ធឿន មករា - La Reine Media

8វិធីកម្ចាត់ក្លិនមាត់បានយ៉ាងល្អដែលជនជាតិជប៉ុនណែនាំ

ក្លិនមាត់បានសាងនូវភាពលែងជឿជាក់លើខ្លួនឯងចំពោះសាមីខ្លួនយ៉ាងខ្លាំង ទោះជាខំថែរក្សាព្យាបាលប្រអប់មាត់ និងធ្មេញល្អល្អះប៉ុនណាក្ដី តែជួនកាលក៏នៅតែមានក្លិនមាត់សាយភាយចេញមកបែបមិនដឹងខ្លួនដែរ ដូច្នេះពេលនេះ យើងនាំគ្នាមកដឹងពីមូលហេតុជាច្រើនប្រការដែលធ្វើឱ្យកើតក្លិនមាត់ និងវិធីកម្ចាត់ក្លិនមាត់ឱ្យបានលទ្ធផលល្អដែលជនជាតិជប៉ុនណែនាំមកដូចខាងក្រោមនេះ…។

មូលហេតុរបស់ការកើតមានក្លិនមាត់
ក្លិនមាត់ មានមូលហេតុមកពីច្រើនរឿងណាស់ តាំងពីការញ៉ាំកាហ្វេ និងស្រា ការទទួលទានអាហារដែលប្រកបដោយខ្ទឹមបារាំង ខ្ទឹមក្រហម ខ្ទឹមស និងគ្រឿងទេសជាដើម តែមូលហេតុចម្បងវិញ បណ្ដាលមកពីការដុសសម្អាតធ្មេញមិនបានស្អាត ធ្វើឱ្យមេរោគបាក់តេរីក្នុងប្រអប់មាត់ទៅរំលាយកម្ទេចកម្ទីអាហារដែលនៅជាប់សេសសល់ក្នុងប្រអប់មាត់ និងបំពង់ក ដែលក្រៅពីនឹងធ្វើឱ្យកើតក្លិនស្អុយហើយ នៅបង្កឱ្យមានបញ្ហាក្នុងប្រអប់មាត់ទៀតផង ដូចជាមានបន្ទះផ្សិតពណ៌សៗនៅលើអណ្ដាត និងគល់អណ្ដាតផ្នែកខាងក្នុង ពុកធ្មេញ ជំងឺរលាកអញ្ចាញដោយសារកំណកអតិសុខុមប្រាណ និងកំណកកំបោរប្រមូលសន្សំនៅតាមមុខតំណរបស់អញ្ចាញ និងធ្មេញ។ បើមិនបានទទួលការព្យាបាលទេ ជំងឺរលាកអញ្ចាញធ្មេញនឹងរីករាលដាលខ្លាំងឡើង ក្លាយជាជំងឺរលាកជុំវិញធ្មេញដែលនឹងបង្កឱ្យមានក្លិនកាន់តែស្អុយខ្លាំងឡើង។

មូលហេតុសំខាន់ 1ប្រការទៀតរបស់ការកើតមានក្លិនមាត់គឺ សភាវមាត់ស្ងួត មានទឹកមាត់តិច ដែលកើតពីការញ៉ាំទឹកមិនបានគ្រប់គ្រាន់។ នៅពេលមានទឹកមាត់តិច មេរោគផ្សេងៗជាច្រើននឹងនៅសេសសល់ក្នុងប្រអប់មាត់ ធ្វើឱ្យកើតមានក្លិនមិនប៉ងប្រាថ្នាកាន់តែច្រើនឡើង។ ក្រៅពីនេះ ក៏មានមូលហេតុមកពីប្រព័ន្ធរំលាយអាហារដែលមានមេរោគបាក់តេរីប្រភេទមិនល្អក្នុងក្រពះ និងពោះវៀនតូចដែលបង្កឱ្យកើតអាការឆ្អល់ណែនក្នុងពោះ និងភើមានក្លិនស្អុយចេញមក រួមទាំងអាការទល់លាមកច្រើនៗថ្ងៃ ក៏ធ្វើឱ្យកើតមានក្លិនមាត់មិនល្អបានដែរ។

វិធីកម្ចាត់ក្លិនក្នុងប្រអប់មាត់
អាចប្រើវិធីណាមួយ ឬប្រើរួមទាំងអស់ក៏បាន…

1. ប្រើម្សៅបេកឃីងសូដា
វិធីនេះនឹងជួយសម្លាប់មេរោគបាក់តេរីខាងក្នុងមាត់ អាចធ្វើបានដោយការលាយម្សៅបេកឃីងសូដា(អាចរកទិញបាននៅក្នុងផ្សារទំនើប) កន្លះស្លាបព្រាកាហ្វេក្នុងទឹក 1កែវ ហើយខ្ពុរក្នុងមាត់រយៈពេល30វិនាទី រួចខ្ជាក់ចេញ។

2. ប្រើប្រទាលកន្ទុយក្រពើ
ប្រទាលកន្ទុយក្រពើ ក្រៅពីមានគុណសម្បត្តិក្នុងការព្យាបាលមុខរបួសរលាកភ្លើង ឬទឹកក្ដៅហើយ វាក៏មានគុណសម្បត្តិក្នុងការបំបាត់ក្លិនមាត់បានដោយការកាត់បន្ថយបរិមាណមេរោគបាក់តេរីក្នុងប្រអប់មាត់ និងជួយបង្កើនបរិមាណទឹកមាត់។ វិធីងាយៗ គឺគ្រាន់តែខ្ពុរមាត់ដោយទឹកប្រទាលកន្ទុយក្រពើ 1ថ្ងៃ 2ដង ព្រឹក និងល្ងាច។

3. ញ៉ាំទឹកឱ្យបានគ្រប់គ្រាន់
ការញ៉ាំទឹកតិច នឹងធ្វើឱ្យលំហូរវិលរបស់ទឹកមាត់មានតិច និងនាំឆ្ពោះទៅរកការមានក្លិនមាត់មិនល្អ។ ក្នុង 1ថ្ងៃ គួរញ៉ាំទឹកឱ្យបានញឹកញាប់ ដើម្បីបង្កើនលំហូរវិលរបស់ទឹកមាត់នៅក្នុងប្រអប់មាត់។

4. ញ៉ាំស្រាទំពាំបាយជូរក្រហម 1ថ្ងៃ 1កែវ
តាមរយៈការសិក្សាស្រាវជ្រាវមួយបានរកឃើញថា ការញ៉ាំស្រាទំពាំងបាយជូរក្រហម 1ថ្ងៃ 1កែវ នឹងជួយកាត់បន្ថយការរីកចម្រើនរបស់មេរោគបាក់តេរីក្នុងប្រអប់មាត់ តែទាំងអស់នេះ ដើម្បីការពារពណ៌របស់ស្រាក្រហមប្រឡាក់ជាប់ធ្មេញ គួរដុសសម្អាតធ្មេញ ឬខ្ពុរមាត់ក្រោយពេលញ៉ាំស្រានេះរួច។

5. ទទួលទានបន្លែ និងផ្លែឈើដែលសម្បូរដោយជាតិកាកសរសៃ
ការទំពាបន្លែ ឬផ្លែឈើដែលសម្បូរទៅដោយកាកសរសៃអាហារ ដូចជា ស្ពៃក្ដោប សាលាដ ការ៉ុត ឃឹនឆាយ ផ្លែប៉ោម និងផ្លែត្របែក ក្រៅ-ពីបានសាងនូវភាពស្រស់ថ្លាដល់ពេលហូបអាហារហើយ ការទំពាបន្លែ និងផ្លែឈើទាំងនោះ នឹងជួយលាងជម្រះវត្ថុកខ្វក់នៅក្នុងមាត់ និងបន្ថែមការបញ្ចេញទឹកមាត់ទៀតផង។

6. ទទួលទានក្រូចឆ្មារ និងផ្លែបួយត្រាំ
ផ្លែក្រូចឆ្មារ និងផ្លែបួយត្រាំមានអាស៊ីតអតិសុខុមប្រាណដែលជួយបង្កើនការបញ្ចេញទឹកមាត់ និងបង្កើនការរំលាយរបស់ប្រូតេអុីនដែលជាប្រភពធ្វើឱ្យកើតក្លិនអាក្រក់ក្នុងមាត់ និងថែមទាំងជួយការពារមិនឱ្យកម្ទេចអាហារដែលជាប់នៅក្នុងកន្លៀតធ្មេញរលួយស្អុយក្នុងករណីដែលមិនបានដុសសម្អាតធ្មេញក្រោយពេលបាយបានភ្លាមៗ។

7. ញ៉ាំទឹកតែ
ទឹកតែភាគច្រើនប្រកបដោយសារធាតុ ហ្វ្លាវ៉ូណយដ៍ ដែលមានឫទ្ធិក្នុងការកាត់បន្ថយក្លិនមាត់ និងជួយកម្ចាត់មេរោគបាក់តេរីក្នុងប្រអប់មាត់។ វិធីការដែលមានប្រសិទ្ធភាពក្នុងការជួយកាត់បន្ថយក្លិនមាត់បានល្អបំផុត គឺការញ៉ាំទឹកតែក្រោយពេលបាយរួច។

8. ទទួលទានយ៉ាអួ(ទឹកដោះគោជូរ)ជាប្រចាំ
មួយក្នុងចំណោមមូលហេតុសំខាន់របស់ក្លិនមាត់ គឺការមានមេរោគបាក់តេរីច្រើនលើសនៅក្នុងក្រពះ និងពោះវៀនតូច ដែលធ្វើឱ្យប្រព័ន្ធរំលាយអាហារធ្វើការខុសប្រក្រតី។ ការទទួលទានយ៉ាអួជាប្រចាំ នឹងជួយកែសម្រួលប្រព័ន្ធទូទៅក្នុងពោះវៀនឱ្យល្អឡើង ហើយមានការស្រាវជ្រាវមួយបានរកឃើញថា ការទទួលទានយ៉ាអួជាប្រចាំរៀងរាល់ថ្ងៃ 1ថ្ងៃ 1ពែង នឹងជួយបន្ថយបរិមាណសារធាតុដែលធ្វើឱ្យកើតក្លិនស្អុយក្នុងមាត់ ដូចជា ហៃដ្រូចេនសាល់ហ្វៃដ៍ បានទៀតផង។

បើសិនជាបានដុសសម្អាតធ្មេញ និងមើលថែទាំសុខភាពប្រអប់មាត់បានល្អហើយ តែក៏នៅតែមានអារម្មណ៍ថា នៅតែមានក្លិនមាត់មិនល្អទៀតនោះ ចូរសាកល្បងប្រើវិធីណាមួយដូចខាងលើ-លមើលក៏បាន៕

