Author: ធឿន មករា

មកស្គាល់កីឡាករ ដែលធ្លាក់តម្លៃខ្លួនខ្លាំងជាងគេបង្អស់ ដោយសារ Covid-19
ទីផ្សារដោះដូរកីឡាករនៅតែដំណើរការដូចធម្មតា បើទោះបីជាមានការរាតត្បាតនៃមេរោគកូវីដ-19 ដែលតម្រូវឱ្យផ្អាកការប្រកួតនានាស្ទើរតែជុំវិញពិភពលោកក៏ដោយ។
ក្នុងនោះដែរ ដោយសារតែវិបត្តិហិរញ្ញវត្ថុរបស់ក្លិបនានា បានធ្វើឱ្យក្លិបទាំងនោះមិនមានលុយច្រើនគ្រប់គ្រាន់ក្នុងការទិញដូរកីឡាករ ដូច្នេះធ្វើឱ្យតម្លៃខ្លួនរបស់កីឡាករនីមួយៗ បានធ្លាក់ទៅតាមទីផ្សារនោះដែរ។
ក្នុងនោះ បើតាមការចេញផ្សាយរបស់ BBC បានបង្ហាញថា កីឡាករ Raheem Sterling ដែលលេងនៅក្របខ័ណ្ឌលីកកំពូលអង់គ្លេស (English Premier League) គឺជាកីឡាករដែលធ្លាក់តម្លៃខ្លួនខ្លាំងជាងគេបង្អស់នៅលើពិភពលោក ដែលបច្ចុប្បន្នតម្លៃខ្លួនរបស់ខ្សែប្រយុទ្ធស្លាបរូបនេះ នៅសល់ត្រឹមតែ 86លានផោនប៉ុណ្ណោះ ខណៈដែលមុននេះរូបគេមានតម្លៃខ្លួនដល់ទៅ 115លានផោនឯណោះ ពោលគឺ បានធ្លាក់អស់ 19លានផោន៕
April 20, 2020
ជម្រើសទី១៖ កម្មវិធីផ្សាយផ្ទាល់របស់ថៃហ្គ័រ ជំរុញឱ្យសិល្បៈករ អ្នកជំនាញ និងអ្នកលក់រាយ រួមកម្លាំងគ្នាដើម្បីប្រឆាំងនឹងកូវីដ-១៩
ភ្នំពេញ ថ្ងៃទី១៩ ខែមេសា៖ ប្រជាពលរដ្ឋកម្ពុជាច្រើនជាងកន្លះលាននាក់ បានបើកអនឡាញ ដើម្បីចូលក្នុងកម្មវិធីបែបថ្មីនៃការប្រគំតន្ត្រីរបស់ស្រាបៀរ ថៃហ្គ័រ ខណៈដែលព្រឹត្តិការណ៍នេះ បានប្រមូលផ្តុំតន្ត្រីករ សិល្បៈករ តារាល្បីៗ មេចុងភៅកំពូលៗ អ្នកមានឥទ្ធិពលលើបណ្តាញសង្គម អ្នកលក់រាយ និងតំណាងចែកចាយ ទាំងអស់ទូទាំងប្រទេសកម្ពុជា ឲ្យចូលរួមសហការគ្នា ដើម្បីជួយប្រយុទ្ធប្រឆាំងនឹងវីរុសកូវីដ–១៩ ដែលកំពុងតែធ្វើឲ្យប៉ះពាល់ដល់ជីវិតប្រចាំថ្ងៃរបស់ប្រជាពលរដ្ឋកម្ពុជា។
ព្រឹត្តិការណ៍ប្រគុំតន្ត្រីផ្សាយផ្ទាល់របស់ស្រាបៀរថៃហ្គ័រ បានចាប់ផ្តើមដំណើរការកាលពីថ្ងៃអង្គារ ទី១៤ ខែមេសា ដោយមានការចូលរួមសម្តែងពី DJ MAILY និងកំពូលតន្ដ្រីករហ្សាក់ស្ស៊ូហ្វូន Euan Gray ក៏ដូចជាតន្ដ្រីករស្គរ Jim Wilson។
នៅមុនពេលកម្មវិធីសម្តែងទី១ DJ Maily បាននិយាយថា៖ «បញ្ហាវីរុសកូវីដ-១៩ គឺបានប៉ះពាល់ដល់យើងគ្រប់គ្នាតែម្ដង។ ពួកយើងពិតជាអរគុណដល់ក្រុមហ៊ុនស្រាបៀរថៃហ្គ័រ ដែលបានរៀបចំព្រឹត្តិការនេះឡើង សម្រាប់ឲ្យពួកយើង អាចគាំទ្រ និងផ្សារភ្ជាប់ទំនាក់ទំនងជាមួយនឹងអ្នកគាំទ្ររបស់យើង។ ពួកយើងក៏មានមោទនភាពផងដែរ ដែលអាចជួយគាំទ្រដល់អាជីវករលក់រាយ និងតំណាងចែកចាយ ក៏ដូចជាសង្គមខ្មែរទាំងមូល ផងដែរ»។
កាលពីថ្ងៃព្រហស្បតិ៍ ទី១៦ ខែមេសា អ្នកគាំទ្រជិត២៥ម៉ឺននាក់ បានចូលរួមទស្សនាការសម្តែងតាមអនឡាញរបស់កំពូលតារាចម្រៀងលោក ឆន សុវណ្ណរាជ រួមជាមួយនឹងក្រុមសិល្បៈករផងដែរ។
ក្រុមហ៊ុនស្រាបៀរថៃហ្គ័រ បានរៀបចំព្រឹត្តិការណ៍ប្រគុំតន្ត្រីផ្សាយផ្ទាល់នេះឡើង ដើម្បីចូលរួមគាំទ្រដល់តន្ត្រីករ សិល្បៈករ តារាល្បីៗ មេចុងភៅ និងអ្នកមានឥទ្ធិពលលើបណ្តាញសង្គម ដែលមិនអាចសម្តែងនៅតាមទីសាធារណៈបាន ក្នុងអំឡុងពេលនេះ។ តាមរយៈការប្រមូលផ្តុំសិល្បៈករ អ្នកលក់រាយ និងតំណាងចែកចាយឲ្យធ្វើការជាមួយគ្នា ក្រុមហ៊ុនស្រាបៀរថៃហ្គ័រ ក៏មានបំណងជួយដល់អាជីវករដែលរងផលប៉ះពាលផ្នែកអាជីវកម្មរបស់ខ្លួនដោយសារតែវីរុសកូវីដ-១៩ ផងដែរ។ ក្រុមហ៊ុនស្រាបៀរថៃហ្គ័រ ក៏ចង់ចូលរួមចំណែកធ្វើឲ្យអ្នកដែលកំពុងតែស្នាក់នៅឯផ្ទះ ក្នុងពេលនេះ ទទួលបានភាពសប្បាយរីករាយ តាមរយៈការសម្តែងដ៏រំភើបអស្ចារ្យ ពីគេហដ្ឋានផងដែរ។
