ធឿន មករា - La Reine Media

Facebook បង្កើតច្បាប់ពិន័យថ្មី ចំពោះសមាជិកក្នុង Group ដែលបំពានច្បាប់

កាលពីពេលថ្មីៗនេះ ក្រុមហ៊ុន Facebook បានសម្រេចចិត្ដថា អាចនឹងធ្វើការផាកពិន័យ ទៅលើសមាជិកណាមួយ ដែលធ្វើខុសពីគោលការណ៍ Group។ Facebook បានបញ្ជាក់ថា ផែនការថ្មីនេះនឹងរឹតបន្តឹងច្បាប់បន្ថែម ដោយផ្តោតខ្លាំងទៅលើ Group ឬក៏សមាជិក Group មួយចំនួនដូចជា៖ ការផាកពិន័យដល់អ្នកប្រើប្រាស់ ដែលបានបំពានគោលការណ៍ច្បាប់, ការកាត់បន្ថយលើការផ្សព្វផ្សាយ Group ណាដែលទាក់ទងទៅនឹងរឿងនយោបាយ និងរឹតបន្ដឹងបន្ថែមលើ Group ណាដែលរំលោភបំពានគោលការណ៍របស់ Facebook ជាដើម។

ការផាកពិន័យចំពោះសមាជិក Group ដែលមិនបានគោរពតាមគោលកាណ៍ និងតែងតែបំពានជារឿយៗនេះ Facebook នឹងបិទឬហាមឃាត់សមាជិក Group ទាំងនោះជាបណ្ដោះអាសន្ន មិនឱ្យធ្វើការបង្ហោះ ឬ Comment នៅក្នុង Group រយៈពេល 7ថ្ងៃ ទៅ ១ខែ អាស្រ័យលើករណីធ្ងន់ ឬស្រាលដែលសាមីខ្លួន បានបំពាន។ អ្នកដែលធ្វើខុសច្រើនដង អាចនឹងមិនអនុញ្ញាតឱ្យ Join, Invite ឬ Create Group ថ្មីទៀតបានឡើយ។

Group ណាមួយ ដែលរកឃើញថា មានការបំពានច្បាប់ ក៏នឹងត្រូវបានកត់សម្គាល់ ដោយការព្រមានទុកជាមុន ហើយនៅពេលមានសមាជិកថ្មីចង់ចូលរួម Facebook នឹងបញ្ជាក់ប្រាប់ថា Group នោះបានបំពានគោលការណ៍ និងណែនាំឱ្យធ្វើការ Review ជាមុនសិន មុននឹងចូលរួម។ Group ទាំងនោះក៏អាចនឹងត្រូវបានកាត់បន្ថយការផ្សព្វផ្សាយនៅលើ News Feed ផងដែរ។

កន្លងមកមាន Group មួយចំនួនព្យាយាមផ្សព្វផ្សាយព័ត៌មានមិនពិតច្រើនខ្លាំងពេក ជាពិសេសការចែកចាយព័ត៌មានមិនពិត អំពីបញ្ហាកូវីដ-19 បង្កឱ្យមានភាពចលាចល ក៏ជាហេតុផលបណ្ដាលឱ្យ Facebook បង្កើតច្បាប់ពិន័យថ្មីនេះចេញមក៕

March 19, 2021

Samsung ចេញលក់ Galaxy A 2021 2ម៉ូដែល តម្លៃធូរៗថ្លៃ

គ្រួសារត្រកូល Galaxy A របស់ Samsung ក្នុងឆ្នាំ 2021នេះ គឺ Galaxy A52 | A72 បាននិងកំពុងចរាចរណ៍ លើទីផ្សារនៅគ្រប់បណ្ដាហាងនានាទូទាំងប្រទេសកម្ពុជា។

