ធឿន មករា - La Reine Media

តម្លៃនាំចូលសម្ភារសំណង់បានកើនឡើង 50% នៅឆ្នាំ2019

ការរីកចម្រើនវិស័យអចលនទ្រព្យបាននិងកំពុងជំរុញឱ្យមានកំណើនតម្រូវការសម្ភារសំណង់ ស្របពេលវិស័យសំណង់នៅបន្តសកម្មភាពគគ្រឹកគគ្រេង ដែលឆ្លុះបញ្ចាំងឱ្យឃើញថា មិនទាន់មានភាពនឿយណាយ នៃការវិនិយោគលើវិស័យនេះនៅឡើយ។

របាយការណ៍អំពីតម្លៃសម្ភារសំណង់ដែលនាំចូលមកកម្ពុជា ដើម្បីផ្គត់ផ្គង់ដល់វិស័យសំណង់បានឱ្យដឹងថា បានកើនឡើង 50%ក្នុងឆ្នាំ 2019 បើប្រៀបធៀបនឹងឆ្នាំ2018។ នេះបើតាមធនាគារជាតិនៃកម្ពុជា។

តួលេខពីធនាគារជាតិនៃកម្ពុជាបានបង្ហាញថាតម្លៃសរុបនៃសម្ភារសំណង់ រួមមានសម្ភារសំណង់ស៊ីម៉ងត៍ និងផលិតផលដែកថែប ត្រូវបានប៉ាន់ប្រមាណថា មានចំនួន 1.5ពាន់លានដុល្លារ ក្នុងឆ្នាំ2019 រីឯតម្លៃនៃការនាំចូលសម្ភារសំណង់កាលពីឆ្នាំ2018 មានប្រមាណ 1ពាន់លានដុល្លារ។

ធនាគារជាតិនៃកម្ពុជា ឬ NBC បាននិយាយថា វិស័យសំណង់ គឺជាផ្នែកមួយនៃកត្តាជំរុញសេដ្ឋកិច្ចសម្រាប់កំណើនសេដ្ឋកិច្ចឆ្នាំ2019 ដែលត្រូវបានគេប៉ាន់ប្រមាណថា នឹងឈានដល់ 7.1%។

ធនាគារជាតិនៃកម្ពុជា បានសរសេរនៅក្នុងរបាយការណ៍ថា៖“វិស័យសំណង់ និងអចលនទ្រព្យបន្តកើនឡើង ដែលឆ្លុះបញ្ចាំងដោយនិន្នាការកើនឡើងនៃការនាំចូលសម្ភារសំណង់ និងគម្រោងសាងសង់ដែលទទួលបានការអនុម័ត”។

បើតាមរបាយការណ៍ដដែលនេះ នៅក្នុងឆ្នាំ2019 ការនាំចូលសម្ភារសំណង់ មានតម្លៃប៉ាន់ស្មានប្រមាណ 1,500លានដុល្លារ អាមេរិក ដែលកើនឡើងពីជិត 600លានដុល្លារក្នុងឆ្នាំ2018។ ក្នុងនោះ ការនាំចូលគ្រឿងបរិក្ខារសំណង់ផ្សេងៗ មានតម្លៃជាង 900លានដុល្លារ ការនាំចូលស៊ីម៉ងត៍មានតម្លៃជាង 100លានដុល្លារ ពោលគឺកើនឡើងពីប្រមាណ 90លានដុល្លារកាលពីឆ្នាំ2018 និងការនាំចូលដែកមានតម្លៃ 500លានដុល្លារ កើនពីចំនួន 300លានដុល្លារក្នុងឆ្នាំ2018។

របាយការណ៍របស់ NBC ក៏បានបង្ហាញដែរថាវិស័យសំណង់ និងអចលនទ្រព្យនៅតែបន្តកើនឡើង ដែលត្រូវបានឆ្លុះបញ្ចាំងពីនិន្នាការនៃការកើនឡើងការនាំចូលសម្ភារសំណង់ និងគម្រោងសាងសង់ដែលបានអនុម័ត។

សម្រាប់ឆ្នាំ2020 នេះ ការនាំចូលគ្រឿសម្ភារសម្រាប់ផ្គត់ផ្គង់ដល់វិស័យសំណង់ ត្រូវបានព្យាករថា នឹងមានតម្លៃប្រមាណជាង 2,300លានដុល្លារ។ ការនាំចូលសម្ភារសំណង់ រួមមានបរិក្ខាសំណង់ផ្សេងៗ ស៊ីម៉ងត៍ និងដែក ត្រូវបានព្យាករថា នឹងនៅតែបន្តកើនឡើងនៅឆ្នាំ2020 ដែលឆ្លុះបញ្ជាំងពីកំណើននៃវិស័យសំណង់នៅកម្ពុជា ខណៈគម្រោងសាងសង់ក្នុងឆ្នាំ2019 មានសម្ទុះកើនឡើងខ្ពស់។

យោងតាមរបាយការណ៍ស្តីពី “វឌ្ឍនភាពម៉ាក្រូសេដ្ឋកិច្ច និងវិស័យធនាគារឆ្នាំ2019 និងទស្សនវិស័យឆ្នាំ2020” របស់ធនាគារជាតិនៃកម្ពុជា បានបញ្ជាក់ថា វិស័យសំណង់នឹងនៅតែជាសសរស្តម្ភមួយនៃការជំរុញកំណើនសេដ្ឋកិច្ចកម្ពុជាសម្រាប់ឆ្នាំ2020។

ធនាគារជាតិនៃកម្ពុជា បានបង្ហាញនៅក្នុងរបាយការណ៍ទស្សនវិស័យឆ្នាំ2020 នេះថា ការនាំចូលបរិក្ខារសំណង់ផ្សេងៗ តំណាងជិត 50% ឬមានទំហំទឹកប្រាក់នាំចូលប្រមាណជិត 1,400លានដុល្លារ។ ចំណែកការនាំចូលស៊ីម៉ងត៍ តំណាងជិត 10% ឬស្មើប្រមាណជិត 200លានដុល្លារ។ ការនាំចូលដែកតំណាងជិត 40% ឬស្មើនឹងតម្លៃសម្រាប់នាំចូលប្រមាណជិត 800លានដុល្លារ។

យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់បានឱ្យដឹងថាគម្រោងសាងសង់មានចំនួនសរុប 4,446គម្រោងនៅក្នុងឆ្នាំ2019 ដែលជាការកើនឡើង 55% បើប្រៀបធៀបទៅនឹងឆ្នាំមុន ខណៈពេលដែលទុនវិនិយោគមានចំនួន 9,3 ពាន់លានដុល្លារ ពោលគឺកើនឡើង 78%។

ឯកឧត្តម ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់មានប្រសាសន៍ថា “វិស័យសំណង់រីកចម្រើន គឺដោយសារតែកំណើនសេដ្ឋកិច្ចល្អ។ ការវិនិយោគភាគច្រើន ចូលមកខេត្តព្រះសីហនុ គឺមកពីប្រទេសចិន។ ការកើនឡើងនៅក្នុងវិស័យសំណង់ គឺផ្តើមចេញពីកំណើនសេដ្ឋកិច្ច និងស្ថិរភាពនយោបាយ”។

គួរជម្រាបដែរថា បច្ចុប្បន្ននេះប្រទេសកម្ពុជាមានរោងចក្រផលិតស៊ីម៉ងត៍ចំនួន5 ដែលអាចផលិតស៊ីម៉ងត៍ បាន8លានតោនក្នុង 1ឆ្នាំ៕

January 15, 2020

តើអ្នកត្រៀមខ្លួនហើយឬនៅដើម្បីស្តែងចេញនូវការតាំងចិត្តដ៏មោះមុតរបស់អ្នក? ក្នុងព្រឹត្តិការណ៍ប្រកួតបាល់ទាត់ដ៏ធំបំផុត Tiger Street Football 2020 បានបើកឆាកប្រកួតនៅប្រទេសកម្ពុជា!

រាជធានីភ្នំពេញ៖ កាលពីថ្ងៃទី ១១ ខែមករា ឆ្នាំ ២០២០ ព្រឹត្តិការណ៍ប្រកួតបាល់ទាត់ Tiger Street Football ឆ្នាំថ្មី ឆ្នាំ២០២០ រដូវកាលទី ៨ បានចាប់ផ្តើម ហើយព្រឹត្តិការណ៍ដ៏អស្ចារ្យនេះបានរៀបចំឡើងនៅតាមបណ្តាប្រទេសនៅតំបន់អាស៊ីដូចជាវៀតណាម ម៉ាឡេស៊ី និងមីយ៉ាន់ម៉ា ជាពិសេសនៅកម្ពុជាយើងដោយការប្រកួតបាល់ទាត់នឹងធ្វើឡើងនៅ៨ខេត្តក្រុងទូទាំងប្រទេស។ ជើងឯកនឹងមានឱកាសប្រកួតផ្ទាល់ជាមួយកំពូលតារាបាល់ទាត់អន្តរជាតិ Rio Ferdinand នៅថ្ងៃប្រកួតផ្តាច់ព្រ័ត្រនៅរាជធានីភ្នំពេញ ចាប់ថ្ងៃទី ២៩ ខែកុម្ភៈ រហូតដល់ថ្ងៃទី ១ ខែ មីនា ២០២០ ខាងមុខនេះ។Tiger Street Football នេះជាឱកាស នេះជាទីលានប្រកួតសំរាប់យុវជនកម្ពុជា ស្តែងចេញនូវការតាំងចិត្តដ៏មោះមុតរបស់អ្នក បង្ហាញមហិច្ឆិតា សេចក្តីក្លាហាន និងទេពកោសល្យដ៏លេចធ្លោតាមរយៈបាល់ទាត់នៅទីនេះ ។Tiger Street Football មិនត្រឹមតែបង្ហាញស្ទីលលេងបាល់ទាត់ដ៏អស្ចារ្យថែមទាំងមានសកម្មភាពសប្បាយរីករាយជាច្រើនទាំងលើទីលាននិងក្រៅទីលានដូចជា ការលេងហ្គេមកម្សាន្ត បាល់ទាត់សប្បាយៗមានការប្រគំតន្រ្តីកាន់តែធំជាងមុនដោយមានការអញ្ជើញចូលរួមសម្តែងពីសំណាក់តារាល្បីៗ រួមជាមួយកម្មវិធីកម្សាន្តសប្បាយៗជាច្រើន កាន់តែរំភើប កាន់តែអស្ចារ្យ ដែលញ៉ាំងឲ្យព្រឹត្តិការណ៍នេះកាន់តែជក់ចិត្ត និងដក់ជាប់អារម្មណ៍ដល់អ្នកទស្សនា។សូមមើលកាលវិភាគប្រកួត និងទស្សនាការផ្សាយផ្ទាល់នៅលើទំព័រហ្វេសប៊ុករបស់យើង!

