ធឿន មករា - La Reine Media

ជំរុញការអភិវឌ្ឍផ្លូវជនបទ ឆ្លើយតបតម្រូវការពលរដ្ឋជនបទ ស្របតាមកំណើនសេដ្ឋកិច្ចជាតិ

ក្រសួងអភិវឌ្ឍន៍ជនបទបានប្រកាសផែនការរបស់ខ្លួនសម្រាប់ឆ្នាំ2020 ចំនួន 15ចំណុច ដោយក្នុងនោះមាន 3ចំណុច បានធ្វើឱ្យមានការចាប់-អារម្មណ៍ខ្លាំង ដោយបានបញ្ជាក់ថា ចំណុចនេះជាការឆ្លើយតបតម្រូវការពលរដ្ឋជនបទ ឱ្យស្របតាមកំណើនសេដ្ឋកិច្ចជាតិ។

នៅក្នុងការលើកឡើង ដោយរដ្ឋលេខាធិការក្រសួងអភិវឌ្ឍន៍ជនបទ បានបង្ហាញពីចំណុចទី13-ជំរុញបង្កើនសកម្មភាពសេដ្ឋកិច្ចជនបទ និងសហគ្រិនភាព ដើម្បីគាំទ្រការបង្កើនប្រាក់ចំណូលតាមគ្រួសារនីមួយៗ តាមរយៈការចិញ្ចឹមសត្វ ចិញ្ចឹមត្រី ចិញ្ចឹមក្តាម និងចិញ្ចឹមឃ្មុំ ដើម្បីចូលរួមទប់ស្កាត់ការធ្វើចំណាកស្រុកដោយប្រថុយប្រថាន និងជំរុញការអនុវត្តកម្មវិធីបណ្តុះបណ្តាលចល័ត។

14-ពង្រឹង និងពង្រីកកិច្ចសហប្រតិបត្តិការល្អជាមួយបណ្តាអង្គការដៃគូ វិស័យឯកជន និងបណ្តាប្រទេសជាមិត្តនានា ដើម្បីកៀរគរប្រភពធនធានហិរញ្ញវត្ថុ បច្ចេកទេស និងបច្ចេកវិទ្យាថ្មីៗ សម្រាប់ទ្រទ្រង់វិស័យអភិវឌ្ឍន៍ជនបទឱ្យមានការរីកចម្រើន។

15-សហការជាមួយក្រសួងសាធារណការ និងដឹកជញ្ជូន ដើម្បីរៀបចំបែបបទ និងវិធីសាស្ត្របង្កើតផែនការមេសម្រាប់អភិវឌ្ឍន៍ផ្លូវថ្នល់តាមជនបទ ការរៀបចំប្លង់ និងការកំណត់អាទិភាពគម្រោង។

ឯកឧត្ដមរដ្ឋលេខាធិការក្រសួងអភិវឌ្ឍន៍ជនបទ នៅក្នុងសន្និសីទសារព័ត៌មានដែលធ្វើឡើងនៅទីស្តីការគណៈរដ្ឋមន្ត្រីកាលពីថ្ងៃទី17 កុម្ភៈ បានថ្លែងទាក់ទិននឹងចំណុចទី15 ថា ក្នុងការសម្របសម្រួលជាមួយក្រសួងសាធារណការ និងដឹកជញ្ជូន ដើម្បីធ្វើវិសោធនកម្មអនុក្រឹត្យមួយចំនួន ដែលនឹងអនុញ្ញាតឱ្យមានការចូលរួមទប់ស្កាត់យានយន្តធុនធ្ងន់ពីការប្រើប្រាស់ និងធ្វើឱ្យខូចផ្លូវជនបទ។

ឯកឧត្តម ចាន់ ដារ៉ុង រដ្ឋលេខាធិការក្រសួងអភិវឌ្ឍន៍ជនបទ បានមានប្រសាសន៍ថា៖“កន្លងមកក្រសួងសាធារណការ និងដឹកជញ្ជូនបានដាក់ជញ្ជីងថ្លឹងរថយន្តដឹកទំនិញលើសកំណត់នៅតាមដងផ្លូវជាតិ និងក្នុងទីរួមខេត្តដែលធ្វើឱ្យផ្លូវជនបទខូច។

ក្រសួងអភិវឌ្ឍន៍ជនបទនឹងសម្របសម្រួលជាមួយក្រសួងសាធារណការ និងដឹកជញ្ជូនដើម្បីធ្វើវិសោធនកម្មអនុក្រឹត្យ ដែលនឹងអនុញ្ញាតឱ្យមានការចូលរួមទាំង 2ក្រសួង ដូច្នេះក្រសួងអភិវឌ្ឍន៍ជនបទគិតថា វាគួរតែមានយុត្តាធិការក្នុងការដោះស្រាយបញ្ហានេះ”។

ឯកឧត្តមបានបន្ថែមថា ក្រសួងទាំង2 ក៏នឹងសហការគ្នាធ្វើវិសោធនកម្មអនុក្រឹត្យស្តីពីការគ្រប់គ្រងចិញ្ចើមផ្លូវនៅតាមបណ្តោយផ្លូវជាតិ និងផ្លូវដែក និងរៀបចំផែនការមេ ដើម្បីអភិវឌ្ឍហេដ្ឋារចនាសម្ព័ន្ធផ្លូវថ្នល់ឱ្យកាន់តែប្រសើរឡើង ក្នុងគោលបំណងលើកកម្ពស់ការដឹកជញ្ជូន និងការថែទាំផ្លូវថ្នល់។

ដើម្បីរក្សាគុណភាពផ្លូវថ្នល់ឱ្យប្រើប្រាស់បានយូរ ក្រសួងសាធារណការ និងដឹកជញ្ជូនបានលើកទឹកចិត្តឱ្យអ្នករកស៊ីដឹកទំនិញទាំងអស់ត្រូវគោរពច្បាប់ ពិសេសកុំផ្ទុកទំនិញលើសពីអ្វីដែលរដ្ឋបានកំណត់ បើមិនដូច្នេះទេ ក្រសួងនឹងមិនលើកលែងឡើយ ហើយនឹងត្រូវផាកពិន័យទៅតាមច្បាប់កំណត់ជាធរមាន។ នេះបើតាម រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងកាលពីថ្ងៃទី21 ខែកុម្ភៈកន្លងទៅ។

ឯកឧត្តម ស៊ុន ចាន់ថុល ទេសរដ្ឋមន្ត្រីបានមានប្រសាសន៍ថា៖“គ្រប់រថយន្ដដឹកទំនិញទាំងអស់ត្រូវផ្ដល់ការអនុគ្រោះឱ្យផ្ទុកទំនិញលើសទម្ងន់ត្រឹមតែ 5%នៃទម្ងន់ដែលច្បាប់បានកំណត់ប៉ុណ្ណោះ ដើម្បីសម្រួលដល់ការធ្វើអាជីវកម្មរបស់ប្រជាពលរដ្ឋ ប៉ុន្តែក្រសួងមិនអនុញ្ញាតឱ្យដឹកលើសទម្ងន់ច្រើនទេ បើលើសកំណត់ ក្រសួងនឹងមិនលើកលែងឡើយ”។

ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន

ឯកឧត្តមបានបញ្ជាក់ថា៖“ក្នុង 1ឆ្នាំៗ ជាមធ្យមក្រសួងសាធារណការ និងដឹកជញ្ជូនត្រូវចំណាយថវិកាជាតិប្រមាណ 200លានដុល្លារលើការងារជួសជុលផ្លូវ។ បើសិនជាយើងអាចកាត់បន្ថយបាននូវការដឹកជញ្ជូនលើសទម្ងន់ដែលបណ្តាលឱ្យខូចផ្លូវនោះនឹងធ្វើឱ្យយើងអាចនៅសល់ថវិកាប្រមាណ 200លានដុល្លារក្នុង 1ឆ្នាំៗ ដើម្បីយកទៅសាងសង់សាលារៀន និងយកទៅធ្វើផ្លូវបានច្រើនថែមទៀតផង”។

យោងតាមរបាយការណ៍របស់ក្រសួងអភិវឌ្ឍន៍ជនបទ បានឱ្យដឹង ថាគិតត្រឹមឆ្នាំកន្លងទៅព្រះរាជាណាចក្រមានផ្លូវជនបទសរុបប្រវែង 46,150គីឡូម៉ែត្រ។ ក្នុងនោះមានចម្ងាយ 2,400 គីឡូម៉ែត្រជាផ្លូវក្រាលបេតុង និងកៅស៊ូ ស្មើនឹង 3.5%។

ឯកឧត្តម ចាន់ ដារ៉ុង រដ្ឋលេខាធិការក្រសួងអភិវឌ្ឍន៍ជនបទបានប្រាប់កាសែតឡារ៉ែនពាណិជ្ជថា៖“អ្វីដែលជាទិសដៅរបស់ក្រសួងសម្រាប់ការអនុវត្តនៅឆ្នាំ2020 នេះ គឺចំណុចទាំង15 ដែលក្រសួងបានលើកឡើង ប៉ុន្តែប្រសិនបើការអនុវត្តមានឧបសគ្គ ឬបញ្ហារាំងស្ទះយ៉ាងណានោះក្រសួងនឹងដោះស្រាយជាដំណាក់ៗ ដើម្បីឱ្យការអនុវត្តនោះបានបន្តទៅមុខ”។

