នៅក្នុងខែតុលា ដែលជាខែនៃរដូវកាលរៀប-អាពាហ៍ពិពាហ៍បានចូលមកដល់ហើយ ដូច្នេះនារីៗ ដែលត្រៀមខ្លួននឹងក្លាយជាកូនក្រមុំដ៏ស្រស់ស្អាតនាពេលខាងមុខនេះ សូមក្រឡេកមកមើលម៉ូដក្រចកដ៏ស្រស់ស្អាត គួរឱ្យស្រឡាញ់ លាយឡំដោយម៉ូដត្បូង គុជ និងគ្រាប់អង្កាំ ដែលមានពន្លឺភ្លឺស្រស់ថ្លា ចែងចាំង និងគួរជាទីទាក់ទាញក្រៃលែង ដែលមាននៅក្នុងទំព័រមួយនេះ ទុកកុម៉្មង់ជាងជំនាញខាងម៉ូដក្រចក សម្រាប់លេងម៉ូដយ៉ាងស្រស់ស្អាតដូចព្រះនាងម្ចាស់នៅក្នុងថ្ងៃរៀបអាពាហ៍ពិពាហ៍របស់អ្នកផងណា៎។ កុំឱ្យរំលង ហើយនារីៗ ដែលនិយមលេងម៉ូដក្រចកបែបស្អាតៗ សម្រាប់កម្មវិធីផ្សេងៗក៏អាចលេងម៉ូដតាមម៉ូដក្រចកទាំងនេះបានដែរ៕
Author: ធឿន មករា
ម៉ូដក្រចកកូនក្រមុំ បែបស្អាតៗដូចព្រះនាងម្ចាស់
ម៉ូដរ៉ូបកូនក្រមុំ សម្រាប់រដូវកាលអាពាហ៍ពិពាហ៍
ភ្លេចខ្លួនតែបន្តិច រដូវកាលរៀបអាពាហ៍ពិពាហ៍ក៏ចូលមកដល់ទៀតហើយ ដូច្នេះសូមមកត្រៀមខ្លួនជាមួយនឹងទំព័រម៉ូដសម្លៀកបំពាក់ ឡារ៉ែន នៅក្នុងខែតុលា ដែលផ្តោតទៅលើអាពាហ៍ពិពាហ៍ដូចតទៅ។ កំលោះក្រមុំទាំងអស់បានត្រៀមខ្លួនសម្រាប់ថ្ងៃដ៏ពិសេសរបស់ខ្លួនហើយឬនៅ? ក្នុងឆ្នាំនេះអាចជាពេលវេលាដែលអ្នកត្រូវដល់គូព្រេងផងក៏មិនដឹង ហើយបើមិនដូច្នេះទេ ក៏គង់តែគេចមិនផុតពីការក្លាយខ្លួនជាភ្ញៀវកិត្តិយសក្នុងពិធីមង្គលការមិត្តភក្តិ ឬសាច់ញាតិមិនខាន។ ដូច្នេះ ថ្ងៃរៀបអាពាហ៍ពិពាហ៍ គឺជាថ្ងៃដ៏ពិសេសមួយ ដែលកូនក្រមុំទាំងឡាយត្រូវតែស្រស់ស្អាតបំផុត។ ម៉ូដសម្លៀកបំពាក់ក៏ជាផ្នែកមួយដ៏សំខាន់ក្នុងការជួយលើកសម្រស់ដល់កូនក្រមុំគ្រប់រូបដែរ ដូច្នេះមានន័យថា ការជ្រើសរើសសម្លៀកបំពាក់ ដើម្បីយកមកគ្រងនៅលើរាងកាយក៏ជារឿងមួយដែលអ្នកត្រូវរើសយ៉ាងយកចិត្តទុកដាក់ដែរ។ កុំបារម្ភអី! សូមសាកល្បងមើលម៉ូដរ៉ូបកូនក្រមុំទាំងនេះទៅមើល៍ វាប្រហែលជាអាចជួយអ្នកបានក្នុងការជ្រើសរើសម៉ូដរ៉ូបកូនក្រមុំសម្រាប់ថ្ងៃដ៏វិសេសរបស់អ្នក ឬញាតិមិត្តរបស់អ្នកបានជាមិនខាន៕
ពាណិជ្ជកម្មកម្ពុជា-ជប៉ុន កើនឡើងក្នុងទំហំ 2ប៊ីលានដុល្លារអាមេរិក
រាជរដ្ឋាភិបាលកម្ពុជាបានសម្តែងការពេញចិត្តចំពោះកំណើនពាណិជ្ជកម្មរវាងកម្ពុជា-ជប៉ុន ក្រោយពីមានការតភ្ជាប់ជើងហោះហើរត្រង់ ដែលមិនត្រឹមតែបានជំរុញការផ្លាស់ប្តូរ ទំនាក់ទំនងប្រជាជននឹងប្រជាជនប៉ុណ្ណោះទេ ប៉ុន្តែថែមទាំងចូលរួមចំណែកដល់ការជំរុញពាណិជ្ជកម្ម និងវិនិយោគផងដែរ។ នេះបើតាមព័ត៌មានក្រោយពីជំនួបឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ជាមួយឯកឧត្តម MIKAMI Masahiro ឯកអគ្គរាជទូតជប៉ុនតែងតាំងថ្មីប្រចាំនៅកម្ពុជា។
ឯកឧត្តម កេត សោផាន់ អ្នកនាំពាក្យក្រសួងការបរទេសបានឱ្យដឹងថា ឯកឧត្តមឧបនាយករដ្ឋមន្ត្រី ប្រាក់ សុខុន បានស្វាគមន៍ និងអបអរសាទរក្នុងដំណើរបំពេញបេសកកម្មនៅកម្ពុជារបស់ឯកអគ្គរាជទូតជប៉ុនតែងតាំងថ្មីដែលនឹងពង្រឹងទំនាក់ទំនងបន្ថែមទៀតរវាងកម្ពុជា និងជប៉ុនតាមរយៈបទពិសោធការងាររបស់ ឯកឧត្តម MIKAMI Masahiro នៅកម្ពុជា។
ក្នុងជំនួបនេះដែរ ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស បានរំឭកថា លោកនាយករដ្ឋមន្ត្រីជប៉ុន ស៊ិនហ្សូ អាបេ បានជម្រាបសម្តេចតេជោ ហ៊ុន សែន នាយករដ្ឋមន្ត្រីកម្ពុជាថា ប្រទេសជប៉ុនគាំទ្រដល់កិច្ចសហប្រតិបត្តិការគ្រប់ជ្រុងជ្រោយ និងគាំទ្រដំណើរការអភិវឌ្ឍន៍បែបប្រជាធិបតេយ្យរបស់កម្ពុជាផងដែរ។
ឯកឧត្តម ឧបនាយករដ្ឋមន្ត្រី ក៏បានថ្លែងអំណរគុណដល់ជប៉ុនដែលបានជួយដល់កម្ពុជាតាំងពីការស្វែងរកសន្តិភាព និងការអភិវឌ្ឍប្រទេស សេដ្ឋកិច្ច និងនយោបាយរបស់កម្ពុជា។ ឯកឧត្ដមមានប្រសាសន៍ថា៖ “មានតែប្រជាជនជប៉ុនទេ ដែលធ្លាប់ឆ្លងកាត់សង្គ្រាមដូចគ្នា ទើបបានដឹងពីការលំបាករបស់កម្ពុជា”។
ឯកឧត្តម ឧបនាយករដ្ឋមន្ត្រី បានជម្រាបឯកអគ្គរាជទូតជប៉ុនថ្មីថា ពេលនេះប្រជាជនកម្ពុជាទទួលបានសន្តិភាពយ៉ាងពិតប្រាកដតាមរយៈការបោះឆ្នោតកាលពីឆ្នាំមុន ដោយមានប្រជាពលរដ្ឋ83.02%បានចេញទៅបោះឆ្នោត ហើយក្នុងនោះប្រជាពលរដ្ឋប្រមាណជាង 77%បានគាំទ្រកម្មវិធីនយោបាយរបស់គណបក្សដឹកនាំអំណាច។
ឯកឧត្តមបានសម្តែងនូវការពេញចិត្តចំពោះកំណើនសេដ្ឋកិច្ចទ្វេដងរវាងប្រទេសទាំង2ដែលមានចំនួនជាង 2ប៊ីលានដុល្លារនៅក្នុងឆ្នាំ2019 នេះ។
កំណើននេះបានមកពីការតភ្ជាប់ជើង ហោះ ហើរត្រង់ពីជប៉ុនមកកម្ពុជា ហើយវាមិនត្រឹមតែកំណើនទេសចរប៉ុណ្ណោះទេ តែនៅមានកំណើនពាណិជ្ជកម្មផងដែរ ។
ឯកឧត្តម MIKAMI Masahiro ឯកអគ្គរាជទូតជប៉ុនតែងតាំងថ្មីមានប្រសាសន៍ថា ឯកឧត្តមបានមើលឃើញថា កាលពី 7ឆ្នាំមុន និងបច្ចុប្បន្ននេះ ប្រទេសកម្ពុជាមានការរីកចម្រើនយ៉ាងឆាប់ រហ័ស។ ឯកឧត្តមបន្តទៀតថា “ខ្ញុំសូមកោតសរសើចំពោះថ្នាក់ដឹកនាំរាជរដ្ឋាភិបាល និងប្រជាជនកម្ពុជា ដែលបានឆ្លងកាត់ការលំបាក ដោយបានអភិវឌ្ឍលើវិស័យសេដ្ឋកិច្ច និងនយោបាយយ៉ាងឆាប់រហ័ស”។ឯកអគ្គរាជទូតជប៉ុនថ្មីបានបញ្ជាក់ថា ជប៉ុនគោរពអធិបតេយ្យភាពរបស់កម្ពុជា។
