Author: ធឿន មករា

ទៅទស្សនាផ្កាសាគូរ៉ារដូវរងាឆ្នាំ2020 នៅជប៉ុន ជិតទីក្រុងតូក្យូ
ជាទូទៅ ក្នុង 1ឆ្នាំៗ ផ្កាសាគូរ៉ានៅក្នុងប្រទេសជប៉ុននឹងចាប់ផ្ដើមរីកក្នុងអំឡុងរដូវស្លឹកឈើលាស់ ក្រោយអស់រដូវរងា និងធាតុអាកាសចាប់ផ្ដើមកក់ក្ដៅឡើង ឬប្រមាណចុងខែមីនា ដល់ដើមខែមេសា តែក៏មានសាគូរ៉ាមួយផ្នែកឆាប់រីកឡើងដែរ ដែលជនជាតិជប៉ុនហៅថា Hayazaki Sakura ឬសាគូរ៉ាឆាប់រីក ដែលសាគូរ៉ាប្រភេទនេះគឺជាសាគូរ៉ាពូជ ខាវ៉ាស៊ុ សាគូរ៉ា និងខូស៊ុសាគូរ៉ា ដែលនឹងចាប់ផ្ដើមរីកឡើងតាំងពីពាក់កណ្ដាលខែកុម្ភៈ ដល់ខែមីនា ដែលនៅប្រទេសជប៉ុនគឺជារដូវរងានៅឡើយ។ អាចហៅបានថា ជាសាគូរ៉ាខុសរដូវ ដែលរីកមុនរដូវកាល។ សម្រាប់អ្នកដែលចង់ទៅទស្សនា ផ្កាសាគូរ៉ារដូវរងានៅប្រទេសជប៉ុន ក៏អាចទៅទស្សនាបានច្រើនកន្លែងដែរ ថែមទាំងនៅមិនឆ្ងាយពីទីក្រុងតូក្យូទៀតផង…។
1. Kawazu Sakura Festival 2020 -ខេត្ត ស៊ិស៊ុអូកានាំគ្នាមកដើរលេងប្រទេសជប៉ុន ទស្សនាផ្កាសាគូរ៉ា នៅខេត្តស៊ិស៊ុអូកា ជាមួយពិធីបុណ្យទស្សនាផ្កាសាគូរ៉ារីកលើកដំបូងប្រចាំឆ្នាំដែលល្បីល្បាញបំផុត Kawazu Sakura Festival នៅតាមមាត់ទន្លេ ខាវ៉ាស៊ុ ដែលទីនេះ គឺជាដើមកំណើតរបស់ដើមផ្កា ខាវ៉ាស៊ុ សាគូរ៉ា ឬសាគូរ៉ាឆាប់រីក។ នៅតាមផ្លូវថ្មើរជើងតាមបណ្ដោយមាត់ទន្លេចម្ងាយ 3គីឡូម៉ែត្រ នឹងមានដើមផ្កាសាគូរ៉ាដុះរៀងគ្នាជាជួរជាង 8,000ដើម សម្លឹងមើលទៅខាងណា ក៏មានតែពណ៌ផ្កាឈូក ស័ក្តិសមសម្រាប់គូស្នេហ៍ដែលជុំវិញខ្លួនពោរពេញដោយពណ៌នៃសេចក្ដីស្នេហា។ ឡារ៉ែន សូមណែនាំថា គួរបបួលគូស្នេហ៍ បបួលលោកឪពុកអ្នកម្ដាយ មកទស្សនាផ្កាសាគូរ៉ានៅទីក្រុងនេះ ធានាថា ច្បាស់ជារំភើបចិត្តមិនខាន។
2. Minami Sakura and Nanohana Festival 2020-ខេត្ត ស៊ិស៊ុអូកាជាពិធីបុណ្យទស្សនាផ្កាសាគូរ៉ាឆាប់រីក ឬសាគូរ៉ាខុសរដូវមួយទៀតក្នុងខេត្តស៊ិស៊ុអូកាដដែល គឺពិធីបុណ្យ Minami Sakura and Nanohana Festival 2020 ព្រោះទីនេះមិនមែនមានតែផ្កាសាគូរ៉ាប៉ុណ្ណោះទេ តែយើងនៅអាចទស្សនាផ្កា ណាណូហាណា បានទៀតផង ដោយផ្កាណាណូហាណា ជាផ្កាដែលមានពណ៌លឿងស្រស់ស្រាយ ពេលដាំជិតៗដើមសាគូរ៉ា និងមានផ្ការីកដំណាលគ្នាផងនោះ វានឹងក្លាយជាទិដ្ឋភាពផ្កាដែលមានទាំងពណ៌ផ្កាឈូក និងពណ៌លឿងមើលទៅស៊ីគ្នាល្អឥតខ្ចោះ។ ទីនេះជាទីតាំងទស្សនាផ្កាសាគូរ៉ាខុសរដូវដែលស្រស់ស្អាត និងស្ងប់ស្ងាត់មួយទៀត ស័ក្តិសមក្នុងការដើរលេងកម្សាន្ត និងថតរូបខ្លាំងបំផុត។
3. Miura-kaigan Sakura Festival 2020-ខេត្ត ខាណាកាវ៉ាតមកទៀតគឺ Miura-kaigan Sakura Festival ពិធីបុណ្យទស្សនាផ្កាសាគូរ៉ារដូវរងា ដែលស្ថិតនៅក្នុងខេត្ត ខាណាកាវ៉ា។ ពិធីបុណ្យនេះរៀបចំឡើងនៅត្រង់បរិវេណផ្លូវដើរដែលពោរពេញទៅដោយដើមសាគូរ៉ានៅជិតស្ថានីយរថភ្លើង ព្រមជាមួយការតុបតែងលម្អដោយទង់ជាតិ និងគោមភ្លើង។ ពេលថតរូបចេញមក យើងនឹងបានរូបភាពផ្លូវថ្នល់ដែលកោងសណ្ដូកវែងពណ៌ផ្កាឈូក មើលទៅស្រស់ស្អាតបំផុត។
4. Ichi-no-srki Harane 2020-ខេត្តខាណាកាវ៉ាជាបរិវេណចង្កេះភ្នំ Nuda ក្នុងខេត្ត ខាណាកាវ៉ា ជាទីកន្លែងដែលដាំដើមសាគូរ៉ាពូជ ហារុមេគិ (Harumeki)ដែលជាផ្កាសាគូរ៉ាពូជថ្មី ទើបតែបានទទួលការចុះបញ្ជីកាលពីឆ្នាំ2000។ សាគូរ៉ានៅក្នុងតំបន់នេះបានទទួលការដាំដុះ និងស្ថិតនៅក្រោមការមើលថែទាំរបស់អង្គការក្នុងប្រទេសជប៉ុន ដែលពេលមកដល់អំឡុងពាក់កណ្ដាលខែមីនា ហារុមេគិ សាគូរ៉ា ជាង120ដើម ក៏នឹងចេញផ្កាពណ៌ផ្កាឈូករីកស្គុះស្គាយពេញទីនោះ។ ជាទីតាំងទស្សនាផ្កាសាគូរ៉ាមួយទៀតដែលអ្នកណាបានមកដល់ហើយត្រូវតែជញ្ជក់មាត់សរសើរគ្រប់គ្នា៕
January 30, 2020
អាការ12 យ៉ាងរបស់កូន ដែលឪពុកម្តាយមិនគួរព្រងើយកន្តើយ
ក្មេងៗទោះជាអាយុប៉ុន្មានក៏ដោយ ចេះនិយាយហើយ ឬមិនទាន់ចេះនិយាយក៏ដោយ លោកឪពុកអ្នកម្តាយគួរតែចេះសង្កេតមើលអាការកូនឱ្យបានថា តើមានអ្វីខុសប្រក្រតីឬទេ? កុំចាំរហូតដល់កូនហារមាត់ប្រាប់នោះ ព្រោះរឿងខ្លះត្រូវតែសង្កេតមើល និងប្រញាប់កែបញ្ហាភ្លាមមុននឹងអ្វីៗហួសពេលកែ។ ខាងក្រោមនេះគឺជាអាការ12យ៉ាងរបស់កូន ដែលលោកឪពុកអ្នកម្តាយមិនគួរព្រងើយកន្តើយ។
1. កូនមើលទៅរាងមានអារម្មណ៍ធុញថប់តានតឹង សោកសៅ អាចនឹងគ្មានអាការគ្រុនក្តៅ ឬមិនស្រួលខ្លួនឱ្យឃើញក៏ដោយ តែកូនអាចនឹងបង្ហាញអាការតាមរយៈទឹកមុខ ឬមើលទៅឃើញហាក់ដូចជាកំពុងគិតពីអ្វីម្យ៉ាងគ្រប់ពេលវេលា បើសិនជាឃើញបែបនេះហើយ ឪពុកម្តាយមិនគួរមើលរំលង ឬព្រងើយកន្តើយឡើយ ត្រូវប្រញាប់នាំទៅប្រឹក្សាជាមួយគ្រូពេទ្យភ្លាមៗល្អជាង។
2. ឡើងកម្តៅខ្ពស់ សីតុណ្ហភាពប្រក្រតីរបស់ក្មេងនឹងស្ថិតនៅក្នុងកម្រិត 36-37.5អង្សាសេលសៀស សម្រាប់ក្មេងដែលមានអាយុទាបជាង 6ខែ បើមានសីតុណ្ហភាពក្នុងកម្រិត 37.6-38.4អង្សាសេលសៀសនោះ គឺមានន័យថា ឡើងកម្តៅខ្ពស់ហើយ ចំណែកក្មេងអាយុច្រើនជាង6ខែឡើង បើសិនលើស 38.5អង្សាសេលសៀស មានន័យថា កម្តៅខ្លួនឡើងខ្ពស់ហើយ ត្រូវរកវិធីបញ្ចុះកម្តៅ និងប្រញាប់នាំទៅមន្ទីរពេទ្យភ្លាម។
3. ក្តៅខ្លួនជាប់ៗគ្នាអត់បាត់រយៈពេល 3ថ្ងៃឡើងទៅ ដោយញ៉ាំថ្នាំ និងជូតខ្លួនហើយ តែអាការនៅតែមិនល្អប្រសើរឡើងនោះ ត្រូវប្រញាប់នាំទៅជួបគ្រូពេទ្យជាបន្ទាន់។
4. គ្រុនក្តៅខ្លួន និងមានអាការផ្សេងទៀតរួមជាមួយផង ដូចជា ឈឺក្បាល មានឡើងកន្ទួលរមាស់នៅលើរាងកាយ ឈឺ-ក អាការបែបនេះត្រូវតែប្រញាប់ទៅជួបលោកគ្រូពេទ្យជាបន្ទាន់។
5. មានឡើងកន្ទួលក្រហមតាមខ្លួនប្រាណ និងមានអាការរាលដាលកាន់តែខ្លាំងឡើង ឬមានអាការហើមឡើងក្រហមត្រង់បរិវេណដែលមានឡើងកន្ទួល និងមានអាការដកដង្ហើមមិនស្រួល រាងស្ទះៗជាដើមនោះ កុំបង្អង់យូរ ត្រូវប្រញាប់នាំទៅមន្ទីរពេទ្យភ្លាម។
6. មានពងបែកឡើងតាមខ្លួនប្រាណក្នុងលក្ខណៈខុសប្រក្រតី ដែលមិនធ្លាប់មានកន្លងមក ត្រូវប្រញាប់យកកូនទៅឱ្យគ្រូពេទ្យពិនិត្យជាបន្ទាន់ ព្រោះអាចកើតរោគមហារីកស្បែកបាន។
7. កូនតូចយំរករឿងខ្លាំង ព្រោះឈឺក្បាលបែបទាន់ហន់ភ្លាមៗ ឬអាចឈឺពោះផ្នែកខាងស្តាំចុះមកក្រោម អាចជាអាការរបស់ខ្នែងពោះវៀន ឬបើឈឺពោះហើយមានក្អួតផងនោះ អាចបណ្តាលមកពីអាការរលាកក្រពះ បើរឹតតែមានឈាមចេញមកជាមួយផងនោះ ត្រូវតែប្រញាប់នាំទៅមន្ទីរពេទ្យជាប្រញាប់។
