវិធី ABC Lions of Fashion នៅភោជនីយដ្ឋាន Friend House ដោយបានទទួលការចូលរួមពីសំណាក់មិត្តយុវវ័យយ៉ាងច្រើនកុះករ។

កម្មវិធីអបអរសាទរការប្រកួតប្រជែងក្នុងកម្មវិធី ABC Lions of Fashion បានចាប់ផ្តើមតាំងពីប្រហែលជាម៉ោង ៧ យប់រហូតដល់ម៉ោង១១យប់ដោយមានការអញ្ជើញចូលរួមពីកំពូលតារាចម្រៀងដ៏ល្បីប្រចាំព្រះរាជាណាចក្រកម្ពុជា ដួង វីរៈសិទ្ធិ និងពិធីការិនីដ៏ស្រស់ស្អាត កញ្ញា សុខ សុមាវត្តី។ បេក្ខនារីទាំងដប់រូបក្នុងសម្លៀកបំពាក់ដែលឆ្នៃម៉ូតដោយយុន រតនៈ ហើយជាបេក្ខនារី ដែលកំពុងតែប្រលងដើម្បីដណ្តើមជ័យលាភីក្នុងកម្មវិធីប្រកួតបង្ហាញម៉ូត ABC Lions of Fashion បានដើរបង្ហាញម៉ូតជាមួយក្រុមបង្ហាញម៉ូតដ៏ល្បីឈ្មោះប្រចាំប្រទេសកម្ពុជា។

កម្មវិធីពិសេសនេះរៀបចំក្នុងគោលបំណងដើម្បីឱទ្ទេសនាមបេក្ខជនបេក្ខនារីផ្នែកបង្ហាញម៉ូតចំនួន 10 នាក់ ជាពិសេសអំពាវអំនាវឲ្យអតិថិជន និងសាធារណជនចូលរួមបោះឆ្នោត ឬ Vote គាំទ្របេក្ខជនបេក្ខនារីដែលពួកគេពេញចិត្តតាមគេហទំព័រហ្វេសប៊ុកផ្លូវការរបស់ស្រាបៀរ ABC អិចស្ត្រាស្តោត ៖https://www.facebook.com/ABC.ExtraStoutCambodia/ ។

កម្មវិធី ABC Lions of Fashion គឺជាកម្មវិធីដំបូងបង្អស់នៅក្នុងប្រទេសកម្ពុជាទទួលស្គាល់ស្នាដៃអ្នកច្នៃម៉ូត និងអ្នកបង្ហាញម៉ូតដែលជាតារាទើបតែរះនៅក្នុងព្រះរាជាណាចក្រកម្ពុជា ។ កម្មវិធីប្រកួតនេះត្រូវបានរៀបចំឡើង ដោយសហការជាមួយស្ថាប័ន ដែលឈានមុខគេនៅក្នុងឧស្សាហកម្មច្នៃម៉ូដរបស់កម្ពុជាគឺទស្សនាវដ្តី សូវរីន ដែលជាទស្សនាវដ្តីម៉ូដឈានមុខគេនៅកម្ពុជា និង Arise Agency ដែលជាទីភ្នាក់ងារបង្ហាញម៉ូតដែលនាំមុខគេ។

កម្មវិធីអបអរសាទរការប្រកួតប្រជែងក្នុងកម្មវិធី ABC Lions of Fashion នឹងបន្តប្រារព្ធធ្វើឡើងនៅទីតាំងផ្សេងៗនៅក្នុងទីក្រុងរហូតដល់ខែតុលា។

រាល់សន្លឹកឆ្នោតដែលបានប្រមូលក្នុងអំឡុងពេលកម្មវិធីពិសេសនេះនឹងត្រូវបានយកមកបូកសរុប ហើយបេក្ខជនបេក្ខនារីផ្នែកបង្ហាញម៉ូតដែលទទួលបានការគាំទ្រច្រើនគេនឹងឈ្នះជ័យលាភី។

សូមចូលរួមឲ្យបានច្រើនកុះករដើម្បីគាំទ្របេក្ខជនបេក្ខនារីរបស់យើងក្នុងកម្មវិធី ABC Lions of Fashion!!!
ចំពោះព័ត៌មានបន្ថែមអំពីកម្មវិធីពិសេសនេះ ចូលទៅកាន់គេហទំព័រផ្លូវការ៖https://www.facebook.com/ABC.ExtraStoutCambodia/

សូមរីករាយទទួលទាន ABC អិចស្ត្រាស្តោត ដោយការទទួលខុសត្រូវ ។

October 10, 2019

CVEA បង្ហាញកំណត់សម្គាល់ និងបទពិសោធដែលបានពីសន្និសីទអចលនទ្រព្យអន្តរជាតិ

ចំណុចសំខាន់ៗមួយចំនួនដែលជាប្រធានបទទាក់ទិននឹងអចលនទ្រព្យ ត្រូវបានក្លាយជា បទបង្ហាញរបស់ប្រតិភូនៃសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា(CVEA)ដែលបានលើកយកមកដើម្បីផ្សព្វផ្សាយអំពីសក្ដានុពលក្នុងប្រទេសកម្ពុជាក្នុងការអញ្ជើញចូលរួមនៅក្នុងព្រឹត្តិការណ៍សន្និសីទអចលនទ្រព្យអន្តរជាតិប្រចាំឆ្នាំ2019 នៅប្រទេសជប៉ុន ដើម្បីបង្កើនសក្តានុពលលើការវិនិយោគក្នុងវិស័យអចលនទ្រព្យ។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA)បានប្រាប់ឡារ៉ែន ពាណិជ្ជថា៖“ខ្ញុំបានត្រៀមធ្វើបទបង្ហាញផ្ដោតលើប្រទេសកម្ពុជាឱ្យអ្នកវិនិយោគបរទេសបានយល់ថា ហេតុអ្វីកម្ពុជាត្រូវការការវិនិយោគ និងក៏ដើម្បីបានចាត់ទុកថា ការចូលរួមនេះ គឺជាឱកាសដ៏ល្អសម្រាប់អ្នករកស៊ីក្នុងវិស័យអចលនទ្រព្យកម្ពុជា ដែលត្រូវរៀនសូត្រពីបណ្ដាប្រទេសរីកចម្រើនលើពិភពលោក ពិសេសម្ចាស់ផ្ទះជប៉ុន។ នេះគឺជាឱកាសដ៏ល្អ ដើម្បីទាក់ទាញការវិនិយោគបរទេសមកកាន់កម្ពុជា និងពីកម្ពុជាទៅប្រទេសក្នុងតំបន់អាស៊ាន”។

លោកបានបន្តទៀតថា តាមការចូលរួមនៅក្នុងសន្និសីទអចលនទ្រព្យអន្តរជាតិនៅក្នុងប្រទេសជប៉ុននោះ អ្វីដែលយើងទទួលបានមកវិញគឺ៖ ទី1-បទពិសោធនៃបណ្តាប្រទេសទាំង8 នៃបណ្តាប្រទេសជាសមាជិកអាស៊ាន និងការចែករំលែកនូវអ្វីដែលពាក់ព័ន្ធនឹងការវិនិយោគ ជាពិសេសការវិនិយោគវិស័យអចលនទ្រព្យ និងបណ្តាប្រទេសនៅក្នុងតំបន់ផ្សេងៗទៀត។ ទី2-បរិបទ និងបែបផែននៅក្នុងការវិនិយោគពីប្រទេសយើងទៅកាន់ប្រទេសគេ និងពីប្រទេសគេមកកាន់ប្រទេសកម្ពុជាយើងវិញដែរ ដើម្បីណែនាំការវិនិយោគ ដែលនេះ គឺជាសក្តានុពលទាក់ទងនឹងការអភិវឌ្ឍ។ ទី3-ពាក់ព័ន្ធនឹងទំនាក់-ទំនងជាមួយអ្នកិវិនិយោគថា តើអ្នកវិនិយោគនាំមកនូវម៉ូដែល និងបច្ចេកវិទ្យាសំខាន់ៗមកក្នុងប្រទេសយើងជាមួយនឹងសក្តានុពលនៃការអភិវឌ្ឍបែបណានៅក្នុងប្រទេសរបស់យើង។

