ក្នុងពិភពបាល់ទាត់ ចៀសមិនផុតឡើយពីការលើសលស់លើគ្នាបន្តិចបន្តួច ដែលពេលខ្លះក៏ប៉ះគ្នាខ្លាំងៗ ឈានទៅដល់ការទទួលបានកាតលឿង និងក្រហមក៏មាន។
កីឡាករខ្សែបម្រើការពារ សញ្ជាតិកូឡុំប៊ី Gerardo Bedoya ត្រូវបានចារិកឈ្មោះក្នុងប្រវត្តិសាស្រ្តក្នុងនាមជាកីឡាករ ដែលបង្កកំហុសច្រើនជាងគេបង្អស់ នៅក្នុងការលេងបាល់ទាត់អាជីព ដោយទទួលបានកាតក្រហមដល់ទៅ 46លើក។
ចំពោះកីឡាករដែលឈរនៅលំដាប់លេខ2 ដែលទទួលបានកាតក្រហមច្រើនជាងគេនោះគឺ ខ្សែការពារបារាំង Cyril Rool ដែលទទួលបានកាតក្រហមចំនួន 27លើកក្នុងអាជីព៕
នៅពេលកូនតូចចូលដល់វ័យត្រូវញ៉ាំអាហារបន្ថែម លោកឪពុកអ្នកម្តាយត្រូវយកចិត្តទុកដាក់ជាពិសេសបន្តិច ថ្ងៃនេះ ឡារ៉ែនមានចំណេះដឹងល្អៗក្នុងរឿងការត្រៀមជាស្រេចរឿងអាហារបន្ថែមដែលល្អសម្រាប់កូនតូចមកជម្រាបជូនដូចតទៅ។
ចំណេះដឹងរឿងអាហារបន្ថែម
ដំបូងគេបង្អស់លោកឪពុកអ្នកម្តាយគួរសិក្សាពីព័ត៌មានការឱ្យអាហារបន្ថែមសម្រាប់កូន ដូចខាងក្រោម ៈ
– អាហារប្រភេទណាស័ក្តិសមក្នុងការនាំមកបញ្ចុកធ្វើជាអាហារបន្ថែមឱ្យកូនក្នុងរយៈដំបូង និងអំឡុងខែបន្តបន្ទាប់មកទៀត នៅពេលកូនមានវិវឌ្ឍនាការល្អឡើងហើយ។
– លក្ខណៈរបស់សាច់អាហារ ភាពទន់ ស្អិត ខាប់ រាវ ល្អិត មិនសូវម៉ត់ -ល- បែបណាទើបស័ក្តិសមជាមួយកូនតូចក្នុងអំឡុងខែនីមួយៗដែលកើនឡើង។
– អាហារដែលមានភាពប្រថុយប្រថានក្នុងការកើតប្រតិកម្មចាញ់លើក្មេងតូចប្រភេទណាខ្លះដែលគួរចៀសវាង។
– បរិមាណអាហារបន្ថែមដែលស័ក្តិសមជាមួយកូនក្នុងមួយពេលៗ។
– ដំណាក់កាលក្នុងការត្រៀម ការធ្វើ ការរក្សាទុកអាហារបន្ថែមរបស់កូន រួមទាំងចំណែកផ្សំដែលគួរ និងមិនគួរនាំយកមកលាយផ្សំក្នុងអាហារបន្ថែមរបស់កូន។
– ករណីដែលទិញអាហារបន្ថែមកញ្ចប់ ឬកំប៉ុង លោកឪពុកអ្នកម្តាយគួរសិក្សាពីវិធីការជ្រើសរើសទិញ វិធីការអានការណែនាំ ដើម្បីប្រយោជន៍ដែលល្អដល់កូនរបស់យើងខ្លួនឯង។