លោក Jeevan អ្នកចាត់ការទូទៅជាន់ខ្ពស់ប្រចាំសាខារបស់ក្រុមហ៊ុនស្រាបៀរថៃហ្គ័រ មានប្រសាសន៍ថា៖ «ក្រុមហ៊ុនរបស់យើងយល់អំពីទុក្ខលំបាកដែលសិល្បៈករ និងប្រជាពលរដ្ឋដែលត្រូវរក្សាខ្លួនក្នុងផ្ទះ កំពុងជួបប្រទះ ក្នុងស្ថានភាពនេះ។ ហេតុនេះហើយទើបបានជា យើងកៀងគរគ្រប់ភាគីទាំងអស់ ឲ្យមកជួយគ្នាទៅវិញទៅមក ក្នុងពេលមានវិបត្តិនេះ»។
ដើម្បីចូលរួមជួយដល់អ្នកលក់រាយ និងដេប៉ូចែកចាយផ្សេងៗ ក្រុមហ៊ុនស្រាបៀរថៃហ្គ័រ ក៏នឹងផ្តល់ថវិកាចំនួន១ម៉ឺន៥ពាន់ដុល្លារអាមេរិក ជូនដល់សាធារណៈជនផងដែរ។ ការផ្តល់អំណោយនេះ នឹងត្រូវធ្វើឡើងជាបណ្ណរង្វាន់ (Voucher) ដែលមានតម្លៃជាទឹកប្រាក់៥ដុល្លារ និងអាចយកទៅប្រើប្រាស់ដើម្បីកុម្ម៉ង់ម្ហូបអាហារផ្សេងៗតាមអនឡាញបាន។
លោក Jeevan បានប្រាប់បន្តថា៖ «ជាមួយនឹងកម្មវិធីផ្សាយផ្ទាល់របស់ស្រាបៀរថៃហ្គ័រនេះ សិល្បៈករ អាចបន្តធ្វើការសម្តែងរបស់ខ្លួន និងទទួលបានប្រាក់ចំណូល ស្របពេលដែលទូរទស្សនិកជនក៏អាចទស្សនា និងទទួលបានការកម្សាន្តលំដាប់ថ្នាក់លេខ១ ក៏ដូចជាការលើកទឹកចិត្ត និងការណែនាំផ្សេងៗផងដែរ។ នេះគឺជាវិធីសាស្ត្ររបស់យើងក្នុងការបណ្ដុះសាមគ្គីភាពសង្គម ក្នុងគ្រាដ៏លំបាកនេះ»។
លោកបានបន្ថែមទៀតថា៖ «តាមរយៈមធ្យោបាយនេះ យើងសង្ឃឹមថា នឹងអាចជួយឲ្យគ្រប់គ្នានៅតែអាចរក្សាភាពស្និទ្ធស្នាលនឹងគ្នាបាន។ យើងក៏កំពុងតែជួយដល់អ្នកដែលកំពុងត្រូវការរក្សាការងារ ជួយដល់អាជីវករដែលត្រូវការរក្សាអាជីវកម្មរបស់ពួកគាត់ និងជួយដល់អ្នកដែលកំពុងតែអង្គុយនៅឯផ្ទះ ដែលទន្ទឹងរង់ចាំឲ្យវិបត្តិជំងឺនេះរលាយបាត់ទៅ ផងដែរ»។
ក្រៅពីការប្រគុំតន្ត្រីទៅ កម្មវិធីផ្សាយផ្ទាល់របស់ស្រាបៀរថៃហ្គ័រ ក៏នឹងមានជាការបង្ហាញថ្វីដៃចម្អិនម្ហូបបែបអាហារតាមដងផ្លូវ ពីសំណាក់កំពូលចុងភៅ ក៏ដូចជាការសម្តែងសិល្បៈគំនូរ ពីវិចិត្រករដ៏ចំណានប្រចាំប្រទេសកម្ពុជា ផងដែរ។
វគ្គបន្ទាប់នៃកម្មវិធីផ្សាយផ្ទាល់របស់ស្រាបៀរថៃហ្គ័រ នឹងគ្រោងរៀបចំឡើងនៅថ្ងៃពុធ និងថ្ងៃសុក្រសប្ដាហ៍នេះ ចាប់ពីម៉ោង ៧ យប់តទៅ។ ការសម្តែងតាមអនឡាញនេះ នឹងមានការចូលរួមពីក្រុមតន្ត្រី និងតារាចម្រៀងល្បីៗប្រចាំកម្ពុជាផងដែរ ដូចជាក្រុមតន្ត្រី SMALL WORLD SMALL BAND រួមជាមួយនឹងតារាចម្រៀង ចំរើន សុភា និងក្រុមចម្រៀង P-SAND X BROTHERS។
អ្នកស្នេហាវិស័យសិល្បៈទាំងអស់ ដែលចង់ជ្រាបព័ត៌មានបន្ថែម អាចចូលទៅកាន់ទំព័រ Facebook ផ្លូវការរបស់ថៃហ្គ័របានតាមរយៈ (https://facebook.com/tigerbeerKH)។
ហេតុនេះ ប្រសិនបើលោកអ្នកមានបំណងចង់ចូលរួមជួយស្រាបៀរថៃហ្គ័រ ក្នុងគម្រោងនេះ សូមកុំភ្លេចចូលរួមទស្សនាការផ្សាយផ្ទាល់របស់ស្រាបៀរថៃហ្គ័រ នៅថ្ងៃពុធ ទី២២ ខែមេសា ចាប់ពីម៉ោង ៧ យប់តទៅ លើទំព័រ Facebook របស់ថៃហ្គ័រ (https://facebook.com/tigerbeerKH)៕
April 20, 2020
ក្រុមហ៊ុន មេនូឡាយហ្វ៍ ខេមបូឌា ប្រកាសជាផ្លូវការនូវអត្ថប្រយោជន៍បន្ថែមដែលផ្ដល់ជាទឹកប្រាក់សម្រាប់ការសម្រាកព្យាបាលនៅមន្ទីរពេទ្យ និង “EasyClaims” ដើម្បីជួយឲ្យជីវិតរបស់អតិថិជនកាន់តែប្រសើរឡើង
រាជធានីភ្នំពេញ, ថ្ងៃទី ២០ ខែមេសា ឆ្នាំ ២០២០ – ថ្ងៃនេះ ក្រុមហ៊ុន មេនូឡាយហ្វ៍ ខេមបូឌា បានប្រកាសដាក់ឲ្យដំណើរការជាផ្លូវការនូវ «អត្ថប្រយោជន៍បន្ថែម មេនូឡាយហ្វ៍ មេឌីខាស» ដែលជាដំណោះស្រាយធានារ៉ាប់រងដំបូង និងតែមួយគត់ក្នុងប្រទេសកម្ពុជាដែលផ្តល់ជូននូវអត្ថប្រយោជន៍ជាទឹកប្រាក់ថេរប្រចាំថ្ងៃចាប់ពី ១០ ដុល្លារអាមេរិករហូតដល់ ២០០ ដុល្លារអាមេរិកដល់អ្នកត្រូវបានធានារ៉ាប់រងក្នុងអំឡុងពេលសម្រាកព្យាបាលនៅមន្ទីរពេទ្យដោយសារជំងឺ ឬគ្រោះថ្នាក់។
