ធឿន មករា - La Reine Media

បន្តិចទៀតប្រជាជនទូទាំងប្រទេសនឹងអាចទទួលព័ត៌មានពីគ្រោះធម្មជាតិតាមរយៈទូរស័ព្ទបង្ការគ្រោះថ្នាក់

ប៉ុន្មានឆ្នាំជាប់ៗគ្នានេះ កម្ពុជាតែងតែត្រូវរងការវាយប្រហារដោយសារបញ្ហាធម្មជាតិ ដូចជាគ្រោះរាំងស្ងួត ខ្យល់កន្ត្រាក់ រន្ទះ និងជាពិសេស គឺបញ្ហាទឹកជំនន់។ បញ្ហានេះ បានធ្វើឱ្យប្រជាពលរដ្ឋនៅតាមមូលដ្ឋាន ត្រូវរងផលប៉ះពាល់យ៉ាងច្រើនទាំងបញ្ហាសុវត្ថិភាពនៃការរស់នៅ បញ្ហាសុខភាព និងត្រូវជម្លៀសចេញពីលំនៅឋាននៅពេលទឹកលេចសហគមន៍របស់ពួកគាត់តែម្តង។ ជាទូទៅគេសង្កេតឃើញថា ក្នុងចំណោមសហគមន៍ដែលរងគ្រោះទាំងអស់ តំបន់ដែលទទួលរងផលប៉ះពាល់ធ្ងន់ជាងគេ គឺកន្លែងដែលមិនទទួលបានព័ត៌មានមុនពេលទឹកជំនន់ ដែលធ្វើឱ្យប្រជាជនខ្លះភៀសខ្លួនចេញពីលំនៅឋានមិនទាន់ ឬត្រូវទឹកជន់លិចដោយមិនដឹងខ្លួននៅពេលយប់ ជាដើម។

ពាក់ព័ន្ធនឹងបញ្ហានេះ កាសែត ឡារ៉ែន ពាណិជ្ជ បានជួបសម្ភាសជាមួយលោក ទេព សុខា អនុប្រធានកម្មវិធីកាត់បន្ថយហានិភ័យនៃគ្រោះមហន្តរាយនៃអង្គការ People In Need ពាក់ព័ន្ធនឹងប្រព័ន្ធប្រកាសព័ត៌មានគ្រោះមហន្តរាយធម្មជាតិ 1294 (early warning 1294) ដែលជាប្រព័ន្ធផ្តល់ព័ត៌មានទៅគ្របតំ-បន់ដែលរងផលប៉ះពាល់ដោយសារហានិភ័យនៃគ្រោះធម្មជាតិដើម្បីឱ្យប្រជាជនបានដឹង និងត្រៀមខ្លួនដោះស្រាយទាន់ពេលវេលានៅពេលជួបគ្រោះធម្មជាតិជាក់ស្តែងកើតឡើង។

1. តើកម្មវិធីប្រកាសព័ត៌មានពីគ្រោះធម្មជាតិនេះកើតឡើងនៅឆ្នាំណា?
ហើយមូលហេតុអ្វីទើបបង្កើតកម្មវិធីនេះឡើង?
កម្មវិធីផ្តល់ព័ត៌មានជាមុន ឬប្រព័ន្ធប្រកាសព័ត៌មានគ្រោះធម្មជាតិនេះត្រូវបានអង្គការ People In Need បង្កើតសាកល្បងនៅក្នុងឆ្នាំ2013 ដោយកាលណោះយើងអនុវត្តនៅក្នុងភូមិចំនួន3ក្នុងខេត្តពោធិ៍សាត់។ រហូតមកដល់បច្ចុប្បន្ននេះយើងបានគ្រប់ដណ្តប់លើ 21ខេត្តក្រុងហើយ លើកលែងតែ 4ខេត្តក្រុងទៀតប៉ុណ្ណោះ គឺខេត្តតាកែវ ខេត្តកណ្តាល ខេត្តកំពង់ស្ពឺ និងរាជធានីភ្នំពេញ ដែលមិនទាន់មានដាក់ឱ្យប្រើប្រាស់ប្រព័ន្ធនេះ។ ទោះជាយ៉ាងនេះក្តី តាមគម្រោង គឺនឹងដាក់ឱ្យអនុវត្តនៅទូទាំងប្រទេសនៅពាក់កណ្តាលឆ្នាំ2020 ខាងមុខនេះ ដោយឡែកសម្រាប់ខេត្តកំពង់ស្ពឺ គឺគ្រោងនឹងបញ្ចប់ការដំឡើងនៅចុងខែធ្នូនេះ។

គោលបំណងសំខាន់របស់យើងគឺ យើងចង់ជួយប្រជាពលរដ្ឋទូទាំងប្រទេសទាំងអស់ឱ្យត្រៀមខ្លួនឱ្យបានល្អ ដើម្បីទប់ទល់ជាមួយនឹងគ្រោះធម្មជាតិ។ ដូចយើងដឹងហើយថា គ្រោះធម្មជាតិពេលខ្លះវាកើតឡើងភ្លាមៗ ដែលធ្វើឱ្យយើងជួបបញ្ហាធ្ងន់ធ្ងរ ប្រសិនបើយើងមិនបានដឹងមុន។ មានតំបន់ខ្លះ កន្លងមកយើងឃើញថា ជួនកាលទឹកជន់ឡើងកណ្តាលអធ្រាត្រ ដែលធ្វើឱ្យអ្នករស់នៅតំបន់នោះជម្លៀសមិនទាន់ ឬមានបញ្ហាប្រឈមធ្ងន់ធ្ងរ ទម្រាំអាជ្ញាធរទៅជួយបាន។ ហេតុនេះប្រសិនបើគាត់បានដឹងមុនថា 2ថ្ងៃ ឬបានដឹងថា ក្នុងរយៈពេលណាមួយខាងមុខនេះនឹងមានទឹកជំនន់កើតឡើងនោះ គាត់នឹងអាចត្រៀមខ្លួនដោះស្រាយបញ្ហាបានទាន់ពេលវេលា។

2. តើកម្មវិធីនេះដំណើរការដោយប្រើបច្ចេកវិទ្យា និងវិធីណាខ្លះ?
កម្មវិធីនេះដំណើរការដោយការប្រើប្រាស់បច្ចេកវិទ្យាភ្ជាប់ជាមួយនឹងប្រព័ន្ធទូរស័ព្ទ។ អង្គការ People In Need បានរៀបចំឱ្យមានកម្មវិធីនេះដោយមានការគាំទ្រ និងទំនាក់ទំនងល្អជាមួយនឹងគណៈកម្មការជាតិគ្រប់គ្រងគ្រោះមហន្តរាយថ្នាក់ជាតិ និងថ្នាក់ក្រោមជាតិ។ ហេតុនេះយើងមានភាពងាយស្រួលក្នុងការធ្វើការងារ ដោយយើងបានដាក់ឧបករណ៍ Sensor នៅតាមតំបន់នានាដើម្បីវាស់កម្ពស់ទឹក សម្រាប់តាមដានពីបញ្ហាទឹកជំនន់។ Sensor ទាំងអស់នោះនឹងធ្វើបច្ចុប្បន្នភាពនៃកម្ពស់ទឹកមកកន្លែងគ្រប់គ្រងព័ត៌មានរៀងរាល់ 15នាទីម្តង ដែលធ្វើឱ្យយើងងាយដឹងព័ត៌មានទុកជាមុន។

បន្ទាប់ពីទទួលបានព័ត៌មានហើយ យើងបានផ្តល់ឧបករណ៍ទៅរដ្ឋបាលខេត្ត ដោយសហការជាមួយនឹងគណៈកម្មការជាតិគ្រប់គ្រងគ្រោះមហន្តរាយថ្នាក់ខេត្ត ដើម្បីឱ្យពួកគាត់ជួយធ្វើជាអ្នកផ្សាយព័ត៌មាន។ យើងបានផ្តល់ជាឧបករណ៍ដូចជាកុំព្យូទ័រ ឧបករណ៍ថតសំឡេង និងឧបករណ៍ផ្សេងៗទៀត ដើម្បីឱ្យគាត់ផ្សាយចេញទៅកាន់លេខទូរស័ព្ទដែលបានចុះឈ្មោះនៅក្នុងតំបន់របស់គាត់ ពាក់ព័ន្ធនឹងបញ្ហាគ្រោះធម្មជាតិដែលនឹងកើតឡើងនៅក្នុងតំបន់របស់គាត់។

សិទ្ធិក្នុងការសម្រេចចិត្តផ្សាយ ឬផ្ញើសារជាសំឡេងនេះ គឺស្ថិតនៅលើអភិបាលខេត្តនីមួយៗ មានន័យថា នៅពេលមានគ្រោះមហន្តរាយម្តងៗ អង្គការ People In Need អាចនឹងផ្តល់ព័ត៌មានជូនពួកគាត់ ឬគណៈអភិបាលខេត្ត អាចនឹងធ្វើការប្រជុំជាមួយនឹងមន្ទីរធនធានទឹក និងភាគីពាក់ព័ន្ធផ្សេងៗទៀត មុននឹងផ្សាយចេញទៅលេខទូរស័ព្ទរបស់ប្រជាពលរដ្ឋនៅក្នុងតំបន់។

3. តើការផ្ញើសារនេះមានប្រសិទ្ធភាពប៉ុនណាសម្រាប់ប្រជាពលរដ្ឋនៅគ្រប់តំបន់?
ដូចយើងបានដឹងហើយថា ការផ្សព្វផ្សាយជាផ្នែកមួយយ៉ាងសំខាន់ ហើយគ្រប់ប្រព័ន្ធផ្សព្វផ្សាយទាំងអស់សុទ្ធតែសំខាន់ ដូចជាវិទ្យុ ទូរទស្សន៍ ឬបណ្តាញផ្សេងៗទៀត តែពេលខ្លះនៅតំបន់ជនបទ មិនប្រាកដថា គាត់បានស្តាប់គ្រប់គ្នានោះទេ។ ហេតុនេះយើងយល់ឃើញថា ប្រជាជននៅគ្រប់តំបន់សុទ្ធតែមានទូរស័ព្ទប្រើប្រាស់ ទាំងទូរស័ព្ទទំនើប និងទូរស័ព្ទធម្មតា។ ហេតុនេះយើងក៏ប្រើប្រាស់វិធីសាស្រ្តផ្ញើសារជាសំឡេងតាមរយៈប្រព័ន្ធទូរស័ព្ទ 1294 ដើម្បីឱ្យគាត់បានដឹងមុន។

នៅពេលទូរស័ព្ទរបស់គាត់ឃើញការហៅចូល (Call) ពីលេខ 1294 គាត់នឹងដឹងថា តំបន់របស់គាត់នឹងមានបញ្ហា។ ក្រោយពេលគាត់ចុចទទួលនឹងមានសារជាសំឡេងដែលបង្ហាញពីកម្ពស់ទឹក ឬបញ្ហាត្រូវប្រុងប្រយ័ត្ននានា តែប្រសិនបើគាត់រវល់ ឬនៅឆ្ងាយពីទូរស័ព្ទ ប្រព័ន្ធនេះនឹងទាក់ទងទៅគាត់រៀងរាល់ 15នាទីម្តង ចំនួន 3ដងទើបឈប់។