8. ឈឺក្បាល និងក្អួត អាចជាអាការចាប់ផ្តើមដំបូងរបស់រោគម៉ៃក្រេន តែបើមានអាការធ្ងន់ធ្ងរខ្លាំងជាងនោះ អាចបណ្តាលមកពីរោគផ្សេងទៀត អាការបែបនេះក៏ត្រូវតែប្រញាប់នាំកូនទៅមន្ទីរពេទ្យដែរ។
9. បរិមាណទឹកនោមថយចុះ ស្ងួតមាត់ បន្ទូលក្បាល (បង្ហើយ) ផតចុះ ក្អួត រាក អាការទាំងនេះអាចបណ្តាលមកពីសភាវខ្វះជាតិទឹក បើឃើញកូនមានអាការបែបនេះ ត្រូវតែប្រញាប់នាំកូនទៅមន្ទីរពេទ្យជាបន្ទាន់។
10. ហើមមុខ ហើមខ្លួន ក្អួត ឬមានឡើងរមាស់ អាការនេះអាចបណ្តាលមកពីកើតប្រតិកម្មចាញ់នឹងរបស់អ្វីមួយ បើធ្ងន់ធ្ងរត្រូវនាំទៅជួបគ្រូពេទ្យភ្លាម។
11. ចេញឈាមច្រើនពេក មិនថាតែស្នាមរបួសតូច ឬធំនោះទេ បើឃាត់ឈាមហើយ ឈាមនៅតែហូរចេញមកមិនឈប់ ចូរប្រញាប់នាំកូនទៅមន្ទីរពេទ្យភ្លាម។
12. បបូរមាត់ឡើងស្លេក ខៀវជាំ ដកដង្ហើមអាក់ៗ និងដកដង្ហើមតាមមាត់ អាចជាអាការមានប្រតិកម្មនឹងរបស់អ្វីម្យ៉ាង ឬអាចបណ្តាលមកពីជំងឺដែលពាក់ព័ន្ធនឹងប្រព័ន្ធដកដង្ហើម ឬរោគសួត ក៏ជាអាការត្រូវប្រុងប្រយ័ត្ន និងត្រូវនាំទៅមន្ទីរពេទ្យជាបន្ទាន់ដែរ។
អាការរបស់កូន ដែលបានរៀបរាប់មកខាងលើនេះ លោកឪពុកអ្នកម្តាយមិនគួរព្រងើយកន្តើយជាដាច់ខាត ព្រោះអាការមួយចំនួននោះអាចនិយាយបានថា សុទ្ធតែជាសញ្ញារបស់ជំងឺធ្ងន់ធ្ងរផ្សេងៗទាំងអស់៕
January 29, 2020
កណ្តាស់ញឹកញាប់ កុំកន្តើយ អាការនេះបង្ហាញពីរោគសញ្ញាច្រើនណាស់
ក្នុងអំឡុងពេលដែលអាកាសធាតុប្រែប្រួល រដូវកាលផ្លាស់ប្តូរ មនុស្សជាច្រើនតែងមានអាការកណ្តាស់ហាច់ឈីស! ជាញឹកញាប់ ដែលប្រាកដណាស់ ច្បាស់ជានឹកភ្លែតឡើងថា ប្រហែលជាកើតផ្តាសាយមិនខាន។ អា៎… កុំអាលគិតថា អាការកណ្តាស់របស់យើងនេះ វាបញ្ចប់ត្រឹមតែជំងឺផ្តាសាយនោះ ព្រោះការពិតទៅ អ្នកណាដែលកណ្តាស់ញឹកញាប់ ព្រឹកក៏កណ្តាស់ ល្ងាចក៏កណ្តាស់ កណ្តាស់ពេញមួយថ្ងៃនេះ អាចបណ្តាលមកពីរាងកាយរបស់យើងមានលាក់បង្កប់ភាពខុសប្រក្រតីអ្វីម្យ៉ាង ឬច្រើនយ៉ាងក៏អាចថាបានដែរ។
1/ រោគប្រតិកម្មចាញ់អាកាសធាតុ
ក្នុងករណីដែលមិនមែនជាជំងឺផ្តាសាយ គឺមិនបានកណ្តាស់ និងមានទឹកសំបោរខាប់ស្អិត រួមទាំងមិនមានអាការឈឺក្បាលឡើយ ដូច្នេះវាអាចទៅរួចថា អាការកណ្តាស់ញឹកញាប់របស់អ្នកនេះ អាចបណ្តាលមកពីសភាវរបស់រោគប្រតិកម្មចាញ់ធាតុអាកាស រឹតតែនៅលើមនុស្សដែលមានអាការកណ្តាស់ញឹកញាប់ជាប់ៗគ្នា ឬមានអាការរមាស់ក្នុងភ្នែក ហៀរទឹកភ្នែករួមជាមួយផងនោះ ក៏រឹតតែសង្ស័យថាអាចនឹងកើតរោគប្រតិកម្មចាញ់អាកាធាតុ ឬជំងឺច្រមុះបានដែរព្រោះរោគនេះជាអាការដែលកើតឡើងនៅលើសាច់ភ្នាសក្នុងច្រមុះ ដែលសាច់ភ្នាសក្នុងច្រមុះរបស់អ្នកកើតរោគនេះនឹងឆាប់រហ័សមានប្រតិកម្មជាមួយនឹងកត្តាជំរុញជាច្រើនដូចជា សភាពអាកាសធាតុ ធូលីដី លំអងទឹកភ្លៀង កេសររបស់ផ្កា មេរោគផ្សិត រោមសត្វ ឬសូម្បីតែក្លិន និងវត្ថុដែលធ្វើឱ្យរលាកក្រហាយផ្សេងៗរហូតបង្កឱ្យកើតជាអាការកណ្តាស់ហាច់ឈីសៗហ្នឹងឯង។
2/ រលាកសាច់ភ្នាសច្រមុះ
សភាវរលាកសាច់ភ្នាសច្រមុះក៏អាចជាមូលហេតុរបស់អាការកណ្តាស់ញឹកញាប់នេះបានដែរ ដោយសាច់ភ្នាសក្នុងច្រមុះដែលរលាកនោះច្រើនតែបណ្តាលមកពីការឆ្លងមេរោគវីរុសនៅលើប្រព័ន្ធដកដង្ហើម ឬអាចជាការឆ្លងមេរោគបាក់តេរីដែលច្រើនតែកើតនៅលើមនុស្សដែលមានប្រព័ន្ធប្រឆាំងជំងឺទាប។ ទាំងអស់នេះយើងអាចសង្កេតអាការរលាកសាច់ភ្នាសច្រមុះនេះបានតាមរយៈអាការកណ្តាស់ញឹកញាប់ មិនព្រមបាត់ អ្នកខ្លះអាចមានក្តៅខ្លួនស្ទិញៗរួមជាមួយផង មានទឹកសំបោរពណ៌ប្រផេះ លឿង ដែលបង្ហាញពីអាការឆ្លងមេរោគ ហើយអ្នកខ្លះអាចមានអាការឈឺករួមជាមួយផងដែរ។
3/ ជំងឺឫសដូងច្រមុះ
ឫសដូងច្រមុះគឺ សភាវដែលសាច់ភ្នាសនៅក្នុងច្រមុះមានអាការរលាក និងហើម រហូតមានលក្ខណៈលយពកចេញមកដូចជាខ្នែង ដែលច្រើនតែបណ្តាលមកពីការរលាក ឬការឆ្លងមេរោគនៅលើសាច់ភ្នាសច្រមុះរ៉ាំរ៉ៃ ភាពខុសប្រក្រតីរបស់ការតបស្នងចំពោះប្រព័ន្ធប្រសាទដែលគ្រប់គ្រងការធ្វើការរបស់សរសៃឈាមក្នុងផ្នែកដែលចិញ្ចឹមសាច់ភ្នាសច្រមុះ ដែលជាហេតុធ្វើឱ្យកើតអាការហើមលើសាច់ភ្នាសច្រមុះ។ ភាពខុសប្រក្រតីទាំងនោះអាចបង្ហាញចេញមកដោយអាការតឹងណែនច្រមុះ កណ្តាស់ញឹកញាប់ មានទឹកសំបោរថ្លាៗ ឬសំបោរមានពណ៌ព្រមជាមួយក្លិន រួមទាំងមានអាការឈឺពើតនៅត្រង់ក្តោងច្រមុះ និងថ្ពាល់ ឈឺករ៉ាំរ៉ៃ និងអាការឈឺងឿងក្បាលទៀតផង។
4/ សភាវឌឺថ្នាំ
ការប្រើថ្នាំប្រភេទដដែលជាប់ៗគ្នាយូរ អាចបង្កឱ្យកើតប្រតិកម្មអវិជ្ជមានចំពោះរាងកាយបាន ដោយច្រើនប្រទះឃើញថា ថ្នាំដែលអ្នកជំងឺលេបជាប់ៗគ្នារយៈពេលយូរ ជាហេតុនាំឱ្យកើតអាការរលាក ហុចផលឱ្យកើតអាការកណ្តាស់ញឹកញាប់មិនបាត់បានដូចគ្នា ដោយនឹងមានចំណុចសង្កេតបន្តិចថា អ្នកជំងឺនឹងមានអាការកណ្តាស់ក្រោយពីប៉ះពាល់នឹងអ្វីដែលជាកត្តាជំរុញ ដូចជា ផ្សែងបារី ក្លិនឈួលខ្លាំង ឬផ្សែង និងធូលីជាដើម៕
January 29, 2020
ក្រសួងកសិកម្ម៖ ក្រោយកាត់បន្ថយកូតានាំចូលមាន់ពីបរទេស តម្លៃមាន់ក្នុងស្រុកស្ទុះឡើង
អគ្គនាយកដ្ឋានសុខភាពសត្វ និងផលិតកម្មសត្វនៃក្រសួងកសិកម្ម រុក្ខាប្រមាញ់ និងនេសាទបានចេញសេចក្តីប្រកាសព័ត៌មានកាលពីពេលថ្មីៗនេះ(ថ្ងៃទី9 ខែមករា ឆ្នាំ2020)ដោយបានលើកឡើងពីភាពវិជ្ជមាននៃចំណាត់ការរបស់ក្រសួងកសិកម្ម ក្នុងការកាត់បន្ថយចំនួនក្រុមហ៊ុន និងចំនួនកូតានាំចូលមាន់រស់ពីបរទេសមកកាន់កម្ពុជា។
អគ្គនាយកដ្ឋានសុខភាពសត្វ និងផលិតកម្មសត្វ បានបញ្ជាក់ថា ចាប់ពីដើមឆ្នាំ2019 អគ្គនាយកដ្ឋាន
សុខភាពសត្វ បានពិនិត្យឃើញថា កសិករ សហគមន៍ និងក្រុមហ៊ុនចិញ្ចឹមសត្វនៅកម្ពុជា បានជួបប្រទះនឹងបញ្ហាធ្លាក់ចុះតម្លៃមាន់រស់យ៉ាងគំហុក ពោលគឺថ្លៃដើមផលិតក្នុង1គីឡូក្រាម ត្រូវចំណាយអស់ 5,000រៀល តែចំពោះការលក់ចេញមាន់រស់បានតម្លៃត្រឹមតែ 4,800រៀលប៉ុណ្ណោះក្នុង 1គីឡូក្រាម។
អគ្គនាយកដ្ឋាននេះបានបន្តថា ដោយមើលឃើញពីសភាពការណ៍នេះ ក្រសួងកសិកម្ម រុក្ខា ប្រមាញ់ និងនេសាទ បានកាត់បន្ថយចំនួនក្រុមហ៊ុន និងចំនួនកូតានាំចូលមាន់រស់ពីបរទេស មកកាន់កម្ពុជាពីចំនួន 13ក្រុមហ៊ុន មកនៅត្រឹមចំនួន 7ក្រុមហ៊ុនវិញ និងចំនួននាំចូលពីមុន 44,000ក្បាលក្នុង 1ថ្ងៃ មកនៅត្រឹមតែ 1,7000ក្បាលប៉ុណ្ណោះក្នុង 1ថ្ងៃ។
អគ្គនាយកដ្ឋានសុខភាពសត្វ និងផលិតកម្មសត្វ បានបញ្ជាក់ទៀតថា លទ្ធផលដែល ទទួលបានក្រោយពីការកាត់បន្ថយចំនួនក្រុមហ៊ុន និងចំនួនកូតានាំចូលបក្សីពីបរទេស មានជាអាទិ៍៖