ឯកឧត្តមបន្តថា៖ “សម្រាប់វិស័យសេដ្ឋកិច្ចវិញ ការវិនិយោគរបស់ក្រុមហ៊ុនជប៉ុនមកកម្ពុជា មានការកើនឡើងជាបន្តបន្ទាប់។ យើងខ្ញុំនឹងបន្តជំរុញឱ្យវិនិយោគិនជប៉ុនមកកម្ពុជាកាន់តែច្រើនដើម្បីពង្រឹងទំនាក់ទំនងសេដ្ឋកិច្ចរវាងជប៉ុន និងកម្ពុជា។
ទន្ទឹមនឹងនេះខ្ញុំយល់ឃើញថា ការយល់ដឹងរបស់ក្រុមហ៊ុនជប៉ុនអំពីស្ថានភាពជាក់ស្តែងនៅកម្ពុជានៅមានកម្រិតនៅឡើយ ដូច្នេះហើយ ការរៀបចំបទបង្ហាញរបស់សម្តេចតេជោ ហ៊ុន សែន អំពីស្ថានភាពវិនិយោគនៅកម្ពុជាដល់វិនិយោគិនជប៉ុនដោយផ្ទាល់ អំឡុងពេលទស្សនកិច្ចនៅជប៉ុនកាលពីខែឧសភាកន្លងទៅ គឺមានអត្ថន័យជ្រាលជ្រៅ ហើយក៏ទទួលបានការវាយតម្លៃខ្ពស់ពីក្រុមហ៊ុនជប៉ុនដែលបានចូលរួមស្តាប់”។
ឯកឧត្តមបន្ថែមថា៖“ខ្ញុំផ្ទាល់ក៏នឹងព្យាយាមធ្វើការដើម្បីឱ្យក្រុមហ៊ុន និងប្រជាជនជប៉ុន ស្គាល់ពីភាពទាក់ទាញរបស់កម្ពុជាកាន់តែច្បាស់បន្ថែមទៀត ខ្ញុំសង្ឃឹមថា ការកើនឡើងនៃការវិនិយោគរបស់ក្រុមហ៊ុនជប៉ុននឹងចូលរួមចំណែកដល់ការអភិវឌ្ឍសេដ្ឋកិច្ចកម្ពុជា ការលើកស្ទួយជីវភាពរស់-នៅរបស់ប្រជាជនកម្ពុជាកាន់តែប្រសើរ ពិពិធកម្ម និងការលើកកម្ពស់ផ្នែកឧស្សាហកម្ម ព្រមទាំងការបង្កើនការងារដល់ប្រជាជនកម្ពុជា”។
ឯកឧត្តមឱ្យដឹងទៀតថា ចំនួនក្រុមហ៊ុនជប៉ុនដែលជាសមាជិករបស់សមាគមពាណិជ្ជកម្មជប៉ុនប្រចាំនៅកម្ពុជា កើនឡើងដល់ 269ក្រុមហ៊ុន។ ការវិនិយោគរបស់ក្រុមហ៊ុនជប៉ុនដូចជា ផ្សារទំនើប អុីអន បាននាំឱ្យមានការប្រែប្រួលជីវភាពរស់នៅរបស់ប្រជាជនកម្ពុជា។ ទន្ទឹមនឹងនេះ វត្តមានរបស់ក្រុមហ៊ុនជប៉ុន អាចផ្តល់ឥទ្ធិពលវិជ្ជមានសម្រាប់សេដ្ឋកិច្ច កម្ពុជា គឺមិនត្រឹមតែការបង្កើតការងារប៉ុណ្ណោះទេ តែថែមទាំងការបណ្តុះបណ្តាលធនធានមនុស្ស ការគិតគូរពីបញ្ហាបរិស្ថានសង្គម ព្រមទាំងការគោរពច្បាប់ផ្សេងៗទៀតផង។
សូមបញ្ជាក់ថា ឯកឧត្តម MIKAMI Masahiro កាលពី 17ឆ្នាំមុនធ្លាប់បានមកកម្ពុជាម្ដង ហើយពេលដែលកម្ពុជាធ្វើជាម្ចាស់ផ្ទះក្នុងកិច្ចប្រជុំអាស៊ានកាលពីឆ្នាំ2002 ហើយឯកឧត្តមធ្លាប់បានបម្រើការនៅស្ថានទូតជប៉ុនប្រចាំប្រទេសថៃ។ ពេលនេះឯកឧត្តម បានមកធ្វើជាឯកអគ្គរាជទូតជប៉ុន ប្រចាំនៅកម្ពុជា។
ឯកឧត្តមថ្លែងថា៖ “ពេលនេះ ទីក្រុងភ្នំពេញប្រែក្លាយជាទីក្រុងមួយដ៏មមាញឹក ដែលមានអគារខ្ពស់ស្កឹមស្កៃ និងចរាចរណ៍មមាញឹកខ្លាំង។ ; ខ្ញុំសប្បាយរីករាយ ដែលបានជួបប្រជាជនកម្ពុជាម្តងទៀត និងបានឃើញទឹកមុខញញឹមរបស់ប្រជាជនកម្ពុជាមិនប្រែប្រួល ខ្ញុំក៏សូមអរគុណដល់ប្រទេសកម្ពុជា ចំពោះការគាំទ្រគំនិតផ្តួចផ្តើម Free and Open Indo-pacific របស់ជប៉ុន និងការគាំទ្ររបស់កម្ពុជានៅក្នុងវេទិកាអន្តរជាតិផ្សេងៗទៀតផងដែរ”៕
ហេតុផលដែលអ្នកគួររៀបការ
រៀបការ ជាការធ្វើឱ្យការរស់នៅជាមួយគ្នារវាងមនុស្សពីរនាក់មានភាពត្រឹមត្រូវទៅតាមបែបបទប្រពៃណី ឯការចុះសំបុត្រអាពាហ៍ពិពាហ៍គឺជាការធ្វើឱ្យការរស់នៅជាមួយគ្នារវាងមនុស្សពីរនាក់មានភាពត្រឹមត្រូវទៅតាមច្បាប់ ដូច្នេះមានន័យថា ទាំងពីរចំណុចនេះសុទ្ធតែជារឿងសំខាន់ដែលអ្នកត្រូវតែធ្វើស្របគ្នា។ ជាការពិតការរស់នៅជាមួយគ្នាក្នុងនាមជាប្តីប្រពន្ធគឺពិតជាសំខាន់ខ្លាំងណាស់។ វាជាការប្រកាសឱ្យមនុស្សគ្រប់គ្នាបានដឹងថា ពេលនេះអ្នកជាមនុស្សម្នាក់ដែលមានម្ចាស់រួចហើយ ហើយម្យ៉ាងទៀតក៏ជាការបង្ហាញពីក្តីស្រឡាញ់រវាងគ្នានឹងគ្នាផងដែរ។ ក្រៅពីបានបញ្ជាក់ពីទឹកចិត្តស្រឡាញ់ ការឱ្យតម្លៃ និងការប្រកាសឱ្យមនុស្សគ្រប់គ្នាបានដឹងពីភាពជាប្តីប្រពន្ធរបស់អ្នកហើយនោះ ការរៀបអាពាហ៍ពិពាហ៍ក៏បានផ្តល់ឱ្យអ្នកនូវគុណសម្បត្តិផ្សេងៗមួយចំនួនដូចជា៖
1. មានទំនុកចិត្តថានឹងមិនមានការបោះបង់ដោយងាយៗ : បើសម្រេចចិត្តថារៀបការនឹងគ្នាហើយ ប្រាកដជាមិនងាយបោះបង់គ្នាចោលដោយងាយៗទេ ដូច្នេះឱកាសនៃការលែងលះក៏មិនងាយនឹងកើតឡើងដែរ។
2. រស់នៅជាមួយគ្នាដោយមានកិត្តិយស : ជាការពិតណាស់អ្នកបានរៀបការត្រឹមត្រូវទាំងតាមផ្លូវច្បាប់ និងតាមប្រពៃណី ហេតុនេះ គ្មានអ្នកណាហ៊ានមកនិយាយអ្វីដែលនាំឱ្យប៉ះពាល់ដល់កិត្តិយសរបស់អ្នកនោះទេ។
3. លប់បំបាត់អតីតកាល : ការរៀបការមិនមែនធ្វើឡើងដើម្បីបំបាត់ការឈឺចាប់ពីអតីតកាលនោះទេ ប៉ុន្តែការរៀបការរស់នៅជាមួយមនុស្សថ្មីដែលអ្នកស្រឡាញ់ ក្តីស្រឡាញ់នេះនឹងអាចលប់ចោលនូវរឿងពីអតីតកាលដែលធ្លាប់ធ្វើឱ្យអ្នកឈឺចាប់បានដោយឯកឯង។
4. លែងមានអារម្មណ៍ឯកោទៀតហើយ : កាលពីមិនទាន់រៀបការ អ្នកពិតជាមានអារម្មណ៍ថា ឯកោជាមួយនឹងការរស់នៅក្នុងភាពជាអ្នកនៅលីវអស់រយៈពេលជាយូរមកហើយ ប៉ុន្តែបន្ទាប់ពីបានរៀបការរួច ធានាថា អារម្មណ៍បែបនេះនឹងលែងកើតមានតទៅទៀតហើយ គឺមានតែភាពរីករាយជាមួយនឹងការរស់នៅជាមួយមនុស្សដែលអ្នកស្រឡាញ់ជារៀងរាល់ថ្ងៃ។
