កាលពីពេលកន្លងទៅនេះ ទោះបីជាវីរុស COVID-19 បានឆ្លងរាតត្បាតខ្លាំងនៅជប៉ុនកាលពីជាង 1ខែមុនក៏ដោយ តែក៏ជប៉ុន នៅតែរក្សាទុកកាលវិភាគប្រកួតអូឡាំពិករបស់ខ្លួននៅដដែល រហូតទាល់តែមកដល់ពេលថ្មីៗនេះ ទើបប្រទេសជប៉ុនសម្រេចប្រកាស លើកពេលវេលារៀបចំការប្រកួតកីឡាដ៏ធំបំផុតរបស់ពិភពលោកនេះ។
គណៈកម្មាធិការអូឡាំពិកអន្តរជាតិ (IOC) បានបញ្ជាក់យ៉ាងច្បាស់ថា ការសម្រេចចិត្តផ្អាកសិននេះ គឺក្រោយពីមានអត្តពលិកជាច្រើននាក់បានបង្ហាញពីក្ដីបារម្ភ និងមិនចង់ចូលរួម។ ដោយឆ្លើយតបនឹងសំណើទាំងនេះ គណៈកម្មការរៀបចំការប្រកួតកីឡាអូឡាំពិកជប៉ុន ក៏បានយល់ព្រមទៅលើសំណើទាំងនេះ ដោយសម្រេចចិត្តពន្យារពេល ទៅធ្វើនៅឆ្នាំក្រោយវិញ។
គួរបញ្ជាក់ដែរថា តាមកាលវិភាគចាស់ កីឡាអូឡាំពិក 2020 នៅជប៉ុន គ្រោងនឹងធ្វើឡើងនៅថ្ងៃទី24 កក្កដា ឆ្នាំ2020 រហូតដល់ថ្ងៃទី9 ខែសីហា ឆ្នាំ2020៕
Author: ធឿន មករា
ជប៉ុនប្រកាស៖ កីឡាអូឡាំពិក ឆ្នាំ2020 នឹងត្រូវលើកពេលទៅឆ្នាំក្រោយ
ការណែនាំ 4ចំណុចរបស់រដ្ឋបាលរាជធានីភ្នំពេញ ជូនចំពោះបងប្អូនប្រជាពលរដ្ឋដែលទើបអញ្ជើញត្រលប់មកពីក្រៅប្រទេស
រដ្ឋបាលរាជធានីភ្នំពេញ សូមជម្រាបជូនដំណឹងដល់សាធារណជន ពិសេសបងប្អូនប្រជាពលរដ្ឋទាំងអស់ដែលទើបអញ្ជើញត្រលប់មកពីធ្វើការនៅព្រះរាជាណាចក្រថៃ និងពីបណ្តាប្រទេសមួយចំនួនទៀតឱ្យបានជ្រាបថា មេរោគកូវីដ ១៩ (COVID-19) បាន និងកំពុងរាតត្បាតនៅទូទាំងពិភពលោក ដោយឡែកនៅព្រះរាជាណាចក្រកម្ពុជា ក្រសួងសុខាភិបាលបានរកឃើញអ្នកមានផ្ទុកមេរោតកូវីដ ១៩ (COVID-19) ចំនួន ៨៦ ករណី គិតត្រឹមថ្ងៃទី២៣ ខែមីនា ឆ្នាំ២០២០ ហើយមេរោគនេះកំពុងតែបន្តរីករាលដាល ជាបន្តបន្ទាប់។
ដើម្បីចូលរួមទប់ស្កាត់ការរីករាលដាល និងការចម្លងមេរោគកូវីដ១៩ (COVID-19) នៅក្នុងរាជធានីភ្នំពេញ ក៏ដូចក្នុងព្រះរាជាណាចក្រកម្ពុជា រដ្ឋបាលរាជធានីភ្នំពេញស្នើបងប្អូនប្រជាពលរដ្ឋទាំងអស់ដែលទើបអញ្ជើញត្រលប់មកពីធ្វើការនៅព្រះរាជាណាចក្រថៃ និងពីបណ្តាប្រទេសមួយចំនួនទៀត ត្រូវអនុវត្តតាមការណែនាំដូចខាងក្រោម៖
១. ត្រវជួនដំណឹងទៅរដ្ឋបាលខណ្ឌទាំង១៤ ដូចមានតារាងលេខទូរស័ព្ទសម្រាប់ទំនាក់ទំនង ដែលជាឯកសារឧបសម្ព័ន្ធ។
២. ត្រូវដាក់ខ្លួនឱ្យនៅដាច់ដោយឡែក រយៈពេល១៤ថ្ងៃ ដោយអនុវត្តតាមសេចក្តីណែនាំរបស់ក្រសួងសុខាភិបាល។ ក្នុងករណ៍ដែលបងប្អូនមានការលំបាកក្នុងការអនុវត្តសេចក្តីណែនាំរបស់ក្រសួងសុខាភិបាល ត្រវរាយការណ៍ទៅអាជ្ញាធរមូលដ្ឋាន ដើម្បីមានមូលដ្ឋានដោះស្រាយបញ្ហាជូន។
៣. ក្នុងករណីដែលបងប្អូនមានអាការមួយចំនួន ដូចជាក្អក ឡើងកម្តៅ ៣៨ ដឺក្រេ ពិបាកដកដង្ហើមដែលសង្ស័យថាអាចមានផ្ទុកមេរោគកូវីដ១៩(COVID-19) សូមបងប្អូនទំនាក់ទំនងតាមរយៈលេខទូរស័ព្ទដូចមានឯកសារឧបសម្ព័ន្ធភ្ជាប់មកជាមួយ / ឬអាចទំនាក់ទំនងដោយផ្ទាល់ទៅអាជ្ញាធរភូមិ ប៉ុស្តិ៍នគរបាលរដ្ឋបាលសង្កាត់ និងរដ្ឋបាលសង្កាត់ និងមន្ទីរពេទ្យរដ្ឋ ដែលនៅជិតទីកន្លែងរស់នៅរបស់បងប្អូន ជាបន្ទាន់។