១១ – ១២ មករា ២០២០ នៅខេត្តកំពង់ស្ពឺ
១៧, ១៨, ១៩ មករា ២០២០ នៅខេត្តសៀមរាប
២៥-២៦ មករា ២០២០ នៅក្រុងប៉ោយប៉ែត
៣១ មករា, ០១-០២ កុម្ភៈ ២០២០ នៅខេត្តបាត់ដំបង
០៨-០៩ កុម្ភៈ ២០២០ នៅខេត្តកំពង់ចាម
១៥-១៦ កុម្ភៈ ២០២០ នៅខេត្តព្រះសីហនុ
២២-២៣ កុម្ភៈ ២០២០ នៅខេត្តតាកែវ
២៦, ២៧, ២៨ កុម្ភៈ ២០២០ នៅកោះពេជ្ររាជធានីភ្នំពេញ
និងការប្រកួតផ្តាច់ព្រ័ត្រនៅខាងមុខបរិវេណសាលមហោស្រពកោះពេជ្រ រាជធានីភ្នំពេញ ថ្ងៃទី ២៩ ខែកុម្ភៈដល់ថ្ងៃទី ០១ ខែមីនា ឆ្នាំ ២០២០ ។Tiger Street Football 2020 គឺជាឆ្នាំទី ៨ នៃព្រឹត្តិការណ៍បាល់ទាត់ដ៏ធំបំផុត ដែលមានក្រុមចូលរួមកាន់តែច្រើន ដោយរំពឹងថា ក្រុមជាង ៦០០ ក្រុមនឹងចូលរួមការប្រកួតវគ្គជម្រុះតាមតំបន់។ ៦៤ ក្រុមកំពូលនឹងចូលរួមការប្រកួតផ្តាច់ព្រ័ត្តជាមួយនឹងក្រុមកំពូលៗ ដើម្បីប្រកួតដណ្តើមយកពានជើងឯកក្នុងវគ្គផ្តាច់ព្រ័ត្តនៅខាងមុខបរិវេណសាលមហោស្រពកោះពេជ្រ រាជធានីភ្នំពេញ ថ្ងៃទី ២៩ ខែកុម្ភៈដល់ថ្ងៃទី ០១ ខែមីនា ឆ្នាំ ២០២០ ។ចំពោះព័ត៌មានលម្អិតបន្ថែមអំពីព្រឹតិ្តការណ៍ Tiger Street Football 2020 និងវិធីចូលរួមព្រឹតិ្តការណ៍ពិសេសនេះ សូមចូលទៅកាន់ទំព័រហ្វេសប៊ុកផ្លូវការ៖ www.facebook.com/TigerBeerKH
ដើម្បីទស្សនាវីដេអូឃ្លីបព្រឹត្តិការណ៍ Tiger Street Football 2020 សូមចូលទៅកាន់៖

តំណលីង៖ ១. https://www.facebook.com/watch/?v=2483957058487846
២. https://www.facebook.com/watch/?v=2214335065536582

សូមពិសាស្រាបៀរថៃហ្គ័រដោយការទទួលខុសត្រូវ

January 15, 2020

ពិធីបុណ្យចូលឆ្នាំចិន

បុណ្យចូលឆ្នាំចិនដែលត្រូវបានគេស្គាល់ថាជាពិធីបុណ្យនិទាឃរដូវនៅក្នុងប្រទេសចិនសម័យទំនើប ឫក៏ជាពិធីបុណ្យចូលឆ្នាំថ្មីរបស់ជនជាតិចិន ដែលជាពិធីបុណ្យដ៏សំខាន់មួយរបស់ជនជាតិចិនទូទាំងពិភពលោក។ នៅក្នុងឆ្នាំ2020នេះ ថ្ងៃបុណ្យចូលឆ្នាំចិន ត្រូវនឹងថ្ងៃទី25-27 ខែមករា និងថ្ងៃសែនចូលឆ្នាំចិន នៅថ្ងៃទី24 ខែមករា។ ពិធីបុណ្យចូលឆ្នាំថ្មីមានអាយុកាលរាប់សតវត្សមកហើយ ដោយសារតែជំនឿ និងប្រពៃណីរបស់ជនជាតិចិនដែលមានតាំងពីយូរលង់ណាស់មកហើយ។ ជាប្រពៃណីពិធីបុណ្យចូលឆ្នាំចិន គឺជាពេលវេលានៃការគោរពបូជាព្រះ និងបុព្វបុរស។ បុណ្យចូលឆ្នាំចិនត្រូវបានប្រារព្ធនៅក្នុងប្រទេសចិន និងតាមបណ្តាប្រទេសដែលមានប្រជាជនចិនរស់នៅ មានដូចជានៅចិនដីគោក តៃវ៉ាន់ ហុងកុង ម៉ាកាវ សិង្ហបុរី ឥណ្ឌូណេស៊ី ម៉ាឡេស៊ី ថៃ វៀតណាម ម៉ូរីស អូស្ត្រាលី ហ្វីលីពីន រួមទាំងប្រទេសកម្ពុជាយើងផងដែរ។ បុណ្យចូលឆ្នាំចិនត្រូវបានគេចាត់ទុកថាជាថ្ងៃឈប់សម្រាកដ៏សំខាន់សម្រាប់ជនជាតិចិន និងអ្នកជាប់សែស្រឡាយចិនទូទាំងពិភពលោក។

នៅក្នុងប្រទេសចិនប្រពៃណីនិងប្រពៃណីក្នុងតំបន់ទាក់ទងនឹងការប្រារព្ធពិធីចូលឆ្នាំចិនមានភាពខុសគ្នាយ៉ាងខ្លាំង។ ជាញឹកញាប់ល្ងាចមុនទិវាចូលឆ្នាំចិនគឺជាឱកាសមួយសម្រាប់ក្រុមគ្រួសារចិនប្រមូលផ្តុំគ្នាសម្រាប់អាហារពេលល្ងាចជួបជុំគ្នាប្រចាំឆ្នាំ។ វាក៏ជាប្រពៃណីសម្រាប់គ្រួសារទាំងអស់ ដូចជាសម្អាតផ្ទះយ៉ាងហ្មត់ចត់ ដើម្បីលុបបំបាត់រាល់សំណាងអាក្រក់ និងដើម្បីបង្កើតឱ្យមានសំណាងល្អ។ បង្អួច និងទ្វារត្រូវបានតុបតែងដោយក្រដាសពណ៌ក្រហម និងបិទអក្សរ “សំណាងល្អ” ឬ “សុភមង្គល” “ទ្រព្យសម្បត្តិ” និង “អាយុយឺនយូរ”។ មានការតុបតែងលម្អផ្ទះបន្ថែមរួមមានភ្លើងបំភ្លឺ ភ្លើងគោម និងអាំងប៉ាវក្រហមជាដើម។ បុណ្យចូលឆ្នាំចិនគឺជាពិធីបុណ្យសំខាន់បំផុតសម្រាប់ជនជាតិចិន ហើយជាទូទៅជនជាតិចិនតែងប្រារព្ធពិធិបុណ្យចូលឆ្នាំចិនរយៈពេល15ថ្ងៃ។ ថ្ងៃចូលឆ្នាំចិនត្រូវបានគេកំណត់ថា ជាថ្ងៃដំបូងនៃខែដំបូងក្នុងប្រតិទិនចិនបុរាណ។ បុណ្យចូលឆ្នាំចិន គឺផ្អែកលើប្រតិទិនភាសាចិនឡាតាំង ដែលកាលបរិច្ឆេទបង្ហាញទាំងដំណាក់កាលព្រះចន្ទ និងពេលវេលានៃឆ្នាំព្រះអាទិត្យ។ ពិធីបុណ្យចូលឆ្នាំចិននេះគឺជាពេលវេលាសម្រាប់ការជួបជុំគ្រួសារ ជាទូទៅមនុស្សម្នានឹងទៅលេងសាច់ញាតិ និងក្រុមគ្រួសារ ហើយក៏ជាការជួបជុំជាមួយនឹងមិត្តភក្តិ ដើម្បីដើរទិញទំនិញមើលកម្មវិធីប្រពៃណីចិន បាញ់កាំជ្រួច និងរៀបចំគម្រោងសម្រាប់ធ្វើនៅឆ្នាំក្រោយជាដើម។

អាហារពេលល្ងាចនៅថ្ងៃចូលឆ្នាំថ្មី គឺជាអាហារពេលល្ងាចដ៏សំខាន់បំផុតសម្រាប់ជនជាតិចិន ជាធម្មតាអាហារពេលល្ងាចជួបជុំគ្រួសារជាពិសេសសម្រាប់អ្នកដែលមានសមាជិកគ្រួសារនៅឆ្ងាយពីផ្ទះ។ ក្នុងអំឡុងពេលអាហារពេលល្ងាច ត្រី និងនំប៉ាវគឺជាអាហារដ៏សំខាន់បំផុតនៅភាគខាងជើងនៃប្រទេសចិន។ អាហារទាំងពីរនេះបង្ហាញពីភាពរុងរឿង ហើយចំណែកអាហារផ្សេងទៀតគឺអាស្រ័យលើចំណង់ចំណូលចិត្តផ្ទាល់ខ្លួន៕

January 15, 2020

ស្រ្តីមានគភ៌ គួរត្រៀមខ្លួនឱ្យបានស្រេច 1ខែមុនដល់ពេលប្រសូត…

នៅសល់ 1ខែទៀតមុនដល់ពេលឆ្លងទន្លេ គឺជាអំឡុងពេលនៃការទន្ទឹងរង់ចាំរបស់ស្ត្រីមានគភ៌គ្រប់ៗរូប ព្រោះទាំងរំភើបចិត្តផង ទាំងត្រេកអរផង ដែលជិតបានឃើញមុខកូនសម្លាញ់ ខណៈពេលជាមួយគ្នា ក៏មានអារម្មណ៍នឹកខ្លាចចំពោះក្តីឈឺចាប់ដែលនឹងកើតមានឡើង ហើយនិងរឿងផ្សេងៗជាច្រើនទៀតដែរ។ ថ្ងៃនេះ ទស្សនាវដ្តី ឡារ៉ែន មានដំបូន្មានល្អៗ ពីគ្រូពេទ្យជំនាញមកជម្រាបអ្នកមានគភ៌លើកដំបូង ដែលនៅមិនទាន់មានបទពិសោធក្នុងរឿងនេះថា តើត្រូវត្រៀមខ្លួនយ៉ាងណាខ្លះមុនដល់ពេលប្រសូត ដូចតទៅ៖

ឈានចូលដល់ខែទី 9 ក្នុងរយ:ពេលនេះ គ្រូពេទ្យនឹងណាត់ឱ្យទៅពិនិត្យគភ៌កាន់តែញឹកញាប់ឡើងរៀងរាល់សប្តាហ៍ ដើម្បីពិនិត្យមើលភាពត្រៀមខ្លួនជាស្រេច និងអាការផ្សេងៗដែលកើតមានឡើងថា តើប្រក្រតី ឬក៏អត់? ក្នុងអំឡុងពេលនេះ ស្ត្រី-មានគភ៌ជិតគ្រប់ខែនឹងមានអាការឈឺរាងធ្ងន់ៗនៅម្តុំក្រោមផ្ចិតនៅពេលដើរ ជើងនឹងហើម មានអារម្មណ៍ឈឺផ្សាៗនៅត្រង់ចុងដង្ហើម ដោយសារតែអាស៊ីតរំលាយអាហារហូរបញ្រ្ចាស់ឡើង ព្រោះទំហំក្បាលពោះដែលធំឡើង ធ្វើឱ្យក្រពះត្រូវបានរុញឡើងមកលើ អាហារមិនសូវរំលាយ ឆ្អល់ណែនពោះ និងជួនកាលអាចត្រូវភ្ញាក់ឡើងកណ្តាលយប់ ព្រោះតែប្រគ្រីវកាច់ជើង រហូតដល់ត្រូវដាស់លោកប្តីឱ្យជួយរឹតជើងឱ្យទៀតផង។

ត្រៀមខ្លួនជាស្រេច… មុនពេលឆ្លងទន្លេការត្រៀមជាស្រេចទាំងរាងកាយ ផ្លូវចិត្ត និងរបស់របរប្រើប្រាស់ផ្សេងៗ នឹងជួយឱ្យស្ត្រីមានគភ៌ទៅប្រសូតបុត្របានយ៉ាងជឿជាក់ក្នុងចិត្ត និងមានអារម្មណ៍ធូរស្រាល តែ… តើត្រូវត្រៀមរឿងអ្វីខ្លះនោះ សូមតាមដានជាបន្ត។

