Author: ធឿន មករា

គន្លឹះល្អៗក្នុងការចម្អិនម្ហូបអាហារបែបចៀន ឬបំពង
មានប្អូនៗស្ត្រីមេផ្ទះថ្មោងថ្មីជាច្រើននាក់ណាស់ ដែលតែងតែមានបញ្ហាក្នុងរឿងចៀន ឬបំពងត្រី ឬសាច់ផ្សេងៗ ដោយមិនដឹងជាត្រូវធ្វើយ៉ាងណាដើម្បីឱ្យឆ្អិនល្អ មិនជាប់ខ្ទះ និងមានពណ៌ស្អាតគួរឱ្យចង់ទទួលទាន…។ ខាងក្រោមនេះ គឺជាចំណេះដឹងល្អៗពាក់ព័ន្ធនឹងការចៀន ឬបំពងត្រី ឬសាច់ផ្សេងៗដែលស្ត្រីមេផ្ទះយើងបានដឹងហើយ ច្បាស់ជាចង់សាកល្បងធ្វើតាមជាមិនខាន។
មើមខ្ញីជួយឱ្យត្រីចៀនមិនជាប់ខ្ទះ
នេះជាវិធីមួយដែលនឹងជួយឱ្យពេលចុងភៅ(មិនសូវ)ចំណានដូចយើងប្រុងចៀនត្រី វិធីតទៅនេះនឹងមិនធ្វើឱ្យត្រីជាប់ខ្ទះឡើយ។ វិធីនោះគឺ ពេលចាក់ខ្លាញ់ ឬប្រេងឆាចូលទៅក្នុងខ្ទះ និងទុកឱ្យក្តៅល្មមហើយ សូមយកមើមខ្ញីស្រស់ៗមកហាន់ជាបន្ទះស្តើងៗប្រមាណជា 2-3បន្ទះ រួចដាក់ចូលទៅក្នុងខ្ទះដែលមានខ្លាញ់ក្តៅស្រាប់ហើយនោះ។ រង់ចាំឱ្យបន្ទះខ្ញីនោះឡើងក្រៀមហើយ សឹមដួសចេញ រួចដាក់ត្រីចូលទៅចៀន ត្រីនោះនឹងមិនជាប់ខ្ទះឡើយ(ធានា!)។
វីធីចៀនសាច់ត្រីឱ្យមានពណ៌លឿងស្អាត មិនបែក ឃើញហើយគួរឱ្យចង់ទទួលទាន
ស្ត្រីមេផ្ទះទាំងឡាយប្រហែលជាធ្លាប់ជួបច្រើនដងមកហើយ នៅពេលដែលចង់ពិសាសាច់ត្រីចៀនឱ្យឆ្ងាញ់មាត់ម្តង តែបែរជាជួបនូវសាច់ត្រីចៀនដែលបែកខ្ទេច ឬបាក់ដាច់ជាបំណែកតូចៗ ឃើញហើយមិនចង់ឱ្យទទួលទានសោះ… ថ្ងៃនេះ អ្នកគ្រូ ឆវី មានតិចនិកក្នុងការចៀនត្រីបែបថ្មី មកជម្រាបជូន ធានាថា សាច់ត្រីនឹងនៅជាដុំមូល មិនបែក និងមានពណ៌គួរឱ្យចង់ញ៉ាំទៀតផង ។
– ដាក់ខ្លាញ់ ឬប្រេងចៀននៅលើភ្លើងឱ្យក្តៅខ្លាំងជាមុនសិន។
– ដាក់សាច់ត្រីចូលទៅចៀន ដោយដាក់ខាងស្បែកចុះក្រោម ព្រោះកន្លែងសាច់ជាប់ស្បែកក្រឆ្អិនជាងកន្លែងសាច់សុទ្ធ។
– យកវែកឆា ឬវែកឈើសម្រាប់ចៀនសាច់សង្កត់លើសាច់ត្រីតិចៗ ដើម្បីកុំឱ្យសាច់ត្រី-ងឡើង និងកុំប្រែចុះ ឡើងញឹកញាប់ដោយមិនចាំបាច់ គួរទុកឱ្យឆ្អិនម្តងម្ខាង។
– ពេលសាច់ខាងស្បែកនោះឆ្អិនក្រៀមល្អហើយ សឹមត្រឡប់ឱ្យសាច់ខាងលើទៅនៅខាងក្រោមម្តង និងចៀនរហូតឡើងឆ្អិនក្រៀម សឹមស្រង់ឡើង ទុកឱ្យស្រក់ខ្លាញ់អស់។
ចូរកុំភ្លេច មុនពេលដាក់ចៀន អ្នកគួររោយអំបិលពីលើសាច់ត្រីឱ្យសព្វ ដើម្បីការពារកុំឱ្យសាច់ត្រីជាប់ខ្ទះ។
គន្លឹះក្នុងការបំពងសាច់មាន់ ឱ្យស្រួយខាងក្រៅ ទន់ខាងក្នុង
យកសាច់មាន់ដែលលាងហើយទៅដាក់សំដិលខ្យល់ឱ្យស្ងួត។ បុកមើមខ្ទឹមស និងគ្រាប់ម្រេចឱ្យបែកល្អិតចូលគ្នាសព្វ ដាក់អំបិលចូល ហើយយកទៅប្រឡាក់ផ្អាប់ជាមួយសាច់មាន់ដែលសំដិលស្ងួតហើយនោះ រួចទុកចោលយ៉ាងតិចឱ្យបានកន្លះម៉ោង។ បន្ទាប់ពីនោះយកមកដាក់ក្នុងចាន ហើយយកទៅដាក់ចំហុយនៅក្នុងឡាំងស៊ឹង(ឆ្នាំងសម្រាប់ចំហុយ) ដែលមានទឹកពុះជាស្រេច(ដាំទឹកឱ្យពុះសិន សឹមដាក់សាច់មាន់ចូលចំហុយ)។ ចំហុយរហូតសាច់មាន់ឆ្អិនល្មម សឹមយកចេញពីក្នុងឡាំងស៊ឹង ទុកឱ្យត្រជាក់ និងដាក់សំដិលខ្យល់ឱ្យស្ងួត រួចហើយយកសាច់មាន់មកច្របល់ជាមួយ និងម្សៅសាលី(ឬម្សៅបំពងស្រួយក៏បាន) បន្ទាប់មកយកទៅជ្រលក់នៅក្នុងទឹកស៊ុតក្រឡុក រួចទើបយកទៅចៀនបំពងនៅក្នុងខ្លាញ់ដែលកំពុងក្តៅខ្លាំង ដោយប្រើភ្លើងខ្លាំងល្មម។ ពេលមើលឃើញម្សៅខាងក្រៅឆ្អិនឡើងពណ៌លឿងស្រួយហើយ ចូរយកចង្កឹះចាប់ស្រង់ឡើងយកមកទុកឱ្យស្រក់ខ្លាញ់អស់… តែប៉ុណ្ណឹងលោកអ្នកនឹងបានសាច់មាន់បំពងដែលស្រួយក្រៅ ទន់ក្នុង មកទទួលទានយ៉ាងឆ្ងាញ់មាត់មិនខាន៕