៤. អាជ្ញាធរភូមិ ប៉ុស្តិ៍នគរបាលរដ្ឋបាលសង្កាត់ និងរដ្ឋបាលសង្កាត់ត្រូវរាយការណ៍បន្ទាន់ក្នុងករណី ដែលទទួលបានព័ត៌មានថាមានបងប្អូនប្រជាពលរដ្ឋដែលទើបអញ្ជើញត្រលប់មកពីធ្វើការនៅព្រះរាជាណាចក្រថៃ និងពីបណ្តាប្រទេសមួយចំនួនទៀត ទៅរដ្ឋបាលខណ្ឌ ដើម្បីអនុវត្តវិធានការបង្ការ និងទប់ស្កាត់ការរាលដាលនៃមេរោគកូវីដ (COVID-19) និងត្រូវចុះអប់រំណែនាំដល់បងប្អូនប្រជាពលរដ្ឋទាំងអស់នោះ អំពីការដាក់ខ្លួនឱ្យនៅដាច់ដោយឡែក រយៈពេល ១៤ថ្ងៃ។
រដ្ឋបាលរាជធានីភ្នំពេញមានក្តីសង្ឃឹមយ៉ាងមុតម៉ាំថា បងប្អូនប្រជាពលរដ្ឋទាំងអស់ដែលទើបអញ្ជើញត្រលប់មកពិធ្វើការនៅព្រះរាជាណាចក្រថៃ និងពីបណ្តាប្រទេសមួយចំនួនទៀត ត្រវច្ចលរួមទប់ស្កាត់ការរីករាលដាលមេរោតកូវីដ ១៩ (COVID-19) នេះ ដើម្បីសេចក្តីសុខក្រមត្រសារជាទីស្រឡាញ់ សាច់ញាតិក៏ដូចសង្គមជាតិយើងផងដែរ។
ទទួលបានសេចក្តីជូនដំណឹងនេះ ស្នងការដ្ឋាននគរបាលរាជធានីភ្នំពេញ បញ្ជាការដ្ឋានកងរាជអាវុធហត្ថរាជធានីភ្នំពេញ រដ្ឋបាលខណ្ឌទាំង១៤ មន្ទីរ-អង្គភាពជំនាញពាក់ព័ន្ធ ត្រវអនុវត្តសេចក្តីជូនដំណឹងនេះ ឱ្យទទួលបានលទ្ធផលល្អប្រសើរ និងប្រកបដោយប្រសិទ្ធភាពខ្ពស់៕
ប្រភព៖ រដ្ឋបាលរាជធានីភ្នំពេញ
រឿងធម្មតា10យ៉ាង ដែលយើងច្រើនតែភ្លេចក្នុងការតុបតែងផ្ទះ
តើលោកអ្នកធ្លាប់ដែរឬទេ ធ្លាប់មានអារម្មណ៍ថា ទោះជាខំតុបតែងផ្ទះយ៉ាងណា ក៏នៅតែមិនស្អាតដូចរូបនៅក្នុងទស្សនាវដ្តីដែរ និងមានអារម្មណ៍ថា ដូចជារាងទើសភ្នែក ខ្វះនេះ លើសនោះយ៉ាងម៉េចក៏មិនដឹង…។ ព្រោះថា ទោះជាផ្ទះរបស់លោកអ្នក ទំនើប និងថ្លៃប៉ុនណាក៏ដោយ តែរឿងការតុបតែងលម្អមិនមែនជារឿងងាយដូចការគិតនោះទេ។ ខាងក្រោមនេះគឺ ឧទាហរណ៍ខ្លះៗដែលយើងច្រើនតែភ្លាត់ភ្លាំងក្នុងការតុបតែងផ្ទះ ដូច្នេះបើអ្នកណាមិនចង់ខុសឆ្គងក្នុងការតុបតែងផ្ទះ សូមតាមដានដូចតទៅ។
1. តែងផ្ទះច្រើនពេក ឡើងស៊ុបទ្រុប
កុំគិតតែពីតុបតែងផ្ទះដោយរបស់លម្អច្រើនពោរពាស រហូតមើលទៅដូចជាចង្អៀតហប់នោះ បើលោកអ្នកត្រូវដើរចៀសរបស់នេះ ដើរគេចរបស់នោះពេលដើរចេញចូលក្នុងផ្ទះរបស់ខ្លួនឯងនោះ នោះបញ្ជាក់ថា លោកអ្នកមានរបស់របរច្រើនជ្រុលពេកហើយ ដូច្នេះគួរទុកឱ្យមានកន្លែងចន្លោះទំនេរគ្រាន់នឹងសម្រាកខ្សែភ្នែកខ្លះផង។
2. ពេញទៅដោយរបស់ប្រមូលសន្សំទុក
ផ្ទះដែលពោរពេញទៅដោយរបស់ប្រមូលសន្សំ ដែលជាចំណង់ចំណូលចិត្តផ្ទាល់ខ្លួននោះ អ្នកអាចមើលឃើញថាវាស្អាតក៏ពិតមែន តែអ្នកជឿទេថា ភ្ញៀវដែលមកលេងផ្ទះយើង គេមិនបានគិតបែបហ្នឹងទេ ហើយគេមានអារម្មណ៍ថា ដូចជារំខានទៀតផង ដូច្នេះចូរសាកល្បងតុបតែងផ្ទះតាមបែបស្ទីលធម្មតាវិញ ប្រហែលជាគួរឱ្យគយគន់ជាង។3. ទិញគ្រឿងសង្ហារិមមកដាក់ក្នុងផ្ទះ ខុសទំហំ