តាមការបញ្ជាក់របស់លោកសុខនីម បានឱ្យដឹងថា ៖“ការចូលរួមក្នុងសន្និសីទអន្តរជាតិនេះ ក្រុមប្រតិភូ CVEA បានទទួលនូវអ្វីជាសំខាន់នោះ គឺការរៀនពីម៉ូដែល នៃវិស័យអចលនទ្រព្យនៅក្នុង ប្រទេសនីមួយៗដែលបានចូលរួម។ តាមរយៈការធ្វើទស្សនកិច្ចតំបន់អចលនទ្រព្យប្រទេសជប៉ុន ដែលមានអគារកម្ពស់ 70-80ជាន់ដែលបំពាក់ឧបករណ៍ការពារការរញ្ជួយផែនដីផង តែក៏គេនៅតែអាចដឹកនាំការកសាងបាន”។

លោកប្រធានសមាគមបានមានប្រសាសន៍ឱ្យដឹងដែរថា៖“បើយើងប្រៀបធៀបសេដ្ឋកិច្ចក្នុងការវិនិយោគវិស័យអចលនទ្រព្យក្នុងពេលបច្ចុប្បន្ននេះ គឺយើងដើរនៅក្រោយគេឆ្ងាយណាស់ បើប្រៀបធៀបជាឆ្នាំ ប្រហែលជាក្រោយប្រទេសជប៉ុនប្រមាណ 25ឆ្នាំមុន។ គឺយើងនៅឆ្ងាយពីគេនៅឡើយ ព្រោះគេមានការអភិវឌ្ឍច្រើនជាងយើង មានបទពិសោធខ្លាំង និងល្អជាងយើង។ វិស័យអចលនទ្រព្យគេមានការ-គិតគូរបានល្អ និងការរៀបចំបានល្អ”។

ប៉ុន្តែលោកប្រធានសមាគម CVEA ក៏បានបញ្ជាក់ដែរថា៖“ប៉ុន្តែប្រទេសកម្ពុជាយើងមិនអន់នោះទេ យើងដើរលឿន ទោះជាយើងអភិវឌ្ឍក្រោយគេមែនតែយើងដើរលឿនសម្រាប់ការវិនិយោគវិស័យអចលនទ្រព្យនេះ។ ព្រោះបើតាមការព្យាករ ក្នុងរយៈពេលប្រហែលជា 15ឆ្នាំ ទៅមុខទៀត កម្ពុជាអាចនឹងឈានបានប្រហាក់ប្រហែលនឹងប្រទេសគេបានហើយ ទោះបីមិនដល់គេ ព្រោះពេលនោះគេអាចកែប្រែបន្ថែម តែក្នុងចន្លោះ15ឆ្នាំ យើងនឹងឃើញអគារខ្ពស់ៗច្រើននៅក្នុងរាជធានីភ្នំពេញ និងតំបន់ប៉ូលអភិវឌ្ឍន៍សំខាន់ៗមួយចំនួន”។

សូមបញ្ជាក់ថា ការចូលរួមសន្និសីទអចលនទ្រព្យអន្តរជាតិប្រចាំឆ្នាំ2019 (International Real EstateConference 2019) IREC នៅប្រទេសជប៉ុន គឺក្នុងគោលបំណងបង្កើនទំនាក់ទំនង កិច្ចសហប្រតិបត្តិការអន្តរជាតិ ជាពិសេសពង្រីកការវិនិយោគលើវិស័យឧស្សាហកម្មអចលនទ្រព្យ ឱ្យកាន់តែរីកចម្រើនថែមទៀត និងដើម្បីស្វែងយល់ ក៏ដូចជាផ្សព្វផ្សាយពីសក្ដានុពលទីផ្សារអចលនទ្រព្យ និងកៀងគរក្រុមអ្នកវិនិយោគអន្តរជាតិឱ្យចូលមកធ្វើការវិនិយោគនៅកម្ពុជា។

លោកស្រី តាំង ហួរ នាយិកាក្រុមហ៊ុនអចលនទ្រព្យ AMATAK Property Service ដែលបានចូលរួមក្នុងសន្និសីទអចលនទ្រព្យអន្តរជាតិនៅប្រទេសជប៉ុននេះដែរ បានមានប្រសាសន៍ប្រាប់ឡារ៉ែនថា៖“ការចូលរួមក្នុងសន្និសីទនេះយើងបានទទួលបទពិសោធច្រើនដែរសម្រាប់យកមកអនុវត្តក្នុងវិស័យអចលនទ្រព្យនៅប្រទេសយើង។ ពោលគឺយើងបានរៀនសូត្រនូវអ្វីល្អៗពីគេ យើងមានណេតវើក (Network) និងការផ្លាស់ប្តូរយោបល់ គំនិតក្នុងវិស័យអចលនទ្រព្យក្នុងកម្រិតពិភពលោក”។

លោកស្រីនាយិកាបានបញ្ជាក់ដែរថា យើងក៏បានពិភាក្សាដេញដោលគ្នាពីបញ្ហាភ្នាក់ងារលក់ទិញអចលនទ្រព្យ ដោយលើកហេតុផលពីប្រទេសនីមួយៗថា យើងជួបប្រទះបញ្ហាអ្វីខ្លះ? កង្វះខាតអ្វីខ្លះដែលយើងមាន? ព្រោះគោលការណ៍ និងច្បាប់លក់ដូរ វាខុសៗគ្នាទៅតាមប្រទេសនីមួយៗ ហើយយើងអាចយកចំណុចសំខាន់ៗមកអនុវត្តដោយព្យាយាមកែប្រែ និងបំពេញនូវចំណុចខ្វះខាតដែលយើងមាន ដើម្បីធ្វើឱ្យមានការរីកចម្រើនវិស័យអចលនទ្រព្យក្នុងប្រទេសយើងឱ្យជឿនលឿនដូចគេដែរ។

លោកស្រី តាំង ហួរ ក៏បានបញ្ជាក់ទៀតថា៖“យើងក៏ទទួលបាននូវការធ្វើ Network យើងអាចដឹងពីព័ត៌មាននៃការលក់ដូរ។ ដូចជានៅប្រទេសមួយចំនួនដោយសារដីថ្លៃ គេច្រើនតែលក់ខុនដូវិញ ព្រោះវាមិនសូវស្មុគស្មាញ តែសម្រាប់យើងតម្លៃដីនៅថោក បើប្រៀបនឹងប្រទេសគេ ដូច្នេះយើងអាចលក់ទាំងដី ទាំងលំនៅឋាន ខុនដូ និងសំណង់អគារផ្សេង។ល។ ហើយសម្រាប់ប្រទេសយើង អចលនទ្រព្យស្រុកយើង មានអ្នកវិនិយោគបរទេសគេល្បីណាស់ ដោយសារយើងមានសក្តានុពលវិស័យនេះ។ តែទោះបីយើងមានសក្តានុពលវិស័យអចលនទ្រព្យនេះក៏ដោយ ក៏យើងត្រូវតែខំប្រឹងរៀនសូត្រពីគេ ដើម្បីការវិវឌ្ឍទៅមុខ បើយើងមិនរៀនសូត្រ យើងមិនអាចមានការរីកចម្រើនបានទេ”៕