1. មន្ទីរពេទ្យ
– ត្រូវប្រឹក្សាជាមួយគ្រូពេទ្យជានិច្ច បើសិនមានបញ្ហាអ្វីគួរសង្ស័យពាក់ព័ន្ធនឹងគភ៌។
– អាចនឹងត្រូវសាកល្បងជិះរថយន្ត ដើម្បីប៉ាន់ស្មានរយ:ពេលធ្វើដំណើរពីផ្ទះទៅមន្ទីរពេទ្យ ឬរកមើលផ្លូវណាផ្សេងដែលងាយស្រួល និងលឿនជាង ទុកបម្រុងនៅថ្ងៃឈឺពោះប្រសូតជាស្រេច។

2. ត្រៀមរាងកាយ
– ត្រៀមរឿងអាហារការហូបចុក : គួរបរិភោគអាហារណាដែលមានប្រូតេអុីនច្រើន តែបន្ថយអាហារដែលមានរសជាតិខ្លាំងៗ ដូចជាប្រៃខ្លាំង ជូរខ្លាំង ជាពិសេសរសជាតិហឹរ ព្រោះវានឹងធ្វើឱ្យអ្នកមានគភ៌ហើមខ្លួន។ គួរទទួលបន្លែផ្លែឈើរួមជាមួយផង ដើម្បីកាត់បន្ថយអាការណែនឆ្អល់ពោះ។
– គួរញ៉ាំថ្នាំបំប៉នតាមដែលលោកគ្រូពេទ្យឱ្យមកឱ្យបានគ្រប់ : ដូចជា ថ្នាំបំប៉នលោហិត វីតាមីនរួម និងកាល់ស្យូម ព្រោះក្នុងអំឡុងពេលប្រសូត ស្ត្រីមានគភ៌អាចនឹងត្រូវបាត់បង់ឈាមច្រើន ហើយការញ៉ាំថ្នាំបំប៉ននឹងជួយធ្វើឱ្យអ្នកម្តាយថ្មោងថ្មី ឆាប់ស្រួលខ្លួនឡើងវិញផង។
– រកទិញរបស់របរប្រើប្រាស់ចាំបាច់ៗ ទាំងរបស់អ្នកម្តាយ និងរបស់កូនតូច ទុកជាស្រេច ព្រោះក្រោយពេលប្រសូតរួច អ្នកម្តាយថ្មោងថ្មីមិនអាចមានពេលទៅដើររកទិញបានទេ។

3. ត្រៀមប្រសូត
– ក្នុងករណីដែលស្ត្រីមានគភ៌ មិនមានលក្ខណៈខុសប្រក្រតីខាងរាងកាយ ឬខាងវេជ្ជសាស្រ្តណាដែលតម្រូវឱ្យប្រសូតដោយការវះកាត់ទេនោះ អ្នកគួរតែប្រសូតតាមវិធីធម្មជាតិ។
– កំណត់ផែនការក្រោយពេលប្រសូតរួចជាស្រេចថា តើត្រូវពន្យារកំណើត(គ្រាវ)ឬយ៉ាងណា? បើត្រូវពន្យារកំណើត(គ្រាវ) គួរតែប្រាប់គ្រូពេទ្យឱ្យបានដឹងជាមុន ដើម្បីភាពងាយស្រួលក្នុងការត្រៀមខ្លួនរបស់គ្រូពេទ្យ។
4. ត្រៀមចិត្ត ត្រៀមថ្លើម- អ្នកមានគភ៌គ្រប់ខែ ត្រូវត្រៀមខ្លួនទប់ទល់នឹងសភាវសោកសៅក្នុងចិត្ត ដែលអាចកើតឡើងក្រោយពេលប្រសូតរួច ដែលមានដូចជា យំខ្សឹកខ្សួលពេញ1ថ្ងៃ ភ័យខ្លាចប្តីលែងស្រឡាញ់ និងត្រូវបោះបង់ចោល ខ្លាចខ្លួនលែងស្អាតដូចកាលពីពេលមុនជាដើម និងកុំភ្លេចសួរពីវិធីកែបញ្ហានេះជាមួយគ្រូពេទ្យ ដើម្បីទុកប្រត្តិបត្តិតាមផង។

អាការប្រាប់ឱ្យដឹងខ្លួន មុនពេលប្រសូត
1. ឈឺពោះយ៉ាងខ្លាំងជាប់ជានិច្ច រៀងរាល់ 3នាទី និងឈឺម្តងៗប្រហែលជា 40វិនាទី។
2. មានឈាមចេញមកតាមរន្ធស្បូន (បញ្ជាក់: អាការនេះទោះមិនឈឺពោះក៏ដោយ ក៏ត្រូវទៅមន្ទីរពេទ្យដែរ)។ 3. មានទឹកភ្លោះហូរចេញមកតាមរន្ធស្បូន អាការនេះទោះមិនឈឺពោះក៏ដោយ ក៏ត្រូវប្រញាប់ទៅមន្ទីរពេទ្យដែរ ព្រោះថង់ទឹកភ្លោះអាចបែកទៅហើយ បើទុកចោលយូរអាចនឹងធ្វើឱ្យឆ្លងមេរោគបាន។

សភាវជ្រៀតជ្រែកពីរោគផ្សេងៗដែលអាចកើតឡើង
1. មានធ្លាក់ឈាម ជាសភាវដែលសុកធ្លាក់ចុះមកទាប ដោយសុកនឹងរំកិលមកតោងនៅម្តុំមាត់ស្បូន ឬផ្នែកក្រោមរបស់មាត់ស្បូន ធ្វើឱ្យមាត់ស្បូនដាច់រហែក ហើយមានឈាមហូរជ្រាបចេញមក។
2. សម្ពាធឈាមឡើងខ្ពស់ ជាដើមហេតុរបស់សភាវគភ៌មានជាតិពុល នឹងធ្វើឱ្យស្ត្រីមានគភ៌ហើមជើង ហើមមុខ អ្នកខ្លះមានឈឺក្បាលទៀតផង ដែលជាហេតុអាចធ្វើឱ្យស្ត្រីមានគភ៌ប្រកាច់ ឬបែកសរសៃឈាមក្នុងខួរក្បាលបាន។
3. ទារកលែងសូវរើ ដែលអាចមានមូលហេតុមកពីសុកចាប់ផ្តើមធ្វើការខ្សោយ ឬខ្សែទងសុកទៅរុំ-កទារក ដែលករណីនេះ ជាគ្រោះថ្នាក់ចំពោះទារកខ្លាំងណាស់។ ពេលស្ត្រីមានគភ៌ជួបអាការដូចដែលបានរៀបរាប់មកខាងលើនេះ ចូរប្រញាប់ទៅជួបគ្រូពេទ្យភ្លាមជាបន្ទាន់។
នៅពេលរាងកាយត្រៀមរួចរាល់ ចិត្តត្រៀមរួចរាល់… ពេលនេះស្ត្រីមានគភ៌គ្រប់ខែ អាចទៅប្រសូតបុត្រដោយភាពជឿជាក់បានហើយ។ ក្តីឈឺចាប់ដែលកើតឡើងក្នុងពេលប្រសូត នឹងរលាយបាត់អស់ នៅពេលដែលអ្នកម្តាយថ្មោងថ្មីបានឃើញមុខកូនសម្លាញ់ និងក្លាយទៅជាក្តីរំភើបសោមនស្សរីករាយពេញក្នុងចិត្តវិញមិនខាន។

ការត្រៀមសម្ភារសម្រាប់ចូលមន្ទីរសម្ភព
• សម្រាប់អ្នកម្តាយ
1. ប័ណ្ណពិនិត្យសុខភាពគភ៌ និងអត្តសញ្ញាណប័ណ្ណ
2. សំឡីអនាម័យ និងអាវក្នុងសម្រាប់ពាក់បំបៅដោះកូន
3. សម្លៀកបំពាក់អ្នកម្តាយ សម្រាប់ស្លៀកពេលចេញពីមន្ទីរពេទ្យ
4. អាហារ និងភេស្ជជៈ (ព្រោះក្រោយពេលឆ្លងទន្លេរួច អ្នកម្តាយនឹងឃ្លានខ្លាំងណាស់)
5. កូនកាបូបតូចមួយ សម្រាប់ដាក់គ្រឿងសម្អាង
6. កន្សែងជូតមុខ និងកន្សែងពោះគោសម្រាប់ជូតខ្លួន
7. កាមេរ៉ាថតរូប ក្នុងករណីដែលខាងមន្ទីរពេទ្យអាចអនុញ្ញាតឱ្យថតរូបបាន

• សម្រាប់ទារក
1. ក្រណាត់កន្ទប សម្រាប់រុំខ្លួនទារក
2. ខោអាវកូនតូច (សម្រាប់ទារកទើបកើត)
3. ទឹកសាប៊ូសម្រាប់បោកជម្រះផ្សេងៗ
4. កូនខ្នើយសម្រាប់ទ្រាប់ក្បាលកូនពេលបីបំបៅដោះ
5. ក្រណាត់ ឬកន្សែងសម្រាប់រុំខ្លួនកូនពេលត្រឡប់ទៅផ្ទះវិញ៕

January 15, 2020

ក្រសួងកសិកម្មជំរុញឱ្យកសិករបង្កើនផលិតកម្មក្នុងស្រុក ទប់ស្កាត់ការនាំចូល

ក្រសួងកសិកម្មកំពុងចាត់វិធានការ ដើម្បីបង្កើនផលិតភាពចំណីអាហារក្នុងស្រុកបន្ថែមទៀត ក្នុងគោលបំណងកាត់បន្ថយការនាំចូល ដោយសារកសិករក្នុងប្រទេសបាននិងកំពុងតែដាំដំណាំ បន្លែបង្ការជាច្រើនប្រភេទ លើផ្ទៃដីសរុប 58,000ហិកតានៅទូទាំងប្រទេសនៅចុងឆ្នាំ2019 ដែលផ្ទៃដីនេះ ផលិតកសិផលបានប្រមាណ 68%នៃតម្រូវការទីផ្សារក្នុងស្រុក។ នេះបើយោងតាមអ្នកនាំពាក្យនៃក្រសួងកសិកម្ម។

យោងតាមរបាយការណ៍ពីក្រសួងកសិកម្ម ដែលបានជំរុញឱ្យកសិករបង្កើនផលិតកម្ម ដើម្បី ឆ្លើយតបនឹងតម្រូវការក្នុងស្រុកដែលកំពុងកើនឡើងយ៉ាងឆាប់រហ័ស ដោយហេតុថា កាលពីឆ្នាំមុននេះ ប្រជាជនកម្ពុជាបានបរិភោគបន្លែជាមធ្យម 540តោនក្នុង 1ថ្ងៃ។

របាយការណ៍របស់ក្រសួងបានបង្ហាញថា កម្ពុជាអាចផលិតបន្លែបានតែ 400តោនប៉ុណ្ណោះក្នុង 1ថ្ងៃក្នុងឆ្នាំ2018 ដែលមានន័យថា ប្រហែលជា 140តោនទៀតត្រូវនាំចូលរាល់ថ្ងៃ ដែលភាគច្រើនមកពីប្រទេសវៀតណាម ថៃ និងចិន។

ឯកឧត្តម វេង សាខុន រដ្ឋមន្ត្រីក្រសួងកសិកម្មបានមានប្រសាសន៍ថា ផលិតកម្មបន្លែបានកើនឡើងគួរឱ្យកត់សម្គាល់ ក្នុងប៉ុន្មានខែថ្មីៗនេះ ប៉ុន្តែឯកឧត្តមបានបន្ថែមថា ប្រទេសនេះនៅតែពឹងផ្អែកលើការនាំចូល។ ឯកឧត្តមរដ្ឋមន្ត្រីបានអំពាវនាវឱ្យមានការផលិតបន្លែក្នុងស្រុកឱ្យបានច្រើនដែលស្របតាមស្តង់ដារគុណភាព និងសុវត្ថិភាព។

ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ

ឯកឧត្តមបានមានប្រសាសន៍ថា៖ “ដោយសារតែកំណើនសេដ្ឋកិច្ចខ្លាំង ការកើនឡើងនៃជីវភាពរស់នៅ និងការហូរចូលនៃភ្ញៀវទេសចរ តម្រូវការបន្លែមានគុណភាព និងបន្លែសុវត្ថិភាពកំពុងតែកើនឡើងយ៉ាងឆាប់រហ័ស”។

យោងតាមរបាយការណ៍ របស់អគ្គនាយកដ្ឋានកសិកម្មបានឱ្យដឹងថា ផលិតផលបន្លែមិនមែនផលិតក្នុងស្រុក ភាគច្រើននាំចូលមកពីប្រទេសវៀតណាម និងថៃ។ បន្លែប្រមាណ 85តោនត្រូវបាននាំចូលពីប្រទេសវៀតណាម និង 44តោននាំចូលពីប្រទេសថៃក្នុង 1ថ្ងៃ។ តួលេខនេះគ្របដណ្តប់ តែលើខេត្តចំនួន8 និងរាជធានីភ្នំពេញមួយ តែប៉ុណ្ណោះ។

លោក ស្រី វុទ្ធី អ្នកនាំពាក្យក្រសួងកសិកម្មបានមានប្រសាសន៍ថា៖“យើងបានដាក់ចេញនូវផែនការដើម្បីជំរុញការដាំបន្លែនៅក្នុងប្រទេសរបស់យើង ដើម្បីផ្គត់ផ្គង់ទីផ្សារក្នុងស្រុក ហើយជាមួយនឹងចលនានេះ យើងសង្ឃឹមថា ការនាំចូលបន្លែពីប្រទេសជិតខាងនឹងថយចុះបន្តិចម្តង”។

អ្នកនាំពាក្យរូបនេះបានឱ្យដឹងបន្តទៀតថា៖“ការផ្លាស់ប្តូរនេះនឹងជួយឱ្យមានតុល្យភាពនៃការទូទាត់របស់ប្រទេសកម្ពុជា ដែលបច្ចុប្បន្នមើលឃើញការនាំចូល ច្រើនជាងការនាំចេញ។ នៅឆ្នាំ2023 ខ្ញុំចង់ឱ្យផ្ទៃដីនេះកើនឡើងដល់ 63,000ហិកតា គឺប្រមាណ76%”។

លោកបានបញ្ជាក់ដែរថា ការនាំចូលពីប្រទេសវៀតណាមក្នុងរដូវផលិតកម្មទាប នឹងមានតម្រូវការកើនឡើងយ៉ាងខ្លាំង នៅពេលដែលការផ្គត់ផ្គង់ក្នុងស្រុក មិនអាចឆ្លើយតបនឹងតម្រូវការបាន។

សូមរំឭកថា កាលពីខែកញ្ញា ឆ្នាំ2017 គម្រោងរបស់រដ្ឋាភិបាលក្នុងការជំរុញការផលិតបន្លែគ្មានជាតិគីមី បានចាប់ផ្តើមដំណើរការ។

គម្រោងនេះមានឈ្មោះថា គម្រោងជំរុញអាហារ និងផលិតកម្មបន្លែគ្មានជាតិគីមី ដែលមានថវិកា 20លានដុល្លារ។ គម្រោងនេះត្រូវបានអនុវត្តនៅក្នុងខេត្តតាកែវ កណ្តាល ព្រៃវែង កំពង់ស្ពឺ កំពង់ចាម ពោធិ៍សាត់ កំពង់ឆ្នាំង បាត់ដំបង សៀមរាប និងខេត្តត្បូងឃ្មុំ។

លោក ស្រី វុទ្ធី អ្នកនាំពាក្យក្រសួងកសិកម្មបានឱ្យដឹងថា គម្រោងជំរុញផលិតកម្មនេះបានទទួលផ្លែផ្ការួចទៅហើយ ក្នុងការបង្កើនផលិតកម្មបន្លែក្នុងស្រុក និងជួយកាត់បន្ថយការនាំចូល។

លោកបានមានប្រសាសន៍ថា៖“ក្នុងរយៈពេល 5ឆ្នាំខាងមុខនេះ យើងមានគម្រោងបង្កើនផលិតកម្មបន្លែប្រហែល 20-30%ថែមទៀត។ យើងកំពុងផ្តោតលើការកសាងហេដ្ឋារចនាសម្ព័ន្ធធារាសាស្ត្រ ដូច្នេះយើងអាចនឹងផលិតបន្លែបានពេញ 1ឆ្នាំ”។

លោក យ៉ង់ សាំងកុមារ អ្នកជំនាញផ្នែកកសិកម្មបានមានប្រសាសន៍ថា រដ្ឋាភិបាលគួរតែពិចារណាលើការរឹតត្បិតការនាំចូលបន្លែក្នុងរដូវប្រមូលផល ដែលនឹងជួយការពារផលចំណេញរបស់កសិករ និងការពារការបោះចោលផលិតផលរបស់ពួកគេ ដោយសារតែសម្បូរពោរពាស និងតម្លៃផលិតផលធ្លាក់ចុះខ្លាំងដែលបណ្តាលឱ្យកសិករខាតបង់។

លោកត្រូវបានដកស្រង់សម្តីថា៖“នៅរដូវច្រូតកាត់ រដ្ឋាភិបាលគួរតែរារាំងការនាំចូលបន្លែពីទីផ្សារបរទេសក្នុងរយៈពេលខ្លី ដើម្បីរក្សាបន្លែរបស់កសិករក្នុងស្រុកឱ្យរួចផុតពីបញ្ហាទីផ្សារ។ ការពិតរដ្ឋាភិបាលអាចរារាំងប្រភេទបន្លែមួយចំនួនពីទីផ្សារបរទេស ក្នុងរយៈពេលខ្លីដើម្បីការពារផលប្រយោជន៍កសិករក្នុងតំបន់”។

ជាមួយគ្នានេះដែរ ក្រសួងកសិកម្ម រុក្ខាប្រមាញ់ និងនេសាទ កំពុងបន្តរៀបចំយន្តការជំរុញឱ្យកសិករអនុវត្តកសិកម្មឱ្យបានល្អ និងឱ្យកាន់តែច្រើន ដើម្បីចូលរួមកាត់បន្ថយការនាំចូលបន្លែពីក្រៅប្រទេស និងបន្លែដែលមានផ្ទុកជាតិគីមី ដែលធ្វើឱ្យប៉ះពាល់សុខភាព ខណៈពេលដែលប្រជាពលរដ្ឋកំពុងព្រួយបារម្ភពីកម្រិតជាតិពុលនៅក្នុងបន្លែនាពេលបច្ចុប្បន្ននេះ។

តាមការសិក្សាស្រាវជ្រាវរបស់អង្គការសហប្រតិបត្តិការអន្តរជាតិដើម្បីការអភិវឌ្ឍ បាន បង្ហាញថា95% នៃអ្នកប្រើប្រាស់ ព្រួយបារម្ភពីកម្រិតជាតិគីមីនៅក្នុងបន្លែ ទាំងបន្លែផលិតនៅក្នុងស្រុក និងបន្លែនាំចូលពីប្រទេសជិតខាង។

ក្នុងនោះដែរ ក្រសួងកសិកម្ម បានជំរុញធ្វើយ៉ាងណា គឺត្រូវចងក្រងបងប្អូនប្រជាកសិករដែលដាំបន្លែគ្មានជាតិគីមីនេះឱ្យក្លាយទៅជាសហគមន៍ និងឱ្យមានការកើនឡើងក្នុងខេត្តគោលដៅទាំង11 ដែលក្នុងនោះ យើងបានបញ្ចូលនូវបច្ចេកវិទ្យា ជាពិសេសការអនុវត្តកសិកម្មល្អ ជាបន្លែផ្លែឈើ GAP (ការអនុវត្តកសិកម្មល្អ)សំដៅធ្វើយ៉ាងណាជួយជំរុញ និងបង្កើនចំណេះដឹងដល់បងប្អូនប្រជាកសិករ ក្នុងកិច្ចការជាបន្តបន្ទាប់”៕

January 15, 2020

ផលិតផល SME ត្រូវការការជួយពីរដ្ឋាភិបាល ខណៈបញ្ហាប្រឈម គឺការប្រកួតប្រជែង

កាលពីដំណាច់ឆ្នាំ2019 សម្ដេចតេជោនាយករដ្ឋមន្ត្រី ហ៊ុន សែន បានចង្អុលបង្ហាញថា គោលនយោបាយឧស្សាហកម្មរបស់កម្ពុជា គឺទាក់ទាញការវិនិយោគលើវិស័យចំនួន2 ជាអាទិភាព គឺកែច្នៃកសិផល និងឧស្សាហកម្មប្រើជំនាញខ្ពស់។

ការលើកឡើងរបស់ប្រមុខរដ្ឋាភិបាលបែបនេះ បានធ្វើឡើងនៅក្នុងពិធីប្រគល់សញ្ញាបត្រដល់និស្សិតនៃសាកលវិទ្យាល័យនីតិសាស្ត្រ និងវិទ្យាសាស្ត្រសេដ្ឋកិច្ច។

សម្ដេច ហ៊ុន សែន បានមានប្រសាសន៍ថា ៖“គោលនយោបាយឧស្សាហកម្មរបស់យើងបន្ត គឺយើងចង់ទាក់ទាញលើផ្នែក 2សំខាន់។ ទី1-ឧស្សាហកម្មកែច្នៃផលិតផលកសិកម្ម ដែលមិនទាមទារទុនធំពេកទេ សហគ្រាសធុនតូច និងមធ្យមត្រូវដំណើរការ ទាំងអ្នកក្នុងស្រុក និងអ្នកក្រៅស្រុក”។

សម្ដេចតេជោនាយករដ្ឋមន្ត្រីបន្តថា៖“រីឯការចង់បានទី2 គឺការវិនិយោគទៅលើឧស្សាហកម្មបច្ចេកវិទ្យា ទោះបីជាយើងនៅរក្សាឧស្សាហកម្មអតិពលកម្ម ដែលប្រើកម្លាំងច្រើន ដូចជាវិស័យកាត់ដេរ ប៉ុន្តែបើយើងនៅទ្រឹងប៉ុណ្ណឹង ទៅមិនរួចទេ អ៊ីចឹងត្រូវទាញយកឧស្សាហកម្មជំនាញខ្ពស់បន្ថែមទៀត”។

ប្រមុខរដ្ឋាភិបាល និងរបាយការណ៍របស់ធនាគារពិភលោក ដែលបានចេញផ្សាយកន្លងមកបានលើកឡើងដូចគ្នា គឺកម្ពុជាកំពុងមានភាពទាក់ទាញខ្លាំងខាងការវិនិយោគ រោងចក្រឧស្សាហកម្មមិនមែនកាត់ដេរ ដូចជាឧស្សាហកម្មដំឡើងយានយន្ត គ្រឿងផ្គុំអេឡិចត្រូនិក គ្រឿងបន្លាស់ ជាដើម ពិសេសការ-វិនិយោគពីក្រុមហ៊ុនជប៉ុន។

ប៉ុន្មានឆ្នាំចុងក្រោយនេះ ការនាំចេញឧស្សាហកម្មប្រភេទនេះ បានកាន់កាប់ទំហំនាំចេញរបស់កម្ពុជាកាន់តែធំ ដែលមានប្រមាណ10% នៃការនាំចេញសរុប បើធៀបនឹងទំហំមិនដល់ 2%ផងនៅឆ្នាំ2010។ ប៉ុន្តែបើតាមធនាគារពិភពលោក កម្ពុជាត្រូវពង្រឹងធនធានមនុស្ស កែលម្អបរិយាកាសធុរកិច្ច និងបញ្ចុះថ្លៃដើមផលិតកម្ម ដើម្បីភាពទាក់ទាញការវិនិយោគទាំងនោះ។

