Author: ធឿន មករា

ក្រសួង និងអ្នកជំនាញកំពុងសិក្សាលើដំណាំកៅស៊ូគ្រួសារ សំដៅបង្កើនចង្វាក់តម្លៃកៅស៊ូ
ក្នុងរយៈពេលជិត 1ទសវត្សរ៍ចុងក្រោយនេះ ការធ្លាក់ចុះតម្លៃ និងបញ្ហាដែលកើតមានឡើងចំពោះដំណាំកៅស៊ូនៅកម្ពុជា បានបង្កបញ្ហាប្រឈមខ្លាំងដល់កសិករ ដូច្នេះហើយទើបរដ្ឋាភិបាល បានបង្កើតការសិក្សាស្រាវជ្រាវមួយ ដោយផ្តោតលើដំណាំកៅស៊ូគ្រួសារនៅក្នុងតំបន់មួយចំនួនក្នុងព្រះរាជាណាចក្រកម្ពុជា។
អគ្គនាយកដ្ឋានកៅស៊ូ នៃក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា ការសិក្សាស្រាវជ្រាវនេះនឹងធ្វើឡើងដើម្បីឆ្លើយតបនឹងការធ្លាក់ចុះតម្លៃកៅស៊ូចាប់តាំងពីឆ្នាំ2011មក ព្រមទាំងក្នុងគោលបំណងស្វែងរកបញ្ហាប្រឈម និងស្វែងយល់ពីរបៀបដែលកសិករផ្តួចផ្តើមផលិត កែច្នៃផលិតផលកៅស៊ូ និងធ្វើទីផ្សារ និងដើម្បីវិភាគខ្សែចង្វាក់តម្លៃកៅស៊ូកម្ពុជា ឱ្យកាន់តែយល់ច្បាស់អំពីវិធីសាស្ត្រដែលអាចជួយដល់កសិករបាន។
ឯកឧត្តម ប៉ុល សុផា អគ្គនាយកនៃអគ្គនាយកដ្ឋានកៅស៊ូ
ឯកឧត្តម ប៉ុល សុផា អគ្គនាយកនៃអគ្គនាយកដ្ឋានកៅស៊ូ បានឱ្យដឹងថា ការសិក្សានេះនឹងត្រូវធ្វើឡើងដោយមានការសហការរវាងក្រសួងកសិកម្ម ជាមួយលោក Jean Christoph Diepart ជាអ្នកស្រាវជ្រាវឯករាជ្យមកពីមហាវិទ្យាល័យ Gembloux Agri-Bio នៃសាកលវិទ្យាល័យ Liege ប្រទេសបែលហ្ស៊ិក និងស្ថាប័នពាក់ព័ន្ធ។
យោងតាមសេចក្តីប្រកាសព័ត៌មាន ដែលបានឱ្យដឹងតាមរយៈអគ្គនាយកដ្ឋានកៅស៊ូ គម្រោងនេះបានសម្រេចកំណត់គោលដៅសិក្សាស្រាវជ្រាវនៅក្នុងខេត្តចំនួន3 ដែលមានការដាំដុះ និងផលិតកែច្នៃកៅស៊ូចម្បងនៅកម្ពុជា ដែលរួមមាន ស្រុកស្ទឹងត្រង់ នៅក្នុងខេត្តកំពង់ចាម ស្រុកស្នួល ក្នុងខេត្តក្រចេះ និងស្រុកបរកែវ ក្នុងខេត្តរតនគិរី ហើយការសិក្សាស្រាវជ្រាវនេះបានចាប់ផ្តើមកាលពីពាក់កណ្តាលខែមករា ហើយគ្រោងនឹងបញ្ចប់ក្នុងខែមិថុនា ឆ្នាំ2020 នេះ។
នាយកដ្ឋានអភិវឌ្ឍន៍កៅស៊ូ នៃអគ្គនាយកដ្ឋានកៅស៊ូបានឱ្យដឹងថា “ការសិក្សាស្រាវជ្រាវនេះ ជ្រើសយកការសិក្សាលើកៅស៊ូគ្រួសារ ព្រោះពួកគេមិនជាប់ពាក់ព័ន្ធនឹងដីសម្បទានកៅស៊ូទេ”។ កៅស៊ូគ្រួសារ សំដៅលើកសិករដែលដាំដុះកៅស៊ូក្នុងទំហំផ្ទៃដីតិចជាង 45ហិកតា។
ទោះជាយ៉ាងណា ការសិក្សានេះអាចនឹងជួយដោះស្រាយវិបត្តិតម្លៃកៅស៊ូនៅកម្ពុជាបាន។ ប៉ុន្តែមិនទាន់មានព័ត៌មានលម្អិតនៅឡើយទេ ដោយរង់ចាំលទ្ធផលនៃការសិក្សានេះបញ្ចប់សិន។ ពេលនោះនឹងមានការធ្វើរបាយការណ៍លម្អិត ដោយនឹងបញ្ចូលការស្រាវជ្រាវទៅក្នុងគោលនយោបាយរបស់រដ្ឋាភិបាលសម្រាប់វិស័យកៅស៊ូ។
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា
លោកឧកញ៉ា លឹម ហេង អនុប្រធានសភាពាណិជ្ជកម្ម បានប្រាប់កាសែតឡារ៉ែនពាណិជ្ជថា ការសិក្សាដែលគេសំដៅទៅលើអាជីវកម្មកៅស៊ូលក្ខណៈគ្រួសារនេះ ដោយសារតែវាខុសពីកៅស៊ូ ដែលធ្វើលើដីសម្បទាន។ ដំណាំកៅស៊ូលើផ្ទៃដីសម្បទានធំៗ គេបានធ្វើរបាយការណ៍ជូនក្រសួងជារៀងរាល់ឆ្នាំ អំពីការដាំដុះ ការអភិវឌ្ឍលើផ្ទៃដីបន្ថែម ជាដើម តែចំពោះកៅស៊ូគ្រួសារវិញ គឺមិនមានរបាយការណ៍ច្បាស់លាស់ទេ។
លោកឧកញ៉ា លឹម ហេង បានមានប្រសាសន៍បញ្ជាក់ថា៖ “កៅស៊ូក្រុមហ៊ុនដីសម្បទាន គេមានតួលេខដែលបានរាយការណ៍បញ្ជូនទៅក្រសួងកសិកម្ម ឯកៅស៊ូគ្រួសារមិនមានតួលេខច្បាស់លាស់ទេ ហើយពូជទៀតសោត ក៏មិនមានលក្ខណៈស្តង់ដាឬជាពូជមិនល្អ គ្មានប្រភពច្បាស់លាស់ ដែលអាចនាំឱ្យផលដែលទទួលបានមានគុណភាពអន់ ក្រសួងក្តាប់មិនជុំពីស្ថានភាព កៅស៊ូគ្រួសារនេះទេ អុីចឹងហើយទើបក្រសួងចុះសិក្សាដើម្បីប្រមូលទិន្នន័យ”។
លោកឧកញ៉ា បានបន្ថែមថា មួយរយៈនេះក្រោយពីតម្លៃកៅស៊ូធ្លាក់ចុះ កសិករមួយចំនួនបានកាប់ដើមកៅស៊ូចោល ដើម្បីដាំដំណាំផ្សេងវិញ ហើយក៏មិនមានតួលេខពីការកាប់ចោល ឬដាំប៉ុន្មាន និងនៅសល់ប៉ុន្មាននោះដែរសម្រាប់ដំណាំកៅស៊ូគ្រួសារនេះ ដូច្នេះក្រសួងចុះទៅសិក្សានេះ គឺជាការត្រឹមត្រូវហើយ។
លោកឧកញ៉ាបានបញ្ជាក់ថា៖“ការសិក្សាទៅលើកៅស៊ូគ្រួសារនេះ គឺជាការខិតខំរបស់អគ្គនាយកដ្ឋានកៅស៊ូ ពេញដៃពេញជើងក្នុងការសិក្សា និងប្រមូលទិន្នន័យពិតប្រាកដ។ ខ្ញុំគិតថា ជាការល្អបើសិនជាមានតួលេខច្បាស់លាស់ វានឹងបូកបញ្ចូលនូវទិន្នន័យដែលបានពីការសិក្សានោះ ដើម្បីជាផលប្រយោជន៍សម្រាប់វិស័យកៅស៊ូនៅស្រុកយើងផងដែរ ពីព្រោះថា ប្រសិនបើអ្នកវិនិយោគគេចង់ផលិតកង់ឡាន ឬផលិតផលពីកៅស៊ូស្រុកខ្មែរ គេត្រូវដឹងពីតួលេខវត្ថុធាតុដើមកៅស៊ូយើងថា ក្នុង1ឆ្នាំមានប៉ុន្មាន?”