* តម្លៃមាន់រស់ បានកើនឡើងវិញល្អប្រសើរ ពី 6,900 -7,400រៀលក្នុង 1គីឡូក្រាម។
* អ្នកចិញ្ចឹមបក្សី ប្រជាជន ក្រុមហ៊ុនចិញ្ចឹមបក្សី និងសមាគមអ្នកចិញ្ចឹមសត្វកម្ពុជា បានគាំទ្រ និងកោតសរសើរចំពោះចំណាត់ការរបស់ក្រសួងកសិកម្ម រុក្ខាប្រមាញ់ និងនេសាទលើការកាត់បន្ថយចំនួនក្រុមហ៊ុន និងចំនួនកូតានាំចូលមាន់រស់ពីបរទេសមកកម្ពុជានេះ។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានប្រាប់កាសែតឡារ៉ែនពាណិជ្ជថា លោកសូមគាំទ្រ និងកោតសរសើរចំពោះក្រសួងកសិកម្ម រុក្ខាប្រមាញ់ និងនេសាទដែលបានកាត់បន្ថយចំនួនក្រុមហ៊ុន និងកូតាមាន់សាច់រស់នាំចូលពីបរទេស ដើម្បីលើកទឹកចិត្តដល់ផលិតកម្មចិញ្ចឹមមាន់ក្នុងស្រុកគ្រប់រូបភាព ក្នុងការរក្សាបានតុល្យភាពតម្លៃ មិនប៉ះពាល់ដល់អ្នកចិញ្ចឹម និងជួយរក្សាកម្លាំងពលកម្ម និងកាត់បន្ថយការចំណាកស្រុក។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាបានមានប្រសាសន៍ថា៖“ការកាត់បន្ថយមាន់សាច់រស់នាំចូលពីបរទេស ជាការត្រឹមត្រូវហើយ ព្រោះផលិតកម្មចិញ្ចឹមសត្វមាន់ និងជ្រូកក្នុងស្រុក កំពុងតែជួបនូវបញ្ហាជំងឺប៉េស្តជ្រូកអាហ្វ្រិកថ្មីៗនេះ បានខាតបង់ កសិករក៏ងាកមកចិញ្ចឹមមាន់វិញម្ដង។
ដូច្នេះក្រសួងបានគិតគូរដល់កសិករហើយ ប៉ុន្តែសាច់មាន់ឡើងថ្លៃ មិនមែនដោយសារតែការកាត់បន្ថយការនាំចូលទេ គឺមាន់ប្រទេសជិតខាងក៏ឡើងថ្លៃដែរ តែបើយើងមិនកាត់បន្ថយទេ ពេលចុះថ្លៃ គេនឹងនាំចូលមកគំហុក ដើម្បីសម្លាប់កសិករយើង”។
លោកប្រធានសមាគម ដែលមានគំនិតគាំពារនិយម ចូលចិត្តលើកស្ទួយដល់អ្នកចិញ្ចឹមក្នុងស្រុកបានបញ្ជាក់ថា នេះក៏ជាសំណូមពររបស់សមាគមមួយដែរសម្រាប់ទីផ្សារតម្លៃមាន់បច្ចុប្បន្នបើយើងឱ្យតម្លៃថ្លៃពេក វាក៏ប៉ះពាល់ដល់អ្នកហូប អ្នកទិញដែរ។ កត្តាសំខាន់ឱ្យចំណេញទាំងអស់គ្នា ចំណេញទាំងអ្នកចិញ្ចឹម ទាំងអ្នកហូប។
លោក ស្រ៊ុន ពៅ ក៏បានបន្តទៀតដែរថា ចំណុចមួយទៀតនោះ គឺការចិញ្ចឹមមាន់របស់កសិករបានដំណើរការល្អ តែយើងខ្វះពូជមាន់ឱ្យកសិករយើង នេះក៏ជាបញ្ហាមួយដែរ។
លោក ស្រ៊ុន ពៅ ក៏បានឱ្យដឹងទៀតដែរថា៖“បើគិតពីតម្លៃរបស់មាន់ស្រែ នៅពេលមានរដូវបុណ្យទាន ឬចូលឆ្នាំចិនជាដើម ជាការពិត វាថ្លៃជាងថ្ងៃធម្មតា នេះជាប្រពៃណីទៅហើយ។
សម្រាប់មាន់ស្រែថ្លៃ 25,000៛/1kg ឬខ្ពស់ជាងនេះ តែការចិញ្ចឹមរបស់វា ត្រូវប្រើរយៈពេលវែងរហូតដល់ទៅ 6 – 7ខែឯណោះ។ សម្រាប់មាន់សាច់រស់វិញ ថ្លៃជាង 6,400៛/1kg គឺចុះបន្តិចហើយ(ប្រែប្រួលតាមប្រទេស
ជិតខាង)តែការចិញ្ចឹមត្រូវការរយៈពេលតែជាង 40ថ្ងៃទេ។ ឯសម្រាប់មាន់ 3សាសន៍វិញ ចិញ្ចឹមដល់ទៅជាង 3ខែ។ តម្លៃប៉ុណ្ណឹងនៅលើទីផ្សារ គឺល្អ”។
លោក ពៅ ក៏បានថ្លែងបន្តទៀតថា៖“បច្ចុប្បន្ន យើងមានតម្រូវការសត្វមាន់នៅក្នុងប្រទេសកម្ពុជាទាំងមូលមានប្រមាណ 12-13ម៉ឺនក្បាលក្នុង 1ថ្ងៃ ហើយការនាំចូលសព្វថ្ងៃមានប្រមាណពី 4-5ម៉ឺនក្បាល។ ដូច្នេះបានន័យថា ការផ្គត់ផ្គង់ក្នុងស្រុកបានជាង 6-7ម៉ឺនក្បាលដែរ។ តែបើឱ្យនាំចូលច្រើន វាធ្វើឱ្យប៉ះពាល់ដល់កសិករយើង”។
លោកប្រធានសមាគម បានលើកឡើងថា៖“បើសិនណាជាយើងកាត់បន្ថយទាំងអស់បាន លុះត្រាណាតែក្នុងស្រុក យើងចិញ្ចឹម និងអាចផ្គត់ផ្គង់បាន។
បើយើងគិត 4ម៉ឺនក្បាលក្នុង 1ថ្ងៃ ហើយមាន់1ក្បាលមានតម្លៃ 5ដុល្លារនោះយើងនឹងទទួលបាន 20ម៉ឺនដុល្លារក្នុង 1ថ្ងៃ ហើយយើងអាចរកឃើញតួលេខក្នុង 1ខែ ហើយយើងរកឃើញផលចំណេញជារួមដល់ឆ្នាំទៀតផង។ ដូច្នេះបើយើងអាចជំរុញឱ្យកសិករចិញ្ចឹមបាន នោះយើងនឹងទទួលបានផលចំណេញ និងកាត់បន្ថយបាននូវការចំណាកស្រុកផងដែរ”។
តែទោះជាយ៉ាងណាក្តី លោកប្រធានសមាគម បានបញ្ជាក់ថា៖ “តួលេខនៃការផ្គត់ផ្គង់ទីផ្សារនៅពេលរដូវបុណ្យទាន ដូចជាចូលឆ្នាំចិន-វៀតណាម មានតម្រូវការមាន់ច្រើន និងមាន់ស្រែអាចមានតម្រូវការច្រើនជាង តែវាបន្ថយចំនួនមាន់សាច់ទៅវិញ។ ពោលគឺ ការផ្គត់ផ្គង់តម្រូវការប្រជាជន អាចគ្រប់គ្រាន់ ព្រោះអ្នកចិញ្ចឹមគេបានត្រៀមសម្រាប់តម្រូវការនេះជាមុនរួចរាល់។ ចំនួនមានតួលេខដដែល គឺប្រមាណជាង 13ម៉ឺនក្បាល (ដោយកើនចំនួនមាន់ស្រែ តែថយតម្រូវការមាន់សាច់)”។ លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា ក៏បានអំពាវនាវផងដែរចំពោះអ្នកដែលចិញ្ចឹមជ្រូក និងចិញ្ចឹមមាន់ ដែលធ្វើការ
ផ្គត់ផ្គង់សាច់ក្នុងទីផ្សារ ត្រូវតែមានការប្រុងប្រយ័ត្នខ្ពស់ចំពោះជំងឺប៉េស្តជ្រូកអាហ្វ្រិក ដែលក្នុងពេលកន្លងមក ធ្លាប់កើតមាន និងជំងឺផ្តាសាយបក្សី ត្រូវតែធ្វើជីវៈសុវត្ថិភាពជាប្រចាំនៅទីតាំង និងកន្លែងចិញ្ចឹម ដើម្បីការគ្រប់គ្រងបានល្អប្រសើរ ចៀសផុតពីស្ថានភាពនៃការរាលដាលនៃជំងឺឆ្លងបក្សី និងជំងឺប៉េស្តជ្រូកអាហ្វ្រិកនេះ៕
January 29, 2020
ក្រុមហ៊ុន LG ចូលរួមផ្ដល់ដំណោះស្រាយចំពោះបញ្ហាខ្យល់កខ្វក់ក្នុងបរិយាកាសពិភពលោកនាពេលបច្ចុប្បន្ន
ដោយមើលឃើញពីរបាយការណ៍គួរឱ្យព្រួយបារម្ភរបស់អង្គការសុខភាពពិភពលោក (WHO) ថ្មីៗនេះបានបញ្ជាក់ថាមនុស្ស 90 ភាគរយនៅទូទាំងពិភពលោកកំពុងដកដង្ហើមជាមួយខ្យល់កខ្វក់។ នៅពេលគុណភាពខ្យល់ថយចុះហានិភ័យនៃជំងឺដាច់សរសៃឈាមខួរក្បាល ជំងឺបេះដូង ជំងឺមហារីកសួត និងជំងឺផ្លូវដង្ហើមរ៉ាំរ៉ៃនិងស្រួចស្រាវ រួមទាំងជំងឺហឺតកើនឡើងសម្រាប់ប្រជាជនដែលរស់នៅក្នុងទីក្រុងដែលរងផលប៉ះពាល់ខ្លាំងបំផុត។
ប្រភពទិន្នន័យ៖ ការបំពុលបរិយាកាស – ឃាតករលាក់មុខ (https://bit.ly/2Us08ZM)
គំនិតភាគច្រើនយល់ស្របថាដើម្បីទប់ស្កាត់ការឡើងកំដៅផែនដីយើងទាំងអស់គ្នាចាំបាច់ត្រូវបង្កើតវិធានការណ៍ជាច្រើនដូចជាបើកបរតិច និងយកជើងហោះហើរតិច ខណៈពេលដែលបង្កើនការកែច្នៃនិងការអភិរក្សដើម្បីកាត់បន្ថយការផលិតកាបូនរបស់យើង – និងបរិមាណកាបូនឌីអុកស៊ីតដែលមនុស្សម្នាក់ទទួលខុសត្រូវចំពោះបរិយាកាស។ ជាទូទៅសារធាតុដែលផលិតដោយមនុស្ស ហើយបញ្ចេញទៅក្នុងបរិយាកាសអាចត្រូវបានគេចាត់ទុកថាជាការបំពុល។
