Author: ធឿន មករា

វិស័យសំណង់ក្នុងខេត្តកំពត នៅតែមានសម្ទុះរីកចម្រើនខ្លាំង នៅដើមឆ្នាំ2020
ក្រសួង និងមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកំពត បានអះអាងថា វិស័យសំណង់ក្នុងខេត្តកំពតនៅតែមានសម្ទុះរីកចម្រើនខ្លាំងនៅដើមឆ្នាំ2020 នេះ ខណៈកាលពីឆ្នាំ2019 រដ្ឋបាលខេត្តនេះ បានចេញលិខិតអនុញ្ញាតសាងសង់បានចំនួន 238គម្រោង ក្រោមទុនវិនិយោគសរុប ជាង 3លានដុល្លារអាមេរិក។
ការលើកឡើងពីសំណាក់ក្រសួង និងមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកំពតនៅពេលនេះ ត្រូវបានធ្វើឡើងក្នុងពិធីបើកវគ្គផ្សព្វផ្សាយស្ដីពី “ច្បាប់សំណង់” នៅសាលប្រជុំសាលាខេត្តកំពត កាលពីចុងខែកុម្ភៈ ឆ្នាំ2020 កន្លងទៅនេះ។
នាឱកាសនោះ អភិបាលខេត្តកំពត លោក ជាវ តាយ បានលើកឡើងថា វិស័យសំណង់នៅក្នុងខេត្តកំពតក្នុងរយៈពេលប៉ុន្មានឆ្នាំកន្លងមកនេះ មានសម្ទុះរីកចម្រើនគួរឱ្យកត់សម្គាល់ ខណៈរដ្ឋបាលខេត្ត បានបង្កើនការត្រួតពិនិត្យ និងគ្រប់គ្រងសំណង់បានល្អប្រសើរ។ ជាក់ស្តែង លោកថា កាលពីឆ្នាំ2019 រដ្ឋបាលខេត្តបានចេញលិខិតអនុញ្ញាតសាងសង់បានចំនួន 238គម្រោង ក្រោមទុនវិនិយោគសរុប 3,187,300ដុល្លារអាមេរិក បើប្រៀបធៀបទៅនឹងឆ្នាំ2018 គឺមានកំណើន 80ភាគរយ។
លោកបន្តថា ក្នុងឆ្នាំ2019 កន្លងទៅនេះ ខេត្តកំពតបានបង្កើតគណៈកម្មការត្រួតពិនិត្យ និងគ្រប់គ្រងសំណង់ ដោយមានកិច្ចសហការចូលរួមពីគ្រប់ជំនាញពាក់ព័ន្ធ ធ្វើឱ្យវិស័យសំណង់ក្នុងខេត្ត មានសម្ទុះរីកចម្រើន និងមានលក្ខណៈល្អប្រសើរ។ ជាងនេះទៀត លោកថា រដ្ឋបាលខេត្ត ក្រុង ស្រុក បានចេញលិខិតអនុញ្ញាតសាងសង់ បានចំនួន 238គម្រោង ដែលមានផ្ទៃក្រឡាសរុប 90,299ម៉ែត្រការ៉េ, ទុនវិនិយោគសរុប 3,187,300 ដុល្លារអាមេរិក បើប្រៀបធៀបទៅនឹងឆ្នាំ2018 មានកំណើន 80 ភាគរយ ដោយមានត្រឹមតែ 142គម្រោង មានផ្ទៃក្រឡាសរុប 52,008 ម៉ែត្រការ៉េ ប៉ុណ្ណោះ។
លោកអភិបាលខេត្តកំពតរូបនេះអះអាងថា “ប្រជាពលរដ្ឋខេត្តកំពត មានជីវភាពរស់នៅកាន់តែល្អប្រសើរឡើង ពី 1ថ្ងៃទៅ 1ថ្ងៃ។ ចំណែកទីផ្សារអចលនទ្រព្យ កាន់តែមានតម្លៃខ្ពស់ សំណង់ធំៗជាច្រើនមានការសាងសង់ឡើង ពិសេសនៅក្នុងក្រុងកំពត និងស្រុកទឹកឈូ រួមទាំងតំបន់ទីប្រជុំជននៅតាមបណ្ដាស្រុកដទៃទៀត”។
ពាក់ព័ន្ធនឹងការលើកឡើងនេះ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់លោក លាង មុនីរិទ្ធ បានថ្លែងថា ការសាងសង់សំណង់ធំខ្ពស់ៗ ដែលសម្ទុះនៃការរីកចម្រើនរបស់វិស័យសំណង់នេះ បានទាមទារតម្រូវការនៃការពង្រឹងការគ្រប់គ្រង រាល់ដំណើរការ និងប្រតិបត្តិការក្នុងវិស័យសំណង់ រួមជាមួយអ្នកពាក់ព័ន្ធជុំវិញការងារ សំណង់កាន់តែមានភាពចាំបាច់ជាសារវន្ត។
លោកបន្តថា ដោយសារវិស័យសំណង់កាន់តែធំ កាន់តែខ្ពស់ និងកាន់តែស្មុគស្មាញ គឺកាន់តែទាមទារឲ្យមានការអនុវត្តយ៉ាងត្រឹមត្រូវ តាមបទដ្ឋានគតិយុត្ត បច្ចេកវិទ្យាស្តង់ដា និងបទប្បញ្ញត្តិបច្ចេកទេស ដើម្បីធានាភាពរឹងមាំ គុណភាព សោភណភាព និងចីរភាពនៃសំណង់ រៀបចំខ្លួនសម្រាប់សេដ្ឋកិច្ចឌីជីថល (Digital) ដើម្បីឆ្លើយតបនឹងបដិវត្តន៍ឧស្សាហកម្មទី 4 ផង ដើម្បីលើកតម្កើងអត្តសញ្ញាណជាតិ និងភាពសុខដុមរមនានៅក្នុងសង្គមផង។
គួររំឭកដែរថា ពាក់ព័ន្ធនឹងភាពរីកចម្រើននៃវិស័យសំណង់នៅខេត្តកំពតនេះដែរ បើយោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា ហៅកាត់ថា CDC បានបង្ហាញថា ចាប់តាំងពីឆ្នាំ2016 ដល់ដំណាច់ខែសីហា ឆ្នាំ2019 កន្លងមក ការវិនិយោគពីប្រទេសចិន នៅតាមបណ្តាខេត្តជាប់មាត់សមុទ្រ ដូចជាខេត្តព្រះសីហនុ ខេត្តកោះកុង និងខេត្តកំពត លើកលែងតែខេត្តកែប ទទួលបានទុនវិនិយោគប្រមាណ 2.6ពាន់លានដុល្លារអាមេរិក ដែលស្មើនឹងប្រមាណ 11.5ភាគរយ នៃទំហំវិនិយោគសរុបនៅកម្ពុជា ។
