ធឿន មករា - La Reine Media

ខែត្រជាក់គួរងូតទឹកក្ដៅ ឬទឹកត្រជាក់? មួយណាល្អជាងសម្រាប់សុខភាព?

ការងូតទឹក គឺជារឿងមួយក្នុងចំណោមរឿងមួយចំនួន ដែលមនុស្សគ្រប់រូបធ្វើនៅពេលព្រឹក និងពេលល្ងាច។ នៅពេលអ្នកងូតទឹក វាផ្តល់ឱ្យអ្នកនូវពេលវេលាដ៏ល្អសម្រាប់សម្អាតរាងកាយរបស់អ្នក។ ប៉ុន្តែតើអ្នកដឹងទេថា ការងូតទឹកក្ដៅឧណ្ហៗមានអត្ថប្រយោជន៍ដែរឬទេ? ភាគច្រើនយើងគឺជាមនុស្សងូតទឹកត្រជាក់ ប៉ុន្ដែការផ្លាស់ប្តូរតិចតួចក្នុងទម្លាប់អាចផ្តល់នូវប្រយោជន៍ខ្ពស់សម្រាប់ការគេងរបស់អ្នក ជាពិសេសប្រសិនបើប្រើទឹកក្តៅឧណ្ហៗ។ ប្រសិនបើអ្នកមានបញ្ហាក្នុងការសម្រាក ឬការគេងលក់នៅពេលយប់ អ្នកអាចសាកល្បងងូតទឹកក្ដៅ ដើម្បីបន្ថយភាពតានតឹង។ គេអាចនិយាយថានេះ គឺជាទម្លាប់ធម្មតាមួយសម្រាប់ការសម្រាកសាច់ដុំមុនពេលគេង ដោយសារតែការងូតទឹកក្ដៅឧណ្ហៗធ្វើឱ្យប្រព័ន្ធសរសៃប្រសាទរំញោច និងមានអារម្មណ៍ងងុយគេង។ ចង់ដឹង តោះតាមដានទាំងអស់គ្នា នេះជាអត្ថប្រយោជន៍នៃការងូតទឹកក្តៅ និងទឹកត្រជាក់។

ការងូតទឹកក្ដៅ
ក្រោយពេលបញ្ចប់ការងារពេញមួយថ្ងៃ គ្មានអ្វីស្រួលជាងការងូតទឹកក្ដៅឧណ្ហៗនោះទេ ដើម្បីធ្វើឱ្យស្រស់ស្រាយអារម្មណ៍ឡើងវិញ។ ចំណុចខាងក្រោមនេះ ជាទង្វើឆ្លើយតបនៃរាងកាយរបស់អ្នកទៅនឹងការងូតទឹកក្ដៅ ៖
1. សម្រួលសាច់ដុំដែលឈឺចាប់ : ដូចគ្នាទៅនឹងឥទ្ធិពលនៃការបិតកៅអៀកលើសាច់ដុំដែលឈឺចាប់ដែរ ការងូតទឹកក្ដៅអាចជួយសម្រាលសាច់ដុំដែលឈឺចាប់ សម្រួលការរមួលសាច់ដុំ និងការតានតឹងរបស់សាច់ដុំ។ ការងូតទឹកក្ដៅ ក៏ជួយបង្កើនចរន្តឈាមរត់នៅក្នុងរាងកាយ ដែលអាចកាត់បន្ថយការឈឺចាប់បានច្រើន ជំរុញការព្យាបាលសាច់ដុំ និងកាត់បន្ថយការរលាកសាច់ដុំជាដើម។
2. សម្រួលផ្លូវដង្ហើម : តើអ្នកធ្លាប់ស្ទះស្លេសក្នុងច្រមុះទេ? ចំហាយដែលចេញពីទឹកក្ដៅ មានមុខងារជាថ្នាំធម្មជាតិរំលាយស្លេសនៅក្នុងច្រមុះ កាត់បន្ថយជំងឺផ្ដាសាយ ដោយសារតែចំហាយទឹកក្ដៅដែលផ្ដល់សំណើមដល់រន្ធច្រមុះជានិច្ច។
3. ស្បែកកាន់តែស្រស់ថ្លា : ការងូតទឹកក្ដៅ ជួយពង្រីករន្ធញើស ដូចនេះវាជួយធ្វើឱ្យស្បែករបស់អ្នកទន់ និងមានសុខភាពល្អ។ មនុស្សមួយចំនួន បានណែនាំឱ្យងូតទឹកក្ដៅ ដើម្បីជួយបើករន្ធញើសសម្អាតស្បែក និងបង្ហូរញើសពីស្បែក។ ដូចគ្នាទៅនឹងការប្រើចំហាយទឹក ឬកន្សែងក្ដៅឧណ្ហៗជូតមុខដែរ។

ចុះហេតុអ្វីយើងត្រូវងូតទឹកត្រជាក់? ហើយបើងូតទឹកត្រជាក់ក្នុងអំឡុងខែត្រជាក់ អាចប៉ះពាល់ដល់សុខភាពឬទេ?
ការងូតទឹកត្រជាក់
ការងូតទឹកត្រជាក់នៅពេលព្រឹកព្រលឹម នឹងធ្វើឱ្យអ្នកកាន់តែមានអារម្មណ៍ងងុយគេង ហើយគេងមិនចង់ក្រោកនៅពេលម៉ោងឈប់សម្រាកថ្ងៃត្រង់។ ប៉ុន្តែអ្នកវិទ្យាសាស្រ្តផ្នែកកីឡា ដែលសិក្សាអំពីទម្លាប់បុរាណមួយចំនួនបានលើកឡើងថា ការងូតទឹកត្រជាក់នៅពេលព្រឹក ពិតជាធ្វើឱ្យអ្នកអាចរៀបចំខ្លួនបានល្អប្រសើរ ដើម្បីបំពេញការងារពេញមួយថ្ងៃ។ តែរដូវរងាបែបនេះ យើងជឿថា គ្មាននរណាម្នាក់ចង់ងូតទឹកត្រជាក់នោះទេ ក៏ប៉ុន្ដែ បើតាមទីជនបទវិញ នៅតែចៀសមិនផុតពីការងូតទឹកត្រជាក់ឡើយ។