October 10, 2019

សាលារៀនជំនាន់ថ្មីជាសាលារដ្ឋដែលមានសិស្សជាប់និទ្ទេស A ច្រើនជាងគេបំផុត

ក្រោយការធ្វើកំណែទម្រង់ប្រព័ន្ធអប់រំ ជាពិសេសការរឹតបន្តឹងការប្រឡងមធ្យមសិក្សាទុតិយភូមិ គំនិតផ្តួចផ្តើមបង្កើតសាលាជំនាន់ថ្មីបានក្លាយជាគំនិតប្រកបដោយប្រសិទ្ធភាពមួយក្នុងការបណ្តុះបណ្តាលសិស្សានុសិស្សឱ្យមានសមត្ថភាពខ្ពស់ និងមានបរិក្ខារគ្រប់យ៉ាងមិនចាញ់សាលាឯកជននោះទេ។

នៅឆ្នាំសិក្សា 2018-2019 នេះ សាលារៀនជំនាន់ថ្មី ដែលជាគ្រឹះស្ថានសិក្សារដ្ឋ ចាប់ផ្តើមបើកសាកល្បងកាលពីឆ្នាំ2016 ត្រូវបានគេមើលឃើញថា ជាសាលាដែលទទួលបានលទ្ធផលល្អជាងគេបំផុតក្នុងចំណោមគ្រឹះស្ថានបណ្តុះបណ្តាលចំណេះដឹងទូទៅរដ្ឋ និងឯកជន។ បើតាមការបញ្ជាក់របស់ លោក សម្យ កំសាន្ត នាយករងវិទ្យាល័យស៊ីសុវត្ថិ ទទួលបន្ទុកសាលាជំនាន់ថ្មី បានបញ្ជាក់ថា សិស្សដែលចេញពីសាលាជំនាន់ថ្មីនៅឆ្នាំនេះ ទទួលបានជោគជ័យក្នុងការប្រឡងរហូតដល់ទៅ 94ភាគរយ ខណៈអ្នកដែលទទួលបាននិទ្ទេស A ក៏មានចំនួនច្រើនជាងគេផងដែរនៅទូទាំងប្រទេស។

លោក សម្យ កំសាន្ត បានលើកឡើងថា នេះជាឆ្នាំទី5 ហើយដែលគម្រោងសាលារៀនជំនាន់ថ្មីបានអនុវត្តនៅក្នុងប្រទេសកម្ពុជា។ គោលដៅសំខាន់នៃការបង្កើតសាលារៀនជំនាន់ថ្មីនេះ ធ្វើឡើងក្នុងគោលបំណងពង្រឹងគុណភាពអប់រំ ដើម្បីឆ្លើយតបជាមួយនឹងតម្រូវការទីផ្សារទាំងក្នុងប្រទេស និងក្នុងតំបន់។

សាលារៀនជំនាន់ថ្មីជាសាលាដែលបានបន្ថែមនូវកម្មវិធីសិក្សាថ្មីដោយសិក្សាយ៉ាងល្អិតល្អន់ពីវិធីសាស្ត្របង្រៀនដែលមានលក្ខណៈស្តង់ដាខ្ពស់មិនចាញ់ប្រទេសអភិវឌ្ឍន៍ធំៗនោះទេ ព្រោះយើងចង់ឱ្យសិស្សានុសិស្សរបស់យើងមានគុណភាពខ្លាំងសម្រាប់ការប្រកួតប្រជែង។ ជាលទ្ធផល សិស្សនៃសាលាជំនាន់ថ្មីបានចូលរួមប្រកួតប្រជែងទាំងកម្រិតថ្នាក់ជាតិ និងថ្នាក់អន្តរជាតិ ដោយពួកគេអាចយកជ័យជម្នះលើការប្រឡងប្រជែងជាច្រើន ដោយក្នុងនោះមានទាំងមេដាយមាស មេដាយប្រាក់ និងមេដាយសំរិទ្ធជារៀងរាល់ឆ្នាំ។

លោក សម្យ កំសាន្ត បាននិយាយថា៖ “សាលារៀនជំនាន់ថ្មី គឺជាសាលារដ្ឋ តែនៅក្នុងការអនុវត្តគម្រោងនេះ ក្រសួងបានដាក់បញ្ចូលនូវកម្មវិធីបង្រៀនស៊ីជម្រៅជាងសាលារដ្ឋធម្មតា មានន័យថា បើការបង្រៀនត្រូវពិសោធ សិស្សត្រូវតែទៅធ្វើការពិសោធជាក់ស្តែងតែម្តង។ សិស្សនៃសាលាជំនាន់ថ្មីមានការសិក្សាផង អនុវត្តផ្ទាល់ផង និងមានកិច្ចការស្រាវជ្រាវច្រើនជាងសិស្សទូទៅ”។

សាលារៀនជំនាន់ថ្មី ជាសាលាដែលបំពាក់នូវបរិក្ខារពិសោធន៍ និងបច្ចេកវិទ្យាគ្រប់យ៉ាង ដោយក្នុងនោះបានដាក់បញ្ចូលនូវកម្មវិធីសំខាន់ៗជាច្រើនដូចជាកម្មវិធីបណ្តុះបណ្តាល វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) កម្មវិធីបច្ចេកវិទ្យាព័ត៌មានវិទ្យា ដូចជាការសរសេរកូដ និងកម្មវិធីឌីហ្សាញជាដើម។ បន្ថែមពីលើនេះ សាលារៀនជំនាន់ថ្មីក៏ជាសាលាដែលបញ្ចូលនូវគំនិតសហគ្រិនភាព និងជំនាញសំខាន់ៗជាច្រើនផ្សេងទៀតផងដែរដល់សិស្សានុសិស្សគ្រប់គ្នាឱ្យបានសិក្សាកាន់តែស៊ីជម្រៅ។ គំរូនៃសាលាជំនាន់ថ្មីនេះ ត្រូវបានគេរំពឹងទុកថានឹងដាក់ឱ្យអនុវត្តនៅទូទាំងប្រទេសនៅថ្ងៃអនាគត។

គួរបញ្ជាក់ថា មកដល់បច្ចុប្បន្ននេះ សាលារៀនជំនាន់ថ្មីមានកម្រិតបឋមសិក្សាចំនួន 4សាលា និងកម្រិតមធ្យមសិក្សាចំនួន 6សាលា។ ក្នុងនោះកម្រិតមធ្យមសិក្សាមានដូចជាវិទ្យាល័យស៊ីសុវត្ថិ វិទ្យាល័យហ៊ុនសែនកំពង់ចាម វិទ្យាល័យព្រែកលៀប វិទ្យាល័យសម្តេចជាស៊ីមព្រែកអញ្ចាញ វិទ្យាល័យហ៊ុនសែនពាមជីកង និងអនុវិទ្យាល័យគោកព្រីង៕