របាយការណ៍នោះបានបង្ហាញថា ការវិនិយោគនៅខេត្តកោះកុងមានទំហំវិនិយោគប្រមាណ 470លានដុល្លារអាមេរិក ខេត្តព្រះសីហនុ មានទំហំវិនិយោគចំនួន 2ពាន់លានដុល្លារអាមេរិក និងខេត្តកំពត មានទំហំវិនិយោគប្រមាណជាង 100លានដុល្លារអាមេរិក។
យ៉ាងណាក្ដី ភាគីពាក់ព័ន្ធ ដែលបានចូលរួមក្នុងពិធីបើកវគ្គផ្សព្វផ្សាយស្ដីពី “ច្បាប់សំណង់” នាខេត្តកំពត ក៏បានអះអាងដែរថា តាមរយៈច្បាប់សំណង់នឹងឈានទៅលើកកម្ពស់សុខុមាលភាពសាធារណៈគណនេយ្យភាព និងប្រសិទ្ធភាពក្នុងការប្រកបការងារ និងប្រកបវិជ្ជាជីវៈក្នុងវិស័យសំណង់ ដោយបង្កើនការជឿទុកចិត្ត របស់វិនិយោគិននៅក្នុងវិស័យសំណង់ និងជំរុញទីផ្សារអចលនទ្រព្យនៅក្នុងខេត្តកំពត កាន់តែរីកចម្រើនខ្លាំង នៅក្នុងឆ្នាំ2020 នេះ បន្ថែមទៀត៕
March 13, 2020
ធារី ចន្ថាប៊ីន ស៊ិតបាល់ហ្វ្រ៊ីឃីក រកគ្រាប់បាល់ដំបូងបានហើយ នៅលីកកំពូលម៉ាឡេស៊ី2020
កាលពីយប់មិញនេះ ក្រុមបាល់ទាត់ Perak FA បានយកជ័យជម្នះទៅលើក្រុម Petaling Jaya City ដោយលទ្ធផល 2ទល់នឹង0 ក្នុងការប្រកួតលីកកំពូលម៉ាឡេស៊ី ប្រចាំសប្តាហ៍ទី3។

ក្នុងនោះដែរ គ្រាប់ទី2 របស់ Perak ត្រូវបានរកទាត់បញ្ចូលទីដោយកីឡាករកូនកាត់ខ្មែរ-បារាំង ធារី ចន្ថាប៊ីន ដែលជាគ្រាប់បាល់ហ្វ្រ៊ីឃីកដ៏អស្ចារ្យមួយពីចម្ងាយ។ 1គ្រាប់នេះ បានធ្វើឱ្យក្រុមរបស់គេ ឡើងទៅឈរនៅលេខ2 ក្នុងតារាងពិន្ទុលីកកំពូលម៉ាឡេស៊ី ដោយមាន 7ពិន្ទុក្នុងដៃ ក្រោយប្រកួតបាន 3ប្រកួត ឈ្នះ2 និងស្មើ1 មិនទាន់ស្គាល់ពាក្យថា ចាញ់នៅឡើយ។

គួរបញ្ជាក់ផងដែរថា គិតមកទល់នឹងសប្តាហ៍ទី3 នេះ ធារី ចន្ថាប៊ីន រកគ្រាប់បាល់បាន 1គ្រាប់ និងបញ្ជូនបាល់បញ្ចូលទីបាន 1គ្រាប់ហើយ៕
March 13, 2020
ខ្សែការពារ Juventus ម្នាក់ ត្រូវបានរកឃើញថា មានផ្ទុកវីរុស COVID-19
កាលពីព្រឹកថ្ងៃទី11 ខែមីនា ឆ្នាំ2020 ម្សិលមិញនេះ ខ្សែការពារ Daniele Rugani របស់ក្លិប Juventus ម្នាក់ត្រូវបានគេធ្វើតេស្តរកឃើញថា មានផ្ទុកវីរុស COVID-19 ក្រោយពេលប្រកួតឈ្នះក្រុម Inter Milan ក្នុងក្របខ័ណ្ឌ Italy Serie A។

ក្លិប Juventus បានបញ្ជាក់ថា អ្នកដែលធ្លាប់ស្និទ្ធជាមួយកីឡាករខាងលើនេះ នឹងត្រូវដាក់នៅដោយឡែកសិន ដើម្បីតាមដានអាការ ខណៈដែលសាមីខ្លួនផ្ទាល់កំពុងសម្រាកនៅមន្ទីរពេទ្យ។ ក្រោយពីការប្រកាសថា កីឡាកររបស់ខ្លួនម្នាក់ឆ្លងមេរោគនេះហើយ UEFA ក៏អាចនឹងផ្អាកការប្រកួតរបស់ Juventus ទល់ក្រុម Lyon នៅក្នុងពានរង្វាន់ UEFA Champions League ខាងមុខផងដែរ។

គួរបញ្ជាក់ថា ខ្សែការពារ Daniele Rugani និងខ្សែប្រយុទ្ធ Christiano Ronaldo បានជុំគ្នា និងថតរូបជាមួយគ្នា ក្រោយការប្រកួតឈ្នះរបស់ពួកគេផងដែរ ហើយរូបគេទាំង 2នាក់ គឺជាកីឡាករដែលលេង11នាក់ដំបូង ក្នុងការប្រកួតនេះទៀតផង៕
March 13, 2020
ព្រះខ័នរាជ ធ្លាក់មកនៅលេខ3 ក្រោយ Thnah Quan Ninh មកលត់ដល់ទឹកដី
កាលពីយប់ថ្ងៃទី11 ខែមីនា ឆ្នាំ2020 ម្សិលមិញនេះ ក្រុមព្រះខ័នរាជស្វាយរៀង បានប្រកួតចាញ់ក្រុមលីកកំពូលវៀតណាម Thnah Quan Ninh ក្នុងលទ្ធផល 4ទល់នឹង1 ក្នុងការប្រកួតពានរង្វាន់ AFC CUP 2020 ប្រចាំពូល G ដែលធ្វើឡើងនៅពហុកីឡដ្ឋានជាតិរបស់កម្ពុជា។

ការប្រកួតក្នុងវគ្គទី1 ក្រុមព្រះខ័នរាជស្វាយរៀង ហាក់មានប្រៀបច្រើន ដោយមានការគ្រប់គ្រងបាល់ និងមានឱកាសល្អៗជាច្រើន តែរកបានត្រឹម 1គ្រាប់គត់ ដោយកីឡាករ Privat តាមពីក្រោយក្រុមភ្ញៀវដែលរកបាន 1គ្រាប់មុនរួចហើយ។ ចូលមកដល់តង់ទី2 វិញ ក្រុមវៀតណាមបានផ្លាស់ប្តូរពីការលេងបែបទប់ មកលេងបែបសម្រុកវិញ និងមានខ្សែប្រយុទ្ធទៅចងមុងនៅខាងលើជាច្រើន ដែលយុទ្ធសាស្ត្របែបនេះ បានធ្វើឱ្យព្រះខ័នរាជស្វាយរៀងមានការឆ្លេឆ្លាក្នុងតំបន់ការពារ រហូតរបូតដល់ទៅ 3គ្រាប់ទៀត និងបញ្ចប់ដោយលទ្ធផល 4ទល់នឹង1។