លោកឧកញ៉ា លឹម ហេង បានប្រាប់ឡារ៉ែនពាណិជ្ជថា សហគ្រាសធុនតូច និងមធ្យម(SME) សព្វថ្ងៃកំពុងប្រឈមបញ្ហាផលិតភាព ដែលពិបាកនឹងប្រកួតប្រជែងជាមួយនឹងផលិតផលនាំចូល។ ព្រោះថា សេដ្ឋកិច្ចយើងស្ថិតក្នុងបរិបទទីផ្សារសេរី និងសហគមន៍សេដ្ឋកិច្ចអាស៊ានផងនោះ បើមិនអាចផលិតឱ្យមានភាពប្រកួតប្រជែងទេ SMEយើងទោះចង់មិនចង់ក៏ត្រូវប្រឈមបញ្ហាដែរ។ តែជាមួយគ្នានេះ រដ្ឋាភិបាលត្រូវគាំទ្រដល់ SME ដើម្បីពង្រឹងការផលិតឱ្យមានភាពប្រកួតប្រជែង។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានមានប្រសាសន៍ថា៖“ រដ្ឋាភិបាលមិនអាចបិទការនាំចូលបានទេ ព្រោះថា ជារបបទីផ្សារសេរី គឺយើងជាបណ្តាប្រទេសស្ថិតក្នុងសហគមន៍សេដ្ឋកិច្ចអាស៊ាន ទំនិញឆ្លងកាត់មិនត្រូវបានគិតពន្ធទៀត ដូច្នេះវាជាការប្រកួតប្រជែងមួយដែលយើងចាំបាច់ត្រូវតែប្រឈម។ ម្យ៉ាងទៀត SME យើងសព្វថ្ងៃ ដែលប្រកួតប្រជែងជាមួយគេ គឺផ្នែកបច្ចេកវិទ្យា មិនទាន់ទំនើបដូចគេ និងថ្លៃដើមនៅមានបញ្ហា។ នេះគឺជាអ្វីដែលយើងកំពុងប្រឈម និងជាបញ្ហាពិបាកសម្រាប់យើង។

បើយោងតាម ម្ចាស់សហគ្រាសមួយចំនួនក្នុងប្រទេសកម្ពុជា និងសម្រាប់ផ្គត់ផ្គង់ក្នុងស្រុកនោះបានឱ្យដឹងថា បញ្ហាប្រឈមរបស់សហគ្រាស ពេលបច្ចុប្បន្ននេះ គឺការប្រកួតប្រជែងទីផ្សារជាមួយទំនិញនាំចូលពីបរទេស ព្រោះអីទំនិញគេលើទីផ្សារ មានតម្លៃទាបជាងទំនិញរបស់អ្នកផលិតក្នុងស្រុកយើង ហើយអ្នកប្រើប្រាស់ចង់បានទំនិញណាដែលមានតម្លៃទាបចំពោះអាទិភាពមុនគេ ព្រោះពលរដ្ឋខ្មែរភាគច្រើន គាត់មើលទៅលើតម្លៃ បើសិនជាតម្លៃទាបគាត់ត្រូវជ្រើសរើសយកទំនិញណាដែលមានតម្លៃទាបជាមុនសិន។ តែចំពោះអ្នកដែលគិតគូរពីគុណភាព និងសុខភាពខ្លួនឯង គេត្រូវពិនិត្យមើលទៅគុណភាពទំនិញ។

ម្យ៉ាងទៀត ទំនិញដែលនាំចូល គឺមានតម្លៃទាបជាងទំនិញក្នុងស្រុក ព្រោះការផលិតរបស់គេចំណាយថ្លៃដើមតិចជាងផលិតផលក្នុងស្រុក ដូច្នេះគេអាចលក់លើទីផ្សារក្នុងតម្លៃទាបជាងផលិតផលយើងបាន តែបើសិនជាយើងលក់ទាបដូចគេដែរនោះ អាជីវកម្មយើងនឹងដួលរលំ។

លោកឧកញ៉ា លឹម ហេង បានមានប្រសាសន៍បន្ថែមថា សម្រាប់ការទទួលឥណទាន ក៏គ្នា (SME) មិនទាន់ទទួលបាននៅឡើយដែរ ព្រោះថា ការ-ទទួលបានកម្ចីពីធនាគារពាណិជ្ជមួយចំនួន ក៏ការប្រាក់ខ្ពស់ដែរ ដែលធ្វើឱ្យថ្លៃដើមកើនឡើងខ្ពស់ ប៉ុន្តែយើងអាចជួយកាត់បន្ថយថ្លៃដើមគាត់បាន។ នេះគឺជាអ្វីដែលលោកឧកញ៉ាបានសំដៅទៅលើសហគ្រាសធុនតូច និងមធ្យម ដែលត្រូវការការគាំពារ ការពារនិងឧបត្ថម្ភធនច្រើនណាស់ ដើម្បីឱ្យគាត់អាចប្រកួតប្រជែងជាមួយបណ្តាប្រទេសអាស៊ានបាន។

លោកឧកញ៉ាលឹម ហេង បានបញ្ជាក់ថា៖“ខ្ញុំក៏បានមើលឃើញដែរថា រាជរដ្ឋាភិបាលកម្ពុជាបានជួយដល់(SME)ច្រើនហើយ ទាំងក្រសួងឧស្សហកម្ម និងសិប្បកម្មក៏បានរៀបចំសម្រាប់ឱ្យ SME មានដំណើរការថ្ងៃខាងមុខបានល្អដែរ ព្រោះធនាគារ SME ដែលសម្តេចហ៊ុន សែនផ្តល់ទុន ក៏បានបង្កើតហើយ នៅតែដំណើរការប៉ុណ្ណោះ”។

លោកឧកញ៉ាបានបញ្ជាក់ទៀតថា៖“ខ្ញុំគិតថា ជាពិសេសការទទួលវិនិយោគពីខាងក្រៅ វាជាការចូលរួម ផ្នែកបច្ចេកទេស ដែលបច្ចុប្បន្នយើងឃើញថា ខាងបច្ចេកវិទ្យាក្នុងឧស្សាហកម្មកាត់ដេរ ដែលបាននាំបច្ចេកវិទ្យាឱ្យខ្មែរយើងចេះ ដូច្នេះបញ្ហារបស់ SME បើមានការវិនិយោគពីបណ្តាប្រទេសជិតខាង ដែលគេមានបច្ចេកវិទ្យាទំនើប គេមានបទពិសោធ នេះជាការចម្លងបច្ចេកវិទ្យាទំនើបដល់យើង ដែលនឹងអាចឱ្យយើងពង្រឹងខ្លួនបានដែរ។

ជាមួយគ្នានេះសហគ្រាសខ្លួនឯង ត្រូវពង្រឹងធនធានមនុស្ស និងធ្វើទំនើបកម្មការផលិត ដោយមិនត្រូវផលិតបែបលក្ខណៈសិប្បកម្មគ្រួសារនោះទេ”។

ម្យ៉ាងទៀតក្នុងការជួយពង្រឹងSME នេះ លោកឧកញ៉ាអនុប្រធានសភាពាណិជ្ជកម្មកម្ពុជា បានជំរុញឱ្យមានការបង្កើតតំបន់សហគ្រាសធុនតូច និងមធ្យមពិសេស នៅទូទាំងប្រទេស។

លោកឧកញ៉ាបញ្ជាក់ថា ការប្រមូលផ្ដុំ SME បែបនេះ នឹងទាក់ទាញការផ្ដល់កម្ចីពីធនាគារ បង្កភាពងាយស្រួលក្នុងការ-បណ្ដុះបណ្ដាល ហើយរដ្ឋត្រូវតភ្ជាប់បណ្ដាញហេដ្ឋារចនាសម្ព័ន្ធផ្សេងៗចូលក្នុងតំបន់ទាំងនោះ ព្រមជាមួយគោលនយោបាយគាំទ្រនានា។

លោកឧកញ៉ាលឹម ហេង បានបន្តយ៉ាងដូច្នេះទៀតថា៖“ប្រសិនបើមានការយកចិត្តទុកដាក់ពីធនាគារ SME របស់សម្តេចតេជោ ដែលបង្កើតឡើងដើម្បីផ្តល់ប្រាក់កម្ចី នឹងចូលរួមដោះស្រាយបន្ទុកបានមួយផ្នែក ទោះបីមិនបានទាំងស្រុងក៏ដោយ ក៏ជាចំណែកមួយ ជួយលើកទឹកចិត្តដល់សហគ្រាសធុនតូច និងមធ្យមដែរ។ ខ្ញុំគិតថា បើមានការលើក-ទឹកចិត្តទាំងថវិកា ទាំងគោលនយោបាយទាំងការគាំពារ យើងនឹងអាចចូលរួមប្រកួតប្រជែងជាមួយគេបាន”៕

January 14, 2020

វាយកូនមិនមែនជាវិធីបង្រៀនរបស់អាណាព្យាបាលឆ្លាតវៃនោះទេ

អាណាព្យាបាលភាគច្រើនតែងតែបង្រៀនកូន ឬអប់រំកូនដោយការវាយ និងការគំរាមដើម្បីឱ្យកូនឈប់ធ្វើរឿងទាំងឡាយណាដែលពួកគាត់គិតថាមិនត្រឹមត្រូវ។ ការធ្វើបែបនេះ ត្រូវបានគេរកឃើញថាជាវិធីមិនត្រឹមត្រូវដែលអាចជះផលអវិជ្ជមានដល់កូនៗនៅថ្ងៃអនាគត ដូចជាធ្វើឱ្យកូនមានភាពភ័យខ្លាចច្រើន ខ្វះភាពជាអ្នកដឹកនាំ និងមិនហ៊ានសម្រេចចិត្តលើបញ្ហាសំខាន់ៗក្នុងជីវិតជាដើម។

ខាងក្រោមនេះជាវិធីមួយចំនួនសម្រាប់អាណាព្យាបាលដើម្បីអប់រំកូនៗកុំឱ្យធ្វើខុស និងស្គាល់ពីកំហុសខ្លួនឯង។

១. ប្រាប់ហេតុផលឱ្យបានច្បាស់លាស់ ជាទូទៅក្មេងដែលធ្វើខុសគឺបណ្តាលមកពីពួកគេមិនយល់ពីហេតុផល និងផលប៉ះពាល់នៃទង្វើរបស់ខ្លួន។ មានក្មេងខ្លះមិនទាំងដឹងថាហេតុអ្វីបានជាអាណាព្យាបាលវាយ ឬជេរស្តីលើរូបគេផង ព្រោះគេមិនដឹងថាសកម្មភាពដែលគេកំពុងធ្វើនេះជាអំពើខុសឆ្គងនោះទេ។ ជម្រើសល្អបំផុតសម្រាប់អាណាព្យាបាល គឺឧស្សាហ៍បង្រៀនកូនៗពីហេតុ និងផលនៃសកម្មភាពដែលខុសឆ្គង រួមទាំងបង្ហាញផ្លូវដែលល្អដល់កូនៗដើម្បីជាជម្រើសសម្រាប់ពួកគេ។