5. សុខភាពរាងកាយរឹងមាំល្អ : រស់នៅជាមួយគ្នាប្រកបដោយសេចក្តីសុខ ;មានអារម្មណ៍ល្អ ធ្វើឱ្យសុខភាពល្អទៅតាមនោះដែរ ហើយរឿងមួយទៀតដែលអ្នកអាចដឹងនោះគឺ អត្ថប្រយោជន៍ផ្សេងៗដែលបានមកពីការរួមភេទ ដូចជា ធ្វើឱ្យក្មេងជាងវ័យ គេចផុតពីជំងឺមួយចំនួន រួមទាំងកម្ចាត់អារម្មណ៍តានតឹងជាដើម៕
អ្នកផ្ញើលុយតាមវីង៦នាក់ហើយដែលឈ្នះម៉ូតូស៊េរីថ្មី
មកដល់ពេលនេះ ធនាគារឯកទេសវីង (ខេមបូឌា) លីមីតធីត បានផ្តល់រង្វាន់ម៉ូតូស៊េរីថ្មីចំនួន៦គ្រឿងហើយសម្រាប់អតិថិជនដែលបានប្រើប្រាស់សេវាផ្ញើប្រាក់ពីកូរ៉េខាងត្បូង និងថៃ មកកាន់ប្រទេសកម្ពុជា។ ការចាប់រង្វាន់លើកចុងក្រោយត្រូវបានធ្វើឡើងនៅថ្ងៃទី ០៤ តុលា ឆ្នាំ២០១៩ កន្លងទៅនេះ។
លោកស្រី ហេង អ៊ឿន ដែលមានទីលំនៅក្នុងខេត្តបាត់ដំបង បានមកទទួលយករង្វាន់ម៉ូតូ១គ្រឿង ជំនួសក្មួយស្រីរបស់គាត់ដែលបានទៅធ្វើការនៅក្រៅប្រទេស។ ក្មួយស្រីរបស់គាត់ បានផ្ញើប្រាក់ពីប្រទេសថៃមកក្រុមគ្រួសារនៅកម្ពុជាតាមរយៈដៃគូសហការរបស់វីង និង ធ្វើការដកប្រាក់តាមភ្នាក់ងារ វីង ជាញឹកញាប់។
កម្មវិធីប្រូម៉ូសិនភ្ជុំបិណ្ឌឈ្នះម៉ូតូស៊េរីថ្មីនេះគឺជាកម្មវិធីប្រូម៉ូសិន របស់ធនាគារឯកទេស វីង ដែលធ្វើឡើងដើម្បីសម្តែងសេចក្តីថ្លែងអំណរគុណដល់អតិថិជនរបស់ខ្លួន ចំពោះការគាំទ្រលើផលិតផល និង សេវាកម្មរបស់ វីង ជាពិសេសសម្រាប់អតិថិជននៅប្រទេសកូរ៉េខាងត្បូង និងថៃដែលបានផ្ញើប្រាក់មកកម្ពុជាតាមរយៈដៃគូសហការវីងដូចជា៖ GME, Gmoney Trans, KB Kookmin, Hanpass, SBI Cosmoney, Shinhan Bank និង PPCB នៅប្រទេសកូរ៉េខាងត្បូង និង DeeMoney និង 2C2P នៅប្រទេសថៃ។
លោក ហោ ប៊ុនថែ អគ្គនាយករងរបស់ វីង បានមានប្រសាសន៍ថា៖ “ប្រជាជនកម្ពុជាដែលកំពុងធ្វើការនៅក្នុងប្រទេសកូរ៉េខាងត្បូង និងថៃ អាចធ្វើការផ្ទេរប្រាក់កាន់តែងាយស្រួលជាងមុនមកកាន់សាច់ញាតិនៅក្នុងប្រទេសកម្ពុជា តាមរយៈដៃគូសហការរស់ វីង”។
សម្រាប់នៅក្នុងប្រទេសកម្ពុជាវិញ អតិថិជនអាចដកប្រាក់នៅតាមភ្នាក់ងាររបស់វីងដែលមានជាង ៧០០០ នៅទូទាំងប្រទេស ដែលនៅជិតបំផុត៕
សហគ្រាសធុនតូច និងមធ្យម ស្វែងរកការគាំទ្រដើម្បីជំរុញការប្រកួតប្រជែងទីផ្សារ
សហព័ន្ធសមាគមសហគ្រាសធុនតូច និងមធ្យមកម្ពុជា (The Federation of Association of Small and Medium Enterprises of Cambodia ឬ Fasmec) កំពុងអំពាវនាវសុំការគាំទ្រពីរដ្ឋាភិបាលដើម្បីផ្តល់ការលើកទឹកចិត្តលើពន្ធ ដើម្បីកាត់បន្ថយថ្លៃដើមផលិតកម្ម និងបង្កើនការប្រកួតប្រជែងទីផ្សាររបស់សហគ្រាសធុនតូច និងមធ្យម (SME)។ នេះបើតាមការថ្លែងរបស់ប្រធាន FASMAC នៅក្នុងសិក្ខាសាលានៅទីស្នាក់ការគយ និងរដ្ឋាករ។
លោកឧកញ៉ា តែ តាំងប៉រ ប្រធានសហព័ន្ធសមាគមសហគ្រាសធុនតូច និងមធ្យមកម្ពុជា (Fasmec)បានថ្លែងថា សមាគមនៅតែបន្តគាំទ្រសហគ្រាសធុនតូច និងមធ្យមដែលប្រើប្រាស់វត្ថុធាតុដើមកសិកម្មក្នុងស្រុក រួមទាំងបង្កើនសមត្ថភាពរបស់ពួកគេ។
លោកបានកត់សម្គាល់ថា កិច្ចខិតខំប្រឹងប្រែងនេះមានគោលបំណងធ្វើឱ្យប្រសើរឡើងនូវការប្រកួតប្រជែងនៃផលិតផលក្នុងស្រុក ជាពិសេសនៅពេលប្រៀបធៀបនឹងផលិតផលនាំចូល។ ដោយសមាគមគ្រោងនឹងជួបពិភាក្សាជាមួយក្រសួង និងស្ថាប័នពាក់ព័ន្ធ អំពីបញ្ហាដែលសហគ្រាសធុនតូច និងមធ្យមកំពុងប្រឈម និងស្នើសុំជំនួយ ដើម្បីកែលម្អអាជីវកម្មដែលធ្វើការជាមួយវត្ថុធាតុដើមកសិកម្ម។
លោកឧកញ៉ាបានមានប្រសាសន៍ថា៖“យើងចង់ជំរុញអាជីវកម្មដែលប្រើប្រាស់វត្ថុធាតុដើមកសិកម្ម ដើម្បីផលិតផលិតផលអាហារ ដូច្នេះយើងធ្វើការជិតស្និទ្ធជាមួយក្រសួងពាក់ព័ន្ធដើម្បីរកវិធីកាត់បន្ថយថ្លៃដើមផលិតកម្ម ពេលវេលា និងការចំណាយដើម្បីជំរុញផលិតផលក្នុងស្រុក”។
លោកបានបន្ថែមថា៖“បច្ចុប្បន្នផលិតផលក្នុងស្រុក ពាក់ព័ន្ធនឹងថ្លៃដើមផលិតកម្មខ្ពស់បើប្រៀបធៀបនឹងផលិតផលសម្រេចនាំចូល ដូច្នេះយើងព្យាយាមកាត់បន្ថយថ្លៃដើមផលិតកម្មដើម្បីធ្វើឱ្យផលិតផលរបស់យើងកាន់តែមានភាពងាយស្រួលក្នុងការប្រកួតប្រជែង”។
លោកបានមានប្រសាសន៍ទៀតថា ធនាគារ SME នឹងអនុញ្ញាតឱ្យសហគ្រាសធុនតូច និងមធ្យមក្នុងស្រុកបន្ថែមទៀតដើម្បីពង្រីកប្រតិបត្តិការរបស់ខ្លួន។ ធនាគារសម្រាប់សគ្រាសធុនតូច និងមធ្យម ជាគំនិតផ្តួចផ្តើមរបស់រដ្ឋាភិបាលក្នុងការលើកកម្ពស់ការទទួលបានមូលនិធិសម្រាប់អាជីវកម្មខ្នាតតូច និងមធ្យមក្នុងស្រុកដែលនឹងអាចរកបាននៅចុងឆ្នាំនេះ។
ក្រៅពីគយ និងរដ្ឋាករ បញ្ហាផ្សេងទៀតដែលសហគ្រាសធុនតូច និងមធ្យមកំពុងប្រឈមនោះ រួមមានថ្លៃអគ្គិសនី និងកម្លាំងពលកម្មនឹងត្រូវលើកឡើងក្នុងកិច្ចប្រជុំក្រុមការងាររដ្ឋាភិបាល – ឯកជនស្តីពីសហគ្រាសធុនតូច និងមធ្យមដែលគ្រោងធ្វើឡើងនៅខែក្រោយ។