នៅថ្ងៃនេះដែរ ក្រុមហ៊ុន មេនូឡាយហ្វ៍ ខេមបូឌា ក៏បានដាក់ឲ្យដំណើរការនូវប្រព័ន្ធទាមទារសំណង «EasyClaims» របស់ខ្លួនដែលអនុញ្ញាតឱ្យអតិថិជនដាក់ពាក្យស្នើសុំទាមទារសំណងតាមប្រព័ន្ធអេឡិកត្រូនិកគ្រប់ពេលវេលា គ្រប់ទីកន្លែង តាមរយៈទូរស័ព្ទដៃ។
«អត្ថប្រយោជន៍បន្ថែម មេនូឡាយហ្វ៍ មេឌីខាស» ត្រូវបានបង្កើតឡើងដើម្បីជួយសម្រាលបន្ទុកហិរញ្ញវត្ថុរបស់អតិថិជន និងជួយពួកគាត់ពីការបាត់បង់ប្រាក់ចំណូលក្នុងអំឡុងពេលពួកគាត់សម្រាកព្យាបាលនៅមន្ទីរពេទ្យ។ លក្ខណៈពិសេសរបស់អត្ថប្រយោជន៍នេះរួមមាន៖
- អត្ថប្រយោជន៍ជាទឹកប្រាក់ប្រចាំថ្ងៃចាប់ពី ១0 ដុល្លារអាមេរិករហូតដល់ ២00 ដុល្លារអាមេរិកក្នុងមួយថ្ងៃ
- អត្ថប្រយោជន៍សម្រាកនៅផ្នែកប្រពោធនកម្ម(ICU)៖ ទទួលបានទឹកប្រាក់បន្ថែម ១០០% នៃអត្ថប្រយោជន៍ទឹកប្រាក់ធានារ៉ាប់រងប្រចាំថ្ងៃ
- ការស្នាក់នៅមន្ទីរពេទ្យយ៉ាងតិច ៦ ម៉ោងឡើងទៅ និងរហូតដល់ ២០ ថ្ងៃក្នុងការសម្រាកនៅមន្ទីរពេទ្យមួយលើក
- អត្ថប្រយោជន៍សម្រាកមន្ទីរពេទ្យប្រចាំថ្ងៃរបស់លោកអ្នកនឹងមានសុពលភាពភ្លាមៗបន្ទាប់ពីបណ្ណសន្យារ៉ាបរងត្រូវបានផ្តល់ជូនសម្រាប់ការសម្រាកនៅមន្ទីរពេទ្យដោយសារគ្រោះថ្នាក់ និង បន្ទាប់ពីផុតរយៈពេល ៤៥ ថ្ងៃគិតចាប់ពីថ្ងៃដែលបណ្ណសន្យារ៉ាប់រងត្រូវបានផ្តល់ជូនសម្រាប់ការសម្រាកនៅមន្ទីរពេទ្យដោយសារជំងឺ
- ការការពារទាំងក្នុង និងក្រៅប្រទេស
- បុព្វលាភធានារ៉ាប់រងមានតម្លៃសមរម្យចាប់ពី ២៥ ដុល្លារអាមេរិកក្នុង១ឆ្នាំ
អត្ថប្រយោជន៍បន្ថែមនេះគឺជាដំណោះស្រាយធានារ៉ាប់រងមួយដែលអតិថិជនអាចជ្រើសរើសភ្ជាប់ជាមួយដំណោះស្រាយធានារ៉ាប់រងណាមួយដូចខាងក្រោម៖
- គម្រោងអនាគតការសិក្សារបស់កូនខ្ញុំជាមួយមេនូឡាយហ្វ៍ (សម្រាប់តែអ្នកបង់ប្រាក់តែប៉ុណ្ណោះ) ឬ
- គម្រោងមរតកខ្ញុំជាមួយមេនូឡាយហ្វ៍
លោក Justin Helferich អគ្គនាយកប្រតិបត្តិ និងនាយកចាត់ការទូទៅនៃក្រុមហ៊ុន មេនូឡាយហ្វ៍ ខេមបូឌា មានប្រសាសន៍ថា៖ «នៅក្រុមហ៊ុន មេនូឡាយហ្វ៍ យើងមានបេសកកម្មយ៉ាងមុតមាំមួយដើម្បីជួយអតិថិជនឲ្យធ្វើការសម្រេចចិត្តកាន់តែងាយស្រួល និងជីវិតកាន់តែប្រសើរ។» «ចាប់តាំងពីយើងបានឈានចូលក្នុងទីផ្សារកម្ពុជាក្នុងឆ្នាំ ២០១២ ក្នុងនាមជាក្រុមហ៊ុនធានារ៉ាប់រងអាយុជីវិតអន្តរជាតិដំបូងបំផុតមក យើងបានខិតខំប្រឹងប្រែងយ៉ាងខ្លាំងក្នុងការបង្កើតជាដំណោះស្រាយ និងសេវាកម្មដែលឆ្លើយតបទៅនឹងតម្រូវការរបស់ក្រុមគ្រួសារកម្ពុជា។»
វីដេអូ៖ https://youtu.be/HLPdpbbAKb8
លោកបានបន្ថែមថា៖ «ថ្ងៃនេះយើងមានសេចក្តីសោមនស្សរីករាយក្រៃលែងក្នុងការណែនាំជូននូវដំណោះស្រាយឈានមុខគេមួយទៀតនៅលើទីផ្សារដែលមានឈ្មោះថា «អត្ថប្រយោជន៍បន្ថែម មេនូឡាយហ្វ៍ មេឌីខាស» ដែលអត្ថប្រយោជន៍នេះនឹងផ្តល់ការគាំទ្រផ្នែកហិរញ្ញវត្ថុប្រចាំថ្ងៃដល់អតិថិជនក្នុងពេលសម្រាកនៅមន្ទីរពេទ្យ ហើយអនុញ្ញាតឱ្យពួកគាត់ផ្តោតលើការជាសះស្បើយជាជាងលើការចំណាយ។» លោកបន្តថា៖ «ខ្ញុំក៏មានមោទនភាពផងដែរដែលយើងអាចនាំយកមកក្នុងពេលជាមួយគ្នានូវបទពិសោធន៍នៃការទាមទារសំណងតាមប្រព័ន្ធអេឡិកត្រូនិកដល់អតិថិជននៅកម្ពុជា។ ការផ្តល់ជូននូវដំណើរការទាមទារសំណងប្រកបដោយសុវត្ថិភាព និងភាពងាយស្រួលដល់អតិថិជននេះដើរស្របគ្នាយ៉ាងល្អឥតខ្ចោះទៅនឹងអាទិភាពយុទ្ធសាស្រ្តរបស់យើងក្នុងការក្លាយជាអ្នកដឹកនាំផ្នែកឌីជីថលនៅក្នុងវិស័យធានារ៉ាប់រង។»
វីដេអូ៖ https://youtu.be/cY4QiI8rcXI
សម្រាប់ព័ត៌មានលម្អិតអំពី «អត្ថប្រយោជន៍បន្ថែម មេនូឡាយហ្វ៍ មេឌីខាស» និង EasyClaims សូមចូលទៅកាន់គេហទំព័ររបស់ក្រុមហ៊ុន មេនូឡាយហ្វ៍ ខេមបូឌា https://www.manulife.com.kh/ ឬទាក់ទងមកកាន់ ១៨០០ ២១១ ២១១ (ទូរស័ព្ទឥតគិតថ្លៃ)។
អំពីក្រុមហ៊ុន មេនូឡាយហ្វ៍ ខេមបូឌា