4. តើប្រជាពលរដ្ឋ អាចចុះឈ្មោះប្រើប្រាស់ប្រព័ន្ធនេះដោយវិធីណាខ្លះ?
សម្រាប់ការចុះឈ្មោះ គឺមានភាពងាយស្រួលណាស់ អ្នកទាំងអស់គ្នាអាចសាកល្បងចុចទៅលេខ 1294 នឹងមានឮសំឡេងណែនាំឱ្យដឹងពីវិធីចុះឈ្មោះ។ ក្រោយស្តាប់ឮសំឡេងនោះហើយ គ្រាន់តែចុចបន្ត នឹងអាចចុះឈ្មោះបានហើយ។ ឧទាហរណ៍ យើងនៅតំបន់ណា ខេត្តណា យើងត្រូវចុចតាមការណែនាំនោះ ក្រោយពេលចុចខេត្តហើយ គេនឹងសួរយើងបន្ត ឱ្យយើងជ្រើសរើសស្រុក និងឃុំមុននឹងបញ្ចប់ការចុះឈ្មោះ។ គ្រាន់តែចុះឈ្មោះតាមការណែនាំនោះ យើងនឹងអាចទទួលបានព័ត៌មាននៅតំបន់ដែលយើងកំពុងរស់នៅ ឬតំបន់ដែលឪពុកម្តាយ ក្រុមគ្រួសាររបស់យើងរស់នៅក៏បាន។ រាល់ការចុះឈ្មោះ និងទទួលព័ត៌មាន គឺមិនគិតថ្លៃនោះទេ។

5. តើមូលហេតុអ្វី បានជាប្រើប្រាស់លេខ 1294 នេះ?
មូលហេតុដែលយើងប្រើប្រាស់លេខ 1294 នេះ គឺដោយសារតែយើងបានស្នើសុំទៅខាងគណៈកម្មការជាតិគ្រប់គ្រងគ្រោះមហន្តរាយ បន្ទាប់មកលោកក៏បានទំនាក់ទំនងទៅ ក្រសួងប្រៃសណីយ៍ និងទូរគមនាគមន៍ ដើម្បីទទួលបានលេខខ្លីមួយសម្រាប់ប្រើប្រាស់។ ក្រោយទទួលបានការស្នើសុំ ក្រសួងប្រៃសណីយ៍ ក៏បានផ្តល់លេខមួយខ្សែនេះដល់យើង ដើម្បីប្រើប្រាស់ក្នុងគោលបំណងមនុស្សធម៌។ បច្ចុប្បន្ននេះ លេខ 1294 ទទួលបានការជួយគាំទ្រ និងប្រើប្រាស់ដោយឥតគិតថ្លៃពីក្រុមហ៊ុនទូរស័ព្ទចំនួន3 គឺក្រុមហ៊ុន Smart, ក្រុមហ៊ុន CamGSM ឬប្រព័ន្ធ Cellcard និងក្រុមហ៊ុន Viettel ឬយើងស្គាល់ថាជាប្រព័ន្ធ Metfone ហ្នឹងឯង។

6. តើលោកមានមតិផ្តាំផ្ញើ និងសារអ្វីខ្លះសម្រាប់សាធារណជន?
ជាសាររបស់ខ្ញុំ គឺខ្ញុំលើកទឹកចិត្តឱ្យប្រជាពលរដ្ឋទាំងអស់ ឬអ្នកដែលបានទទួលព័ត៌មានពីកម្មវីធីផ្តល់ព័ត៌មានទុកជាមុនពីគ្រោះធម្មជាតិនេះ ជួយផ្សព្វផ្សាយ និងណែនាំឱ្យប្រជាពលរដ្ឋ ឬក្រុមគ្រួសាររបស់ខ្លួនបានប្រើប្រាស់ផង ដើម្បីជាប្រយោជន៍សម្រាប់ត្រៀមខ្លួនចៀសឱ្យផុតពីគ្រោះមហន្តរាយ។

ខ្ញុំក៏សូមថ្លែងអំណរគុណផងដែរដល់គណៈកម្មការជាតិគ្រប់គ្រងគ្រោះមហន្តរាយ គណៈអភិបាលខេត្ត និងម្ចាស់ជំនួយទាំងអស់ដែលបានគាំទ្រដល់កម្មវិធីនេះដើម្បីជួយប្រជាជនកម្ពុជា។ បន្ថែមពីលើនេះ បច្ចុប្បន្ននេះគណៈកម្មការទន្លេមេគង្គ ក៏កំពុងសិក្សាពីគំរូដែលធ្វើនៅកម្ពុជានេះ ដើម្បីជួយដល់បណ្តាប្រទេសដទៃទៀតផងដែរនៅតំបន់ទន្លេមេគង្គដើម្បីចៀស ឬត្រៀមខ្លួនទុកជាមុនដើម្បីគេចចេញពីគ្រោះមហន្តរាយធម្មជាតិ៕

December 5, 2019

អាហារសម្រាប់ស្ត្រីមានគភ៌ : វីតាមីន A & D ត្រូវញ៉ាំឱ្យមានតុល្យភាព

វីតាមីនផ្សេងៗសុទ្ធតែមានភាពចាំបាច់ចំពោះរាងកាយទាំងអស់ តែបើបានទទួលច្រើន ឬតិចជ្រុលពេក ក៏អាចធ្វើឱ្យមានផលអាក្រក់បានដូចគ្នា ជាពិសេស វីតាមីន A និងវីតាមីន D បើបានទទួលច្រើនជ្រុលពេក នឹងពិបាកក្នុងការកម្ចាត់ចេញពីរាងកាយវិញ និងអាចធ្វើឱ្យមានគ្រោះថ្នាក់ដល់ស្ត្រីមានគភ៌ និងទារកក្នុងផ្ទៃបាន។

វីតាមីន A
ក្រៅពីមានផលដល់ការរីកចម្រើនធំធាត់ ការកសាងឆ្អឹង និងប្រព័ន្ធបន្តពូជហើយ នៅអាចការពារការឆ្លងមេរោគក្នុងប្រព័ន្ធរំលាយអាហារ ប្រព័ន្ធដកដង្ហើម និងប្រព័ន្ធបន្ទោបង់ទឹកមូត្រ និងចាំបាច់ចំពោះរាងកាយក្នុងការបំបែកខ្លួនរបស់កោសិកាទៀតផង។
តែបើទទួលបានវីតាមីន A ច្រើនជ្រុលពេកក្នុងត្រីមាសដំបូងនៃការមានគភ៌ នឹងធ្វើឱ្យកើតសភាវរលូតបុត្រ ឬទារកពិការពីកំណើត ហើយថ្លើមរបស់ស្ត្រីមានគភ៌នឹងធ្វើការខុសប្រក្រតី ដោយសាតែមានការប្រមូលសន្សំវីតាមីន A ច្រើននៅក្នុងថ្លើម។ កើតសភាវឆ្អឹងពុក មានអាការក្អួតចង្អោ ឈឺក្បាល វិលមុខ និងស្រវាំងភ្នែកជាដើម។
ស្ត្រីមានគភ៌គួរទទួលវីតាមីន A ក្នុងបរិមាណ 770ម៉ៃក្រូក្រាម ឬស្មើនឹងការញ៉ាំបន្លែផ្លែឈើយ៉ាងតិចបំផុតក្នុង1ថ្ងៃ 5ចំណែក (5ក្តាប់ ឬប្រមាណ 1/2 គីឡូក្រាម) នឹងបានទទួលវីតាមីន សារធាតុរ៉ែគ្រប់គ្រាន់ចំពោះតម្រូវការរបស់រាងកាយ។
អាហារដែលមានវីតាមីន A មានដូចជា មើមការ៉ុត ម្ទេសបុក ដំឡូងជ្វា ថ្លើម ស៊ុត ទឹកដោះ បន្លែផ្លែឈើដែលមានពណ៌បៃតងចាស់ ពណ៌ក្រហម លឿងទុំ និងលឿង ដូចជា ផ្លែក្រូច ផ្លែខេនតាលូប(ត្រសក់ស្រូវបារាំង) ផ្លែទន្លាប់ ម៉ាក់ប្រាង។ល។ វីតាមីន A នៅក្នុងអាហារ និងបន្លែផ្លែឈើនឹងមិនធ្វើឱ្យរាងកាយបានទទួលវីតាមីនលើសពីតម្រូវការដូចវីតាមីនកែច្នៃនោះទេ។ វីតាមីន A ភាគច្រើនមានច្រើននៅក្នុងបន្លែផ្លែឈើដែលនឹងស្ថិតក្នុងរូបភាពជា បេតាឃែរ៉ូធីន ដែលត្រូវបានប្តូរទៅជាវីតាមីន A នៅក្នុងរាងកាយមួយសាទៀត។

វីតាមីន D
ជួយក្នុងការបឺតជ្រាបកាល់ស្យូមចូលទៅក្នុងរាងកាយ ជួយដល់ការធ្វើការងាររបស់បេះដូង ប្រព័ន្ធការពាររោគ និងរក្សាកម្រិតសម្ពាធឈាម។
តែបើទទួលបានវីតាមីន D ច្រើនជ្រុលពេក នឹងធ្វើឱ្យកើតសភាវជាតិពុល ដូចជា ធុញទ្រាន់ ឬមិននឹកចង់ញ៉ាំអាហារ ប្រព័ន្ធរំលាយអាហារធ្វើការមិនបានល្អ មិនស្រួលក្នុងពោះ ឈឺក្បាល ឈឺសន្លាក់ឆ្អឹង កាល់ស្យូមនៅក្នុងឈាមខ្ពស់ កាល់ស្យូមតោងនៅក្នុងបេះដូង ក្រលៀន សរសៃឈាម និងប្រព័ន្ធដកដង្ហើម ធ្វើឱ្យអវយវៈទាំងនោះធ្វើការងារខុសប្រក្រតី ដោយសារតែរាងកាយបឺតជ្រាបកាល់ស្យូមច្រើនជាងប្រក្រតី និងបង្ខំការរំលាយកាលស្យូមចេញពីឆ្អឹង ធ្វើឱ្យមានកាល់ស្យូមក្នុងឈាមខ្ពស់ និងបាត់បង់តុល្យភាព។
គួរបានទទួលវីតាមីន D ក្នុងបរិមាណ 600 IU ក្នុង 1ថ្ងៃ ឬឱ្យស្បែកដែលគ្មានឡេការពារពន្លឺថ្ងៃ បានប៉ះពន្លឺថ្ងៃក្នុងអំឡុងពេលមុនម៉ោង 10ព្រឹក ឬក្រោយម៉ោង 3រសៀល ប្រមាណជា 10 – 15នាទី ក្នុង 1អាទិត្យ 2ដង ដោយសារតែវីតាមីន D មាននៅក្នុងពន្លឺថ្ងៃ តែបច្ច័យដែលរារាំងការសាងវីតាមីន D នៅក្នុងស្រទាប់ស្បែកនោះគឺ សម្លៀកបំពាក់ ឡេការពារពន្លឺថ្ងៃ កញ្ចក់រថយន្ត និងការធ្វើការនៅក្នុងបន្ទប់ជាដើម។
អាហារដែលមានវីតាមីន D មានដូចជា សាច់ត្រីដែលមានអូមេហ្កា3 ដូចជា ត្រីសាឌីន សាល់ម៉ុន មែកឃើរេល(សាបាក់) ធូណា ទឹកដោះ ខ្លាញ់ថ្លើមត្រី និងការប៉ះពន្លឺថ្ងៃខ្លះៗ នឹងទទួលបានវីតាមីន D គ្រប់គ្រាន់ល្មមជាមិនខាន។

