ធឿន មករា - La Reine Media

អាការៈរបស់អ្នកដែលឆ្លងមេរោគ “ឆ្កែឆ្កួត”

រហូតមកដល់ពេលបច្ចុប្បន្ន នៅពេលអ្នកជំងឺឆ្លងមេរោគឆ្កែឆ្កួត និងចាប់ផ្ដើមបង្ហាញអាការខាងប្រព័ន្ធប្រសាទ នឹងមានអត្រាការស្លាប់ដោយសារជំងឺនេះដល់ទៅ 100%ហើយគឺ មិនទាន់ឃើញមានការព្យាបាលជំងឺឆ្កែឆ្កួតបានឡើយ តែសំណាងល្អដែលផ្នែកវេជ្ជសាស្ត្រអាចរកឃើញវ៉ាក់សាំងដែលជួយការពារមេរោគមិនឱ្យចូលទៅក្នុងប្រព័ន្ធប្រសាទក្នុងរាងកាយមនុស្សបាន តែត្រូវប្រញាប់ចាក់ឱ្យអ្នកដែលត្រូវសត្វឆ្កែខាំ ឬត្រូវសត្វឆ្កែលិទ្ធកន្លែងដែលមានដំបៅ ឬស្នាមរបួស មុនពេលដែលរាងកាយអ្នកជំងឺឆ្លងមេរោគចូលរហូតបង្ហាញអាការចេញមក។នៅពេលដែលមនុស្សជាច្រើនបានដឹងរឿងនេះហើយ ទើបបច្ចុប្បន្នចាប់ផ្ដើមមានអ្នកស្លាប់ដោយសារមេរោគឆ្កែឆ្កួតថយចុះ រហូតអាចធ្វើឱ្យមនុស្សជាច្រើនលែងបានដឹងថា អាការរបស់អ្នកដែលឆ្លងមេរោគឆ្កែឆ្កួតមែនទែននោះយ៉ាងណាខ្លះ និងអាចកើតការយល់ច្រឡំតាមរយៈព័ត៌មាននៅក្នុងអុីនធើណិតដែលបានចែករំលែកតៗគ្នានោះបានទៀតផង ដូច្នេះពេលនេះយើងនាំគ្នាមកដឹងពីអាការរបស់អ្នកឆ្លងមេរោគឆ្កែឆ្កួតដែលការពិតទៅមានសភាពយ៉ាងណាខ្លះដូចតទៅ…។

អាការៈរបស់អ្នកដែលឆ្លងមេរោគឆ្កែឆ្កួត
រយៈដំបូង អ្នកជំងឺអាចមានគ្រុនក្ដៅតិចៗ ឈឺក មិនឃ្លានអាហារ បន្ទាប់ពីនោះអាចមានអារម្មណ៍ឈឺផ្សាក្ដៅនៅត្រង់កន្លែងដែលត្រូវឆ្កែខាំ ទោះជាស្នាមរបួសជាសះហើយក៏ដោយ។ តមកនឹងចាប់ផ្ដើមពិបាកក្នុងការលេបទឹក និងអាហារ ដោយសារមានអាការឈឺដែលបណ្ដាលមកពីការពង្រឹងខ្លួនរបស់សាច់ដុំដែលធ្វើការលើការលេប។ ចាប់ផ្ដើមមានអាការខ្លាចទឹក ឡេះឡះឆ្លេឆ្លា មិនចូលចិត្តកន្លែងភ្លឺៗ ខ្យល់ និងសំឡេងឮខ្លាំង អាចមានទឹកមាត់ស្អិតៗ ខាប់ៗហៀរចេញមកតាមមាត់ រហូតចុងក្រោយលែងមានសតិស្មារតី ប្រកាច់ ស្ពឹកមួយកំណាត់ខ្លួន និងស្លាប់បាត់បង់ជីវិតនៅទីបំផុត។

តើត្រូវធ្វើយ៉ាងណាពេលត្រូវឆ្កែខាំ ឬលិទ្ធចំកន្លែងដំបៅ ឬស្នាមរបួស?
1. ប្រញាប់លាងស្នាមរបួសឱ្យបានលឿនបំផុត លាងដោយទឹកស្អាត ជាមួយសាប៊ូ ឬថ្នាំសម្លាប់មេរោគ ដូចជាថ្នាំបេតាឌីន ឬទឹកអាល់កុល70% និងព្យាយាមលាងចូលឱ្យជ្រៅទៅដល់បាតស្នាមរបួស។ ទាំងអស់នេះ បើទំហំរបស់ស្នាមរបួស និងទីតាំងរបស់ស្នាមរបួសរឹតតែនៅជិតខួរក្បាលប៉ុនណា ក៏រឹតតែប្រថុយប្រថាននឹងរយៈពេលសម្ងំពង្រីកខ្លួនរបស់មេរោគដែលនឹងចូលទៅដល់ខួរក្បាលបានលឿនប៉ុននោះដែរ។2. ទទួលសារធាតុប្រឆាំងការពារ ដើម្បីឱ្យចូល ទៅបំផ្លាញមេរោគមិនឱ្យចូលទៅដល់សរសៃប្រសាទ ដោយនឹងផ្ដល់សារធាតុតតាំងដំណាលគ្នាការចាក់ថ្នាំវ៉ាក់សាំងការពារ។ ចាក់ជុំវិញស្នាមរបួសដែលត្រូវសត្វខាំ តែបើគ្មានស្នាមរបួស ដូចជាត្រូវសត្វលិទ្ធមាត់ ឬទឹកមាត់សត្វខ្ទាតចូលភ្នែកអាចចាក់ថ្នាំតាមសាច់ដុំបាន។
3. ប្រញាប់ទៅមន្ទីរពេទ្យដើម្បីចាក់វ៉ាក់សាំង ការពារជំងឺឆ្កែឆ្កួត ដើម្បីឱ្យរាងកាយមានប្រព័ន្ធប្រឆាំងឡើងមកបំផ្លាញមេរោគដោយខ្លួនឯង៕

October 28, 2019

កាសែតឡារ៉ែន ពាណិជ្ជ លេខ 195

[easy_media_download url=”https://www.lareine.com.kh/wp-content/uploads/2019/11/LRPN_195-Final-For-Web.pdf” force_dl=”1″]

October 28, 2019

UNDP៖ ការវិនិយោគលើដំណាំដំឡូងមីជួយជំរុញកំណើនសេដ្ឋកិច្ចប្រទេសកម្ពុជា

រដ្ឋាភិបាលកម្ពុជា និងអង្គការកម្មវិធីអភិវឌ្ឍន៍របស់អង្គការសហប្រជាជាតិ (UNDP) បានជំរុញឱ្យប្រជាកសិករដាំដំណាំដំឡូងមី ខណៈក្រសួងពាណិជ្ជកម្មកំពុងរៀបចំគោលនយោបាយជាតិវិនិយោគលើដំឡូងមីក្នុងគោលបំណងជំរុញផលិតកម្ម និងការនាំចេញ។ ដោយហេតុថា ការបណ្តាក់ទុនពីរដ្ឋាភិបាល និងវិស័យឯកជនលើដំណាំដំឡូងមីក្នុងរយៈពេល 10ឆ្នាំខាងមុខនេះ អាចនឹងជួយលើកស្ទួយសម្ទុះសេដ្ឋកិច្ចកម្ពុជាជាទឹកប្រាក់ប្រមាណ940លានដុល្លារអាមេរិក ដែលជាលទ្ធផលអាចនឹងបង្កើតឱកាសការងារ និងជួយកាត់បន្ថយភាពក្រីក្រនៅកម្ពុជា។ នេះបើតាមសេចក្តីប្រកាសព័ត៌មានរបស់ UNDP។

បើយោងតាមការសិក្សាស្រាវជ្រាវរបស់អង្គការ UNDP ស្តីពីការរៀបចំករណីវិនិយោគសម្រាប់ដំឡូងមីបានរកឃើញថា ការវិនិយោគលើដំណាំដំឡូងមីដែលអាចនឹងទទួលបានផលចំណេញពីការបណ្តាក់ទុនលើដំឡូងមីក្នុងទឹកប្រាក់ប្រមាណ 294លានដុល្លារពីសំណាក់រដ្ឋាភិបាលកម្ពុជា ពោលគឺ អាចទទួលបានផលច្រើនជាងការវិនិយោគក្នុងវិស័យផលិតកម្មស្រូវចិញ្ចឹមសត្វ និងស្បៀងអាហារ។

យ៉ាងណាមិញ របាយការណ៍របស់ UNDP ដែលមានចំណងជើងថា “Making the Case For Investment in Cassava” បានកត់សម្គាល់ថា ដើម្បីទាញយកប្រយោជន៍ពីវិស័យដាំដំឡូងមីនេះ រដ្ឋាភិបាលកម្ពុជាគួរសហការឱ្យបានដិតដល់ជាមួយវិស័យឯកជនក្នុងការបង្កើតធនធាននានា ដើម្បីគាំទ្រសកម្មភាពដាំដុះ កែច្នៃ និងសកម្មភាពទីផ្សារ ជាពិសេសការបង្កើតឱ្យមានគម្រោងអភិវឌ្ឍន៍ហេដ្ឋារចនាសម្ព័ន្ធនានា ដូចជាការបង្កើតឱ្យមានឧស្សាហកម្មកែច្នៃដំឡូងមីឱ្យកាន់តែមានប្រសិទ្ធភាព ជាដើម។

លោក Nick Beresford នាយកគ្រប់គ្រងកម្មវិធីអភិវឌ្ឍន៍ UNDP ប្រចាំប្រទេសកម្ពុជា បានថ្លែងនៅក្នុងកម្មវិធីផ្សព្វផ្សាយរបាយការណ៍នេះថា៖ “ផលចំណេញខាងផ្នែកសេដ្ឋកិច្ច និងសង្គម រួមមានកម្រិតនៃឱកាសបង្កើតការងារ និងការកាត់បន្ថយភាពក្រីក្រនឹងកើនឡើងគួរឱ្យកត់សម្គាល់ សម្រាប់ការបណ្តាក់ទុនលើដំឡូងម‍ីនេះ”។

ឯកឧត្តម ម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម បានថ្លែងក្នុងពិធីប្រកាសរបាយការណ៍នេះថាការរៀបចំគោលនយោបាយនេះ គឺដោយសារដំណាំដំឡូងមី គឺជាដំណាំកសិកម្មធំទី2 បន្ទាប់ពីដំណាំស្រូវរបស់កម្ពុជា។ ទាក់ទងនឹងឯកសារគោលនយោបាយនេះ លោកថ្លែងថា៖ “ឯកសារយើងបានដាក់ទៅកាន់ទីស្តីការគណៈរដ្ឋមន្ត្រីហើយ ដោយទីស្តីការគណៈរដ្ឋមន្ត្រីបានទទួលឯកភាពលើខ្លឹមសារ ប៉ុន្តែមិនទាន់ឆ្លងទីស្តីការនៅឡើយទេ ដោយសារឯកសារមិនទាន់ត្រូវតាមលក្ខខណ្ឌកំណត់របស់រដ្ឋាភិបាល”។

