Author: ធឿន មករា

Apple ដាក់គម្រោង តម្លៃ 1ពាន់លានដុល្លារ បង្កើតមជ្ឈមណ្ឌលផលិតឈីប 5G ផ្ទាល់ខ្លួន
បើយោងតាមសេចក្តីប្រកាសព័ត៌មានផ្លូវការ ពីការិយាល័យកណ្ដាលរបស់ Cupertino របស់ Apple កាលពីសប្ដាហ៍មុនបានឱ្យដឹងថា ក្រុមហ៊ុនបច្ចេកវិទ្យាដ៏ល្បីល្បាញមួយនេះ បានបញ្ចេញឱ្យដឹងនូវគម្រោងថ្មីមួយទៀត នោះគឺ ការចំណាយ 1ពាន់លានដុល្លារដើម្បីបង្កើតមជ្ឈមណ្ឌលផលិតឈីប 5G ដោយផ្ទាល់ខ្លួន។
ការប្ដេជ្ញាចិត្តនេះ បានបញ្ជាក់យ៉ាងច្បាស់ថា Apple កំពុងត្រៀមខ្លួន ដើម្បីដើរចេញពីម៉ូឌឹម 5G របស់ Qualcomm ដែលពួកគេធ្លាប់សហការគ្នាប្រើវាកន្លងមក យកមកដាក់ក្នុងផលិតផល Apple ទ្រទ្រង់សេវា 5G បាន ហើយកាន់តែច្បាស់បន្ថែមទៀតនោះ គឺកាលពី ឆ្នាំ2019 ក្រុមហ៊ុន Apple ថែមទាំងបានទិញយកអាជីវកម្មផលិតម៉ូឌឹម 5G របស់ស្មាតហ្វូន ពីក្រុមហ៊ុន intel ទៀតផង។
ទឹកប្រាក់ដែល Apple បានត្រៀមជាង 1ពាន់លានដុល្លារនោះ នឹងធ្វើឱ្យលេចចេញជារូបរាង ក្នុងរយៈពេល 3ឆ្នាំខាងមុខ ទៅកាន់មជ្ឈមណ្ឌលស្រាវជ្រាវ និងអភិវឌ្ឍន៍ថ្មី របស់ពួកគេនៅទីក្រុងមុយនិច ប្រទេសអាល្លឺម៉ង។
បច្ចុប្បន្នទីតាំងចាស់នៅទីក្រុងមុយនិច នៅប្រទេសអាល្លឺម៉ងរបស់ Apple នៅអឺរ៉ុប មានវិស្វករជំនាញ 1,500នាក់ ដោយបម្រើការលើផ្នែកស្រាវជ្រាវ និងអភិវឌ្ឍន៍ ចាប់ពីផ្នែកបច្ចេកវិទ្យាឥតខ្សែ រហូតដល់ប្រព័ន្ធកម្មវិធីសំខាន់ៗដទៃទៀតផងដែរ តែទាំងអស់នេះ មិនទាន់រាប់បញ្ចូលគម្រោងថ្មីខាងលើនោះទេ៕
March 23, 2021
បាត់មុខយូរ ស្រាប់តែលោក ដូណាល់ ត្រាំ បញ្ចេញគម្រោង បង្កើត Social Media ផ្ទាល់ខ្លួនតែម្ដង
បន្ទាប់ពីសហរដ្ឋអាមេរិក ធ្វើការបោះឆ្នោតជ្រើសតាំង បានប្រធានាធិបតីថ្មី គឺលោក ចូ បៃឌិន មក គេក៏លែងសូវបានឃើញវត្តមាន និងឮដំណឹងអ្វី ពីអតីតប្រធានាធិបតិអាមេរិកទី45 គឺលោក ដូណាល់ ត្រាំ អស់ជាច្រើនសប្ដាហ៍មកហើយ តែកាលពីពេលថ្មីៗនេះ អ្នកនាំពាក្យជំនិតម្នាក់ ឈ្មោះលោក Jason Miller មកពីគណបក្សសាធារណរដ្ឋ បានបង្ហើបឱ្យដឹងថា លោក ត្រាំ នឹងវិលត្រឡប់មកវិញ ជាមួយនឹងការបង្កើត Social media ផ្ទាល់ខ្លួនមួយ។
ដំណឹងដ៏ភ្ញាក់ផ្អើលនោះ គឺលោកនឹងបង្កើតប្រព័ន្ធបណ្ដាញសង្គមផ្ទាល់ខ្លួន ដែលអាចនឹងដាក់ឱ្យប្រើប្រាស់នៅក្នុងរយៈពេលដ៏ខ្លីខាងមុខនេះ តែគេមិនទាន់ទទួលបានព័ត៌មានច្រើននៅឡើយថា តើវាមានឈ្មោះអ្វី ហើយដំណើរការយ៉ាងដូចម្តេច?។
សូមរំឭក ថយទៅក្រោយវិញបន្តិច…រឿងរ៉ាវបង្កើត Social media ផ្ទាល់ខ្លួននេះ គេធ្លាប់បានឮម្ដងរួចមកហើយ កាលពីអំឡុងពេល ដែលលោកនៅកាន់តំណែង ដោយសារមិនពេញចិត្តលើចំណាត់ការរបស់ Twitter ក៏ដូចជាក្រុមហ៊ុនបច្ចេកវិទ្យាធំៗនៅសហរដ្ឋអាមេរិក ដែលហាមឃាត់មិនឱ្យមានការចូលទៅប្រើប្រាស់បាន។ លោក ត្រាំ ក៏ត្រូវបានក្រុមហ៊ុនបណ្ដាញសង្គមនានា ដូចជា Facebook, Twitter, និង Reddit លុបគណនីរបស់លោកចោលតែម្ដង កាលពីដើមឆ្នាំ2021កន្លងទៅហើយដែរ ហើយលោកក៏ត្រូវបានហាមឃាត់ មិនឱ្យធ្វើការបង្ហោះសារផ្សេងៗណាមួយ ដែលអាចបង្កជាហានិភ័យ ឬជាការញុះញង់អ្នកគាំទ្រ ឱ្យធ្វើការតវ៉ាប្រឆាំងនឹងរដ្ឋាភិបាលជាប់ឆ្នោតនោះដែរ។