February 26, 2020
តើត្រូវឱ្យកុមារតូចញ៉ាំខ្លាញ់ប្រភេទណាទើបល្អចំពោះសុខភាព
អ្នកដែលខ្លាចធាត់ ច្រើនតែខ្លាចអាហារដែលមានខ្លាញ់ច្រើន តែសម្រាប់កុមារតូចៗវិញ ខ្លាញ់សំខាន់ និងចាំបាច់ចំពោះរាងកាយមិនមែនធម្មតាឡើយ ជាពិសេសក្នុងអំឡុងពេលចាប់ផ្តើមដំបូងនៃជីវិតដែលរាងកាយ និងខួរក្បាលកំពុងវិវឌ្ឍនោះ។ កុមារតូចៗក្នុងអំឡុងវ័យ 2ខួបដំបូង ត្រូវការកម្លាំងថាមពល និងសារធាតុខ្លាញ់ច្រើនជាងមនុស្សធំ ដើម្បីឱ្យទាន់នឹងអត្រានៃការរីកចម្រើនធំធាត់របស់រាងកាយ និងខួរក្បាលដែលកំពុងតែស្ទុះឡើងខ្លាំង ដែលចាំបាច់កុមារត្រូវតែ ៖
1. ទទួលបានកម្លាំងថាមពលមួយចំណែកពីសារធាតុខ្លាញ់
2. ប្រើប្រាស់សារធាតុខ្លាញ់ទៅជួយថែទាំសុខភាពស្បែក
3. មានសារធាតុខ្លាញ់ជួយបឺតជ្រាបវីតាមីនដែលសំខាន់ៗ មានដូចជា A, D, E, K ចូលក្នុងរាងកាយ
4. បានទទួលសារធាតុខ្លាញ់ដែលចាំបាច់សម្រាប់យកទៅប្រើប្រាស់ក្នុងការសាង និងពង្រីកកោសិកាខួរក្បាល ដើម្បីត្រៀមទទួលការរៀនយល់ដឹង និងការវិវឌ្ឍផ្នែកផ្សេង(ចំណុចនេះសំខាន់ខ្លាំងណាស់)។ដូច្នេះដើម្បីឱ្យរាងកាយ មានការវិវឌ្ឍឡើងរួមទាំងការរៀនយល់ដឹងរបស់កូនតូចដំណើរការទៅយ៉ាងល្អនោះ យើងនាំគ្នាមកជ្រើសរើសប្រភពសារធាតុខ្លាញ់ដែលល្អ និងមានប្រយោជន៍ឱ្យកូនៗវិញប្រសើរជាង ៖
1- សារធាតុខ្លាញ់នៅក្នុងទឹកដោះម្តាយ គឺជាសារធាតុខ្លាញ់ល្អមានប្រយោជន៍មុនគេបំផុតដែលកូនតូចគួរតែបានទទួល ព្រោះមានសារធាតុអាស៊ីតខ្លាញ់ចាំបាច់ដែលជួយបង្កើនដល់ការវិវឌ្ឍរបស់ខួរក្បាល រួមទាំងសារធាតុអាស៊ីតខ្លាញ់ផ្សេងៗទៀតជាង 160ប្រភេទ ដែលទោះជានៅមិនទាន់ដឹងពីមុខនាទីការងាររបស់វាក៏ដោយ តែក៏គេទទួលស្គាល់រួចហើយដែរថា វាមានប្រយោជន៍ក្នុងការវិវឌ្ឍរបស់ខួរក្បាលកុមារយ៉ាងខ្លាំង។
2- ពេលដល់វ័យដែលកុមារអាចញ៉ាំអាហារបានដូចមនុស្សធំហើយនោះ អ្នកម្តាយត្រូវជ្រើសរើសអាហារដែលជាប្រភពនៃសារធាតុខ្លាញ់មានប្រយោជន៍ឱ្យមកទទួលតួនាទីបន្តពីទឹកដោះម្តាយ និងមិនត្រូវភ្លេចរឿងភាពសម្បូរបែបរបស់អាហារនោះឡើយ ព្រោះគ្រប់ចំណែករបស់រាងកាយត្រូវដំណើរការទៅមុខព្រមៗគ្នា។
3- សារធាតុខ្លាញ់នេះមាននៅក្នុងសាច់ត្រីសមុទ្រ ដូចជា ត្រីឆ្ពុង ត្រីប្លាធូ ត្រីតុកកែ ត្រីសាល់ម៉ុន និងត្រីធូណាជាដើម ឬសូម្បីតែត្រីទឹកសាបប្រភេទខ្លះក៏មានសារធាតុអាស៊ីតខ្លាញ់ចាំបាច់ប្រភេទនេះដែរ ដូចជា ត្រីរ៉ស់ ត្រីដំរី ត្រីប្រា – ល -រួម-ទាំងប្រេងឆាប្រភេទផ្សេងៗផងដែរ ដូចជា ប្រេងសណ្តែកលឿង ប្រេងកន្ទក់ ប្រេងគ្រាប់ផ្កាឈូករ័ត្ន និងលើកលែងតែប្រេងដូងមួយចេញ ។ សារធាតុខ្លាញ់ល្អទាំងនេះ មិនមែនមានប្រយោជន៍ចំពោះតែខួរក្បាលរបស់កូនប៉ុណ្ណោះទេ តែវានៅជួយការពារសភាវជាតិខ្លាញ់កើនលើសដែលជាបញ្ហាចម្បងរបស់កុមារសម័យនេះបានទៀតផង៕
February 26, 2020
រដ្ឋាបាលរាជធានីភ្នំពេញនឹងដាក់ឲ្យដេញថ្លៃ សេវាប្រមូលសំរាមដោយបែងចែកជាបីតំបន់ដាច់ពីគ្នា