ឯកឧត្តមបានបង្ហាញសុទិដ្ឋនិយមថា៖“ដំឡូងមីផ្តល់ជាមធ្យោបាយមួយក្នុងការពង្រីកកំណើនសេដ្ឋកិច្ច ដែលដើរស្របនឹងទស្សនវិស័យយូរអង្វែងរបស់រាជរដ្ឋាភិបាលកម្ពុជា ដើម្បីក្លាយជាប្រទេសដែលនាំចេញ និងផ្គត់ផ្គង់ដំឡូងមីដ៏គួរឱ្យទុកចិត្តបំផុតនៅក្នុងពិភពលោក‍។ យើងមើលឃើញថា ប្រជាពលរដ្ឋជាច្រើនបានដាំដំឡូងមីដែលមានជាងកន្លះលានគ្រួសារ។ វានឹងអាចជួយជីវភាពកាន់តែល្អប្រសើរដល់ពួកគាត់”។

ឯកឧត្តមរដ្ឋលេខាធិការក្រសួងពាណិជ្ជកម្មក៏បានសង្កត់ធ្ងន់ថា រដ្ឋាភិបាលកម្ពុជានឹងប្តេជ្ញាខិតខំជំរុញឱ្យមានការយកចិត្តទុកដាក់ជាអាទិភាពលើវិស័យដាំដំណាំដំឡូងមី ឱ្យដូចគ្នានឹងការយកចិត្តទុកដាក់របស់រដ្ឋាភិបាលលើវិស័យផ្សេងៗទៀត ដូចជាវិស័យដំណាំស្រូវជាដើម។

លោក លាង រ័ត្នម៉ាណា ប្រធានគម្រោងរបស់អង្គការ UNDP ថ្លែងក្នុងពិធីប្រកាសផ្សព្វផ្សាយរបាយការណ៍ស្តីពីការរៀបចំករណីការវិនិយោគសម្រាប់ដំឡូងមីរបស់អង្គការ UNDP ថា មាននិន្នាការកើនឡើងនូវតម្រូវការដំឡូងមីពីទីផ្សារពិភពលោក និងពីប្រទេសចិន ហើយរដ្ឋាភិបាល និងវិស័យឯកជនចាំបាច់ត្រូវវិនិយោគលើវិស័យដំឡូងមី។

លោកថ្លែងថា៖ “ចំណុចខ្លាំងរបស់កម្ពុជាគឺទី1 គឺផលិតកម្មយើងធំ ទី2 យើងមានលទ្ធភាពពង្រីកផ្ទៃដីដាំដុះ ទី3 ដីដែលយើងប្រើប្រាស់ដាំដំឡូងមីនៅមានគុណភាពល្អ បើធៀបជាមួយថៃ និងប្រទេសវៀតណាមហើយការវិនិយោគណាមួយដែលអាចធ្វើឡើង គឺជាការលើកទឹកចិត្ត និងជួយដល់ប្រជាពលរដ្ឋដែលរស់នៅតាមតំបន់សមស្របក្នុងការដាំដំឡូងមីឱ្យគាត់ដាំដុះដំឡូងមី ហើយយករោងចក្រសម្រាប់កែច្នៃទៅដាក់នៅតំបន់សមស្របនោះ”។

បើយោងតាមរបាយការណ៍របស់អង្គការ UNDP ការអភិវឌ្ឍក្នុងវិស័យដំឡូងមី កម្ពុជាត្រូវការកញ្ចប់ថវិកាវិនិយោគសាធារណៈចំនួន 296លានដុល្លារ ខណៈដែលការអភិវឌ្ឍក្នុងវិស័យនេះភាគច្រើន គឺមិនទាន់យកចិត្តទុកដាក់ខ្ពស់លើការកែច្នៃក្នុងប្រទេសនៅឡើយទេ។

របាយការណ៍នេះបានបង្ហាញទៀតថា ដើម្បីសម្រេចបាននូវគោលដៅសម្រាប់វិស័យនេះចាំបាច់ត្រូវមានកិច្ចអន្តរាគមន៍ពីវិស័យសាធារណៈតាមរយៈការផ្តល់ធនធាន ដើម្បីគាំទ្រដល់ការដាំដុះ ការកែច្នៃ និងស្វែងរកទីផ្សារ និងការអនុវត្តគម្រោងកសាងហេដ្ឋារចនាសម្ព័ន្ធគាំទ្រជាដើម។

ដំឡូងមី គឺជាប្រភេទដំណាំកសិកម្មដ៏ពេញនិយមមួយនៅកម្ពុជា ដោយគេឃើញមានកសិករនៅតាមបណ្តាខេត្តជាច្រើនក្នុងប្រទេសកំពុងដាំដំណាំនេះ។

ក៏ប៉ុន្តែក្នុងរយៈពេលប៉ុន្មានឆ្នាំចុងក្រោយនេះ តម្លៃដំឡូងមីនៅកម្ពុជាបានធ្លាក់ចុះប្រមាណ 30% ពី 700រៀលក្នុង 1គីឡូក្រាមនៅឆ្នាំ2014 មកនៅសល់ត្រឹម 450រៀលក្នុង 1គីឡូនៅឆ្នាំ2017 ស្របពេលតម្លៃផលិតផលក្នុងពិភពលោកសម្រាប់ដំណាំដំឡូងមីបានធ្លាក់ចុះ និងបញ្ហាប្រឈមនៃមេរោគឆ្លងលើដំណាំនេះ។

តាមទិន្នន័យរបស់ក្រសួងពាណិជ្ជកម្ម ការនាំចេញដំឡូងមីរបស់កម្ពុជាមានតម្លៃ 17.8លាន ដុល្លារក្នុងឆ្នាំ2017 ខណៈការនាំចេញនៅឆ្នាំ2018 បានធ្លាក់មកត្រឹម 12.6លានដុល្លារ។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានមានប្រសាសន៍ប្រាប់ឡារ៉ែនថា៖“ប្រសិនបើមានការជួយជាផ្នែកបច្ចេកទេសឱ្យទទួលផលបានក្នុង 1ហិកតាច្រើនតោន នោះគឺជារឿងល្អ កន្លងមកបញ្ហាដំឡូងមីជារឿងពិបាកនិយាយ ដោយសារតែតម្លៃវាឡើងចុះមិនអាចរកផលចំណេញបាន”។

លោកឧកញ៉ា លឹម ហេង បានបន្តថា៖“តាមពិតទៅ ក្នុងរយៈពេលកន្លងមក យើងបានធ្វើច្រើនហើយ។ ដូច្នេះវាជារឿងល្អ បើគេអាចជួយបង្កើនទិន្នផល គឺចាប់ពី 30តោនឡើងទៅក្នុង 1ហិកតា នោះទើបគេអាចរកផលកម្រៃចំណេញបាន”៕

October 28, 2019

អាការងងុយគេងពេលថ្ងៃ បញ្ជាក់ពីការហុចផលមិនល្អចំពោះសុខភាពតើគួរដោះស្រាយបែបណា?

អាការងងុយគេងនៅពេលថ្ងៃ អាចបញ្ជាក់ប្រាប់យើងឱ្យដឹងពីការគេងមិនបានគ្រប់គ្រាន់នៅពេលយប់ និងការបូកផ្សំជាមួយភាពនឿយហត់អស់កម្លាំងក្នុងរាងកាយ។ ជាក់ស្ដែង អាការងងុយគេងខ្លាំងនៅពេលថ្ងៃ ក៏ជាសញ្ញាមួយនៃវិបត្ដិដំណេកដែលនាំឱ្យងាយកើតជំងឺផ្សេងៗ ជាពិសេស ប្រឈមមុខនឹងការចុះជាតិស្ករនៅក្នុងរាងកាយ។ យ៉ាងណាមិញ វាក៏មានការហុចផលអាក្រក់ចំពោះអារម្មណ៍រួមមានដូចជា អាការធ្លាក់ទឹកចិត្ដ អាការថប់បារម្ភ ស្ដ្រេស សភាពធុញទ្រាន់ក៏អាចបណ្ដាលឱ្យកើតចេញនូវវិបត្ដិដំណេកនេះផងដែរ។

អាការអត់ងងុយ អាចជះឥទ្ធិពលទៅលើផលិតភាពការងាររបស់អ្នក និងបង្កក្ដីរំខានដល់ជីវិតផ្ទាល់ខ្លួនរបស់អ្នក ដោយសារប្រព័ន្ធខួរក្បាលធ្វើការខុសប្រក្រតី។ ការផ្លាស់ប្ដូររបៀបរស់នៅ ការទទួលទានអាហារល្អចំពោះសុខភាព និងការរៀបចំកាលវិភាគគេងឱ្យបានសមស្រប អ្នកអាចប្រឆាំងនឹងអាការអត់ងងុយបានយ៉ាងងាយស្រួល។ ប៉ុន្ដេទោះជាយ៉ាងណា សូមអ្នកធ្វើការប្រឹក្សាជាមួយគ្រូពេទ្យ ដើម្បីពិនិត្យសុខភាព ប្រសិនអ្នកចាប់ផ្ដើមប្រើថ្នាំងងុយគេប្រភេទណាមួយដែលមិនប៉ះពាល់ដល់សុខភាព ដោយចៀសវាងលេបថ្នាំច្រើនលើសកំណត់ ដែលនាំរងរបួសដល់ផ្នែកខួរក្បាល។

អាការគេងមិនបានគ្រប់គ្រាន់នេះ និងអាការគេងមានសំឡេងរំខាន គឺជាហេតុផលពីរដ៏ចម្បងនៅពីក្រោយការងងុយគេងពេលថ្ងៃ។ ដូច្នេះ ការកំណត់កាលវិភាគគេងឱ្យបានសមស្រប គឺជាវិធីសាស្ដ្រមួយដ៏ប្រសើរ ដើម្បីបង្ការភាពងងុយគេងពេលថ្ងៃ។ ការគេងបានប្រក្រតី នឹងជួយអ្នកការពារប្រឆាំងនឹងការធ្លាក់ចុះថាមពលរាងកាយ ការស្រុតចុះកម្លាំង ការធ្លាក់ទឹកចិត្ដ និងស្ដ្រេស។ មនុស្សផ្សេងពីគ្នា តែងត្រូវការនូវកម្រិតនៃពេលវេលាគេងខុសៗគ្នា ដើម្បីជួយឱ្យរាងកាយបំពេញមុខងារបានប្រក្រតី ប៉ុន្ដែទោះជាយ៉ាងណា ពេលវេលានៃការគេងពី7ទៅ8ម៉ោងក្នុងមួយយប់គឺគ្រប់គ្រាន់ ដើម្បីជួយឱ្យរាងកាយរបស់អ្នកបំពេញមុខងារបានប្រក្រតី។