October 10, 2019

ទង្វើមិនល្អ 5យ៉ាង ប៉ះពាល់ដល់សុខភាព ដែលបុរសជាច្រើនអាចមិនទាន់ដឹង…

មនុស្សជាច្រើនដែលស្រឡាញ់សុខភាព និងមើលថែទាំខ្លួនឯងជាប់ជានិច្ចនោះ អាចគិតថា បើបានហាត់ប្រាណជាប្រចាំរៀងរាល់ថ្ងៃ និងជ្រើសរើសទទួលទានតែអាហារដែលមានប្រយោជន៍ ប្រហែលជាមានសុខភាពល្អមិនខាន។ មេរោគផ្សេងៗដែលជាមូលហេតុធំរបស់ជំងឺទាំងឡាយ ច្បាស់ជាគ្មានផ្លូវអាចធ្វើអ្វីរូបគេបានឡើយ។តែការពិតទៅ ទង្វើមួយចំនួនដែលយើងនាំគ្នាធ្វើជាប្រក្រតីរៀងរាល់ថ្ងៃនេះឯង ដែលជាតួឯកសំខាន់អាចធ្វើឱ្យសុខភាពរបស់យើងរងការប៉ះពាល់ និងធ្លាក់ចុះដុនដាបយ៉ាប់យ៉ឺននោះ។ ថ្ងៃនេះទស្សនាវដ្តី ឡារ៉ែន បានទៅស្រាវជ្រាវរករឿងរ៉ាវដ៏គួរឱ្យចាប់អារម្មណ៍មួយចំនួនដែលពាក់ព័ន្ធនឹងទង្វើប្រចាំថ្ងៃ មកជម្រាបជូនមិត្តអ្នកអានដែលជាសុភាពបុរសឱ្យបានជ្រាបដូចខាងក្រោម…។

1. ប្រើសាប៊ូជេលលាងសម្អាតដៃញឹកញាប់ជ្រុលពេក
បើអ្នក គឺជាមនុស្សម្នាក់ដែលស្ថិតក្នុងប្រភេទដែលត្រូវតែលាងដៃ ឬប្រើក្រដាសអនាម័យជូតសម្អាតដៃយ៉ាងហ្មត់ចត់រៀងរាល់ក្រោយពេលចាប់ឃីបតកុំព្យូទ័រ ចាប់បង្កាន់ដៃជណ្តើរ ចាប់ដៃទ្វារបន្ទប់បង្គន់ហើយ ប្រភេទមិនទុកឱកាសឱ្យមេរោគកខ្វក់ណាមកតោងជាប់ដៃបានយូរនោះ វាគឺជារឿងល្អមួយហើយដែលអ្នកស្រឡាញ់ភាពស្អាតបាតមានអនាម័យបែបនោះ តែការពិតវិញ សាប៊ូជេល និងក្រដាសជូតដៃប្រភេទសើមនេះហើយដែលជាមេក្លោងធ្វើឱ្យស្បែករបស់អ្នកទៅជាស្ងួតខ្លាំងនោះ ព្រោះឧបករណ៍លាងសម្អាតដៃទាំងអស់នោះ មានចំណែកផ្សំរបស់ត្រៃខ្លូសាន (Triclosan)ជាសារធាតុមួយមានគុណសម្បត្តិក្នុងការទប់ស្កាត់មេរោគបាក់តេរីរួមជាមួយដែរ ដោយស្បែកនឹងបឺតយកសារធាតុនេះចូលទៅបានយ៉ាងងាយស្រួល ហើយលទ្ធផលដែលតាមមក គឺស្បែកនឹងឡើងស្ងួតក្រៀមហ្នឹងឯង។ វិធីដែលល្អបំផុត គឺចូលបន្ទប់ទឹកលាងសម្អាតដៃជាមួយនឹងសាប៊ូ និងទឹកស្អាតធម្មតាប្រសើរជាង។

2. ញ៉ាំទឹកបរិសុទ្ធពីក្នុងដប (មិនដែលចាក់ចូលកែវញ៉ាំ)
យើងជឿថា បុរសភាគច្រើនសុទ្ធតែជ្រើសរើសញ៉ាំទឹកដោយវិធីនេះទាំងអស់ ព្រោះវាងាយស្រួល រហ័ស ហើយថែមទាំងមិនបាច់ខាតពេលលាងសម្អាតកែវទៀតផង តែអ្នកដឹងទេថា កម្មវិធីផលិតទឹកពិសានៅក្នុងដបប្លាស្ទិកផ្សេងៗនេះធ្វើឱ្យសារធាតុរ៉ែសំខាន់ៗនៅក្នុងទឹកបាត់បង់អស់ ហើយវានឹងចូលទៅរាំងស្ទះប្រព័ន្ធការធ្វើការងារក្នុងផ្នែកសាងកម្លាំងថាមពល និងប្រព័ន្ធការជួសជុលសាច់ដុំឱ្យធ្វើការមិនបានពេញសមត្ថភាពទៀតផង។

3. ឈប់ហាត់ប្រាណបែបការ៍ឌីយោ ហើយបែរទៅហាត់ប្រាណលើកទម្ងន់វិញ
អ្នកណាដែលប្រាប់ថា វិធីហាត់ប្រាណបែបការ៍ឌីយោ មិនបានជួយបញ្ចុះទម្ងន់ស្មើនឹងការបញ្ចេញកម្លាំងលើកទម្ងន់(ដុំដែក)នោះ ប្រហែលជាត្រូវគិតឡើងវិញជាថ្មីហើយ ព្រោះទោះជាការលើកទម្ងន់វាជួយផ្លាស់ប្តូរដុំខ្លាញ់ជ្រាយៗឱ្យក្លាយទៅជាសាច់ដុំបានមែន តែបើមិនធ្វើលំហាត់ប្រាណបែបការ៍ឌីយោរួមជាមួយផងទេនោះ លទ្ធផលដែលទទួលបាន ប្រហែលជាមិនសូវមើលឃើញច្បាស់លាស់ប៉ុន្មានទេ។ ដូច្នេះចូរសាកល្បងបែងចែកពេលវេលាមករត់ មកហែលទឹក ឬក៏ធាក់កង់រួមជាមួយផង ធានាថា ទម្ងន់ខ្លួនដែលលើសនោះ នឹងរលាយបាត់ជាសន្សឹមៗនៅទីបំផុត។

4. ដុសសម្អាតធ្មេញភ្លាមៗក្រោយពេលបាយរួច
មនុស្សភាគច្រើន ច្រើនតែធ្វើតាមការណែនាំក្នុងរឿងការសម្អាតធ្មេញថា ត្រូវតែដុសសម្អាតធ្មេញ 2ដង គឺពេលព្រឹក និងមុនចូលគេងរៀងរាល់ថ្ងៃ ក្នុងខណ:ដែលអ្នកខ្លះខ្លាចធុំក្លិនមាត់ ឬខ្លាចមានកម្ទេចអាហារនៅជាប់តាមជើងធ្មេញនោះ ក៏សម្រេចចិត្តដុសសម្អាតធ្មេញ និងមាត់ភ្លាមៗតែម្តងក្រោយពេលញ៉ាំបាយហើយរួចរាល់។ តែអ្នកដឹងទេថា ទង្វើនេះវាហុចនូវផលអាក្រក់ដល់សុខភាពធ្មេញរបស់អ្នកលើសមុនទៅទៀត ដោយសារតែអាស៊ីតខ្លាញ់ដែលនៅសេសសល់ជាប់នៅលើធ្មេញ និងក្នុងប្រអប់មាត់ វានឹងទៅបំផ្លាញស្រទាប់ស្រោបខាងក្រៅរបស់ធ្មេញ ហើយបើសិនជាធ្វើបែបនោះញឹកញាប់ទៅ ស្រទាប់ក្រៅរបស់ធ្មេញនឹងត្រូវបំផ្លាញជានិរន្តរ៍បានយ៉ាងងាយ ក្រៅពីនេះនៅមានអាការស្រៀវធ្មេញតាមមកទៀតផង។ តែបើសិនជាទ្រាំមិនបាន ចង់តែដុសសម្អាតធ្មេញមែននោះ ឡារ៉ែន សុំណែនាំឱ្យរង់ចាំយ៉ាងតិចណាស់ 1ម៉ោងក្រោយ សឹមធ្វើការដុសសម្អាតធ្មេញចុះ។