ពេលព្រឹក : ស៊ែនវិចឆ៍សាច់ត្រីធូណា-យ៉ាអួ ប្រើយ៉ាអួរសជាតិធម្មជាតិជំនួស ម៉ាយ៉ង់នេស ស្ករបន្តិច និងជួយរឿងប្រព័ន្ធបន្ទោបង់។ សារធាតុអាហារចម្បងដែលស្ត្រីមានគភ៌នឹងបានទទួលក្នុងពេលអាហារព្រឹកនេះគឺ ប្រូតេអុីន កាលស្យូម ខ្លាញ់ត្រី វីតាមីន A – B និង D។ពេលថ្ងៃត្រង់ : ត្រីផ្លាធូចៀន បែបមិនឱ្យស្រួយពេក ព្រោះបើប្រើពេលចៀនយូរពេក ជាតិខ្លាញ់នៅក្នុងសាច់ត្រីនឹងរលាយចេញមកអស់ ធ្វើឱ្យមិនបានទទួលសារធាតុអាហារល្អៗ។ពេលល្ងាច : ស្ងោជ្រក់ផ្សិត ផ្សិតដែលដុះឡើងតាមធម្មជាតិនឹងសម្បូរទៅដោយវីតាមីន D គ្រឿងស្ងោរជ្រក់រសជាតិស្រទន់បន្តិចនឹងជួយបំបាត់អាការក្អួតចង្អោ និងជួយឱ្យទទួលទានអាហារបានច្រើនឡើងទៀតផង។យើងឃើញហើយថា សារធាតុរ៉ែ និងសារធាតុអាហារដែលល្អ ច្រើនតែចេញមកពីប្រភពអាហារតាមធម្មជាតិ ដូចជាបន្លែផ្លែឈើ សាច់សត្វ និងគ្រាប់ធញ្ញជាតិផ្សេងៗ ដូច្នេះដើម្បីសុខភាពដ៏ល្អរបស់ខ្លួនឯង និងកូនតូចនៅក្នុងផ្ទៃ ស្ត្រីមានគភ៌ត្រូវបរិភោគឱ្យបានគ្រប់គ្រាន់ និងសមរម្យ៕

December 5, 2019

ធ្លាប់ដឹងតែជំងឺលើសឈាម ឬសម្ពាធឈាមខ្ពស់ តើសម្ពាធឈាមទាបគឺជាអ្វី?

ជាទូទៅអ្នកជំងឺច្រើននាក់បានជ្រាបច្បាស់ពីអាការឡើងសម្ពាធឈាមខ្ពស់ ដែលអាចបង្កគ្រោះថ្នាក់ជាច្រើនដល់សុខភាពរបស់អ្នកដូចជា ជំងឺដាច់សរសៃឈាមខួរក្បាល ជំងឺគាំងបេះដូង និងជំងឺខ្សោយតម្រងនោមជាដើម ហើយករណីធ្ងន់ធ្ងរអាចមានគ្រោះថ្នាក់ដល់អាយុជីវិតទៀតផង។ តែមានមនុស្សមិនច្រើននាក់ដែលបានដឹងអំពីអាការសម្ពាធឈាមទាប ហើយវាក៏អាចបង្កជាគ្រោះថ្នាក់ដល់សុខភាពរាងកាយបានដូចគ្នា ដោយវានឹងធ្វើឱ្យរាងកាយរបស់អ្នកទទួលបានអុកស៊ីហ្សែ៊នមិនគ្រប់គ្រាន់ក្នុងការទៅបំពេញមុខងារផ្សេង។ ខណៈដែលសម្ពាធឈាមទាប អ្នកជំងឺអាចប្រឈមនឹងជំងឺបេះដូង និងជំងឺខួរក្បាលដូចគ្នា ហើយវាអាចធ្វើឱ្យពិបាកដកដង្ហើមជាដើម។ អ្នកជំងឺមានសម្ពាធឈាមទាប ភាគច្រើនគឺមានអាការក្ដៅសាច់ និងកម្ដៅក្នុងខ្លួនឡើងជាប្រចាំ។

នៅពេលដែលសម្ពាធឈាមទាប បណ្តាលឱ្យចរន្ដឈាមហូរទៅកាន់ខួរក្បាលយឺតៗ និងខ្សោយ។ ហើយវាថែមទាំងកាត់បន្ថយការផ្គត់ផ្គង់អុកស៊ីហ្សែ៊នទៅកាន់ខួរក្បាល ដែលវាបណ្តាលឱ្យអ្នកមានអារម្មណ៍ថា វិលមុខ និងឈឺក្បាល។ អាការនេះជាញឹកញាប់អាចកើតឡើងជាធម្មតា នៅពេលដែលអ្នកធ្វើការផ្លាស់ប្តូរចលនា និងទីតាំងភ្លាមៗពេក ដូចជា ការងើបក្រោកឈរឡើងលឿនពេកពេលភ្ញាក់ពីព្រលឹមជាដើម។ ចរន្ដឈាមហូរ ដើរតួនាទីសំខាន់ខ្លាំងណាស់ក្នុងការផលិតថាមពល ដោយវាជាអ្នកផ្តល់អុកស៊ីហ្សែ៊ន និងសារធាតុចិញ្ចឹមចាំបាច់ជាច្រើនទៅកាន់រាងកាយទាំងមូល។ ហើយនៅពេលដែលលំហូរនៃសម្ពាធឈាមធ្លាក់ចុះ វានឹងបង្អាក់ដំណើរការបង្កើតថាមពលដែលបណ្តាលឱ្យអស់កម្លាំង និងល្ហិតល្ហៃ។ ក៏ប៉ុន្តែអាការនេះក៏អាចបណ្តាលមកពីការមិនបានសម្រាកគ្រប់គ្រាន់ ឬខ្វះជាតិស្ករផងដែរ។

សម្ពាធឈាមទាប អាចបណ្តាលឱ្យមានរោគសញ្ញាផ្សេងៗមួយចំនួន ដូចជា អាការក្អួត ចង្អោរ ការធ្លាក់ទឹកចិត្ត ការបាត់បង់ស្មារតី ឈឺក្បាល ឈឺក ក្អករ៉ាំរ៉ៃ ឈឺខ្នង និងប្រព័ន្ធរំលាយអាហារធ្វើការមិនបានល្អជាដើម។ ខាងក្រោមនេះគឺជាមូលហេតុ និងរោគសញ្ញា ដែលធ្វើឱ្យសម្ពាធឈាមចុះខ្សោយ៖

1. អាការខ្វះជាតិទឹក
សភាពនេះ គឺបណ្ដាលមកពីកង្វះអំបិលរ៉ែ បណ្តាលឱ្យមានលំហូរឈាមខ្សោយ។ ចរន្ដឈាមហូរយឺត និងត្រឡប់ទៅបេះដូងវិញ ដែលធ្វើឱ្យបេះដូងច្របាច់ខ្លួនខ្សោយទៅៗ ជាហេតុមានសម្ពាធឈាមទាប។
2. អាការខ្សោយគ្រាប់ឈាម
ឈាមដែលរត់ទៅកាន់បេះដូងវិញមិនទាន់ ធ្វើឱ្យបេះដូងច្របាច់ខ្លួនខ្សោយ កម្លាំងរបត់ឈាមខ្សោយ ជាការហុចផលនៃការគ្រប់គ្រង់គ្រាប់ឈាម។
3. អាការស្លេកស្លាំង
កំហាប់ឈាមថយចុះដោយសារបរិមាណកោសិកាឈាមក្រហមមានការថយចុះ។ ក៏ជាការហុចផលនៃបរិមាណឈាមមិនធម្មតាក្នុងរាងកាយ ទើបធ្វើឱ្យសម្ពាធឈាមចុះទាប។4. អាការឆ្អែតអាហារពេក
ការទទួលទានអាហារច្រើនជ្រុល ធ្វើឱ្យឈាមហូរទៅចិញ្ចឹមក្រពះ ពោះវៀន កាន់តែច្រើនដូចគ្នានឹងកាន់តែធ្វើឱ្យបរិមាណឈាមសរុបចុះខ្សោយ។ចរន្ដឈាមដែលរត់ទៅកាន់បេះដូងក៏ត្រូវបានកាត់បន្ថយទៅតាមហ្នឹងផងដែរ។
5. ប្រតិកម្មថ្នាំ
អាការចាញ់ និងប្រតិកម្មថ្នាំ បានហុចផលឱ្យគ្រាប់ឈាមជាច្រើនផ្លាស់ខ្លួនយ៉ាងរហ័សទៅគ្រប់ទៅកន្លែង ហើយធ្វើឱ្យកំហាប់ឈាមរាវ ទឹកនៅក្នុងឈាមរត់ចេញមកក្រៅសរសៃឈាម ដែលជាហេតុធ្វើឱ្យបាត់បង់គ្រាប់ឈាមក្នុងសរសៃវ៉ែន។6. អាការភ័យខ្លាច
ភាពភ័យខ្លាចនៃការធ្លាក់ទឹកចិត្ត និងភាពស្លន់ស្លោ ក៏ជាហេតុអាចបង្កឱ្យមានការរំញោចសរសៃឈាម និងបេះដូងថយចុះ នោះសម្ពាធឈាមក៏នឹងធ្លាក់ចុះដូចគ្នាដែរ។
7. ការតាំងគភ៌
ការតាំងគភ៌ធ្វើឱ្យរាងកាយត្រូវតែបង្កើនការផ្គត់ផ្គង់ឈាមដល់ទារក។ លទ្ធផលនៃចរន្ដឈាមហូរ និងបរិមាណឈាមសរុបមិនមានភាពសមតុល្យ វាក៏បណ្ដាលឱ្យសម្ពាធឈាមចុះទាបបានដែរ។

