កន្លាត ជាសត្វចង្រៃដែលតែងតែមកពួនសម្ងំនៅក្នុងចង្ក្រានបាយ ក្នុងទូ ឬនៅក្នុងទីកន្លែងផ្សេងៗក្នុងផ្ទះនោះ មានវិធីកំចាត់ដ៏ងាយសែនងាយ តែស្ត្រីមេផ្ទះភាគច្រើន អាចមិនដឹង ឬគិតមិនដល់។
វិធីនោះគឺ យកគ្រាប់ម្រេចទៅដាក់នៅតាមកន្លែងណាដែលសត្វកន្លាតចូលចិត្តចេញមក ដោយដាក់ក្នុងមួយចំណុច 4-5 គ្រាប់បានហើយ។ តែប៉ុណ្ណឹងសត្វកន្លាតនឹងលែងហ៊ានមករំខានទៀតហើយ ព្រោះវាមិនត្រូវធាតុគ្នាជាមួយនឹងក្លិនគ្រាប់ម្រេចឡើយ មិនចាំបាច់ប្រើថ្នាំបាញ់សម្លាប់សត្វល្អិតនាំតែអស់លុយ និងមានគ្រោះថ្នាក់ដល់អ្នកនៅក្នុងផ្ទះឡើយ ដល់ពេលគ្រាប់ម្រេចនោះអស់ក្លិន ក៏ដូរដាក់គ្រាប់ម្តេចថ្មីទៀតជំនួសជាការស្រេច៕
Author: ធឿន មករា
ផ្ទះបាយ នឹងលែងមានសត្វកន្លាត ដោយគ្រាន់តែអនុវត្តតាមវិធីនេះ
ដឹងអត់ ទទួលទានល្ងខ្មៅរាល់ថ្ងៃមានអត្ថប្រយោជន៍អ្វីខ្លះ?
ល្ងខ្មៅ ជាអាហារមួយប្រភេទដែលមានអត្ថប្រយោជន៍បំផុត ព្រោះវាមានសារធាតុចិញ្ចឹម និងថែរក្សារាងកាយរបស់មនុស្សយើងបានយ៉ាងល្អ ។ ល្ងខ្មៅ ជាគ្រាប់ធញ្ញជាតិតូចៗ ដែលសម្បូរជីវជាតិ និងគុណសម្បតិ្តជួយថែរក្សាសុខភាពបានល្អ ដូច្នោះហើយទើបល្ងខ្មៅជាអាហារដែលជាប់លំដាប់ថ្នាក់កំពូល នៃអាហារដែលមានសារៈប្រយោជន៍ចំពោះរាងកាយ ដែលលោកអ្នកមិនគួររំលង ។ តើអ្នកធ្លាប់បានដឹងខ្លះទេថា នៅក្នុងគ្រាប់ល្ងខ្មៅតូចៗ មានសារធាតុអ្វីខ្លះ ហើយមានគុណប្រយោជន៍អ្វីខ្លះ ?
យោងតាមវេជ្ជបណ្ឌិតជំនាញបានឲ្យដឹងថា អ្នកវិទ្យាសាស្រ្ដបានឡើងអំពីល្ងខ្មៅថា ជាគ្រាប់ធញ្ញជាតិដែលមានកំណើតចេញពីប្រទេស អេត្យូពី បាននាំចូលមកដល់ប្រទេស ឥណ្ឌា ចិន អាហ្វ្រិកខាងជើង និងអាស៊ី កាលពី ២០០០ឆ្នាំមុន ហើយល្ងខ្មៅជាប្រភេទល្ងតែមួយនឹងល្ងស។ អ្នកវិទ្យាសាស្រ្ដបានបន្ដទៀតថា បើទទួលទានល្ងខ្មៅ ១០០ក្រាមនោះ លោកអ្នកទទួលបានថាមពល ៥៧៣គីឡូកាឡូរី ។ មិនត្រឹមតែប៉ុណ្ណោះទេ ការទទួលទានល្ងខ្មៅ មានអត្ថប្រយោជន៍ដូចជា ៖
១.បំបាត់ការឈឺចាប់សន្លាក់រ៉ាំរ៉ៃ
២.ជំនួយស្បែក និង ឆ្អឹង
៣.កាត់បន្ថយកូឡេស្តេរ៉ុលក្នុងសរសៃឈាម
៤.ជំនួយបេះដូង និងសម្រួលចង្វាក់បេះដូង
៥.ការពារជំងឺមហារីក
៦.ជំនួយប្រព័ន្ធរំលាយអាហារ
៧.បន្ថយការឈឺចាប់ពេលមករដូវ
៩.ជួយឲ្យគេងលក់ស្រួល
១០.ជំនួយខួរក្បាល បង្កើនសមត្ថភាពចង់ចាំ
១១.ជំនួយភ្នែក ៕
ម៉ូដក្រចកពេញដោយក្តីស្រឡាញ់
ថ្ងៃបុណ្យ Valentin’s Day ដែលជាថ្ងៃពេញដោយភាពស្រស់ស្រាយ ពណ៌ស៊ីជំពូគ្រប់ទីកន្លែង ផ្កាពណ៌ផ្កាឈូក ពណ៌ក្រហម កំពុងរងចាំអ្នក ដូច្នេះត្រូវតែតុបតែងខ្លួនឱ្យស្អាត ហើយកុំភ្លេចបន្ថែមពណ៌ក្រចករបស់អ្នកឱ្យត្រូវនឹងរដូវកាលផងណា៎! សូមក្រឡេកមើលមើល៎ម៉ូដក្រចករូបបេះដូង ពណ៌ស្អាតៗ គួរឱ្យស្រឡាញ់នៅក្នុងទំព័រមួយនេះ ម៉ូដមួយណាដែលអ្នកពេញចិត្ត សូមលេងម៉ូដក្រចក និងពណ៌ក្រចកឱ្យស្អាតជាទីពេញចិត្តរបស់គូស្នេហ៍របស់អ្នកក្នុងថ្ងៃបុណ្យនៃក្តីស្រឡាញ់ក្នុងឆ្នាំនេះ ដើម្បីបង្កើនមន្តស្នេហ៍ និងជាទីចាប់អារម្មណ៍របស់គូស្នេហ៍របស់អ្នក និងមនុស្សនៅជុំវិញប្រកបដោយភាពជឿជាក់៕
មន្ទីរពេទ្យកុមារអង្គរបន្ថែមការយល់ដឹងដល់អាណាព្យាបាល ពីរបៀបថែទាំកូន និងបង្ការជំងឺបុត្រធីតា តាមរយៈវេទិកាថ្មីមួយ
