ធឿន មករា - La Reine Media

កូរ៉េខាងត្បូងនឹងបង្កើនការវិនិយោគ ខណៈទំហំពាណិជ្ជកម្មកម្ពុជា-កូរ៉េ កើនដល់ជាង 1ពាន់លានដុល្លារ

ប្រធានាធិបតីនៃប្រទេសកូរ៉េខាងត្បូងលោក មូនជេអុីន (Moon Jae-In) បានសន្យាជាមួយសម្តេចអគ្គសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជាថា នឹងជំរុញអ្នកវិនិយោគកូរ៉េខាងត្បូងមកបណ្តាក់ទុននៅកម្ពុជាឱ្យបានកាន់តែច្រើនថែមទៀត។ ជាពិសេសចាប់ឱកាសវិនិយោគលើវិស័យហេដ្ឋារចនាសម្ព័ន្ធ។

លោក Moon Jae-In ប្រធានាធិបតីនៃប្រទេសកូរ៉េខាងត្បូង បានមានប្រសាសន៍បែបនេះនៅក្នុងជំនួបស្វាគមន៍ និងពិភាក្សាការងារជាមួយសម្តេចតេជោ ហ៊ុន សែន កាលពីថ្ងៃទី4 ខែកុម្ភៈ ឆ្នាំ2020 នៅទីក្រុងសេអ៊ូល ជាទីដែលសម្តេចនាយករដ្ឋមន្ត្រី អញ្ជើញចូលរួមកិច្ចប្រជុំកំពូលពិភពលោក ឆ្នាំ2020 របស់អង្គការសហព័ន្ធសន្តិភាពសកល។

ក្នុងជំនួបពិភាក្សាការងាររវាងសម្តេចតេជោ ហ៊ុន សែន និងលោកប្រធានាធិបតីកូរ៉េ បានកត់សម្គាល់ពីការរីកចម្រើននូវទំនាក់ទំនង និងកិច្ចសហប្រតិបត្តិការរវាងប្រទេសទាំង2 ដែលបានឈានដល់ដំណាក់កាលដ៏ល្អប្រសើរមួយនាពេលបច្ចុប្បន្ន។ សម្តេចតេជោនាយករដ្ឋមន្ត្រី បានលើកឡើងថា ទំហំពាណិជ្ជកម្មរវាងកម្ពុជា និងកូរ៉េខាងត្បូងកាលពីឆ្នាំមុនបានកើនឡើងដល់ជាង 1ពាន់លានដុល្លារអាមេរិក ដោយសម្ដេចបានលើកឡើងពីលទ្ធផលផ្លែផ្កា ដែលជាលទ្ធផលនៃចំណងទាក់ទងដ៏រឹងមាំរវាងប្រទេសទាំង2។

សម្តេចតេជោនាយករដ្ឋមន្ត្រី បានប្រកាសព័ត៌មាននេះ នៅក្នុងជំនួបជាមួយប្រជាជនកម្ពុជាជាង 1,000នាក់ កាលពីថ្ងៃទី3 ខែកុម្ភៈ ឆ្នាំ2020 នៅទីក្រុងសេអ៊ូល ប្រទេសកូរ៉េ ក្នុងអំឡុងកិច្ចប្រជុំកំពូលសហព័ន្ធសន្តិភាពពិភពលោក (the Universal Peace Federation ឬ UPF) កិច្ចប្រជុំកំពូលពិភពលោកឆ្នាំ2020 ដែលព្រឹត្តិការណ៍នេះបានបញ្ចប់នៅថ្ងៃទី5 ខែកុម្ភៈ ឆ្នាំ2020។

សូមបញ្ជាក់ថា ទំហំពាណិជ្ជកម្មទ្វេភាគី(កម្ពុជា-កូរ៉េ) មានតម្លៃសរុប 1,032ពាន់លានដុល្លារក្នុងឆ្នាំ
2019។ ក្នុងនោះការនាំចេញរបស់កម្ពុជាទៅកាន់ប្រទេសកូរ៉េខាងត្បូង មានចំនួន 335លានដុល្លារ ខណៈកម្ពុជាបាននាំចូលទំនិញពីប្រទេសកូរ៉េវិញ មានតម្លៃ 696លានដុល្លារ។ កម្ពុជាបាននាំចូលក្រណាត់កូតុង ភេសជ្ជៈ គ្រឿងអេឡិចត្រូនិក រួមទាំងឧបករណ៍ប្រើប្រាស់ក្នុងស្រុក ឱសថ និងផលិតផលប្លាស្ទិក មកពីប្រទេសកូរ៉េខាងត្បូង។

សម្តេចនាយករដ្ឋមន្ត្រី ហ៊ុន សែន បានបន្ថែមថា៖“នេះគឺជាអតុល្យភាពក្នុងពាណិជ្ជកម្ម ហើយនេះដោយសារតែតម្រូវការរបស់យើងមានខ្ពស់ សម្រាប់ទំនិញរបស់កូរ៉េខាងត្បូង ដែលភាគច្រើនជារថយន្ត និងទូរទស្សន៍ ហើយទំហំពាណិជ្ជកម្មនឹងមិនកើនឡើងទេ បើគ្មានទំនាក់ទំនងការទូតល្អ រវាងប្រទេសទាំង2”។

គិតចាប់ពីឆ្នាំ1994 ដល់ឆ្នាំ2019 គម្រោងវិនិយោគរបស់កូរ៉េខាងត្បូង ដែលបានចុះបញ្ជីនៅក្រុមប្រឹក្សាអភិវឌ្ឍន៍កម្ពុជា (CDC) មានចំនួន 215គម្រោង ក្នុងទំហំទឹកប្រាក់ជិត 5ពាន់លានដុល្លារអាមេរិក។ ក្នុងនោះមាន 123គម្រោង បានវិនិយោគទៅលើរោងចក្រ ជាមួយទុនវិនិយោគ 486លានដុល្លារ បង្កើតការងារជូនប្រជាជនបានប្រមាណ 8ម៉ឺនកន្លែង។ កូរ៉េខាងត្បូងក៏ជាប្រទេសទី2 ផងដែរ ជាអ្នកវិនិយោគបរទេសផ្ទាល់ ធំជាងគេនៅកម្ពុជាបន្ទាប់ពីចិន។ នេះជាការកត់សម្គាល់របស់សម្តេចតេជោនាយករដ្ឋមន្ត្រី ក្នុងឱកាសជួបសំណេះសំណាលជាមួយបងប្អូនប្រជាពលរដ្ឋខ្មែរដែលរស់នៅក្នុងកូរ៉េខាងត្បូង។

សម្តេចតេជោនាយករដ្ឋមន្ត្រី ហ៊ុន សែន បានបញ្ជាក់ថា “ទំហំពាណិជ្ជកម្មរវាងកម្ពុជា-កូរ៉េ បានកើនឡើងជាលំដាប់ ហើយការកើនឡើងនេះមិនអាចកាត់ផ្តាច់ចេញបានទេពីទំនាក់ទំនងការទូតដ៏ល្អរវាងរាជរដ្ឋាភិបាលកម្ពុជា និងរដ្ឋាភិបាលកូរ៉េ”។

សម្តេចក៏បានលើកឡើងអំពីផ្លែផ្កានៃទំនាក់ទំនងការទូតយ៉ាងល្អនេះ ដែលធ្វើឱ្យកម្ពុជា អាចនាំចេញផ្លែស្វាយដោយផ្ទាល់មកកាន់ប្រទេសកូរ៉េ ចាប់តាំងពីខែមករា ឆ្នាំ2020 មក។ ការនាំចេញផ្លែស្វាយទៅកាន់ប្រទេសកូរ៉េនេះ គឺជាការរីកចម្រើនថ្មីរបស់កម្ពុជា ដែលអាចតម្រូវបានតាមស្តង់ដាទីផ្សារក្នុងប្រទេសជឿនលឿន ដូចជាប្រទេសកូរ៉េខាងត្បូងនេះជាដើម។

ការនាំចេញផ្លែស្វាយទៅទីផ្សារប្រទេសកូរ៉េដ៏ធំនេះ ផ្តល់ឱកាសដល់អ្នកដាំស្វាយនៅកម្ពុជា ពង្រីកអាជីវកម្មរបស់ខ្លួនកាន់តែធំជាងមុន ព្រោះថា ផ្លែស្វាយទាំងនោះមិនមែនត្រឹមតែផ្គត់ផ្គង់សម្រាប់តែប្រជាជនកូរ៉េជាង 50លាននាក់នោះទេ គឺអាចផ្គត់ផ្គង់ដល់ភ្ញៀវទេសចរដែលមកលេងប្រទេសកូរ៉េផងដែរ។

សម្តេចតេជោ ហ៊ុន សែន បានថ្លែងថា៖“ប្រភពទីផ្សារដែលយើងនាំមកកូរ៉េ វាក៏ជាផ្នែកមួយនៃការជំរុញការដាំដុះនៅប្រទេសកម្ពុជា ហើយយើងកំពុងតែស្វែងរកឱកាសក្នុងការនាំចេញនូវមុខទំនិញផ្សេងៗបន្ថែមទៀត អ៊ីចឹងផ្លែស្វាយកម្ពុជា មិនអន់ជាងផ្លែស្វាយរបស់បណ្ដាប្រទេសអាស៊ានប៉ុន្មានទេ”។

សម្តេចតេជោនាយករដ្ឋមន្ត្រី ក៏បានណែនាំដល់អ្នកនាំចេញស្វាយមកកាន់ប្រទេសកូរ៉េទាំងអស់ដែរថា សូមគោរពតាមស្តង់ដាអនាម័យឱ្យបានត្រឹមត្រូវ ធ្វើយ៉ាងណាកុំរកស៊ីលក់ផ្លូវ ដែលនាំឱ្យប៉ះពាល់ដល់ការធ្វើពាណិជ្ជកម្មរបស់ខ្លួនផង និងប៉ះពាល់ដល់កេរ្តិ៍ឈ្មោះ ប្រទេសជាតិផងដែរ។