November 14, 2019

ម៉ូដសក់សាមញ្ញៗស្អាតៗ សម្រាប់ដំណើរកម្សាន្តរីករាយ

បន្ទាប់ពីថ្ងៃរៀបការកន្លងផុតទៅ កុំភ្លេចណ៎ា ចូលដល់ថ្ងៃដើរកម្សាន្តក្រេបចន្ទទឹកឃ្មុំម្តងហើយ ដើម្បីបង្កើនភាពផ្អែមល្ហែម និងសេចក្តីសុខដល់ការចាប់ផ្តើមជីវិតអាពាហ៍ពិពាហ៍។ សូមរក្សាភាពស្រស់ស្អាតរបស់អ្នកឱ្យបាន ទោះជានៅក្នុងដំណើរកម្សាន្តបែបឯកជនតែពីរនាក់ក៏ដោយ ក៏ភាពស្រស់ស្អាតនៅតែចាំបាច់ ដើម្បីផ្តល់ឱ្យអ្នកនូវភាពស្និតស្នាល និងភាពជឿជាក់ដល់រូបអ្នក ជាពិសេសនៅពេលផ្តិតយកនូវរូបភាពទុកជាអនុស្សាវរីយ៍ ថតរូបភាពជាមួយគូស្នេហ៍របស់អ្នក ឬក៏ថត Selfie ជាដើម។ ម៉ូដសក់សម្រាប់ដំណើរកម្សាន្តមិនចាំបាច់សាំញ៉ាំច្រើននោះទេ ឱ្យតែសមនឹងទម្រង់មុខរបស់អ្នក ស្រឡះមុខ និងបែបសាមញ្ញៗទៅបានហើយ ដើម្បីឱ្យអ្នកមានភាពសុខស្រួលក្នុងចិត្ត និងងាយស្រួលថែទាំសក់របស់អ្នកផង។ អ្នកអាចលេងម៉ូដចង ក្រង ឬទម្លាក់ខ្លះៗក៏បាន ទោះជាម៉ូដទាំងនេះមានភាពសាមញ្ញ និងមើលទៅធម្មតាៗក៏ពិតមែន តែមិនសាំភ្នែកនោះទេ ហើយថែមទាំងផ្តល់នូវភាពងាយស្រួលមិនតិចទេដល់នារីៗយើង ព្រមទាំងជាម៉ូដដែលទាន់សម័យទៀតផង។ កុំភ្លេចណ៎ា! លេងម៉ូដសក់សម្រាប់ដំណើរកម្សាន្តដ៏រីករាយទាំងអស់គ្នា៕

November 14, 2019

រាជរដ្ឋាភិបាលគ្រោងចំណាយថវិកាជាតិឆ្នាំ2020 ប្រមាណ 8,223លានដុល្លារ

រាជរដ្ឋាភិបាលកម្ពុជាគ្រោងនឹងចំណាយថវិកានៅក្នុងឆ្នាំ2020ខាងមុខនេះសរុបប្រមាណ33,339,633លានរៀល ;ដែលស្មើនឹងប្រមាណជា 8,223លានដុល្លារសហរដ្ឋអាមេរិកសម្រាប់ការគ្រប់គ្រងរដ្ឋ។ គម្រោងចំណាយនេះបើធៀបនឹងឆ្នាំ2019 មានប្រមាណជា 28.01%នៃផសស (GDP) និងកើនឡើង22.7%។ នេះបើតាមខ្លឹមសារនៃសេចក្ដីសង្ខេបប្រតិបត្តិ “សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងរដ្ឋឆ្នាំ2020” របស់ក្រសួងសេដ្ឋកិច្ច និងហិរញ្ញវត្ថុ។

គេនៅមិនទាន់ដឹងថា តើការបង្កើនការចំណាយសម្រាប់ការចំណាយបន្ទាន់នេះនឹងរួមចំណែកដល់កញ្ចប់ថវិកាសារពើពន្ធដែលធនាគារពិភពលោកបានព្យាករថានឹងត្រូវបានណែនាំនោះទេ ប្រសិនបើសហភាពអឺរ៉ុបសម្រេចចិត្តដកកម្ពុជាចេញពីប្រព័ន្ធពាណិជ្ជកម្មអ្វីគ្រប់យ៉ាងលើកលែងតែអាវុធ ឬ EBA នៅក្នុងខែកុម្ភៈឆ្នាំក្រោយ។ កាលពីដើមខែនេះធនាគារពិភពលោកបានអះអាងថា រដ្ឋាភិបាលកម្ពុជាកំពុងរៀបចំកញ្ចប់ជំរុញសេដ្ឋកិច្ចរហូតដល់ 3%នៃផលិតផលក្នុងស្រុកសរុប។ការកើនឡើងតិចតួចនៃគម្រោងចំណាយនេះត្រូវបានគេរំពឹងថា នឹងកើតមាននៅគ្រប់ផ្នែកទាំងអស់នៃថវិកាចំពោះរដ្ឋបាលទូទៅ ដែលមានក្រសួង និងស្ថាប័នចំនួន15 រួមទាំងរដ្ឋសភា ព្រឹទ្ធសភា និងទីស្តីការគណៈរដ្ឋមន្ត្រី ដែលត្រូវបានគេមើលឃើញថា នឹងមានការកើនឡើងបន្តិចបន្តួចចាប់ពីឆ្នាំ2019ពី 615លានដុល្លារ ដល់ប្រហែល 628លានដុល្លារសម្រាប់ឆ្នាំ2020 ។

វិស័យការពារជាតិ សន្តិសុខ និងសណ្តាប់ធ្នាប់សាធារណៈត្រូវបានកំណត់នឹងទទួលបានជិត 1.2ពាន់លានដុល្លារនៅឆ្នាំក្រោយ ប្រសិនបើសេចក្តីព្រាងថវិកាត្រូវបានអនុម័ត ដោយកើនឡើងពី 1.1ពាន់លានដុល្លារនៅឆ្នាំនេះ ដែលនឹងត្រូវចែកជា4 នៃផ្នែកការពារជាតិ ប្រហែលជា 630លានដុល្លារ។

ស្ថាប័ន និងក្រសួងចំនួន9 ដែលបង្កើតជាផ្នែកសង្គម និងជំពូកសុខុមាលភាពនៃថវិកាក៏អាចត្រូវបានរំពឹងថា នឹងមានការកើនឡើងបន្តិចបន្តួចពី 1.81ពាន់លានដុល្លារនៅឆ្នាំនេះដែរ ដោយថវិកាឆ្នាំ2020 នឹងឈានដល់ 2ពាន់លានដុល្លារ ដែលក្នុងនោះថវិកាជាង 1.4ពាន់លានដុល្លារនឹងត្រូវបែងចែកទៅក្រសួងអប់រំ និងសុខាភិបាល។

វិស័យសេដ្ឋកិច្ចដែលរួមមានក្រសួង-ស្ថាប័នចំនួន10 ទំនងជានឹងមានការកើនឡើងតិចតួចដែរ ពី1.65ពាន់លានដុល្លារដល់ប្រហែល 1.8ពាន់លានដុល្លារ ដែលក្រសួងសាធារណការ និងដឹកជញ្ជូន ត្រូវបានរំពឹងថា នឹងមានប្រហែល 800លានដុល្លារនៅឆ្នាំ2020។

ក្នុងចំណោមគម្រោងចំណាយថវិកាជាតិជាង 8ពាន់លានដុល្លារសហរដ្ឋអាមេរិករបស់កម្ពុជា សម្រាប់ឆ្នាំ2020 នេះ រាជរដ្ឋាភិបាលមានទិសដៅជាយុទ្ធសាស្ត្រកំណត់ចំណាយថវិកាថ្នាក់ជាតិឱ្យស្ថិតក្នុងកម្រិតចំនួន 31,095,855លានរៀល ដែលស្មើនឹងប្រមាណជាង 7,600លានដុល្លារ ត្រូវជា26.12% នៃផសស កើនឡើង20.7% បើធៀបនឹងច្បាប់ឆ្នាំ2019 ដែលក្នុងនោះការចំណាយចរន្តថ្នាក់ជាតិ មានចំនួន 18,036,884លានរៀល ឬប្រមាណ 4,459លានដុល្លារនិងចំណាយមូលធនថ្នាក់ជាតិ មានចំនួន 13,058,971លានរៀល ឬប្រមាណ 3,200លានដុល្លារ)។

សូមបញ្ជាក់ថា នៅក្នុងឆ្នាំ2019 នោះសម្រាប់ការចំណាយទូទៅរបស់រដ្ឋ រាជរដ្ឋាភិបាលកម្ពុជាបានកំណត់ចំណាយថវិកាប្រមាណ 27,164,996លានរៀល ដែលប្រហាក់ប្រហែលនឹង 7,600លានដុល្លារសហរដ្ឋអាមេរិក។ ចំនួនបានកើនឡើង 11.4% ធៀបនឹងគម្រោងចំណាយថវិការដ្ឋឆ្នាំ2018 ដែលមានចំនួនសរុបចំនួន 24,375,102លានរៀល។

ថវិកាឆ្នាំ2020 ត្រូវបានរៀបចំដោយការគិតគូរប្រកបដោយភាពប្រយ័ត្នប្រយែង និងសម្រាប់អនុវត្តសកម្មភាពអាទិភាព ដើម្បីឆ្លើយតបទៅនឹងអាទិភាពគោលនយោបាយធំៗរបស់រាជរដ្ឋាភិបាល និងតម្រូវការចាំបាច់ជាមូលដ្ឋានរបស់ក្រសួងស្ថាប័ននានា ជាពិសេសការអនុវត្តឱ្យចេញលទ្ធផលជាក់ស្តែងប្រកបដោយប្រសិទ្ធភាពនូវកម្មវិធីនយោបាយ ព្រមទាំងផែនការយុទ្ធសាស្ត្រអភិវឌ្ឍន៍ជាតិឆ្នាំ2019-2023 របស់រាជរដ្ឋាភិបាលដែលជា មាគ៌ារយៈពេលមធ្យមសំដៅឈានទៅសម្រេចបាននូវបំណងប្រាថ្នារយៈពេលវែងរបស់ប្រជាជនកម្ពុជា។

នៅក្នុងកិច្ចប្រជុំពេញអង្គគណៈរដ្ឋមន្ត្រីកាលពីព្រឹកថ្ងៃទី25 ខែតុលា ឆ្នាំ2019 ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានសម្រេចអនុម័តទាំងស្រុងហើយលើ “សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងរដ្ឋឆ្នាំ2020”។ នេះបើតាមការប្រកាសរបស់អង្គភាពអ្នកនាំពាក្យរាជរដ្ឋាភិបាល៕

November 13, 2019

វិស័យសំណង់នៅតែរឹងមាំ និងទទួលបានការវិនិយោគ 6.5ពាន់លានដុល្លារ

ការវិនិយោគក្នុងវិស័យសំណង់នៅក្នុងប្រទេសកម្ពុជាបានឈានដល់កម្រិតខ្ពស់ថ្មីក្នុងអំឡុងពេល 9ខែ នៃឆ្នាំ2019 នេះ ដែលក្រសួងរៀបចំដែនដី នគរូបនីយកម្ម និងសំណង់បានអនុម័តលើគម្រោងសាងសង់ចំនួន 3,433គម្រោង និងទទួលបានការវិនិយោគគិតជាទឹកប្រាក់ចំនួនប្រមាណ 6.5ពាន់លានដុល្លារ។ នេះបើយោងតាមរបាយការណ៍ចុងក្រោយរបស់រដ្ឋាភិបាល។

ចាប់ពីខែមករា ដល់ខែកញ្ញា ការវិនិយោគក្នុងវិស័យនេះបានកើនឡើង34.7% បើប្រៀបធៀបនឹងរយៈពេលដូចគ្នាកាលពីឆ្នាំមុន។ របាយការណ៍ដដែលបានគូសបញ្ជាក់ថា ក្នុងរយៈពេលតែ 9ខែប៉ុណ្ណោះដែលគម្រោងសាងសង់សរុបចំនួន 3,433គម្រោងត្រូវបានអនុម័តនៅទូទាំងប្រទេសក្នុងអំឡុងពេលដូចគ្នា។ រួមជាមួយនឹងផ្ទៃដីប្រមាណច្រើនជាង 13លានម៉ែត្រការ៉េ។ នេះបើយោងតាមរបាយការណ៍ពីក្រសួងរៀបចំដែនដី នគរូបនីយកម្ម និងសំណង់។

