ធឿន មករា - La Reine Media

ដោយសារក្រុមថ្នាលយុវជនរបស់ Hanoi FC គ្មានសកម្មភាពអ្វីសោះ ត្រូវ AFC ពិន័យយ៉ាងធ្ងន់ក

សហព័ន្ធកីឡាបាល់ទាត់ប្រចាំទ្វីបអាស៊ី (AFC) បានពិន័យ និងដកសិទ្ធិក្រុមបាល់ទាត់ដែលជាជើងឯកលីកកំពូលរបស់វៀតណាមរដូវកាល2019 នេះ មិនឱ្យចូលរួមលេងក្នុងពានរង្វាន់ធំៗចំនួន2 របស់ទ្វីបនេះគឺ AFC CUP និង AFC Champions League ដោយសារក្លិបនេះមិនបានបំពេញគ្រប់លក្ខខណ្ឌនិងបានបន្លំលេងក្នុងពានរង្វាន់នេះកាលពីឆ្នាំមុន។

ចំពោះមូលហេតុនៃការបាត់បង់កៅអីពានរង្វាន់ធំៗប្រចាំទ្វីបទាំងនេះ គឺដោយសារតែក្រុមយុវជនអាយុក្រោម 15ឆ្នាំរបស់ក្លិប មិនបានចូលរួមប្រកួតក្នុងពានយុវជនអាយុក្រោម 15ឆ្នាំរបស់សហព័ន្ធកីឡាបាល់ទាត់វៀតណាម ដោយក្លិបមួយនេះបានបញ្ជូនកីឡាកររបស់គេទៅហ្វឹកហាត់នៅអឺរ៉ុបជំនួសវិញ។

ការបាត់បង់ឱកាសមាសរបស់ក្លិប Hanoi FC បានធ្វើឱ្យក្រុមលេខ2 គឺ TP Ho Chi Minh ទទួលបានកៅអីមួយនេះជំនួសវិញ ដោយត្រូវលេងក្នុងវគ្គជម្រុះពាន AFC Champions League ប្រសិនបើធ្លាក់ ក្រុមនេះនឹងចូលរួមពាន AFC CUP 2020។

October 30, 2019

ច្បាស់ការហើយ Felix និង Honda គឺជាអ្នកដឹកនាំកម្ពុជាក្នុងព្រឹត្តិការណ៍ SEA GAMES

ការប្រកួតកីឡាតំបន់អាស៊ីអាគ្នេយ៍ ឬស៊ីហ្គេមនាចុងឆ្នាំ2019 នេះ នៅប្រទេសហ្វីលីពីនក្នុងវិញ្ញាសាបាល់ទាត់ គ្រូបង្វឹកគឺជាលោក Félix Dalmas ចំណែកឯអ្នកចាត់ការក្រុម គឺលោក Keisuke Honda នេះបើតាមការបញ្ជាក់ពីមន្ត្រីសហព័ន្ធកីឡាបាល់ទាត់ម្នាក់។

មិនខុសពីរាល់ដងទេ ដែលគ្រូបង្វឹកជម្រើសជាតិកម្ពុជាតែងតែដឹកនាំក្រុមយុវជនឈុតស៊ីហ្គេម តែអ្វីដែលសំអាងមួយទៀតនោះគឺ កាលពីពាន AFF U22 Championship 2018 ដែលគ្រានោះកម្ពុជាធ្វើជាម្ចាស់ផ្ទះ កាលនោះ គឺស្ថិតនៅក្រោមការដឹកនាំរបស់ជនបរទេសទាំង 2រូបនេះដូចគ្នា ដោយក្រុមយុវជនគោព្រៃកម្ពុជាធ្វើបានយ៉ាងល្អ និងបានទទួលចំណាត់ថ្នាក់លេខ4 ទៀតផង។

គួរបញ្ជាក់ផងដែរថា ស៊ីហ្គេមចុងឆ្នាំនេះនៅហ្វីលីពីន ត្រូវបានអនុញ្ញាតឱ្យមានកីឡាករលើសអាយុក្នុងក្រុមចំនួន 2រូប និង តម្រូវឱ្យមានសមាសភាពកីឡាករសរុបទាំងអស់តែ 20រូបប៉ុណ្ណោះ៕

October 30, 2019

សហព័ន្ធកីឡាបាល់ទាត់កម្ពុជាផ្លាស់ប្តូរកាលបរិច្ឆេទលក់សំបុត្រការប្រកួត AFC U-19 Championship

សហព័ន្ធកីឡាបាល់ទាត់កម្ពុជាបានប្រកាសអំពីការផ្លាស់ប្តូរកាលបរិច្ឆេទលក់សំបុត្រ សម្រាប់ទស្សនាការប្រកួត AFC U-19 Championship 2020 Qualifiers, East Zone, ពូល G ដែលកាលពីពេលកន្លងទៅសហព័ន្ធបានប្រកាសថា នឹងចាប់ផ្តើមលក់នៅថ្ងៃទី28 ខែវិច្ឆិកា។

ចំពោះកាលបរិច្ឆេទលក់សំបុត្រថ្មីនេះ នឹងលើកពេលពីថ្ងៃទី28 ខែវិច្ឆិកា ឆ្នាំ2019 ទៅថ្ងៃទី31 ខែវិច្ឆិកា ឆ្នាំ2019 វិញ ដោយសារមានការកែសម្រួលរចនាប័ទ្មឌីហ្សាញសំបុត្រតាមការស្នើសុំពីគណៈកម្មការរៀបចំការប្រកួតរបស់សហព័ន្ធកីឡាបាល់ទាត់ទ្វីបអាស៊ី (AFC) ដើម្បីឱ្យត្រូវតាមស្តង់ដាអន្តរជាតិ។

គួររំឭកដែរថា ការប្រកួតវគ្គជម្រុះ AFC U-19 Championship 2020 ប្រចាំពូល G ដែលកម្ពុជាធ្វើជាម្ចាស់ផ្ទះនេះ មានប្រទេសមកចូលរួមចំនួន5 រួមមានម្ចាស់ផ្ទះកម្ពុជា ថៃ ម៉ាឡេស៊ី ប្រ៊ុយណេ និងកោះម៉ារីណាខាងជើង៕

October 30, 2019

ចេញហើយ! បញ្ជីឈ្មោះចុងក្រោយ សម្រាប់វគ្គជម្រុះ U19

កម្ពុជានឹងធ្វើជាម្ចាស់ផ្ទះការប្រកួតវគ្គជម្រុះ AFC U-19 Championship 2020 ប្រចាំពូល G ដែលមានប្រទេសមកចូលរួមចំនួន5 រួមមានម្ចាស់ផ្ទះកម្ពុជា ថៃ ម៉ាឡេស៊ី ប្រ៊ុយណេ និងកោះម៉ារីណាខាងជើង ដែលនឹងចាប់ផ្ដើមពីថ្ងៃទី2 ដល់ទី10 ខែវិច្ឆិកា ឆ្នាំ2019 នៅពហុកីឡដ្ឋានជាតិនៃប្រទេសកម្ពុជា។ចំពោះក្រុមខ្លាំងប្រចាំពូលតែ 1គត់នឹងបានឡើងទៅប្រកួតពានរង្វាន់យុវជនអាយុក្រោម 19ឆ្នាំអាស៊ី ប្រចាំឆ្នាំ2019 នៅប្រទេសអ៊ូសបេគីស្ថាន ចាប់ពីថ្ងៃទី14 ដល់ 31 ខែតុលា ឆ្នាំ2019។ក្នុងពានរង្វាន់នេះដែរ កាលពីលើកមុនកម្ពុជាស្ថិតនៅក្នុងពូលជាមួយចិន មីយ៉ាន់ម៉ា និងហ្វីលីពីន ហើយនៅពេលនោះ កម្ពុជាស្ទើរតែបានឡើងទៅប្រកួតវគ្គចាប់ពូលប្រចាំទ្វីបអាស៊ីទៅហើយ ដោយកាលនោះម៉ាឡេស៊ីបានឡើងទៅវគ្គបន្តទោះបីជាមានពិន្ទុស្មើកម្ពុជាក៏ដោយ តែមានគ្រាប់បាល់លើសកម្ពុជាតែ 1គ្រាប់ប៉ុណ្ណោះ៕

October 30, 2019

តំបន់ទេសចរណ៍សំខាន់ៗក្នុងតំបន់អាស៊ានសម្រាប់គូស្វាមីថ្មោងថ្មីទៅកម្សាន្តក្រោយរៀបអាពាហ៍ពិពាហ៍

