ធឿន មករា - La Reine Media

Xiaomi វ៉ាឈ្នះ Huawei ក្លាយជាក្រុមហ៊ុនផលិតស្មាតហ្វូនធំជាងគេនៅចិន

កាលពីពេលពេលថ្មីៗនេះ សារព័ត៌មានក្នុងស្រុកចិន បានបញ្ចេញរបាយការណ៍ថ្មីចុងក្រោយបង្អស់ ដែលយោងតាម Counterpoint បានបង្ហាញថា ចំណែកទីផ្សារភាគហ៊ុនទូរស័ព្ទទូទាំងពិភពលោករបស់ក្រុមហ៊ុន Xiaomi បានហក់ឡើងខ្ពស់ដល់ទៅ 12% បានក្លាយជាក្រុមហ៊ុនផលិតស្មាតហ្វូន ធំជាងគេនៅចិន និងជាប់លេខ3 លើពិភពលោក លក់ចេញបានជាង 4.4លានគ្រឿង គិតត្រឹមដំណាច់ខែកុម្ភៈ ឆ្នាំ2021។ កាលពីខែមករា ដើមឆ្នាំ2021 តំណែងលេខ1 នេះ បានធ្លាក់លើដៃ OPPO ឯណោះទេ។

ក្នុងទីផ្សារពិភពលោក Huawei ធ្លាក់ចុះ 4% ចំណែកឯ OPPO ឈរនៅទី4 មានចំណែកទីផ្សារភាគហ៊ុនពិភពលោក 12% និង vivo ជាប់ចំណាត់ថ្នាក់ទី5 ជាមួយចំណែកទីផ្សារភាគហ៊ុន 10% ។ ដោយឡែកSamsung ឈរនៅលំដាប់កំពូល ជាក្រុមហ៊ុនផលិតទូរស័ព្ទចល័តធំជាងគេបំផុតនៅលើពិភពលោក មានចំណែកទីផ្សារភាគហ៊ុន 20% និង Apple ជាប់ចំណាត់ថ្នាក់ទី2 ចំណែកទីផ្សារភាគហ៊ុន 17%។

សូមជម្រាបជូនដែរថា តំណែងលេខ1 នេះធ្លាប់ត្រូវបានគ្រប់គ្រងដោយក្រុមហ៊ុនបច្ចេកវិទ្យា Huawei អស់ជាច្រើនឆ្នាំមកហើយ តែយ៉ាងណាមិញ គេបានសង្កេតឃើញថា ចាប់តាំង Huawei ត្រូវបានហាមឃាត់ មិនឱ្យនាំយកផលិតផលទៅលក់ក្នុងទីផ្សារអាមេរិកមក បានធ្វើឱ្យក្រុមហ៊ុនមួយនេះបាត់បង់ទីផ្សារមួយចំណែកដ៏ធំ៕

April 7, 2021

LG បញ្ជាក់ច្បាស់ហើយថា ពិតជាដើរចេញមែន ចាប់ពីថ្ងៃទី31 ខែកក្កដា 2021 តទៅ!

បន្ទាប់ពីមានការសម្រេចចិត្តចុងក្រោយដោយក្រុមប្រឹក្សាភិបាលរបស់ខ្លួន ដែលសារព័ត៌មានអន្តរជាតិនានា បានចុះផ្សាយព្រោងព្រាត កាលពីម្សិលមិញ បានបញ្ជាក់ជាផ្លូវការថា ក្រុមហ៊ុន LG នឹងចាកចេញពីអាជីវកម្មផលិតស្មាតហ្វូន របស់ប្រទេសកូរ៉េខាងត្បូង ពិតប្រាកដមែនហើយ។

LG បានបញ្ជាក់ថា ការសម្រេចចិត្តចាកចេញនេះ នឹងធ្វើឡើងចាប់ពីថ្ងៃទី31 ខែកក្កដា ឆ្នាំ2021។ ដូច្នេះយើងនឹងលែងឃើញមានទូរស័ព្ទឆ្លាតវៃ ស៊េរីថ្មីៗផលិតក្រោមម៉ាក LG ទៀតហើយ។

យ៉ាងណាមិញ ក្រុមហ៊ុន LG នឹងផ្ដោតទៅលើធនធានរបស់ខ្លួនដែលមានស្រាប់ ហើយនឹងបន្ដអាជីវកម្មរបស់ខ្លួនផ្សេងទៀត គឺនៅក្នុងវិស័យគ្រឿងបន្លាស់រថយន្តអគ្គិសនី, ឧបករណ៍IoT (ឧបករណ៍វៃឆ្លាតដោយប្រើអ៊ីនធឺណិត), ឧបករណ៍ទំនើបសម្រាប់ផ្ទះវៃឆ្លាត, មនុស្សយន្ត, បច្ចេកវិទ្យា AI និងផ្នែកប្រឹក្សាដោះស្រាយអាជីវកម្មវិញម្ដង។ ក្រៅពីនេះ LG ក៏នឹងបន្ដខិតខំស្រាវជ្រាវផ្នែកបណ្ដាញទំនាក់ទំនង 6G ផងដែរ៕