ក្រសួងខាងលើបានកត់សម្គាល់ថា ក្នុងរយៈពេល9ខែដូចគ្នាកាលពីឆ្នាំមុន(2018)មានគម្រោងចំនួន 2,541គម្រោង ត្រូវបានអនុម័តដែលគ្របដណ្តប់លើផ្ទៃដីសរុប 10.7លានម៉ែត្រការ៉េ និងតម្លៃវិនិយោគសរុបមានចំនួន 4.8ពាន់លានដុល្លារ។

របាយការណ៍បានកត់សម្គាល់ថា ចាប់ពីឆ្នាំ2000ដល់ចុងខែកញ្ញា ឆ្នាំនេះ ក្រសួងរៀបចំដែនដី នគរូបនីយកម្ម និងសំណង់បានអនុម័តលើគម្រោងសាងសង់ចំនួន 46,991គម្រោងដែលមានទំហំទឹកប្រាក់វិនិយោគសរុបជាង 48ពាន់លានដុល្លារ និងផ្ទៃក្រឡាដីសរុបប្រមាណជាង 126លានម៉ែត្រការ៉េ។

យោងតាមរបាយការណ៍បានបង្ហាញថា នៅក្នុងប្រទេសកម្ពុជាមានអគារចំនួន 1,517 មានកម្ពស់យ៉ាងតិច 5ជាន់ ហើយនៅពេលនិយាយអំពីវិនិ-យោគិនក្នុងវិស័យនេះនៅកម្ពុជា របាយការណ៍បានបញ្ជាក់ថា ជនជាតិចិននៅតែបន្តនាំមុខគេដដែល។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ថ្មីៗនេះបានមានប្រសាសន៍ថា កំណើនដ៏រឹងមាំនៅក្នុងវិស័យសំណង់នឹងមានបន្តយ៉ាងហោចណាស់ក្នុងរយៈពេល 5ឆ្នាំទៅមុខទៀត។ លោកបានមានប្រសាសន៍ថា៖“ដរាបណាស្ថានភាពនយោបាយ និងសេដ្ឋកិច្ចរបស់ប្រទេសយើងនៅតែមានស្ថិរភាព វិស័យសំ-ណង់នឹងនៅតែបន្តរីកចម្រើន”។

លោក ហ៊ឹម សីហា នាយកស្រាវជ្រាវក្រុមហ៊ុន VTrust Appraisal បានលើកឡើងថា ការកើនឡើងនៃការវិនិយោគ ភាគច្រើនបណ្តាលមកពីតម្រូវការលំនៅឋានដែលកំពុងកើនឡើងនៅក្នុងចំណោមប្រជាជនក្នុងស្រុក។ តម្រូវការនេះត្រូវបានជំរុញដោយវណ្ណៈកណ្តាលដែលកំពុងលេចធ្លោនៅក្នុងប្រទេស ដូចជាគូស្វាមីភរិយាថ្មីថ្មោង ជាដើម។ តម្រូវការដែលកំពុងកើនឡើងសម្រាប់លំនៅឋាននៅក្នុងចំណោមប្រជាជនកម្ពុជា បានធ្វើឱ្យគម្រោងសំណង់នានាកើនឡើង។

លោក ហ៊ឹម សីហា មានប្រសាសន៍ថា៖“តម្លៃនៃការវិនិយោគក្នុងវិស័យសំណង់បានកើនឡើងគួរឱ្យកត់សម្គាល់ក្នុងទសវត្សរ៍ចុងក្រោយនេះ ដោយសារតែការកើនឡើងនៃតម្រូវការលំនៅឋានក្នុងចំណោមអ្នកទិញក្នុងស្រុកដែលត្រូវបានជំរុញដោយចំនួនប្រជាជនដែលទើបនឹងកើនឡើងថ្មី”។ លោកបានបន្ថែមទៀតថា តម្រូវការការិយាល័យ សេវាកម្មផ្ទះល្វែង អាផាតមិន និងអគារពាណិជ្ជកម្មកាន់តែច្រើនឡើង ៗ បានរួមចំណែកដល់ការកើនឡើងនៃសម្ភារសំណង់ដូចគ្នា។

លោកបានមានប្រសាសន៍ថា៖“ការកើនឡើងនៃការនាំចូលដែកថែប និងសម្ភារសំណង់បានបង្ហាញពីការរីកចម្រើនឥតឈប់ឈរពី 1ឆ្នាំទៅ1ឆ្នាំ ដែលបង្ហាញនូវកំណើននៃវិស័យសំណង់ដែលមានសុខភាពល្អ”។

យោងតាមរបាយការណ៍ចុងក្រោយដែលបានចេញផ្សាយដោយធនាគារពិភពលោក បានឱ្យដឹងថា វិស័យសំណង់នៅកម្ពុជានៅតែបន្តកើនឡើង ដោយសារតែមានការកើនឡើងជាលំដាប់នៃការវិនិយោគនៅក្នុងវិស័យនេះ និងការនាំចូលសម្ភារសំណង់យ៉ាងច្រើនមកក្នុងប្រទេស។

បច្ចុប្បន្នភាពសេដ្ឋកិច្ចនៅក្នុងតំបន់អាស៊ីបូព៌ានិងប៉ាស៊ីហ្វិក របាយការណ៍របស់ធនាគារពិភពលោកបានព្យាករថា សេដ្ឋកិច្ចរបស់ប្រទេសកម្ពុជានឹងកើនឡើង7% ដោយសារតែការរីកចម្រើនរបស់ប្រទេសនេះនៅក្នុងវិស័យសំណង់។

លោក លី សូដេត សេដ្ឋវិទូជាន់ខ្ពស់នៅធនាគារពិភពលោកប្រចាំកម្ពុជា បានមានប្រសាសន៍ថា ការ-នាំចូលដែកថែបសរុបបានកើនឡើង 63.5% ក្នុងរយៈពេល 9ខែនៃឆ្នាំនេះ បើប្រៀបធៀបនឹងរយៈពេលដូចគ្នាកាលពីឆ្នាំមុន។ វាបង្ហាញពីកំណើនខ្លាំង ចាប់តាំងពីវាកើនឡើងត្រឹមតែ 27.7% នៅចន្លោះឆ្នាំ2017 និងឆ្នាំ2018។

ខណៈពេលដែលឧស្សាហកម្មនេះមិនមានសញ្ញានៃការធ្លាក់ចុះនាពេលឆាប់ៗនោះ លោកលី សូដេតបានរំឭកថា មានយុទ្ធសាស្ត្រមួយចំនួននៅក្នុងដៃដើម្បីការពារហានិភ័យណាមួយ ក៏ជាវិធីសាស្ត្រល្អផងដែរ។ “វិស័យសំណង់តែងតែមានវដ្តនៃការរីកដុះដាល និងការរាំងស្ទះ ដូច្នេះយើងមិនរំពឹងថា កំណើនសំណង់នឹងបន្តជារៀងរហូតនោះទេ”។

ជាមួយគ្នានេះ ក្រសួងសេដ្ឋកិច្ច និងហិរញ្ញវត្ថុបានព្យាករថា កំណើនវិស័យសំណង់ និងអចលនទ្រព្យដែលជាអនុវិស័យជំរុញកំណើនសេដ្ឋកិច្ចជាតិ គឺនឹងធ្លាក់ចុះនៅឆ្នាំ2019 ដល់ឆ្នាំ2022 ក៏ប៉ុន្តែ វិស័យទាំង2 នេះ នឹងនៅតែរក្សាភាពរឹងមាំដដែល។

របាយការណ៍ដែលចែកដល់អ្នកសារព័ត៌មានក្នុងកិច្ចប្រជុំពេញអង្គនៅទីស្តីការគណៈរដ្ឋមន្ត្រី កាលពីខែសីហា បានបង្ហាញថា វិស័យសំណង់ត្រូវបានគេរំពឹងថា នឹងកើនឡើងក្នុងល្បឿន 17.3% ក្នុងឆ្នាំ2019 ហើយនឹងធ្លាក់ចុះដល់ 16.1% នៅឆ្នាំ2020 ខណៈឆ្នាំ2021 និង2022 តួលេខនេះនឹងបន្តថយចុះដល់ 15.5% និង 14.9%តាមលំដាប់។

នេះជារបាយការណ៍ដែលបង្ហាញថា វិស័យអចលនទ្រព្យនឹងកើនឡើង8.8% ក្នុងឆ្នាំ2019 ហើយនឹងធ្លាក់ចុះដល់8.5% នៅឆ្នាំ2020 ហើយតួលេខនេះនឹងបន្តធ្លាក់ចុះដល់ 7.9% នៅឆ្នាំ2021 និងធ្លាក់ចុះដល់ 7.5% នៅឆ្នាំ2020។

ការធ្លាក់ចុះនេះបានកើតឡើងខណៈដែលកំណើនសេដ្ឋកិច្ចកម្ពុជាក្នុងឆ្នាំ2019 ត្រូវបានគេរំពឹងថា នឹងកើនឡើងដល់ 7.1% ហើយនឹងធ្លាក់ចុះមកនៅត្រឹម6.5% នៅឆ្នាំ2020 ដោយសារតែសម្ពាធក្រៅស្រុក ដូចជាការប្រឈមនឹងការបាត់បង់ប្រព័ន្ធអនុគ្រោះពន្ធពាណិជ្ជកម្ម “អ្វីៗទាំងអស់លើកលែងតែអាវុធ ឬ EBA” ជាមួយសហភាពអឺរ៉ុប។ទោះជាយ៉ាងនេះក្តី ក្រសួងសេដ្ឋកិច្ច និងហិរញ្ញវត្ថុបានបញ្ជាក់ថា វិស័យសំណង់នៅតែរក្សាភាពរឹងមាំ។

នេះគឺដោយសារវិស័យសំណង់គាំទ្រដោយសម្ទុះកំណើននៃសំណង់តម្លៃមធ្យម និងសមរម្យ តាមរយៈការអនុវត្តគម្រោងអភិវឌ្ឍន៍លំនៅឋានតម្លៃសមរម្យ និងភាពជឿជាក់ចំពោះការវិនិយោគនៅកម្ពុជា ដែលជួយប៉ះប៉ូវការធ្លាក់ចុះនៃសំណង់តម្លៃខ្ពស់មួយផ្នែក៕

November 12, 2019

រយៈពេល 9ខែ ឆ្នាំ2019 ស្ថាប័នប្រមូលពន្ធរបស់រដ្ឋ 2ស្ថាប័នមានកំណើនប្រដំប្រសងគ្នា

ស្ថាប័នប្រមូលពន្ធរបស់រដ្ឋ 2ស្ថាប័ន គឺអគ្គនាយកដ្ឋានពន្ធដារ និងអគ្គនាយកដ្ឋានគយ និងរដ្ឋាករកម្ពុជាត្រូវបានគេមើលឃើញថា បានប្រមូលពន្ធជូនរដ្ឋដោយទទួលបានកំណើនចំណូលពន្ធ ក្នុងតួលេខដ៏ខ្ពស់ ដែលតាមតួលេខ អគ្គនាយកដ្ឋានពន្ធដារបានប្រមូលពន្ធស្មើនឹងប្រមាណ 2,183.68លានដុល្លារអាមេរិក។ រីឯអគ្គនាយកដ្ឋានគយ និងរដ្ឋាករកម្ពុជាប្រមូលចំណូលបានប្រមាណ2,391លានដុល្លារអាមេរិក ដែលជាតួលេខមួយគួរឱ្យកត់សម្គាល់ក្នុងរយៈពេល 9ខែ ឆ្នាំ2019 នេះ។

