ការប្រកួតចុងក្រោយរបស់កម្ពុជា ក្នុងពានរង្វាន់ JENESYS 2019 Japan-ASEAN U19 Men’s Football Tournament នៅប្រទេសជប៉ុន កម្ពុជាបានយកឈ្នះក្រុមបាល់ទាត់ជម្រើសជាតិអាយុក្រោម 19ឆ្នាំរបស់ម៉ាឡេស៊ី ដោយបាល់ស៊ុតកាត់សេចក្ដី 11ម៉ែត្រ ក្នុងលទ្ធផល 5ទល់នឹង 3 ក្រោយស្មើគ្នា 0ទល់នឹង0។
ក្នុងពានរង្វាន់មួយនេះ ឆ្លងកាត់ 4ប្រកួតក្នុងពូលមកនេះ កម្ពុជាឈ្នះ 2ប្រកួត និងចាញ់ 2ប្រកួត ដោយបានចាញ់ប្រកួតទី1 ជាមួយទីម័រខាងកើត 3ទល់នឹង7, ចាញ់ Kagoshima FC 1ទល់នឹង0, ឈ្នះ មីយ៉ាន់ម៉ា 3ទល់នឹង0, និងចុងក្រោយឈ្នះម៉ាឡេស៊ី ដោយបាល់ស៊ុត 11ម៉ែត្រ 5ទល់នឹង3។
គួរបញ្ជាក់ផងដែរថា ក្រុមកម្ពុជាអាយុក្រោម 19ឆ្នាំបានត្រឡប់មកដល់ប្រទេសកម្ពុជាវិញដោយសុវត្តិភាពហើយ បន្ទាប់ពីចូលរួមការប្រកួត JENESYS 2019 Japan-ASEAN U19 Men’s Football Tournament នៅប្រទេសជប៉ុន៕
Author: ធឿន មករា
កម្ពុជា ឈ្នះ2 ចាញ់2 ក្នុងពានរង្វាន់ JENESYS នៅប្រទេសជប៉ុន
ការប្រកួតទាំងអស់នៅក្របខ័ណ្ឌលីកថៃ នឹងត្រូវប្រកួតបិទទ្វារទាំងអស់ក្នុងខែមីនានេះ
ក្រោយពីមានការរាលដាលនៃវីរុស COVID-19 ស្ទើរពាសពេញពិភពលោក និងក្នុងប្រទេសថៃផងនោះ ពេលនេះសហព័ន្ធកីឡាបាល់ទាត់ថៃ បានប្រកាសអាសន្នគ្រប់ការប្រកួតទាំងអស់របស់លីកថៃទាំង 4លំដាប់។
ក្នុងនោះដែរ លីកកំពូលថៃទាំង 4លំដាប់ នឹងត្រូវប្រកួតបិទទ្វារ ពោលគឺមិនឱ្យមានអ្នកទស្សនា ចាប់ពីថ្ងៃទី7 រហូតដល់ទី 31 ខែមីនា ឆ្នាំ2020។ លើសពីនេះទៀត ក្នុងការប្រកួតបិទទ្វារទាំងអស់នោះ ក៏កំពុងពង្រឹងនូវបញ្ហាសុវត្ថិភាពដើម្បីបញ្ចៀសពីការឆ្លងមេរោគ COVID-19 ( Corona Virus ) ដោយផ្អែកលើគោលការណ៍ ផ្តល់ម៉ាស់ និងទឹកអាល់កុល នៅតាមកីឡដ្ឋាននីមួយៗ សម្រាប់ក្រុមប្រកួត ហើយប្រសិនបើមានបញ្ហាធ្ងន់ធ្ងរ៖ លីករដូវកាលនេះ នឹងត្រូវលុបចោលតែម្ដង ប្រសិនមានការរីករាលដាលខ្លាំងក្លានៃជំងឺដ៏កាចសាហាវនេះ៕ 
ក្រសួងធនធានទឹក ប្រាប់ឲ្យប្រជាពលរដ្ឋប្រុងប្រយ័ត្នចំពោះបាតុភូតផ្គរ រន្ទះ និងខ្យល់កន្ត្រាក់
(ភ្នំពេញ)៖ ក្រសួងធនធានទឹក និងឧតុនិយម នៅថ្ងៃទី០៣ ខែមីនា ឆ្នាំ២០២០នេះ បានចេញសេចក្តីស្ថានភាពធាតុអាកាសនៅកម្ពុជា ចាប់ពីថ្ងៃនេះដល់ថ្ងៃទី០៩ ខែមីនា ឆ្នាំ២០២០។
ក្រសួងបញ្ជាក់ថា បញ្ជាក់ថា ចាប់ពីថ្ងៃទី០៣-០៩ ខែមីនា ឆ្នាំ២០២០ នៅតំបន់ជួរភ្នំដងរែក និងខ្ពស់រាបឦសាន មានសីតុណ្ហភាពអប្បបរមា ពី២២-២៤អង្សាសេ, សីតុណ្ហភាពអតិបរមា ពី៣៣-៣៥អង្សាសេ។
តំបន់វាលទំនាបកណ្តាល មានសីតុណ្ហភាពអប្បបរមា ពី២៤-២៦ អង្សាសេ និងសីតុណ្ហភាពអតិបរមា ពី៣៦-៣៨ អង្សាសេ ហើយចាប់ពីថ្ងៃទី៤-៦ ខែមីនា បណ្តាខេត្តពាយ័ព្យ នឹងអាចមានភ្លៀងពីតិចទៅមធ្យម។ តំបន់មាត់សមុទ្រ សីតុណ្ហភាពអប្បបរមា ពី២៤-២៦ អង្សាសេ និងសីតុណ្ហភាពអតិបរមា ៣៤-៣៦អង្សាសេ។ ផ្នែកខ្លះនៃបណ្តាខេត្តនៅតំបន់មាត់សមុទ្រ នឹងអាចមានភ្លៀងធ្លាក់ខ្សោយ។
ជាមួយគ្នានេះ ក្រសួងបានអំពាវនាវដល់ប្រជាពលរដ្ឋ សូមប្រុងប្រយ័ត្នចំពោះបាតុភូតផ្គរ រន្ទះ និងខ្យល់កន្ត្រាក់ ដែលអាចកើតមានឡើងនៅបណ្តាខេត្តភាគពាយ័ព្យ មានដូចជាខេត្តឧត្តរមានជ័យ បន្ទាយមានជ័យ សៀមរាប បាត់ដំបង និងបៃលិន ចាប់ពីថ្ងៃទី៤-៦ ខែមីនា៕
ក្រសួងសុខាភិបាល៖ មកដល់ថ្ងៃទី2 មីនានេះកម្ពុជាមិនទាន់មានករណីឆ្លងជំងឺកូរ៉ូណាថ្មី ឬ COVID-19 នោះទេ
ក្រសួងសុខាភិបាលបានអះអាងថា កម្ពុជាមិនទាន់មានករណីឆ្លងជំងឺកូរ៉ូណាថ្មី ឬ COVID-19 នោះទេ ដើម្បីឆ្លើយតបទៅនឹងព័ត៌មាននៅលើបណ្ដាញសង្គមថាកម្ពុជាបានឆ្លងជំងឺកូរ៉ូណាថ្មី ឬ COVID-19។
ថ្លែងក្នុងសន្និសីទសារព័ត៌មាន ស្តីពីការឆ្លើយតប ការការពារ និងការត្រៀមអន្តរាគមន៍លើការចម្លងជំងឺកូរ៉ូណាថ្មី ឬ COVID-19 នៅកម្ពុជា នារសៀល ថ្ងៃទី02 ខែមីនា ឆ្នាំ2020 ឯកឧត្ដម ម៉ម ប៊ុនហេង រដ្ឋមន្រ្ដីក្រសួងសុខាភិបាល បានមានប្រសាសន៍ថា៖ “មន្រ្ដីសុខាភិបាលបានតាមដាន និងពិនិត្យកំហាក រហូតមកទល់ពេលនេះ គឺមិនទាន់បានរកឃើញពលរដ្ឋកម្ពុជាណាម្នាក់ បានឆ្លងជំងឺកូរ៉ូណាថ្មី ឬ COVID-19 នៅឡើយនោះទេ មិនដូចការបង្ហោះព័ត៌មាននៅលើបណ្ដាញសង្គមនោះឡើយ”។