គម្រោងការបង្កើតប្រព័ន្ធផ្សព្វផ្សាយថ្មីនេះ អាចនឹងត្រូវដាក់ឱ្យប្រើប្រាស់ យ៉ាងយូរបំផុតនៅពាក់កណ្ដាលឆ្នាំ2021 នេះឯង ដោយអតីតប្រធានាធិបតីទី45 រូបនេះ បានរំពឹងទុកថា អាចទាក់ទាញអ្នកគាំទ្របានជាថ្មីម្ដងទៀត យ៉ាងហោចណាស់ក៏ 10លាននាក់ដែរ។ មានន័យថា បើអត់ពី Twitter ទៅ អ្នកដែលធ្លាប់គាំទ្រលោក ត្រាំ អាចតាមដានលើ platform ថ្មីនេះជំនួសវិញបាន៕
March 23, 2021
បទសម្ភាស នៅអៀកឡង់ បង្ហាញមូលហេតុនៃការចាកចេញរបស់ Barret ពីព្រះខ័នរាជស្វាយរៀង
ខ្សែការពារកណ្តាលសញ្ជាតិអៀកឡង់ Paddy Barret បានចាកចេញពីក្លិបព្រះខ័នរាជស្វាយរៀងហើយកាលពីពេលកន្លងទៅនេះ ក្រោយចុះកុងត្រាមិនបានប៉ុន្មានផង។ ការចាកចេញនេះ ត្រូវបានគេដឹងថា កីឡាកររូបនេះ នឹងទៅចូលរួមជាមួយនឹងក្លិបនៅលីគកំពូលរបស់ប្រទេសអៀកឡង់ St Patrick’s Athletic FC។
ទោះជាក្លិបព្រះខ័នរាជស្វាយរៀង បានបញ្ជាក់ថា គេចាកចេញដោយសារតែបញ្ហាផ្ទាល់ខ្លួន ដើម្បីទៅជួបជុំគ្រួសារ ក្នុងពេលវិបត្តិកូវីដ-19 ក៏ដោយ ក៏ប៉ុន្តែកីឡាករវ័យ 27ឆ្នាំរូបនេះ បានផ្តល់បទសម្ភាសដល់សារព័ត៌មានក្នុងស្រុក អៀកឡង់ ថា មូលហេតុគឺមានដូចតទៅនេះ៖
-ពិបាកសម្របខ្លួននឹងស្ថានភាពនានាក្នុងប្រទេសកម្ពុជា(អាកាសធាតុ ម្ហូបអាហារ មជ្ឈដ្ឋានជុំវិញខ្លួន…)
-ទម្រង់លេងមិនល្អតាមការទាមទាររបស់ក្លិប និងគ្រូបង្វឹក
-ប្រាក់ឈ្នួលតិច លីគកំពូលកម្ពុជា ជាលីគប្រកួតប្រជែងទាប មិនស័ក្តិសមនឹងរូបគេ
-ក្លិបផ្សេងឱ្យប្រាក់ឈ្នួលខ្ពស់ជាងនៅកម្ពុជា និងមានលក្ខខណ្ឌល្អជាងគ្រប់យ៉ាង
ខណៈកូតាកីឡាករបរទេស នៅសល់តែ៤នាក់នេះ ក្លិបបាល់ទាត់ព្រះខ័នរាជស្វាយរៀង បានបន្ថែមកីឡាករម្នាក់ភ្លាមៗ គឺកីឡាករខ្សែប្រយុទ្ធសញ្ជាតិសេណេហ្គាល់ Robert Lopez Mendy មកជំនួសតំណែងកីឡាកររូបនះ៕
March 22, 2021
ខាន់ ចេសា ត្រូវប៉ះកីឡាការិនី មកពីប្រេស៊ីល នៅដើមខែមេសានេះ
កីឡាការិនីកូនកាត់កម្ពុជា-មិកស៊ិក-អាមេរិកាំង ខាន់ ចេសា ឈ្នះខ្សែក្រវាត់ Who Number One នឹងឡើងទៅកាន់សង្វៀន Evolve Ur Game ដោយត្រូវប្រកួតជាមួយកីឡាការិនីមកពីប្រទេសប្រេស៊ីល Thamires Aquino។ ហើយនេះជាការប្រកួត Superfight ដែលធ្វើនៅទីក្រុងឡាសវេហ្គាស់ រដ្ឋណេវ៉ាដា សហរដ្ឋអាមេរិក នៅថ្ងៃទី3 ខែមេសា ឆ្នាំ2021។