5. ពាក់ស្បែកជើងផ្ទាត់ដើរពេញ 1ថ្ងៃ
សូមទទួលស្គាល់ថា ស្បែកជើងផ្ទាត់ គឺជាស្បែកជើងដែលពាក់ស្រួលនិងសប្បាយស្រួលជើងជាទីបំផុតតែមាននរណាដឹងខ្លះទេថា ការពាក់ស្បែកជើងផ្ទាត់ចេញពីផ្ទះ ដើរទៅនេះ ដើរទៅនោះពេញ 1ថ្ងៃនោះ បែរជាហុចផលអាក្រក់ដល់សុខភាពជើងយ៉ាងខ្លាំងទៅវិញ(ជាពិសេសបរិវេណបាតជើង) ដូច្នេះបើសិនជាអាចទៅរួច ឡារ៉ែន ចង់ណែនាំឱ្យងាកទៅពាក់ស្បែកជើងបែបផ្សេងខ្លះ ដូចជាស្បែកជើងបាតាជាដើម ទោះជាវាមិនសូវសប្បាយជើងដូចស្បែកជើងផ្ទាត់មែន តែយ៉ាងហោចណាស់ក៏វាមិនបំផ្លាញសុខភាពជើងខ្លាំងពេកដែរ៕

October 10, 2019

កុំបារម្ភថាអត់ការងារធ្វើ តែអ្វីដែលសិស្សត្រូវគិត គឺចាប់ឱកាសការងារដោយវិធីណា?

សិស្សានុសិស្សជាច្រើន ជាពិសេសអ្នករស់នៅតាមបណ្តាខេត្តតែងតែបារម្ភពីបញ្ហាគ្មានការងារធ្វើក្រោយបញ្ចប់ការសិក្សា។ ដោយមូលហេតុនេះ ធ្វើឱ្យសិស្សមួយចំនួនមិនហ៊ានសម្រេចចិត្តបន្តការសិក្សានៅឧត្តមសិក្សា ហើយចាប់អាជីពការងារនៅក្បែរផ្ទះដែលងាយស្រួល និងចំណាយតិចទៅវិញ។

តាមពិតទៅ ជីវិតការងារជាក់ស្តែង មិនគួរឱ្យបារម្ភដូចអ្វីដែលយុវជនគិតនោះទេ ព្រោះកន្លងមកមានម្ចាស់អាជីវកម្មច្រើនណាស់ដែលរអ៊ូរទាំពីកង្វះបុគ្គលិកសម្រាប់ធ្វើការងារ ស្របពេលដែលសិស្សជាច្រើនបែរជាបារម្ភពីភាពគ្មានការងារធ្វើទៅវិញ។ តាមពិតទៅ ប្រសិនបើសិស្ស និស្សិតមានចំណុចទាំងប៉ុន្មានខាងក្រោមនេះ នោះពួកគេនឹងមិនបាច់បារម្ភពីភាពគ្មានការងារធ្វើក្រោយពេលបញ្ចប់ការសិក្សានោះទេ។

1. ចំណេះដឹងវិជ្ជាជីវៈ
ការសិក្សានៅកម្រិតមហាវិទ្យាល័យ គឺជាការសិក្សាដែលផ្តោតសំខាន់លើចំណេះដឹងសម្រាប់ធ្វើការងារ តែនៅក្នុងជំនាញគោលរយៈពេល4ឆ្នាំនេះ មានមុខវិជ្ជាជាច្រើនផ្សេងគ្នាដែលអាចបំបែកបានជាអាជីពការងារជាច្រើនផងដែរ។ ហេតុនេះនិស្សិតត្រូវតែដឹងថា អាជីពជាក់លាក់ណាមួយលើវិស័យដែលខ្លួនកំពុងសិក្សាជាអាជីពដែលខ្លួនពេញចិត្តពិតប្រាកដ។

ឧទាហរណ៍ ប្រសិនបើគាត់កំពុងសិក្សាលើមុខវិជ្ជានីតិសាស្ត្រ និស្សិតគួរកំណត់ឱ្យច្បាស់ថាអនាគតទៅចង់ក្លាយជាមេធាវីឯកទេសរដ្ឋប្បវេណី មេធាវីខ្លាំងខាងព្រហ្មទណ្ឌ អ្នកធ្វើការងារក្នុងក្រសួង-ស្ថាប័នរដ្ឋ មន្ត្រីជំនាញផ្នែកច្បាប់ក្នុងក្រុមហ៊ុនឯកជន ឬចង់ធ្វើការងារនៅក្នុងតុលាការជាដើម។ ក្រោយពេលកំណត់ច្បាស់ហើយ និស្សិតអាចចាប់យកមុខវិជ្ជាពាក់ព័ន្ធទាំងអស់នោះដើម្បីធ្វើការសម្រួចឱ្យខ្លាំងដើម្បីធានាថាយើងអាចចេះចាំច្បាស់ និងអាចធ្វើការងារបាន។

2. បទពិសោធ
នៅក្នុងការដាក់ពាក្យធ្វើការងារ ជាពិសេសអ្នកធ្វើការងារក្នុងវិស័យឯកជន ភាគច្រើនជ្រើសរើសបុគ្គលិកដែលមានបទពិសោធន៍ការងារស្រាប់។ មាននិស្សិតជាច្រើនមិនហ៊ានដាក់ពាក្យធ្វើការងារដោយសារមិនមានបទពិសោធគ្រប់គ្រាន់តាមការកំណត់របស់ស្ថាប័ន នៅពេលដែលពួកគេទើបនឹងចេញពីសាកលវិទ្យាល័យ។ត្រង់ចំណុចនេះ និស្សិតគួរចាប់ផ្តើមស្វែងរកការងារស្ម័គ្រចិត្ត ឬធ្វើការងារហាត់ការនៅក្នុងស្ថាប័នណាដែលត្រូវនឹងអាជីពរបស់ខ្លួន។ បើទោះបីជាការងារនោះមិនធំដុំ ឬមិនសូវសំខាន់ក្នុងស្ថាប័ន តែវាក៏ត្រូវបានគេរាប់បញ្ចូលទៅក្នុងរយៈពេលដែលយើងធ្វើការងារក្នុងវិស័យដែលយើងកំពុងសិក្សានោះដែរ។ ប្រសិនបើនិស្សិតបានប្រឡូកជាមួយការងារជាក់ស្តែងនៅឆ្នាំទី2 នោះមានន័យថា គ្រាន់តែចប់សាកលវិទ្យាល័យភ្លាម គាត់មានបទពិសោធជាង 2ឆ្នាំរួចបាត់ទៅហើយ។