អគ្គនាយកដ្ឋានពន្ធដារ ក្នុងរយៈពេល 9ខែ ឆ្នាំ2019 បានប្រមូលពន្ធតាមរយៈប្រព័ន្ធគ្រប់គ្រងទិន្នន័យចំណូលអនឡាញបានចំនួន 8,734.70 ប៊ីលានរៀល ស្មើនឹងប្រមាណ 2,183.68លានដុល្លារអាមេរិក ស្មើនឹង 95.42 %នៃផែនការប្រចាំឆ្នាំ។យោងតាមរបាយការណ៍របស់អគ្គនាយកដ្ឋានពន្ធដារបានឱ្យដឹងថា បើធៀបនឹងរយៈពេល ដូចគ្នាក្នុងឆ្នាំ2018 ចំណូលពន្ធអាករបានកើនឡើងចំនួន 1,968.34ប៊ីលានរៀល ឬប្រមាណ 492.09លានដុល្លារអាមេរិក ស្មើនឹង 29.09%។

របាយការណ៍ដដែលបញ្ជាក់ថា ក្នុងរយៈពេល 9ខែ ឆ្នាំ2019 នេះ ប្រភេទពន្ធសំខាន់ៗ ដែលរួមចំណែកដល់កំណើនចំណូលពន្ធ មានការកើនឡើងគួរឱ្យកត់សម្គាល់ បើធៀបនឹងរយៈពេលដូចគ្នាក្នុងឆ្នាំ2018 ក្នុងនោះរួមមានអាករលើតម្លៃបន្ថែម (VAT)កើនឡើង 33.05% ពន្ធលើប្រាក់ចំណូលកើនឡើន26.05 % អាករពិសេសកើនឡើង 26.50 % ពន្ធលើប្រាក់បៀវត្សរ៍កើនឡើង 16.66% និងពន្ធលើឈ្នួលផ្ទះ និងដីកើនឡើង 70.33 %។

របាយការណ៍ដដែលបានបញ្ជាក់ទៀតថា សម្រាប់ខែកញ្ញា ឆ្នាំ2019 កន្លងមកនេះ អគ្គនាយកដ្ឋានពន្ធដារបានប្រមូលពន្ធបានប្រមាណ 928.25ប៊ីលានរៀល ឬប្រមាណ 232.06លានដុល្លារអាមេរិក ស្មើនឹង 10.16%នៃផែនការប្រចាំឆ្នាំ។ បើធៀបនឹងរយៈពេលដូចគ្នានៃឆ្នាំ2018 កើនឡើងប្រមាណ 175.08ប៊ីលានរៀល ឬប្រមាណ43.77លានដុល្លារអាមេរិក ស្មើនឹង 23.25 %។

ឯកឧត្តម គង់ វិបុល អគ្គនាយកនៃអគ្គនាយកដ្ឋានពន្ធដារបានឱ្យដឹងដែរថា សម្រាប់ចំណូលពន្ធក្នុងខែកញ្ញា ឆ្នាំ2019 នេះ អគ្គនាយកដ្ឋានពន្ធដារប្រមូលពន្ធបាន 232.06លានដុល្លារអាមេរិក គឺជាឯតទគ្គ-កម្មថ្មីមួយទៀតដែលពុំធ្លាប់មាន ព្រោះខែកញ្ញា ធ្លាប់តែជាខែដែលការប្រមូលចំណូលពន្ធមានកម្រិតទាបកាលពីឆ្នាំមុន។ លោកបន្តថា ការសម្រេចបាននូវកំណើនប្រកបដោយនវានុវត្តន៍ និងនិរន្តរភាព គឺអាស្រ័យដោយការអនុវត្តកំណែទម្រង់រដ្ឋបាលសារពើពន្ធ និងការធ្វើទំនើបកម្ម ប្រព័ន្ធពន្ធដារ ជាពិសេសវិធានការថ្មីៗរបស់អគ្គនាយកដ្ឋានពន្ធដារ។

ឯកឧត្តមបានបញ្ជាក់ថា បូករួមជាមួយវិធានការថ្មីៗទាំងនេះធ្វើឱ្យនៅរយៈពេល 9ខែ ឆ្នាំ 2019នេះ ការគ្រប់គ្រងប្រមូលចំណូលពន្ធ និងអាករគ្រប់ប្រភេទសម្រេចបានប្រមាណជាង 95.42% នៃផែនការប្រចាំឆ្នាំ។ វិធានការថ្មីៗ របស់អគ្គនាយកដ្ឋានពន្ធដាររួមមាន៖

*ការដាក់ឱ្យអនុវត្តនូវប្រព័ន្ធ Online-VAT Refundand Online-VAT Credit ដើម្បីពង្រឹងការគ្រប់គ្រង ការបង្វិលសង និងប្រើប្រាស់ឥណទានអាករលើតម្លៃបន្ថែមឱ្យមានប្រសិទ្ធភាព និងតម្លាភាព។*សេវាគាំទ្រ ពិគ្រោះយោបល់ និងការផ្តល់សេវាជូនអ្នកជាប់ពន្ធតាមរយៈ CALL CENTER 1277 GDT Live-Chat ពិគ្រោះយោបល់ដោយផ្ទាល់ E-mail ព្រមទាំងការតាមដាន និងឆ្លើយតបនានាតាម Facebook។ជាមួយគ្នានេះដែរ ;រយៈពេល 9ខែ ឆ្នាំ2019នេះ អគ្គនាយកដ្ឋានគយ និងរដ្ឋាករកម្ពុជាប្រមូលចំណូលបានជាង 2ពាន់លានដុល្លារអាមរិកដែរ។ នេះបើយោងតាមសេចក្តីប្រកាសព័ត៌មានស្តីពីកិច្ចប្រជុំបូកសរុបការងារគយ និងរដ្ឋាករ។

យោងតាមសេចក្តីប្រកាសព័ត៌មាននេះ ឯកឧត្តមបណ្ឌិត គុណ ញឹម ប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកដ្ឋានគយ និងរដ្ឋាករកម្ពុជាបានគូសបញ្ជាក់ថា សម្រាប់រយៈពេល 9ខែ ឆ្នាំ2019ចំណូលសរុបមានប្រមាណជាង 9.7ទ្រីលានរៀល(ប្រមាណ 2,391លានដុល្លារអាមេរិក)កើនឡើងប្រមាណ 35% ធៀបនឹងរយៈពេលដូចគ្នាកាលពីឆ្នាំ2018។

ឯកឧត្តមថ្លែងថា លទ្ធផលចំណូលនេះត្រូវនឹងប្រមាណជា 106%នៃផែនការឆ្នាំ ដែលកំណត់ ដោយច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ2019។បើប្រៀបធៀបរយៈពេលដូចគ្នាក្នុងឆ្នាំ2018 លទ្ធផលចំណូលតាមប្រភេទពន្ធ និងអាករសំខាន់ៗដែលប្រមូលបានដោយគយ មានកំណើនគួរឱ្យកត់សម្គាល់ក្នុងនោះពន្ធគយ(ពន្ធនាំចូល)មានកំណើនជិត 38%អាករពិសេសកើនប្រមាណ 39% និងអាករលើតម្លៃបន្ថែម (VAT) កើនជាង 32%។

គួរបញ្ជាក់ថា មុខទំនិញជាប្រភពចំណូលពន្ធសំខាន់ៗ រួមមាន៖ 1-យានយន្ត និងគ្រឿងចក្រ គ្របដណ្តប់ប្រមាណជាង 52%នៃចំណូលសរុប។ 2-ប្រេងឥន្ធនៈ និងថាមពលប្រមាណជិត 17%នៃចំណូលសរុប និង3-ទំនិញចម្រុះ និងគ្រឿងសំណង់មានប្រមាណ 29.5%នៃចំណូលសរុប។

លទ្ធផលដ៏ល្អប្រសើរនេះ គឺបានមកដោយសារកម្ពុជាមានស្ថិរភាពនយោបាយ ការអនុវត្តកម្មវិធីកែទម្រង់របស់អគ្គនាយកដ្ឋានគយ និងរដ្ឋាករស្របតាមគោលនយោបាយ និងយុទ្ធសាស្ត្រកែទម្រង់របស់រាជរដ្ឋាភិបាល ការពង្រឹងអភិបាលកិច្ចផ្ទៃក្នុងរបស់អង្គភាពគយ និងការយល់ដឹងកាន់តែទូលាយក្នុងការអនុវត្តកាតព្វកិច្ចពន្ធអាកររបស់អ្នកធុរកិច្ចពាក់ព័ន្ធ។

ដើម្បីឱ្យការប្រមូលពន្ធ និងអាករកាន់តែមានប្រសិទ្ធភាព និងទទួលបានលទ្ធផលកាន់តែល្អប្រសើរបន្ថែមទៀត ឯកឧត្តម គុណ ញឹមបានណែនាំឱ្យមន្ត្រីគយ និងរដ្ឋាករខិតខំប្រឹងប្រែងឱ្យអស់ពីកម្លាំងកាយចិត្តក្នុងការបំពេញភារកិច្ចប្រកបដោយការទទួលខុសត្រូវលើវិជ្ជាជីវៈ និងបានរំឭកមតិណែនាំរបស់ឯកឧត្ដមអគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ កាលពីកិច្ចប្រជុំកន្លងមក។

លើសពីនេះ លោកបានណែនាំបន្ថែមដោយសង្កត់ធ្ងន់ និងត្រូវយកចិត្តទុកដាក់ខ្ពស់ជាប្រចាំលើការងារជំនាញសំខាន់ៗមួយចំនួនដូចជា៖ ការពង្រឹងប្រសិទ្ធភាពនៃការងារបច្ចេកទេសគយ អនុវត្តបន្តនូវការងារបង្ការ និងបង្ក្រាបអំពើរត់គេច និងបន្លំពន្ធ ការធ្វើសាមញ្ញកម្មនីតិវិធីគយ និងកែលម្អសេវាគយបន្ថែមទៀត ការអនុវត្តនីតិវិធីបំពេញបែបបទគយមុនពេលទំនិញមកដល់ ជំរុញបញ្ចប់យុទ្ធសាស្ត្រនៃការអនុវត្តច្បាប់ និងយុទ្ធសាស្ត្រប្រើប្រាស់បច្ចេកវិទ្យាព័ត៌មាន និងការកសាងផែនការសកម្មភាពរបស់អគ្គនាយកដ្ឋានគយ និងរដ្ឋាករ ឆ្នាំ2020 ជាដើម៕