ឯកឧត្តមក៏បានឱ្យដឹងដែរថា ចំពោះការដែលក្រសួងអភិវឌ្ឍន៍ជនបទ និងក្រសួងសាធារណការ និងដឹកជញ្ជូនបានធ្វើកិច្ចការដូចគ្នា(ធ្វើផ្លូវ) តែការទទួលខុសត្រូវ គឺក្រសួងសាធារណការទទួលការងារផ្លូវជាតិ ផ្លូវក្នុងទីរួមខេត្ត ផ្លូវល្បឿនលឿន និងផ្លូវរថភ្លើង។ ឯក្រសួងអភិវឌ្ឍន៍ជនបទទទួលបន្ទុកផ្លូវនៅក្នុងជនបទ។ ក្នុងការធ្វើផ្លូវនៅតាមទីជនបទ ក្រសួងមានថវិកាតិចតួច តែតម្រូវការរបស់យើងមានច្រើន ដូច្នេះត្រូវធ្វើផ្លូវណាដែលអាទិភាពជាមុន ពោលគឺ ត្រូវមើលផ្លូវណាដែលចាំបាច់ជាងគេសម្រាប់ឆ្នាំនេះ បន្ទាប់មកយើងនឹងជ្រើសយកផ្លូវណាសម្រាប់ជាជំហានបន្ត និងឆ្នាំបន្ទាប់។

ឯកឧត្តម ចាន់ ដារ៉ុង ក៏បានបញ្ជាក់ថា៖“នេះក៏ដោយសារតែថវិកាយើងមិនគ្រប់គ្រាន់ ព្រោះបើយើងមានថវិកាច្រើនក្នុងការកសាងផ្លូវនោះ វាគ្មានបញ្ហាអ្វីទេ យើងនឹងដោះតែម្តងឱ្យហើយ។ ហេតុនេះទើបយើងបានលើកឡើងនៅចំណុចទី14 ស្តីពីកិច្ចសហប្រតិបត្តិការល្អជាមួយអង្គការដៃគូ វិស័យឯកជន និងបណ្តាប្រទេសជាមិត្តនានា ដើម្បីកៀរគរប្រភពធនធានហិរញ្ញវត្ថុ បច្ចេកទេស និងបច្ចេកវិទ្យាថ្មីៗ សម្រាប់ទ្រទ្រង់វិស័យអភិវឌ្ឍន៍ជនបទឱ្យមានការរីកចម្រើន”។

ឯកឧត្តមរដ្ឋលេខាក៏បានបញ្ជាក់បន្ថែមដែរថា៖“…ប៉ុន្តែគ្រប់បណ្តាប្រទេសនៅលើពិភពលោកនេះ មិនដែលមានប្រទេសណាដោះបញ្ហាតែម្តងអស់ទេ គឺយើងដោះជាដំណាក់ៗ និងដោះជាអាទិភាពលើអាទិភាព។ ក្រសួងនឹងបន្តជំរុញការអភិវឌ្ឍផ្លូវជនបទ ដើម្បីឆ្លើយតបនឹងតម្រូវការរបស់ប្រជាពលរដ្ឋជនបទឱ្យស្របតាមកំណើនសេដ្ឋកិច្ចជាតិ”៕

February 27, 2020

កម្ពុជាបន្តពង្រឹង ការគ្រប់គ្រងម៉ាក្រូសេដ្ឋកិច្ច និងថវិកាឆ្នាំ2020 ខណៈការកសាងផ្លូវថ្នល់ជំរុញការភ្ជាប់ប៉ូលសេដ្ឋកិច្ច

ការគ្រប់គ្រងម៉ាក្រូសេដ្ឋកិច្ច និងថវិកា ឆ្នាំ2020 ក៏ដូចជាដើម្បីបង្ហាញអំពីតម្លាភាពនៃការប្រើប្រាស់ និងបែងចែកធនធានសាធារណៈដែលទទួលបានពីកំណើន ព្រមទាំងដើម្បីធានាឱ្យមានការចូលរួមមតិពីគ្រប់តួអង្គពាក់ព័ន្ធ និងសាធារណជនទូទៅ ក្នុងការតម្រង់ការប្រើប្រាស់ធនធានថវិកាឱ្យកាន់-តែមានប្រសិទ្ធភាពខ្ពស់ នេះគឺជាការងារដ៏សំខាន់
ដែលរាជរដ្ឋភិបាលកម្ពុជាកំពុងបន្តពង្រឹង។

វេទិកាសាធារណៈស្តីពីការគ្រប់គ្រងម៉ាក្រូសេដ្ឋកិច្ច និងថវិកាឆ្នាំ2020 បានប្រព្រឹត្តទៅកាលពីចុងខែមករា ឆ្នាំ2020 កន្លងមកក្រោមអធិបតីភាព រដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ បញ្ជាក់ឱ្យដឹងថា ជារួម កំណើនសេដ្ឋកិច្ចពិភពលោកកំពុងមាននិន្នាការធ្លាក់ចុះដោយរួមទាំងតំបន់អាស៊ានផងដែរ។ ជាក់ស្តែង សេដ្ឋកិច្ចពិភពលោកឆ្នាំ2019 មានកំណើនប្រមាណ 2.9%ប៉ុណ្ណោះ ធៀបនឹងការព្យាករប្រមាណ 3.4%។

ឯកឧត្តម វង្សី វិស្សុត រដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុមានប្រសាសន៍ថា៖“ក្នុងបរិការណ៍នៃការថមថយកំណើនសេដ្ឋកិច្ចពិភពលោក និងតំបន់ខាងលើនេះ កំណើនសេដ្ឋកិច្ចកម្ពុជាឆ្នាំ2019 នៅតែមានភាពរឹងមាំ ក្នុងរង្វង់7% ទោះបីត្រូវប្រឈមនឹងហានិភ័យពីខាងក្រៅ ហើយសកម្មភាពសេដ្ឋកិច្ចនៅក្នុងរយៈពេល 2ខែចុងឆ្នាំមានការថមថយខ្លះ ពិសេសវិស័យទេសចរណ៍ និងសំណង់ក្តី។ ប្រការនេះអាចធ្វើឱ្យយើងចាត់ទុកថាកម្ពុជាជាប្រទេសដែលសម្រេចបាននូវកំណើនសេដ្ឋកិច្ចខ្ពស់ជាងគេក្នុងអាស៊ាន”។

ជាមួយគ្នានេះដែរ អត្រាអតិផរណា បន្តស្ថិតក្នុងកម្រិតទាប ហើយអត្រាប្តូរប្រាក់នៅតែបន្តមានស្ថិរភាពល្អ ក្នុងខណៈដែលអត្រាអ្នកអត់ការងារធ្វើតាមការអង្កេតរបស់ WB មានប្រមាណតែ 0.3%ប៉ុណ្ណោះ។

ការនាំចេញមានសម្ទុះកំណើនល្អ ដោយមានការកើនឡើងប្រមាណ 15% ហើយលំហូរទុនវិនិយោគផ្ទាល់ពីបរទេសមានកំណើនរហូតទៅដល់ 13% នៃផ.ស.ស ដែលធ្វើឱ្យតុល្យភាពនៃជញ្ជីងទូទាត់កាន់តែមានលក្ខណៈល្អប្រសើរជាទូទៅ។

ទុនបម្រុងអន្តរជាតិបានកើនឡើងរហូតដល់ប្រមាណជាង 17.4ប៊ីលានដុល្លារអាមេរិក ដែលអាចធានាបាននូវការនាំចូលរហូតទៅដល់ប្រមាណ 8ខែ។

ទន្ទឹមនឹងការសម្រេចបាននូវកំណើនសេដ្ឋកិច្ចខ្ពស់និងរឹងមាំ ហើយម៉ាក្រូសេដ្ឋកិច្ចមានស្ថិរភាពខាងលើនេះ កម្ពុជាក៏សម្រេចបាននូវលទ្ធផលល្អប្រសើរនៅក្នុងការគ្រប់គ្រងហិរញ្ញវត្ថុសាធារណៈផងដែរ។

ប្រការនេះ បានធ្វើឱ្យយើងសម្រេចបាននូវអតិរេកថវិកាចរន្តរហូតទៅដល់ជាង 8% នៃផ.ស.ស ធៀបនឹងការគ្រោងទុកប្រមាណតែ 2.81 នៃ ផ.ស.ស ប៉ុណ្ណោះ ដែលធ្វើឱ្យប្រាក់សន្សំរបស់រាជរដ្ឋាភិបាលបានកើនឡើងដល់ប្រមាណ 18% នៃ ផ.ស.ស សម្រាប់ពង្រីកលម្ហថវិកា និងធនធានថវិកាបម្រុងទុកសម្រាប់ត្រៀមទប់ទល់នឹងវិបត្តិ និងហានិភ័យផ្សេងៗជាយថាហេតុ។ នេះបើតាមឯកឧត្តម វង្សី វិស្សុត។

ឯកឧត្តម វង្សី វិស្សុត បានបន្តថា កំណើនសេដ្ឋកិច្ចកម្ពុជាក្នុងឆ្នាំ2020 នេះ នឹងនៅតែអាចសម្រេចក្នុងរង្វង់ 6%ទោះបីត្រូវប្រឈមការលំបាក និងហានិភ័យទាំងខាងក្នុង និងទាំងខាងក្រៅច្រើនជាងមុនក្តី ពិសេសករណីការរាលដាលនៃវីរុសកូរ៉ូណា នៅប្រទេសចិន ដែលជាដៃគូសេដ្ឋកិច្ចដ៏ធំរបស់កម្ពុជា។ ឯកឧត្តមបានគូសបញ្ជាក់ថា ការកំណត់កំណើនសេដ្ឋកិច្ចប្រមាណ 6,5% នៃ ផ.ស.ស ក្នុងច្បាប់ថវិកាឆ្នាំ2020 គឺបានរាប់បញ្ចូលករណីការដកប្រព័ន្ធអនុគ្រោះពាណិជ្ជកម្ម (EBA) ពីសហភាពអឺរ៉ុបរួចហើយ ព្រោះយើងដឹងថា វានឹងមកដល់គ្រាន់តែមុន ឬក្រោយប៉ុណ្ណោះ។