យើងមិនត្រឹមតែការពារបរិស្ថានរបស់យើងប៉ុណ្ណោះទេ ប៉ុន្តែយើងក៏ត្រូវថែរក្សាសុខុមាលភាពរបស់យើងនិងមនុស្សជាទីស្រឡាញ់របស់យើងផងដែរ។ ហេតុដូច្នេះវាមានសារៈសំខាន់ខ្លាំងណាស់ក្នុងការវិនិយោគលើផលិតផលបន្សុតខ្យល់ដែលល្អ ដែលអាចច្រោះជាតិពុល ខ្យល់ចូលក្នុងផ្ទះរបស់យើងដោយធ្វើឱ្យខ្យល់កាន់តែមានខ្យល់និងថែរក្សាសុខភាពរបស់យើង។ ខណៈពេលដែលមនុស្សអាចពាក់ម៉ាសតម្រងខ្យល់ពេលនៅខាងក្រៅផ្ទះ វាក៏ជាការប្រសើរណាស់ដែរក្នុងការជ្រើសរើសម៉ាស៊ីនបន្សុទ្ធខ្យល់ដែលមានសមត្ថភាពរបស់វាក្នុងការកម្ចាត់ធូលី ភាគល្អិតនិងបញ្ហាគ្រោះថ្នាក់ផ្សេងទៀត ប្រកបដោយគុណភាពខ្ពស់ សម្រាប់បរិយាកាសក្នុងផ្ទះរបស់អ្នក ។
ក្រុមហ៊ុន LG ផ្ដល់ដំណោះស្រាយបញ្ហាខ្យល់ជាមួយម៉ាស៊ីនបន្សុទ្ធខ្យល់ ដែលអាចជួយអោយអ្នកប្រើប្រាស់ ទទួលបានគុណភាពខ្យល់បរិសុទ្ធល្អក្នុងផ្ទះ ជាពិសេសចំពោះអ្នកដែលមានជំងឺហឺត COPD (ជំងឺស្ទះសួតរ៉ាំរ៉ៃ) ឬប្រតិកម្មអាលែហ្សីតម្រង HEPA នៅពេលដែលពួកគេជ្រើសរើសលើការប្រើប្រាស់ឧបករណ៍បន្សុទ្ធខ្យល់នេះ 99,97 ភាគរយនៃភាគល្អិត ខ្យល់កខ្វក់និងការបំពុលផ្សេងៗទៀតត្រូវបានកម្ចាត់ចោលយ៉ាងមានប្រសិទ្ធិភាព។
ដើម្បីជួយដល់ក្រុមគ្រួសារបង្កើតបរិយាកាសរស់នៅក្នុងផ្ទះដ៏ប្រសើរបំផុត ក្រុមហ៊ុន LG បានបង្កើតស្តង់ដារថ្មីជាមួយនឹងម៉ាស៊ីនត្រជាក់ LG DUALCOOL ថ្មីរបស់ខ្លួន ដែលជាឧបករណ៍ដែលមិនត្រឹមតែធ្វើឱ្យត្រជាក់ប៉ុណ្ណោះទេ ថែមទាំងផ្តល់នូវការបន្សុទ្ធខ្យល់ដ៏អស្ចារ្យផងដែរ។ បច្ចេកវិទ្យាបន្សុទ្ធខ្យល់នៅក្នុង DUALCOOL របស់ LG រកឃើញនិងកំចាត់ភាគល្អិតតូចៗដូចជា PM1.0 ជាដើម។ តម្រងធូលីខ្នាតតូចរបស់វាស្រូបយកម៉ូលេគុលដែលមានបន្ទុកអវិជ្ជមានរួមទាំងវីរុសនិងបាក់តេរី ដើម្បីជួយរក្សាក្រុមគ្រួសារអ្នកឱ្យមានសុវត្ថិភាពផ្លូវដង្ហើមល្អប្រពៃ។ ចំនែកកម្រិតបង្ហាញគុណភាពខ្យល់របស់ DUALCOOL នឹងប្រាប់ពីស្ថានភាពគុណភាពខ្យល់ក្នុងផ្ទះអ្នកដោយប្រើរូបតំណាងចម្រុះពណ៌ចំនួន 6 ដែលធ្វើឱ្យងាយស្រួលមើលគុណភាពខ្យល់នៅពេលណាក៏បាន។
ការផ្តល់ជូនចុងក្រោយបំផុតរបស់ក្រុមហ៊ុន LG គឺម៉ាស៊ីនបន្សុទ្ធខ្យល់ LG PuriCare 360 °ប្រើឧបករណ៍ចាប់សញ្ញាឆ្លាតវៃកម្រិតខ្ពស់ដើម្បីរកឃើញបំណែកតូចៗ ដែលមានទំហំក្រោម 1 មីក្រូម៉ែត្រនិងអាចបំបាត់ក្លិនមិនល្អផងដែរ។ ឧបករណ៏នេះធ្វើការត្រួតពិនិត្យពេលវេលាជាក់ស្តែងទៅលើកំរិតនៃការបំពុលបរិយាកាស ដើម្បីធានាថាខ្យល់ក្នុងបរិវេណផ្ទះឬបន្ទប់របស់អ្នកមានសុវត្ថិភាពនិងផាសុកភាព ។
ប្រព័ន្ធចម្រោះចម្រុះគ្មានពីរដែលមាននៅក្នុង LG PuriCare 360° អាចចាប់យកភាគល្អិត 6 ប្រភេទផ្សេងៗគ្នាក្នុងនោះមានអាឡែកហ្សីដ៏គ្រោះថ្នាក់បំផុតដែលមាននៅក្នុងផ្ទះ បន្ទាប់មកវានឹងបន្សុទ្ធខ្យល់នោះអោយទៅជាខ្យល់បរិសុទ្ធ។ មិនខុសគ្នាប៉ុន្មានទេ ចំពោះប្រព័ន្ធតម្រង HEPA របស់វាអាចចាប់យកភាគល្អិតបានល្អ ៗ រហូតដល់ 99,97 ភាគរយឯណោះ ។ បន្ថែមពីលើការចាប់យកសារធាតុអាឡែរហ្សី តម្រងនេះស្រូបយកក្លិនមិនល្អ (ដូចជាអាហារនិងផ្សែង) ផ្សែងអ័ព្ទនិងសារធាតុគីមីដែលបង្កគ្រោះថ្នាក់ពីក្នុងខ្យល់នោះផងដែរ លើសពីនេះទៀតមុខងារថែទាំទារក Baby Care បានដឹកនាំលំហូរខ្យល់បរិសុទ្ធពីមូលដ្ឋានផ្ទាល់ពី PuriCare ដើម្បីបង្កើតបរិយាកាសល្អសម្រាប់ទារកនិងកុមារតូចដែលទើបចេះដើរតេះតះ។
PuriCare 360 °អាចគ្រប់គ្រងបានពីគ្រប់ទិសទីតាមរយៈកម្មវិធី LG SmartThinQ ។ ឪពុកម្តាយអាចពិនិត្យមើលគុណភាពខ្យល់ក្នុងផ្ទះពីស្មាតហ្វូនរបស់ពួកគេនិងធ្វើឱ្យម៉ាស៊ីនបន្សុទ្ធខ្យល់ចាប់ដំណើរការ សកម្មភាពមុនពេលកូនរបស់ពួកគេមកពីសាលារៀន ហើយកាន់តែពិសេសឧបករណ៍បន្សុទ្ធខ្យល់ឆ្លាតវៃថែមទាំងជូនដំណឹងដល់ពួកគេនៅពេលដែលតម្រងរបស់វាត្រូវការផ្លាស់ប្ដូរថ្មីផងដែរ។
LG PuriCare 360 ° និងម៉ូឌែល LG ផ្សេងទៀតសន្សំសំចៃថាមពលដោយមិនប៉ះពាល់ដល់ដំណើរការរឺស្ទីលទេ។ យោងតាមទីភ្នាក់ងារការពារបរិស្ថានសហរដ្ឋអាមេរិក បានបញ្ជាក់ថាម៉ាស៊ីនបន្សុន្ធខ្យល់ដែលទទួលបានវិញ្ញាប័នបត្រ ENERGY STAR នេះ មានប្រសិទ្ធភាពថាមពល 40 ភាគរយច្រើនជាងម៉ូឌែលស្តង់ដាធម្មតា ដែលជួយសន្សំសំចៃដល់អ្នកប្រើប្រាស់ប្រហែល 225 គីឡូវ៉ាត់ម៉ោងក្នុងមួយឆ្នាំនិង 30 ដុល្លារជារៀងរាល់ឆ្នាំលើវិក្កយបត្រប្រើប្រាស់។
ក្រុមហ៊ុន LG តែងតែគិតគូរក្រុមគ្រួសារអ្នកឱ្យទទួលបានបរិយាកាសក្នុងផ្ទះប្រកបដោយសុខភាពល្អ និងធ្វើអោយពិភពលោកអាចជឿជាក់ថា LG នឹងបន្តអភិវឌ្ឍបច្ចេកវិទ្យាដែលការពារសុខភាពរបស់មនុស្សជាទីស្រឡាញ់របស់ពួកគេអោយកាន់តែប្រសើរឡើងពីមួយថ្ងៃទៅថ្ងៃ។
ប្រសិនបើលោកអ្នកមានចំណាប់អារម្មណ៍ចំពោះម៉ាស៊ីនត្រជាក់ LG DUALCOOL អថិតិជនអាចអញ្ជើញទៅទស្សនាផ្ទាល់របស់ហាងចែកចាយគ្រឿងអេឡិចត្រូនិក LG Brandshop ដែលមានទីតាំងសរុបចំនួន 10 សាខា ទូទាំងប្រទេសកម្ពុជា ដែលរាជធានីភ្នំពេញ មាន 4 សាខា និងតាមបណ្ដាខេត្តមួយចំនួនដូចជា សាខាខេត្តកំពង់ចាម សាខាខេត្តសៀមរាប សាខាខេត្តបាត់ដំបង សាខាក្រុងព្រះសីហនុ សាខាខេត្តកណ្ដាល និង សាខាក្រុងកំពត ជាដើម។
ទំនិញមានគុណភាព តម្លៃសមរម្យ សេវាកម្មល្អ
ទូរសព្ទមកកាន់សេវាកម្ម 023 222 699
ពត៌មានបន្ថែម ➡️ https://bit.ly/IL13RSR2
January 29, 2020
កុំចិញ្ចឹមកូនតាមបែបអ្នកដទៃ ព្រោះការចិញ្ចឹមកូនមិនអាចធ្វើតាមគ្នាបានទេ
កុំចិញ្ចឹមកូនតាមអ្នកដទៃ ព្រោះការចិញ្ចឹមកូន មិនអាចធ្វើតាមគ្នាបានទេ មិនថាទ្រឹស្តីណា ឬការចិញ្ចឹមកូនបែបណាដែលគេនាំគ្នានិយាយ ឬចែករំលែកតគ្នាថា វាល្អ វាប្រពៃផុតកំពូលក៏ដោយ តែសម្រាប់ Lifestyle របស់លោកឪពុកអ្នកម្ដាយ បើវាត្រឹមត្រូវ ក៏គឺត្រឹមត្រូវ តែបើវាមិនត្រូវនឹងយើង យ៉ាងណាក៏នៅតែមិនត្រូវនឹងយើងដែរ…។
កូនរបស់អ្នកណា កូនរបស់អ្នកហ្នឹង
តើអ្នកម្ដាយទាំងឡាយធ្លាប់ទេ ជាពិសេសអ្នកម្ដាយថ្មោងថ្មី ដែលអានអត្ថបទពីគ្រូពេទ្យ ពីគ្រូពេទ្យចិត្តសាស្ត្រ ពីឪពុកម្ដាយដែលសរសេរពីអត្ថបទចិញ្ចឹមកូន ដែលគេថាធ្វើយ៉ាងនេះ វាល្អយ៉ាងនោះ ចិញ្ចឹមបែបនេះ បានកូនឆ្លាត និងទទួលបានជោគជ័យ ឬត្រូវចិញ្ចឹមកូនបែបនេះ ទើបកូនធំឡើងក្លាយជាអ្នកមានជាដើម -ល- និង-ល-។ តែការពិតទៅ ការចិញ្ចឹមកូនបែបនេះ ឬបែបនោះ វាមិនស័ក្តិសមជាមួយក្មេងគ្រប់រូបនោះទេព្រោះក្មេងម្នាក់ៗមានភាពខុសប្លែកពីគ្នា មានភាពជាខ្លួនឯងមិនដូចគ្នា មិនអាចធ្វើតាមគ្នាបានទេ តឱ្យជាកូនភ្លោះនឹងគ្នា ដែលទោះជាយើងធ្លាប់ឃើញពួកគេស្លៀកខោអាវដូចគ្នាក៏ដោយ តែការពិតទៅ កូនរបស់យើងអាចនឹងមិនចង់ដូចអ្នកណា ក៏អាចថាបានដែរ មែនទេអ្នកម្ដាយទាំងឡាយ?