1. កម្ពុជា : ព្រះរាជាណាចក្រកម្ពុជាត្រូវបានសាកលលោកទទួលស្គាល់ថា ជាប្រទេសដែលមានវប្បធម៌ អរិយធម៌ដ៏ផូរផង់ និងមានវ័យចំណាស់ជាងគេនៅក្នុងតំបន់អាស៊ី។ ដោយឡែកសម្រាប់តំបន់កម្សាន្ត ឬតំបន់ទេសចរណ៍វិញ ក៏មានច្រើនអណេករាប់មិនអស់ ដែលក្នុងនោះមានទាំងតំបន់ទេសចរណ៍វប្បធម៌ធម្មជាតិ និងតំបន់ទេសចរណ៍បែបកែច្នៃ។ ហើយសម្រាប់តំបន់ដែលស័ក្ដិសមបំផុតសម្រាប់គូស្វាមីភរិយាថ្មោងថ្មីកម្សាន្តអារម្មណ៍នៅក្នុងដំណើរក្រេបចន្ទទឹកឃ្មុំនាពេលនេះ គឺរួមមានដូចជា តំបន់ដែលស្ថិតនៅភាគឦសាន (ខេត្តមណ្ឌលគីរី និងរតនៈគិរី), តំបន់សមុទ្រនាក្រុងកំពង់សោម កំពត ជាពិសេស នៅលើកំពូលភ្នំឋានសួគ៌បូកគោដែលមានអាកាសធាតុត្រជាក់គ្រប់រដូវកាល។

2. ម៉ាឡេស៊ី : ថ្វីដ្បិតតែម៉ាឡេស៊ីជាប្រទេសដែលនៅជិតព្រះរាជាណាចក្រកម្ពុជាក៏ពិតមែន ប៉ុន្តែប្រទេសនេះក៏ជាតំបន់ដែលមានការពេញនិយមយ៉ាងសម្បើមពីសំណាក់ភ្ញៀវទេសចរមិនចាញ់បណ្តាប្រទេសជិតខាងខ្លួនមួយចំនួនទៀតនោះឡើយ។ នៅម៉ាឡេស៊ី មានទីកម្សាន្តដ៏អស្ចារ្យជាច្រើនដូចជា៖អគារភ្លោះខ្ពស់កប់ពពក ដែលជានិមិត្តសញ្ញានៃប្រទេសមួយនេះ រួមជាមួយនឹងក្លោងទ្វារព្រះរាជវាំង វិមានវីរជន និងដងទង់ជាតិឯករាជ្យ។ បន្ថែមពីនេះនៅមានកំពូលភ្នំហ្គេនធីង ដែលទីនេះលោកអ្នកអាចរីករាយជាមួយការជិះកន្ត្រកខ្សែកាប ដែលមានប្រវែងវែងជាងគេនៅអាស៊ីអាគ្នេយ៍ ក៏ដូចជារមណីយដ្ឋាន និងកាស៊ីណូដ៏ធំនៅលើកំពូលភ្នំ ជាមួយនឹងអាកាសធាតុដ៏សែនត្រជាក់នារដូវចុងឆ្នាំផងដែរ។ ក្រៅពីនេះ នៅមានសួនឧទ្យានឌែមផាក, រូងភ្នំខ្យល់ខ្មៅ, ហាងលក់ផលិតផលក្នុងស្រុក និងហាងលក់ត្បូងពេជ្រដ៏សម្បូរបែបប្រចាំនៅទីក្រុងម៉ាឡាកា នៃប្រទេសម៉ាឡេស៊ី។

3. ហុងកុង : ហុងកុង គឺជាកោះដ៏តូចមួយ តែមានសក្តានុពលផ្នែកវិស័យពាណិជ្ជកម្មយ៉ាងខ្លាំងក្លា និងជាទីក្រុងស្វយ័តរបស់ប្រទេសចិន។ ដោយសារតែភាពលេចធ្លោផ្នែកសេដ្ឋកិច្ច ក៏ដូចជាការអភិវឌ្ឍក្នុងតំបន់មានកំណើនឥតឈប់ឈរ ជាពិសេសវិស័យហេដ្ឋារចនាសម្ពន្ធរួមមានដូចជា អគារខ្ពស់ៗជាច្រើន ផ្លូវថ្នល់ ផ្លូវក្រោមដី លើអាកាស និងស្ពានខ្វាត់ខ្វែងស្អេកស្កះ ក៏ដូចជាការអភិវឌ្ឍកែច្នៃតំបន់កម្សាន្តមួយចំនួនផងនោះបានធ្វើឱ្យទីក្រុងមួយនេះមានការចាប់អារម្មណ៍យ៉ាងខ្លាំងពីសំណាក់ភ្ញៀវទេសចររហូតត្រូវបានគេដាក់រហស្សនាមឱ្យថា ជាទីក្រុងគជ់ ដ្បិតនៅហុងកុងមានភាពស្រស់ស្អាតគួរជាទីទាក់ទាញបំផុតនាពេលរាត្រី។ ក្រៅពីនេះហុងកុង ក៏មានតំបន់កម្សាន្តជាច្រើនទៀតរាប់ទាំងរមណីយដ្ឋានបែបធម្មជាតិ, វប្បធម៌ និងបែបកែច្នៃផ្សេងទៀត ដែលសុទ្ធតែកំពុងមានការពេញនិយមជាខ្លាំង ដូចជា សួនឧទ្យានឌីសនីឡែន, ទស្សនាពិភពបាតសមុទ្រជាមួយនឹងសម្រស់ផ្កាថ្ម និងហ្វូងត្រីតូចធំចម្រុះ, ការជិះរទេះភ្លើងក្នុងល្បឿនលឿនជិះកន្ត្រកខ្សែកាបទស្សនាសម្រស់ធម្មជាតិនៃជ្រលងភ្នំ ក៏ដូចជាទៅកម្សាន្តនៅសួនសត្វខ្លាឃ្មុំដ៏គួរឱ្យស្រឡាញ់ជាដើម។

4. កូរ៉េ : នៅក្នុងប្រទេសកូរ៉េសម្រាប់អាកាសធាតុនាអំឡុងចុងឆ្នាំ វាហាក់ដូចជាមានអាកាសធាតុត្រជាក់ខ្លាំងបន្តិចបើប្រៀបធៀបនឹងអាកាសធាតុនារដូវធ្លាក់ខ្យល់នៅក្នុងប្រទេសកម្ពុជា។ ប៉ុន្តែបើនិយាយពីទិដ្ឋភាព និងភាពទាក់ទាញចំពោះប្រទេសកូរ៉េនៅក្នុងរដូវនេះគឺបានអូសទាញនិងស្រូបយកបណ្តាភ្ញៀវទេសចរចម្រុះជាតិសាសន៍ជាច្រើននៅទូទាំងសាកលលោកឱ្យមកទស្សនាកម្សាន្តយ៉ាងច្រើនកុះករ។ ដោយឡែកនៅក្នុងឱកាសចុងឆ្នាំ និងមានពិធីបុណ្យជិះស្គីលេងនៅលើព្រិលទឹកកកដែលគេប្រារព្វធ្វើឡើងជារៀងរាល់ឆ្នាំនៅទីលានដ៏ស្រស់ស្អាតមួយស្ថិតនៅក្នុងរមណីដ្ឋានភ្នំព្រិល (Yong Pyong Ski Resort) ស្ថិតនៅក្បែរឧទ្យានជាតិភ្នំសូរ៉ាក់សាន ឬហៅថាកំពូលភ្នំព្រិលនៅលើជួរភ្នំថាយប៉ាយ ហើយភ្ញៀវទេសចរទាំងអស់អាចទៅកម្សាន្តជាលក្ខណៈគ្រួសារ ឬលក្ខណៈគូស្វាមីភរិយាយ៉ាងសប្បាយរីករាយក្រៃលែង។ បន្ថែមពីនេះក៏អាចបន្តដំណើរទៅទីក្រុងសេអ៊ូលដែលជាមណ្ឌលសេដ្ឋកិច្ចនៃប្រទេសកូរ៉េខាងត្បូង, ទស្សនាព្រះបរមរាជវាំងបុរាណក្យុងបុក, កោះណាមីុ, ព្រះវិហារបុរាណស៊ីញហេង, វិហារណាក់សានសា, ផ្សារទំនើបយេជូ, មជ្ឈមណ្ឌលគីមឈី ដែលជាម្អូបដ៏ល្បីឈ្មោះប្រចាំប្រទេសកូរ៉េ, ផ្សាររាត្រីម៉ីងតុង, ទៅទស្សនាពិភពបាតសមុទ្រ, រមណីយដ្ឋាន ឡតតេ វើលដ៍ រួមទាំងកន្លែងកម្សាន្តដ៏គួរឱ្យទាក់ទាញជាច្រើនទៀតរាប់មិនអស់។