សម្តេចតេជោនាយករដ្ឋមន្ត្រី ក៏បានបញ្ជាក់ទៀតដែរថា៖“តាំងពីឆ្នាំ1996 ដល់ឆ្នាំ2018 កូរ៉េខាងត្បូងបានផ្តល់ជំនួយឥតសំណងជាង 300លានដុល្លារអាមេរិក ហើយឆ្នាំ2019 កន្លងទៅជំនួយឥតសំណង មាន 17លានដុល្លារ និងឆ្នាំ2020 កូរ៉េគ្រោងនឹងផ្តល់ឱ្យកម្ពុជា 24លានដុល្លារថែមទៀត។ គិតត្រឹមខែវិច្ឆិកា ឆ្នាំ2019 កូរ៉េខាងត្បូងផ្តល់កម្ចីសម្រាប់ការអភិវឌ្ឍប្រមាណ 889 លានដុល្លារ បើកប្រើប្រាស់អស់ 442លានដុល្លារ ហើយការត្រៀមផ្តល់នៅឆ្នាំ2019 ដល់ឆ្នាំ 2023 ប្រមាណ 700លានដុល្លារបន្ថែមទៀតសម្រាប់ការអភិវឌ្ឍន៍គម្រោងចំនួន10”។

ជាមួយគ្នានេះ រដ្ឋាភិបាលទាំង2 បានផ្លាស់ប្តូរយោបល់គ្នា ដើម្បីជំរុញការវិនិយោគពាណិជ្ជកម្ម និងទេសចរណ៍ រួមទាំងការហោះហើរត្រង់រវាងប្រទេសទាំង2 ទៀតផង។ បច្ចុប្បន្ននេះ មានជើងហោះហើរចំនួន 50ជើងក្នុង 1សប្តាហ៍ រវាងប្រទេសកម្ពុជា និងប្រទេសកូរ៉េខាងត្បូង ដែលស្ថិតក្នុងចំណោមចំណាត់ថ្នាក់ទាំង10 សម្រាប់ការមកដល់នៃទីផ្សារទេសចរណ៍កម្ពុជា។ កាលពីឆ្នាំមុន ព្រះរាជាណាចក្រកម្ពុជាបានស្វាគមន៍ភ្ញៀវទេសចរសរុប ចំនួន 254,874នាក់ មកពីប្រទេសកូរ៉េ ដែលនេះជាការថយចុះ 15% បើប្រៀបធៀបទៅនឹងឆ្នាំមុន(2018)។

លើសពីនេះទៀត ទំនាក់ទំនងរវាងប្រទេសទាំង2 ក៏ត្រូវបានឆ្លុះបញ្ចាំងនៅក្នុងកិច្ចជំនួបនេះផងដែរថា មាននិស្សិតកម្ពុជាជាង 400នាក់ កំពុងបន្តការសិក្សានៅសាកលវិទ្យាល័យ និងមានពលករខ្មែរជាង 65,000នាក់កំពុងធ្វើការនៅក្នុងប្រទេសកូរ៉េ។ បើតាមប្រសាសន៍របស់សម្តេចតេជោនាយករដ្ឋមន្ត្រីនៃកម្ពុជា ហើយពលករទាំងនោះបានផ្ញើប្រាក់ប្រមាណ 400លានដុល្លារទៅឪពុកម្តាយរបស់ពួកគេជារៀងរាល់ឆ្នាំ។

សម្តេចតេជោនាយករដ្ឋមន្ត្រី បានបន្ថែមថា រាជរដ្ឋាភិបាលកម្ពុជា និងរដ្ឋាភិបាលកូរ៉េ បានចាប់ផ្តើមបង្កើតឱ្យមានការចរចា ការធ្វើពាណិជ្ជកម្មសេរីរវាងកម្ពុជា-កូរ៉េ ដែលជាឱកាសឱ្យកម្ពុជា ពង្រីកអាចទីផ្សារនៅប្រទេសកូរ៉េកាន់តែធំឡើង។

សម្តេចតេជោ បានមានប្រសាសន៍ថា៖“រដ្ឋាភិបាលទាំង2 បានចាប់ផ្តើមធ្វើការសិក្សាលើកិច្ចព្រមព្រៀងតំបន់ពាណិជ្ជកម្មសេរី នៅពេលវាក្លាយជាការពិត វានឹងអនុញ្ញាតឱ្យប្រទេសកម្ពុជាមានឱកាសមួយទៀត ដើម្បីពង្រីកទីផ្សាររបស់ខ្លួននៅក្នុងប្រទេសកូរ៉េខាងត្បូង”។

កាលពីចុងខែវិច្ឆិកា ឆ្នាំមុន កិច្ចព្រមព្រៀងដើម្បីធ្វើការសិក្សាលើកិច្ចព្រមព្រៀងតំបន់ពាណិជ្ជកម្មសេរី ត្រូវបានចុះហត្ថលេខារវាងរដ្ឋមន្ត្រីក្រសួងពាណិជ្ជកម្មកូរ៉េខាងត្បូង លោក Yoo Myung-hee ជាមួយឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មនៅក្នុងទីក្រុងប៊ូសានប្រទេសកូរ៉េខាងត្បូង ដែលអាចត្រូវចំណាយពេល 1ឆ្នាំក្នុងការសិក្សា។

កិច្ចព្រមព្រៀងពាណិជ្ជកម្មសេរីនេះ ត្រូវបានគេចាត់ទុកថា ជាយន្តការពាណិជ្ជកម្មដ៏សំខាន់មួយ ដែលនឹងជួយក្រុមហ៊ុនកូរ៉េខាងត្បូង ឱ្យជ្រាបចូលកាន់តែជ្រៅមកក្នុងប្រទេសអាស៊ីអាគ្នេយ៍មួយនេះជាមួយនឹងសក្តានុពលនៃកំណើនដ៏លេចធ្លោ ខណៈដែលវាក៏អនុញ្ញាតឱ្យព្រះរាជាណាចក្រកម្ពុជា ក្លាយជាទីផ្សារសក្តានុពលថ្មីសម្រាប់ការនាំចេញរបស់ខ្លួនផងដែរ។

សូមជម្រាបថា ប្រទេសកូរ៉េខាងត្បូង មានកិច្ចព្រមព្រៀងពាណិជ្ជកម្មសេរី ដែលបានចូលជាធរមានជាមួយប្រទេសសិង្ហបុរី ក្នុងឆ្នាំ2006 និងជាមួយប្រទេសវៀតណាមក្នុងឆ្នាំ2015។

ដោយឡែកសម្តេចតេជោនាយករដ្ឋមន្ត្រី ហ៊ុន សែន បានថ្លែងក្នុងកិច្ចប្រជុំកំពូលសហព័ន្ធសន្តិភាពពិភពលោក (UPF) ថា ប្រធានបទនៃវេទិកានេះ គឺពិតជាមានសារៈសំខាន់ និងចាំបាច់ ស្របពេលដែលប្រជាជាតិទាំងអស់ក្នុងពិភពលោក កំពុងប្រឈមនឹងបញ្ហាជាច្រើន ដែលបង្កផលប៉ះពាល់ និងគំរាមដល់សន្តិភាព កំណើនសេដ្ឋកិច្ច វិបុលភាព និងភាពសុខដុមរមនារបស់ប្រជាជនក្នុងសកលលោក។

សម្ដេចតេជោនាយករដ្ឋមន្ត្រីនៃកម្ពុជា បានលើកឡើងថា រាជរដ្ឋាភិបាលបានយល់ច្បាស់ថា ការបន្តរក្សាបាននូវសន្តិភាព គឺមិនអាចកាត់ផ្ដាច់បានពីការផ្ដល់ឱកាសស្មើគ្នាជូនប្រជាជន គ្រប់រូបនូវផ្លែផ្កានៃការអភិវឌ្ឍសេដ្ឋកិច្ច ក៏ដូចជាអភិវឌ្ឍន៍ធនធានមនុស្សឱ្យក្លាយជាធនធានដែលមានសក្តានុពលមិនចេះរីងស្ងួតផងដែរ។

សម្តេចតេជោនាយករដ្ឋមន្ត្រី ក៏បានមានប្រសាសន៍ផងដែរថា ប្រទេសកម្ពុជានឹងធ្វើជាម្ចាស់ផ្ទះនៃកិច្ចប្រជុំកំពូលអាស៊ី-អឺរ៉ុបលើកទី1 ក្រោមប្រធានបទ“ការពង្រឹងពហុភាគីនិយមដើម្បីកំណើនរួម”នៅខែវិច្ឆិកា ឆ្នាំ2020 ខាងមុខ ក្នុងគោលបំណងបង្កើតការមូលមតិគ្នាជាអន្តរជាតិ ប្រកបដោយថាមពលស្ដីពីសារៈសំខាន់នៃក្របខ័ណ្ឌពហុភាគីក្នុងការដោះស្រាយបញ្ហា និងការប្រឈមរបស់ពិភពលោក៕

February 19, 2020

ឥណទានក្នុងវិស័យមីក្រូហិរញ្ញវត្ថុកម្ពុជាកាលឆ្នាំ2019 កើនដល់ចំនួនប្រមាណជាង 7ពាន់លានដុល្លារ

ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា ស៊ីអឹមអេ ឬស.ម.ក (Cambodia Microfinance Association ឬ CMA) បានឱ្យដឹងថា វិស័យមីក្រូហិរញ្ញវត្ថុនឹងបន្តមានសុខភាពល្អ ខណៈ ដែលផលបត្រកម្ចី មានដល់ទៅជាង 7ពាន់លានដុល្លារ។ ផលបត្រឥណទាននេះបានបន្តជាមួយនឹងលទ្ធផលប្រសើរជាងមុន ជាមួយនឹងការកើនឡើងជិត 30%។

លោក គា បូរាណ ប្រធានសមាគមមីក្រូហិរញ្ញវត្ថុកម្ពុជា (ស៊ីអឹមអេ) បានមានប្រសាសន៍ថា៖“បើយើងក្រឡេកមើលសមិទ្ធផលមីក្រូហិរញ្ញវត្ថុជាទូទៅ វាល្អកាលពីឆ្នាំមុន។ ប្រជាជនកម្ពុជាចំនួន 2.1លាននាក់បានប្រើប្រាស់សេវាកម្មរបស់អ្នកផ្តល់ប្រាក់កម្ចីខ្នាតតូច ដោយខ្ចីប្រាក់សរុបចំនួន 7.5ប៊ីលានដុល្លារក្នុងឆ្នាំ2019 ពោលគឺកើនឡើងជិត 30% បើធៀបនឹងឆ្នាំមុន។ ខណៈពេលដែលប្រាក់បញ្ញើ ក៏កំពុងកើនឡើងជាលំដាប់ផងដែរ និងអ្នកសន្សំមានចំនួនជិត 3លាននាក់ ដោយមានទឹកប្រាក់ជិត4ពាន់លានដុល្លារនៅតាមការិយាល័យចំនួន 1,400កន្លែងដែលមានបុគ្គលិកចំនួន 34,000នាក់នៅទូទាំងប្រទេស”។