គួរបញ្ជាក់ដែរថា ក្រោយបញ្ចប់ការប្រកួត ក្រុមតំណាងឱ្យកម្ពុជានេះ បានធ្លាក់មកនៅលេខ3 ក្នុងពូល G វិញ ពោលគឺនៅពីក្រោមក្រុម Ceres Negros (ហ្វីលីពីន) និង Thnah Quan Ninh (វៀតណាម) ខណៈដែលក្រុម Bali United ស្ថិតនៅបាតតារាង៕
March 13, 2020
ស្ត្រីមានគភ៌ដែលចាញ់កូនខ្លាំង កូននៅក្នុងផ្ទៃ ច្បាស់ជារឹងប៉ឹងខ្លាំងដែរ
លទ្ធផលនៃការតាមដានពិនិត្យមើលស្ត្រីមានគភ៌ជាង 850,000នាក់ បានឱ្យដឹងថា ស្ត្រីមានគភ៌ដែលមានអាការចាញ់កូន មិនថាតែចាញ់ខ្លាំង ឬចាញ់តិចនោះទេ ច្រើនតែប្រសូតត្រូវចំកំណត់ពេល ហើយទារកដែលប្រសូតចេញមក ក៏មានសុខភាពរាងកាយរឹងមាំល្អដែរ តែសម្រាប់ស្ត្រីមានគភ៌ដែលគ្មានអាការចាញ់កូនសោះនោះ គិតជាភាគរយ 9.5% ច្រើនតែប្រសូតមុនពេលកំណត់ និងទារកខ្លះអាចនឹងស្លាប់បាត់បង់ជីវិតតាំងពីនៅក្នុងគភ៌ផងក៏មាន។
អាការចាញ់កូនកើតឡើងបានចំពោះអ្នកមានគភ៌គ្រប់រូប កើតឡើងដោយសារតែការដែលអ័រម៉ូនក្នុងរាងកាយប្រែប្រួលយ៉ាងឆាប់រហ័ស រហូតធ្វើឱ្យរាងកាយត្រូវបញ្ជូនសញ្ញាអ្វីម្យ៉ាងចេញមក ដូចជា ក្អួត អស់កម្លាំងល្វើយ ចង់តែគេងសម្រាករហូត ឆាប់ទទួលដឹងក្លិនលឿនជាងសព្វដង មានកង្វល់ និងមិនសប្បាយក្នុងខ្លួន ជាដើមតែអាការចាញ់កូនទាំងនេះនឹងកើតធ្ងន់ធ្ងរចំពោះតែក្នុងត្រីមាសដំបូងប៉ុណ្ណោះ លុះឈានចូលដល់អំឡុងត្រីមាសទី2 អាការចាញ់កូនទាំងនេះនឹងបាត់អស់ទៅវិញ ឬមានអាការស្រួលខ្លួនឡើងវិញជាងមុន។ បើស្ត្រីមានគភ៌មានអាការចាញ់កូន មិនថាច្រើន ឬក៏តិចយ៉ាងណានោះទេ គួរតែប្រាប់ទៅគ្រូពេទ្យឱ្យបានដឹងគ្រប់ពេលដែលទៅពិនិត្យរាងកាយ ដើម្បីគ្រូពេទ្យនឹងបានវាយតម្លៃសុខភាពទារកក្នុងគភ៌របស់អ្នកម្តាយបាន។
បើស្ត្រីមានគភ៌ម្នាក់ណាមានអាការចាញ់កូនខ្លាំង អាចញ៉ាំអាហារខាងក្រោមនេះ ដើម្បីសម្រាលអាការបាន ដូចជា :
1-ទឹកខ្ញីក្តៅៗ ឬត្រជាក់ ដែលមានរសជាតិផ្អែមតិចៗ។
2-បែងអាហារដែលចង់ទទួលទានចេញជាពេលអាហារតូចៗ ដើម្បីទទួលទានក្នុងពេលថ្ងៃ។
3-រៀបចំនំឃុកគី ឬនំគ្រែកឃើរ៍ ដុំតូចៗទុកយកមកញ៉ាំក្នុងពេលថ្ងៃ។
4-ញ៉ាំទឹកឱ្យបានច្រើនៗ និងសម្រាករាងកាយឱ្យបានគ្រប់គ្រាន់។
សម្រាប់អាការចាញ់កូន អាចនិយាយបានថា ជារឿងប្រក្រតីសម្រាប់អ្នកមានគភ៌ ចូរគិតថាចាញ់កូនខ្លាំង កូនរឹងប៉ឹងខ្លាំង ព្រោះបានបញ្ចេញអ័រម៉ូនការមានជីវិតចេញមកច្រើន តែសម្រាប់ស្ត្រីមានគភ៌ដែលគ្មានអាការចាញ់កូនសោះនោះក៏មិនចាំបាច់កង្វល់ដែរ បើពិនិត្យរាងកាយគ្រប់យ៉ាងប្រក្រតីនោះ ក៏បញ្ជាក់ថា អ្នកជាម្តាយដែលសំណាងល្អមែនទែន ដែលមិនចាំបាច់នឿយហត់ជាមួយអាការចាញ់កូន៕
March 13, 2020
ស្រ្ដីគួរយល់ដឹង! ពិតទេ វ័យជ្រេបន្ដិចសុដន់កាន់តែយារធ្លាក់?
ភាគច្រើនអ្នកតែងតែយល់ថា ស្រ្តីដែលរៀបការរួចហើយមានកូន នោះសុដន់របស់គាត់នឹងមានសភាពយារធ្លាក់ ប៉ុន្តែវាមិនពិតទាំងស្រុងនោះទេ ព្រោះពេលខ្លះអាស្រ័យលើវ័យ ហើយវ័យខ្លះក៏អាចប្រឈមនឹងបញ្ហាសុដន់យារធ្លាក់ខ្លាំងផងដែរ ដោយផ្អែកលើទម្លាប់អាក្រក់របស់គាត់ជារៀងរាល់ថ្ងៃ។ ជាធម្មតា ការធ្លាក់យារសុដន់ កើតឡើងក្រោយពីស្ត្រីឈានដល់វ័យ40ឆ្នាំ ប៉ុន្តែវាក៏អាចកើតឡើងមុនអាយុនេះផងដែរ។ កត្តាផ្សេងទៀតដែលធ្វើឱ្យសុដន់ធ្លាក់យារមានដូចជា ការបំបៅដោះកូន ការមានផ្ទៃពោះ ការអស់រដូវ ការស្រក់ទម្ងន់ខ្លាំង ឬការឡើងទម្ងន់ខ្លាំង ការខ្វះជីវជាតិ ការធ្វើលំហាត់ប្រាណដែលធ្វើឱ្យអស់កម្លាំង និងការពាក់អាវទ្រនាប់ដែលមិនស័ក្តិសមជាដើម។