ទំហំរបស់វត្ថុប្រើប្រាស់គួរតែឱ្យវាសមល្មមនឹងទំហំរបស់បន្ទប់ មិនគួរតូច ឬធំជ្រុលពេកឡើយ ដូច្នេះសូមកុំភ្លេចវាស់ទំហំទីកន្លែងដែលត្រូវដាក់តាំង មុននឹងចេញទៅរកទិញរបស់ទាំងនោះផងទើបជាការប្រសើរ។
4. វ៉លផេភើរ៍(ក្រដាសរូបភាពបិទជញ្ជាំង)
មានរូបភាពក្បាច់ក្បូរគួរឱ្យខ្លាចវ៉លផេភើរ៍ មានរូបដូចសត្វពស់ ដូចសត្វចម្លែក គួរឱ្យខ្លាចញញើត… សូមសាកល្បងគិតទៅមើលថា បើភ្ញៀវមកលេងផ្ទះរបស់អ្នក តើគេហ៊ានឈានជើងចូលមកក្នុងផ្ទះឬទេ? ដូច្នេះ ចូរកុំតុបតែងផ្ទះដោយវ៉លផេភើរ៍បែបនេះជាដាច់ខាត។5. ដើមផ្កាជ័រ
ពិតប្រាកដហើយថា ដើមឈើ និងផ្កា នឹងជួយឱ្យផ្ទះមើលទៅស្រស់ស្អាត តែដើមផ្កាក្លែងក្លាយ ឬជ័រ នឹងធ្វើឱ្យផ្ទះមើលទៅមានតម្លៃថោក បង្ហាញពីចំណង់ចំណូលចិត្តរបស់អ្នកស្នាក់នៅ មិនហាយក្លាស់ ដូច្នេះគួរចំណាយប្រាក់ទិញដើមផ្កាមែនទែនមកតុបតែងលម្អវិញដែលទោះជាថ្លៃជាងមែន តែមើលទៅល្អស្រស់ស្រាយជាងច្រើនណាស់។6. បន្ទប់គេងប្រើពណ៌ផ្កាឈូកពេញទាំងបន្ទប់
តើអ្នកគិតយ៉ាងណាដែរ ពេលជួបមនុស្សដែលតុបតែងខ្លួនដោយសម្លៀកបំពាក់ពណ៌តែមួយតាំងពីក្បាលដល់ចុងជើងនោះ? ការតុបតែងបន្ទប់ ឱ្យអ្វីៗគ្រប់យ៉ាងមានពណ៌ផ្កាឈូកទាំងអស់ ទោះជាមើលយ៉ាងម៉េច ក៏នៅតែដូចជាដែលគ្មានសិល្ប:ក្នុងការតុបតែងដែរ។ ដូច្នេះសូមសាកល្បងរករបស់តុបតែងណា ដែលមានពណ៌ស៊ីគ្នានឹងពណ៌ផ្កាឈូកមកដាក់លាយឡំខ្លះ ទើបជាការប្រសើរជាង។7. មិនព្រមបកថង់ប្លាស្ទិកចេញពីវត្ថុតុបតែងលម្អ
មានវិធីផ្សេងទៀតជាច្រើនក្នុងការថែទាំរបស់ប្រើប្រាស់ឱ្យនៅថ្មី ជាប់ធន់បានយូរ និងមិនប្រឡាក់ តែមិនមែនជាវិធីបែបនេះទេ…។
8. ព្យួររូបភាពលើជញ្ជាំងខ្ពស់ជ្រុលពេក
មើលទៅដូចជាស្អាត តែតើវានឹងរួយកទេ ពេលយើងងើយមើលវា? រូបភាព ឬរូបថតផ្សេងៗមិនគួរព្យួរខ្ពស់ជ្រុលពេក ដល់ថ្នាក់ត្រូវងើបមុខឡើងមើលនោះទេ គួរព្យួរនៅក្នុងកម្ពស់ដែយើងអង្គុយ ឬឈរក៏អាចមើលឃើញដែរទើបជាការប្រសើរ។9. ខ្សែភ្លើងច្រវេតច្រវាត់ រញេរញ៉ៃ គ្មានរបៀប
ខ្សែភ្លើងរបស់ទូរទស្សន៍ កង្ហារ ឬគ្រឿងប្រើប្រាស់អគ្គិសនីទាំងអស់ដែលមាននៅក្នុងផ្ទះ មិនថាតែក្នុងបន្ទប់ណាក៏ដោយ គួររៀបចំប្រមូលចង ឬរុំបញ្ចូលគ្នាជាខ្សែតែមួយដាក់ទៅកៀនជញ្ជាំង ទើបមើលទៅមិនកេកកាក រញ៉េរញ៉ៃ និងមានសណ្តាប់ធ្នាប់។10. ដាក់កៅអីសាឡុងឃ្លាតឆ្ងាយពីគ្នាជ្រុលពេក
នេះគឺជាចំណុចខុសឆ្គងមួយ ដែលមិនអាចទទួលយកបានជាទីបំផុត ដូច្នេះមិនចាំបាច់ដាក់កៅអីសាឡុងទៅជាប់នឹងជញ្ជាំងពេកទេ ហើយទោះជាបន្ទប់ទទួលភ្ញៀវមានទីធ្លាធំទូលាយយ៉ាងណាក៏ដោយ ក៏គួររៀបចំឱ្យបានសមរម្យ និងមានរយៈចម្ងាយពីគ្នាសមល្មម ដើម្បីងាយស្រួលក្នុងការសំណេះសំណាលគ្នា៕
ប្រមុខរាជរដ្ឋាភិបាលកម្ពុជាសម្តេចតេជោ ហ៊ុន សែន បានចេញសារសំឡេងដោយដាក់ចេញនូវវិធានការដោះស្រាយបន្ទាន់ ចំពោះបងប្អូនពលករខ្មែរដែលទើបត្រឡប់មកពីប្រទេសថៃ