ភ្នំពេញ៖ យោងតាមលិខិតដែលចេញផ្សាយនៅថ្ងៃទី២៥ ខែកុម្ភៈ ឆ្នាំ២០២០ រដ្ឋបាលរាជធានីភ្នំពេញ បានបញ្ជាក់ថា រដ្ឋបាលរាជធានីភ្នំពេញកំពុងស្វែងរកក្រុមហ៊ុន ដែលមានសមត្ថភាព បទពិសោធន៍ និងហិរញ្ញវត្ថុគ្រប់គ្រាន់ ដើម្បីផ្ដល់សេវាប្រមូល ដឹកជញ្ជូនសំរាម និងសំណល់រឹង នៅរាជធានីភ្នំពេញ ក្រោមដំណើរការ និងនីតិវិធីលទ្ធកម្មតាមលក្ខណៈស្តង់ដារអន្តរជាតិ។
ខាងក្រោមនេះ គឺជាសេចក្តីជូនដំណឹងទាំងស្រុងរបស់រដ្ឋបាលរាជធានីភ្នំពេញ៖
February 26, 2020
ទស្សនៈប្រជាពលរដ្ឋ និងអ្នកជំនាញ ចំពោះវិស័យអចលនទ្រព្យនៅតំបន់អរិយក្សត្រ
ប្រជាពលរដ្ឋ និងអ្នកជំនាញវាយតម្លៃអចលនទ្រព្យបានអះអាងថា តំបន់ប៉ែកខាងកើតនៃរាជធានីភ្នំពេញ ពោលគឺតំបន់អរិយក្សត្រ នឹងក្លាយជាតំបន់ដ៏មានសក្តានុពលវិនិយោគលើវិស័យអចលនទ្រព្យនាពេលអនាគតដ៏ខ្លីខាងមុខនេះ ដោយសារតែតំបន់នេះស្ថិតនៅកៀកនឹងរាជធានីភ្នំពេញជាងគេ។ ទន្ទឹមគ្នានេះ អ្នកជំនាញក៏បានមើលឃើញដែរថាតំបន់អរិយក្សត្រ នឹងក្លាយជាទីក្រុងរណបថ្មី 1ទៀតដែលភាពខុសប្លែកពីទីក្រុងរណបកោះពេជ្រ និងជ្រោយចង្វារទៀតផង។
ការលើកឡើងពីសំណាក់ប្រជាពលរដ្ឋ និងក្រុមអ្នកជំនាញអចលនទ្រព្យនៅពេលនេះ ត្រូវបានធ្វើឡើងក្រោយពេលដែលប្រមុខរាជរដ្ឋាភិបាល សម្ដេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា កំពុងពន្លឿនប្រទេសកូរ៉េខាងត្បូងឱ្យជួយសង់ស្ពានមិត្តភាពកម្ពុជា-កូរ៉េ ដែលនឹងឆ្លងកាត់ពីជ្រោយចង្វារទៅកាន់តំបន់អរិយក្សត្រ នាពេលដ៏ខ្លីខាងមុខនេះ។
អ្នកភូមិម្នាក់ដែលរស់នៅក្នុងតំបន់អរិយក្សត្រ លោក ថន សំណាង បានសម្ដែងភាពរីករាយនៅពេលបានឮដំណឹងថា រាជរដ្ឋាភិបាលមានគម្រោងសាងសង់ស្ពាន តភ្ជាប់ទីក្រុងភ្នំពេញទៅតំបន់របស់ពួកគាត់។ លោកនិយាយថា “ខ្ញុំពិតជាចង់ឱ្យមានការសាងសង់ស្ពានខ្លាំងណាស់ ព្រោះនៅពេលដែលមានការអភិវឌ្ឍហេដ្ឋារចនាសម្ព័ន្ធច្រើន គម្រោងអភិវឌ្ឍន៍ជាច្រើននឹងចាប់ផ្តើមមកកាន់តំបន់នេះនៅពេលមានស្ពាន វានឹងផ្តល់ភាពងាយស្រួលដល់ការធ្វើដំណើរចេញចូលក្នុងទីក្រុង”។
បច្ចុប្បន្នអ្នករស់នៅតំបន់អរិយក្សត្រត្រូវឆ្លងស្រឡាងទៅ-មក
ជាប្រជាពលរដ្ឋរស់នៅរាជធានីភ្នំពេញ លោក ព្រំ សីហា បានបង្ហាញការយល់ឃើញថា តំបន់នេះពិតជាមានសក្តានុពលដ៏ល្អសម្រាប់ថ្ងៃអនាគតមែន ជាពិសេសការអភិវឌ្ឍលំនៅឋាន ព្រោះថា ទីនេះជាតំបន់ដែលមានទីតាំងល្អបំផុត ស្ថិតនៅជិតទីក្រុងបំផុត មានទេសភាពបៃតង មានខ្យល់ល្អបរិសុទ្ធ និងបរិយាកាសស្រស់ស្អាត។ ជាងនេះទៀត លោកបានបន្តថា តំបន់អរិយក្សត្រជាទីតាំងដ៏អំណោយផលដែលជាកត្តាទាក់ទាញអ្នកអភិវឌ្ឍន៍ឱ្យមកអភិវឌ្ឍកាន់តែច្រើននាពេលអនាគត។
ពាក់ព័ន្ធនឹងការលើកឡើងរបស់ប្រជាពលរដ្ឋពីតំបន់អររិយក្សត្រនេះដែរ លោក អ៊ា ចរិយា អគ្គនាយកក្រុមហ៊ុន AP Real Estate ដែលជាក្រុមហ៊ុនអភិវឌ្ឍន៍ទិញ-លក់អចលនទ្រព្យនៅតំបន់អរិយក្សត្រ បានលើកឡើងថា បើប្រៀបធៀបតំបន់ដែលមានចម្ងាយពី5 ទៅ 10គីឡូម៉ែត្រ ពីកណ្តាលក្រុងនោះ តំបន់អរិយក្សត្រ គឺស្ថិតនៅកៀកទីក្រុងភ្នំពេញជាងគេ ហេតុនេះតំបន់នេះនឹងកាន់តែមានសក្តានុពលខ្លាំងទៅទៀតទៅថ្ងៃអនាគត។