ព្រោះវាគ្មានអ្វីមកធានាបានថា បើយើងបង្ហាត់បង្រៀនកូនរបស់យើង ដោយយកវិធីរបស់អ្នកដទៃមកប្រើ នឹងទទួលបានជោគជ័យដូចគេនោះឡើយ ព្រោះវាមានបច្ច័យជុំវិញខ្លួនផ្សេងៗដែលចូលមកធ្វើជាអ្នកជំរុញ និងប្រាកដណាស់! យ៉ាងហោចណាស់ក៏ចរិតនិស្ស័យរបស់កូនយើង និងកូនគេ មិនបានដូចគ្នាគ្រប់ប្រការដែរ។
កុំចិញ្ចឹមកូនតាមបែបអ្នកដទៃ ត្រូវចិញ្ចឹមកូនយើង ឱ្យក្លាយជាកូនយើង
ក្មេងៗនឹងធំធាត់ឡើង ក្លាយជាមនុស្សដែលជឿជាក់លើខ្លួនឯង បើឪពុកម្ដាយទទួលស្គាល់លើភាពជាខ្លួនឯងរបស់កូន។ ទិដ្ឋភាពពិតរបស់ក្មេងនឹងបង្ហាញច្បាស់ឡើង នឹងរឹងមាំឡើង គឺនៅពេលដែលឪពុកម្ដាយមានចន្លោះឱកាសឱ្យកូនបានបង្ហាញពីភាពជាខ្លួនឯងរបស់កូនបានយ៉ាងពេញទំហឹង ទោះជារឿងទាំងអស់នោះ អាចនឹងមើលទៅថាដូចជាត្រូវប្រើចិត្តវិញ្ញាណខ្ពស់ក៏ដោយ។ ដូច្នេះបើឪពុកម្ដាយ មិនមែនជាគ្រូពេទ្យចិត្តសាស្ត្រ តើអាចធ្វើបានទេ? ចម្លើយគឺ ប្រាកដណាស់ ពិតជាបាន! តែអាចនឹងពិបាកវេទនាខ្លះ ដោយសារតែឪពុកម្ដាយ ក៏ទើបតែក្លាយជាឪពុកម្ដាយ នៅពេលកូនកើតឡើងហ្នឹងឯង… មិនថាអ៊ីចឹងហ្អេ៎?
ការប្រៀបធៀប មិនដែលជារឿងល្អឡើយ
ជាពិសេសបំផុត ការប្រៀបធៀបកូនខ្លួនឯងជាមួយក្មេងឯទៀត ឬការប្រៀបធៀបកូន ជាមួយខ្លួនយើង។ ប្រាកដណាស់ថា ការប្រៀបធៀប វានឹងល្អ ក៏នៅពេលណាដែលយើងប្រៀបធៀបពីតម្លៃនៃរបស់របរមួយៗ តែមិនមែនជាមួយវត្ថុមានជីវិត មានចិត្តគំនិត ដូចជាមនុស្សនោះទេ ជាពិសេសមនុស្សនោះ គឺជាកូនរបស់យើង។ ឪពុកម្ដាយ គឺពិភពលោកទាំងមូលរបស់កូន គឺជាអ្វីៗគ្រប់យ៉ាងរបស់កូន ត្រឹមតែពាក្យសម្ដីដែលឪពុកម្ដាយអាចនឹងគិតមិនទាន់ ក៏អាចនឹងធ្វើឱ្យក្លាយជាចំណុចខ្សោយមួយរបស់កូនរហូតដល់កូនធំ។
កុំចិញ្ចឹមកូនតាមបែបអ្នកដទៃ កូនមិនមែន
ជាខ្លួនយើង យើងមិនមែនជាខ្លួនកូនតើធ្លាប់ដែរទេ ដែលគិតថា កូនយើងល្ងង់ ស៊ូក្មេងដទៃមិនបាន ឬកូនយើងច្បាស់ជាមានអ្វីខុសប្រក្រតី? រៀនក៏ដូចអ្នកឯទៀត នាំទៅរៀនកួរពិសេស ក៏ច្រើនជាងក្មេងឯទៀត តែកូនយើងនៅតែមានលទ្ធផលការរៀនទាបជាងមិត្តភក្តិក្នុងថ្នាក់។
ការប្រៀបធៀបកូនជាមួយក្មេងដទៃ ឪពុកម្ដាយខ្លះមិនបានធ្វើទេ តែធ្វើដោយមិនដឹងខ្លួនជាមួយការប្រៀបធៀបខ្លួនឯងជាមួយកូន។ ធ្វើអារឿងដែលឪពុកម្ដាយយើងធ្លាប់ធ្វើជាមួយយើង គិតអ្វីៗជំនួសកូនទាំងអស់ សង្ឃឹមលទ្ធផលខ្ពស់ដូចដែលយើងធ្លាប់ជួបមក។ សួរថា តើកូនយើង ដូចខ្លួនយើង 100ភាគរយឬយ៉ាងណា? បើមិនដូចទេ ហេតុអីបានគិតថាវិធីនោះនឹងទទួលបានលទ្ធផលល្អ?
តើត្រូវចិញ្ចឹមកូនយ៉ាងម៉េច? និងតាមវិធីណាល្អ?
ដែលរៀបរាប់មកទាំងអស់នោះ មិនមែនឱ្យឪពុកម្ដាយឈប់ធ្វើតាមពាក្យណែនាំរបស់អ្នកដទៃនោះទេ តែវា គឺការស្គាល់កូនខ្លួនឯងឱ្យច្បាស់បំផុត… ត្រូវហើយ! ព្រោះលោកអ្នកគឺ ឪពុកម្ដាយរបស់គេ ដូច្នេះចូរសាកល្បងយកពាក្យណែនាំទាំងនោះមកសាកល្បងធ្វើតាម វិធីណាមិនបានលទ្ធផល ក៏ប្ដូរវិធីថ្មី កុំប្រកាន់ខ្ជាប់តែលើវិធីតែមួយ។ វិធីណាបានផលល្អ ក៏អាចនឹងប្រកាន់យកវិធីនោះធ្វើជាគំរូបែប ហើយកែសម្រួលឱ្យស័ក្តិសមជាមួយកូនរបស់យើង។
ទ្រឹស្ដីនៅលើពិភពលោកនេះមានច្រើនណាស់ តាមអ្នកចិត្តវិទ្យា តាមឪពុកម្ដាយដែលមានកូនរាប់សិបនាក់ តាមគ្រូអ្នកជំនាញ ឬតាមអ្នកជំនាញការ អាចនឹងទៅរួចដូចគ្នាដែលគ្រប់ទ្រឹស្ដីទាំងនោះមិនទទួលបានលទ្ធផលល្អជាមួយកូនយើងសោះឡើយ ដូច្នេះតើវានឹងលំបាកប៉ុនណាទៅ បើសិនកូនជាមនុស្សដំបូងដែលនឹងសាកល្បងទ្រឹស្ដីថ្មីដែលឪពុកម្ដាយគិតឃើញឡើងដោយខ្លួនឯង? វាមិនមានអ្វីខុសឡើយក្នុងការទទួលបានផល ព្រោះកូនយើងមានតែមួយគត់ក្នុងលោកនេះ ដែលមានមុខមាត់អ៊ីចឹង ចរិតនិស្ស័យអុីចឹង រពឹសខ្លាំងបែបហ្នឹង គួរឱ្យស្រឡាញ់បែបហ្នឹង គួរឱ្យចង់ខោកក៏មាន គួរឱ្យរំភើបចិត្តខ្លាំងក៏ច្រើន។ល។
- ចិញ្ចឹមកូនឱ្យក្លាយជាក្មេងដែលជះពន្លឺចេញពីខាងក្នុងមកខាងក្រៅ
– ចិញ្ចឹមកូនដោយគោរពក្នុងភាពជាកូនរបស់យើង
– ចិញ្ចឹមកូនដោយវិធីដែលស័ក្តិសមបំផុតជាមួយរូបគេ
– កុំទៅខ្វល់សំឡេងអ្នកដទៃ ដរាបណាដែលយើងមិនបានសាងភាពមួម៉ៅក្ដៅក្រហាយចំពោះអ្នកណា
– ចូរចិញ្ចឹមកូនតាមបែបកូនជាកូនរបស់យើងឱ្យបានខ្លាំងបំផុត៕
January 29, 2020
រកឃើញ៤ក្រុមឡើងវគ្គផ្តាច់ព្រ័ត្រ Tiger Street Football 2020 មណ្ឌលប៉ោយប៉ែត
ប៉ោយប៉ែត៖ ការប្រកួតបាល់ទាត់ Tiger Street Football 2020 មណ្ឌលប៉ោយប៉ែតដែលជាមណ្ឌលទី៣ គិតមកដល់ម៉ោង២រសៀលបានរកឃើញ៤ក្រុមខ្លាំងឡើងទៅកាន់វគ្តផ្តាច់ព្រ័ត្រហើយ។
៤ក្រុមដែលត្រូវឡើងបន្តដល់វគ្គផ្តាច់នោះ មានក្រុម Family Sisophon (A) ក្រុម Poi Pet United ក្រុម DONBOSCO FAMILY (A) ក្រុម Bun Koy Youth ក្រុម Bun Koy FC។ ក្រុមខ្លាំងទាំង៤នេះ និងប្រជែងគ្នានៅវគ្គ៤ក្រុមចុងក្រោយ ក្រុមដែលចាញ់និងប៉ះក្រុមចាញ់ដូចគ្នា ដើម្បីយកចំណាត់ថ្នាក់លេខ៣ រីឯក្រុមដែលឈ្នះត្រូវប៉ះក្រុមឈ្នះដូចគ្នាដណ្តើមជើងឯក។ ចំណែកក្រុមដែលឈ្នះជ័យលាភីទទួលបានថវិការ គឺក្រុមដណ្តើមបានចំណាត់ថ្នាក់លេខ១ទឹកប្រាក់ ១៥០០ដុល្លារ ចំណាត់ថ្នាក់លេខ២ ទឹកប្រាក់ ១០០០ដុល្លារ ចំណាត់ថ្នាក់លេខ៣ទឹកប្រាក់ ៥០០ដុល្លារ និងចំណាត់ថ្នាក់លេខ៤ទឹកប្រាក់ ២០០ដុល្លារ។ សម្រាប់មហាព្រឹត្តិការណ៍ Tiger Street Football 2020 មានប្រាក់រង្វាន់ជ័យលាភីសរុបរហូតដល់ទៅ៥ម៉ឺនដុល្លារអាមេរិច។
សូមបញ្ជាក់ថា ព្រឹត្តិការណ៍បាល់ទាត់ Tiger Street Football 2020 មណ្ឌលប៉ោយប៉ែត ដែលជាមណ្ឌលទី៣នេះ មានក្រុមចូលរួមប្រកួតចំនួន៨២ក្រុម កើនឡើងរហូតដល់១៤ក្រុមលើសពីឆ្នាំ២០១៩ រដូវកាលទី៧កន្លងទៅ។
ស្តែងចេញនូវការតាំងចិត្តដ៏មោះមុតរបស់អ្នក ជាមួយស្រាបៀរថៃហ្គ័រ។

ពិសាដោយការទទួលខុសត្រូវ៕
January 28, 2020
តើវិស័យសំណង់នៅតំបន់ភាគត្បូងរាជធានីភ្នំពេញ នឹងវិវឌ្ឍខ្លួនយ៉ាងដូចម្តេច?