November 12, 2019

ខេត្តបារៀ-វង់តាវវៀតណាម សហការជាមួយសមាគមទីភ្នាក់ងារទេសចរណ៍កម្ពុជាជំរុញវិស័យទេសចរណ៍

សមាគមទីភ្នាក់ងារទេសចរណ៍កម្ពុជា (CATA)បានចុះអនុស្សរណៈនៃការយោគយល់គ្នា (MoU) ស្តីពីកិច្ចសហប្រតិបត្តិការអភិវឌ្ឍន៍វិស័យទេសចរណ៍ជាមួយសមាគមទីភ្នាក់ងារទេសចរណ៍ ខេត្តបារៀ-វង់តាវ (Baria-Vung Tau) ប្រទេសវៀតណាម ដើម្បីបង្កើតកញ្ចប់ទេសចរណ៍ពិសេសរួមគ្នាក្នុងការទាក់ទាញភ្ញៀវទេសចរវៀតណាមឱ្យមកទស្សនាកម្ពុជាបន្ថែមទៀត ខណៈដែលភ្ញៀវទេសចរវៀតណាមឈរនៅលេខរៀងទី2 បន្ទាប់ពីទេសចរចិន។

លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា (CATA) បានថ្លែងថា ការចុះអនុស្សរណៈនៃការយោគយល់គ្នាមួយនេះ គឺដើម្បីជួយគ្នាធ្វើឱ្យគោលដៅទេសចរណ៍នៃប្រទេសជិតខាងទាំង2 កម្ពុជា-វៀតណាមកាន់តែមានសម្ទុះខ្លាំងជាងមុន។

លោកស្រីមានប្រសាសន៍ថា៖ “សមាគមទីភ្នាក់ងារទេសចរណ៍ខេត្តបារៀ-វង់តាវ របស់ប្រទេសវៀតណាមក៏ចង់ផ្សព្វផ្សាយតំបន់ទេសចរណ៍របស់គេ ក្នុងគោលដៅស្រូបទាញភ្ញៀវទេសចរ ពីកម្ពុជាឱ្យបានកាន់តែច្រើនឡើងថែមមួយកម្រិតទៀតផងដែរ”។

លោកជំទាវបានបន្តថា៖“យើងព្រមព្រៀងគ្នាក្នុងការជំរុញភ្ញៀវទេសចរទាំង 2កន្លែងនេះឱ្យកាន់តែបានច្រើនជាងមុន ជាពិសេសជួយជំរុញភ្ញៀវទេសចរខេត្តបារៀ-វង់តាវ ឱ្យចូលមកទស្សនាកម្ពុជា។ ដោយយើងមើលឃើញថា កម្រិតជីវភាពរបស់ប្រជាពលរដ្ឋយើងទាំង2 កាន់តែល្អប្រសើរឡើងពី 1ឆ្នាំទៅ 1ឆ្នាំអ៊ីចឹងហើយគុណភាពសេវាកម្មទាំងឡាយក៏ត្រូវការល្អជាងមុនដែរ”។

លោកស្រីថ្លែងថា សមាគមទីភ្នាក់ងារទេសចរណ៍ខេត្តវ៉ុងតាវ ប្រទេសវៀតណាមក៏ចង់ផ្សព្វផ្សាយតំបន់ទេសចរណ៍របស់គេក្នុងគោលដៅស្រូបទាញភ្ញៀវទេសចរពីកម្ពុជាឱ្យកាន់តែច្រើនឡើងថែមមួយកម្រិតទៀតផងដែរ ខណៈបច្ចុប្បន្នភ្ញៀវទេសចរកម្ពុជាទៅទស្សនាខេត្តនេះនៅមានចំនួនទាបនៅឡើយ។ លោកស្រីបន្តថា៖ “សម្រាប់ខេត្តបារៀ-វង់តាវ លំហូរភ្ញៀវទេសចរកម្ពុជានៅមានកម្រិតនៅឡើយ ដូច្នេះហើយទើបបានជាខាងវៀតណាមចាប់ផ្តើមចូលមកធ្វើការសហការជាមួយយើង”។

លោកស្រី ឆាយ ស៊ីវលីន ថ្លែងបញ្ជាក់ទៀតថា៖ ;“រំពឹងថា តាមរយៈការចុះអនុស្សរណៈនៃការយោគយល់គ្នានេះ កម្ពុជាក៏អាចស្រូបទាញភ្ញៀវទេសចរពីខាងវៀតណាមកាន់តែច្រើនឡើងជាងមុន ដោយសមាគមទីភ្នាក់ងារទេសចរណ៍នៃប្រទេសទាំង2 នឹងបង្កើតកញ្ចប់ទេសចរណ៍ពិសេសមួយ លើសពីសេវាកម្មទេសចរណ៍ធម្មតា ដើម្បីឱ្យមានភាពទាក់ទាញទាំងសងខាង”។

លោកស្រីបានថ្លែងបន្តទៀតថា៖ “យើងធ្វើការផ្សព្វផ្សាយ Promotion ដល់ភ្ញៀវរៀងៗខ្លួន។ នៅខេត្តបារៀ-វង់តាវ គេចាប់ផ្តើមផ្សព្វផ្សាយពីកម្ពុជាកាន់តែច្រើនជាងមុន មិនត្រឹមតែផ្សព្វផ្សាយទេ យើងនឹងធ្វើការ Promotion រួមគ្នា គឺយើងបន្ថែមតម្លៃឱ្យល្អ បន្ថែមសេវាកម្មពិសេសណាមួយដែលមិនធម្មតាដូចជាការផ្សព្វផ្សាយទូទៅទេ ដើម្បីឱ្យមានភាពទាក់ទាញទាំងសងខាង ទាំងខេត្តបារៀ-វង់តាវ ទាំងកម្ពុជាយើង”។

លោក ង្វៀន ហុងលិញ សមាជិកគណៈកម្មាធិការមជ្ឈិមបក្សកុម្មុយនីស្តវៀតណាម និងជាប្រធានក្រុមប្រឹក្សាប្រជាជនខេត្តបារៀ-វង់តាវ បានបង្ហាញពីសក្តានុពលទេសចរណ៍ និងចំណុចសំខាន់ៗនៃវិស័យទេសចរណ៍របស់ខេត្តបារៀ-វង់តាវដែលមានដូចជាទេសចរណ៍បែបវប្បធម៌ ពាណិជ្ជកម្ម ឆ្នេរសមុទ្រនិងតំបន់ទាក់ទាញភ្ញៀវទេសចរជាច្រើនទៀត។ ប្រទេសវៀតណាមចង់ទាក់ទាញភ្ញៀវទេសចរពីកម្ពុជាឱ្យបានច្រើនដើម្បីទៅទស្សនាខេត្តបារៀ-វង់តាវ ខណៈបច្ចុប្បន្ន លោកមើលឃើញថា ចំនួនភ្ញៀវទេសចរកម្ពុជាទៅកម្សាន្តនៅក្នុងខេត្តមួយនេះនៅមានកម្រិតតិចតួចនៅឡើយ។

ដោយឡែកមួយទៀតរដ្ឋបាលរាជធានីភ្នំពេញក្នុងឱកាសទទួលស្វាគមន៍ក្រុមគណៈប្រតិភូវៀតណាម ដែលដឹកនាំដោយលោក ង្វៀន ហុងលិញប្រធានក្រុមប្រឹក្សាប្រជាជនខេត្តបារៀ-វង់តាវ នៃប្រទេសវៀតណាម កាលពីថ្ងៃទី21 ខែតុលា ឆ្នាំ2019នេះ ក៏បានជំរុញការតភ្ជាប់វិស័យទេសចរណ៍រវាងរាជធានីភ្នំពេញជាមួយនឹងខេត្តបារៀ-វង់តាវប្រទេសវៀតណាមនេះផងដែរ ដើម្បីទាក់ទាញភ្ញៀវទេសចរ នៃប្រទេសទាំង2 ឱ្យទៅទស្សនាកម្សាន្តទៅវិញទៅមកឱ្យកាន់តែច្រើន និងពិភាក្សាលើគម្រោងភ្ជាប់កិច្ចសហប្រតិបត្តិការលើវិស័យជាច្រើន ដើម្បីជាប្រយោជន៍សម្រាប់ប្រជាជនទាំងសងខាង។

ឯកឧត្តម ឃួង ស្រេង អភិបាលរាជធានីភ្នំពេញចង់ឱ្យមានការភ្ជាប់ទំនាក់ទំនងរវាងវិស័យដឹកជញ្ជូនអ្នកដំណើរតាមរយៈរថយន្តក្រុងពីរាជធានីភ្នំពេញទៅខេត្តបារៀ-វង់តាវ នៃប្រទេសវៀតណាម ឬពីខេត្តបារៀ-វង់តាវ មកកាន់រាជធានីភ្នំពេញវិញ ដើម្បីបង្កលក្ខណៈងាយស្រួលដល់អ្នកទេសចរនៃប្រទេសទាំង2 បានទៅទស្សនាកម្សាន្តនៅតំបន់ទេសចរណ៍សំខាន់ៗ ទាំងនៅរាជធានីភ្នំពេញ និងខេត្តបារៀ-វង់តាវ ជាដើម។

ឯកឧត្តមបានអះអាងថា គម្រោងតភ្ជាប់វិស័យទេសចរណ៍រវាងរាជធានី-ខេត្តនៃប្រទេសទាំង2នេះ និងក្លាយជាកញ្ចប់ផលិតផលថ្មីក្នុងការទាក់ទាញភ្ញៀវទេសចរ ខណៈដែលរាជធានីភ្នំពេញ និងខេត្តបារៀ-វង់តាវ នៃប្រទេសវៀតណាម សម្បូរទៅដោយតំបន់ទេសចរណ៍ធម្មជាតិប្រវត្តិសាស្ត្រដ៏ច្រើនដូចគ្នា។លោកថ្លែងថា ឥលូវនេះ ក្រោមកំណើនសេដ្ឋកិច្ចជាង7% ជាង 2ទសវត្សរ៍មកនេះ ប្រជាជនកម្ពុជារស់នៅក្នុងភាពស៊ីវិល័យក្នុងការធ្វើដំណើរកម្សាន្តទាំងក្នុងប្រទេស និងក្រៅប្រទេស។

ឯកឧត្តម ឃួង ស្រេង បានបញ្ជាក់ថា៖“ស្របពេលដែលទីក្រុងបារៀ-វង់តាវ នៃប្រទេសវៀត ណាមនិងរាជធានីភ្នំពេញសម្បូរទៅដោយតំបន់ទេសចរណ៍ ដូច្នេះយើងត្រូវតែផ្លាស់ប្តូរវិស័យទេសចរណ៍គ្នាទៅវិញទៅមក ពិសេសការភ្ជាប់សេវារថយន្តក្រុងដោយផ្ទាល់ពីរាជធានីភ្នំពេញទៅបារៀ-វង់តាវ ឬពីបារៀ-វង់តាវមកកាន់រាជធានីភ្នំពេញវិញ។ បន្ថែមពីនេះទៀត គឺការផ្លាស់ប្តូរការវិនិយោគលើវិស័យទេសចរណ៍ដែលបង្កលក្ខណៈងាយស្រួលដល់ប្រជាជននៃប្រទេសទាំង2 បានធ្វើដំណើរកម្សាន្តទៅវិញទៅមក”។

គួរបញ្ជាក់ថា ដើម្បីសម្រួលដល់ការធ្វើដំណើររបស់ភ្ញៀវទេសចរពីវៀតណាមមកកាន់កម្ពុជា កាលពីពេលថ្មីៗនេះ ក្រុមហ៊ុនអាកាសចរណ៍ក្នុងស្រុក Cambodia Angkor Air ក៏បានប្រកាសភ្ជាប់ជើងហោះហើរត្រង់ពីរាជធានីភ្នំពេញ ទៅខេត្តដាណាង ប្រទេសវៀតណាមផងដែរ៕