នេះជាការបង្ហាញខ្លួនជាថ្មីម្តងទៀតរបស់ ចេសា បន្ទាប់ពីឈ្នះកីឡាការិនី Danielle Kelly ក្នុងកម្មវិធី Who Number One នៅតិចសាស់ កាលពីពេលថ្មីៗកន្លងទៅ។ ដោយមានឪពុកជាកូនកាត់កម្ពុជា-អាមេរិក និងម្តាយជាកូនកាត់មិកស៊ិក-អាមេរិក ខាន់ ចេសា ត្រូវបានគេចាត់ទុកថា ជាកីឡាការិនី ដែលលេងកីឡាជូជីតស៊ូបានល្អបំផុតក្នុងពិភពលោក ដោយឈ្នះជើងឯកពិភពលោក 3ដង, ជើងឯកទ្វីបអាមេរិក 4ដង, ជើងឯកពិភពលោក NoGi 3ដង និងជើងឯកអឺរ៉ុប 2ដង។ នៅឆ្នាំ2018 និង2019 កីឡាការិនីរូបនេះ បានប្រកួតតំណាងឱ្យកម្ពុជា ហើយដណ្តើមបានមេដាយមាស កីឡាអាស៊ីនៅប្រទេសឥណ្ឌូនេស៊ី និងកីឡាអាស៊ីអាគ្នេយ៍នៅហ្វ៊ីលីពីន៕

March 22, 2021
តោះ! មកមើលប្រាក់ខែ Honda កាលលេងនៅក្លិបចាស់
Keisuke Honda អតីតកីឡាករខ្សែប្រយុទ្ធជម្រើសជាតិជប៉ុន និងជាអ្នកចាត់ការក្រុមជម្រើសជាតិកម្ពុជា ត្រូវបានគេស្គាល់ថា ជាកីឡាករជប៉ុនម្នាក់ ដែលសម្បូរបទពិសោធក្រៅប្រទេសបំផុត ដោយរូបគេធ្លាប់បានលេងនៅក្លិបសឹងតែគ្រប់ទ្វីបទាំងអស់ នៅតែទ្វីបអង់តាក់ទិកមួយតែប៉ុណ្ណោះ។
បើនិយាយអំពីប្រាក់ខែវិញ កីឡាកររូបនេះ អាចរកបានខ្ទង់រាប់សិបលានដុល្លារ កាលពីនៅលេងឱ្យក្លិប AC Milan នៃលីគកំពូលអ៊ីតាលី ដែលគ្រានោះ គឺជាសម័យកាលដ៏កំពូល របស់កីឡាកររូបនេះ។ មកទល់នឹងពេលនេះ ក្លិប Botafugo ដែលជាក្លិបចុងក្រោយរបស់កីឡាកររូបនេះប្រកបអាជីពចុងក្រោយបង្អស់ បានបញ្ចេញទិន្នន័យប្រាក់ខែរបស់ Honda ដោយមានតម្លៃដល់ទៅ 66ម៉ឺនដុល្លារ ក្នុង 1រដូវកាល បើគិតជាខែវិញ រូបគេអាចរកបានប្រហែលខ្ទង់ 5ម៉ឺន5ពាន់ដុល្លារ ជារៀងរាល់ខែ ពីក្លិបលីគកំពូលប្រេស៊ីលខាងលើ។
គួរឱ្យដឹងដែរថា កាលពីពេលថ្មីៗនេះ Keisuke Honda ទើបតែបានចុះកុងត្រាជាមួយនឹងក្លិបមួយ នៃលីគកំពូលអាស៊ែបៃហ្សង់ គឺក្លិប Neftçi PFK តែមិនទាន់មានភាគីណាមួយ ហ៊ានចេញមុខទម្លាយអំពីប្រាក់ខែរបស់កីឡាករម្នាក់នេះនៅឡើយទេ៕

March 19, 2021
40 ចំណុចដែលបញ្ជាក់ថា Ford Ranger XLT 2021 មានប្រៀបជាងដៃគូប្រកួតប្រជែង
បច្ចុប្បន្ននេះយើងសង្កេតឃើញថាទីផ្សាររថយន្តថ្មីនៅប្រទេសកម្ពុជាកើនឡើងពីមួយឆ្នាំទៅមួយឆ្នាំ ទន្ទឹមជាមួយគ្នានេះដែរក៏មានការប្រកួតប្រជែងគ្នាយ៉ាងខ្លាំងក្នុងទីផ្សារមួយនេះ។ ដូច្នេះមុននឹងសម្រេចចិត្តទិញរថយន្តយកមកប្រើប្រាស់អតិថិជនទាំងអស់គ្នាគួរគប្បីពិនិត្យមើលឲ្យបានល្អិតល្អន់ទាក់ទងទៅនឹងគុណភាពនៃរថយន្ត តម្លៃ ជាពិសេសនោះគឺទៅលើប្រវត្តិក្រុមហ៊ុន និងម៉ាកយីហោនៃរថយន្តនោះផ្ទាល់តែម្តង។ ជាក់ស្តែងក្រុមហ៊ុន Ford ដែលជាក្រុមហ៊ុនឈានមុខគេមួយក្នុងទីផ្សាររថយន្តដែលមានដើមកំណើតមកពីសហរដ្ឋអាមេរិក និងបានឈរជើងយ៉ាងរឹងមាំ 100 ឆ្នាំជាងក្នុងការផ្គត់ផ្គង់រថយន្តទៅទូទាំងពិភពលោក។ រថយន្ត Ford បានមានវត្តមានក្នុងទីផ្សារនៃព្រះរាជាណាចក្រកម្ពុជាអស់រយៈពេលជាច្រើនឆ្នាំមកហើយ បងប្អូនមួយចំនួនតែងតែនិយមហៅរថយន្ត Ford ថាជារថយន្ត Ford Ranger ។ តើបងប្អូនដឹងទេថារថយន្ត Ford Ranger នេះមានប៉ុន្មានប្រភេទក្នុងទីផ្សារប្រទេសកម្ពុជាយើង? ជាការពិតណាស់មកទល់នឹងពេលបច្ចុប្បន្ននេះត្រកូល Ford Ranger មាន 4ប្រភេទនោះគឺ Ford Ranger XLS, Ford Ranger XLT, Ford Ranger Wildtrak និង Ford Ranger Raptor ដែល Ford Ranger នីមួយៗមានចំណុចពិសេសរាងៗខ្លួន។