ឯកឧត្ដមរដ្ឋមន្រ្ដីក្រសួងសុខាភិបាលបានបញ្ជាក់ថា៖ “ការពិនិត្យកំហាកនេះ ដើម្បីធានាឱ្យច្បាស់លាស់ជូនដល់ប្រជាពលរដ្ឋ កុំឱ្យមានការភាន់ច្រឡំ និងមានភាពភ័យខ្លាចដល់សាធារណជន”។
ឯកឧត្ដមរដ្ឋមន្រ្ដីបន្ដថា៖ “ក្រសួងនឹងបន្ដតាមដានជំងឺកូរ៉ូណាថ្មី ឬ COVID-19 ជាប់ជាប្រចាំ ដើម្បីការពារ និងអាចព្យាបាលបានឱ្យទាន់ពេលវេលា ហើយចៀសវាងឆ្លងរីករាលដាលបន្ដទៀត”។
លោកស្រីតំណាងអង្គការសុខភាពពិភពលោក បានកោតសរសើរមន្រ្ដីសុខាភិបាលកម្ពុជា ដែលធ្វើការតាមដានការងារស្វែងរកជំងឺកូរ៉ូណាថ្មី ឬ COVID-19 បានយ៉ាងល្អ និងមានភាពច្បាស់លាស់។
សូមបញ្ជាក់ថា កម្ពុជាបានរកឃើញការឆ្លងមួយករណីនៅលើខ្លួនជនជាតិចិនម្នាក់ដែលធ្វើដំណើរពីក្រុងវូហាន ប្រទេសចិន ចូលមកកាន់ខេត្តព្រះសីហនុ ប្រទេសកម្ពុជា ហើយជនជាតិចិនម្នាក់នោះត្រូវបានព្យាបាលជាសះស្បើយ ហើយអនុញ្ញាតឱ្យចាកចេញពីប្រទេសកម្ពុជាទៅកាន់ប្រទេសចិនវិញដែរ។ ប៉ុន្ដែថ្មីៗនេះ មានការដួលសន្លប់ និងស្លាប់នោះ មិនមែនជាជំងឺកូរ៉ូណាថ្មី ឬ COVID-19 នោះទេ៕
ប្រភព៖ ក្រសួងព័ត៌មាន
អ្នកវិទ្យាសាស្រ្តរកឃើញថា ការនិយាយជាមួយក្មេងតូចច្រើន អាចជួយឱ្យគេរៀនឆាប់ចេះ
មនុស្សធំជាច្រើនយល់ថា ក្មេងតូចដែលមិនទាន់ចេះនិយាយ ប្រហែលជាមិនទាន់ចេះស្តាប់ និងមិនទាន់យល់ពីអ្វីដែលមនុស្សធំនិយាយទេមើលទៅ។
ហេតុនេះហើយទើបគេមិនសូវយកចិត្តទុកដាក់រវីរវល់ជាមួយក្មេងតូចប៉ុន្មានទេ នៅពេលដែលក្មេងតូចស្ថិតក្នុងវ័យដែលមិនទាន់អាចឆ្លើយតបឬមិនទាន់ចេះនិយាយ។ សកម្មភាពនេះត្រូវបានគេរកឃើញថា មិនមែនជារឿងល្អសម្រាប់កុមារតូចនោះទេ ព្រោះថ្មីៗនេះអ្នកវិទ្យាសាស្រ្តខាងការអភិវឌ្ឍកុមារតូច បានរកឃើញថា ក្មេងតូចៗអាចចេះស្តាប់ និងចេះគិតតាំងពីពួកគេនៅតូចៗម៉្លេះ។
យោងតាមការបញ្ជាក់របស់វេទិកាសេដ្ឋកិច្ចពិភពលោកបានលើកឡើងថា អ្នកវិទ្យាសាស្រ្តកុមារបានរកឃើញថា ការនិយាយជាមួយកុមារតូចៗ អាចជួយឱ្យពួកគេចំណាំពាក្យបានច្រើន និងរៀនឆាប់ចេះទាំងការនិយាយ និងការចងចាំលើផ្នែកផ្សេងៗទៀតនៅពេលពួកគេធំឡើង។ តាមការបញ្ជាក់របស់ស្ថាប័នវិទ្យាសាស្ត្រអប់រំអាមេរិក PNAS (Proceedings of the National Academy of Sciences of the United States of America) បានឱ្យដឹងថា ការព្យាយាមនិយាយមិនច្បាស់តាមកុមារ ឬបញ្ចេញសំឡេងតាមកុមារតូចមិនមែនជាវិធីល្អនោះទេសម្រាប់កុមារក្នុងការអភិវឌ្ឍសមត្ថភាព តែអាណាព្យាបាលគួរនិយាយពាក្យច្បាស់ៗ និងព្យាយាមទំនាក់ទំនងឱ្យបានច្រើនដោយការនិយាយជាមួយពួកគេបើទោះបីជាទារក ឬកុមារតូចមិនទាន់ចេះនិយាយតបមកយើងក៏ដោយ។
អ្នកអប់រំក្នុងស្ថាប័នខាងលើបានណែនាំថាអាណាព្យាបាលអាចព្យាយាមសាកល្បងនិយាយជាមួយកុមារតូចនូវពាក្យយឺតៗដដែលៗ ឬពាក្យទាំងឡាយណាដែលពួកគេងាយចងចាំដើម្បីពិនិត្យមើលពីការឆ្លើយតបរបស់ពួកគេ។
ច្បាស់ណាស់កុមារនឹងចងចាំ ឬយល់នូវអត្ថន័យដែលយើងកំពុងនិយាយ ព្រោះពួកគេពួកគេអាចមានសមត្ថភាពចាប់បាននូវអ្វីដែលមនុស្សធំចង់ឱ្យគេធ្វើ។
ម្យ៉ាងវិញទៀត ទន្ទឹមនឹងការព្យាយាមនិយាយជាមួយពួកគេ យើងក៏គួរទុកឱកាសឱ្យពួកគេធ្វើតាម រៀនបញ្ចេញសំឡេងតាម ឬឆ្លើយតបតាមដំណាក់កាល។
នៅពេលដែលពួកគេមិនទាន់ចេះនិយាយ យ៉ាងហោចណាស់ក៏អាចធ្វើឱ្យពួកគេឆ្លើយតបដោយកាយវិការ ដូចជាការណែនាំឱ្យគេសើច ឬឱ្យគេធ្វើសកម្មភាពណាងាយៗដើម្បីដឹងថា ពួកគេអាចយល់ ឬមិនទាន់យល់នូវអ្វីដែលមនុស្សធំកំពុងទំនាក់ទំនងជាមួយគេ។
ការទំនាក់ទំនងជាមួយកូនជួយអភិវឌ្ឍការចងចាំបានល្អ អ្នកវិទ្យាសាស្រ្តរកឃើញថា កុមារតូច ដែលមានអាណាព្យាបាលភ្ជាប់ទំនាក់ទំនងល្អ ឬមានវិធីសាស្រ្តក្នុងការទំនាក់ទំនង និងបង្រៀនបានល្អ ភាគច្រើនជាក្មេងដែលមានសមត្ថភាពឆាប់ចេះនិយាយមុនអាយុ និងអាចចងចាំពាក្យបានល្អជាងក្មេងដទៃ2ដង។