សម្រាប់ម៉ូដែល Galaxy A52 ដូចគ្នានឹងម៉ូដែលកូនពៅ A32 ដែរ ចំណែកឯម៉ូដែល Galaxy A72 ក៏កំពុងដាក់លក់ដូចគ្នាដែរ។ ក្នុងនោះផងដែរ Galaxy A52 មាន 2ម៉ូដែលប្រើសេវា 4G និងសេវា 5G។ រីឯ Galaxy A72 មិនមានម៉ូដែល 5G គឺមានត្រឹម 4G តែប៉ុណ្ណោះ។ សម្រាប់ទីផ្សារស្រុកខ្មែរ មិនទាន់មានស៊េរី 5G នៅឡើយទេ។

ខាងក្រោមនេះ គឺជាលក្ខណសម្បត្តិសំខាន់ៗ ដែលក្រុមហ៊ុនបានបំពាក់ មកជាមួយសមត្ថភាពខ្ពស់ ស័ក្តិសមនឹងតម្លៃស្មាតហ្វូន Galaxy A72 មានរចនាប័ទ្ម ខាងមុខបង្កប់កាមេរ៉ា Selfie ស្រដៀងប្រជ្រុយ (Infinity-O) ផ្ទៃអេក្រង់ទំហំ 6.7អ៊ិញ កម្រិត FHD+ ប្រភេទSuper AMOLED មានកម្រិតអេក្រង់ 90 Hz Refresh rate មានជម្រើស RAM8 GB មេម៉ូរី 256 GB (បន្ថែមកាតក្រៅដល់ 1TB) បន្ទះឈីបល្បឿនដំណើរការគឺ Snapdragon 720G ។ រីឯផ្នែកកាមេរ៉ាក្រោយ មាន 4 គ្រាប់៖ 64 MP (កាមេរ៉ាមេ) 1គ្រាប់ទៀត 12 MP (ប្រភេទលេនស៍ Ultra-Wide) 1គ្រាប់ទៀត 8 MP (ប្រភេទលេនស៍Telephoto) និង 1គ្រាប់ចុងក្រោយ 5 MP (ប្រភេទលេនស៍ Macro) ចំណែកកាមេរ៉ាមុខ 1គ្រាប់ទំហំ៖ 32 MP (លេនស៍ធំមែនទែន)។

A72 បំពាក់មកជាមួយថ្មធំ ដល់ 5000 mAh អាចជួយឱ្យអ្នកប្រើបានស្ទើរតែពេញ 1ថ្ងៃ។ ចេញមកជាមួយនឹងដុំសាកថ្មល្បឿនលឿន 25W ថែមទៀត និងបំពាក់មកជាមួយបច្ចេកវិទ្យាការពារជម្រាបទឹក ឬអាវក្រោះការពារទឹកជ្រាបកម្រិត IP67 និងបច្ចេកវិទ្យាសុវត្ថិភាព ស្គែនខ្ចៅដៃលើអេក្រង់ ដោះសោលឿនណាស់ តែមួយប៉ប្រិចភ្នែកប៉ុណ្ណោះ។ ក្រឡេកមកមើលពណ៌វិញ មាន 4ជម្រើសដូចជា សសុទ្ធ, ខ្មៅសុទ្ធ, ខៀវសុទ្ធ និងពណ៌ស្វាយដ៏ស្រស់ស្អាត។

Samsung announces Galaxy A52, A52 5G and A72 with 90 Hz displays, 64 MP quad cameras