យោងតាម FASMAC ប្រទេសកម្ពុជាមានសហគ្រាសធុនតូច និងមធ្យមចំនួនជាង 500,000 សហគ្រាស ក្នុងនោះមានសហគ្រាសធុនតូច និងមធ្យមចំនួន 150,000សហគ្រាសកំពុងកែច្នៃវត្ថុ ធាតុដើមកសិកម្មទៅជាផលិតផលម្ហូបអាហារ។ សមាគមបានឱ្យដឹងថា តាមការប៉ាន់ស្មាន មាន 10% នៃសហគ្រាសធុនតូច និងមធ្យមចំនួន 150,000កន្លែងនោះបាននាំចេញផលិតផលរបស់ខ្លួនទៅទីផ្សារបរទេស។
ថ្លែងនៅក្នុងសិក្ខាសាលាដែលបានធ្វើឡើង ឯកឧត្តម គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករនៃក្រសួងសេដ្ឋកិច្ច និងហិរញ្ញវត្ថុ បានលើកទឹកចិត្តដល់ម្ចាស់សហគ្រាសធុនតូច និងមធ្យមដើម្បីពិភាក្សាអំពីការលើកទឹកចិត្តលើពន្ធគយ និងសម្រាប់សហគ្រាសធុនតូច និងមធ្យម។ឯកឧត្តមបានមានប្រសាសន៍ថា៖“សហគ្រាសធុនតូច និងមធ្យមគឺជាឆ្អឹងខ្នងស្នូលនៃសេដ្ឋកិច្ចរបស់ប្រទេស ហើយកំពុងជំរុញកំណើនសេដ្ឋកិច្ច និងបង្កើតការងារ”។
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា មានប្រសាសន៍ប្រាប់ឡារ៉ែនថា៖“ការលើកទឹកចិត្តដល់ម្ចាស់សហគ្រាសធុនតូច និងមធ្យម ជាប្រការសំខាន់ណាស់ក្នុងការជំរុញ និងលើកស្ទួយវិស័យSME។ រដ្ឋាភិបាលគួរផ្តល់ការលើកទឹកចិត្តលើពន្ធ ដើម្បីកាត់បន្ថយថ្លៃដើមផលិតកម្ម និងបង្កើនការប្រកួតប្រជែងទីផ្សាររបស់ពួកគេ។ ជាការឆ្លុះបញ្ចាំងលើការងារនេះ តំបន់SMEពិសេស គួរតែត្រូវបានបង្កើតឡើង ដូចតំបន់សេដ្ឋកិច្ចពិសេសដែរ”។
លោកឧកញ៉ាបានបញ្ជាក់ថា៖“បញ្ហាដែលសហគ្រាសធុនតូច និងមធ្យមកំពុងប្រឈម រួមមានថ្លៃអគ្គិសនី និងកម្លាំងពលកម្ម នឹងត្រូវលើកឡើងនៅក្នុងកិច្ចប្រជុំក្រុមការងាររដ្ឋាភិបាល – ឯកជនស្តីពីសហគ្រាសធុនតូចនិងមធ្យមដែលគ្រោងធ្វើនាពេលខាងមុខ យើងសង្ឃឹមថានឹងទទួលបានការសម្របសម្រួលនូវការដោះស្រាយបញ្ហាសំខាន់ៗពាក់ព័ន្ធនឹងថ្លៃដើមផលិតកម្មខ្ពស់ ជាដើម”។
លោកឧកញ៉ា លឹម ហេងក៏បានបញ្ជាក់បន្ថែមទៀតផងដែរថា៖“ប្រសិនបើមានការគាំពារពីរដ្ឋច្រើន សភាពាណិជ្ជកម្មក៏នឹងជំរុញបញ្ហានេះឱ្យដំណើរការ ព្រោះវាដូចជាការធ្វើទំនើបកម្មដែរ ដោយយើងយកបច្ចេកវិទ្យាមកផលិត ដើម្បីឱ្យថ្លៃដើមទាប ព្រោះការប្រើមនុស្ស បច្ចុប្បន្នប្រាក់ខែគោលឡើងដល់ 190$ហើយ ដូច្នេះថ្លៃដើមការផលិតក៏ឡើងតាមហ្នឹងដែរ តែនៅថ្ងៃអនាគតសហព័ន្ធមួយសម្រាប់ SME ក៏នឹងត្រូវបង្កើតឡើងដើម្បីការរីកចម្រើនរបស់វិស័យនេះដែរ”។
ក្នុងសិក្ខាសាលា ស្តីពីការលើកកម្ពស់ការអភិវឌ្ឍសហគ្រាសធុនតូច និងមធ្យម កាលពីខែសីហាកន្លងទៅ ឯកឧត្តម ហេង សុខគង់ រដ្ឋលេខាធិការក្រសួងឧស្សាហកម្ម និងសិប្បកម្ម បានបញ្ជាក់ដែរថា៖“តាមវេទិការាជរដ្ឋាភិបាល វិស័យសហគ្រាសធុនតូចនិងមធ្យម ជាវិស័យអាទិភាព និងជាឆ្អឹងខ្នងនៃសេដ្ឋកិច្ចជាតិ ដែលមានតួនាទីយ៉ាងសំខាន់ ដើម្បីជួយវិស័យនេះ អាចធ្វើទំនើបកម្ម នឹងដើរឱ្យទាន់ចង្វាក់ផលិតកម្មពិភពលោក ព្រោះវិស័យ SME គឺជាផ្នែកមួយជួយដល់ផលិតផលសរុប ក្នុងស្រុកមានកំណើនល្អ ជាពិសេសជួយបង្កើនដល់កំណើនសេដ្ឋកិច្ចជាតិប្រមាណជាង32.8% នៅឆ្នាំ2018 ពោលគឺលឿនជាងផែនការរហូតដល់ទៅ 5ឆ្នាំ។
ដូច្នេះរាជរដ្ឋាភិបាលបានរៀបចំវិធាន និងនីតិវិធីលម្អិតដើម្បីអនុវត្ត តាមដានវឌ្ឍនភាព និងវាយតម្លៃប្រសិទ្ធភាព នៃការអនុវត្ត និងរៀបចំស្នើនូវវិធានការបន្ថែមក្នុងករណីចាំបាច់ ដើម្បីដោះស្រាយនូវបញ្ហាប្រឈមក្នុងវិស័យនេះ”។
ឯកឧត្តម ហេង សុខគង់ បញ្ជាក់ថា៖“ ដើម្បីឆ្លើយតបទៅនឹងតម្រូវការនៃការប្រើប្រាស់បច្ចេកវិទ្យាទំនើប ក៏ដូចជាវិស័យឌីជីថល ស្របទៅនឹងការរីកចម្រើនរបស់បដិវត្តន៍ឧស្សាហកម្មជំនាន់ទី4 កម្ពុជាក៏គ្រោងប្រើប្រាស់ផ្កាយរណបដោយខ្លួនឯងនៅក្នុងអំឡុងឆ្នាំ2022 ហើយក៏គ្រោងនឹងប្រើប្រាស់ឌីជីថល ខេមបូឌា នៅក្នុងអំឡុងឆ្នាំ2023 ខាងមុខនេះផងដែរ”៕
ឆ្ពោះទៅរកទីក្រុងដ៏ត្រជាក់ដូចទឹកកក ជាមួយនឹងស្រាបៀរថៃហ្គ័រ គ្រីស្តាល់
ថ្ងៃទី០៧ ខែតុលា ឆ្នាំ២០១៩ រាជធានីភ្នំពេញ៖ បន្ទាប់ពីស្រាបៀរថៃហ្គ័រគ្រីស្ដាល់ បានត្រលប់មកវិញនៅក្នុងខែសីហា ឆ្នាំនេះ ដោយក្រុមហ៊ុនថៃហ្គ័រ នឹងផ្ដល់ជូននូវស្រាបៀរពេញនិយមប្រភេទថ្មី ដោយផ្ដល់ជូននូវភាពត្រជាក់ដូចទឹកកកនៅពាសពេញទីក្រុងទាំងមូល។ ស្រាបៀរដែលផ្សំឡើងពីវត្ថុធាតុដើមយ៉ាងពិសេសនេះត្រូវបានផលិត និងចំរោះនៅក្នុងសីតុណ្ហភាពត្រជាក់ខ្លាំងកម្រិត -១ អង្សារ នៅក្នុងរោងចក្រផលិតស្រាបៀរដែលបំពាក់ទៅដោយបច្ចេកវិទ្យាទំនើប។ លទ្ធផលនៃការរៀបចំផលិតប្រកបដោយការយកចិត្តទុកដាក់ខ្ពស់ ស្របតាមក្បួនខ្នាត និងបច្ចេកវិទ្យាទំនើប នេះ គឺទទួលបាននូវផលិតផលមួយដែលយុវជនជំនាន់ថ្មី និងអ្នកនិយមពិសារស្រាបៀរសម័យទំនើបចូលចិត្តជាទីបំផុត ហើយផលិតផលនេះទទួលបានការពេញនិយមយ៉ាងខ្លាំងនៅក្នុងទីផ្សារទូទាំងប្រទេស។