លោកបានធ្វើការកត់សម្គាល់ថា ការបំពេញការងារប្រកបដោយសុខភាពល្អ ក៏ឆ្លុះបញ្ចាំងពីសមាមាត្រនៃប្រាក់កម្ចីមិនដំណើរការដែរ (NPL) ដែលក្នុងនោះលោកបានមានប្រសាសន៍ថា ប្រាក់កម្ចីដែលការទូទាត់លើសពី 30ថ្ងៃ គឺមានទាបជាង 1% នៅចុងឆ្នាំ2019 ដែលជាអត្រាទាបជាងឆ្នាំមុន។

សមាគមមីក្រូហិរញ្ញវត្ថុកម្ពុជា (ស.ម.ក) Cambodia Microfinance Association ឬ CMA បានដាក់ចេញនូវគម្រោងបរិយាប័ន្នហិរញ្ញវត្ថុ ប្រកបដោយការទទួលខុសត្រូវ ខណៈការផ្តល់ឥណទានក្នុងវិស័យមីក្រូហិរញ្ញវត្ថុកម្ពុជា បានកើនដល់ចំនួនប្រហែល 7ពាន់លានដុល្លារ។

គម្រោងបរិយាប័ន្នហិរញ្ញវត្ថុប្រកបដោយការទទួលខុសត្រូវនេះ ត្រូវបានធ្វើឡើងដើម្បីឆ្លើយតបនឹងការព្រួយបារម្ភនានា និងរួមចំណែកក្នុងកំណើនសេដ្ឋកិច្ច តាមរយៈការធ្វើឱ្យប្រជាជនកម្ពុជាមានលទ្ធភាពទទួលបានសេវាកម្មហិរញ្ញវត្ថុផ្លូវការប្រកបដោយការទទួលខុសត្រូវ។ គម្រោង 3ឆ្នាំដែលទទួលបានវិភាគទានពីសមាជិករបស់ ស.ម.ក នេះ នឹងរួមចំណែកដល់យុទ្ធសាស្ត្រស្តីពីបរិយាប័ន្នហិរញ្ញវត្ថុឆ្នាំ2019-2025 របស់ធនាគារជាតិនៃកម្ពុជា។

លោក គា បូរាណ ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា បានមានប្រសាសន៍ថា៖“គម្រោងបរិយាប័ន្នហិរញ្ញវត្ថុប្រកបដោយការទទួលខុសត្រូវ ឆ្លើយតបបន្ថែមទៀតទៅនឹងការព្រួយបារម្ភនានា ព្រមទាំងចូលរួមចំណែកក្នុងកំណើនសេដ្ឋកិច្ច ដែលធ្វើឱ្យប្រជាជនកម្ពុជា មានសិទ្ធិទទួលសេវាហិរញ្ញវត្ថុផ្លូវការបន្ថែម ក្នុងពេលដែល ស.ម.ក ឬ CMA បាននិងកំពុងធ្វើការងារនេះ ជាមួយសមាជិករបស់ខ្លួនផងដែរចាប់តាំងពីឆ្នាំ2017 មក”។

ជាមួយគ្នានេះដែរ អតិថិជនដែលបានប្រើប្រាស់ប្រាក់កម្ចីពីវិស័យមីក្រូហិរញ្ញវត្ថុ ភាគច្រើនប្រើប្រាស់នៅក្នុងវិស័យកសិកម្ម ពាណិជ្ជកម្ម និងផលិតកម្ម រីឯវិស័យសេវាកម្មវិញ ក៏មានការកើនឡើងគួរឱ្យកត់សម្គាល់ផងដែរ។ យើងបានប្រឈមនឹងបញ្ហាមួយចំនួន ដែលបញ្ហាមួយគឺការគំរាមកំហែងនៃស្ថានភាពគ្រោះរាំងស្ងួតក្នុងឆ្នាំ2018 ពីព្រោះកសិកម្ម គឺជាវិស័យអាទិភាពមួយក្នុងវិស័យមីក្រូហិរញ្ញវត្ថុដែលកំណើនឥណទានថយចុះបន្តិចនៅដើមឆ្នាំ2019។ ទោះយ៉ាងណា កំណើនឥណទានចាប់ផ្តើមមានអត្រាកំណើនល្អ ចាប់ពីត្រីមាសទី3 នៃឆ្នាំនោះ។

សមាគមមីក្រូហិរញ្ញវត្ថុកម្ពុជា គឺជាស្ថាប័នតែមួយគត់ តំណាងឱ្យស្ថាប័នមីក្រូហិរញ្ញវត្ថុទាំងអស់ដែលបានចុះបញ្ជីស្របច្បាប់ និងអនុវត្តនូវគម្រោងតម្លៃជិត 1លានដុល្លារ ដោយសហការយ៉ាងជិតស្និទ្ធជាមួយសមាជិករបស់ខ្លួន ព្រមទាំងដៃគូសំខាន់ៗ ដូចជាធនាគារជាតិនៃកម្ពុជា សមាគមធនាគារជាតិនៅកម្ពុជា ការិយាល័យឥណទានកម្ពុជា និងដៃគូអភិវឌ្ឍន៍នានា។

វិស័យហិរញ្ញវត្ថុ មានការផ្លាស់ប្តូរគួរឱ្យកត់សម្គាល់ក្នុងរយៈពេល 10ឆ្នាំចុងក្រោយនេះ។ ជាបឋម ផលបត្រឥណទានបានកើនជាងមុន 18ដង នៅពេលដែលចំនួនអតិថិជនកើនជាងមុន 2ដង។ ជាងនេះទៀត វិស័យនេះបានប្រែប្រួលខ្លាំង ពីវិស័យអង្គការអភិវឌ្ឍន៍ ទៅជាស្ថាប័នហិរញ្ញវត្ថុដែលគ្រប់គ្រងដោយម្ចាស់ទុនឯកជន។

ថ្មីៗនេះក្រសួងសេដ្ឋកិច្ច និងហិរញ្ញវត្ថុបានព្យាករថា កំណើនសេដ្ឋកិច្ចពិតរបស់កម្ពុជា នឹងមានជាមធ្យម 6.1%នៅឆ្នាំ(2020)នេះ ពោលគឺធ្លាក់ចុះ កាលពីឆ្នាំមុន(2019)។ បញ្ហានេះភាគច្រើនដោយសារតែកត្តាខាងក្រៅ ដោយរដ្ឋាភិបាលបានលើកឡើងពីមូលហេតុនៃសង្គ្រាមពាណិជ្ជកម្មរវាងចិន និងអាមេរិក និងមេរោគវីរុសកូរ៉ូណាប្រល័យលោកដែលអាចបង្កគ្រោះថ្នាក់ធំដល់ពិភពលោកទាំងមូល ការប្រែប្រួលអាកាសធាតុ និងការកាត់បន្ថយសន្តិសុខភូមិសាស្ត្រនយោបាយ និងសន្តិសុខសកលលោក បន្ទាប់ពីមានការវាយប្រហាររបស់អុីរ៉ង់ទៅលើផលប្រយោជន៍អាមេរិកដែលការគាំពារនិយមរីករាលដាល។

លោក គា បូរាណ ជឿជាក់ថា ប្រសិនបើកំណើនផ.ស.ស របស់ប្រទេសជាតិថយចុះ វានឹងប៉ះពាល់ដល់វិស័យមីក្រូហិរញ្ញវត្ថុ។ យើងត្រូវរង់ចាំមើលថា តើអ្វីៗនឹងវិវឌ្ឍយ៉ាងដូចម្តេចនៅក្នុងរយៈពេលខ្លីខាងមុខ។

លោកបានមានប្រសាសន៍ថា៖“ប្រសិនបើសេដ្ឋកិច្ចធ្លាក់ចុះ ការស្នើសុំប្រាក់កម្ចីក៏នឹងធ្លាក់ចុះដែរ ហើយការផ្តល់ប្រាក់កម្ចី ក៏ត្រូវយកមកពិចារណាផងដែរ។ នោះជាមូលហេតុ ដែលយើងរំពឹងថា ផលបត្រប្រាក់កម្ចីនៅឆ្នាំនេះ នឹងមិនកើនឡើងខ្ពស់ជាងឆ្នាំ2019 ទេ។ ប៉ុន្តែកិច្ចព្រមព្រៀងពាណិជ្ជកម្ម EBA ប្រសិនបើវាត្រូវបានដក នឹងមិនប៉ះពាល់ដល់ឧស្សាហកម្មមីក្រូហិរញ្ញវត្ថុទេ ពីព្រោះដូចដែលបានលើកឡើងហើយថា វិស័យនេះផ្តោតសំខាន់ទៅលើវិស័យកសិកម្ម”។

វិស័យមីក្រូហិរញ្ញវត្ថុ ក៏បានធ្វើការផ្តោតខ្លាំងទៅលើសហគ្រាសធុនតូច និងមធ្យម ទន្ទឹមនឹងធនាគារមួយចំនួនតូចក៏បានហក់ចូលក្នុងទីផ្សារនេះដែរ។ ការដាក់ពិតានអត្រាការប្រាក់របស់រដ្ឋកាលពីខែមេសា ឆ្នាំ2017 បានធ្វើឱ្យចំនួនអតិថិជននៅតែថេរ តែទំហំឥណទានមធ្យមកាន់តែកើនឡើងគួរឱ្យកត់សម្គាល់។ កំណើននេះ បានជំរុញឱ្យមានការកោតសរសើរ ក៏ដូចជាក្តីបារម្ភដែរថា អាចនឹងមានបញ្ហាប្រឈម ដូចជាបំណុលវ័ណ្ឌក ដោយសារតែមានការប្រកួតប្រជែងខ្លាំងក្នុងវិស័យនេះ។