April 7, 2021

Son ទាមទារថ្លៃឈ្នួល 1អាទិត្យ 20ម៉ឺនដុល្លារ ទើបបន្តកុងត្រាថ្មី នៅ Spur

កីឡាករខ្សែប្រយុទ្ធលេខ1 របស់អាស៊ី ជនជាតិកូរ៉េខាងត្បូង Son Heung-Min នឹងផុតកុងត្រាជាមួយក្លិបបាល់ទាត់ Tottenham Hotspur នាចុងរដូវកាល2022 ខាងមុខនេះហើយ ដោយនៅមិនទាន់មានតម្រុយក្នុងការបន្តកុងត្រាជាថ្មីឡើយ ដោយសារតែមានបញ្ហារបួស។

យោងតាម Football Insider បានឱ្យដឹងថា ក្លិបយក្សនៅអាល្លឺម៉ង់ គឺ Bayern បានរៀបចំដាក់សំណើកុងត្រារយៈពេល 5ឆ្នាំទៅឱ្យ Son ខណៈតម្លៃខ្លួន អាស្រ័យលើ Spurs ថា តើចង់បានប៉ុន្មាន?។ Son វ័យ 28ឆ្នាំ ធ្លាប់មានបទពិសោធលេងនៅអាល្លឺម៉ង់ជាមួយក្លិប Hamburg និង Bayer Leverkusen មុនពេលផ្លាស់ទៅអង់គ្លេស នៅឆ្នាំ2015។

គួរឱ្យដឹងដែរថា កុងត្រាថ្មីរបស់ Son Heung-Min ត្រូវបានគេដឹងថា ភ្នាក់ងារចាត់ចែងកីឡាកររូបនេះ បានទាមទារតម្លៃ 20ម៉ឺនដុល្លារ ក្នុង 1សប្តាហ៍ ហើយសំណើនេះត្រូវបាន Tottenham Hotspur ពន្យារពេលចរចា មកទល់នឹងពេលនេះ៕

Soccer Football – Audi Cup – Final – Tottenham Hotspur v Bayern Munich – Allianz Arena, Munich, Germany – July 31, 2019 Tottenham’s Son Heung-Min in action REUTERS/Michael Dalder

April 5, 2021

វីងអនុញ្ញាតឲ្យអតិថិជនអាចផ្ញើប្រាក់ពីគណនីវីង ទៅគណនីវីងមិនអស់ថ្លៃសេវា

ធនាគារឯកទេសវីង បានជូនដំណឹងដល់សាធារណជនឲ្យបានជ្រាបថា ការផ្ញើប្រាក់ពីគណនីវីង ទៅគណនីវីងផ្សេងទៀតតាមរយៈ កម្មវិធីស្មាតហ្វូនវីង (Wing Money App) នឹងមិនអស់ថ្លៃសេវាឡើយ។

អតិថិជនវីងទាំងអស់នឹងកាន់តែងាយស្រួយជាមួយការផ្ញើប្រាក់ទៅកាន់ដៃគូរម្ខាងទៀតដោយសេរីគ្រប់ពេលវេលានិងគ្រប់ទីកន្លែង ដោយគ្រាន់តែចុចពីរបីដងលើទូរស័ព្ទដៃរបស់ពួកគេ នោះពួគេនឹងអាចផ្ទេរប្រាក់បានរហូតដល់២០,០០០ដុល្លារក្នុងមួយថ្ងៃ។

ការផ្តល់ជូនដ៏ពិសេសនេះនឹងធ្វើឡើងសម្រាប់តែអតិថិជនដែលធ្វើប្រតិបត្តការផ្ទេរប្រាក់តាមរយៈ កម្មវិធីស្មាតហ្វូនវីង (Wing Money App) ទៅកាន់អតិថិជនដែមានគណនីវីងតែប៉ុណ្ណោះ ហើយការផ្តល់ជូននេះនឹងប្រព្រឹត្តទៅចាប់ពីថ្ងៃជូនដំណឹងនេះ រហូតដល់មានការជូនដំណឹងជាថ្មី។

សម្រាប់អតិថិជនដែលមិនទាន់មាន កម្មវិធីស្មាតហ្វូនវីង អាចតំឡើងកម្មវិធីនេះដោយខ្លួនឯងបានយ៉ាងងាយស្រួលនិងឆាប់រហ័ស ដោយគ្រាន់តែចូលទៅក្នុង App Store ឬ IOS រួចទាញយក Wing Money App និងបំពេញព័ត៌មានតាមការណែនាំដើម្បីបង្កើតគណនីផ្ទាល់ខ្លួនជាការស្រេច។