ក្រុមហ៊ុន មេនូឡាយហ្វ៍ ខេមបូឌា បានចាប់ផ្តើមប្រតិបត្តិការរបស់ខ្លួននៅថ្ងៃទី ២៨ ខែមិថុនា ឆ្នាំ ២០១២ ។ ក្នុងនាមជាក្រុមហ៊ុនធានារ៉ាប់រងអាយុជីវិតបរទេសដំបូងបំផុតនៅក្នុងព្រះរាជាណាចក្រកម្ពុជា ក្រុមហ៊ុន មេនូឡាយហ្វ៍ ខេមបូឌា បានប្តេជ្ញាចិត្តក្នុងការផ្តល់ជូនអតិថិជនរបស់ខ្លួននូវផលិតផល និងសេវាកម្មការពារហិរញ្ញវត្ថុដែលជាតម្រូវការចាំបាច់របស់ពួកគាត់។ សម្រាប់ព័ត៌មានបន្ថែម សូមចូលទៅគេហទំព័រ www.manulife.com.kh ឬទំព័រ Facebook៖ ManulifeKh។
ក្រុមហ៊ុន មេនូឡាយហ្វ៍ ហ្វាយនែនសល គឺជាក្រុមហ៊ុនផ្តល់សេវាកម្មហិរញ្ញវត្ថុឈានមុខគេមួយលំដាប់ថ្នាក់អន្តរជាតិដែលជួយប្រជាជនក្នុងការសម្រចចិត្តឲ្យកាន់តែមានភាពងាយស្រួល និងធ្វើឲ្យជិវីតកាន់តែប្រសើរឡើង។ យើងបានដំណើរការជាក្រុមហ៊ុន John Hancock នៅសហរដ្ឋអាមេរិក និងជាក្រុមហ៊ុន មេនូឡាយហ្វ៍ នៅបណ្តាប្រទេសផ្សេងៗទៀតក្នុងពិភពលោក។ យើងផ្តល់ការប្រឹក្សាហិរញ្ញវត្ថុ ដំណោះស្រាយធានារ៉ាប់រង ព្រមទាំងផលិតផល និងសេវាកម្មគ្រប់គ្រងទ្រព្យសម្បត្តិជូនដល់អតិថិជនជាលក្ខណៈបុគ្គលជាក្រុម និងជាស្ថាប័ន។ គិតត្រឹមចុងឆ្នាំ ២០១៨ យើងមានបុគ្គលិកបម្រើការងាជាង ៣៥.០០០ នាក់ភ្នាក់ងារធានារ៉ាប់រងប្រមាណ ៩៨.០០០ នាក់ និងដៃគូចែកចាយផលិតផលធានារ៉ាប់រងអាយុជីវិតរាប់ពាន់ដៃគូផ្សេងទៀត ដែលកំពុងបម្រើសេវាកម្មជូនអតិថិជនប្រមាណ ៣០ លាននាក់។ គិតត្រឹមថ្ងៃទី ៣១ ខែធ្នូ ឆ្នាំ ២០១៩ យើងមានសាច់ប្រាក់ប្រតិបត្តិការចំនួន ១,២ ទ្រីលានដុល្លារកាណាដា ឬ ០,៩ ទ្រីលានដុល្លារអាមេរិកដែលជាទ្រព្យសកម្ម។ គិតត្រឹមរយៈពេល ១២ ខែចុងក្រោយ យើងបានបង់ជូនជាអត្ថប្រយោជន៍ការប្រាក់ និងការចំណាយផ្សេងៗជូនដល់អតិថិជនរបស់យើងដែលមានតម្លៃជាសាច់ប្រាក់ចំនួន ២៩,៧ ពាន់លានដុល្លារ។ យើងមានប្រតិបត្តិការធំៗនៅអាស៊ី កាណាដា និងសហរដ្ឋអាមេរិក ហើយយើងបានបម្រើអតិថិជនរបស់យើងអស់រយៈពេលច្រើនជាង ១០០ ឆ្នាំមកហើយ។ យើងមានស្នាក់ការកណ្តាលជាសកលរបស់យើងនៅទីក្រុង Toronto ប្រទេស កាណាដា ហើយក្រុមហ៊ុន មេនូឡាយហ្វ៍ Manulife Financial Corporation បានធ្វើប្រតិបត្តិការអាជីវកម្មជា MFC នៅទីផ្សារមូលបត្រ តូរ៉ុនតូ ញូវយ៉ក និងទីផ្សារមូលបត្រហ្វីលីពីន ហើយនៅលើទីផ្សារមូលបត្រហុងកុងក្រោមឈ្មោះ ៩៤៥។
អាសយដ្ឋានទំនាក់ទំនងសម្រាប់សារព័ត៌មាន
ក្រុមហ៊ុន មេនូឡាយហ្វ៍ ខេមបូឌា
លោក តារា សៅយុទ្ធនា
ប្រធានជាន់ខ្ពស់ផ្នែកទំនាក់ទំនង
០១១ ៧៥៩ ៩៦៤
[email protected]
April 20, 2020
ប្រយ័ត្ន! ចាញ់បោក Hackers ដាក់មេរោគចូលក្នុង Email ពាក់ព័ន្ធនឹង កូវីដ-19
ថ្មីៗនេះ ក្រុមហ៊ុនបានបញ្ចេញរបាយការណ៍មួយថា រកឃើញមេរោគចូលក្នុង Email ច្រើនជាង 18លាន ជារៀងរាល់ថ្ងៃពាក់ព័ន្ធនឹងព័ត៌មានកូវីដ-19។
តួលេខនេះ ត្រឹមតែ 1សប្ដាហ៍ចុងក្រោយនេះប៉ុណ្ណោះ នៅពេលដែលក្រុម Hackers មានបំណងវាយប្រហារមកលើក្រុមហ៊ុនបច្ចេកវិទ្យាយក្សមួយនេះ។
ទោះបីជាយ៉ាងនេះក៏ដោយ Google ក៏បានដឹងមុនដែរ និងបានបន្ថែមប្រព័ន្ធសុវត្ថិភាពកាន់តែខ្ពស់ និងបានប្រាប់ឱ្យអ្នកប្រើប្រាស់ បង្កើនការប្រុងប្រយ័ត្ន មុននឹងចុចលើ link ណាមួយ សូមមើលឱ្យបានជាក់ ចៀសវាងការខាតបង់ណាមួយ។
រំឭកផងដែរថា មិនមែនត្រឹមតែ Google ប៉ុណ្ណោះទេ តែនៅមានក្រុមហ៊ុនធំៗជាច្រើនទៀត ហើយក្នុងនោះក៏មានអង្គការ WHO មួយដែរ ដែលបានរងគ្រោះនៅក្នុងអំឡុងពេលវិបត្តិ កូវីដ-19 នេះ៕
April 18, 2020
Real Madrid បញ្ចេញគោលការណ៍កាត់ប្រាក់ឈ្នួលកីឡាករដូចក្លិបផ្សេងៗ