គេរំពឹងថា គម្រោងនេះនឹងចូលរួមចំណែកយ៉ាងច្រើនដល់សេដ្ឋកិច្ចជាតិ ទី1-ជួយលើកម្ពស់បរិយាប័ន្នមីក្រូហិរញ្ញវត្ថុ ដោយប្រើប្រាស់ស្ដង់ដាអន្តរជាតិប្រកបដោយក្រមសីលធម៌ មានដូចជា គោលការណ៍ការពារអតិថិជន ឥណទានភ្ជាប់ជាមួយកិច្ចការសង្គមគោលការណ៍ផ្តល់ប្រាក់កម្ចី ព្រមទាំងយន្តការដោះស្រាយបណ្តឹងអតិថិជន។ ទី2-លើកកម្ពស់វិស័យអប់រំហិរញ្ញវត្ថុដល់អតិថិជន និងសាធារណជន ដោយសហការជាមួយធនាគារជាតិនៃកម្ពុជា និងដៃគូផ្សេង។ ទី3-លើកកម្ពស់ដល់ការយល់ដឹងពីតួនាទីមីក្រូហិរញ្ញវត្ថុក្នុងការកាត់បន្ថយភាពក្រីក្រ និងជួយកំណើនសេដ្ឋកិច្ចតាមទីជនបទ និងទី4-ស្រាវជ្រាវ និងអភិវឌ្ឍបន្ថែមពីវិស័យមីក្រូហិរញ្ញវត្ថុ។

សូមបញ្ជាក់ថា សមាគមមីក្រូហិរញ្ញវត្ថុ គឺជាសមាគមវិជ្ជាជីវៈមួយដែលជួយធ្វើឱ្យមានវិបុលភាព និងនិរន្តរភាពក្នុងវិស័យមីក្រូហិរញ្ញវត្ថុនៅក្នុងប្រទេសកម្ពុជា ដោយបានជំរុញឱ្យមានកំណើនសេដ្ឋកិច្ចព្រមទាំងការអភិវឌ្ឍ។ ស.ម.ក មានសមាជិកចំនួន101ស្ថាប័ន សុទ្ធសឹងជាគ្រឹះស្ថានមីក្រូហិរញ្ញវត្ថុគ្រឹះស្ថានឥណទានជនបទ ព្រមទាំងក្រុមហ៊ុនភតិសន្យា(បង់រំលស់)។

លោក កាំង តុងងី ប្រធាននាយកដ្ឋានទំនាក់ទំនងនៃសមាគមមីក្រូហិរញ្ញវត្ថុកម្ពុជាបានប្រាប់ឡារ៉ែនពាណិជ្ជឱ្យដឹងថា៖“ទិន្នន័យនៃកម្ចីដែលសមាគមមាន គេមិនគិតជាឆ្នាំទេ គឹគេគិតថា មកដល់ចំណុចពេលហ្នឹង មានប្រជាជនប៉ុន្មាននាក់ដែលកំពុងតែទទួលបានកម្ចី ហើយចំនួនលុយប៉ុន្មានដែលកំពុងតែជំពាក់? ពីព្រោះអ្នកខ្លះខ្ចីត្រឹម 2-3ឆ្នាំ ឯអ្នកខ្លះខ្ចីដល់ 10ឆ្នាំ។ ដូច្នេះយើងមិនអាចគិតថា 1ឆ្នាំប៉ុន្មានបានទេ។ ដូច្នេះតួលេខពិតប្រាកដដែលយើងមាន គិតត្រឹមខែកញ្ញា ឆ្នាំ2019 គឺមានមនុស្សប្រមាណជា 2.1លាននាក់កំពុងតែខ្ចីបំណុលដែលមានទំហំប្រមាណជាង 7.5ប៊ីលានដុល្លារ”។

លោក កាំង តុងងី ក៏បានបញ្ជាក់ដែរថា៖“ចំពោះតួលេខដែលបញ្ជាក់អំពីការអនុវត្តឱ្យបាននូវការប្រើប្រាស់ប្រាស់រៀលឱ្យបាន 10%ក្នុងឆ្នាំ2019នោះ សមាគមបានទាក់ទងទៅសមាជិកអ្នកពាក់ព័ន្ធ ដើម្បីប្រមូលទិន្នន័យហើយ តែបើគិតពីការប្រើប្រាស់ គឺអាចលើសពី 10%ហើយ ព្រោះវិស័យមីក្រូហិរញ្ញវត្ថុមានអតិថិជនប្រមាណ 80%ជាអ្នកខ្ចី ក្នុងមុខរបរទាក់ទងនឹងកសិកម្ម និងសហគ្រាសធុនតូច និងមធ្យម ដូច្នេះការប្រើប្រាស់ប្រាក់រៀល វាច្រើនជាងខាងធនាគារពាណិជ្ជ”៕

February 18, 2020

ឆ្នាំ2019 កម្ពុជានាំចេញជ័រកៅស៊ូជិត 30ម៉ឺនតោន ខណៈក្រុមហ៊ុនកៅស៊ូវៀតណាម គ្រោងមកពង្រីកផលិតកម្មនៅកម្ពុជា

រយៈពេលពេញ 1ឆ្នាំ2019 កម្ពុជាបាននាំចេញជ័រកៅស៊ូជិត 30ម៉ឺនតោន ដែលចំនួននេះកើនឡើង30% បើធៀបនឹងរយៈពេលដូចគ្នាកាលពីឆ្នាំ2018។នេះបើតាមរបាយការណ៍ផ្លូវការ របស់ក្រសួងកសិកម្មរុក្ខាប្រមាញ់ និងនេសាទ។

របាយការណ៍ក្រសួងកសិកម្ម បានបញ្ជាក់ថា រយៈពេលពេញ 1ឆ្នាំ2019 កន្លងទៅ កម្ពុជាផលិតជ័រកៅស៊ូសម្រេចបាន 287,638តោន កើនឡើងចំនួន67,538តោន ស្មើនឹង 30% ធៀបនឹងឆ្នាំ2018។ បរិមាណជ័រកៅស៊ូនាំចេញនៅឆ្នាំ2019 សម្រេចបានចំនួន 282,071តោន កើនឡើង 64,570តោន ស្មើនឹង 30% ធៀបនឹងឆ្នាំ2018។

គួរកត់សម្គាល់ដែរថា ក្នុងឆ្នាំ2019 តម្លៃជ័រកៅស៊ូជាមធ្យមគឺ 1,336ដុល្លារក្នុង 1តោន តម្លៃនេះកើនឡើង 19ដុល្លារក្នុង1 តោន កាលពីឆ្នាំមុន ធៀបនឹងឆ្នាំ2018 ខណៈកាលពីខែធ្នូកន្លងទៅ តម្លៃជាមធ្យម1,371ដុល្លារក្នុង 1តោនកើនឡើង 44ដុល្លារធៀបនឹងខែវិច្ឆិកា ឆ្នាំ2018។

ក្នុងរបាយការណ៍បានបញ្ជាក់ថា គិតមកដល់បច្ចុប្បន្ននេះ កម្ពុជាមានផ្ទៃដីដាំកៅស៊ូសរុបមានចំនួន 406,142ហិកតា ក្នុងនោះផ្ទៃដីចៀរជ័រមានចំនួន 247,113ហិកតា ស្មើនឹង 61%។ ចិនគឺជាទីផ្សារធំជាងគេរបស់កៅស៊ូកម្ពុជានៅពេលនេះ។

សូមបញ្ជាក់ថា រយៈពេលពេញមួយឆ្នាំ2018 កម្ពុជាបាននាំចេញជ័រកៅស៊ូជាង 21ម៉ឺនតោន ទទួលបានចំណូលជិត 300លានដុល្លារអាមេរិក។ ជ័រកៅស៊ូកម្ពុជា បាននាំចេញទៅកាន់ប្រទេសចិន វៀតណាម សិង្ហបុរី និងម៉ាឡេស៊ី។

នៅខណៈពេលដែលកៅស៊ូកម្ពុជាកំពុងតែមានបញ្ហា និងស្វែងរកការពង្រីកវិស័យកៅស៊ូនេះ ក្រុមហ៊ុន VRG ដែលជាសហគ្រាសគ្រប់គ្រងដោយរដ្ឋ នៅប្រទេសវៀតណាម បានវិនិយោគលើចម្ការកៅស៊ូខ្នាតធំនៅខេត្តចំនួន7 នៃប្រទេសកម្ពុជា។ ផែនការពង្រីកវិស័យកៅស៊ូ ត្រូវបានលើកឡើងក្នុងជំនួបនៅក្នុងកិច្ចប្រជុំជាមួយឯកឧត្តម វេង សាខុន រដ្ឋមន្ត្រីក្រសួងកសិកម្ម ដែលមានតំណាងក្រុមហ៊ុនកៅស៊ូវៀតណាម គឺលោក ជិន ង៉ុកធួក ។

លោក ជិន បានកត់សម្គាល់ថា ក្រុមហ៊ុនបានប្រមូលជ័រកៅស៊ូចំនួន 5ម៉ឺនតោនពីផ្ទៃដី 47,000ហិកតារបស់ខ្លួនកាលពីឆ្នាំមុន។ លោកបានអរគុណចំពោះក្រសួងកសិកម្មដែលតែងតែគាំទ្រការវិនិយោគរបស់យើងនៅកម្ពុជា។ ក្នុងន័យនេះយើងគ្រោងនឹងពង្រីកផ្ទៃដីដាំដំណាំចម្ការកៅស៊ូរបស់យើងដើម្បីបង្កើនផលិតកម្មកៅស៊ូសម្រាប់កែច្នៃនៅក្នុងប្រទេស ។

សូមបញ្ជាក់ថា ក្រុមហ៊ុនកៅស៊ូវៀតណាម ប្រតិបត្តិការតាមរយៈក្រុមហ៊ុនបុត្រសម្ព័ន្ធចំនួន19 នៅក្នុងព្រះរាជាណាចក្រកម្ពុជា។ ការវិនិយោគមួយនេះ ត្រូវបានគេរាយការណ៍ថា មានតម្លៃប្រហែល 800លានដុល្លារ។ នៅឆ្នាំ2019 ក្រុមហ៊ុនបានទទួលកម្រៃកើនលើស23%នៃគោលដៅប្រចាំឆ្នាំរបស់ខ្លួនដែលធ្វើឱ្យមានចំណូលប្រមាណ 1.28ពាន់លានដុល្លារអាមេរិក។

ទោះយ៉ាងណា ប្រភពក្នុងស្រុកមួយចំនួនបានកត់សម្គាល់ថា ប្រាក់ចំណេញមុនពន្ធរបស់ខ្លួនមានចំនួន 220.82លានដុល្លារពោល គឺ 98%នៃគោលដៅរបស់ខ្លួន។