មន្ទីរពេទ្យកុមារអង្គរបានបង្ហាញគម្រោងមួយដែលមានឈ្មោះថា វេទិកាតុកាហ្វេវិទ្យាសាស្ដ្រ ឬ Science Café ជាវេទិកាផ្តល់ចំណេះដឹងបន្ថែមដល់ឪពុកម្ដាយ ឬអាណាព្យាបាលដែលមានកូនមកសម្រាកព្យាបាលជំងឺក្នុងមន្ទីរពេទ្យកុមារអង្គរ ដើម្បីបន្ថែមការការពារ និងថែទាំបុត្រធីតាមិនឱ្យមានជំងឺ និងចេះថែទាំនៅពេលពួកគេឈឺថ្កាត់ផងដែរ។
ការពិតទៅ វេទិកាតុកាហ្វេវិទ្យាសាស្ដ្រនេះ បានបង្កើតឡើងអស់រយៈពេល 3ឆ្នាំមកហើយ គឺតាំងពីឆ្នាំ2016 មកម៉្លេះ ដោយមានកម្មវិធីបង្រៀនជាប្រចាំ សម្រាប់ចែករំលែកចំណេះដឹងសុខភាព ដល់មាតាបិតាដែលនាំកូនមកព្យាបាលជំងឺ ក្នុងមន្ទីរពេទ្យកុមារអង្គរ។ វេទិកានេះ ដូចជាថ្នាក់រៀនមួយដូច្នោះដែរដែលបង្រៀនមេរៀនពីជំងឺផ្សេងៗដែលងាយកើតលើកុមារតូចៗ និងរបៀបថែទាំពួកគេ។កញ្ញា ប៉ុល ស្រីមុំ អ្នកស្រាវជ្រាវការិយាល័យស្រាវជ្រាវវិទ្យាសាស្ដ្រ Oxford ប្រចាំប្រទេសកម្ពុជា នៅក្នុងមន្ទីរពេទ្យកុមារអង្គរបានឱ្យដឹងថា គោលបំណងនៃវេទិកានេះ គឺផ្តល់ភាពជិតស្និទ្ធរវាងគ្រូពេទ្យនិងអាណាព្យាបាលកុមារ បង្កើនការយល់ដឹងបន្ថែមពីសុខភាពកុមារក៏ដូចជាជំងឺផ្សេងៗដែលកំពុងកើតមាន។ កញ្ញា ស្រីមុំ បានឱ្យដឹងថា រយៈពេល 3ឆ្នាំមកនេះ វេទិកានេះបានអញ្ជើញគ្រូពេទ្យតាមឯកទេសជាច្រើនសម្រាប់ការធ្វើបទបង្ហាញ និងផ្តល់ចំណេះដឹងផ្នែកថែទាំកុមារដល់ឪពុកម្ដាយ និងអាណាព្យាបាលកុមារ ហើយមេរៀនមួយចំនួនគឺបានពីការសម្ភាសអាណាព្យាបាលដែលពួកគេមានចម្ងល់ និងចង់ដឹងបន្ថែមពីអាការជំងឺ និងរបៀបថែទាំឱ្យបានល្អប្រសើរ។ ការបង្រៀននេះទៀតសោត បានផ្តោតលើជំងឺតាមរដូវកាល ដែលឧស្សាហ៍កើតលើកុមារ ដូចជាជំងឺផ្ដាសាយ គ្រុនឈាម និងកង្វះអាហារូបត្ថម្ភជាដើម។
អ្នកស្រី ចាន់ លីណា ដែលបានចូលរួមក្នុងវេទិកាកាហ្វេវិទ្យាសាស្ដ្របាននិយាយថា កម្មវិធីនេះពិតជាល្អ និងមានសារៈសំខាន់ណាស់ និងធ្វើឱ្យអ្នកស្រីទទួលបានចំណេះដឹងថ្មីបន្ថែមទាក់ទងនឹងអនាម័យថែទាំកូន។
លោកវេជ្ជបណ្ឌិត មីលីយ៉ា ធី ដែលធ្វើជាគ្រូឧទ្ទេសក្នុងវេទិកាតុកាហ្វេវិទ្យាសាស្ដ្រកាលពីពេលទៅថ្មីៗនេះ បាននិយាយថា លោកបានចែករំលែកចំណេះដឹងទាក់ទងនឹងជំងឺដែលកើតឡើងតាមរដូវកាលទាំងរដូវប្រាំង និងវស្សា។ លោកវេជ្ជបណ្ឌិតបានពន្យល់ថា រដូវកាលទាំង2 នេះតែងនាំមកនូវជំងឺផ្សេងៗគ្នាដែលអាណាព្យាបាលគួរស្វែងយល់ ពិសេសជំងឺផ្ដាសាយ និងជំងឺគ្រុនឈាមដែលតែងកើតលើកុមារភាគច្រើន ប្រសិនបើមិនមានការថែទាំត្រឹមត្រូវពីអាណាព្យាបាល។
សម្រាប់លោកវេជ្ជបណ្ឌិត មីលីយ៉ា ការយល់ដឹងពីជំងឺជាមុន ពិតជាសំខាន់ណាស់សម្រាប់ឪពុកម្ដាយ ព្រោះដើម្បីឱ្យកូនៗរបស់ពួកគាត់មានអនាម័យ និងចេះថែទាំកុមារកុំឱ្យឈឺ។ លោកថា ការការពារប្រសើរជាងការព្យាបាល ហើយលោកជឿថា អាណាព្យាបាលទាំងអស់នឹងយកចំណេះដឹងដែលបានរៀនពីគ្រូពេទ្យទៅអនុវត្តប្រសិនពួកគេស្រឡាញ់សុខភាពកូន។
កញ្ញា ប៉ុល ស្រីមុំ យល់ថា វេទិកានេះមានសារៈសំខាន់ និងជាឱកាសដែលឱ្យវាគ្មិនជាគ្រូពេទ្យមានពេលផ្តល់ព័ត៌មានកាន់តែលម្អិតទាក់ទងនឹងជំងឺ រីឯអាណាព្យាបាលអ្នកជំងឺវិញ ក៏ពួកគាត់មានឱកាសជជែកវែកញែកទាក់ទងនឹងអាការជំងឺរបស់កូន និងមានសំណួរទាក់ទងនឹងជំងឺរបស់កូនពួកគាត់ដែរ៕
មណ្ឌលគិរី កន្លែងកម្សាន្តដ៏ស័ក្តិសមសម្រាប់ថ្ងៃឈប់សម្រាក
គ្រាន់តែឈានជើងចូលដល់ទឹកដីនៃខេត្តមណ្ឌលគិរីភ្លាម អារម្មណ៍ហត់នឿយដែលបណ្តាលមកពីការធ្វើដំណើរអស់រយៈពេលស្ទើរពេញមួយព្រឹក ហាក់រលាយបាត់ទៅដោយមិនដឹងខ្លួន។