លោកឧកញ៉ា លឹម ហេង បានបន្តថា៖“បើមិនបានសិក្សាឱ្យច្បាស់លាស់ទេ យើងមិនដឹងតួលេខថា មានវត្ថុធាតុដើមប៉ុន្មានត្រូវផលិតនោះទេ។ តើគេដាក់រោងចក្រសមស្របឬអត់? សម្រាប់អ្នកវិនិយោគ គេត្រូវមើលថា តើក្នុង 1ឆ្នាំត្រូវប្រើវត្ថុធាតុដើមសម្រាប់ផលិតចំនួនប៉ុន្មាន? តើត្រូវការដាំបន្ថែមប៉ុន្មានសម្រាប់ការមកធ្វើវិនិយោគ”។
លោកឧកញ៉ាបានបញ្ជាក់ដែរថា៖ “ការសិក្សាដែលយើងអាចស្រង់តួលេខបាន គឺសម្រាប់ឱ្យគេវិនិយោគ ហើយសម្រាប់អ្នកវិនិយោគ គេនឹងអាចវាយតម្លៃបាន ដែលបើតាមកៅស៊ូសរុបរបស់យើងមានទំហំប្រមាណ 434,552ហិកតា ទើបការចុះទៅសិក្សាបន្ថែមអំពីកៅស៊ូគ្រួសារនេះ នឹងអាចប្រមូលទិន្នន័យបានបន្ថែមទៀត បូកបញ្ចូលទំហំដែលយើងមានសម្រាប់អ្នកវិនិយោគិន ដែលគេមកវិនិយោគគេអាចធ្វើការវាយតម្លៃ និងប៉ាន់ស្មានបាន”។
យោងតាមសេចក្តីរាយការណ៍កន្លងមក កាលពីឆ្នាំ2011 កៅស៊ូមានតម្លៃជាមធ្យម 4,600 ដុល្លារ ក្នុង 1តោន ប៉ុន្តែកៅស៊ូបានធ្លាក់ថ្លៃ មកនៅត្រឹមប្រហែល 1,350ដុល្លារ ក្នុង 1តោនរហូតមកដល់ដើមឆ្នាំ2020។
ទិន្នន័យបង្ហាញថា គិតត្រឹមខែវិច្ឆិកា ឆ្នាំ2019 ផ្ទៃដីដាំកៅស៊ូសរុបមានទំហំ 434,552ហិកតា ក្នុងនោះកៅស៊ូដែលអាចប្រមូលផលបានមានជាង 23ម៉ឺនហិកតា។
ការនាំចេញកៅស៊ូរបស់កម្ពុជាបានកើនឡើង 24% ក្នុងរយៈពេល 11ខែក្នុងឆ្នាំ2019 ធៀបទៅនឹងរយៈពេលដូចគ្នាក្នុងឆ្នាំ2018 ដោយនាំចេញបាន 233,677តោន មានតម្លៃ 311លានដុល្លារ ខណៈដែលការនាំចេញកៅស៊ូនៅឆ្នាំ2018 មានចំនួន 21ម៉ឺនតោន មានតម្លៃប្រមាណ 300លានដុល្លារ។ នេះបើតាមទិន្នន័យរបស់អគ្គនាយកដ្ឋានកៅស៊ូ៕
January 27, 2020
អគ្គនាយកក្រុមហ៊ុននាំចូលគ្រឿងសង្ហារិមធំមួយនៅកម្ពុជា ចែករំលែកគន្លឹះជោគជ័យលើទីផ្សាក្នុងស្រុក
ទីផ្សារអចលនទ្រព្យនៅកម្ពុជា ដែលកំពុងតែរីកចម្រើនឥតឈប់ឈរ និងមានការចាប់អារម្មណ៍ខ្លាំងពីសំណាក់ប្រជាជនក្នុងស្រុក និងវិនិយោគិនបរទេសបានទាក់ទាញវិនិយោគិនថ្មីៗជាច្រើនឱ្យងាកមកចាប់អារម្មណ៍វិនិយោគលើវិស័យនាំចូលគ្រឿងសង្ហារិម។ ការវិនិយោគនេះ គឺដើម្បីបំពេញតម្រូវការម្ចាស់អាជីវកម្មក្នុងទីផ្សារសំណង់គេហដ្ឋាន និងវិស័យអចលនទ្រព្យនៅកម្ពុជា។
តែក្នុងចំណោមអ្នកវិនិយោគលើវិស័យនាំចូលគ្រឿងសង្ហារិមទាំងអស់នោះ លោក ដួង អក្ខរា អគ្គនាយកក្រុមហ៊ុន ផ្គត់ផ្គង់គ្រឿងសង្ហារិម អេស.អេ (S.A Solutions Co, LTD) ដែលជាក្រុមហ៊ុនធំជាងគេមួយដែរនៅប្រទេសកម្ពុជាបានលើកឡើងថាការចាប់ផ្តើមអាជីវកម្មលើវិស័យគ្រឿងសង្ហារិមតុបតែងផ្ទះនេះ មិនមែនជារឿងងាយស្រួលពេកទេ ក្នុងការធ្វើឱ្យសម្រេចបានជោគជ័យ។
លោក ដួង អក្ខរា អគ្គនាយកក្រុមហ៊ុនផ្គត់ផ្គង់គ្រឿងសង្ហារិម អេស.អេ ថតរូបជាមួយបុគ្គលិក
លោក ដួង អក្ខរា អគ្គនាយកក្រុមហ៊ុនផ្គត់ផ្គង់គ្រឿងសង្ហារិម អេស.អេ បានចែករំលែកគន្លឹះសំខាន់ៗចំនួន 6ចំណុច ដែលជាបទពិសោធផ្ទាល់ខ្លួន ដែលធ្វើឱ្យក្រុមហ៊ុនរបស់លោកអាចឈរជើងនៅក្នុងអាជីវកម្មគ្រឿងសង្ហារិមបានរហូតមកដល់សព្វថ្ងៃ ៖
1. ត្រូវសិក្សាពីផែនការឱ្យបានច្បាស់លាស់៖ ត្រង់ចំណុចនេះ លោកថា នៅក្នុងវិស័យគ្រឿងសង្ហារិម មានផ្នែកជាច្រើនខុសគ្នា ហេតុនេះបើយើងជាម្ចាស់ក្រុមហ៊ុនលក់គ្រឿងសង្ហារិម ឬចង់វិនិយោគក្នុងវិស័យនេះ ចាំបាច់ត្រូវគិតឱ្យច្បាស់ជាមុនសិន គឺត្រូវសិក្សាផែនការឱ្យបានលម្អិត និងច្បាស់លាស់ ព្រោះកាលណាយើងសិក្សាបានច្បាស់លាស់ក្នុងដំណើរប្រតិបត្តិការការនាំចូល និងដំណើការលក់គ្រឿងសង្ហារិមហើយនោះ វានឹងបញ្ចៀសបាននូវហានិភ័យចំពោះមុខ ចំពោះអតិថិជន។ ហេតុនេះ បើយើងរកស៊ីក្នុងវិស័យគ្រឿងសង្ហារិម យើងត្រូវគិត និងសិក្សាពីផែនការជាមុនសិននោះទើបកសាងទំនាក់ទំនងបានយូរអង្វែងជាមួយគ្រប់ដៃគូអាជីវកម្មនានា។
2. ត្រូវសិក្សាអំពីទីផ្សារនៅក្នុងប្រទេស ៖ មុននឹងចាប់ផ្ដើមប្រឡូកនៅក្នុងអាជីវកម្មនាំចូល គ្រឿងសង្ហារិម ការសិក្សាពីទីផ្សារក្នុងប្រទេស ក៏ជារឿងសំខាន់មួយដែរ ព្រោះដើម្បីឱ្យដឹងថា តើនៅកម្ពុជា តើមានក្រុមហ៊ុនប៉ុន្មាន កំពុងប្រតិបត្តិកាលើការងារគ្រឿងសង្ហារិម? តើមានការប្រកួតប្រជែងទីផ្សារកម្រិតណា? ហើយថា តើយើងគួរមានយុទ្ធសាស្ត្របែបណាដើម្បីយកឈ្នះទីផ្សារនៅក្នុងប្រទេសបាន?។
លោកបានបញ្ជាក់ត្រង់ចំណុចនេះបន្តថា អាជីវកម្មមួយជោគជ័យបាន គឺត្រូវការយុទ្ធសាស្ត្រទីផ្សារខ្លាំង។ ការធ្វើទីផ្សារ ឬភាគច្រើនត្រូវបានគេហៅថា Marketing គឺជាដង្ហើមរបស់អាជីវកម្ម។ អាជីវកម្មខ្លះ ត្រូវដួលភ្លាមៗ បន្ទាប់ពីបើកដំណើរការមិនបានប៉ុន្មានផង បញ្ហាធំគឺដោយសារតែខ្សោយខាងផ្នែកយុទ្ធសាស្ត្រទីផ្សារ។ ចេញរកស៊ី មិនមែនថា ឱ្យតែមានលុយបើកដំណើរការហើយ មានគេមកតម្រង់ជួរទិញនោះទេ យើងត្រូវការការធ្វើទីផ្សារដើម្បីជំរុញការលក់។
ការធ្វើ Marketing បានល្អ នឹងជំរុញឱ្យផលិតផល ឬសេវាកម្មរបស់យើងអាចចូលទៅក្នុងទៅផ្សារបាន និងមានការទទួលស្គាល់ពីអតិថិជនបានយ៉ាងលឿន។
3. សិក្សាពីអ្នកប្រើប្រាស់៖ ទម្លាប់របស់ប្រជាជនកម្ពុជា 1ចំណុចដែលធ្វើឱ្យអាជីវកម្មខ្លះដួល ហើយអាជីវកម្មខ្លះទៀតជោគជ័យនោះ គឺការចូលចិត្តអ្វីដែលថ្មី។ ទំនោរចិត្តនេះ មិនមែនតែអតិថិជននៅកម្ពុជានោះទេ គឺនៅទូទាំងពិភពលោកតែម្តង តែអ្វីដែលប្លែកនោះ គឺអតិថិជនកម្ពុជាឆាប់ណាយ ហើយចូលចិត្តអ្វីតែមួយឆាវៗទេ។ ឧទាហរណ៍ដូចជា ផ្សារាត្រី ផ្សារកុងតឹន័រ គុយទាវទូកជាដើម ដែលមានភ្ញៀវកកកុញពេលចូលទីផ្សារដំបូង តែយូរៗទៅក៏អស់ភ្ញៀវស្ងាត់សូន្យតែម្តង។ អាជីវកម្មទាំងឡាយ ត្រូវតែត្រៀមគ្រប់ពេល ដើម្បីផ្លាស់ប្តូរនូវអ្វីដែលថ្មីសម្រាប់ការបត់បែនរបស់អតិថិជន។
4. រៀបចំរចនាសម្ព័ន្ធក្រុមហ៊ុនឱ្យបានត្រឹមត្រូវ៖ ដើម្បីទទួលជោគជ័យក្នុងមុខជំនួញ លោកថា ក្រោយពីយើងបានរៀបចំផែនការទុកមុនរួចរាល់ហើយ។ នៅក្នុងអាជីវកម្មនីមួយៗ មានយុទ្ធសាស្ត្រគ្រប់គ្រងខុសៗគ្នា និងអាស្រ័យលើទំហំ និងប្រភេទនៃអាជីវកម្ម។ ការមានរចនាសម្ព័ន្ធគ្រប់គ្រងល្អ អាចធ្វើឱ្យម្ចាស់អាជីវកម្មមិនសូវឈឺក្បាល ហើយអាជីវកម្មនឹងដំណើរការទៅបានដោយរលូន។
ការរចនាប្រព័ន្ធគ្រប់គ្រងអាជីវកម្ម គឺរៀបចំដោយម្ចាស់អាជីវកម្ម ឬសហស្ថាបនិកដែលយល់ច្បាស់អំពីប្រតិបត្តិការអាជីវកម្មរបស់ខ្លួន។ ដូចនេះ ការរៀបចំរចនាសម្ព័ន្ធក្រុមហ៊ុនឱ្យបានត្រឹមត្រូវ គឺជារឿងសំខាន់ដែរ ព្រោះវានឹងជួយយើងឱ្យបំពេញភារកិច្ចបានតាមផែនការ ដាក់បុគ្គលិកត្រូវជំនាញ ត្រូវកន្លែង ដែលជាសមត្ថភាពពិតរបស់ពួកគេផ្ទាល់ ដើម្បីងាយបំពេញការងារបានជោគជ័យ។
5. ត្រូវមានភាពក្លាហាន និងហ៊ានប្រថុយ៖ តាំងពីចាប់ផ្តើមអាជីវកម្ម លោកប្រឈមបញ្ហាជាច្រើនលើការបោកប្រាស់ នៅពេលដែលគ្រឿងសង្ហារិមបានកុម្ម៉ង់ និងកក់ប្រាក់រួចហើយ តែត្រូវគេមិនផ្តល់ឱ្យ។ តែចំណុចនេះ លោកមិនរារែកទេ និងតែងប្រាប់ខ្លួនឯងថា បើហ៊ានប្រឡូកក្នុងអាជីវកម្មនេះ ត្រូវតែហ៊ានខាតបង់ខ្លះ ទុកជាមេរៀនថ្ងៃក្រោយ ព្រោះការខាតបង់ មិនមែនមានរហូតនោះទេ។