5. ឥណ្ឌូណេស៊ី : ឥណ្ឌូណេស៊ី គឺជាប្រទេសសមាជិកមួយក្នុងអាស៊ាន ដែលមានអរិយធម៌ចំណាស់ និងជាប្រទេសដែលមានប្រជាជនកាន់សាសនាអីុស្លាមច្រើនជាងគេបំផុតនៅទូទាំងសាកលលោក។ បើនិយាយពីវិស័យទេសចរណ៍វិញ សម្រាប់ប្រទេសឥណ្ឌូណេស៊ី ហាក់មិនសូវខុសពីបណ្តាប្រទេសមួយចំនួនដែលស្ថិតនៅជិតខាងរបស់ខ្លួនឡើយ ពោលគឺអាចមានលទ្ធភាពទាក់ទាញភ្ញៀវទេសចរគ្រប់ទិសទីឱ្យមកចាប់អារម្មណ៍ទស្សនាតំបន់អច្ឆរិយៈដែលមានប្រាសាទបុរាណអាយុកាលរាប់រយឆ្នាំ រួមជាមួយនឹងតំបន់កម្សាន្តបែបធម្មជាតិ និងបែបកែច្នៃជាច្រើនកន្លែងផងដែរដូចជា ៖ ឧទ្យានជាតិ ប៊ូគីត បារីសាន សេឡាតាន (Bukit Barisan Selatan) កោះស៊ូម៉ាត្រា ឧទ្យានជាតិ ប៊ូគីត បារីសាន សេឡាតានឧទ្យានហ្គូនុង ឡេសឺរ កេរីនស៊ី សេប្លាត (Gunung Leuser Kerinci Seblat) ជាពិសេសតំបន់ព្រៃត្រូពិចដែលត្រូវបានអង្គការយូណេស្កូ (UNESCO) ទទួលស្គាល់ថាជាសម្បត្តិបេតិកភ័ណ្ឌពិភពលោកកាលពីឆ្នាំ2004។

6. មីយ៉ាន់ម៉ា : សម្រាប់មីយ៉ាន់ម៉ាក៏មានតំបន់អច្ឆរិយៈប្រចាំប្រទេសរបស់ខ្លួនដែរ ដែលក្នុងនោះរួមមានដូចជា ទន្លេអាយើវ៉ាឌីមានប្រវែងជាង2,000 គីឡូម៉ែត្រ, ប្រាសាទឈ្មោះ អាណានដា (Ananda) ដែលមានដំបូលរៀបចំជាជាន់ៗយ៉ាងច្រើន ព្រមជាមួយនឹងរូបសំណាកព្រះពុទ្ធរូបធ្វើពីមាសសុទ្ធ កម្ពស់9ម៉ែត្រចំនួន4អង្គ រួមជាមួយនឹងផ្ទាំងគំនូររាប់រយទៀត ដែលនិយាយពីដំណើរជីវិតរបស់ព្រះអង្គ។ ជាមួយគ្នានេះ ប្រាសាទដែលគួរឱ្យចាប់អារម្មណ៍ដូចគ្នានេះដែរគឺមានប្រាសាទ ស្វេស៊ីហ្គុន (Shwezigon) មានចេតិយមាស ដែលគេនិយាយតគ្នាថាមានផ្ទុកនូវធាតុដងកាំបិត និងព្រះទន្ដ(ធ្មេញ)របស់ព្រះពុទ្ធ។ បន្ថែមពីនេះនៅមានទីក្រុងបុរាណបាហ្គាន ទីក្រុងម៉ានដាឡៃ (Mandalay) ជាពិសេសគឺភូមិសម្បូររុក្ខជាតិមួយហៅថា កាថា (Katha) ដែលអាចដើររុករកដោយថ្មើរជើងយ៉ាងងាយស្រួលនៅពេលលោកអ្នកបានទៅដល់ទីនោះ និងមានប្រជាជនចម្រុះជាតិសាសន៍ ភូមា កាឈីន និងចិន។ ភូមិនេះក៏ជាទីតាំងដ៏ល្បីផងដែរសម្រាប់រឿងប្រលោមលោក Bur-mese Days របស់លោក George Orwell។

7. វៀតណាម : នៅក្នុងប្រទេសជិតខាង ដែលនៅទិសខាងកើតនៃព្រះរាជាណាចក្រកម្ពុជាមួយនេះក៏មានតំបន់កម្សាន្តច្រើនស្អេកស្កះមិនចាញ់បណ្តាប្រទេសនានាក្នុងតំបន់អាស៊ីដែរ។ ប៉ុន្តែសម្រាប់តំបន់ទេសចរណ៍ដែលល្បីឈ្មោះជាងគេ និងតែងទទួលបានភ្ញៀវយ៉ាងក្រាសក្រែលនាឱកាសចុងឆ្នាំនេះ គឺក្រុងដាឡាត់។ ដាឡាត់ គឺជាទីក្រុងដ៏ល្បីឈ្មោះមួយកន្លែងដែលត្រូវបានគេរកឃើញកាលពីអំឡុងសតវត្សរ៍ទី19 ស្ថិតនៅក្នុងទឹកដីនៃខេត្តឡាំដុង និងជាតំបន់ភ្នំមានរយៈកម្ពស់ប្រមាណ1,500ម៉ែត្រពីនេវ៉ូទឹកសមុទ្រ ដោយមានមនុស្សរស់នៅប្រមាណជាង20ម៉ឺននាក់ ប៉ុន្តែអាចទាក់ទាញភ្ញៀវទេសចរឱ្យចូលមកកម្សាន្តច្រើនជាងប្រជាជនក្នុងស្រុករហូតដល់ប្រមាណជាង10%។ លោកអ្នកអាចចំណាយពេលធ្វើដំណើរប្រមាណជាង4ម៉ោង ដើម្បីទៅដល់គោលដៅខាងលើដោយផ្ដើមចេញពីទីក្រុងហូជីម៉ិញនៃប្រទសវៀតណាម ឆ្លងកាត់តំបន់កម្សាន្តញ៉ាត្រាង។ នៅទីនេះក្រៅពីមានអាកាសធាតុត្រជាក់ល្អបែបធម្មជាតិ និងលម្អសោភ័ណ្ឌភាពទូទាំងតំបន់ទៅដោយសម្រស់នៃចំការផ្កាដែលត្រូវបានគេរៀបចំកែច្នៃយ៉ាងស្រស់ស្អាតពេញមួយឆ្នាំ ថែមទាំងមានធនធានធម្មជាតិយ៉ាងសម្បូរបែបមិនចាញ់តំបន់កម្សាន្តនៅតាមប្រទេសមួយចំនួនទៀតលើសាកលលោកនោះឡើយ ដែលក្នុងនោះរួមមានដូចជារុក្ខជាតិតូចធំដុះព្រោងព្រាតពណ៌ខៀវស្រងាត់ មានបឹងធម្មជាតិ តំបន់ទឹកជ្រោះ ជ្រលងភ្នំ និងសំណង់ទួអេហ្វហ្វែលជាដើម៕

October 30, 2019

អ្នកជំនាញ៖ វិស័យអចលនទ្រព្យបន្តរីកចម្រើនដដែល តែពង្រីកសក្តានុពលតំបន់សេដ្ឋកិច្ច

អ្នកជំនាញ និងអ្នកអភិវឌ្ឍន៍ក្នុងវិស័យអចលនទ្រព្យបានអះអាងថា នៅដំណាច់ឆ្នាំ2019នេះ ស្ថានភាពនៃការទិញ-លក់ ដីធ្លីដែលស្ថិតនៅតំបន់សេដ្ឋកិច្ចមួយចំនួន នៅតែមានសកម្មភាពដដែលទេ ប៉ុន្តែពាក់ព័ន្ធទៅនឹងតម្លៃហាក់នៅទ្រឹងបើធៀបទៅនឹងកាលពីអំឡុងដើមឆ្នាំដដែលនេះ។

លោកឧកញ៉ា នួន រិទ្ធី អគ្គនាយកក្រុមហ៊ុនអចលនទ្រព្យ Khmer Foundation Appraisal បានមានប្រសាសន៍ប្រាប់ឡារ៉ែន ពាណិជ្ជថា៖“ដូចជាមិនមានសញ្ញាណាមួយ បង្ហាញពីការប្រែប្រួលខ្លាំងគ្រាន់តែនៅតំបន់ខ្លះឃើញថាវាឡើងរហ័ស ដល់ពេលចាប់ផ្តើមមានការប្រែប្រួលគោលនយោបាយមួយចំនួន វានៅទ្រឹង។ វានៅទ្រឹងតម្លៃ តែក្នុងសកម្មភាពនៃការទិញ-លក់ មិនមានអ្វីប្រែប្រួលនោះទេ”។

ប៉ុន្តែលោកឧកញ៉ាបានទទួលស្គាល់ថា តម្លៃវាហាក់ដូចជានៅក្រោមទីផ្សារបន្តិច ដែលកើតមាននៅខេត្តព្រះសីហនុ តែលោកយល់ថា អ្នកវិនិយោគភាគច្រើន គឺពួកគេបានយល់ច្បាស់ពីស្ថានភាពនេះដែលវាមិនមែនជាការប្រថុយប្រថាននោះទេ ចំពោះតម្រូវការនៃវិស័យនេះ។ តែសម្រាប់តម្លៃនៅភ្នំពេញវានៅដដែល និងវិសាលភាពនៅតំបន់ជុំវិញភ្នំពេញវាអត់មានថមថយទេ។

ដោយឡែកពាក់ព័ន្ធទៅនឹងតម្លៃដី នៅក្នុងតំបន់មួយចំនួនលោកបានចាត់ទុកថាជាតំបន់សក្តានុពលសេដ្ឋកិច្ចដូចជាខេត្តមួយចំនួនមានប៉ោយប៉ែត សៀមរាប បាវិត ព្រះសីហនុ និងកំពតជាដើម នៅតែមានសកម្មភាពនៃការអភិវឌ្ឍទៅលើវិស័យអចលនទ្រព្យទៅតាមគម្រោងជាធម្មតា។