ចំណែកឯ Galaxy A52 មានចំណុចប្លែកពី A72 លើទំហំអេក្រង់ ទំហំ RAM ជម្រើសមេម៉ូរី និងទំហំថ្ម។ ក្រៅពីនោះ ច្រើនចំណុចទៀតសឹងតែដូចគ្នា ដូចជារចនាប័ទ្មខាងមុខ បង្កប់កាមេរ៉ា Selfie ស្រដៀងប្រជ្រុយ (Infinity-O) ផ្ទៃអេក្រង់ទំហំ 6.5អ៊ិញ កម្រិតFHD+ ប្រភេទSuper AMOLED មានកម្រិតអេក្រង់ 90 Hz Refresh rateមានជម្រើស RAM8 GB មេម៉ូរី 128 GB (បន្ថែមកាតក្រៅដល់ 1TB) បន្ទះឈីបល្បឿនដំណើរការគឺ Snapdragon 720G ដូចគ្នា។ កាមេរ៉ាក្រោយមាន 4 គ្រាប់៖ 64 MP (កាមេរ៉ាមេ) 1គ្រាប់ទៀត 12 MP (ប្រភេទលេនស៍ Ultra-Wide) 1គ្រាប់ទៀត 8 MP (ប្រភេទលេនស៍Telephoto) និង 1គ្រាប់ចុងក្រោយ 5 MP (ប្រភេទលេនស៍ Macro) ចំណែកកាមេរ៉ាមុខ ១គ្រាប់ទំហំ៖ 32 MP (លេនស៍ធំមែនទែន)។

A52 បំពាក់មកជាមួយថ្មធំ ដល់ 5000 mAh អាចជួយឱ្យអ្នកប្រើបានស្ទើរតែពេញ 1ថ្ងៃ និងចេញមកជាមួយនឹងដុំសាកថ្មល្បឿនលឿន 25W ថែមទៀត និងបំពាក់មកជាមួយបច្ចេកវិទ្យាការពារជម្រាបទឹក ឬអាវក្រោះការពារទឹកជ្រាបកម្រិត IP67 និងបច្ចេកវិទ្យាសុវត្ថិភាពស្គែនខ្ចៅដៃលើអេក្រង់ ដោះសោលឿនណាស់តែមួយប៉ប្រិចភ្នែកប៉ុណ្ណោះ។ ក្រឡេកមកមើលពណ៌វិញមាន 4ជម្រើសដូចជា សសុទ្ធ, ខ្មៅសុទ្ធ, ខៀវសុទ្ធ និងពណ៍ស្វាយដ៏ស្រស់ដូចគ្នា៕

March 19, 2021

ឥឡូវនេះ! អតិថិជនអាចទិញបន្លែសាច់ស្រស់ តាមរយៈ Wing App

ហាង លក់គ្រឿងទេស បន្លែស្រស់ សាច់ស្រស់ ផ្លែឈើស្រស់ល្បីៗជាច្រើននៅរាជធានីភ្នំពេញ បានរួមគ្នាដាក់លក់ផលិតផលរបស់ពួកគេតាមរយៈ វីងម៉ល(WingMall) ដែលជាទីផ្សារអេឡិចត្រូនិចដ៏ទំនើប និងពេញនិយមនៅកម្ពុជា។

ដើម្បីជួយសម្រួល និងកាត់បន្ថយហានិភ័យដល់អតិថិជនពីជំងឺកូវីដ១៩ ឥឡូវនេះពួកគេ អាចធ្វើការបញ្ជាទិញ កសិផល សាច់ ត្រី បន្លែ គ្រឿងទេស ម្ហូបអាហារ ភេសជ្ជៈនិងផលិតផលជាច្រើនផ្សេងទៀតជាមួយហាង Alliment, Strokesy, Kiwi Mart, Fairplus និងហាងល្បីៗជាច្រើនផ្សេងទៀតនៅលើវីងម៉ល(WingMall)។

ជាមួយកម្មវិធីស្មាតហ្វូនវីង(Wing Money App) អតិថិជន គ្រាន់តែចូលទៅកាន់មុខងារ “វីងម៉ល” (WingMall) នោះ ពួកគេ នឹងអាចបញ្ជាទិញផលិតផលជាច្រើនជាមួយហាងរាប់រយនៅរាជធានីភ្នំពេញ ព្រមទាំងទទួលបានសេវាដឹកជញ្ជូនដោយឥតគិតថ្លៃរហូតដល់១០គីឡូម៉ែត ក្នុងរាជធានីភ្នំពេញ និងមានឱកាសឈ្នះរង្វាន់ជាច្រើនផ្សេងទៀត។