សម្ពាធឈាមទាបអាចបង្កគ្រោះថ្នាក់
ជាមួយនឹងករណីលើកលែងតិចតួចណាស់ដែលសម្ពាធឈាមរ៉ាំរ៉ៃក្រោម 120/80 គឺមិនមានគ្រោះថ្នាក់នោះទេ។ សម្ពាធឈាមទាបត្រូវបានគេចាត់ទុកថា មានគ្រោះថ្នាក់ តែនៅពេលដែលវាបណ្តាលឱ្យមានរោគសញ្ញា ឬលទ្ធផលនៃសម្ពាធឈាមភ្លាមៗថយចុះ។ ក្នុងករណីដែលសម្ពាធឈាមរបស់អ្នកធ្លាក់ចុះភ្លាមៗវាមិនមែនជាសម្ពាធឈាមទាប ដែលបង្កឱ្យមានគ្រោះថ្នាក់នោះទេ ប៉ុន្តែវាជាការផ្លាស់ប្តូរភ្លាមៗពីកម្រិតឈាមខ្ពស់មកទាប។ ការផ្លាស់ប្តូរភ្លាមៗនៃសម្ពាធឈាមអាចបណ្តាលឱ្យមានការរំខានដល់ការផ្គត់ផ្គង់ឈាមដល់បេះដូង តម្រងនោម និងខួរក្បាលរបស់អ្នក ហើយនឹងត្រូវបានអមដោយរោគសញ្ញាផ្សេងៗទៀត។ ជាធម្មតា បញ្ហានៃសម្ពាធឈាមទាប គឺជាសញ្ញាមួយបង្ហាញថា មានអ្វីផ្សេងទៀតអាចខុសពីធម្មតា ហើយគួរតែប្រញាប់ទៅពិគ្រោះជំងឺជាមួយគ្រូពេទ្យជាបន្ទាន់។ការព្យាបាលបញ្ហាសម្ពាធឈាមទាប
ប្រភេទនៃការព្យាបាលសម្រាប់បញ្ហាសម្ពាធឈាមទាប គឺអាស្រ័យទៅលើអាការ និងរោគសញ្ញា ដែលកើតឡើង។ ប្រសិនបើអ្នកមិនមានរោគសញ្ញាអ្វីទេ វាមិនទំនងទេ ដែលអ្នកត្រូវការការព្យាបាល។ ទោះជាយ៉ាងណាក៏ដោយប្រសិនបើអ្នកមិនមានរោគសញ្ញា ហើយគ្រូពេទ្យមិនអាចរកឃើញបញ្ហាសុខភាព ដែលពន្យល់ពីសម្ពាធឈាមទាប នោះអ្នកនឹងបដិបត្តិជាមួយការការពារដូចជា បង្កើនការទទួលទានអំបិល ពាក់ស្រោមជើង ញ៉ាំទឹកឱ្យបានច្រើន និងការប្រើថ្នាំដែលគ្រូពេទ្យបានផ្ដល់ឱ្យឱ្យបានត្រឹមត្រូវ៕

December 5, 2019

កម្ពុជា-កូរ៉េខាងត្បូង ចាប់ផ្ដើមសិក្សាពីលទ្ធភាពក្នុងការបង្កើតកិច្ចព្រមព្រៀងពាណិជ្ជកម្មសេរី

ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា និងលោកជំទាវ យូ ម្យុង-ហ៊ី (Yoo Myung-Hee) រដ្ឋមន្ត្រីក្រសួងពាណិជ្ជកម្មកូរ៉េខាងត្បូង បានចុះហត្ថលេខាលើសេចក្តីថ្លែងការណ៍រួម ស្តីពីការចាប់ផ្តើមការសិក្សាលទ្ធភាពក្នុងការបង្កើតកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-កូរ៉េ ដែលការចុះហត្ថលេខានេះ បានធ្វើឡើងនៅក្នុងឱកាសនៃកិច្ចប្រជុំកំពូលរំឭកខួបអនុស្សាវរីយ៍ 30ឆ្នាំ នៃទំនាក់ទំនងអាស៊ាន-កូរ៉េ និងកិច្ចប្រជុំកំពូលមេគង្គ-កូរ៉េ ពីថ្ងៃទី25 ខែវិច្ឆិកា ឆ្នាំ2019 នៅទីក្រុង ប៊ូសាន សាធារណរដ្ឋកូរ៉េ។ នេះបើតាមសេចក្តីប្រកាសព័ត៌មានរបស់ក្រសួងពាណិជ្ជកម្ម។

ក្រសួងពាណិជ្ជកម្មបានលើកឡើងថា៖ “តាមការរំពឹងទុក កិច្ចព្រមព្រៀងពាណិជ្ជកម្មសេរីទ្វេ ភាគីកម្ពុជាកូរ៉េ នឹងជួយពង្រឹងទំនាក់ទំនង និងពង្រីកទំហំពាណិជ្ជកម្មនៃប្រទេសទាំង2 បន្ថែមទៀត ព្រមទាំងបង្កើតឱកាសការងារក្នុងស្រុក ការនាំចេញសេវា និងពង្រីកការវិនិយោគបន្ថែម ដែលនឹងចូលរួមសំខាន់ក្នុងការអភិវឌ្ឍសេដ្ឋកិច្ចជាតិនិងផ្តល់ផលប្រយោជន៍ដល់ប្រជាជននៃប្រទេសទាំង2ផងដែរ”។

សូមជម្រាបថា ក្នុងឱកាសនៃកិច្ចប្រជុំទ្វេភាគីរវាងសម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា និងលោក មូន ជេ អុីន (Moon Jae-In) ប្រធានាធិបតីនៃសាធារណរដ្ឋកូរ៉េ កាលពីថ្ងៃទី15 ខែមីនា ឆ្នាំ2019 នៅវិមានសន្តិភាព ក្នុងដំណើរទស្សនកិច្ចផ្លូវការរបស់លោកប្រធានាធិបតីកូរ៉េ មក កាន់កម្ពុជា ប្រមុខដឹកនាំកំពូលនៃប្រទេសទាំង2 បានឯកភាពលើការជំរុញ និងពង្រីកទំហំពាណិជ្ជ កម្ម និងវិនិយោគរវាងប្រទេសទាំង2 ព្រមទាំងបានណែនាំឱ្យមានការសិក្សាពីលទ្ធភាពបង្កើតកិច្ច ព្រមព្រៀងពាណិជ្ជកម្មសេរីទ្វេភាគីកម្ពុជា-កូរ៉េ។

នៅក្នុងឆ្នាំ2018 កន្លងទៅនេះ ទំហំពាណិជ្ជកម្មនៃប្រទេសទាំង2 (កម្ពុជា និងកូរ៉េខាងត្បូង) បានកើនឡើងជាលំដាប់ គឺមានទំហំប្រមាណ 756លានដុល្លារសហរដ្ឋអាមេរិក ដោយកើនឡើងប្រមាណ 14.69% បើធៀបនឹងឆ្នាំ2017។ ទំនិញនាំចេញសំខាន់ៗរបស់កម្ពុជាទៅកូរ៉េ រួមមាន អាវយឺត សម្លៀកបំពាក់បុរស គ្រឿងអេឡិចត្រូនិក ស្បែកជើង វ៉ាលីស កម្ទេចអាលុយមីញ៉ូម ភេសជ្ជៈ សម្ភារពេទ្យ (ចេសសម្រាប់ការវះកាត់)តង់ និងកៅស៊ូធម្មជាតិ។

ទំនិញនាំចូលសំខាន់ៗរបស់កម្ពុជាពីកូរ៉េ រួមមាន រថយន្តដឹកទំនិញ ក្រណាត់ចាក់ ទឹករ៉ែធម្មជាតិ ភួយ គ្រឿងអេឡិចត្រូនិក គ្រឿងចក្រ(ប៊ុលដូហែ៊្សរ) បន្ទះ ឬសន្លឹកនីកែល ស្បែកពីសត្វចៀមកែច្នៃរួច ក្រណាត់ជ្រលក់ពណ៌ និងផលិតផលថែរក្សាសម្ផស្ស។

ជាមួយនឹងលទ្ធផលនៃទំហំពាណិជ្ជកម្មនេះ ហើយក្នុងបំណងពង្រីកពាណិជ្ជកម្មឱ្យកាន់តែធំជាងនេះ បន្ទាប់ពីជំនួបទ្វេភាគី រដ្ឋមន្ត្រីពាណិជ្ជកម្មនៃប្រទេសទាំង2 ក៏បានចុះហត្ថលេខាលើសេចក្តី ថ្លែងការណ៍រួមស្តីពីការចាប់ផ្តើមការសិក្សាលទ្ធភាពក្នុងការបង្កើតកិច្ចព្រមព្រៀងពាណិជ្ជកម្មសេរី (FTA) ទ្វេភាគី កម្ពុជា-កូរ៉េ ដែលកិច្ចព្រមព្រៀងនេះពាក់ព័ន្ធនឹងនីតិវិធីចរចា ដើម្បីបង្កើតការសិក្សារួមគ្នាមួយ។

សេចក្តីថ្លែងការណ៍ មិនបានបញ្ជាក់ថា ការសិក្សានេះនឹងត្រូវចំណាយពេលប៉ុន្មាននោះទេ ប៉ុន្តែបើតាមបណ្តាញសារព័ត៌មានកូរ៉េខាងត្បូង បានប៉ាន់ស្មានថា វាអាចត្រូវចំណាយពេល 1ឆ្នាំ។ ដោយឡែក កិច្ចព្រមព្រៀងពាណិជ្ជកម្មសេរីរបស់កូរ៉េខាងត្បូងជាមួយប្រទេសសិង្ហបុរី និងវៀតណាម បានចូលជាធរមានក្នុងឆ្នាំ2006 និង 2015 តាមលំដាប់។

ជំនួបទ្វេភាគីរវាងឯកឧត្តម ប៉ាន សូរស័ក្តិ រដ្ឋមន្ត្រីពាណិជ្ជកម្មកម្ពុជា និងលោកជំទាវ យូ ម្យុង-ហ៊ី (Yoo Myung-Hee) រដ្ឋមន្ត្រីពាណិជ្ជកម្មនៃសាធារណរដ្ឋកូរ៉េ បានផ្តោតការពិភាក្សាសំខាន់លើលទ្ធភាពក្នុងការបង្កើនទំហំពាណិជ្ជកម្ម និងវិនិយោគរវាងប្រទេសទាំង2 ដោយបានស្នើសុំឱ្យភាគីកូរ៉េពិនិត្យលទ្ធភាពជួយបង្កើនការបញ្ជាទិញទំនិញបន្ថែមពីកម្ពុជា ព្រមទាំងលើកទឹកចិត្តឲ្យវិនិយោគិនកូរ៉េ មកវិនិយោគបន្ថែមទៀតនៅកម្ពុជា។

លោកជំទាវ Myung-hee បានមានប្រសាសន៍ថា៖ “កិច្ចព្រមព្រៀងពាណិជ្ជកម្មសេរីជាមួយប្រទេសកម្ពុជា នឹងក្លាយជាកិច្ចព្រមព្រៀងដ៏សំខាន់មួយដែលជួយឱ្យក្រុមហ៊ុនកូរ៉េ ចូលជ្រៅទៅក្នុងប្រទេសអាស៊ីអាគ្នេយ៍មួយនេះ ជាមួយនឹងសក្តានុពលនៃកំណើនដ៏លេចធ្លោ”។ សម្ដេចតេជោនាយករដ្ឋមន្ត្រី ហ៊ុន សែន ធ្លាប់បានលើកទឹកចិត្តដល់វិនិយោគិនឯកជនជនជាតិកូរ៉េ ឱ្យស្វែងយល់បន្ថែមអំពីសក្តានុពលអាជីវកម្មរបស់ព្រះរាជាណាចក្រកម្ពុជា និងចូលរួមចំណែកក្នុងការអភិវឌ្ឍសេដ្ឋកិច្ចរបស់ប្រទេស។ សម្ដេចអគ្គមហាសេនាបតីបានមានប្រសាសន៍ថា “ខ្ញុំសូមអំពាវនាវដល់វិស័យឯកជន និងវិនិយោគិនកូរ៉េដែលមិនបានមកប្រទេសកម្ពុជាដើម្បីស្វែងយល់អំពីសក្តានុពល និងឱកាសវិនិយោគនៅកម្ពុជា និងធ្វើការវិនិយោគនៅកម្ពុជាដើម្បីចូលរួមអភិវឌ្ឍន៍ប្រទេស។ យើងនឹងទាញយកប្រយោជន៍ពីសមិទ្ធផលទាំងអស់នេះ”។