កាលពីថ្ងៃទី16 ខែមេសា ម្សិលមិញនេះ ក្លិបបាល់ទាត់ Real Madrid បានប្រកាសថា ខ្លួននឹងកាត់ប្រាក់ខែបុគ្គលិក និងកីឡាករទាំងអស់របស់ក្លិបចំនួនពី10 ទៅ 20ភាគរយ ដោយសារតែវិបត្តិកូវីដ-19។
ការកាត់បន្ថយនេះ ត្រូវបានក្លិបបញ្ជាក់ថា ធ្វើឡើងទៅតាមការព្រមព្រៀងគ្នារវាងភាគីកីឡាករ ឬបុគ្គលិក នឹងក្លិប ដើម្បីបន្ថយភាពតានតឹងផ្នែកហិរញ្ញវត្ថុរបស់ក្លិប ហើយចំពោះកីឡាករដែលមានថ្លៃឈ្នួលតិច ក្លិបនឹងកាត់ត្រឹមតែ 10%ប៉ុណ្ណោះ និង 20% គឺចំពោះតែកីឡាករដែលមានថ្លៃឈ្នួលខ្ពស់ តែ2 ទៅ 3នាក់តែប៉ុណ្ណោះ៕
គួរបញ្ជាក់ដែរថា កាលពីប្រមាណជា 2សប្តាហ៍មុន ក្លិបបាល់ទាត់អ្នកមាន របស់អេស្ប៉ាញ Real Madrid ទើបតែប្រកាសថា ក្លិបមានលទ្ធភាពគ្រប់គ្រាន់ពេញលេញក្នុងការបើកប្រាក់ឈ្នួលកីឡាករឱ្យបានគ្រប់ចំនួន ទោះបីជាមានវិបត្តិកូវីដ-19 ក៏ដោយ៕

April 18, 2020
ក្លិបមួយនៅ Bundesliga បែកគំនិតធ្វើរឿងមួយ ក្រោយមិនឱ្យមានអ្នកគាំទ្រចូលទស្សនាការប្រកួត
ក្របខ័ណ្ឌលីកកំពូលអាល្លីម៉ង់ Bundesliga បានប្រកាសអំពីការចាប់ផ្តើមប្រកួតបាល់ទាត់វិញហើយ កាលពីម្សិលមិញនេះ ក្នុងលក្ខខណ្ឌមិនមានទស្សនិកជនចូលរួមទស្សនាការប្រកួតឡើយ ដោយសារតែស្ថានភាពកូវីដ-19 នៅក្នុងប្រទេសមួយនេះ បានថមថយកម្លាំងបន្តិច ក្រោយពេលវាយលុកយ៉ាងខ្លាំងអស់រយៈពេលជិត 2ខែកន្លងមក។
ក្នុងនោះដែរក្លិប Borussia Monchengladbach ដែលកំពុងតែឈរលើលំដាប់លេខ4 បណ្តោះអាសន្នប្រចាំលីកមួយនេះ បានរកឃើញគំនិតថ្មីមួយដែលធ្វើឱ្យការប្រកួតមានលក្ខណៈដូចធម្មតា និងមានអ្នកគាំទ្រនៅកីឡដ្ឋាន។
គំនិតនោះគឺជាការព្រីនរូបភាពអ្នកគាំទ្រពិតប្រាកដរបស់ក្លិបបាល់ទាត់មួយនេះ មកដាក់នៅលើកៅអីអង្គុយនៅក្នុងកីឡដ្ឋានរបស់ខ្លួន ដែលមើលទៅហាក់ដូចជាមានហ្វ៊ែនពិតៗ មកអង្គុយទស្សនាការប្រកួតមែនទែនអ៊ីចឹង៕

April 18, 2020
ក្រុមហ៊ុនធានារ៉ាប់រង Forte នៅបន្តការងារ រួមចំណែកក្នុងសង្គមកម្ពុជាប្រឆាំងនឹងជំងឺកូវីដ-19
ជំងឺរាតត្បាតកូវីដ-19 កំពុងបង្កនូវភាពមិនប្រាកដប្រជា ការរំខាន និងការព្រួយបារម្ភនៅកម្ពុជា និងជុំវិញពិភពលោក។ ក្រុមហ៊ុនធានារ៉ាប់រង ហ្វ័រតេ (Forte) កំពុងតែព្យាយាមដោះស្រាយទៅតាមស្ថានភាពដែលកំពុងវិវឌ្ឍយ៉ាងឆាប់រហ័សនេះ។
ជាមួយគ្នានេះ សុវត្ថិភាពរបស់អតិថិជន និងបុគ្គលិក គឺជាអាទិភាពរបស់ក្រុមហ៊ុន ដោយយើងបាននិងកំពុងតាមដានការវិវឌ្ឍ និងកំណត់យកវិធីសាស្រ្តល្អបំផុត ដើម្បីឆ្លើយតបនឹងបញ្ហាដែលបង្កដោយ វីរុសកូវីដ-19 តែយើងនៅតែបន្តប្រតិបត្តិការជាធម្មតា ស្របពេលនេះ យើងក៏បានបន្ថែមការយកចិត្តទុកដាក់ចំពោះសុខុមាលភាពរបស់បុគ្គលិកផងដែរ។
តបតាមការអំពាវនាវរបស់រាជរដ្ឋាភិបាល បច្ចុប្បន្ន Forte ជាក្រុមហ៊ុនធានារ៉ាប់រងដែលរឹងមាំជាងគេនៅកម្ពុជា បានបរិច្ចាគទឹកប្រាក់តិចតួចជាមួយសមាគមគ្រឹះស្ថានមីក្រូហិរញ្ញវត្ថុ ចំពោះគណៈកម្មការជាតិប្រយុទ្ធប្រឆាំងនឹងវីរុសកូវីដ-19 នៃរាជរដ្ឋាភិបាលកម្ពុជា ដើម្បីចូលរួមចំណែកក្នុងការប្រយុទ្ធប្រឆាំងនឹងជំងឺដ៏កាចសាហាវនេះ។
លោក យក់ ចំរើនឬទ្ធិ អគ្គនាយកក្រុមហ៊ុនForte បានមានប្រសាសន៍ថា៖ «ក្រុមហ៊ុនForteសូមចូលរួមជាកម្លាំងមួយផ្នែក ជាមួយរាជរដ្ឋាភិបាលកម្ពុជាក្នុងការទប់ស្កាត់ បង្ការ និងព្យាបាលវីរុសកូវីដ-19 ដើម្បីសុវត្ថិភាព និងសុខភាពប្រជាជនកម្ពុជា។
លោកអគ្គនាយក បានបន្តថា ក្រៅពីការរួមចំណែកជាថវិកាជាមួយរដ្ឋាភិបាលហើយ ក្រុមហ៊ុនហ្វ័រតេ ក៏បានដាក់ចេញជាវិធានការបន្ទាន់ និងយ៉ាងតឹងរ៉ឹង ដើម្បីទប់ស្កាត់ការឆ្លងវីរុសកូវីដ-19 ដល់បុគ្គលិក និងអតិថិជន ដោយបានអនុវត្តវិធានការផ្នែកអនាម័យល្អ និងសុវត្ថិភាព។