លោកឧកញ៉ា នួន រិទ្ធី បានបញ្ជាក់ប្រាប់ទៀតថា៖“ជាទូទៅនៅប៉ោយប៉ែត យើងឃើញថាជាខេត្តគោលដៅនៃទីក្រុងថ្មី ដែលជាទីក្រុងតភ្ជាប់ទីក្រុងប្រទេសថៃ និងកម្ពុជា។ អាចនិយាយថា វាជាតំបន់ដោះដូរទំនិញ ផងដែរ។ តំបន់ប៉ោយប៉ែតមកទល់ពេលនេះនៅអាចមានដំណើរការគម្រោង 2-3បន្ថែមទៀតបន្តទៅដើមឆ្នាំថ្មី។ អុីចឹងវាមិនមានអ្វីថមថយទេគ្រាន់តែកន្លងមកមានការជួលពីជនជាតិចិន ដែលគាត់មកប្រកបរបរអនឡាញ គឺវាមានភាពគំហុកនៅតំបន់ពាណិជ្ជកម្មច្រើន តែនៅតំបន់ឧស្សហកម្មវានៅតែមានសកម្មភាពដដែលធម្មតា“។

ពាក់ព័ន្ធតំបន់សេដ្ឋកិច្ចដទៃទៀតដូចជាផ្លូវ51ផ្លូវជាតិលេខ 3 វានៅតែមានសក្តានុពលដោយសារតែរាជរដ្ឋាភិបាលរក្សាស្ថិរភាព និងសន្តិសុខបានវាមិនធ្វើឱ្យមានផលប៉ះពាល់ដល់វិស័យនេះទេ តែ នៅក្នុងនោះតំបន់នីមួយៗ តែងមានផលកើនឡើងខ្លាំង និងផលប៉ះពាល់ក៏ខ្លាំងដែរ។ នេះបើតាមការ-បញ្ជាក់របស់លោកឧកញ៉ា។

លោកឧកញ៉ា នួន រិទ្ធី បានបញ្ជាក់ទៀតថា៖“សម្រាប់ខេត្តកំពត កែប មិនមានអ្វីកត់សម្គាល់ខ្លាំងដែរ វាមិនមានការឡើងជាគំហុកនោះទេដោយសារតែមិនមានការអភិវឌ្ឍទ្រង់ទ្រាយធំ គ្រាន់តែមានការ-វិនិយោគដីទុក និងអនុវត្តទៅតាមគម្រោងផែនការរបស់គេ។ ដោយហេតុថា ក្រុងព្រះសីហនុ ជាខេត្តជាប់សមុទ្រដូចគ្នា ពេលគាត់មានតម្លៃដីខ្ពស់កើនឡើងខ្លាំង នោះវានឹងប្តូរ Replacement ហើយខេត្តកំពត កែប អាចនឹងទទួលជំនួស ព្រោះកំពត កែប មានចម្ងាយជិតជាង និងមានហេដ្ឋារចនាសម្ពន្ធ កំពង់ផែ ផ្លូវដែក ដែលអាចដោះដូរទំនិញ ទៅប្រទេសវៀតណាមបានទៀតផង។

លោក សន សៀប នាយកប្រតិបត្តិក្រុមហ៊ុនអចលនទ្រព្យ Key Realestat បានមានប្រសាសន៍ប្រាប់តាមទូរស័ព្ទ ដល់កាសែតឡារ៉ែនថា៖“បើតាមការសង្កេតជាក់ស្តែងនៅដំណាច់ឆ្នាំ2019នេះ សម្រាប់ការទិញ-លក់ដីធ្លី គឺហាក់ដូចជាស្ងាត់បន្តិចតែតម្លៃនៅទ្រឹង អត់មានការធ្លាក់ចុះទេ ពីព្រោះយើងមិនមានអ្នកលក់បង្ខំៗ គឺមានការសាកសួររក តែមិនមានករណីនេះ ដូច្នេះធ្វើឱ្យតម្លៃវានៅទ្រឹង គឺវាមិនឡើង តែវាក៏មិនចុះដែរ”។

លោកបានបន្តទៀតថា សម្រាប់អ្នកវិនិយោគនៅក្នុងវិស័យដីធ្លី នៅបណ្តាខេត្តដែលមានការអភិវឌ្ឍថ្មីៗវិញក៏ហាកដូចជា ស្ងប់ស្ងាត់ដែរ។ ដូចជាកន្លងមកយើងពង្រីកទៅខាងប៉ោយប៉ែត បាវិត ព្រះសីហនុជាដើម ក៏ហាក់ដូចជានៅទ្រឹងដែរ។ ចំពោះការស្ងប់ស្ងាត់នេះវាមានផលប៉ះពាល់ ព្រោះការដែលមិនមានសកម្មភាព គឺវាមិនមានការកើនឡើងនូវចំណូល។ ដូច្នេះយើងឃើញថាវាមានការប៉ះពាល់ដល់តម្លៃជួល ដោយអ្នកជួលនៅប៉ោយប៉ែត បាវិត គាត់បានសុំបញ្ចុះតម្លៃ និយាយទៅវាមានប៉ះពាល់ទៅដល់ចំណូលខ្លះនៃការជួល។

លោក សនសៀប បានបន្តថា៖ “ទោះបីជាមានភាពនៅទ្រឹងនៅតំបន់សេដ្ឋកិច្ចមួយចំនួនក៏ពិតមែនតែការអភិវឌ្ឍវិស័យអចលនទ្រព្យនៅតំបន់ថ្មីៗ និងគម្រោងបង្កើតទីក្រុងរណប បានបង្ហាញថាសក្តា-នុពលនៃវិស័យអចលនទ្រព្យកំពុងពង្រីកសក្តានុពលទៅតំបន់សេដ្ឋកិច្ចទាំងនោះ”។

លោក បានបញ្ជាក់ទៀតថា៖“យើងអាចនិយាយបានដែរថាវិស័យអចលនទ្រព្យកំពុង តែពង្រីកសក្តានុពលទៅតំបន់សេដ្ឋកិច្ច ខណៈនៅតែមានអ្នកជំនួញក្នុងវិស័យនេះចុះធ្វើសកម្មភាពទិញ-លក់ដដែល។ ដូចជានៅខេត្តកំពត សៀមរាបដែលមានគម្រោងអភិវឌ្ឍន៍ទីក្រុងរណបជាដើម ប៉ុន្តែវាមិនសូវជាមានឥទ្ធិពលដោយសារវាស្ថិតនៅជាគម្រោងនៅឡើយ”។

លោក សន សៀប បានបញ្ជាក់ដែរថា៖“យើងចាំមើលប្រហែលជាដើមឆ្នាំក្រោយយើងនឹងអាចដឹងថាវាមានការប្រែប្រួលយ៉ាងម៉េចទៀត ខ្ញុំគិតថាដើមឆ្នាំក្រោយវាពិតជាល្អ។ ឆ្នាំនេះវាចុងឆ្នាំផង វាមានរឿងមិនល្អកើតមានផង ហើយដោយសារតែវាជារដូវធ្លាក់ភ្លៀង ហាក់មានភាពស្ងប់ស្ងាត់បន្តិចព្រោះតែពិបាកក្នុងការចុះមើលទីតាំង និងវាស់វែងដូច្នេះមិនសូវមានការទិញលក់ទេ។ តែភាពស្ងប់ស្ងាត់ទាំងនេះ អាចនឹងត្រូវកែប្រែឡើងវិញ បន្ទាប់រដូវភ្លៀងធ្លាក់បានបញ្ចប់”៕

October 29, 2019

រយៈពេល 9ខែឆ្នាំ2019គយប្រមូលពន្ធលើយានយន្តបានប្រមាណ 1,244លានដុល្លារអាមេរិក

រយៈពេល 9ខែ ឆ្នាំ2019 នេះ អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានប្រមូលពន្ធលើយានយន្ត និងគ្រឿងចក្របានប្រមាណ 1,244លានដុល្លារសហរដ្ឋអាមេរិក តួលេខនេះស្មើនឹងជាង 52% នៃចំណូលពន្ធសរុប។ នេះបើយោងតាមរបាយការណ៍របស់អគ្គនាយកដ្ឋានគយ និងរដ្ឋាករ។

យោងតាមកិច្ចប្រជុំបូកសរុបការងារគយ និងរដ្ឋាកររយៈពេល 9ខែ ឆ្នាំ2019 ឯកឧត្តមបណ្ឌិត គុណញឹម ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជាបានគូសបញ្ជាក់ថា សម្រាប់ 9ខែ ឆ្នាំ2019 ចំណូលសរុបមានប្រមាណជាង 9.7ទ្រីលានរៀល(ប្រមាណ 2,391 លានដុល្លារអាមេរិក) កើនឡើងប្រមាណ 35% ធៀបរយៈពេលដូចគ្នាក្នុងឆ្នាំ2018។