លោកបានបញ្ជាក់ថា “ក្រោយតភ្ជាប់ស្ពានពីជ្រោយចង្វារទៅអរិយក្សត្រ និងពីអរិយក្សត្រទៅផ្លូវជាតិលេខ1 តម្លៃដីនៅតំបន់នេះនឹងកាន់តែហក់ខ្ពស់ឡើងទ្វេដង ពោលគឺអាចគុណនឹង2 គុណនឹង5 ឬគុណនឹង10 ផងក៏មិនដឹង។ មិនតែប៉ុណ្ណោះ បើយើងប្រៀបធៀបតម្លៃដីដែលស្ថិតនៅចម្ងាយពី5 ទៅ10គីឡូម៉ែត្រពីកណ្តាលក្រុង តម្លៃដីមានការកើនឡើងចាប់ពីជាង1,000 ទៅជាង 2,000ដុល្លារក្នុង 1ម៉ែត្រការ៉េ ចំណែកដីនៅតំបន់អរិយក្សត្រវិញ ចាប់ពីជាង50 ទៅជាង 800ដុល្លារក្នុង 1ម៉ែត្រការ៉េ”។
អ្នកជំនាញផ្នែកវាយតម្លៃអចលនទ្រព្យរូបនេះ បានបង្ហាញពីការជឿជាក់ថា “ទៅថ្ងៃអនាគតតំបន់អរិយ្សក្សត្រ នឹងក្លាយជាទីក្រុងរណបថ្មីមួយទៀត ខុសប្លែកពីទីក្រុងរណបកោះពេជ្រ និងជ្រោយចង្វារ។ លោកអះអាងថា ថ្ងៃអនាគត តំបន់អរិយក្សត្រ មិនត្រឹមតែរីកដុះដាលខ្លាំងខាងវិស័យខុនដូ លំនៅឋាន និងអគារណិជ្ជកម្មប៉ុណ្ណោះទេ តែអរិយក្សត្រក៏នឹងក្លាយជាទីក្រុងរណបថ្មីមួយទៀតដែលមានទាំងផ្នែកពាណិជ្ជកម្ម ឧស្សាហកម្ម និងកសិកម្មទៀតផងដោយសារតែតំបន់នេះមានទន្លេ បឹង និងហេដ្ឋារចនាសម្ព័ន្ធងាយស្រួលក្នុងការអភិវឌ្ឍ”។
ពាក់ព័ន្ធនឹងតំបន់អរិយក្សត្រនេះដែរ កាលពីពេលថ្មីៗនេះ សម្ដេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាបានលើកឡើងថានៅពេលឆាប់ៗខាងមុខនេះ តំបន់អរិយក្សត្រ និងស្វាយជ្រុំ នឹងប្រែក្លាយទៅជាទីក្រុងរណបដ៏ទាក់ទាញ និងមានសក្ដានុពល បន្ទាប់ពីស្ពានឆ្លងកាត់ទន្លេមេគង្គ ត្រូវបានសាងសង់រួចជាស្ថាពរ។
ទន្ទឹមគ្នានេះ សម្ដេច ក៏កំពុងពន្លឿនកូរ៉េខាងត្បូង ឱ្យជួយសង់ស្ពានមិត្តភាពកម្ពុជា-កូរ៉េ ដែលឆ្លងកាត់ពីជ្រោយចង្វារទៅកាន់តំបន់អរិយក្សត្រ។ ជាងនេះទៀត សម្តេចបានមានប្រសាសន៍បន្ថែមថា រដ្ឋាភិបាល ក៏មានគម្រោងសាងសង់ស្ពានឆ្លងកាត់ទន្លេមេគង្គក្រោម ដែលតភ្ជាប់រវាងតំបន់អរិយក្សត្រ និងតំបន់ក្តីតាកុយផងដែរ។ ប្រមុខរដ្ឋាភិបាលបានអះអាងថា បើផែនការសាងសង់ស្ពាននេះជោគជ័យ វានឹងក្លាយជាចលករមួយក្នុងការរុញច្រានទីផ្សារអចលនទ្រព្យឱ្យមានភាពរស់រវើកក្នុងតំបន់នោះ៕
February 25, 2020
រដ្ឋាភិបាលចង់ឱ្យជប៉ុនជួយពិនិត្យ និងពង្រឹងបទដ្ឋានគតិយុត្តលើវិស័យសំណង់នៅកម្ពុជា
ប្រមុខរដ្ឋាភិបាលកម្ពុជាបានស្នើរដ្ឋាភិបាលជប៉ុនជួយត្រួតពិនិត្យ និងពង្រឹងបទដ្ឋានគតិយុត្តលើវិស័យសំណង់នៅកម្ពុជា។ ការស្នើរបស់រាជរដ្ឋាភិបាលបែបនេះ បានធ្វើឡើងនាឱកាសសម្ដេចមហាអគ្គសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា អញ្ជើញជួបពិភាក្សាការងារជាមួយឯកអគ្គរាជទូតជប៉ុនប្រចាំព្រះរាជាណាចក្រកម្ពុជា លោក មីកាមី ម៉ាសាហ៊ីរ៉ូ កាលពីពេលថ្មីៗនេះ។
នាឱកាសនោះ ប្រមុខរដ្ឋាភិបាលកម្ពុជា សម្ដេចតេជោនាយករដ្ឋមន្ត្រី បានថ្លែងអំណរគុណ ចំពោះជំនួយរបស់ជប៉ុន ដល់ការតាក់តែងច្បាប់សំណង់នៅកម្ពុជា។ បន្ថែមលើនោះសម្ដេច បានស្នើសុំឱ្យជប៉ុនបន្តជួយដល់កម្ពុជា ធ្វើយ៉ាងណាពង្រឹងបទដ្ឋានគតិយុត្ត ក៏ដូចជាធ្វើការត្រួតពិនិត្យលើវិស័យសំណង់ទាំងឡាយ ដែលកម្ពុជាបាននិងកំពុងសាងសង់ ដើម្បីឱ្យវិស័យនេះមានភាពរឹងមាំ។
សម្ដេច បានលើកឡើងបន្តថា ជប៉ុនកំពុងតែធ្វើការសហការជាមួយក្រសួងរ៉ែ និងថាមពល លើវិស័យអគ្គិសនី ដោយបានពិភាក្សាជាមួយឯកឧត្ដមស៊ុយ សែម ម្តងរួចមកហើយ និងបន្តពិភាក្សាម្ដងទៀត ដើម្បីធ្វើយ៉ាងណាជំរុញកិច្ចសហប្រតិបត្តិការលើវិស័យអគ្គិសនី។