November 12, 2019

សិស្សអាមេរិកមួយក្រុមមកកម្ពុជាដើម្បីស្វែងយល់ពីការរស់នៅ និងវប្បធម៌ខ្មែរ

សិស្សានុសិស្សមួយក្រុមបានមកកាន់ប្រទេសកម្ពុជាដើម្បីស្វែងយល់ពីការរស់នៅ វប្បធម៌ និងការអប់រំ នៅកម្ពុជាតាមរយៈកម្មវិធីផ្លាស់ប្តូរបទពិសោធរវាងសាលារៀន និងសាលារៀន (International School to School Experience) ជាមួយនឹងបណ្តាញសាលារៀនរបស់វេសឡាញ។

ដំណើរមកកាន់កម្ពុជារបស់ក្រុមសិស្សអាមេរិកមកពីរដ្ឋ Colorado នេះធ្វើឡើងបន្ទាប់ពីសិស្សនៃសាលារៀនវេសឡាញន៍ចំនួន 8 រូបបានបំពេញទស្សនកិច្ចសិក្សា និងផ្លាស់ប្តូរបទពិសោធនៅសហរដ្ឋអាមេរិកចំនួន3សប្តាហ៍។ នៅក្នុងកម្មវិធីនេះ សិស្សអាមេរិកទាំងអស់នឹងមកស្នាក់នៅក្នុងផ្ទះជាមួយនឹងក្រុមសិស្សខ្មែរដែលបានទៅបំពេញទស្សនកិច្ចនៅអាមេរិក ដើម្បីស្វែងយល់ពីការរស់នៅ របៀបនៃការរស់នៅ វប្បធម៌ប្រពៃណី និងការអប់រំនៅក្នុងគ្រួសារខ្មែរ។ សកម្មភាពនេះ ត្រូវបានគេមើលឃើញថានឹងធ្វើឱ្យមានទំនាក់ទំនងកាន់តែប្រសើររវាងសិស្ស និងអាណាព្យាបាលខ្មែរ ជាមួយនឹងសិស្ស និងអាណាព្យាបាលនៅសហរដ្ឋអាមេរិក ហើយវាក៏ជាឱកាសល្អដែលសិស្ស និងអាណាព្យាបាល អាចផ្សព្វផ្សាយពីវប្បធម៌ប្រពៃណី ម្ហូបអាហារ និងអត្តសញ្ញាណដ៏ល្អរបស់ខ្មែរទៅកាន់ពិភពលោកកាន់តែប្រសើរ។

លោក គង់ សំនៀង ប្រធាននាយកប្រតិបត្តិការនៃក្រុមហ៊ុនវេសឡាញ អេឌ្យូខេសិន គ្រុប បានលើកឡើងថាគោលបំណងសំខាន់នៃកម្មវិធីផ្លាស់ប្តូរការសិក្សានេះ គឺចង់ពង្រឹង និងបង្កើនទំនាក់ទំនងកាន់តែខ្លាំងរវាងសិស្សនៃបណ្តាញសាលារៀនរបស់វេសឡាញ ជាមួយនឹងសិស្សបរទេស ដែលអនុញ្ញាតឱ្យពួកគេស្វែងយល់បានកាន់តែច្បាស់ពីការរស់នៅក្នុងប្រទេសលោកខាងលិច។ កម្មវិធីនេះ មិនមែនជារលើកទី1នោះទេ ដែលក្រុមហ៊ុនវេសឡាញ អេឌ្យូខេសិន គ្រុប បានសហការជាមួយនឹង ISSE និងសាលានានាជុំវិញពិភពលោកក្នុងការបញ្ជូនសិស្សឱ្យចូលរួមកម្មវិធីផ្លាស់ប្តូរការសិក្សា។

លោក គង់ សំនៀង បាននិយាយថា៖ ”នៅឆ្នាំមុន យើងបានបញ្ជូនសិស្សរបស់យើងទៅកាន់ប្រទេសអូស្ត្រាលី និងទៅកាន់ប្រទេសមួយចំនួនផ្សេងទៀត ហើយយើងនឹងបន្តកម្មវិធីដ៏ល្អបែបនេះជាបន្តបន្ទាប់ទៀតដើម្បីឱ្យសិស្សមានឱកាសកាន់តែច្រើនដើម្បីស្វែងរកអ្វីថ្មីៗនៅក្នុងពិភពលោក ផ្លាស់ប្តូរវិធីសិក្សា ជំរុញទំនួលខុសត្រូវ រៀនរស់នៅជាក្រុម រៀបចំខ្លួនឱ្យបានល្អសម្រាប់អនាគត និងរៀនដឹកនាំខ្លួនឯងដោយមិនចាំបាច់ពឹងពាក់លើអាណាព្យាបាលច្រើនពេក”។

លោក គង់ សំនៀង បានលើកឡើងថាក្នុងនាមវេសឡាញអេឌ្យូខេសិនគ្រុប លោកសូមថ្លែងអំណរគុណចំពោះសាលារៀន Angevine និងគ្រូដែលបានសហការល្អក្នុងការសហការផ្តល់ឱកាសសម្រាប់សិស្សរបស់វេសឡាញទៅកាន់សហរដ្ឋអាមេរិករយៈពេល3សប្តាហ៍ និងអរគុណដល់អាណាព្យាបាល ក៏ដូចជាក្រុមការងាររបស់កម្មវិធីទាំងមូលដែលបានសហការល្អធ្វើកម្មវិធីនេះអាចរៀបចំទៅបានដោយរលូន ដែលផ្តល់ផលប្រយោជន៍យ៉ាងច្រើនសម្រាប់សិស្សានុសិស្ស៕

November 11, 2019

កាសែតឡារ៉ែន ពាណិជ្ជ លេខ 197

[easy_media_download url=”https://www.lareine.com.kh/wp-content/uploads/2019/11/LRPN_197-Final-For-Web.pdf” force_dl=”1″]

November 11, 2019

ដើម្បីលើកកម្ពស់ផលិតភាព កម្ពុជាគួរតែចាប់យកស្វ័យប្រវត្តិកម្ម ក្នុងឧស្សាហកម្មកាត់ដេរ

កម្ពុជាគួរតែចាប់ផ្ដើមចាប់យកឌីជីថលនីយកម្ម និងស្វ័យប្រវត្តិកម្មក្នុងឧស្សាហកម្មកាត់ដេរ ដើម្បីធ្វើឱ្យផលិតភាពប្រសើរឡើង និងបង្កើនផលិតកម្ម ប៉ុន្តែការបណ្ដុះបណ្ដាលជំនាញកម្លាំងពលកម្ម គឺជាកត្តាចាំបាច់។ នេះបើតាមមន្ដ្រីជាន់ខ្ពស់មកពីសមាគមរោងចក្រកាត់ដេរនៅកម្ពុជា (GMAC) បានថ្លែងក្នុងសន្និសីទថ្នាក់ជាតិ ស្ដីពីផលិតភាពលើកទី3 ដែលធ្វើឡើងនៅមជ្ឈមណ្ឌលសន្និសីទកោះពេជ្រ។

លោក John Cha សមាជិកគណៈកម្មាធិការប្រតិបត្តិរបស់ GMAC បានថ្លែងថា៖“ខណៈអាជីវកម្មពិភពលោកកំពុងផ្លាស់ប្តូរឆ្ពោះទៅរកបដិវត្តន៍ឧស្សាហកម្មទី4 វិស័យកាត់ដេរ និងវាយនភណ្ឌកម្ពុជាគួរតែតាមឱ្យទាន់បដិវត្តន៍ឧស្សាហកម្មនេះ ដើម្បីបង្កើនផលិតភាព និងសមត្ថភាពប្រកួតប្រជែង”។

លោកបានថ្លែងទៀតថ្លែងថា៖ “ក្នុងយុគសម័យបដិវត្តន៍ឧស្សាហកម្មទី4 យើងកំពុងសង្កេតឃើញមានការបង្កើនល្បឿននៃស្វ័យប្រវត្តិកម្ម និងឌីជីថលនីយកម្មនៅក្នុង និងទូទាំងឧស្សាហកម្មរបស់យើង។ឧទាហរណ៍ ក្នុងឧស្សាហកម្មសម្លៀកបំពាក់ គ្រឿងយន្តស្វ័យប្រវត្ដិកំពុងត្រូវបានប្រើប្រាស់កាន់តែច្រើនឡើងក្នុងដំណើរការផលិតកម្មរបស់យើង”។

លោកបាន John Cha បញ្ជាក់ថា៖ “កម្ពុជាត្រូវតែចាប់យកដំណើរការឌីជីថលនីយកម្ម និងស្វ័យប្រវត្តិកម្មនេះ ដើម្បីផ្លាស់ប្តូរកន្លែងធ្វើការងារ និងកម្លាំងពលកម្មរបស់យើង។ យើងត្រូវតែធ្វើការបណ្ដុះបណ្ដាលជំនាញឡើងវិញ និងបង្រៀនជំនាញបន្ថែមដល់កម្លាំងពលកម្មរបស់យើង ការត្រួតពិនិត្យបង្កើនល្បឿន សម្រាប់ការធ្វើស្វ័យប្រវត្ដិកម្ម និងការគ្រប់គ្រងរោងចក្រ។ ក្នុងទិដ្ឋភាពនេះ យើងជំរុញឱ្យរដ្ឋាភិបាលកម្ពុជាពិចារណាផ្ដល់ការលើកទឹកចិត្តផ្នែកពន្ធរបស់ខ្លួនសម្រាប់ការវិនិយោគ និងការវិនិយោគឡើងវិញក្នុងទិសដៅនេះ”។

លោកបានពន្យល់ថា រាប់ចាប់ពីការធ្វើគំរូ ការប៉ាក់ការកាត់ ការបោះពុម្ព និងការរចនាម៉ូដ រហូតដល់ការដេរ និងការផ្គុំ ដំណើរការឌីជីថលនីយកម្ម និងស្វ័យប្រវត្តិកម្មនេះអាចពាក់ព័ន្ធនឹងប្រភេទគ្រឿងម៉ាស៊ីនតែមួយ ព្រមទាំងប្រព័ន្ធចង្វាក់សមាហរណកម្មដែលអាចធ្វើឱ្យសម្រេចបានទិន្នផលកាន់តែលឿន និងកាន់តែច្បាស់លាស់ ដូច្នេះធ្វើឱ្យយើងសន្សំបានពេលវេលា ការចំណាយ និងគុណភាពកាន់តែខ្ពស់។

លោក John Cha មានប្រសាសន៍ថា៖ “មនុស្សជាច្រើនក្នុងចំណោមពួកយើង បានវិនិយោគលើស្វ័យប្រវត្ដិកម្ម និងបច្ចេកវិទ្យា និងបានទទួលអត្ថប្រយោជន៍ នៃដំណើរការទាំងនេះ និងជួយកាត់បន្ថយចម្ងាយទំនាក់ទំនង រវាងផលិតកម្ម និងទីផ្សារ។ម៉ាស៊ីនស្វ័យប្រវត្តិកម្មជាច្រើន និងប្រព័ន្ធផលិតកម្មដែលអាចរកបាននៅទីផ្សារនេះនឹងធ្វើឱ្យមានផលិតភាពកាន់តែខ្ពស់ និងគុណភាពទិន្នផលកាន់តែប្រសើរ”។