ស្របនឹងការបន្តពង្រឹងការគ្រប់គ្រងម៉ាក្រូសេដ្ឋកិច្ច និងថវិកា ឆ្នាំ2020 ការជំរុញ និងគម្រោងស្តារផ្លូវថ្នល់កម្ពុជា ក៏ត្រូវបានបន្តពង្រឹង តាមរយៈគម្រោងធ្វើឱ្យប្រសើរឡើងវិញកំណាត់ផ្លូវជាតិលេខ 2 និងផ្លូវជាតិលេខ22 ដែលមានប្រវែងសរុប 72.17គីឡូម៉ែត្រ។ គម្រោងនេះគ្រោងចំណាយថវិកាសរុបប្រមាណ 56.1លានដុល្លារអាមេរិក ជាហិរញ្ញប្បទានពីរដ្ឋាភិបាលសាធារណរដ្ឋកូរ៉េ រួមជាមួយថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ ការបោសសម្អាតមីន និងយុទ្ធភណ្ឌមិនទាន់ផ្ទុះ និងពន្ធអាករ។ គម្រោងនេះ ត្រូវសាងសង់ដោយប្រើប្រាស់រយៈពេល 30ខែ ចាប់ពីខែតុលា ឆ្នាំ2019 ដល់ខែមេសា ឆ្នាំ2022។

ឯកឧត្ដម ស៊ុន ចាន់ថុល ទេសរដ្ឋមន្ត្រីបានមានប្រសាសន៍ថា ដោយសារប្រទេសមានសុខសន្តិភាព ស្ថិរភាពនយោបាយបានធ្វើឱ្យកំណើនវិនិយោគិនបរទេសកាន់តែកើនឡើង កំណើនសេដ្ឋកិច្ចជាតិកាន់តែមាននិរន្តរភាព បណ្ដាលឱ្យមធ្យោបាយដឹកជញ្ជូនកាន់តែកើនឡើងយ៉ាងគំហុក ដែលចាំបាច់ក្នុងការធ្វើទំនើបកម្ម និងសមាហរណកម្មហេដ្ឋារចនាសម្ព័ន្ធទាំងក្នុង និងក្រៅប្រទេស។

ឯកឧត្ដមទេសរដ្ឋមន្ត្រី បានគូសបញ្ជាក់ថា បន្ទាប់ពីផ្លូវនេះបានសាងសង់រួចជាស្ថាពរ វានឹងក្លាយជាប្រព័ន្ធភ័ស្តុភារកម្មរបស់កម្ពុជា សំដៅសម្រួលដល់ការដឹកជញ្ជូនផលិតផល ដំណាំកសិផល និងកសិឧស្សាហកម្មរបស់ក្រុមហ៊ុនវិនិយោគ និងបងប្អូនប្រជាពលរដ្ឋមកពីគ្រប់តំបន់នៅទូទាំងប្រទេសទៅកាន់ទីផ្សារក្នុងស្រុក និងទីផ្សារអន្តរជាតិ ជាពិសេសតាមរយៈច្រកទ្វារព្រំដែនអន្តរជាតិកម្ពុជា-វៀតណាម (ភ្នំដិន-ទិញបៀន) ប្រកបដោយភាពងាយស្រួល ឆាប់រហ័ស និងចំណាយតិច ហើយវាក៏អាចជួយកាត់បន្ថយគ្រោះថ្នាក់ចរាចរណ៍តាមដងផ្លូវ ការកកស្ទះចរាចរណ៍ និងជួយសម្រួលដល់ការធ្វើចរាចរណ៍តាមផ្លូវជាតិលេខ3 មួយកម្រិតផងដែរ។

ឯកឧត្ដមស៊ុន ចាន់ថុល ក៏បានមានប្រសាសន៍ដែរថា៖ “បន្ទាប់ពីផ្លូវនេះបានសាងសង់រួចជាស្ថាពរ វានឹងជួយលើកកម្ពស់ប្រសិទ្ធភាព នៃការធ្វើដំណើរ និងគឺជាប៉ូលសេដ្ឋកិច្ច និងទេសចរណ៍ ដ៏មានសក្ដានុពលរបស់កម្ពុជា នាពេលបច្ចុប្បន្ន និងទៅអនាគត”៕

February 27, 2020

អ្នកជំនាញ៖ វិស័យអចលនទ្រព្យពិតជារីកចម្រើនខ្លាំង មែន ក្នុង1ទសវត្សរ៍កន្លងមក

អ្នកជំនាញក្នុងវិស័យអចលនទ្រព្យបានឱ្យដឹងថា ការវិនិយោគលើអចលនទ្រព្យនៅក្នុងប្រទេសកម្ពុជា ក្នុងរយៈពេល 10ឆ្នាំចុងក្រោយនេះ គឺមានការកើនឡើងខ្ពស់ ដែលការកើនឡើងនេះ គឺដោយសារតែការចាប់ផ្តើមហូរចូលមកយ៉ាងគំហុកនូវចំនួនអ្នកវិនិយោគបរទេសក្នុងវិស័យមួយនេះ។

បើតាមការកត់សម្គាល់អំពីសក្តានុពល និងភាពទាក់ទាញសំខាន់ៗនៃការវិនិយោគលើវិស័យអចលនទ្រព្យនៅកម្ពុជា គេសង្កេតឃើញមានចំណុចមួយចំនួនដូចជា៖ ទី1-ប្រទេសកម្ពុជាស្ថិតក្នុងចំណោមជម្រើសដ៏ល្អបំផុត សម្រាប់វិនិយោគលើវិស័យអចលនទ្រព្យ ដោយផ្អែកលើកំណើនសេដ្ឋកិច្ចដ៏លឿន ធ្វើឱ្យប្រាក់ចំណូលប្រជាពលរដ្ឋកើនឡើងខ្ពស់ គួបផ្សំនឹងស្ថិរភាពនយោបាយដ៏រឹងមាំ ក៏ដូចជាក្របខ័ណ្ឌច្បាប់ច្បាស់លាស់ក្នុងការគ្រប់គ្រងវិស័យអចលនទ្រព្យ និងសំណង់។

ទី2- ការវិនិយោគលើអចលនទ្រព្យក្នុងរយៈពេល 10ឆ្នាំចុងក្រោយនេះ គឺមានការកើនឡើងខ្ពស់។

ទី3- ការរីកចម្រើននៃវិស័យពាណិជ្ជកម្ម ឧស្សាហកម្ម និងទេសចរណ៍ បានធ្វើឱ្យតម្រូវការអចលនទ្រព្យសម្រាប់ការស្នាក់នៅ និងធ្វើពាណិជ្ជកម្មកាន់តែកើនឡើងខ្ពស់ឡើងៗ ធ្វើឱ្យអ្នកវិនិយោគមានឱកាសចំណេញច្រើន។ ជាក់ស្តែងប្រាក់ចំណូលបានមកពីការជួលអចលនទ្រព្យជាមធ្យមគឺ 5.33% ក្នុង 1ឆ្នាំដែលឈរលើកម្រិតខ្ពស់បំផុតលំដាប់ទី3 នៅក្នុង
ទ្វីបអាស៊ី។

ទី4- ក្នុងចំណោមបណ្តាប្រទេសអាស៊ាន តម្លៃអចលនទ្រព្យនៅប្រទេសកម្ពុជា ស្ថិតនៅក្នុងចំណោមប្រទេសដែលមានតម្លៃនៅទាបសមរម្យបំផុត ដែលនេះជាអំណោយផលល្អដល់ការទិញ-លក់ (តម្លៃនៅជាយរាជធានីភ្នំពេញអាចមានតម្លៃចាប់ ពី100USD/m2 ហើយនៅកណ្តាលរាជធានីភ្នំពេញ អាចមានតម្លៃខ្ពស់រហូតដល់ 5,000USD/m2)។

លោក សន សៀប អគ្គនាយកក្រុមហ៊ុន Key Real Estate បានថ្លែងប្រាប់ឡារ៉ែនពាណិជ្ជ នៅក្នុងបទសម្ភាសមួយថា៖“វិស័យអចលនទ្រព្យ អាចបែងចែកជា 2ប្រភេទ៖ទី1-ទីផ្សារអចលនទ្រព្យ និងទី2-ការអនុវត្តគម្រោងអចលនទ្រព្យ។ ចំពោះគម្រោងអចលនទ្រព្យ យើងមើលឃើញថាក្នុងរយៈពេល 10ឆ្នាំកន្លងមក មានការកើនឡើងខ្ពស់មែនទែន តាំងពីយើងមិនទាន់មានអី មានតែអគារ 1-2 រហូតដល់ឥឡូវមានអគារខ្ពស់ច្រូងច្រាង”។

លោកបានបន្តថា ក្នុងទីក្រុង ខ្ញុំមិនដឹងថា កើនក្នុងចំនួនប៉ុន្មានទេ តែយើងមើលឃើញថាច្រើន នេះបើយើងនិយាយពីទឹកប្រាក់នៃការវិនិយោគ និងនិយាយពីទំហំនៃការអភិវឌ្ឍ គិតជាម៉ែត្រការ៉េ និងមួយទៀតយើងនិយាយពីតម្លៃអចលនទ្រព្យឡើងថ្លៃ គឺយើងនិយាយពាក់ព័ន្ធនឹងដី។