ទេសភាពនៃធម្មជាតិដ៏ស្រស់បំព្រង រួមផ្សំជាមួយនឹងផ្កាស្មៅភ្នំដែលកំពុងយោលយោគតាមកម្លាំងខ្យល់បក់នៅតាមដងផ្លូវ អាកាសធាតុដ៏ត្រជាក់ពីរុក្ខជាតិតាមដងភ្នំ បានឆក់យកសេចក្តីនឿយហត់ទាំងឡាយ បន្សល់ទុកនូវទឹកចិត្តរីករាយ និងក្តីអន្ទះសារចង់ដឹងថាតើទីតាំងដែលនឹងត្រូវទៅកម្សាន្តនោះវាស្រស់ស្អាតដល់កម្រិតណាទៅ? បើគ្រាន់តែទេសភាពតាមដងផ្លូវសោះក៏អាចធ្វើឱ្យយើងមានអារម្មណ៍ថា ហាក់ដូចជាកំពុងតែស្ថិតនៅភពផ្សេងគ្នាទាំងស្រុងពីកន្លែងដែលយើងរស់នៅជារៀងរាល់ថ្ងៃទៅហើយនោះ។
នៅពេលដែលបានឃើញរូបសត្វគោព្រៃពីរក្បាលដែលស្ថិតនៅចំកណ្តាលផ្លូវ នោះមានន័យថា អ្នកបានចូលមកដល់ទីរួមខេត្តមណ្ឌលគិរីហើយ។ នៅទីនោះអ្នកអាចស្វែងរកកន្លែងស្នាក់នៅ កន្លែងទទួលទានអាហារ ព្រមទាំងផ្សារដែលអាចចូលទិញឥវ៉ាន់នៅក្នុងផ្សារខេត្តនោះបានតាមចំណូលចិត្តផងដែរ ហើយបន្ទាប់ពីនោះវាជាពេលវេលាដែលអ្នកត្រូវធ្វើដំណើរកម្សាន្តម្តង។
មណ្ឌលគិរី អាចនាំក្រសែភ្នែករបស់អ្នកឱ្យទៅទស្សនាកន្លែងកម្សាន្តជាច្រើនកន្លែងដូចជា ទឹកធ្លាក់អូររមីស ចំការស្រល់ ភ្នំដោះក្រមុំ សមុទ្រឈើ ភូមិជនជាតិ ចំការកាហ្វេ និងទីតាំងទឹកជ្រោះជាច្រើនកន្លែងទៀត ប៉ុន្តែតំបន់ទេសចរណ៍ដែលមានឈ្មោះល្បីជាងគេគឺទឹកជ្រោះប៊ូស្រា។ ទឹកជ្រោះប៊ូស្រាចែកចេញជា 3ដំណាក់ ដំណាក់ទី1 មានកម្ពស់ប្រមាណ12ម៉ែត្រ ដែលមានមុខកាត់ 15ម៉ែត្រនៅរដូវវស្សា។ ដំណាក់ទី2 មានកម្ពស់ពី15 ទៅ20ម៉ែត្រ និងមានមុខកាត់ទទឹង 20ម៉ែត្រ មានកម្ពស់18 ទៅ25ម៉ែត្រ ចំណែកនៅរដូវប្រាំង គឺមានមុខកាត់ត្រឹមតែ 13ម៉ែត្រប៉ុណ្ណោះ។ ដំណាក់ទីពីរនេះមានចម្ងាយប្រមាណជា150ម៉ែត្រពីដំណាក់ទីមួយ។ ចំណែកដំណាក់ទី3 ស្ថិតនៅឆ្ងាយពីដំណាក់ទី2 ដែលមិនអាចទៅដល់បាន ព្រោះជាតំបន់ព្រៃក្រាស់ និងសម្បូរសត្វសាហាវរស់នៅ។ បន្ទាប់ពីនោះ អ្នកទេសចរអាចបន្តទៅកន្លែងមួយផ្សេងទៀតគឺទឹកជ្រោះសែនមនោរម្យ ដែលមានចម្ងាយត្រឹមតែ 5គីឡូម៉ែត្រពីទីរួមខេត្ត ហើយទឹកធ្លាក់នៅទីនោះក៏មាន 3ដំណាក់ដែរ ប៉ុន្តែវាមានទ្រង់ទ្រាយតូចជាងទឹកជ្រោះប៊ូស្រា។
ចំណែកទឹកជ្រោះរមនា គឺចម្ងាយប្រមាណជា 11គីឡូម៉ែត្រពីទីរួមខេត្ត ហើយតំបន់ទឹកជ្រោះនេះហ៊ុមព័ទ្ធជុំវិញដោយដំណាំផ្សេងៗជាច្រើនដូចជា ដំណាំកោស៊ូ ស្វាយចន្ទី កាហ្វេនិងរុក្ខជាតិ ព្រមទាំងព្រៃឈើតូចធំជាលម្អនៅក្នុងតំបន់មួយនេះ។ ទឹកជ្រោះនេះ ក៏ជាតំបន់គួរឱ្យទាក់ទាញចំពោះទេសចរផងដែរ ដោយមានទឹកធ្លាក់កម្ពស់5ម៉ែត្រ ហូរធ្លាក់ទៅក្នុងអាងទឹកធំមួយដែលបង្កនូវភាពងាយស្រួលដល់អ្នកទេសចរក្នុងការងូតទឹកកម្សាន្ត។ មិនទាន់អស់ត្រឹមនេះនោះទេមណ្ឌលគិរីនៅមានកន្លែងគួរឱ្យចាប់អារម្មណ៍ជាច្រើនទៀត ដែលអ្នកគួរតែទៅមើលឱ្យឃើញដោយផ្ទាល់ភ្នែក ដូច្នេះសង្ឃឹមថាថ្ងៃសម្រាកខាងមុខនេះ វានឹងក្លាយជាតំបន់ទេសចរណ៍មួយដែលស្ថិតនៅក្នុងជម្រើសរបស់អ្នក៕
រឿងពិតក្នុងប្រវត្តិសាស្រ្តសង្រ្គាម «ទាហានជប៉ុនលាក់ខ្លួនក្នុងទឹកដីសត្រូវជាង28ឆ្នាំ»
រឿងពិតក្នុងប្រវត្តិសាស្រ្តសង្រ្គាម «ទាហានជប៉ុនលាក់ខ្លួនក្នុងទឹកដីសត្រូវជាង28ឆ្នាំ»ព្រោះមិនដឹងថាសង្រ្គាមលោកលើកទី 2 ចប់ហើយ
ទាហានជប៉ុនម្នាក់លាក់ខ្លួនក្នុងរណ្តៅ 28 ឆ្នាំ!