ការគេងលក់ស្រួលដោយគ្មានការរំខាននាពេលយប់ ឱ្យបានពី7ទៅ8ម៉ោងក្នុងមួយយប់ គឺពិតជាល្អប្រពៃណាស់។ អ្នកត្រូវចងចាំនូវពាក្យមួយឃ្លាថា “ឆាប់ចូលគេង និងឆាប់ភ្ញាក់ពីដំណេក”។ ពិតណាស់ការគេងច្រើនពេក ក៏នឹងអាចធ្វើឱ្យប៉ះពាល់ដល់ការងារ ឬការសិក្សាបន្ថែមនៅផ្ទះរបស់អ្នកផងដែរ ប៉ុន្ដែបើអ្នកអាចធ្វើវាបាន នោះគ្មានផ្លូវដែលអ្នកត្រូវអង្គុយងោកនៅក្នុងថ្នាក់រៀន ឬនៅការិយាល័យនោះទេ។ អ្នកគួរតែផ្អាកការគេងនៅពេលថ្ងៃត្រង់ ក៏ព្រោះវាអាចបណ្ដាលឱ្យប៉ះពាល់ដល់ការគេងនាពេលយប់ផងដែរ។

អ្នកអាចចាប់ផ្ដើមថ្ងៃថ្មីរបស់អ្នកជាមួយនឹងពន្លឺព្រះអាទិត្យ ដោយឱ្យរាងកាយប៉ះនឹងពន្លឺព្រះអាទិត្យឱ្យបានរាល់ថ្ងៃ។ ជាក់ស្ដែងពន្លឺព្រះអាទិត្យអាចជួយគ្រប់គ្រងវដ្ដនៃការគេង និងការភ្ញាក់ពីគេងរបស់អ្នក ពីព្រោះវាជួយឱ្យខួរក្បាលចងចាំថា ពេលណាត្រូវភ្ញាក់ពីគេង។ ម្យ៉ាងទៀត ពន្លឺព្រះអាទិត្យជួយឱ្យរាងកាយផលិតចេញនូវវីតាមីនD។ ការសិក្សាស្រាវជ្រាវមួយ កាលពីឆ្នាំ2013 ចុះផ្សាយនៅក្នុងទស្សនាវដ្ដីឱសថជំនួយការគេងបានណែនាំថា ភាពកង្វះវីតាមីនD អាចមានទំនាក់ទំនងទៅនឹងបញ្ហាគេង ជាពិសេសភាពងងុយគេងពេលថ្ងៃ។

មួយវិញទៀត អ្នកអាចប្រោសទឹកត្រជាក់លើមុខរបស់អ្នកឱ្យត្រជាក់ស្បែកមុខ នៅពេលដែលអ្នកមានអារម្មណ៍ងងុយគេង អ្នកអាចលុបមុខនឹងទឹកត្រជាក់។ ការផ្លាស់ប្ដូរសីតុណ្ហភាពភ្លាមៗជួយបំបាត់អារម្មណ៍ងងុយគេង និងលើកកម្ពស់កម្រិតថាមពល ព្រមទាំងជួយឱ្យផ្ដោតអារម្មណ៍បានល្អផងដែរ។ ក្រោយពេលប្រោសទឹកត្រជាក់នៅលើមុខរបស់អ្នក ដោយឈរបែរមុខទៅម៉ាស៊ីនត្រជាក់ ដើម្បីធ្វើឱ្យការដាស់អារម្មណ៍ដោយទឹកនេះកាន់តែមានប្រសិទ្ធភាពខ្ពស់។ ណាមួយបើអាច អ្នកក៏អាចងូតទឹកត្រជាក់នៅពេលព្រឹក ដើម្បីបំបាត់ចោលនូវភាពងងុយគេង និងលើកកម្ពស់ចរន្ដឈាមរត់ផងដែរ។

ខាងក្រោមនេះគឺជាវិធីជួយឱ្យអ្នកគេងលក់ស្រួលនាពេលយប់៖
1. រក្សាកាលវិភាគគេង ដែលកំណត់ឱ្យបានច្បាស់លាស់ពីពេលវេលាគេង និងពេលក្រោកពីគេង។
2. រក្សាបន្ទប់គេងរបស់អ្នកកុំឱ្យមានពន្លឺ ដើម្បីលើកកម្ពស់ការគេងយ៉ាងស្កប់ស្កល់។ ប្រសិនបើចាំបាច់ សូមប្រើក្រណាត់ ឬវាំងនន ដើម្បីបិទកុំឱ្យពន្លឺជះពីខាងក្រៅចូលទៅរំខាន។
3. ប្រើពូក ដែលមានគុណភាពល្អ កម្រាលស្អាតៗ និងខ្នើយទន់ៗ ដើម្បីលើកកម្ពស់គុណភាពដំណេករបស់អ្នក។
4. អានសៀវភៅ ឬធ្វើយូហ្កាឱ្យបាន20នាទី មុនពេលចូលគេង។
5. កំណត់ការសំឡឹងមើលអេក្រង់កុំព្យូទ័រ ទូរទស្សន៍ ឬទូរស័ព្ទដៃឱ្យបានសមស្របមុនពេលចូលគេង៕

October 28, 2019

រយៈពេល 9ខែ ឆ្នាំ2019 ផ្សារហ៊ុនកម្ពុជាបង្ហាញពីកំណើនការជួញដូរ

ផ្សារហ៊ុនកម្ពុជា(ផ្សារមូលបត្រកម្ពុជា ឬ CSX) បានបង្ហាញពីចំណាប់អារម្មណ៍របស់ក្រុមហ៊ុននានាកាន់តែច្រើនក្នុងការចុះបញ្ជី ដែលធ្វើឱ្យសកម្មភាពជួញដូរភាគហ៊ុនក្នុងរយៈពេល 9ខែ ឆ្នាំ2019 កាន់តែសកម្មឡើង ចាប់តាំងពីផ្សារនេះត្រូវបានបង្កើតឡើងកាលពីឆ្នាំ2012។

ការជួញដូរនៅក្នុងរយៈពេល 9ខែ ឆ្នាំ2019 បានបង្ហាញនូវកំណើនដោយមូលធនូបនីយកម្មទីផ្សារបានកើនឡើងជាង 40% បើធៀបនឹងត្រីមាសទី2 ដែលនេះគឺជាតួលេខខ្ពស់បំផុតចាប់តាំងផ្សារហ៊ុនបើកដំណើរការមក។ នេះបើយោងតាមទិន្នន័យពីផ្សារមូលបត្រកម្ពុជា។

ទិន្នន័យដែលទទួលបានពីក្រុមហ៊ុនផ្សារមូលបត្រកម្ពុជាបានបង្ហាញថា នៅក្នុងរយៈពេល 9ខែឆ្នាំ2019 មូលធនូបនីយកម្មទីផ្សារបានកើនដល់ 800លានដុល្លារកើនឡើងជាង 40%ពីចំនួន 570លានដុល្លារកាលពីត្រីមាសទី2 ឆ្នាំ 2019។ ចំណែកសន្ទស្សន៍ផ្សារហ៊ុនបានកើនឡើងដល់ 869 ពិន្ទុដែលជាតួលេខខ្ពស់បំផុតក្នុងរយៈកាល 6ឆ្នាំចុងក្រោយនេះ។

យោងតាមការគណនាមូលធនូបនីយកម្មទីផ្សារជាតម្លៃក្រុមហ៊ុនចុះបញ្ជីក្នុងទីផ្សារទាំងអស់បូកបញ្ចូលគ្នា គិតតាមតម្លៃទីផ្សារដោយតម្លៃក្រុមហ៊ុននីមួយៗ គឺគេយកថ្លៃភាគហ៊ុន គុណចំនួនភាគហ៊ុនចុះបញ្ជី។ ទិន្នន័យបានបញ្ជាក់ឱ្យដឹងទៀតថា ចំនួនគណនីថ្មីដែលបើកក្នុងរយៈពេល 9ខែមានចំនួន 725 ដោយគិតត្រឹមចុងត្រីមាសទី3 គណនីជួញដូរមានចំនួនសរុប 22,196។ ការជួញដូរជាមធ្យមក្នុងរយៈពេល9ខែ គិតជាទឹកប្រាក់មានតម្លៃប្រមាណ 27.121ដុល្លារ ស្មើនឹង12,539 ភាគហ៊ុនក្នុង 1ថ្ងៃ។ ការជួញដូរដែលមានលក្ខណៈវិនិយោគិនឯកត្តបុគ្គលមានប្រហែល 94%។

លោកស្រី គឹម សុផានីតា ប្រធាននាយកដ្ឋានប្រតិបត្តិការទីផ្សារ CSX បានមានប្រសាសន៍ឱ្យដឹងថា៖ “គោលនយោបាយបែងចែកភាគលាភកាន់តែប្រសើរ ការបង្កើនទំនុកចិត្តរបស់វិនិយោគិនមកលើទីផ្សារ គឺជាកិច្ចខិតខំប្រឹងប្រែងរបស់ CSX និងភាគីពាក់ព័ន្ធក្នុងការសម្រួលបទប្បញ្ញត្តិនីតិវិធី និងការធ្វើសកម្មភាពផ្សព្វផ្សាយឱ្យបានកាន់តែទូលំទូលាយទាំងក្នុងស្រុក និងក្រៅស្រុក ក៏ជាកត្តាចម្បងក្នុងការជំរុញទីផ្សារដែរ”។

លោកស្រីបន្តថា៖ “ដោយហេតុនេះហើយ ទើបសកម្មភាពប្រតិបត្តិការរបស់ផ្សារហ៊ុនកម្ពុជាក្នុងរយៈពេល 9ខែ ឆ្នាំ2019 មានភាពល្អប្រសើរយ៉ាងខ្លាំងចាប់តាំងពីរយៈពេល 6ឆ្នាំនៃការចាប់ផ្តើមដំ-ណើរការផ្សារហ៊ុន។ ភាពល្អប្រសើរ របស់ផ្សារមូលបត្រកម្ពុជានៅពេលនេះ គឺមកពីកត្តាសំខាន់ៗមួយចំនួនដូចជា ការបន្ថែមម៉ោងជួញដូរ កំណើនសេដ្ឋកិច្ចកម្ពុជា និងកំណើនប្រាក់ចំណេញរបស់ក្រុមហ៊ុនចុះបញ្ជីផងដែរ”។

លោកស្រីបន្តថា ជាមួយនឹងភាពល្អប្រសើរនេះបានធ្វើឱ្យចំនួនគណនីជួញដូរបច្ចុប្បន្នមានចំនួន 22,196 ដោយកើនឡើង 35% បើធៀបនឹងរយៈពេលដូចគ្នាកាលពីឆ្នាំមុន។