នៅក្នុងសារសំឡេងនោះសម្តេចតេជោបានជម្រាបថា៖ “ជូនថ្នាក់ដឹកនាំរបស់យើងនៅក្នុង Group ប្រឆាំងកូវីត-19នេះ ហើយក៏ដូចជាពិសេសគឺអភិបាលខេត្ត ដែលជាប្រធានគណៈកម្មការប្រយុទ្ធប្រឆាំងកូវីត-19នៅតាមខេត្ត។
យើងបានឃើញហើយថា អ្នកជំងឺរបស់យើងជូនកាលកន្លែងខ្លះមានការកើនឡើង ដូចជានៅខេត្តព្រះសីហនុជាដើម អញ្ចឹងបើកើតឡើងរបៀបនេះ ធ្វើឱ្យកន្លែងដែលយើងទទួល គឺវាមិនគ្របគ្រាន់ទេ។ អញ្ចឹងខ្ញុំបានពិភាក្សាជាមួយនឹងឯកឧត្តម ម៉ម ប៊ុនហេង យើងត្រូវប្រើប្រាស់សាលារៀន ហើយខ្លះមានអ្នកជូនយោបល់ខ្ញុំថាអោយយកកុងទីន័ររមកកែច្នែធ្វើជាបន្ទប់ ប៉ុន្តែគឺវាមិនល្អទេ ចឹងខ្ញុំគិតថា ត្រូវប្រើប្រាស់សាលារៀន ហើយសាលារៀនដែលខ្ញុំបានធ្វើកន្លងមកគឺស្អាតៗណាស់ គឺនៅទីរួមខេត្ត និងកន្លែងមួយចំនួន គឺយើងយកសាលារៀនតែម្តង អ្វីដែលជាបញ្ហាបន្ទាន់ គឺត្រូវជ្រើសរើសទីតាំងណាមួយ ឬពីរ ក្នុងខេត្តមួយ ហើយគឺថានឹងរៀបចំប្រព័ន្ធទឹក ភ្លើង ចូលអោយដល់ជាបន្ទាន់ នេះជាកិច្ចការបន្ទាន់នៅតាមខេត្តត្រូវយកចិត្តទុកដាក់។
រាជធានីភ្នំពេញមិនជាចំណោទទេ ដោយសារយើងមាន មន្ទីរពេទ្យរុស្ស៊ី ហើយអគារនៅចាក់អង្រែ ហើយក្រៅពីនោះ នៅមន្ទីរពេទ្យ UT ហើយនឹងសណ្ឋាគារអាំងទែកុងទីណង់តាល់ហើយ មិនជាចំណោទទេ ប៉ុន្តែអ្វីដែលជាចំណោទ គឺនៅតាមបណ្តាខេត្ត ដែលត្រូវធ្វើបន្ទាន់ ដោះស្រាយធ្វើមិចត្រូវជ្រើសរើសសាលារៀនដែលយើងកំពុងតែបិទ យកអគារមួយ ឬពីរ គឺអោយមានច្រើនបន្ទប់ រៀបចំបន្ទប់ រៀបចំគ្រែ ដើម្បីដំណើរការតែម្តង ដោយប្រើប្រាស់កម្លាំងសរុប ដែលអាចយកទាំងកម្លាំងប៉ូលីស កម្លាំងទាហាន និងប៉េអឹមដើម្បីយកមកជួយការងារនេះតែម្តង។
ហើយជាពិសេសគឺសម្រុកដោះស្រាយបញ្ហាតភ្ជាប់ប្រព័ន្ធទឹក ប្រព័ន្ធភ្លើង ចូលទៅក្នុងសាលាតែម្តង ហើយរៀបចំគ្រែ ដោះស្រាយគ្រែ ដើម្បីដាក់សម្រាប់ទទួលអ្នកជំងឺដែលយើងត្រូវមានការចំបាច់ នេះជាវិធីដែលដោះស្រាយបន្ទាន់ ហើយយើងមានអគារស្រាប់ទាំងអស់ មិនចាំបាច់ដូចនៅប្រទេសចិនគេកសាងអគារភ្លាមៗ ដែលយើងគឺមិនចំបាច់ទេ គឺយើងយកអគារសាលារៀនតែម្តង បន្ទប់សាលារៀនដែលយើងបានធ្វើកន្លងទៅស្អាតៗណាស់ ហើយរឿងដែលខ្វះ គឺថាខ្វះតែបន្ទប់ទឹកទេ ប៉ុន្តែបើនិយាយពីសាលាមានកន្លែងខ្លះ គឺមានបន្ទប់ទឹក ប៉ុន្តែបណ្តាញទឹកដែលត្រូវផ្គត់ផ្គង់គឺវាត្រូវអោយគ្រប់ ដែលត្រូវខិតខំដោះស្រាយបញ្ហានឹងបន្ទាន់។
សូមអោយយកចិត្តទុកដាក់អំពីបញ្ហានេះ ព្រោះដើម្បីជៀសវាងគឺនៅពេលមានអ្នកជំងឺច្រើន យើងមិនអាចរកកន្លែងដាក់បាន តែយើងបានត្រៀមបម្រុងទុកហើយ ។
សូមអោយថ្នាក់ខេត្ត ឯកឧត្តម ម៉ម ប៊ុនហេង ក៏ដូចជាថ្នាក់ដឹកនាំក្រសួងគឺចូលរួមផ្តល់មតិបន្ថែមទៅអោយសុខាភិបាលខេត្ត រួមជាមួយនឹងគណៈអភិបាល ដើម្បីពិនិត្យទៅថា គួរយកកន្លែងណាដែលសមស្រប យើងមិនមែនចេះតែដើរយកទេ គឺយកកន្លែងណាដែលសមស្រប ដែលមានលទ្ធភាព ហើយដែលមិនអាចរីករាលដាលទៅកន្លែងដទៃ សូមអរគុណ”៕
ប្រភព៖ ទូរទស្សន៍ជាតិកម្ពុជា ទទក – TVK
