Author: ធឿន មករា

គន្លឹះ4 សំខាន់ៗពី Facebook៖ វិធីសាស្ត្រក្នុងការរក្សាសុវត្ថិភាព ពេលធ្វើការពីផ្ទះ
ភ្នំពេញ ថ្ងៃទី១៥ ខែមេសា ឆ្នាំ២០២០៖ ស្របពេលដែលមនុស្សកាន់តែច្រើននាក់តម្រូវឲ្យបំពេញការងារពីផ្ទះរបស់ខ្លួន និងប្រើប្រាស់កម្មវិធីសូហ្វវ៉ែរ ក៏ដូចជាបណ្តាញសង្គមផ្សេងៗគ្នាជាច្រើន ដើម្បីធ្វើការងារប្រកបដោយប្រសិទ្ធិភាព វាពិតជាសំខាន់ណាស់ក្នុងការការពារខ្លួនរបស់អ្នកកុំឲ្យរងនូវការឆបោក និងការបោកប្រាស់ផ្សេងៗលើប្រព័ន្ធអ៊ីនធើណិត ដែលទាក់ទងនឹង វីរុសកូវីដ–១៩។
ដើម្បីជួយឲ្យអ្នកប្រើប្រាស់ទាំងអស់ រក្សាបាននូវសុវត្ថិភាពជានិច្ច ក្នុងពេលបំពេញការងារពីផ្ទះរបស់ខ្លួន ឬក៏រក្សា ទំនាក់ទំនងជាមួយនឹងមិត្តភក្តិ និងក្រុមគ្រួសារ ក្រុមហ៊ុន Facebook នឹងចែករំលែកនូវគន្លឹះសំខាន់ៗចំនួន៤ ដើម្បីធ្វើឲ្យលោកអ្នកប្រើប្រាស់អនឡាញប្រកបដោយសុវត្ថិភាព។
1)   ការការពារលេខសម្ងាត់របស់អ្នក
លោកអ្នកត្រូវប្រើប្រាស់លេខសម្ងាត់ខុសៗគ្នា សម្រាប់គណនីអនឡាញនីមួយៗរបស់លោកអ្នក។ លេខសម្ងាត់គណនី Facebook របស់អ្នក គឺត្រូវតែខុសគ្នាពីលេខសម្ងាត់គណនីផ្សេងទៀត។ លេខសម្ងាត់របស់លោកអ្នក គួរតែមានលក្ខណៈពិបាកទាយ និងស្មុគស្មាញ ហេតុនេះ សូមកុំប្រើប្រាស់ឈ្មោះរបស់អ្នកក្នុងលេខសម្ងាត់ ឬក៏ពាក្យដែលគេស្គាល់ច្រើន ជាដើម។
លោកអ្នកមិនត្រូវប្រាប់ ឬចែករំលែកព័ត៌មានពីការចូលក្នុង (login) គណនីរបស់លោកអ្នក ជាមួយនឹង នរណាម្នាក់នោះឡើយ។
ដើម្បីស្វែងយល់បន្ថែមទៀតអំពីសុវត្ថិភាពលេខសម្ងាត់ និងរបៀបបង្កើតលេខសម្ងាត់ដ៏មានសុវត្ថិភាពបំផុត ក្រុមហ៊ុន Facebook បានបង្កើតកម្មវិធីមួយដែលហៅថា «Privacy Checkup Tool» (ឧបករណ៍ត្រួតពិនិត្យ ព័ត៌មានឯកជន)។
2) បើកមុខងារប្រាប់ដំណឹងក្នុងពេលចូលក្នុងគណនី ឬ login alerts
វិធីសាស្ត្រមួយទៀតដើម្បីធ្វើឲ្យគណនី Facebook កាន់តែមានសុវត្ថិភាពខ្ពស់នោះ គឺការបើកមុខងារប្រាប់ដំណឹង ក្នុងពេលដែលមានអ្នកដ៏ទៃព្យាយាមចូលក្នុងគណនីរបស់អ្នកដោយប្រើប្រាស់ ឧបករណ៍ ឬ browser ចំឡែកដែលអ្នកមិនធ្លាប់ប្រើ។
យើងអាចកំណត់មុខងារប្រាប់ដំណឹងទាំងនេះបាន នៅក្នុង Privacy Checkup tool ដែលមានរៀបរាប់ខាងលើ។
ការធ្វើបច្ចុប្បន្នភាពអាសយដ្ឋានអ៊ីម៉ែល និងលេខទូរស័ព្ទ អាចជួយធានាបានថា ម្ចាស់គណនី នៅតែអាចចូល ក្នុងគណនីរបស់ខ្លួនបាន ទោះជាគាត់ ភ្លេចលេខសម្ងាត់ក៏ដោយ។
3)   ពិនិត្យមើលសកម្មភាពប្រើប្រាស់គណនីរបស់អ្នក
ការត្រួតពិនិត្យមើលទីតាំង និងពេលវេលា ដែលលោកអ្នកបានចូលក្នុងគណនី Facebook និង Instagram និងប្រវត្តិចំនួនម៉ោងដែលគណនីនោះបានអនឡាញតាមឧបករណ៍ដែលមិនធ្លាប់បានប្រើប្រាស់ពីមុន គឺសំខាន់ដូចគ្នា ហើយលោកអ្នកអាចធ្វើការត្រួតពិនិត្យចំណុចនេះបានតាមរយៈប្រអប់ Security Settings (ការកំណត់សុវត្ថិភាព)។
អ្នកប្រើប្រាស់ Instagram គួរតែពិចារណាទៅលើការបន្ថែមប្រព័ន្ធសុវត្ថិភាពមួយកម្រិតទៀតលើគណនីរបស់ខ្លួន តាមរយៈការប្រើប្រាស់មុខងារបញ្ជាក់លេខសម្ងាត់២លើក ឬ two-factor authentication ដែលជាកូដ សុវត្ថិភាពបន្ថែមមួយ នៅពេលដែលលោកអ្នកព្យាយាមចូលក្នុងគណនីតាមឧបករណ៍ថ្មី ដែលមិនធ្លាប់ប្រើ។
4)   ត្រូវតែមានការប្រុងប្រយ័ត្នខ្ពស់លើសារបោកប្រាស់ និងការឆបោកផ្សេងៗ
ក្រុមឆបោកតាមអនឡាញ អាចនឹងព្យាយាមបោកបញ្ឆោតលោកអ្នកតាមរយៈការបង្ហោះព័ត៌មានអំពី វីរុសកុរ៉ូណា ឬសារបំភិតបំភ័យផ្សេងៗអំពីការរាតត្បាតជាសកលនេះ ហេតុនេះ វាពិតជាសំខាន់ណាស់ ដែលលោកអ្នក មិនត្រូវចុចទៅលើលីង ឬដំណរភ្ជាប់គេហទំព័រដែលគួរឲ្យសង្ស័យនោះទេ និងត្រូវតែរាយការណ៍ ពីសារដ៏គួរឲ្យសង្ស័យ ទាំងឡាយ ដែលព្យាយាមសួររកព័ត៌មានផ្ទាល់ខ្លួនរបស់អ្នក។