សំរាប់អ្នកដំបូង ស្រាបៀរថៃហ្គ័រគ្រីស្តាល់ថ្មីនេះផ្ដល់ជូននូវគុណភាពដ៏ល្អប្រណីត សម្រាប់អតិថិជនដែលមិនទាន់បានដឹងអំពីប្រវត្តិស្រាបៀរនេះ ក៏សូមជម្រាបជូនថា ស្រាបៀរថៃហ្គ័រ មានដើមកំណើតពីរោងចក្រផលិតស្រាបៀរនៅតាមដងផ្លូវមួយនៅក្នុងដែនដីនៃទីក្រុងសិង្ហបុរី។ ចាប់តាំងពីពេលបង្កើតឡើងនៅក្នុងឆ្នាំ ១៩៣២ មក ស្រាបៀរថៃហ្គ័រ បានចាប់ផ្ដើមមានឈ្មោះបោះសម្លេងដ៏ល្បីល្បាញយ៉ាងខ្លាំងនៅជាង ៥០ ប្រទេសនៅក្នុងពិភពលោក ព្រមទាំងឈ្នះពានរង្វាន់អន្តរជាតិជាង ៤០ ពានរង្វាន់ថែមទៀតផង។
ស្រាបៀរថៃហ្គ័រគ្រីស្ដាល់ ត្រូវបានផលិតតាមវិធីសាស្រ្តគួរជាទីមោទនៈ និងល្អបំផុត។ ស្រាបៀរនេះ
ផលិតឡើងដោយការលាយផ្សំគ្នាទាំងពេលវេលា និងបច្ចេកវិទ្យាថ្មីៗ ដែលអាចធានាបានថា
ស្រាបៀរនេះអាចមានលទ្ធភាពចូលរួមប្រកួតប្រជែងជាមួយនឹងផលិតផលស្រាបៀរដទៃទៀតនៅក្នុងកម្រិតពិភពលោក នៅគ្រប់ពេលវេលា ឬគ្រប់ទីកន្លែងទាំងអស់។ ស្រាបៀរថៃហ្គ័រគ្រីស្ដាល់ បានកសាង ចំណងសម្ព័ន្ធភាពពិសេសជាមួយនឹងអ្នកនិយមពិសារស្រាបៀរនៅក្នុងស្រុក ដើម្បីចូលរួមនៅក្នុងកម្មវិធីជប់លៀង ឬកម្មវិធីផ្សេងទៀតៗ។ស្រាបៀរថៃហ្គ័រគ្រីស្ដាល់ បាននាំអ្នកចូលរួមកម្មវិធីជប់លៀងទាំងអស់ទៅកាន់ពិភពត្រជាក់ព្រិលទឹកកកមួយកន្លែងនៅក្នុងក្លឹបកម្សាន្តសោន Sound នៅក្នុងកម្មវិធីមួយដែលមានចំណងជើងថា “Own The Place” កាលពីថ្ងៃសុក្រ ទី០៤ ខែតុលា ឆ្នាំ២០១៩ កន្លងទៅ សម្រាប់ជាកម្មវិធីបង្ហាញផលិតផលថ្មីនៅទីនោះ ពោលគឺនៅក្នុងក្លឹបកម្សាន្តដែលពេញនិយមជាងគេសម្រាប់អតិថិជននៅក្នុងរាជធានីភ្នំពេញ និងត្រូវបានចូលរួមដោយពិធីករ វី យ៉ារ៉ូ ធ្វើឱ្យទស្សនិកជនរំភើបជាមួយនឹងការសម្តែងវីយូឡុងដ៏ ពិសេសពី Grace Tan ពេញមួយយប់។
សកម្មភាពចូលរួមនៅក្នុងពិភពត្រជាក់ព្រិលទឹកកកនេះ ចាប់ផ្ដើមឡើងដោយមានការសម្ដែង
ក្រឡុកស្រា ដែលអ្នកក្រឡុកស្រាត្រូវបង្ហាញអំពីជំនាញរបស់ខ្លួនក្នុងយប់នោះ ហើយអ្នកលាយស្រា អញ្ជើញអ្នកចូលរួមទាំងអស់មកលាយស្រា ខកថេល ទៅតាមចំណង់ចំណូលចិត្តរបស់ខ្លួន។បន្ទាប់ពីការសម្ដែងរបស់បុគ្គលិកផ្នែកក្រឡុកស្រារួច គឺកម្មវិធីបង្ហាញរបស់ស្រាបៀរថៃហ្គ័រគ្រីស្ដាល់ដែលភ្ញៀវកិត្តិយសទាំងអស់ត្រូវបំបែកទឹកកកត្រជាក់ខ្លាំងកម្រិត -១ អង្សារ ទៅយកស្រាបៀរថៃហ្គ័រគ្រីស្ដាល់ដប/កំប៉ុងដែលក្លាស្សេនៅក្នុងធុង។ បន្ទាប់មកកម្មវិធីក្បួនដង្ហែរ ស្រាខកថេល ដែលបុគ្គលិកដែលពាក់អាវរងាពណ៌សបានរៀបចំ និងចែកជូនភ្ញៀវកិត្តិយសនូវកាតស្រាខកថេលក្នុងទឹកកកស្ងួត។ អ្នកពិសាម្នាក់បាននិយាយនៅក្នុងកម្មវិធីនោះថា “ពេលនេះ យើងបានស្គាល់រសជាតិស្រាបៀរថៃហ្គ័រគ្រីស្ដាល់ដ៏ត្រជាក់ដូចទឹកកកនេះហើយ”។
នៅក្នុងក្លឹបកម្សាន្តសោន ស្រាបៀរថៃហ្គ័រគ្រីស្ដាល់ចាប់ផ្ដើមបង្ហាញនូវគុណភាពដ៏ល្អប្រណីតរបស់ខ្លួន និងចាប់ផ្ដើមបង្ហាញវត្តមានរបស់ខ្លួនសារជាថ្មីដើម្បីប្រកួតប្រជែងជាមួយម៉ាកស្រាបៀរល្បីៗនៅក្នុងទីផ្សារ។ កម្មវិធីណែនាំនូវផលិតផលនេះ មានការអញ្ជើញចូលរួមពីសំណាក់អ្នកនិយមពិសារស្រាបៀរ និងយុវវ័យជាច្រើនរូបដែលមកពីតំបន់ផ្សេងៗនៃទីក្រុង ដែលនឹងនាំយកផលិតផលដ៏ត្រជាក់ដូចព្រិលទឹកកកនេះទៅពិសារនៅគ្រប់ទីកន្លែងក្នុងទីក្រុង ហើយផលិតផលនេះ នឹងមិនធ្វើឱ្យលោកអ្នកខុសបំណងឡើយ។
កំណត់ប្រតិទិនចំនាំថ្ងៃពិសេសនេះ! យប់នេះមិនបញ្ចប់ទៅឆាប់នោះទេ! នៅតែនាំមកនូវអ្វីដែលថ្មី កាន់តែត្រជាក់ដើម្បីបំពេញភាពស្រស់ស្រាយរបស់អ្នក នៅភោជនីយដ្ឋាន The Storm ពីថ្ងៃទី ១០ – ១២ ខែតុលា ឆ្នាំ ២០១៩ ម៉ោង ៧ ដល់ ១២យប់។ ភោជនីយដ្ឋាន The Storm នឹងក្លាយទៅជាតំបន់ទឹកកកដ៏ត្រជាក់ជាមួយនឹងការសម្តែងភ្លែកៗពី អ្នក Beat Box, ប្រុសឡា, ក្មេងខ្មែរ, អ្នកក្រឡុកស្រា និងក្រុមជំនាញជាច្រើនដែលកំពុងរង់ចាំអ្នក។
មកចូលរួមទាំងអស់គ្នា ហើយកុំភ្លេចនាំមិត្តភក្តិនិងមនុស្សជាទីស្រលាញ់របស់អ្នកមកចូលរួមលេងកំសាន្តសកម្មភាពសប្បាយ និងទទួលបានភាពស្រស់ស្រាយដែលមិននឹកស្មានដល់នៅពេលយប់ដែលមិនធ្លាប់មាននៅក្នុងតំបន់ត្រជាក់ជាមួយTiger Crystalទាំងអស់គ្នា។
ហេតុអីត្រូវទៅពិនិត្យគភ៌? បើមិនទៅពិនិត្យគភ៌ តើមានគ្រោះថ្នាក់ដល់កូនក្នុងផ្ទៃយ៉ាងណា?
អនាគតអ្នកម្ដាយថ្មីថ្មោងតែងមានការនឹកសង្ស័យថា ពេលមានផ្ទៃពោះ តើចាំបាច់ប៉ុនណាត្រូវទៅពិនិត្យផ្ទៃពោះ និងបើមិនទៅពិនិត្យផ្ទៃពោះបានឬទេ? ទិញថ្នាំបំប៉នមកញ៉ាំដោយខ្លួនឯងបានទេ? ព្រោះពេលខ្លះមិនងាយស្រួលក្នុងការធ្វើដំណើរទៅពិនិត្យផ្ទៃពោះតាមការណាត់របស់គ្រូពេទ្យ និងស្ត្រីមានគភ៌ខ្លះអាងហេតុផលថា ពិបាកក្នុងការសុំច្បាប់ឈប់ពីការងារជាដើម។ល។ តែស្ត្រីមានគភ៌ទាំងឡាយដឹងទេថា បើមិនបានទៅពិនិត្យគភ៌ នឹងមានគ្រោះថ្នាក់ដល់ខ្លួនឯង និងកូនក្នុងផ្ទៃខ្លាំងណាស់… សេចក្ដីលម្អិតមានដូចខាងក្រោមនេះ៖
4ហេតុផលល្អៗថា ហេតុអីត្រូវទៅពិនិត្យគភ៌?