ជារឿងរ៉ាវដ៏សែនកំសត់ជាទីបំផុតរបស់ “Yokoi Shoichi” ទាហានជប៉ុនដែលរួចជីវិតនៅលើកោះ ហ្គួម អស់រយៈពេលយូរដល់ទៅ 28 ឆ្នាំ ក្នុងអំឡុងពេលសង្រ្គាមលោកលើកទី 2 ដោយមិនបានដឹងថា សង្រ្គាមបានបញ្ចប់ទៅហើយនោះឡើយ។
នៅក្នុងប្រត្តិបត្តិការសឹករបស់ទាហានជប៉ុនក្នុងសម័យសង្រ្គាមលោកលើកទី 2 យ៉ូកូអ៊ិ សូអ៊ិឈិ ជាជាងកាត់ដេរ ដែលត្រូវបានកេណ្ឌទៅប្រយុទ្ធក្នុងកងទ័ពជប៉ុននៅឆ្នាំ 1941 ដោយបានទទួលឋានន្តរស័ក្តិជា ព្រឹន្ទបាលទោ។ គេបានទទួលភារកិច្ចឱ្យចូលទៅវាយលុកកោះ ហ្គួម របស់ទាហានអាមេរិកាំងក្នុងអំឡុងឆ្នាំ 1944 តែកងទ័ពរបស់សហរដ្ឋអាមេរិកបានព័ទ្ធចាប់ទាហានជប៉ុនបានយ៉ាងឆាប់រហ័ស និងជាច្រើននាក់ត្រូវបានសម្លាប់ ដែលធ្វើឱ្យក្រុមរបស់ យ៉ូកូអ៊ិ សូអ៊ិឈិ និងមិត្តទាហាន 10 នាក់ទៀតដកថយចូលទៅក្នុងព្រៃជ្រៅ ដើម្បីពួនគេចខ្លួន តែមិនយូរប៉ុន្មាន ទាហានអាមេរិកាំងក៏រកឃើញយ៉ាងឆាប់រហ័ស ធ្វើឱ្យទាហានជប៉ុនទាំងនោះត្រូវបំបែកគ្នារត់ទៅទីកន្លែងផ្សេងៗទៀតដើម្បីលាក់ខ្លួនជាបន្ត។
យ៉ូកូអ៊ិ សូអ៊ិឈិ និងមិត្តទាហាន 3 នាក់ទៀត បានទៅពួនលាក់ខ្លួនក្នុងបរិវេណមួយជាមួយគ្នា និងរស់នៅក្នុងព្រៃអស់ជាច្រើនឆ្នាំ រហូតដល់ឆ្នាំ 1952 ពួកគេក៏បានឮព័ត៌មានថា សង្រ្គាមបានចប់ហើយ តែក៏នៅតែខ្លាចថា ព័ត៌មាននោះជាកលល្បិចរបស់ពួកអាមេរិកាំង ទើបនៅតែគេចខ្លួន និងសម្ងំរស់នៅក្នុងព្រៃតទៅទៀតដដែល។និងមិនប៉ុន្មានឆ្នាំតមក មិត្តទាហានទាំង 3 នាក់ក៏ស្លាប់បាត់បង់ជីវិតទៅ ធ្វើឱ្យ យ៉ូកូអ៊ិ សូអ៊ិឈិ ត្រូវរស់នៅក្នុងព្រៃជ្រៅតែម្នាក់ឯង ដែលជាហេតុធ្វើឱ្យមនុស្សជាច្រើននឹកឆ្ងល់ថា តើដោយសារហេតុអ្វី ទើបធ្ចើឱ្យទាហានជប៉ុនមួយរូបនេះនៅមានជីវិត?។
យ៉ូកូអ៊ិ សូអ៊ិឈិ ប្រើពេលវេលាជាង 3ខែក្នុងការជីករណ្តៅសម្រាប់សម្ងំលាក់ខ្លួន ដែលមានជម្រៅចុះទៅក្រោមប្រមាណជា 7 ហ្វុត មានមាត់ផ្លូវចុះទៅទំហំតូច និងអាស្រ័យគម្របមាត់រណ្តៅធ្វើអំពីឫស្សីបិទបាំង ព្រមទាំងបានជីករន្ធបង្ហុយតូចមួយដើម្បីឱ្យខ្យល់អាកាសចេញចូលទៀតផង។ យ៉ូកូអ៊ិ ពួនសម្ងំខ្លួននៅក្នុងទីនោះ និងចិញ្ចឹមជីវិតដោយការចាប់ត្រី កង្កែប ពស់ និងផ្លែឈើព្រៃមកធ្វើជាអាហារ។
រហូតមកដល់ឆ្នាំ 1972 មានអ្នកនេសាទក្នុងតំបន់ 2 នាក់បានប្រទះឃើញទាហានជប៉ុនរូបនេះនៅលើមាត់ច្រាំងនៃដងទន្លេ Talofofo ពេលនោះ ទាហានជប៉ុនម្នាក់នោះមានការភ័យខ្លាចយ៉ាងខ្លាំង ព្រោះខ្លាចត្រូវគេចាប់ខ្លួនយកទៅឱ្យទាហានអាមេរិកាំង គេក៏អង្វរករដោយសុំឱ្យអ្នកនេសាទទាំង 2 នាក់នោះសម្លាប់រូបគេចោលចុះ តែផ្ទុយទៅវិញអ្នកនេសាទទាំង 2 បានជួយសង្រ្គោះយ៉ូកូអ៊ិ និងនាំរូបគេត្រឡប់មកផ្ទះវិញ។
2 សប្តាហ៍ក្រោយមក Yokoi Shoichiត្រូវបានជួយសង្រ្គោះឱ្យបានត្រឡប់ទៅប្រទេសជប៉ុនវិញក្នុងឋានៈជាវិរៈបុរសសង្រ្គាម និងមានជីវិតរស់នៅរហូតដល់អាយុ 82 ឆ្នាំ គេក៏ទទួលមរណភាពទៅ។