អ្នកជំនាញផ្នែកសំណង់ និងអចលនទ្រព្យនៅកម្ពុជា បានលើកឡើងថា តំបន់ភាគខាងត្បូង រាជធានីភ្នំពេញ នឹងកាន់តែក្លាយជាគោលដៅដ៏ទាក់ទាញមួយទៀតសម្រាប់អ្នកអភិវឌ្ឍន៍អចលនទ្រព្យ ជាពិសេសនឹងផ្ទុះកក្រើកខ្លាំងខាងការវិនិយោគលើការសាងសង់ ខណៈបច្ចុប្បន្នលំនៅឋាន បុរី និងសំណង់ផ្ទះល្វែង ជាច្រើនកំពុងវាយលុក និងធ្វើការសាងសង់ក្នុងតំបន់នេះ កើនឡើងពី 1ឆ្នាំទៅ 1ឆ្នាំ។
ពាក់ព័ន្ធនឹងបញ្ហានេះ លោក គីម ហ៊ាង ប្រធានក្រុមហ៊ុន Keller Williams Cambodia និងជាអគ្គនាយកក្រុមហ៊ុន ខ្មែរ រៀល អុីស្ទេត បានលើកឡើងថា តំបន់ភាគខាងត្បូង បច្ចប្បន្នកំពុងរីកចម្រើនលើវិស័យសំណង់ និងអចលនទ្រព្យគួរឱ្យកត់សម្គាល់ខ្លាំង ខណៈតំបន់នេះកំពុងទទួលបានការចាប់ពីអារម្មណ៍ពីអ្នកវិនិយោគក្នុងស្រុក និងក្រៅស្រុកខ្លាំង។
លោកបានបន្តថា៖“ការទទួលបានការចាប់-អារម្មណ៍ ពីសំណាក់វិនិយោគិនទាំងក្នុង និងក្រៅប្រទេសនេះ ក៏ព្រោះតែតំបន់ភាគខាងត្បូង ស្ថិតនៅក្បែគម្រោងផ្សារទំនើបអុីអនម៉លទី3 ជាពិសេសគម្រោងបុរីលំនៅឋានល្បីៗជាច្រើនទៀត ដែលកំពុងអភិវឌ្ឍ ក៏សម្រុកទៅទីនោះដែរ។
ទន្ទឹមគ្នានេះ ភាពរីកចម្រើននៃវិស័យអចលនទ្រព្យនៅក្នុងតំបន់ភាគខាងត្បូងទីក្រុងភ្នំពេញ ក៏បណ្តាលមកពីតំបន់នេះត្រូវបានជ្រើសរើសជាតំបន់ដែលត្រូវសាងសង់ព្រលានយន្ដហោះភ្នំពេញថ្មី ដែលមានស្ថិតនៅក្នុងខេត្តកណ្តាល ក្នុងស្រុកកណ្តាលស្ទឹង ផងដែរ”។
ដោយមើលឃើញពីសក្តានុពលនៃតំបន់ភាគខាងត្បូង ដែលមានទីក្រុងតាខ្មៅ ព្រមទាំងមានគម្រោងវិយោគធំៗជាច្រើននោះ អ្នកជំនាញផ្នែកអចលនទ្រព្យរូបនេះ បានវាយតម្លៃថា តំបន់ភាគត្បូងនៅម្តុំផ្លូវ 60ម៉ែត្រ ព្រមទាំងក្រុងតាខ្មៅ នឹងក្លាយជាតំបន់ដែលមានការវិនិយោគវិស័យខុនដូច្រើនជាងគេ ក្នុងរយៈពេល 3ឆ្នាំខាងមុខ។
លោកបញ្ជាក់ថា ក្នុង 1ឆ្នាំៗ ប្រជាពលរដ្ឋចំណាកស្រុកមករស់នៅក្នុងទីក្រុងកើនដល់ជាង 10ម៉ឺននាក់ ហេតុនេះវិស័យខុនដូក្នុងតំបន់ភាគខាងត្បូង ដែលមានក្រុងតាខ្មៅ គឺជាទីតាំងល្អសម្រាប់ការរស់នៅរបស់ប្រជាជន ព្រោះជាតំបន់ដែលស្ថិតនៅក្បែររាជធានីភ្នំពេញស្រាប់។
ទន្ទឹមគ្នានេះ អគ្គនាយកក្រុមហ៊ុន Estate Xchange Cambodia លោក រស់ សុវណ្ណថា ក៏បានលើកឡើងដែរថា តំបន់ភាគខាងត្បូងរាជធានីភ្នំពេញ ចន្លោះពីផ្លូវ 60ម៉ែត្រដល់តំបន់រង្វង់មូលកួរស្រូវ កំពុងទទួលបានគម្រោង វិនិយោគធំៗជាច្រើន ហើយវិស័យអចលនទ្រព្យនៅតំបន់ភាគខាងត្បូង ក៏មានការរីកចម្រើនគួរឱ្យកត់សម្គាល់ផងដែរ។
លោកបន្តថា គម្រោងលំនៅឋាន នឹងមានសម្ទុះខ្លាំងជាងគេ ដោយសារតំបន់ភាគត្បូងរាជធានីនេះ ម្ដុំ AEON MALL ទី3 នៅមានចន្លោះដីធំទូលាយ និងនៅទំនេរច្រើន ហើយលោកយល់ថា តំបន់នោះនឹងមានការវិវឌ្ឍលើផ្នែកលំនៅឋានពីសំណាក់
គម្រោងធំៗដូចតំបន់ភ្នំពេញថ្មី ខណ្ឌសែនសុខ ដែលមានផ្សារទំនើប AEON MALL ទី2 ដែរ។
លោកបានបន្ថែមថា តម្លៃដីក្នុងតំបន់នេះ ក៏មានការកើនឡើងគួរឱ្យកត់សម្គាល់ដែរ ពោលគឺនៅតាមបណ្ដោយផ្លូវធំ អាចមានតម្លៃចាប់ពី 700ដុល្លារ ដល់ 1,000ដុល្លារក្នុង 1ម៉ែត្រការ៉េ ខណៈដែលដីនៅផ្លូវ 60ម៉ែត្រវិញ មានតម្លៃចាប់ពី 1,500ដុល្លារ ក្នុង 1ម៉ែត្រការ៉េឡើងទៅ។
ដីនៅម្តុំផ្លូវ60មែ៉ត្រ
ប៉ុន្តែទោះជាយ៉ាងណា លោកក៏បានបញ្ជាក់ដែរថា៖“តម្លៃអចលនទ្រព្យនៅតំបន់ AEON MALLទី3 មិនសូវមានការប្រែប្រួលខ្លាំងប៉ុន្មានទេ” ប៉ុន្តែលោកបានសង្កត់ធ្ងន់ថា ក្រៅពីផ្ទុះកក្រើកខ្លាំងខាងការវិនិយោគលើការសាងសង់បុរីលំនៅឋានហើយនោះ គម្រោងខុនដូក្នុងតម្លៃសមរម្យ នៅតាមបណ្តោយផ្លូវ 60ម៉ែត្រ ក៏នឹងមានការវិនិយោគខ្លាំងជាងមុនផងដែរ។
បើតាមផែនការមេ (2015-2035) របស់សាលារាជធានីភ្នំពេញ បានកំណត់យកទីតាំងភាគខាងត្បូងទីក្រុងភ្នំពេញ ពោលគឺ ត្រឹមរយៈពេល 15ឆ្នាំទៅមុខទៀត តំបន់នេះនឹងត្រូវបានអភិវឌ្ឍទៅជាទីក្រុងបៃតង និងមជ្ឈមណ្ឌលពាណិជ្ជកម្មដ៏សំខាន់បំផុតរបស់រាជធានីភ្នំពេញ។ នេះបើតាមការអះអាងរបស់ Prince Real Estate។
ជាងនេះទៀត នៅតំបន់ភាគខាងត្បូងរាជធានីភ្នំពេញ មានផ្លូវ 60ម៉ែត្រ ឬហៅថា “មហាវិថីសម្តេច តេជោ ហ៊ុន សែន” ដែលមានទទឹង 60ម៉ែត្រ និងបណ្តោយជិត 10គីឡូម៉ែត្រដែលជាផ្លូវធំជាងគេ និងជាផ្លូវតភ្ជាប់ដ៏សំខាន់មួយនៅក្នុងរាជធានីភ្នំពេញ។ មហាវិថីសម្ដេចតេជោ ហ៊ុន សែន ក៏ជាផ្នែកមួយដ៏សំខាន់នៅក្នុងផែនការអភិវឌ្ឍន៍ទីក្រុងឆ្នាំ2035 របស់សាលាក្រុងភ្នំពេញ ក្នុងគោលបំណងជួយពង្រឹងជីវភាពរស់នៅរបស់ប្រជាជននៅពេលទីក្រុងភ្នំពេញបន្តពង្រីកកាន់តែធំ និងអភិវឌ្ឍកាន់តែខ្លាំងឡើង។
ដោយសារតែតំបន់ភាគខាងត្បូងរាជធានីភ្នំពេញនឹងក្លាយជាទីក្រុងបៃតង ទំនើប និងស្រស់ស្អាតបំផុតក្នុងរាជធានីភ្នំពេញនាពេលអនាគត ទើបបានជាទីតាំងនៅទីនោះ តម្លៃដីបានហក់ឡើងខ្លាំងពិសេសតំបន់ផ្លូវ 60ម៉ែត្រ ហើយជីវភាពប្រជាពលរដ្ឋក៏ហក់ខ្ពស់ឡើងតាមនោះដែរ។ នេះបើតាមការលើកឡើងពី លោក ម៉េត មាសភក្តី មន្ត្រីនាំពាក្យសាលារាជធានីភ្នំពេញ។
គួរបញ្ជាក់ដែរថា កាលចុងខែធ្នូ ឆ្នាំ2019 កន្លងទៅ យោងតាមការចេញផ្សាយរបស់ក្រុមប្រឹក្សាអភិវឌ្ឍន៍កម្ពុជា (CDC ) បានឱ្យដឹងថា គម្រោងសាងសង់ផ្សារទំនើប AEON MALL ទី3 បានចេញគម្រោងជាផ្លូវការហើយ គឺស្ថិតនៅសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ មានទុនវិនិយោគប្រមាណ 289.6លានដុល្លារអាមេរិក និងអាចបង្កើតការងារបានចំនួន 47កន្លែង។ ផ្សារទំនើប AEON MALL3 នេះ នឹងត្រូវចាប់ផ្តើមសាងសង់នៅ