ការងូតទឹកត្រជាក់មានប្រយោជន៍អ្វីខ្លះ?
1. ស្បែក និងរោម : ទឹកត្រជាក់ មានឥទ្ធិពលផ្ទុយពីទឹកក្ដៅ នៅពេលជ្រាបចូលរន្ធញើស វាបានបិទរន្ធញើស ឬធ្វើឱ្យរបកស្បែកចាស់ រួចធ្វើឱ្យកោសិកាស្បែកថ្មីដុះឡើងតឹងណែនល្អ។ ដូច្នេះហើយគេជឿជាក់ថា ចំណុចនេះទឹកត្រជាក់ជួយរក្សាសំណើមដល់ស្បែក និងការពារភាពកខ្វក់មិនឱ្យជ្រាបចូលក្នុងស្បែក ជាពិសេសពពួកបាក់តេរី។ ចំពោះស្បែកក្បាល ទឹកត្រជាក់ បន្តឹងស្បែកក្បាល បង្កើនសមត្ថភាពបណ្ដុះសក់របស់រន្ធសក់នៅលើក្បាល ធ្វើឱ្យសរសៃសក់កាន់តែរឹងមាំខ្លាំង។
2. បង្កើនភាពស៊ាំប្រឆាំងមេរោគ និងជួយឱ្យចរន្តរត់លំហូរឈាមដំណើរការបានល្អ : ក្រៅពីផ្ដល់នូវអត្ថប្រយោជន៍ដល់ស្បែក ទឹកត្រជាក់ក៏ជួយបង្កើនចរន្តរត់នៃលំហូរឈាមឱ្យកាន់តែល្អផងដែរ។ នៅពេលទឹកត្រជាក់ប៉ះស្បែក សរសៃឈាមនឹងរួម ហើយចរន្តរត់របស់ឈាម បង្កើតលំហូរដែលផ្ដោតតែទៅកាន់តែសរីរាង្គសំខាន់ៗក្នុងរាងកាយតែប៉ុណ្ណោះ។ ទឹកត្រជាក់នឹងជួយបង្កើនកម្ដៅនៅក្នុងខ្លួន ឱ្យប្រព័ន្ធភាពស៊ាំកាន់តែរឹងមាំក្នុងការប្រឆាំងនឹងរោគជំងឺ។
3. បន្ថយអាការរលាកសន្លាក់ : កីឡាករដែលត្រាំក្នុងអាងទឹកកក ជឿជាក់ថា វាជួយកាត់បន្ថយការរលាក ឬបង្កើនដំណើរការស្ដារថាមពលឡើងវិញរបស់សាច់ដុំ។ ដោយសារតែដុំទឹកកករឹបសរសៃឈាម និងធ្វើឱ្យចុងនៃសរសៃប្រសាទស្ពឹក ដែលនេះជាវិធីសាស្រ្តបញ្ជាក់ថា ការងូតទឹកត្រជាក់ អាចបន្ធូរបន្ថយការឈឺចាប់សាច់ដុំបានយ៉ាងល្អ។

តើយើងគួរតែងូតទឹកក្ដៅ ឬងូតទឹកត្រជាក់?
ដោយសារតែការងូតទឹកទាំងពីរប្រភេទនេះ ផ្ដល់នូវអត្ថប្រយោជន៍ល្អរៀងៗខ្លួន ដូចនេះ តើការងូតទឹកប្រភេទណាដែលល្អសម្រាប់អ្នក? អ្នកអាចជ្រើសរើសការងូតទឹក ដែលអ្នកពេញចិត្ត ប៉ុន្តែមានឧទាហរណ៍មួយចំនួន ដែលត្រូវជ្រើសរើសយកតែមួយប៉ុណ្ណោះ។
តើអ្នកមានជំងឺគេងមិនលក់ឬទេ? បើមានអ្នកត្រូវងូតទឹកក្ដៅឧណ្ហៗល្អជាង។ បើពិបាកគេង អ្នកអាចងូតទឹកក្ដៅឧណ្ហៗនៅពេលយប់ វាមិនត្រឹមតែជួយឱ្យរាងកាយរបស់អ្នកធូរស្រាលប៉ុណ្ណោះទេ ថែមទាំងធ្វើឱ្យរាងកាយសម្របទៅនិងសីតុណ្ហភាពបានយ៉ាងល្អផងដែរ ។ នៅពេលដែលអ្នកចេញពីបន្ទប់ងូតទឹកដែលក្ដៅឧណ្ហៗ ចូលក្នុងបន្ទប់គេងដែលត្រជាក់ សីតុណ្ហភាពក្នុងរាងកាយ ចង្វាក់បេះដូង និងចង្វាក់ផ្លូវដង្ហើមធ្លាក់ចុះ ដែលជាសញ្ញាបង្ហាញថា ដល់ពេលគេងហើយ។

តើគប្បីងូតទឹកក្ដៅ ឬទឹកត្រជាក់ ក្រោយពេលហាត់ប្រាណរួច? កីឡាករជំនាញ និងមិនមានជំនាញ បានចូលត្រាំក្នុងទឹកកក ក្រោយពេលហាត់ប្រាណ ដើម្បីជួយបង្កើនសាច់ដុំឱ្យមានកម្លាំងកាន់តែខ្លាំង ដូចនេះ អ្នកអាចសាកល្បងជម្រើសរវាងទឹកក្ដៅ និងទឹកត្រជាក់។ អ្នកឯកទេសមួយចំនួនជឿជាក់ថា ជម្រើសរវាងការងូតទឹកក្ដៅ និងការងូតទឹកត្រជាក់ ក្រោយពេលហាត់ប្រាណ ជួយបង្កើនដំណើរការរត់នៃចរន្តឈាម និងបំបាត់ជាតិពុលក្នុងរាងកាយបានដូចគ្នា៕