លោក ឈាង វណ្ណារិទ្ធ ប្រធានវិទ្យាស្ថានទស្សនៈអាស៊ី បានមានប្រសាសន៍ថ្មីៗនេះថា មានសក្តានុពលដ៏ធំធេងក្នុងការពង្រីកទំនាក់ទំនងពាណិជ្ជកម្មទ្វេភាគីរវាងប្រទេសទាំង។ ទោះយ៉ាងណាដើម្បីឈានទៅរកភាពជាដៃគូយុទ្ធសាស្ត្រគ្រប់ជ្រុងជ្រោយ ភាគីទាំង2 ក៏ត្រូវពង្រឹងកិច្ចសហប្រតិបត្តិការសន្តិសុខផងដែរ។

លោកត្រូវបានគេស្រង់សម្តីថា នៅពេលដែលប្រទេសកម្ពុជាព្យាយាមទាញយកបដិវត្តន៍ឧស្សាហកម្មទី4 និងការចាប់យកសេដ្ឋកិច្ចឌីជីថល ការការពារហេដ្ឋារចនាសម្ព័ន្ធសំខាន់ៗ និងធនធានសំខាន់ៗ កំពុងតែមានសារៈសំខាន់។

លោកបញ្ជាក់ថា៖“រហូតមកដល់ពេលនេះ កូរ៉េខាងត្បូងមិនបានបង្ហាញផលប្រយោជន៍សន្តិសុខ និងយុទ្ធសាស្ត្រច្រើនក្នុងការចូលរួមជាមួយប្រទេសកម្ពុជា និងអាស៊ីអាគ្នេយ៍ជាទូទៅទេ។ កិច្ចសហប្រតិបត្តិការសន្តិសុខ តាមបណ្តាញអុីនធើណិត និងសន្តិសុខតាមសមុទ្រ នឹងក្លាយជាតំបន់សក្តានុពលនៃកិច្ចសហប្រតិបត្តិការ”៕

December 5, 2019

ឧកញ៉ា ចិត្រ សេរីសុភ័ក្ត្រ ចង់ជោគជ័យត្រូវវិនិយោគលើខ្លួនឯង

ផ្តើមចេញពីយុវជន ដែលពោរពេញទៅដោយការតាំងចិត្ត និងមានសមត្ថភាពខ្ពស់ លោកឧកញ៉ា ចិត្រ សេរីសុភ័ក្ត្រ ជាអ្នកជំនួញវ័យក្មេងមួយរូបដែលពោរពេញទៅដោយភាពជោគជ័យក្នុងអាជីវកម្ម និងជាអគ្គនាយកក្រុមហ៊ុន Luxury Smile Beauty Group Co., LTD ដែលចូលចិត្តការចែករំលែកគំនិតយុវជនជាច្រើននាក់ផ្សេងទៀតនៅកម្ពុជា។

សហគ្រិនវ័យក្មេងរូបនេះបានប្រកាន់ភ្ជាប់នូវគំនិតមួយសម្រាប់ជាការអភិវឌ្ឍខ្លួនឯង និងសម្រាប់ជាដើមទុនសំខាន់ដើម្បីធ្វើអាជីវកម្ម នោះគឺ “ការវិនិយោគលើខ្លួនឯង”។ លោកឧកញ៉ា ចិត្រ សេរីសុភ័ក្ត្រ បានលើកឡើងថា៖ “ជាដើមទុនដំបូងសម្រាប់ការធ្វើអាជីវកម្មឱ្យទទួលបានជោគជ័យគឺ គំនិត ចំណេះដឹង កម្លាំងចិត្ត ទំនុកចិត្ត និងការកសាងធនធានមនុស្ស។ ចំណុចទាំងអស់នេះត្រូវការចាប់ផ្តើមពីខ្លួនឯង ហើយការកសាងចំណុចទាំងអស់នេះគឺជាការវិនិយោគលើខ្លួនឯង”។បើតាមលោកឧកញ៉ា ចិត្រ សេរីសុភ័ក្ត្រ ការកសាងសមត្ថភាព និងចំណេះដឹងសម្រាប់ខ្លួនឯងគឺជាការវិនិយោគយ៉ាងធំមួយសម្រាប់ខ្លួនឯង ព្រោះមិនថា ធ្វើការងារឱ្យគេ ឬធ្វើអាជីវកម្មនោះទេ អ្នកទាំងអស់គ្នាសុទ្ធតែត្រូវការចំណេះដឹងទាំងក្នុងសាលា និងក្រៅសាលា។ ចំណេះដឹង ផ្តើមចេញពីការសិក្សា ការស្រាវជ្រាវ ការធ្វើការឱ្យគេ និងបន្ទាបខ្លួនស្តាប់យកមតិយោបល់របស់មនុស្សជាច្រើននៅជុំវិញខ្លួន។ នៅពេលដែលយើងមានបទពិសោធជីវិតច្រើន មានព័ត៌មានច្រើននៅក្នុងខ្លួន យើងនឹងអាចអភិវឌ្ឍអាជីវកម្មឱ្យជោគជ័យជាមួយនឹងភាពបត់បែនខ្ពស់ទៅតាមស្ថានការណ៍សង្គម។

លើសពីនេះទៅទៀតសហគ្រិនវ័យក្មេងខាងលើបានបញ្ជាក់ផងដែរថា ត្រឹមតែមានសមត្ថភាព មិនទាន់រាប់ថាក្លាយជាអ្នកចេះវិនិយោគខ្លួនឯងបានល្អនោះទេ យើងក៏ត្រូវមានកម្លាំងចិត្តរឹងមាំ ជាមួយនឹងទំនុកចិត្តដែលមនុស្សគ្រប់គ្នាផ្តល់ឱ្យ។ ការរកស៊ី ទាមទារឱ្យមានការតាំងចិត្តខ្ពស់ ហើយទាមទារឱ្យមានភាពរឹងមាំផ្នែកផ្លូវចិត្ត ដើម្បីទប់ទល់ជាមួយនឹងឧបសគ្គដែលចូលមកជារៀងរាល់ថ្ងៃ។ ប្រសិនបើអ្នកទាំងអស់គ្នា អាចមានកម្លាំងចិត្តរឹងមាំ នៅពេលនោះ យើងនឹងមានភាពវិជ្ជមានក្នុងការដកស្រង់យកចំណេះដឹងដែលបានរៀនយកមកអនុវត្ត ហើយទទួលបានគុណតម្លៃជាប្រយោជន៍ជាក់ជាមិនខានឡើយ។

លោកឧកញ៉ា ចិត្រ សេរីសុភ័ក្ត្រ បានលើកឡើងផងដែរថា៖ “ការសិក្សាដោយមិនយកមកអនុវត្ត គឺប្រៀបបានទៅនឹងសៀវភៅដែលគេទុកចោលដូច្នោះដែរ។ យើងមិនអាចទទួលជោគជ័យបានទេ ប្រសិនបើយើងគ្មានកម្លាំងដើម្បីអនុវត្តចំណេះដឹងរបស់យើងនៅក្នុងអាជីវកម្មបានល្អ ហើយកម្លាំងចិត្តគឺសំខាន់បំផុតដើម្បីរុញច្រានយើងឱ្យទទួលបានជោគជ័យ”។លោកលើកឡើងផងដែរថា ជាធម្មតា បន្ទាប់ពីយើងមានចំណេះដឹងច្បាស់លាស់ហើយ មានគំនិតអភិវឌ្ឍល្អ និងមានកម្លាំងចិត្តល្អ យើងទាមទារឱ្យមានភាពទុកចិត្តបានផងដែរ ទើបយើងអាចរកស៊ីបានល្អ។ ការកសាងទំនុកចិត្តគឺត្រូវការទំនុកចិត្តខ្លាំងបំផុត ប្រសិនបើយើងមានគ្រប់យ៉ាង តែខ្វះភាពទុកចិត្តបាន យើងនឹងពិបាកទំនាក់ទំនងជាមួយដៃគូពាណិជ្ជកម្ម ហេតុនេះអ្នករកស៊ីត្រូវកសាងទំនុកចិត្តខ្ពស់បំផុត។

ដើម្បីឱ្យគេទុកចិត្តលុះត្រាតែយើងកសាងកេរ្តិ៍ឈ្មោះខ្លួនឯងឱ្យបានល្អ ហើយបង្ហាញភាពស្មោះត្រង់ទៅកាន់មនុស្សទូទៅ បន្ទាប់ពីយើងធ្វើល្អទៅកាន់មនុស្សគ្រប់គ្នា ពួកគាត់នឹងចាប់ផ្តើមផ្តល់តម្លៃមកយើងវិញ ដែលធ្វើឱ្យដំណើរចរចារនានានៅក្នុងអាជីវកម្មអាចធ្វើទៅបានដោយរលូន។ ចំពោះការកសាងធនធានមនុស្សវិញ លោកឧកញ៉ា ចិត្រ សេរីសុភ័ក្ត្រ បានលើកឡើងថា ដំណើរក្រុមហ៊ុនអាចទៅមុខបានដោយរលូនគឺទាមទារឱ្យមានបុគ្គលិក និងធនធានមនុស្សពូកែៗ។ ទន្ទឹមនឹងភាពពូកែរបស់បុគ្គលិក អ្នកគ្រប់គ្រងក៏ត្រូវចេះទាញយកបេះដូងបុគ្គលិកឱ្យបានផងដែរ តាមរយៈការផ្តល់តម្លៃដល់បុគ្គលិក ហើយចាត់ទុកបុគ្គលិកដូចជាបងប្អូន ដែលត្រូវធ្វើការងារសំខាន់ៗរួមគ្នា។ ចំណុចទាំងអស់នេះ ជាការវិនិយោគលើខ្លួនឯងដែលអាចរុញច្រានឱ្យក្រុមហ៊ុន និងដំណើរជីវិតទទួលបានជោគជ័យ។គួរបញ្ជាក់ថា ក្រុមហ៊ុន Luxury Smile Beauty Group Co., LTD ដែលជាក្រុមហ៊ុនបង្កើតម៉ាកសញ្ញា និងចែកចាយគ្រឿងសម្អាងធំជាងគេបំផុតនៅកម្ពុជា និងមានរោងចក្រទទួលផលិតគ្រឿងសម្អាងដ៏ធំនៅប្រទេសថៃ ជាក្រុមហ៊ុនដែលបានផ្តល់សិទ្ធិចែកចាយគ្រឿងសម្អាងប្រកបដោយគុណភាព សុវត្ថិភាព និងទំនុកចិត្តខ្ពស់ ដល់ក្រុមហ៊ុនក្នុងស្រុកជាច្រើននាពេលបច្ចុប្បន្ននេះ។ ថ្មីៗនេះក្រុមហ៊ុនដ៏មានសក្តានុពលនេះទើបតែបង្កើតកម្មវិធីប្រគល់ពានរង្វាន់សហគ្រិនឆ្នើម Successful CEO Award 2019 ដំបូងគេបំផុតនៅកម្ពុជាដល់ម្ចាស់អាជីវកម្មផ្នែកសម្ផស្ស ក្រោមអធិបតីភាពពីលោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល តំណាងដ៏ខ្ពង់ខ្ពស់របស់ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាល និងមានការចូលរួមពីលោកជំទាវ វី សាឌី អនុប្រធានគណៈកម្មការប្រឆាំងផលិត-ផលក្លែងក្លាយតំណាងដ៏ខ្ពង់ខ្ពស់របស់ឯកឧត្តម មៀច សុផាន់ណា រដ្ឋលេខាធិការក្រសួងមហាផ្ទៃនិងជាប្រធានគណៈកម្មការប្រឆាំងផលិតផលក្លែងក្លាយ ព្រមទាំងមានវត្តមានរបស់តំណាងស្ថានទូត ស្ថាប័នពាណិជ្ជកម្ម និងក្រុមហ៊ុនជាតិអន្តរជាតិជាច្រើនផ្សេងទៀត៕