លោកបន្តថា បើយើងមិនក្លាហាន យើងមិនអាចចេញរកស៊ីបានទេ ហើយបើយើងមិនចេះស៊ូនៅក្នុងការរកស៊ីអាជីវកម្ម យើងក៏មិនអាចមានភាពរីកចម្រើនបានដែរ ហេតុនេះហើយយើងត្រូវតែដាក់ចិត្តមួយថា ទៅឱ្យដល់ មុជឱ្យជ្រៅ ព្រោះកាលណាបើយើងដាក់ចិត្តខំប្រឹងហើយនោះ ច្បាស់ជាអាចទទួលបានផ្លែផ្កានៅពេលណាមួយជាក់ជាមិនខាន។
6. ភាពជឿទុកចិត្តខ្ពស់៖ មុខរបរបម្រើសេវាកម្មលើគ្រឿងសង្ហារិមនេះ លោកថា មានភាពផុយស្រួយណាស់។ យើងធ្វើការជាមួយចិត្ត និងចិត្ត គេចង់បានអីយើងបម្រើទៅតាមសេចក្តីត្រូវការរបស់អតិថិជន ថែរក្សាអតិថិជន កុំឱ្យថ្នាំងថ្នាក់ចិត្ត បម្រើឱ្យមានប្រសិទ្ធភាព។ បើនិយាយពីរឿងការងាររកស៊ី មុខជំនួញណាក៏មានការប្រកួតប្រជែងគ្នាដែរ ប៉ុន្តែមុខជំនួញគ្រឿងសង្ហារិម លោកគិតថា មានការប្រកួតប្រជែងគ្នាខ្លាំងជាងគេ។
លោកបន្តថា ដោយសារយើងរកស៊ីក្នុងវិស័យនេះ ភាគច្រើនទាក់ទងតែជាមួយអ្នកដែលមានលុយ អ្នកមានមុខមាត់នៅក្នុងសង្គម។ ពួកគាត់ទាំងនោះ ចង់បានអ្វីដែលល្អ មានគុណភាព ដូច្នេះ យើងចាំបាច់ត្រូវផ្តល់នូវទំនុកចិត្តខ្ពស់ដល់អតិថិជន។
សូមបញ្ជាក់ជូនដែរថា ក្រុមហ៊ុនផ្គត់ផ្គង់គ្រឿងសង្ហារិម អេស.អេ (S.A Solutions Co, LTD) ជាក្រុមហ៊ុននាំចូលគ្រឿងសង្ហារិមដ៏ធំមួយនៅកម្ពុជា។
មានវត្តមានត្រឹមតែជិត 10ឆ្នាំក្នុងទីផ្សារកម្ពុជាប៉ុណ្ណោះតែក្រុមហ៊ុនទទួលបានការបញ្ជាទិញកើនឡើងយ៉ាងច្រើន ដោយការលក់ បានកើនឡើងពី20% ក្នុងឆ្នាំដំបូង រហូតដល់ 80% ក្នុងឆ្នាំបន្ទាប់ ដោយក្នុង 1ឆ្នាំការលក់អាចកើនឡើងប្រហែលជា4ដង។
បើនិយាយពីការកកើតក្រុមហ៊ុននេះវិញ ពីដំបូងមានតែបុគ្គលិកតែ 2នាក់ប៉ុណ្ណោះ តែរហូតមកដល់បច្ចុប្បន្ន ក្រុមហ៊ុននេះបានវិវឌ្ឍខ្លួន រហូតដល់មានបុគ្គលិកជាង 40នាក់ និងមាន 3សាខានៅកម្ពុជា។ សម្រាប់ឆ្នាំ2020នេះ ក្រុមហ៊ុនគ្រោងនឹងពង្រីកសាខានៅទីតាំង5 បន្ថែមទៀត ដើម្បីឆ្លើយនឹងតម្រូវការទីផ្សារគ្រឿងសង្ហារិម នៅកម្ពុជាដែលកំពុងមានសម្ទុះខ្លាំង។
ជារួមមក បើសិនជាអ្នកវិនិយោគនៅក្នុងវិស័យគ្រឿងសង្ហារិម ប្រកាន់ខ្ជាប់នូវគន្លឹះទាំង 6ចំណុចខាងលើនោះ នឹងទាក់ទាញបានប្រជាប្រិយភាព ការជឿទុកចិត្ត និងការគាំទ្រពីអតិថិជន ដែលធ្វើឱ្យជំនួញប្រភេទនេះជោគជ័យមិនខាន៕
January 27, 2020
ឆ្នាំ2020 កម្ពុជាចាប់ផ្តើមពន្លឿនដំណើរការបច្ចេកវិទ្យា 5G
វគ្គបណ្តុះបណ្តាលស្តីពីបច្ចេកវិទ្យា5G ដែលរៀបចំឡើងដោយបណ្ឌិត្យសភាបច្ចេកវិទ្យាទូរគមនាគមន៍ និងព័ត៌មាននៃសាធារណរដ្ឋប្រជាមានិតចិន(ហៅកាត់ថា CAICT)សម្រាប់មន្ត្រីក្រសួងប្រៃសណីយ៍ និងទូរគមនាគមន៍ត្រូវបានធ្វើឡើងកាលពីថ្ងៃទី6 ដល់ថ្ងៃទី10 ខែមករា ឆ្នាំ2020 កន្លងទៅនៅទីក្រុងប៉េកាំង ត្រូវបានបិទបញ្ចប់ហើយក្រោមអធិបតីភាពរដ្ឋលេខាធិការក្រសួងប្រៃសណីយ៍ និងទូរគមនាគមន៍។
វគ្គបណ្តុះបណ្តាលនេះ គឺធ្វើឡើងក្នុងគោលបំណងចែករំលែកនូវបទពិសោធដល់មន្ត្រីនៃក្រសួងប្រៃសណីយ៍ និងទូរគមនាគមន៍កម្ពុជា ស្តីអំពីគោលនយោបាយសម្រាប់ការគាំទ្រការអភិវឌ្ឍបច្ចេកវិទ្យា 5G និងធ្វើបច្ចុប្បន្នភាពចុងក្រោយនៃបទពិសោធអំពីការដាក់ពង្រាយ 5G របស់សាធារណរដ្ឋប្រជាមានិតចិន និងបណ្តាប្រទេសមួយចំនួនទៀត។
ឯកឧត្តម សុខ ពុទ្ធិវុធ រដ្ឋលេខាធិការក្រសួងប្រៃសណីយ៍ និងទូរគមនាគមន៍ បានមានប្រសាសន៍ថា៖“បច្ចេកវិទ្យា5G គឺជាហេដ្ឋារចនាសម្ព័ន្ធឌីជីថលដ៏សំខាន់ ក្នុងការកសាងបណ្តាញតភ្ជាប់ដ៏ពេញលេញ និងវៃឆ្លាតនៅក្នុងប្រទេសកម្ពុជា ហើយរាជរដ្ឋាភិបាលកម្ពុជាបានប្តេជ្ញាជំរុញឱ្យមានផែនទីបង្ហាញផ្លូវនៃការរៀបចំប្រព័ន្ធ5G (5G roadmap)និងចាប់ផ្តើមដាក់ឱ្យប្រើប្រាស់ជាផ្លូវការក្នុងឆ្នាំ2020 នេះ”។
ឯកឧត្តមបានបន្តថា៖“នៅប៉ុន្មានខែខាងមុខ ក្រសួងប្រៃសណីយ៍ និងទូរគមនាគមន៍ (MPTC)នឹងធ្វើការលើការរៀបចំផែនទីបង្ហាញ ផ្លូវ សម្រាប់បច្ចេកវិទ្យា 5G (5G roadmap) និងប្តេជ្ញាជំរុញការអភិវឌ្ឍប្រព័ន្ធ 5G នៅឆ្នាំ2020 សម្រាប់ប្រទេសកម្ពុជា។
ការអភិវឌ្ឍយ៉ាងឆាប់រហ័ស និងភាពចាស់ទុំនៃខ្សែចង្វាក់ឧស្សាហកម្ម 5G នឹងមិនត្រឹមតែជំរុញការផ្លាស់ប្តូរ និងការធ្វើឱ្យឧស្សាហកម្មបែបប្រពៃណីមានភាពប្រសើរឡើងប៉ុណ្ណោះទេ តែថែមទាំងចូលរួមបង្កើតមុខជំនួញថ្មីៗ ជាច្រើនទៀតផងដែរ”។
ឯកឧត្តមបានបញ្ជាក់ថា៖“បច្ចេកវិទ្យា5G បានក្លាយជាកម្លាំងថាមពលថ្មីមួយទៀត ដែលអាចឱ្យយើងអាចទាញយកនូវបដិវត្តន៍ឧស្សាហកម្មជំនាន់ទី4 និងជាកត្តាជំរុញមួយក្នុងការសម្រេចចក្ខុវិស័យដែលបានដាក់ចេញដោយសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការប្រែក្លាយព្រះរាជាណាចក្រកម្ពុជាយើង ទៅជាប្រទេសមានចំណូលខ្ពស់នៅឆ្នាំ2050 ”។
គួរបញ្ជាក់ផងដែរថា CAICT គឺជាវិទ្យាស្ថានស្រាវជ្រាវវិទ្យាសាស្ត្រ ស្ថិតក្រោមក្រសួងឧស្សាហកម្ម និងព័ត៌មានវិទ្យាចិន (MIIT)។ CAICT បាននិងកំពុងផ្តល់នូវការគាំទ្រយ៉ាងពេញទំហឹងចំពោះយុទ្ធសាស្ត្រ ផែនការ គោលនយោបាយ ស្តង់ដា ការសាកល្បង និងវិញ្ញាបនបត្រសម្រាប់ការអភិវឌ្ឍវិស័យបច្ចេកវិទ្យា និងព័ត៌មាន និងកម្មវិធីព័ត៌មានវិទ្យានៅក្នុងប្រទេសចិន។
តាមរយៈការបណ្តុះបណ្តាលរយៈពេល 5ថ្ងៃកន្លងមកនេះ ក៏បានលើកឡើងនូវប្រធានបទជាច្រើនដូចជា យុទ្ធសាស្ត្រនៃបច្ចេកវិទ្យា 5G និងការអភិវឌ្ឍឧស្សាហកម្មជាសកល និងសម្រាប់ប្រទេសចិនប្រធានបទស្តីអំពីស្តង់ដា និងបច្ចេកវិទ្យា 5G ការចែករំលែកហេដ្ឋារចនាសម្ព័ន្ធ5G ផែនការ និងការគ្រប់គ្រងវិសាលគមន៍ (Spectrum) សន្តិសុខអុីនធើណិតនៃប្រព័ន្ធ 5G សេវាកម្ម និងកម្មវិធីផ្សេងៗនៃបច្ចេកវិទ្យា5G។ល។ ក្រៅពីនោះ វគ្គបណ្តុះបណ្តាលក៏មានការចូលរួមពីតំណាងក្រុមហ៊ុន China Unicom និង China Telecom ដើម្បីចែករំលែកនូវបទពិសោធរបស់ពួកគេ អំពីការដាក់ពង្រាយប្រព័ន្ធ 5G ជាផ្លូវការនៅក្នុងប្រទេសចិនផងដែរ។
ឯកឧត្តម សុខ ពុទ្ធិវុធ ក៏បានជួបពិភាក្សាការងារជាមួយលោក Lu Jianwen អគ្គនាយករងនៃនាយកដ្ឋានសហប្រតិបត្តិការអន្តរជាតិនៃក្រសួងឧស្សាហកម្ម និងព័ត៌មានវិទ្យាចិន (MIIT) លោកស្រី Wang Zhiqin អនុប្រធាននៃ CAICT និងលោក Victor Zhang អគ្គនាយកបច្ចេកទេសនៃក្រុមហ៊ុន Huawei ប្រចាំប្រទេសកម្ពុជា ដែលនេះជាកិច្ចពិភាក្សាស៊ីជម្រៅស្តីអំពីគំរូនៃការអភិវឌ្ឍបច្ចេកវិទ្យា5G នៅកម្ពុជាតាមទស្សនៈនៃក្រសួងឧស្សាហកម្ម និងបច្ចេកវិទ្យាព័ត៌មានចិន (MIIT) បណ្ឌិត្យសភាបច្ចេកវិទ្យាទូរគមនាគមន៍ និងព័ត៌មានចិន(CAICT) និងក្រុមហ៊ុន Huawei។
ឯកឧត្តមរដ្ឋលេខាធិការក្រសួងប្រៃសណីយ៍ និងទូរគមនាគមន៍ និងគណៈប្រតិភូបានអញ្ជើញទស្សនកិច្ចមជ្ឈមណ្ឌលពិព័រណ៍ R&D (Executive Briefing Center) នៃក្រុមហ៊ុន Huawei នៅទីក្រុងប៉េកាំង។ ក្រុមហ៊ុន Huawei បានបង្ហាញនូវផលិតផល និងដំណោះស្រាយចុងក្រោយ នៃប្រព័ន្ធ5G និងបទបង្ហាញស្តីអំពីបទពិសោធនៃបច្ចេកវិទ្យា5G សម្រាប់ទីផ្សារពិភពលោក។