January 21, 2020

អ្នកម្ដាយថ្មោងថ្មី និងជំនឿខុសៗ 4យ៉ាងក្នុងការបំបៅដោះកូន

ពេលនិយាយពីការបំបៅដោះកូន មានជំនឿជាច្រើន និងការនិយាយប្រាប់តៗគ្នាមក រហូតអាចធ្វើឱ្យអ្នកម្ដាយជាច្រើននាក់យល់ច្រឡំ និងវិលវល់មិនប្រាកដក្នុងចិត្តថា តើជំនឿទាំងនោះត្រឹមត្រូវឬទេ? ដូច្នេះថ្ងៃនេះ យើងនឹងនាំយកចំណេះដឹងល្អៗមកជម្រាបជូនអ្នកម្ដាយថ្មោងថ្មី ដើម្បីបានកែខៃជំនឿខុសៗក្នុងការបំបៅទឹកដោះកូន ដូចតទៅ…។

1. យកចិត្តទុកដាក់បំបៅដោះកូន រហូតភ្លេចមើលថែទាំសុខភាពខ្លួនឯង
អ្នកម្ដាយភាគច្រើនតែងកើតមានបញ្ហាលើការមិនមើលថែទាំសុខភាពខ្លួនឯង ព្រោះគិតថា ការបំបៅទឹកដោះកូន គឺជារឿងបន្ទាន់ និងសំខាន់បំផុតដែលត្រូវធ្វើមុនគេបង្អស់ តែបែរជាភ្លេចនឹកគិតថា ទឹកដោះសុទ្ធតែប្រកបទៅដោយសារធាតុអាហារចេញពីរាងកាយរបស់ស្ត្រីជាម្ដាយទាំងអស់។ បើម្ដាយមានសុខភាពមិនល្អ ទឹកដោះក៏មិនមានសារធាតុអាហារគ្រប់ចំនួនដែរ ដូច្នេះស្ត្រីជាម្ដាយត្រូវយកចិត្តទុកដាក់លើរឿងសុខភាព ញ៉ាំអាហារ និងសម្រាកឱ្យបានគ្រប់គ្រាន់ និងគួរញ៉ាំអាហារបំប៉ន មិនថាតែវីតាមីន សារធាតុរ៉ែ កាល់ស្យូម ស័ង្កសី-ល ដើម្បីឱ្យរាងកាយរឹងប៉ឹងមាំមួនល្អ និងផលិតទឹកដោះដែលមានគុណភាពឱ្យកូនតូចបាន។

2. កូនគេងលក់ពេលបៅដោះ បញ្ជាក់ថា កូនឆ្អែតហើយ
អ្នកម្ដាយថ្មីថ្មោងជាច្រើន លួចនឹកសប្បាយនៅក្នុងចិត្ត ពេលបំបៅដោះកូនហើយកូនគេងលក់ទៅ យល់ថាកូនបៅទឹកដោះឆ្អែតរហូតដល់គេងលក់ តែការពិតវិញ កូនតូចអាចគេងលក់នៅក្នុងរង្វង់ដៃបីឱ្យបៅលើទ្រូងម្ដាយបានដោយមិនចាំបាច់មឹមឆ្អែតបាន ព្រោះស្រួលខ្លួន មានអារម្មណ៍កក់ក្ដៅ និងមានសុវត្ថិភាព ដូច្នេះការឧស្សាហ៍សង្កេតមើលកូន និងជួនកាលអាចប្ដូរឥរិយាបទកូនឱ្យបែរមកបៅដោះម្ខាងទៀត ឬឱ្យសម្រាកបៅមួយភ្លែតៗ ដើម្បីជំរុញឱ្យកូនមិនភ្លេចខ្លួនគេងលក់ បៅឱ្យបានឆ្អែតពេញលេញ ដើម្បីការចម្រើនធំធាត់ និងវិវឌ្ឍនាការរបស់កូនតូចយើងហ្នឹងឯង។

3. ស្ដាប់តាមអ្នកដទៃពីការបំបៅទឹកដោះកូន
ការបំបៅទឹកដោះ គ្មានច្បាប់ទម្លាប់កំណត់ច្បាស់នោះទេ អ្នកម្ដាយត្រូវចេះសង្កេតមើលកូន និងកែសម្រួលការឱ្យកូនបៅទឹកដោះឱ្យត្រឹមត្រូវ។ កូនខ្លះ បៅដោះ 5-10នាទី ឬ 20នាទីទើបឆ្អែត។ អ្នកម្ដាយខ្លះ ក៏ឱ្យកូនបៅដោះត្រឹមតែ 6ខែប៉ុណ្ណោះ អ្នកខ្លះ 1ឆ្នាំ ដល់ 2ឆ្នាំ ទើបលែងឱ្យបៅ… ទាំងអស់នេះ គ្មានខុស ឬត្រូវទេ។ អ្នកម្ដាយគួរសិក្សាព័ត៌មានពីប្រភពដែលគួរឱ្យជឿទុកចិត្តបាន ហើយយកមកកែសម្រួលធ្វើតាមឱ្យបានស័ក្តិសមបំផុត។

4. យល់ថា ការឈឺដោះបណ្ដាលមកពីការបំបៅកូន ជារឿងប្រក្រតី
អ្នកម្ដាយជាច្រើនយល់ខុសថា ការឈឺដោះ គឺជារឿងប្រក្រតីរបស់ការបំបៅដោះកូនតែការពិតវិញ វាអាចបណ្ដាលមកពីបញ្ហាបង្កប់មួយចំនួន ដូចជា ដោះតឹងណែនខះដោយសារតែកូនបៅទឹកដោះតិចពេក ឬអ្នកម្ដាយប្រើវិធីបឺតយកទឹកដោះទុកឱ្យកូនបៅខុសវិធីជាដើម។ អាការទាំងនេះ បើទុកចោលរយៈពេលយូរ នឹងកើតការតឹងណែនខះក្នុងដោះជាបន្តបន្ទាប់ រហូតនាំឆ្ពោះទៅរកការរលាកក្លាយខាងក្នុងដោះ ឬករណីខ្លះ ក៏ជាមូលហេតុមកពីកូនកើតសភាវជាប់អណ្ដាត ធ្វើឱ្យបៅដោះយូរ តែមិនឆ្អែត ដែលអ្នកម្ដាយត្រូវទៅជួបគ្រូពេទ្យដើម្បីពិនិត្យ និងកែបញ្ហានេះ។