អតិថិជនទាំងអស់អាចរីករាយជាមួយការសន្សំពិន្ទុ Wingpoint ដើម្បីប្តូរយករង្វាន់ជាច្រើនផងដែរ។ សម្រាប់អតិថិជនវីងដែលសន្សំបាន៥០០ពិន្ទុក្នុងមួយសប្តាហ៍ នឹងមានឱកាសឈ្នះរង្វាន់ទូរស័ព្ទដៃ iPhone 12 Pro មួយគ្រឿង ហើយអ្នកដែលសន្សំបាន៥០០០ពិន្ទុក្នុងមួយខែ ក៏អាចមានឱកាសឈ្នះរង្វាន់ម៉ូតូហុងដា Zoomer X មួយគ្រឿងផងដែរ។

រក្សាសុវត្ថិភាព និងចំណាយពេលដ៏ផ្អែមល្ហែមជាមួយគ្រួសារជាទីស្រលាញ់របស់អ្នក ពុំចាំបាច់ចេញពីផ្ទះជាមួយការបញ្ជាទិញគ្រឿងទេស និង ម្ហូបអាហារពី #WingMall ៕

March 19, 2021

AFC CUP លើកការប្រកួតរបស់វិសាខា ដែលគ្រោងធ្វើនៅកម្ពុជា ទៅធ្វើនៅទឹកដីកណ្តាលវិញ

ការប្រកួតពានរង្វាន់ AFC CUP 2021 វគ្គជម្រុះជុំទី2 ដែលគ្រោងនឹងចាប់ផ្តើមនៅថ្ងៃទី28 ខែមេសា ឆ្នាំ 2021 ខាងមុខនេះ ដោយក្នុងនោះក្រុមតំណាងឱ្យកម្ពុជា គឺវិសាខា នឹងត្រូវប្រកួតទល់នឹងក្រុម Lalenok United FC ដែលជាជើងឯកលីគកំពូលទីម័រខាងកើត។ ការប្រកួតនេះ ត្រូវបានសហព័ន្ធកីឡាបាល់ទាត់អាស៊ាន កំណត់យកកីឡដ្ឋាន នៅក្នុងប្រទេសម៉ាឡេស៊ី ធ្វើជាទឹកដីកណ្តាលសម្រាប់ការប្រកួត។

ការប្រកួតនេះ នឹងធ្វើឡើងតែ 1ជើងតែប៉ុណ្ណោះ ដោយក្រុមដែលឈ្នះ នឹងទទួលបានកៅអីឡើងទៅកាន់វគ្គជម្រុះ ជុំទី3 ជាបន្ត ដោយនឹងប៉ះជាមួយក្រុមខ្លាំង មកពីឥណ្ឌូនេស៊ី Persipura Jayapura ដែលជាក្រុមលេខ2 នៃលីគកំពូលឥណ្ឌូនេស៊ី នៅថ្ងៃទី19 ខែឧសភា ឆ្នាំ2021 ហើយការប្រកួតនេះ នឹងធ្វើឡើងនៅក្នុងកីឡដ្ឋាន Mandala Stadium នៃខេត្ត Persipura ដែលជាទឹកដីរបស់ក្រុម Persipura Jayapura ជាម្ចាស់ផ្ទះ។