ផលិតផលកៅស៊ូដែលប្រមូលបានពីប្រជាកសិករ(កៅស៊ូគ្រួសារ)ក្នុងខេត្តចំនួន8 រួមមានកំពង់ចាម ត្បូងឃ្មុំ ក្រចេះ រតនគិរី និងមណ្ឌលគីរីមានតម្លៃជាមធ្យម 1.18ដុល្លារក្នុង 1គីឡូក្រាម សម្រាប់ជ័រកៅស៊ូស្រស់ ខណៈកៅស៊ូស្ងួត ជាមធ្យមលក់ក្នុងតម្លៃ 0.61ដុល្លារក្នុង 1គីឡូក្រាម។ នេះបើយោងតាមទិន្នន័យផ្លូវការពីអគ្គនាយកដ្ឋានកៅស៊ូ។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានប្រាប់ឡារ៉ែនពាណិជ្ជថា៖“ការដែលក្រុមហ៊ុនវៀតណាមគ្រោងនឹងពង្រីកការវិនិយោគផលិតកៅស៊ូរបស់ខ្លួននៅកម្ពុជានោះ គឺដោយសារតែខាងវៀតណាមគេមានដីសម្បទានដំណាំកៅស៊ូស្រាប់ទៅហើយនៅកម្ពុជា។ ម្យ៉ាងវិញទៀត ក្រុមហ៊ុនវិនិយោគក្នុងស្រុកបានបញ្ឈប់ការវិនិយោគរបស់ខ្លួនដោយមិនអាចបន្តការងារនេះបាន ទើបស្ទុះទៅមុខមិនរួច”។

លោកឧកញ៉ា បានបញ្ជាក់ថា៖“ដោយខាងក្រសួងចង់លុបចោលការវិនិយោគមួយចំនួនរបស់ម្ចាស់ដីសម្បទានក្នុងស្រុក ដែលពុំមានលទ្ធភាព និងពុំមានសកម្មភាពបន្ត ទើបក្រុមហ៊ុនវៀតណាមបានស្វែងរកដៃគូវិនិយោគក្នុងស្រុក បន្តការវិនិយោគលើវិស័យកៅស៊ូនេះ ដោយអាចជួយពង្រីកវិស័យកសិកម្មរបស់យើងបន្ថែមផងដែរ។ តែបើការវិនិយោគលើការផ្តល់ដីសម្បទានថ្មី ពុំមានដីសម្បទានថ្មីផ្តល់ជូនទេ គឺក្រសួងបានបញ្ចប់ការផ្តល់យូរហើយ”។

លោកឧកញ៉ាក៏បានបញ្ជាក់ដែរថា៖“ការវិនិយោគដែលក្រុមហ៊ុនវៀតណាមនឹងធ្វើ គឺតាមរយៈកិច្ចសហការតាមកិច្ចព្រមព្រៀងរបស់ក្រសួងកសិកម្មដែលមានស្រាប់ ហើយវាគឺជាការល្អ ដែលយើងអាចរក្សាស្ថិរភាព នៃវិស័យកៅស៊ូរបស់យើងសម្រាប់ការអភិវឌ្ឍទៅថ្ងៃមុខ”។

លោកឧកញ៉ា លឹម ហេង ក៏បានបញ្ជាក់ទៀតដែរថា៖“ការវិនិយោគបែបនេះ វាមិនមានផលប៉ះពាល់ទេ តែវាជាការជួយគ្នាទៅវិញទេ ពីព្រោះវិស័យកសិកម្មយើងវាមានបញ្ហាច្រើន បើយើងមានដៃគូពីក្រៅសម្រាប់សហការ ជាការល្អ ហើយក្នុងការផ្តល់ដីសម្បទាន រដ្ឋក៏ផ្តល់សិទ្ធិក្នុងការរកដៃគូក្នុងការវិនិយោគរួមដែរ”៕

February 18, 2020

មន្ត្រីក្រសួង៖ កម្ពុជាត្រូវខិតខំធ្វើពិពិធកម្មសេដ្ឋកិច្ច ដើម្បីសម្រេចបានចក្ខុវិស័យនៅឆ្នាំ2030

មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថាកម្ពុជាត្រូវតែខិតខំធ្វើពិពិធកម្មសេដ្ឋកិច្ច និងពង្រឹងសមត្ថភាពប្រកួតប្រជែងឱ្យបានខ្លាំងក្លា ទាំងការបង្កើនទំហំ និងការលើកកម្ពស់ប្រសិទ្ធភាពនៃការវិនិយោគលើវិស័យហេដ្ឋារចនាសម្ព័ន្ធគ្រប់ប្រភេទ ដើម្បីឈានទៅសម្រេចបាននូវចក្ខុវិស័យជាប្រទេសចំណូលមធ្យមកម្រិតខ្ពស់នៅឆ្នាំ2030 និងមានចំណូលខ្ពស់នៅឆ្នាំ2050។

រដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ ឯកឧត្ដម វង្សី វិស្សុត បានលើកឡើងនៅក្នុងសិក្ខាសាលាពិគ្រោះយោបល់លើសេចក្តីព្រាង “អនុក្រឹត្យ ស្តីពីការគ្រប់គ្រងការវិនិយោគសាធារណៈ” កាលពីពេលថ្មីៗនេះថា សេចក្តីព្រាងអនុក្រឹត្យនេះ មានគោលបំណងដោះស្រាយបញ្ហានៅក្នុងប្រព័ន្ធនៃការវិនិយោគសាធារណៈរបស់យើងនាពេលបច្ចុប្បន្នពិសេសការប្រើប្រាស់ធនធានវិនិយោគរបស់ប្រទេសទាំងមូល ដែលមានលក្ខណៈរាយប៉ាយ ឱ្យមានលក្ខណៈជាប្រព័ន្ធ ស្របទៅតាមបទដ្ឋាន និងនីតិវិធីច្បាប់ ដោយមានភ្ជាប់នូវការទទួលខុសត្រូវច្បាស់លាស់ ទាំងសម្រាប់ក្រសួងសេដ្ឋកិច្ច និងហិរញ្ញវត្ថុ ដែលនឹងបំពេញមុខងារជាទ្វារបាលនៃការគ្រប់គ្រងគម្រោងវិនិយោគសាធារណៈ និងទាំងសម្រាប់ក្រសួង-ស្ថាប័ននានា ដែលជាប្រតិបត្តិករអនុវត្តន៍ផ្ទាល់។

ឯកឧត្ដម វង្សី វិស្សុត រដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ

ក្នុងន័យនេះ ឯកឧត្តមបានស្នើសុំដល់គ្រប់ក្រសួងស្ថាប័នទាំងអស់ សូមចូលរួមធ្វើកិច្ចការកែទម្រង់ដ៏សំខាន់នេះ ក៏ដូចជាការងារកែទម្រង់ការគ្រប់គ្រងហិរញ្ញវត្ថុសាធារណៈទាំងមូល ក្នុងស្មារតីការងារជាក្រុម និងឱ្យបានស្រុះដៃគ្នា ដើម្បីសំដៅធ្វើយ៉ាងណាឱ្យការវិនិយោគសាធារណៈ អាចដើរតួនាទីជាឧបករណ៍សេដ្ឋកិច្ចដ៏មានប្រសិទ្ធភាព និងស័ក្ដិសិទ្ធិភាព សម្រាប់ទ្រទ្រង់ដល់កំណើនសេដ្ឋកិច្ចរយៈពេលវែងនិងការអភិវឌ្ឍប្រទេសឱ្យកាន់តែរីកចម្រើនផង និងដើម្បីបន្តលើកកម្ពស់ជីវភាពរបស់ប្រជាពលរដ្ឋ និងធានាបាននូវយុត្តិធម៌ និងសមធម៌នៅក្នុងសង្គមផងដែរ។

រដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុរូបនេះ ក៏បានលើកឡើងដែរថា ដើម្បីឈានទៅសម្រេចបាននូវចក្ខុវិស័យជាប្រទេសចំណូលមធ្យមកម្រិតខ្ពស់នៅឆ្នាំ2030 និងជាប្រទេសចំណូលខ្ពស់នៅឆ្នាំ2050 កម្ពុជាត្រូវខិតខំធ្វើពិពិធកម្មសេដ្ឋកិច្ច និងពង្រឹងសមត្ថភាពប្រកួតប្រជែងរបស់ខ្លួនឱ្យបានខ្លាំងក្លា ទាំងតាមរយៈការបង្កើនទំហំនៃការវិនិយោគនិងទាំងតាមរយៈការលើកកម្ពស់ប្រសិទ្ធភាពនៃការវិនិយោគលើវិស័យហេដ្ឋារចនាសម្ព័ន្ធគ្រប់ប្រភេទពិសេសហេដ្ឋារចនាសម្ព័ន្ធនៃការតភ្ជាប់ក្នុងវិស័យគមនាគមន៍, ថាមពល, និងឌីជីថល និងហេដ្ឋារចនាសម្ព័ន្ធសេដ្ឋកិច្ច-សង្គមផ្សេងទៀត ដូចជាសាលារៀន និងមន្ទីរពេទ្យជាដើម។ ក៏ប៉ុន្តែឯកឧត្តមថា បច្ចុប្បន្នកម្ពុជាកំពុងប្រឈមទៅនឹងការធ្លាក់ចុះនៃជំនួយអភិវឌ្ឍន៍ផ្លូវការ (ODA) ទាំងប្រភពហិរញ្ញប្បទានឥតសំណង និងទាំងមកពីប្រភពឥណទានដែលមានសម្បទានកម្រិតខ្ពស់ ដោយសារកម្ពុជាបានចាកផុតពីឋានៈជាប្រទេសដែលមានចំណូលទាបហើយ។

ម្យ៉ាងទៀត ឯកឧត្ដមបានមានប្រសាសន៍ទៀតថា ការវិនិយោគសាធារណៈ កាន់តែមានលក្ខណៈស្មុគស្មាញ ដោយសារកត្តាការប្រែប្រួលអាកាសធាតុ តម្រូវការនៃការអភិវឌ្ឍប្រទេសដែលមានទំហំកាន់តែធំ ការរំពឹងទុករបស់ប្រជាជនដែលកាន់តែខ្ពស់ជាងមុន និងការប្រើប្រាស់បច្ចេកវិទ្យាថ្មីៗ ក្នុងក្របខ័ណ្ឌនៃបដិវត្តន៍ឧស្សាហកម្មទី4។