លើសពីនេះទៅទៀត ក៏មានកិច្ចសហប្រតិបត្តិការក្នុងការរៀបចំផែនការមេសម្រាប់ការវិនិយោគរបស់ជប៉ុននៅកម្ពុជាផងដែរ ដូចជាមានការពិភាក្សា និងសិក្សាអំពីផែនការមេក្នុងការពង្រីក និងពង្រឹងវិនិយោគកំពង់ផែក្រុងព្រះសីហនុ។
បើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា (CDC) កាលពីថ្ងៃទី12 ខែកុម្ភៈ កន្លងទៅ បានបង្ហាញថា គិតត្រឹមដំណាច់ឆ្នាំ2019 CDC បានសម្រេចអនុញ្ញាតគម្រោង វិនិយោគជប៉ុនចំនួន 143គម្រោង ក្នុងទុនវិនិយោគប្រមាណ 2,785លានដុល្លារអាមេរិក។
សូមរំឭកដែរថា ច្បាប់សំណង់កម្ពុជា ត្រូវបានអនុម័តសម្រេចដាក់ឱ្យប្រើប្រាស់ជាផ្លូវការកាលពីថ្ងៃទី3 ខែវិច្ឆិកា ឆ្នាំ2019 កន្លងទៅនេះ។ កន្លងមក ពាក់ព័ន្ធនឹងច្បាប់ស្តីពីសំណង់នេះដែរ គឺមានការ រួមចំណែកពីប្រទេសជប៉ុន តាមរយៈការផ្តល់ជំនួយទាំងថវិកា និងជួយពង្រឹងបទដ្ឋានគតិយុត្តនៅក្នុងច្បាប់នេះ។
ជុំវិញច្បាប់សំណង់នេះ ប្រមុខរដ្ឋាភិបាលកម្ពុជាព្រមទាំងស្ថាប័នពាក់ព័ន្ធ បានចាត់ទុកថា គឺជាសមិទ្ធផល និងផ្លែផ្កាដ៏ត្រចះត្រចង់ និងជោគជ័យថ្មីមួយទៀតសម្រាប់ប្រទេសកម្ពុជា ខណៈច្បាប់នេះ ត្រូវបានស្ថាប័នពាក់ព័ន្ធខិតខំ និងរង់ចាំលទ្ធផលជាយូរណាស់មកហើយ ដើម្បីយកមកប្រើប្រាស់ក្នុងការគ្រប់គ្រងវិស័យសំណង់របស់កម្ពុជា។
គួរបញ្ជាក់ថា ច្បាប់សំណង់ ដែលបានសម្រេចដាក់ឱ្យប្រើប្រាស់ជាផ្លូវការ កាលពីដើមខែវិច្ឆិកា ឆ្នាំ2019 នោះ មានទាំងអស់ 22ជំពូក និង 111មាត្រា។
ច្បាប់នេះ ធ្វើឡើងក្នុងគោលបំណងពង្រឹងគុណភាព សន្ដិសុខ សុវត្ថិភាពសំណង់ ការពារទ្រព្យសម្បត្តិ និងសុខុមាលភាពរបស់ម្ចាស់សំណង់ អ្នកប្រើប្រាស់សំណង់ និងសាធារណជន។ ច្បាប់ថ្មីនេះ ក៏នឹងបង្កើនគណនេយ្យភាព និងប្រសិទ្ធភាពក្នុងការប្រកបការងារ និងការប្រកបវិជ្ជាជីវៈក្នុងវិស័យសំណង់ ព្រមទាំងបង្កើនការជឿទុកចិត្តរបស់វិនិយោគិននៅក្នុងវិស័យសំណង់ផងដែរ។
យ៉ាងណាក្ដី ប្រមុខរដ្ឋាភិបាលកម្ពុជា សម្តេចតេជោ ហ៊ុន សែន ក៏បានទទូចស្នើសុំដល់អ្នកវិនិយោគ អ្នកសាងសង់ ក៏ដូចជាអ្នកគ្រប់គ្រងសំណង់ និងអ្នកអភិវឌ្ឍន៍អចលនទ្រព្យទាំងអស់ សូមចូលរួមគោរពច្បាប់សំណង់ និងបទប្បញ្ញត្តិឱ្យមានប្រសិទ្ធភាពប្រកបដោយភាពត្រឹមត្រូវ ដើម្បីធានាបាននូវសុវត្ថិភាព និងគុណភាពសំណង់នៅកម្ពុជា៕
February 25, 2020
ចម្ការបន្លែគ្រួសារជុំវិញផ្ទះ (តពីលេខមុន)
-ចម្ការបន្លែគ្រួសារក្នុងផើង និងចម្ការបន្លែគ្រួសារលើអាកាស
សម្រាប់ការដាំដុះបន្លែក្នុងរូបបែបនេះ នឹងស័ក្តិសមជាមួយអ្នកដែលស្នាក់អាស្រ័យនៅតាមបន្ទប់ជួល អាផាតមិនត៍ ផ្ទះល្វែងផ្ទះលក់ចាប់ហួយតាមចិញ្ចើមថ្នល់ ឬកន្លែងដែលគ្មានដីទំនេររបស់ខ្លួនឯង ដោយចម្ការបន្លែគ្រួសារទាំង 2រូបបែបនេះ ទោះជាមានឈ្មោះហៅខុសពីគ្នាមែន តែអាចរាប់បានថា ជាវិធីដាំដុះបន្លែក្នុងលក្ខណៈដូចគ្នា គឺការដាំនៅក្នុងភាជនៈ គ្រាន់តែ “ចម្ការបន្លែក្នុងផើង”អាចនឹងប្រើភាជនៈដែលធ្វើអំពីដីឥដ្ឋដុត ផើងជ័រ ឬភាជនៈដែលលែងប្រើហើយ ដូចជា ចានដែក ធុង ពាង កំប៉ុង ក្រឡ ឆ្នាំងជាដើម ដែលចំណុចល្អ របស់ការដាំបន្លែគ្រួសារក្នុងផើងនេះគឺ អាចរើផ្លាស់ប្តូរទីកន្លែងទៅដាក់នៅកន្លែងណាដែលដំណាំអាចទទួលពន្លឺបានយ៉ាងងាយ និងថែមទាំងជាការសន្សំសំចៃពេលវេលាក្នុងការមើលថែទាំទៀតផង និងចង់ជ្រើសរើសយកមកដាក់តាំងលម្អខាងក្នុងបរិវេណផ្ទះក៏អាចធ្វើបានយ៉ាងងាយស្រួលដែរ។