ដើមឡើយ ការប្រកួតជុំទី2 ត្រូវធ្វើឡើងនៅក្នុងរាជធានីភ្នំពេញ ប្រទេសកម្ពុជា ដែលក្រុមវិសាខា គ្រោងនឹងខ្ចីពហុកីឡដ្ឋានជាតិអូឡាំពិក ដើម្បីប្រើប្រាស់ជាទីតាំងសម្រាប់ប្រកួត ក៏ប៉ុន្តែសហព័ន្ធកីឡាបាល់ទាត់អាស៊ាន បានតម្រូវឱ្យផ្លាស់ប្តូរទៅកាន់ទឹកដីម៉ាឡេស៊ីនេះវិញ គឺដោយសារតែកម្ពុជា នៅមានច្បាប់តម្រូវឱ្យធ្វើចត្តាឡីស័ក 14ថ្ងៃ ដែលអាចធ្វើឱ្យខាតពេលវេលាប្រកួត ក៏ដូចជាចំណាយអស់ច្រើនសម្រាប់ AFC៕

March 17, 2021

AFC អនុញ្ញាតឱ្យបារ៉ែន ធ្វើជាម្ចាស់ផ្ទះ ការប្រកួតវគ្គជម្រុះ FIFA WORLD CUP ប្រចាំពូល C

កាលពីពេលថ្មីៗនេះ សហព័ន្ធកីឡាបាល់ទាត់ប្រចាំទ្វីបអាស៊ី (AFC) បានប្រកាសអំពីទីតាំងទឹកដីកណ្តាល សម្រាប់ការប្រកួតវគ្គជម្រុះ FIFA WORLD CUP QATAR 2022 គឺប្រទេសបារ៉ែន នឹងក្លាយជាទីតាំងសម្រាប់ក្រុមទាំង5 ប្រចាំពូល C ដែលរួមមាន កម្ពុជា ហុងកុង បារ៉ែន អ៊ីរ៉ាក់ និងអ៊ីរ៉ង់ ធ្វើការប្រកួតគ្នា។

គួរឱ្យដឹងដែរថា អ៊ីរ៉ង់ ក៏បានដាក់ពាក្យស្នើសុំធ្វើជាម្ចាស់ផ្ទះក្នុងព្រឹត្តិការណ៍នេះដែរ គឺតាំងពីមុនគេ មុនឯងឯណោះ ក៏ប៉ុន្តែត្រូវបាន AFC សម្រេចចិត្តផ្តល់ឱ្យទៅប្រទេសកាតារវិញ ដោយសារតែប្រទេសនេះ មានហានិភ័យ ទាបជាងអ៊ីរ៉ង់ ណាមួយប្រទេសនេះ បានអនុញ្ញាតឱ្យកីឡាករទាំងអស់ រួចផុតពីការធ្វើចត្តាឡីស័ក ប្រសិនបើមិនមានផ្ទុកកូវីដ-19 ទេនោះ។

សម្រាប់កម្ពុជាវិញ នៅសល់ 3ប្រកួត ដែលនឹងត្រូវធ្វើឡើង នៅទឹកដីកណ្តាលនេះ ដោយថ្ងៃទី3 ខែមិថុនា ឆ្នាំ2021 ម្ចាស់ផ្ទះបារ៉ែន ត្រូវប៉ះកម្ពុជា។ ថ្ងៃទី7 ខែមិថុនា ឆ្នាំ2021 កម្ពុជា ត្រូវប៉ះអ៊ីរ៉ាក់ និងការប្រកួតចុងក្រោយរបស់កម្ពុជា នឹងត្រូវធ្វើឡើងនៅថ្ងៃទី11 ខែមិថុនា ឆ្នាំ2021 ដោយកម្ពុជា នឹងត្រូវជួប អ៊ីរ៉ង់៕

March 17, 2021

Apple ពិចារណា លែងផលិត Speakers ព្រោះលក់បានតិចពេក

Speakers របស់ក្រុមហ៊ុន Apple គឺ HomePod កំពុងត្រូវបានសារព័ត៌មានផ្សេងៗ ទស្សន៍ទាយពីវាសនា ទុករួចស្រេចបាត់ទៅហើយថា វានឹងលែងមានវត្តមានក្នុងបញ្ជីផលិតផល Apple ដោយសារកត្ដាធំ២ គឺទី1 រូបរាង និងទី2 គឺតម្លៃ។