1. ពេលអនាគតអ្នកម្ដាយទៅពិនិត្យគភ៌អ្នកម្ដាយនឹងបានដឹងពីព័ត៌មាន និងការណែនាំក្នុងការប្រតិបត្តិខ្លួនក្នុងអំឡុងពេលមានគភ៌ រហូតដល់រយៈពេលក្រោយការប្រសូត ដោយសារតែក្នុងអំឡុងពេលតាំងគភ៌ សរីរៈ និងរាងកាយរបស់ស្ត្រីមានគភ៌មានការប្រែប្រួលច្រើន។ ស្ត្រីមានគភ៌លើកដំបូងមួយចំនួនអាចនឹងមិនយល់ និងកើតក្ដីកង្វល់ជាមួយនឹងការប្រែប្រួលទាំងនោះ ដូច្នេះគ្រូពេទ្យអ្នកពិនិត្យគភ៌នឹងផ្ដល់ការណែនាំក្នុងរឿងផ្សេងៗទាំងនោះបានយ៉ាងល្អ។
2. នៅក្នុងការពិនិត្យគភ៌ ស្ត្រីមានផ្ទៃពោះនឹងបានទទួលការវាយតម្លៃយ៉ាងលម្អិតអំពីឱកាសកើតសភាវជ្រៀតជ្រែកពីជំងឺផ្សេងក្នុងខណៈតាំងគភ៌ ហើយក្នុងករណីដែលស្ត្រីមានគភ៌មានភាពប្រថុយប្រថានខ្ពស់ក្នុងការកើតមានសភាវជ្រៀតជ្រែកនេះ គ្រូពេទ្យអ្នកពិនិត្យគភ៌នឹងអធិប្បាយ និងណែនាំវិធីក្នុងការការពារសភាវផ្សេងៗទាំងនោះទៀតផង។
3. សម្រាប់ស្ត្រីដែលមានរោគ ឬសភាវជ្រៀតជ្រែកពីជំងឺផ្សេងៗកើតឡើងក្នុងខណៈមានផ្ទៃពោះ ការពិនិត្យគភ៌គឺជារឿងសំខាន់ និងចាំបាច់បំផុត។ តើស្ត្រីទាំងឡាយជ្រាបដែរឬទេថា មានជំងឺមួយចំនួនដែលភាពធ្ងន់ធ្ងររបស់វានឹងកើនខ្លាំងឡើងក្នុងខណៈដែលអ្នកមានផ្ទៃពោះ ដែលវានឹងហុចផលប៉ះពាល់ដល់សុខភាពរបស់ម្ដាយ និងកូនតូចក្នុងផ្ទៃ ដូច្នេះក្នុងការពិនិត្យគភ៌ គ្រូពេទ្យនឹងមើលថែទាំ និងផ្ដល់ការរក្សាព្យាបាលផ្សេងៗដែលកើតឡើងពេញមួយរយៈពេលនៃការមានផ្ទៃពោះរបស់អ្នក។
4. ហេតុផលចុងក្រោយដែលស្ត្រីមានផ្ទៃពោះគួរតែទៅពិនិត្យគភ៌នោះគឺ ដើម្បីឱ្យទាំងម្ដាយ(ខ្លួនឯង) និងកូនតូចក្នុងផ្ទៃមានសុខភាពរឹងមាំឥតខ្ចោះ ប្រាសចាករោគភ័យ និងសភាវជ្រៀតជ្រែកអ្វីៗទាំងអស់ហ្នឹងឯង។
អនាគតស្ត្រីជាម្ដាយមួយចំនួនអាចនឹងមានអារម្មណ៍កង្វល់អំពីរឿងការពិនិត្យផ្ទៃពោះនេះ មិនដឹងថានឹងទៅពិនិត្យនៅទីណា? ទៅហើយ ត្រូវធ្វើអ្វីខ្លះ? គ្រូពេទ្យ និងអ្នកជំនួយការគ្រូពេទ្យនឹងស្ដីបន្ទោសឬអត់? ត្រូវជោះឈាមយកទៅពិនិត្យច្រើនដងអត់?-ល- ដូច្នេះពេលនេះ ឡារ៉ែនសូមប្រាប់ទៅចុះថា កុំទៅព្រួយកង្វល់ធ្វើអី ចូរទៅពិនិត្យផ្ទៃពោះឱ្យបានទៀងទាត់តាមការណាត់របស់គ្រូពេទ្យ ដើម្បីកូនជាទីស្រឡាញ់របស់អ្នក…៕
ការតាំងចិត្ត និងការគ្រប់គ្រងខ្លួនឯងបានល្អ ជាបច្ច័យដែលធ្វើឱ្យសិស្សភាគច្រើនបាននិទ្ទេស A
ទទួលបាននិទ្ទេស A គឺជាមោទកភាពដ៏ធំមួយសម្រាប់សិស្សានុសិស្សដែលបានខិតខំសិក្សាអស់រយៈពេលជាច្រើនឆ្នាំនៅកម្រិតមធ្យមសិក្សា។ ហើយវាជាចំណុចដ៏សំខាន់ដែលបង្ហាញពីចំណុចចាប់ផ្តើមដ៏វិជ្ជមានសម្រាប់ការអភិវឌ្ឍសមត្ថភាពជាមួយនឹងឱកាសយ៉ាងច្រើនសម្រាប់អនាគត។
ដើម្បីទទួលបាននិទ្ទេស A សិស្សឆ្នើមជាច្រើនបានបង្ហាញវិធីសាស្ត្រប្លែកៗពីគ្នាទៅតាមស្ថានភាពជាក់ស្តែងនៃការរស់នៅ ទេពកោសល្យផ្ទាល់ខ្លួន និងបរិស្ថាននៃការអប់រំ។ នៅក្នុងចំណោមវិធីសាស្ត្រល្អៗជាច្រើនដែលសិស្សនិទ្ទេសA បានលើកឡើង មានចំណុចរួមមួយដែលពួកគេសុទ្ធតែមាននៅក្នុងខ្លួន គឺការតាំងចិត្ត និងការគ្រប់គ្រងខ្លួនឯងបាន។
យុវសិស្ស ហុង រស្មីមរកត សិស្សឆ្នើមនិទ្ទេស A ឆ្នាំសិក្សា 2018-2019 មកពីសាលារៀនវេស្ទឡាញន៍ បានលើកឡើងថា ប្រសិនបើចង់ទទួលបាននិទ្ទេសល្អប្រសើរក្នុងការប្រឡងមធ្យមសិក្សាទុតិយភូមិ បេក្ខជនទាំងអស់ចាំបាច់ត្រូវដឹងខ្លួនឯងឱ្យច្បាស់ថា និទ្ទេសអ្វីដែលយើងចង់ឃើញនៅក្នុងពេលប្រកាសលទ្ធផល។ គ្រាន់តែចាប់ផ្តើមឆ្នាំសិក្សាចូលថ្នាក់ទី12 ភ្លាម យើងត្រូវតាំងចិត្តឱ្យបានមុតមាំភ្លាមថា យើងត្រូវតែយកនិទ្ទេសល្អឱ្យបាន។ កន្លងមកមានសិស្សជាច្រើនមិនហ៊ានដាក់គោលដៅយកនិទ្ទេស A នោះទេ ព្រោះពួកគេយល់ឃើញថា វាជារឿងធំខ្លាំងពេកសម្រាប់ទៅឱ្យដល់ តែតាមពិតទៅ ប្រសិនបើយើងខិតខំប្រឹងប្រែងពេញ 1ឆ្នាំ យើងអាចយកបាន…។
យុវតី ហុង រស្មីមរកត បាននិយាយថា៖ “ការតាំងចិត្តជារឿងសំខាន់បំផុតដែលយើងត្រូវមាននៅក្នុងជីវិត។ ប្រសិនបើចង់បាននិទ្ទេស A វាមិនមែនជារឿងងាយស្រួលពេកនោះទេ តែវាក៏មិនលំបាកខ្លាំងរហូតដល់យកមិនបានដែរ ឱ្យតែមានការតស៊ូ និងមានវិន័យច្បាស់លាស់ នោះយើងនឹងអាចជម្នះឧបសគ្គនានាដើម្បីសម្រេចបាននូវនិទ្ទេសដែលយើងប្រាថ្នាមិនខាន”។
សិស្សឆ្នើមនិទ្ទេស A ខាងលើបានលើកឡើងផងដែរថា នៅពេលដែលយើងមានការតាំងចិត្តខ្ពស់ នោះយើងនឹងមានឆន្ទៈធំក្នុងការខិតខំប្រឹងប្រែង។