ក្នុងន័យនេះ ឯកឧត្តមក៏បានបញ្ជាក់ថា កម្ពុជាត្រូវមានប្រព័ន្ធគ្រប់គ្រងការវិនិយោគរួមមួយ របស់ប្រទេសដែលរឹងមាំ និងមានភាពគ្រប់ជ្រុងជ្រោយ និងស៊ីជម្រៅ សំដៅធ្វើយ៉ាងណាឱ្យអាចធានាបានថា កម្ពុជាពិតជាបានប្រើប្រាស់ធនធានក្នុងការវិនិយោគប្រកបដោយភាពត្រឹមត្រូវ និងឆ្លាតវៃ ហើយទទួលបាននូវផលចំណេញមកវិញខ្ពស់បំផុត ដែលអាចឆ្លើយតបបានទៅនឹងសេចក្តីត្រូវការក្នុងការអភិវឌ្ឍប្រទេសជាតិ។

ជាមួយគ្នានោះដែរ ឯកឧត្តម អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក៏ធ្លាប់បានគូសបញ្ជាក់ប្រាប់ពីសារៈសំខាន់នៃការធ្វើពិពិធកម្មទីផ្សារនាំចេញរបស់កម្ពុជា ដែលនឹងរួមចំណែកសំខាន់ដល់ការពង្រឹងអធិបតេយ្យភាពជាតិ និងឯករាជភាពនៃសេដ្ឋកិច្ចកម្ពុជា ព្រមទាំងឈានទៅសម្រេចបាននូវចក្ខុវិស័យឆ្នាំ2030 (ប្រទេសចំណូលមធ្យមកម្រិតខ្ពស់) និងឆ្នាំ2050 (ប្រទេសចំណូលខ្ពស់)។

ឯកឧត្តម អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ

ឯកឧត្តមឧបនាយករដ្ឋមន្ត្រីរូបនេះ ក៏បានស្នើក្រសួងពាណិជ្ជកម្ម ខិតខំជំរុញការធ្វើសេរីភាវូបនីយកម្មនិងសមាហរណកម្មក្នុងតំបន់ និងពិភពឯកឧត្តម តាមរយៈការបន្តកិច្ចសហការជាមួយក្រសួង-ស្ថាប័នពាក់ព័ន្ធ ដើម្បីពន្លឿនការចុះកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) នៅក្នុងឆ្នាំ2020 និងខិតខំចរចាកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ចិន និងកម្ពុជា-សាធារណរដ្ឋកូរ៉េ ដើម្បីជំរុញការធ្វើពិពិធកម្មទីផ្សារនាំចេញរបស់កម្ពុជា សំដៅគាំទ្រការអភិវឌ្ឍកំណើនសេដ្ឋកិច្ចដែលជាគោលដៅនៃយុទ្ធសាស្ត្រចតុកោណដំ-ណាក់កាលទី4។

បន្ថែមលើនោះ ឯកឧត្តមឧបនាយករដ្ឋមន្ត្រី អូន ព័ន្ធមុនីរ័ត្ន ក៏បានផ្តល់អនុសាសន៍សំខាន់ៗចំនួន 4ចំណុចដល់ក្រសួងពាណិជ្ជកម្ម ដើម្បីជាវិភាគទានសម្រាប់រៀបចំគោលនយោបាយ និងកំណត់ទិសដៅសម្រាប់អនុវត្តការងារពាណិជ្ជកម្មឆ្នាំ2020 ឱ្យទទួលបានប្រសិទ្ធភាពខ្ពស់ មានដូចជា៖
1. ការកែទម្រង់ផ្ទៃក្នុង និងបន្តជំរុញសមាហរណកម្មសេដ្ឋកិច្ចកម្ពុជាចូលទៅក្នុងតំបន់ និងពិភពឯកឧត្តម។

2. កំណែទម្រង់រដ្ឋបាលសាធារណៈ និងគុណភាពសេវាសាធារណៈ។

3. ការរៀបចំខ្លួនសម្រាប់សេដ្ឋកិច្ចឌីជីថល និងឆ្លើយតបនឹងបដិវត្តន៍ឧស្សាហកម្មជំនាន់ទី4 និង4.ការរក្សាបាននូវសន្តិសុខស្បៀងអាហារ និងស្ថិរភាពថ្លៃទំនិញ និងសេវាកម្ម ដើម្បីគាំទ្រឧត្តមភាពប្រកួតប្រជែងរបស់កម្ពុជា។

ជាការឆ្លើយតបនឹងការផ្តល់ជាអនុសាសន៍ពីសំណាក់ក្រសួងសេដ្ឋកិច្ច និងហិរញ្ញវត្ថុនេះ រដ្ឋមន្ត្រីក្រសួងពាណិជ្ជកម្ម ឯកឧត្ដម ប៉ាន សូរស័ក្តិ បានលើកឡើងដែរថា ក្នុងរយៈពេលជាង 1ឆ្នាំកន្លងមកនេះ ក្រសួងពាណិជ្ជកម្មបានយកចិត្តទុកដាក់បំពេញភារកិច្ចយ៉ាងសកម្ម រហូតទទួលបានជោគជ័យលើការចរចាបើកច្រកទីផ្សារពាណិជ្ជកម្ម ការពង្រឹងសមត្ថភាពផលិតកម្មសម្រាប់ផ្គត់ផ្គង់ក្នុងស្រុក និងនាំចេញ ការធ្វើកំណែទម្រង់សេវាសាធារណៈ ការកសាងលិខិតបទដ្ឋានគតិយុត្តនៅក្រោមវិស័យពាណិជ្ជកម្ម ការលើកកម្ពស់កិច្ចការពារអ្នកប្រើប្រាស់និងសុខុមាលភាពប្រជាជន ការរក្សាបានសន្តិសុខស្បៀង និងហិរញ្ញវត្ថុ ដែលបានរួមចំណែកយ៉ាងសំខាន់ដល់ការរក្សាកំណើន និងការអនុវត្តអភិបាលកិច្ចល្អរបស់រាជរដ្ឋាភិបាល។

ឯកឧត្ដម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម

យោងតាមរបាយការណ៍បូកសរុបលទ្ធផលការងារពាណិជ្ជកម្ម ឆ្នាំ2019 និងទិសដៅការងារពាណិជ្ជកម្ម ឆ្នាំ2020 របស់ក្រសួងពាណិជ្ជកម្មដែលចេញផ្សាយកាលពីពេលថ្មីៗនេះ បានឱ្យដឹងថាការនាំចេញទំនិញទៅគ្រប់ទ្វីបក្រោមប្រព័ន្ធអនុគ្រោះពាណិជ្ជកម្ម និងកិច្ចព្រមព្រៀងពាណិជ្ជកម្មសេរី ក្នុងរយៈពេល 10ខែ ក្នុងឆ្នាំ2019 មានទឹកប្រាក់ប្រមាណជាង10,813លានដុល្លារអាមេរិកបើប្រៀបធៀបរយៈពេលដូចគ្នាកាលពីឆ្នាំ2019 ដែលមានទឹកប្រាក់ប្រមាណតែជាង 10,158លានដុល្លារអាមេរិក កើនឡើងប្រមាណជាង 654លានដុល្លារអាមេរិក ស្មើនឹង6.45%។ ក្នុងនោះមានសម្លៀកបំពាក់ ក្នុងទឹកប្រាក់ប្រមាណជាង 6,406 លានដុល្លារអាមេរិក,វាយនភណ្ឌមានទឹកប្រាក់ប្រមាណជាង 40លានដុល្លារអាមេរិក ,ស្បែកជើង មានទឹកប្រាក់ប្រមាណជាង 905លានដុល្លារអាមេរិក, អង្ករ មានទឹកប្រាក់ប្រមាណជាង 286លានដុល្លារអាមេរិក និងផលិតផលផ្សេងៗមានទឹកប្រាក់ប្រមាណជាង 3,174លានដុល្លារអាមេរិក។

យ៉ាងណាក្ដី រដ្ឋមន្ត្រីក្រសួងពាណិជ្ជកម្មរូបនេះបានអះអាងថា នឹងខិតខំអនុវត្តតាមអនុសាសន៍របស់ក្រសួងសេដ្ឋកិច្ច និងហិរញ្ញវត្ថុ ដើម្បីបង្កើនការធ្វើពិពិធកម្មសេដ្ឋកិច្ច បង្កើនទំហំពាណិជ្ជកម្មនាំចេញ ដើម្បីឱ្យប្រទេសកម្ពុជាឈានទៅសម្រេចចក្ខុវិស័យនៅឆ្នាំ2030 និងមានចំណូលខ្ពស់នៅឆ្នាំ2050៕

February 13, 2020

អឺរ៉ុបកាត់ផ្នែកខ្លះនៃប្រព័ន្ធអនុគ្រោះពន្ធ EBA ខណៈរាជរដ្ឋាភិបាលកម្ពុជា បានត្រៀមខ្លួនរួចរាល់

(ភ្នំពេញ)៖ លោក កាំង ម៉ូនីកា អគ្គលេខាធិការរង សហមគមរោងចក្រកាត់ដេរកម្ពុជា (GMAC) បានមានប្រសាសន៍នៅល្ងាចថ្ងៃទី១២ ខែកុម្ភៈ ឆ្នាំ២០២០នេះថា គណៈកម្មការអឺរ៉ុប (EU) បានចេញសេចក្តីសម្រេចពាក់ព័ន្ធបញ្ហា EBA នៅកម្ពុជាហើយនៅល្ងាចថ្ងៃទី១២ ខែកុម្ភៈនេះ ដោយបានកាត់ផ្នែកខ្លះនៃប្រព័ន្ធអនុគ្រោះពន្ធនេះ ប៉ុន្តែលោកមិនទាន់អាចបញ្ជាក់ ពីទំហំទឹកប្រាក់ដែលត្រូវបានខាតបង់ពីការកាត់ EBA នៅឡើយទេ ដោយកំពុងគណនាតាមលេខកូដនីមួយៗ។

លោក ម៉ូនីកា អាចត្រឹមបញ្ជាក់ថា វិស័យដែលប៉ះពាល់ដោយការកាត់ផ្នែកខ្លះនៃ EBA គឺវិស័យកាត់ដេរសម្លៀកសំលៀកបំពាក់, វិស័យផលិតស្បែកជើង និងផលិតផលសម្រាប់ធ្វើដំណើរ ប៉ុន្តែផលិតសម្រាប់ធ្វើដំណើរនេះប៉ះពាល់តិចតួចប៉ុណ្ណោះ ព្រោះទីផ្សារធំរបស់កម្ពុជា គឺអាមេរិក។លោកអគ្គលេខាធិការរងបានបញ្ជាក់ថា វិស័យផលិតកង់នៅកម្ពុជា បានរួចផុតពីការកាត់ប្រព័ន្ធអនុគ្រោះពន្ធ EBA ដែលនេះអាចចាត់ទុកថា ជាការគាំទ្រការធ្វើពិពិធកម្មនៃការផលិតរបស់កម្ពុជា។