ជាមួយកម្មវិធីស្មាតហ្វូនវីង អតិថិជនអាចបញ្ចូលទឹកប្រាក់ក្នុងគណនីវីងបានយ៉ាងឆាប់រហ័សគ្រប់ទីកន្លែងជាមួយភ្នាក់ងារវីងជាង៩០០០កន្លែងទូទាំងប្រទេស និងទទួលបានអត្ថប្រយោជន៍ជាច្រើនជាមួយ ការទិញទំនិញតាមអនឡាញ បង់វិក្កយបត្រទឹក ភ្លើង សំរាម និងសេវាកម្មជាច្រើនផ្សេងទៀត៕

April 5, 2021

គម្រោងអូសខ្សែកាប្លិ៍ថ្មីរបស់ Facebook និង Google នឹងធ្វើឱ្យតំបន់អាស៊ី កាន់ជិតជាងមុន

កាលពីពេលថ្មីៗនេះ សារព័ត៌មាន CNA បានចុះផ្សាយពីគម្រោងអូសខ្សែកាប្លិ៍បាតសមុទ្រថ្មី 2ខ្សែរបស់ Facebook នឹងត្រូវធ្វើឡើង ដើម្បីភ្ជាប់ប្រទេសសិង្ហបុរី ឥណ្ឌូនេស៊ី និងអាមេរិកខាងជើង នៅក្នុងគម្រោងមួយ ជាមួយនឹងក្រុមហ៊ុន Google និងក្រុមហ៊ុនទូរគមនាគមន៍ក្នុងតំបន់ ដើម្បីបង្កើនសមត្ថភាពការតភ្ជាប់អ៊ិនធើណិត កាន់តែជិតជាងមុន។

តាមប្រភពខាងលើ បានលើកឡើងថា លោក Kevin Salvadori អនុប្រធានផ្នែកបណ្តាក់ទុននៅក្រុមហ៊ុន Facebook បានប្រាប់ Reuters ថា៖ “ខ្សែកាប្លិ៍ឈ្មោះ Echo និង Bifrost នឹងក្លាយជាខ្សែកាប្លិ៍2 ដំបូងគេដែលនឹងត្រូវអូសលើផ្លូវថ្មីមួយ ឆ្លងកាត់ទន្លេ Java ហើយខ្សែកាប្លិ៍ទាំងនោះ នឹងបង្កើនសមត្ថភាពខ្សែកាប្លិ៍ក្រោមសមុទ្រជារួម រហូតដល់ 70%”។ លោកបានបន្ថែមថា ខ្សែកាប្លិ៍ទាំង 2ខ្សែនេះ នឹងក្លាយជាខ្សែកាប្លិ៍ដំបូងដែលភ្ជាប់តំបន់អាមេរិកខាងជើងដោយផ្ទាល់ ទៅកាន់តំបន់សំខាន់ៗជាច្រើនរបស់ឥណ្ឌូនេស៊ី និងបង្កើនការតភ្ជាប់សម្រាប់ខេត្តនៅភាគកណ្តាល និងខាងកើតនៃរដ្ឋដែលមានអត្រាប្រជាជនច្រើនជាងគេលំដាប់ទី3 ក្នុងពិភពលោក។

សម្រាប់ខ្សែកាប្លិ៍ទាំង2 មានគម្រោងដោយឡែកពីគ្នា ទី1 គឺខ្សែកាប្លិ៍ Echo កំពុងតែត្រូវបានដំឡើងក្រោមភាពជាដៃគូជាមួយនឹង Google របស់ក្រុមហ៊ុន Alphabet និងក្រុមហ៊ុនទូរគមនាគមន៍ឥណ្ឌូនេស៊ី XL Axiata ហើយគម្រោងនេះ គួរតែដំឡើងរួចរាល់នៅត្រឹមឆ្នាំ2023។ សម្រាប់ខ្សែកាប្លិ៍ទី2 គឺ Bifrost នឹងត្រូវដំឡើងតាមរយៈការចាប់ដៃគូជាមួយនឹងក្រុមហ៊ុន Telin ដែលជាក្រុមហ៊ុនឧបសម្ព័ន្ធរបស់ក្រុមហ៊ុនឥណ្ឌូនេស៊ី Telkom និងក្រុមហ៊ុនពហុសាជីវកម្មសិង្ហបុរី Keppel ដែលនឹងត្រូវអូសឱ្យរួចរាល់នៅត្រឹមឆ្នាំ2024៕