VIVO និយាយថា មិនយូរទេ ទូរស័ព្ទតម្លៃជាង 200ដុល្លារនឹងមាន 5G ស្រាប់
លោក Liu Hong ដែលជាថ្នាក់ដឹកនាំមួយរូបក្នុងក្រុមហ៊ុនផលិតស្មាតហ្វូន VIVO បានលើកឡើងថា នៅថ្ងៃអនាគតដ៏ខ្លីខាងមុខនេះ(ចុងឆ្នាំ ២០២០) ស្មាតហ្វូន 5G នឹងមានតម្លៃត្រឹមតែជាង ២០០ដុល្លារប៉ុណ្ណោះ។
លោកបានបន្ថែមទៀតថា ក្រុមហ៊ុនកំពុងតែធ្វើយ៉ាងណាផលិតស្មាតហ្វូន 5G ឱ្យបានច្រើនជាង ១០០,០០០គ្រឿងដើម្បីផ្គត់ផ្តង់ទីផ្សារ។ វិបតិ្តវីរុស COVID-19 បានធ្វើឲ្យចរន្តលក់ចេញ ធ្លាក់ចុះពី ៣០% ទៅ ៥០% ហើយមិនមែនមានតែ VIVO មួយនោះទេ សហគ្រាសផ្សេងៗក៏មិនខុសគ្នាដែរ។
ថ្នាក់ដឹកនាំរូបនោះ បានបន្ថែមទៀតថា VIVO ដាក់គោលដៅនៅឆ្នាំបន្ទាប់ នឹងត្រូវផលិតយ៉ាងតិចឲ្យបានជាង ២០០លានគ្រឿងក្នុង 1ឆ្នាំ ដើម្បីយកចំណែកទីផ្សារពិភពលោកឱ្យបានកាន់តែច្រើនជាងមុន៕
Ninja robots ត្រូវបានដាក់ឱ្យប្រើនៅពេទ្យក្នុងប្រទេសថៃ ជំនួសបុគ្គលិកពេទ្យ
មន្ទីរពេទ្យនានានៅក្នុងប្រទេសថៃ កំពុងដាក់ឱ្យប្រើប្រាស់ “Ninja robots” ដើម្បីស្ទង់កម្តៅ និងការពារសុខភាពបុគ្គលិកពេទ្យ នៅសមរភូមិជួរមុខដែលធ្វើការហួសកម្លាំងដើម្បីប្រយុទ្ធនឹងជំងឺកូរ៉ូណា។
លោក វីប៊ុន សាងវីរៈផាន់ស៊ិរិ មកពីសាកលវិទ្យាល័យជុឡាឡុងកន និយាយថា “ក្រុមគ្រូពេទ្យអាចឈរនៅក្រៅបន្ទប់ និងធ្វើទំនាក់ទំនងជាមួយអ្នកជំងឺនៅខាងក្នុងតាមរយៈមនុស្សយន្ត”។ មនុស្សយន្តស៊េរីក្រោយនឹងផលិតឡើងដើម្បីឱ្យវាដឹកអាហារ និងថ្នាំពេទ្យឱ្យអ្នកជំងឺ និងចុងក្រោយអាចនឹងប្រើដើម្បីលាងសម្អាតមេរោគនៅតាមបន្ទប់មន្ទីរពេទ្យបានទៀតផង។
ក្រុមវិស្វកររបស់លោកវីប៊ុន ក៏កំពុងប្រឹងប្រែងផលិតមនុស្សយន្តនិនចាឱ្យបានច្រើនបន្ថែមទៀតសម្រាប់មន្ទីរពេទ្យ 10កន្លែង ផ្សេងទៀតនៅជុំវិញប្រទេសថៃ។
ពីដំបូង គេផលិតរ៉ូបូតនេះឡើង គឺដើម្បីតាមដានអ្នកជំងឺស្ត្រូក (ដាច់សរសៃឈាមខួរក្បាល) តែប៉ុណ្ណោះ។យ៉ាងណាមិញ គេក៏បានយកទៅច្នៃវាឡើងវិញយ៉ាងលឿន ដើម្បីជួយប្រយុទ្ធនឹងជំងឺ COVID-19 ដែលមកទល់ឥឡូវបានសម្លាប់មនុស្សជាង 1ម៉ឺននាក់ហើយនៅជុំវិញពិភពលោក។
ពួកវាបានជួយបុគ្គលិកនៅមន្ទីរពេទ្យចំនួន 4 ក្នុងទីក្រុងបាងកក ដើម្បីកាត់បន្ថយហានិភ័យនៃការឆ្លងមេរោគ តាមរយៈការអនុញ្ញាតឱ្យវេជ្ជបណ្ឌិត និងគិលានុបដ្ឋាកអាចនិយាយទៅកាន់អ្នកជំងឺបានតាមរយៈវីដេអូ។
ចិនបានបញ្ជូនគ្រូពេទ្យជំនាញចំនួន7នាក់ រួមទាំងបរិក្ខាពេទ្យមកកម្ពុជា
ដូចការគ្រោងទុកក្រុមគ្រួពេទ្យជំនាញរបស់ចិនចំនួន7នាក់ និងជំនួយសម្ភារៈបរិក្ខាពេទ្យជាង4តោន បានមកដល់ប្រទេសកម្ពុជាហើយនៅវេលាម៉ោង 8:50នាទីព្រឹកថ្ងៃទី23នេះ ដើម្បីចូលរួមទប់ស្កាត់ការរីករាលដាលវីរុស Covid-19 ជាមួយរាជរដ្ឋាភិបាលកម្ពុជា។
កូនតូចគេងលក់គ្រប់គ្រាន់ គឺកូនសោបើកឆ្ពោះទៅរកការរៀនយល់ដឹង
តើលោកឪពុកអ្នកម្តាយទាំងអស់ដឹងទេថា ទារកដែលបានគេងលក់ញឹកញាប់ នឹងជួយហុចផលល្អដល់ការរៀនយល់ដឹងនៅពេលក្រោយ?