បើយោងតាមរបាយការណ៍លក់ប្រចាំឆ្នាំ របស់ក្រុមហ៊ុនបច្ចេកវិទ្យាយក្សរបស់អាមេរិកមួយនេះ បានឱ្យដឹងថា Apple បានប្រកាសចេញឧបករណ៍បំពងសំឡេង HomePod កាលពីឆ្នាំ2018 កន្លងទៅ ដោយលក់ក្នុងតម្លៃ 349ដុល្លារ បន្ទាប់មក ដោយសារតែការលក់របស់ឧបករណ៍នេះ ហាក់មិនសូវល្អ Apple បានទម្លាក់ថ្លៃ មកនៅត្រឹម 299ដុល្លារ ប៉ុន្ដែវានៅតែមិនទទួលបានលទ្ធផលអ្វីធំដុំដដែល។

គួររំឭកផងដែរថា សូម្បីតែគេហទំព័រលក់ របស់ក្រុមហ៊ុន Apple ផ្ទាល់ ក៏បានសរសេរដែរថា “While supplies last” ដែលមានន័យថា ជាការលក់ចុងក្រោយ រីឯការលក់នៅក្នុងប្រទេស ឬតំបន់ខ្លះវិញនោះ គឺលែងមានដាក់លក់នៅលើអនឡាញតែម្ដង៕

សូមទស្សនាវីដេអូខាងក្រោម៖

March 16, 2021

iPhone 12 ចាប់ផ្តើមដំឡើង នៅប្រទេសឥណ្ឌា កំពុងតែក្លាយជាការពិត!

ដូចដែលយើងទាំងអស់គ្នា បានដឹងហើយថា សង្គ្រាមពាណិជ្ជកម្មរវាងសហរដ្ឋអាមេរិក និងចិន រហូតមកទល់ពេលនេះ បានធ្វើឱ្យមានបញ្ហាជាច្រើននៅកកស្ទះ មិនទាន់អាចដោះស្រាយបាន ហេតុដូច្នេះហើយ ទើបធ្វើឱ្យក្រុមហ៊ុនយក្សរបស់អាមេរិកមួយនេះ បានផ្លាស់ប្តូរទីតាំងផលិត ឬដំឡើងផលិតផលរបស់ខ្លួន ទៅកាន់ប្រទេសផ្សេងទៀតវិញ ដូចជា ប្រទេសវៀតណាម និងឥណ្ឌាជាដើម។

កាលពីពេលថ្មីៗនេះ Apple បានចេញមុខមកបញ្ជាក់ថា ក្រុមហ៊ុនពិតជាមានគម្រោង ក្នុងការបង្កើនផលិតកម្ម iPhone 12 របស់ខ្លួន នៅក្នុងប្រទេសឥណ្ឌាឱ្យបានច្រើនជាងមុនពិតមែន។

Apple បានបញ្ជាក់ទៀតថា ពួកគេពេញចិត្តយ៉ាងខ្លាំង ក្នុងការសម្រេចបង្កើនផលិតកម្ម iPhone របស់ខ្លួននៅក្នុងប្រទេសឥណ្ឌា ដែលមានប្រជាជនច្រើនលំដាប់លេខ2 មួយនេះ។

កន្លែងដែលត្រូវប្រើប្រាស់សម្រាប់ការដំឡើង iPhone 12 គឺស្ថិតនៅក្នុងរោងចក្ររបស់ក្រុមហ៊ុន Foxconn ថ្មី ដែលមានទីតាំងស្ថិតនៅក្នុងរដ្ឋ Tamil Nadu ប្រទេសឥណ្ឌា ដែលជាសាខាធំមួយ មិនចាញ់ Foxconn នៅប្រទេសចិនប៉ុន្មានឡើយ។