ចំណែក “បន្លែចម្ការគ្រួសារលើអាកាស” វិញ ស័ក្តិសមសម្រាប់ផ្ទះដែលគ្មានបរិវេណទំនេរនៅសល់សោះ គឺជាការដាំបន្លែនៅក្នុងភាជនៈដែលអាចព្យួរបានហ្នឹងឯង ដោយភាជនៈសម្រាប់ដាក់ដាំក្នុងចម្ការប្រភេទនេះគួរតែនឹកដល់រឿងរបស់ភាជនៈដែលមានភាពស្រស់ស្អាតប្រកបជាមួយផង ដោយភាគច្រើនអាចជ្រើសរើសប្រើភាជនៈដែលធ្វើអំពីវត្ថុធម្មជាតិ ដូចជា លលាដ៍ដូង សម្បកផ្លែដូងទុំ បំពង់ឫស្សី -ល- ឬនៅក្នុងផ្ទះខ្លះអាចជ្រើសរើសប្រើថូ ផើងស្អាតៗ ឬភាជនៈផ្សេងទៀតដែលមានភាពស្រស់ស្អាត ដើម្បីធ្វើជាគ្រឿងប្រដាប់តុបតែងលម្អក្នុងបរិវេណផ្ទះក៏បានដែរ។
តែអ្វីដែលត្រូវនឹកដល់ជាសំខាន់នោះគឺ ការជ្រើសរើសប្រភេទបន្លែ គួរជ្រើសរើសដាំប្រភេទដែលមានដើមមិនធំពេក ស័ក្តិសមនឹងភាជនៈដែលដាក់ដាំ ដូចជា ដើមម្ទេសដែលមានពណ៌ស្អាតៗ ដើមជីអង្កាម ដើមជីនាងវងទាបៗ និងថែមទាំងភាជនៈទាំងនេះមិនគួរមានទម្ងន់ធ្ងន់ខ្លាំងពេកឡើយ និងគួររកខ្សែច្រវាក់តូចៗ ឬខ្សែលួសដែលមានភាពរឹងមាំស៊ូធន់នឹងកម្តៅថ្ងៃ ភ្លៀងខ្យល់មកចងព្យួរ ព្រោះបើប្រើប្រាស់ខ្សែមិនរឹងមាំល្អទេនោះ អាចនឹងធ្វើឱ្យមានគ្រោះថ្នាក់ជាយថាហេតុបាន។ក្រៅពីនេះ ក្នុងការដាំ “ចម្ការបន្លែគ្រួសារក្នុងផើង” និង “ចម្ការបន្លែគ្រួសារលើអាកាស” ក្រៅពីការបណ្តុះគ្រាប់ឱ្យដុះធំឡើងនៅក្នុងផើងហើយ អាចនឹងប្រើមែកផ្សាំ កាត់មែកមកដាក់ដាំ ឬបណ្តុះឱ្យដុះឡើងជាកូន ហើយសឹមដកយកទៅស្ទូងក្នុងផើងមួយទៀតក៏អាចធ្វើបានដែរ អាស្រ័យលើភាពស័ក្តិសមរបស់ប្រភេទបន្លែជាសំខាន់។ ចំណែកខាងផ្នែកមើលថែទាំវិញ ដោយសារតែក្នុងភាជនៈដែលដាំដុះបន្លែនោះមានដីតិច ដូច្នេះរឿងដែលគួរនឹកដល់មួយទៀតនោះគឺ ការឧស្សាហ៍ដាក់ជីវិទ្យាសាស្រ្ត ស្រោចទឹកជាប់ជានិច្ច និងគួរផ្លាស់ប្តូរដីថ្មីម្តងម្កាលតាមរយៈពេលដែលស័ក្តិសមរបស់ដំណាំបន្លែនោះ។

-ចម្ការរបងបន្លែញ៉ាំបាន
សម្រាប់ចម្ការបន្លែគ្រួសារប្រភេទនេះ រឿងសំខាន់គឺ ត្រូវរៀបចំតុបតែងមិនឱ្យរញេរញ៉ៃស៊ុបទ្រុប ដោយបន្លែដែលស័ក្តិសមសម្រាប់ការដាំដុះក្នុងលក្ខណៈនេះ គឺ “រុក្ខជាតិវារតោង” ព្រោះអាចយកមកដាំធ្វើជារុក្ខជាតិតុបតែងលម្អ បង្កើនភាពស្រស់ស្អាតដល់បរិវេណជុំវិញផ្ទះក៏បាន ដូចជា ពពួកបន្លែទម្លាក់កួរ ត្រសក់ ននោងជ្រុង-មូល ពពាយ សណ្តែកកួរ ម្រះ ឃ្លោក ជាដើម ដោយមានគ្រោងសាងរបស់ទ្រើងដែលជារបងនោះ អាចនឹងត្រូវតុបតែងកែច្នៃឱ្យស្អាត ឬគ្រាន់តែបណ្តោយឱ្យវាវារតោងឡើងលើរបងលួសបន្លា ឬបង្គោលឈើឬស្សីក៏បាន តែនៅពេលចាប់ផ្តើមដាំថ្មីៗ ចាំបាច់ត្រូវតែជួយរៀបចំចាត់ចែងឱ្យវារតោងឡើងទៅលើទ្រើង និងការក្តិចត្រួយក៏នឹងជួយឱ្យបែកមែកចេញខ្នែងច្រើន ធ្វើឱ្យអាចវារគ្របដណ្តប់ទៅលើទ្រើងដែលជារបងបានឆាប់រហ័សឡើង ឬក្រៅអំពីដំណាំវារតោងហើយ យើងនៅអាចជ្រើសរើសដាំ “ដំណាំដើមឈរខ្នាតតូច” ដូចជា ដើមកន្ទុំទេស ស្អំ ដើមអង្គារដី ដើមបន្លែផ្អែម -ល- មកដាំធ្វើជារបងផ្ទះបាន ព្រោះជាដំណាំដែលងាយដាំ និងផ្តល់នូវផលិតផលរហូតពេញ 1ឆ្នាំ និងមានគុណប្រយោជន៍ខាងអាហារខ្ពស់ និងគ្មានសាធាតុគីមីទៀតផង។