3. អត្តចរិត និងអាកប្បករិយា
ចំណុចនេះ ជាចំណុចសំខាន់ដែលនិយោជកភាគច្រើនត្រូវការ ព្រោះចំណេះជំនាញអាចបណ្តុះបណ្តាលបាន តែអត្តចរិតលំបាកណាស់ក្នុងការតម្រង់។ ការបណ្តុះអត្តចរិតល្អដែលស្ថាប័ននានាចង់បាន គឺសមត្ថភាពធ្វើការងារជាក្រុម ភាពជាអ្នកដឹកនាំ ភាពបត់បែន និងប្រសិទ្ធភាពការងារខ្ពស់។ អត្តចរិត និងអាកប្បកិរិយាល្អនេះ ជាមេរៀនដែលត្រូវរៀននៅក្រៅសាលា ហើយវាកើតឡើងពីការសន្សំ។ ហេតុនេះការធ្វើសូមកុំមើលរំលងពីអត្ថន័យនៃការងារតូចៗដែលយើងកំពុងធ្វើ។ ការងារជាក្រុមដែលសាស្ត្រាចារ្យដាក់ឱ្យ រួមទាំងការងារដែលប្រធានស្ថាប័នដាក់ឱ្យយើងធ្វើសុទ្ធតែបង្កប់នូវមេរៀនសំខាន់ក្នុងការហ្វឹកហាត់ខ្លួនឯងឱ្យក្លាយជាមនុស្សល្អដែលគេចង់បាន។ ការធ្វើការងារសាលាសូមយកចិត្តទុកដាក់ ហើយគិតថាវាជាការងារសំខាន់សម្រាប់អាជីព ហើយការធ្វើការងារហាត់ការក៏ត្រូវតែខិតខំប្រឹងប្រែងធ្វើឱ្យល្អ និងពេលខ្លះបើអាចខិតខំធ្វើរហូតមានសមត្ថភាពល្អជាងបុគ្គលិកពេញសិទិ្ធក៏កាន់តែប្រសើរ។ នៅពេលនោះ កុំថាឡើយចេញពីសាលាមិនលំបាកដាក់ពាក្យធ្វើការងារ សូម្បីតែប្រធានស្ថាប័នដែលយើងកំពុងហាត់ការនេះ ក៏អាចនឹងទាញយើងឱ្យចូលធ្វើការងារទាំងមិនទាន់រៀនចប់ផងក៏មាន៕

October 10, 2019

ម៉ូដសក់ស្អាតៗ សម្រាប់អនាគតកូនក្រមុំទាន់សម័យ

សម្រាប់ម៉ូដសក់កូនក្រមុំនាសម័យថ្មីនេះ គឺមិនត្រូវការភាពស៊ាំញ៉ាំដូចជាសម័យមុននោះទេ ម៉ូដសក់ទាំងនេះមិនត្រឹមតែស្អាត ទាន់សម័យនោះទេ ថែមទាំងងាយស្រួលប្តូរម៉ូដសក់ថ្មី មិនឈឺក្បាល ហើយមិនខូចសក់ថែមទៀតផង។ មើលចុះម៉ូដសក់ទាំងនេះពិតជាស្រស់ស្អាត និងពេញចិត្តអនាគតកូនក្រមុំសម័យថ្មីនេះមិនតិចទេ ដូច្នេះតោះចឹងសូមជ្រើសរើសម៉ូដសក់ស្អាតៗ ងាយៗសម្រាប់ថ្ងៃដ៏សំខាន់របស់អ្នកដូចតទៅ៕

October 10, 2019

បើមិនអាចបំភ្លេចគេបានទេ គ្រាន់តែចាំថា គេឈប់ស្រឡាញ់យើងទៅបានហើយ

គឺជារឿងធម្មតារបស់ “សេចក្ដីស្នេហា” ដែលត្រូវតែប្រសព្វជួបនឹង “ក្តីសមបំណង” និង “ក្តីខកបំណង” … “សេចក្តីសុខ” និង “ក្តីទុក្ខសោក” តែបើបានជួបនឹងសេចក្ដីស្នេហាដែលល្អៗ នោះគឺបានន័យថា អ្នកសំណាងល្អណាស់…ចុះបើជួបនឹងស្នេហាដែលខកបំណង ដែលចង់ “បំភ្លេច” និងទោះជាខំប្រឹងបំភ្លេចយ៉ាងណា ក៏មិនអាចបំភ្លេចបាន ព្រោះវានៅតែដក់ដិតជាប់នៅក្នុងបេះដូងវិញនោះ តើអ្នកត្រូវធ្វើយ៉ាងណា? តើអ្នកធ្លាប់ដាក់សំណួរបែបនេះចំពោះខ្លួនឯងដែរឬទេ?

ពិតហើយ ដែលការចងចាំរបស់មនុស្សយើងម្នាក់ៗវាខុសគ្នា អ្នកខ្លះឆាប់ភ្លេច អ្នកខ្លះក្រភ្លេចនិងអ្នកខ្លះមិនងាយភ្លេច ទោះជាខំព្យាយាមបំភ្លេចយ៉ាងណា ក៏មិនអាចបំភ្លេចបានដែរ… នៅក្នុងខួរក្បាលនៅតែវិលវល់ នឹកឃើញតែរូបភាពចាស់ៗ រឿងរ៉ាវកាលពីអតីត អារម្មណ៍ចាស់ៗពីមុនដែលរូបអ្នក ឬគេធ្លាប់បានប្រគល់ឱ្យគ្នាទៅវិញទៅមក ទីកន្លែងដែលធ្លាប់ដើរដឹកដៃគ្នាកាលគ្រាដំបូង ហាងដែលយើងធ្លាប់ញ៉ាំបាយជាមួយគ្នាជាប្រចាំ កុនរឿងនោះដែលគេ ឬនាងចូលចិត្តមើល។ល។

ពិតមែនហើយថា “ពេលវេលាមិនអាចធ្វើឱ្យនរណាភ្លេចនរណាបានឡើយ” តែវិធីដែលល្អបំផុតនោះគឺ បើនៅតែមិនអាចបំភ្លេចគេបានក៏គ្រាន់តែចាំថា គេលែងស្រឡាញ់យើងទៅបានហើយ និងសួរខ្លួនឯងថា តើហេតុអ្វីបានជាយើងមិនព្រមប្រមូលការចងចាំចាស់ៗ អនុស្សាវរីយ៍ចាស់ៗដែលយើង និងគេធ្លាប់ធ្វើរួមគ្នាទាំងនោះដាក់ចូលទៅក្នុងទីជម្រៅនៃបេះដូង រួចចាក់សោបិទវាឱ្យជិត ឈប់រំឭក ឈប់នឹកឃើញនោះឱ្យអស់ទៅ? រួចហើយរង់ចាំដល់ថ្ងៃណាមួយដែលអ្នកមានអារម្មណ៍ថា ត្រៀមខ្លួនរួចរាល់ជាថ្មីម្តងទៀត និងស្នាមរបួសដែលធ្លាប់មាននោះ វាជាសះស្រួលបួលហើយ សឹមបើកទ្វារបេះដូងជាថ្មីម្តងទៀត ទទួលយកអ្នកថ្មី ក៏វាមិនមែនជារឿងអីប្លែកដែរ។

ចូរសាកល្បងសួរបេះដូងខ្លួនឯងទៅមើលថា តើចង់មានសេចក្តីសុខជាមួយបច្ចុប្បន្ន ឬចង់មានសេចក្តីសុខជាមួយនឹងអតីតកាលដែលកន្លងហួសទៅហើយ ដែលវាមិនអាចនឹងវិលត្រឡប់មកឱ្យយើងកែកុនជាថ្មីទៀតបាននោះ?ចូរកុំភ្លេចថា ជីវិតត្រូវតែឈានទៅមុខជានិច្ច ហើយអ្វីដែលសំខាន់នោះគឺ… ការចងចាំគ្រាន់តែជាចំណែកតូចមួយក្នុងជីវិតប៉ុណ្ណោះ មិនមែនក្នុងជីវិតទាំងមូលរបស់យើងឡើយ៕

October 8, 2019

ជម្រើស 5យ៉ាង ឆ្ពោះទៅរកការមានសុខភាពល្អ ខណៈពេលមានគភ៌

ការមានសុខភាពល្អ ពិតជារឿងមួយចាំបាច់ណាស់សម្រាប់ស្រ្តីមានគភ៌ទាំងឡាយ ព្រោះវាមានន័យថា នៅពេលដែលអ្នកមានសុខភាពល្អរឹងមាំពេញលេញហើយនោះ ជីវិតដ៏តូចមួយដែលនៅក្នុងពោះអ្នកក៏នឹងមានវិវឌ្ឍនាការរីកចម្រើនធំធាត់តាមអាយុគភ៌ដ៏ល្អនោះដែរ ដូច្នេះគេអាចមើលឃើញបានថា គ្រូពេទ្យនឹងណែនាំអនាគតអ្នកម្តាយដែលកំពុងតាំងគភ៌ទាំងឡាយឱ្យឧស្សាហ៍មើលថែទាំខ្លួន ទាំងរឿងសុខភាពរាងកាយ រួមទាំងសុខភាពផ្លូវចិត្តផងដែរ។ ឥឡូវយើងមកមើលថា តើជម្រើសឆ្ពោះទៅរកការមានសុខភាពដ៏ល្អនោះ យើងអាចធ្វើយ៉ាងដូចម្តេចបានខ្លះ?