យ៉ាងណាមិញ លោកអ្នកអាចបញ្ជាក់បានយ៉ាងងាយស្រួលថា អ៊ីម៉ែល និងសារផ្សេងៗ គឺត្រូវបានផ្ញើរចេញ ដោយផ្ទាល់ពី Facebook ដោយគ្រាន់តែពិនិត្យមើលថា សារ និងអ៊ីម៉ែលទាំងអស់នោះ ត្រូវបានផ្ញើរចេញពីគេហទំព័រ facebookmail.com ឬយ៉ាងណា និងតាមរយៈការត្រួតពិនិត្យអ៊ីម៉ែលថ្មីៗ នៅក្នុងប្រអប់ Security and Login Settings (សុវត្ថិភាព និងការកំណត់ការចូលគណនី)។ បណ្តាញសង្គម Instagram ក៏ប្រើវិធីសាស្ត្រដូចគ្នានេះដែរ ដើម្បីពិនិត្យមើលចំណុចទាំងនោះ។ សូមចាំថា Facebook នឹងមិនស្នើសុំ ឬសួររកលេខសម្ងាត់របស់លោកអ្នកតាមរយៈអ៊ីម៉ែលឡើយ។
ដើម្បីជៀសឲ្យផុតពីការឆបោកផ្សេងៗ អ្នកត្រូវមានការប្រុងប្រយ័ត្នខ្ពស់ចំពោះអ្នកដែលស្នើសុំប្រាក់ពីអ្នក ទាំងដែលលោកអ្នកមិនស្គាល់គេនោះសោះ ឬសំណើពីនរណាម្នាក់ដែលអះអាងថាគេជាមិត្តភក្ដិ ឬជាសាច់ញាតិរបស់អ្នក ដែលកំពុងស្ថិតក្នុងសភាពគ្រោះថ្នាក់ណាមួយ។
ទាំងនេះ គឺជាវិធីសាស្ត្រសំខាន់ៗមួយចំនួនដែលលោកអ្នកអាចយកទៅអនុវត្តបាន ដើម្បីធានាឲ្យបានថា ការធ្វើការងារពីផ្ទះ និងការរក្សាទំនាក់ទំនងជាមួយនឹងអ្នកផ្សេងទៀតតាមអនឡាញ នៅតែមានសុវត្ថិភាព និងផ្តល់នូវលទ្ធផលជាវិជ្ជមាន ជានិច្ច។ សម្រាប់ព័ត៌មានថ្មីៗអំពីការរាតត្បាតរបស់វីរុសកូរ៉ូណា សូមតាមដានក្នុង «មជ្ឈមណ្ឌលព័ត៌មាន កូវីដ-១៩» របស់ Facebook ដែលមានបង្ហាញជូននៅលើទំព័រដើមលើគណនី Facebook របស់លោកអ្នក៕
April 21, 2020
ហេតុអ្វីប្រេងធ្លាក់ថ្លៃ តែអគ្គិសនីមិនទាន់ធ្លាក់?
នាពេលបច្ចុប្បន្ននេះ មានប្រជាពលរដ្ឋមួយចំនួនបានចោទសួរថា តើហេតុអ្វីទើបតម្លៃអគ្គិសនីដែលផ្គត់ផ្គង់នៅទូទាំងប្រទេសនៅតែមានតម្លៃដដែល ស្របពេលដែលតម្លៃប្រេងលើសកលលោកបានធ្លាក់ចុះយ៉ាងគំហុក។
ឆ្លើយតបជាមួយនឹងបញ្ហានេះ ឯកឧត្តម វ៉ិចទ័រ ហ្សូនា អ្នកនាំពាក្យក្រសួងរ៉ែនិងថាមពល បានលើកឡើងថាមូលហេតុដែលតម្លៃអគ្គិសនីកម្ពុជាមិនប្រែប្រួលតម្លៃនៅពេលតម្លៃប្រេងធ្លាក់ចុះ គឺដោយសារតែការចូលរួមរបស់ប្រេងនៅក្នុងការផលិតអគ្គិសនីនៅកម្ពុជាមានចំនួនប្រមាណត្រឹមតែ 5% ប៉ុណ្ណោះក្នុងចំណោមប្រភពសំខាន់ៗទាំងអស់។
ក្រៅពីនោះប្រភពដែលកម្ពុជាបានចំណាយយកមកផលិតជាអគ្គិសនីគឺបានមកពីវារីអគ្គិសនីប្រហែល 33% ការផលិតអគ្គិសនីចេញពីធ្យូងថ្មប្រហែល 32% ខណៈ 25% ទៀតត្រូវចំណាយទិញអគ្គិសនីពីប្រទេសជិតខាង និងចំនួន 2% បានមកពីថាមពលអគ្គិសនីដែលកើតឡើងវិញដូចជាការប្រើប្រាស់ផ្ទាំងសូឡា រួមទាំងប្រភពមួយចំនួនផ្សេងទៀត។
ឯកឧត្តមបញ្ជាក់ថា ប្រសិនបើយើងប្រើប្រាស់អគ្គិសនីដែលផលិតចេញពីប្រេងនាពេលបច្ចុប្បន្ននេះ គឺតម្លៃអាចលើសពី 2,000រៀលក្នុងមួយគីឡូវ៉ាត់ម៉ោង មិនមែន 730រៀលសម្រាប់អ្នកប្រើប្រាស់លើសពី 200គីឡូវ៉ាត់ម៉ោងក្នុងមួយខែ ឬតម្លៃ 610រៀលសម្រាប់អ្នកប្រើប្រាស់ក្រោមនេះនោះទេ។
ឯកឧត្តមបង្ហាញផងដែរថា នៅកម្ពុជាបច្ចុប្បន្ននេះមានការប្រើប្រាស់បណ្តាញជាតិប្រមាណ 90% នៅទូទាំងប្រទេស ហើយនៅសល់ជាង 1,000ភូមិទៀតដែលមិនទាន់មានការផ្គត់ផ្គង់អគ្គិសនីបណ្តាញជាតិ។
សម្រាប់តំបន់ដែលមិនទាន់មានការផ្គង់ផ្គង់បណ្តាញជាតិខ្លះ ពួកគាត់ប្រើប្រាស់ម៉ាស៊ីនភ្លើងដើរដោយថាមពលប្រេង ហេតុនេះហើយទើបយតម្លៃអគ្គិសនីដែលពួកគាត់កំពុងប្រើប្រាស់រាល់ថ្ងៃនេះគឺ នៅមានតម្លៃខ្ពស់ជាង 2,000រៀលក្នុងមួយគីឡូម៉ែត្រម៉ោង៕
តម្លៃលក់រាយប្រេងឥន្ធនៈថ្មី ដែលត្រូវអនុវត្តន៍ ពីថ្ងៃទី16 ដល់ថ្ងៃទី30 ខែមេសា ឆ្នាំ2020
April 21, 2020
ការនាំចេញកៅស៊ូ ក្នុងខែមីនា ធ្លាក់ចុះ តែសរុប 1ត្រីមាសទី1 កើនឡើង 10%
យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ការនាំ ចេញជ័រកៅស៊ូរបស់កម្ពុជាបានកើនឡើង 10% នៅក្នុងត្រីមាសទី1 នៃឆ្នាំនេះ បើប្រៀបធៀបទៅនឹង រយៈ ពេលដូចគ្នាកាលពីឆ្នាំមុន(2019) ប៉ុន្តែតម្លៃទំនិញបានធ្លាក់ចុះបន្តិច។
របាយការណ៍ បានបង្ហាញតួលេខ ចាប់ពីខែមករា ដល់ខែមីនា ប្រទេសកម្ពុជាបាននាំចេញ កៅស៊ូចំនួន 53,057តោនកើនឡើង 10% ដោយតម្លៃជាមធ្យម 1,397ដុល្លារក្នុង 1តោន ដែល តំណាងឱ្យការធ្លាក់ចុះ 1.2%។ ជារួមសម្រាប់រយៈពេលនេះវិស័យជ័រកៅស៊ូ បាននាំមកនូវប្រាក់ ចំណូលប្រមាណ 74លានដុល្លារ ។
របាយការណ៍បានបញ្ជាក់ដែរថា បើទោះបីជាមានការធ្លាក់ចុះ 15% នៃបរិមាណនាំចេញក្នុងខែមីនា បើប្រៀបធៀបនឹងខែកុម្ភៈ ពី 12,913 ដល់ 11,751តោន ដែលជាលទ្ធផលនៃការរំខានដល់ ពាណិជ្ជកម្មដែលបណ្តាលមកពីការរឹតត្បិតនៃសកម្មភាពពាណិជ្ជកម្មឆ្លងកាត់ព្រំដែនឆ្លើយតបទៅនឹងការរាលដាលវីរុសកូវីដ-19។
លោកឧកញ៉ា លឹម ហេង អនុប្រធានក្រុមហ៊ុន អានម៉ាឌី ដែលជាម្ចាស់ចម្ការកៅស៊ូ និងនាំចេញផលិតផលបានមានប្រសាសន៍ថា ការធ្លាក់ចុះនៃការនាំចេញកាលពីខែមីនា ភាគច្រើន គឺកាត់បន្ថយការបញ្ជាទិញពីអ្នកនាំចូលធំបំផុតរបស់ពួកគេ។
ប្រទេសចិនដែលយើងមើលឃើញថា ជាទីផ្សារកៅស៊ូដ៏ធំបំផុតរបស់យើង បានដាក់កម្រិតយ៉ាងតឹងរ៉ឹងលើពាណិជ្ជកម្មនាំចូល ដោយសារតែជំងឺរាតត្បាតកូវីដ-19។ ជាហេតុនាំឱ្យមានលទ្ធផលនាំចេញ និងប្រាក់ចំណេញបានធ្លាក់ចុះ។
កសិករកំពុងចាក់ជ័រកៅស៊ូចូលធុង
ក្រៅពីប្រទេសចិន ដែលជាទីផ្សារសំខាន់នៃទំនិញ ជ័រកៅស៊ូកម្ពុជាក៏ត្រូវបាននាំចេញទៅកាន់ប្រទេសម៉ាឡេស៊ី វៀតណាម និងសិង្ហបុរីផងដែរ ដែលសុទ្ធសឹងជាប្រទេសមានវិបត្តិវីរុសកូវីដ-19 ជាហេតុនាំឱ្យការនាំចេញមានការរឹតត្បិត ក្នុងសកម្មភាពពាណិជ្ជកម្ម។
សូបញ្ជាក់ថា ប្រទេសកម្ពុជាមានចម្ការកៅស៊ូចំនួន 405,485 ហិកតាដែលក្នុងនោះ 250,750 ហិកតា (62%) គឺជា“ ដំណាំសាច់ប្រាក់” ដែលមានអាយុគ្រប់គ្រាន់នឹងទទួលផលហើយ។
ជាមួយគ្នានេះដែរ ថ្មីៗនេះ រដ្ឋាភិបាលក៏បានកែសម្រួលពន្ធលើការនាំចេញកៅស៊ូក្នុងគោល បំណងជួយដល់កសិករ ដើម្បីជំរុញការប្រកួតប្រជែងទំនិញនៅលើទីផ្សារ៕
April 21, 2020
ពិភពលោកបាត់បង់មនុស្សឆ្នើមម្នាក់ទៀតហើយ! ស្ថាបនិក Tom & Jerry និង Popeye បានទទួលមរណៈភាពនៅអាយុ 95ឆ្នាំ
ស្ថាបនិកគំនូរជីវចលកំប្លុកកំប្លែងឆ្មារកណ្តុរ ឬ Tom & Jerry និង Poepeye លោក Gene Deitch បានទទួលមរណភាពហើយនៅវ័យ 95ឆ្នាំ នៅទីក្រុងប្រាក សាធារណរដ្ឋឆេក។
លោក Gene Deitch គឺជាម្ចាស់ពានរង្វាន់អូស្កាអាមេរិកផ្នែកគំនូរជីវចល អ្នកដឹកនាំរឿងគំនូរជីវចល និងជាអ្នកផលិតខ្សែភាពយន្តគំនូរជីវចលដ៏ល្បីល្បាញលើពិភលោក។ នៅក្នុងនោះស្នាដៃរបស់លោកជាច្រើនត្រូវបានសាធារណជនចាប់អារម្មណ៍ និងទទួលបានការគាំទ្ររាប់ទសវត្សរហូតមកដល់បច្ចុប្បន្ននេះ។
នៅឆ្នាំ 1960 ភាពយន្តរបស់លោកឈ្មោះថា “Munro” បានឈ្នះពានរង្វាន់គំនូរជីវចលល្អ និងបន្តឈ្នះពានរង្វាន់ផ្ទួនគ្នានៅឆ្នាំ 1964 លើខ្សែភាពយន្តរឿង “Here’s Nudnik” និង “How to Avoid Frienship”។
នៅក្នុងឆ្នាំ 2004 លោក Dene Deitch បានទទួលពានរង្វាន់ Winsor McCay សម្រាប់ការខិតខំប្រឹងប្រែងផលិតខ្សែភាពយន្តគំនូរជីវចលក្នុងជីវិតរបស់គាត់៕
April 21, 2020
អាថ៍កំបាំងរបស់ញើស
មិនថាដោយសារតែក្តីរំភើបញាប់ញ័រដែលបានចេញទៅដើរលេងកំសាន្តជាមួយមនុស្សដែលយើងស្រឡាញ់ ឬមកពីភាពនឿយហត់ពីការហាត់ប្រាណក្នុងក្លឹបហ្វ៊ីតនេសនោះឡើយ វាជាកិច្ចការដែលមើលទៅខុសគ្នាស្រឡះ តែក៏ធ្វើឱ្យយើងបែកញើសបានដូចគ្នាដែរ ដូច្នេះថ្ងៃនេះយើងនាំគ្នាមកស្គាល់ពីដំណក់ទឹកប្រៃៗដែលជ្រាបចេញមកពីរាងកាយយើងនោះគឺជាអ្វី និងចេញមកពីណា?