December 4, 2019

វីរៈសិល្បករអាយ៉ៃដ៏កម្រ ព្រហ្ម ម៉ាញ ព្រួយបារម្ភខ្លាចអនាគតមិនមានអ្នកស្នងអាយ៉ៃបុរាណខ្មែរ

អាយ៉ៃ គឺជាទម្រង់សិល្បៈចម្រៀងឆ្លើយឆ្លងបែបបុរាណមួយ ដែលមានប្រវត្តិចារទុកជាសម្បត្តិវប្បធម៌ខ្មែរ។ ប៉ុន្តែ ទោះជាអាយ៉ៃមានតម្លៃមិនអាចកាត់ថ្លៃបានក៏ដោយ ក៏សិល្បករចម្រៀងអាយ៉ៃមានចំនួនតិចតួចណាស់នៅក្នុងប្រទេសកម្ពុជានាពេលបច្ចុប្បន្ននេះ។ លោក ព្រហ្ម ម៉ាញ ជាសិល្បករជើងចាស់មានសំឡេងពីរោះពូកែទាំងកំប្លុកកំប្លែង ទាំងសំនួនវោហារ និងការសំដែង កំពុងមានការសោកស្តាយ និងព្រួយបារម្ភចំពោះការវិវឌ្ឍនៃវិស័យសិល្បៈអាយ៉ៃទៅថ្ងៃអនាគត។

វីរៈសិល្បករឆ្នើម ដែលត្រូវបានមហាជនឱ្យឈ្មោះថាជា “ស្ដេចអាយ៉ៃកំប្លែង” មានវោហាស័ព្ទមិនចេះរីងស្ងួតរូបនេះ បានសាងកេរ្តិ៍ឈ្មោះល្បីល្បាញនៅក្នុងប្រទេសកម្ពុជា ជាមួយដៃគូចម្រៀងស្រី លោកយាយ យ៉យ បានបង្ហាញអារម្មណ៍ភ័យបារម្ភបន្ទាប់ពីសិល្បៈអាយ៉ៃ ហាក់បាត់បង់ការគាំទ្រក្នុងមួយរយៈចុងក្រោយនេះ។

លោកបានប្រកាសបង្រៀនដោយឥតគិតថ្លៃ ដល់យុវវ័យគ្រប់ផ្នែក ជាមួយនឹងការរំពឹងថា នឹងធ្វើឱ្យអាជីពនៅក្រោយពេលលោកចូលនិវត្តន៍ អាចបន្តស្ទុះទៅមុនទៀតបាន។ក្រៅពីការបារម្ភអំពីបញ្ហាសុខភាពដែលកាន់តែទ្រុឌទ្រោម ពីព្រោះវ័យរបស់លោកកាន់តែជ្រេ ក៏លោក ព្រហ្ម ម៉ាញ នៅតែបង្ហាញនូវឆន្ទៈចង់ជំរុញឱ្យសិល្បៈអាយ៉ៃខ្មែរ នៅតែមានការចាប់អារម្មណ៍ទៅថ្ងៃខាងមុខ។ លោកបានប្រកាសចំណាយពេល និងកម្លាំងបង្រៀនដោយឥតគិតថ្លៃ ជាថ្នូរនឹងភាពព្រងើយកន្តើយរបស់យុវជនខ្មែរមួយចំនួនធំ ដែលពុំសូវខ្វល់ខ្វាយអំពីសិល្បៈបុរាណ ហើយធ្វើឱ្យលោកភ័យព្រួយខ្លាចមិនមានអ្នកបន្តវេនផ្នែកចម្រៀងអាយ៉ៃខ្មែរ។ លោកបានប្រកាសដំណឹងដល់បងប្អូនសិល្បៈ ឬយុវជនណាដែលមានបំណងចង់ចេះ ចង់ហាត់រៀនសិល្បៈអាយ៉ៃ ដោយមិនសំដៅទៅលើតែអ្នកដែលមាននិស្ស័យពីកំណើតនោះទេ ដោយលោកនឹងធ្វើការបង្ហាត់បង្រៀន ផ្ទេរបទពិសោធទៅឱ្យយុវជនយុវនារីជំនាន់ក្រោយ ដើម្បីបន្តវេនពីលោកបន្តទៀត។

ពេលវេលាបង្ហាត់ គឺមិនកំណត់ថានឹងរៀនពេញមួយសប្ដាហ៍នោះទេ គឺអាស្រ័យទៅលើម៉ោងដែលលោកទំនេរ ដកឃ្លាពីការងារផ្ទាល់ខ្លួនរបស់លោកបាន ហើយលោកនឹងជូនជាដំណឹងជាមុនអំពីម៉ោងពេលសម្រាប់ការហាត់រៀន។ការប្រកាសរបស់លោក គឺជារឿងមួយដ៏ប្រសើរ ដែលលោកមានគំនិតចង់បង្ហាត់បង្រៀនបណ្ដុះស្មារតីដល់កូនខ្មែរឱ្យងាកមកចាប់អារម្មណ៍នូវសិល្បៈអាយ៉ៃខ្មេរ ដែលភាគតិចណាស់ដែលមានអ្នកអាចចេះជំនាញមួយនេះពិតប្រាកដ និងអាចចាប់អាជីពនេះជាប់លាប់។

លោក ព្រហ្ម ម៉ាញ សង្ឃឹមថា កុលបុត្រកុលធីតាខ្មែរជំនាន់ក្រោយ នឹងមិនព្រងើយកន្តើយអំពីដំណឹងមួយនេះនោះទេ។ មិនតែប៉ុណ្ណោះ ជាជ្រុងមួយជួយឱ្យសិល្បៈអាយ៉ៃខ្មែរមានទីផ្សារងើបឡើងវិញ ប្រសិនបើក្មេងជំនាន់ក្រោយអាចធ្វើបាន និងបន្តវេនពីលោកដោយជោគជ័យនោះ សិល្បៈបុរាណខ្មែរមួយនេះនឹងមិនបាត់បង់ជាក់ជាមិនខានឡើយ៕

December 4, 2019

រាជរដ្ឋាភិបាលបន្តការអនុវត្តកម្មវិធី “គម្រោងរោងចក្រកាន់តែប្រសើរនៅកម្ពុជា”

រាជរដ្ឋាភិបាលនៃព្រះរាជាណាចក្រកម្ពុជា សមាគមរោងចក្រកាត់ដេរនៅកម្ពុជា (GMAC) និងអង្គការអន្តរជាតិខាងការងារ (ILO) បានចុះហត្ថលេខាលើអនុស្សរណៈនៃការយោគយល់គ្នាស្តីពីកម្មវិធី“គម្រោងរោងចក្រកាន់តែប្រសើរនៅកម្ពុជា” សម្រាប់បន្តអនុវត្តនៅឆ្នាំ2020 ដល់ឆ្នាំ2022 ដែលអនុស្សរណៈនេះគ្របដណ្តប់លើវិស័យកាត់ដេរសម្លៀកបំពាក់ និងវាយនភណ្ឌ កាបូប និងសម្ភារសម្រាប់ធ្វើដំណើរ ដែលពិធីចុះហត្ថលេខានេះបានធ្វើឡើងនៅសណ្ឋាគារសាន់វេ កាលពីថ្ងៃទី21 ខែវិច្ឆិកា ឆ្នាំ2019 ។

ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានមានប្រសាសន៍ថា៖“នេះជាការចុះហត្ថលេខាលើអនុស្សរណៈលើកទី6 ដែលគ្របដណ្តប់លើវិស័យកាត់ដេរសម្លៀកបំពាក់ វាយនភណ្ឌ កាបូប និងសម្ភារសម្រាប់ធ្វើដំណើរ។ អនុស្សរណៈនៃការយោគយល់ថ្មីនេះ នឹងបន្តទ្រទ្រង់ផ្នែកហិរញ្ញវត្ថុ និងកិច្ចសហការកាន់តែប្រសើរ រួមទាំងការផ្ទេរចំណេះដឹងផ្នែកអធិការកិច្ចដល់មន្ត្រីនៃក្រសួងការងារ និងបណ្តុះបណ្តាលវិជ្ជាជីវៈ ដើម្បីឱ្យស្របទៅនឹងការវិវឌ្ឍនៃស្ថានការណ៍បច្ចុប្បន្ន និងទៅអនាគត”។

ឯកឧត្តមរដ្ឋមន្ត្រីបានមានប្រសាសន៍បន្ថែមទៀតថា រាជរដ្ឋាភិបាលកម្ពុជាបានដាក់ចេញនូវគោលនយោបាយផ្សារភ្ជាប់ពាណិជ្ជកម្មជាមួយនឹងបទដ្ឋានការងារចាប់តាំងពីឆ្នាំ2001មក ដើម្បីកែលម្អលក្ខខណ្ឌការងារក្នុងវិស័យកាត់ដេរសម្លៀកបំពាក់ និងវាយនភណ្ឌ ដែលទទួលស្គាល់ស្តង់ដាការងារជាអន្តរជាតិ តាមរយៈការអនុវត្តច្បាប់ការងាររបស់កម្ពុជា។

ឯកឧត្តមរដ្ឋមន្ត្រីក្រសួងពាណិជ្ជកម្មបានលើកឡើងថា តាមរយៈការអនុវត្តគោលនយោបាយ នៃការផ្សារភ្ជាប់ពាណិជ្ជកម្មជាមួយនឹងបទដ្ឋានការងារនេះ បានប្រែក្លាយកេរិ៍្ដឈ្មោះរបស់កម្ពុជាទៅជា ប្រទេសដែលឈានមុខគេក្នុងគោលនយោបាយពាណិជ្ជកម្មអន្តរជាតិ និងបានធ្វើឱ្យកម្ពុជាក្លាយជា ប្រទេសគំរូសម្រាប់ប្រទេសមួយចំនួនយកទៅធ្វើជាបទពិសោធសម្រាប់អនុវត្ត និងរៀនសូត្រតាម។ គោលនយោបាយនេះ បានជំរុញការទាក់ទាញវិនិយោគទុន បង្កើតការងារ និងប្រាក់ចំណូលសម្រាប់កម្មករ កម្មការិនី ក៏ដូចជាគ្រួសាររបស់ពួកគាត់ឱ្យកាន់តែប្រសើរទ្បើង និងចូលរួមចំណែកកសាងនូវមូលដ្ឋានគ្រឹះក្នុងការប្រែក្លាយប្រទេសកម្ពុជាទៅជាប្រទេសដែលមានការអភិវឌ្ឍវិស័យឧស្សាហកម្មជាលំដាប់។