ថ្ងៃនេះដែរ យើងខ្ញុំនឹងលើកយកម៉ូឌែល Ford Ranger XLT មកបង្ហាញជូនអតិថិជនទាំងអស់គ្នា ដែលរថយន្ត Ford Ranger XLT នេះជារថយន្តប្រភេទ Pick Up ដែលមានភាពធន់រឹងមាំ ប្រព័ន្ធសុវត្ថិភាព បច្ចេកវិទ្យា ប្រព័ន្ធជើងក្រោម និងសមត្ថភាពក្នុងការដឹកប្រហាក់ប្រហែលទៅនឹងរថយន្ត Ford Ranger Wildtrak ដែរ ។ គួរបញ្ជាក់ផងដែរថា សម្រាប់ម៉ូឌែល Ford Ranger XLT នេះមានជម្រើស 2ប្រភេទគឺ Ford Ranger XLT ម៉ាស៊ីន 2.2L និង Ford Ranger XLT ម៉ាស៊ីន 3.2L។ រថយន្តនេះទទួលបានការគាំទ្រយ៉ាងពេញទំហឹងក្នុងទីផ្សាររថយន្ត Pick Up ក្នុងប្រទេសកម្ពុជារយៈពេល 2-3 ឆ្នាំចុងក្រោយនេះគួរឲ្យកត់សម្គាល់ដោយសារតែរថយន្តនេះមានប្រព័ន្ធសុវត្ថិភាព បច្ចេកវិទ្យា និងភាពធន់រឹងមាំទាំង 40 ចំណុចដែលលើសពីដៃគូប្រកួតប្រជែង ដូច្នេះយើងខ្ញុំនឹងធ្វើការបកស្រាយចំណុចទាំងនេះនៅខាងក្រោម៖
1. ម៉ាស៊ីនម៉ាស៊ូតជំនាន់ចុងក្រោយសម្រាប់ម៉ូឌែល 2L អាចផលិតនូវកម្លាំងសេះដល់ទៅ 150 PS និងកម្លាំងរមួលបានដល់ទៅ 385 Nm និងម៉ូឌែល 3.2L ជាប្រភេទម៉ាស៊ីនតែមួយជាមួយ Ranger Wildtrak 3.2L ដែលអាចផលិតនូវកម្លាំងសេះដល់ទៅ 200 PS និងកម្លាំងរមួលបានដល់ទៅ 470 Nm។
2. ប្រអប់លេខ 6 វគ្គអូតូ ក៏ជាប្រអប់លេខតែមួយជាមួយរថយន្ត Ranger Wildtrak ផងដែរ ដែលធ្វើឲ្យមានភាពរលូនក្នុងការបើកបរ (6-Speed Automatic)
3. ចង្កៀងគុជ HID (HID Headlamps) និងចង្កៀងបំភ្លឺផ្នែកខាងក្រោម (Fog Lamps) ដែលមានភាពភ្លឺច្បាស់ជាងមុន
4. ចង្កៀងបិទ/បើក និងហ្វាកូដដោយស្វ័យប្រវត្ត (Auto On/Off Headlamps)
5. ប៉ាណាភ្លឺ ក្រូម៉េពណ៍ទឹកប្រាក់ (Silver Front Grille)
6. យ៉ាន់កង់បែបស្ព័រទំនើបទាន់សម័យទំហំ 17អ៊ីញស័ក្តិសមជាមួយតួរថយន្ត និងអាចជំនះឧបសគ្គបានគ្រប់ស្ថានភាពផ្លូវ ជាពិសេសធន់រឹងមាំសម្រាប់ការដឹកទំនិញ (17” Alloy Wheel)
7. ប្រព័ន្ធកូនសោឆ្លាតវៃ (Smart Key) និងចុចបញ្ឆេះរថយន្ត (Start-Stop Engine)
និងចេញចូលរថយន្តដោយគ្រាន់តែយកដៃទៅស៊កនឹងដៃទ្វារ
1. កាមេរ៉ាជំនួយចូលចតផ្នែកខាងក្រោយដែលមានខ្សែគំនូសពណ៍ស រេតាមចង្កូត (Rear View Camera)
2. សេនសឺផ្នែកខាងក្រោយចំនួន 4 គ្រាប់ (4 Rear Sensors)
3. ចុចកព្ចាក់ក្តោបដោយស្វ័យប្រវត្ត (Auto Side Mirror Folding System)
4. ផ្លិតទឹកអូតូ (Rain Sensing Wipers)