ព្រោះមានលទ្ធផលនៃការស្រាវជ្រាវវិភាគពីមហាវិទ្យាល័យ ឆេហ្វហ្វៀល មួយ ដែលតាមដានសង្កេតមើលទង្វើរបស់ទារកដែលមានអាយុមិនលើស 12ខែ ចំនួន 216នាក់ ហើយបានរកឃើញថា ទារកនឹងចងចាំការរៀនយល់ដឹងថ្មីៗមិនបានឡើយ បើមិនបានគេងលក់យូរៗជាបន្តបន្ទាប់គ្រប់គ្រាន់ ហើយពេលវេលាដែលល្អបំផុតក្នុងការរៀនយល់ដឹងរបស់ក្មេងនោះគឺ អំឡុងពេលមុនគេងហ្នឹងឯង ដូច្នេះហើយទើបការអានក្នុងអំឡុងពេលមុនគេងលក់ គឺជារឿងសំខាន់។
ការគេងលក់មានភាពសំខាន់ចំពោះអំឡុងពេលដំបូងរបស់ជីវិតខ្លាំងជាងវ័យផ្សេងទៀត អ្នកស្រាវជ្រាវវិភាគបានសាកល្បងលេងធ្វើតុក្កតាដៃជាមួយទារកវ័យ 6 – 12ខែ ដោយឱ្យទារកចំនួនពាក់កណ្តាលបានគេងលក់ 4ម៉ោងក្រោយការរៀនយល់ដឹង ខណៈដែលចំនួនពាក់កណ្ដាលទៀត មិនបានគេងសម្រាក ឬបានគេងសម្រាកតិចជាង30នាទី។ថ្ងៃបន្ទាប់មក ពេលសាកល្បងជំរុញឱ្យទារកលេងធ្វើតុក្កតាដៃឡើងវិញដូចពីម្សិលនោះ លទ្ធផលនៃការសាកល្បងបានបង្ហាញឱ្យឃើញថា ការគេងលក់ គឺជាបច្ច័យសំខាន់មួយក្នុងការរៀនយលដឹង ព្រោះទារកដែលបានគេងលក់គ្រប់គ្រាន់អាចលេងធ្វើតុក្កតាដៃឡើងវិញបាន ជាមធ្យមបាន 1ក្នុង 3នាក់ តែក្មេងដែលមិនបានគេងសម្រាក ឬបានគេងសម្រាកតិច ធ្វើឡើងវិញមិនបានឡើយ។
វេជ្ជបណ្ឌិត ជេន ហ៊ើរ៍ប៊ើដ សាស្ត្រាចារ្យមុខវិជ្ជាចិត្តវិទ្យា នៃមហាវិទ្យាល័យ ឆេហ្វហ្វៀល បានអធិប្បាយបន្ថែមថា ភាពក្លៀវក្លាស្វាហាប់ មិនមែនជារឿងដែលល្អបំផុតសម្រាប់ការរៀនយល់ដឹងនោះទេ តែកិច្ចការងារមុនពេលគេងទៅវិញទេ ដែលសំខាន់បំផុតសម្រាប់កុមារ។
សាស្ត្រាចារ្យ ឃើក ចាន់ឌិចក៍ អ្នកវិទ្យាសាស្រ្តផ្នែកការគេងនៃមហាវិទ្យាល័យ ស៊ើរ៍រេយ៍ប្រាប់ថា យន្តការរបស់ការចងចាំនៅក្នុងកម្មវិធីនៃការគេងលក់ បានបង្ហាញឱ្យឃើញថា មានការទាក់ទិនរវាងខួរក្បាលដែលបង្កខ្លួនឡើងក្នុងអំឡុងពេលគេងលក់ ដូច្នេះទារកគួរគេងលក់យ៉ាងគ្រប់គ្រាន់ដើម្បីការរៀនយល់ដឹង។ ទោះជាការរៀនយល់ដឹងក្នុងអំឡុងពេលមុនគេង និងការគេងលក់ក្រោយការហ្វឹកហាត់ជារឿងល្អមែន តែត្រូវមិនមែនជាការគេងលក់ក្នុងអំឡុងពេលហ្វឹកហាត់នោះទេ៕
វីង រួមចំណែកជួយប្រជានជនកម្ពុជានៅកូរ៉េខាងត្បូងខណៈមានការរីករាលដាលមេរោគ Covid-19
ភ្នំពេញ ខែមីនា ២០២០-ធនាគារឯកទេសវីង បានបរិច្ចាគទឹកប្រាក់ចំនួន៥០០០ ដុល្លារដល់ប្រជាជនខ្មែរ ដែលកំពុង រស់នៅ ប្រកបការងារនិង សិក្សានៅកូរ៉េខាងត្បូងតាមរយៈស្ថានទូតកម្ពុជាដើម្បីទិញម៉ាស់និងទឹកលាងដៃក្នុងការការពារខ្លួនពីការីករាលដាលនៃមេរោគ Covid-19។