ឯកឧត្តមបានបញ្ជាក់ថា គោលនយោបាយនេះក៏បានធ្វើឱ្យវិស័យពាណិជ្ជកម្មរួមចំណែកយ៉ាងសំខាន់ក្នុងការជំរុញកំណើនសេដ្ឋកិច្ចជាតិ ដែលក្នុងរយៈពេល 2ទសវត្សរ៍ចុងក្រោយនេះ កម្ពុជាសម្រេចបានកំណើនសេដ្ឋកិច្ចជាមធ្យម 7% រៀងរាល់ឆ្នាំ ដែលបានរួមចំណែកយ៉ាងសំខាន់ដល់ការធានាបាននូវស្ថិរភាពម៉ាក្រូសេដ្ឋកិច្ច ក៏ដូចជាបានរួមចំណែកក្នុងការកាត់បន្ថយភាពក្រីក្ររបស់ប្រជាពលរដ្ឋ ស្របតាមផែនការយុទ្ធសាស្ត្រអភិវឌ្ឍន៍ជាតិ និងយុទ្ធសាស្ត្រចតុកោណរបស់រាជរដ្ឋាភិបាលកម្ពុជា។

ឯកឧត្តម ប៉ាន សូរស័ក្ដិ បានបញ្ជាក់បន្ថែមថា ការអនុវត្តគោលនយោបាយនៃការផ្សារភ្ជាប់ ពាណិជ្ជកម្មជាមួយនឹងបទដ្ឋានការងារ ក៏បានបង្កើនទំនុកចិត្តដល់អ្នកបញ្ជាទិញ និងម៉ាកយីហោល្បីៗ ក្នុងការដាក់បន្ថែមការបញ្ជាទិញផលិតផលសម្លៀកបំពាក់ និងវាយនភណ្ឌនៅកម្ពុជាពី 1ឆ្នាំ ទៅ 1ឆ្នាំ កាន់តែច្រើនឡើងផងដែរ។

ជាក់ស្តែងការនាំចេញរបស់កម្ពុជាក្រោមប្រព័ន្ធអនុគ្រោះពាណិជ្ជកម្មទៅកាន់ទីផ្សារបរទេស នៅឆ្នាំ2001 មានទឹកប្រាក់សរុប 1,188លានដុល្លារអាមេរិក កើនរហូតដល់ទឹកប្រាក់សរុប 12,895លានដុល្លារអាមេរិក នៅឆ្នាំ2018។ ក្នុងនោះការនាំចេញសម្លៀកបំពាក់ និងវាយនភណ្ឌ មានកំណើនគួរឱ្យកត់សម្គាល់ ដែលនៅឆ្នាំ2001 មានទឹកប្រាក់ត្រឹមតែ 828លានដុល្លារអាមេរិក បានកើនដល់ 7,779លានដុល្លារអាមេរិក នៅឆ្នាំ2018។

ឯកឧត្តម អុិត សំហេង រដ្ឋមន្ដ្រីក្រសួងការងារនិងបណ្ដុះបណ្ដាលវិជ្ជាជីវៈក៏បានបញ្ជាក់ដែរថា៖“រាជរដ្ឋាភិបាលកម្ពុជា បានចាត់ទុកគម្រោងរោងចក្រកាន់តែប្រសើរនៅកម្ពុជា គឺជាដៃគូអភិវឌ្ឍន៍ដ៏សំខាន់ក្នុងការចូលរួមចំណែកលើការធានានូវសិទ្ធិការងារ និងលក្ខខណ្ឌការងារល្អប្រសើរសម្រាប់បងប្អូនកម្មករ និយោជិត និងផ្អែកលើភាពជោគជ័យនៃការអនុវត្តគម្រោងនេះ រាជរដ្ឋាភិបាលកម្ពុជា សម្រេចបន្តអនុស្សរណៈ នៃការយោគយល់គ្នា ក្នុងការអនុវត្តគម្រោងរោងចក្រកាន់តែប្រសើរ នៅកម្ពុជាសម្រាប់ឆ្នាំ2020-2022 ”។

ឯកឧត្ដមបន្ដថា ការសម្រេចនេះគឺធ្វើឡើងដើម្បីឆ្លើយតបផងដែរទៅនឹងផែនការសហប្រតិបត្តិការនិងសមាហរណកម្មរបស់គម្រោងរោងចក្រកាន់តែប្រសើរ ជាមួយនឹងក្រសួងការងារ និងបណ្តុះបណ្តាលវិជ្ជាជីវៈ ដែលឆ្លុះបញ្ចាំងពីការប្តេជ្ញាចិត្តរបស់រាជរដ្ឋាភិបាលកម្ពុជាក្នុងបេសកកម្មលើកកម្ពស់ “លក្ខខណ្ឌការងារក្នុងវិស័យវាយនភណ្ឌ និងសម្លៀកបំពាក់នៅកម្ពុជា សមស្របតាមបទដ្ឋានការងារស្នូលដែលត្រូវបានទទួលស្គាល់ជាអន្តរជាតិ និងស្របតាមច្បាប់ស្តីពីការងារកម្ពុជា”។

លោកឧកញ៉ា វ៉ាន់ ស៊ូអៀង ប្រធានសមាគមរោងចក្រកាត់ដេរនៅកម្ពុជាបានឱ្យដឹងថា សមាគមរោងចក្រកាត់ដេរ នឹងបន្តធ្វើការជាមួយររោងចក្រកាន់តែប្រសើរនៅកម្ពុជា និងរាជរដ្ឋាភិបាល នៃ ព្រះរាជាណាចក្រកម្ពុជា ដើម្បីរក្សាការផលិត សុវត្ថិភាពការងារ និងការងារ ប្រកបដោយចីរភាព សម្រាប់ជាកម្លាំងពលកម្មរបស់កម្ពុជាយើង។

លោក Grame Buckley នាយកការិយាល័យអង្គការពលកម្មអន្ដរជាតិខាងការងារ ILO ប្រចាំប្រទេសកម្ពុជា ឡាវ និងថៃ បានកត់សម្គាល់ថា ដោយធ្វើការជាមួយរាជរដ្ឋាភិបាល និងសមាគមរោងចក្រកាត់ដេរ យើងនឹងរួមគ្នាលើកកម្ពស់ការងារសមរម្យសម្រាប់កម្មកររាប់រយ ពាន់នាក់ ជាពិសេសស្ត្រី ហើយក៏ជួយកម្មករ និយោជិត ក្នុងការអភិវឌ្ឍជំនាញថ្មីៗ អាជីវកម្ម ដើម្បីទទួលប្រាក់ចំណេញកាន់តែច្រើនជាងមុន និងក្រុមគ្រួសារពួកគេឱ្យចាកផុតពីភាពក្រីក្រ។

គួរបញ្ជាក់ថា នេះជាអនុស្សរណៈលើកទី6 ហើយ ក្នុងការបន្តទ្រទ្រង់ផ្នែកហិរញ្ញវត្ថុ និងកិច្ចសហការកាន់តែប្រសើរ ដើម្បីឱ្យស្របទៅនឹងការវិវឌ្ឍនៃស្ថានការណ៍បច្ចុប្បន្ន និងទៅអនាគត។ អនុស្សរណៈនៃការយោគយល់គ្នារវាង ភាគីទាំង3ខាងលើនេះលើកទី1ត្រូវបានចុះហត្ថលេខានៅថ្ងៃ28 ខែវិច្ឆិកាឆ្នាំ2003 ដើម្បីបន្តអនុវត្តន៍ គម្រោងសហប្រតិបត្តិការបច្ចេកទេសដែលមានឈ្មោះថា “ការធានា ថាលក្ខខណ្ឌការងារក្នុងវិស័យវាយនភណ្ឌ និងសម្លៀកបំពាក់នៅកម្ពុជា សមស្របតាមបទដ្ឋានការងារស្នូល ដែលត្រូវបានទទួលស្គាល់ជាអន្តរជាតិ និងស្របតាមច្បាប់ស្តីពីការងារកម្ពុជា”សម្រាប់រយៈពេល 2ឆ្នាំ ហើយគម្រោងនេះ ត្រូវបានផ្លាស់ប្តូរឈ្មោះទៅជា “គម្រោងរោងចក្រកាន់តែប្រសើរនៅកម្ពុជា” រហូតមកដល់បច្ចុប្បន្ន៕

December 3, 2019

សន្និសីទធនាគារអាស៊ាន ផ្តោតលើកំណែទម្រង់ប្រព័ន្ធឌីជីថលក្នុងវិស័យធនាគារ និងសេវាហិរញ្ញវត្ថុ

មន្ត្រីកំពូលៗ ជាអ្នកជំនាញធនាគារ និងហិរញ្ញវត្ថុជាន់ខ្ពស់ មកពីទូទាំងតំបន់ក្នុងសហគមន៍អាស៊ានបានមកជួបជុំគ្នានៅរាជធានីភ្នំពេញ ដើម្បីចូលរួមក្នុងព្រឹត្តិការណ៍ សន្និសីទប្រចាំតំបន់ដ៏សំខាន់មួយដែលសន្និសីទ នោះរៀបចំឡើងក្រោមទស្សនទាន“ការផ្សារភ្ជាប់អាស៊ានឆ្នាំ2025-ពិភពលោកដ៏ក្លៀវក្លាថ្មីមួយនៃនវានុវត្តភាព ប្រព័ន្ធឌីជីថលសម្រាប់វិស័យធនាគារអាស៊ានតែមួយ (ASEAN Connectivity2025-abravenew world of digital innovation for one ASEAN banking sector)” ដោយផ្តោតទៅលើកំណែទម្រង់ប្រព័ន្ធឌីជីថល ក្នុងវិស័យធនាគារ និងសេវាហិរញ្ញវត្ថុ នៅតំបន់អាស៊ីអាគ្នេយ៍។

ឯកឧត្តម ជា ចាន់តូ អគ្គទេសាភិបាលធនាគារជាតិនៃកម្ពុជា បានថ្លែងស្វាគមន៍ដល់ប្រតិភូក្នុងសន្និសីទទាំងមូលថា៖ “ខ្ញុំពិតជាមានមោទនភាពណាស់ ដែលបានឃើញដំណើរវិវឌ្ឍន៍ដ៏គួរឱ្យកត់សម្គាល់ក្នុងវិស័យធនាគារនៅកម្ពុជា ក៏ដូចជាក្នុងតំបន់អាស៊ាន ពិសេសរយៈពេលប៉ុន្មានឆ្នាំចុងក្រោយនេះ បន្ទាប់ពីវិបត្តិហិរញ្ញវត្ថុសកល។ ការធ្វើទំនើបកម្មលើហេដ្ឋារចនាសម្ព័ន្ធហិរញ្ញវត្ថុ និងបច្ចេកវិទ្យាហិរញ្ញវត្ថុថ្មីៗ បានជួយបង្កើនប្រសិទ្ធភាព ក្នុងការផ្តល់សេវាហិរញ្ញវត្ថុ ទៅកាន់ប្រជាពលរដ្ឋអាស៊ាន ច្រើនជាង 600លាននាក់ ប្រកបដោយសុវត្ថិភាព និងបរិយាប័ន្ន”។