ជាទូទៅអ្នកតែងចំណាយពេលជាច្រើនក្នុងការថែរក្សាសម្រស់ផ្ទៃមុខជាមួយនឹងការបិទម៉ាស ឬប្រើផលិតផលផ្សេងៗ ដើម្បីទប់ស្កាត់ភាពចាស់មុនអាយុ ដោយពុំសូវបានចាប់អារម្មណ៍ទេ អំពីបញ្ហាដងខ្លួន ជាពិសេសផ្នែកដើមទ្រូង។ ការពាក់អាវទ្រនាប់មិនបានត្រឹមត្រូវដូចជា តឹងពេក ឬធំពេកអាចពន្លឿនដល់ដំណើរការយារធ្លាក់របស់សុដន់បានយ៉ាងឆាប់រហ័ស។ ហេតុដូចនេះ អ្នកគួរជ្រើសរើសប្រភេទអាវទ្រនាប់ណា ដែលសមស្របជាមួយនឹងទំហំរបស់អ្នក ទើបជាការល្អប្រសើរ។
មួយវិញទៀតទង្វើនៃការធ្វើលំហាត់ប្រាណ ក៏ជាផ្នែកមួយដ៏សំខាន់ផងដែរ វាមិនត្រឹមតែធ្វើឱ្យអ្នកមានសុភាពល្អប៉ុណ្ណោះទេ ក៏ប៉ុន្តែវាថែមទាំងជួយឱ្យអ្នកមានរាងស្អាត សិចស៊ី និងចៀសផុតពីបញ្ហាសុដន់យារធ្លាក់មុនវ័យបានថែមទៀតផង។ បើតាមការសិក្សាស្រាវជ្រាវបានបង្ហាញឱ្យដឹងថា ការថែរក្សាតុល្យភាពនៃទម្ងន់ឱ្យនៅនឹង ក៏ជាវិធីសាស្ត្រដ៏មានប្រសិទ្ធភាពមួយផងដែរ ក្នុងការចៀសផុតពីបញ្ហាសុដន់យារធ្លាក់។ ក្រៅពីនោះអ្វីដែលសំខាន់មួយទៀតគឺ ការងូតទឹកក្តៅ វាក៏អាចជួយឱ្យអ្នកមានអារម្មណ៍ស្រស់ថ្លា បន្ទាប់ពីការនឿយហត់ ប៉ុន្តែវាអាចបណ្ដាលឱ្យខូចទ្រង់ទ្រាយទ្រូងរបស់អ្នកបាន។ បញ្ហាផ្សេងទៀតដូចជាមហារីកសុដន់ ឬជំងឺទាក់ទងនឹងផ្លូវដង្ហើម ការទទួលទានជាតិនីកូទីនច្រើនពេក និងការទទួលទានគ្រឿងស្រវឹង ក៏អាចធ្វើឱ្យសុដន់ធ្លាក់យារផងដែរ។ ក៏ប៉ុន្តែបញ្ហាធ្លាក់យារនេះ យើងអាចការពារបានតាមរយៈរូបមន្តធម្មជាតិងាយៗដូចខាងក្រោមនេះ៖
1. ត្រសក់ និងផ្នែកលឿងនៃស៊ុត
ម៉ាសដែលធ្វើមកពីការលាយបញ្ចូលគ្នានៃផ្លែត្រសក់ និងផ្នែកលឿងនៃស៊ុត គឺពិតជារូបមន្តដ៏អស្ចារ្យក្នុងការជួយពង្រឹងសុដន់។ កិនត្រសក់មួយផ្លែឱ្យម៉ដ្ឋ បន្ទាប់មកបន្ថែមផ្នែកលឿងនៃស៊ុតចំនួនមួយ និងប្រេងអូលីវមួយស្លាបព្រាកាហ្វេ ដើម្បីលាយបញ្ចូលគ្នាឱ្យស្មើសាច់បន្តិច។ បន្ទាប់មក ចូរលាបទៅលើសុដន់របស់អ្នក ហើយទុកកន្លះម៉ោង មុននឹងលាងចេញជាមួយនឹងទឹកត្រជាក់។ ចូរធ្វើបែបនេះរយៈពេលមួយសប្តាហ៍ម្តង ដើម្បីធ្វើឱ្យសុដន់របស់អ្នកតឹងណែនល្អ។
2. ផ្នែកសនៃស៊ុត
ផ្នែកសនៃស៊ុតគឺជារូបមន្តមួយផ្សេងទៀត ដើម្បីការពារកុំឱ្យសុដន់យារ ដោយសារតែវាមានសារធាតុចិញ្ចឹមដ៏សំខាន់។ យកផ្នែកសនៃស៊ុតវាយក្រឡុករហូតទាល់តែចេញពពុះ។ យកស៊ុតដែលវាយច្របល់ហើយនេះលាបនៅលើសុដន់របស់អ្នក និងទុកចោលរយៈពេលកន្លះម៉ោងចាំលាងវាចេញ។ ព្យាយាមធ្វើបែបនេះមួយសប្តាហ៍ម្តង ដើម្បីពង្រឹងភាពតឹងណែនរបស់សុដន់។
3. ការហាត់ប្រាណ
អ្នកត្រូវតែធ្វើការហាត់ប្រាណជារៀងរាល់ថ្ងៃ ប្រសិនបើអ្នកចាប់អារម្មណ៍ថា សុដន់របស់អ្នកបានផ្ដើមយារធ្លាក់។ ការហាត់ប្រាណនេះបានជួយដោះស្រាយបញ្ហាសុដន់ និងពង្រឹងសាច់ដុំជុំវិញដើមទ្រូង។ ការសង្កត់ទ្រូងការធ្វើចលនាដៃលើកដៃឡើងលើ អាវ៉ង់ សុទ្ធសឹងតែជាលំហាត់ប្រាណដែលជួយឱ្យសុដន់របស់អ្នកតឹងណែនល្អ។
4. ប្រើប្រេងអូលីវ
មានសារធាតុចិញ្ចឹមមួយចំនួននៅក្នុងប្រេងអូលីវ។ គ្រឿងផ្សំទាំងនេះអាចជួយការពារកុំឱ្យសុដន់ធ្លាក់យារបាន ហើយវាក៏ធ្វើឱ្យស្បែករបស់អ្នករលោងស្អាតផងដែរ។ ចាក់ប្រេងអូលីវលើបាតដៃរបស់អ្នក ហើយយកមកត្រដុសនឹងបាតដៃទាំងពីរចុះឡើង ដើម្បីឱ្យមានកម្តៅ។ បន្ទាប់មក សឹមយកមកលាបម៉ាស្សាថ្មមៗលើសុដន់របស់អ្នកចុះឡើងៗ។ ធ្វើបែបនេះថ្មមៗរយៈពេល15នាទី។ ចូរធ្វើបែបនេះឱ្យបានរយៈពេល4 ឬ5ដងក្នុងមួយសប្តាហ៍ នោះអ្នកនឹងឃើញពីប្រសិទ្ធភាពរបស់ប្រេងអូលីវ។
5. ប្រទាលកន្ទុយក្រពើ
ប្រទាល់កន្ទុយក្រពើមានសារធាតុជាច្រើន ដើម្បីជួយពង្រឹងសុដន់ និងជួយកុំឱ្យស្បែកសុដន់ធ្លាក់យារ។ យកទឹក ឬជាតិអន្ធិលនៃប្រទាលកន្ទុយក្រពើទៅលាបលើសុដន់ និងយកមកម៉ាស្សាថ្មមៗជារង្វង់មូលលើសុដន់រយៈពេល10នាទី និងទុកចោលរយៈពេល10នាទីទៀត ហើយបន្ទាប់មកលាងចេញជាមួយនឹងទឹកក្តៅឧណ្ហៗ។ ចូរធ្វើបែបនេះឱ្យបានពី4ទៅ5ដងក្នុងមួយសប្ដាហ៍ ដើម្បីទទួលបាននូវប្រសិទ្ធភាពល្អជាទីគាប់ចិត្ត៕