ជាធម្មតានៅពេលដែលពួកគេយល់ច្បាស់ពីហេតុផលហើយ ក្មេងៗឆាប់ទទួលយកបំផុត នៅពេលនោះគេនឹងស្អប់អំពើអាក្រក់ ហើយថែមទាំងហ៊ានប្រដៅដល់មនុស្សចាស់ថែមទៀតផង នៅពេលដែលមនុស្សធំនោះភ្លេចខ្លួនធ្វើរឿងរ៉ាវណាដែលខុសឆ្គង។ បើកូនរបស់អ្នកស្ថិតក្នុងស្ថានភាពចាស់ទុំបែបនេះអ្នកប្រាកដជាលែងចង់វាយ ឬសម្លុតទៀតហើយ។

២. ត្រូវចេះលើកទឹកចិត្ត កុំចេះតែចាប់កំហុស អាណាព្យាបាលជាច្រើនគិតថា ការមិនសូវធ្វើល្អដល់កូនគឺកុំឱ្យកូនស្គាល់ចិត្ត ឬកុំឱ្យកូនបានចិត្តជាដើម។ ហេតុនេះនៅពេលដែលកូនធ្វើល្អ គាត់មិនបានបង្ហាញពីការគាំទ្រដល់កូននោះទេ តែនៅពេលដែលកូនធ្វើខុសគាត់បែរជាដាក់ពិន័យយ៉ាងធ្ងន់ធ្ងរទៅវិញ។ ទង្វើបែបនេះ អាចធ្វើឱ្យអាណាព្យាបាលបង្រៀនកូនបានតែរូបភាពខាងក្រៅប៉ុណ្ណោះ កូនៗអាចគ្រាន់តែខ្លាច តែមិនគោរពនោះទេ។

រាល់សកម្មភាពមិនល្អគេគ្រាន់តែផ្អាកមួយរយៈនៅពេលដែលអាណាព្យាបាលស្ថិតនៅចំពោះមុខពួកគេ ហើយលួចធ្វើវិញនៅពេលដែលយើងមិននៅ។ចំណុចសំខាន់ដែលគួរធ្វើគឺ ចេះលើកទឹកចិត្តនៅពេលដែលកូនបានធ្វើល្អ ដើម្បីឱ្យពួកគេរក្សាបាននូវទង្វើទាំងអស់នោះ ហើយបង្រៀនពួកគេឱ្យស្គាល់ពីកំហុស និងហ៊ាននិយាយដោយត្រង់ថាទង្វើណាដែលមិនគួរធ្វើ ឬសកម្មភាពណាដែលយើងនឹងដាក់ពិន័យដល់ពួកគេប្រសិនបើគេធ្វើដដែលៗ។

៣. ធ្វើជាគំរូល្អដល់កូន អាណាព្យាបាលភាគច្រើនសម្លុតកូន នៅពេលដែលឃើញកូនប្រើសម្តីមិនល្អដាក់អ្នកដទៃ តែភ្លេចថាកូនចេះការប្រើភាសាមិនល្អនេះពីខ្លួនឯង ហេតុនេះ ដើម្បីមិនឱ្យកូនមានចំណុចខុសឆ្គងច្រើន អាណាព្យាបាលត្រូវកាត់បន្ថយកំហុសឆ្គងរបស់ខ្លួនឱ្យបានជាមុនសិន៕

January 14, 2020

ភាពយន្តតុក្កតាមួយចំនួនកំពុងបំផ្លាញក្មេងៗ ដែលអាណាព្យាបាលនឹកស្មានមិនដល់

អាណាព្យាបាលមួយចំនួនធំបានបណ្តោយឱ្យកូនតូចៗនៅជាមួយឧបករណ៍អេឡិចត្រូនិក ឬបណ្តោយកុមារតូចៗឱ្យមើលរឿងតុក្កតាដោយរំពឹងថា អាចនឹងធ្វើឱ្យពួកគេឆ្លាតជាងមុន តែថ្មីៗនេះមានអ្នកជំនាញខាងចិត្តវិទ្យាកុមារបានរកឃើញថា មានរឿងតុក្កតាមួយចំនួនកំពុងបំផ្លាញក្មេងៗទៅវិញ។

យោងតាមគេហទំព័រ novakdjokovicfoundation.org ដែលជាគេហទំព័រនិយាយអំពីការអប់រំ និងអំពើហិង្សាបានបង្ហាញថា ក្មេងៗជាច្រើនលើពិភពលោក កំពុងងប់ងល់ជាមួយនឹងរឿងតុក្កតាខណៈរឿងតុក្តតាទាំងអស់នោះមានបង្កប់ដោយអំពើហិង្សា និងគំរូអាក្រក់ជាច្រើនដល់ពួកគេ។ ខាងក្រោមនេះជារឿងតុក្កតាមួយចំនួនដែលត្រូវបានគេរកឃើញភាពអវិជ្ជមានជាច្រើន។

១. រឿងឆ្មា និងកណ្តុរ (Tom and Jerry)

អាណាព្យាបាលជាច្រើនប្រហែលជាមិននឹកស្មានដល់ទេថា រឿងតុក្កតាកំប្លុកកំប្លែង Tom and Jerry ដែលសូម្បីតែមនុស្សធំក៏ចូលចិត្តដែរនោះ ជារឿងដែលបង្កប់ដោយហិង្សា។ ក្នុងវគ្គជាច្រើនរបស់រឿងឆ្មា និងកណ្តុរបានបង្ហាញពីឈុតឆាកវាយប្រហារ រួមទាំងការដោះស្រាយបញ្ហាដោយការសងសឹកគ្នាទៅវិញទៅមក។

នៅពេលដែលក្មេងៗបានមើលរឿងនេះហើយ ពួកគេអាចនឹងយកគំរូតាម ដោយប្រើប្រាស់ហិង្សាដើម្បីទាមទារនូវអ្វីដែលគេចង់បាន ឬដើម្បីយកឈ្នះលើក្មេងដទៃទៀតដែលមានគំនិតមិនស្របជាមួយនឹងខ្លួន។

២. រឿង Pokemon

Pokemon ជារឿងដែលបានបង្កើតឡើងដោយផលិតករ Satoshi Tajiri នៅក្នុងឆ្នាំ 1995។ តាមពិតទៅរឿងនេះមានចំណងជើងពីដំបូងគឺ “Pocket Monster” តែក្រោយមកគឺត្រូវបានហៅកាត់មកត្រឹម Pokemon វិញ។

រឿងមួយនេះត្រូវបានរដ្ឋាភិបាលជប៉ុនបញ្ឈប់ការចាក់ផ្សាយ បន្ទាប់ពីមានក្មេងៗជាច្រើនត្រូវចូលមន្ទីរពេទ្យនៅក្នុងឆ្នាំ 1997 ដោយសារតែបញ្ហាភ្លើង Flash ពណ៌ក្រហម និងពណ៌ខៀវនៅក្នុងវគ្គខ្លះរបស់រឿងតុក្កតានេះដែលធ្វើឱ្យក្មេងៗមានបញ្ហាភ្នែក។

ទូរទស្សន៍ជាច្រើនបានបញ្ឈប់ការចាក់ផ្សាយរឿងមួយនេះបន្ទាប់ពីមានការប្រកាសអាសន្នថាបានប៉ះពាល់ដល់សុខភាពភ្នែករបស់ក្មេងៗ តែនៅកម្ពុជា រឿងតុក្កតាមួយនេះនៅតែមានវត្តមាននៅឡើយក្នុងបណ្តាញ YouTube និងបណ្តាញសង្គម ដែលអ្នកខ្លះបានយកមកបង្ហោះសាឡើងវិញ។

៣. រឿង Oggy and the Cockroaches

Oggy and the Cockroaches ជាប្រភេទរឿងតុក្កតាភាគថ្មីមួយទៀតដ៏មានប្រជាប្រិយភាពដែលគ្រប់គ្នាសុទ្ធតែដឹងថា មានលក្ខណៈស្រដៀងនឹងរឿងឆ្មា និងកណ្តុរដែរ។

រឿងមួយនេះ វគ្គខ្លះក៏បានបង្ហាញដល់ក្មេងៗនូវគុណវិបត្តិផងដែរ តាមរយៈឈុតឆាកអវិជ្ជមានមួយចំនួនដែលក្មេងៗមិនគួរធ្វើតាម ឬធ្វើឱ្យក្មេងៗក្លាយជាមនុស្សខូច ហើយទន្ទឹមនឹងនោះ នៅមានវគ្គខ្លះទៀតសុទ្ធសឹងតែជាសកម្មភាពហិង្សា ដែលអាចប៉ះពាល់ដល់ការគិតរបស់កុមារ។

រឿងមួយនេះបានបង្ហាញផងដែរអំពីការពួនស្ទាក់ដើម្បីដណ្តើមរបស់របរគ្នា រួមជាមួយនឹងការប្រើល្បិចជាច្រើនដើម្បីបំផ្លាញគ្នា។ ហេតុនេះអាណាព្យាបាលគួរពិចារណាឱ្យបានច្បាស់មុននឹងអនុញ្ញាតឱ្យកូនៗមើលរឿងតុក្កតាណាមួយនោះ៕

January 14, 2020

កម្ពុជាបានត្រៀមរួចរាល់សម្រាប់អចលនទ្រព្យនៅឆ្នាំ2020

កាលពីឆ្នាំ2019 កន្លងទៅ ទីផ្សារអចលនទ្រព្យនៅកម្ពុជាបានកើនឡើងខ្លាំងដោយសារតែតម្រូវការទាំងអ្នកទិញក្នុងស្រុក និងអន្តរជាតិតាមប្រភេទអចលនទ្រព្យផ្សេងៗគ្នា ហើយសម្រាប់ឆ្នាំថ្មី2020នេះ សួរថា តើកម្ពុជាបានត្រៀមរួចរាល់ហើយឬនៅ?។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា(CVEA) បានមើលឃើញថា វិស័យអចលនទ្រព្យនៅកម្ពុជាបានបង្ហាញពីភាពរឹងមាំរបស់ខ្លួនជាបន្តបន្ទាប់ ជាពិសេសក្នុងរយៈពេល 4-5ឆ្នាំចុងក្រោយនេះ ដោយមានកំណើនជាមធ្យមក្នុងរង្វង់ពី 15-20% ជារៀងរាល់ឆ្នាំ។ ភាពរឹងមាំនេះបណ្តាលមកពីកត្តាសំខាន់ៗមួយចំនួនដូចជា កត្តាស្ថិរភាពនយោបាយ កំណើនសេដ្ឋកិច្ច កំណើនប្រាក់ចំណូលប្រជាជនក្នុងស្រុក កំណើនការវិនិយោគផ្ទាល់ពីបរទេស និងជាប្រទេសស្ថិតនៅចំកណ្តាលតំបន់អាស៊ាន។

លោក ច្រឹក សុខនីម បានមានប្រសាសន៍ថា៖“ខ្ញុំមិនបានមើលឃើញពីសញ្ញានៃការធ្លាក់ចុះនៃវិស័យអចលនទ្រព្យនៅកម្ពុជាទេនាពេលនេះ ដោយកំណើននេះនឹងបន្តកើនក្នុងរយៈពេលយ៉ាងតិច 5-10ឆ្នាំទៅមុខទៀត ដោយហេតុថា កំណើនថ្មីៗនេះ មិនមែនមានត្រឹមតែតួលេខនៃការបណ្តាក់ទុនវិនិយោគប៉ុណ្ណោះទេ ប៉ុន្តែសកម្មភាពនៃការទិញ-លក់ និងសាងសង់ គឺឡើងព្រមគ្នា”។

លោកប្រធាន CVEA ក៏បានមើលឃើញពីកំណើនគួរឱ្យកត់សម្គាល់នៃសកម្មភាពទិញ-លក់នៅក្នុងគម្រោងលំនៅឋាន និងការិយាល័យ។ ទីផ្សារអចលនទ្រព្យបានរីកចម្រើនគ្រប់ទីកន្លែងពី 10% ទៅ 15%នៅឆ្នាំ2019 ប៉ុន្តែនៅតែទុកឱកាសសម្រាប់ការរីកចម្រើនទីផ្សារបាននៅឆ្នាំ2020ដែរ។