លោកអគ្គនាយកក្រុមហ៊ុន Key Real Estate បានបញ្ជាក់ថា៖“ដី តាមខ្ញុំសង្កេតជាក់ស្តែង ដីដែលនៅក្នុងក្រុង ត្រូវបានបែងចែកជា 2ប្រភេទ។ ដីដែលបានអភិវឌ្ឍន៍រួច នៅក្នុងនោះមានខណ្ឌ 5 រួមមាន ខណ្ឌចំការមន ខណ្ឌដូនពេញ ខណ្ឌ7មករា ខណ្ឌបឹងកេងកង ហើយនិងខណ្ឌទួលគោក។ ជារួម ខណ្ឌដែលអភិវឌ្ឍន៍រួច មានការឡើងថ្លៃជាមធ្យមពី 5 -10% ប៉ុណ្ណោះ។ ប៉ុន្តែ ខណ្ឌដែលនៅក្រៅក្រុង ដូចជាខណ្ឌសែនសុខ ជ្រោយចង្វារ ច្បារអំពៅ ឬស្សីកែវ ពោធិ៍-សែនជ័យ ដង្កោ មានជ័យ ខណ្ឌទាំងអស់នេះបូកគ្នាទៅ ឡើងជាមធ្យមពី 10 ទៅ15 និងពី 15 ទៅ 20% ដោយខណ្ឌខ្លះឡើងថ្លៃច្រើន។ ពី 1ឆ្នាំ ទៅ 1ឆ្នាំ វាប្រែប្រួល គិតជាមធ្យមប្រហាក់ប្រហែលប៉ុណ្ណឹង ។

លោក សន សៀប ក៏បានបញ្ជាក់ដែរថា៖“បើតាមខ្ញុំចាំ នៅឆ្នាំ2005 ខ្ញុំសង្កេតឃើញថា ដីនៅតំបន់បឹងកេងកងក្នុង 1ម៉ែត្រការ៉េថ្លៃ 300ដុល្លារ ហើយមកដល់ឆ្នាំ2015 ដីនៅទីនោះឡើងថ្លៃ 1ម៉ែត្រការ៉េថ្លៃ1,500ដុល្លារ។ ដូច្នេះក្នុងរយៈពេល 10ឆ្នាំ វាឡើងថ្លៃ 1ជា5 ហើយមកដល់បច្ចុប្បន្ន វាឡើងកាន់តែខ្ពស់ទៅទៀត ព្រោះដោយសារតម្រូវការអភិវឌ្ឍន៍ច្រើន ក្នុងតំបន់នោះ”។

“ដីនៅក្នុងទីក្រុងភ្នំពេញដែលគេសម្លឹងឃើញថា មានតម្លៃថ្លៃ មាន 3ទីតាំង មានតំបន់ធនាគារលើផ្លូវក្រមួនស មានតម្លៃចន្លោះពី 7,000 ទៅ 10,000ដុល្លារ ក្នុង 1ម៉ែត្រការ៉េ។ បឹងកេងកងមានតម្លៃ ដល់ទៅប្រមាណ 6,000 ទៅ 7,000ដុល្លារ ក្នុង 1ម៉ែត្រការ៉េ និងនៅកោះពេជ្រ ម្តុំអុីអនមានតម្លៃ 4,000-5,000ដុល្លារ ក្នុង1ម៉ែត្រការ៉េ។ ឯដីនៅជាយក្រុង វាឡើងច្រើនជាង និងនៅក្នុងក្រុងវាឡើងតិចជាង។ ដីនៅក្នុងក្រុងឡើងតិចជាង ឧទាហរណ៍តម្លៃដី 1,200 ហើយឡើង 1,300ដុល្លារ បើគិតភាគរយវាតិចទេ គឺឡើង100ដុល្លារ តែបើដីនៅជាយក្រុងវិញ វាឡើងពី 50 ទៅ 100ដុល្លារ គឺឡើងតែ 50ដុល្លារទេ តែវាគុណនឹង2។ ដូច្នេះភាគរយ ថ្លៃដីនៅក្រៅក្រុងឡើងខ្ពស់ជាង”។ នេះបើតាមលោក សន សៀប បានបញ្ជាក់។

លោក សន សៀប បានឱ្យដឹងថា អ្នកវិនិយោគតែងតែសួរថា តើបច្ចុប្បន្នអចលនទ្រព្យគួរវិនិយោគទៅលើតំបន់មួយណា ឬប្រភេទមួយណា? សម្រាប់ខ្មែរយើង ដីនៅជាយៗក្រុង នៅតែល្អ សម្រាប់ការវិនិយោគហើយនិងដីនៅតាមគម្រោងអភិវឌ្ឍន៍ធំផ្សេងៗនៅតាមបណ្តាខេត្ត ឬនៅតាមតំបន់ឆ្នេរ។

អគារខុនដូ និងផ្សារទំនើបថ្មីកំពុងត្រូវបានអភិវឌ្ឍក្នុងរាជធានីភ្នំពេញនាពេលបច្ចុប្បន្ន

លោកបានឱ្យដឹងទៀតថា ការចូលរួមចំណែកក្នុងការអភិវឌ្ឍវិស័យអចលនទ្រព្យ និងសំណង់របស់វិស័យឯកជន គឺជាការរួមចំណែកមួយក្នុងចក្ខុវិស័យ នៃយុទ្ធសាស្ត្រតម្រង់ទិសអភិវឌ្ឍន៍របស់រាជធានីភ្នំពេញ ឆ្នាំ2035 ដែលទទួលបានការគាំទ្រពីរាជរដ្ឋាភិបាល សំដៅលើការអភិវឌ្ឍសង្គម សេដ្ឋកិច្ចឱ្យមានប្រសិទ្ធភាព និងនិរន្តរភាព។

លោក សន សៀប អគ្គនាយកក្រុមហ៊ុន Key Real Estate បានមានប្រសាសន៍ទាក់ទងនឹងការវិវឌ្ឍចុងក្រោយនៃវិស័យអចលនទ្រព្យថា ទោះបីអចលនទ្រព្យកម្ពុជាកំពុងទទួលបានកំណើនខ្លាំងក៏ដោយ ក៏ឧស្សាហកម្មនេះទំនងជានឹងរងឥទ្ធិពលដោយពាក់ព័ន្ធទៅនឹងមេរោគ Coronavirus ថ្មីមកពីទីក្រុង Wuhan នៅប្រទេសចិន ដែលខណៈនេះ លោកក៏ទទួលស្គាល់ពីផលប៉ះពាល់លើឧស្សាហកម្មនេះ ដោយសារការវិនិយោគផ្ទាល់ពីបរទេសនៅកម្ពុជាត្រូវបានចូលរួមដោយវិនិយោគិនចិន ជាពិសេសក្នុងវិស័យសំណង់ និងអចលនទ្រព្យនេះតែម្ដង។

លោក សន សៀប បានបញ្ជាក់ថា៖“វាអាចនឹងប៉ះពាល់ដល់ទីផ្សារអចលនទ្រព្យ ប៉ុន្តែយើងបានកត់សម្គាល់ថា ផលប៉ះពាល់នេះនឹងមិនមានរយៈពេលយូរទេ។ ការផ្ទុះឡើងនេះ គឺជាកត្តាខាងក្រៅ ហើយខ្ញុំជឿជាក់ថា ស្ថានភាពនឹងឆាប់ជាសះស្បើយ និងស្ងប់ស្ងាត់ទៅវិញ។ ពិតណាស់ក្នុងអំឡុងពេលនេះ វានឹងមានផលប៉ះពាល់តិចតួចលើផ្នែកជួលនៃទីផ្សារអចលនទ្រព្យ។ តែមិនគួរមានការព្រួយបារម្ភច្រើនពេកអំពីវាទេ។ ខ្ញុំគិតថា គ្រាន់តែជាផលប៉ះពាល់មួយរយៈពេលខ្លីប៉ុណ្ណោះ”៕

February 27, 2020

ស្រូវជាដំណាំចម្បងដែលបានរួមចំណែកប្រមាណ 15%នៃតម្លៃបន្ថែម ក្នុងវិស័យកសិកម្មកម្ពុជា

ក្រសួងកសិកម្ម រុក្ខាប្រមាញ់ និងនេសាទ បានចាត់ទុកថា ផលិតកម្មស្រូវ គឺជាផ្នែកមួយដ៏សំខាន់ក្នុងវិស័យកសិកម្ម ដែលកន្លងមក ក្នុងយុទ្ធសាស្ត្រចតុកោណ របស់រាជរដ្ឋាភិបាលកម្ពុជា ក៏បានជំរុញការអភិវឌ្ឍដំណាំស្រូវ ឱ្យសម្រេចបានជោគជ័យតាមផែនការអភិវឌ្ឍន៍ផលិតកម្មស្រូវ នៅកម្ពុជាឆ្នាំ2011-2020ផងដែរ។

ថ្លែងក្នុងពិធីបុណ្យដារលាន នាខេត្ដតាកែវ កាលពីពេលថ្មីនេះ ឯកឧត្ដម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានលើកឡើងថា វិស័យកសិកម្ម បាននិងកំពុងដើរតួនាទីយ៉ាងសំខាន់ក្នុងការចូលរួមទ្រទ្រង់សេដ្ឋកិច្ចជាតិ សេដ្ឋកិច្ចគ្រួសារ ធានាសន្តិសុខស្បៀង អាហារូបត្ថម្ភ គាំទ្រដល់ការនាំចេញ និងជាពិសេសដើម្បីបង្កើនផលិតភាពផលិតកម្មក្នុងស្រុក ពិពិធភាវូបនីយកម្ម និងពាណិជ្ជវូបនីយកម្មកសិកម្ម សំដៅលើកកម្ពស់ផលិតភាពផលិតកម្ម ធានាបានទាំងបរិមាណ និងគុណភាពសមស្របតាមការប្រែប្រួលអាកាសធាតុ បរិយាប័ន្ន និងនវានុវត្តន៍។

ជាមួយគ្នានោះដែរ ឯកឧត្ដមបានថ្លែងថា ស្រូវគឺជាដំណាំយុទ្ធសាស្ត្រមួយប្រភេទ ដែលបានផ្តល់ប្រយោជន៍ជាច្រើន ព្រមទាំងបានចូលរួមលើកកម្ពស់សេដ្ឋកិច្ចជាតិ សេដ្ឋកិច្ចគ្រួសារ កាត់បន្ថយភាពក្រីក្រ បង្កើតការងារ កាត់បន្ថយការធ្វើចំណាកស្រុកជាដើម។ ជាក់ស្តែង ឯកឧត្ដមមានប្រសាសន៍ថាស្រូវ ជាដំណាំចម្បងដែលបានរួមចំណែកប្រមាណ15% នៃតម្លៃបន្ថែមក្នុងវិស័យកសិកម្ម ជាក់ស្តែងផ្ទៃដីដាំដុះសម្រេចបាន នៅក្នុងឆ្នាំ2018 មានជាង 3.3លានហិកតា ជាមួយទិន្នផល 10.8លានតោន។