លទ្ធផលចំណូលនេះត្រូវនឹងប្រមាណជា106% នៃផែនការឆ្នាំ ដែលកំណត់ដោយច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ2019។ បើប្រៀបធៀបរយៈពេលដូចគ្នាក្នុងឆ្នាំ2018 លទ្ធផល ចំណូលតាមប្រភេទពន្ធ និងអាករសំខាន់ៗ ដែលប្រមូលដោយគយ មានកំណើនគួរឱ្យកត់សម្គាល់ ក្នុងនោះពន្ធគយ (ពន្ធនាំចូល)មានកំណើនជិត 38% អាករពិសេសកើនប្រមាណ 39% និងអាករលើតម្លៃបន្ថែម (VAT) កើនជាង 32%។

របាយការណ៍ក៏បានឱ្យដឹងដែរថា ការប្រមូលចំណូលពន្ធលើមុខទំនិញជាប្រភពចំណូលសំខាន់ៗផ្សេងទៀត ដូចជាប្រងឥន្ធនៈ និងថាមពលសម្រេចបានប្រមាណ 406លានដុល្លារអាមរិក ស្មើ នឹង 17%នៃចំណូលពន្ធសរុប និងមុខទំនិញចម្រុះ និងគ្រឿងសំណង់ប្រមូលបាន 705លានដុល្លារអាមេរិកស្មើនឹងប្រមាណ 29.5% នៃចំណូលសរុប។

ការកើនឡើងនៃចំណូលពន្ធលើយានយន្ត និងគ្រឿងចក្រនេះ កើតឡើងបន្ទាប់ពីរាជរដ្ឋាភិបាល កាលពីពេលថ្មីៗបានប្រកាសដំឡើងពន្ធរថយន្ត និងគ្រឿងចក្រឡើងរហូតពីជាង 80% ទៅ 110% តាមប្រភេទទំហំស៊ីឡាំងនៃរថយន្ត។ ជាមួយគ្នានេះដែរយានយន្ត និងគ្រឿងចក្រប្រភេទជជុះក៏ត្រូវបានដំឡើងផងដែរ នៅក្នុងនោះអង្គភាពគយ ក៏បានកំណត់តម្លៃពន្ធថ្មី ទៅលើប្រភេទយានយន្តទេសចរណ៍ សម្រាប់ទំហំស៊ីឡាំងមិនលើសតម្លៃពន្ធ 93% រហូតដល់ជាង 152% សម្រាប់ប្រភេទរថយន្តកម្លាំងលើស 5000សេះ។

ការបង្កើនពន្ធយានយន្ត និងគ្រឿងចក្រ មិនត្រឹមតែជួយបង្កើនចំណូលចូលដល់សេដ្ឋកិច្ចជាតិប៉ុណ្ណោះទេ គឺថែមទាំងជួយឱ្យប្រជាពលរដ្ឋងាកទៅប្រើប្រាស់រថយន្តថ្មី ដែលធានាសុវត្ថិភាពប្រើប្រាស់កាត់បន្ថយគ្រោះថ្នាក់ចរាចរណ៍ និងទាក់ទាញក្រុមហ៊ុនវិនិយោគបង្កើតរោងចក្រដំឡើងរថយន្តឱ្យមកបណ្តាក់ទុនកាន់តែច្រើនក្នុងស្រុកនាពេលអនាគត។

ថ្មីៗនេះប្រមុខរាជរដ្ឋាភិបាលកម្ពុជា បានកោតសរសើរដល់អង្គភាពគយដែលបានខិតខំប្រមូលពន្ធឱ្យមានកំណើនគួរជាទីមោទនៈជាពិសេសចំណូលពន្ធយានយន្ត និងគ្រឿងចក្រនេះ។

សម្តេចតេជោ ហ៊ុន សែន នាយករដ្ឋមន្ត្រី បានអះអាងថា ការកើនឡើងចំណូលពន្ធលើយានយន្តនិងគ្រឿងចក្រ គឺជាការរីកលូតលាស់នៃសេដ្ឋកិច្ចកម្ពុជា ដែលធ្វើឱ្យប្រជាពលរដ្ឋកាន់តែមានជីវភាពធូរធារ ហើយដែលតម្រូវឱ្យការប្រើប្រាស់យានយន្ត និងគ្រឿងចក្រកាន់តែកើនឡើង ដើម្បីប្រើប្រាស់សម្រាប់ជាមធ្យោបាយធ្វើដំណើរប្រើប្រាស់ សម្រួលដល់មុខរបររបស់ខ្លួន និងដឹកជញ្ជូនទំនិញជាដើម ដែលជំរុញនូវចំណូលពន្ធយានយន្ត និងគ្រឿងចក្រកើនឡើងផងដែរ។

បើតាមសម្តេចនាយករដ្ឋមន្ត្រី ចំណូលគយ បើគិតជាមធ្យមមានប្រមាណ 250លានដុល្លារក្នុង 1ខែ ហើយមានខែខ្លះ អាចមានរហូតដល់ 300លានដុល្លារ ហើយការប្រមូលពន្ធនៅសល់ពេល 2ខែទៀតសម្រាប់ឆ្នាំនេះ ដូច្នេះចំណូលគយឆ្នាំនេះ រំពឹងថា នឹងកើនឡើងលើផែនការ 800លានដុល្លារអាមេរិក។

សម្តេច ហ៊ុន សែន បញ្ជាក់ទៀតថា ក្នុង 1ខែៗ កម្ពុជាប្រមូលចំណូលសរុបបានប្រមាណ 500លានដុល្លារអាមេរិក និងចំណាយទៅវិញប្រមាណ 300លានដុល្លារ នៅសល់ 200លានដុល្លារសម្រាប់ការសន្សំ ដើម្បីវិនិយោគដោយខ្លួនឯង ដោយមិនរង់ចាំតែការវិនិយោគពីបរទេសនោះទេ។

លទ្ធផលដ៏ល្អប្រសើរនេះ គឺបានមកដោយសារតែកម្ពុជា មានស្ថិរភាពនយោបាយ ការអនុវត្តកម្មវិធីកែទម្រង់របស់ អ.គ.រ(អគ្គនាយកដ្ឋានគយ និងរដ្ឋាករ)ស្របតាមគោលនយោបាយ និងយុទ្ធសាស្ត្រ កែទម្រង់មុតស្រួចរបស់រាជរដ្ឋាភិបាល ការពង្រឹងអភិបាលកិច្ចផ្ទៃក្នុងរបស់អង្គភាពគយ និងការយល់ដឹងកាន់តែទូលាយ ក្នុងការអនុវត្តកាតព្វកិច្ច ពន្ធអាកររបស់ធុរជនពាក់ព័ន្ធ៕

October 29, 2019

សណ្ឋាគារ Himawari Hotel Apartments និងសាលាអន្តរជាតិ SCIA រួមគ្នារៀបចំកម្មវិធីបុណ្យ Halloween