បច្ចុប្បន្នមានក្រុមហ៊ុនជាច្រើនកំពុងរៀបចំខ្លួនចុះបញ្ជីក្នុងផ្សារហ៊ុនដើម្បីទទួលបានអត្ថប្រយោជន៍ពីការកាត់បន្ថយពន្ធ 50%លើពន្ធប្រាក់ចំណេញ។ នេះបើតាមការបញ្ជាក់របស់លោកស្រី សុផានីតា។

លោកស្រីបានថ្លែងបន្តថា៖ “ខ្ញុំមានសុទិដ្ឋិនិយមចំពោះទីផ្សារក៏ដូចជាវិស័យនេះទាំងមូល។ ខ្ញុំរំពឹងថា ប្រសិនបើក្រុមហ៊ុនថ្មីដែលត្រៀមចុះបញ្ជីអាចដំណើរការចប់រួចរាល់តាមការគ្រោងទុក ហើយភាគហ៊ុនទាំងអស់នឹងនៅតែបន្តផ្តល់អត្រាចំណេញមួយដ៏ទាក់ទាញនោះនឹងមានការចូលរួមកាន់តែច្រើនបន្ថែមទៀតពីសំណាក់វិនិយោគិន”។

ទិន្នន័យពី CSX បានឱ្យដឹងទៀតថា តម្លៃភាគហ៊ុនរបស់ក្រុមហ៊ុនទាំង 5 ដែលបានចុះបញ្ជីនៅផ្សារមូលបត្រកម្ពុជាគិតត្រឹមដំណាច់ត្រីមាសទី2 ធៀបនឹងរយៈពេលដូចគ្នាឆ្នាំ2018 គឺតម្លៃភាគហ៊ុនរបស់៖ 1-កំពង់ផែស្វយ័តខេត្តព្រះសីហនុ (PAS) កើនឡើង 270% ពី 6400រៀល មក 23,650 រៀល។ 2-កំពង់ផែស្វយ័តភ្នំពេញ(PPAP) កើនឡើងជិត 100% ពី 6400រៀល មក 12,780រៀល។ 3-រដ្ឋាករទឹកស្វយ័តក្រុងភ្នំពេញ (PWSA) កើនឡើង 93% ពី 3180រៀល មក 6,160រៀល។ 4-ហ្គ្រេនធ្វីន អុីនធើណេសូណល(GTI) កើនឡើង 44% ពី 3050រៀល មក 4,400រៀល។ 5-ភ្នំពេញអេសអុីហ្សេត (PPSP) បានធ្លាក់ចុះ 2% ពី 2800រៀល មក 2,740រៀល គិតត្រឹមត្រីមាសទី3 ឆ្នាំ2019។

នាយកប្រតិបត្តិក្រុមហ៊ុន RHB Indochina Securities Plc ដែលជាក្រុមហ៊ុនធានាទិញមូលបត្របានថ្លែងប្រាប់ថា៖“ដោយសារទីផ្សាររបស់យើងនៅតូច ដូច្នេះនៅពេលដែលមានការចាប់អារម្មណ៍ច្រើនពីសំណាក់អ្នកវិនិយោគក៏អាចនឹងធ្វើឱ្យមានឥទ្ធិពលធ្វើឱ្យផ្សារកើនឡើងដែរ។ មានន័យថា នៅពេលដែលអ្នកលក់មានចំនួនតិច និងអ្នកចង់ទិញមានច្រើន ក៏វាងាយធ្វើឱ្យទីផ្សារមានការកើនឡើងដែរ ហើយកំណើនដ៏ខ្ពស់នៃតម្លៃភាគហ៊ុនរបស់កំពង់ផែស្វយ័តក្រុងព្រះសីហនុ និងកំពង់ផែក្រុងភ្នំពេញ គឺជាធាតុដ៏សំខាន់មួយក្នុងការធ្វើឱ្យផ្សារមូលបត្រកម្ពុជា មានសម្ទុះខ្លាំងក្នុងរយៈពេល 9ខែ ឆ្នាំ2019នេះ”៕

October 27, 2019

ច្បាប់ធ្វើពាណិជ្ជកម្មតាមអុីនធើណិត ត្រូវបានសភាអនុម័ត

រដ្ឋសភាជាតិបានអនុម័តសេចក្តីព្រាងច្បាប់ស្តីពីពាណិជ្ជកម្មតាមអុីនធើណិតដែលកំពុងទន្ទឹងរង់ចាំ និងជាផ្នែកមួយនៃបទប្បញ្ញត្តិដែលរំពឹងថា នឹងដើរតួនាទីយ៉ាងសំខាន់ក្នុងការជួយសេដ្ឋកិច្ចកម្ពុជាសម្របខ្លួនទៅនឹងយុគសម័យឌីជីថល ហើយនឹងផ្តល់លទ្ធភាពយ៉ាងច្រើនដល់សហគ្រាសធុនតូចនិងមធ្យមនៅកម្ពុជាក្នុងការភ្ជាប់ខ្លួនទៅនឹងខ្សែចង្វាក់ផលិតកម្មទីផ្សារក្នុងស្រុក និងអន្តរជាតិ។

ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានលើកឡើងនៅក្នុងសម័យប្រជុំពេញអង្គនៃរដ្ឋសភាជាតិថា៖“ច្បាប់ពាណិជ្ជកម្មតាមប្រព័ន្ធអេឡិចត្រូនិកនឹងមានសារៈសំខាន់យ៉ាងខ្លាំង ក្នុងការលើកកម្ពស់សកម្មភាពអាជីវកម្មតាមអុីនធើណិតនៅក្នុងព្រះរាជាណាចក្រកម្ពុជា។ ច្បាប់នេះនឹងត្រួសត្រាយផ្លូវសម្រាប់ប្រទេសកម្ពុជាដើម្បីអភិវឌ្ឍសេដ្ឋកិច្ចឌីជីថលរបស់ខ្លួន។ វានឹងជួយប្រទេសឱ្យត្រៀមខ្លួនសម្រាប់បដិវត្តន៍ឧស្សាហកម្ម 4.0 ដោយប្រើពាក្យពេញនិយមសម្រាប់និន្នាការបច្ចុប្បន្ន នៃស្វ័យប្រវត្តិកម្ម និងឌីជីថលដែលត្រូវបានគេមើលឃើញនៅក្នុងអាជីវកម្ម និងឧស្សាហកម្ម”។

សេចក្តីព្រាងច្បាប់នេះត្រូវបានរៀបចំឡើងដោយក្រសួងពាណិជ្ជកម្មក្រោមជំនួយឧបត្ថម្ភពីធនាគារអភិវឌ្ឍន៍អាស៊ី (ADB) បន្ទាប់មកច្បាប់នេះនឹងត្រូវបញ្ជូនទៅព្រឹទ្ធសភា ដើម្បីពិភាក្សាបន្ថែមទៀតមុនពេលក្រុមប្រឹក្សាធម្មនុញ្ញឈានដល់ការពិភាក្សា។ ជំហានចុងក្រោយ គឺដើម្បីព្រះមហាក្សត្រព្រះបាទនរោត្តម សីហមុនី ឡាយព្រះហត្ថលេខាលើឯកសារ។

សេចក្តីព្រាងច្បាប់ដែលមាន 12ជំពូក និង 67មាត្រានេះនឹងផ្តល់នូវវិធានជាមូលដ្ឋានដ៏សំខាន់នៅក្នុងការជំរុញពាណិជ្ជកម្មតាមប្រព័ន្ធអេឡិចត្រូនិករបស់កម្ពុជាប្រកបដោយទំនុកចិត្តទាំងក្នុងនិងក្រៅប្រទេស ខណៈវានឹងចូលរួមចំណែកយ៉ាងសកម្មក្នុងការអភិវឌ្ឍសេដ្ឋកិច្ចឌីជីថលនៅកម្ពុជាក្នុងការត្រៀមទទួលយកបដិវត្តន៍ឧស្សាហកម្មទី4។ នេះបើយោងតាមសេចក្តីថ្លែងហេតុរបស់រដ្ឋាភិបាលក្នុងការការពារសេចក្តីព្រាងច្បាប់។

ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានមានប្រសាសន៍ថា៖ “ការរៀបចំច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិកនៅពេលនេះ គឺចំពេលដែលកម្ពុជាកំពុងរៀបចំខ្លួនក្នុងការទទួលយកការមកដល់នៃបដិវត្តន៍ឧស្សាហកម្មទី4 ដែលនេះជាការបោះជំហានថ្មីមួយទៀតក្នុងការបង្កើនការគោរពច្បាប់ធ្វើពាណិជ្ជកម្មតាមប្រព័ន្ធអេឡិចត្រូនិកនៅកម្ពុជា។ ទោះយ៉ាងណាដោយសារចំណេះដឹង និងការអនុវត្តច្បាប់នៅមានកម្រិតនោះ កម្ពុជានៅត្រូវការពេលវេលាបន្ថែមទៀតក្នុងការគ្រប់គ្រងការធ្វើពាណិជ្ជកម្មតាមរយៈអនឡាញនេះ”។

ឯកឧត្តមរដ្ឋមន្ត្រី បានឱ្យដឹងដែរថា៖ “ការងារលើច្បាប់ពាណិជ្ជកម្មតាមប្រព័ន្ធអេឡិចត្រូនិក បានចាប់ផ្តើមនៅក្នុងឆ្នាំ2012 ដោយមានជំនួយបច្ចេកទេសពីធនាគារអភិវឌ្ឍន៍អាស៊ីហើយ ត្រូវបានផ្ទៀងផ្ទាត់ប្រឆាំងនឹងច្បាប់គំរូរបស់អង្គការសហប្រជាជាតិ”។

លោក ឈា ឡាយហ៊ី ប្រធាននាយកដ្ឋានសហគ្រាសធុនតូច និងមធ្យមនៃក្រសួងឧស្សាហកម្ម និងសិប្បកម្មបានឱ្យដឹងថា ខណៈការធ្វើពាណិជ្ជកម្មតាមប្រព័ន្ធអេឡិចត្រូនិកនៅកម្ពុជាបច្ចុប្បន្នពុំមានការគ្រប់គ្រងច្បាស់លាស់ ច្បាប់នេះនឹងផ្តល់អត្ថប្រយោជន៍យ៉ាងច្រើនសម្រាប់អ្នកវិនិយោគ និងរដ្ឋាភិបាល។ ព្រោះជាច្បាប់ដែលបង្កើតឡើងក្នុងគោលបំណងគ្រប់គ្រងពាណិជ្ជកម្មតាមប្រព័ន្ធអេឡិចត្រូនិកនៅកម្ពុជាជាមួយអន្តរជាតិនឹងផ្តល់នូវលទ្ធភាពឱ្យសហគ្រាសធុនតូច និងមធ្យម (SME)នៅកម្ពុជាអាចភ្ជាប់ខ្លួនទៅនឹងខ្សែចង្វាក់ផលិតកម្ម និងទីផ្សារក្នុងស្រុក និងអន្តរជាតិក៏ដូចជាជំរុញឱ្យមានការច្នៃប្រឌិត និងការបង្កើតទំនិញ និងសេវាថ្មីៗបន្ថែមទៀត។