បន្ថែមពីនេះ ឯកឧត្ដមបានឱ្យដឹងបន្តថា បើយោងតាមការប៉ាន់ស្មានជំហានដំបូងកាលពីឆ្នាំ2019 ផលស្រូវសម្រេចបានប្រមាណ 10.88លានតោន ហើយនឹងអាចនៅសល់ស្រូវសរុបប្រមាណជាង 5លានតោន ឬអង្ករចំនួនជាង 3លានតោនទៀត។

នៅក្នុងឱកាសនោះដែរ ឯកឧត្ដមបានឱ្យដឹងទៀតថា ស្ថិតក្នុងបរិបទនៃកំណើនសេដ្ឋកិច្ច កំណើនប្រជាជន និងយោងលើសេចក្តីត្រូវការជាមូលដ្ឋានក្នុងការលើកកម្ពស់កម្រិតជីវភាពរបស់ពលរដ្ឋកាន់តែកើនឡើងជាលំដាប់ រាជរដ្ឋាភិបាលបានដាក់ចេញនូវកម្មវិធីគោលនយោបាយ និងយុទ្ធសាស្ត្រចតុកោណដំណាក់កាលទី4 ក្នុងទិសដៅពិតប្រាកដមួយ គឺដើម្បីជំរុញ និងពន្លឿនការអភិវឌ្ឍន៍លើគ្រប់វិស័យជាជំហានៗច្បាស់លាស់ សមស្របតាមពេលវេលា និងធនធានរបស់ជាតិ ធ្វើយ៉ាងណាឈានឆ្ពោះទៅសម្រេចគោលដៅនៃឆ្នាំ2030 និង2050។

យ៉ាងណាក្ដី ឯកឧត្ដមក៏បានបញ្ជាក់ដែរថា ក្រសួងកសិកម្ម តែងបានយកចិត្តទុកដាក់ខ្ពស់ ក្នុងការអភិវឌ្ឍផលិតកម្មស្រូវ ឱ្យកាន់តែល្អប្រសើរឡើង និងមានភាពប្រកួតប្រជែង តាមរយៈការដាក់បញ្ចូលផែនការអភិវឌ្ឍន៍ផលិតកម្មស្រូវ ទៅក្នុងផែនការយុទ្ធសាស្ត្រអភិវឌ្ឍន៍ វិស័យកសិកម្ម2019-2023 យុទ្ធសាស្ត្រអភិវឌ្ឍន៍ជាតិ2019 -2023 និងបន្តជំរុញការអនុវត្តផែនការ យុទ្ធសាស្ត្រអភិវឌ្ឍន៍ស្រូវឆ្ពោះទៅឆ្នាំ2030 ឱ្យបានជោគជ័យតាមគោលដៅគ្រោងទុក។

ឯកឧត្ដមរដ្ឋមន្ត្រីក៏បានអះអាងបន្ថែមទៀតថា ដើម្បីសម្រេចឱ្យបាននូវផលិតកម្មស្រូវបន្ថែមទៀតក្រសួងបានណែនាំឱ្យអគ្គនាយដ្ឋាន កសិកម្ម មន្ទីរកសិកម្មខេត្ត និងតួអង្គពាក់ព័ន្ធផ្សេងៗទៀតត្រូវយកចិត្តទុកដាក់ថែមទៀតលើការអនុវត្តបច្ចេកទេសពង្រឹង និងពង្រីកការងារផ្សព្វផ្សាយ និងអនុវត្តច្បាប់លិខិតបទដ្ឋានគតិយុត្ត ការងារស្រាវជ្រាវ និងបណ្តុះបណ្តាល ពង្រឹងការងារដឹកនាំ និងគ្រប់គ្រងសហគមន៍កសិកម្ម ការអនុវត្តផលិតកម្មកសិកម្មតាមកិច្ចសន្យាជំរុញ និងលើកទឹកចិត្តការចុះបញ្ជីកសិដ្ឋានគ្រប់ប្រភេទ លើកកម្ពស់ប្រសិទ្ធភាពចំពោះការផ្តល់សេវាសាធារណ: បន្ដពង្រឹង និងពង្រីកកិច្ចសហការល្អជាមួយអាជ្ញាធរមូលដ្ឋាន ស្ថាប័នជំនាញពាក់ព័ន្ធ និងដៃគូអភិវឌ្ឍន៍ និងវិស័យឯកជនឱ្យកាន់តែមានប្រសិទ្ធភាព។

គួរបញ្ជាក់ផងដែរថា យោងតាមរបាយការណ៍របស់សហព័ន្ធស្រូវអង្ករកម្ពុជា បានឱ្យដឹងថា នៅខែមករា ឆ្នាំ2020 កម្ពុជាបាននាំចេញអង្ករចំនួន 50,450តោន ថយចុះ 15.39ភាគរយ បើធៀបនឹងរយៈពេលដូចគ្នាក្នុងឆ្នាំ2019។ មូលហេតុនៃការថយចុះនេះបណ្តាលមកពីការយកពន្ធអង្ករកម្ពុជា នាំចូលនៅសហគមន៍អឺរ៉ុបនៅឆ្នាំដំបូង ដោយក្នុងអង្ករ 1តោនចំនួន 175អឺរ៉ូ គិតចាប់ពីថ្ងៃទី19 ខែមករា ឆ្នាំ2019មក។

សហព័ន្ធស្រូវអង្ករកម្ពុជា បានឱ្យដឹងបន្តថា ទឹកប្រាក់សរុបពីបានការនាំអង្ករចេញពីកម្ពុជា ទៅកាន់ទីផ្សារអន្តរជាតិ នៅក្នុងខែមករា ឆ្នាំ2020 មានប្រមាណជា 39លានដុល្លារអាមេរិក។

ចំណែកឯទីផ្សារអាស៊ានវិញ ឃើញថា មានការប្រែប្រួលខ្លះ អាស្រ័យលើប្រទេសជិតខាង ដូចជាប្រទេសថៃ និងវៀតណាម។ ក្នុងនោះ សហព័ន្ធស្រូវអង្ករ បានបញ្ជាក់បន្ថែមទៀតថា ទីផ្សារចម្បងរបស់កម្ពុជា គឺប្រទេសម៉ាឡេស៊ី និងប្រ៊ុយណេ ដែលមិនមានការប្រែប្រួលខ្លាំងនោះទេ គឺនៅរក្សាបានស្ថានភាពល្អ មានលំនឹងនៅឡើយ។ រីឯទីផ្សារផ្សេងៗទៀត បានកើនឡើងប្រមាណ 40% ក្នុងនោះប្រទេសហ្គាបុង នៅតែបន្តនាំមុខដដែល ស្របពេលជាមួយគ្នានោះ ប្រទសអូស្ត្រាលី ក៏បានបង្កើនល្បឿនក្នុងការនាំចូលអង្ករពីប្រទេសកម្ពុជា ដ៏គួរឱ្យកត់សម្គាល់ផងដែរ៕

February 27, 2020

សុជីវធម៌ សីលធម៌ និងគុណធម៌ ជាអ្វីដែលសង្គមជាតិមួយត្រូវតែមាន

សុជីវធម៌ សីលធម៌ និងគុណធម៌ ត្រូវបានសង្គមចាត់ទុកថាជាបណ្ដុំនៃគុណតម្លៃដែលមនុស្សម្នាក់មិនអាចខ្វះបានឡើយ គ្រាន់តែថា ធម៌ទាំង3 នេះ មានគុណតម្លៃផ្សេងៗពីគ្នាប៉ុណ្ណោះ។
សុជីវធម៌ គឺសំដៅលើកាយវិការ និងឥរិយាបថសមរម្យ និងពាក្យសម្ដីវាចាពីរោះ សុភាពរាបសា ដែលសង្គមទទួលស្គាល់ និងឱ្យតម្លៃ។ ជាឥរិយាបថ ដែលមើលទៅគាប់ភ្នែក និងពាក្យសម្តី ដែលស្តាប់ទៅមិនទើសត្រចៀក ដែលមនុស្សទូទៅក្នុងសង្គម ត្រូវតែនាំគ្នាប្រកាន់ខ្ជាប់ និងប្រព្រឹត្តជារៀងរាល់ថ្ងៃ នោះគឺជាសុជីវធម៌។

នៅពេល យុវជនម្នាក់ ជួបមនុស្សដែលមានអាយុច្រើនជាងខ្លួន ឬមានវ័យចំណាស់ចាស់ជាង ឬជាព្រឹទ្ធាចារ្យ ហើយយុវជននោះលើកដៃសំពះ លំឱនកាយ និងពោលពាក្យជម្រាបសួរ នេះគឺហៅថា សុជីវធម៌។

ចំណែក សីលធម៌ គឺសំដៅទៅលើទឹកចិត្ត និងចេតនានៃទង្វើ ជាជាងកាយវិការ ឥរិយាបថ និងពាក្យសម្តី។ សីលធម៌ គឺជាភាពត្រឹមត្រូវចរិតនិស្ស័យល្អៗ និងគំនិតល្អៗរបស់មនុស្ស ដែលប្រកាន់ខ្ជាប់ក្នុងចិត្ត ទោះជាមានអ្នកដទៃដឹង ឬមិនដឹងក៏ដោយ។ ការតាំងចិត្តថា មិនធ្វើអំពើអាក្រក់ ឬមិនប្រព្រឹត្តទង្វើមិនគួរគប្បីណាមួយ ឬមិនបង្កការក្ដៅក្រហាយ ឬការឈឺចាប់ដល់អ្នកដទៃ នោះគេហៅថាសីលធម៌។