ឆន្ទៈ និងក្តីស្រមៃនេះហើយដែលជំរុញទឹកចិត្តយើងឱ្យឈ្នះការអូសទាញនៃភាពខ្ជីខ្ជា និងភាពខ្ជិលច្រអូស ដែលនេះជាបច្ច័យដ៏សំខាន់នាំឱ្យទទួលបានជោគជ័យក្នុងការសិក្សា។ យុវតី រស្មីមរកត បានបន្ថែមទៀតថា ដើម្បីរក្សាឱ្យគំនិតស្រឡះល្អ និងទទួលបានជោគជ័យដោយភាពរីករាយ សិស្សានុសិស្សគួរកុំដាក់សម្ពាធខ្លាំងពេកក្នុងការសិក្សា។ សិស្សគួរកុំផ្តោតតែលើការប្រឡងបាក់ឌុប ហើយគិតថា វាលំបាកខ្លាំង និងងប់ងុលជាមួយនឹងការបង្ខំខ្លួនឯងឱ្យខំរៀនជ្រុលហួសហេតុពេក។ អ្វីដែលយើងអាចធ្វើបាន គឺព្យយាមកាត់បន្ថយស្ត្រេស និងតាមដានអារម្មណ៍របស់ខ្លួនឯងផងដែរ។ នៅពេលយើងធ្វើលំហាត់លំបាកខ្លាំង ឬនៅពេលស្ត្រេសពេក យើងមិនគួរបង្ខំខ្លួនឯងឱ្យខំហួសពីសមត្ថភាពនោះទេ អ្វីដែលគួរធ្វើ គឺកត់លំហាត់ដែលពិបាកនោះទុកយកទៅសួរគ្រូ ឬស្រាវជ្រាវនៅពេលក្រោយ ហើយអាចបង្វែរអារម្មណ៍ទៅធ្វើអ្វីផ្សេងដែលចិត្តយើងចង់ធ្វើវិញប្រសើរជាង។ ប្រសិនបើយើងចង់មើលកុន ឬចង់ចេញទៅក្រៅ យើងអាចបណ្តោយឱ្យអារម្មណ៍រីករាយខ្លះបាន ព្រោះជោគជ័យដែលកើតចេញពីសម្ពាធខ្លាំងពេកមិនល្អប៉ុន្មាននោះទេសម្រាប់ជីវិត តែត្រូវចាំផងដែរថា យើងក៏មិនអាចបណ្តែតបណ្តោយខ្លាំងពេកបានដែរ ព្រោះបើយើងធូររលុងខ្លាំងពេក យើងអាចនឹងបរាជ័យក្នុងការសិក្សាក៏អាចថាបានដែរ។
យុវជន តៅ វិល្លៀម សិស្សពូកែនិទ្ទេស A ក្នុងឆ្នាំសិក្សាដូចគ្នានេះដែរបានលើកឡើងថា គាត់ធ្លាប់ជាសិស្សខ្ជិល ហើយញៀនជាមួយការលេងទូរស័ព្ទ និងហ្គេមម្នាក់ មុននឹងក្លាយជាសិស្សនិទ្ទេស A។ ដោយសារតែការតាំងចិត្ត និងមហិច្ឆតាដែលបានកំណត់សម្រាប់ខ្លួនឯង យុវសិស្សរូបនេះអាចអូសទាញខ្លួនឯងបន្តិចម្តងៗពីភាពញៀនលេងទូរស័ព្ទ មកសម្រេចក្តីស្រមៃបាន ព្រោះខ្លួនបានដាក់គោលដៅថា ចង់បាននិទ្ទេសA ឬ B។ ដំបូងឡើយ ការកំណត់គោលដៅយកនិទ្ទេសA នេះ បានបង្កើតជាសម្ពាធដ៏ច្រើន ព្រោះគ្រប់គ្នាគិតថា វាជារឿងធំពេក តែទោះជាយ៉ាងណាក្តី សិស្សឆ្នើមរូបនេះនៅតែគិតថា គាត់អាចទៅរួច!។
សិស្សឆ្នើម តៅ វិល្លៀម និយាយថា៖ “មនុស្សខ្លះគិតថា និទ្ទេស A មិនសំខាន់ពេកទេសម្រាប់ថ្នាក់សាកលវិទ្យាល័យ តែសម្រាប់ខ្ញុំ ខ្ញុំមើលឃើញថា វាមានសារៈសំខាន់ខ្លាំងណាស់ ព្រោះខ្ញុំចាត់ទុកថា វាជាសមិទ្ធផលដែលកើតចេញពីការខិតខំប្រឹងប្រែងតាំងពីតូចរបស់ខ្ញុំ ហើយការទទួលបាននិទ្ទេស A ក៏ជាមោទកភាពមួយផងដែរចំពោះខ្លួនខ្ញុំផ្ទាល់ គ្រួសារ សាលា និងសង្គម”។
សិស្សឆ្នើមខាងលើបានបន្ថែមទៀតថា ក្រោយពេលកំណត់គោលដៅច្បាស់លាស់ហើយ រូបគេបានប្រើប្រាស់ឆន្ទៈនៃគោលដៅនោះធ្វើជាវិធីដើម្បីជម្នះខ្លួនឯង។ គាត់ដឹងច្បាស់ថា ប្រសិនបើនៅតែជក់ជាមួយនឹងទូរស័ព្ទខ្លាំងទៀត ក្តីស្រមៃរបស់គេនឹងមិនអាចក្លាយជាការពិតបានឡើយ ហេតុនេះរូបគេក៏បង្កើតវិន័យលើខ្លួនឯងឡើង ដោយនឹងមិនប៉ះទូរស័ព្ទឡើយ រហូតទាល់តែធ្វើលំហាត់ ឬមើលមេរៀនចប់គ្រប់ចំនួនតាមដែលខ្លួនគេបានកំណត់។ ម្យ៉ាងវិញទៀត នៅពេលខ្ជិលម្តងៗ យុវសិស្សខាងលើបានប្រើប្រាស់អារម្មណ៍នឹកដល់ទឹកចិត្តគ្រូដែលខំចំណាយកម្លាំងងើបមកបង្រៀនតាំងពីព្រលឹម ដើម្បីដុសខាត់សមត្ថភាពសិស្សមុនពេលប្រឡង ហេតុនេះខ្លួនគេត្រូវតែខំដើម្បីឱ្យស្មើនឹងអ្វីដែលជាតម្លៃនៃការលះបង់ និងខិតខំរបស់គ្រូរបស់ខ្លួនដែរ។ បន្ថែមពីលើនេះ យុវសិស្សខាងលើបានបន្ថែមទៀតថា បន្ទាប់ពីអភិវឌ្ឍសមត្ថភាពបានហើយ អ្វីដែលត្រូវគ្រប់គ្រងខ្លួនឯងឱ្យបាន គឺកុំក្អេងក្អាង និងមើលងាយស្ថានការណ៍ឱ្យសោះ។ ហើយអ្វីដែលគួរពិចារណាផងដែរនោះគឺ មុនប្រឡង1ថ្ងៃ ចូរកុំឱ្យមានអ្វីជ្រុះ កុំឱ្យមានអ្វីបាក់ ឬកុំឱ្យមានបែករបស់របរអ្វីឱ្យសោះ ព្រោះពេលខ្លះជំនឿក៏អាចនាំឱ្យយើងមានជំនឿចិត្ត និងសំណាងល្អបានដូចគ្នាដែរ៕
ប្រទេសហូឡង់ ចូលរួមជំរុញកម្មវិធីផលិតកម្មស្រូវសរីរាង្គ RiceTechCambodia
គម្រោងឈ្មោះថា“រ៉ៃស៍ថេកខេមបូឌា” (RiceTechCambodia) ជាគម្រោងដែលមានរយៈពេល5ឆ្នាំ ដែលផ្ដួចផ្ដើមឡើងក្នុងគោលបំណងលើកកម្ពស់ការចិញ្ចឹមជីវិតរបស់កសិករខ្នាតតូច ដោយជួយពួកគេឱ្យទទួលបានវិញ្ញាបនបត្រស្រូវសរីរាង្គបង្កើនផលិតភាព ពង្រឹងទិន្នផលស្រូវ និងធានាឱ្យបានតម្លៃស្រូវខ្ពស់លក់ក្នុងទីផ្សារអឺរ៉ុប។
លោក កាន់ គន្ធី អគ្គនាយករងក្រុមហ៊ុន AmruRice បានឱ្យដឹងថា គម្រោងនេះត្រូវបានរដ្ឋាភិបាលប្រទេសហូឡង់ផ្ដល់មូលនិធិប្រមាណ 5លានដុល្លារនិងត្រូវវិនិយោគទឹកប្រាក់មួយចំនួនទៀតពី AmruRice តាមភាពជាក់ស្ដែង។ គម្រោងនេះនឹងផ្ដោតទៅលើការបណ្ដុះបណ្ដាលពង្រឹងបច្ចេកទេសដល់កសិករនិងកសាងហេដ្ឋារចនាសម្ព័ន្ធ ឃ្លាំងស្តុកឡសម្ងួត ម៉ាស៊ីនកិនស្រូវនៅស្រុកកោះញែក ខេត្តមណ្ឌលគិរី ជាគោលដៅសម្រាប់អនុវត្តគម្រោង។ ក្រៅពីសហគមន៍កសិករ ដៃគូគម្រោងផ្សេងទៀតរួមមាន ក្រុមហ៊ុនបញ្ជាទិញ Sanorice ក្រុមហ៊ុននាំចេញអង្ករ AmruRice អង្គការ Oxfam អង្គការ Larive International អង្គការអភិវឌ្ឍន៍ និងភាពជាដៃគូក្នុងសង្គហភាព។
លោក កាន់ គន្ធី បានបញ្ជាក់ថា៖“គម្រោងនេះមានគោលដៅគ្របដណ្ដប់កសិករខ្នាតតូច ដោយក្នុងនោះ រំពឹងថាស្រូវសរីរាង្គប្រមាណ 2ម៉ឺនតោន នឹងត្រូវបានផលិតក្នុង 1ឆ្នាំចេញពីតំបន់នៃគម្រោងនេះ។