ឯកឧត្ដម ឡុង ឌីម៉ង់ ឯកអគ្គរាជទូតកម្ពុជាប្រចាំប្រទេសកូរ៉េខាងត្បូងបានមានប្រសាសន៍ថា៖ «ការបរិច្ចាគវិភាគទានដែលប្រកបដោយសប្បុរសធម៌របស់វីងនៅពេលនេះ គឺពិតជាចាំបាច់បំផុតដើម្បីទិញម៉ាស់និងទឹកលាងដៃសម្រាប់ចែកជូនដល់ពលរដ្ឋកម្ពុជាដែលកំពុងរស់នៅ និងធ្វើការនៅទីនេះ ជាពិសេសពលរដ្ឋមួយចំនួនដែលកំពុងរស់នៅក្នុងតំបន់លំបាកក្នុងការរកទិញម៉ាសនិងទឹលាងដៃ ដើម្បីការពារនិងប្រយុទ្ធប្រឆាំងពីការរីករាលដាលមេរោគ Covid -19»។
នាពេលបច្ចុប្បន្ននេះ មានមនុស្សរាប់ពាន់នាក់ហើយដែលត្រូវបានគេរកឃើញថាមានផ្ទុកមេរោគCovid 19 នៅក្នុងប្រទេសកូរ៉េខាងត្បូង។ ទោះជាខណៈពេលនេះមានប្រជាជនកម្ពុជាជាង ៦០.០០០ នាក់ កំពុងរស់នៅធ្វើការនិងសិក្សារនៅក្នុងប្រទេសមួយនេះក៏ដោយ ប៉ុន្តែមិនទាន់មានរបាយការណ៍ណាមួយដែលបានបញ្ជាក់ពីការឆ្លងមេរោគនេះឡើយ។
លោក ឆៃ ប៉េងស្រ៊ន់ និស្សិតកម្ពុជាដែលកំពុងសិក្សាថ្នាក់បណ្ឌិតនៃសាកលវិទ្យាល័យ Myongji University ក្នុងប្រទេសកូរ៉បាននិយាយថា៖ «យើងខ្ញុំសូមកោតសរសើរយ៉ាងខ្លាំងដែល វីង មិនត្រឹមតែយកចិត្តទុកដាក់ចែករំលែកសុខទុក្ខដល់បងប្អូនខ្មែរដែលរស់នៅក្នុងប្រទេសតែប៉ុណ្ណោះទេ សូម្បីតែពួកយើងនៅដល់ប្រទេសកូរ៉េ ក៏វីងនៅតែជួយនិងចូលរួមវិភាគទានតាមរយៈស្ថានទូតផងដែរ» ។បើយោងតាមសមាគមនិស្សិតកម្ពុជានៅកូរ៉េ(CSAK) មាននិស្សិតខ្មែរប្រមាណជាង៤៥០នាក់កំពុងតែបន្តការសិក្សានៅសាកលវិទ្យាល័យនានាក្នុងប្រទេសកូរ៉េខាងត្បូង។
លោក ម៉ានូ រ៉ាចាន់ អគ្គនាយកនៃធនាគារឯកទេស វីង (ខេមបូឌា) លីមីតធីត បានមានប្រសាសន៍ទៅកាន់ប្រជាជនកម្ពុជានៅក្នុងប្រទេសកូរ៉េខាងត្បូងថា៖«សូមអ្នកទាំងអស់គ្នាថែរក្សាខ្លួនអោយបានល្អ ហើយព្យាយាមរក្សារការទាក់ទងជាមួយក្រុមគ្រួសារអ្នកនៅកម្ពុជាជាប្រចាំ។ ខ្ញុំប្រាកដថាក្រុមគ្រួសាររបស់អ្នកកំពុងព្រួយបារម្ភអំពីអ្នកទាំងអស់គ្នាជាខ្លាំង។ អ្នកទាំងអស់គ្នាពិតជាមានតួនាទីយ៉ាងសំខាន់សំរាប់គ្រួសារណាស់»។កាលពីឆ្នាំមុនប្រជាជនកម្ពុជាដែលធ្វើការនៅប្រទេសកូរ៉េខាងត្បូងបានរួមចំណែកទ្រទ្រង់សេដ្ឋកិច្ចជាតិជាង៥០០ លានដុល្លារតាមយៈការផ្ទេរប្រាក់ពីប្រទេសកូរ៉ខាងត្បូងមកប្រទេសកម្ពុជា។
តើអ្នកដឹងទេថា វីតាមីនសំខាន់ចំពោះមនុស្សខ្លាំងប៉ុនណា?