នៅពេលពួកគេចូលសាលារៀន ការចងចាំពីភាសា និងការយល់ពីអត្ថន័យនៃពាក្យនីមួយៗមានភាពឆាប់រហ័ស ហើយគេអាចនឹងរៀនបានលឿនជាងកុមារដែលអាណាព្យាបាលមិនបានហ្វឹកហាត់ ឬនិយាយជាមួយពួកគេពេលពួកគេនៅតូច។
ការចាប់ឱកាសអភិវឌ្ឍន៍សមត្ថភាពក្នុងការអភិវឌ្ឍភាសានៅវ័យក្មេងនេះ ត្រូវបានអ្នកវិទ្យាសាស្ត្រអប់រំរកឃើញថា មានប្រយោជន៍ខ្លាំងណាស់សម្រាប់ពេញមួយជីវិតតែម្តងព្រោះពួកគេអាចនឹងឈានទៅអភិវឌ្ឍសមត្ថភាពផ្នែកដទៃទៀតលឿនជាងកុមារទូទៅ។
ជាឧទាហរណ៍ កុមារម្នាក់មានសមត្ថភាពចងចាំផ្នែកភាសាល្អ ពួកគេក៏នឹងមានសមត្ថភាពអាន ឬចូលចិត្តអានផងដែរនៅពេលពួកគេធំឡើង។ ហេតុនេះហើយទើបធ្វើឱ្យពួកគេមានប្រភពព័ត៌មានច្រើនជាងក្មេងដទៃទៀត ឬមានកម្រិតបញ្ញា (IQ) ខ្ពស់ជាងក្មេងផ្សេងៗដែលទទួលបានព័ត៌មានតិចតួចពីការអាន ឬពីការស្តាប់ជាដើម។
តាមការបញ្ជាក់របស់ស្ថាប័នអប់រំ Sutton Trust នៅឆ្នាំ2010 បានបញ្ជាក់ថាកុមារអាយុ 5ឆ្នាំ មកពីគ្រួសារដែលមិនបានអប់រំល្អ ឬមិនបានភ្ជាប់ទំនាក់ទំនងល្អរវាងអាណាព្យាបាល និងកូនតូច មានកម្រិតយល់ដឹងផ្នែកពាក្យយឺតជាងកុមារដែលទទួលបានការភ្ជាប់ទំនាក់ទំនងល្អជាមួយមនុស្សធំដល់ទៅ 16ខែ។
ហេតុនេះអាណាព្យាបាលគួរចាប់ឱកាសនេះឱ្យបានប្រសិនបើកំពុងមានកូនតូចនៅក្នុងផ្ទះកុំឱ្យឱកាសនៃការអប់រំដ៏ល្អនេះរំលងផុត ដោយការយល់ឃើញថាកុមារមិនយល់អ្វីទាំងអស់៕
យុវជនគួររៀបខ្ទង់ចំណាយបែបណាដើម្បីអភិវឌ្ឍជីវិតបានល្អ?
ព្រោះវ័យនេះ ជាវ័យនៃការចាប់ផ្តើមនៃដំណើរជីវិតបែបឯករាជ្យ។ ប្រសិនបើយុវវ័យមានទម្លាប់ល្អក្នុងការចាយវាយ នោះជីវិតរបស់ពួកគេនឹងអាចអភិវឌ្ឍបានយ៉ាងប្រសើរទៅថ្ងៃអនាគតការគ្រប់គ្រងហិរញ្ញវត្ថុ ឬមានទម្លាប់ល្អក្នុងការចាយវាយ ជារឿងដ៏សំខាន់សម្រាប់យុវវ័យ ហើយជីវភាពក៏មានលក្ខណៈល្អប្រសើរផងដែរ តែប្រសិនបើពួកគេគ្រប់គ្រងថវិកាមិនល្អ ពួកគេត្រូវរស់នៅក្នុងជីវិតក្រីក្រយូរអង្វែង ឬត្រូវធ្លាក់ក្នុងសភាពដុនដាបពេញមួយជីវិតក៏អាចថាបានដែរ។
ពាក់ព័ន្ធនឹងបញ្ហានេះ លោក ង៉ែត ជូ អ្នកជំនាញផ្នែកហិរញ្ញវត្ថុ បានលើកឡើងថា យុវវ័យគួរចេះគិតគូរឱ្យបានល្អិតល្អន់ពីការគ្រប់គ្រងហិរញ្ញវត្ថុ ព្រោះបច្ចុប្បន្ននេះប្រជាជនមួយចំនួនកំពុងរស់នៅក្នុងស្ថានភាពសម្ភារនិយម និងចូលចិត្តចាយលុយច្រើនជាងសន្សំលុយ។ ហេតុនេះដើម្បីឱ្យជីវិតអភិវឌ្ឍបានល្អយុវជនគួរចាយលុយឱ្យបានត្រូវខ្ទង់ដោយក្នុងនោះលោកបែងចែករបៀបចាយជា 4ចំណុចគឺ ទី1 ការវិនិយោគលើការកសាងសមត្ថភាព។
ការកសាងសមត្ថភាពជារឿងសំខាន់ខ្លាំងណាស់សម្រាប់មនុស្សម្នាក់ៗ ព្រោះគ្រប់គ្នាត្រូវតែរៀន មិនអាចចៀសផុតបានទេ បើទោះបីជាមិនរៀននៅក្នុងសាលា ក៏ត្រូវរៀនពីការរស់នៅជាក់ស្តែងដែរទើបអាចអភិវឌ្ឍជីវិតបានល្អ។
ហេតុនេះ ការចំណាយក្នុងការវិនិយោគលើការអប់រំ ដូចជាការទៅរៀនបន្ត ឬរៀនបន្ថែមនូវជំនាញនានាដើម្បីក្លាយជាពលរដ្ឋល្អ ឬជាបុគ្គលដែលមានសមត្ថភាពខ្ពស់ ជារឿងល្អបំផុតសម្រាប់យុវវ័យ។ ក្រៅពីនេះ កាលណាយើងមានចំណេះដឹងខ្ពស់ យើងអាចនឹងមានគំនិតច្រើនក្នុងការស្វែងរកចំណូល ក៏ដូចជាចេះវិនិយោគប្រសើរជាងមុនផងដែរ។
លោក ង៉ែត ជូ បាននិយាយថា៖ «ជម្រើសសំខាន់ទី2 ដែលយុវជនគួរចាយនោះ គឺវិនិយោគដើម្បីបង្កើតប្រាក់ ដូចជាវិនិយោគលើផ្សាហ៊ុន (Stocks) វិនិយោគលើអចលនទ្រព្យ និងវិនិយោគដោយចូលហ៊ុនបង្កើតអាជីវកម្មជាដើម»។
លោកថា ការវិនិយោគរបៀបនេះជាការវិនិយោគដ៏ប្រសើរ បន្ទាប់ពីការវិនិយោគលើការកសាងសមត្ថភាពផ្ទាល់ខ្លួន។ ការវិនិយោគបន្ថែមនេះអាចនឹងជួយឱ្យយើងមានសមត្ថភាពក្នុងការវិភាគ ក៏ដូចជាការគិតពិចារណារឿងលុយកាក់ និងរឿងផ្សេងៗទៀត។ បន្ថែមពីលើនេះ វាក៏ជួយឱ្យយើងមានការសម្រេចចិត្តល្អប្រសើរជាងមុនដែរ ព្រោះកាលណាយើងដាក់លុយកាក់វិនិយោគ យើងត្រូវការប្រមូលព័ត៌មានឱ្យបានច្បាស់លាស់ជាមុនសិន។