បើទោះបីជាយ៉ាងណា រាជរដ្ឋាភិបាលកម្ពុជា បានប្រកាសថា ពីការត្រៀមខ្លួនចំពោះការបាត់បង់ EBA នេះរួចហើយ និងប្រកាសមិនចុះញ៉មចំពោះការខាតបង់ EBA នេះឡើយ។

ថ្លែងនៅថ្ងៃទី១១ ខែកុម្ភៈ ឆ្នាំ២០២០ សម្តេចតេជោ ហ៊ុន សែន បានថ្លែងថា ចំពោះបញ្ហា EBA សម្តេចមិនធ្វើសេចក្តីថ្លែងការណ៍ណាមួយ សូមឲ្យអឺរ៉ុបទុក EBA នោះទេ សិទ្ធិសេរីភាពនៅលើដៃរបស់អឺរ៉ុប ចង់ដក ឬទុក EBA ជាការសម្រេចរបស់អឺរ៉ុប។

សម្តេចតេជោប្រមុខរាជរដ្ឋាភិបាលនៅតែបញ្ជាក់ថា «ខ្ញុំមិនយកឯករាជ្យ អធិបតេយ្យជាតិរបស់កម្ពុជា ទៅដោះដូរជាមួយជំនួយ ឬភាពអនុគ្រោះណាទាំងអស់។ សូមប្រជាពលរដ្ឋកម្ពុជា គិតឲ្យច្បាស់ថា តើពេលនេះកម្ពុជាត្រូវការអ្វីពិតប្រាកដ? កម្ពុជាត្រូវការសន្តិភាព មិនអាចឲ្យអ្នកណាមកបំផ្លាញសន្តិភាពបានទេ បើទោះបីបង់ថ្លៃប៉ុណ្ណាក៏ដោយចុះ កម្ពុជាត្រូវតែជាប្រទេសដែលមានសន្តិភាព»។

សម្តេចតេជោ ហ៊ុន សែន ក៏បានអំពាវនាវដល់កម្មករ កម្មការិនី សុំកុំមានភាពតក់ស្លុត ចំពោះបញ្ហា [EBA] ដែលអាចកើតមាននាពេលខាងមុខ ព្រោះរាជរដ្ឋាភិបាល ត្រៀមលក្ខណៈដោះស្រាយហើយ។

សម្តេចតេជោនាយករដ្ឋមន្ត្រីបានថ្លែងថា «បើសិនមានរឿងអ្វីកើតឡើង សុំកុំស្លន់ស្លោទាក់ទងនឹងការសម្រេចចិត្តរបស់អឺរ៉ុប យ៉ាងម៉េចកុំមានការតក់ស្លុតឲ្យសោះ យើងត្រូវពឹងលើការដកដង្ហើបខ្លួនឯង»៕
នេះបើយោងតាមការចុះផ្សាយរបស់អង្គភាពព័ត៌មាន Fresh News

February 13, 2020

ចម្ការបន្លែគ្រួសារជុំវិញផ្ទះ

លក្ខណៈការដាំដុះបន្លែជិតកន្លែងស្នាក់អាស្រ័យ ឬក្នុងទីប្រជុំជន ដោយប្រើប្រាស់ផ្ទៃដីដែលដាំដុះត្រឹមតែបន្តិចបន្តួច ដើម្បីទុកធ្វើជាប្រភពអាហារ ឬដែលហៅថា “ចម្ការបន្លែគ្រួសារ” នេះ មិនត្រឹមតែជាការធ្វើកសិកម្មដែលមានភាពចំណាស់យូររាប់រយឆ្នាំមកហើយនោះទេ តែក្នុងសភាវសេដ្ឋកិច្ចក្នុងសង្គមបច្ចុប្បន្ន ដែលការចាយវាយក្នុងការចិញ្ចឹមជីវិតរបស់ប្រជាជនកំពុងកើនខ្ពស់ឡើងជាបន្តបន្ទាប់នោះ ប្រជាជនជួបប្រទះបញ្ហាប្រាក់ចំណូលមិនគ្រប់គ្រាន់ ជាមួយនឹងប្រាក់ចំណាយនោះ ទើប “ការដាំបន្លែគ្រួសារជុំវិញផ្ទះ” ក្លាយជាប្រព័ន្ធការធ្វើកសិកម្មមួយដែលគាំទ្រឱ្យមនុស្សគ្រប់រូបមានភាពស្ថិតស្ថេរខាងអាហារខ្លាំងឡើង ព្រោះការដាំបន្លែគ្រួសារនៅក្នុងផ្ទៃដីតូចមួយ មិនថាតែដើម្បីទុកបរិភោគក្នុងក្រុមគ្រួសារ ចែករំលែកទៅឱ្យអ្នកជិតខាង ឬដើម្បីលក់ជាប្រាក់ចំណូលបន្ថែមដល់គ្រួសារនោះទេ វាសុទ្ធតែសាងនូវផលប្រយោជន៍ដល់អ្នកបរិភោគទាំងអស់ ព្រោះទាំងអ្នកដាំ និងអ្នកទទួលទាននឹងបានបរិភោគបន្លែដែលមានសុវត្ថិភាពពីសារធាតុពុល និងថែមទាំងជាការធ្វើការងារក្រៅម៉ោង ឱ្យសមាជិកគ្រប់គ្នាក្នុងក្រុមគ្រួសារបានប្រើប្រាស់ពេលវេលាទំនេររួមគ្នាយ៉ាងមានប្រយោជន៍ទៀតផង។
ប្រយោជន៍នៃការដាំបន្លែគ្រួសារ
– សមាជិកក្នុងគ្រួសារបានទទួលទានបន្លែ ដែលមានគុណតម្លៃខាងអាហារគ្រប់ចំនួន និងមានសុវត្ថិភាពពីសារធាតុពុល។
– ប្រើប្រាស់ធ្វើជារុក្ខជាតិឱសថបុរាណ សម្រាប់ព្យាបាលរោគ ដូចជា ខ្ទឹមក្រហម ខ្ទឹមស ខ្ញី ជីអង្កាម ជាដើម។
– ជួយកាត់បន្ថយប្រាក់ចំណាយ និងអាចលក់ដើម្បីសាងប្រាក់ចំណូលបន្ថែមដល់គ្រួសារបាន។
– ប្រើប្រាស់សម្រាប់តុបតែងលម្អបរិវេណជុំវិញផ្ទះ ឬអាចធ្វើជាព្រំកំណត់(របង)របស់ផ្ទះបានទៀតផង ដូចជា ដើមកន្ទុំទេស ដើមស្អំ ស្លឹកបាស់ និងម្រះ ជាដើម។
– ជាការប្រើពេលវេលាទំនេរៗ និងផ្ទៃដីទំនេរខាងក្នុងរបងផ្ទះ ឱ្យកើតប្រយោជន៍ដល់សមាជិកក្នុងគ្រួសារ និងថែមទាំងធ្វើឱ្យកើតមានការធ្វើកិច្ចការងាររួមគ្នា ជាការសាងសម្ព័ន្ធភាព និងភាពកក់ក្តៅឱ្យកើតមានក្នុងក្រុមគ្រួសារទៀតផង។ចំណុចគួរពិចារណាក្នុងការដាំដុះ
1 . ទីកន្លែង និងទីធ្លាសម្រាប់ដាំដុះ ៖ ការជ្រើសរើសទីកន្លែងដាំដុះបន្លែបង្ការ គួរតែនៅជិតទីកន្លែងស្នាក់អាស្រ័យ មានប្រភពទឹក ទីធ្លាដាំដុះត្រូវមានពន្លឺព្រះអាទិត្យគ្រប់គ្រាន់ ក្នុងករណីដែលគ្មានដីធ្លីសម្រាប់ដាំដុះ លោកអ្នកអាចដាំបន្លែក្នុងភាជនៈផ្សេងៗ ដូចជា ថូ ផើង ពាង ឬធុង(ស្នោ) ជាដើម ដោយដាក់នៅលើកម្រាលឥដ្ឋ ឬព្យួរនៅក្នុងកន្លែងណាដែលមានពន្លឺថ្ងៃចាំងមកដល់ និងមិនគួរស្ថិតនៅឆ្ងាយពីកន្លែងស្នាក់នៅពេកនោះទេ ដើម្បីងាយស្រួលក្នុងការប្រតិបត្តិការងារផ្នែកការដាំដុះ ការរក្សាថែទាំ និងថែមទាំងងាយស្រួលក្នុងការបេះយកមកធ្វើជាម្ហូបអាហារបានភ្លាមៗតាមតម្រូវការទៀតផង។

2 . ការគណនាទីធ្លា កំណត់ទំហំ និងចំនួនរង ៖ ដោយសភាពទីធ្លាស្នាក់អាស្រ័យក្នុងពេលបច្ចុប្បន្ន ជាពិសេសមនុស្សម្នាក្នុងសង្គមទីក្រុង សុទ្ធតែមានដែនកំណត់ក្នុងរឿងធនធាន ទាំងដីធ្លី ទឹក និងពន្លឺថ្ងៃ ជាពិសេសការដាំបន្លែនៅក្នុងតំបន់ទីក្រុង ត្រូវតែស្គាល់ពីការគ្រប់គ្រងចាត់ចែងទីធ្លាឱ្យកើតប្រយោជន៍ខ្ពស់បំផុត ដោយទំហំរងបន្លែដែលស័ក្តិសមក្នុងគ្រួសារគឺ ទទឹងមិនលើស 1ម៉ែត្រ X 4ម៉ែត្រ ឬបណ្តោយតាមទំហំទីធ្លា ព្រមទាំងលើករងខ្ពស់ឡើងយ៉ាងតិច 30 – 50សង្ទីម៉ែត្រ ចំណែកចំនួនរងដែលស័ក្តិសមស្ថិតក្នុងចំនួនប្រមាណជា 3រង គឺមានបន្លែហូបស្លឹក 2រង និងបន្លែហូបផ្លែបានយូរ 1រង។