ឯកឧត្តម បានបន្តថា សន្និសីទនេះគឺជាឱកាសដ៏ល្អឥតខ្ចោះ ក្នុងការផ្លាស់ប្តូរបទពិសោធ និងព័ត៌មាន ជាមួយអ្នកជំនាញ មកពីប្រទេសសមាជិកអាស៊ានផ្សេងទៀត និងលើកទឹកចិត្តធនាគារឱ្យទទួលយកបច្ចេកវិទ្យាចុងក្រោយ ដែលមាននៅក្នុងវិស័យនេះ។

ឯកឧត្តម ទេសាភិបាល បានឱ្យដឹងថា៖ “ឧស្សាហកម្មធនាគារនៅកម្ពុជាកំពុងអភិវឌ្ឍយ៉ាងរហ័សក្នុងរយៈពេល 2-3 ឆ្នាំចុងក្រោយនេះ ដោយសារតែស្ថិរ-ភាពម៉ាក្រូសេដ្ឋកិច្ចល្អ និងការបើកចំហគោលនយោបាយវិនិយោគរបស់រដ្ឋាភិបាល។ ឆ្នាំនេះសេដ្ឋកិច្ចរបស់កម្ពុជា ត្រូវបានព្យាករថានឹងរក្សាបានកំណើនក្នុងអត្រាស្រដៀងគ្នានឹងឆ្នាំទៅ ដែលភាគច្រើនត្រូវបានជំរុញដោយលំហូរចូលជាបន្តនៃការវិនិយោគផ្ទាល់ពីបរទេស កំណើនការនាំចេញខ្ពស់ និងតម្រូវការក្នុងស្រុកដ៏រឹងមាំ”។

កាលពីចុងខែកក្កដា ធនាគារជាតិនៃកម្ពុជា NBCបានព្យាករថា កំណើនសេដ្ឋកិច្ចរបស់កម្ពុជាបានរក្សាក្នុងកម្រិតមធ្យម 7.1%នៅឆ្នាំនេះ ដែលជំរុញពីកំណើនការនាំចេញ វិស័យសំណង់ អចលនទ្រព្យ និងទេសចរណ៍ ខណៈវិស័យកសិកម្មនឹងមានកំណើនយឺត។ គិតត្រឹមខែកក្កដា ឆ្នាំ 2019 ទ្រព្យសកម្ម ក្នុងប្រព័ន្ធធនាគារបានកើនដល់ 114% នៃផលិតផលក្នុងស្រុកសរុប (GDP)។

ឯកឧត្តម ជា ចាន់តូ មានប្រសាសន៍បន្តថា៖“ការអភិវឌ្ឍផ្នែកបច្ចេកវិទ្យាបានចូលរួមចំណែក យ៉ាងសំខាន់ក្នុងការពង្រីក និងពង្រឹងវិស័យធនាគារនៅកម្ពុជាក៏ដូចជាក្នុងតំបន់អាស៊ាន។ បណ្តាញធនាគារនិងស្ថាប័នហិរញ្ញវត្ថុនានាបានបង្កើនការប្រើប្រាស់ បច្ចេកវិទ្យា និងបង្កើតផលិតផល និងសេវាកម្មហិរញ្ញ-វត្ថុថ្មីៗ ដើម្បីផ្តល់ភាពងាយស្រួលដល់អតិថិជន តាមរយៈការកាត់បន្ថយថ្លៃដើម និងពេលវេលា។ ការបង្កើតថ្មីទាំងនេះ គាំទ្រដល់ការរីកចម្រើននៃសកម្មភាពសេដ្ឋកិច្ច ក៏ដូចជាការដាក់បញ្ចូលហិរញ្ញវត្ថុ”។

លោកបណ្ឌិត អុិន ចាន់នី ប្រធានសមាគមធនាគារកម្ពុជាបានមានប្រសាសន៍ថា៖ “ព្រឹត្តិការណ៍នេះអនុញ្ញាតឱ្យធនាគារកម្ពុជាអាចរៀនសូត្រពីសមភាគីរបស់ខ្លួននៅទូទាំងអាស៊ាន។ ចំណេះដឹងនេះនឹងបង្កើតឱកាសបន្ថែមទៀត នៅក្នុងវិស័យហិរញ្ញវត្ថុក្នុងស្រុក និងផ្តល់សេវាកម្មកាន់តែប្រសើរដល់អតិថិជនកម្ពុជា។ ដូចសមាគមធនាគារ ដទៃទៀតនៅក្នុងតំបន់តួនាទីរបស់សមាគមធនាគារនៅកម្ពុជា គឺត្រូវសហការជាមួយធនាគារជាតិនៃកម្ពុជា ក្នុងការជំរុញការច្នៃប្រឌិតនិងការអភិវឌ្ឍហេដ្ឋារចនាសម្ព័ន្ធ ប្រព័ន្ធទូទាត់ប្រកបដោយប្រសិទ្ធភាព និងតម្លាភាពដើម្បីសម្រួលដល់កំណើន សេដ្ឋកិច្ច និងសមាហរណកម្មតំបន់”។

លោកបណ្ឌិត អុិន ចាន់នី បានថ្លែងថា៖ “យើងមិនត្រឹមតែបានឃើញពីការរីកចម្រើន របស់ ក្រុមហ៊ុនធំៗក្នុងតំបន់ដូចជា Grab នៅសិង្ហបុរី ឬក៏ក្រុមហ៊ុន GoJek នៅឥណ្ឌូនេស៊ី ដែលកំពុងតែឈានមុខ គេក្នុងវិស័យនេះ ក្នុងការធ្វើឱ្យបច្ចេកវិទ្យាថ្មីៗ មានភាពងាយស្រួល។ យើងបានសិក្សារៀនសូត្រពីក្រុមហ៊ុនទាំងនោះ ហើយយើងកំពុងតែអភិវឌ្ឍក្រុមអ្នកច្នៃប្រឌិតផ្ទាល់ខ្លួនរបស់យើង ដូចជាក្រុមហ៊ុន PassApp ឬ Joonaak ដែលកំពុងនាំយកចំណេះដឹងក្នុងតំបន់របស់ពួកគេនៅទីនេះ ដើម្បីផ្តល់អត្ថប្រយោជន៍ដល់ប្រជាពលដ្ឋរបស់យើង”។

បណ្ឌិត អុិន ចាន់នី បានថ្លែងបន្តថា៖ “ពិតណាស់ យើងបានទទួលស្វាគមន៍ក្រុមហ៊ុន Grab និងក្រុមហ៊ុនជាច្រើនផ្សេងទៀត ដើម្បីប្រតិបត្តិនៅទីនេះ ប៉ុន្តែយើងមានមោទនភាពណាស់ ដែលយើងមានទេពកោសល្យ និងមហិច្ឆតាក្នុងការបង្កើត និងបង្កើនការប្រកួតប្រជែងក្នុងស្រុកជាមួយនឹងក្រុមហ៊ុនធំៗប្រចាំតំបន់ទាំងនេះ”។

ប្រតិភូជាន់ខ្ពស់ជាច្រើននាក់ផ្សេងទៀត ត្រូវបានរំពឹងទុកថា នឹងផ្តល់អនុសាសន៍របស់ខ្លួនទៅលើ ប្រធានបទ ដូចគ្នានេះ នៅក្នុងអំឡុងពេលកិច្ចពិភាក្សាជាក្រុម អំពីប្រព័ន្ធឌីជីថល និងបច្ចេកវិទ្យាហិរញ្ញវត្ថុ(Fintech) សន្តិសុខលើការលួចចម្លងទិន្នន័យ (cybersecurity) បញ្ជីកំណត់ត្រាប្លុកឆេន (Blockchain) និងកំណែទម្រង់ប្រព័ន្ធឌីជីថល ក្នុងវិស័យធនាគារ និងសេវាហិរញ្ញវត្ថុ។

លោក ភួខុង ចន្ថាចក Phoukhong-Chanthachack ប្រធានសមាគមធនាគារិកអាស៊ានក៏បានលើកឡើងពីសារៈសំខាន់នៃការច្នៃប្រឌិតឌីជីថលផងដែរ។ “ការច្នៃប្រឌិតឌីជីថលគឺជាផ្នែកសំខាន់មួយ នៃសសរស្តម្ភទាំង 5 នៅក្នុងផែនការមេអាស៊ានតភ្ជាប់ឆ្នាំ 2025។ ចក្ខុវិស័យរបស់យើង គឺដើម្បីសម្រេចបាននូវអាស៊ាន ដែលមានទំនាក់ទំនង និងសមាហរណកម្មយ៉ាងរលូន និងទូលំទូលាយ។

បច្ចុប្បន្នសមាគមធនាគារនៅកម្ពុជាមានសមាជិក 65 រួមមាន៖ធនាគារពាណិជ្ជកម្ម ចំនួន44 ធនាគារឯកទេសចំនួន17និងការិយាល័យតំណាងចំនួន4 និងសមាគមមីក្រូហិរញ្ញវត្ថុមួយ។ នេះជាលើកទី1 ហើយដែលកម្ពុជាធ្វើជាម្ចាស់ផ្ទះនៃសន្និសីទធនាគារអាស៊ាន ដែល ដែលតម្រូវឱ្យត្រូវដាក់វេនគ្នាធ្វើជាម្ចាស់ផ្ទះ រៀងរាល់រយៈពេល2 ឆ្នាំម្តងរាល់ប្រទេស ជាសមាជិក សហគមន៍អាស៊ានទាំងអស់។

សូមបញ្ជាក់ថា ឥណទានក្នុងវិស័យធនាគារ និងមីក្រូហិរញ្ញវត្ថុបានកើនឡើងប្រហែល 22.4%ដល់ 27,7ពាន់លានដុល្លារកាលពីចុងត្រីមាសទី 2 ឆ្នាំ2019។ កម្ចីសរុបនៅក្នុងវិស័យធនាគារមានចំនួន21,5 ពាន់លានដុល្លារ ខណៈកម្ចីពីគ្រឹះស្ថានមីក្រូហិរញ្ញវត្ថុមាន 6,2 ពាន់លានដុល្លារគិតត្រឹមត្រីមាសទី2 ឆ្នាំ 2019។

ទ្រព្យសកម្មសរុបនៅក្នុងវិស័យធនាគារ និងមីក្រូហិរញ្ញវត្ថុបានកើនឡើង12.2%កើនឡើងដល់44,8 ពាន់លានដុល្លារ គិតត្រឹមដំណាច់ត្រីមាសទី 2 ឆ្នាំ 2019។ ធនាគារ និងមីក្រូហិរញ្ញវត្ថុ (ការិយាល័យកណ្ដាល និងសាខា) បានកើនឡើងដល់ 2,367 ដោយមានម៉ាស៊ីន ATM 2,228 កន្លែងទូទាំងប្រទេស។

គិតត្រឹមត្រីមាសទី2 ឆ្នាំ2019 មានធនាគារពាណិជ្ជ45 ធនាគារឯកទេស 15 គ្រឹះស្ថានមីក្រូ ហិរញ្ញវត្ថុទទួលប្រាក់កម្ចី 7 គ្រឹះស្ថានមីក្រូហិរញ្ញវត្ថុ 74 ប្រតិបត្តិករឥណទានជនបទ 254 និងក្រុមហ៊ុនផ្ដល់សេវាទូទាត់16។ នេះបើតាមរបាយការណ៍ទិន្នន័យធនាគារជាតិនៃកម្ពុជា៕

December 3, 2019