ចំណែករណ្តៅសុវត្ថិភាពរបស់ Yokoi Shoichi ពីដំបូងបានទទួលនូវការឃុំគ្រងថែរក្សាទុកជាអនុស្សាវរីយ៍ប្រវត្តិសាស្រ្ត ទោះជាវាបាក់រលំខូចខាតទៅតាមពេលវេលាហើយក៏ដោយ។ បច្ចុប្បន្នរណ្តៅសុវត្ថិភាពសិប្បនិម្មិតមួយត្រូវបានសាងឡើងទុកជាអនុស្សាវរីយ៍ចំពោះ Yokoi Shoichi និងមិត្តទាហានរបស់គេ 3 នាក់ទៀតនៅក្នុងសារមន្ទីរ Talofofo Falls Resort Park ដែលអនុញ្ញាតឱ្យអ្នកទេសចរចូលទស្សនា និងមានឈ្មោះថា Yokoi Cave៕
គន្លឹះ6យ៉ាងធ្វើឱ្យសេចក្តីស្នេហានៅស្ថិតស្ថេរគង់វង្សយូរអង្វែង
សេចក្តីស្នេហាគឺជារឿងដែលល្អសម្រាប់មនុស្សគ្រប់រូប តែនៅពេលមានសេចក្តីស្នេហាហើយ យើងត្រូវធ្វើយ៉ាងណាឱ្យសេចក្តីស្នេហានោះនៅស្ថិតស្ថេរ និងយូរអង្វែងរហូតទៅ ថ្ងៃនេះ ឡារ៉ែន មានគន្លឹះល្អៗមកជម្រាបគូស្វាមីថ្មោងថ្មីគ្រប់គ្នាដូចតទៅ។
1. សម្លឹងរកមើលចំណុចមិនល្អរបស់ខ្លួនឯង
នៅពេលរស់នៅរួមគ្នា ម្នាក់ៗក៏នឹងមើលឃើញពីចំណុចមិនល្អរបស់គ្នាទៅវិញទៅមក តែកុំយកចំណុចមិនល្អរបស់ដៃគូមករារាំងការសម្របសម្រួលកែខៃចំណុចមិនល្អរបស់ខ្លួនឱ្យសោះ ព្រោះការដែលអ្នកសម្របសម្រួលខ្លួននោះ ដៃគូរបស់អ្នកនឹងសម្លឹងត្រឡប់មករកចំណុចមិនល្អរបស់ខ្លួនឯង ដើម្បីកែសម្រួលដូចគ្នាដែរ។2. កុំសម្តែងភាពមិនពេញចិត្តនឹងដៃគូនៅចំពោះមុខបុគ្គលដទៃ
ព្រោះមិនថា ស្ត្រី ឬក៏បុរសនោះទេ បើជួបហេតុការណ៍បែបនេះនឹងមានអារម្មណ៍ថា ដូចខ្លួនឯងត្រូវគេទះកំភ្លៀងដូច្នោះដែរ ហើយលទ្ធផលដែលតាមមកនោះគឺការឈ្លោះប្រកែកគ្នានឹងកើតឡើង ដូច្នេះគួរសង្កត់ទប់អារម្មណ៍មិនពេញចិត្តនោះទុកយកទៅនិយាយគ្នានៅឯផ្ទះវិញប្រសើរជាងធ្លាក់ខ្លួនក្លាយជាចំណីខ្សែភ្នែករបស់អ្នកដំណើរនៅតាមផ្លូវ។3. កុំលះបង់ពេលវេលាទៅលើការងារច្រើនជ្រុលពេក
កុំធ្វើការងាររហូតគ្មានពេលវេលាឱ្យគ្រួសារ ព្រោះក្រុមគ្រួសារគឺជាអ្វីដែលសំខាន់បំផុតនៅក្នុងការជួយរុញច្រាន និងគាំទ្រឱ្យការធ្វើការងាររបស់អ្នកឱ្យរីកចម្រើនឈានទៅមុខ។4. ពេលមានបញ្ហាត្រូវបែរមុខរកគ្នា
មិនមែនថា ដល់ពេលកើតបញ្ហាហើយ ម្នាក់ៗបែរខ្នងដាក់គ្នា មិននិយាយ មិនអធិប្បាយពន្យល់ប្រាប់គ្នាអំពីបញ្ហាដែលកើតឡើង ព្រោះតែគិតថា មិនចាំបាច់ត្រូវអធិប្បាយអ្វីនោះឡើយ ហើយបណ្តោយឱ្យវាកន្លងទៅ បន្តិចទៀតម្នាក់ៗគង់តែភ្លេចមិនខាន តែតើអ្នកដឹងទេថា វាគឺជាស្នាមប្រេះឆាដែលកំពុងតែធ្វើឱ្យជីវិតគូរបស់អ្នកមិនយូរអង្វែង។ ដូច្នេះចូរបែរមុខមកនិយាយគ្នាវិញទើបជារឿងមួយដ៏ល្អបំផុត។5. ឧស្សាហ៍បន្ថែមកម្លាំងចិត្តដល់គ្នា
ពេលអ្នកទាំងពីរមករស់នៅរួមគ្នា ច្បាស់ជាត្រូវជួបនឹងសេចក្តីសុខ និងសេចក្តីទុក្ខវិលវល់ផ្លាស់ប្តូរគ្នាចូលមកមិនខាន ដូច្នេះសុំតែម្យ៉ាងគត់ គឺកុំអាលអស់កម្លាំងចិត្តក្នុងការតស៊ូ ចូរនៅចាំធ្វើជាកម្លាំងចិត្តឱ្យគ្នាទៅវិញទៅមកក្នុងពេលដែលគាត់ ឬនាងមានទុក្ខវិញប្រសើរជាង។6. រកពេលវេលារំឭកអនុស្សាវរីយ៍ល្អៗកាលពីអតីតកាល
មិនថាតែនៅតាមខេត្ត ឬទីកន្លែងណាក៏ដោយ ដែលអ្នកទាំងពីរពេញចិត្ត និងចូលចិត្តទៅញឹកញាប់ ចូរប្រើអំឡុងពេលនោះប្រមូលយកអនុស្សាវរីយ៍ និងការចងចាំល្អៗដែលធ្វើឱ្យអ្នកទាំងពីរមានថ្ងៃនេះឱ្យបានញឹកញាប់ ឬយ៉ាងហោចណាស់ក៏ឱ្យបានខ្លះៗដែរ ដើម្បីរក្សាឱ្យបាននូវទំនាក់ទំនងល្អៗ និងអនុស្សាវរីយ៍ល្អៗដែលមិនអាចបំភ្លេចបាននៅក្នុងជីវិតអាពាហ៍ពិពាហ៍របស់អ្នក។ការមានស្នេហាមិនមែនជារឿងពិបាកទេ តែការដែលធ្វើឱ្យស្នេហានោះនៅគង់វង្សស្ថិតស្ថេរយូរអង្វែងទៅវិញទេ ដែលជារឿងពិបាក ដូច្នេះចូរសាកល្បងតាមវិធីទាំង6ខាងលើនេះ ដើម្បីជួយឱ្យជីវិតគូរបស់អ្នកកាន់តែផ្អែមល្ហែម និងគង់វង្សយូរអង្វែងឡើង៕