លើសពីនេះទៅទៀតការចាយវាយដើម្បីវិនិយោគបន្តិចម្តងៗនឹងធ្វើឱ្យយើងមានបទពិសោធក្នុងការគ្រប់គ្រងហិរញ្ញវត្ថុ ក៏ដូចជាស្គាល់កាន់តែច្បាស់នូវច្រកសំខាន់ៗដែលធ្វើឱ្យចំណូលរបស់យើងកើនឡើងជាលំដាប់។
បន្ថែមពីលើជម្រើសខាងលើ ចំណុចទី3 ដែលយុវជនគួរចំណាយនោះគឺ ទិញផ្ទះបង់រំលស់ ឬសន្សំប្រាក់នៅធនាគារ។ លោកថា ការទិញផ្ទះបង់រំលស់ និងសន្សំប្រាក់នៅធនាគារ ជាជម្រើសល្អព្រោះប្រសិនបើយើងទិញផ្ទះបង់រំលស់ យើងនឹងនៅសល់ទ្រព្យ ហើយវាក៏ធ្វើឱ្យយើងមានវិន័យល្អក្នុងការគ្រប់គ្រងហិរញ្ញវត្ថុដែរ។
ការទិញផ្ទះ ត្រូវការចំណូលដែលមានស្ថិរភាពល្អ ទើបអាចធានានិរន្តរភាពក្នុងការបង់ប្រចាំខែបាន ហេតុនេះប្រសិនបើគ្រប់គ្រងមិនបានល្អទេនោះ យើងនឹងមានហានិភ័យ ហេតុនេះវាទាមទារឱ្យមានទម្លាប់ល្អ និងចាំបាច់តែម្តងត្រូវតែមានសមត្ថភាពគ្រប់គ្រងហិរញ្ញវត្ថុប្រចាំខែឱ្យបានច្បាស់លាស់។ ជម្រើសនេះល្អ តែមិនល្អខ្លាំង ដូចជាការចាយវាយលើជម្រើសទី1 និងជម្រើសទី2 ខាងលើទេ។ ម្យ៉ាងវិញទៀតផលចំណេញពីផ្ទះឡើង
ថ្លៃ ឬការប្រាក់ធនាគារ គឺមានអត្រាទាប។ចំណែកឯជម្រើសទី4 គឺកាត់បន្ថយការចំណាយលើភាពហ៊ឺហាតាមបែបយុវវ័យភ្លេចខ្លួន។ យុវវ័យគួរបង្កើនភាពចាស់ទុំ ឬកុំធ្វើខ្លួនដូចជាអ្នកនៅលីវជាច្រើនទៀតដែលចូលចិត្តទិញសម្ភារទំនើបៗ ចូលក្លិបកម្សាន្ត ឬចូលខារ៉ាអូខេជាដើម ព្រោះទង្វើទាំងអស់នេះ ជាជម្រើសអាក្រក់បំផុតដែលយុវជនខ្មែរមួយភាគធំចូលចិត្តប្រព្រឹត្ត។ សកម្មភាពនេះនឹងធ្វើឱ្យយើងខាតបង់ទាំងទ្រព្យធន ខាតបង់ទាំងពេលវេលា និងបាត់បង់ឱកាសកសាងសមត្ថភាពទៀតផង៕
ហេតុផលដែលស្ត្រីភាគច្រើនមិនមានអារម្មណ៍ចង់រួមរ័ក
សព្វថ្ងៃនេះមាននារីមិនតិចនាក់នោះទេ ដែលកំពុងពិបាកចិត្ដពិបាកហារមាត់និយាយពីបញ្ហាមួយនេះ ពីព្រោះពួកគាត់រកមិនឃើញសោះនូវ “ភាពសប្បាយ ឬតម្រេកនៃតណ្ហា” នៃចំណងមេត្រីភាពរវាងប្ដី និងប្រពន្ធ។ និយាយរួមគឺ ជីវភាពសិចរបស់ពួកគាត់ ត្រូវបានជួបនូវភាពរអាក់រអួលស្ទើរតែមិនដែលស្គាល់ពាក្យថា “ស្រណុកសុខស្រួល” រហូតបង្កើតឱ្យមានភាពសោះអង្គើយជាមួយដៃគូរួមជីវិតរបស់ពួកគាត់ថែមទៀតផង។
កម្រនឹងមាននារីណាដែលនៅស្ងៀមៗស្រាប់តែនឹកឃើញដល់តម្រូវការផ្លូវភេទនោះណាស់ ជាពិសេសចំពោះអ្នកដែលតែងកើតមានបញ្ហាបែបសោះកក្រោះនៅពេលរួមដំណេកតែម្ដង។ តាមធម្មតាស្ថានភាពនៃការគ្មានអារម្មណ៍ស្រើបស្រាលក្នុងរឿងស្នេហារបស់នារី តែងកើតមានក្រោយពេលមានរឿងតក់ស្លុតភ័យរន្ធត់យ៉ាងខ្លាំងខាងចិត្ដសាស្ដ្រ ឬដោយសារជំងឺផ្សេងៗ។ ទោះបីជាដោយសារមូលហេតុអ្វីក៏ដោយ ការគ្មានអារម្មណ៍ក្នុងពេលរួមរ័ក នឹងបង្កើតជាបញ្ហានៅក្នុងជីវិតរបស់នារីៗទាំងនោះ ជាពិសេសគឺក្នុងការរស់នៅជាប្ដីប្រពន្ធដ៏យូរអង្វែងតែម្ដង។ ការគ្មានអារម្មណ៍នឹងធ្វើឱ្យបាត់បង់ភាពមានសម្រើបដល់កំពូលក្នុងការរួមរ័ករវាងប្រុស និងស្រី បានសេចក្ដីថា ពុំទាន់ឈានទៅដល់សម្រើបដ៏កំពូលដែលមនុស្សគ្រប់រូបតែងតែចង់បាន និងចង់ឱ្យកើតមាន។ ទោះជាក្នុងសម័យណាក៏ដោយ ជំងឺគ្មានអារម្មណ៍របស់នារី ហាក់មានលក្ខណៈស្រដៀងគ្នា ខុសគ្នាបន្តិចត្រង់ចំណុចថានារីសម័យនេះងាយនឹង “រអ៊ូរទាំ” និងមានលក្ខខណ្ឌជាច្រើនសម្រាប់ “កែខៃ” ជាងសម័យបូរាណដែលនារីចូលចិត្ដលាក់ទុកក្នុងចិត្ដ។
ជាមួយនឹងករណីឧបស័គ្គក្នុងពេលរួមរ័កនេះ លោកវេជ្ជបណ្ឌិតឯកទេសខាងរោគស្ដ្រី (Gynecology) ឈ្មោះ Joelle Bensimhon បានកត់សម្គាល់ថា ក្នុងមួយថ្ងៃៗកាន់តែមានស្ត្រីច្រើនឡើងៗទៅជួបពិគ្រោះជាមួយគ្រូពេទ្យ ដោយសារមូលហេតុខាងលើនេះ ហើយក៏ត្រូវបានលោកវេជ្ជបណ្ឌិតណែនាំបន្ដឱ្យទៅជួបជាមួយអ្នកជំនាញខាងបញ្ហានេះ(សម្ពន្ធភាពសិច)។ អ្នកជំងឺតែងតែនិយាយប្រាប់គ្រូពេទ្យថា “ខ្លួនខ្ញុំដូចជាធម្មតា ខ្ញុំមិនពេញចិត្ដក្នុងការរួមរ័កជាមួយប្ដី ខ្ញុំមានឧបស័គ្គក្នុងពេលស្នេហា…។ យ៉ាងណាក៏ដោយតាមធម្មតា នារីក៏ដូចជាបុរសដែរ គឺចង់បានជីវិតប្ដីប្រពន្ធប្រកបដោយសុភមង្គល និងជីវភាពរួមរ័កប្រកបដោយភាពល្អរលូន