March 13, 2020
ក្រសួងកសិកម្ម ជំរុញឱ្យបង្កើនការអនុវត្តកសិកម្មល្អ និងស្តង់ដាកសិកម្មសរីរាង្គ
ក្រសួងកសិកម្ម រុក្ខាប្រមាញ់ និងនេសាទ និងភាគីពាក់ព័ន្ធ បានលើកឡើងប្រហាក់ប្រហែលគ្នាថា ការជំរុញគម្រោងលើកកម្ពស់ការអនុវត្តកសិកម្មល្អ (GAP) ឱ្យមានប្រសិទ្ធភាព និងជំរុញការអនុម័តស្ដង់ដាកសិកម្មសរីរាង្គជាតិឱ្យបានឆាប់រហ័ស គឺជាគន្លឹះសំខាន់ក្នុងការលើកស្ទួយវិស័យកសិកម្មដែលកំពុងជួបបញ្ហាប្រឈម។
ការលើកឡើងនេះ ត្រូវបានធ្វើឡើង នៅក្នុងពិធីបិទកិច្ចប្រជុំបូកសរុបលទ្ធផលការងារឆ្នាំ2019 និងលើកទិសដៅការងារឆ្នាំ2020 របស់អគ្គនាយកដ្ឋានកសិកម្ម ក្រោមការចូលរួម ពីថ្នាក់ដឹកនាំក្រសួង អង្គភាពក្រោមឱវាទ មន្ទីរកសិកម្ម រុក្ខាប្រមាញ់ និងនេសាទ រាជធានី-ខេត្ត និងមន្ត្រីអគ្គនាយកដ្ឋាន ប្រមាណ 500នាក់ ដែលធ្វើឡើងកាលពីចុងខែកុម្ភៈ កន្លងទៅ។
នាឱកាសនោះដែរ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ឯកឧត្តម វេង សាខុន បានទទួលស្គាល់ថា វិស័យកសិកម្មកម្ពុជា មានបញ្ហាជាច្រើនដែលត្រូវដោះស្រាយ ហើយបញ្ហាទាំងនោះត្រូវមានការដោះស្រាយជាប្រព័ន្ធ។ លើសពីនេះ ឯកឧត្តម នៅតែចាត់ទុកវិស័យកសិកម្ម ជាវិស័យស្នូលក្នុងការរួមចំណែកដល់កំណើនសេដ្ឋកិច្ច និងការពារសន្តិសុខសង្គម កាត់បន្ថយភាពក្រីក្រ ជីវភាពកសិករ និងការពារបរិស្ថាន។ ដូច្នេះក្រសួងកសិកម្ម និងភាគីពាក់ព័ន្ធបង្កើតកិច្ចប្រជុំនេះឡើង ដើម្បីពិភាក្សារួមគ្នា និងផ្ដោតការយកចិត្តទុកដាក់កាន់តែខ្លាំងលើការអនុវត្តកសិកម្មល្អ (GAP) ពិសេសឈានទៅជំរុញកសិកម្មសរីរាង្គកម្ពុជាកាន់តែប្រសើរឡើង។
ឯកឧត្តមក៏បានអះអាងឱ្យដឹងដែរ អំពីលទ្ធផលនៃវិស័យកសិកម្មថា តាមការវាយតម្លៃរបស់អង្គភាពជំនាញបានបង្ហាញឱ្យឃើញថា ក្នុងឆ្នាំ2019 វិស័យកសិកម្ម សម្រេចទទួលបានអត្រាកំណើន ផ.ស.ស. ពិតនៃវិស័យកសិកម្ម ចំនួន4%។ អនុវិស័យដំណាំកសិកម្ម សម្រេចបានក្នុងរង្វង់ 13,7% ប្រហាក់ប្រហែលនឹងឆ្នាំ2018 តែការនាំចេញមានទំហំកើនឡើង។
ឯកឧត្តមបញ្ជាក់ថា៖ “បើទោះបី កំណើនផលិតកម្មដំណាំខ្លះ មានការធ្លាក់ចុះបន្តិចក្ដី តែដំណាំកសិកម្មយុទ្ធសាស្ត្រមួយចំនួន ក៏ដូចជាការនាំចេញ គឺនៅរក្សាកំណើនខ្ពស់ដដែល ដូចជាដំណាំដំឡូងមី បន្លែ ដំណាំចេកអំបូងលឿង ស្វាយកែវរមៀត និងគ្រាប់ស្វាយចន្ទីជាដើម។ ជាមួយនេះ គុណភាពអង្ករកម្ពុជា ដែលនៅតែមានឧត្តមភាពប្រកួតប្រកួតប្រជែង និងទទួលបាននូវការលើកតម្កើងកេរិ៍្តឈ្មោះនៅលើឆាកអន្តរជាតិក្នុងរយៈពេល 4ឆ្នាំជាប់ៗគ្នា ជាពិសេស អង្ករក្រអូបប្រណីតពូជស្រូវផ្ការំដួលរបស់កម្ពុជា ត្រូវបានទទួលស្គាល់ថា មានគុណភាពល្អ និងមានរសជាតិឆ្ងាញ់នៅលើសកលលោក”។
ជាមួយគ្នានោះដែរ កម្ពុជាបានចរចាបើកទីផ្សារ និងពង្រីកទំហំនៃការនាំចេញផលិតផលដំណាំសំខាន់ៗដែលកំពុងដំណើរការចរចាពិធីសារ ស្តីពីលក្ខខណ្ឌតម្រូវភូតគាមអនាម័យ សម្រាប់ការនាំចេញផ្លែស្វាយស្រស់ និងផ្លែមៀនប៉ៃលិន ទៅកាន់ទីផ្សារប្រទេសចិន ការចុះបញ្ជីសហគ្រាស និងការបញ្ចប់ពិធីសារ ស្តីពីលក្ខខណ្ឌតម្រូវភូតគាមអនាម័យក្នុងការនាំចេញផ្លែស្វាយស្រស់ទៅកាន់សាធារណរដ្ឋកូរ៉េ និងផ្លែមៀនប៉ៃលិនសម្រាប់ទីផ្សារប្រទេសថៃ ផងដែរ។ នេះជាការលើកឡើងបន្ថែម ពីឯកឧត្តមរដ្ឋមន្ត្រីក្រសួងកសិកម្ម។
ក្នុងនោះដែរ ទន្ទឹមនឹងការទទួលបានលទ្ធផលខាងលើនេះ ក្នុងគោលដៅបន្តជំរុញការអនុវត្តកសិកម្មល្អ និងស្តង់ដាកសិកម្មសិរីរាង្គ ឱ្យកាន់តែមានការរីកចម្រើន ឯកឧត្តមបានជំរុញ និងបានបន្ថែមទៀតនូវអនុសាសន៍មួយចំនួន សម្រាប់ជាមូលដ្ឋានយកទៅអនុវត្តបន្ត ដើម្បីជំរុញឱ្យបង្កើនការអនុវត្តកសិកម្មល្អ និងស្តង់ដាកសិកម្មសរីរាង្គកម្ពុជារួមមាន៖