(នៅមានត)
February 25, 2020
Vivo នឹងចេញស្មាតហ្វូនមាន 5G ថ្មខ្លាំង និងសាករហ័ស មកជាមួយស្រាប់ នៅថ្ងៃទី 29 ខែកុម្ភៈនេះ
ក្រុមហ៊ុន Vivo បានឱ្យតម្រុយតាមរយៈការចែកចាយរូបភាពមួយចំនួននៅលើបណ្តាញសង្គមចិន Weibo មានបង្ហាញពីរូបរាង Z6 ដែលមានប្រើប្រាស់អេក្រង់បន្សល់ប្រជ្រុយតូចមួយនៅផ្នែកខាងស្តាំអេក្រង់ និងបណ្ដុំកាមេរ៉ា 4គ្រាប់នៅខាងក្រោយអមប្រព័ន្ធស្គែនខ្ចៅដៃ។

ស្មាតហ្វូនVivo Z6 នឹងបំពាក់នូវបន្ទះឈីប Snapdragno 765G SoC មានប្រព័ន្ធបញ្ចុះកម្តៅ Liquid Cooling គាំទ្រការប្រើប្រាស់ 5G អមថាមពលថ្ម 5000mAh និងមុខងារសាកថ្មរហ័សកម្លាំង 44វ៉ាត់ម៉ោង។ ទោះបីមិនទាន់មានការបញ្ជាក់ពីតម្លៃច្បាស់ការណ៍នៅឡើយ តែតាមតម្រុយរូបភាពគឺ Z6 នឹងមានជម្រើស 3ពណ៌។
ដំណាក់កាលចេញលក់ដំបូងទំនងជានឹងធ្វើឡើងនៅថ្ងៃទី29 កុម្ភៈ នោះផ្ទាល់លើគេហទំព័រ JD.com របស់ទីផ្សារចិន៕
February 25, 2020
SONY នៅតែបន្តចេញស្មាតហ្វូនអេក្រង់ 90Hz ម្តង 2 ហើយអាចនឹងមាន 5G
ក្រុមការងាររបស់ XDA បានចែករំលែករូបភាព ដែលទំនងជារូបភាពលេចធ្លាយ និងលក្ខណសម្បត្តិរបស់ស្មាតហ្វូន Sony ឆ្នាំ2020 គឺមានឈ្មោះ Xperia 1 II និង Xperia 10 II។
ស្មាតហ្វូន Xperia 1 II នេះ ដូចឈ្មោះវាបានបញ្ជាក់ស្រាប់ហើយអ៊ីចឹង គឺវាជាប្រភេទដែលមានការផ្លាស់ប្ដូរថ្មីរបស់ Sony Xperia 1 ដោយមានប្ដូរប្រើសេវា 5G ប្រើបន្ទះឈីប Snapdragon 865 ដែលសមត្ថភាពខ្លាំងជាងមុន និងមានអេក្រង់ដែលអាចបង្ហាញ ដូចជាអេក្រង់ 90Hz ផងដែរ។ ការផ្លាស់ប្ដូរផ្សេងទៀត រួមមានថ្មទំហំ 4000 mAh (ពីមុន 3300 mAh), កាមេរ៉ាមានសមត្ថភាព Zoom បាន 3ដង, មាន RAM ទំហំ 8GB និងអង្គផ្ទុកទិន្នន័យក្នុងម៉ាស៊ីនទំហំ 256GB។
ចំណែកស្មាតហ្វូន Xperia 10 II វិញ គឺនៅតែប្រើប្រាស់សេវា 4G LTE ដដែល មានអេក្រង់ OLED អាចបង្ហាញរូបភាពកម្រិត 2520×1080 ភិកសែល ដូច Xperia 10។ វាមានសមត្ថភាពខ្លាំងលើសស៊េរីមុន ត្រង់ការប្រើឈីប Snapdragon 665 មាន RAM ទំហំ 4GB មានកាមេរ៉ាក្រោយ 3គ្រាប់ និងអង្គផ្ទុក 128GB។
ថ្ងៃនៃការប្រកាសបង្ហាញមុខ មិនបានមកព្រមគ្នាជាមួយរូបភាពលេចធ្លាយទេ ប៉ុន្តែគេអាចដឹងអំពីវាឆាប់ៗនេះ ដោយសារនៅលើផ្ទាំងទូរស័ព្ទ មានបង្ហាញអំពីថ្ងៃទី24 ខែកុម្ភៈ៕
February 25, 2020
រាជរដ្ឋាភិបាល ប្រកាស៖ ម្ចាស់សណ្ឋាគារ និងផ្ទះសំណាក់នៅសៀមរាប មិនបាច់បង់ពន្ធ រយៈពេល 4ខែ
ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានបញ្ជាក់ប្រាប់ទៅដល់ម្ចាស់សណ្ឋាគារ និងផ្ទះសំណាក់នៅខេត្តសៀមរាប ដែលបានចុះបញ្ជីថា ពុំចាំបាច់បង់ប្រាក់ពន្ធដារប្រចាំខែក្នុងរយៈពេល 4ខែ។
សម្តេចតេជោ ហ៊ុន សែន បានមានប្រសាសន៍ថា៖ «វិធានការនេះជួយដល់វិស័យទេសចរណ៍ ជាមួយនឹងការភ័យខ្លាចចំពោះជំងឺកូវីដ-19 ព្រោះវាបានធ្វើឱ្យប៉ះពាល់ដល់វិស័យទេសចរណ៍ ទាំងនៅក្នុងតំបន់ ក៏ដូចជាប្រទេសកម្ពុជាផងដែរ។ ជាក់ស្តែងនៅក្នុងខែកុម្ភៈ ឆ្នាំ2020 ភ្ញៀវទេសចរបរទេស ដែលចូលមកកម្ពុជា បានធ្លាក់ចុះប្រមាណជាង 60% ជាពិសេស ភ្ញៀវទេសចរជនជាតិចិនបានធ្លាក់ចុះក្នុងប្រមាណជា 90%»។