1- ស្ត្រីមានគភ៌គួរទទួលទានបន្លែផ្លែឈើ អាហារ Cereal បាយអង្ករស្រូវសាលី គ្រាប់ធញ្ញជាតិ និងអាហារដែលមានកាកសរសៃឱ្យបានច្រើន ដើម្បីចៀសវាងអាការទល់លាមក ព្រោះអ័រម៉ូនដែលប្រែប្រួលនឹងមានផលប៉ះពាល់ដល់ពោះវៀនធំរបស់ស្ត្រីមានគភ៌ ហើយអាហារដែលមានកាកសរសៃអាចជួយបានច្រើន។2- ស្ត្រីមានគភ៌ត្រូវបានទទួលសារធាតុដែកពីសាច់សត្វ យ៉ាងហោចណាស់ 1សប្តាហ៍ 3ដង ដែលមិនចាំបាច់ញ៉ាំច្រើនទេ តែឱ្យគ្រប់គ្រាន់នឹងតម្រូវការរបស់រាងកាយ ហើយនិងសារធាតុដែកដែលមាននៅក្នុងបន្លែ ជាប្រភេទដែលមិនមែន ហេម៉ូគ្លោប៊ីន ធ្វើឱ្យរាងកាយពិបាកក្នុងការបឺតជ្រាបនោះទេ។3- ដើម្បីជួយបង្កើន និងពង្រឹងខួរក្បាលដល់កូនតូច ស្រ្តីមានគភ៌ត្រូវទទួលទានអាស៊ីតខ្លាញ់អូមេហ្កា3 តែចូរចៀសវាងសត្វក្នុងទឹកដែលមានសម្បករឹង ប្រភេទគ្រំ ងាវ និង លៀសជាដើម ព្រោះអាចនឹងបង្កឱ្យមានគ្រោះថ្នាក់ដល់ទាំងម្តាយ និងទារកក្នុងគភ៌ដែលនឹងអាចឆ្លងមេរោគបាក់តេរីលិស្តេរីបាន។4- បើស្ត្រីមានគភ៌ពិបាកជាមួយនឹងអាការក្អួតចង្អោរ ចូរទទួលទានមើមខ្ញី ព្រោះវាអាចព្យាបាលអាការក្អួតចង្អោរបានល្អ ដោយគ្រាន់តែហាន់មើមខ្ញីស្រស់ជាចំណិតស្ដើងៗ ដាក់ក្នុងទឹកក្តៅឧណ្ហៗខ្លាំង ហើយក្រេបម្តងបន្តិចៗឱ្យបានញឹកញាប់។
5- ស្ត្រីមានគភ៌ត្រូវបានទទួលបរិមាណ Fluoride ឱ្យបានគ្រប់គ្រាន់ ព្រោះវាសំខាន់ដល់ការសាងធ្មេញរបស់កូនតូចក្នុងផ្ទៃ៕

October 8, 2019

ចម្ការម្នាស់ទឹកឃ្មុំ កំពុងជួយជំរុញទីផ្សារភេសជ្ជៈទឹកផ្លែឈើរបស់សិប្បកម្មក្នុងស្រុក

ដំណាំម្នាស់ ពិសេសម្នាស់ទឹកឃ្មុំ ដោយសារតែវាអាចរស់បាននៅក្នុងតំបន់ដែលមានសីតុណ្ហភាពមធ្យមពី 26 ទៅ 28អង្សាសេ ធ្វើឱ្យម្នាស់ក្លាយជាដំណាំហូបផ្លែមួយប្រភេទដែលងាយស្រួលដាំ ដោយសារវាលូតលាស់លឿន និងឆាប់ឱ្យផល ដែលបច្ចុប្បន្ន ខ្មែរយើងមានបច្ចេកទេសដាំម្នាស់តែក្នុងរយៈពេល 6ខែ ទៅ 7ខែប៉ុណ្ណោះនឹងទទួលបានផល ហើយដំណាំនេះកំពុងត្រូវបានប្រជាពលរដ្ឋនាំគ្នាដាំនៅគ្រប់ខេត្ត-ក្រុងនៅក្នុងប្រទេសកម្ពុជា និងដើម្បីផ្គត់ផ្គង់តម្រូវការទីផ្សារដែលកំពុងត្រូវការច្រើនផងដែរ។

កសិករដាំម្នាស់ទឹកឃ្មុំ នៅភូមិអូរឫស្សីកណ្តាល ឃុំអូរឫស្សីកណ្តាល ស្រុកសៀមបូក ខេត្តស្ទឹងត្រែង លោក សាយ ពន្លឺករុណា បានផ្តល់បទសម្ភាសប្រាប់កាសែតឡារ៉ែនពាណិជ្ជថា៖ “គ្រួសារខ្ញុំ ចាប់ផ្តើមប្រកបរបរដាំម្នាស់អស់រយៈពេល 10ឆ្នាំមកហើយ ដោយបានដាំដុះនៅលើផ្ទៃដីចំនួន 15ហិកតា ប៉ុន្តែបច្ចុប្បន្ននៅសល់តែ 2ហិកតាប៉ុណ្ណោះ ដោយសារខ្ញុំបានបង្វិលទុនធ្វើសិប្បកម្ម ផលិតភេសជ្ជៈទឹកផ្លែម្នាស់វិញ”។

ថ្វីដ្បិតតែកសិករដាំម្នាស់រូបនេះបានភ្ជាប់ខ្លួនទៅនឹងការងារសិប្បកម្មផលិតទឹកផ្លែម្នាស់ក៏ដោយ ក៏លោកនៅតែអាចប្រាប់ពីបច្ចេកទេសដាំដុះម្នាស់ ដែលលោកធ្លាប់មានបទពិសោធច្រើនបង្គួរពីដំណាំផ្លែឈើមួយនេះដែរ។ លោកថា៖“ម្នាស់ 1ហិកតា ខ្ញុំអាចដាំបានចន្លោះពី 36,000កូន ទៅ50,000កូន តែបច្ចុប្បន្នខ្ញុំដាំបានត្រឹមតែ 40.000កូនប៉ុណ្ណោះ (នៅតំបន់ខ្លះមានដង់ស៊ីតេដាំប្រមាណជា 55,000កូនក្នុង 1ហិកតា)ដោយលើកជារងចន្លោះពី 1.2ម៉ែត្រ ទៅ1.5ម៉ែត្រពីគ្នា ហើយដាំឃ្លាតគ្នាពី 1ដើមទៅ 1ដើមចម្ងាយពី 2.5តឹកទៅ 3តឹក។