ទាក់ទិននឹងស្រូវសរីរាង្គនេះ លោកបញ្ជាក់ថា កន្លងមកក្រុមហ៊ុន AmruRice អាចប្រមូលបានស្រូវសរីរាង្គប្រមាណ 2ម៉ឺនតោនពីខេត្តព្រះវិហារ ដោយក្នុង 1ឆ្នាំក្រុមហ៊ុននាំចេញបានជិត 1ម៉ឺនតោនអង្ករ ដែលស្មើនឹងជាង80%នៃការនាំចេញអង្ករសរីរាង្គសរុបរបស់កម្ពុជា ហើយការផលិតស្រូវទាំងនេះ គឺធ្វើជាម៉ូដែលកសិកម្មតាមកិច្ចសន្យា”។
ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលចូលរួមជាអធិបតីក្នុងពិធីសម្ពោធគម្រោង រ៉ៃស៍ថេក នេះ បានថ្លែងថា នេះជាការបោះជំហានមួយកម្រិតទៀតក្នុងការជំរុញផលិតកម្មស្រូវសរីរាង្គ និងការកែច្នៃផលិតផលស្រូវសរីរាង្គ ជាផលិតផលសម្រេចសម្រាប់នាំចេញទៅទីផ្សារអន្តរជាតិ។
ឯកឧត្តម វេង សាខុន រដ្ឋមន្ត្រីក្រសួងកសិកម្មក៏បានឱ្យដឹងថា៖“គម្រោងដែលនឹងត្រូវអនុវត្តនៅស្រុកកោះញែក គោលបំណងគឺដើម្បីឈានដល់កសិករធ្វើស្រូវខ្នាតតូចចំនួន 2,400គ្រួសារ។ កសិករចំនួន 1,300នាក់នឹងទទួលបានការបណ្តុះបណ្តាលយ៉ាងទូលំទូលាយលើកសិកម្មសរីរាង្គ និងការអនុវត្តកសិកម្មល្អ ខណៈពេលដែលទទួលបានកន្លែងសម្ងួតស្តុក និងរោងម៉ាស៊ីនកិនដើម្បីបង្កើនគុណភាពផលិតផលស្រូវ។ គម្រោង RiceTechCambodia នឹងជំរុញផលិតកម្មស្រូវសរីរាង្គ និងធ្វើឱ្យព្រះរាជាណាចក្រកម្ពុជាមានកេរ្តិ៍ឈ្មោះនៅបរទេសក្នុងនាមជាអ្នកផលិតអង្ករសរីរាង្គ”។
ជាមួយគ្នានេះដែរ ឯកឧត្តម វេង សាខុន បានបញ្ជាក់អំពីស្ថានភាពនៃការប្រកួតប្រជែងក្នុងវិស័យស្រូវអង្ករយ៉ាងដូច្នេះថា៖“បច្ចុប្បន្ន ការប្រកួតប្រជែងអង្ករសធម្មតានៅលើទីផ្សារអន្តរជាតិមានភាពតឹងតែង ពោលគឺកម្ពុជាពិបាកដណ្ដើមទីផ្សារជាមួយវៀតណាម ព្រោះថ្លៃដើមផលិត និងនាំចេញរបស់យើងថ្លៃជាងគេ ដូច្នេះមានតែការផលិតស្រូវអង្ករក្រអូប និងអង្ករគុណភាពខ្ពស់ដូចជា អង្ករសរីរាង្គ និងអង្ករស្ដង់ដា Standard Rice Product SRP ប៉ុណ្ណោះដែលជួយឱ្យអង្ករកម្ពុជាល្បីឈ្មោះលើទីផ្សារអន្តរជាតិ”។
លោក Robert Vreeman ប្រធានក្រុមហ៊ុន SanoRice មានប្រសាសន៍ដូច្នេះថា៖“យើងជំរុញខ្សែចង្វាក់ផ្គត់ផ្គង់ឱ្យកាន់តែប្រសើរឡើង ដោយអនុវត្តវិញ្ញាបនបត្រស្រូវសរីរាង្គ និងវិធីសាស្ត្រតាមដានត្រួតពិនិត្យតាមបែបទំនើបដោយប្រើប្រាស់បច្ចេកវិទ្យាថ្មីដូចជា ប្លុកឆេនជាដើម។ ការចូលរួមពីSanoRice ក្នុងគម្រោងនេះ គឺការធានាទំហំស្រូវនាំចេញ និងតម្លៃខ្ពស់ដល់កសិករ”។
លោកស្រី លឹម សូលីន នាយិកាអង្គការអុកស្វាម ដែលជាដៃគូក្នុងគម្រោងនេះដែរនោះ បានជឿជាក់ថា គម្រោងនេះនឹងផ្ដល់ផលប្រយោជន៍ដល់កសិករ។ លោកស្រីថ្លែងបែបនេះថា៖“អង្គការអុកស្វាមជឿជាក់ថា កសិករខ្នាតតូចសមនឹងទទួលបានផលចំណេញសមរម្យទៅនឹងតម្លៃបន្ថែមក្នុងខ្សែចង្វាក់ផលិតកម្មស្រូវ ហើយទាំងនេះអាចសម្រេចបានតាមរយៈខ្សែសង្វាក់ផលិតកម្មប្រកបដោយបរិយាប័ន្នដែលជំរុញដោយដៃគូទាំងអស់”។
សូមបញ្ជាក់ថា RiceTechCambodia ដែលជាគំនិតផ្តួចផ្តើម និងទុន 5លានដុល្លារដែលឧបត្ថម្ភថវិកាដោយប្រទេសហូឡង់នេះត្រូវបានអនុម័តតាំងពីខែមិថុនាដោយភាពជាដៃគូគោលដៅអភិវឌ្ឍន៍ប្រកបដោយចីរភាព Sustainable Development Goals (SDG) ដែលចាត់ចែងដោយក្រសួងការបរទេសហូឡង់។
លោក Thomas van Leeuwen ឯកអគ្គរដ្ឋទូតរងនៃប្រទេសហូឡង់ប្រចាំនៅកម្ពុជាបានអំពាវនាវដល់ស្ថាប័នទាំងអស់ដែលចូលរួមក្នុងគម្រោងនេះឱ្យបញ្ចូលគ្នានូវបច្ចេកវិទ្យា និងការខិតខំដើម្បីបន្ថែមតម្លៃដល់អង្ករសរីរាង្គរបស់ប្រទេស។ “តាមរយៈការធ្វើដូច្នេះវានឹងធ្វើឱ្យប្រទេសកម្ពុជាអាចធានាបាននូវទីផ្សារអង្ករអន្តរជាតិ។ យើងរំពឹងថា គំនិតផ្តួចផ្តើមនេះនឹងធ្វើឱ្យប្រសើរឡើងនូវជីវភាពរស់នៅរបស់កសិករខ្នាតតូច”។
ប្រទេសកម្ពុជាធ្លាប់ជាប្រទេសនាំចេញអង្ករសរីរាង្គធំជាងគេទី 5 ទៅកាន់សហភាពអឺរ៉ុបកាលពីឆ្នាំមុន។ យោងតាមតួលេខពីសហគមន៍អឺរ៉ុបដែលបានចែករំលែកជាមួយសហព័ន្ធស្រូវអង្ករកម្ពុជាបាននាំចេញអង្ករសរីរាង្គចំនួន 8,467តោនទៅប្លុកមួយនេះកាលពីឆ្នាំមុនដែលតំណាងឱ្យ 3.9%នៃការនាំចូលអង្ករសរីរាង្គរបស់សហភាពអឺរ៉ុប។
លោកឧកញ៉ា សុង សារ៉ន នាយកប្រតិបត្តិ និងជាប្រធានក្រុមហ៊ុន AmruRice បានលើកឡើងថា៖“តួនាទីរបស់កម្មវិធីក្នុងការលើកកម្ពស់អង្ករកម្ពុជានៅបរទេស និងក្នុងការជួយសហគមន៍កសិកម្មក្នុងស្រុក។ វាក៏នឹងជះឥទិ្ធពលខ្លាំងដល់ជីវិតកសិករដែលនេះគឺជាជំហានដ៏សំខាន់មួយឆ្ពោះទៅការប្រែក្លាយកសិករទៅជាអ្នកដាំដុះដ៏មានបទពិសោធក្នុងដំណាំអង្ករសរីរាង្គ។ គោលបំណងគឺអនុវត្តខ្សែចង្វាក់តម្លៃស្រូវប្រកបដោយការទទួលខុសត្រូវប្រកបដោយចីរភាព និងភ្ជាប់ទំនាក់ទំនងជាមួយតម្រូវការផ្គត់ផ្គង់ជាមួយកសិករតូចតាចដែលជាអ្នកពាក់ព័ន្ធស្នូល”៕