នៅក្នុងពេលទស្សនកិច្ចនោះ គណ:ប្រតិភូកម្ពុជាបានស្វែងយល់ពីការប្រើប្រាស់បច្ចេកវិទ្យា 5G នៅក្នុងវិស័យផ្សេងៗ ដូចជា ទីក្រុងឆ្លាតវៃ ការអប់រំឆ្លាតវៃសុខាភិបាលឆ្លាតវៃ សន្តិសុខសណ្តាប់ធ្នាប់ និងវិស័យផ្សេងៗទៀតដែលបច្ចេកវិទ្យានេះនឹងជួយដល់ការបង្កើនប្រសិទ្ធភាពការងារ និងគុណភាពនៃជីវិតនាពេលអនាគត និងជាពិសេស គឺការចាប់ផ្តើមពន្លឿនដំណើរការបច្ចេកវិទ្យា5G សម្រាប់កម្ពុជានៅឆ្នាំ2020 នេះ៕
January 27, 2020
នៅពេលរាងកាយខ្វះ “វីតាមីន” នឹងហុចផលអាក្រក់ដល់សុខភាពរបស់យើង (តចប់)
វីតាមីន និងសារធាតុរ៉ែ ជាសារធាតុអាហារដែលចាំបាច់ខ្លាំងណាស់ចំពោះការធ្វើការងាររបស់ប្រព័ន្ធផ្សេងៗក្នុងរាងកាយមនុស្សយើង ហើយបើទោះជារាងកាយនឹងត្រូវការវីតាមីន និងសារធាតុរ៉ែត្រឹមតែបន្តិចបន្តួចក៏ដោយ ក៏នៅតែមិនអាចខ្វះបានជាដាច់ខាត ព្រោះបើសិនរាងកាយរបស់អ្នកមិនបានទទួលវីតាមីន និងសារធាតុរ៉ែគ្រប់គ្រាន់នោះ វាអាចធ្វើឱ្យរូបអ្នកឈឺថ្កាត់បានភ្លាមៗតែម្ដង ហើយខាងក្រោមនេះ គឺអាការដែលបង្ហាញថា រាងកាយរបស់អ្នកខ្វះវីតាមីនហើយ…។
8ជំងឺដំបៅចង្វែកមាត់រោគដំបៅចង្វែកមាត់ ជារោគដែលអាចកើតឡើងបាននៅលើមនុស្សគ្រប់ភេទ គ្រប់វ័យ និអាចបាត់ទៅវិញដោយឯកឯងក្នុងរយៈពេលដ៏ខ្លី តែក៏មានឱកាសអាចកើតឡើងម្ដងទៀតដដែលៗបានដែរ។ អ្នកដែលកើតជំងឺនេះ នឹងមានស្នាមរយះនៅត្រងចង្វែកមាត់ទាំងសងខាង បើមិនប្រញាប់ព្យាបាលទេ អាចក្លាយជាឧបសគ្គដល់ការនិយាយស្ដី ឬញ៉ាំអាហារបាន ហើយមូលហេតុរបស់រោគដំបៅចង្វែកមាត់នេះ ក៏កើតពីការដែលរាងកាយស្ថិតក្នុងសភាពទន់ខ្សោយ មានប្រព័ន្ធប្រឆាំងជំងឺទាប ឬសភាវខ្វះវីតាមីនB ជាពិសេសវីតាមីនB2 វីតាមីនB3 និងវីតាមីនB12 រួមទាំងការខ្វះសារធាតុរ៉ែស័ង្កសី និងសារធាតុដែក។
9ឈឺស្ពឹកនៅត្រង់ចុងដៃ និងចុងជើងនៅពេលរាងកាយខ្វះវីតាមីន B1 វីតាមីនB6 និងវីតាមីនB12 ច្រើនតែធ្វើឱ្យកើតអាការឈឺស្ពឹកនៅលើចុងដៃ ចុងជើង ដោយវីតាមីន B1 និងវីតាមីន B6 មានចំណែកពាក់ព័ន្ធនឹងការសាងប្រព័ន្ធទំនាក់ទំនងប្រសាទ និងការបញ្ជូនសញ្ញាប្រសាទ។ ចំណែកឯវីតាមីនB12 វិញ ពាក់ព័ន្ធនឹងការផលិតសាច់ភ្នាស ម៉ៃអុិលិន ដែលមានតួនាទីជួយបញ្ជូនសញ្ញាក្រសែប្រសាទ។ ដូច្នេះហើយទើបការខ្វះវីតាមីនទាំងអស់នេះ នឹងធ្វើឱ្យរាងកាយកើតមានអាការខុសប្រក្រតី ឈឺស្ពឹកនៅលើសរសៃប្រសាទរង្វង់ក្រៅ ឬចុងដៃ ចុងជើងហ្នឹងឯង។
10ក្រចកដៃជើងផុយស្រួយនៅពេលរាងកាយរបស់អ្នកមានសារធាតុដែកទាប រាងកាយផ្នែកខ្លះនឹងចាប់ផ្ដើមបង្ហាញភាពទន់ជ្រាយចេញមកក្នុងរូបបែបរបស់ក្រចកដៃជើងដែលផុយស្រួយ ឬសាច់ភ្នាសភ្នែកឡើងស្លេក។ ស្ត្រីដែលមានវដ្តរដូវមកច្រើន នឹងប្រថុយប្រថាននឹងការខ្វះសារធាតុដែកកាន់តែខ្លាំងឡើង ដូចគ្នានឹងអ្នកដែលទទួលទានមំសៈអាហារ(តមអាហារដែលមានសាច់)រយៈពេលយូរដែរ។ ដោយសារតែរាងកាយអាចបឺតជ្រាបសារធាតុដែកបានល្អបំផុតពីសាច់សត្វ ដូច្នេះអ្នកដែលទទួលទានមំសៈអាហារគួរផ្ដល់ភាពសំខាន់ទៅលើការទទួលបន្លែដែលសម្បូរដោយសាធាតុដែក ដូចជា ស្លឹកផ្ទី ឬគ្រាប់សណ្ដែក រួមទាំងអាហារដែលមានវីតាមីនCខ្ពស់ ដើម្បីបង្កើនការបឺតជ្រាបសារធាតុដែកចូលទៅក្នុងរាងកាយ។
11ឆ្អឹងស្រួយ ងាយប្រេះ បាក់ភាពប្រថុយប្រថានក្នុងការកើតរោគឆ្អឹងស្ដើង សភាវឆ្អឹងផុយមិនរឹងមាំ និងឆ្អឹងងាយបាក់ ដោយសារតែបណ្ដុំឆ្អឹងថយចុះនេះ បណ្ដាលមកពីរាងកាយខ្វះកាល់ស្យូម ព្រោះឆ្អឹងរបស់មនុស្សយើង នឹងរឹងមាំខ្លាំងក្លាបំផុតនៅពេលមានអាយុប្រមាណជា30ឆ្នាំ មុននឹងបាត់បង់កាល់ស្យូមជាបណ្ដើរៗទៅវិញ។ ការទទួលទានកាល់ស្យូមក្នុងកម្រិតដែលសមរម្យជាប់ជាប្រចាំ គឺជារឿងសំខាន់ណាស់ ជាពិសេស ស្ត្រីក្នុងវ័យអស់វដ្តរដូវ ដែលមានភាពប្រថុយប្រថានជាមួយសភាវឆ្អឹងផុយមិនរឹងមាំខ្ពស់៕
January 27, 2020
បងៗស្រ្តីមេផ្ទះ ញ៉ាំផ្លែក្រូចហើយ កុំចោលសម្បក ព្រោះវាមានគុណប្រយោជន៍អាចប្រើការបានច្រើនយ៉ាងទៀត
ពេលបងៗស្រ្តីមេផ្ទះទាំងឡាយទិញផ្លែក្រូចមកពិសា មិនថាតែក្រូចឆ្មារ ក្រូចពោធិ៍សាត់ ឬក្រូចថ្លុងក៏ដោយ សូមកុំអាលបោះចោលសម្បកវា ព្រោះវានៅអាចយកមកប្រើប្រាស់ជាប្រយោជន៍ផ្សេងៗទៀតបាន ដូច្នេះបើបងៗចង់ដឹងថា តើសម្បកផ្លែក្រូចទាំងនោះមានប្រយោជន៍អ្វីខ្លះនោះសូមអានជាបន្ត…។
- សម្បកផ្លែក្រូចឆ្មារ
. យកមកដុសនៅតាមកន្លែងផ្សេងៗលើរាងកាយពេលងូតទឹក វានឹងជួយកម្ចាត់ស្នាមក្អែល ធ្វើឱ្យរាងកាយស្អាតក្រអូបស្រស់ថ្លា។
. ដាក់សម្បកផ្លែក្រូចឆ្មារចូលទៅក្នុងទឹកតែក្ដៅឧណ្ហៗ ដើម្បីបង្កើនរសជាតិឱ្យរឹតតែឈ្ងុឆ្ងាញ់ឡើង។
. ដាក់សម្បកផ្លែក្រូចឆ្មារចូលទៅក្នុងសាច់មាន់ពេលដាក់អាំង ដើម្បីបង្កើនក្លិន និងមានរសជាតិកាន់តែគួរឱ្យចង់ទទួលទានឡើងទៀត។
– សម្បកផ្លែក្រូចពោធិ៍សាត់
. បង្កើនភាពស្រទន់ដល់ស្ករក្រហម(ស្ករត្នោត) ដោយការយកដាក់ចូលទៅក្នុងដបកែវដាក់ស្ករក្រហម។
. ធ្វើជាគ្រឿងផ្សំនៅក្នុងភេសជ្ជៈប្រភេទ ខក់ធេល។
. បន្ថែមភាពក្រអូបប្រហើរដល់ស្រោមជើងឈុតក្នុង ដោយការធ្វើវាឱ្យស្ងួត រួចដាក់ចូលក្នុងកញ្ចប់ ឬថង់ ហើយចោះប្រហោងឱ្យមានក្លិនសាយភាយចេញមក រួចយកទៅដាក់នៅក្នុងទូខោអាវ ឬថតតុជាដើម។
. ធ្វើជាជីរុក្ខជាតិ ដោយនាំយកទៅដាក់គរចោលនៅត្រង់គល់ដើមឈើ ហើយទុកឱ្យវារលួយជ្រាបចូលទៅក្នុងដីដោយខ្លួនឯង។
. យកមកដុសលាបលើស្បែក ដើម្បីបណ្តេញសត្វល្អិតដែលមករំខាននៅពេលយប់។
– សម្បកផ្លែក្រូចថ្លុង
. យកសម្បកក្រូចថ្លុងដែលឆ្លងកាត់ការស្ងោរហើយ មកដុសខាត់ភាជនៈប្រភេទអាលុយមីញ៉ូម
ដូចជាវែកឆា វែកបាយជាដើម-ល- នឹងធ្វើឱ្យភាជនៈទាំងនោះឡើងភ្លឺរលោងដូចថ្មីមិនខាន។
. យកមកចម្រាញ់ធ្វើជាទឹកអប់ក្លិនក្រូច។
. យកមកធ្វើជាដំណាប់ មានរសជាតិប្លែក ផ្អែមឈ្ងុយឆ្ងាញ់៕
January 25, 2020
កុំចិញ្ចឹមកូនតាមបែបអ្នកដទៃព្រោះការចិញ្ចឹមកូនមិនអាចធ្វើតាមគ្នាបានទេ
កុំចិញ្ចឹមកូនតាមអ្នកដទៃ ព្រោះការចិញ្ចឹមកូន មិនអាចធ្វើតាមគ្នាបានទេ មិនថាទ្រឹស្តីណាការចិញ្ចឹមកូនបែបណាដែលគេនាំគ្នានិយាយ ឬចែករំលែកតគ្នាថា វាល្អ វាប្រពៃផុតកំពូលក៏ដោយ តែសម្រាប់ Lifestyle របស់លោកឪពុកអ្នកម្ដាយ បើវាត្រឹមត្រូវ ក៏គឺត្រឹមត្រូវ តែបើវាមិនត្រូវនឹងយើង យ៉ាងណាក៏នៅតែមិនត្រូវនឹងយើងដែរ…។
កូនរបស់អ្នកណា កូនរបស់អ្នកហ្នឹងតើអ្នកម្ដាយទាំងឡាយធ្លាប់ទេ ជាពិសេសអ្នកម្ដាយថ្មោងថ្មី ដែលអានអត្ថបទពីគ្រូពេទ្យ ពីគ្រូពេទ្យចិត្តសាស្ត្រ ពីឪពុកម្ដាយដែលសរសេរពីអត្ថបទចិញ្ចឹមកូន ដែលគេថាធ្វើយ៉ាងនេះ វាល្អយ៉ាងនោះ ចិញ្ចឹមបែបនេះ បានកូនឆ្លាត និងទទួលបានជោគជ័យ ឬត្រូវចិញ្ចឹមកូនបែបនេះ ទើបកូនធំឡើងក្លាយជាអ្នកមានជាដើម -ល- និង-ល-។ តែការពិតទៅ ការចិញ្ចឹមកូនបែបនេះ ឬបែបនោះ វាមិនស័ក្តិសមជាមួយក្មេងគ្រប់រូបនោះទេ ព្រោះក្មេងម្នាក់ៗមានភាពខុសប្លែកពីគ្នា មានភាពជាខ្លួនឯងមិនដូចគ្នា មិនអាចធ្វើតាមគ្នាបានទេ តឱ្យជាកូនភ្លោះនឹងគ្នា ដែលទោះជាយើងធ្លាប់ឃើញពួកគេស្លៀកខោអាវដូចគ្នាក៏ដោយ តែការពិតទៅ កូនរបស់យើងអាចនឹងមិនចង់ដូចអ្នកណា ក៏អាចថាបានដែរ មែនទេអ្នកម្ដាយទាំងឡាយ?