(នៅមានត)

February 13, 2020

ច្បាស់កាណ៍ហើយ! ក្រុមដែលត្រូវចូលរួមលេងពានរង្វាន់ក្លិបបាល់ទាត់ធំជាងគេបំផុតប្រចាំតំបន់អាស៊ាន ACC

សហព័ន្ធបាល់ទាត់តំបន់អាស៊ីអាគ្នេយ៍ហៅជាភាសាអង់គ្លេសថា ASEAN Football Federation (AFF) បានប្រកាសជាផ្លូវការពីពានរង្វាន់ថ្មីសន្លាងមួយ មានឈ្មោះថា ASEAN Club Championship ដោយជ្រើសយកក្លិបកំពូលៗនៅក្នុងតំបន់អាស៊ីអាគ្នេយ៍មកប្រកួតតតាំងគ្នាលើសមរភូមិវាលស្មៅ។

ACC រដូវកាលទី1 នឹងមានក្លិបចំនួន12 ចូលរួម អមដោយប្រាក់រង្វាន់ 50ម៉ឺនដុល្លារសហរដ្ឋអាមេរិក ស្របពេលដែលកូតាកីឡាករបរទេសនៅក្នុងក្លិបនីមួយៗ មានសញ្ជាតិក្រៅពីអាស៊ីចំនួន 3នាក់ និងសញ្ជាតិអាស៊ី 1នាក់។ សម្រាប់ការចូលរួមលេងក្នុងក្របខ័ណ្ឌពាននេះ កម្ពុជា ហ្វីលីពីន ប្រ៊ុយណេ ឡាវ និងទីម័រខាងកើត នឹងត្រូវប្រកួតជម្រុះជុំដំបូង ដោយយកតែក្លិបល្អៗ 2ចុងក្រោយបង្អស់មកបង្គ្រប់ក្លិបចំនួន 10ទៀតដែលឈរចាំស្រាប់ មានដូចជា ក្លិបរបស់ថៃមាន2 ក្លិបវៀតណាមមាន2 ក្លិបម៉ាឡេស៊ីមាន2 ក្លិបឥណ្ឌូនេស៊ីមាន ក្លិបសិង្ហបុរី1 និងក្លិបមីយ៉ាន់ម៉ា1។

ខាងក្រោមនេះ ជាក្រុមដែលទទួលបានកៅអីរួចហើយនៅជុំផ្ដាច់ព្រ័ត្រ ACC ៖
1-Chiangrai United Thai League Champions 1 2019
2-PT Prachuap 2019 Thai League Cup Champion
3-Bali United Indonesia 1 Champions League 2019
4-Persebaya Indonesia 1 Premier League Championship 2019
5-Hanoi FC V.League Champions 1 2019
6-Ho Chiminh City V.League Champions 2 2019
7-Shan United 2019 Myanmar National League Champions
8-Tampines Rover 2019 Singapore Premiere League Champions

ក្រុមដែលត្រូវប្រកួតវគ្គ Play-off
1-Svay Rieng FC 2019 Cambodia League Champion
2-Lao Toyota 2019 Lao Premier League Champion
3-Indera 4th Place Brunei Super League
4-Ceres Negros 2019 Football League Champion

February 13, 2020

លោក Park ជាប់ពិន័យមិនឱ្យដឹកនាំ 4ប្រកួត និងបង់ប្រាក់ 5ពាន់ដុល្លារ

លោក Park Hang-Seo គ្រូបង្វឹកក្រុមជម្រើសជាតិវៀតណាម ត្រូវបានសហព័ន្ធបាល់ទាត់អាស៊ី (AFC) ពិន័យព្យួរចំនួន 4ប្រកួត ដោយសារឧប្បត្តិហេតុមួយក្នុងព្រឹត្តិការណ៍ស៊ីហ្គេមឆ្នាំ2019 នៅឯប្រទេសហ្វីលីពីន។

សហព័ន្ធកីឡាបាល់ទាត់ប្រចាំទ្វីបអាស៊ី AFC បានកត់សម្គាល់ឃើញថា លោក Park បានប្រើដៃរុញអាជ្ញាកណ្តាល, និយាយប្រមាថ និងប្រើប្រាស់ភាសាមិនសមរម្យ រំលោភបំពានចំពោះអាជ្ញាកណ្តាល ដោយនៅក្នុងច្បាប់បាល់ទាត់ត្រូវនឹងបទប្បញ្ញត្តិប៉ះពាល់ធ្ងន់ធ្ងរ នៅក្រោមមាត្រាទី 47 នៃក្រមវិន័យ និងវិជ្ជាជីវៈបាល់ទាត់ AFC។
ក្រៅពីត្រូវបានបណ្តេញចេញពីទីលាននៅពេលប្រកួតនោះហើយ គ្រូបង្វឹកជនជាតិកូរ៉េរូបនេះ ក៏នឹងត្រូវបង់ប្រាក់ពិន័យចំនួន 5,000ដុល្លារ រួមជាមួយនឹងការពិន័យមិនឱ្យដឹកនាំការប្រកួតចំនួន 4ប្រកួតទៀតផង។ បន្ថែមពីលើនោះទៅទៀត AFC បានបន្ថែមថា ការល្មើសម្តងហើយម្តងទៀតលើបទប្បញ្ញត្តិនេះ អាចនឹងត្រូវទទួលទោសយ៉ាងធ្ងន់ធ្ងរលើសពីនេះទៅទៀត៕

February 13, 2020

ចិន បង្កើត App ដឹងពីចម្ងាយសម្រាប់អ្នកឆ្លងវីរុសកូរ៉ូណា ដើម្បីការពារខ្លួន

Close contact detector’ app ជាកម្មវិធីថ្មីមួយសម្រាប់ទូរស័ព្ទដៃ ដែលបានប្រកាសដាក់ចេញឱ្យប្រើប្រាស់ជាផ្លូវការនៅក្នុងប្រទេសចិនកាលពីពេលថ្មីៗនេះ ក្នុងយុទ្ធនាការប្រយុទ្ធប្រឆាំង និងការពារជំងឺរលាកសួតដោយមេរោគ CoVid-19 ដែលកំពុងឆ្លងរាលដាលយ៉ាងគួរឱ្យភ័យខ្លាចនាពេលបច្ចុប្បន្ន។

មុខងារសំខាន់ដែលមាននៅក្នុងកម្មវិធីនោះ ត្រូវបានគេដឹងថា វានឹងផ្តល់នូវដំណឹងលើអេក្រង់(Alert) ប្រសិនបើមានអ្នកផ្ទុកវីរុសកូរ៉ូណាស្ថិតនៅក្បែរ ឬកំពុងចូលមកជិតខ្លួនអ្នក ជាពិសេសអ្នកដែលទើបនឹងឆ្លងថ្មីៗ។ របៀបប្រើ គឺតម្រូវឱ្យអ្នកប្រើ ដាក់លេខទូរស័ព្ទ និង ID number និងស្គែន QR ស្រដៀងកម្មវិធី Pay online ដែរ ដូចជា Alipay, WeChat ឬ QQ ជាដើម។ វាពិសេសត្រង់ថា យើងអាចដឹងពីសីតុណ្ហភាពរបស់មនុស្សដែលនៅជិតៗយើង។

កម្មវិធីដ៏មានសារៈសំខាន់នេះ ត្រូវបានបង្កើតឡើងដោយគណៈកម្មការសុខភាពជាតិ និងសាជីវកម្ម បច្ចេកវិទ្យាអេឡិចត្រូនិករដ្ឋចិន ដើម្បីទប់ស្កាត់កុំឱ្យរីករាលដាលដល់អ្នកដទៃ៕

February 13, 2020

គ្រឿងផ្តត់ផ្គង់ពីចិន មិនគ្រប់គ្រាន់ ព្រោះកំពុងផ្ទុះវីរុសកូរ៉ូណា ក្រុមហ៊ុនផលិតរថយន្តជាច្រើននឹងបិទទ្វាររោងចក្របណ្តោះអាសន្ន

ក្រុមហ៊ុនផលិតរថយន្តជប៉ុន Nissan នឹងផ្អាកចង្វាក់ផលិតកម្មរបស់ខ្លួនចំនួន 2ថ្ងៃ ក្នុងប្រទេសជប៉ុន ដែលបច្ចុប្បន្នកំពុងផលិតរថយន្ត Nissan Serena និង X-Trail។ ជាមួយគ្នានេះ ក្រុមហ៊ុនផលិតរថយន្តជាច្រើននៅទូទាំងពិភពលោក ក៏កំពុងជួបបញ្ហាស្រដៀងគ្នានេះដែរ ហើយបានបិទទ្វាររោងចក្ររបស់ខ្លួនផងដែរ ដោយសារតែមេរោគវីរុសកូរ៉ូណានៅក្នុងប្រទេសចិន ដែលកំពុងបង្កឱ្យមានអ្នកឆ្លង និងមនុស្សស្លាប់រាប់ពាន់នាក់។

ជាក់ស្តែង ក្រុមហ៊ុន Hyundai ក៏បានបិទទ្វាររោងចក្ររបស់ខ្លួននៅក្នុងប្រទេសកូរ៉េខាងត្បូងជាបណ្តោះអាសន្នដែរ ដោយសារតែខ្វះគ្រឿងបន្លាស់ពីប្រទេសចិន។

ក្រុមហ៊ុនផលិតរថយន្តធំៗជាច្រើននៅទូទាំងពិភពលោក កំពុងជួបបញ្ហាខ្វះគ្រឿងផ្គុំ រថយន្ត ស្របពេលដែលរោងចក្រផលិតគ្រឿងផ្គុំរថយន្តនៅប្រទេសចិន បាននិងកំពុងបិទទ្វារជាបន្តបន្ទាប់ដោយសារវិបត្តិមេរោគវីរុសកូរ៉ូណា ក្នុងនោះ Nissan គឺជាក្រុមហ៊ុនផលិតរថយន្តចុងក្រោយបង្អស់មួយ ដែលនឹងបិទទ្វាររោងចក្ររបស់ខ្លួនបណ្តោះអាសន្ន និងដោយសារតែបញ្ហានេះ បានធ្វើឱ្យអាជីវកម្មធំៗដែលពឹងពាក់លើខ្សែចង្វាក់ផលិតកម្មរបស់ប្រទេសចិន ត្រូវបានផ្អាកដំណើរការជាបណ្ដោះអាសន្ន៕

February 13, 2020

Author: ធឿន មករា