ជំនឿទាំង4ខាងលើនេះ សុទ្ធតែត្រូវបានប្រាប់តៗគ្នាមក រហូតដល់អាចនឹងធ្វើឱ្យវិលវល់យល់ច្រឡំបាន ដូច្នេះពេលអ្នកម្ដាយបានដឹងពីការពិតហើយ ក៏សូមឱ្យនាំយកទៅប្រើ និងប្រតិបត្តិខ្លួនយ៉ាងត្រឹមត្រូវតាមវិធី ដើម្បីកូនតូចរបស់អ្នក៕

January 20, 2020

ទីបំផុត! មិត្តហ្វូនបានស្វែងរកឃើញម្ចាស់រថយន្ត TOYOTA HILUX REVO សេរីឆ្នាំ2020 ពីកម្មវិធី បញ្ចូលលុយឈ្នះរង្វាន់មហស្ចារ្យហើយ

ភ្នំពេញ៖ ព្រឹកថ្ងៃច័ន្ទ ទី20 ខែមករា ឆ្នាំ2020 ក្រុមហ៊ុនមិត្តហ្វូនបានប្រារព្ធពិធីប្រគល់រង្វាន់រថយន្តសេរីថ្មីទំនើបម៉ាក TOYOTA HILUX REVO សេរីឆ្នាំ2020 ទៅកាន់អតិថិជនដែលមានសំណាងពីកម្មវិធី «បញ្ចូលលុយឈ្នះរង្វាន់មហស្ចារ្យ» នៅឯការិយាល័យកណ្តាលរបស់ខ្លួន។ អ្នកស្រី ហាក់ ស្រី រស់នៅរាជធានីភ្នំពេញ ជាអតិថិជនដែលមានសំណាងឈ្នះរង្វាន់រថយន្តទំនើបនេះបានថ្លែងទាំងអារម្មណ៍រំភើបឥតឧបមាថា៖ “ខ្ញុំអរចង់ហោះនៅពេលដែលក្រុមហ៊ុនតេមកបញ្ជាក់ថា ខ្ញុំឈ្នះរង្វាន់ឡាន១គ្រឿងនេះ។ ដំបូងភ័យណាស់ខ្លាចគេបោកប្រាស់ ព្រោះអីធ្លាប់គេខលមកបោកប្រាស់បន្លំច្រើនដង” អ្នកស្រីបន្តថា៖ មិត្តហ្វូនពិតជាបានប្រគល់រង្វាន់ដ៏អំអស្ចារ្យនេះមកនាងខ្ញុំពិតមែន។ សូមអតិថិជនទាំងអស់ជឿជាក់ជាមួយការផ្តល់ជូននេះ!

អតិថិជនមានសំណាងម្នាក់ទៀតមកពីខេត្តកណ្តាលលោកអ៊ុត ណេង ឈ្នះរង្វាន់ទូរស័ព្ទដៃទំនើបម៉ាក iPhone 11 Pro ក៏បានបង្ហាញអារម្មណ៍រំភើបដូចគ្នាថា៖ «រង្វាន់នេះពិតប្រាកដណាស់ ខ្ញុំតែងតែប្រើប្រាស់ប្រព័ន្ធមិត្តហ្វូន ហើយគ្រាន់តែបញ្ចូលលុយមិននឹកស្មានថាឈ្នះរង្វាន់ទូរស័ព្ទដៃដ៏ទំនើបមួយនេះទេ»។
អតិថិជនដែលឈ្នះរង្វាន់ផ្សេងៗទៀតសុទ្ធតែបង្ហាញអារម្មណ៍រំភើបដូចគ្នាក្នុងពីធីប្រគល់រង្វាន់នេះ។
ថ្លែងនៅក្នុងពិធីប្រគល់រង្វាន់លោកញ៉ុង ឌិនថន អគ្គនាយករងក្រុមហ៊ុនមិត្តហ្វូនបានមានប្រសាសន៍ថា៖ «ខ្ញុំបាទមានកិត្តិយសក្នុងការប្រគល់រង្វាន់ជូនអតិថិជនមហាសំណាងយើងនៅថ្ងៃនេះ។ ការរៀបចំកម្មវិធីពិសេសៗរបស់មិត្តហ្វូនពិតជាមានតម្លាភាព និងសច្ចភាពទៅដល់អតិថិជនគ្រប់រូបដែលតែងតែជឿជាក់និងគាំទ្រលើសេវាកម្មរបស់មិត្តហ្វូន ហើយឆាប់ៗខាងមុខនេះមិត្តហ្វូននឹងផ្តល់ជូននូវកម្មវិធីថ្មីៗនិងឈ្នះរង្វាន់ដ៏ច្រើនសន្ធឹកសន្ធាប់ទៀត»។ នៅក្នុងពីធីនេះមិត្តហ្វូនបានប្រគល់នូវរង្វាន់ដ៏ច្រើនសន្ធឹកសន្ធាប់ទៅកាន់អតិថិជនដែលមានសំណាងដូចជា៖

រង្វាន់រថយន្ត TOYOTA HILUX REVO សេរីឆ្នាំ2020 បានទៅលើអ្នកស្រី ហាក់ ស្រី មកពីរាជធានីភ្នំពេញ
រង្វាន់ទូរស័ព្ទដៃ iPhone 11 Pro បានទៅលើលោក អ៊ុត ណេង មកពីខេត្តកណ្តាល
រង្វាន់ទូរទស្សន៍ LG Smart TV 49 អ៊ីញ បានទៅលើអ្នកនាង រៀល សំអាត មកពីខេត្តស្វាយរៀង
រង្វាន់ទូទឹកកក SAMSUNG បានទៅលើអ្នកស្រី ខ្នា រ៉េន មកពីខេត្តកំពង់ធំ