ប្រភពដដែល បានបង្ហើបឱ្យដឹងទៀតថា ផលិតកម្ម iPhone ត្រូវបានធ្វើឡើងនៅក្នុងប្រទេសឥណ្ឌា តាមរយៈក្រុមហ៊ុន Foxconn និង Wistron តាំងពីឆ្នាំ2017 មកម្ល៉េះ លើសពីនេះក្រុមហ៊ុន Apple ក៏កំពុងមានគម្រោងក្នុងការដំឡើង ថេប្លេត របស់ខ្លួនក្នុងប្រទេសឥណ្ឌាផងដែរ៕

March 16, 2021

Lenovo គ្រោងនឹងបញ្ចេញទូរស័ព្ទ មានឆ្នាំងសាក 110W សាកថ្មលឿនដូចព្យុះ

កាលពីពេលថ្មីៗនេះ គេប្រទះឃើញមានវិញ្ញាបនបត្រឆ្នាំងសាក 110W របស់ក្រុមហ៊ុន Lenovo ត្រូវបានចុះបញ្ជីរួចរាល់ហើយ នៅតែរង់ចាំចូលរោងចក្រផលិតជាស្មាតហ្វូនប៉ុណ្ណោះ។

បើយោងតាមប្រភពព័ត៌មាន បានឱ្យដឹងថា Lenovo Legion 2 និង Lenovo Legion 2 Pro អាចនឹងមានឈ្មោះជាស្មាតហ្វូន Gaming ដែលមានឆ្នាំងសាកថ្មលឿនជាងគេក្នុងពិភពលោក។

គិតត្រឹមពេលនេះ គេនៅមិនទាន់ទទួលបានដំណឹងអ្វីច្រើន ពីស្មាតហ្វូនម៉ូដែលលនេះនៅឡើយទេ តែយ៉ាងណាមិញ ស្មាតហ្វូននោះអាចនឹងបំពាក់មកជាមួយនឹងបន្ទះឈីបជំនាន់ចុងក្រោយ គឺ Snapdragon 888 និងមានជម្រើស RAM ចាប់ពី 8GB ដល់ 128GB ផងដែរ។ ដូចនេះ សូមរង់ចាំតាមដានបន្តថា តើក្រុមហ៊ុននឹងចេញលក់នៅថ្ងៃណា? និងក្នុងតម្លៃប៉ុន្មាន?

March 15, 2021

ធ្លាប់តែផលិតកុំព្យូទ័រ ពេលនេះ Razer បញ្ចេញវ៉ែនតាពិសេស ស្ដាប់តន្ត្រីបាន និងអាចការពារពន្លឺខៀវ បានទៀតផង

កាលពីពេលថ្មីៗនេះ ក្រុមហ៊ុន Razer បានបញ្ចេញវ៉ែនតាឆ្លាតវៃ ឈ្មោះថា ‘Razer Anzu’ ដែលមានបំពាក់មកជាមួយនូវមុខងារការពារកាំរស្មី UVA/UVB បានដល់ទៅ 99% អាចការពារពន្លឺពណ៌ខៀវ ដែលជះចេញពីកុំព្យូទ័រ ឬស្មាតហ្វូនបាន 35% និងជាពិសេសអាចស្ដាប់តន្ត្រីបានទៀតផង។

Razer Anzu មាន 2ប្រភេទសម្រាប់ឱ្យជ្រើសរើស គឺប្រភេទកញ្ចក់រាងជ្រុង និងកញ្ចក់រាងមូល ដោយតម្លៃលក់របស់វា ប្រមាណជា 200ដុល្លារ សម្រាប់ទីផ្សារបរទេស។