ព្រោះវាគ្មានអ្វីមកធានាបានថា បើយើងបង្ហាត់បង្រៀនកូនរបស់យើង ដោយយកវិធីរបស់អ្នកដទៃមកប្រើ នឹងទទួលបានជោគជ័យដូចគេនោះឡើយ ព្រោះវាមានបច្ច័យជុំវិញខ្លួនផ្សេងៗដែលចូលមកធ្វើជាអ្នកជំរុញ និងប្រាកដណាស់! យ៉ាងហោចណាស់ក៏ចរិតនិស្ស័យរបស់កូនយើង និងកូនគេ មិនបានដូចគ្នាគ្រប់ប្រការដែរ។
កុំចិញ្ចឹមកូនតាមបែបអ្នកដទៃ ត្រូវចិញ្ចឹមកូនយើង ឱ្យក្លាយជាកូនយើងក្មេងៗនឹងធំធាត់ឡើង ក្លាយជាមនុស្សដែលជឿជាក់លើខ្លួនឯង បើឪពុកម្ដាយទទួលស្គាល់លើភាពជាខ្លួនឯងរបស់កូន។ ទិដ្ឋភាពពិតរបស់ក្មេងនឹងបង្ហាញច្បាស់ឡើង នឹងរឹងមាំឡើង គឺនៅពេលដែលឪពុកម្ដាមានចន្លោះឱកាសឱ្យកូនបានបង្ហាញពីភាពជាខ្លួនឯងរបស់កូនបានយ៉ាងពេញទំហឹង ទោះជារឿងទាំងអស់នោះ អាចនឹងមើលទៅថាដូចជាត្រូវប្រើចិត្តវិញ្ញាណខ្ពស់ក៏ដោយ។ ដូច្នេះបើឪពុកម្ដាយ មិនមែនជាគ្រូពេទ្យចិត្តសាស្ត្រ តើអាចធ្វើបានទេ? ចម្លើយគឺ ប្រាកដណាស់ ពិតជាបាន! តែអាចនឹងពិបាកវេទនាខ្លះ ដោយសារតែឪពុកម្ដាយ ក៏ទើបតែក្លាយជាឪពុកម្ដាយ នៅពេលកូនកើតឡើងហ្នឹងឯង… មិនថាអ៊ីចឹងហ្អេ៎?
ការប្រៀបធៀប មិនដែលជារឿងល្អឡើយជាពិសេសបំផុត ការប្រៀបធៀបកូនខ្លួនឯងជាមួយក្មេងឯទៀត ឬការប្រៀបធៀបកូន ជាមួយខ្លួនយើង។ ប្រាកដណាស់ថា ការប្រៀបធៀប វានឹងល្អ ក៏នៅពេលណាដែលយើងប្រៀបធៀបពីតម្លៃនៃរបស់របរមួយៗ តែមិនមែនជាមួយវត្ថុមានជីវិត មានចិត្តគំនិត ដូចជាមនុស្សនោះទេ ជាពិសេសមនុស្សនោះ គឺជាកូនរបស់យើង។ ឪពុកម្ដាយ គឺពិភពលោកទាំងមូលរបស់កូន គឺជាអ្វីៗគ្រប់យ៉ាងរបស់កូន ត្រឹមតែពាក្យសម្ដីដែលឪពុកម្ដាយអាចនឹងគិតមិនទាន់ ក៏អាចនឹងធ្វើឱ្យក្លាយជាចំណុចខ្សោយមួយរបស់កូនរហូតដល់កូនធំ។
កុំចិញ្ចឹមកូនតាមបែបអ្នកដទៃ កូនមិនមែនជាខ្លួនយើង យើងមិនមែនជាខ្លួនកូនតើធ្លាប់ដែរទេ ដែលគិតថា កូនយើងល្ងង់ ស៊ូក្មេងដទៃមិនបាន ឬកូនយើងច្បាស់ជាមានអ្វីខុសប្រក្រតី? រៀនក៏ដូចអ្នកឯទៀត នាំទៅរៀនកួរពិសេស ក៏ច្រើនជាងក្មេងឯទៀត តែកូនយើងនៅតែមានលទ្ធផលការរៀនទាបជាងមិត្តភក្តិក្នុងថ្នាក់។ ការប្រៀបធៀបកូនជាមួយក្មេងដទៃ ឪពុកម្ដាយខ្លះមិនបានធ្វើទេ តែធ្វើដោយមិនដឹងខ្លួនជាមួយការប្រៀបធៀបខ្លួនឯងជាមួយកូន។ ធ្វើអារឿងដែលឪពុកម្ដាយយើងធ្លាប់ធ្វើជាមួយយើង គិតអ្វីៗជំនួសកូនទាំងអស់ សង្ឃឹមលទ្ធផលខ្ពស់ដូចដែលយើងធ្លាប់ជួបមក។ សួរថា តើកូនយើង ដូចខ្លួនយើង 100ភាគរយឬយ៉ាងណា? បើមិនដូចទេ ហេតុអីបានគិតថាវិធីនោះនឹងទទួលបានលទ្ធផលល្អ?
តើត្រូវចិញ្ចឹមកូនយ៉ាងម៉េច? និងតាមវិធីណាល្អ?
ដែលរៀបរាប់មកទាំងអស់នោះ មិនមែនឱ្យឪពុកម្ដាយឈប់ធ្វើតាមពាក្យណែនាំរបស់អ្នកដទៃនោះទេ តែវា គឺការស្គាល់កូនខ្លួនឯងឱ្យច្បាស់បំផុត… ត្រូវហើយ! ព្រោះលោកអ្នកគឺ ឪពុកម្ដាយរបស់គេ ដូច្នេះចូរសាកល្បងយកពាក្យណែនាំទាំងនោះមកសាកល្បងធ្វើតាម វិធីណាមិនបានលទ្ធផល ក៏ប្ដូរវិធីថ្មី កុំប្រកាន់ខ្ជាប់តែលើវិធីតែមួយ។ វិធីណាបានផលល្អ ក៏អាចនឹងប្រកាន់យកវិធីនោះធ្វើជាគំរូបែប ហើយកែសម្រួលឱ្យស័ក្តិសមជាមួយកូនរបស់យើង។
ទ្រឹស្ដីនៅលើពិភពលោកនេះមានច្រើនណាស់ តាមអ្នកចិត្តវិទ្យា តាមឪពុកម្ដាយដែលមានកូនរាប់សិបនាក់ តាមគ្រូអ្នកជំនាញ ឬតាមអ្នកជំនាញការ អាចនឹងទៅរួចដូចគ្នាដែលគ្រប់ទ្រឹស្ដីទាំងនោះមិនទទួលបានលទ្ធផលល្អជាមួយកូនយើងសោះឡើយ ដូច្នេះតើវានឹងលំបាកប៉ុនណាទៅ បើសិនកូនជាមនុស្សដំបូងដែលនឹងសាកល្បងទ្រឹស្ដីថ្មីដែលឪពុកម្ដាយគិតឃើញឡើងដោយខ្លួនឯង? វាមិនមានអ្វីខុសឡើយក្នុងការទទួលបានផល ព្រោះកូនយើងមានតែមួយគត់ក្នុងលោកនេះ ដែលមានមុខមាត់អ៊ីចឹង ចរិតនិស្ស័យអ៊ីចឹង រពឹសខ្លាំងបែបហ្នឹង គួរឱ្យស្រឡាញ់បែបហ្នឹង គួរឱ្យចង់ខោកក៏មាន គួរឱ្យរំភើបចិត្តខ្លាំងក៏ច្រើន។ល។
- ចិញ្ចឹមកូនឱ្យក្លាយជាក្មេងដែលជះពន្លឺចេញពីខាងក្នុងមកខាងក្រៅ
– ចិញ្ចឹមកូនដោយគោរពក្នុងភាពជាកូនរបស់យើង
– ចិញ្ចឹមកូនដោយវិធីដែលស័ក្តិសមបំផុតជាមួយរូបគេ
– កុំទៅខ្វល់សំឡេងអ្នកដទៃ ដរាបណាដែលយើងមិនបានសាងភាពមួម៉ៅក្ដៅក្រហាយចំពោះអ្នកណា
– ចូរចិញ្ចឹមកូនតាមបែបកូនជាកូនរបស់យើងឱ្យបានខ្លាំងបំផុត៕
January 23, 2020
រដ្ឋមន្ត្រីទេសចរណ៍ សាទរកំណើនទេសចរ 5.8% មកទស្សនាតំបន់អាស៊ាន+3 ក្នុងឆ្នាំ2019
រដ្ឋមន្ត្រីក្រសួងទេសចរណ៍កម្ពុជា បានដឹកនាំគណៈប្រតិភូក្រសួងទេសចរណ៍ ទៅចូលរួមកិច្ចប្រជុំរដ្ឋមន្ត្រីទេសចរណ៍អាស៊ាន+3 (ចិន ជប៉ុន និងកូរ៉េ) លើកទី19 នៅប្រទេសប្រ៊ុយណេ កាលពីថ្ងៃទី16 ខែមករា ឆ្នាំ2020 ក្នុងឱកាសនៃវេទិកាទេសចរណ៍អាស៊ានឆ្នាំ2020(ASEAN Tourism Forum 2020)ក្រោមប្រធានបទ “អាស៊ាន៖ទាំងអស់គ្នាឆ្ពោះទៅកាន់ការធ្វើដំណើរជំនាន់ថ្មី” (ASEAN:Toge ther towards a Next Generation of Travel)។
រដ្ឋមន្ត្រីទេសចរណ៍អាស៊ានបូក3 បានអបអរសាទរចំពោះកំណើនទេសចរមកទស្សនាតំបន់អាស៊ានបូក3 ក្នុងឆ្នាំ2019 មានចំនួន 244.5លាននាក់ កើនឡើង 5.8%។ កិច្ចប្រជុំក៏បានពិនិត្យអំពីវឌ្ឍនភាពនៃកិច្ចសហប្រតិបត្តិការទេសចរណ៍អាស៊ានបូក3 ជាពិសេសការអនុវត្តផែនការសកម្មភាពសហប្រតិបត្តិការទេសចរណ៍អាស៊ានបូក3 ឆ្នាំ2018 -2020 ដោយសម្រេចបានលទ្ធផលចម្បងៗ ដូចខាងក្រោម៖ អបអរសាទរវេទិកាអាស៊ានបូក3 ស្តីពីស្តង់ដាគ្រប់គ្រងបរិស្ថាន កាលពីថ្ងៃទី25-26 ខែកក្កដាឆ្នាំ2019 នៅប្រទេសហ្វីលីពីន។
2- អបអរសាទរ កិច្ចប្រជុំកំពូល យុវជនទេសចរណ៍អាស៊ានបូក3 ឆ្នាំ2019 កាលពីថ្ងៃទី25-31 ខែសីហា ឆ្នាំ2019 នៅប្រទេសថៃ។
3- សិក្ខាសាលាស្តីពីការធ្វើឱ្យប្រសើរឡើងនូវផលិតផល និងសេវាកម្មសហគមន៍ ដើម្បីទាក់ទាញអ្នកធ្វើដំណើរវ័យក្មេងក្នុងសហស្សវត្សថ្មី កាលពីថ្ងៃទី10-12 ខែកញ្ញា ឆ្នាំ2019 នៅប្រទេសឥណ្ឌូនេស៊ី។
4- សិក្ខាសាលាស្តីពីការគ្រប់គ្រងធនធានមនុស្សទេសចរណ៍អាស៊ាន និងបណ្តាញនៃការអភិវឌ្ឍសម្រាប់កម្មវិធីអេកូទេសចរណ៍ កាលពីថ្ងៃទី2124 ខែតុលា ឆ្នាំ2019 នៅប្រទេសម៉ាឡេស៊ី។
5- សន្និសីទវិនិយោគទេសចរណ៍អាស៊ាន-ជប៉ុន កាលពីថ្ងៃទី23 ខែតុលា ឆ្នាំ2019 នៅប្រទេសជប៉ុន។
រដ្ឋមន្ត្រីទេសចរណ៍អាស៊ានបានថ្លែងអំណរគុណដល់ប្រទេសចិន ជប៉ុន ប្រទេសកូរ៉េ ដែលបានគាំទ្រដល់សមាជិកអាស៊ាន តាមរយៈសកម្មភាពកិច្ចសហប្រតិបត្តិការទេសចរណ៍អាស៊ាន ចិន នានាជាច្រើនក្នុងអំឡុងឆ្នាំ2019 កន្លងមក។