ការមិនសម្លាប់ ការមិនបៀតបៀន ការមិនកុហក ការមិនប្រព្រឹត្តកាមគុណលើកូន ប្រពន្ធ និងប្តីរបស់អ្នកដទៃ គឺសុទ្ធសឹងតែជាសីលធម៌ទាំងអស់ ដែលក្នុងភាសាព្រះពុទ្ធសាសនា ហៅថាសីល។ ពេលខ្លះ សីលធម៌ ឬអសីលធម៌ ក៏អាចបង្ហាញចេញតាមរយៈកាយវិការ និងសម្ដីវាចាដែរ។

រីឯគុណធម៌វិញ គឺជាទឹកចិត្តអាណិតមេត្តា ដែលកើតមានចំពោះអ្នកដទៃ ហើយចង់ជួយអ្នកដទៃតាមរបៀប ឬមធ្យោបាយណាមួយដោយសុចរិតបរិសុទ្ធ។ គេអាចនិយាយបានថា ឱ្យតែនរណាម្នាក់ ឬសង្គមតូចណាមួយទទួលបានអ្វីមួយពីបុគ្គលណាម្នាក់ ឬក្រុមណាមួយនូវអំពើល្អ អំពើដែលមានប្រយោជន៍ ការអធ្យាស្រ័យ ការជួយយកអាសា ឬជួយសង្គ្រោះ ឬក៏ការលើកលែងទោសឱ្យនោះ នោះហើយគឺ គុណធម៌។

បើអ្នកមានទ្រព្យច្រើន ហើយលះបង់ទ្រព្យខ្លះ ដើម្បីជួយអ្នកក្រខ្សត់ នោះហើយ គុណធម៌។ បើអ្នកមានចំណេះដឹង ហើយចែករំលែកចំណេះដឹងទៅឱ្យអ្នកដទៃ ព្រោះចង់ឱ្យអ្នកដទៃ មានចំណេះដឹងដូចខ្លួនដែរនោះ ហ្នឹងហើយគុណធម៌។ ឃើញអ្នកដទៃមានទុក្ខសោក ហើយមានអ្នកទៅជួយរកមធ្យោបាយ ដើម្បីដោះស្រាយ ឬរំសាយទុក្ខសោកនោះ ហ្នឹងហើយដែលគេហៅថា គុណធម៌។ បុគ្គលណាម្នាក់ ធ្វើខុសចំពោះអ្នក ហើយអ្នកលើកលែងទោសគេ ហ្នឹងដែលហៅថា គុណធម៌។

ការមានក្តីសន្តោសប្រណី ការអត់ឱន និងមានចេតនាចង់ជួយអ្នកដទៃ គឺជាធាតុល្អខាងក្នុងចិត្តរបស់បុគ្គលដែលមានគុណធម៌។ ការមិនច្រណែន ការមិនគុំកួន ការមិនព្យាបាទ ការមិនធ្វើបាបអ្នកដទៃ ក៏ជាធាតុល្អខាងក្នុងរបស់បុគ្គលដែលមានគុណធម៌ដែរ។

សុជីវធម៌ មិនអាចកំណត់បានថា ជាមនុស្សល្អ ឬអាក្រក់បានឡើយ។ អ្នកខ្លះ មើលទៅដូចជាមានសុជីវធម៌ល្អដែរ ដូចជាបង្ហាញឥរិយាបថសុភាពរាបសា ទន់ភ្លន់ ចេះគួរសម ហើយត្រឹមត្រូវសម្បើមណាស់ ប៉ុន្តែបែរជាមានចិត្តច្រណែនឈ្នានីស និងរុកកួនរំខានអ្នកដទៃទៅវិញ ក៏មានដែរ។ សុជីវធម៌ គ្រាន់តែរូបភាព ឬជាទង្វើខាងក្រៅរបស់មនុស្សប៉ុណ្ណោះ មិនអាចកំណត់បានទាំងស្រុងថា មនុស្សនោះ ជាមនុស្សល្អ មានសីលធម៌ ឬគុណធម៌ឡើយ។ មានសុជីវធម៌ តែមិនមានសីលធម៌ និងខ្វះគុណធម៌ ក៏មិនទាន់គ្រប់គ្រាន់ដែរ។

ទាល់តែមានសីលធម៌ផង ទើបអាចកំណត់បានថា ជាមនុស្សល្អ។ សីលធម៌ មានតម្លៃខ្ពស់ជាងសុជីវធម៌។ អ្នកដែលមិនធ្វើអំពើអាក្រក់ដាក់អ្នកដទៃ គឺជាអ្នកដែលមានសីលធម៌ ឬហៅថាសីល។ ប៉ុន្តែ សីលធម៌ មិននិយាយដល់ការជួយអ្នកដទៃ ឬមិនជួយនោះទេ គឺនិយាយត្រឹមតែថា មិនធ្វើអំពើអាក្រក់ប៉ុណ្ណោះ។

ក្នុងចំណោមធម៌ទាំង3 គុណធម៌ ហាក់មានតម្លៃខ្ពស់ជាងគេ។ បុគ្គលណា ដែលមានគុណធម៌ តែងមានលក្ខណៈ 2យ៉ាង គឺទី1 តាំងចិត្តធ្វើទង្វើល្អត្រឹមត្រូវជានិច្ច ដោយមិនធ្វើអំពើទុច្ចរិតជាដាច់ខាត ហើយទី2 ផ្តល់ប្រយោជន៍ដល់អ្នកដទៃ។ បុគ្គលណា មិនធ្វើអាក្រក់ដាក់អ្នកដទៃ ចាត់ទុកថា មានសីលធម៌ ហើយបើចេះជួយអ្នកដទៃទៀតផងនោះ គឺនឹងឈានដល់កម្រិតមួយទៀត គឺគុណធម៌ហ្នឹងឯង៕

February 27, 2020

សហព័ន្ធបាល់ទាត់កម្ពុជាចាត់ទុកព្រឹត្តិការណ៍បាល់ទាត់ Tiger Street Football ជាព្រឹត្តិការណ៍រួមចំណែកផលិតធនធានកីឡាករបាល់ទាត់ក្នុងស្រុក

ភ្នំពេញ៖ លោក ឆាង ពិសិដ្ឋ មន្រ្តីសហព័ន្ធកីឡាបាល់ទាត់កម្ពុជា តំណាងឲ្យ ឯកឧត្តម សៅ សុខា ប្រធានសហព័ន្ធបាល់ទាត់កម្ពុជា បានថ្លែងបញ្ជាក់ នៅក្នុងពិធីបើកការប្រកួតបាល់ទាត់ Tiger Street Football 2020 នាមជ្ឈមណ្ឌលពិព័រណ៍កោះពេជ្រ នាព្រឹកថ្ងៃទី២៦ ខែកុម្ភៈ នេះថា ព្រឹត្តិការណ៍បាល់ទាត់ Tiger Street Football ដែលរៀបចំដោយក្រុមហ៊ុនស្រាបៀរ Tiger (CBL) ដំណើរការប្រកួតជារៀងរាល់ឆ្នាំ គឺជាប្រភពគៀងគរបាននូវកីឡាករបាល់ទាត់ឆ្នើមៗពីបណ្តាខេត្ត និងរាជធានី ដើម្បីជ្រើសរើសដល់ក្លឹប និងសហព័ន្ធបាល់ទាត់កម្ពុជាធ្វើការចម្រាញ់ជ្រើសរើសយកមកដុះខាត់សមត្ថភាពសម្រាប់ត្រៀមការប្រកួតថ្នាក់ជាតិ និងអន្តរជាតិលើវិស័យបាល់ទាត់ក្នុងសាល។

មន្រ្តីសហព័ន្ធបាល់ទាត់រូបនេះ អះអាងទៀតថា ព្រឹត្តិការណ៍បាល់ទាត់ដ៏អស្ចារ្យនេះ វាពុំត្រឹមតែទទួឡបានកីឡាករឆ្នើមៗសម្រាប់កម្ពុជាលើវិស័យបាល់ទាត់ក្នុងសាលសម្រាប់កម្ពុជាប៉ុណ្ណោះទេ ប៉ុន្តែវាក៏ជាព្រឹត្តិការណ៍បាល់ទាត់មួយដែលបានរួមចំណែកបំផុសយ៉ាងខ្លាំងដល់ផ្នត់គំនិតកីឡាករនៅទូទាំងប្រទេសឲ្យងាកមកចូលចិត្តបាល់ទាត់ នឹងលេងបាល់ទាត់ក្រោយទំនេរពីការសិក្សា ដើម្បីពង្រឹងសមត្ថភាពត្រៀមចូលរួមប្រជែងក្នុងព្រឹត្តិការណ៍ Tiger Street Football តំណាងស្រុក ខេត្តរបស់ខ្លួន។ ក្នុងនាម លោក តំណាងឲ្យថ្នាក់ដឹកនាំសហព័ន្ធបាល់ទាត់ សូមថ្លែងអំណរគុណយ៉ាងជ្រាលជ្រៅដល់ក្រុមហ៊ុនស្រាបៀរ Tiger (CBL) ដែលបានរៀប ចំព្រឹត្តិការណ៍បាល់ទាត់ដ៏អស្ចារ្យនេះនៅកម្ពុជា ដែលបានផ្តល់ឱកាសដល់កីឡាករនៅទូទាំងប្រទេសបានប្រកួតបញ្ចេញសមត្ថភាព ដើម្បីបោះជំហ៊ានក្លាយជាកីឡាករបាល់ទាត់អាជីពនៅកម្ពុជា។

ព្រឹត្តិការណ៍បាល់ទាត់ Tiger Street Football 2020 មណ្ឌលរាជធានីភ្នំពេញ ដែលជាមណ្ឌលទី៨នេះ សម្រាំងយកក្រុមខ្លាំងចំនួន១២ក្រុម ដើម្បីយកចូលរួមការប្រកួតវគ្គផ្តាច់ព្រ័ត្រធ្វើនៅថ្ងៃទី២៩ ខែកុម្ភៈ ដល់ថ្ងៃទី១ ខែមិនា ឆ្នាំ២០២០ ជាមួយក្រុមបាល់ទាត់ ខ្លាំងៗចំនួន៥២ក្រុម ដែលសម្រាំងចេញពី៧មណ្ឌលនៅតាមបណ្តាខេត្ត ដណ្តើមប្រាក់រង្វាន់១៥០០០ដុល្លារ។

សូមបញ្ជាក់ថា Tiger Street Football 2020 មណ្ឌលរាជធានីភ្នំពេញមានក្រុមចូលរួមប្រកួតសរុបចំនួន១១៥ក្រុម កើនឡើងប្រមាណជាង២០ក្រុម ខណៈឆ្នាំ២០១៩កន្លងទៅក្រុមចូលរួមមានតែជាង៨០ក្រុមប៉ុណ្ណោះ។ សូមចូលទៅកាន់ទំព័រហ្វេសប៊ុកផ្លូវការ របស់ស្រាបៀរថៃហ្គ័រ៖ www.facebook.com/TigerBeerKH.