ភ្នំពេញ៖ កាលថ្ងៃសៅរ៍ ទី26 ខែតុលា ឆ្នាំ2019 សណ្ឋាគារ Himawari និងសាលាអន្តរជាតិ SCIA បានសហការគ្នារៀបចំកម្មវិធីបុណ្យ Halloween ដោយមានការចូលរួមពីក្មេងៗ រួមជាមួយក្រុមគ្រួសារប្រមាណជា 250នាក់ នៅឯបរិវេណសណ្ឋាគារ និងក្នុងសាល Sunflower។ពិធីបុណ្យត្រូវបានរៀបចំចាប់ពីម៉ោង 11ព្រឹក រហូតដល់ 5ល្ងាច ដោយខាងសណ្ឋាគារបានរៀបចំតុបតែងកម្មវិធីទាំងមូលឱ្យដូចទៅនឹងពិធីបុណ្យ Halloween នៅឯបស្ចិមប្រទេសដែរ ដែលមានដូចជា៖ ការឆ្លាក់រូបល្ពៅជាក្បាលខ្មោច តុបតែងជាផ្ទះខ្មោច គូសមុខឱ្យដូចទៅនឹងខ្មោចសាហាវៗ បូករួមជាមួយនឹងការស្លៀកសម្លៀកបំពាក់ចេញជារូបរាងខ្មោចពិតៗ គួរឱ្យខ្លាចតែម្តង។ភ្ញៀវ និងក្មេងៗដែលបានអញ្ជើញចូលរួមក្នុងកម្មវិធីនាពេលរសៀលនោះបានរីករាយជាមួយនឹងម្ហូបអាហារ ភេសជ្ជៈ ស្តង់លេងហ្គេមកម្សាន្តរបស់សណ្ឋាគារ Himawari ក៏ដូចជាស្តង់លេងហ្គេមកម្សាន្តរបស់សាលាអន្តរជាតិ SCIA ដែលពួកគាត់បានរៀបចំជាលក្ខណៈបុណ្យ Halloween តែម្តង។លោក Andrew Tay គឺជានាយកប្រតិបត្តិរបស់សណ្ឋាគារ Himawari បានលើកឡើងនៅក្នុងពិធីបុណ្យ Halloween ថា «ពិធីបុណ្យ Halloween ដែលបានរៀបចំនៅសណ្ឋាគារ Himawari បានប្រហែលជា 5 លើករួចមកហើយ វាជាថ្ងៃពិសេសមួយដែលឪពុកម្តាយបាននាំកូនៗរបស់ពួកគាត់មកលេងកម្សាន្តនៅទីនេះ វាពិតជាគួរឱ្យខ្លាចបន្តិចមែន តែវាសប្បាយរីករាយ ហើយពួកគាត់អាចថតរូបទុកជាអនុស្សារីយ៍ជាមួយគ្នា» លោកបន្ថែមទៀតថា «ឆ្នាំក្រោយ ខ្ញុំសង្ឃឹមថាក្មេងៗ ក៏ដូចជាឪពុកម្តាយនឹងមកចូលរួមក្នុងកម្មវិធីបុណ្យ Halloween នេះឱ្យបានច្រើនជាមួយពួកយើង ហើយអ្វីដែលកាន់តែពិសេសជាងនេះទៅទៀត ឆ្នាំនេះយើងទទួលបានការសហការពីសាលាអន្តរជាតិ SCIA ជាដៃគូក្នុងការរៀបចំកម្មវិធីបុណ្យ Halloween ជាមួយពួកយើងផងដែរ»។លោក Edward Tiu ជាអនុប្រធានផ្នែកជ្រើសរើសសិស្ស និងការចូលរួមសហគមន៍ របស់សាលាអន្តរជាតិ SCIA (Singapore Cambodia International Academy) បានលើកឡើងថា «នេះជាលើកទី1 ហើយដែល SCIA បានរៀបចំកម្មវិធីបុណ្យ Halloween ជាមួយនឹងសណ្ឋាគារ Himawari ហើយពួកយើងរីករាយក្នុងការសហការជាមួយនឹងសណ្ឋាគារ Himawari ពីព្រោះពួកគាត់បានជួយជ្រោមជ្រែងសាលារបស់ពួកយើងយ៉ាងខ្លាំង ហើយយើងខ្ញុំសង្ឃឹមថា ក្មេងៗក៏ដូចជាកូនសិស្ស ឪពុកម្តាយនឹងសប្បាយរីករាយជាមួយពិធីបុណ្យ Halloween នេះ ពីព្រោះកម្មវិធីមានសកម្មភាពជាច្រើនរួមមាន គូសមុខ គូសជារូបភាព សិល្បៈដីឥដ្ឋ និងការលេងហ្គេមជាច្រើនប្រភេទផ្សេងៗទៀត យើងខ្ញុំសូមលើកទឹកចិត្តឱ្យក្មេងៗ ក៏ដូចជាឪពុកម្តាយអញ្ជើញចូលរួមជាមួយពួកយើងខ្ញុំ ហើយពួកគាត់ក៏អាចស្លៀកពាក់តាមបែប Halloween ផងដែរ។» លោកបានបន្ថែមទៀតថា «ជាចុងក្រោយតាងនាមខ្ញុំបាទជាអ្នកតំណាងឱ្យសាលា SCIA ដែលជាសាលាអន្តជាតិមួយនៅក្នុងប្រទេសកម្ពុជា ខ្ញុំសូមលើកទឹកចិត្តឱ្យក្មេងៗចូលរួមកម្មវិធីបុណ្យអន្តរជាតិឱ្យបានច្រើន គោលបំណងដែលយើងខ្ញុំបានសហការជាមួយសណ្ឋាគារ Himawari ក្នុងការរៀបចំប្រារព្ធពិធីបុណ្យ Halloween ថ្ងៃនេះពីព្រោះពួកយើងចង់ឱ្យពួកគាត់បានស្គាល់ពីបុណ្យជាលក្ខណៈអន្តរជាតិ ជាពិសេសពួកយើងចង់ឱ្យគាត់បានឈប់សម្រាកពីការសិក្សា និងចំណាយពេលវេលាជាមួយនឹងគ្រួសាររបស់ពួកគាត់»។គួរបញ្ជាក់ផងដែរថា បុណ្យ Halloween ជាកម្មវិធីបុណ្យប្រពៃណីមួយរបស់ប្រជាជនរស់នៅឯបស្ចិមប្រទេសដែលគេតែងតែប្រារព្ធធ្វើឡើងជារៀងរាល់ឆ្នាំនៅចុងខែតុលា ដើម្បីរំឭកដល់ព្រលឹងអ្នកដែលបានចែកឋានទៅ។ ពិធីបុណ្យនេះត្រូវបានគេប្រារព្ធធ្វើឡើងប្រហែលជាង 200ឆ្នាំមកហើយនៅតាមប្រទេសប៉ែកខាងអឺរ៉ុប ដូចជាប្រទេស អ៊ីរ៉ង់ សហរដ្ឋអាមេរិក ចក្រភពអង់គ្លេស កាណាដា អូស្រ្តាលី និងប្រទេសផ្សេងៗទៀត ដែលជាទូទៅគេចូលចិត្តប្រារព្ធធ្វើឡើងនៅចុងសប្តាហ៍ មុន ឬក្រោយថ្ងៃបរិច្ឆេទ។ ចំពោះសកម្មភាពវិញពួកគេតែងតែប្រើផ្លែល្ពៅឆ្លាក់ជារូបក្បាលខ្មោច តុបតែងផ្ទះខ្មោច គូសមុខខ្មោច ស្លៀកពាក់ដូចខ្មោចចម្លែកៗ តុបតែងម្អូបអាហារបែប Halloween និងមានការលេងល្បែងប្រជាប្រិយបែបអឺរ៉ុប ដូចជាកីឡា និងគំនូរជាដើម។

សព្វថ្ងៃនេះពីធីបុណ្យ Halloween មិនមែនមានតែប្រជាជននៅប៉ែកអឺរុបទេដែលប្រារព្ធធ្វើឡើង ប៉ុន្តែនៅប៉ែកខាងអាស៊ី ដូចជា ចិន ថៃ ជប៉ុន ហុងកុង កូរ៉េ ប្រទេសកម្ពុជា និងប្រទេសផ្សេងៗទៀតក៏មានការពេញនិយមច្រើនផងដែរ។ ពីធីបុណ្យនេះវាប្រហាក់ប្រហែលទៅនឹងពិធីបុណ្យភ្ជុំបិណ្ឌនៅក្នុងប្រទេសកម្ពុជាដែរ ព្រោះបុណ្យ Halloween គឺធ្វើឡើងក្នុងគោលបំណងរំឭកដល់សាច់ញាតិដែលបានចែកឋានទៅ ហើយពិធីបុណ្យក៏បានផ្តល់ជាចំណេះដឹងដល់កូនចៅជំនាន់ក្រោយឱ្យរំឭកពីបុព្វការីជនរបស់ពួកគេដែរ។

October 28, 2019

IMF ៖ សង្គ្រាមពាណិជ្ជកម្ម បានផ្តល់ផលវិជ្ជមានដល់សេដ្ឋកិច្ចកម្ពុជា

លោក Jarkko Turunen អនុប្រធានផ្នែកទទួលបន្ទុកតំបន់អាស៊ីប៉ាស៊ីហ្វិក Asia Pacific Department (APD) និងជាក្រុមការងារបេសកកម្ម ArticleIV របស់មូលនិធិរូបិយវត្ថុអន្តរជាតិ ឬ IMF (International Monetary Fund) បានធ្វើសេចក្តីរាយការណ៍សង្ខេបស្តីពីរបាយការណ៍របស់លោកនៅពេលបេសកកម្មបានបញ្ចប់ ដោយលោកបានលើកឡើងថា សង្គ្រាមពាណិជ្ជកម្មបានផ្តល់ផល វិជ្ជមានមួយចំនួនដល់សេដ្ឋកិច្ចកម្ពុជា ដែលបានឆ្លុះបញ្ចាំងតាមរយៈការកើនឡើងនៃការនាំចេញ ជាពិសេសទៅសហរដ្ឋអាមេរិក និងលំហូរទុនវិនិយោគពីបរទេស។

ទន្ទឹមនឹងការបង្ហាញសញ្ញាវិជ្ជមាន ក្រុមការងារបេសកកម្ម ArticleIV នៃមូលនិធិរូបិយវត្ថុអន្តរជាតិ(IMF)ក៏បានឱ្យដឹងដែរថា ក្នុងឆ្នាំ2020 សេដ្ឋកិច្ចកម្ពុជាត្រូវបានរំពឹងថានឹងថមថយបន្តិច ដោយសារការថយចុះកំណើននៃសេដ្ឋកិច្ចសកល និងតំបន់ក្នុងរយៈពេលខ្លី និងមធ្យមខាងមុខ ដោយសារការកើនឡើងភាពតានតឹងនៃសង្គ្រាមពាណិជ្ជកម្ម និងការកើនឡើងនៃគោលនយោបាយគាំពារនិយម (Protectionism)។

ក្រុមបេសកកម្មរបស់ IMF មកកាន់រាជធានីភ្នំពេញក៏បានមើលឃើញនូវការធ្លាក់ចុះដ៏គួរឱ្យកត់សម្គាល់ ដែលបណ្តាលមកពីការព្យួរកិច្ចព្រម-ព្រៀង EBA ដែលអាចនឹងកើតឡើង និងអាចជះឥទ្ធិពលអវិជ្ជមានយ៉ាងខ្លាំងដល់សកម្មភាពសេដ្ឋកិច្ចរយៈពេលខ្លី។