និងផ្អែមល្ហែម។ អ្នកសិក្សាខាងរឿងសិចបានយល់ច្បាស់អំពីបញ្ហានេះ។ ជាក់ស្ដែងគឺគេខំស្រាវជ្រាវរកឱសថថ្មីៗសម្ដៅរំញោចអារម្មណ៍ស្រើបស្រាលរបស់នារី ឬស្វែងរកវិធានការផ្សេងៗ ដើម្បីស្ដារឡើងវិញនូវសមត្ថភាពដែលទាក់ទិនដល់ការបង្កើនអារម្មណ៍របស់ស្រី។ គេពិបាកនឹងវាស់ស្ទង់បានកម្រិតសម្រើបដល់កំពូលនៃការរួមរ័ករបស់ស្ត្រីណាស់។ ប្រសិនបើជឿលើគំរូសម្ដែងតាមខ្សែភាពយន្ដ គឺសម្រើបកំពូលក្នុងពេលរួមរ័កតែងតែគួបផ្សំជាមួយសញ្ញាប្រែប្រួលរបស់ទឹកមុខ ឬសម្រែកថ្ងូរ។ អាស្រ័យហេតុនេះនារីខ្លះក៏ភាន់ច្រឡំថា ខ្លួនមិនដែលមានអារម្មណ៍បានសុខស្រួល ឬមិនធ្លាប់មានសម្រើបដល់កំពូល ពីព្រោះពេលខ្លួនមានសម្រើប គេមិនធ្លាប់បានស្រែកថ្ងូរអ្វីសោះដូចក្នុងសាច់រឿងនោះឡើយ។
ក្រុមអ្នកជំនាញបានបញ្ជាក់ច្បាស់ថា នារីភាគច្រើនមានចំណុចសម្រើបខ្លាំងនៅខាងលើបបូរមាត់យោនី និង សិ (Clitoris) ជាងនៅតាមទ្វារមាស (Vaginal) ។ សម្រើបរបស់ទ្វារមាសច្រើនតែកើតមាននៅពេលក្រោយពេលរួមរ័ក ជួនកាលនៅពេលវ័យឈានដល់ខ្ទង់40ឆ្នាំប្លាយទើបនារីបានដឹងច្បាស់ ខណៈដែលពួកគេមិនអាចបកស្រាយឱ្យច្បាស់ថាបណ្តាលមកពីហេតុអ្វីនោះទេ។ អាស្រ័យដោយខ្វះការយល់ដឹង ទើបគូស្វាមីភរិយាខ្លះបានខ្ជះខ្ជាយពេលវេលានៅក្នុងជីវភាពរួមរ័កដោយអចេតនា ដែលកាន់តែធ្វើឱ្យជីវភាពសិចសោះអង្គើយជារៀងរហូតទៅ។ បញ្ហាសំខាន់មិនមែនរបៀបសម្ដែងរបស់នារីដែលមានសម្រើបដល់កំពូលនោះទេ តែគឺជាការពេញចិត្ដដែលកើតចេញពីសម្រើបឈានដល់កម្រិតកំពូល។ នៅពេលដែលទីតាំងនៃសម្រើបបានឈានដល់កម្រិតកំពូលដែលស្ថិតនៅក្នុងខួរក្បាលត្រូវទទួលឥទ្ធិពល វានឹងបញ្ចេញជាតិ Endorphines ដែលជាវត្ថុពិសេសបង្កើតឱ្យមានភាពសុខក្សេមក្សាន្ដ។ជំងឺគ្មានអារម្មណ៍រួមរ័កអាចកើតឡើងដោយមូលហេតុមួយចំនួនដូចជា អ្នកខ្លះធ្លាប់ជួបប្រទះនឹងបញ្ហា ខណៈពេលឈានចូលដល់ដំណាក់កាលយុវវ័យក៏ត្រូវបាត់បង់អស់សមត្ថភាពរួមរ័ក ហើយគ្រប់ការប៉ះពាល់រាងកាយក៏មិនបានបង្កើតឱ្យមានអារម្មណ៍ដែរ។ ក្នុងករណីនេះ រឿងរួមរ័កក៏ត្រូវចាត់ទុកថាជារឿងស្មោកគ្រោក និងគួរឱ្យមាក់ងាយ។ ជួនកាលជំងឺគ្មានអារម្មណ៍ ក៏កើតចេញពីការប៉ះពាល់គ្នាជាលើកដំបូង ហើយច្រើនតែត្រូវបកស្រាយថា ដោយសារអ្នកទាំងពីរខ្វះបទពិសោធ។ ពួកគេមិទាន់យល់ពីសារៈសំខាន់របស់ឥរិយាបថក្នុងពេលរួមរ័កជាលើកដំបូងនៅឡើយ។ នារីខ្លះកើតមានជំងឺគ្មានអារម្មណ៍ប្រភេទនេះក្រោយពេលសម្រាលកូន (ដែលអូសបន្លាយ និងដោយសារមានជំងឺផ្សេងៗ) និងអាស្រ័យដោយមានការប្រែប្រួលភ្លាមៗនៅម្ដុំឆ្អឹងត្រគាក ប៉ុន្ដែការគ្មានអារម្មណ៍ក្រោយពេលសម្រាលកូននេះវាមិនអាចស្ថិតស្ថេរយូរអង្វែងឡើយ។ វេជ្ជបណ្ឌិត Bensimhon មានមតិថា មុនដំបូងគេត្រូវគិតទៅដល់មូលហេតុច្របូកច្របល់របស់រាងកាយ។ មូលហេតុខ្លះដោយសារអ័រម៉ូន (Hormone) ឧទាហរណ៍ដូចជាដំណាក់កាលក្រោយពេលអស់រដូវ ដោយមានការប្រែប្រួលសរសៃប្រសាទ ឬដោយជំងឺទឹកនោមផ្អែម ឬក៏ការប្រើប្រាស់ឱសថខុស ឬច្រើនពេកដូចជា ការប្រើថ្នាំខាងសរសៃប្រសាទជាដើម។
យ៉ាងណាក៏ដោយ ជាដំណោះស្រាយ ស្ត្រីដែលបានជួបនឹងបញ្ហាខាងលើនេះ អាចព្យាយាមស្វែងយល់បន្ថែមពីខ្លួនឯងនូវចំណុច ក៏ដូចជាទីតាំងណាមួយជាតំបន់ផ្ដល់រំញោច និងសម្រើបដែលផ្ដល់ផលល្អក្នុងជីវិតសិច។ បន្ថែមពីនេះ ស្ត្រីទាំងអស់ក៏គួរតែមានភាពក្លាហានក្នុងការនិយាយដោយត្រង់ជាមួយដៃគូ ក៏ដូចជាស្វែងរកការប្រឹក្សាសុំយោបល់ល្អៗពីអ្នកជំនាញ ឬវេជ្ជបណ្ឌិតឯកទេសជាជំនួញ៕
ទីផ្សារលំនៅឋាននៅតែមានភាពល្អប្រសើរ ខណៈការអភិវឌ្ឍគេហដ្ឋានតម្លៃសមរម្យកំពុងអនុវត្ត
អ្នកជំនាញក្នុងវិស័យអចលនទ្រព្យបានអះអាងថា វិស័យលំនៅឋាននៅតែមានភាពល្អប្រសើរ ដោយសារតែតម្រូវការនៅតែបន្តកើនឡើង និងកំណើនសេដ្ឋកិច្ចត្រូវបានគេរំពឹងថា នឹងមានស្ថិរភាព។ កំណើននៃការសាងសង់ និងអភិវឌ្ឍន៍វិស័យលំនៅឋានបានកើតឡើងស្ទើរគ្រប់តំបន់ ជាពិសេសនៅតាមតំបន់ជាយៗក្រុង ដោយគេកត់សម្គាល់ឃើញថា មានការកើនឡើងខ្ពស់ ដែលស្របទៅនឹងតម្រូវការនៃការរស់នៅជាកម្មសិទ្ធិ ដែលកំពុងស្ថិតនៅក្នុងអត្រាខ្ពស់នៅឡើយ។