លក្ខណៈពិសេសផ្សេងទៀតរបស់ Razer Anzu គឺមានកម្រិតស្ដង់ដាការពារទឹក និងធូលី IPX4 និងមានថាមពលថ្មអាចប្រើបាន 5ម៉ោង ហើយបើ standby ទុកចោល គឺអាចបានដល់ទៅ 2សប្ដាហ៍ឯណោះ វាក៏ប្រើការបញ្ជាដោយការប៉ះ លើការកំណត់ ឬចូលទៅកាន់មុខងារផ្សេងៗ យ៉ាងទំនើបផងដែរ។ លើសពីនេះទៀត វ៉ែនតាឆ្លាតវៃស៊េរីនេះ មានភ្ជាប់រន្ធម៉ៃក្រូហ្វូនដែលអាចឱ្យវាទទួល ឬ ហៅទូរស័ព្ទចេញចូលបាន។

រំឭកផងដែរថា កេរ្ត៍ឈ្មោះរបស់ Razer ធ្លាប់តែល្បីល្បាញខាងទីផ្សារធំ ផ្នែកផលិតកុំព្យូទ័ សម្រាប់ហ្គេម ឥលូវបានឈានជើងចូលក្នុងទីផ្សារផលិតសម្ភារឆ្លាតវៃនៅឆ្នាំ2021 នេះ។ ដូច្នេះ នៅឆ្នាំបន្ទាប់ៗទៀត អាចនឹងមានផលិតផលថ្មីៗ ចេញមកបង្ហាញខ្លួនលើទីផ្សារទៀតជាមិនខាន៕

សូមទស្សនាវីដេអូខាងក្រោម៖

March 15, 2021

Apple នឹងបញ្ចេញ iPad 2021 អេក្រង់ប្រភេទ mini-LED ឈីបល្បឿនលឿន

កាលពីពេលថ្មីៗនេះ ក្រុមហ៊ុន Apple បានបង្ហើបឱ្យដឹងពីការរៀបចំព្រឹត្តិការណ៍ធំមួយ នាដើមឆ្នាំនេះ នៅថ្ងៃទី23 ខែមីនា។ កម្មវិធីខាងលើ Apple នឹងធ្វើឡើងតាមប្រព័ន្ធឌីជីថល និងមានការផ្សាយបន្តផ្ទាល់ តាមរយៈគេហទំព័រ និង YouTube ផ្លូវការរបស់ក្រុមហ៊ុន Apple ផ្ទាល់តែម្ដង។

ក្នុងព្រឹត្តិការណ៍នេះ នឹងមានដាក់បង្ហាញផលិតផល AirTags, iPads និង AirPods ម៉ូដែលថ្មី។ លើសពីនេះទៀតApple នឹងបញ្ចេញ iPad ជំនាន់ថ្មី ជាមួយនឹងអេក្រង់ប្រភេទ mini-LED ដែលដំណើរការ ដោយបន្ទះឈីបល្បឿនលឿនជាងមុនផងដែរ។

គេបានរំពឹងទុកថា Apple នឹងបញ្ចេញ App Tracking Transparency លើ iOS 14.5 ដែលជាមុខងារបើកសិទ្ធិដល់អ្នកប្រើប្រាស់ ឱ្យមានសេរីភាពលើកម្មវិធីណាមួយ ដែលតាមដានពួកគេ និងដែលមិនធ្លាប់ប៉ះសម្តីជាមួយមេ Facebook។

ព្រឹត្តិការណ៍ដើមឆ្នាំរបស់ Apple នេះ នឹងធ្វើឡើងជាមួយគ្នានឹងថ្ងៃប្រកាសចេញ របស់ OnePlus 9 ផងដែរ នេះបើតាមប្រភពខាងលើ លោក Kang បានបន្ថែម តែទោះយ៉ាងណាក៏ដោយ ព័ត៌មានលម្អិតជាផ្លូវការអំពីព្រឹត្តិការណ៍ របស់ក្រុមហ៊ុន Apple នេះ យើងនៅមិនទាន់បានដឹងនៅឡើយ៕

March 15, 2021

Author: ធឿន មករា