លោក ចំរើនឬទ្ធិ បានបញ្ជាក់ថា៖«នៅក្នុងវិធានការដែលក្រុមហ៊ុនយើងបានប្រតិបត្តិ ក្នុងការការពារបុគ្គលិក និងអតិថិជនរបស់យើង ដោយបានផ្តល់ជូននូវបរិស្ថានធ្វើការ ប្រកបដោយសុវត្ថិភាពតាមដែលអាចធ្វើទៅបាន ក្នុងអំឡុងពេលមានការផ្ទុះឡើងនូវវីរុសនេះ។ វិធានការទាំងនោះរួមមានដូចជា៖ ការស្ទង់សីតុណ្ហភាពបុគ្គលិក 2ដងក្នុង 1ថ្ងៃ និងការស្ទង់សីតុណ្ហភាពអតិថិជន ដែលអញ្ជើញមកការិយាល័យ ឬសាខារបស់ Forte ផ្តល់ជូនទឹកអាល់កុលលាងដៃដល់បុគ្គលិក និងអតិថិជន»។
លោក បានឱ្យដឹងថា យើងក៏បានធ្វើការសម្អាតដៃទ្វារ រៀងរាល់ 2ម៉ោងម្តង បាញ់ទឹកកម្ចាត់មេរោគគ្រប់តុធ្វើការ និងបន្ទប់ប្រជុំ សម្អាត និងកម្ចាត់មេរោគទ្រង់ទ្រាយធំ នៅគ្រប់ការិយាល័យ និងសាខា រៀងរាល់ 2សប្តាហ៍ម្តង និងមានវេជ្ជបណ្ឌិតប្រចាំការនៅការិយាល័យ ដើម្បីពិនិត្យអ្នកដែលមានរោគសញ្ញាណាមួយ យើងត្រៀមរួចរាល់ក្នុងការផ្តល់សេវាកម្មជូនលោកអ្នក ក្នុងនាមជាជម្រើសដៃគូ ផ្តល់ការធានារ៉ាប់រងដល់លោកអ្នក Forteត្រៀមខ្លួនរួចជាស្រេចក្នុងការគាំទ្រលោកអ្នកក្នុងអំឡុងពេលប្រឈមនេះ»។
លោក ចំរើនឬទ្ធិ បានបញ្ជាក់ដែរថា៖ «លើសពីនេះ ក្រុមហ៊ុនForte ក៏បានលើកទឹកចិត្តឱ្យបុគ្គលិក ឈប់សម្រាកឆ្លាស់វេនគ្នា ពេលចូលមកធ្វើការត្រូវពាក់ម៉ាស់ ពេលអង្គុយធ្វើការ ត្រូវមានគម្លាតពីគ្នា លាងសម្អាតដៃជាញឹកញាប់ជាមួយនឹងសាប៊ូ ឬអាល់កុលលាងដៃ ដើម្បីបង្ការការឆ្លងនៅការិយាល័យ ដែលអាចមានជាប់បាក់តេរី និងវីរុស ជាយថាហេតុ»។
សូមបញ្ជាក់ថា ក្រុមហ៊ុនForte ក៏បានផ្សព្វផ្សាយពីវិធីបង្ការកូវីដ-19 តាមខិត្តប័ណ្ណ និងចែកបណ្ណផ្សាយ តាមទំព័រហ្វេសប៊ុកហ្វ័រតេ ក្នុងការការពារការឆ្លងជំងឺកូវីដ-19 ផ្សេងទៀតជូនដល់បុគ្គលិក និងអតិថិជនទាំងអស់ ដើម្បីបញ្ជ្រាបការយល់ដឹង និងចូលរួមប្រយុទ្ធនឹងការចម្លងជំងឺដ៏កាចសាហាវនេះ។
បើទោះជាស្ថិតក្នុងស្ថានភាព ធុរកិច្ចមានសភាពមិនប្រក្រតីក៏ដសោយ ក៏ប្រតិបត្តិការធុរកិច្ច របស់ក្រុមហ៊ុនForte នៅតែបន្តដំណើរការ ទោះបីជាក្នុងពេលចូលឆ្នាំខ្មែរ 3ថ្ងែក្ដី ក៏ក្រុមហ៊ុនForte នៅគោរពបទបញ្ជារបស់រាជរដ្ឋាភិបាល គ្រប់ការិយាល័យ និងសាខារបស់ហ្វ័រតេ នៅតែបើកទ្វារដូចធម្មតា។
បើទោះជាយើងមិនទាន់ដឹងថា ស្ថានភាពជំងឺរាតត្បាតជាសកលនេះ នឹងបញ្ចប់នៅពេលណាក៏ដោយ តែយើងបានដឹងច្បាស់ថា យើងទាំងអស់គ្នានឹងប្រឈមនឹងការលំបាកក្នុងអំឡុងពេលប៉ុន្មានសប្តាហ៍ ឬប៉ុន្មានខែបន្ទាប់ពីនេះ។ យើងរួមគ្នាប្រយុទ្ធប្រឆាំងនឹងបញ្ហាប្រឈមនេះ ។ យើងនៅទីនេះដើម្បប្រយុទ្ធប្រឆាំងនឹងបញ្ហានេះជាមួយលោកអ្នកក្នុងនាមជាដៃគូធានារ៉ាប់រងដ៏ល្អ។
លោក យក់ ចំរើនឬទ្ធិ អគ្គនាយក ហ្វ័រតេ បានមានប្រសាសន៍ថា៖ «ក្នុងពេលវេលាដ៏លំបាកនេះ តាងនាមថ្នាក់គ្រប់គ្រង និងបុគ្គលិកទាំងអស់របស់ក្រុមហ៊ុនធានារ៉ាប់រងហ្វ័រតេ ខ្ញុំបាទសូមគោរពជូនពរចំពោះ សម្ដេច ទ្រង់ ឯកឧត្ដម អ្នកឧកញ៉ា លោកជំទាវ លោក លោកស្រី អ្នកនាង កញ្ញាទាំងអស់ សូមមានសុខភាពល្អ និងមានសុវត្ថិភាពគ្រប់ៗគ្នា។ យើងរួមគ្នាដើម្បីបង្ការការឆ្លងជំងឺកូវីដ-19 សូមចូលរួមសកម្មភាពការពារខ្លួនអ្នកផ្ទាល់ និងក្រុមគ្រួសារ និងរក្សាបានសុវត្ថិភាពខ្ពស់ទាំងអស់គ្នា!»៕

April 18, 2020
ហាងបេប៊ីអោតឡេត ដាក់រថយន្ត Ford Ecosport ជារង្វាន់ធំដល់អតិថិជន