លោកបានថ្លែងបន្តថា៖“ក្នុងទិដ្ឋភាពនេះ យើងសង្ឃឹមថា រដ្ឋាភិបាលកម្ពុជាអាចជួយបានតាមរយៈការលើកទឹកចិត្តផ្នែកពន្ធសម្រាប់ការវិនិយោគឡើងវិញលើការទិញគ្រឿងម៉ាស៊ីនបែបនោះ ព្រមទាំងការបណ្ដុះបណ្ដាលអំពីបច្ចេកវិទ្យា ដែលដំណើរការជាមួយម៉ាស៊ីនទាំងនោះផងដែរ។ ដោយដើរឆ្ពោះទៅមុខ យើងសង្ឃឹមថា ល្បឿននៃការវិនិយោគនឹងកាន់តែលឿន និងកាន់តែខ្លាំងឡើង”។

ឯកឧត្តម ពេជ សោភ័ន រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈទទួលស្គាល់ថា ការអភិវឌ្ឍយ៉ាងរហ័សនៃបច្ចេកវិទ្យា ជាពិសេសបដិវត្តន៍ឧស្សាហកម្មទី4 និងបច្ចេកវិទ្យាបញ្ញាសិប្បនិម្មិត (AI) កំពុងបង្កើនផលិតភាព និងផលិតកម្ម ប៉ុន្តែវាក៏បង្កផលប៉ះពាល់អវិជ្ជមានចំពោះការបាត់បង់ការងាររបស់ប្រជាពលរដ្ឋផងដែរ។

ឯកឧត្តម បានមានប្រសាសន៍ថា៖ “រដ្ឋាភិបាលកម្ពុជាចេញរួចហើយ នូវគោលនយោបាយអភិវឌ្ឍន៍ឧស្សាហកម្មឆ្នាំ 2015-2025 ដើម្បីបង្កើនវិស័យឧស្សាហកម្មរបស់យើងឆ្ពោះទៅរកបច្ចេកវិទ្យា និងបង្កើនកម្លាំងពលកម្មជំនាញ ដែលនឹងឆ្លើយតប ទៅនឹងការទទួលយកបដិវត្តន៍ឧស្សាហកម្មទី 4 ដើម្បីសម្រេចបាន ផែនការប្រកបដោយមហិច្ឆិកា ដើម្បីក្លាយជាប្រទេស មានប្រាក់ចំណូលមធ្យមកម្រិតខ្ពស់នៅត្រឹមឆ្នាំ 2030 និងប្រទេសមានប្រាក់ចំណូលខ្ពស់ ត្រឹមឆ្នាំ2050”។

ឯកឧត្តម ពេជ សោភ័ន បន្តថា៖ “ដូច្នេះយើងមើលឃើញការអភិវឌ្ឍយ៉ាងរហ័សនៃបច្ចេកវិទ្យានេះ ជាពិសេសការទទួលយកបដិវត្តន៍ឧស្សាហកម្មទី4 ក្នុងវិស័យឧស្សាហកម្មដែលបង្កើតការងារថ្មីៗសម្រាប់ប្រជាពលរដ្ឋ និងបង្កើនផលិតភាព ហើយលើសពីនេះ វាក៏បង្កើតឱកាសដ៏ល្អមួយសម្រាប់ប្រទេសកំពុងអភិវឌ្ឍន៍ ដូចជាកម្ពុជាក្នុងការលោត-ផ្លោះសម្រាប់ការអភិវឌ្ឍរបស់ខ្លួន”។

ជាមួយគ្នានេះដែរ សមាគមរោងចក្រកាត់ដេរនៅកម្ពុជា (GMAC) បានជំរុញឱ្យសមាជិកទាំងអស់របស់ខ្លួនចាប់ផ្តើមចុះឈ្មោះក្នុងប្រព័ន្ធចុះបញ្ជីអ្នកនាំចេញ(REX) ដើម្បីចៀសវាងផលវិបាកណា មួយដែលអាចកើតឡើងនាពេលខាងមុខ ។

សេចក្តីជូនដំណឹងរបស់ GMAC បានឱ្យដឹងថា សហភាពអឺរ៉ុបបានដាក់ចេញនូវប្រព័ន្ធចុះបញ្ជី អ្នកនាំចេញ (REX) ដែលអ្នកនាំចេញទៅសហភាពអឺរ៉ុបអាចធ្វើការប្រកាសដោយខ្លួនឯងអំពីប្រភពដើមនៃផលិតផលនាំចេញរបស់ពួកគេ (ការប្រកាសប្រភពដើម) នៅលើឯកសារពាណិជ្ជកម្មរបស់ពួកគេដោយមិនប្រើវិញ្ញាបនបត្របញ្ជាក់ប្រភពដើមទំនិញ(CO) ដែលចេញដោយក្រសួងពាណិជ្ជកម្ម។ GMAC បានបញ្ជាក់ថា ប្រព័ន្ធនេះសម្រួលពាណិជ្ជកម្ម និងសន្សំសំចៃការចំណាយសម្រាប់អ្នកនាំចេញ។

សមាគម GMAC បានឱ្យដឹងទៀតថា នៅត្រឹមដំណាច់ឆ្នាំ 2019 នេះ ដែលជាការបរិច្ឆេទផុតកំណត់ រោងចក្រណាដែលខកខានមិនបានចុះឈ្មោះនៅក្នុងប្រព័ន្ធ REX នេះនឹងត្រូវបង់ពន្ធនាំចូលទៅសហភាពអឺរ៉ុប សម្រាប់ការនាំចេញរបស់ពួកគេ។

បើតាម GMAC អស់រយៈពេលប្រហែល 1ឆ្នាំហើយ ដែលក្រសួងពាណិជ្ជកម្ម និង GMAC បានព្យាយាមអស់ពីសមត្ថភាពក្នុងការផ្សព្វផ្សាយព័ត៌មាននេះទៅដល់សមាជិកទាំងអស់។ ជាអកុសល បើប្រៀបធៀបទៅនឹងចំនួនសរុបនៃរោងចក្រទាំងអស់ មានរោងចក្រមិនច្រើនទេដែលបានចុះឈ្មោះក្នុងប្រព័ន្ធនេះ៕

November 10, 2019

កសិដ្ឋានចិញ្ចឹមទាខេត្តតាកែវដ៏ល្បីល្បាញ កំពុងពង្រីកផលិតភាពដើម្បីបំពេញទីផ្សារ

កសិដ្ឋានចិញ្ចឹមទារបស់លោក សូត្រ សុផល ដែលមានទីតាំងស្ថិតនៅក្នុងភូមិក្រាំងស្វាយ ឃុំស្រែរនោង ស្រុកត្រាំកក់ ខេត្តតាកែវ បានត្រូវគេស្គាល់ និងល្បីឈ្មោះជាយូរមកហើយ ជាពិសេសពងទាកូនស្រែរនោងដែលប្រជាពលរដ្ឋស្ទើរគ្រប់ខេត្ត-ក្រុង នរណាក៏ធ្លាប់ពានភ្លក្សពងទាកូននេះដែរ។

លោក សូត្រ សុផល ដែលបច្ចុប្បន្នជាប្រធានសមាគមភ្ញាស់ស៊ុតទាផងនោះ បានប្រាប់កាសែតឡារ៉ែន ពាណិជ្ជ ថា៖“ខ្ញុំជាអ្នកខេត្តតាកែវ បានចាប់រកស៊ីរបរភ្ញាស់ស៊ុតទាយកកូនលក់នេះ តាំងពីឆ្នាំ2007មកម៉្លេះ។ តាំងពីចាប់ផ្តើមប្រកបមុខរបរនេះមក ដំបូងឡើយលោកមានប្រាក់តែ 80ម៉ឺនរៀលប៉ុណ្ណោះដើម្បីទិញពងទាពីកសិករចិញ្ចឹមទានានានៅក្នុងភូមិ ដើម្បីភ្ញាស់កូនទាលក់”។

លោកបានបន្តថា សម្រាប់អាជីវកម្មរបស់ខ្ញុំដែលជាអ្នកប្រមូលទិញសត្វទា ដែលអ្នកភូមិចិញ្ចឹមមកភ្ញាស់ជាកូនទា លក់កូនទា លក់ពងទាកូន និងលក់ពងទា ដែលរបរនេះបានជួយឱ្យខ្ញុំរីកចម្រើន និងបន្តដល់អ្នកភូមិមួយចំនួន ក៏ចាប់ផ្តើមប្របរបរនេះរហូតដល់បង្កើតបានជាសមាគមមួយរហូតមកដលសព្វថ្ងៃ។

លោកប្រធានសមាគមភ្ញាស់ពងទាកូនស្រែរនោងបានប្រាប់ឱ្យដឹងថា៖“សមាគមរបស់យើងត្រូវបានបង្កើតឡើងកាលពីខែកញ្ញា ឆ្នាំ2016 ដោយមកដល់ពេលនេះមានអាយុកាល 3ឆ្នាំហើយ និងមានសមាជិកប្រមាណជាង 50គ្រួសារ សុទ្ធសឹងជាអ្នកមានកសិដ្ឋានចិញ្ចឹមទា ធ្វើអាជីវកម្មចម្រុះរួមមាន ការភ្ញាស់យកកូនទាលក់ ចិញ្ចឹមយកពង ការកែច្នៃពងទាទៅជាពងទាកូន និងពងទាប្រៃ ជាដើម”។

នៅក្នុងរដូវដែលសម្បូរ សមាគមនេះអាចផលិតពងទាកូនលក់បានពី 9ម៉ឺន ទៅ 10ម៉ឺនគ្រាប់ក្នុង 1ថ្ងៃនិងនាំចេញទៅកាន់ស្ទើរគ្រប់ខេត្ត-ក្រុងទូទាំងប្រទេសរួមទាំងពងទាប្រៃ និងពងទាសាបប្រហែល 3ទៅ 4ម៉ឺនគ្រាប់ទៀត និងពងទាដែលភ្ញាស់យកកូនបានប្រហែលជា 5ពាន់ក្បាលទៀយ។

លោក សុផល បានបន្តរៀបរាប់យ៉ាងដូច្នេះថាសមាគមមានសមាជិក 50គ្រួសារ គ្រួសារនីមួយៗប្រកបអាជីវកម្មភ្ញាស់ស៊ុតទាយកកូនលក់ ដោយកូនទាញី លក់បានតម្លៃ 1,800រៀលក្នុង 1ក្បាល បើឈ្មោលវិញលក់តែ 400រៀលប៉ុណ្ណោះក្នុង 1ក្បាល និងលក់ជាពងទាកូនបាន 900រៀល /គ្រាប់ ហើយក្នុង1ថ្ងៃខ្ញុំអាចលក់ចេញបានពី 4,000 ទៅ 5000កូនទា និងពងទាកូន។

លោក សុផល បានបញ្ជាក់ឱ្យដឹងថា៖“សម្រាប់ឡភ្ញាស់របស់ខ្ញុំវិញ អាចទទួលទិញស៊ុតបានពី 9 ទៅ10ម៉ឺនគ្រាប់ក្នុង 1ថ្ងៃ។ ក្នុងរដូវចិញ្ចឹម និងភ្ញាស់កូនទាក្នុង 1ថ្ងៃ ជាមធ្យមខ្ញុំអាចរកចំណូលបាន 380,000រៀល ក្នុង 1ខែ ក៏បានកម្រៃប្រមាណ 11,400,000 រៀល បន្ទាប់ពីទូទាត់ថ្លៃដើមរួច”។