April 2, 2021

ផ្លូវការ៖ ក្រុមហ៊ុន Xiaomi ឈ្នះក្តី រួចផុតពីការចោទប្រកាន់ដោយសហរដ្ឋអាមេរិក

បន្ទាប់ពីក្រុមហ៊ុនបច្ចេកវិទ្យាចិន Xiaomi រងការដាក់ពាក្យបណ្ដឹងតវ៉ាលើរឿងក្តី ដែល “ក្រសួងការពារជាតិសហរដ្ឋអាមេរិក ចោទប្រកាន់ថា ជាក្រុមហ៊ុនដែលមានទំនាក់ទំនងជាមួយយោធាចិន” កាលពីពេលកន្លងមកនោះ មកទល់ពេលនេះ រឿងរ៉ាវដ៏ក្តៅគគុក ដែលអូសបន្លាយពេលជាង 3ខែមកហើយនេះ ទើបនឹងសម្រេចជាផ្លូវការ ដោយតុលាការសហរដ្ឋអាមេរិក។

កាលពីពេលថ្មីៗនេះ គេបានឃើញលិខិតផ្លូវការមួយ បង្ហោះដោយគណនីក្រុមហ៊ុន Xiaomi បង្ហាញថា ក្រុមហ៊ុន នឹងមិនត្រូវទទួលរង នូវការពិន័យណាមួយឡើយ។ នៅក្នុងន័យនេះ លិខិតផ្លូវការនោះ បានបន្ថែមទៀតថា Xiaomi បានឈ្នះ លើរឿងក្តីនេះរួចរាល់ហើយ ព្រមទាំងបានបន្តស្នើសុំទៅតុលាការ ដើម្បីឱ្យធ្វើការលុបឈ្មោះក្រុមហ៊ុនរបស់ខ្លួន ចេញពីបញ្ជាចោទប្រកាន់ខាងលើជាបន្ទាន់ទៀតផង។ ដោយឡែក ចៅក្រមរបស់អាមេរិក បានបញ្ជាក់ថា ការចោទប្រកាន់ពីសំណាក់ក្រសួងការពារជាតិអាមេរិកនេះ គឺជាការបំពាន និងធ្វើឱ្យប៉ះពាល់យ៉ាងខ្លាំង ដល់ក្រុមហ៊ុន Xiaomi។

សូមជម្រាបជូនផងដែរថា កាលពីដើមឆ្នាំ2021 កន្លងទៅថ្មីៗ ក្រសួងការពារជាតិនៃសហរដ្ឋអាមេរិក បានបញ្ចេញបញ្ជីក្រុមហ៊ុនអាជីវកម្មចិនជាច្រើន ដែលស្ថិតក្នុងការតាមដាន ឬបញ្ជីខ្មៅ ចំពោះក្រុមហ៊ុនចិនណា ដែលមានទំនាក់ទំនងជាមួយរដ្ឋាភិបាលចិន ដោយមានការសំអាងតិចតួចប៉ុណ្ណោះ ដែលក្នុងនោះ ក៏មាន Xiaomi មួយដែរ។

ផ្ទុយពីក្រុមហ៊ុនដទៃទៀតដែលសម្ងំនៅស្ងៀម ក្រុមហ៊ុន Xiaomi បានដាក់ពាក្យប្តឹងប្រឆាំងតបតវិញភ្លាមៗ ដែលធ្វើឱ្យរឿងរ៉ាវ ត្រូវអូសបន្លាយរហូតអស់រយៈពេលជាង 3ខែ ទើបដោះស្រាយរួច។ កន្លងទៅ Xiaomi ក៏ធ្លាប់បានចេញលិខិតអះអាងជាច្រើនដងរួចមកហើយថា ពួកគេមិនត្រូវបានគ្រប់គ្រង ឬមានទំនាក់ទំនងណាមួយ ជាមួយយោធាចិន ដូចការចោទប្រកាន់នោះទេ។ ការចោទប្រកាន់នេះ បានធ្វើឱ្យប៉ះពាល់យ៉ាងធ្ងន់ធ្ងរដល់ក្រុមហ៊ុន Xaiomi ក្នុងទីផ្សារសកល ជាពិសេសនោះគឺ ធ្វើឱ្យវិនិយោគិន ដែលភាគច្រើនជាជនជាតិអាមេរិក មិនអាចបន្តការវិនិយោគតទៅទៀតបាន៕

April 2, 2021

ឆ្នាំថ្មី ពន្ធថ្មី ក្រុមហ៊ុន Ford បញ្ចុះតម្លៃរហូតដល់ $4,000!!!