ស្វែងយល់ពីពិធីបុណ្យមាឃបូជា
មាឃបូជា ជាពីធីបុណ្យមួយដែលមានសារៈសំខាន់នៅក្នុងពុទ្ធសាសនា ដែលរួមមាន: មាឃបូជា ពិសាខបូជា អាសាឍបូជា និងបុណ្យបវារណា (ចេញវស្សា)។ បុណ្យមាឃបូជាប្រារព្ធឡើង ដើម្បីរំលឹកដល់ថៃ្ងដែល ព្រះសម្មាសម្ពុទ្ធទ្រង់ប្រកាសបង្កើត ព្រះពុទ្ធសាសនាឡើងក្នុងលោកនាប្រទេសឥណ្ឌាកាលពី 588ឆ្នាំ មុនគ្រិស្តសករាជ នាថៃ្ងទី 15កើត ខែមាឃ ក្រោយពីការត្រាស់ដឹងរបស់ព្រះអង្គចំនួន 9ខែគត់។
ការបង្កើតព្រះពុទ្ធសាសនា ក្នុងឋានៈជាអង្គការសាសនាមួយនេះ ធ្វើឡើងនៅ ក្នុងចំណោម ព្រះសង្ឃចំនួន 1250អង្គ ជាសមាជិក ក្នុងអង្គមហាសន្និបាតមួយ ដែលបាននិមន្តមកពីគ្រប់ស្រទាប់វណ្ណៈទាំងអស់ ។ នៅក្នុងមហាសន្និបាតនោះ ព្រះសម្មាសម្ពុទ្ធ ទ្រង់បានប្រកាសនៅគោលការណ៍ ចំនួន11 ប្រការ សម្រាប់ឲ្យសមាជិកមហាសន្និបាត ទាំងអស់កាន់យកជាវិថីជីវិត និងសម្រាប់យកទៅ ផ្សព្វផ្សាយ ដល់ជនដទៃទៀត ឲ្យបានយល់ពី ពុទ្ធសាសនា ។ គោលការណ៍ ទាំង11ប្រការនេះ មានឈ្មោះជាភាសាបាលីថា “ឱវាទបាដិមោក្ខ” ដែលពុទ្ធសាសនិកជនម្មាក់ៗ ត្រូវយកមក សិក្សាឲ្យ យល់ដឹង និងអនុវត្តដូចតទៅ :
គោលបំណងៈ គោលបំណងរបស់របស់ ព្រះពុទ្ធសាសនា ឬក៏ដូចជា គោលបំណងរបស់ ពុទ្ធសាសនិកម្នាក់ៗ គឺ សែ្វងរកនិព្វានដែលប្រែថាសភាវប្រាសចាក ទុក្ខមិនមាន សេចក្តីទុក្ខ មិនមានបញ្អា នៅក្នុងដួងចិត្តរបស់ខ្លួន ពាក្យនិព្វាននេះ មានន័យស្មើនិង ពាក្យថា “សន្តិ “ដែលប្រែថា” សេចក្តីស្ងប់ ” ។
យើងអាចនិយាយថា គោលបំណង របស់ព្រះពុទ្ធសាសនា គឺការបង្កើតឡើងនូវ សន្តិភាព ក្នុងដួងចិត្តនេះដែរ ក៏ជាមូលដ្ឋានគ្រឹះនៃ សន្តិភាពក្នុងសង្គម ដែលខ្លួនរស់នៅផង។ ការកាន់ព្រះពុទ្ធសាសនា គឺជាការប្រឹងប្រែង ដើម្បីបង្កើតសន្តិភាពដល់ខ្លួន និងចូលរួមចំណែកដល់ សន្តិភាពសង្គម និងពិភពលោក នេះជាកាតព្វកិច្ច ដែលពុទ្ធសាសនិកម្នាក់ៗ ត្រូវប្រឹងប្រែង ធ្វើអោយសម្រេច ។
គោលដៅ : សន្តិភាព ប្ញនិញ្វន មិនមែនកើតឡើងដោយការសុំបន់ស្រន់បួងសួងទេ និងក៏មិនអាចកើត ឡើងដោយសារផ្តល់ ឬប្រទានឲ្យ ដោយចិត្តស្រឡាញ់ មេត្តារបស់ អាទិទេព ឬព្រះជាម្ចាស់ អង្គណាមួយឡើយ សន្តិភាពនេះ កើតដោយសារការសន្សំ របស់សកម្មភាព៣យ៉ាងគឺ:
– ការមិនធ្វើអាក្រក់ ការកម្ចាត់អំពើអាក្រក់ ការកម្ចាត់អំពើអាក្រក់ និងការពារអំពើអាក្រក់គ្រប់ប្រភេទ មិនឲ្យកើតក្នុងជីវិតរស់នៅទាំងផ្លូវកាយនិងផ្លូវសម្តី។
– ការធ្វើអំពើល្អ បង្កើតអំពើល្អ និងរក្សាអំពើល្អឲ្យ ស្ថិតសេ្ថរគង់វង្សក្នុង ជីវិតរស់នៅប្រចាំថៃ្ង ទាំងអំពើល្អខាងផ្លូវកាយនិងផ្លូវសម្តី ។
– ពង្រឺងចិត្តដែលជាមូលដ្ឋាននៃអំពើ ដោយកម្ចាត់កិលេស ឬមេរោគដែលតោង ចិត្តឲ្យអស់ទៅ រហូតដល់ចិត្តស្អាតបរិសុទ្ធ មិនមានសភាវៈអាក្រក់ស្ថិតនៅ។លក្ខណៈរបស់ព្រះពុទ្ធសាសនិកជន ៖