5. ចង្កូតបូមអេឡិចត្រូនិចដែលមានលក្ខណះធូរងាយស្រួលបើកបរ )Electric Power-Assisted Steering)
6. ប្រព័ន្ធបញ្ជាដោយសម្លេង (Voice Command) សម្រាប់ការហៅទូរស័ព្ទ និងបញ្ជាប្រព័ន្ធគ្រប់គ្រងសីតុណ្ហភាពរថយន្ត
7. កុងទ័រឌីជីថលរចនាម៉ូដថ្មីស្រឡាងដែលផ្តល់ព័ត៍មានយ៉ាងលម្អិតអំពីរថយន្ត (LCD Instrument Cluster)
8. ប្រព័ន្ធផ្តល់សញ្ញានៅពេលដែលប្រើប្រាស់ម៉ាស៊ូតមិនល្អ (Water In Diesel Filter Warning Lights)
9. កញ្ចក់មើលក្រោយអាចកាត់បន្ថយចំណាំងផ្លាត (Auto-Dimming)
10. អេក្រង់ Touch Screen 8 អ៊ីញ សម្រាប់គ្រប់គ្រង វិទ្យុ តន្រ្តី និងការកំសាន្តផ្សេងៗ (8” Touch Screen)
11. បច្ចេកវិទ្យា SYNC 3 ជំនាន់ថ្មីដែលអាចធ្វើការភ្ជាប់ផ្ទាល់ជាមួយនឹង Apple CarPlay, Android Auto និង Google Map (New SYNC 3 Technology)
12. រន្ធ USB ចំនួន 2 និងរន្ធសាកកម្លាំង 12V នៅផ្នែកខាងក្រោយ (2 USB Ports / 12V Invertor)
13. សេនសឺខ្សែក្រវ៉ាត់សុវត្ថិភាព (Seat Belt Sensor)
14. ប្រព័ន្ធការពារចោរកម្ម (Anti-Theft Alarm System)
15. ប្រព័ន្ធពន្លត់ម៉ាស៊ីនដោយស្វ័យប្រវត្ត ពេលបញ្ឆេះរថយន្តចោល (Auto Engine Off)
16. ប្រព័ន្ធកាត់បន្ថយសម្លេងរំខានពីខាងក្រៅ (Active Noise Cancellation)
17. ប្រព័ន្ធកាត់បន្ថយផ្សែងពុល (Emissions System)
18. ប្រព័ន្ធសម្រាប់កំណត់ល្បឿនអតិបរមាពេលបើកបរ (MyKey System)
19. រថយន្តនេះអាចចុះទឹកបានជម្រៅ 800mm លើសគេ (800mm Water Wading)
20. ប្រព័ន្ធទប់លំនឹងរថយន្តពេលបើកបរលើផ្លូវកោង រអិល និងបញ្ចៀសការក្រឡាប់ (Electronic Stability Program)
21. ប្រព័ន្ធទប់លំនឹងកុំឲ្យរអិលថយក្រោយពេលឡើងចំណោត )Hill Launch Assist)
22. ប្រព័ន្ធទប់លំនឹងពេលចុះចំណោត )Hill Descent Control)
23. ប្រព័ន្ធហ្រ្វាំង ABS និងEBD (Anti-Lock Braking Systems and Electronic Brake Force Distribution)
24. ប្រព័ន្ធជំនួយក្នុងការចាប់ហ្រ្វាំង (Brake Fade)
25. ប្រព័ន្ធគ្រប់គ្រងប៉ុងរបស់រថយន្ត (កាប់ពីតាស)(4×4 Shift-On-The-Fly)
26. ប្រព័ន្ធចាប់ប៉ុងក្រោយដែលជួយសម្រួលដល់ការជាប់ផុង (Rear Lock Differential)
27. តួរថយន្តធ្វើពីដែកថែបមានភាពរឹងមាំខ្លាំង មានដែកថែបពិសេសចំនួន 2ដើម សម្រាប់ការពារផ្នែកចំហៀងសងខាងនៃរថយន្ត (Ultra-High-Strength Boron Steel Side Impact Beam Bar)
28. ខែលដែកថែបការពារម៉ាស៊ីនផ្នែកខាងក្រោម (Front Bumper Protector)
29. គឺជារថយន្ត Pick Up ដែលទទួលបានចំណាត់ថ្នាក់ផ្កាយ 5ផ្នែកសុវត្ថិភាពពីគណ:កម្មការវាយតម្លៃសុវត្ថិភាពរបស់រថយន្តថ្មី (Euro NCAP)
30. បំពាក់ជូននូវពោងសុវត្ថិភាពចំនួន 6 គ្រាប់ (6 Air Bags)