ដោយយោងតាមអនុក្រឹត្យលេខ ១៨ អនក្រ.បក ចុះថ្ងៃទី០៩ ខែកុម្ភៈ ឆ្នាំ២០២១ ស្តីពីការកែសម្រួលអត្រាអាករពិសេសលើមុខទំនិញមួយចំនួនរបស់រដ្ឋាភិបាលកម្ពុជា និងសេចក្តីជូនដំណឹងរបស់អគ្គនាយកដ្ឋានគយ និងរដ្ឋាករកម្ពុជា យើងសង្កេតឃើញថាមានក្រុមហ៊ុនរថយន្តមួយចំនួនបានអនុវត្តតាមអនុក្រឹត្យខាងលើដោយបានបញ្ចុះតម្លៃទៅលើរថយន្តរបស់ខ្លួន។

ទន្ទឹមជាមួយគ្នានេះដែរ ក្រុមហ៊ុន អ អិម អេ ខេមបូឌា ដែលជាក្រុមហ៊ុននាំចូល និងចែកចាយផ្ដាច់មុខនូវរថយន្ត Ford គ្រប់ប្រភេទដែលជាម៉ាកយីហោរថយន្តឈានមុខគេក្នុងទីផ្សារប្រទេសកម្ពុជាបានសម្រេចអនុវត្តទៅតាមអនុក្រឹត្យលេខ ១៨ អនក្រ.បក របស់រាជរដ្ឋាភិបាលដោយបានធ្វើការប្រកាសបញ្ចុះតម្លៃទៅលើរថយន្ត Ford ជាច្រើនម៉ូឌែលរួមមាន៖

ចំពោះម៉ូឌែល 2021

Ford EcoSport ឆ្នាំ2021 តម្លៃចាស់ $29,900 មកត្រឹម $27,900

Ford Territory ឆ្នាំ2021 តម្លៃចាស់ $49,900 មកត្រឹម $46,900

Ford Everest Trend ឆ្នាំ2021 តម្លៃចាស់ $59,500 មកត្រឹម $57,500

Ford Everest 2.0L Bi-Turbo ឆ្នាំ2021 តម្លៃចាស់ $71,000 មកត្រឹម $68,500

ចំពោះម៉ូឌែល 2020

Ford EcoSport ឆ្នាំ 2020 តម្លៃចាស់ $29,900 មកត្រឹម $26,000

Ford Everest Trend ឆ្នាំ2020 តម្លៃចាស់ $59,500 មកត្រឹម $55,500

Ford Everest 2.0L Bi-Turbo ឆ្នាំ 2020 តម្លៃចាស់ $71,000 មកត្រឹម $67,000

ចឹងដឹងព័ត៍មាន និងប្រូម៉ូសិនថ្មីៗពីក្រុមហ៊ុន Ford សូមចុចតំណរភ្ជាប់ (Link) Telegram Channel https://t.me/FordCambodia នេះទាំងអស់គ្នា។

តាមរយៈការបញ្ចុះតម្លៃរថយន្តថ្មីនេះ ជឿជាក់ថាកំណើននៃការប្រើប្រាស់រថយន្តថ្មីនៅក្នុងប្រទេសកម្ពុជានឹងមានការកើនឡើងនាពេលខាងមុខ បងប្អូនមួយចំនួននឹងងាកពីការប្រើប្រាស់រថយន្តជជុះមួយទឹកពីស្រុកគេ មកប្រើប្រាស់រថយន្តថ្មីរបស់ក្រុមហ៊ុនដោយសារតែមានគុណប្រយោជន៍ជាច្រើន និងតម្លៃធូរថ្លៃជាងមុនច្រើនដោយគម្លាតនៃការបញ្ចុះតម្លៃគឺចាប់ពីចន្លោះ $2,000 ទៅ $4,000 ដុល្លាទៅតាមម៉ូឌែលនីមួយៗដែលនេះជាប្រយោជន៍ដល់អ្នកប្រើប្រាស់ផ្ទាល់តែម្តង ក៏ដូចជាការលើកទឹកចិត្តដល់ប្រជាជនខ្មែរឲ្យងាកមកប្រើប្រាស់នូវរថយន្តថ្មីផងដែរ។ ជាក់ស្តែងមានរថយន្ត Ford មួយម៉ូឌែលដែលមានតម្លៃប្រហាក់ប្រហែលទៅនឹងរថយន្តជជុះខ្លាំងមែនទែននោះគឺរថយន្ត Ford EcoSport ដែលសម្រាប់តម្លៃថ្មីនៃរថយន្ត Ford EcoSport ឆ្នាំ 2020 គឺត្រឹមតែ $26,000 តែប៉ុណ្ណោះ រីឯតម្លៃថ្មីនៃរថយន្ត Ford EcoSport ឆ្នាំ 2021 គឺត្រឹមតែ $27,900 តែប៉ុណ្ណោះ។ តម្លៃត្រឹម 2ម៉ឺនជាងតែបងប្អូនអាចទិញរថយន្តថ្មីដែលមានការធានាត្រឹមត្រូវពីក្រុមហ៊ុនរយៈពេល 3ឆ្នាំ ឬ100,000គីឡូម៉ែត្រដែលផ្តល់ជូននូវទំនុកចិត្ត សុវត្ថិភាព ផាសុកភាព សេចក្តីសុខផ្លូវចិត្ត និងអារម្មណ៍ស្រស់ស្រាយក្នុងពេលបើកបរ។