មិត្តហ្វូនជាក្រុមហ៊ុនទូរស័ព្ទចល័តឈានមុខគេលើសេវាគ្របដណ្តប់ទូទាំងប្រទេស អត្រាតម្លៃសមរម្យ រួមជាមួយនឹងការផ្តល់ជូនកម្មវិធីពិសេសៗទៅដល់អតិថិជនរបស់ខ្លួនរៀងរាល់ខែ។ ការផ្តល់ជូននេះគឺជាការឆ្លើយតបទៅដល់អិតិថិជនទាំងអស់ដែលបានគាំទ្រប្រើប្រាស់បណ្តាញមិត្តហ្វូនយ៉ាងពេញទំហឹងតាំងពីខ្លួនបើកប្រតិបត្តិការនៅលើទីផ្សារប្រទេសកម្ពុជាជាង១០ឆ្នាំមកនេះ៕

January 20, 2020

Google បើកបង្រៀនសរសេរកូដអនឡាញ ដើម្បីបង្ហាត់បុគ្គលិកអំពីការងារទាក់ទងនឹងបច្ចេកវិទ្យា

ក្រុមហ៊ុនបច្ចេកវិទ្យាយក្ស Google បានប្រកាសបើកកម្មវិធីបង្រៀនអនឡាញលើជំនាញសរសេរកូដ ដោយមិនគិតថ្លៃ ក្នុងគោលបំណងបណ្ដុះបណ្ដាលបុគ្គលិកឱ្យកាន់តែមានជំនាញនេះខ្លាំងឡើង និងងាយស្រួលធ្វើការលើវិស័យទាក់ទងនឹងបច្ចេកវិទ្យា។ក្រុមហ៊ុនមានមូលដ្ឋាននៅ Silicon Valley មួយនេះបានបង្កើតកម្មវិធីមួយដែលខ្លួនឱ្យឈ្មោះថា Google IT Automation ដែលចែកចេញជា 6វគ្គ ហើយនៅពេលបញ្ចប់ ក៏នឹងប្រគល់វិញ្ញាបនបត្រ Python Professional Certificate ឱ្យអ្នករៀនផងដែរ។ វាជារឿងដ៏កម្រមួយ ដែលអ្នកធ្វើការនៅទីនេះមិនចេះសរសេរកូដ ប៉ុន្តែគោលបំណងដែលបង្រៀនបែបនេះ គឺដើម្បីបង្កើនគុណភាពការងារឱ្យកាន់តែប្រសើរឡើងទៀត។

Google បានឱ្យដឹងបន្ថែមទៀតថា ឥឡូវនេះមានកន្លែងទំនេរ 2,500កន្លែងសម្រាប់ទីផ្សារការងារប្រភេទនេះ។ វគ្គនេះនឹងចាប់ផ្តើមនៅខែកុម្ភៈខាងមុខនេះ៕

January 20, 2020

ធ្លាប់តែផលិតកុំព្យូទ័រ! ឥឡូវ Lenovo ងាកមកផលិតឧបករណ៍ VR ថែមមួយទៀត

ឧបករណ៍ VR មួយឈ្មោះថា “Lenovo VR3030S” ត្រូវបានប្រទះឃើញចុះកម្មសិទ្ធិប៉ាតង់រួចរាល់ហើយ នៅ FFC(ស្ថាប័នកម្មសិទ្ធិបញ្ញា)។ដោយសារតែវាមិនមែនជាលើកដំបូង ដូច្នេះឧបករណ៍ VR ថ្មីនេះ នឹងប្រជែងជាមួយ Google ដែលមានឧបករណ៍ប្រភេទនេះដូចគ្នា។ វានឹងមានភ្ជាប់មកជាមួយនឹងដៃបញ្ជាមួយផងដែរ។ បច្ចុប្បន្នទីផ្សារឧបករណ៍ VR ហាក់នៅទាបនៅឡើយ ប៉ុន្តែមានក្រុមហ៊ុនមិនច្រើនទេ ដែលឈានជើងចូលវិស័យនេះ។

ចំពោះដំណឹងប្រកាសលក់នៅពេលណានោះ នៅមិនទាន់ត្រូវបានឱ្យដឹងនៅឡើយទេ។

January 20, 2020

ស្មាតហ្វូនថ្មី Huawei មានភ្ជាប់សេវាកម្ម Google មកស្រាប់ តម្លៃ 389ដុល្លារ

ទោះជាមានការហាមឃាត់ពីសំណាក់រដ្ឋាភិបាលអាមេរិកមិនឱ្យរកស៊ីជាមួយក្រុមហ៊ុនអាមេរិកក៏ដោយ ប៉ុន្តែ Huawei ក៏នៅតែដាក់លក់ស្មាតហ្វូនថ្មី គឺ Huawei P30 Lite New Edition ដែលមានសេវាកម្ម Google ភ្ជាប់មកជាមួយស្រាប់។

ម៉ូដែលថ្មីនេះ គឺជាការផ្លាស់ប្ដូរបន្ថែមទៅលើ P30 Lite ដែល Huawei ប្រកាសចេញកាលពីដើមឆ្នាំ2019។ ប្រៀបធៀបនឹងជំនាន់មុន ស៊េរីថ្មីនេះមានជម្រើស RAM 6GB និងអង្គផ្ទុកទិន្នន័យមានទំហំដល់ 256GB ឯផ្នែកដទៃទៀតនៅរក្សាដូចដើម ទាំងការឌីហ្សាញ បន្ទះឈីប អេក្រង់ និងកាមេរ៉ា។P30 Lite New Edition ចេញលក់នៅឆ្នាំ2020 ក្រោយពីមានការហាមឃាត់ពីអាមេរិកមែន តែវានៅមានសេវាកម្ម Google ដូចស៊េរីដែលចេញឆ្នាំ2019 ដែរ ហេតុផលអាចមកពីអាជ្ញាប័ណ្ណ Google គឺជាប់ជាមួយឈ្មោះនៃម៉ូដែលនេះ ហេតុនេះទោះជា Huawei នៅប្រើឈ្មោះដដែល ប៉ុន្តែប្ដូរការឌីហ្សាញបន្តិច និងប្ដូរលក្ខណសម្បត្តិបន្តិចក៏នឹងមិនល្មើសពីអាជ្ញាប័ណ្ណដែរ។ នេះតាមការយល់ឃើញរបស់សារព័ត៌មាន Android Authority។