សម្តេចតេជោនាយករដ្ឋមន្ត្រី បានថ្លែងយ៉ាងដូច្នេះនៅក្នុងសន្និសីទសារព័ត៌មាននាព្រឹកថ្ងៃទី24 ខែកុម្ភៈ ឆ្នាំ2020 នៅវិមានសន្តិភាព ដោយបញ្ជាក់ថា បញ្ហាជំងឺកូវីដ-19 នេះបានធ្វើឱ្យអាជីវកម្មនៅក្នុងខេត្តសៀមរាបទទួលរងនូវផលប៉ះពាល់យ៉ាងខ្លាំង។ តែសកម្មភាពទេសចរណ៍នៅតំបន់ដទៃទៀតស្ថិតក្នុងកម្រិតសមរម្យ។
សម្តេចនាយករដ្ឋមន្ត្រី បានចាត់ទុកថា វិធានការដែលរាជរដ្ឋាភិបាលដាក់ចេញនោះស្ថិតក្នុងគោលបំណងធ្វើយ៉ាងណាជួយដល់អាជីវកម្មទេសចរណ៍នៅក្នុងខេត្តសៀមរាប ក្នុងនោះគឺសណ្ឋាគារ និងផ្ទះសំណាក់អាចបន្តអាជីវកម្មរបស់ខ្លួនបាន ក្នុងការបន្តការងារជូនដល់កម្មករ និងបុគ្គលិក ជាពិសេសនោះ មានភាពខ្លាំងជាងមុន នឹងកើតឡើងនៅពេលមេរោគវីរុសកូវីដ-19បានបញ្ចប់។
សម្តេចតេជោបានបន្តថា៖«លើសពីនេះរាជរដ្ឋាភិបាលមានវិធានការ សម្រេចលើកលែងការបង់ពន្ធប្រចាំខែគ្រប់ប្រភេទរបស់ម្ចាស់សណ្ឋាគារ និងផ្ទះសំណាក់ដែលបានចុះបញ្ជីនៅអគ្គនាយកដ្ឋានពន្ធដារ និងមានសកម្មភាពធ្វើអាជីវកម្មសម្រាប់រយៈពេល 4ខែ ចាប់ពីខែកុម្ភៈ ដល់ខែឧសភា ឆ្នាំ2020។ អាជីវកម្មសណ្ឋាគារ និងផ្ទះសំណាក់នៅតែមានសិទ្ធិដាក់លិខិតប្រកាសពន្ធអាកររបស់ខ្លួន និងប្រើប្រាស់ប្រព័ន្ធអនឡាញសម្រាប់គ្រប់អាជីវក លើតម្លៃបន្ថែមជារៀងរាល់ខែក្នុងរយៈពេលលើកលែងពន្ធ»។

សម្តេចតេជោក៏បានគូសបញ្ជាក់ទៀតផងដែរថា៖«ការលើកលែងយកពន្ធនេះ គឺរដ្ឋជាអ្នកបង់ពន្ធជំនួសវិញ។ យើងធ្លាប់បង់ពន្ធហើយ យើងមិនអាចហៅថា លើកលែងនោះទេ តែដើម្បីងាយស្តាប់ ប្រើពាក្យលើកលែងបង់ពន្ធទៅ តែរដ្ឋបង់ពន្ធជំនួស។ យើងធ្វើមិនទូទៅនោះទេ គឺធ្វើតែនៅខេត្តសៀមរាបប៉ុណ្ណោះ ព្រោះជាខេត្តមួយដែលធ្លាប់មានភ្ញៀវទេសចរទៅលេងនៅទីនោះច្រើន តែពេលនេះធ្លាក់ចុះ»។
សម្តេចតេជោក៏បានលើកឡើងទៀតដែរថា៖«ការជំរុញវិស័យទេចរណ៍នៅខេត្តសៀមរាបនេះ ក៏សំដៅធ្វើយ៉ាងណាឱ្យមានការបណ្តុះបណ្តាល ដើម្បីឱ្យកម្មករមានឱកាសចាប់យកជំនាញថ្មី ឬមានលទ្ធភាពទទួលបានការងារល្អជាងមុន។

ជាមួយគ្នានោះដែរ សម្តេចតេជោបានអះអាងថា នឹងមិនធ្វើសវនកម្មពេញលេញ សម្រាប់កាលបរិច្ឆេទឆ្នាំ2020 ចំពោះសហគ្រាសក្នុងវិស័យសណ្ឋាគារ និងផ្ទះសំណាក់ដែលបានចុះបញ្ជីនៅពន្ធដា និងសកម្មភាពអាជីវកម្មនៅក្នុងខេត្តសៀមរាបនោះទេ៕
February 25, 2020
ព្រះខ័នរាជស្វាយរៀង ត្រូវតទល់នឹងជើងឯកលីកកំពូលឥណ្ឌូនេស៊ី នាល្ងាចនេះ
ក្លិបតំណាងឱ្យកម្ពុជា ព្រះខ័នរាជស្វាយរៀង បានឆ្លងកាត់ប្រកួតហើយក្នុងពានរង្វាន់ AFC CUP 2020 ប្រចាំពូល G ដោយបានចាញ់ក្រុម Ceres United ក្នុងលទ្ធផល 4ទល់នឹង0។
នៅពេលល្ងាចនេះ ក្លិបព្រះខ័នរាជស្វាយរៀង ត្រូវទទួលភារកិច្ចក្នុងជំនួបទី២ ដោយត្រូវស្វាគមន៍ក្រុម Bali United និងជាជើងឯកលីកកំពូលឥណ្ឌូនេស៊ីផងដែរ។
គួរបញ្ជាក់ដែរថា ក្រុមបាល់ទាត់ព្រះខ័នរាជស្វាយរៀង នឹងត្រូវបើកពហុកីឡដ្ឋានជាតិ ទទួលស្វាគមន៍ក្រុមបាល់ទាត់ Bali United នាល្ងាចនេះចាប់ពីម៉ោង6 តទៅ៕
February 25, 2020