ផ្ទុយទៅវិញយើងសង្កេតឃើញថារថយន្តជជុះមួយទឹកពីស្រុកគេគឺគ្មានប្រវត្តិច្បាស់លាស់ និងគ្មានការធានាត្រឹមត្រូវដែលជាហេតុធ្វើឲ្យការប្រើប្រាស់របស់លោកអ្នកមិនសូវមានទំនុកចិត្ត ហើយបងប្អូនអាចនឹងជួបបញ្ហាជាច្រើនដូចជា៖ ការទិញប៉ះចំរថយន្តបុកប៉ះ ការសោ្ងប្តូរពណ៍ ការកាត់ត។ល។

ដូច្នេះបងប្អូនគួរតែងាកមកប្រើប្រាស់រថយន្តថ្មីដើម្បីផ្តល់នូវទំនុកចិត្តក្នុងការបើកបរ លើសពីនេះទៅទៀតរាល់ការទិញរថយន្ត Ford ពីក្រុមហ៊ុនលោកអ្នកនឹងទទួលបានអត្ថប្រយោជន៍បន្ថែមដែលរួមមាន៖

ការធានាផ្ទាល់ពីរោងចក្ររយះពេល 3ឆ្នាំ ឬ 100,000គីឡូម៉ែត្រ
សេវាថែទាំរថយន្តរយៈពេល 1ឆ្នាំ ឬ 20,000គីឡូម៉ែត្រ
ជាពិសេសមានសេវាជួសជុលរថយន្តចល័ត២៤ម៉ោងទូទាំងប្រទេស
សេវាយករថយន្តចាស់មកផ្លាស់ប្តូររថយន្តថ្មី (Trade-In Service)
សេវាបង់រំលស់គ្រប់ខេត្តក្រុងប្រកបដោយទំនុកចិត្ត
កាន់តែពិសេសលើសពីក្រុមហ៊ុនដ៏ទៃនោះគឺការរៀបចំនូវដំណើរកំសាន្តជួនដល់អតិថិជន Ford ។

សម្រាប់ព័ត៍មានបន្ថែមសូមអញ្ជើញទៅកាន់អគារតាំងបង្ហាញរថយន្ត Ford ដែលមានទីតាំងដូចជា៖

អគារតាំងបង្ហាញសាខាផ្លូវព្រះមុនីវង្សដែលស្ថិតនៅអគារលេខ 444 ផ្លួវព្រះមុនីវង្ស ជាប់ទូតវៀតណាម លេខទូរស័ព្ទទំនាក់ទំនង៖ 023 214 214
អគារតាំងបង្ហាញសាខាទឹកថ្លាដែលស្ថិតនៅតាមបណ្តោយផ្លូវទៅព្រលានយន្តហោះ លេខទូរស័ព្ទទំនាក់ទំនង៖ 023 890 880
អគារតាំងបង្ហាញសាខាទួលសង្កែដែលស្ថិតនៅលើផ្លូវ 105 ជិតផ្សារសាំហាន់ លេខទូរស័ព្ទទំនាក់ទំនង៖ 078 990 800 | 087 990 800
អគារតាំងបង្ហាញសាខាខេត្តសៀមរាបដែលស្ថិតនៅអគារលេខ 593 តាមបណ្តោយផ្លូវជាតិលេខ 6A លេខទូរស័ព្ទទំនាក់ទំនង៖ 063 766 661។

April 1, 2021

LG ជិតបិទអាជីវកម្មផ្នែកស្មាតហ្វូន តែនៅឈរជើងផ្នែកផលិតគ្រឿងបន្លាស់ និងសម្ភារក្នុងផ្ទះ

LG ធ្លាប់ជាក្រុមហ៊ុនផលិតស្មាតហ្វូនធំបំផុត លំដាប់ទី3 នៅលើពិភពលោក និងថែមទាំងជាគូប្រជែង ជាមួយក្រុមហ៊ុន Apple ទៀតផង។ យ៉ាងណាមិញ អាជីវកម្មស្មាតហ្វូនរបស់ក្រុមហ៊ុនបច្ចេកវិទ្យាល្បីល្បាញ ខាងផលិតអេក្រង់ល្អបំផុតមួយនេះ ត្រូវបានគេមើលឃើញថា មានការធ្លាក់ចុះការនាំចេញ និងថែមទាំងខាតបង់ទឹកប្រាក់អស់ចំនួន 4.5ពាន់លានដុល្លារក្នុងរយៈពេល 5ឆ្នាំកន្លងមក ដែលនេះជាហានិភ័យធំមួយ ដែលតម្រូវឱ្យ LG ធ្វើការវាយតម្លៃឡើងវិញជាបន្ទាន់។