– ប្រភពរបស់ញើស
ធ្លាប់សង្កេតមើលទេថា ភាពក្តៅហប់ និងញើសច្រើនតែមកដំណាលគ្នា មិនថាតែជាពេលវេលាដែលធាតុអាកាសក្តៅហប់ ខណៈពេលដែលយើងកំពុងប្រើកម្លាំងសាច់ដុំយ៉ាងខ្លាំងក្លា ឬរំភើបញាប់ញ័ររហូតសរសៃប្រសាទត្រូវបានជំរុញខ្លាំងៗរហូតញើសជ្រាបចេញនោះទេ ការពិតទៅ គឺជាដំណោះស្រាយដែលធម្មជាតិសាងឡើងមកជួយ ដើម្បីសម្រាលភាពក្តៅ និងសាងភាពត្រជាក់ឡើងមកជំនួសវិញ និងដើម្បីជាការសម្រួលតុល្យភាពដល់រាងកាយរបស់យើង ហើយដែលកើតភាពត្រជាក់បាននោះ ក៏ព្រោះតែនៅក្នុងញើសនោះប្រកបទៅដោយទឹកជាចម្បងហ្នឹងឯង ហើយសារធាតុរ៉ែបន្ទាប់ចុះមកនោះគឺ ខ្ល័រ និងប៉ូតាស្យូម។
– ក្លិនរបស់ញើស
ចេញញើស គឺជាយន្តការមួយក្នុងចំណោមយន្តការឆ្លើយតបខាងធម្មជាតិរបស់រាងកាយ ដែលមនុស្សជាច្រើនប្រហែលជាចង់ឱ្យកើតតិចបំផុត ព្រោះក្រៅពីនឹងធ្វើឱ្យស្អឹតតតេកតតាក់ និងមិនស្រួលខ្លួនហើយនោះ ក្លិនដែលកើតឡើងក៏មិនមែនជាអ្វីដែលគួរឱ្យបេតីប៉ុន្មានឡើយ ហើយញើសរបស់អ្នកខ្លះថែមទាំងមានក្លិនខ្លាំងជាពិសេសទៀតផង ប្រភេទដែលធ្វើឱ្យអ្នកនៅជុំវិញខ្លួនដែលមិនធ្លាប់នឹងក្លិននោះ ត្រូវប្រញាប់លើកដៃខ្ទប់ច្រមុះ ហើយដើរចេញភ្លាមតែម្តង។ ការពិតទៅ ញើសរបស់មនុស្សយើងនេះគ្មានក្លិនទេ តែនៅពេលវាលាយគ្នាជាមួយនឹងមេរោគបាក់តេរីដែលមាននៅលើស្បែក និងរោម រួមទាំងអាស៊ីតខ្លាញ់ពីអាហារដែលយើងញ៉ាំចូលទៅផងនោះ ទើបធ្វើឱ្យកើតក្លិនមិនល្អឡើងបាន។
ក្រពេញញើសរបស់យើងមានពីរប្រភេទ បើជាញើសដែលចេញពាសពេញរាងកាយ ជាពិសេសម្តុំថ្ងាស បាតដៃ និងបាតជើងនោះ នឹងចេញមកពីក្រពេញដែលហៅថា Eccrine ដែលចាប់ផ្តើមផលិតញើសតាំងពីយើងនៅជាទារកទើបនឹងកើតម្ល៉េះ ទើបមិនសូវជាមានក្លិនខ្លាំងក្លាដូចញើសដែលចេញមកពីក្រពេញ Aprocrine ដែលស្ថិតនៅត្រង់ម្តុំក្លៀក និងគល់ភ្លៅជិតទ្វាធំ និងអវយវៈភេទឡើយ ដែលក្រពេញនេះនឹងចាប់ផ្តើមធ្វើការនៅពេលឈានចូលវ័យបន្តពូជ ហើយបើសិននាំគ្នាពិនិត្យមើលយ៉ាងដិតដល់វិញនោះ នឹងបានឃើញថា មានទាំងអាស៊ីតខ្លាញ់ និងប្រូតេអុីនលាយឡំជាមួយ ធ្វើឱ្យញើសដែលចេញមកមានពណ៌រាងលឿងល្អក់បន្តិច និងច្រើនតែឃើញមានជាស្នាមប្រឡាក់នៅលើខោអាវបានយ៉ាងងាយ ទើបនេះឯងជាដែលជាមូលហេតុថា តើហេតុអីបានបណ្តាផលិតផលបំបាត់ញើស និងក្លិនខ្លួនផ្សេងៗនោះនាំគ្នាតម្រង់មុខសញ្ញាទៅរកការកំចាត់ក្លិននៅម្តុំក្លៀកជាពិសេសនោះ។
ញើសដែលខុសប្រក្រតី
អ្នកខ្លះមានញើសចេញមកច្រើនជ្រុលពេករហូតដល់គួរឱ្យរំខាន និងធ្វើឱ្យសាម៉ីខ្លួនកើតក្តីអៀនខ្មាស់ជាញឹកញាប់ ជាពិសេសញើសនៅតាមបាតដៃ និងក្លៀកដែលសើមជោកជារង្វង់ មូលហេតុនោះខាងវេជ្ជសាស្រ្តខ្លួនឯងក៏នៅមិនទាន់អាចបញ្ជាក់បានច្បាស់លាស់ដែរ តែអាចមូលហេតុកើតឡើងដូចតទៅនេះ និងអាចព្យាបាលបានដោយការញ៉ាំថ្នាំ និងការវះកាត់។
– ភាពមិនតុល្យការរបស់អ័រម៉ូន ដូចជា អាការមេណូផូស ( Menopause )ក្នុងអំឡុងវ័យអស់រដូវ។
– ក្រពេញថៃរ៉យដ៍ធ្វើការខុសប្រក្រតីដែលធ្វើឱ្យរាងកាយផលិតកម្តៅបានខ្ពស់។
– ថ្នាំដែលកំពុងប្រើប្រាស់ប្រភេទខ្លះ។
– អាហារ ដូចជា កាហ្វេដែលមានជាតិកាហ្វេអ៊ីនខ្ពស់។
– ប្រព័ន្ធប្រសាទធ្វើការខ្លាំងជ្រុលពេក។