ស្តែងចេញនូវការតាំងចិត្តដ៏មោះមុតរបស់អ្នក ជាមួយស្រាបៀរថៃហ្គ័រ។

ពិសាដោយការទទួលខុសត្រូវ៕

February 27, 2020

ប្រទេសបង់ក្លាដែស ថ្វាយព្រះមហាកិត្តិយសដល់ព្រះមហាវីរក្សត្រកម្ពុជា ដោយដាក់ឈ្មោះវិថីមួយនៅក្នុងទីក្រុងដាក្កា

វិថីមួយដែលមានឈ្មោះថា «Park Road» ស្ថិតនៅតំបន់ការទូត Baridhara ក្នុងទីក្រុងដាក្កា ប្រទេសបង់ក្លាដែស ត្រូវបានរដ្ឋាភិបាលនៃប្រទេសនេះប្តូរទៅជា «King Norodom Sihanouk Road» ហើយត្រូវបានសម្ពោធជាផ្លូវការកាលពីថ្ងៃពុធ ទី26 ខែកុម្ភៈ ឆ្នាំ2020។ នេះបើតាមការផ្សាយរបស់សារព័ត៌មាន Dhaka Tribune។

វិថី «King Norodom Sihanouk Road» ដែលដាក់តាមព្រះនាមរបស់ព្រះមហាវីរក្សត្រ សម្តេចព្រះបាទ នរោត្តម សីហនុ ព្រះបរមរតនកោដ្ឋនេះ គឺជាការឧទ្ទិសដល់ទំនាក់ទំនងដ៏ល្អរវាងប្រទេសទាំង2។

ដូចនឹងព្រះមហាវីរក្សត្រដ៏អមតៈនៃព្រះរាជាណាចក្រកម្ពុជាដែរ លោក Sheikh Mijubur Rahman គឺជាបិតាឯករាជ្យជាតិរបស់បង់ក្លាដែស «Father of Benali Nation»។ លោកគឺជាប្រធានាធិបតីដំបូងបង្អស់របស់ប្រទេសបង់ក្លាដែសនៅឆ្នាំ1971 ហើយបន្តកាន់តំណែងជានាយករដ្ឋមន្ត្រីរហូតដល់ថ្ងៃដែលលោកត្រូវបានគេធ្វើឃាតនៅថ្ងៃទី15 ខែសីហា ឆ្នាំ1975។

លោក Md Tajul Islam រដ្ឋមន្ត្រីរដ្ឋាភិបាលមូលដ្ឋាន អភិវឌ្ឍន៍ជនបទ និងកិច្ចសហប្រតិបត្តិការ (LGRAD) ជាអ្នកដែលបានប្រកាសដាក់ឱ្យប្រើប្រាស់ឈ្មោះវិថីថ្មី «King Norodom Sihanouk Road» មួយនេះនៅក្រុងដាក្កា ក្រោមការរៀបចំរបស់អង្គភាព Dhaka North City Corporation (DNCC)៕

February 27, 2020

សញ្ញាអាក្រក់ចំពោះសុខភាព មិនមែនគ្រាន់តែជាសញ្ញាគម្រាមលេងៗទេ

មុននឹងកើតរឿងហេតុធំឡើង វាតែងតែមានសញ្ញាប្រកាសអាសន្នប្រាប់ជាមុនមិនខាន ប្រៀបដូចមុននឹងកើតមានព្យុះរលកស៊ូណាមិ គេតែងឃើញមានត្រីសមុទ្រទឹកជ្រៅហែលគេចពីសេចក្តីស្លាប់មកទើលើឆ្នេរខ្សាច់អុីចឹងដែរ ចំណែករោគចង្រៃ និងរោគប្លែកៗដែលកើតឡើង នឹងធ្វើឱ្យយើងភិតភ័យដូចគ្នានឹងគ្រានោះដែរ។ ការពិតទៅ វាមិនមែនជាការវាយលុកចូលមកមិនឱ្យយើងដឹងខ្លួននោះទេ តែដោយសារតែយើងបណ្តាយខ្លួនឱ្យក្លាយជាភ្នាក់ងារទទួលមេរោគដោយខ្លួនឯងទៅវិញទេ។

មុនកើតជំងឺចង្រៃនៅក្នុងរាងកាយយើង វាច្រើនតែមកសម្ងំពង្រីកខ្លួនយ៉ាងរីករាយនៅក្នុងខ្លួនយើងមុនមួយរយៈរួចមកហើយ មិនមែននៅស្ងៀមៗវាកើតឡើងតែម្តងនោះទេ ឧទាហរណ៍ដែលមើលឃើញច្បាស់នោះគឺ ជំងឺមហារីក ទំរាំតែរីកធំឡើងក្លាយជាដុំសាច់ដែលយើងស្ទាបដឹងនោះ វាត្រូវពង្រីកខ្លួនបង្កើតកូនចៅរាប់លានក្បាល រហូតចូលទៅនៅក្នុងសរសៃឈាមបានហើយ ទើបដុះចេញមកជាដុំសាច់ឱ្យយើងមើលឃើញនោះ។សញ្ញាប្រកាសអាសន្នទាំងនេះ លោកអ្នកអាចប្រើការសង្កេតមើលខ្លួនឯងក៏បាន មិនពិបាកឡើយ ដូចជា៖
1-លែងចង់ញ៉ាំអាហារ
2-ចុះស្គមខុសប្រក្រតី (ទម្ងន់ខ្លួនស្រកចុះជាង 2គីឡូក្រាមក្នុង 1ខែ)
3-ឆាប់មួម៉ៅ អារម្មណ៍ងាយប្រែប្រួល
4-ចុករួយតាមរាងកាយគួរឱ្យរំខាន
5-ងឿងក្បាលបែបមិនស្រឡះសោះ
6-មានអាការគ្រុនបែបក្តៅរងាៗ
7-មុខមាត់ត្រចៀកមើលទៅឡើងក្រហម ហាក់ដូចជាមានកម្តៅក្តៅគគុកនៅក្នុងរាងកាយ។

សរុបងាយៗថា បើនៅសុខៗមានភាពប្រែប្រួលដែលមិនធ្លាប់កើតមានកើតឡើង មិនថាតែចំពោះរាងកាយ ឬសូម្បីតែក្នុងអារម្មណ៍ និងផ្លូវចិត្តក៏ដោយនោះ សម្តែងថា ច្បាស់ជាមាន “ហេតុភេទ” មិនល្អអ្វីម្យ៉ាងកើតឡើងហើយ ដូច្នេះវាជាតួនាទីរបស់យើងហើយដែលត្រូវតែស្វែងរក “ជនពាល” នោះឱ្យឃើញយ៉ាងឆាប់រហ័ស កុំបណ្តោយឱ្យវានៅសម្ងំពង្រីកខ្លួនក្នុងរាងកាយរបស់យើងរហូតដល់កើតបញ្ហាធំលែងអាចព្យាបាលបានឱ្យសោះ៕

February 27, 2020

អង្គការទេសចរណ៍ពិភពលោក និងអង្គការសុខភាពពិភពលោក ចេញសេចក្តីថ្លែងការណ៍រួមស្តីពីទេសចរណ៍ និង Covid-19

(ម៉ាឌ្រីដ, អេស្ប៉ាញ និងហ្សឺណែវ, ស្វីស)៖ កាលពីថ្ងៃទី26 ខែកុម្ភៈ ឆ្នាំ2020 អង្គការទេសចរណ៍ពិភពលោក (UNWTO) និងអង្គការសុខភាពពិភពលោក (WHO) បានចេញសេចក្តីថ្លែងការណ៍រួមស្តីពីទេសចរណ៍ និង Covid-19 ដោយបានអំពាវនាវឱ្យមានការទទួលខុសត្រូវ និងកិច្ចសម្របសម្រួល។ សេចក្តីថ្លែងការណ៍នេះ មានខ្លឹមសារដូចខាងក្រោម៖

ក្នុងខណះដែលការរីករាយដាលនៃជម្ងឺវីរុសកូរ៉ូណាបច្ចុប្បន្ននៅតែបន្តកើតមាន អង្គការសុខភាពពិភពលោក និងអង្គការទេសចរណ៍ពិភពលោក ប្តេជ្ញាធ្វើការរួមគ្នាក្នុងការណែនាំតម្រង់ទិសទៅលើការឆ្លើយតបរបស់វិស័យទេសចរណ៍ និងការធ្វើដំណើរ ទៅនឹងវិបត្តិ Covid-19 នេះ។