ទី1. ត្រូវបន្តរៀបចំ និងពង្រឹងការអនុវត្តប្រកបដោយមនសិការវិជ្ជាជីវៈនូវក្របខ័ណ្ឌយុទ្ធសាស្ត្រ គោលនយោបាយ និងលិខិតបទដ្ឋានគតិយុត្ត ដែលបម្រើឱ្យការងារគ្រប់គ្រងផលិតកម្មដំណាំ ការត្រួតពិនិត្យគុណភាពពូជដំណាំ និងធាតុចូលកសិកម្ម ការគ្រប់គ្រង និងប្រើប្រាស់ដីកសិកម្ម ការអនុវត្តកសិកម្មល្អ និងស្តង់ដាកសិកម្មសរីរាង្គជាដើម។
ទី.2 ត្រូវបន្តជំរុញការសិក្សាស្រាវជ្រាវបច្ចេកទេសផលិតកម្មដំណាំ បន្សុទ្ធ និងពង្រីកពូជដំណាំដែលមានគុណភាពល្អ ធន់ទ្រាំនឹងការប្រែប្រួលអាកាសធាតុ និងមានតម្លៃបន្ថែមខ្ពស់។
ទី.3 បន្តការបណ្តុះបណ្តាល និងផ្ទេរបច្ចេកវិទ្យាកសិកម្មទំនើប ដោយផ្តោតលើស្តង់ដាកសិកម្មសុវត្ថិភាពឱ្យបានទូលំទូលាយ។ ជំរុញការធ្វើពិពិធកម្មដំណាំសាកវប្បកម្ម ដំណាំបន្លែដែលមានតម្រូវការទីផ្សារខ្ពស់ ប្រកបដោយគុណភាព និងសុវត្ថិភាពដែលអាចជំនួសការនាំចូល និងបម្រើការនាំចេញ តាមរយៈការពង្រីកទីផ្សារប្រមូលផ្តុំ បោះដុំ និងចែកចាយនៅតាមសហគមន៍កសិកម្ម។ ជាពិសេសត្រូវចៀសវាងការប្រើប្រាស់សារធាតុគីមី ក្នុងផលិតកម្មដំណាំកសិកម្មដែលនាំឱ្យប៉ះពាល់ដល់សុខុមាលភាពសាធារណៈ តាមស្មារតីនៃអនុសាសន៍ដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី។
ទី.4 ត្រូវពង្រឹងរចនាសម្ព័ន្ធគ្រប់គ្រង ដឹកនាំ និងអាជីវកម្មរបស់សហគមន៍កសិកម្មឱ្យមានលក្ខណៈជាអាជីពក្នុងធុរកិច្ចកសិកម្ម និងសហការជាមួយវិស័យឯកជនដើម្បីអភិវឌ្ឍខ្សែចង្វាក់តម្លៃលើមុខដំណាំសំខាន់ៗតាមរយៈការអនុវត្តកសិកម្មតាមកិច្ចសន្យា និងកិច្ចសហការជាមួយអន្តរស្ថាប័នពាក់ព័ន្ធ រដ្ឋបាលថ្នាក់ក្រោមជាតិ។
ទី.5 ត្រូវពង្រឹង និងពង្រីកសមត្ថភាព មន្ទីរពិសោធន៍ជាតិកសិកម្ម ក្នុងការវិភាគ និងវាយតម្លៃគុណភាពធាតុចូលកសិកម្ម (ពូជ ជី ថ្នាំកសិកម្ម) គុណភាពដី និងកម្រិតសំណល់ថ្នាំកសិកម្មក្នុងផលិតផលកសិកម្ម ដី និងទឹក ដោយត្រូវសហការយ៉ាងជិតស្និទ្ធជាមួយគ្រប់ដៃគូពាក់ព័ន្ធទាំងអស់។
ទី6. ត្រូវពង្រឹងវិធានការការពារដំណាំ អនាម័យ និងភូតគាមអនាម័យ តាមរយៈការតាមដានវាយតម្លៃ ការព្យាករ និងការអន្តរាគមន៍កម្ចាត់សមាសភាពចង្រៃលើដំណាំ ការត្រួតពិនិត្យ និងចុះបញ្ជីកសិដ្ឋាន ការអនុវត្តកសិកម្មល្អ ពង្រឹងយន្តការទប់ស្កាត់ការឆ្លងរាលដាលនូវសមាសភាពចង្រៃ និងរឹតបន្តឹងការនាំចូលកសិផលមិនមានគុណភាព និងគ្មានសុវត្ថិភាពដែលនាំឱ្យប៉ះពាល់ដល់ផលិតកម្មដំណាំក្នុងស្រុកសុខុមាលភាពសាធារណៈ និងសម្រាប់ការនាំចេញ។
ទី7. បន្តពង្រឹងប្រសិទ្ធភាពសេវាពិសោធន៍វិភាគក្នុងមន្ទីរពិសោធន៍ ដោយត្រូវបំពាក់ឧបករណ៍វិភាគសំណល់ថ្នាំកសិកម្ម និងសេវាត្រួតពិនិត្យភូតគាមអនាម័យ ដើម្បីលើកកម្ពស់ភាពប្រកួតប្រជែងនៃការនាំចេញ ដោយជំរុញសេវាត្រួតពិនិត្យភូតគាមអនាម័យឱ្យកាន់តែកៀកនឹងអ្នកប្រើប្រាស់ មានភាពងាយស្រួលព្រមទាំងដាក់ឱ្យដំណើរការស្នាក់ការផ្តល់សេវាភូតគាមអនាម័យប្រចាំតំបន់ ដូចជាការដាក់ពាក្យស្នើសុំការត្រួតពិនិត្យតាមប្រព័ន្ធកុំព្យូទ័រ និងអភិវឌ្ឍប្រព័ន្ធ e-Phyto ជាដើម។
តាមរយៈអនុសាសន៍ខាងលើនេះ ក្រសួងកសិកម្មរំពឹងថា នឹងឈានទៅធានាដល់ការលើកកម្ពស់សុវត្ថិភាពបន្លែផ្លែឈើសរីរាង្គ ដើម្បីផ្គត់ផ្គង់ទៅក្នុងទីផ្សារនៅប្រទេសកម្ពុជា៕
March 12, 2020
អាណាព្យាបាលគួរចូលរួមយុទ្ធនាការ “តោះ- អានរៀងរាល់ថ្ងៃ” ដើម្បីអនាគតកុមារកម្ពុជា
ក្រសួងអប់រំ យុវជន និងកីឡា បានសហការជាមួយដៃគូបង្កើតយុទ្ធនាការ តោះអានរៀងរាល់ថ្ងៃ ដោយចាប់ផ្តើមពីថ្ងៃទី6 ដល់ថ្ងៃទី15 ខែមីនា ឆ្នាំ2020 នេះ ដើម្បីជំរុញឱ្យមានការអានកាន់តែច្រើនឡើងនៅក្នុងប្រទេសកម្ពុជា និងជាពិសេស គឺសម្រាប់កុមារ។