ជាពិសេសការរៀបចំពិព័រណ៍ ទេសចរណ៍អាស៊ាន-ចិន កាលពីពាក់កណ្ដាលខែតុលា ឆ្នាំ2019 នៅទីក្រុង Guilin ប្រទេសចិន និងកិច្ចសហប្រតិបត្តិការអាស៊ាន-ជប៉ុននៅឆ្នាំ2019 កន្លងមក ក្នុងនោះរួមមានការរៀបចំសិក្ខាសាលា និងសន្និសីទនានា ការតាំងពិព័ណ៍ទេសចរណ៍អាស៊ាន-ជប៉ុនផ្សេងៗ ព្រមទាំងការជួយផ្សព្វផ្សាយទេសចរណ៍តាមនាវាសមុទ្រ (Cruise Tourism)។
ដោយឡែកឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍កម្ពុជា ក៏បានថ្លែងអំណរគុណដល់ប្រទេសបូក3 រួមមាន ចិន ជប៉ុន និងកូរ៉េ សម្រាប់កិច្ចសហប្រតិបត្តិការ និងការគាំទ្រដ៏ល្អកន្លងមកចំពោះកម្ពុជា ព្រមទាំងបានស្នើសុំឱ្យបន្តកិច្ចសហប្រតិបត្តិការនេះតទៅមុខទៀត។
សូមជម្រាបជូនផងដែរថា ក្នុងឆ្នាំ2019 កម្ពុជាបានទទួលភ្ញៀវទេសចរអន្តរជាតិចំនួនប្រមាណ 6.7លាននាក់ កើនឡើង 8% ក្នុងនោះសម្រាប់រយៈពេល 10ខែ ទេសចរចិនមានចំនួនប្រមាណ 2.4លាននាក់ ទេសចរកូរ៉េមានចំនួន 20ម៉ឺននាក់ និងទេសចរជប៉ុនមានចំនួន 16ម៉ឺននាក់។
នៅឆ្នាំ2020 នេះ វេទិកាទេសចរណ៍អាស៊ាន (ATF) ក្រោមប្រធានបទអាស៊ាន “ទាំងអស់គ្នាឆ្ពោះទៅកាន់ការធ្វើដំណើរជំនាន់ថ្មី ឬ ASEAN-Together towards a Next Generation of Travel” បានចូលរួមដោយរដ្ឋមន្ត្រីទេសចរណ៍មកពីប្រទេសសមាជិកអាស៊ាន ចិន ជប៉ុន សាធារណរដ្ឋកូរ៉េ ឥណ្ឌា និងប្រទេសដៃគូពិភាក្សាអភិវឌ្ឍន៍មួយចំនួនទៀត។
កម្ពុជាបានសហការជាមួយផ្នែកឯកជន ចូលរួមក្នុងពិព័រណ៍ទេសចរណ៍អន្តរជាតិ TRAVEX ដោយបានទទួលប្រតិភូចូលរួមចំនួន 750នាក់ ប្រព័ន្ធផ្សព្វផ្សាយព័ត៌មានចំនួន100 មានស្តង់ពិព័រណ៍(Booths) 250 និងអ្នកលក់ (Sellers) ចំនួន 250ក្រុមហ៊ុន និងមានអ្នកទិញ (Buyers) ចំនួន 150ក្រុមហ៊ុនផងដែរ។
សូមបញ្ជាក់ថា វេទិកាកំពូលទេសចរណ៍អាស៊ាន ឆ្នាំ2020 និងកិច្ចប្រជុំពាក់ព័ន្ធនានាបានប្រារព្ធឡើងកាលពីថ្ងៃទី12-13 ខែមករា ឆ្នាំ2020 នៅប្រទេសប្រ៊ុយណេ។ ទន្ទឹមនឹងនេះដែរ កិច្ចប្រជុំទាំងមូលបានផ្តោត និងលើកយកបញ្ហាចម្បងៗចំនួន7 មកជជែកពិភាក្សា ដើម្បីរកដំណោះស្រាយ និងវឌ្ឍនភាពវិស័យទេសចរណ៍អាស៊ានបន្តទៀត។
លោក ថោង រដ្ឋសក្តិ អគ្គនាយកនៃអគ្គនាយកដ្ឋានអភិវឌ្ឍន៍ផលិតផលទេសចរណ៍ និងសហប្រតិបត្តិការអន្តរជាតិនៃក្រសួងទេសចរណ៍កម្ពុជា ដែលបានដឹកនាំប្រតិភូក្រសួងទៅចូលរួមកិច្ចប្រជុំថ្នាក់ស្ថាប័នជាតិទេសចរណ៍អាស៊ាន និងកិច្ចប្រជុំពាក់ព័ន្ធ នាឱកាសវេទិកាកំពូលទេសចរណ៍ឆ្នាំ2020 នេះ បានលើកឡើងថា ស្ថាប័នជាតិទេសចរណ៍ប្រទេសសមាជិកអាស៊ានទាំង10 នឹងពិភាក្សាពិនិត្យសម្រេចលើចំណុចសំខាន់ៗនៃសកម្មភាពទេសចរណ៍អាស៊ាន និងអនុម័តលើឯកសារ ពិធីសារមួយចំនួន។
ឯកសារ និងពិធីសារទាំងនោះ រួមមានទី1- ពង្រឹងការផ្សព្វផ្សាយទេសចរណ៍អាស៊ានតាមប្រព័ន្ធឌីជីថល អនឡាញ និងប្រព័ន្ធបណ្តាញសង្គម។ ទី2-ពិនិត្យអំពីវឌ្ឍនភាពនៃការរីកចម្រើន វិស័យទេសចរណ៍ក្នុងតំបន់អាស៊ាន ឆ្នាំ2018-2019។ ទី3- ពិនិត្យ និងវាយតម្លៃវឌ្ឍនភាពនៃការអនុវត្តផែនការយុទ្ធសាស្ត្រទេសចរណ៍អាស៊ាន ឆ្នាំ2016-2025។ ទី4- ជំរុញការបង្កើតផលិតផលថ្មីៗ ដោយផ្តោតសំខាន់លើទេសចរណ៍ម្ហូបអាហារជាដើម។
លោក ថោង រដ្ឋសក្តិ បានបន្តថា៖ “កិច្ចពិភាក្សាខាងលើនេះ គឺដើម្បីសម្រេចបាននូវចក្ខុវិស័យទេសចរណ៍អាស៊ាន ដោយត្រឹមឆ្នាំ2025 អាស៊ាននឹងក្លាយជាគោលដៅទេសចរណ៍ល្អឯក ប្រកបដោយគុណភាព ពិពិធភាព បទពិសោធ ចីរភាព បរិយាប័ន្ន និងការអភិវឌ្ឍដោយការទទួលខុសត្រូវ ចូលរួមចំណែកលើកស្ទួយសេដ្ឋកិច្ច សុខុមាលភាពសង្គម ប្រជាជាតិអាស៊ាន”៕
January 23, 2020
គ្រប់គ្រងសតិ (Mindful) ឱ្យបានល្អ ជាវិធីបង្កើន ប្រសិទ្ធភាពក្នុងជីវិត
ប្រសិទ្ធភាពការងារ ជាចំណុចដ៏សំខាន់មួយក្នុងការអភិវឌ្ឍជីវិត ព្រោះវាអាចជួយឱ្យយើងក្លាយជាមនុស្សលេចធ្លោ ចំណាយពេលវេលាតិច ចំណេញការងារច្រើន និងតែងតែអភិវឌ្ឍឈានទៅមុខប្រកបដោយភាពវិជ្ជមានជានិច្ចនៅគ្រប់ទីកន្លែង។
លោក ប៉ិច បូឡែន អគ្គនាយកក្រុមហ៊ុន វេសឡាញ អេឌ្យូខេសិន គ្រុប បានលើកឡើងថា មនុស្សម្នាក់ៗលើពិភពលោកយើងនេះមានពេលវេលាដូចគ្នាទាំងអស់ គឺ 1ថ្ងៃ 24ម៉ោងដូចៗគ្នា តែមនុស្សមានលទ្ធផលជីវិតខុសគ្នា បើទោះបីជាពេលខ្លះពួកគេមានឋានៈតួនាទី និងធ្វើការក្នុងស្ថាប័នតែមួយដូចគ្នាក៏ដោយ។
មានមនុស្សខ្លះចាប់ផ្តើមពីចំណុចតូចមួយក្នុងស្ថាប័ន តែប៉ុន្មានឆ្នាំក្រោយគាត់បានក្លាយជាអ្នកដឹកនាំស្ថាប័ន ឬជាអ្នកដែលលេចធ្លោក្នុងចំណោមមនុស្សនានាដែលគាត់ស្គាល់ ខណៈមនុស្សមួយចំនួនទៀតចាប់ផ្តើម និងបញ្ចប់នៅនឹងកន្លែងមួយដដែល។ កត្តាដែលនាំឱ្យមនុស្សមានភាពខុសគ្នាបែបនេះ គឺមកពីភាពខុសគ្នានៃប្រសិទ្ធភាពការងារ។
អ្នកដែលមានប្រសិទ្ធភាពការងារខ្ពស់ ភាគច្រើនជាអ្នកដែលគ្រប់គ្រងពេលវេលាបានល្អ ចេះបែងចែករឿងអាទិភាពក្នុងថ្ងៃនីមួយៗ និងចេះឆ្លើយតបជាមួយនឹងបញ្ហា ដោយបង្កើតជាដំណោះស្រាយប្រកបដោយភាពច្បាស់លាស់ ឬអាចនិយាយបានថា គេអាចគ្រប់គ្រងសតិ (Mindful) បានល្អ។
គ្រប់ហេតុការណ៍ដែលកើតឡើងក្នុង 1ថ្ងៃៗ គេអាចគ្រប់គ្រង និងកំណត់ដឹងយ៉ាងច្បាស់ថា គេកំពុងធ្វើអ្វី ហើយនឹងធ្វើអ្វីបន្តទៀត ដែលនេះជាគោលដៅបន្ទាប់សម្រាប់បុព្វហេតុក្នុងជីវិតរបស់គេផ្ទាល់។
លោក ប៉ិច បូឡែន បាននិយាយថា៖ «មនុស្សដែលអាចគ្រប់គ្រងសតិបានល្អ ជាបុគ្គលដែលអាចរីកចម្រើនបានយ៉ាងលឿន ព្រោះគេអាចបែងចែករឿងនីមួយៗបានយ៉ាងច្បាស់ ហើយដំណើរការការងារ ក៏មានភាពច្បាស់លាស់ដូចគ្នា ដែលធ្វើឱ្យគេធ្វើការបានចប់ចុងចប់ដើម និងស្អាតរៀបរយទៀតផង»។
លោក បូឡែន បានលើកឡើងផងដែរថា នៅក្នុង 1ថ្ងៃៗ មានរឿងជាច្រើនដែលត្រូវឱ្យយើងដោះស្រាយហើយប្រសិនបើយើងគ្រប់គ្រងសតិមិនបានល្អទេនោះ យើងនឹងមិនអាចដោះស្រាយអស់នោះទេ។
កាលណាយើងដោះស្រាយបញ្ហាចាស់មិនអស់ បញ្ហាថ្មីៗក៏នឹងចូលមកជាបន្តបន្ទាប់ដែលធ្វើឱ្យយើងត្រូវវិលវល់នៅក្នុងបញ្ហា ដោះស្រាយមិនចេះចប់ មិនចេះហើយ។
ហេតុនេះដើម្បីក្លាយជាបុគ្គលដែលមានប្រសិទ្ធភាពខ្ពស់ ចាំបាច់ត្រូវចេះឆ្លើយតបជាមួយនឹងបញ្ហាឱ្យបានល្អ។ នៅក្នុងទម្លាប់ល្អទាំង 7យ៉ាងរបស់បុគ្គលមានប្រសិទ្ធភាពខ្ពស់ គេនិយាយថា មនុស្សមាន 2ប្រភេទ គឺមនុស្សកូកា និងមនុស្សទឹកសុទ្ធ។