លោក Turunen មានប្រសាសន៍ថា៖“បរិយាកាសម៉ាក្រូសេដ្ឋកិច្ចមានស្ថិរភាពការលូតលាស់ រឹងមាំ និងការកែទម្រង់រចនាសម្ព័ន្ធ ដែលកំពុងបន្តបានរួមចំណែកដល់វឌ្ឍនភាពគួរឱ្យកត់សម្គាល់ឆ្ពោះទៅរកគោលដៅអភិវឌ្ឍន៍ប្រកបដោយចីរភាព។ ទោះជាយ៉ាងនេះក្តី សេដ្ឋកិច្ចកម្ពុជានឹងប្រឈមនឹងភាពមិនប្រាកដប្រជា រាប់បញ្ចូលទាំងភាពតានតឹងខាងពាណិជ្ជកម្ម និងការផ្អាកសក្តានុពលនៃការចូលទៅកាន់ទីផ្សារអនុគ្រោះ ក្រោមគម្រោងអ្វីៗគ្រប់យ៉ាងលើកលែងតែអាវុធ (the Everything-but-arms ឬEBA) ដែលអាចជះឥទ្ធិពលអវិជ្ជមានដល់សេដ្ឋកិច្ចកម្ពុជា”។

ហានិភ័យធ្លាក់ចុះផ្សេងទៀត រួមមានការធ្លាក់ចុះពីការកើនឡើងនៃការគាំពារនិយមពាណិជ្ជកម្មសកលដែលអាចរារាំងការនាំចេញនិងធ្វើឱ្យប៉ះពាល់ដល់ទំនុកចិត្តរបស់វិនិយោគិន។ របាយការណ៍ IMFក៏បានមើលឃើញពីហានិភ័យដែលបណ្តាលមកពីភាពងាយរងគ្រោះក្នុងវិស័យហិរញ្ញវត្ថុកើនឡើង។ បើនិយាយពីជំហរសារពើពន្ធវិញ IMF ជឿជាក់ថា ខ្លួននឹងនៅតែមានអតិរេកនៅឆ្នាំនេះ។

លោក Turunen ក៏បានគូសបញ្ជាក់ផងដែរថា សកម្មភាពសេដ្ឋកិច្ចកម្ពុជានៅតែរឹងមាំជាមួយនឹងកំណើនប្រមាណ 7%នៅឆ្នាំនេះ ដោយសារកំណើនការនាំចេញ និងសកម្មភាពវិស័យសំណង់ ខណៈអតិផរណានៅថេរក្នុងអត្រា 2.5%។

ក្នុងរយៈពេលមធ្យម កំណើនត្រូវបានគេរំពឹងថានឹងមានកម្រិតមធ្យមបន្ថែមទៀត ខណៈវដ្តអចលនទ្រព្យ និងឥណទានមានភាពចាស់ទុំ។ កំណើននៃការនាំចេញ ក៏ត្រូវបានគេរំពឹងថានឹងមានកម្រិតមធ្យមផងដែរ ដែលនាំឱ្យមានឱនភាពគណនីចរន្តកើនឡើងដល់ប្រមាណ 13.5%នៃផលិតផលក្នុងស្រុកសរុបនៅឆ្នាំនេះ។

លោក Turunen មានប្រសាសន៍ថា៖ “លទ្ធផលនៃប្រាក់ចំណូលនៅតែបន្ត ហើយដោយ សារការ-ខិតខំប្រឹងប្រែងផ្នែករដ្ឋបាលយ៉ាងខ្លាំង ប្រាក់ចំណូលពន្ធបានឈានដល់ជិត 19%នៃ GDP ក្នុងឆ្នាំ2018 ។ ជាលទ្ធផលសមតុល្យសារពើពន្ធឆ្នាំ2018 បង្ហាញពីអតិរេកជិត 1%នៃGDP”។

ដូចគ្នានឹងធនាគារពិភពលោកដែរ IMFមើលឃើញថា បំណុលសាធារណៈនៅតែទាបនៅឡើយគឺ 28.6% ហើយប្រទេសនេះត្រូវបានគេរំពឹងថា នឹងនៅតែមានហានិភ័យទាបនៃភាពតានតឹងបំណុល បើទោះបីជាមានការកើនឡើង ទាំងការទូទាត់បំណុល និងភាពជាដៃគូសាធារណៈ-ឯកជន (PPPs)ដើម្បីផ្តល់ហិរញ្ញប្បទានដល់ការវិនិយោគហេដ្ឋារចនាសម្ព័ន្ធចាំបាច់ក្ដី។

ទោះយ៉ាងណា លោក Turunen បានសង្កត់ធ្ងន់លើតម្រូវការសម្រាប់កិច្ចខិតខំប្រឹងប្រែង បន្ថែមទៀតនៃគោលនយោបាយ ដើម្បីដោះស្រាយភាពងាយរងគ្រោះក្នុងវិស័យហិរញ្ញវត្ថុដែលកើនឡើង។ លោកបានមានប្រសាសន៍ថា៖ “វិធានការអាទិភាព រួមមានការអនុវត្តគោលនយោបាយ គោលដៅ ដូចជាទំហំហានិភ័យខ្ពស់ និងតម្រូវការវិធានធនសម្រាប់ការផ្តល់ប្រាក់កម្ចីអចលនទ្រព្យ ក៏ដូចជាការណែនាំអំពីការកំណត់ប្រាក់កម្ចី គិតជាតម្លៃសរុបដើម្បីដោះស្រាយហានិភ័យពាក់ព័ន្ធនឹងវិស័យអចលនទ្រព្យ”។

ដោយមើលទៅមុខ ការអនុវត្តដ៏រឹងមាំនៃយុទ្ធសាស្ត្រជំរុញចំណូលថ្មី (2019-2023) ត្រូវបាន រំពឹងថា នឹងជួយទ្រទ្រង់កំណើនប្រាក់ចំណូលតាមរយៈគោលនយោបាយពន្ធ និងកំណែទម្រង់រដ្ឋបាលចំណូល។ លោក Turunen បានមានប្រសាសន៍ថា៖“ការចំណាយបន្ថែម គួរតែបន្តឆ្ពោះទៅរកការវិនិយោគ ហេដ្ឋារចនាសម្ព័ន្ធអាទិភាព ក៏ដូចជាការចំណាយលើវិស័យសុខាភិបាល និងការអប់រំនៅពេលនេះ ធានាបាននូវប្រសិទ្ធភាពនៃការចំណាយ”។

មូលនិធិរូបិយវត្ថុអន្តរជាតិបានគូសបញ្ជាក់បន្ថែមថា រាជរដ្ឋាភិបាលកម្ពុជាកំពុងស្ថិតនៅលើមាគ៌ាត្រឹមត្រូវក្នុងការធ្វើកំណែទម្រង់រចនាសម្ព័ន្ធសេដ្ឋកិច្ចរបស់ខ្លួន រួមទាំងការគ្រប់គ្រងប្រមូលចំណូល ជាពិសេសកិច្ចខិតខំប្រឹងប្រែងផ្នែករដ្ឋបាលសារពើពន្ធ និងការកែទម្រង់ផ្អែកតាមយុទ្ធសាស្ត្រកៀរគរចំណូល 2019-2023 សំដៅដោះស្រាយបញ្ហាប្រឈមនិងបញ្ចៀសរាល់ហានិភ័យដែលអាចកើតឡើងជាយថាហេតុ តាមរយៈការដាក់ចេញនូវកញ្ចប់ថវិកាចំណាយបន្ថែមក្នុងឆ្នាំ2020 ដើម្បីគាំទ្រដល់ការបង្កើតការងារ ការអភិវឌ្ឍធនធានមនុស្ស និងបង្កើនការវិនិយោគហេដ្ឋារចនាសម្ព័ន្ធ។

ទន្ទឹមនេះ វិធានការទាំងនេះ ក៏បានផ្តោតលើការលើកកម្ពស់ការប្រកួតប្រជែង និងជំរុញការធ្វើពិពិធកម្មសេដ្ឋកិច្ចរបស់កម្ពុជាផងដែរ។ ស្របពេលជាមួយគ្នានេះដែរ IMF ក៏បានលើកទឹកចិត្ត និងជំរុញឱ្យរាជរដ្ឋាភិបាលកម្ពុជាពន្លឿនការអនុវត្តវិធានការកំណែទម្រង់ទាំងនេះ សំដៅសម្រេចបានសមិទ្ធផលប្រកបដោយប្រសិទ្ធភាព និងទាន់ពេលវេលា។