លក្ខខណ្ឌទី1៖ មានការអត់ធ្មត់ក្នុងការធ្វើអំពើល្អ និង កម្ចាត់អំពើអាក្រក់។
លក្ខខណ្ឌទី2៖ មិនប្រើអំពើហិង្សាក្នុងការរស់នៅ។
លក្ខខណ្ឌទី3៖ មិនប្រើពាក្យបៀតបៀននិងតិៈដៀលអ្នកដទៃ។
លក្ខខណ្ឌទី4៖ រក្សាសីល រស់នៅក្នុងច្បាប់ យកច្បាប់ជាធំ។
លក្ខខណ្ឌទី5៖ បរិភោគ ប្រើប្រាស់វត្ថុទាំងទ្បាយដោយសន្សំសំចៃនិងស្គាល់ប្រមាណ។
លក្ខខណ្ឌទី6៖ ចូលចិត្តភាពស្ងប់ស្ងាត់ និង បង្កើតបរិយាកាសស្ងប់ស្ងាត់។
លក្ខខណ្ឌទី7៖ មានសេចក្តីព្យាយាមក្នុងការសម្អាតចិត្ត ធ្វើឲ្យចិត្តមានសមាធិ។
មេរៀនពីបុណ្យមាឃបូជា ៖ថៃ្ងនេះជាថៃ្ងដែល ព្រះពុទ្ធអង្គទ្រង់ប្រកាសគោលការណ៍ទាំង11 ប្រការនេះ សម្រាប់ជាប្រយោជន៍ដល់បរិស័ទយកទៅប្រើប្រាស់ៈចំណុច1៖ ក្នុងឋានៈជាបរិស័ទ ការអនុវត្តន៍តាមប្រការទាំង 11នេះ នឹងនាំទៅរកសន្តិភាពផ្លូវចិត្តជាពិតប្រាកដ។
ចំណុច2៖ ក្នុងឋានៈជាពលរដ្ឋ ក្នុងសង្គមការមាន គោលបំណង រួមមានគោលដៅដូចគ្នា និងការប្រព្រឹត្តប្រហាក់ប្រហែលគ្នានេះ នឹងអាចនាំមកនូវ សន្តិភាព និង ការអភិវឌ្ឍន៍ដែលប្រកបដោយនិរន្តភាព។
ចំណុច3៖ ក្នុងឋានៈជាក្រុមបក្សនៅ ក្នុងសង្គម ឬប្រទេសជាតិមួយ ដែលព្យាយាម សែ្វងរកនូវឱកាស ដើម្បីរក្សាសន្តិភាព និងជំរុញដល់ ការអភិវឌ្ឍន៍ដល់ ប្រទេសជាតិតែឯងនោះ ការគោពតាមគោលការណ៍ទាំង 11ប្រការនេះ នឹងកាត់បន្ថយបាននូវអស្ថិរភាព ជម្លោះ និងអំពើ ហិង្សា ដែលកើតមកពីការប្រកូតប្រជែងគ្នាបាន។
ចំណុច4៖ ក្នុងឋានៈជាអ្នកផ្សាយសាសនា ការប្រព្រឹត្តទៅតាមគោលការណ៍នេះ នឹងនាំឲ្យមានការយោគយល់ការផ្តល់កិត្តិយស ដល់គ្នានិងគ្នា និងការរស់នៅជុំគ្នា ក្នុងឋានៈជាមនុស្សជាតិបាន បើទោះជាមាន សាសនាខុសគ្នាៗក៏ ដោយ។
ចំណុច5៖ ក្នុងឋានៈជាអន្តរជាតិ ការគោរពតាមគោលការណ៍នេះ នឹងនាំមកនូវនិរន្តរភាព របស់មនុស្សជាតិ បរិស្ថានធម្មជាតិ ពិភពសត្វ និងអាកាសធាតុដ៏យូរអងែ្វងបាន ដោយមិនបាច់ ព្រួយបារម្ភក្នុងការដណ្តើមគ្នា ដើម្បីរស់ឡើយ។សង្ឃឺមថា យើងម្នាក់ៗអាចទាញយកប្រយោជន៍បានខ្លះពីថៃ្ងមាឃបូជានេះ នឹងអញ្ជើញនាំគ្នាធ្វើបុណ្យទានរក្សាសីល និងសមាធិសម្អាតចិត្ត របស់ខ្លួនក្នុងថៃ្ងនេះ ដើម្បីបូជា និង រំលឹកចំពោះគុណព្រះសម្មាសម្ពុទ្ធដែលព្រះអង្គ បានបង្កើត ព្រះពុទ្ធសាសនាសម្រាប់ជាមាគ៌ាជីវិតដល់ពួកយើងទាំងអស់គ្នា៕
សូមទស្សនាវីឌីអូខាងក្រោមនេះ៖
ហ្គេមអ្នកស៊ើបអង្កេត ដែលសូម្បីតែអ្នកស៊ើបអង្កេត ឬប៉ូលិសមួយចំនួនក៏រកមិនឃើញដែរ
ហ្គេមស៊ើបអង្កេតគឺជាហ្គេមដែលចាំបាច់ត្រូវប្រើការសង្កេត ភាពឈ្លាសវៃ ការថ្លឹងថ្លែងរកភាពដែលអាចទៅរួច និងចំណេះដឹងជុំវិញខ្លួនខ្ពស់ ដូច្នេះបើលោកអ្នកជឿជាក់លើខ្លួនឯងថា ជាមនុស្សដែលមានសមត្ថភាពគ្រប់គ្រាន់នោះ ថ្ងៃនេះគេហទំព័រ ឡារ៉ែន សូមនាំលោកអ្នកមកលេងហ្គេមអ្នកស៊ើបអង្កេតដូចខាងក្រោមនេះ។ ចូរសង្កេតមើលរូបភាព និងអានសំណួរឱ្យបានច្បាស់ រួចហើយយើងនាំគ្នាមកមើលថា តើលោកអ្នកមានសមត្ថភាពអាចរកឃើញចម្លើយដែលល្អ និងត្រឹមត្រូវបំផុតបានដែរឬទេ?