FUN FACTS ABOUT SWEAT ដឹងទេថា…
– មនុស្សយើងមានក្រពេញញើសពាសពេញក្នុងរាងកាយ ក្នុងម្នាក់ៗប្រមាណជា 2,6 លានក្រពេញ។
– ញើសដែលជ្រាបចេញមកនៅត្រង់បាតដៃ និងក្លៀកនោះ មិនដូចគ្នាទេ ហើយឱ្យក្លិនខុសប្លែកពីគ្នាទៀតផង។
– បើសង្កេតឱ្យដិតដល់ ការពិតទៅយើងមានញើសចេញមកគ្រប់ពេលវេលា។
– បើធាតុអាកាសក្តៅខ្លាំង មនុស្សយើងអាចបាត់បង់ញើសក្នុងមួយម៉ោងដល់ទៅ 1 លិត្រឯណោះ។
– ញើសមានរសជាតិប្រៃ ដោយសារតែមានសារធាតុរ៉ែសំខាន់គឺ សូដ្យូម និងប៉ូតាស្យូម។
– បើញើសចេញមកច្រើនហើយមិនប្រញាប់ញ៉ាំទឹកចូលទៅបន្ថែមវិញទេ អាចនឹងធ្វើឱ្យកើតខ្យល់គ កើតបញ្ហាក្នុងប្រព័ន្ធហូរវឹល ឬអាចគាំងក្រលៀនបាន។
– ម៉ាស៊ីនចាប់កំហុស អាចវាស់ដឹងបានពីភាពប្រែប្រួលរបស់ចរន្តអគិ្គសនីដែលស្ថិតនៅលើស្បែក និងញើសដែលចេញមកនៅពេលយើងភ័យខ្លាច ឬញាប់ញ័រ៕
April 21, 2020
ឆ្លើយតបនឹងចំណុចសង្ស័យ 7 រឿងដែលអ្នកម្តាយមានគភ៌ចង់ដឹងបំផុត
អ្នកម្តាយដែលទើបតែមានគភ៌ថ្មោងថ្មីដែលកើតមានក្តីសង្ស័យ និងមិនប្រាកដក្នុងចិត្តថា តើក្នុងអំឡុងពេលមានគភ៌នោះ ត្រូវ
មើលថែទាំអ្វីខ្លះទៀត បន្ទាប់ពីជ្រើសរើសមុខម្ហូបត្រូវតាមភោជនាការរបស់ស្ត្រីមានគភ៌ហើយ ហាត់ប្រាណយ៉ាងត្រឹមត្រូវ និងសម្រាក
យ៉ាងគ្រប់គ្រាន់ហើយ តើនៅមានរឿងអ្វីដែលគួរធ្វើបន្ថែមទៀតឬទេ? និងតើមានរឿងអ្វីខ្លះដែលគួរចៀសវាង? កិច្ចការងារពីមុនដែល
ធ្លាប់ធ្វើ តើអាចធ្វើបានទៀតឬទេ? ឬហុចផលអាក្រក់ប៉ុនណា?។ ចំណុចសង្ស័យទាំងនេះសុទ្ធតែជារឿងដែលអ្នកម្តាយមានគភ៌នៅសង្ស័យច្រើនគ្នាណាស់ ដូច្នេះយើងនាំគ្នាមកបកស្រាយចំណុចសង្ស័យទាំងនេះទាំងអស់គ្នា។
1 – ទម្ងន់ខ្លួនដែលស័ក្តិសមសម្រាប់អ្នកម្តាយមានគភ៌
បើអ្នកម្តាយមានគភ៌ទទួលទានអាហារតាមការណែនាំហើយ (ប្រូតេអុីន វិតាមីន សារធាតុរ៉ែ អុីយ៉ូដ កាល់ស្យូម ហ្វូលេត សារធាតុដែក) នោះ ទម្ងន់ខ្លួននឹងកើនឡើងប្រមាណជា 12 – 15 គីឡូក្រាម ជាមធ្យមកើនមួយខែ 2 គីឡូក្រាម តែក្នុងត្រីមាសដំបូង
ទម្ងន់អាចថយចុះបាន ដោយសារតែអាការចាញ់កូនដែលក្អួតចង្អោរញឹកញាប់ ឬមិនអាចញ៉ាំអាហារបានច្រើន។ ក្នុងត្រីមាសទី 2 ជា
អំឡុងពេលអស់អាការចាញ់កូនហើយ អ្នកម្តាយអាចហាត់ប្រាណបានយ៉ាងត្រឹមត្រូវ ដើម្បីគ្រប់គ្រងកុំឱ្យទម្ងន់កើនឡើងលឿនជ្រុលពេក ចំណែកត្រីមាសចុងក្រោយ ត្រូវប្រយ័ត្នប្រយែងបន្តិច ព្រោះឱកាសប្រសូតមុនកំណត់មានខ្ពស់ណាស់បើសិនបញ្ចេញកម្លាំងធ្វើអ្វីមួយខ្លាំងជ្រុលពេក ក្នុងត្រីមាសនេះ ទម្ងន់ខ្លួនអ្នកម្តាយនឹងកើនឡើងខ្ពស់បំផុត។
2 – បើចាក់វ៉ាក់សាំងការពារជំងឺផ្សេងៗ ក្នុងអំឡុងមានគភ៌ត្រីមាសដំបូងព្រោះតែមិនដឹង តើនឹងមានគ្រោះថ្នាក់ទេ?
បើវ៉ាក់សាំងដែលចាក់នោះជាវ៉ាក់សាំងការពារតេតាណូស គ្រុនផ្តាសាយធំ ឬកញ្រ្ជឹល មិនជាគ្រោះថ្នាក់ដល់ទារកក្នុងផ្ទៃទេ
និងជាការសាងប្រព័ន្ធការពារជំងឺឱ្យខ្លួនទារកទៀតផង។ ពេញមួយរយៈពេល 9 ខែ អ្នកម្តាយអាចត្រូវចូលទៅទទួលការចាក់វ៉ាក់សាំង
ការពារជំងឺយ៉ាងត្រឹមត្រូវ ដើម្បីទារកចម្រើនធំធាត់រឹងប៉ឹង និងពេញលេញ ប្រាសចាកជំងឺដង្កាត់។
3 – វីតាមីនបន្ថែម ចាំបាច់ដែរឬទេ?