ក្រុមហ៊ុន LG ក៏ត្រូវបានគេរំពឹងទុកដែរថា នឹងផ្សព្វផ្សាយសេចក្តីសម្រេចចិត្តចុងក្រោយ អំពីអនាគតនៃអាជីវកម្មស្មាតហ្វូនរបស់ខ្លួន នៅខែក្រោយ បន្ទាប់ពីប្រជុំសម្រេចពីក្រុមប្រឹក្សាភិបាល ថាតើគួរបន្ដ ឬបិទ?។

LG ដែលជាក្រុមហ៊ុនធំជាងគេទី3 មួយនេះ កំពុងឈានដល់ដំណាក់កាលបិទអាជីវកម្មផ្នែកស្មាតហ្វូនរបស់ខ្លួនទាំងមូលតែម្ដង បន្ទាប់ពីបរាជ័យ ១លើក ជា 2លើក ក្នុងការស្វែងរកម្ចាស់ថ្មី មកជួយស្រោចស្រង់អាជីវកម្មមិនបានសោះ។ ក្រុមហ៊ុនបច្ចេកវិទ្យារបស់កូរ៉េត្បូងមួយនេះ បានពិភាក្សាជាមួយក្រុមហ៊ុន Vingroup របស់វៀតណាម និងក្រុមហ៊ុនផលិតរថយន្ត Volkswagen អំពីការទិញអាជីវកម្មស្មាតហ្វូនរបស់ខ្លួន ប៉ុន្តែគួរឱ្យស្ដាយ ការចរចា មិនបានឈានដល់កិច្ចព្រមព្រៀងអី្វមួយឡើយ។ នេះយោងទៅតាមសារព័ត៌មានក្នុងស្រុកកូរ៉េខាងត្បូង ដែលបានចេញផ្សាយកាលពីពេលថ្មីៗនេះ។

បើទោះជា LG ទំនងជានឹងបិទអាជីវកម្មស្មាតហ្វូនរបស់ខ្លួនក៏ពិតមែន តែសេចក្ដីរាយការណ៍បន្ថែម បានឱ្យដឹងទៀតថា ជំនួសឱ្យការផលិតស្មាតហ្វូននិងលក់ផ្ទាល់ ពួកគេនៅតែដំណើរការអាជីវកម្មផ្សេងៗទៀត ដែលកំពុងតែទទួលបានទំនុកចិត្តយ៉ាងពេញទំហឹងពីអតិថិជន ដូចជា ផ្នែកផលិតគ្រឿងបន្លាស់រថយន្ត និងសម្ភារប្រើប្រាស់ក្នុងផ្ទះ ជាដើម៕

March 26, 2021

Samsung រកឃើញនវានុវត្តន៍អេក្រង់ថ្មី នឹងចាប់ផ្តើមផលិត សម្រាប់ 120Hz ទុកឱ្យ iPhone 13

កាលពីពេលថ្មីៗនេះ ក្រុមហ៊ុន Samsung គ្រោងនឹងចាប់ផ្តើមផលិតបន្ទះអេក្រង់ប្រភេទ LTPO OLED។ បន្ទះបង្ហាញទិន្នន័យប្រភេទថ្មី LTPO នេះ គឺជាបច្ចេកវិទ្យាថ្មីបំផុតជំនាន់ចុងក្រោយ ដែលវាជាគម្រោងស្រាវជ្រាវមួយ ដែលរកឃើញថា ប្រើប្រាស់ថាមពល តិចជាងអេក្រង់ OLED ទូទៅ។ មានន័យថា ទូរស័ព្ទជំនាន់បន្ទាប់ នឹងអាចរក្សារយៈពេលថ្ម ឱ្យរស់បាន1 ឬ 2ថ្ងៃពេញ។

លើសពីនេះផងដែរ វាក៏ជាផ្លូវមួយ សម្រាប់បើកឱ្យ iPhone ជំនាន់ថ្មី របស់ Apple អាចទ្រទ្រង់កម្រិត refresh rate ដល់ទៅ 120Hz ដូចនឹងស្មាតហ្វូនកំពូលៗ របស់ក្រុមហ៊ុនដទៃផងដែរ និងសម្រាប់ផ្គត់ផ្គង់ដល់ Apple ដែលចាប់ផ្ដើមនៅឆមាសទី1 នៃឆ្នាំ2021 នេះតែម្ដង។

គួរបញ្ជាក់ដែរថា Samsung និង Apple បានចាប់ដៃគ្នាក្នុងអាជីវកម្មបន្ទះអេក្រង់នេះ តាំងពីជំនាន់ iPhone X ចេញឆ្នាំ2017 និងបន្តរហូតមកដល់បច្ចុប្បន្ន។ បន្ថែមលើនេះ ក៏មានឈ្មោះក្រុមហ៊ុនល្បីផ្សេងៗចូលរួមផងដែរ ដូចជា LG ជាដើម៕