បើតាមការបញ្ជាក់របស់ក្រសួងអប់រំ យុវជន និងកីឡា បានបញ្ជាក់ថា យុទ្ធនាការ “តោះអានរៀងរាល់ថ្ងៃ” គឺជាយុទ្ធនាការដែលមានគោលបំណងផ្សព្វផ្សាយការអាន និងជំរុញទឹកចិត្តឱ្យឪពុកម្តាយ ក្រុមគ្រួសារ លោកគ្រូ អ្នកគ្រូ បណ្ណារក្ស និងអ្នកពាក់ព័ន្ធនានា បង្កើតនូវទម្លាប់វិជ្ជមានមួយក្នុងការចំណាយពេលវេលាអានជាមួយនឹងកូន ប្អូន ក្មួយ ចៅ ក៏ដូចជាសិស្សានុសិស្សក្នុងរយៈពេលនៃយុទ្ធនាការ និងបន្តទម្លាប់នេះក្នុងសកម្មភាពប្រចាំថ្ងៃ។
លោកជំទាវ គឹម សេដ្ឋានី រដ្ឋលេខាធិការក្រសួងអប់រំ យុវជន និងកីឡា បានលើកឡើងថាក្រសួងអប់រំបានដាក់ចេញនូវកំណែទម្រង់ជាច្រើនដើម្បីអភិវឌ្ឍវិស័យអប់រំឱ្យកាន់តែប្រសើរ មានគុណភាពប្រកបដោយសមធម៌ និងបរិយាប័ន្ន និងផ្តល់ឱកាសលើកកម្ពស់ការសិក្សាពេញមួយជីវិតសម្រាប់ទាំងអស់គ្នា។ នៅក្នុងនោះ ថ្មីៗនេះ ក្រសួងអប់រំ យុវជន និងកីឡា បានសហការជាមួយនឹងអង្គការមូលនិធិអាស៊ី និងដៃគូអភិវឌ្ឍន៍នានា រៀបចំជាយុទ្ធនាការមួយដែលមានឈ្មោះថា “តោះអានរៀងរាល់ថ្ងៃ” ដែលមានរយៈពេល 10ថ្ងៃ ដោយចាប់ផ្តើមពីថ្ងៃទី6 ដល់ថ្ងៃទី15 ខែមីនា ឆ្នាំ2020។ យុទ្ធនាការដ៏មានសារៈសំខាន់នេះ លើកទឹកចិត្តឱ្យអាណាព្យាបាលក្រុមគ្រួសារ លោកគ្រូ-អ្នកគ្រូ និងបណ្ណារក្ស ចំណាយពេលអានជាមួយកូនៗ សិស្សានុសិស្ស និងកុមារដើម្បីបង្កើតនូវបរិយាកាសរីករាយជាមួយគ្នា។
ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងថាការអានជាផ្នែកយ៉ាងសំខាន់ក្នុងការអភិវឌ្ឍគុណភាពកុមារ ព្រោះកាលណាកុមារតូចៗមានទម្លាប់អានច្រើន ពួកគេនឹងមានប្រភពចំណេះដឹងច្រើន ហើយការសិក្សារបស់ពួកគេក៏នឹងមានភាពល្អប្រសើរឡើងតាមហ្នឹងដែរ។ កាលណាកុមារតូចអានបានច្រើន នៅពេលពួកគេធំឡើង មេរៀនទាំងឡាយនៅក្នុងកម្មវិធីសិក្សា ជាពិសេសមេរៀនអំណាន ក៏អាចធ្វើឱ្យរៀនបានពូកែ និងឆាប់យល់ដែរ។ បន្ថែមពីលើនេះ ប្រសិនបើអាណាព្យាបាលចេះបង្កើតទម្លាប់អានបានល្អនៅក្នុងផ្ទះផងនោះ ក្មេងៗនឹងអាចរីករាយជាមួយនឹងការអាន ដែលធ្វើឱ្យពួកគេចងចាំពាក្យបានល្អជាងមុន ហើយលទ្ធភាពនៃការសរសេរ ឬតែងសេចក្តីក៏ល្អផងដែរ។
ឯកឧត្តម ហង់ជួន ណារ៉ុន មានប្រសាសន៍ថា៖ «ការចំណាយពេលវេលាអានជាមួយកុមារ អាចជួយឱ្យកុមារឆាប់ចេះពាក្យថ្មីៗ បង្កើតក្តីស្រមៃ និងមានទម្លាប់វិជ្ជមានក្នុងការអាន។ សូមចូលរួមយុទ្ធនាការតោះអានរាល់ថ្ងៃ ដើម្បីចាប់ផ្តើមអានជាមួយកុមារ»។
ឯកឧត្តមក៏បានលើកឡើងផងដែរថា ក្រសួងអប់រំ យុវជន និងកីឡា បានយកចិត្តទុកដាក់យ៉ាងខ្លាំងក្នុងការបណ្តុះបណ្តាលការអានដល់កុមារ ដើម្បីឱ្យពួកគេចាប់ផ្តើមមានសមត្ថភាពអំណានកាន់តែខ្ពស់នៅកម្រិតបឋមសិក្សា។ ជាក់ស្តែងកន្លងមក ក្រសួងអប់រំ បានដាក់ចេញនូវកម្មវិធីអំណានដំបូងដើម្បីឱ្យកុមារទាំងអស់មានសម្ភារអំណានគ្រប់គ្រាន់ ក៏ដូចជាមានកម្មវិធីសិក្សាមួយប្រកបដោយប្រសិទ្ធភាពសម្រាប់បង្កើនសមត្ថភាពអានឱ្យបានល្អ។
លោក សុខ ឡាក់ ស្ថាបនិកបណ្ណាល័យបញ្ញវន្ត បានលើកឡើងថា ការបណ្តុះឥរិយាបថនៃការអានដល់កុមារ គឺជាគំរូប្រកបដោយប្រសិទ្ធភាពមួយ ក្នុងការចូលរួមអភិវឌ្ឍធនធានមនុស្សនៅកម្ពុជា។
បច្ចុប្បន្ននេះ យើងឃើញថា ពិភពលោកកំពុងប្រែប្រួលយ៉ាងលឿន ហើយការប្រកួតប្រជែងក៏កំពុងតែមាន កាន់តែខ្លាំងក្លាផងដែរ។ ហេតុនេះដើម្បីបណ្តុះបណ្តាលឱ្យមានធនធានមនុស្សប្រកបដោយសមត្ថភាពខ្ពស់ សម្រាប់បំពេញតម្រូវការនាពេលអនាគត លុះត្រាតែកុមារនាពេលបច្ចុប្បន្នចូលចិត្តអាន ហើយវប្បធម៌អំណានត្រូវបានអនុវត្តនៅគ្រប់ទីកន្លែងទាំងនៅក្នុងសាលារៀន នៅក្នុងសហគមន៍ និងនៅក្នុងក្រុមគ្រួសារនីមួយៗ។
លោក សុខ ឡាក់ បាននិយាយថា៖ «ការអភិវឌ្ឍកុមារត្រូវបានអ្នកអប់រំជាច្រើនមើលឃើញថា ផ្តល់ផលចំណេញច្រើនណាស់សម្រាប់អនាគត។
ហេតុនេះការបណ្តុះបណ្តាលវប្បធម៌អំណាន ឬការអានជាមួយកុមារ ជាផ្នែកយ៉ាងសំខាន់ដែលអាចទាញបាននូវផលចំណេញយ៉ាងខ្ពស់សម្រាប់សង្គម»។