ក្នុងឆ្នាំ2020 នេះហើយ។
គួរជម្រាបឱ្យដឹងដែរថា ផ្សារទំនើបទី3 របស់ក្រុមហ៊ុន AEON នឹងមានផ្ទៃក្រឡាសរុប រហូតដល់ទៅ 174,000ម៉ែត្រការ៉េ ដែលទំហំនេះ គឺធំជាងផលបូកផ្ទៃក្រឡារបស់ផ្សារទំនើបAEON ទី1 (68,000ម៉ែត្រការ៉េ) និងផ្សារទំនើបAEON 2 សែនសុខ (100,000ម៉ែត្រការ៉េ) ដែលទំហំសរុបមានត្រឹមតែ 168,000ម៉ែត្រការ៉េ។
ទន្ទឹមនឹងនេះដែរ ផ្សារទំនើបទី3 របស់ AEON ដែលមានទីតាំងតាមបណ្តោយផ្លូវ 60ម៉ែត្រឬមហាវិថីសម្តេចតេជោ ហ៊ុន សែនមួយនេះ គឺគ្រោងនឹងដាក់ឱ្យដំណើរការក្នុងឆ្នាំ2023 ខាងមុខនេះ។ នេះបើតាមសេចក្តីជូនដំណឹងរបស់ក្រុមហ៊ុននេះ កាលពីពេលកន្លងទៅ។
ជាសរុប ដោយសារវត្តមានផ្សារទំនើបទី3 របស់ក្រុមហ៊ុនAEON និងគម្រោងវិនិយោគធំៗនៅតំបន់នោះ ដែលទើបបានប្រកាសជាផ្លូវការ និងបន្តរីកចម្រើនឥតឈប់ឈរនោះ ភាគីពាក់ព័ន្ធ ក្នុងវិស័យសំណង់ និងអចលនទ្រព្យ បានបង្ហាញពីក្តីសង្ឃឹមថា វិស័យសំណង់នៅតំបន់ភាគខាងត្បូងរាជធានីភ្នំពេញ ទៅថ្ងៃអនាគត នឹងកាន់តែមានការអភិវឌ្ឍលឿនលើគម្រោងសាងសង់នានា ខ្លាំងជាងតំបន់ដទៃទៀតនៅជុំវិញរាជធានីភ្នំពេញ ព្រោះតំបន់នេះមានសេដ្ឋកិច្ចរីកលូតលាស់លឿន ស្ថានភាពដីធ្លីខ្ពស់មិនសូវប្រឈមនឹងការលិចទឹក ជាទីតាំងដែលនៅជិតទីក្រុងជាងគេ និងជាតំបន់ដែលត្រូវរៀបចំហេដ្ឋារចនាសម្ព័ន្ធថ្មី ដែលអាចអនុញ្ញាតឱ្យការកសាងផ្លូវ ធ្វើបានល្អជាងតំបន់ដែលបានអភិវឌ្ឍន៍រួច៕
January 27, 2020
សហរដ្ឋអាមេរិក សន្យាបន្តជួយអភិវឌ្ឍវិស័យកសិកម្មនៅកម្ពុជា
រដ្ឋាភិបាលអាមេរិក នឹងបន្តជួយវិស័យកសិកម្មនៅកម្ពុជាទៀត ក្រោយឃើញភាពរីកចម្រើនគួរឱ្យកត់សម្គាល់។ នេះការសន្យារបស់លោក W. Patrick Murphy ឯកអគ្គរដ្ឋទូតអាមេរិកប្រចាំកម្ពុជា ចំពោះមុខលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលបានចុះទៅពិនិត្យ និងវាយតម្លៃលើសមិទ្ធផលដែលសម្រេចបានពីកិច្ចសហប្រតិបត្តិការរវាងសាកលវិទ្យាល័យភូមិន្ទកសិកម្ម (RUA) ជាមួយ USAID ក្រសួងកសិកម្មសហរដ្ឋអាមេរិក (USDA) និង Kansas State University កាលពីពេលថ្មីៗនេះ។
នាឱកាសនោះ លោក W. Patrick Murphy ឯកអគ្គរដ្ឋទូតអាមេរិកប្រចាំកម្ពុជា បានលើកឡើងថា បច្ចុប្បន្នវិស័យកសិកម្មកម្ពុជា មានការរីកចម្រើនជាបន្តបន្ទាប់គួរឱ្យកត់សម្គាល់ តាមរយៈការគាំទ្រទាំងបច្ចេកទេស និងហិរញ្ញវត្ថពីរដ្ឋាភិបាលសហរដ្ឋអាមេរិកកន្លងមកនេះ។ ក្រោយមើលឃើញសមិទ្ធផលកសិកម្មដ៏ល្អគាប់ចិត្តនេះ លោក Patrick Murphy ក៏បានសន្យាថា លោកនឹងបន្តជួយឧបត្ថម្ភគាំទ្រ និងអភិវឌ្ឍវិស័យកសិកម្មកម្ពុជាបន្ថែមទៀត នៅក្នុងអាណត្តិរបស់លោក។
ឯកអគ្គរដ្ឋទូតសហរដ្ឋអាមេរិក ប្រចាំកម្ពុជា ក៏បានបញ្ជាក់ពីមូលហេតុដែលសហរដ្ឋអាមេរិក ចង់ជួយនឹងបន្តផ្ដល់ជំនួយដល់កម្ពុជា គឺដើម្បីសហប្រតិបត្តិការសិក្សាជាមួយសាកលវិទ្យាល័យភូមិន្ទកសិកម្មរបស់កម្ពុជា និងសាកលវិទ្យាល័យកសិកម្មរបស់សហរដ្ឋអាមេរិក ដោយជំរុញឱ្យមានអ្នកជំនាញសហរដ្ឋអាមេរិក និងអ្នកជំនាញខ្មែរបានជួបគ្នាស្វែងយល់ពីបច្ចេកទេសកសិកម្មចម្រុះនៅកម្ពុជា ដែលអាចជំរុញឱ្យកម្ពុជា មានចំនួនអ្នកស្រាវជ្រាវកាន់តែច្រើនជាងមុន។
ជាងនេះទៀត លោក Patrick Murphy បានមានប្រសាសន៍បន្ថែមថា “តាមរយ:ចំណងការទូតនេះធ្វើឱ្យយើងមានថ្ងៃនេះ ហើយដែលសមិទ្ធផលទទួលបានពីកិច្ចសហប្រតិបត្តិការនេះ បានចូលរួមចំណែកយ៉ាងមានប្រសិទ្ធភាពក្នុងការកសាង និងអភិវឌ្ឍធនធានមនុស្ស ដែលពួលគេនឹងចូលជាចលករក្នុងការរុញច្រាន ពន្លឿនវិស័យកសិករឱ្យមានការរីកចម្រើនជាបន្តបន្ទាប់។ ការរីកចម្រើននេះ ពិតជាបានរួមចំណែកក្នុងលើកកម្ពស់កម្រិតជីវភាព បង្កើនប្រាក់ចំណូល និងនិរន្តរភាពសេដ្ឋកិច្ច”។
ជាការឆ្លើយតបចំពោះ ការលើកឡើងពីសំណាក់ឯកអគ្គរដ្ឋទូតសហរដ្ឋអាមេរិក ប្រចាំកម្ពុជានេះដែរ ឯកឧត្ដម វេង សុខុន រដ្ឋមន្ត្រីក្រសួងកសិកម្ម បានឱ្យដឹងថា កន្លងមកអាមេរិក បានជួយបញ្ជ្រាបបច្ចេកទេសទំនើប ទាន់សម័យ និងសមស្របទៅតាមស្ថានភាពភូមិសាស្ត្រ ដី ទឹក ក្សេត្របរិស្ថាន និងភាតរបរិស្ថាន ក្នុងបំណងបង្កើនផលិតភាពផលិតកម្ម គុណភាព សុវត្ថិភាព ឱ្យស្របតាមស្តង់ដាទីផ្សារក្នុង និងក្រៅស្រុក ដើម្បីឈានទៅលើកកម្ពស់កម្រិតជីវភាព និងបង្កើនប្រាក់ចំណូល។ ជាពិសេសធានាសន្តិសុខស្បៀង អាហារូបត្ថម្ភ កាត់បន្ថយចំណាកស្រុក និងកាត់បន្ថយការពឹងអាស្រ័យទាំងស្រុងលើធនធានមច្ឆជាតិពីប្រភពធម្មជាតិ តាមរយ:បង្កើនផលិតភាពផលិតកម្មវារីវប្បកម្មជាដើម។
ជាងនេះទៀត លោក រដ្ឋមន្ត្រី ក៏បានសង្កត់ធ្ងន់ទៀតថា ក្រៅពីជំនួយបច្ចេកទេស និងថវិកាទាំងនេះរដ្ឋមន្ត្រីកសិកម្ម ក៏រំពឹងថា អាមេរិកនឹងជំរុញអ្នកវិនិយោគមកបោះទុនរកស៊ីបន្ថែមទៀត លើវិស័យកសិកម្មនេះ។ យ៉ាងណាក្ដី លោកក៏បានថ្លែងអំណរគុណយ៉ាងជ្រាលជ្រៅជូនចំពោះប្រជាជន និងរដ្ឋាភិបាលសហរដ្ឋអាមេរិកដែលបានជួយឧបត្ថម្ភគាំទ្រដល់ការអភិវឌ្ឍប្រទេសកម្ពុជាឱ្យមានការរីកចម្រើន។
ទាក់ទិននឹងចំណុចនេះដែរ សាកលវិទ្យាធិការនៃសាកលវិទ្យាល័យភូមិន្ទកសិកម្ម លោក ង៉ោ ប៊ុនថាន ក៏បានបន្ថែមផងដែរថា តាមរយៈគម្រោងនានាដែលបានឧបត្ថម្ភដោយទីភ្នាក់ងារសហរដ្ឋអាមេរិក (USAID) ទាក់ទងលើការស្រាវជ្រាវមកកានសាកលវិទ្យាល័យភូមិន្ទកសិកម្ម កន្លងមកក៏បានជួយកសាងសមត្ថភាពមន្ត្រី សាស្ត្រាចារ្យ និងនិស្សិត និងការពង្រឹងសមត្ថភាពមន្ទីរពិសោធន៍នវានុវត្តន៍ ប្រពលវប្បកម្មនិរន្តរភាព សាកវប្បកម្ម ការគ្រប់គ្រងចម្រុះលើកត្តាចង្រៃ ប្រព័ន្ធបសុសត្វ និងសុវត្ថិភាពអាហារផងដែរ។