(ចំពោះអ្នកចូលរួមលេងហ្គេមនេះ ហើយឆ្លើយត្រូវ ឬរកឃើញចម្លើយដែលល្អ និងត្រឹមត្រូវបំផុតនោះ ឡារ៉ែន នឹងមានរង្វាន់ជាទីគាប់ចិត្តចំនួន 1 រង្វាន់ ដូច្នេះសូមមិត្តអ្នកអានដែលគិតថា ខ្លួនឯងមានភាពឆ្លាតវាងវៃ ប៉ិនសង្កេត និងមានសមត្ថភាពគ្រប់គ្រាន់នោះ សូមឆ្លើយនៅក្នុងComment ព្រមទាំងដាក់លេខទូរស័ព្ទរបស់លោកអ្នកមកជាមួយផង ដើម្បីឱ្យក្រុមការងាររបស់គេហទំព័រ ឡារ៉ែនងាយស្រួលក្នុងការទំនាក់ទំនងទៅវិញដើម្បីជូនរង្វាន់។ ចំណែកឯចម្លើយ គេហទំព័រ ឡារ៉ែននឹងផ្សាយជូននៅព្រឹកថ្ងៃច័ន្ទស្អែក)តើលោកអ្នកត្រៀមខ្លួនរួចហើយឬនៅ? បើរួចរាល់ហើយ…សូមមើលសំណួរដូចតទៅៈ
ឃាតកម្មក្នុងសាលារៀន
ក្នុងថ្ងៃដំបូងនៃបវេសនកាល លោកគ្រូបង្រៀនមុខវិជ្ជាភូមិវិទ្យាមួយរូបត្រូវរងអំពើឃាតកម្មដ៏អាថ៌កំបាំង។ ប៉ូលិសចាប់ជនសង្ស័យបានចំនួន 4នាក់ រួមមាន អ្នកមើលថែសួនច្បារក្នុងសាលា លោកគ្រូបង្រៀនមុខវិជ្ជាគណិតវិទ្យា លោកគ្រូកីឡា និងលោកគ្រូនាយក ដែលនៅពេលកើតហេតុឃាតកម្មនោះ ទាំង 4នាក់ សុទ្ធតែអះអាងថា ខ្លួនកំពុងធ្វើការងាររៀងៗខ្លួន ដូចជា ៖
– អ្នកមើលថែសួនច្បារ អះអាងថា ខ្លួនកំពុងតែកាត់មែកឈើ និងរៀបចំសួនច្បារ។
– គ្រូគណិតវិទ្យាអះអាងថា ខ្លួនកំពុងតែកែលំហាត់ប្រឡងរបស់សិស្ស។
– គ្រូកីឡាអះអាងថា ខ្លួនកំពុងតែលេងបាល់បោះនៅឯតារាងបាល់។
– លោកគ្រូនាយកអះអាងថា ខ្លួនកំពុងតែធ្វើការនៅក្នុងបន្ទប់ធ្វើការរបស់ខ្លួនឯង។ឃាតករត្រូវបានចាប់ខ្លួនភ្លាមតែម្ដងបន្ទាប់ពោលពាក្យអះអាងរបស់ខ្លួនរួច។ តើនរណាជាឃាតករដែលសម្លាប់លោកគ្រូភូមិវិទ្យា និងតើហេតុអីបានប៉ូលិសដឹង?
ស្រាវជ្រាវ និងជូនរង្វាន់ដោយ តាវ៉ែនតា
នារីៗ ត្រូវប្រុងប្រយ័ត្នមុនពេលឆ្លុះកញ្ចក់ក្នុងបន្ទប់ទឹក
ប្រកាសអាសន្នសម្រាប់នារី…ពេលឆ្លុះកញ្ចក់ក្នុងបន្ទប់សណ្ឋាគារ ក្នុងបន្ទប់ទឹក ឬក្នុងបន្ទប់តែងខ្លួន អាចមានមនុស្សកំពុងមើលអ្នក!
ការពារខ្លួនឯងជាមុន មុននឹងដោះសម្លៀកបំពាក់នៅក្នុងបន្ទប់សាធារណៈ…តើអ្នកធ្លាប់គិតទេថា កញ្ចក់នៅតាមទីកន្លែងផ្សេងៗ ដូចជា កញ្ចក់ក្នុងបន្ទប់លខោអាវ កញ្ចក់ក្នុងបន្ទប់សណ្ឋាគារ កញ្ចក់ក្នុងបន្ទប់ទឹកសាធារណៈ អ្វីៗទាំងអស់នេះ តើវាជាកញ្ចក់ធម្មតា ឬក៏ជាកញ្ចក់មើលឃើញពីរខាងដែលមានមនុស្សកំពុងមើលឃើញរូបអ្នកពីខាងក្រោយផ្ទាំងកញ្ចក់នោះ តែអ្នកមើលគេមើនឃើញ?
វិធីពិសោធន៍ងាយៗដើម្បីឱ្យដឹងថា កញ្ចក់ដែលអ្នកកំពុងឆ្លុះនោះជាកញ្ចក់មើលឃើញទាំងសងខាង (គេមើលឃើញយើង តែយើងមើលឃើញតែរូបខ្លួនឯង ឧទាហរណ៍ដូចកញ្ចក់នៅក្នុងបន្ទប់សួរចម្លើយរបស់ប៉ូលិសជាដើម) ឬជាកញ្ចក់ដែលមើលឃើញតែម្ខាងនោះគឺ ចូរយកម្រាមដៃទៅចង្អុលលើកញ្ចក់ បើចុងម្រាមដៃរបស់អ្នកប៉ះគ្នានឹងរូបម្រាមដៃនៅក្នុងកញ្ចក់ (រូបភាពខាងឆ្វេង) នោះគឺជា កញ្ចក់មើលឃើញពីរខាងហើយ បញ្ជាក់ថា មានមនុស្សកំពុងមើលឃើញរូបអ្នកហើយ តែបើជាកញ្ចក់ឆ្លុះធម្មតាវិញ នឹងមានប្រឡោះកណ្តាលរវាងចុងម្រាមរបស់អ្នក និងរូបម្រាមដៃនៅក្នុងកញ្ចក់ (រូបភាពខាងស្តាំ)។ចាំទុកថា បើគ្មានប្រឡោះរវាងម្រាមដៃរបស់អ្នក និងរូបម្រាមដៃនៅក្នុងកញ្ចក់ទេនោះ ចូរប្រញាប់ចាកចេញពីទីនោះភ្លាម ព្រោះវាជាកញ្ចក់ពីរខាង ដែលអាចមើលឃើញរូបអ្នកពីម្ខាងទៀតហើយ ដូច្នេះគួរពិនិត្យសាកល្បងគ្រប់ពេលដែលចូលក្នុងបន្ទប់លខោអាវ បន្ទប់ទឹកសាធារណៈ ក្នុងបន្ទប់សណ្ឋាគារ ជាដើម។ វាមិនខាតបង់អ្វីទេ ព្រោះវាជាការការពារខ្លួនយើងពីជនខូចខិលមួយចំនួនប៉ុណ្ណោះ៕