31. ប្រព័ន្ធជើងក្រោមផ្លាស់ប្តូរថ្មីដែលអាចកាត់បន្ថយការរលាក់ រំញ័រ និងមានលំនឹងពេលបើកបរ[Upgraded Suspension System (Improves Steering, Ride and Handling)]
32. អាចអូសសណ្តោងបានដល់ 3 តោន (3 Tons Towing Capacity)
33. អាចដឹកទំនិញបានដល់ទៅជាង 1 តោន (1 Ton Payload Capacity)
ជាសរុបមកវិញ យើងឃើញថាចំណុចទាំង 40 នេះអាចបញ្ជាក់បានថារថយន្ត Ford Ranger XLT 2021 គឺពិតជារថយន្តដែលមានសមត្ថភាពខ្ពស់ដែលអាចផ្តល់ជូននូវទំនុកចិត្ត ព្រមទាំងផាសុកភាពជូនអតិថិជនបានផងដែរ ជាពិសេសនោះគឺធន់រឹងមាំជាមួយនឹងការដឹក អូសសណ្តោងដែលមានទម្ងន់ធ្ងន់។ សម្រាប់តម្លៃនៃរថយន្ត Ford Ranger XLT 2021 នេះវិញគឺពិតជាពិសេសខ្លាំងមែនទែនដែលជម្រើសម៉ាស៊ីន 2.2L មានតម្លៃត្រឹមតែ $38,900 និងជម្រើសម៉ាស៊ីន 3.2L មានតម្លៃត្រឹមតែ $39,900។
សម្រាប់ពណ៍គឺមានរហូតដល់ទៅ7 ពណ៍រួមមាន៖ ស ខ្មៅ ប្រផេះ ទឹកប្រាក់ ទឹកមាស ខៀវ និងក្រហម។ រថយន្ត Ford Ranger XLT 2021 ត្រូវបានដាក់តាំងបង្ហាញនៅគ្រប់អគារតាំងបង្ហាញរថយន្ត Ford ដែលមានដូចជា៖
- អគារតាំងបង្ហាញសាខាផ្លូវព្រះមុនីវង្សដែលស្ថិតនៅអគារលេខ 444 ផ្លួវព្រះមុនីវង្ស ជាប់ទូតវៀតណាម លេខទូរស័ព្ទទំនាក់ទំនង៖ 023 214 214
- អគារតាំងបង្ហាញសាខាទឹកថ្លាដែលស្ថិតនៅតាមបណ្តោយផ្លូវទៅព្រលានយន្តហោះ លេខទូរស័ព្ទទំនាក់ទំនង៖ 023 890 880
- អគារតាំងបង្ហាញសាខាទួលសង្កែដែលស្ថិតនៅលើផ្លូវ 105 ជិតផ្សារសាំហាន់ លេខទូរស័ព្ទទំនាក់ទំនង៖ 078 990 800 | 087 990 800
- អគារតាំងបង្ហាញសាខាខេត្តសៀមរាបដែលស្ថិតនៅអគារលេខ 593 តាមបណ្តោយផ្លូវជាតិលេខ 6A លេខទូរស័ព្ទទំនាក់ទំនង៖ 063 766 661។
March 19, 2021
សោកស្តាយ អ៊ុំ សេរីរ័ត្ន សម្រេចចិត្ត បោះបង់អាជីពបាល់ទាត់ហើយ
អ្នកចាំទីរបស់ក្លិបបាល់ទាត់ក្រសួងការពារជាតិ បានប្រកាសថា រូបគេនឹងបញ្ចប់អាជីពបាល់ទាត់ត្រឹមនេះហើយ ដោយសារតែបញ្ហារបួសជង្គង់ និងសរសៃពួររ៉ាំរ៉ៃ ដែលអូសបន្លាយអស់រយៈពេលជាង 4ឆ្នាំមកហើយ។
អ៊ុំ សេរីរ័ត្ន ចាប់ផ្ដើមមានបញ្ហារបួសសរសៃ MCL នៅឆ្នាំ2018 ហើយក៏បានចេញទៅព្យាបាលនៅប្រទេសវៀតណាម ដោយត្រូវសម្រាករយៈពេលជាង 10ខែ។ បន្ទាប់ពីរបួសជាសះស្បើយ សេរីរ័ត្នបានចូលលេងឡើងវិញនៅចុងឆ្នាំ2019។ លុះលីគកំពូលកម្ពុជាដំណើរការនៅឆ្នាំ2020 គេលេងបានតែ 3ប្រកួតបុណ្ណោះ ក៏របួសសរសៃ MCL ផ្សេងទៀត តែមិនអាចទៅព្យាបាលនៅក្រៅប្រទេសបានទេ ដោយសារតែការផ្ទុះនៃជំងឺកូវីដ-19។ វិបត្តិនេះបានធ្វើឱ្យគេសម្រេចចិត្តព្យាបាលនៅក្នុងប្រទេស។