សារធាតុអាហារដែលអ្នកម្តាយគួរទទួលទានបន្ថែមនោះគឺ សារធាតុដែក ដែលជួយគាំទ្រការធ្វើការងាររបស់ហ៊ីម៉ូគ្លោប៊ីនក្នុង
គ្រាប់ឈាមក្រហមដែលជាអ្នកនាំអុកស៊ីហ្ស៊ែនឆ្ពោះទៅទារកដែលនៅក្នុងផ្ទៃ បើអ្នកម្តាយបានទទួលសារធាតុដែកមិនគ្រប់គ្រាន់ នឹង
ធ្វើឱ្យកើត សភាវលោហិតស្លេក ហុចផលឱ្យអ្នកម្តាយកើតអាការនឿយល្វើយ ហត់ និងដកដង្ហើមមិនស្រួល។ ទាំងអស់នេះ ការទទួលទានសារធាតុដែកគួរស្ថិតក្នុងបរិមាណដែលសមល្មមតាមដែលរាងកាយត្រូវការ ចំណែកវិតាមីន និងសារធាតុអាហារផ្សេងទៀត
បើទទួលទានអាហារគ្រប់ 5 ប្រភេទក្រុមតាមពាក្យណែនាំរបស់គ្រូពេទ្យហើយនោះ មិនចាំបាចទទួលទានវីតាមីនបន្ថែមក៏បានដែរ តែ
គួរញ៉ាំទឹកដោះគោជាប្រចាំដើម្បីបង្កើនភាពរឹងមាំរបស់ឆ្អឹងទារកនៅក្នុងផ្ទៃ មិនគួរទទួលទានថ្នាំសារធាតុដែកលាយគ្នាជាមួយទឹកដោះ
គោឡើយ ព្រោះវាធ្វើឱ្យមានគុណវិបត្តិច្រើនជាងគុណសម្បត្តិ។
4 – ស្វាមីទ្រាំមិនបាន សុំមានភេទសម្ព័ន្ធក្នុងអំឡុងពេលមានគភ៌
ការមានភេទសម្ព័ន្ធមិនមែនជារឿងគ្រោះថ្នាក់ដល់ទារកក្នុងផ្ទៃទេ លើកលែងតែខាងប្រុសមានជំងឺកាមរោគ។ ក្នុងអំឡុងត្រីមាសទី 3 សូមឱ្យលោកឪពុកអត់ទ្រាំបន្តិច ព្រោះជាដំណាក់កាលសំខាន់ណាស់ គភ៌របស់អ្នកម្តាយមិនគួរទទួលរងកម្លាំងញ័ររញ្ជួយអ្វី
ទាំងអស់ ដើម្បីការពារការប្រសូតមុនកំណត់ និងអាចធ្វើឱ្យទារកមិនរឹងប៉ឹងបាន។ បើត្រីមាសទី 1 និង 2 អ្នកម្តាយគួរសង្កេតមើលផងថា តើមានអាការខុសប្រក្រតីឬទេ ដូចជា ឈឺពោះមុនពេលកំណត់ និងមានឈាមធ្លាក់ចេញពីមាត់ស្បូន ជាដើម បើមានអាការទាំង
នេះ គួរបញ្ឈប់ការមានភេទសម្ព័ន្ធ និងទៅជួបគ្រូពេទ្យភ្លាម។
5 – ទឹកដោះដែលគួរញ៉ាំ
ក្នុងអំឡុងពេលមានគភ៌អ្នកម្តាយអាចញ៉ាំទឹកដោះបានគ្រប់ប្រភេទ ទាំងទឹកដោះគោ ទឹកដោះពពែ ឬទឹកសណ្តែកលឿង
(មិនចាំបាច់តែទឹកដោះសម្រាប់ស្រ្តីមានគភ៌ក៏បានដែរ) និងគួរញ៉ាំឱ្យបានទ្វេរដង ព្រោះរាងកាយរបស់អ្នកម្តាយត្រូវការកាល់ស្យូម និងកូនតូចក៏ត្រូវការកាល់ស្យូមដែរ ព្រោះកាល់ស្យូមនេះនៅបានជួយការពារសភាវលើសឈាមបានទៀតផង។
6 – មុនប្រើថ្នាំក្នុងអំឡុងពេលមានគភ៌
ប្រឹក្សាជាមួយគ្រូពេទ្យសម្ភពគឺជាវិធីដែលល្អបំផុត ព្រោះថ្នាំប្រភេទខ្លះមានគ្រោះថ្នាក់ដល់ទារក ដូចជាអ្មកម្តាយមានគភ៌ដែលរក្សាសម្ផស្សត្រូវការញ៉ាំថ្នាំព្យាបាលមុន ដែលថ្នាំព្យាបាលមុនខ្លះជាប្រភេទលាប និងខ្លះទៀតជាប្រភេទលេបដែលអាចចាត់ទុកថាជា
ប្រភេទថ្នាំគ្រោះថ្នាក់ដែលមានផលទៅដល់ទារកនៅក្នុងគភ៌ អាចធ្វើឱ្យកើតភាពពិការបាន ដូច្នេះមុននឹងប្រើថ្នាំគួរប្រឹក្សាជាមួយគ្រូពេទ្យ និងត្រូវប្រាប់គ្រប់ពេលថាខ្លួនឯងមានគភ៌ ដើម្បីបានទទួលការផ្តល់ថ្នាំដែលត្រឹមត្រូវ។
7 – មានដុំសាច់ដុះក្នុងអំឡុងពេលមានគភ៌
ភាពគ្រោះថ្នាក់អាស្រ័យលើទីតាំង និងលក្ខណៈរបស់សាច់ដុះនោះ នៅពេលអ្នកម្តាយស្ទាបប៉ះ គួរទៅប្រឹក្សាជាមួយគ្រូពេទ្យជំនាញដើម្បីប៉ាន់ប្រមាណពីដុំសាច់ដុះនោះ និងធ្វើការព្យាបាលជាបន្ត។ យ៉ាងណាក៏ដោយ ការត្រៀមខ្លួនជាស្រេចមុនពេលមានគភ៌គឺជារឿងចាំបាច់ ដូចជា ពិនិត្យរកមើលសាច់ដុះ និងធ្វើការព្យាបាលឱ្យជាសះស្បើយមុនការមានគភ៌ ដែលវាជួយកាត់បន្ថយសភាវគភ៌ប្រថុយប្រថានបាន។