March 26, 2021

វីង និង City Express ជប៉ុនចាប់ដៃគូដើម្បីសម្រួលការផ្ទេរប្រាក់មកកម្ពុជា

ធនាគារឯកទេសវីង (ខេមបូឌា) លីមីតធីត ដែលជាអ្នកផ្តល់សេវាកម្មធនាគារតាមទូរស័ព្ទចល័តដំបូងគេនៅកម្ពុជា និងក្រុមហ៊ុនCity Express Money Transfer Japan Co., Ltd.ដែលជាក្រុមហ៊ុនផ្ទេរប្រាក់ឈានមុខគេមួយរបស់ប្រទេសជប៉ុនបានបង្កើតភាពជាដៃគូដើម្បីផ្តល់សេវាកម្មហិរញ្ញវត្ថុកាន់តែប្រសើរឡើងដល់ប្រជាជនកម្ពុជាទាំងអស់ដែលរស់នៅជប៉ុន។ តាមរយៈធនាគារឯកទេសវីង ឥឡូវនេះប្រជាជនអាចផ្ញើប្រាក់ដែលរកបានមកទ្រទ្រង់គ្រួសាររបស់ពួកគេបានភ្លាមៗនៅគ្រប់ទីកន្លែងក្នុងប្រទេសកម្ពុជា។

លោក ម៉ានូ រ៉ាចាន់ អគ្គនាយកនៃធនាគារឯកទេស វីង បានមានប្រសាសន៍ថា៖“ ក្នុងកំឡុងពេលមានជំងឺរាតត្បាតកំពុងបន្តបែបនេះ វាចាំបាច់ណាស់ដែលយើងពង្រឹងសមត្ថភាពសេវាផ្ទេរប្រាក់ឆ្លងប្រទេសដើម្បីគាំទ្រដល់តម្រូវការរបស់សហគមន៍យើង ។ ពលករកម្ពុជានៅជប៉ុនឥឡូវអាចផ្ញើប្រាក់មកផ្ទះទោះជានៅដល់ភូមិដាច់ស្រយាលក៏ដោយ។”

បច្ចុប្បន្នមានប្រជាជនកម្ពុជាជាង ១០.០០០ នាក់កំពុងធ្វើការនៅប្រទេសជប៉ុន។ តាមរយៈភាពជាដៃគូនេះពួកគេអាចទៅម៉ាស៊ីនអេធីអឹមណាមួយនិងសាខាណាមួយនៃក្រុមហ៊ុនCity Express ជប៉ុនហើយជ្រើសរើសផ្ញើប្រាក់តាមរយៈវីង។ បន្ទាប់មកពួកគេនឹងទទួលបានលេខកូដ ៨ ខ្ទង់សម្រាប់ក្រុមគ្រួសាររបស់ពួកគេដើម្បីដកប្រាក់នៅប្រទេសកម្ពុជាតាមរយៈភ្នាក់ងារវីងដែលមានជាង ៩០០០ កន្លែង ។

លោក Shrestha Mahesh Kumar ប្រធាននាយកប្រតិបត្តិនៃក្រុមហ៊ុន City Express ជប៉ុនបានមានប្រសាសន៍ថា៖“ យើងជឿជាក់ថាភាពជាដៃគូនេះនឹងបង្ហាញសមត្ថភាពសេវាហិរញ្ញវត្ថុរបស់យើង តាមរយៈការផ្តល់សេវាហិរញ្ញវត្ថុកាន់តែប្រសើរឡើងដល់ប្រជាជនកម្ពុជាទាំងអស់ ។ បណ្តាញដ៏រឹងមាំរបស់ក្រុមហ៊ុនទាំងពីរនឹងផ្តល់ការផ្ទេរប្រាក់ភ្លាមៗនិងមានសុវត្ថិភាពដែលមានសារសំខាន់ណាស់សម្រាប់ប្រជាជនកម្ពុជារស់នៅក្នុងប្រទេសជប៉ុន។

ក្រុមហ៊ុន City Express ជប៉ុននិងវីងតាំងចិត្តប្រើសមត្ថភាពហិរញ្ញវត្ថុរបស់ពួកគេដើម្បីជាប្រយោជន៍ដល់សហគមន៍ ។ ក្រុមហ៊ុន City Express ជប៉ុនប្តេជ្ញាផ្តល់ដំណោះស្រាយផ្ទេរប្រាក់លឿនរហ័សគួរទុកចិត្ត និងមានសុវត្ថិភាពដល់អតិថិជនតាមរយៈបណ្តាញភ្នាក់ងារនៅទូទាំងពិភពលោក។ ដូចគ្នានេះដែរ ចក្ខុវិស័យរបស់វីងគឺផ្តល់ជូនប្រជាជនកម្ពុជាគ្រប់រូបនូវលទ្ធភាពទទួលបានសេវាហិរញ្ញវត្ថុតាមទូរស័ព្ទជាមួយបណ្តាញភ្នាក់ងារវីងនៅទូទាំងប្រទេស៕

March 26, 2021

Author: ធឿន មករា