ស្ថាបនិកបណ្ណាល័យខាងលើបានបន្ថែមទៀតថា ដើម្បីជំរុញឱ្យកុមារកាន់តែមានសមត្ថភាពអានកាន់តែខ្លាំង យើងគ្រប់គ្នាគួរតែលើកទឹកចិត្ត និងបើកចិត្តឱ្យទូលាយដើម្បីស្វែងយល់ពីសារៈសំខាន់នៃសៀវភៅកុមារ។ កុំគិតថា សៀវភៅកុមារមានតម្លៃថ្លៃ មានរូបច្រើន ឬមិនសូវមានអក្សរដែលធ្វើឱ្យអានបានតិច ឬមិនចង់ចំណាយប្រាក់ទិញជាដើម តែត្រូវងាកមកគិតថា វាជាឧបករណ៍ដ៏មានសារៈសំខាន់ដែលអាចរុញច្រានកុមារ ឱ្យក្លាយជាមនុស្សម្នាក់ដែលមានសមត្ថភាព និងអាចអានបាននូវគ្រប់ប្រភេទឯកសារនៅថ្ងៃខាងមុខ។ ចំណែកឯអ្នកបង្កើតសៀវភៅកុមារ ក៏គួរតែព្យាយាមបង្កើនប្រសិទ្ធភាព និងភាពច្នៃប្រឌិតឱ្យកាន់តែទាន់សម័យឡើង ដើម្បីធ្វើយ៉ាងណាជំរុញឱ្យមានជម្រើសកាន់តែច្រើនសម្រាប់អប់រំកុមារ៕
March 12, 2020
តុបតែងខ្លួនបែបស្អាតៗ ដើម្បីបង្ហាញពីភាពក្លាហានរបស់អ្នក
ភាពស្រស់ស្អាតពិតជាមានសារសំខាន់ខ្លាំងណាស់សម្រាប់មនុស្សស្រីយើង ហើយជាពិសេសសម្រាប់ឱកាសដែលពេញដោយមោទនភាពរបស់នារីៗទូទាំងពិភពលោក គឺថ្ងៃបុណ្យសិទ្ធិនារី អន្តរជាតិ។ ដូច្នេះសូមពិនិត្យមើលការតុបតែងមុខមាត់យ៉ាងស្រស់សោភានៅក្នុងទំព័រផាត់មុខរបស់ ឡារ៉ែន ហើយសូមប្រញាប់តុបតែងមុខរបស់អ្នកឱ្យបានស្រស់ស្អាត គួរជាទីគយគន់ ដើម្បីបង្ហាញពីភាពជឿជាក់ និងនារីដ៏ជោគជ័យទៅដល់មនុស្សនៅជុំវិញខ្លួនរបស់អ្នក៕

March 11, 2020
សម្តេចតេជោ៖ កម្ពុជាត្រៀមថវិកាបម្រុង ចន្លោះពី 800 ទៅ 2,000លានដុល្លារ សម្រាប់សង្គ្រោះសេដ្ឋកិច្ចក្នុងអំឡុងមានជំងឺកូវីដ19
សម្តេចតេជោនាយករដ្ឋមន្ត្រីនៃកម្ពុជា បានឱ្យដឹងថា កម្ពុជាបាននិងកំពុងត្រៀមថវិកា ចន្លោះពី 800 ទៅ 2,000លានដុល្លារអាមេរិក ដើម្បីជួយសង្គ្រោះសេដ្ឋកិច្ចកម្ពុជាឱ្យមានស្ថិរភាព និងលំនឹង បើសិនជំងឺផ្លូវដង្ហើមកូវីដ19 អូសបន្លាយរហូតដល់ 1ឆ្នាំ។ នេះបើតាមការថ្លែងរបស់សម្តេចតេជោហ៊ុន សែន នៅក្នុងពិធីប្រគល់សញ្ញាបត្រជូននិស្សិតនៃវិទ្យាស្ថាន វ៉ាន់ដា នៅថ្ងៃទី10 ខែមីនា ឆ្នាំ2020។
សម្តេចតេជោ ហ៊ុន សែន ថ្លែងឱ្យដឹងថា កម្ពុជាបានត្រៀមថវិកាប្រមាណ 800លានដុល្លារអាមេរិកក្នុងរយៈពេល 6ខែ ហើយបើជំងឺកូវីដ19 អូសបន្លាយរយៈពេល 1ឆ្នាំ នឹងអាចត្រៀមថវិកាជាតិ ប្រមាណចន្លោះ 800 ទៅ 2,000លានដុល្លារអាមេរិក ក្នុងការសង្គ្រោះសេដ្ឋកិច្ច។
សម្តេចតជោនាយករដ្ឋមន្ត្រី ថ្លែងថា៖«យើងត្រៀមថវិកាប្រមាណ 800លានដុល្លារក្នុងរយៈពេល 6ខែ ដើម្បីសង្គ្រោះសេដ្ឋកិច្ច ហើយបើវាអូសបន្លាយដល់ 1ឆ្នាំ យើងក៏ប៉ានស្មានថា វាធ្លាក់កំណើនប៉ុនណា ផលប៉ះពាល់វាធំប៉ុនណា ហើយបាត់បង់ចំណូលប៉ុនណា បើវាដល់ 1ឆ្នាំ សេដ្ឋកិច្ចរបស់យើងធ្លាក់ប៉ុនណា ត្រូវប៉ះប៉ូវទំហំទឹកប្រាក់ប៉ុនណា អ៊ីចឹងវាស្ថិតនៅក្នុងចន្លោះពី 800 ទៅ 2,000លានដុល្លារអាមេរិក ដើម្បីត្រៀមបម្រុង»។
កំណើនសេដ្ឋកិច្ចកម្ពុជានៅឆ្នាំ2020 នឹងមានត្រឹមតែ 6.1%ប៉ុណ្ណោះ។ នេះបើតាមការព្យាករ របស់ក្រសួងសេដ្ឋកិច្ច និងហិរញ្ញវត្ថុកម្ពុជា ដោយបានឱ្យដឹងទៀតដែរថា កំណើនសេដ្ឋកិច្ចរបស់កម្ពុជានៅឆ្នាំ2020 គឺស្ថិតនៅក្នុងរង្វង់ 6.5% ដែលទាញទម្លាក់កំណើនសេដ្ឋកិច្ចកម្ពុជា ដែលធ្លាប់តែសម្រេចបានជាង 7% ក្នុង 1ឆ្នាំក្នុងរយៈពេល 2ទស្សវត្សរ៍មកហើយនេះ។
មានកត្តាជាច្រើនដែលធ្វើឱ្យធ្លាក់ចុះនៃកំណើនសេដ្ឋកិច្ចរបស់កម្ពុជានេះ គឺដោយសារតែការធ្លាក់ចុះនៃកំណើនសេដ្ឋកិច្ចពិភពលោក ភាពមិនប្រាកដប្រជានៅតំបន់មជ្ឈិមបូព៌ា ជម្លោះពាណិជ្ជ កម្ម រវាងចិន-សហរដ្ឋអាមេរិក ការប្រែប្រួលអាកាសធាតុ និងការផ្ទុះឡើងនៃជំងឺឆ្លងដែលបង្កដោយ កូរ៉ូណាវីរុសថ្មីៗ ឬកូវីដ19 នៅក្នុងប្រទេសចិនជាដើម ដែលបាននិងកំពុងរីករាលដាលនៅក្នុងពិភព លោក៕
March 11, 2020