ការមើលថែទាំគភ៌យ៉ាងត្រឹមត្រូវតាមគោលភោជនាហារ និងពាក្យណែនាំរបស់ពេទ្យ ទារកនឹងធំធាត់ឡើងយ៉ាងឥតខ្ចោះ និងរឹងប៉ឹង នៅពេលគេធំឡើងលោកឪពុកអ្នកម្តាយនឹងមានមោទនភាពដែលបានមើលថែទាំគភ៌យ៉ាងល្អ។ បើអ្នកម្តាយមានចំណុចសង្ស័យអ្វីផ្សេងក្រៅពីនេះ ការប្រឹក្សាជាមួយពេទ្យសម្ភព នឹងទទួលបានការណែនាំយ៉ាងត្រឹមត្រូវ ព្រោះរាងកាយអ្នកម្តាយម្នាក់ៗមិនដូចគ្នាទេ ដូច្នេះហើយការទៅប្រឹក្សាជាមួយគ្រូពេទ្យជំនាញពេញមួយរយៈពេល 9 ខែនោះនឹងយល់បានច្បាស់ល្អជាង៕
April 21, 2020
Guangzhou Evergrande ប្រកាសគម្រោងសាងសង់កីឡដ្ឋានផ្ទុកបាន 10ម៉ឺននាក់
ក្លិប Guangzhou Evergrande ជើងឯកលីកកំពូលរបស់ចិនឆ្នាំ2019 បានប្រកាសបើកការដ្ឋានសាងសង់កីឡដ្ឋានថ្មីរបស់ខ្លួនហើយ ដែលមានរូបរាងគួរឱ្យទាក់ទាញយ៉ាងខ្លាំង។
កីឡដ្ឋាននេះអាចផ្ទុកអ្នកទស្សនាបាន 10ម៉ឺននាក់មានទីតាំងនៅតាមបណ្ដោយផ្លូវរថភ្លើងសង្កាត់ Pahyu ក្នុងក្រុង Guangzhou។ ប្រភពរបស់ក្លិបមួយនេះបានបន្តទៀតថា កីឡដ្ឋាននេះនឹងក្លាយជាទីតាំងលេងបាល់ទាត់មួយធំជាងគេបំផុតក្នុងពិភពលោក បន្ទាប់ពីសាងសង់រួចជាស្ថាពរនៅឆ្នាំ2022។
គួររំឭកផងដែរថា ក្លិបបាល់ទាត់នេះ គឺជាក្លិបរបស់មហាសេដ្ឋីចិនម្នាក់ ដែលមានភាគហ៊ុន 50% របស់ក្រុមហ៊ុន Evergrande, 40% របស់ Alibaba និង 10% ទៀតរបស់ក្រុមហ៊ុនផ្សេងៗទៀត៕

April 21, 2020
ចាប់ពីពេលនេះទៅសិស្សអាចសិក្សាពីចម្ងាយតាមរយៈទូរទស្សន៍នៅគ្រប់កន្លែងក្នុងប្រទេសកម្ពុជា
ក្រសួងអប់រំ យុវជន និងកីឡា សហការជាមួយនឹងក្រសួងព័ត៌មានផលិត និងផ្សព្វផ្សាយកម្មវិធី «ការសិក្សាពីចម្ងាយ» និង «ការសិក្សាតាមប្រព័ន្ធអេឡិចត្រូនិក» ដើម្បីអនុញ្ញាតឱ្យសិស្សានុសិស្សនៅទូទាំងប្រទេសអាចសិក្សាបាននៅគ្រប់ទីកន្លែង។
កម្មវិធីសិក្សាដែលក្រសួងទាំងពីរបានផលិតឡើងគឺមានចាប់ពីថ្នាក់កុមារតូចរហូតដល់ថ្នាក់ទី12 ដោយចាប់ផ្តើមចាក់ផ្សាយ 24ម៉ោង ក្នុងមួយថ្ងៃ និងជារៀងរាល់ថ្ងៃ ដែលម៉ោងផ្សាយគឺចាប់ផ្តើមពីម៉ោង 8:00នាទីព្រឹកទៅ ដល់ម៉ោង 24:00នាទីយប់ និងចាក់ផ្សាយឡើងវិញចាប់ពីម៉ោង 24:00នាទីយប់ រហូតដល់ម៉ោង 8:00នាទីព្រឹកតាមកាលវិភាគនានា។ សម្រាប់សិស្សានុសិស្សថ្នាក់ទី9 និងថ្នាក់ទី12 ដែលជាឆ្នាំប្រឡងអាចទស្សនាវីដេអូនៃការបង្រៀនបានរយៈពេល 3ម៉ោងក្នុងមួយថ្ងៃ។
សម្រាប់ប៉ុស្តិ៍ទូរទស្សន៍ដែលសិស្សានុសិស្សអាចទស្សនាបានមានដូចជា៖
- ទូរទស្សន៍ជាតិកម្ពុជាទី2 ទទក២ ឬ TVK2 ដែលជាប៉ុស្តិ៍ទូរទស្សន៍ទើបតែបង្កើតថ្មីសម្រាប់បម្រើដល់ការចាក់ផ្សាយស្តីពីការអប់រំ
- ទូរទស្សន៍ផ្កាយរណបតេជោឌីធីវី Decho DTV ប៉ុស្តិ៍លេខ22
- ទូរទស្សន៍ខ្សែកាបនៅទូទាំង25រាជធានីខេត្តដែលមានចំនួន 55ប៉ុស្តិ៍ថ្មី ដែលផ្សាយបន្តពីទូរទស្សន៍ជាតិកម្ពុជា ទទក២ ឬ TVK2៕
April 20, 2020
សូមអបអរសាទរអ្នកឈ្នះទាំង 10 រូបពីកម្មវិធី “មហាប្រូម៉ូសិនឆ្នាំថ្មីប្រពៃណីជាតិពី សាមសុង” ក្នុងសប្តាហ៍ចុងក្រោយ !!! ជាវស្មាតហ្វូនដែលទំនើបទាន់សម័យ និងលេចធ្លោបំផុតមធ្យម…ងំគឺឈ្នះមហារង្វាន់ពិសេសតែម្តង!!