លោក ច្រឹក សុខនីម បានមានប្រសាសន៍ដែរថា៖“នៅក្នុងទិសដៅរបស់រាជរដ្ឋាភិបាល បានផ្តោតលើការអភិវឌ្ឍលំនៅឋានសមរម្យ តែដើម្បីសាងសង់លំនៅឋានដែលមានតម្លៃសមរម្យ រដ្ឋាភិបាលត្រូវតែផ្តល់ហេដ្ឋារចនាសម្ព័ន្ធល្អប្រសើរ ដូចជាផ្លូវលូ និងបណ្តាញអគ្គិសនីជាដើម ដើម្បីលើកទឹកចិត្តដល់វិស័យឯកជន”។

ខណៈពេលដែលគម្រោងរបស់រដ្ឋាភិបាលកំពុងដំណើរការ ពួកគេត្រូវរក្សាឱ្យបាននូវតម្រូវការទីផ្សារសម្រាប់គម្រោងពាណិជ្ជកម្ម និងលំនៅដ្ឋានដែលត្រូវការការទទួលបាននូវប្រព័ន្ធលូ ទឹក ភ្លើង និងផ្លូវថ្នល់ឱ្យបានត្រឹមត្រូវ យើងគិតថា រដ្ឋាភិបាលគួរតែវិនិយោគបន្ថែមទៀតលើហេដ្ឋារចនាសម្ព័ន្ធ ដើម្បីធ្វើផ្លូវថ្មី រួមជាមួយប្រព័ន្ធទឹក និងអគ្គិសនី។ បើមិនដូច្នោះទេ ថ្លៃដើមនៃការអភិវឌ្ឍហេដ្ឋារចនាសម្ព័ន្ធនេះ នឹងធ្វើឱ្យមានលំនៅឋានមានតម្លៃខ្ពស់សម្រាប់អ្នកទិញ។ នេះបើតាមលោកប្រធាន CVEA។

លោក ច្រឹក សុខនីម ក៏បានបញ្ជាក់ដែរថា៖“ខ្ញុំនៅតែមានសុទិដ្ឋិនិយមខ្ពស់ សម្រាប់វិស័យអចលនទ្រព្យក្នុងឆ្នាំ2020 ថា នឹងមិនមានអ្វីជាបញ្ហានោះទេ”។ សម្រាប់ឆ្នាំ2020 កំណើនតម្លៃអចលនទ្រព្យនឹងស្ថិតក្នុងរង្វង់ជាង 10%បន្ថែមទៀត ជាពិសេសនៅតំបន់ជាយក្រុងភ្នំពេញ ខេត្តព្រះសីហនុ កំពតនិងសៀមរាប ហើយបន្ទាប់ពីនោះ វិស័យអចលនទ្រព្យនឹងមានសម្ទុះខ្លាំងនៅក្នុងខេត្តបាត់ដំបង និងខេត្តកោះកុង។

លោក ច្រឹក សុខនីម បានមានប្រសាសន៍ថា វិស័យអចលនទ្រព្យនៅកម្ពុជានឹងកើនឡើងនៅឆ្នាំ2020 ជាមួយនឹងបញ្ហាខ្លះៗ ដោយសារតែព្រឹត្តិការណ៍ថ្មីៗ ប៉ុន្តែលោកយល់ថា៖ “ឆ្នាំ2020 គឺជាឆ្នាំដ៏ល្អសម្រាប់វិស័យអចលនទ្រព្យ។ រដ្ឋាភិបាលបានបង្កើនគម្រោងដែលបានអនុម័តទ្វេដង ហើយនេះនឹងនាំឱ្យមានសកម្មភាពសាងសង់កាន់តែខ្លាំងនៅក្នុងឆ្នាំបន្តបន្ទាប់ទៀត”។

យោងតាមក្រសួងរៀបចំដែនដី នគរូបនីយកម្ម និងសំណង់ (MLMUPC) បានឱ្យដឹងថា មានគម្រោងសាងសង់ចំនួន 4,446គម្រោងត្រូវបានអនុម័តក្នុងទំហំទឹកប្រាក់ចំនួន 9.3ពាន់លានដុល្លារ គិតត្រឹមខែសីហា ឆ្នាំ2019។ រាប់ពាន់គម្រោងទាំងនេះ ភាគច្រើនជាអគារខ្ពស់ៗដែលមានទីតាំងនៅរាជធានីភ្នំពេញ និងក្រុងព្រះសីហនុ។

លោក សន សៀប ស្ថាបនិក និងជាអគ្គនាយកក្រុមហ៊ុនអចលនទ្រព្យ Key Real Estate បានមានប្រសាសន៍ប្រាប់កាសែតឡារ៉ែនពាណិជ្ជថា កាលពីចុងឆ្នាំ2019 រដ្ឋាភិបាលបានអំពាវនាវឱ្យវិស័យឯកជន និងអ្នកវិនិយោគិន គួរផ្តោតការចាប់អារម្មណ៍លើការអភិវឌ្ឍគម្រោងលំនៅឋានតម្លៃសមរម្យ ព្រោះមានតម្រូវការខ្លាំង តែគេពុំឃើញមានអ្នកវិនិយោគច្រើនទេ។

លោក សន សៀប បានបញ្ជាក់ថា៖“មិនដឹងថា ដោយសារតែប្រាក់ចំណេញទាប ឬយ៉ាងណានោះទេ? តែខ្ញុំគិតថា ដោយសារបច្ចុប្បន្នយើងបានសាងសង់លំនៅឋានដែលមានតម្លៃខ្ពស់ច្រើន ដែលលំនៅឋានទាំងនោះមានតម្លៃចាប់ពី 5ម៉ឺនឡើង។ តែអ្នកដែលធ្វើផ្ទះក្នុងតម្លៃ 5ម៉ឺនចុះ មិនសូវមានអ្នកធ្វើទេ”។

លោកអគ្គនាយកបានបន្ថែមថា ដូច្នេះខ្ញុំគិតថា អ្នកដែលមានលទ្ធភាពទិញលំនៅឋានដែលមានតម្លៃទាប គឺមានច្រើនហើយពួកគាត់មិនសូវមានជម្រើសទេ។ ដូច្នេះគោលនយោបាយរបស់រាជរដ្ឋាភិបាល គឺបានរួមចំណែកជួយដល់ប្រជាជនខ្មែរដែលមានលទ្ធភាពតិចតួចឱ្យមានលំនៅឋានសមរម្យឱ្យមានទីតាំងល្អអាចរស់នៅបាន។ យើងហៅថា ទីជម្រកដ៏សមរម្យមួយ ដែលអាចជួយគ្រាំដល់វិស័យអចលនទ្រព្យផងដែរ ព្រោះអចលនទ្រព្យ យើងមិនអាចធ្វើការសាងសង់តែសំណង់លំនៅឋាន ដែលមានតម្លៃខ្ពស់បានទេ។

លោកបានពន្យល់ថា លំនៅឋានតម្លៃសមរម្យក៏ជួយគាំទ្រដល់វិស័យអចលនទ្រព្យច្រើនដែរ ដោយសារតែយើងមើលទៅលើការអភិវឌ្ឍ ទោះបីជាលំនៅឋានមានតម្លៃទាបមែន តែការអភិវឌ្ឍតាមគម្រោងត្រឹមត្រូវ មានហេដ្ឋារចនាសម្ព័ន្ធ មានទឹក ភ្លើង មានផ្លូវ។ នោះយើងនឹងឃើញថា វាមានសោភណភាពដែលជំរុញឱ្យអ្នកដែលមានគំនិតចង់អភិវឌ្ឍលើលំនៅឋានដែលមានតម្លៃមធ្យម ឬក៏តម្លៃខ្ពស់ហ្នឹង គាត់មានភាពងាយស្រួលដែរ។

លោក សន សៀប បានបញ្ជាក់ថា៖“ខ្ញុំយល់ថាបើមានអ្នកធ្វើការអភិវឌ្ឍលើលំនៅឋាន ដែលមានតម្លៃសមរម្យច្រើន អ្នកដែលធ្វើការអភិវឌ្ឍលំនៅឋានតម្លៃមធ្យម និងតម្លៃខ្ពស់ ក៏អាចទម្លាក់ថ្លៃបានខ្លះដែរព្រោះថ្លៃដើមគាត់ទាបដែរ ហើយប្រសិនបើមានហេដ្ឋារចនាសម្ព័ន្ធល្អ នោះយើងមិនសូវចំណាយថ្លៃដើមខ្ពស់ប៉ុន្មានទេ។ បើគិតពីលទ្ធភាពវិញ វាផ្តល់ផលប្រយោជន៍ដល់អ្នកប្រើប្រាស់ចុងក្រោយផងដែរ។

នេះជាអ្វីដែលយើងអាចព្យាករបាននៅក្នុងការរួមចំណែកលើការអភិវឌ្ឍលំនៅ ឋានតម្លៃសមរម្យ ដែលជាគោលដៅរបស់រាជរដ្ឋាភិបាលក្នុងឆ្នាំ2020 នេះ។

បើនិយាយពីការអភិវឌ្ឍខុនដូវិញ លោកបានមានប្រសាសន៍ថា ទីផ្សារខុនដូ នៅតែមើលឃើញមានប្រតិបត្តិការទិញ-លក់។ ជម្រើសបន្ថែមនៃការទូទាត់ដែលអាចបត់បែនបាននឹងបើកគម្រោងនានាទៅកាន់ទីផ្សារធំទូលាយ ដែលជាចំណែកនៃទីផ្សារជួលក្នុងការផ្តល់លទ្ធភាពខ្ពស់នៅក្នុងប្រទេស ហើយចំនួនខុនដូដែលអាចធ្វើបាន អាចនឹងឈានដល់ចំណុចកំពូល។

លោក សន សៀប អគ្គនាយកក្រុមហ៊ុនអចលនទ្រព្យ Key ក៏បានបញ្ជាក់ដែរថា៖“ខ្ញុំមើលទៅឆ្នាំ2020 នេះ អាចជាឆ្នាំដែលមានសញ្ញាល្អជាងឆ្នាំ2019 លើកលែងតែព្រឹត្តិការណ៍ថ្មីៗនៃការប្រយុទ្ធគ្នារវាងអុីរ៉ង់ និងសហរដ្ឋអាមេរិក។ ប្រសិនបើធ្ងន់ធ្ងរ វាអាចនឹងមានឥទ្ធិពលដល់យើង តែបើពុំដូច្នោះទេ ខ្ញុំគិតថា វិស័យអចលនទ្រព្យយើងនៅតែមានដំណើរការល្អទៅមុខដូចធម្មតា”៕

January 14, 2020

ប្រទេសរុស្ស៊ីជាដៃគូថ្មី ខណៈការនាំចេញម្រេចក្នុងឆ្នាំ2019 បានកើនជាង 50%

ការនាំចេញផលិតផលម្រេចមិនមែន GI របស់កម្ពុជាទៅកាន់ទីផ្សារអន្តរជាតិកើនឡើងជាង 50%

កាលពីឆ្នាំ2019 ខណៈការនាំចេញម្រេច GI កំពតបានធ្លាក់ចុះជាង27% បើធៀបនឹងរយៈពេលដូចគ្នាកាលពីឆ្នាំ2018។ នេះបើតាមទិន្នន័យរបស់ក្រសួងកសិកម្ម រុក្ខាប្រមាញ់ និងនេសាទ។

របាយការណ៍បានបង្ហាញថា ក្នុងឆ្នាំ2019 ការនាំចេញម្រេចមិនមែន GI របស់កម្ពុជាសម្រេចបាន 3,693.25តោន កើនឡើង 53.17% បើធៀបនឹងរយៈពេលដូចគ្នាកាលពី2018 ដែលមានចំនួន2,411.20តោន។