Huawei P30 New Lite មានលក់នៅអង់គ្លេសតាំងពីពាក់កណ្ដាលខែមករា ឆ្នាំនេះ ជាមួយតម្លៃចាប់ពីប្រមាណ 389ដុល្លារឡើង៕

January 20, 2020

ក្លិប Persija មានគម្រោងយក Honda ទៅជួយក្រុមនៅរដូវកាលថ្មី

បបាល់ទាត់លីកកំពូលឥណ្ឌូនេស៊ី Persija Jakarta បានបញ្ចេញបញ្ជីឈ្មោះកីឡាករបរទេសដែលក្លិបកំពុងទាក់ទងដើម្បីយកទៅជួយក្រុមក្នុងរដូវកាល2020 ខាងមុខនេះ។ ក្នុងនោះដែរគេសង្កេតឃើញមានឈ្មោះអតីតកីឡាករ AC Milan និងជម្រើសជាតិជប៉ុន លោក Keisuke Honda ដែលសព្វថ្ងៃជាអ្នកចាត់ការទូទៅនៃក្រុមជម្រើសជាតិកម្ពុជា។
ផែនការនៃការផ្ទេរនេះ ត្រូវបានទទួលស្គាល់ដោយនាយកប្រតិបត្តិក្លឹប Persija Jakarta គឺលោក Ferry Paulus។ យោងតាមសម្ដីរបស់លោកPaulus លោកបានបញ្ជាក់ថា គណៈគ្រប់គ្រងរបស់ក្លិប Persija បច្ចុប្បន្នកំពុងធ្វើការទំនាក់ទំនងជាមួយ Honda ដើម្បីចរចាបង្កើតកិច្ចព្រមព្រៀងនៃការផ្ទេរនេះ។
គួររំឭកផងដែរថា អ្នកចាត់ការក្រុមបាល់ទាត់ជម្រើសជាតិកម្ពុជា លោក Keisuke Honda ដែលបានចូលរួមជាមួយក្លិប Vitesse នៃលីកកំពូលរបស់ប្រទេសហូឡង់ ជាមួយកិច្ចសន្យាដល់រដូវកាល2019-2020 តែកីឡាកររូបនេះ បានចាកចេញកាលពីពេលថ្មីៗនេះ ក្រោយពីមិនអាចជួយក្រុមបានល្អ៕

January 20, 2020

Tiger Street Football 2020 Avatar FC គ្រងជើងឯកមណ្ឌលកំពង់ស្ពឺ ក្នុងព្រឹត្តិការណ៍ប្រកួតបាល់ទាត់

ខេត្តកំពង់ស្ពឺៈ កាលពីថ្ងៃទី ១២ ខែមករា ឆ្នាំ ២០២០ ការប្រកួតបាល់ទាត់ Tiger Street Football 2020 រដូវកាលទី៨ មណ្ឌលទី១ ខេត្តកំពង់ស្ពឺ ដែលមានក្រុមចូលរួមប្រជែងចំនួន៥២ក្រុម ដំណើរការប្រកួតអស់រយៈពេល២ថ្ងៃ នៅដីឡូត៍ឧកញ៉ា ឈួន គឹមសាន្ត Avatar FC ក្លាយជាម្ចាស់ជើងឯកក្រោយយកឈ្នះក្រុមបាល់ទាត់ TN Kandal ក្នុងលទ្ធផល ៦ទល់១ វគ្គផ្តាច់ព្រ័ត្រ។

កីឡាករ សោម សុខវិសាល ប្រធានក្រុម Avatar FC បានស្តែងចេញនូវការតាំងចិត្តដ៏មោះមុតថា មុនក្លាយជាម្ចាស់ជើងឯកប្រចាំមណ្ឌលខេត្តកំពង់ស្ពឺនេះ ក្រុមរបស់ខ្លួនបានពុះពារឆ្លងកាត់ឧបសគ្គជាច្រើន ដោយក្នុងមួយថ្ងៃត្រូវលេងចាប់ពី៣ប្រកួតទៅ៤ប្រកួត ដើម្បីដណ្តើមយកលទ្ធផលឡើងទៅកាន់វគ្គផ្តាច់ព្រ័តក្លាយជាម្ចាស់ជើងឯក។ បន្ទាប់ពីគ្រងតំណែងជើងឯកនៅមណ្ឌលខេត្តកំពង់ស្ពឺ ប្រធានក្រុម Avatar FC រូបនេះបានប្តេជ្ញាបន្តដឹកនាំក្រុមបង្កើនការហ្វឹកហាត់បន្ថែមទៀត ដើម្បីឲ្យទម្រង់បច្ចេកទេសនៃការលេងនៅក្នុងក្រុមកាន់តែស៊ីសង្វាក់ និងយល់ចិត្តគ្នាសម្រាប់វគ្គផ្តាច់ព្រ័ត្រ Tiger Street Football 2020 នៅរាជធានីភ្នំពេញ។

គួររំលឹកផងដែលថា Tiger Street Football 2020 រៀបចំឡើងដោយស្រាបៀរថៃហ្គ័រ សម្រាប់មណ្ឌលខេត្តកំពង់ស្ពឺ មាន៥២ក្រុមធ្វើការប្រកួតជម្រុះយកតែ៦ក្រុមឡើងទៅប្រកួតបន្តវគ្គផ្តាច់ព្រ័ត្រនៅរាជធានីភ្នំពេញថ្ងៃទី២៩ ខែកុម្ភៈ ដល់ថ្ងៃទី១ ខែមិនា ជាមួយមណ្ឌល៧ទៀតដែលកំពង់តែបន្តការប្រកួតជម្រុះជាបន្តបន្ទាប់។ ដោយយក៤ក្រុមចាប់ពីចំណាត់លេខ១ដល់លេខ៤គឺឡើងទៅប្រកួតវគ្គផ្តាច់ព្រ័ត្រនៅរាជធានីភ្នំពេញអូតូ ។ដោយឡែក២ក្រុមទៀតដែលទទួលបានឱកាសឡើងទៅបង្គ្រប់៦ក្រុមសម្រាប់មណ្ឌលកំពង់ស្ពឺលេងនៅវគ្គផ្តាច់ព្រ័ត្រនៅរាជធានីភ្នំពេញនោះ គឺ៤ក្រុមដែលធ្លាក់ត្រឹមវគ្គពាក់កណ្តាលផ្តាច់ព្រ័ត្រនិងធ្វើការចាប់ឆ្នោតរើសយក២ក្រុមឡើងទៅបង្គ្រប់។