កីឡាកររបស់ក្លិប Tiffy Army រូបនេះបានរៀបរាប់អំពីអាការរបួសរបស់គេថា៖ «ពេលដែលខ្ញុំប្រកួតជាមួយវិសាខាហ្នឹង គឺនៅឆ្នាំ2019 ជាការប្រកួតចុងក្រោយហើយ ហើយបន្ទាប់ពីហ្នឹងមក ជើងខ្ញុំវាប្រសើរឡើងវិញហើយ ដល់ពេលចូលឆ្នាំ2020ហ្នឹង គឺខ្ញុំលេងជាមួយអាស៊ីអឺរ៉ុប ព្រះខ័នរាជស្វាយរៀង និងវិសាខា លេងបាន 3ប្រកួតជុំទី1 ដល់ពេលហើយ កូវីដមកដល់ ក៏សម្រាក…ពេលគេសម្រាកកូវីដហ្នឹង គឺបញ្ហាសាច់ដុំខ្ញុំ ចាប់ផ្ដើមស្រកទៅវិញ ហើយណាមួយគេអត់ឱ្យប្រមូលផ្ដុំផង បញ្ហាសាច់ដុំខ្ញុំអត់សូវបានហាត់ វាស្រក ដល់ពេលចូលទៅវិញ ខ្ញុំខំប្រឹងទាត់បាល់ទៅ វាធ្វើឱ្យប៉ះពាល់ដល់សរសៃផ្សេងមួយទៀត»៕
March 19, 2021
Honda នឹងបានពាក់អាវលេខ4 នៅលីគកំពូល អាស៊ែបៃហ្សង់
អ្នកចាត់ការទូទៅក្រុមជម្រើសជាតិកម្ពុជា លោក Keisuke Honda បានសម្រេចចិត្តផ្លាស់ទៅកាន់ក្លិប Neftci PFK នៃលីគកំពូលអាស៊ែបៃហ្សង់។
Honda វ័យ 34ឆ្នាំ ដែលត្រូវបានគេដឹងថា ពេលនេះកំពុងស្ថិតនៅក្នុងរដ្ឋធានីបាគូ របស់អាស៊ែបៃហ្សង់ គឹនៅមិនទាន់មានក្លិបលេង ចាប់តាំងពីបានចាកចេញពីក្រុមនៅប្រេស៊ីល កាលពីចុងឆ្នាំមុន។ ក្រោយមក អ្នកចាត់ការទូទៅនៃក្រុមជម្រើសជាតិកម្ពុជារូបនេះ ក៏បានចុះកិច្ចសន្យាចូលរួមជាមួយក្លិប Portimonense របស់ព័រទុយហ្គាល់ តែមិនយូរប៉ុន្មាន ស្រាប់តែកិច្ចសន្យានោះ ត្រូវបានលុបចោលទៅវិញ នៅពេលដែលក្រុម មិនអាចចុះឈ្មោះរូបលោក ឱ្យចូលប្រកួតបានទាន់ពេលវេលា។
Honda នឹងពាក់អាវលេខ4 សម្រាប់ក្លិបថ្មីរបស់ខ្លួន ដែលមានមូលដ្ឋានក្នុងរដ្ឋធានីបាគូ នៃប្រទេសអាស៊ែបៃហ្សង់ ហើយប្រទេសអាស៊ែបៃហ្សង់នេះ នឹងក្លាយជាប្រទេសទី7 ហើយ ដែល Honda បានទៅលេងបាល់ទាត់អាជីព បន្ទាប់ពីប្រទេសហូឡង់, រុស្ស៊ី, អ៊ីតាលី, ម៉ិកស៊ិក, អូស្ត្រាលី និងប្រេស៊ីល៕
March 19, 2021
OnePlus 9 Pro ចេញលក់ហើយ មានឆ្នាំងសាកក្នុងប្រអប់ស្រាប់
កាលពីពេលថ្មីៗនេះ វត្តមានស្មាតហ្វូន OnePlus 9 និង 9 Pro កំពុងតែពេញនិយមយ៉ាងខ្លាំង ដោយសារតែវាត្រៀមនឹងចេញមកកាន់ទីផ្សារ នាពេលឆាប់ៗនេះ អំឡុងថ្ងៃទី23 ខែមិនា ឆ្នាំ2021។ បើតាមដំណឹងទទួលពីច្រើនប្រភព បានបង្ហើបឱ្យដឹងថា វានឹងភ្ជាប់មកជាមួយនូវឆ្នាំងសាកនៅក្នុងប្រអប់ស្រាប់តែម្តង។
រឹតតែពិសេសទៅទៀតនោះ គឺបច្ចេកវិទ្យា LTPO ឬ LTPO (Low-Temperature Polycrystalline Oxid) គឺជាបច្ចេកវិទ្យាមួយ ដែលអនុញ្ញាតឱ្យអេក្រង់ អាចផ្លាស់ប្តូរកម្រិត Refresh Rate ទៅតាមកម្មវិធីដែលយើងកំពុងប្រើដោយស្វ័យប្រវត្តិ ហើយវាមានសមត្ថភាពធ្វើឱ្យកម្រិត Refresh Rate របស់អេក្រង់ ធ្លាក់ចុះរហូតដល់ទៅ 10Hz ឯណោះ។
មានន័យថា ពេលដែលយើងកំពុងប្រើកម្មវីធី ឬហ្គេម ដែលត្រូវការកម្រិត Refresh Rate ខ្ពស់ នោះបច្ចេកវិទ្យា LTPO នឹងបញ្ជាឱ្យអេក្រង់ រត់ក្នុងកម្រិត Refresh Rate ខ្ពស់បំផុត ទៅតាមអ្វីដែលអេក្រង់របស់វា អាចធ្វើបាន។ ប៉ុន្តែ បើសិនជាទូរស័ព្ទរបស់យើងកំពុងតែដំណើរការមុខងារ Always-On Display នោះ បច្ចេកវិទ្យា LTPO នឹងបញ្ជាឱ្យអេក្រង់ រត់ក្នុងកម្រិត Refresh Rate ទាបបំផុត ដើម្បីជួយសន្សំសំចៃថាមពលថ្ម។