លោក សន សៀប ស្ថាបនិក និងជាអគ្គនាយកក្រុមហ៊ុន Key Real Estateបាន ប្រាប់កាសែតឡារ៉ែនពាណិជ្ជថា មិនថាស្ថិតក្នុងកាលៈទេសៈណានោះទេ តម្រូវការលំនៅឋានសម្រាប់ស្នាក់នៅជាកម្មសិទ្ធិផ្ទាល់ខ្លួន នៅតែបន្តមានជានិច្ច។
លោកបានបញ្ជាក់ថា៖“ចំពោះលំនៅឋានដែលជាប់ដី នៅមានទីផ្សារ ភាគច្រើនមាននៅតាមតំបន់ជាយក្រុង ហើយតម្លៃលក់ គឺពី5 ទៅ 10ម៉ឺនដុល្លារ ដែលមាននៅលើទីផ្សារច្រើន ជាគម្រោងថ្មីៗដែលត្រូវបានគេប្រកាសលក់។ ប៉ុន្តែនៅក្នុងហ្នឹង វាមានប្រភេទតម្លៃថ្លៃ និងតម្លៃថោក ទៅតាមអ្វីគេរៀបចំឌីហ្សាញឡើង ដែលគេឃើញថា នឹងទទួលបានភាពជោគជ័យ”។
លោកអគ្គនាយកបានបញ្ជាក់ទៀតថា៖“ជាទូទៅតម្រូវការលំនៅឋានសម្រាប់ស្នាក់នៅ ភាគច្រើនជាប្រភេទលំនៅឋានដែលមានតម្លៃមធ្យម និងក្រោមមធ្យម ដែលអាចមានតម្លៃត្រឹម 7ម៉ឺនដុល្លារចុះក្រោម ដោយសារតែអត្រានៃចំនួនប្រជាពលរដ្ឋកម្ពុជា ដែលអាចមានលទ្ធភាពក្នុងការរក ចំណូលបានកម្រិតមធ្យមចាប់ពី400 ទៅ 800ដុល្លារក្នុង 1ខែ ឬលើសពីនេះតិចតួចហាក់មានកម្រិតនៅឡើយ”។
លោកបានបន្តទៀតថា៖“និន្នាការក្នុងការទិញលំនៅឋានសម្រាប់ស្នាក់នៅជាកម្មសិទ្ធិ បច្ចុប្បន្ននេះ គឺស្ថិតក្នុងរូបភាពការទិញដោយការបង់រំលស់ប្រចាំខែជាមួយធនាគារទៅលើលំនៅឋាន ដែលមានតម្លៃត្រឹម 5ម៉ឺនដុល្លារចុះក្រោមក្នុងរយៈពេលជាង10 ទៅ 15ឆ្នាំ ហើយតម្លៃថ្លៃជាងនេះ គឺអាចលើសពីលទ្ធភាពរបស់ពួកគាត់ ប៉ុន្តែចំពោះគម្រោងលំនៅឋានតម្លៃសមរម្យវិញ នឹងមានតម្លៃ មិនលើសពី 3ម៉ឺនដុល្លារទេ”។
លោកឧកញ៉ា តេង រិទ្ធី អគ្គនាយកក្រុមហ៊ុន R Investment Group ត្រូវបានគេស្រង់សម្តីថា តម្រូវការលំនៅឋាននៅកម្ពុជាពិតជាមានកំណើនខ្ពស់មែន ខណៈដែលការផ្គត់ផ្គង់ហាក់នៅមានកម្រិត។ លោកបានមានប្រសាសន៍ថា លំនៅឋានដែលកំពុងមានទីផ្សារទូលាយនៅពេលនេះ គឺជាលំនៅឋានកម្រិតមធ្យម ដែលមានតម្លៃមិនលើសពី 7ម៉ឺនដុល្លារ។
លោកឧកញ៉ា បានមានប្រសាសន៍ថា៖“តម្លៃផ្ទះថ្លៃ ឬថោក គឺអាស្រ័យទៅតាមប្រភេទសំណង់ និងទីតាំងអភិវឌ្ឍន៍ ហើយភាគច្រើន ផ្ទះដែលមានតម្លៃសមរម្យ និងក្រោមមធ្យម ត្រូវបានអ្នកអភិវឌ្ឍន៍ធ្វើឡើងតម្រូវទៅតាមតំបន់ ស្របទៅនឹងកម្រិតជីវភាពរបស់ប្រជាជនដែលមានតម្រូវការ”។
លោកឧកញ៉ាបន្តទៀតថា សម្រាប់ផ្ទះដែលមានតម្លៃចាប់ពីជាង10 ម៉ឺនឡើងទៅរហូតដល់ 30ម៉ឺនដុល្លារ ក៏មានតម្រូវការដូចគ្នា ប៉ុន្តែសម្រាប់ប្រភេទអតិថិជនដែលមានចំណូលខ្ពស់ និងស្ថិតនៅក្នុងទីតាំងល្អ នៅក្បែរក្រុង និងជាទីប្រជុំជន ងាយអាស្រ័យផលពីការធ្វើអាជីវកម្ម ហើយផ្ទះប្រភេទនេះ ច្រើនត្រូវបានគេសាងសង់ជាប្រភេទ Shop House។ បច្ចុប្បន្ន សម្រាប់លំនៅឋាន ដែលមានតម្លៃមធ្យម និងក្រោមមធ្យម ត្រូវបានអ្នកវិនិយោគ សាងសង់ឡើងជាប្រភេទវីឡាទោល ឬបែបវីឡាកូនកាត់ ខណៈដែលលំនៅឋានប្រភេទនេះកំពុងតែមានការពេញនិយម។
ដោយឡែក ក្រសួងរៀបចំដែនដី នគរូបនីយកម្ម និងសំណង់ កាលពីថ្ងៃទី17 ខែកុម្ភៈ ឆ្នាំ2020 បានប្រកាសថា ក្រោមគោលនយោបាយជាតិស្តីពីលំនៅឋាន និងគោលនយោបាយស្តីពីការលើកទឹកចិត្ត និងការបង្កើតកម្មវិធីជាតិសម្រាប់ការអភិវឌ្ឍលំនៅឋានតម្លៃសមរម្យ ត្រូវបានបង្កើតឡើង ដើម្បីផ្តល់ឱកាសជូនប្រជាជនទូទាំងប្រទេសឱ្យមានលំនៅឋានសមរម្យ អាចរស់នៅបានប្រកបដោយផាសុកភាព សុវត្ថិភាព និងសេចក្តីថ្លៃថ្នូរ ជាពិសេសប្រជាពលរដ្ឋដែលមានប្រាក់ចំណូលមធ្យម ប្រាក់ចំណូលទាប និងក្រុមជនងាយរងគ្រោះ តាមរយៈការផ្តល់ជាកញ្ចប់វិធានការលើកទឹកចិត្តផ្នែកសារពើពន្ធ ផ្នែកវិនិយោគសាធារណៈ និងផ្នែកនិយតកម្ម ដើម្បីទាក់ទាញការចូលរួមពីវិស័យឯកជន ក្នុងការអនុវត្តគម្រោងអភិវឌ្ឍន៍លំនៅឋានតម្លៃសមរម្យ។ ដើម្បីទទួលបានគោលនយោបាយលើកទឹកចិត្តទាំងនេះ គម្រោងនានាត្រូវមានលំនៅឋានចំនួន 100ខ្នងមានតម្លៃទាប ចន្លោះពី 15,000ដុល្លារ ទៅ 30,000ដុល្លារ ហើយគម្រោងទាំងអស់ក៏ត្រូវស្ថិតនៅចម្ងាយប្រមាណ 20គីឡូម៉ែត្រពីទីក្រុងភ្នំពេញ និងត្រូវមានទីធ្លាបៃតង។