ចំណែកបរិមាណនាំចេញម្រេច GIកំពត ដែលជាដំណាំសម្គាល់ទីតាំងភូមិសាស្ត្រនៅក្នុងឆ្នាំ 2019 កន្លងទៅ ធ្លាក់ចុះជាង27% ស្មើនឹងជិត 20តោន បើធៀបនឹងរយៈពេលដូចគ្នាកាលពីឆ្នាំ2018។ នេះបើតាមប្រធានសមាគមលើកកម្ពស់ម្រេចកំពត។

លោក ងួន ឡាយ ប្រធានសមាគមលើកកម្ពស់ម្រេចកំពត Kampot Pepper Promotion Association បានឱ្យដឹងថា៖ “ការនាំចេញម្រេចដែលធ្លាក់ចុះនេះ មកពីកង្វះទីផ្សារ។ កាលពីឆ្នាំ2019 ការនាំចេញម្រេច GI សម្រេចបាន 50តោន ឯឆ្នាំ2018 ការនាំចេញម្រេច GI បាន 69តោន ខណៈការផលិតម្រេចក្នុងឆ្នាំ2019 ទទួលបានទិន្នផល 125តោន។ ឯទិន្នផលតិចជាងពាក់កណ្តាលត្រូវបានលក់តាមរបៀបប្រពៃណីតាមរយៈសមាគម។

លោកប្រធានសមាគម បានមានប្រសាសន៍ថា៖“ទិន្នផលម្រេចបានកើនឡើង ហើយគុណភាព គឺល្អ។ក្នុងចំណោមម្រេចដែលលក់បាន មាន 30% បានចូលទៅក្នុងទីផ្សារក្នុងស្រុក។ ភាគច្រើនសម្រាប់ហាងទេសចរណ៍ ហើយ70% ទៀតត្រូវបាននាំចេញ។ ទោះបីយ៉ាងនេះក្តី ម្រេចកំពតនៅមានតម្លៃលក់ថេរ ក្នុងនោះម្រេចខ្មៅមានតម្លៃ 15ដុល្លារ ក្នុង 1គីឡូក្រាម។ ម្រេចក្រហម ថ្លៃ 25ដុល្លារ និង 28ដុល្លារ សម្រាប់ម្រេចស”។

លោកប្រធានសមាគមលើកកម្ពស់ម្រេចកំពត បានបន្តថា កង្វះតម្រូវការកំពុងជំរុញឱ្យកសិករម្រេចកំពតមួយចំនួនធំឈប់ធ្វើស្រែ។ លោកប៉ាន់ប្រមាណថា 20 ទៅ 25% នៃកសិករខ្នាតតូច (ដែលធ្វើស្រែតិចជាង 3,000ម៉ែត្រការ៉េ) បានបោះបង់ចោលដំណាំបន្ទាប់ពីរដូវប្រមូលផលឆ្នាំនេះ។ ជាបញ្ហាប្រឈមមួយ ក្នុងចំណោមបញ្ហាប្រឈមទាំងនោះ ការផ្គត់ផ្គង់លើសតម្រូវការបណ្តាលមកពីអ្នកទិញកំពុងចាប់ផ្តើមដាំដុះដំណាំនេះដែរ។

លោកបានមានប្រសាសន៍ថា៖“ការបញ្ជាទិញពីអ្នកទិញ មានការថយចុះគួរឱ្យកត់សម្គាល់ក្នុងរយៈពេលប៉ុន្មានឆ្នាំចុងក្រោយនេះ ពីព្រោះអ្នកទិញទាំងនេះក៏កំពុងដាំម្រេចផងដែរ។ ពីពេលមុនអ្នកទិញបញ្ជាទិញម្រេចពី 10 ទៅ 20តោន ប៉ុន្តែឥឡូវនេះពួកគេត្រូវការតែ 2 ទៅ 10តោនប៉ុណ្ណោះ ពីព្រោះពួកគេកំពុងដាំម្រេចដោយខ្លួនឯង”។

លោកបញ្ជាក់ថា៖“ផលិតផលម្រេចយើង ដែលបាននាំចេញទៅទីផ្សារក្រៅស្រុក គឺនាំចេញទៅសហភាពអឺរ៉ុប អាមេរិក ជប៉ុន កូរ៉េខាងត្បូង ហុងកុងនិងតៃវ៉ាន់។ ទោះបីយ៉ាងណា សមាគមនឹងខិតខំពង្រឹងគុណភាពម្រេច និងស្វែងរកទីផ្សារថ្មីៗបន្ថែមទៀត ហើយសព្វថ្ងៃយើងក៏កំពុងមានដៃគូថ្មី ដែលបាននាំចេញម្រេចទៅប្រទេសរុស្ស៊ី”។

សូមបញ្ជាក់ថា បច្ចុប្បន្ន សមាគមលើកកម្ពស់ម្រេចកំពត មានសមាជិកចំនួន 455នាក់ដែលបង្កើតឡើងដោយកសិករ និងក្រុមហ៊ុនដែលមានចម្ការម្រេច។ ចម្ការនេះមានផ្ទៃដីចំនួន 290ហិកតានៅក្នុងស្រុកកំពង់ត្រាច ខេត្តកំពត។\

លោក ម៉ាក់ នី ប្រធានសហព័ន្ធម្រេច និងគ្រឿងទេសកម្ពុជា បានប្រាប់កាសែត ឡារ៉ែនពាណិជ្ជថា៖“ការនាំចេញផលិតផលម្រេចមិនមែន GI របស់កម្ពុជា ទៅកាន់ទីផ្សារអន្តរជាតិបានកើនឡើងជាង 50% ក្នុងឆ្នាំ2019 នេះបើតាមយើងទទួលបានតួលេខពីក្រុមហ៊ុនជាសមាជិក”។

លោក ម៉ាក់ នី បានឱ្យដឹងថា៖“ក្នុងការនាំចេញម្រេចទៅក្រៅប្រទេស ក្រុមហ៊ុននាំចេញម្រេច ក៏មានផលលំបាកដែរ ដូច្នេះទើបពួកគាត់ ចង់ឱ្យសហព័ន្ធស្នើទៅរដ្ឋាភិបាល ជួយកាត់បន្ថយលើការចំណាយផ្សេងៗឱ្យដូចការអនុវត្តរបស់សហព័ន្ធស្រូវអង្ករដែរ”។ យោងតាមប្រសាសន៍របស់លោកប្រធានសហព័ន្ធ បានមានការបញ្ជាក់ថា អ្វីដែលក្រុមហ៊ុននាំចេញម្រេចមានភាពប្រឈមនោះ គឺទីផ្សារម្រេចពិភពលោកលើសតម្រូវការ ដូច្នេះការនាំចេញមិនបានច្រើនធ្វើឱ្យបញ្ហាប្រឈមនេះធ្លាក់ដល់កសិករជាអ្នកផលិត ដូចជាការនាំចេញម្រេចកំពតទៅក្រៅប្រទេស គឺមានប្រមាណតែ 50តោន ក្នុងឆ្នាំ2019។លោកបានបញ្ជាក់ថា៖“សព្វថ្ងៃយើងមានដៃគូថ្មី ដែលយើងបាននាំចេញម្រេចទៅប្រទេសរុស្ស៊ី ប៉ុន្តែរុស្ស៊ីមិនទាន់ទទួលទិញក្នុងចំនួនច្រើននៅឡើយទេ ទោះបីជារុស្ស៊ីជាអ្នកប្រើប្រាស់ម្រេចក៏ដោយ”។

លោកប្រធានសហព័ន្ធ បានឱ្យដឹងទៀតថា៖“យោងតាមរបាយការណ៍ចុងក្រោយ បានបង្ហាញថា បច្ចុប្បន្ន ម្រេចត្រូវបានដាំដុះនៅក្នុងខេត្តចំនួន19 លើផ្ទៃដីប្រមាណ 7,476ហិកតា ហើយផ្តល់ទិន្នផលប្រហែលជាង 2ម៉ឺនតោន ក្នុង1ឆ្នាំ ដូច្នេះកសិករត្រូវតែផ្តោតការយកចិត្តទុកដាក់បន្ថែម លើគុណភាពដើម្បីរក្សាតម្លៃនៃការលក់ឱ្យបានរឹងមាំ។ កសិករភាគច្រើនគិតតែពីតម្លៃប៉ុណ្ណោះ ដោយពួកគេភ្លេចពីគុណភាព។ គុណភាព គឺជាអ្វីដែលពួកគេត្រូវផ្តល់អាទិភាព”។ នេះ គឺលោកសំដៅទៅលើម្រេចទូទៅក្នុងប្រទេស ដែលមិនមែនជាផលិតផលម្រេចសម្គាល់ភូមិសាស្ត្រ GI របស់កម្ពុជាដែលជាម្រេចកំពតនោះទេ។

លោកប្រធានបានបន្តថា៖“សម្រាប់គុណភាពម្រេចកម្ពុជាយើង មានគុណភាពល្អជាងម្រេចប្រទេសវៀតណាម ដោយយើងមិនមានជាតិគីមីខ្ពស់ដូចប្រទេសវៀតណាមទេ ប៉ុន្តែគេទទួលស្គាល់ម្រេចកម្ពុជាតាមរយៈប្រទេសវៀតណាម ហើយយើងបាននាំចេញទៅវៀតណាមច្រើនជាងគេ ប្រមាណ 70% ឯប្រទេសថៃប្រមាណ15-20% សល់ពីនោះគឺផ្គត់ផ្គង់ក្នុងស្រុកប្រហែល 2-3% និងក្រៅពីនោះ គឺនាំចេញដោយខ្លួនឯង”។

លោក ម៉ាក់ នី ប្រធានសហព័ន្ធម្រេច និងគ្រឿងទេសកម្ពុជា បានបញ្ជាក់ថា៖“ តាមការមើលឃើញពីបញ្ហាប្រឈម គឺយើងបានត្រៀមខ្លួនសម្រាប់កិច្ចការឆ្នាំ2020 នេះរួចរាល់ហើយ ដោយទី1-ផ្តោតលើគុណភាពជាចម្បង ដែលបច្ចុប្បន្នម្រេចយើងត្រូវបានទទួលស្គាល់ថា មានគុណភាពល្អ និងទី2-ការស្នើសុំទៅក្រសួង ដើម្បីភ្ជាប់ទំនាក់ទំនងជាមួយនឹងសហព័ន្ធម្រេចអន្តរជាតិ ដោយសារយើងមិនទាន់មានទំនាក់ទំនងល្អជាមួយស្ថាប័ននេះ ហើយការភ្ជាប់ទំនាក់ទំនងនេះ និងជួយជំរុញការនាំចេញម្រេច និងធ្វើឱ្យអន្តរជាតិកាន់តែស្គាល់ម្រេចដែលមានគុណភាពល្អរបស់កម្ពុជា”។

យោងតាមរបាយការណ៍ក្រសួងកសិកម្មឱ្យដឹងថា កម្ពុជាបាននាំចេញម្រេចទៅកាន់ប្រទេសជាច្រើនដូចជា ប្រទេសវៀតណាម ថៃ ជប៉ុន សិង្ហបុរីកូរ៉េខាងត្បូង បារាំង អាល្លឺម៉ង់ អង់គ្លេស អារ៉ាប៊ីសាអ៊ូឌីត ឥណ្ឌា តៃវ៉ាន់ ឆែក បែលហ្ស៊ិក អូស្ត្រាលី កាណាដា ស្វ៊ីស កាហ្សាក់ស្ថាន រុស្ស៊ី ហុងកុង អាមេរិក និងប៊ុលហ្គារី៕

January 14, 2020

Author: ធឿន មករា