ពានរង្វាន់ចំណាត់ថ្នាក់លេខ១ទឹកប្រាក់ 1,500$ ចំណាត់ថ្នាក់លេខ២ទឹកប្រាក់ 1,000$ ចំណាត់ថ្នាក់លេខ៣ទឹកប្រាក់ 500$ និងចំណាត់ថ្នាក់លេខ៤ទឹកប្រាក់ 200$។ ព្រមទាំងជួបផ្ទាល់ជាមួយកំពូលតារាបាល់ទាត់អន្តរជាតិ Rio Ferdinand នៅថ្ងៃប្រកួតផ្តាច់ព្រ័ត្រដណ្តើមជើងឯក នៅរាជធានីភ្នំពេញ ថ្ងៃ២៩ ខែកុម្ភៈ ដល់ថ្ងៃទី១ ខែមិនា ឆ្នាំ២០២០ ខាងមុខនេះ។

ក្រោយបញ្ចប់ការប្រកួតព្រឹត្តិការណ៍ Tiger Street Football 2020 ក៏មានការប្រគុំដន្រ្តីដ៍កក្រើកដែលមានការចូលរួមពីតារាល្បីប្រចាំកម្ពុជាដូចជា លោកព្រាប សុវត្ថិ អ្នកនាង សុគន្ធ នីសា លោក ហ្សូណូ លោក ដួង វិរៈសិដ្ឋ និងកញ្ញា កែវ ចាន់ដាលីន ដើម្បីផ្តល់ជូននូវការសប្បាយរីករាយជូនប្រជាពលរដ្ឋនៅថ្ងៃចុងសប្តាហ៍ក្រោយសំរាកពីការងារ។ ក្រៅពីការបង្ហាញវត្តមានពីសំណាក់តារាល្បីទាំងនេះ Tiger Street Football 2020 រដូវកាលទី៨ក៍មានកម្មវិធីពិសេសៗសប្បាយ ៗជាច្រើនបង្កើនបរិយាកាសរីករាយជាមួយការប្រគុំដន្ត្រីផងដែរ ក្នុងនោះមានដូចជាផ្តល់ឱកាសជូនអ្នកចូលទស្សនាចូលរួមលេងហ្គេមននៅក្លឹបទឹកកក Tiger Crystal Igloo

ស្រាបៀរថៃហ្គ័រជាស្រាបៀរ ដែលមានគុណភាពខ្ពស់លំដាប់ថ្នាក់អន្តរជាតិមានដើមកំណើតតាំងពីឆ្នាំ១៩៣២ នៅប្រទេសសិង្ហបុរី និងមានលក់នៅច្រើនជាង៧០ប្រទេសនៅទូទាំងពិភពលោក ហើយស្រាបៀរថៃហ្គ័រឈ្នះ ពានរង្វាន់លំដាប់ថ្នាក់អន្តរជាតិច្រើនជាង៤០មេដាយផ្នែករសជាតិ និងគុណភាព។ សូមចូលទៅកាន់ទំព័រហ្វេសប៊ុកផ្លូវការ របស់ស្រាបៀរថៃហ្គ័រ៖ www.facebook.com/TigerBeerKH
ស្តែងចេញនូវការតាំងចិត្តដ៏មោះមុតរបស់អ្នក ជាមួយស្រាបៀរថៃហ្គ័រ។
ពិសាដោយការទទួលខុសត្រូវ៕

January 20, 2020

មាន “ស្លេស្ម៍” នៅក្នុងបំពង់កជាប់រហូត គួរធ្វើយ៉ាងណា?

ការដែលក្នុងបំពង់ករបស់យើងមានស្លេស្ម៍ជាប់រហូត 1ឆ្នាំទល់ 1ឆ្នាំ(Chronic secretion in the throat) ជួនបាត់ ជួនមាន វាពិតជាគួឱ្យរំខានណាស់មែនទេ? ដូច្នេះ បើចង់បាត់ តោះ យើងទៅមើលចម្លើយទាំងអស់គ្នា…។

ស្លេស្ម៍នោះ គឺកើតមកពីការដែលមានមេរោគឬវត្ថុចម្លែកចូលទៅធ្វើឱ្យរលាកបំពង់ខ្យល់ ហើយបំពង់ខ្យល់មិនត្រូវការឱ្យវត្ថុនោះធ្លាក់ចូលទៅក្នុងសួត ទើបបង្កើតសម្បកមកចាប់ស្លេស្ម៍ចេញមកពីក្រពេញសាងទឹករំអិលដែលស្ថិតនៅក្នុងសាច់ភ្នាសផ្លូវដង្ហើម។ ការដែលមានស្លេស្ម៍នៅក្នុងបំពង់ករ៉ាំរ៉ៃនេះ អាចបណ្ដាលមកពីជំងឺ ឬសភាវមួយចំនួនដូចខាងក្រោមនេះ៖
1. ជំងឺរលាកច្រមុះដោយប្រតិកម្មចាញ់ និងរលាកច្រមុះប្រភេទមិនមានប្រតិកម្មចាញ់
2. ជំងឺរលាកសៃណឹស
3. ជំងឺអាស៊ីតរំលាយអាហារហូរបញ្ច្រាស់
4. ការប្រើសំឡេងខុសវិធី
5. ជំងឺរលាកបំពង់ខ្យល់រ៉ាំរ៉ៃ និងជំងឺហឺត
6. ការឆ្លងមេរោគរ៉ាំរ៉ៃនៅក្នុងបំពង់ក
7. ការក្រហាយរលាក និង/ឬការមានរបួសរ៉ាំរ៉ៃនៅក្នុងបំពង់ក។