គួរបញ្ជាក់ដែរថា គម្រោងអភិវឌ្ឍន៍លំនៅឋានតម្លៃសមរម្យនេះ បច្ចុប្បន្នមានក្រុមហ៊ុនមួយកំពុងអភិវឌ្ឍលើគម្រោងចំនួន5 ដែលគម្រោងទាំងនោះមាននៅរាជធានីភ្នំពេញចំនួន 2គម្រោង ខេត្តកណ្តាលចំនួន 2គម្រោង និងខេត្តបន្ទាយមានជ័យ ចំនួន 1គម្រោង ដែលអាចសាងសង់លំនៅឋានសរុបបានប្រមាណជា 8,331ខ្នង។ លំនៅឋានដែលជាចំណែកឯកជន នឹងត្រូវដាក់លក់ក្នុងតម្លៃ 30,000(បីម៉ឺន)ដុល្លារអាមេរិកចុះក្រោម។
ឯកឧត្តម ជា សុផារ៉ា(កណ្តាល) រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ ឯកឧត្តមជា សុផារ៉ា ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ កាលពីពាក់កណ្ដាលខែកុម្ភៈនេះ បានចុះពិនិត្យវឌ្ឍនភាពគម្រោងអភិវឌ្ឍន៍លំនៅឋានតម្លៃសមរម្យរបស់ក្រុមហ៊ុនវើលដ៏ប្រ៊ីដ ហូម(World-Bridge Homes Co)ដែលជាគម្រោង1 ក្នុងចំណោមគម្រោងទាំង5 របស់ក្រុមហ៊ុននេះ។
សម្រាប់គម្រោងរបស់ក្រុមហ៊ុនវើលដ៏ប្រ៊ីដ ហូម ដែលឯកឧត្ដម ជា សុផារ៉ា ចុះទៅពិនិត្យខាងលើនេះ កំពុងសាងសង់លើផ្ទៃដីសរុបប្រមាណ 23ហិកតា មានលំនៅឋានចំនួន 2,457ខ្នង ស្ថិតនៅក្នុងភូមិកោះគរ ឃុំរកាខ្ពស់ ស្រុកស្អាង ខេត្តកណ្ដាល ចម្ងាយ8គីឡូម៉ែត្រពីក្រុងតាខ្មៅ ដែលមានទុនវិនិយោគប្រមាណ 73លានដុល្លារអាមេរិក។ ដោយសារតែនេះជាគម្រោងលំនៅឋានដែលមានតម្លៃសមរម្យដំបូងគេនៅកម្ពុជា ក្រុមហ៊ុនបានកំណត់គុណភាព និងស្តង់ដា សម្រាប់ឱ្យអ្នកអភិវឌ្ឍន៍លំនៅឋានតម្លៃសមរម្យបន្តបន្ទាប់អាចយកធ្វើជាគំរូបាន។
គម្រោងនេះនឹងរួមបញ្ចូលទាំងឧទ្យាន និងសួនច្បារ ទីធ្លាបៃតង ផ្សារ សាលារៀន មន្ទីរពេទ្យ និងអាចនឹងមានស្ថានីយរថយន្តក្រុងសាធារណៈ និងមានបម្រុងដីទុកសម្រាប់ក្រុមអាជីវកម្មតូចៗផងដែរ។ មកដល់ពេលនេះ ក្រុមហ៊ុនបានលក់ផ្ទះអស់ចំនួន 1,088ខ្នងហើយ ដែលស្មើនឹង 44% នៃចំនួនផ្ទះសរុប ក្នុងនោះអតិថិជនជាមន្ត្រីរាជការមានចំនួនជាង 23%។
ក្រុមហ៊ុនបានបញ្ចប់ការសាងសង់ផ្ទះជាស្ថាពរចំនួន 603ខ្នង ដោយគ្រោងនឹងប្រគល់ផ្ទះជូនអតិថិជននៅក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ហើយគ្រោងនឹងបញ្ចប់ការសាងសង់គម្រោងទាំងមូលនៅមុនដំណាច់ឆ្នាំ2020 នេះ។ នេះបើតាមការឱ្យដឹងពីបុគ្គលិកជាន់ខ្ពស់របស់ក្រុមហ៊ុនខាងលើ៕
ចម្ការបន្លែគ្រួសារជុំវិញផ្ទះ (តពីលេខមុន)
ត្រូវបំប៉នដី…មុននឹងឱ្យដីបំប៉នបន្លែ
បេះដូងសំខាន់ក្នុងការដាំបន្លែឱ្យធំធាត់លូតលាស់ល្អ គឺត្រូវស្គាល់ពីដីនៅកន្លែងដែលត្រូវដាំដុះនោះ ឬស្គាល់ពីការត្រៀមដីឱ្យស័ក្តិសមជាមួយបន្លែប្រភេទនីមួយៗ ដោយដីដែលស័ក្តិសមចំពោះការដាំបន្លែ គឺដីដែលមានលក្ខណៈម៉ដ្ឋធូរ មិនហាប់ណែន បង្ហូរទឹកចែកចាយបានល្អ សម្បូរទៅដោយជីអតិសុខុមប្រាណ(ជីធម្មជាតិ) និងសារធាតុអាហារបន្លែ។
ប្រភេទរបស់ដី និងការរៀបចំចាត់ការ
ដីខ្សាច់ និងដីល្បាយខ្សាច់ : លក្ខណៈជាដីមានខ្សាច់លាយឡំច្រើន ចាប់មកពូតជាដុំៗបាននៅពេលត្រូវទឹក ចែកចាយបង្ហូរទឹកបានល្អ តែភាពឧត្តមសម្បូរជីជាតិ ហាក់ដូចជាមានតិច។ ការរៀបចំចាត់ការចំពោះដីបែបនេះ ចូរប្រើប្រាស់ជីធម្មជាតិគ្របពីលើ លាយច្របល់ឱ្យចូលគ្នា គួរទុកដាំចំពោះតែបន្លែដែលមានអាយុខ្លី និងប្រើសម្ភារគ្របលើដី ដូចជា ចំបើង ដើម្បីរក្សាសំណើមមុខដី។
ដីម៉ដ្ឋធូរ : ម៉ដ្ឋធូរអាចពូតជាដុំ ជារូបរាងផ្សេងៗបានល្អ មានភាពស្អិតបន្តិចបន្តួច តែមានភាពឧត្តមសម្បូរខាងជីជាតិហាក់ដូចជាខ្ពស់។ ជាដីដែលស័ក្តិសមសម្រាប់ការដាំបន្លែស្រាប់ហើយ តែគួរប្រើជីអាចម៍គោ ជីធម្មជាតិ និងអង្កាមលាយច្របល់ចូលជាមួយផង នឹងជួយឱ្យគ្រោងសាងរបស់ដីរឹតតែល្អឡើង។ដីស្អិត(ដីឥដ្ឋ) : ស្អិតតតាត់ ទទឹកទឹកអាចពូតធ្វើជារូបរាងផ្សេងៗបាន នៅពេលស្ងួតនឹងក្លាយជាដុំរឹង ចែកចាយ និងជ្រាបទឹកអាក្រក់បំផុត តែបៀមទឹកបានល្អ។ ការរៀបចំចាត់ការដីប្រភេទនេះ យើងគួរប្រើដីខ្សាច់ ផេះអង្កាម អង្កាម កំបោរ (បើដីមានជាតិអាស៊ីត) ជីធម្មជាតិ ជីអាចម៍គោ កម្ទេចចំបើងលាយច្របល់ឱ្យចូលគ្នាល្អ។ គួរធ្វើការលើកជារង ធ្វើចង្អូរបង្ហូរទឹកដើម្បីជួយក្នុងការចែកចាយទឹក។