កាលពីពេលថ្មីនេះ ហាងលក់ទំនិញសម្រាប់កុមារ បេប៊ីអោតឡេត បានធ្វើការប្រកាសនូវប្រូម៉ូសិនធំពិសេសេមិនធ្លាប់មានសម្រាប់ដល់អតិថិដែលតែងគាំទ្របេប៊ីអោតឡេតកន្លងមក ដោយ អតិថិជនគ្រាន់តែចំណាយអស់ 70ដុល្លារ នឹងទទួលបានសន្លឹកឆ្នោតមួយសន្លឹកសម្រាប់ធ្វើការចាប់រង្វាន់ផ្សងសំណាង ដែលរង្វាន់សរុបរួមមានដូចជា iPhone 11 Pro Max ចំនួន 3 គ្រឿង, ម៉ូតូ Honda Zoomer-X ចំនួន 3 គ្រឿង និងរង្វាន់ធំរថយន្ត Ford EcoSport 2020 ចំនួន 1 គ្រឿង រួមទាំងរង្វាន់ផ្សេងៗជាច្រើនទៀតសរុប 5 ម៉ឺនដុល្លារ។ អ្វីដែលធ្វើឲ្យកម្មវិធីចាប់រង្វាន់ឆ្នាំនេះកាន់តែពិសេសជាងរាល់ដងនោះគឺអតិថិជនមានឳកាសឈ្នះរង្វាន់ធំ គឺរថយន្ត Ford Ecosport 2020 មួយគ្រឿងថ្មីស្រឡាង ហើយកម្មវិធីនេះ ចាប់ផ្តើមពីថ្ងៃទី 1 ខែមេសានេះតទៅ។
គួរបញ្ជាក់ផងដែរថា ហាងបេប៊ីអោតឡេត ជាហាងលក់ទំនិញសម្រាប់កុមារឈានមុខគេនៅប្រទេសកម្ពុជា ដែលត្រូវបានបង្កើតឡើងតាំងពីឆ្នាំ2014មកម៉្លេះ ហើយសព្វថ្ងៃនេះហាងបេប៊ីអោតឡេត ត្រូវបានគេចាត់ទុកថាជាអ្នកជំនាញលក់រាយដែលគួរឱ្យទុកចិត្តបំផុតសម្រាប់ផលិតផលទារក កុមារ និងសម្រាប់អ្នកម្តាយផងដែរ។ បេប៊ីអោតឡេត មានសាខាចំនួន៣ ដោយមានទីតាំងស្ថិតនៅលើតំបន់សំខាន់ៗនៃរាជធានីភ្នំពេញ រួមមានដូចជាសាខាទួលគោក, សាខាកម្ពុជាក្រោម និងសាខាវិមានឯករាជ្យ។
បេប៊ីអោតឡេតជ្រើសរើស Ford Ecosport 2020 ជារង្វាន់ធំសម្រាប់ឆ្នាំនេះគឺដើម្បីលើកទឹកចិត្តដល់អតិថិជនបេប៊ីអោតឡេត ហើយម្យ៉ាងទៀតដោយសាររថយន្តនេះ ទទួលបានការពេញនិយមសម្រាប់អ្នកដែលមានសមាជិកគ្រួសារតិច ដោយផ្តល់ផាសុកភាព និងភាពងាយស្រួលក្នុងការបត់បែនគ្រប់កាលៈទេសៈ និងគ្រប់តម្រូវប្រចាំថ្ងៃរបស់យើង ដូចជាការប្រើប្រាស់នៅក្នុងទីក្រុង ឬការដើរកម្សាន្តតាមខេត្តចុងសប្ដាហ៍ជាដើម។ ថ្វិត្បិត Ford Ecosport ជារថយន្ត SUV ធន់តូច តែមានបំពាក់បច្ចេកវិទ្យាទំនើប និងមានសុវត្ថិភាពខ្ពស់មិនចាញ់រថយន្ត SUV ធន់កណ្ដាលនោះទ។ ក្រៅពីនេះ យើងក៏មានដាក់តាំងរថយន្ត Ford Ecosport ដែលត្រៀមចាប់រង្វាន់នៅខាងមុខហាងប៊ីអោតឡេតផងដែរ។ ដូចនេះសម្រាប់អ្នកដែលមានបំណងចង់ទស្សនារថយន្តផ្ទាល់ អាចអញ្ជើញទៅកាន់ហាងប៊ីអោតឡេត សាខាវិមានឯករាជ្យ៕
April 17, 2020
កម្មវិធីកំពុងល្បី Zoom ត្រូវគេលួចយកលេខសម្ងាត់ និងអ៊ីមែលអ្នកប្រើ ទៅដាក់លក់
Zoom បានក្លាយជាកម្មវិធីល្បីភ្លាមមួយរំពេច នៅពេលផ្ទុះឡើង ស្របគ្នានឹងការផ្ទុះជំងឺកូវីដ-19 ដែលតម្រូវឱ្យមនុស្សទាំងអស់ត្រូវស្ថិតនៅដោយឡែកពីគ្នា ដើម្បីកាត់បន្ថយការឆ្លងជំងឺនេះ។ ពេលនេះចំនួនអ្នកប្រើប្រាស់ប្រចាំថ្ងៃឡើងដល់ជាង 200លាននាក់ ដែលមុនការផ្ទុះជំងឺមានត្រឹម 10លាននាក់ប៉ុណ្ណោះ។
យ៉ាងណា ថ្មីៗនេះគេបានរកឃើញថា មានប្រមាណ 53ម៉ឺនaccounts ត្រូវបាន Hacker លួចបានលេខសម្ងាត់ និងអ៊ីមEល ហើយយកទៅដាក់លក់នៅលើវេបសាយរបស់ក្រុមពួក Hacker ។
(File) ទិន្នន័យមួយសំណុំ ដែលមានដាក់លក់លើទីផ្សារខ្មៅងងឹត ត្រូវបានប្រទះឃើញដោយក្រុមហ៊ុនសុវត្ថិភាព Cyble ដោយប្រើប្រាស់ព័ត៌មានទាំងនេះ។ អ្នកដទៃចូលទៅកាន់បន្ទប់ប្រជុំផ្ទាល់ខ្លួនរបស់គណនីណាមួយ ក្នុងកម្មវិធី Zoom និងដំណើរការការប្រជុំនោះ ពួកគេ(ពួក Hacker )អាចអញ្ជើញអ្នកដទៃឱ្យចូលរួមបាន ដោយបន្លំខ្លួនធ្វើជាម្ចាស់គណនី។
Hacker អាចប្រើប្រាស់ឧបករណ៍ឈ្មោះថា OpenBullet ដែលអាចយកឈ្មោះគណនី និងលេខសម្ងាត់ ដែលគេលួចបាន ទៅសាកល្បង Log-In ចូលវេបសាយផ្សេង។ ពេលនោះវាអាចបើកដៃឱ្យ Hacker អាចបង្កប់មេរោគតាមរយៈការអញ្ជើញសម្រាប់អំពើទុច្ចរិតនានា។
ឧបករណ៍នេះ គឺរងការប៉ះពាល់ខ្លាំងបំផុតចំពោះអ្នកដែលប្រើប្រាស់ឈ្មោះគណនី និងលេខសម្ងាត់ដូចគ្នាសម្រាប់ប្រព័ន្ធផ្សេងៗគ្នា។ មកទល់ពេលនេះដែរ គេនៅមិនទាន់ឃើញមានការឆ្លើយតបពីក្រុមហ៊ុន Zoom នៅឡើយទេ៕
April 16, 2020
OnePlus ប្រកាសចេញកំពូលស្មាតហ្វូនថ្មី 2ម៉ូដែល រាងក៏ស្អាត កម្លាំងក៏ខ្លាំង!