មនុស្សកូកា ជាមនុស្សដែលឆាប់ឆេវឆាវ គ្រប់គ្រងខ្លួនឯងមិនបានល្អ ប្រៀបបីដូចជាកំពុងកូកាដែលគេក្រឡុក ហើយបើកគម្របមកនឹងឆួលកំពប់ហៀរឡើង តែផ្ទុយមកវិញមនុស្សទឹកសុទ្ធ គឺមានសភាពនឹងដូចជាទឹកសុទ្ធដូច្នោះដែរ បើទោះបីជាគេក្រឡុកយ៉ាងណា ក៏ក្រោយពេលបើកគម្របនៅតែស្ងៀមនឹង មិនហូរហៀរ ឬកញ្ជ្រោលខ្លាំងដូចកូកានោះទេ។
ប្រសិនបើយើងចង់ក្លាយជាមនុស្សដែលមានប្រសិទ្ធភាពការងារខ្ពស់ យើងគួរចេះតាមដានសតិរបស់យើងឱ្យបានល្អ ដោយការបង្កើតទម្លាប់ធ្វើចិត្តឱ្យស្ងប់ ហើយព្យាយាមស្វែងយល់ពីបញ្ហានីមួយៗឱ្យស៊ីជម្រៅ និងឱ្យបានច្បាស់លាស់ជាមុនសិន មុននឹងចាប់ផ្តើមសម្រេចចិត្តឆ្លើយតប ទើបយើងអាចស្វែងរកដំណោះស្រាយបានល្អ ហើយប្រកបដោយប្រសិទ្ធភាពខ្ពស់។
ប្រសិនបើយើងគ្រប់គ្រងខ្លួនឯងមិនបានល្អ ហើយបណ្តោយឱ្យអារម្មណ៍ស្មុគស្មាញរាល់ថ្ងៃជាមួយនឹងបញ្ហា ឬឆេវឆាវបាត់ការគ្រប់គ្រងនោះ បញ្ហានឹងកាន់តែរីកធំ ហើយច្រើនឡើងៗ ហ៊ុមព័ទ្ធជីវិតយើងដែលធ្វើឱ្យយើងមិនអាចអភិវឌ្ឍខ្លួនបានឡើយ។
ពាក់ព័ន្ធនឹងបញ្ហានេះដែរ លោក នឹម ឈុន្នី ស្ថាបនិកក្រុមហ៊ុន Vipassa បានលើកឡើងថាការគ្រប់គ្រងសតិឱ្យបានល្អជារឿងសំខាន់ខ្លាំងណាស់សម្រាប់មនុស្សម្នាក់ៗ ព្រោះក្នុងថ្ងៃនីមួយៗ
បើទោះបីជាយើងមិននៅស្ងៀម ក៏មានរឿងជាច្រើនចូលមកក្នុងជីវិតរបស់យើងដែរ ហេតុនេះវាទាមទារឱ្យយើងត្រូវចេះគ្រប់គ្រងសតិស្មារតី និងតាមដានជាប់ជានិច្ច ដើម្បីធានាថា យើងអាចប្រើប្រាស់ជីវិតប្រកបដោយប្រសិទ្ធភាពខ្ពស់។
ការគ្រប់គ្រងសតិស្មារតីបានល្អ អាចធ្វើឱ្យយើងឆ្លើយតបនឹងបញ្ហានានាក្នុងការងារ ក្នុងការរស់នៅ ក៏ដូចជាក្នុងគ្រួសារបានយ៉ាងល្អប្រសើរ។ នៅពេលយើងកំពុងខឹងយើងកំណត់ដឹងថា យើងខឹង ហើយនៅពេលអន់ចិត្ត យើងក៏ដឹងខ្លួនឯងដែរថា អន់ចិត្ត ឬនៅពេលរីករាយខ្លាំង យើងដឹងថា យើងកំពុងរីករាយ ហេតុនេះប្រសិនបើយើងដឹងច្បាស់ពីស្ថានភាពក្នុងខ្លួនរបស់ខ្លួនឯង យើងអាចនឹងមានការប្រុងប្រយ័ត្នគ្រប់ពេល។
ប្រសិនបើយើងជួបហេតុការណ៍ណាមួយ ហើយយើងមិនដឹងថា ខ្លួនឯងកំពុងខឹង យើងអាចឆ្លើយតបភ្លាមៗទាំងកំហឹង ដែលនឹងធ្វើឱ្យរឿងរីកធំជាងមុន តែប្រសិនបើយើងដឹងខ្លួនឯងច្បាស់ថា យើងកំពុងខឹង នោះយើងនឹងអាចប្រុងប្រយ័ត្ន ហើយរង់ចាំឱ្យបាត់ខឹង ទើបធ្វើការដោះស្រាយ។ ការធ្វើបែបនេះនឹងធ្វើឱ្យយើងរស់នៅក្នុងជីវិតដែលស្ងប់ និងរីករាយ ហើយធ្វើអ្វីក៏សម្រេចបានលទ្ធផលល្អដែរ។
លោក នឹម ឈុន្នី បាននិយាយថា៖ «ដើម្បីគ្រប់គ្រងសតិ (Mindful) ឱ្យបានល្អ យើងមានវិធីសាស្ត្រច្រើនណាស់ដើម្បីអនុវត្ត ដោយក្នុងនោះយើងអាចបង្កើតទម្លាប់នៃការរស់នៅដោយការព្យាយាមតាមដាន និងកំណត់ដឹងពីអារម្មណ៍របស់យើងគ្រប់ពេលជារៀងរាល់ថ្ងៃ និងវិធីល្អម្យ៉ាងទៀត គឺការធ្វើសមាធិ»។
លោក នឹម ឈុន្នី បានបន្ថែមទៀតថា ទម្លាប់ងាយៗមួយចំនួនដែលអាចជួយឱ្យយើងគ្រប់គ្រងសតិបានល្អ គឺយើងអាចធ្វើសមាធិ 2ដងក្នុង 1ថ្ងៃ ដោយចំណាយពេលវេលាមុនចូលគេងដើម្បីត្រួតពិនិត្យមើលពីអ្វីដែលខ្លួនបានធ្វើ និងមិនទាន់បានធ្វើ។ បន្ទាប់មកយើងអាចត្រៀមខ្លួនឱ្យរួចរាល់សម្រាប់បន្តការងារនៅថ្ងៃស្អែក ហើយសមាធិនៅមុនពេលគេងដើម្បីធ្វើឱ្យការសម្រាកបានល្អ។
បន្ថែមពីលើនេះ ក្រោយក្រោកពីគេង គួរតាមដានសតិស្មារតីរបស់ខ្លួនឯង ដោយការបង្កើតភាពរីករាយ និងអរគុណដែលយើងបានបន្តរស់ 1ថ្ងៃទៀត។ បន្ទាប់មករំឭកពីរឿងរីករាយ និងពង្រឹងស្មារតីឱ្យស្វាហាប់សម្រាប់ការងារនៅព្រឹកថ្ងៃថ្មីនេះ។ ប្រសិនបើយើងទម្លាប់ធ្វើបែបនេះបានជារៀងរាល់ថ្ងៃនោះ
យើងនឹងអាចរស់នៅក្នុងថ្ងៃនីមួយៗប្រកបដោយថាមពល និងភាពរីកចម្រើន៕
January 23, 2020
Tiger Street Football 2020 ក្រុមបាល់ទាត់ Samrong United ក្លាយជាជើងឯកប្រចាំមណ្ឌលសៀមរាប
សៀមរាបៈ នៅទីបំផុតក្រុមបាល់ទាត់ Samrong United បានក្លាយជាម្ចាស់ជើងឯក Tiger Street Football 2020 ប្រចាំមណ្ឌលសៀមរាប ដែលជាមណ្ឌលទី២ ដោយយកឈ្នះក្រុមបាល់ទាត់គិរីដងរែកក្នុងលទ្ធផល ៣ទល់០ វគ្គផ្តាច់ព្រ័ត្រ កាលពីថ្ងៃអាទិត្យ ។ប្រធានក្រុម Samrong United កីឡាករ ហួត លាងហាប់ បានលើកឡើងថា នេះជាលើកទី៣ហើយ ដែលក្រុមខ្លួនបានពុះពារមកពីខេត្តឧត្តរមានជ័យមកប្រកួតនៅមណ្ឌលសៀមរាបនេះ ហើយ ការប្រជែងបានជាម្ចាស់ជើងឯកលើកទី៣នេះ គេសប្បាយរីករាយខ្លាំងណាស់ ព្រោះក្រុមគេនឹងឡើងទៅលេងនៅរាជធានីភ្នំពេញ ដើម្បីបានឱកាសជួបផ្ទាល់ជាមួយតារាបាល់ទាត់ពិភពលោក។កីឡាករ ហួត លាងហាប់ អះអាងទៀតថា អ្វីដែលជាចំណុចខ្លាំងដែលធ្វើឲ្យក្រុមខ្លួនក្លាយជាម្ចាស់ជើងឯកប្រចាំមណ្ឌលសៀមរាប៣ឆ្នាំជាប់គ្នានេះ គឺដោយសារតែក្រុមរបស់គេមានកីឡាករនៅក្នុងក្រុមធ្លាប់លេងជាមួយគ្នា ទម្រង់លេងគឺស៊ីសង្វាក់គ្នាល្អបូករួមទាំងការសាមគ្គីក្នុងក្រុមល្អផងនោះ ទើបធ្វើឲ្យក្រុមទទួលបានជោគជ័យ និងក្លាយជាជើងឯកប្រចាំមណ្ឌលសៀមរាប៣ឆ្នាំជាប់ៗគ្នា។ ប្រធានក្រុមរូបនេះ បញ្ជាក់ទៀតថាក្រុមបាល់ទាត់ Samrong United ខេត្ត ឧត្តរមានជ័យនេះ ធ្លាប់បានទៅលេងវគ្គផ្តាច់ព្រ័តនៅរាជធានីភ្នំពេញ២លើករួចមកហើយ ហើយលទ្ធផលគឺបិះឡើងដល់វគ្គកណ្តាលផ្តាច់ព្រ័ត្រ ហើយសម្រាប់លើកទី៣នេះ គេតាំងចិត្តដ៏មោះមុតថា និងពង្រឹងការហ្វឹកហាត់ឲ្យខ្លាំងបន្ថែមទៀត ដើម្បីឈានទៅដណ្តើមជើងឯកទូទាំងប្រទេសឲ្យបាន លើមុខមាត់ខេត្តឧត្តរមានជ័យ។ ជាមួយគ្នានេះ ប្រធានក្រុមរូបនេះ បានថ្លែងអំណរគុណដល់ក្រុមហ៊ុនស្រាបៀរ Tiger (CBL) ដែលបានបង្កើតព្រឹត្តិការណ៍ប្រកួតនេះឡើង បានផ្តល់ឱកាសឲ្យពួកគេបានបង្ហាញសមត្ថភាព ពិសេសបានបង្ហាញនូវក្តីស្រលាញ់ចំពោះបាល់ទាត់ដែលពួកយើងមាន ដើម្បីឈានទៅអភិវឌ្ឍខ្លួនក្លាយជាកីឡាករអាជីពនៅពេលខាងមុខ។សម្រាប់មហាព្រឹត្តិការណ៍បាល់ទាត់ដ៍ធំប្រចាំប្រទេសកម្ពុជា គឺ Tiger Street Football 2020 រដូលកាលទី៨ មណ្ឌលទី២ ខេត្តសៀមរាប បានដំណើរការប្រកួតផ្លូវការពីថ្ងៃទី១៧ រហូតដល់ថ្ងៃទី១៩ ខែ មករា ឆ្នាំ២០២០ ដោយមានក្រុមចូលរួមប្រកួតប្រជែងចំនួន១១៩ក្រុម មកពីខេត្តចំនួន៤ រួមមាន សៀមរាបម្ចាស់ផ្ទះ ឧត្តរមានជ័យ ព្រះវិហារ និងកំពង់ធំ។ សូមបញ្ជាក់ថា ព្រឹត្តិការណ៍បាល់ទាត់ Tiger Street Football 2020 រដូវកាលទី៨នេះ មាន៨មណ្ឌល ដែលមានប្រាក់រង្វាន់សរុបចំនួន៥០០០០ដុល្លារ ហើយ ការប្រកួតផ្តាច់ព្រ័ត្រនិងធ្វើនៅរាជធានីភ្នំពេញ ចាប់ពី ថ្ងៃទី29 កុម្ភៈនិងថ្ងែទី1មិនាឆ្នាំ2020 ហើយ វគ្គផ្តាច់ព្រ័ត្រនេះក៍មានការចូលរួមពី Rio Ferdinand ផងដែរ៕ ស្តែងចេញនូវការតាំងចិត្តដ៏មោះមុតរបស់អ្នក ជាមួយស្រាបៀរថៃហ្គ័រ។