OnePlus 9 Pro អាចនឹងមានតម្លៃចាប់ផ្តើមដំបូងខ្ទង់ពាន់ៗដុល្លារ ដោយសារតែសមត្ថភាពវាបំពាក់មកជាមួយអេក្រង់កោង ទំហំ 6.78អ៊ីញ ប្រភេទ AMOLED អាចបង្ហាញរូបភាពក្នុងកម្រិត QHD+ និងអាចគាំទ្រអេក្រង់ Refresh Rate 120Hz បំពាក់មកជាមួយបន្ទះឈីបលំដាប់កំពូល Snapdragon 888 គួបផ្សំជាមួយជម្រើស RAM ទំហំ 12GB និងអង្គផ្ទុកទិន្នន័យទំហំ 256GB ក៏ដូចជាថាមពលថ្ម ទំហំ 4,500mAh អាចគាំទ្របច្ចេកវិទ្យាសាកថ្មឥតខ្សែ កម្លាំង 45W ទៀតផង៕
March 19, 2021
សិស្សវិទ្យាល័យអាមេរិកម្នាក់ Hack ចូល Twitter ឥឡូវ ត្រូវតុលាការសម្រេច ឱ្យជាប់គុក 3ឆ្នាំ
សិស្សសាលាវ័យ 17ឆ្នាំម្នាក់ ឈ្មោះ Graham Ivan Clark រៀននៅវិទ្យាល័យ Gaither នៅរដ្ឋហ្វ្លរីដា សហរដ្ឋអាមេរិក ត្រូវបានសមត្ថកិច្ចចាប់ខ្លួន បញ្ជូនទៅតុលាការ និងត្រូវតុលាការកាត់ក្តី សម្រេចឱ្យជាប់ឃុំ រយៈពេល 3ឆ្នាំ ពីបទពាក់ព័ន្ធនឹងការវាយប្រហារដោយខុសច្បាប់(Hack)ចូលទៅក្នុងបណ្ដាញសង្គម Twitter កាលពីខែកក្កដា ឆ្នាំ2020 កន្លងទៅ។
Graham Ivan Clark នៅមានគ្នារបស់គេប៉ុន្មាននាក់ទៀត ដែលបានលួចចូលទៅប្រើប្រាស់គណនី Twitter របស់បុគ្គលល្បីៗ និងក្រុមហ៊ុនតូច-ធំផ្សេងៗ ចំនួន 130គណនីទៀតឯណោះ។ បន្ទាប់ពីលួចចូលបានសម្រេចហើយ គ្នីគ្នារបស់គេ ក៏បានបង្ហោះសារ ដើម្បីផ្សព្វផ្សាយបញ្ឆោត ឱ្យអ្នកគាំទ្ររបស់បុគ្គលល្បីៗ ក៏ដូចជាក្រុមហ៊ុនតូច-ធំទាំងអស់នោះ ធ្វើការផ្ញើប្រាក់ជា Bitcoin ទៅឱ្យពួកគេ។
គ្រាន់តែសារដែលពួកគេ បានបង្ហោះនោះ ចេញជាសាធារណៈបានប៉ុន្មានម៉ោង ពួកគេអាចប្រមូលប្រាក់ Bitcoin បានសរុបច្រើនជាង 10ម៉ឺនដុល្លារ។
ដោយសារតែក្មេងជំទង់ម្នាក់នេះ ធ្វើអំពើខុសច្បាប់ នៅពេលដែលគេទើបមានអាយុ 17ឆ្នាំ (ឆ្នាំមុននៅមិនទាន់គ្រប់អាយុនៅឡើយ) ដូច្នេះហើយ ទើបត្រូវជាប់ពន្ធនាគារតែ 3ឆ្នាំប៉ុណ្ណោះ ព្រោះមិនទាន់គ្រប់ 18ឆ្នាំ តែបើគ្រប់វិញ អាចជាប់ទោសលើស 10ឆ្នាំ។
ក្រុមហ៊ុនធំៗ និងគណនីបុគ្គលល្បីៗជាច្រើនបានរងគ្រោះដូចជា Twitter របស់ ក្រុមហ៊ុន Apple, CEO របស់ Tesla លោក Elon Musk, ក្រុមហ៊ុន Uber គណនីអតីតប្រធានាធិបតី Barack Obama, CEO Microsoft លោក Bill Gats, CEO Amazon លោក Jeff Bezos លោក Warren Buffet គណនីតារាល្បី Kim Kardashian កីឡាប្រដាល់ Floyd Mayweather និងប្រធានាធិបតីអាមេរិកបច្ចុប្បន្ន Joe Biden ជាដើម។
ក្រុមរបស់ពួកគេមានចេតនា ដើម្បីបោកបញ្ឆោតអ្នកប្រើប្រាស់ Twitter និងលួចយកលុយ Bitcoin ជាពិសេស គឺខ្ចីដៃគណនីបុគ្គលល្បីៗខាងលើ ឬក្រុមហ៊ុនធំៗ ដើម្បីបោកបញ្ឆោតអ្នកលេង Twitter តែម្ដង៕
March 19, 2021