តារាស្រីហូលីវូដ ហ៊ីឡារី ស្វ៊ែងក៍ ញ៉ាំវីតាមីនបន្ថែមក្នុង1ថ្ងៃ 45គ្រាប់ ដោយសារតែមកពីការចង់សម្រកទម្ងន់ (Diet) ដូច្នេះទើបកើតមានជាសំណួរមួយឡើងថា តើការញ៉ាំវីតាមីនបន្ថែមនោះសំខាន់ប៉ុនណា? គួរញ៉ាំយ៉ាងណា? តើមនុស្សបែបណាខ្លះដែលគួរញ៉ាំ? និងវីតាមីនជួយអ្វីដល់យើងខ្លះ? ចំពោះរឿងនេះ លោកវេជ្ជបណ្ឌិតជំនាញមានចម្លើយសម្រាប់មិត្តអ្នកអានទាំងអស់។
តើវីតាមីន មានភាពចាំបាច់ចំពោះសុខភាពយ៉ាងណា? អាហារ 5ប្រភេទក្រុមដែលរាងកាយត្រូវការនោះគឺ ខាបូហាយដ្រេត ប្រូតេអុីន វីតាមីន ជាតិខ្លាញ់ និងសារធាតុរ៉ែ ប្រៀបដូចជាថាមពលបញ្ឆេះឱ្យរាងកាយ និងអង់ហ្ស៊ីមផ្សេងៗធ្វើការបានតាមប្រក្រតីដូច្នោះដែរ។
តើវីតាមីនបន្ថែម មានភាពចាំបាច់សម្រាប់អ្នកណាខ្លះ? បើស្ថិតក្នុងស្ថានភាពដែលអាចញ៉ាំបន្លែ និងផ្លែឈើ រួមទាំងញ៉ាំអាហារផ្សេងៗក្នុងចំណែកដែលត្រឹមត្រូវបាននៅឡើយនោះ ក៏មិនមានភាពចាំបាច់អ្វីត្រូវបន្ថែមវីតាមីនទេ លើកលែងតែក្នុងករណីដែលមិនអាចញ៉ាំអាហារបានគ្រប់តាមតម្រូវការដែលរាងកាយត្រូវការ និងស្ថិតក្នុងសភាវដែលរាងកាយត្រូវការវីតាមីនជាពិសេស ដូចជា ពេលឈឺថ្កាត់ និងត្រូវការឱ្យរាងកាយស្វាហាប់ឡើងវិញប៉ុណ្ណោះ។ តែសម្រាប់មនុស្សទូទៅដែលញ៉ាំអាហារបានតាមប្រក្រតី អាចប្រើតិចនិកផ្សេងទៀតដែលនឹងធ្វើឱ្យយើងញ៉ាំបន្លែ និងផ្លែឈើមិនច្រើនជ្រុលពេក ដូចជា កាត់បន្ថយអាហារលាងជាតិពុល ក្នុង 1សប្តាហ៍ 1ដង ឬ 2សប្តាហ៍ម្តងដោយការញ៉ាំផ្លែឈើពេញ 1ថ្ងៃ ដើម្បីឱ្យរាងកាយបានទទួលវីតាមីនពីផ្លែឈើ តែត្រូវមានលក្ខខណ្ឌមួយថា ត្រូវតែជាផ្លែឈើដែលគ្មានជាតិម្សៅ និងរសជាតិដែលមិនផ្អែមខ្លាំងពេក។
អាការខ្វះវីតាមីនរ៉ាំរ៉ៃ ជាសភាវម្យ៉ាងដែលមិនត្រូវបានរាប់ចូលក្នុងក្រុមជំងឺឈឺថ្កាត់ទេ ដូចជាការខ្វះវីតាមីន C នឹងធ្វើឱ្យចេញឈាមតាមជើងធ្មេញ ឬការខ្វះវីតាមីន B1 នឹងធ្វើឱ្យកើតអាការស្ពឹកស្រពន់ជាដើម តែមិនមែនដល់ថ្នាក់ខ្វះវីតាមីន រហូតដល់កើ់តជំងឺនោះទេ គ្រាន់តែអាចមានអារម្មណ៍ថា មិនសូវស្រស់ស្រាយដោយមិនដឹងមូលហេតុ ឬអស់កម្លាំងល្វើយតែប៉ុណ្ណោះ។
យ៉ាងម៉េចទើបហៅថា ការញ៉ាំវីតាមីនដែលត្រឹមត្រូវ? ការញ៉ាំវីតាមីនតាមប្រភេទនីមួយៗក៏ខុសប្លែកពីគ្នាដែរ ដូចជា បេតាឃែរ៉ូធីន គួរជ្រើសរើសយកប្រភេទដែលចម្រាញ់ពីធម្មជាតិទើបប្រសើរជាង។ ចំណែកវីតាមីនច្នៃប្រឌិត ក៏មានចំណុចគួរប្រយ័ត្នដែរ ព្រោះនឹងមានភាពប្រថុយប្រថានក្នុងការកើតជំងឺមហារីកសួតច្រើន។ ចំណែកឯវីតាមីនE ជាវីតាមីនរលាយក្នុងខ្លាញ់ដូចគ្នានឹងវីតាមីន K. A និងD ដែរ តែមានចំណុចកំណត់ថា ថ្នាំ ឬវីតាមីនដែលរលាយក្នុងខ្លាញ់ ងាយនឹងប្រមូលពូនផ្ដុំច្រើនណាស់ ដូច្នេះទើបត្រូវកំណត់បរិមាណក្នុងការទទួលទាន។
តើវីតាមីនជួយអ្វីដល់រាងកាយមនុស្សខ្លះ?
-វីតាមីន A ជួយដល់ការមើលឃើញនៅពេលយប់ និងជួយការពារការឆ្លងមេរោគក្នុងប្រព័ន្ធរំលាយអាហារ ប្រព័ន្ធបន្ទោបង់ទឹកមូត្រ និងប្រព័ន្ធដង្ហើម។
-វីតាមីន B1 សំខាន់ចំពោះសាច់ដុំ ប្រព័ន្ធប្រសាទ និងការធ្វើការរបស់បេះដូង។
-វីតាមីន B12 ចាំបាច់ចំពោះការចម្រើនធំធាត់ ជួយសាងគ្រាប់ឈាមក្រហម និងជំរុញប្រព័ន្ធប្រសាទ។
-វីតាមីន C មានសារធាតុ អ៊ែនទីអុកស៊ីឌែនត៍ ការពារការឆ្លងមេរោគ ធ្វើឱ្យមុខរបួស ឬដំបៅឆាប់ជាសះ និងជួយបឺតជ្រាបសារធាតុដែក តែអ្វីដែលសំខាន់នោះគឺ ជួយផលិតខូឡាជេន ដែលនឹងជួយឱ្យស្បែកតឹងណែនមិនឆាប់ចាស់។
-វីតាមីន E ជួយបំប៉នគ្រាប់ឈាមក្រហម ការពារសួត និងសាច់ភ្នាសផ្សេងៗ៕