យោងតាមរបាយការណ៍ក្រសួងសេដ្ឋកិច្ច និងហិរញ្ញវត្ថុ កាលពីចុងខែធ្នូ ឆ្នាំ2019 បានឱ្យដឹងថា បើគិតចាប់តាំងពីឆ្នាំ1992 ដល់ឆ្នាំ2019 នេះ សហរដ្ឋអាមេរិក បានផ្ដល់ហិរញ្ញប្បទានឥតសំណងប្រមាណ 1,500លានដុល្លារអាមេរិក សម្រាប់អនុវត្តគម្រោងអភិវឌ្ឍន៍នានានៅកម្ពុជា ដោយផ្ដោតលើវិស័យអប់រំ សុខាភិបាល កសិកម្ម និងវិស័យបរិស្ថាន។
របាយការណ៍នោះ បានបន្តថា មានក្រុមហ៊ុនអាមេរិកជាច្រើន បានមកបណ្ដាក់ទុននៅកម្ពុជាជាបន្តបន្ទាប់ ខណៈដែលទំហំពាណិជ្ជកម្មទ្វេភាគីរវាងប្រទេសទាំង2 បន្តកើនឡើងពី 1ឆ្នាំទៅ 1ឆ្នាំ។
ជាងនេះទៀត តាមរយៈហិរញ្ញប្បទានឥតសំណងប្រមាណ 1,500លានដុល្លារ ព្រមទាំងការវិនិយោគ និងពាណិជ្ជកម្មកន្លងមកនេះ គឺពិតជាបានរួមចំណែកបង្កើតការងារ និងផ្ដល់ប្រាក់ចំណូលជាច្រើនដល់ប្រជាពលរដ្ឋកម្ពុជា៕
January 27, 2020
វិធីថ្នាក់ថ្នមបបោសអង្អែលឱ្យដៃគូឈ្លក់វង្វេង
មិនមានអ្នកណាម្នាក់ហ៊ានអះអាងខ្លួនថា មិនត្រូវការបញ្ហាសិចនោះទេ ផ្ទុយទៅវិញ ម្នាក់ៗសុទ្ធតែមានបំណងប្រាថ្នានូវភាពកក់ក្ដៅ សុខស្រួល និងអាចឈានដល់ចំណុចកំពូលនៃតម្រេកតណ្ហារបស់ខ្លួន ដែលវាគឺជាក្រមធម្មជាតិនៃមនុស្ស។ ជាមួយនឹងការចង់បាននូវភាពសុខស្រួលជាមួយដៃគូនេះ អ្វីដែលជាប្រការសំខាន់ និងត្រូវតែអនុវត្តមិនអាចរំលងបាននោះ គឺការបង្កើនភាពស្រៀវស្រើបដុតកម្ដៅនូវចំណង់កាមគុណដោយការចេះបបោសអង្អែលគ្រប់រូបភាពដែលអាចមានប្រសិទ្ធភាពខ្ពស់មុនពេលធ្វើការវាយសម្រុកសម្រេចតម្រេកតណ្ហាជាមួយដៃគូ។ ខាងក្រោមនេះគឺជាចំណុចល្អៗ ដែលអាចជាជំនួយរបស់លោកអ្នកមុនពេលបើកឆាកប្រយុទ្ធក្នុងសមរភូមិលើគ្រែ។

1. បបោសអង្អែលតាមរយៈសកម្មភាពមាត់
ការបបោសអង្អែលដោយការបឺតមាត់គ្នា គឺជាការដាស់អារម្មណ៍ឱ្យគ្នាទៅវិញទៅមកមួយប្រកបដោយភាពស្រៀវស្រើប។ បបូរមាត់ដ៏ស្រទន់របស់ភាគីស្រីនឹងញ័រចំប្រប់ដោយសារបានប៉ះផ្អឹបនឹងបបូរមាត់ប្រកបដោយសិល្បៈរបស់បុរសជាគូស្នេហ៍។ ក្នុងពេលដែល ខ្យល់ដង្ហើមក្តៅឧណ្ហៗ ដែលបាញ់ចេញពីច្រមុះភាគីខាងប្រុសទៅលើផែនថ្ពាល់ដ៏រលើបរលោងរបស់អ្នក វានឹងធ្វើឱ្យអ្នកទទួលអារម្មណ៍ថា ការខាំលិទ្ធបបូរមាត់ ជាមួយបុរសគូស្នេហ៍ជាការស្រេកឃ្លានត្រេកត្រអាលមួយ ហើយអារម្មណ៍របស់អ្នកក៏នឹងចាប់ផ្តើមឡើងកម្តៅដោយសកម្មភាពដ៏មមាញឹកនៃបបូរមាត់របស់បុរសជាគូស្នេហ៍។
2. បបោសអង្អែល ដោយការប្រើអណ្តាត
ការបបោសអង្អែលដោយស៊កអណ្តាតទៅកាន់ទីតាំងស្រៀវស្រើបឱ្យគ្នាទៅវិញទៅមកវាបានធ្វើឱ្យភ្លើងកាមគុណ កាន់តែពុះកញ្ជ្រោលរោលរាលខ្លាំងឡើង មិនចំពោះថាការថ្នាក់ថ្នមបបោសអង្អែលនោះកើតឡើងរវាងអណ្តាត និងអណ្តាត ឬអណ្តាត និងក ឬការបបោសអង្អែលដ៏ស្រៀវស្រើបបំផុតរវាងអណា្តតជាមួយនឹងទីតាំងអាថ៌កំបាំងរបស់គូស្នេហ៍ទាំងពីរនោះទេ ដោយសារតែអណ្តាតអាចគ្រប់គ្រងបានចង់គ្រលាស់ដាស់អារម្មណ៍ត្រង់ផ្នែកណា ឬចង់បាញ់ឆ្ពោះទៅកាន់ផ្នែកទទួលអារម្មណ៍ស្រើបស្រាលណាមួយរបស់ដៃគូ។ ដូច្នេះ ទើបអណ្តាតជាផ្នែកសំខាន់បំផុតមួយក្នុងការដាស់អារម្មណ៍ឱ្យគ្នាទៅវិញទៅមក ព្រោះថាប្រសិនបើខ្វះការបបោសអង្អែលដោយការប្រើអណ្តាតនោះសេចក្តីសុខស្រួល ដែលបានពីសិចនឹងមិនបានសមដូចបំណងឡើយ។
3. បបោសអង្អែលដោយប្រើច្រមុះថើបឈ្មុល
ការបបោសអង្អែលឱ្យគ្នាទៅវិញទៅមកដោយការប្រើច្រមុះថើបស្រង់ក្លិនឈ្មុសឈ្មុលចាត់ទុកថា ជាសកម្មភាពលើគ្រែពិសេសមួយដែលគូស្នេហ៍ម្នាក់ៗ គប្បីបំពេញឱ្យគ្នា។ សិចដែលខ្វះការបបោសអង្អែលដោយច្រមុះទៅលើទីតាំងស្រៀវស្រើបផ្សេងៗគឺជាសិចដែលមិនបានសម្តែងចេញនូវក្តីស្រឡាញ់ឱ្យដល់ទីបំផុតឡើយ លើកលែងតែការចូលដល់ទីតាំងនោះមានក្លិនមិនល្អ។ អារម្មណ៍ដែលគូស្នេហ៍ច្រើនតែបំពេញឱ្យគ្នាទៅវិញទៅមកនោះ គឺត្រង់បរិវេណកជាពិសេសខាងស្រីពេលត្រូវឈ្មុសឈ្មុលដោយច្រមុះកោងស្រួចរបស់បុរសគូស្នេហ៍ តែងតែបិតភ្នែកប្រិមៗផ្អឹបមាត់ប្រកបដោយសេចក្តីសុខស្រួលរាល់លើក។
4. បបោសអង្អែលដោយបង្អូសម្រាមដៃ
ការប្រើម្រាមដៃជំនួសក្នុងការមានសិចនោះ វាជាអាវុធរំញោច និងដាស់អារម្មណ៍ឱ្យពុះកញ្ជ្រោលបានខ្លាំង។ ម្រាមដៃដល់ស្រលូនដែលដាក់បង្អូសទៅលើចំណុចសំខាន់ៗលើរាង្កកាយធ្វើឱ្យអារម្មណ៍គូស្នេហ៍អ្នកទាំងពីរពុះកញ្ច្រោល។ ម្រាមដៃដែលធ្វើការវាយលុក បានគ្រប់កន្លុកកន្លៀតកៀនកោះទាំងអស់លើរាង្គកាយ ជាពិសេសទីកំបាំង ឬទីតាំងហប់ខ្យល់។កតា្តសំខាន់ គូស្នេហ៍ច្រើនប្រើម្រាមដៃ ដើម្បីដាស់អារម្មណ៍ឱ្យពុះកញ្ច្រោល ឬអាចនិយាយម្យ៉ាងទៀតថា ដើម្បីកម្តៅសាច់ដុំរាង្គកាយមុននឹងឈានដល់ដំណាក់កាលដាក់ចូលដកចេញ។ ប៉ុន្តែយ៉ាងណាក៏ដោយ ត្រូវមានការប្រុងប្រយ័ត្នចំពោះក្រចកដៃ អ្វីដែលមិននឹកស្មានអាចកើតឡើងបាន ពីព្រោះកាលដែលអ្នកទុកក្រចកដៃវែងពេកនោះមុខ ក្រចកអាចនឹងបង្ករបួសស្នាមដល់គ្នា។
5. បបោសអង្អែលដោយខ្លួនប៉ះខ្លួន
គូស្នេហ៍ជាច្រើនអាចនឹងមើលរំលងនូវការបបោសអង្អែលចំណុចមួយនេះ ប៉ុន្តែយើងសូមបញ្ជាក់ប្រាប់ថា ការដែលខ្លួនត្រូវផ្អោបនិងត្រូវឱបរឹតយ៉ាងណែននោះផ្តល់នូវសេចក្តីសុខ និងភាពកក់ក្តៅដល់គូស្នេហ៍ទាំងសងខាង ដូច្នេះចូរកុំបោះបង់ការបបោសអង្អែលដោយខ្លួនប៉ះខ្លួននេះឱ្យសោះ៕
January 27, 2020