លោក ឈា ឡាយហ៊ី ថ្លែងថា៖“តាមរយៈច្បាប់នេះ រដ្ឋាភិបាលមិនត្រឹមតែអាចទទួលបានកំណើនប្រាក់ចំណូលពីការប្រមូលពន្ធប៉ុណ្ណោះទេ តែក៏អាចធ្វើការគ្រប់គ្រងលើសកម្មភាពនៃការធ្វើពាណិជ្ជកម្មតាមប្រព័ន្ធអេឡិចត្រូនិកដើម្បីងាយស្រួលក្នុងការរៀបចំគោលនយោបាយអភិវឌ្ឍន៍ លើកទឹកចិត្ត និងពង្រឹងសមត្ថភាពអ្នកនៅក្នុងវិស័យ SME ផងដែរ”។

សូមបញ្ជាក់ថា វិស័យ SME នៅកម្ពុជាបច្ចុប្បន្នកំពុងប្រឈមនឹងបញ្ហាចម្បងៗមួយចំនួនដូចជា គុណភាពផលិតផល និងសេវាកម្ម កង្វះខាតការប្រើប្រាស់បច្ចេកវិទ្យាក្នុងដំណើរការចង្វាក់ផលិតកម្ម ទីផ្សារមានភាពតូចចង្អៀត និងកង្វះមូលធនជាដើម ដូច្នេះច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិកនឹងចូលរួមចំណែកយ៉ាងច្រើននៅក្នុងការជំរុញឱ្យការប្រើប្រាស់បច្ចេកវិទ្យា និងពង្រីកទីផ្សារកម្ពុជាឱ្យបានកាន់តែច្រើន និងធំទូលាយទៅកាន់អន្តរជាតិ។

ឯកឧត្តម ប៉ាន សូរស័ក្តិ បានមានប្រសាសន៍ថា សហគ្រាសធុនតូច និងមធ្យមនឹងទទួលបាន អត្ថប្រយោជន៍យ៉ាងច្រើនពីច្បាប់នាពេលខាងមុខដែលនឹងជួយដល់បណ្តាញផ្គត់ផ្គង់ក្នុងតំបន់ និងពិភពលោករបស់ពួកគេក្នុងតំបន់។

លោករដ្ឋមន្ត្រីបានមានប្រសាសន៍ថា៖“ច្បាប់នេះក៏លើកទឹកចិត្តដល់ការច្នៃប្រឌិតផងដែរ ដោយប្រទេសកម្ពុជាមានគោលបំណងផ្លាស់ប្តូរទៅជាសេដ្ឋកិច្ចឌីជីថលលើសលប់នៅឆ្នាំ2023”។យោងតាមក្រសួងឧស្សាហកម្ម និងសិប្បកម្ម បច្ចុប្បន្ននៅកម្ពុជាមានសហគ្រាសធុនតូច និងមធ្យមចំនួនជាង 50ម៉ឺនកន្លែង ក្នុងនោះសហគ្រាសដែលបានមកចុះបញ្ជី គឺមានកម្រិតតិចជាង 15%៕

October 27, 2019

ក្រុមហ៊ុនបច្ចេកវិទ្យា DAHUA និងក្រុមហ៊ុន គីម ហេង សិនធ័រ ប្រកាសជាផ្លូវការបើកកិច្ចប្រតិបត្តិការជាដៃគូ

នៅថ្ងៃទី២៦ ខែតុលា ឆ្នាំ២០១៩ ក្រុមហ៊ុន គីម ហេង សិនធ័រ បានប្រកាសជាផ្លូវការនឹងក្លាយជាតំណាងចែកចាយផ្តាច់មុខនៅក្នុងប្រទេសកម្ពុជាពីក្រុមហ៊ុនបច្ចេកវិទ្យារ DAHUAដែលជាក្រុមហ៊ុនជាប់ចំណាត់ថ្នាក់លេខ២នៅលើផ្នែកកាម៉េរាសុវត្ថិភាព A&S នៅក្នុងឆ្នាំ២០១៨ និងជាអ្នកផ្ដល់សេវាកម្មផ្នែក video-centric smart IoT លំដាប់ពិភពលោក។

បន្ទាប់ពីចាប់បើកដំណើរការកាលពីអំឡុងឆ្នាំ២០០១ បច្ចុប្បន្នក្រុមហ៊ុនបច្ចេកវិទ្យា DAHUAមានបុគ្គលិកចំនួន 17 000 នាក់ មានសាខានៅក្រៅប្រទេស ៥៤សាខា ដែលរួមមានផលិតផលដួចជា CCTV Camera, Access Control, Video Intercoms, LED/LCD Display, Video Conferencing to Machine Vision, Drones and so on.
ដោយឡែក ក្រុមហ៊ុន គីម ហេង បានចាប់ផ្ដើមធ្វើអាជីវកម្មតាំងពីឆ្នាំ១៩៩៥ ដោយលោក លីម គ្រី ដែលជាតំណាងចែកចាយដំបូងគេបង្អស់នៅក្នុងប្រទេសកម្ពុជា។ បច្ចុប្បន្ននេះក្រុមហ៊ុន គីម ហេង សិនធ័រ មានតំណាងចែកចាយពីក្រុមហ៊ុន HP, Panasonic, IBM, ICOM, SONY, TP Link and Dahua។
កិច្ចសហប្រតិបត្តិការជាដៃគូរវាងក្រុមហ៊ុនបច្ចេកវិទ្យា DAHUA និងក្រុមហ៊ុន គីម ហេង សិនធ័រ គឺដើម្បីសម្រេចនូវចក្ខុវិស័យ “សង្គមមានសុវត្ថិភាព និងការរស់នៅឆ្លាតវៃ” នៅក្នុងប្រទេសកម្ពុជា។

គោលការណ៍ចម្បងមួយទៀតគឺផ្ដោតសំខាន់ទៅលើអតិថិជន ដែលផ្ដល់ជូននូវគុណភាព និងសេវាដ៏ល្អបំផុតជូនអតិថិជន ដើម្បីបង្កើនគុណតម្លៃកាន់តែខ្ពស់សម្រាប់អតិថិជនតាមរយៈការខិតខំប្រឹងប្រែង ដើម្បីកសាងសង្គមប្រកបដោយសុវត្ថិភាព ឆ្លាតវៃ ងាយស្រួល និងមានប្រសិទ្ធភាពសម្រាប់ប្រទេសកម្ពុជា៕

October 27, 2019

អ្នកជំនាញ៖ ពិព័រណ៍ CTM-2019 ទាក់ទាញកំណើនភ្ញៀវទេសចរ តែត្រូវអភិវឌ្ឍការងារមួយចំនួនបន្ថែម

ឯកឧត្តម ថោង ខុន រដ្ឋមន្ត្រីក្រសួងទេសចរណ៍កម្ពុជា បានប្រកាសអំពាវនាវដល់ធុរជនក្នុងវិស័យទេសចរណ៍នៅក្នុងការបើកសម្ពោធពិព័រណ៍ទេសចរណ៍កម្ពុជាអន្តរជាតិលើកទី3 ឬ CTM-2019 កាលពីដើមខែនេះ ឱ្យបន្តការចូលរួមក្នុងសកម្មភាពទេសចរណ៍របស់កម្ពុជាដែលមានមរតកវប្បធម៌ដ៏សម្បូរបែប ជាពិសេសតំបន់ប្រាសាទនានាដែលជាបេតិកភណ្ឌពិភពលោករបស់អង្គការ UNESCO ជាផលិតផលដ៏ពិសិដ្ឋ ព្រមជាមួយធនធានធម្មជាតិដែលជាកាតាលីករទាក់ទាញទេសចរមកពីជុំវិញពិភពលោកកាន់តែច្រើនឡើងពី 1ឆ្នាំទៅ 1ឆ្នាំ។

តាមរយៈការណ៍នេះ គឺយើងបានផ្តល់នូវឱកាសផ្សព្វផ្សាយពីគោលដៅទេសចរណ៍ដ៏ល្អៗរបស់កម្ពុជា រួមទាំងរាជធានីភ្នំពេញដែលជាម្ចាស់ផ្ទះរៀបចំ CTMឆ្នាំនេះផង ទៅដល់បណ្តាក្រុមហ៊ុនអន្តរជាតិដែលជា Buyers និងភ្ញៀវទេសចរអន្តរជាតិរាប់លាននាក់នៅទូទាំងពិភពលោកឱ្យបានស្គាល់ ជាពិសេសខណៈដែលពេលថ្មីៗនេះ ប្រាសាទអង្គររបស់កម្ពុជាបន្តទទួលចំណាត់ថ្នាក់លេខ1“ជាសំណង់ប្រវត្តិសាស្ត្រដ៏អស្ចារ្យបំផុតលើសកលលោកសម្រាប់ឆ្នាំ2018” ដោយក្រុមប្រឹក្សាយោបល់ TripAdvisor ដែលនេះជាមោទនភាពមួយទៀតរបស់កម្ពុជានៅលើឆាកអន្តរជាតិ ស័ក្តិសមនឹងការប្រសិទ្ធនាមថា “កម្ពុជាៈ ព្រះរាជាណាចក្រអច្ឆរិយៈ ប្រកបដោយភាពកក់ក្តៅ (Cambodia: Kingdom of Wonder-Feel the Warmth)។

ថ្វីដ្បិតតែមានភាពប្រឈមបន្តិចក្តី តែរបាយការណ៍ផ្លូវការរបស់ក្រសួងទេសចរណ៍នៅថ្ងៃទី7ខែតុលា ឆ្នាំ2019 កន្លងមកនេះបានបញ្ជាក់ថា នៅរយៈពេល 8ខែដើមឆ្នាំ2019 នេះ ប្រទេសកម្ពុជាទាំងមូលទទួលបានភ្ញៀវទេសចរមកកម្សាន្តចំនួន 4,360,397នាក់ កើនឡើង 10.4% បើធៀបនឹងរយៈពេលដូចគ្នានៅឆ្នាំ2018។