(ភ្នំពេញ) ថ្ងៃទី ២០ ខែមេសា ឆ្នាំ២០២០៖
កម្មវិធី“មហាប្រូម៉ូសិនឆ្នាំថ្មីប្រពៃណីជាតិពី សាមសុង” បានឈានចូលមកដល់សប្ដាហ៍ចុងក្រោយ ដោយបានរកឃើញអ្នកឈ្នះរង្វាន់ធំ ម៉ូតូ Honda ZoomerX 2020 ឈ្មោះគួន គួយ មកពីខេត្តកណ្តាល និងរង្វាន់ជាច្រើនសរុប10 រង្វាន់។
សូមចូលរួមអបអរសាទរដល់អ្នកឈ្នះរង្វាន់ទាំងអស់សរុប 40នាក់ ក្នុងរយៈពេល 4 សប្ដាហ៍ និងសូមថ្លែងអំណរគុណដល់អតិថិជន សាមសុង ទាំងអស់ដែលបានចូលរួមចាប់ឆ្នោតផ្សងសំណាងទូទាំងប្រទេសផងដែរ។
កម្មវិធីនេះទទួលបានការគាំទ្រកាន់តែច្រើនឡើងៗពីមួយសប្ដាហ៍ទៅមួយសប្ដាហ៍ និងធ្វើឲ្យកម្រិតនៃការលក់របស់ Samsung Galaxy A10s, A20s និង A30s ហក់ឡើងខ្ពស់ ធ្វើឲ្យកក្រើកទីផ្សារស្មាតហ្វូននៅកម្ពុជា។
លោកគួន គួយ មកពីខេត្តកណ្តាល ដែលបានឈ្នះរង្វាន់ធំបានថ្លែងទាំងរំភើបថា “ដំបូងចង់ស្ទាក់ស្ទើរព្រោះជាសប្តាហ៍ចុងក្រោយ ប៊ិះអត់ដាក់…តែគិតឡើងវិញ ក៏សាកដាក់ចូលរួម…ហើយក៏បានឈ្នះតែម្ដង…សប្បាយមែនទែន ព្រោះបានរង្វាន់ធំហើយពីមុនមកមិនដែលបានឈ្នះអីចឹងទេ…វាជារង្វាន់ពិតៗមែន”
ក្នុងឱកាសប្រគល់រង្វាន់ដល់អតិថិជន ១០នាក់ ចុងក្រោយ លោក Warren Chew ប្រធានផ្នែកលក់ទូរស័ព្ទដៃរបស់ក្រុមហ៊ុនសាមសុងប្រចាំកម្ពុជា បានមានប្រសាសន៍ថា “ក្រៅពីផ្តល់ជូននូវអ្វីដែលលើសពីភាពអស្ចារ្យតាមរយៈផលិតផលស្មាតហ្វូន ក្រុមហ៊ុន សាមសុង ក៏តែងតែបំពេញតាមសេចក្តីត្រូវការរបស់អតិថិជនគ្រប់លំដាប់ថ្នាក់ជាមួយនឹងជម្រើសនៃពិភពស្មាតហ្វូនដ៏ច្រើនសម្បូរបែប! ដូច្នេះទាំងអាជីវករ និងអតិថិជនរបស់យើងទាំងអស់សុទ្ធតែទទួលបាននូវអត្ថប្រយោជន៍យ៉ាងច្រើនជាមួយនឹងកម្មវិធីពិសេសៗដែលមានជាបន្តបន្ទាប់ផងដែរ! ឆ្លៀតក្នុងឱកាសដ៏រំភើបរីករាយនេះខ្ញុំបាទសូមថ្លែងអំណរគុណយ៉ាងជ្រាលជ្រៅដល់អតិថិជនទាំងអស់ដែលបានគាំទ្រ និងជឿទុកចិត្តបំផុតលើគ្រប់ផលិតផលរបស់ក្រុមហ៊ុន សាមសុង! ជាពិសេសអតិថិជនដែលបានជាវស្មាតហ្វូន សាមសុង Galaxy A10s, A20s និង A30s ដើម្បីមានឱកាសឈ្នះនូវរង្វាន់ដ៏ច្រើនសន្ធឹកសន្ធាប់នៅក្នុងសប្តាហ៍ទី 4 នេះតែម្តង! ជាថ្មីម្តងទៀតសូមឱ្យអតិថិជនទាំងអស់បន្តគាំទ្រគ្រប់ផលិតផល សាមសុង បន្ថែមទៀតដើម្បីមានឱកាសទទួលបាន ស្មាតហ្វូនដែលល្អ ទំនើបទាន់សម័យបំផុតក៏ដូចជាឱកាសឈ្នះនូវមហារង្វាន់អស្ចារ្យពីកម្មវិធីមហាប្រូម៉ូសិនពិសេសៗពីក្រុមហ៊ុន សាមសុង បន្តបន្ទាប់ទៀត”!
*ខាងក្រោមនេះគឺជាឈ្មោះអតិថិជនដែលបានឈ្នះក្នុងសប្តាហ៍ទី4៖
កុំភ្លេចចុច like page Samsung ដើម្បីទទួលបានព័ត៌មានថ្មីៗបន្ថែមទៀត! សម្រាប់ព័ត៌មានលម្អិតសូមអញ្ជើញមកទស្សនាដោយផ្ទាល់តាមបណ្តាហាងទំនើប សាមសុង និងដេប៉ូចែកចាយផលិតផល សាមសុង ដែលនៅជិតលោកអ្នកបំផុត ឬទំនាក់ទំនងទៅកាន់ផ្នែកសេវាបម្រើអតិថិជនតាមរយៈទូរស័ព្ទលេខ៖ 1800-20 32 32 !

April 20, 2020
មិត្តរួមក្រុម Ronaldo 2រូប ជាសះស្បើយពី Covid-19 ហើយ
កីឡាករ 2រូប របស់ក្លិប Juventus នៃក្របខ័ណ្ឌលីកកំពូលអ៊ីតាលី Italy Seria A បានជាសះស្បើយពីជំងឺកូវីដ-19 ហើយ នេះបើតាមការចុះផ្សាយនៅក្នុងគេហទំព័រផ្លូវការរបស់ក្លិបបាល់ទាត់មួយនេះ។
ការប្រកាសនេះ គឺធ្វើឡើងក្រោយពីកីឡាករ Daniele Rugani បានជាសះស្បើយពីជំងឺកូវីដ-19 នេះ កាលពីម្សិលមិញ។ ខណៈកីឡាករម្នាក់ទៀតគឺ Blaise Matuidi ក៏បានជាសះស្បើយប្រមាណជា 1សប្តាហ៍មកហើយដែរ។
គួររំឭកដែរថា បន្ទាប់ពីប្រកាសជាសះស្បើយបែបនេះហើយ កីឡាករទាំង 2រូបនេះ នឹងមិនត្រូវបានដាក់ឱ្យនៅដាច់ដោយឡែក នៅក្នុងផ្ទះរបស់ពួកគេទៀតឡើយ៕

April 20, 2020