បើមិនត្រូវការឱ្យមានស្លេស្ម៍ ក៏ត្រូវការពារពីដើមហេតុ
1. មិនបណ្ដោយឱ្យមេរោគ ឬវត្ថុចម្លែកចូលទៅក្នុងបំពង់ខ្យល់ ដោយការពាក់ម៉ាសបិទច្រមុះ។ បើមានអារម្មណ៍ថា ទើសទាល់ អាចប្រើប្រេងខ្យល់បន្តក់នៅលើក្រណាត់ម៉ាសបាន ធានាថា អាការនេះនឹងល្អប្រសើរឡើងមិនខាន។
2. បើស្លេស្ម៍ខាប់ និងស្អិត អាចញ៉ាំទឹកក្ដៅឧណ្ហៗ ដើម្បីជួយរំលាយស្លេស្ម៍បាន។ មិនគួរញ៉ាំទឹកត្រជាក់ទេ ព្រោះមេរោគនឹងចូលចិត្ត ប្រព័ន្ធប្រឆាំងជំងឺនឹងធ្លាក់ចុះ ហើយនឹងឆ្លងមេរោគកាន់តែច្រើនឡើង។
3. ហាត់ប្រាណឱ្យបានជាប់ជាប្រចាំ៕

January 18, 2020

វីធីកម្ចាត់ស្លាកស្នាមនៅលើស្បែក

បន្ទាប់ពីការបង្កឱ្យមានរបួសណាមួយមិនថាតិច ឬច្រើននោះទេ គឺតែងតែបន្សល់ទុកនូវក្តីបារម្ភជានិច្ចសម្រាប់អ្នកដែលស្រឡាញ់ភាពរលោងស្រស់ស្អាតនៃស្បែក ជាពិសេសគឺនារីៗតែម្តង។ ជាការពិតស្លាកស្នាមខ្លះ វាពិតជាមិនអាច គេចផុតពិតមែន ប៉ុន្តែបើអ្នកចេះថែរក្សា និងអនុវត្តតាមការណែនាំល្អៗនោះ ស្នាមដែលត្រូវកើតមាននៅលើស្បែក ប្រហែលជាអាចត្រូវបានកាត់បន្ថយខ្លះក៏ថាបានដែរ។ ទុកក្តីបារម្ភត្រង់នេះសិន រួចងាកមកអានពីវិធីល្អៗដែលអាចជួយអ្នកក្នុងការធ្វើយ៉ាងណាឱ្យស្នាមដែលសេសសល់នៅលើស្បែកបន្ទាប់ពីរបួសជាសះស្បើយមានតិចបំផុត។

កុំយកដៃប៉ះរបួស : ដៃជាផ្នែកមួយនៃរាងកាយដែលបានប៉ះពាល់ជាមួយនឹងបាក់តេរីជាច្រើនប្រភេទ ហេតុដូច្នេះវាពិតជាចៀសមិនផុតទេដែលថាដៃរបស់អ្នកជាកន្លែងដែលមានមេរោគច្រើន ហើយបើអ្នកយកដៃទៅប៉ះត្រង់កន្លែងដែលមានរបួសនោះ បាក់តេរីដែលនៅជាប់ដៃរបស់អ្នកនឹងឆ្លងទៅកាន់របួសនោះ វាអាចធ្វើឱ្យរបួសមិនងាយជា ឬរីកកាន់តែធំឡើង ដូច្នេះវិធីល្អបំផុតគឺព្យាយាមកុំយកដៃទៅប៉ះរបួសនោះ ដើម្បីជួយឱ្យមុខរបួសមិនឆ្លង និងឆាប់ដុះស្បែកថ្មី។
ឱ្យរបួសត្រូវខ្យល់ខ្លះនាពេលយប់ : ដោយសារតែខ្លាចថាមេរោគផ្សេងៗនឹងចូលទៅក្នុងរបួស ហេតុនេះហើយបានជាពេលថ្ងៃអ្នកត្រូវការពារវាដោយការរុំដោយបង់រុំរបួសស្អាតមានអនាម័យ ប៉ុន្តែបើពេលយប់មកដល់កាលណា អ្នកគួរតែស្រាយបង់រុំរបួសនោះចេញ ហើយជូតសម្អាតវាឱ្យបានស្អាត ការធ្វើបែបនេះនឹងធ្វើឱ្យរបួសឆាប់ជា និងកាត់បន្ថយស្លាកស្នាមបានទៀតផង។
សំណើម : ការផ្តល់សំណើមដល់ស្បែកតាមរយៈការប្រើសំឡីកប្បាសជ្រលក់ជាមួយទឹកបន្តិច និងធ្វើឱ្យស្បែកថ្មីលូតលាស់បានកាន់តែលឿនឡើង។
សម្អាតមុខរបួស : ការសម្អាតមុខរបួសឱ្យបានស្អាតគឺជារឿងចាំបាច់ដែលអ្នកត្រូវតែធ្វើ ព្រោះវិធីនេះមិនត្រឹមតែជាការជួយឱ្យរបួសឆាប់ជាប៉ុណ្ណោះទេ តែវាក៏មានសមត្ថភាពក្នុងការជួយធ្វើឱ្យស្នាមនៅសល់តិចជាងមុនផងដែរ។
វីតាមីនE : វាជាធាតុផ្សំដ៏សំខាន់មួយដែលគេតែងយកមកប្រើនៅក្នុងគ្រឿងសម្អាង ដើម្បីធ្វើឱ្យស្បែករលោងស្អាត និងកម្ចាត់ស្លាកស្នាម។វីតាមីនE អាចជួយឱ្យរបួសឆាប់ជាសះស្បើយ ជួយបង្កើតកោសិកាថ្មី ទប់ស្កាត់នឹងការកើតឡើងនៃស្នាមលើស្បែក។ ការម៉ាស្សាប្រើវីតាមីនE នៅលើស្បែក(បន្ទាប់ពីជារបួស) ជាវិធីល្អមួយទៀតដែលអ្នកគួរធ្វើ ដើម្បីកាត់បន្ថយស្នាមសន្លាក៕

January 18, 2020

Author: ធឿន មករា