ក្រសួងទេសចរណ៍បានឱ្យដឹងថា រយៈពេល 8ខែកន្លងមកនេះ ភ្ញៀវទេសចរចូលតាមផ្លូវអាកាស មានចំនួន 3,104,489នាក់ ស្មើនឹង 71.2% នៃចំនួនភ្ញៀវសរុបដែលមានកំណើន 16.6% ក្នុងនោះចូលតាមអាកាសយានដ្ឋានអន្តរជាតិភ្នំពេញចំនួន 1,427,487នាក់ កើន14.7%។ តាមអាកាសយានដ្ឋានអន្តរជាតិសៀមរាប 1,188,254នាក់ ថយចុះ9.1% និងអាកាសយានដ្ឋានអន្តរជាតិព្រះសីហនុ ចំនួន 488,748នាក់ កើនឡើង343.5%។

ក្រសួងទេសចរណ៍បានឱ្យដឹងទៀតថា នៅ 8ខែដើមឆ្នាំនេះ មានទេសចរកម្ពុជាចេញទៅ ក្រៅប្រទេសចំនួន 1,347,060នាក់ កើនឡើង4.7% ធៀបនឹងរយៈពេលដូចគ្នាឆ្នាំ2018។ គួរបញ្ជាក់ ដែរថា កាលពីឆ្នាំ2018 កម្ពុជាទទួលបានភ្ញៀវទេសចរអន្តរជាតិជាង 6លាននាក់។

ជាមួយគ្នានេះដែរ របាយការណ៍ចុងក្រោយរបស់ក្រសួងទេសចរណ៍ក៏បានបង្ហាញដែរថា កម្ពុជាបានទាក់ទាញភ្ញៀវទេសចរចិនចំនួន 1.7លាននាក់ក្នុងរយៈពេល 8ខែនៃឆ្នាំ2019 ដែលកើនឡើង 33% បើធៀបនឹងរយៈពេលដូចគ្នាកាលពីឆ្នាំមុន។

របាយការណ៍បានបង្ហាញថា ប្រទេសចិននៅតែជាប្រភពធំបំផុតនៃភ្ញៀវទេសចរបរទេសទៅកាន់ប្រទេសអាស៊ីអាគ្នេយ៍នេះដែលមានចំនួន 39%នៃចំនួនភ្ញៀវទេសចរបរទេសសរុបមកប្រទេសកម្ពុជាក្នុងអំឡុងពេលពីខែមករា ដល់ខែសីហា ឆ្នាំនេះ។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍កម្ពុជាបានមានប្រសាសន៍ថា៖“ប្រទេសចិនគឺជាទីផ្សារធំមួយសម្រាប់ឧស្សាហកម្មទេសចរណ៍របស់ប្រទេសកម្ពុជា ដែលយើងសង្ឃឹមថា នឹងទាក់ទាញភ្ញៀវទេសចរចិនប្រមាណ 2.6លាននាក់នៅឆ្នាំ2019 នេះ 3លាននាក់នៅឆ្នាំ2020 5លាននាក់នៅឆ្នាំ2025 និងកើនឡើងដល់ 8លាននាក់នៅឆ្នាំ2030”។

យោងតាមរបាយការណ៍ ភ្ញៀវទេសចរអន្តរជាតិសរុបចំនួន 4.36លាននាក់បានធ្វើដំណើរមកប្រទេសកម្ពុជាក្នុងអំឡុងពេល 8ខែនៃឆ្នាំនេះ គឺកើនឡើង 10,4%បើធៀបនឹងរយៈពេលដូចគ្នាកាលពីឆ្នាំមុន។

លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជាបានមានប្រសាសន៍ប្រាប់ឡារ៉ែន ពាណិជ្ជថា៖“បញ្ហាដែលកើតឡើង វាអាស្រ័យទៅលើបរិបទនៅជុំវិញខ្លួនយើង។ ទី1-គឺកត្តាផ្ទៃក្នុងរបស់យើង គឺខ្ញុំសំដៅទៅលើការងាររដ្ឋបាលទាំងអស់ គឺតាំងពីការកែច្នៃ បរិស្ថាន ការទទួលបដិសណ្ឋារកិច្ច ការគាំទ្រទៅលើក្រមសីលធម៌វិជ្ជាជីវៈរបស់ផ្នែកនីមួយៗ ដោយយើងត្រូវការពង្រឹងឡើងវិញ”។

លោកបន្តថា ទី2-ការប្រកួតប្រជែងត្រូវមានតម្លាភាព ដោយអ្នកប្រកបរបរទេសចរណ៍សព្វថ្ងៃ មួយចំនួនពុំមានបទពិសោធ មិនមានចំណេះដឹង ដោយពុំស្គាល់ពីគុណតម្លៃទេសចរណ៍ទេ ហើយចូលមកប្រឡូកមុខរបរនេះ ធ្វើឱ្យប៉ះពាល់ដល់អ្នកសុចរិតទៀងត្រង់ ដែលចំណុចនេះធ្វើឱ្យប៉ះពាល់ដល់ការផ្សព្វផ្សាយរបស់វិស័យទេសចរណ៍ វានាំឱ្យប៉ះពាល់ដល់សេដ្ឋកិច្ចនៃវិស័យទេសចរណ៍ទាំងមូល ហើយរាជរដ្ឋាភិបាលដែលត្រូវរងផលប៉ះពាល់នេះធំជាងគេ ធ្វើឱ្យមិនអាចសម្រេចគោលដៅទេសចរណ៍បាន។

លោកបានបញ្ជាក់ថា ទី3-ពាក់ព័ន្ធនឹងបរិស្ថានជុំវិញយើង ដូចជាការទុកដាក់សំរាមមិនបានត្រឹមត្រូវ។ ទី4-ការតុបតែងកែលម្អ ដូចជាជុំវិញអង្គរ យើងបានតាំងលម្អ និងធ្វើការដាំដុះឱ្យទាក់ទាញដល់ទេសចរណ៍ នេះហើយជាការកែច្នៃនោះ។ ទី5-បរិបទនយោបាយរបស់ជាតិ គួរតែមានការលើកលែងនូវទិដ្ឋាការ ដែលជាការស្នើរបស់ផ្នែកឯកជនតាំងពីឆ្នាំ2008មក ហើយប្រទេសជិតខាងយើងបានធ្វើរួចហើយ តែយើងមិនបានធ្វើនៅឡើយ គឺផលចំណេញយើងនឹងទទួលបានពីភ្ញៀវដែលមានសក្តានុពល។ ម្យ៉ាងវិញទៀតយើងត្រូវតែមានការលើកទឹកចិត្តគ្នា អ្នកដែលរកស៊ីក្នុងវិស័យនេះយូរមកហើយគាត់មានបទពិសោធ ដឹងពីបរិបទនយោបាយ បរិបទទេសចរណ៍ដែលអាចទាក់ទាញទេសចរណ៍ក្រៅស្រុក ដែលការលើកទឹកចិត្តអាចផ្តល់បាន ដូចជាការបន្ធូរបន្ថយពន្ធដែលស្រុកគេក៏បានអនុវត្តដូច្នេះដែរ។ ទី6-បើសិនជាមិនមានសង្គ្រាមនយោបាយក្នុងតំបន់ក្តី ឬក្នុងពិភពលោក នោះនឹងធ្វើឱ្យអ្វីៗមានភាពប្រសើរឡើង។

លោក ហូ វណ្ឌី ក៏បានបញ្ជាក់ដែរថា៖“អ្នកនៅក្នុងវិស័យទេសចរណ៍កំពុងតែរង់ចាំមើលរយៈពេលប៉ុន្មានខែចុងក្រោយនេះដែលយើងអាចទទួលបានភ្ញៀវទេសចរដូចប្រក្រតីឡើងវិញ ឬមានការកើនឡើង(អំឡុងពាក់កណ្តាលខែ9) ព្រោះថា ការធ្លាក់ចុះនៃភ្ញៀវទេសចរ អាចថាមកពីរដូវខ្សត់ភ្ញៀវ ក៏ថាបាន ដែលយើងសង្ឃឹមថា នឹងមានការកើនឡើងវិញនៃវិស័យទេសចរណ៍ខ្មែរ បើមិនដូច្នោះទេ ទាំងរដ្ឋ និងវិស័យឯកជនត្រូវតែខិតខំទ្វេដងឡើងទៀតលើភាពប្រឈមចំពោះមុខនេះ”។

ឆ្លើយតបនឹងស្ថានភាពទេសចរណ៍បច្ចុប្បន្ន ក្រសួងទេសចរណ៍បាននិងកំពុងអនុវត្តនូវទស្សនវិស័យមួយចំនួនគឺ៖ ជំរុញ និងពង្រីកការផ្សព្វផ្សាយពីគោលដៅទេសចរណ៍កម្ពុជាឱ្យបានកាន់តែទូលំទូលាយថែមទៀត ពិសេសតំបន់សៀមរាបអង្គរ និងតំបន់អេកូទេសចរណ៍។ ដោយបង្កើតផលិតផលទេសចរណ៍ថ្មីៗប្រកបដោយភាពច្នៃប្រឌិត ដូចជាទេសចរណ៍ម្ហូបអាហារ វិថីលក់ម្ហូបអាហារ និងផលិតផលម្ហូបអាហារតាមដងផ្លូវ ក្រោមកិច្ចសហការភាពជាដៃគូរវាងរដ្ឋ-ឯកជន ដើម្បីទាក់ទាញទេសចរ និងបង្កើនរយៈពេលស្នាក់នៅរបស់ពួកគេ។

រៀបចំផែនការមេសម្រាប់ការអភិវឌ្ឍខេត្តសៀមរាប និងតំបន់ជុំវិញដ៏មានសារៈសំខាន់ ដូចជាការសិក្សាលើការបង្កើតផលិតផលទេសចរណ៍ថ្មីៗ លើសពីអ្វីដែលមានស្រាប់នៅតំបន់អង្គរ ការសិក្សាលើការអភិវឌ្ឍ និងពង្រីកប្រព័ន្ធហេដ្ឋារចនាសម្ព័ន្ធនានា ការសិក្សាអំពីការរៀបចំ និងគ្រប់គ្រងបរិស្ថានស្អាត និងបៃតងនៅក្រុងសៀមរាប និងតំបន់ប្រាសាទអង្គរ ការរៀបចំកែលម្អផ្លូវក្នុងទីក្រុង ការសម្អាតតាមដងស្ទឹងសៀមរាប និងផ្លូវទៅកាន់សហគមន៍នានាជាដើម។

បន្ថែមលើនេះ រាជរដ្ឋាភិបាលបាននិងកំពុងខិតខំប្រឹងប្រែងយ៉ាងសកម្មក្នុងការគ្រប់គ្រងអភិវឌ្ឍន៍ខេត្តព្រះសីហនុ ជាពិសេសលើហេដ្ឋារចនាសម្ព័ន្ធ ការគ្រប់គ្រងសំណល់សំរាម និងបរិស្ថានស្អាតនៅឆ្នេរ និងទឹកសមុទ្រ ព្រមទាំងសោភណភាពរបស់ខេត្តដើម្បីផាសុកភាពរបស់អ្នកទេសចរ និងប្រជាពលរដ្ឋ។