ក្រុមហ៊ុន OnePlus បានប្រកាសចេញនូវស្មាតហ្វូនចំនួន 2ម៉ូដែល កាលពីយប់មិញ គឺ OnePlus 8 និង OnePlus 8 Pro ដែលមានរូបរាងនិងលក្ខណសម្បត្តិដូចខាងក្រោមនេះ៖
**លក្ខណសម្បត្តិលើ OnePlus 8**
-មានបំពាក់អេក្រង់ទំហំ 6.5អ៊ីញ អាចបង្ហាញរូបភាពក្នុងកម្រិត 1080p+ និងមាន Refresh Rate 90Hz ហើយវាទ្រាំទ្រនូវ HDR10+ ដែលអាចបង្ហាញរូបភាពមានពណ៌ច្បាស់ដូចធម្មជាតិ ដូច 8 Pro ដែរ។
-កាមេរ៉ាមេមានទំហំ 48MP, កាមេរ៉ា Ultra-Wide មានទំហំ 16MP និងមានគួបផ្សំដោយកាមេរ៉ាប្រភេទ Macro ទំហំ 2MP។ (លើម៉ូដែលនេះមិនមានកាមេរ៉ា Telephoto ទេ ដោយកាមេរ៉ាមេ មានទំហំ 48MP អាចធ្វើ Zoom ចូលបាន 2ដង តាមរយៈការ Crop រូបភាព។)
-ថ្មមានទំហំ 4300 mAh គាំទ្រការសាកថ្មបែប Warp Charge 30T ដែលចំណាយពេលត្រឹម 22នាទី សាកបាន 50% តែម៉ូដែលនេះ គឺមិនគាំទ្រការសាកថ្មឥតប្រើខ្សែទេ។
-ប្រើបន្ទះឈីប Snapdragon 865 ដែលទ្រាំទ្រសេវា 5G
-ប្រើ RAM ប្រភេទ LPDDR4X ដែលដំណើរការយឺតជាង OnePlus 8 Pro បន្តិចបន្តួច។
-តម្លៃ OnePlus 8 គឺ 699ដុល្លារ ជម្រើស RAM ទំហំ 8GB ជាមួយមេម៉ូរី 128GB និង 799ដុល្លារ RAM ទំហំ 12GB ជាមួយមេម៉ូរី 256GB ហើយវានឹងចេញលក់លើទីផ្សារ នៅថ្ងៃទី24 ខែមេសា ជាមួយនឹង OnePlus 8 Pro ដោយនឹងមានលក់នៅសហរដ្ឋអាមេរិកមុនគេ។

**លក្ខណសម្បត្តិរបស់ OnePlus 8 Pro**
-មានបំពាក់អេក្រង់ Fluid AMOLED ដែលមានទំហំ 6.7អ៊ីញ និងមាន Refresh Rate 120Hz ហើយអាចបង្ហាញរូបភាពក្នុងកម្រិត QHD+ នៅល្បឿន 120Hz ទៀតផង។
-បន្ទះអេក្រង់គឺជាប្រភេទ 10-bit និងទ្រាំទ្រការបង្ហាញកម្រិត HDR10+ លើអេក្រង់នេះមានចោះរន្ធតូចមួយសម្រាប់បំពាក់កាមេរ៉ា Selfie ទំហំ 16MP។
OnePlus 8 Pro មានបន្ថែមមុខងារ2 ដែលនេះជាលើកដំបូងសម្រាប់ត្រកូល OnePlus ដែលទី1 គឺសមត្ថភាពការពារទឹក និងធូលីកម្រិត IP68។ ទី2 គឺការគាំទ្រការសាកថ្មដោយឥតប្រើខ្សែ ដែលមានល្បឿនលឿនដល់ 30វ៉ាត់(W/h) វាអាចសាកថ្មទំហំ 4510mAh របស់វាបានដល់ 50% ក្នុងពេលតែ 30នាទីប៉ុណ្ណោះ។ បន្ថែមពីនេះវាគាំទ្រនូវ Reverse Wireless Charge សម្រាប់សាកថ្មឱ្យឧបករណ៍ដទៃបានផងដែរ។
-ការសាកថ្មដោយប្រើខ្សែវិញ គឺដំណើរការដោយបច្ចេកវិទ្យា 30W Warp Charge 30T ដែលអាចសាកពី 0 ដល់ 50% ក្នុងពេល 23នាទី។
-កាមេរ៉ាខាងក្រោយមាន 4គ្រាប់ ដែលកាមេរ៉ាមេទំហំ 48MP, កាមេរ៉ា Ultra-Wide ទំហំ 48MP, កាមេរ៉ា Telephoto ទំហំ 8MP អាច Zoom Optical បាន 3x និងចុងក្រោយជាកាមេរ៉ា Color Filter ទំហំ 5MP។ ប្រព័ន្ធកាមេរ៉ានេះអាចថតវីដេអូកម្រិត 4K/60fps និងមានមុខងារដូចជា Night Mode, Portrait Mode និង Audio Zoom ជាដើម។
-វាដំណើរការដោយបន្ទះឈីប Snapdragon 865, គាំទ្រសេវា 5G ហើយភ្ជាប់មកជាមួយ RAM ប្រភេទ LPDDR5 និងអង្គផ្ទុកទិន្នន័យប្រភេទ UFS 3.0។
-តម្លៃ OnePlus 8 Pro គឺ 899ដុល្លារសម្រាប់ RAM 8GB និងមេម៉ូរី 128GB។ បន្ថែមពីលើ 100ដុល្លារទៀត នឹងទទួលបាន RAM ទំហំ 12GB និងមេម៉ូរី 256GB និងមានលក់នៅសហរដ្ឋអាមេរិកមុនគេដូចគ្នា៕
April 16, 2020