ក្នុងម្នាស់មួយដើមផ្តល់ផលតែ 1ផ្លែប៉ុណ្ណោះដែលមានទម្ងន់ចាប់ពី 1គីឡូ ទៅដល់3គីឡូក្រាម ទៅតាមផ្លែតូច ឬផ្លែធំ ហើយលក់ក្នុងតម្លៃបោះដុំបាន 3,500រៀល តែអ្នកប្រមូលទិញអាចយកទៅលក់នៅក្នុងទីផ្សារបាន 5,000រៀលទៅ 6,000ក្នុង 1គីឡូក្រាម។

លោក ករុណា បានមានប្រសាសន៍ថា៖“ដើមម្នាស់គេអាចបណ្តុះដោយគ្រាប់(គ្រាប់ម្នាស់នៅក្នុងភ្នែកម្នាស់) រួចយកកូនទៅដាក់ដាំ ឬអាចដាំដោយដើមម្នាស់ដែលនៅខាងចុងផ្លែ ឬខ្នែងដែលនៅលើដើមម្នាស់ក៏បាន។ បច្ចេកទេសដាំម្នាស់បច្ចុប្បន្ន គេប្រើរយៈពេលតែ 6ខែទៅ 7ខែប៉ុណ្ណោះ គឺអាចឱ្យវាចេញផ្លែ(ក្ដិប)បានហើយ និងបន្តពីនោះត្រឹមតែ 2-3ខែទៀតផ្លែម្នាស់នឹងទុំ និងអាចប្រមូលផលបានហើយ។ ខុសពីមុនដែលចាប់ពីពេលដាក់ដាំលើកដំបូងរហូតដល់ពេលប្រមូលផលត្រូវចំណាយពេល 12ខែ”។

លោកថា កន្លងមកទីផ្សារលក់ចេញ គឺម្នាស់មិនមានការលំបាកនោះទេ ដោយលោកបានដាក់លក់ឱ្យអ្នកទេសចរ ដែលធ្វើដំណើរទៅលេងខេត្តរតនគីរី និងខេត្តស្ទឹងត្រែង ក៏អាចលក់អស់ប្រមាណជា 70% ទៅ 80%ដែរ និងមួយចំនួនទៀត យើងផ្គត់ផ្គង់ទៅឱ្យទីផ្សារបន្លែធម្មជាតិនៅក្នុងទីក្រុងភ្នំពេញ។

ដំណាំម្នាស់គេអាចដាំបានគ្រប់រដូវ មិនថារដូវវស្សា ឬរដូវប្រាំងនោះទេ សំខាន់ឱ្យតែមានទឹកស្រោចប៉ុន្តែកសិករខាងលើបានអះអាងថា ដើម្បីឱ្យដើមម្នាស់លូតលាស់បានល្អ គេច្រើនដាំនៅរដូវប្រាំង ហើយស្រោចទឹកជាប់ជាប្រចាំ ព្រោះដើមនឹងលូតលាស់បានល្អជាងដាំនៅរដូវវស្សា ព្រោះថា រដូវវស្សាភ្លៀងធ្លាក់ច្រើនពេក ម្នាស់មិនសូវលូតលាស់ល្អទេ ដូច្នេះធ្វើឱ្យដំណាំនេះក៏មិនសូវជាស្រួលក្នុងការថែទាំប៉ុន្មានដែរ ទាល់តែមានបទពិសោធទើបអាចដាំបានផលល្អ និងអាស្រ័យលើប្រភេទពូជ និងបច្ចេកទេសដាំដុះទៀតផង។ នេះបើតាមអ្នកមានបទពិសោធរូបនេះបានបញ្ជាក់។

លោក ករុណា បានឱ្យដឹងទៀតថា លោកនៅសល់ចម្ការម្នាស់ទឹកឃ្មុំ នៅលើផ្ទៃដីប្រមាណជា 2ហិកតា(1ហិកតាស្មើនឹងជាង 40,000ដើម) ឬសរុបទៅ ប្រមាណជាជាង 80,000ដើម ដែលបច្ចុប្បន្នផ្ទៃដីដាំម្នាស់របស់លោកប៉ុនហ្នឹង មិនអាចផ្គត់ផ្គង់បានគ្រប់គ្រាន់សម្រាប់សិប្បកម្មរបស់លោកទេ ព្រោះសិប្បកមរបស់លោកត្រូវការម្នាស់ប្រមាណជា 3តោនទៅ 5តោនក្នុង 1ថ្ងៃ។

ដោយឡែករឿងតម្លៃទឹកផ្លែម្នាស់នៅលើទីផ្សារវិញ លោកករុណា បានប្រាប់កាសែតឡារ៉ែន ពាណិជ្ជថា៖ “សិប្បកម្មទឹកផ្លែម្នាស់ទឹកឃ្មុំរបស់ខ្ញុំ អាចទទួលផលិតបាន 2,500លីត្រក្នុង 1ថ្ងៃ ហើយក្នុង 1ខែសិប្បកម្មខ្ញុំផលិតបានចំនួន 150,000ដប។ ឯតម្លៃលក់បោះដុំ គឺក្នុង1ដប 4,000រៀល ឯអ្នកលក់រាយអាចលក់បានតម្លៃ 5,000 – 6,000រៀលក្នុង1ដប”។

លោក សាយ ពន្លឺករុណា បានបញ្ជាក់ទៀតថា៖“សិប្បកម្មទឹកផ្លែម្នាស់ទឹកឃ្មុំរបស់ខ្ញុំកំពុងដំណើរការចុះបញ្ជីហើយ ដោយមានការជំរុញគាំទ្រពីមន្ទីរពាណិជ្ជកម្មខេត្ត និងក្រសួងឧស្សហកម្ម និងសិប្បកម្ម ព្រោះការផលិតរបស់ខ្ញុំ ធ្វើឡើងតាមបច្ចេកទេសមានស្តង់ដាសុវត្ថិភាព ហើយផ្លែម្នាស់ជាវត្ថុធាតុដើមដែលយកមកប្រើ ក៏ត្រូវចម្រាញ់ និងជាផ្លែម្នាស់ដែលដាំតាមបច្ចេកទេសដែរ ទើបមានការទទួលស្គាល់ពីក្រសួងមន្ទីរ”។

លោក ករុណា បានបញ្ជាក់ទៀតថា៖ “បច្ចុប្បន្នភេសជ្ជៈម្នាស់ទឹកឃ្មុំរបស់ខ្ញុំ ត្រូវបានផ្គត់ផ្គង់ទៅឱ្យទីផ្សារនៅភ្នំពេញ និងតាមបណ្តាខេត្តមានដូចជា សៀមរាប បន្ទាយមានជ័យ និងប៉ោយប៉ែត និងដោយសារតែវាមានតម្រូវការច្រើន ទើបយើងត្រូវការផលិតបន្ថែម ព្រោះយើងក៏លក់តាមអនឡាញដែរ ហើយក៏មានអ្នកបញ្ជាទិញ និងនិយមចូលចិត្តទទួលទានច្រើនហើយដែរ”។

លោកបានប្រាប់កាសែត ឡារ៉ែន ពាណិជ្ជ ទៀតថា៖“ខ្ញុំ ក៏មានគោលបំណងពង្រីកការដាំដុះបន្ថែមទៀតដែរ ជាពិសេសម្នាស់ទឹកឃ្មុំនេះតែម្ដង ដើម្បីផ្គត់ផ្គង់ដល់សិប្បកម្មភេសជ្ជៈរបស់ខ្ញុំដែលកំពុងមានតម្រូវការខ្លាំង បច្ចុប្បន្នខ្ញុំកំពុងពង្រីកការដាំដំណាំម្នាស់ទឹកឃ្មុំនេះឱ្យបាន 5ហិកតាបន្ថែមទៀត ដែលវានឹងហុចផលនៅពេលខាងមុខ”៕

October 8, 2019