រឿងដែលគួរដឹងពាក់ព័ន្ធនឹងគ្រាប់ពូជ
នៅពេលសម្រេចចិត្តថា នឹងធ្វើចម្ការបន្លែគ្រួសារហើយ ដំណាក់កាលសំខាន់ដែលមិនគួរមើលរំលងនោះគឺ រឿងរបស់ការរៀបចំរកគ្រាប់ពូជ ដោយក្នុងពេលបច្ចុប្បន្ននេះ គ្រាប់ពូជបន្លែអាចចែកចេញជា 2ប្រភេទធំៗគឺ៖
1.គ្រាប់ពូជបន្លែក្នុងស្រុកធម្មតា: ជាគ្រាប់ពូជមែនទែន ដែលមានការថែរក្សាទុកតៗគ្នាមក ជាគ្រាប់ពូជដែលល្អឥតខ្ចោះ ផ្តល់ផលបានល្អបំផុតក្នុងការដាំដុះក្នុងតំបន់នោះ ព្រោះមានភាពរឹងមាំ ធន់នឹងរោគ និងសត្វល្អិត ត្រូវនឹងសភាពដីធ្លីក្នុងតំបន់ សភាពអាកាស អាចសម្របសម្រួលខ្លួនចូលជាមួយសភាពបរិស្ថានបានល្អ ដោយគ្រាប់ពូជមែនទែនទាំងនេះ អាចប្រមូលបានពីដើមដែលដាំទុកជាមេពូជតទៅទៀតបានក្នុងជុំនៃការផលិត។ ធ្វើឱ្យអ្នកដាំដុះមិនចាំបាច់ត្រូវប្រើសារធាតុគីមី ឬជីថ្នាំគីមីក្នុងការផលិតច្រើន ដែលធ្វើឱ្យកើតមានសុវត្ថិភាពដល់អ្នកផលិត និងអ្នកបរិភោគ កឱ្យកើតភាពស្ថិតស្ថេរខាងអាហារ និងរក្សាភាពសម្បូរឥតខ្ចោះខាងសរីរាង្គ។ តែដោយសារក្នុងពេលបច្ចុប្បន្ន ការដាំដុះបន្លែនៅក្នុងផ្ទះ យើងមានការសង្កត់ធ្ងន់លើការដាំបែបឧស្សាហកម្ម ធ្វើឱ្យគ្រាប់ពូជខាងជំនួញមានច្រើនឡើង ទើបគ្រាប់ពូជបន្លែក្នុងស្រុកធម្មតាបាត់បង់អស់ជាបណ្តើរៗ។
2.គ្រាប់ពូជបន្លែខាងជំនួញ : ចែកចេញជា 2ប្រភេទ
2/ 1.គ្រាប់ពូជលាយផ្សំបើក ( Open-Polli Nated ) ពេលជ្រើសរើសទិញ ចូរសង្កេតមើលខាងៗកញ្ចប់ដែលមានសរសេរពាក្យកាត់ថា (OP) ជាពូជបន្លែបែបកេសរបើកចំហ៖ អត្រាការលូតលាស់មធ្យម ផលបានមកមធ្យម តែធន់នឹងសភាពបរិស្ថាន អាចថែរក្សាគ្រាប់ទុកដាំបន្តបាននៅរដូវកាលបន្ទាប់ទៀតបាន ដោយផ្តល់ផលផលិតដូចដើម។
2/ 2.ពូជកូនកាត់ ( Hybrid Variety ) ឬដែលមានលេខកូដថា “F1” មានន័យថា គ្រាប់ពូជកូនកាត់ជួរទី1 របស់ពូជ 2 ពូជដែលមានលក្ខណៈខាងពូជអម្បូរផ្សេងពីគ្នា។ បច្ចុប្បន្នជាគ្រាប់ពូជបន្លែដែលប្រើប្រាស់ច្រើនបំផុតក្នុងការធ្វើឧស្សាហកម្មគ្រាប់ពូជ ព្រោះកូនកាត់ច្រើនតែមានផលផលិតខ្ពស់ និងគុណភាពល្អជាមេពូជ ដែលជាលក្ខណសម្បត្តិដែលហៅថា “ភាពលេចធ្លោរបស់កូនកាត់” តែកសិករអ្នកប្រើប្រាស់ ចាំបាច់ត្រូវតែទិញគ្រាប់ពូជកូនកាត់ថ្មីមកដាំគ្រប់រដូវកាលដាំដុះ(មិនអាចយកគ្រាប់ដែលបានមកពីការទុកផ្លែធ្វើពូជមកដាំបានទេ ព្រោះវានឹងមិនមានផ្លែឱ្យទេ)។(សូមរង់ចាំអានលេខបន្ត)
លីកអ៊ីតាលី មានកីឡាករផ្ទុកមេរោគវីរុសកូរ៉ូណា ច្រើនជាងចិនទៅទៀត
កីឡាករ King Udoh របស់ក្លិប US Pianese ត្រូវបានគេពិនិត្យឃើញថា មានលទ្ធផលវិជ្ជមាន (មានវីរ៉ុសកូរ៉ូណាប្រភេទថ្មី ឬCOVID-19) ក្រោយពេលដែលប្រកួតចប់ ជាមួយនឹងក្រុមបាល់ទាត់ Juventus U-23 ហើយមានអាការមិនស្រួលខ្លួន។
ប៉ុន្មានថ្ងៃក្រោយមក ក៏មានកីឡាករក្នុងក្រុម 3នាក់ និងជំនួយការគ្រូបង្វឹកម្នាក់ទៀត ត្រូវបានធ្វើតេស្ដរកឃើញវិជ្ជមាននូវមេរោគ Corona ហើយបច្ចុប្បន្ន ពួកគេកំពុងត្រូវបានបញ្ជូនទៅសម្រាកព្យាបាលនៅមន្ទីរពេទ្យ។ កីឡាករទី1 មានអាការក្ដៅខ្លួន និងឈឺក្បាល ខណៈដែលកីឡាករទី2 និងទី3 មិនស្រួលខ្លួននៅផ្ទះ ដោយមានអាការស្រដៀងគ្នានេះដែរ។
គួរបញ្ជាក់ដែរថា គិតមកទល់នឹងពេលនេះ លីកបាល់ទាត់អ៊ីតាលី ត្រូវបានគេរកឃើញថា មានកីឡាករបាល់ទាត់អាជីពចំនួន 3រូប រួមនឹងជំនួយការគ្រូបង្វឹកម្នាក់មានសញ្ញាវិជ្ជមាននៃវីរុស COVID-19 ។ នេះបើតាមលទ្ធផលតេស្តជាផ្លូវការ ក្រោយពេលដែលមានកីឡាករម្នាក់ដំបូងគេ ក្នុងក្រុមបានឆ្លងមេរោគនេះកាលពី 3ថ្ងៃមុន។ ចំនួននេះបើធៀបជាមួយនឹងប្រទេសចិន ដែលជាកន្លែងបង្កមេរោគនេះ គឺមិនមានកីឡាករម្នាក់កើតមេរោគនេះនៅឡើយទេ៕