ក្រសួងសេដ្ឋកិច្ច និងហិរញ្ញវត្ថុបានឱ្យដឹងថា៖ “តាមការវាយតម្លៃរបស់ IMF ទោះបីកំណើនសេដ្ឋកិច្ចសកលមានការថមថយក្តី សេដ្ឋកិច្ចកម្ពុជាក្នុងឆ្នាំ2019 នៅតែសម្រេចបាននូវកំណើនរឹងមាំ ក្នុងរង្វង់អត្រា 7% ដែលត្រូវបានគាំទ្រដោយការបន្តកំណើនខ្ពស់នៃការនាំចេញ និងវិស័យសំណង់ ខណៈដែលអតិផរណា ត្រូវបានរក្សាឱ្យស្ថិតក្នុងកម្រិតទាបប្រមាណ 2.5%។ ទន្ទឹមនេះស្ថានភាពហិរញ្ញវត្ថុសាធារណៈ នៅបន្តស្ថិតក្នុងភាពល្អប្រសើរ ស្របពេលដែលបំណុលសាធារណៈ ស្ថិតក្នុងកម្រិតហានិភ័យទាប ដែលអាចគ្រប់គ្រងបាន”។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក៏បានថ្លែងអំណរគុណយ៉ាងជ្រាលជ្រៅចំពោះកិច្ចខិតខំប្រឹងប្រែងរបស់ក្រុមការងារបេសកកម្ម Article IV នៃ IMF ក្នុងការវាយតម្លៃសេដ្ឋកិច្ចកម្ពុជា ព្រមទាំងដាក់ចេញនូវអនុសាសន៍គោលនយោបាយ និងការបន្តផ្តល់ជំនួយបច្ចេកទេសក្នុងការកសាងសមត្ថភាពមន្ត្រីកម្ពុជាឱ្យកាន់តែមានជំនាញ និងចំណេះដឹងប្រសើរជាងមុន ជាពិសេសការផ្តល់ជំនួយបច្ចេកទេសលើការចងក្រងស្ថិតិជារួមរបស់រាជរដ្ឋាភិបាល ដែលមានសារៈសំខាន់សម្រាប់ការ-វិភាគ វាយតម្លៃ និងរៀបចំគោលនយោបាយប្រកបដោយប្រសិទ្ធភាព៕

October 28, 2019

ទទួលទានលឿន និងទទួលទានយឺត មួយណាឆាប់ធាត់ជាង?មានគ្រោះថា្នក់ដល់សុខភាពឬទេ?

អ្នកតែងតែមានបច្ចេកទេស និងតិចនិកផ្សេងៗគ្នា ដើម្បីសម្រកទម្ងន់ និងមានសុខភាពល្អ។ ក្រៅពីការគ្រប់គ្រងអាហារយ៉ាងហ្មត់ចត់ហើយនោះ នៅមានតិចនិកជាច្រើនទៀតសម្រាប់ការទទួលទានអាហារជាច្រើនថែមទៀត ដែលយើងតាមដានមិនទាន់។ ប៉ុន្តែមានវិធីងាយៗ ដែលយើងអាចចាប់ផ្តើមពីថ្ងៃនេះគឺ “ល្បឿនក្នុងការទទួលទានអាហារ”។

ទទួលទានយឺត និងទទួលទានលឿន
យោងតាមការសិក្សាស្រាជ្រាវនៅសាកលវិទ្យាល័យជប៉ុន ដែលបានប្រមូលទិន្នន័យពីអ្នកកើតជំងឺទឹកនោមផ្អែមប្រភេទទី2 ចំនួន59,717នាក់បានរកឃើញថា អ្នកដែលមានទម្លាប់ទទួលទានយឺតៗ គឺមានហានិភ័យទាបនៃជំងឺធាត់ខ្លាំងជាងអ្នកដែលមានទម្លាប់ទទួលទានលឿន។ អ្នកឆ្លើយតបចំពោះខ្លួនឯងថា ជាមនុស្សម្នាក់ដែលទទួលទានក្នុងរយៈពេល “ជាមធ្យម” ក៏មានហានិភ័យនៃជំងឺធាត់ជាងអ្នកដែលទទួលទានយឺត ក៏ប៉ុន្តែនៅតែតិចជាងអ្នកដែលទទួលទានលឿន។មួយវិញទៀត អ្នកស្រាវជ្រាវបានសន្និដ្ឋានថា អ្នកដែលមានទម្លាប់ទទួលទានលឿន គឺមានហានិភ័យខ្ពស់ក្នុងការឡើងទម្ងន់ជាងអ្នកដែលទទួលទានយឺតៗ ឬធម្មតា។ ព្រោះពេលយើងទំពាអាហារ គឺសញ្ញាស្រេកឃ្លានរបស់យើង វាត្រូវបានផ្លាស់ប្តូរចរន្ដពីក្រពះទៅកាន់ខួរក្បាលជំនួសវិញ ហើយខួរក្បាលនឹងចំណាយពេលប្រហែល20នាទី ដើម្បីបញ្ចូនសារមកឱ្យរាងកាយឱ្យឈប់ទទួលទាន។ ដូច្នេះបើយើងទទួលទានលឿនៗ មុនពេលខួរក្បាលបញ្ជាឱ្យរាងកាយឈប់នោះ យើងក៏មានអារម្មណ៍ថា ឆ្អែត ហើយនឹងឈប់ទទួលទានភ្លាមៗតែម្ដង។ បើយើងទទួលទានបាយច្រើនជាងម្ហូប ដូច្នេះអ្នកដែលទទួលទាននឹងមានអារម្មណ៍ថាឆ្អែតពេករហូតដល់តឹងណែនពោះមិនស្រួលទៅវិញ ព្រោះនៅពេលដែលយើងដឹងខ្លួនថាឆ្អែតហើយ តែយើងនៅតែបន្ដទទួលទានច្រើន ហើយលឿនៗទៀត។ប្រសិនបើអ្នកទម្លាប់ទទួលទានលឿនបែបនេះរាល់ថ្ងៃ អាចបណ្តោលឱ្យឈឺក្រពះ ពិបាកក្នុងការលេបឆ្លងកាត់បំពង់រំលាយអាហារ និងមិនបានស្រូបយកអាហារបំប៉នដែលចាំបាច់សម្រាប់រាងកាយ ហើយនៅបង្កើនបញ្ហាហើមពោះក្រោយពេលទទួលទានថែមទៀត។ ការទទួលទានលឿនពេក អាចបណ្តោលឱ្យរាងកាយមិនអាចទប់ស្កាត់ភាពអសកម្មនៃជាតិខ្លាញ់ និងជាតិស្ករ ដូច្នេះវាប៉ះពាល់ដល់ការគ្រប់គ្រងនៃអាំងស៊ុយលីន ហើយបង្កើនហានិភ័យនៃជំងឺទឹកនោមផ្អែម។ ដូច្នេះ ដើម្បីរក្សាប្រព័ន្ធរំលាយអាហារឱ្យមានសុខភាពល្អ អ្នកចាំបាច់ត្រូវទទួលទានយឺតៗ ដើម្បីទំពាអាហារឱ្យម៉ដ្ឋមុននឹងលេបចូលទៅក្នុងក្រពះ។ ការធ្វើបែបនេះអាចជួយឱ្យរាងកាយស្រូបយកសារធាតុចិញ្ចឹមបានល្អ ហើយក្រពះមិនសូវធ្វើការធ្ងន់ផងដែរ។ គន្លឹះក្នុងការទទួលទានអាហារឱ្យឆ្អែតលឿន មិនមែនទទួលទានអាហារឱ្យលឿនឡើងនោះទេ ព្រោះការទទួលទានលឿន រូបរាងរបស់អ្នកក៏ឡើងធាត់លឿនដែរ។ អ្នកគួរតែសាកល្បងគន្លឹះដូចខាងក្រោមនេះ ដើម្បីមានរាងស្អាត និងមានសុខភាពល្អ៖
1. ទំពាអាហារឱ្យបានច្រើនដងនៅក្នុងមួយដុំៗ ដោយសាកល្បងរាប់លមើលថា1ដុំ ត្រូវទំពាឱ្យបានលឿនបំផុត15ទៅ30ដង។
2. ប្រើរយៈពេលក្នុងការទទួលទានអាហារឱ្យបានពី 20-30នាទីក្នុងមួយពេលអាហារ។
3. ក្រេបទឹកខ្លះៗខណៈពេលកំពុងទំពាអាហារ (មិនលើសពី1-2កែវ) ជួយឱ្យឆ្អែតលឿនជាងមុន។
4. ដាក់ស្លាបព្រានៅលើចានខណៈពេលទំពាអាហារ ព្រោះបើកាន់ស្លាបព្រាខណៈពេលកំពុងទំពាអាហារអាចធ្វើឱ្យអ្នកចេះតែចង់ដួសអាហារបន្ទាប់ ហើយអាចទទួលទានលឿនឡើង។ប្រសិនបើអ្នកព្យាយាមកែសម្រួលល្បឿន និងពេលវេលានៃអាហារបន្តិចម្តងៗ វានឹងអាចជួយឱ្យអ្នកទទួលទានអាហារយ៉ាងងាយស្រួលជាងមុន និងមិនភ័យខ្លាចរឿងជំងឺធាត់។ សូមព្យាយាមសាកល្បងគន្លឹះខាងលើ ដើម្បីថែរក្សាសុខភាពអ្នកឱ្យកាន់តែប្រសើរ ហើយវាក៏ជាវិធីសាស្ត្រក្នុងការរក្សាទម្ងន់ឱ្យនៅថេរ មិនងាយឡើងទៅតាមចំណង់នៃការទទួលទានផងដែរ៕

October 28, 2019

Author: ធឿន មករា