ក្រសួងទេសចរណ៍កំពុងសហការជាមួយក្រសួង ស្ថាប័ន អាជ្ញាធរពាក់ព័ន្ធដើម្បីរៀបចំផែនការមេអភិវឌ្ឍន៍ទេសចរណ៍នៅខេត្តកែប និងមណ្ឌលគិរី និងបានធ្វើកំណែទម្រង់ដ៏សំខាន់មួយ តាមរយៈការបង្កើតក្រុមប្រឹក្សាភិបាលសិក្សាទីផ្សារ និងផ្សព្វផ្សាយ ដោយផ្តល់តម្លៃដល់វិស័យឯកជន ក្នុងការបន្តចូលរួមអភិវឌ្ឍន៍វិស័យទេសចរណ៍ឱ្យកាន់តែខ្លាំងក្លាថែមទៀត។

ក្នុងនោះដែរ ការផ្សារភ្ជាប់វិស័យទេសចរណ៍កម្ពុជាទៅនឹងបដិវត្តន៍ឧស្សាហកម្ម4.0 ដែលផ្តោតខ្លាំងទៅលើឌីជីថលូបនីយកម្មក្នុងការចាប់យកការអភិវឌ្ឍជាវិជ្ជមាន កាត់បន្ថយកង្វល់ និងធានាឱ្យបាននូវទស្សនទាន “បច្ចេកវិទ្យាទំនើបសម្រាប់វិស័យទេសចរណ៍ វិស័យទេសចរណ៍សម្រាប់បច្ចេក-វិទ្យាទំនើប” ឬអាចហៅបានថា “ការអភិវឌ្ឍវិស័យទេសចរណ៍ ប្រកបដោយភាពវៃឆ្លាត”៕

October 26, 2019

មជ្ឈមណ្ឌលវេជ្ជសាស្រ្តសិង្ហបុរីកម្ពុជា (SGMC) ប្រារព្ធកម្មវិធីនៃខែផ្សព្វផ្សាយការយល់ដឹងអំពីជំងឺមហារីកសុដន់ ដោយរៀបចំកម្មវិធី Pink Talk ក្រោមប្រធានបទ៖ ការរកឃើញរោគសញ្ញាទាន់ពេលវេលាអាចជួយសង្គ្រោះជីវិតបាន

ថ្ងៃទី26 ខែតុលា ឆ្នាំ2019 រាជធានីភ្នំពេញ៖ មជ្ឈមណ្ឌលវេជ្ជសាស្រ្តសិង្ហបុរីកម្ពុជា (SGMC) ប្រារព្ធកម្មវិធីនៃខែផ្សព្វផ្សាយការយល់ដឹងអំពីជំងឺមហារីកសុដន់ (Breast Cancer Awareness Month) តាមរយៈការរៀបចំកម្មវិធី Pink Talk ក្រោមប្រធានបទ៖ ការរកឃើញរោគសញ្ញាទាន់ពេលវេលាអាចជួយសង្គ្រោះជីវិតបាន ដែលជាយុទ្ធនាការសុខភាពអន្តរជាតិប្រចាំឆ្នាំដើម្បីលើកកម្ពស់ការយល់ដឹងអំពីជំងឺមហារីកសុដន់។ កម្មវិធីនេះ គឺជាកម្មវិធីមួយក្នុងចំណោមកម្មវិធីពិភាក្សាបែបអប់រំផ្សេងៗ ដែលមជ្ឈមណ្ឌលវេជ្ជសាស្រ្តសិង្ហបុរីកម្ពុជា (SGMC) ខិតខំបង្កើតឡើង ដើម្បីផ្ដល់ព័ត៌មានមូលដ្ឋានពីសុខភាព ប៉ុន្តែមានសារសំខាន់ជូនដល់ប្រជាជនកម្ពុជា។

កម្មវិធីលើកកម្ពស់ការយល់ដឹងអំពីជំងឺមហារីកសុដន់ដំបូងរបស់មជ្ឈមណ្ឌលវេជ្ជសាស្រ្តសិង្ហបុរី
កម្ពុជា (SGMC) នៅក្នុងប្រទេសកម្ពុជា មានរៀបចំកិច្ចពិភាក្សា និងការធ្វើបទបង្ហាញអំពីការរកឃើញរោគសញ្ញាទាន់ពេលវេលា ដោយវេជ្ជបណ្ឌិតសាស្ត្រាចារ្យ Thay Sovannara ប្រចាំ SGMC ដែលជាគ្រូពេទ្យប្រចាំគ្រួសារ និងអ្នកជំនាញឯកទេសផ្នែកសុខភាពស្ត្រី។

កម្មវិធីដែលរៀបចំធ្វើឡើងនៅមជ្ឈមណ្ឌលវេជ្ជសាស្រ្ត និងសុខមាលភាពដ៏ទំនើប និងទើបតែបើកដំណើរការថ្មីរបស់ខ្លួននៅឯអគារដឹប្រ៊ីដស្ថិតនៅក្នុងសង្កាត់ទន្លេបាសាក់នេះ មានគោលបំណងលើកកម្ពស់ការយល់ដឹងអំពីជំងឺ តាមរយៈការស្វែងយល់អំពីមូលហេតុនៃជំងឺ វិធីសាស្រ្តបង្ការ និងការរកឃើញរោគសញ្ញាទាន់ពេលវេលា និងវិធីសាស្រ្តព្យាបាល។ កម្មវិធីពិភាក្សា Pink Talk នេះ ក៏នឹងបង្ហាញអំពីការគាំទ្ររបស់មជ្ឈមណ្ឌលវេជ្ជសាស្រ្តសិង្ហបុរីកម្ពុជា (SGMC) ចំពោះស្ត្រីដែលមានជំងឺមហារីកសុដន់ទាំងអស់ផងដែរ។ដោយសារតែស្ត្រីគ្រប់រូប មិនថាវ័យណាក៏ដោយ ក៏អាចនឹងកើតជំងឺមហារីកសុដន់បានដែរនោះ ទើបមជ្ឈមណ្ឌលវេជ្ជសាស្រ្តសិង្ហបុរីកម្ពុជា (SGMC) ស្នើសុំឱ្យស្ត្រីដែលមានអាយុចាប់ពី 40 ឆ្នាំឡើងអញ្ជើញទៅធ្វើការប្រឹក្សាយោបល់ និងត្រូវធ្វើការពិនិត្យរកជំងឺមហារីកសុដន់នេះឱ្យបានយ៉ាងតិចម្ដងក្នុងមួយឆ្នាំ។ ការពិនិត្យរកជំងឺមហារីកសុដន់ពិតជាមានសារៈសំខាន់ខ្លាំងណាស់សម្រាប់ស្ត្រីដែលមានវ័យចាប់ពី 50 ឆ្នាំឡើងទៅ។

មជ្ឈមណ្ឌលវេជ្ជសាស្រ្តសិង្ហបុរីកម្ពុជា (SGMC) មានឧបករណ៍ពិនិត្យសុដន់ (mammograms) ដែលពិនិត្យជូននៅក្នុងតម្លៃសមរម្យ ដើម្បីជួយស្ត្រីកម្ពុជាឱ្យទទួលបានការពិនិត្យជំងឺបានទាន់ពេលវេលា ការធ្វើរោគវិនិច្ឆ័យ និងការព្យាបាលជាដើម។ ជំងឺមហារីកសុដន់ គឺជាជំងឺដ៏កាចសាហាវលំដាប់ថ្នាក់ទីបីចំពោះស្ត្រីនៅក្នុងប្រទេសកម្ពុជា ដែលបានសម្លាប់ស្ត្រីដែលមានជំងឺនេះប្រមាណជា 7% ក្នុងមួយឆ្នាំ។ ទោះបីយ៉ាងណា អត្រានៃការរស់រានមានជីវិតកើនឡើងខ្ពស់ផងដែរ នៅពេលយើងរកឃើញរោគសញ្ញាទាន់ពេលវេលា តាមរយៈការពិនិត្យសុដន់។លោកស្រីវេជ្ជបណ្ឌិត Thay ក៏បានពិភាក្សា និងឆ្លើយតបទៅនឹងសំណួរពាក់ព័ន្ធនឹងកត្តាហានិភ័យដែលអាចបង្កើតឱកាសនាំឱ្យមានជំងឺមហារីកសុដន់ រោគសញ្ញា និងសញ្ញាសំខាន់ៗ របៀបការពារជំងឺមហារីកសុដន់ និងវិធីត្រួតពិនិត្យដោយខ្លួនឯង។ លោកស្រីបានសង្កត់ធ្ងន់អំពីសារៈសំខាន់នៃការពិនិត្យជំងឺមហារីកសុដន់ជាប្រចាំ ការត្រួតពិនិត្យសុដន់ដោយខ្លួនឯងជារៀងរាល់ខែ និងការរក្សារបៀបរស់នៅប្រកបដោយសុខភាពល្អផងដែរ។

លោកស្រីវេជ្ជបណ្ឌិត Thay Sovannara មានប្រសាសន៍ថា “នៅក្នុងមជ្ឈមណ្ឌលវេជ្ជសាស្រ្តសិង្ហបុរី យើងយកចិត្តទុកដាក់យ៉ាងខ្លាំងចំពោះសុខភាព និងសុខមាលភាពរបស់អ្នកជំងឺ និងមនុស្សគ្រប់គ្នា។ កម្មវិធីផ្សេង ដូចជាកិច្ចពិភាក្សា Pink Talk នេះ ជួយយើងទាំងអស់គ្នាឱ្យយល់ដឹងអំពីជំងឺមហារីកសុដន់ វិធីការពារ ក៏ដូចជាកាត់បន្ថយហានិភ័យផ្សេងៗនៃជំងឺនេះផងដែរ។” លោកស្រីបានបន្តទៀតថា “ខែនៃការយល់ដឹងអំពីជំងឺមហារីកសុដន់ គឺជា ពេលវេលាដ៏ល្អ ក្នុងការរំឭកឱ្យស្ត្រីនៅក្នុងគ្រួសាររបស់យើងធ្វើការត្រួតពិនិត្យស្វែងរករោគសញ្ញានៃជំងឺនេះ។ យើងពិតជាមានមោទនភាពយ៉ាងខ្លាំងដែលបានរៀបចំកម្មវិធីនេះឡើង និងកម្មវិធីផ្សេងៗទៀតនៅក្នុងសហគមន៍ ក៏ដូចជាធានាឱ្យមានជម្រើសថែរក្សាអាយុជីវិតសម្រាប់មនុស្សជាទីស្រឡាញ់ ព្រមទាំងគ្រួសារ និងមិត្តភិក្តរបស់អ្នកផងដែរ។ដោយផ្អែកទៅលើជំនឿថា មនុស្សគ្រប់រូបស័ក្តិសមនឹងទទួលបាននូវការថែទាំផ្នែកវេជ្ជសាស្ត្រដែលប្រកបដោយគុណភាព និងអាចជឿទុកចិត្តបានខ្ពស់ យើងអនុវត្តនូវវិធីសាស្រ្តគ្រប់ជ្រុងជ្រោយដែលផ្ដល់នូវសេវាកម្មថែទាំសុខភាពគុណភាពខ្ពស់ និងសុខុមាលភាពបែបវេជ្ជសាស្ត្រ។ ប្រកបដោយទឹកចិត្តល្អប្រពៃ និងមានលក្ខណៈបុគ្គលដោយផ្អែកលើការព្យាបាលវេជ្ជសាស្រ្ត ដំណើរការ និងស្តង់ដារដែលផ្អែកលើភស្តុតាងបញ្ជាក់ច្បាស់លាស់។ ក្រុមវេជ្ជបណ្ឌិតដ៏មានទេពកោសល្យចម្រុះគ្នា
គិលានុបដ្ឋាក ឱសថការី និងគ្រូពេទ្យជំនាញថតកាំរស្មីរបស់យើង គឺមកពីប្រទេសសិង្ហបុរី ថៃ និងកម្ពុជា ដែលសុទ្ធតែត្រូវបានគេទទួលស្គាល់ជាលក្ខណៈអន្តរជាតិថាជាអ្នកឯកទេសតាមឯកទេសវេជ្ជសាស្ត្ររៀងៗខ្លួន។