នៅថ្ងៃទី30 ខែមករា ឆ្នាំ2020 អគ្គនាយកអង្គការសុខភាពពិភពលោក បានប្រកាសអំពីការរាតត្បាតនៃ Covid-19 ជាភាពអាសន្នសុខភាពសាធារណៈដែលជាកង្វល់អន្តរជាតិ ហើយបានដាក់ចេញនូវអនុសាសន៍បណ្តោះអាសន្នមួយចំនួន។ អង្គការសុខភាពពិភពលោកមិនបានផ្តល់អនុសាសន៍ឱ្យមានការរឹតបន្តឹងលើពាណិជ្ជកម្ម ឬការធ្វើដំណើរណាមួយឡើយ ផ្អែកតាមព័ត៌មានទទួលបាននាពេលបច្ចុប្បន្ន។

អង្គការសុខភាពពិភពលោកកំពុងបំពេញការងារជាមួយនឹងអ្នកជំនាញពិភពលោក រដ្ឋាភិបាល និងដៃគូរនានាយ៉ាងជិតស្និទ្ធ សំដៅពង្រីកឱ្យបានឆាប់រហ័សនូវការយល់ដឹងបែបវិទ្យាសាស្រ្តស្តីពីមេរោគថ្មីនេះ តាមដានអំពីការឆ្លងនិងឥទ្ធិពលអាក្រក់របស់វា ព្រមទាំងផ្តល់ការណែនាំដល់ប្រទេសនានា និងសហគមន៍សកលលោក ស្តីពីវិធានការការពារសុខភាព និងទប់ស្កាត់ការឆ្លងនៃការផ្ទុះឡើងនៃមេរោគនេះ។

កិច្ចសហប្រតិបត្តិការជាគន្លឹះ

វិស័យទេសចរណ៍មានការប្តេជ្ញាមុតមាំ តម្កល់ប្រជាពលរដ្ឋ និងសុខមាលភាពរបស់ពលរដ្ឋជាអាទិភាព ហើយកិច្ចសហប្រតិបត្តិការអន្តរជាតិមានតួនាទីស្នូលយ៉ាងសំខាន់ក្នុងការធានាឱ្យវិស័យនេះ អាចចូលរួមទប់ស្កាត់ជម្ងឺ Covid-19 ប្រកបដោយប្រសិទ្ធភាព។

អង្គការទេសចរណ៍ពិភពលោក និងអង្គការសុខភាពពិភពលោកកំពុងសហការប្រឹក្សាយោបល់គ្នាយ៉ាងជិតស្និទ្ធ ជាមួយនឹងដៃគូផ្សេងៗទៀត សំដៅជួយដល់បណ្តារដ្ឋទាំងឡាយឱ្យធានាបានការអនុវត្តវិធានការសុខភាពប្រកបដោយប្រសិទ្ធភាព និងកាត់បន្ថយឱ្យនៅតិចបំផុតនូវការរារាំងមិនចាំបាច់ដល់ចរាចរណ៍ និងពាណិជ្ចកម្មអន្តរជាតិ។

ការឆ្លើយតបពីវិស័យទេសចរណ៍ ទាមទារឱ្យមានការថ្លឹងថ្លែងសមស្របទៅតាមភាពគម្រាមកំហែងសុខភាពសាធារណៈ និងផ្អែកទៅលើការវាយតម្លៃហានិភ័យក្នុងស្រុក តាមរយៈការជំរុញឱ្យមានការចូលរួមពីគ្រប់ផ្នែកទាំងអស់នៃសង្វាក់តម្លៃទេសចរណ៍ មានដូចជា ស្ថាប័នសាធារណៈ ក្រុមហ៊ុនឯកជន និងភ្ញៀវទេសចរ ស្របតាមអនុសាសន៍ និងគោលការណ៍ណែនាំជាទូទៅរបស់អង្គការសុខភាពពិភពលោក។

អង្គការទេសចរណ៍ពិភពលោក និងអង្គការសុខភាពពិភពលោកត្រៀមខ្លួនរួចជាស្រេច ដើម្បីបំពេញការងារយ៉ាងជិតស្និទ្ធ ជាមួយគ្រប់សហគមន៍ទាំងអស់ និងប្រទេសទាំងឡាយដែលរងការប៉ះពាល់ដោយភាពអាសន្ននៃសុខភាពបច្ចុប្បន្ន សំដៅចូលរួមកសាងអនាគតមួយកាន់តែប្រសើរ និងកាន់តែរឹងមាំ។

ការរឹតបន្តឹងលើការធ្វើដំណើរទាំងឡាយណាដែលឃ្លាតឆ្ងាយពីស្មារតីខាងលើ អាចបណ្តាលឲ្យមានការរំខានមិនចាំបាច់ដល់ចរាចរណ៍អន្តរជាតិ រួមទាំងផលប៉ះពាល់អវិជ្ជមានលើវិស័យទេសចរណ៍ផងដែរ។

ស្ថិតក្នុងដំណាក់កាលប្រឈមនេះ អង្គការសុខភាពពិភពលោកសូមចូលរួមជាមួយសហគមន៍អន្តរជាតិទាំងអស់ ដើម្បីរក្សាសាមគ្គីភាពជាមួយប្រទេសរងផលប៉ះពាល់នានា៕

ប្រភព៖ ក្រសួងទេសចរណ៍

February 27, 2020

10ដំណាក់កាល ដើម្បីគ្រប់គ្រងទម្ងន់ខ្លួនបានយ៉ាងល្អ

1. កុំរំពឹង ឬជឿជាក់ទុកទាំងស្រុងនោះថា មានអាហារដ៏ពិសេសបំផុតដែលនឹងជួយដោះស្រាយបញ្ហាឱ្យអ្នកបាន តែត្រូវគិតថា វាជាការរួមផ្សំគ្នាជាមួយនឹងសកម្មភាពផ្សេងៗទៀត ហើយចម្លើយគឺស្ថិតនៅលើខ្លួនអ្នកផ្ទាល់។
2. នៅពេលណាដែលអ្នកជម្រុញខ្លួនឯងឱ្យទទួលទានអ្វីមួយតាមចិត្តចង់ អ្នកត្រូវសួរខ្លួនអ្នកថា “តើខ្ញុំឃ្លានទេ?” សូមចងចាំថា ភាពឃ្លានខ្លាំង ឬតិចក៏ចេញពីផ្នែកមួយនៃអារម្មណ៍របស់អ្នកដែរ។
3. ប្រសិនបើអ្នកមានអារម្មណ៍ថាហេវ អ្នកត្រូវព្យាយាមស្វែងរកជម្រើសដែលល្អបំផុតក្នុងការបំពេញឱ្យភាពហេវហត់នេះ។ សិក្សាបន្ថែមពីសារធាតុចិញ្ចឹមនៅក្នុងចំណីអាហារ រក្សារសជាតិរបស់វាឱ្យបានល្អ នឹងធ្វើឱ្យការគ្រប់គ្រងទម្ងន់របស់អ្នកកាន់តែមានភាពងាយស្រួលឡើង។
4. ចងចាំថា មិនមានទេអាហារល្អ ឬអាក្រក់ សម្រាប់អ្នកដែលចង់គ្រប់គ្រងទម្ងន់ដូចជារូបអ្នក ប៉ុន្តែវាអាស្រ័យលើចំនួនដែលអ្នកបានដាក់បញ្ចូលទៅក្នុងរាងកាយទៅវិញទេ។
5. កុំចាំដល់ពេលពោះឡើងតឹង មានអារម្មណ៍ថាឆ្អែតដល់កហើយទើបឈប់ញ៉ាំនោះ ត្រូវបញ្ឈប់ការញ៉ាំតាំងពីមុនពេលដែលអ្នកមានអារម្មណ៍ថាឆ្អែតមកម្លេ៉ះ បើទោះជាអាហារនៅសល់ក៏ដោយ។
6. បើមិនឃ្លានទេ សួរខ្លួនអ្នកទៅមើលថា តើអ្វីខ្លះដែលជាកត្តាជំរុញឱ្យអ្នកញ៉ាំ? បរិស្ថានជុំវិញ ឬអារម្មណ៍របស់អ្នក?
7. បើវាជាកត្តាដែលកើតចេញពីបរិស្ថានខាងក្រៅ ដូចជា ពេលវេលា ឬអាហារឆ្ងាញ់ដ៏សន្ធឹកសន្ធាប់… សួរខ្លួនអ្នកថា គួរធ្វើយ៉ាងណា ដើម្បីគ្រប់គ្រងខ្លួនអ្នកពីកត្តាជំរុញចិត្តឱ្យចង់ញ៉ាំមួយនេះ? ហើយចូរស្វែងរកអ្វីផ្សេងមកធ្វើជំនួសសិន រង់ចាំពេលហេវចាំញ៉ាំអាហារ…។
8. បើវាកើតចេញពីអារម្មណ៍របស់អ្នកវិញ អ្នកត្រូវសួរខ្លួនអ្នកថា តើមានវិធីណាដែលអាចដោះស្រាយបាន បើអ្នកតែងតែនឹកឃើញដល់ការញ៉ាំពេលមានអារម្មណ៍ធុញថប់? ដូច្នេះអ្នកគួររកវិធីបំបាត់ភាពធុញថប់ ដោយវិធីផ្សេងដូចជា ហាត់ប្រាណ គេងសម្រាក ឬស្តាប់ចំរៀងជាដើម…។
9. រស់នៅជាមួយនឹងបែបបទនៃជីវិតដែលមានតែភាពរស់រវើកដូចជា ការហាត់ប្រាណជាដើម។
10. កុំរំពឹងថា អ្វីៗវានឹងបានល្អឥតខ្ចោះ តែត្រូវសិក្សាបន្ថែមពីវិធីថ្មីៗ ហើយចំណាយពេលអនុវត្តវាផង៕

February 26, 2020

Author: ធឿន មករា