ពិសាដោយការទទួលខុសត្រូវ៕
January 23, 2020
មុនសម្រេចចិត្តពាក់វ៉ែនតា សូមងាកមកយល់ដឹងពីការថែរក្សាភ្នែកឱ្យល្អជាមុនសិន
នៅពេលមានបញ្ហាភ្នែក មិនថាតែ ភ្នែកម្ញូបជិត ម្ញូបឆ្ងាយ ភ្នែកស្រលៀង ភ្នែករកាំ ឬកែវភ្នែកមិនអាចមើលឃើញ និងបញ្ចូលរូបភាពទៅកាន់ខួរក្បាលបាននោះ វិធីដោះស្រាយបញ្ហាភ្នែក គឺស្ថិតនៅមូលដ្ឋាននៃទង្វើបប្រព្រឹត្តិប្រចាំថ្ងៃរបស់មនុស្សម្នាក់ៗ ដែលបានធ្វើការថែរក្សាភ្នែកបានល្អប្រសើរដល់កម្រិតណា និងអាចធានានូវហានិភ័យនៃគ្រោះថ្នាក់ចំពោះសុខភាពភ្នែក។ គ្រោះអាក្រក់មួយចំនួនត្រូវបានបង្កដោយទង្វើប្រចាំថ្ងៃដោយមិនដឹងខ្លួន ដែលហុចផលឱ្យភ្នែកកាន់តែឆាប់ខូចពីមួយថ្ងៃទៅមួយថ្ងៃដូចជា ការប្រើប្រាស់កែវភ្នែកសប្បនិមិត្តខន់ថិកលេន ការពាក់វ៉ែនតាស្រអាប់ ឬវ៉ែនតាការពារពន្លឺ ការប្រើភ្នែកធ្វើការមុខកុំព្យូទ័ររយៈពេលច្រើនម៉ោងនិងការប្រើភ្នែកប្រឈជាមួយពន្លឺក្នុងកន្លែងងងឹត។ល។
មានសំណួរជាច្រើនបានចោទសួរអ្នកឯកទេសភ្នែកថា ភ្នែកម្ញូបពាក់វ៉ែនតា គឺកាន់តែម្ញូបឡើងឌឺក្រេភ្នែក? ហើយមានសំណួរខ្លះ បានធ្វើឱ្យអ្នកលែងចង់ពាក់វ៉ែនតាតែម្ដង។ ជាការពិតណាស់ មុននឹងអ្នកសម្រេចចិត្តពាក់វ៉ែនតា អ្នកគប្បីយល់ដឹងពីគុណសម្បត្តិ និងផលប៉ះពាល់ដល់សុខភាពភ្នែកជាមុនសិន។ ក៏ប៉ុន្ដែអ្វីដែលសំខាន់ជាងការពាក់វ៉ែនតាទៀតនោះ គឺគន្លឹះនៃការថែរក្សាភ្នែកឱ្យល្អ និងអាចមើលឃើញបានយូរអង្វែង។ ថ្ងៃនេះទស្សនាវដ្ដី ឡារ៉ែន ចង់ណែនាំឱ្យប្រិយមិត្តអ្នកអានបានជ្រាបអំពីការថែរក្សាភ្នែកឱ្យល្អ មិនឱ្យខូច និងកាន់តែមើលមិនឃើញច្បាស់ទៅថ្ងៃខាងមុខ។
ផ្ដើមអនុវត្តនូវទម្លាប់ល្អក្នុងការថែរក្សាភ្នែក
1. ទៅពិគ្រោះជាមួយគ្រូពេទ្យជំនាញខាងសុខភាពភ្នែកនៅពេលដែលអ្នកមានបញ្ហាភ្នែក ក៏ដូចជាពិបាកក្នុងការមើលជាដើម។ ការពិនិត្យនេះ ដើម្បីថែរក្សាភ្នែករបស់អ្នកឱ្យមានសុខភាពល្អ។
2. ដោះចេញនូវកែវភ្នែកសប្បនិមិត្ត (Contact Lenses) របស់អ្នកនៅមុនពេលអ្នកសម្រាក ឬមុនពេលចូលគេង។ ចៀសវាងការពាក់វាច្រើនជាងរយៈពេល19ម៉ោង។ ការពាក់កញ្ចក់ភ្នែកយូរពេកអាចបណ្តាលឱ្យប៉ះពាល់ដល់ការមើល ព្រមទាំងមិនស្រួលដល់ភ្នែកថែមទៀតផង។
3. យកគ្រឿងតុបតែភ្នែករបស់អ្នកចេញនៅពេលអ្នកសម្រាកពីការងារ ឬមុនពេលចូលគេង។ មិនត្រូវចូលគេងដោយតុបតែងភ្នែករបស់អ្នកនោះទេ។ ប្រសិនបើអ្នកចូលគេងជាមួយម៉ាស្ការ៉ាឬរោមភ្នែកសិប្បនិម្មិតវាអាចចូលទៅក្នុងភ្នែក ហើយបណ្តាលឱ្យរលាកភ្នែក។
4. ពាក់វ៉ែនតាខ្មៅដើម្បីការពារពន្លឺព្រះអាទិត្យ។ ពាក់វ៉ែនតាជានិច្ចនៅពេលអ្នកនៅខាងក្រៅដែលមានពន្លឺព្រះអាទិត្យភ្លឺខ្លាំង។ រកមើលវ៉ែនតាដែលមានក្រដាសដែលបញ្ជាក់ថាកែវការពារ 99% ឬ100% នៃកាំរស្មីUVB និងកាំរស្មីUVA។
5. គេងឱ្យបានច្រើន ការគេងមិនគ្រប់គ្រាន់អាចបណ្តាលឱ្យភ្នែកមានការអស់កម្លាំង។ រោគសញ្ញានៃការអស់កម្លាំងភ្នែករួមមាន ការរលាកភ្នែក ការលំបាកក្នុងការផ្តោតអារម្មណ៍ ភាពស្ងួត ឬទឹកភ្នែកហូរហួសប្រមាណ ការមើលឃើញមិនច្បាស់ ឬពីភាពប្រែប្រួលបន្តិចបន្តួច ឬការឈឺចាប់នៅត្រង់ក ស្មាឬខ្នង។
6. ដាក់ចំណិតត្រសក់នៅលើត្របកភ្នែករបស់អ្នកដើម្បីកាត់បន្ថយការហើម រយៈពេល 10ទៅ15នាទីមុនពេលគេងនៅពេលយប់ ដើម្បីជួយព្យាបាល និងការពារត្របកភ្នែក និងផ្នែកនៅក្រោមភ្នែក។
ការពារភ្នែកពីពន្លឺកុំព្យូរទ័រ
1. កំណត់ពេលវេលារបស់អ្នកមើលនូវកុំព្យូទ័រ និងទូរស័ព្ទប្រសិនបើអាច។ ព្រោះការមើលយូរពេកវាអាចធ្វើឱ្យភ្នែកអ្នកមានភាពស្ងួត។
2. ធ្វើឱ្យប្រាកដថាភ្នែករបស់អ្នកមានកម្រិតជាមួយនឹងអេក្រង់។ ការក្រឡេកមើល ឬចុះក្រោមនៅលើអេក្រង់កុំព្យូទ័រអស់រយៈពេលជាយូរអាចជាការដាក់សម្ពាធបន្ថែមលើភ្នែករបស់អ្នក។
3. ពន្លឺភ្លឹបភ្លែត មនុស្សដែលប្រើពន្លឺតិចនៅពេលដែលពួកគេកំពុងសម្លឹងមើលអេក្រង់ដែលធ្វើឱ្យភ្នែកកាន់តែស្ងួត។ ធ្វើការខិតខំប្រឹងប្រែង ខ្លាំងអ្នកត្រូវព្រិចភ្នែករាល់30 វិនាទីនៅពេលអ្នកអង្គុយមើលអេក្រង់កុំព្យូទ័ររបស់អ្នកដើម្បីការពារភ្នែកស្ងួត។
4. អនុវត្តតាមក្បួន 20-20-20 នៅពេលអ្នកកំពុងធ្វើការលើកុំព្យូទ័រ ពោលគឺ រាល់20នាទីសម្លឹងមើលអ្វីដែលមានចម្ងាយ 20ហ្វីតរយៈពេល 20វិនាទី។ អ្នកក៏អាចជួយខ្លួនឯងចងចាំក្នុងការសម្រាកដោយកំណត់សំឡេងរោទិ៍នៅលើទូរស័ព្ទរបស់អ្នក។
5. ធ្វើការនៅកន្លែងដែលមានពន្លឺភ្លឺថ្លា ការធ្វើការងារ និងការអានដោយពន្លឺស្រអាប់អាចបណ្តាលឱ្យមានបញ្ហាភ្នែក ប៉ុន្តែវានឹងមិនធ្វើឱ្យភ្នែករបស់អ្នកខូចឡើយ។
របបអាហារល្អសម្រាប់ជំនួយសុខភាពភ្នែក
1. បរិភោគអាហារដែលជួយដល់ភ្នែក ដូចជាវីតាមីនC និង E Zinc Lutein Zeaxathin និង Omega-3 ដែលសុទ្ធតែសំខាន់ដែលអាចការពារបាននូវភ្នែកឡើងបាយ ស្រអាប់ក្នុងភ្នែក និង ការមើលក្នុងវ័យចាស់បានទៀតផង។
2. បរិភោគអាហារដែលផ្ទុកវីតាមីន E. ស្រូវសាលី គ្រាប់ធញ្ញជាតិ និងប្រេងបន្លែ ទៅក្នុងរបបអាហាររបស់អ្នក។
3. បរិភោគអាហារដែលមានសារធាតុ Zinc ៖ រួមមាន សាច់គោ សាច់ជ្រូក ប្រភេទគ្រំ ងាវ ដោយសារអាហារទាំងនេះមានជាតិស័ង្កសីដែលមានសារៈសំខាន់សម្រាប់សុខភាពភ្នែករបស់អ្នក។
4. ញ៉ាំអាហារដែលផ្ទុកវីតាមីនសេ រួមបញ្ចូលទាំងក្រូច, ផ្លែស្ត្របឺរី, ផ្កាខាត់ណាខៀវ, និងមើមស្ពៃនៅក្នុងរបបអាហាររបស់អ្នក។
5. បរិភោគអាហារដែលមានសារជាតិ lutein និង zeaxanthin ។ ញ៉ាំ spinach ផ្កាខាត់ណាខៀវ និងផ្លែ peas។ បន្លែទាំងនេះមានសារជាតិ lutein និង zeaxanthin ដែលជាសារធាតុចិញ្ចឹមសំខាន់ៗសម្រាប់សុខភាពភ្នែកផងដែរ។
6. បរិភោគការ៉ុត៖ ប្រសិនបើអ្នកញ៉ាំការ៉ុតនោះវានឹងធ្វើឱ្យភ្នែកកាន់តែប្រសើរ។
7. បរិភោគអាហារដែលមានជាតិខ្លាញ់អូមេហ្គា 3។ ញ៉ាំត្រីដែលមានជាតិខ្លាញ់អូមេហ្គា 3 ឱ្យបានម្តង ក្នុងមួយសប្តាហ៍ដូចជា ត្រីសាម៉ុង ឬត្រីសាឌីន។ ប្រសិនបើអ្នកមិនមែនជាអ្នកចូលចិត្តញ៉ាំត្រីសូមប្រើថ្នាំអូមេហ្គា 3 ជារៀងរាល់ថ្ងៃ៕
January 23, 2020