កសិករចិញ្ចឹមទារូបនេះបន្តថា ៖ “បានជាខ្ញុំងាកមកចិញ្ចឹមសត្វនេះ ដោយសារតែវាជាចំណង់ចំណូលចិត្តរបស់ខ្ញុំពីតូចមក។ ខ្ញុំរៀនពីវិធីចិញ្ចឹម ដើម្បីបង្កើនបច្ចេកទេសចិញ្ចឹមសត្វយ៉ាងណាឱ្យបានចំណេញ ហើយសត្វមិនងាប់ ដើម្បីយកបទពិសោធដែលរកឃើញនេះ ទៅបង្រៀនដល់កសិករដទៃទៀត ឱ្យរៀនសូត្រតាម ពីវិធីចិញ្ចឹមសត្វដែលងាយប្រមូលផល មិនឆ្លងជំងឺ ឆាប់ទទួលបានប្រាក់កម្រៃពីការលក់ដូរជាដើម”។

ទោះបីលោក សុផល បច្ចុប្បន្នពុំបានចិញ្ចឹមទាលក់យកសាច់ក៏ពិតមែន តែកន្លងមកគាត់ក៏ធ្លាប់មានបទពិសោធក្នុងការចិញ្ចឹមទាយកសាច់ផងដែរ។ លោកសុផលបានឱ្យដឹងថា៖“មុនសម្រេចជ្រើសរើសយកពូជទាមកចិញ្ចឹម ត្រូវរើសមើលមេទាណាដែលមានអាយុចាប់ពី 5ខែឡើងទៅ យកមកចិញ្ចឹម ត្រូវតែជាមេទាដែលគ្មានជំងឺ និងជាពូជដែលឆាប់ផ្តល់ស៊ុត”។

លោក សុផល បន្តថា នៅពេលរើសបានមេទាពូជហើយ យើងត្រូវសង់រោងចិញ្ចឹមដោយគិតពីបរិមាណសត្វទា និងទំហំរបស់រោង។ មេទា 1ពាន់ក្បាល យើងត្រូវសង់រោងទទឹង 10ម៉ែត្រ បណ្តោយ 20ម៉ែត្រ និងកម្ពស់រោងប្រមាណ 3ម៉ែត្រ សង់នៅក្បែរស្រះទឹក ធ្វើយ៉ាងណាទីតាំងចិញ្ចឹមទាត្រូវនៅក្នុងកន្លែងដែលត្រជាក់។ នៅពេលមេឃក្តៅខ្លាំង ត្រូវកាប់ស្លឹកឈើគ្របដំបូលរោង ឬយកសំណាញ់បៃតងមកចងពីក្រោមដំបូល ដើម្បីបន្ថយកម្ដៅ ព្រោះទានៅក្នុងរោង វាក្តៅ និងត្រូវលែងវាឱ្យចុះលេងទឹកស្រះ។លោកបន្តថា មេទាដែលទិញមកចិញ្ចឹម ត្រូវលែងឱ្យវាបានលេងទឹក 1ថ្ងៃ 2ដង ហើយបំប៉នចំណីវាក្នុងរយៈពេល 20ថ្ងៃ វានឹងផ្តល់ស៊ុត។ ឯចំណីវិញក្នុងទា 1ពាន់ក្បាល ត្រូវឱ្យចំណីប្រមាណជា 130គីឡូក្រាមក្នុង1ថ្ងៃ ទើបវាស៊ីគ្រប់គ្រាន់។ ចំណីត្រូវដាក់ក្នុងស្នូក។ ស្នូកដាក់ចំណីត្រូវតម្រៀបជាជួរនៅសងខាងទ្រុង។

លោកបញ្ជាក់ថា៖ “ការរៀបស្នូកចំណីឱ្យទានេះគេត្រូវរៀបដាក់ឱ្យបានច្រើន សម្រាប់ដាក់ចំណីឱ្យទាស៊ី ដើម្បីបង្ការកុំឱ្យវាដណ្ដើមគ្នាស៊ី ដែលវាជះឥទ្ធិពលដល់ការផ្តល់ស៊ុតមិនស្រុះគ្នា មិនដំណាលគ្នា ព្រោះបើមានស្នូកចំណីតិច មេទាខ្លះវាស៊ីឆ្អែត វាឱ្យស៊ុតទៀងទាត់ ឯមេទាដែលស៊ីមិនឆ្អែត ការផ្តល់ស៊ុតរបស់វា ក៏នឹងរអាក់រអួលតាមនោះដែរ។ លោកបន្តថា ចំណីដែលផ្តល់ឱ្យទាស៊ី មិនត្រូវលាយចំណីផ្សំនៅតាមទីផ្សារដាក់ឱ្យវាស៊ីទេ ព្រោះទីផ្សារបច្ចុប្បន្នគេមិនទទួលយកស៊ុតទាណាដែលស៊ីចំណីផ្សំស្រេចដែលមានលក់នៅទីផ្សារនោះទេ ព្រោះវាអាចមិនមែនជាចំណីធម្មជាតិ”។

គឺមូលហេតុនេះហើយដែលធ្វើឱ្យពងទាកូនរបស់សមាគមរបស់លោក មានសមត្ថភាពចែកចាយ និងមានតម្រូវការច្រើននោះ។ លោកពន្យល់ថា ទាដែលចិញ្ចឹមនៅក្នុងឃុំស្រែរនោងសុទ្ធតែជាទាដែលចិញ្ចឹមតាមបែបធម្មជាតិ តែក៏បានប្រើប្រាស់បច្ចេកទេសខ្លះដែរក្នុងចិញ្ចឹមដើម្បីឱ្យទទួលបានទិន្នផលច្រើន និងមិនបាត់រសជាតិ។ លក្ខណៈបែបនេះ ត្រូវបានឈ្មួញដែលនិយមទិញពងទាកូនពីសមាគមរបស់លោក តែងតែសរសើរពីរសជាតិពងទារបស់សមាគមលោកជានិច្ច ជាពិសេសពងទាកូន គឺមានរសជាតិផ្អែមឈ្ងុយឆ្ងាញ់តែម្តង។

លោក សុផល បានបន្ថែមទៀតថា ផលិតផលដែលចេញពីសមាគមអាជីវកម្មពងទាកូន ស្រែរនោងត្រូវបានចែកចាយស្ទើរតែទូទាំងប្រទេសទៅហើយ នៅឡើយតែខេត្តភាគឦសានប៉ុណ្ណោះដែលមិនទាន់បានទៅដល់។ ខេត្តដែលបានចែកចាយទីផ្សារកូនទា រួមមានខេត្តកំពង់ធំ កំពង់ចាម សៀមរាប បន្ទាយមានជ័យ ពោធិ៍សាត់ និងបាត់ដំបង។ ចំណែកពងទាក៏មានបញ្ជូនទៅតាមខេត្តទាំងនេះដែរ រួមទាំងខេត្តត្បូងឃ្មុំ និងភ្នំពេញទៀតផង អាស្រ័យលើគេបញ្ជាទិញ។

លោកក៏បានបញ្ជាក់ផងដែរ ពីកត្តាចម្បងដែលធ្វើឱ្យរូបលោកទទួលបានភាពជោគជ័យនោះ គឺចំណង់ចំណូលចិត្ត ក្ដីឧស្សាហ៍ព្យាយាម ការយកចិត្តទុកដាក់ និងមានផែនការច្បាស់លាស់។ បើយើងផ្តោតលើការងារនេះ វានឹងទទួលបានជោគជ័យ តែបើយើងធ្វើតាមគេ វានឹងមិនទទួលបានជោគជ័យឡើយ។ ព្រោះគ្រប់អាជីវកម្មទាំងអស់ អត់មានអាជីវកម្មណាមួយដែលងាយស្រួលនោះទេ ហើយគ្រប់អាជីវកម្មទាំងអស់ ក៏មិនអាចថា យើងធ្វើមិនកើតនោះដែរ។ និយាយពីការងាយ វាមិនងាយទេ តែបើថាឱ្យហួសពីសមត្ថភាពថាធ្វើមិនកើតនោះ ក៏វាមិនហួសសមត្ថភាពដែរ។ ដូច្នេះអ្នកដែលប្រកាន់ខ្ជាប់ និងផ្តោតការយកចិត្តទុកដាក់ យើងឃើញថា គេទទួលបានការរីកចម្រើន និងមានជីវភាពធូរធារ កើនឡើងមួយកម្រិត។

លោក សុផល បានបញ្ជាក់ឱ្យដឹងថា៖”ការបង្កើតជាសមាគមនៅក្នុងសហគមន៍របស់ខ្ញុំ គឺមានគោលបំណងជំរុញអាជីវកម្មសម្រាប់កំណើនជីវភាពផង និងចង់អភិរក្សពងទាកូនស្រែរនោង ឱ្យបន្តកេរដំណែលនេះផងដែរ ហើយសម្រាប់ការផ្គត់ផ្គង់សព្វថ្ងៃយើងក៏មិនទាន់ផ្គត់ផ្គង់ឱ្យបានគ្រប់នៅទីផ្សារក្នុងស្រុកនៅឡើយដែរ គឺនៅមាននាំពងទាចូលពីប្រទេសវៀតណាមមកខ្លះដែរ។ ដូច្នេះយើងចង់ពង្រីកបន្ថែមនូវផលិតភាព ដើម្បីផ្គត់ផ្គង់ទីផ្សារក្នុងស្រុកឱ្យកើនឡើងថែមទៀត តាមរយៈការបញ្ជាទិញក៏កាន់តែច្រើនឡើងដែរ ព្រោះមានអតិថិជនបានទទួលស្គាល់ពីគុណភាពពងទា និងកូនទារបស់សមាគមខ្ញុំកាន់តែច្រើន”។

លោកបានបន្ថែមថា ជាមោទនភាព ឯកឧត្តម វេងសាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលធ្លាប់បានអញ្ជើញមកដល់កសិដ្ឋានរបស់លោក និងទទួលស្គាល់ពីចំណុចខ្លាំង និងចំណុចខ្សោយ និងសំណូមពររបស់សមាគមរបស់ ក៏ដូចជាសេចក្តីត្រូវការជាក់ស្តែងដែរ។ឯកឧត្តមបានឱ្យគ្រប់តួអង្គដែលពាក់ព័ន្ធ ត្រូវរួមសហការគ្នាដោះស្រាយជូនប្រជាពលរដ្ឋឱ្យបានទាន់ពេលវេលា និងប្រកបដោយប្រសិទ្ធភាព។

ដោយឡែកចំពោះការងារបច្ចេកទេសចិញ្ចឹម និងភ្ញាស់ស៊ុតទាវិញ ឯកឧត្តមរដ្ឋមន្ត្រីបានធ្វើការណែនាំឱ្យមន្ទីរកសិកម្មខេត្តសហការជាមួយអគ្គនាយកដ្ឋានសុខភាពសត្វ និងផលិតកម្មសត្វ ធ្វើការផ្សព្វផ្សាយ ឬបំពាក់បំប៉នបច្ចេកទេសចិញ្ចឹម វិធានការការពារជំងឺ ការលើកកម្ពស់អនាម័យ និងការអនុវត្តវិធានជីវសុវត្ថិភាពនៅឡភ្ញាស់ស៊ុតទាឱ្យបានល្អប្រសើរ ក្នុងបំណងបង្កើនគុណភាព និងការជឿទុកចិត្តពីអតិថិជន ដែលនិយមបរិភោគពងទាកូន៕

November 10, 2019

Author: ធឿន មករា