ដោយសង្កត់ធ្ងន់ទៅលើឱសថ និងការព្យាបាលការពារ និងបង្កើតកោសិកាថ្មី សេវាកម្ម SGMC ត្រូវបាន
កសាងដើម្បីទទួលបានសុខមាលភាពទៅលើគ្រប់ផ្នែក រៀបចំឡើងដើម្បីផ្ដល់នូវសុខភាពល្អសម្រាប់គ្រប់សរីរាង្គទាំងអស់ ដោយមិនគ្រាន់តែព្យាបាលទៅលើរោគសញ្ញាដែលមានលក្ខណៈធ្ងន់ធ្ងរឡើយ។ SGMC មានការប្ដេជ្ញាចិត្តខ្ពស់នៅក្នុងការកសាងគោលដៅនៃការរស់នៅប្រកបដោយសុខុមាលភាពដំបូងគេ និងល្អជាងគេនៅក្នុងប្រទេសកម្ពុជា។

សម្រាប់ព័ត៌មានបន្ថែម សូមទំនាក់ទំនង៖
ក្រុមហ៊ុន Two Way Public Relations ជាន់ទី 2 លេខ 5 អគារ Rise ផ្លូវលេខ 282 បឹងកេងកង 1រាជធានីភ្នំពេញ ប្រទេសកម្ពុជា

[email protected]
www.twowaypr.com

ព័ត៌មានអំពីមជ្ឈមណ្ឌលវេជ្ជសាស្រ្តសិង្ហបុរី
មជ្ឈមណ្ឌលវេជ្ជសាស្រ្តសិង្ហបុរីកម្ពុជា ដែលជាសមាជិកនៃគ្រួសារ DrMap នៃមជ្ឈមណ្ឌលវេជ្ជសាស្រ្ត ត្រូវបានបង្កើតឡើងដោយមានគោលដៅចម្បងក្នុងការផ្ដល់នូវបទដ្ឋានវេជ្ជសាស្រ្តប្រកបដោយឧត្តមភាពរបស់ប្រទេសសិង្ហបុរីជូនដល់ប្រជាជនកម្ពុជា។ ដោយផ្អែកទៅលើជំនឿថា មនុស្សគ្រប់រូបស័ក្តិសមនឹងទទួលបាននូវការថែទាំផ្នែកវេជ្ជសាស្ត្រដែលប្រកបដោយគុណភាព និងអាចជឿទុកចិត្តបានខ្ពស់ យើងអនុវត្តនូវវិធីសាស្រ្តគ្រប់ជ្រុងជ្រោយដែលផ្ដល់នូវសេវាកម្មថែទាំសុខភាពគុណភាពខ្ពស់ និងសុខុមាលភាពបែបវេជ្ជសាស្ត្រ។ ប្រកបដោយទឹកចិត្តល្អប្រពៃ និងមានលក្ខណៈបុគ្គលដោយផ្អែកលើការព្យាបាលវេជ្ជសាស្រ្ត ដំណើរការ និងស្តង់ដារដែលផ្អែកលើភស្តុតាងបញ្ជាក់ច្បាស់លាស់ យើងធ្វើការព្យាបាល និងធ្វើរោគវិនិច្ឆ័យជំងឺ ព្រមទាំងផ្ដល់ជូនអ្នកជំងឺរបស់ខ្លួននូវមធ្យោបាយដើម្បីទទួលបានសុខភាព និងសុខុមាលភាពល្អប្រសើរ។

October 26, 2019

ទោះស្ថិតក្នុងជំនាន់ឌីជីថលក៏ដោយ ក៏យុវជនគួរសិក្សាពីប្រវត្តិសាស្ត្រ និងអក្សរសាស្ត្រឱ្យច្បាស់ដែរ

បច្ចុប្បន្ននេះជាសម័យដែលសកលលោកមានការរីកចម្រើនយ៉ាងឆាប់រហ័ស ជាពិសេសផ្នែកបច្ចេកវិទ្យា។ គ្រប់ប្រទេសទាំងអស់សុទ្ធតែជំរុញឱ្យប្រជាជនចាប់ផ្តើមសិក្សាលើផ្នែកបច្ចេកវិទ្យាដើម្បីឆ្លើយតបជាមួយនឹងទីផ្សាការងារក្នុងយុគសម័យឌីជីថល រួមទាំងការប្រកួតប្រជែងជាអន្តរជាតិទៀតផង តែទោះជាយ៉ាងនេះក្តី ក៏ប្រទេសនីមួយៗមិនភ្លេចដែរ ក្នុងការជំរុញឱ្យប្រជាពលរដ្ឋរបស់ខ្លួនសិក្សាឱ្យបានច្បាស់ពីប្រវត្តិសាស្ត្រ និងរាល់ចំណុចសំខាន់ៗដែលជាមូលដ្ឋានគ្រឹះសម្រាប់ប្រទេសរបស់ខ្លួន។

ឯកឧត្តមបណ្ឌិតសភាចារ្យ ហង់ជួន ណារ៉ុន បានលើកឡើងថា យុវជនគួរធ្វើការស្រាវជ្រាវអំពីប្រវត្តិវិទ្យា និងភាសាខ្មែរឱ្យបានទូលំទូលាយ ទោះស្ថិតក្នុងយុគសម័យបច្ចេកវិទ្យាក៏ដោយ។ បច្ចុប្បន្ននេះ កម្ពុជាបានរៀបចំប្រព័ន្ធអប់រំកាន់តែប្រសើរ ដែលធ្វើឱ្យអ្នកសិក្សាស្រាវជ្រាវកាន់តែងាយស្រួលក្នុងការសិក្សាស្រាវជ្រាវពីប្រវត្តិសាស្ត្រ និងអក្សរសាស្ត្ររបស់ខ្មែរ។

ឯកឧត្តមមានប្រសាសន៍ថា ការសិក្សាពីប្រវត្តិសាស្ត្រអតីតកាល បូករួមជាមួយនឹងការដឹងច្បាស់ពីស្ថានភាពជាក់ស្តែងនាបច្ចុប្បន្នកាលនោះ នឹងធ្វើឱ្យយើងអាចរៀបចំផែនការបានកាន់តែប្រសើរសម្រាប់អនាគតកាល។ នៅពេលយើងស្គាល់ខ្លួនឯងច្បាស់ហើយ ទោះស្ថិតក្នុងកាលៈទេសៈណា ក៏យើងនៅតែអាចរក្សាបាននូវតម្លៃ និងវប្បធម៌ដែលជាអត្តសញ្ញាណរបស់យើងបានយ៉ាងល្អប្រសើរដែរ។

ឯកឧត្តម ហង់ជួន ណារ៉ុន មានប្រសាសន៍ថា៖ “ប្រវត្តិសាស្ត្រ និងភាសាខ្មែរ មានអាយុកាលយូរមុនភាសានៅអឺរ៉ុប ហេតុនេះការព្យាយាមសិក្សាស្រាវជ្រាវឱ្យបានស្គាល់ច្បាស់ពីភាសាខ្មែរ គឺជាកិច្ចការដ៏សំខាន់សម្រាប់យុវជនកម្ពុជា”។

បើតាមឯកឧត្តមរដ្ឋមន្ត្រី ប្រវត្តិសាស្ត្រជាមេរៀនយ៉ាងសំខាន់ ឬជាមូលដ្ឋានក្នុងការដោះស្រាយបញ្ហានានាក្នុងការរស់នៅ និងការធ្វើការងារជាដើម។ នៅក្នុងមេរៀនប្រវត្តិវិទ្យា គេបានលើកឡើងពីរឿងរ៉ាវយ៉ាងមានសារៈសំខាន់ជាច្រើនដែលបុគ្គលសំខាន់ៗធ្វើការដោះស្រាយបញ្ហានានារហូតសម្រេចបានជាផ្លែផ្កាយ៉ាងសំខាន់សម្រាប់សង្គម ក៏ដូចជាសម្រាប់ការរស់នៅរបស់មនុស្សជាដើម។ ហេតុនេះការសិក្សាពីប្រវត្តិសាស្ត្រ ជាការសិក្សាពីរឿងរ៉ាវ ឬមេរៀនជាក់ស្តែងពីអតីតកាលដើម្បីទុកជាទុននៃគំនិតសម្រាប់យកមកប្រើប្រាស់នាពេលអនាគត។ ទោះជាយ៉ាងនេះក្តី ឯកឧត្តមរដ្ឋមន្ត្រីក៏បានជំរុញផងដែរឱ្យយុវជនសិក្សាបន្ថែមពីភាសាបរទេសមួយចំនួន ដូចជាភាសាបារាំង និងភាសាអង់គ្លេសជាដើម ដើម្បីបន្តស្វែងរកឯកសារដែលគេបានចងក្រងជាភាសាបរទេសទាំងអស់នោះអំពីប្រវត្តិសាស្ត្រ និងអក្សរសាស្រ្តខ្មែរ បន្ថែមពីលើអ្វីដែលយើងមានស្រាប់។

បន្ទាប់មកទៀត យុវជនក៏អាចសិក្សាបន្ថែមផងដែរពីវប្បធម៌នៃសកលភាវូបនីយកម្ម ដើម្បីបង្កើនគំនិតឱ្យកាន់តែទូលំទូលាយក្រោយពេលស្គាល់ពីមូលដ្ឋានគ្រឹះរបស់ខ្លួនឯងរួចហើយ៕

October 26, 2019

Author: ធឿន មករា