ចំណេះដឹងរឿងភាពត្រៀមខ្លួនរួចហើយរបស់កូនតូច
ក្មេងម្នាក់ៗមានវិវឌ្ឍនាការក្នុងការញ៉ាំយឺតលឿនមិនដូចគ្នាទេ បើក្នុងរយៈដំបូងៗកូននៅបដិសេធក្នុងការញ៉ាំអាហារបន្ថែមនោះ ឪពុកម្តាយក៏កុំអាលទៅកង្វល់អ្វីច្រើនពេក គ្រាន់តែធ្វើចិត្តត្រជាក់ និងខំទ្រាំបញ្ចុកតទៅទៀត ថ្ងៃនេះនៅមិនទាន់ញ៉ាំ ឬញ៉ាំត្រឹមតែ 1 – 2 ម៉ាត់ ក៏មិនអីដែរ ស្អែកនេះសឹមចាប់ផ្តើមម្តងទៀត ព្រោះអាហារជាអ្វីដែលក្មេងត្រូវការ និងចាំបាច់យ៉ាងខ្លាំងសម្រាប់គេក្នុងអំឡុងវ័យនេះគឺ ទឹកដោះ។
ចំណេះដឹងរឿងភាពស្អាត និងមានអនាម័យ
ជាដំណាក់កាលដែលសំខាន់បំផុតព្រោះក្នុងការបញ្ចុកឪពុកម្តាយគួរប្រយ័ត្នប្រយែងទង្វើខាងក្រោមនេះ ព្រោះអាចនាំមេរោគចូលទៅក្នុងរាងកាយកូនបាន។
– ការផ្លុំដោយមាត់ដើម្បីឱ្យត្រជាក់គួរប្រយ័ត្នការខ្ទាតទឹកមាត់ផង។
– ការបៀមអាហារឱ្យកូនដើម្បីឱ្យត្រជាក់។
– ការទំពារ ឬប្រើធ្មេញខាំជាចំណឹតតូចៗមុននឹងបញ្ចុកកូន។
– ការប្រើដៃ ឬវត្ថុផ្សេងៗចាប់អាហារបញ្ចុកចូលមាត់កូនដោយមិនបានលាងសម្ងាតឱ្យបានស្អាតជាមុន៕
មនុស្សជាច្រើនអាចនឹងរៀបផែនការឱ្យឆ្នាំថ្មីខាងមុខនេះ ក្លាយជាឆ្នាំនៃការចាប់ផ្តើមនូវរឿងថ្មីៗចំពោះខ្លួនឯង ឬតាំងគោលបំណងដើម្បីធ្វើរឿងល្អៗចំពោះខ្លួនឯង បើលោកអ្នកគិតចង់ក្រោកឡើងមកផ្លាស់ប្តូរខ្លួនឯងជាថ្មីដើម្បីចាប់ផ្តើមឆ្នាំថ្មីបែបមានភាពរស់រវើកនោះ ក្រៅពីសាងភាពសប្បាយរីករាយឱ្យខ្លួនឯងហើយ នៅបានធ្វើឱ្យអ្នកនៅជុំវិញខ្លួនយើងសប្បាយរីករាយជាមួយដែរទៀតផង។ ខាងក្រោមនេះជាគន្លឹះល្អៗក្នុងការធ្វើឱ្យមានសុខភាពល្អ ដែលយើងអាចធ្វើបានដោយខ្លួនឯងដើម្បីជីវិតកាន់តែប្រសើរឡើង។
1 – ដកដង្ហើមវែងៗដើម្បីសុខភាពល្អ
សាកល្បងសង្កេតមើលខ្លួនឯងថា តើលក្ខណៈការដកដង្ហើមរបស់លោកអ្នកយ៉ាងម៉េចដែរ ដកដង្ហើមខ្លីៗញាប់ៗ ដកដង្ហើមវែងៗ ឬយឺតៗ? ការហ្វឹកហាត់ខ្យល់ដង្ហើមឱ្យវែងៗចូលចេញយ៉ាងយឺតៗ មិនត្រឹមតែនឹងជួយឱ្យលោកអ្នកមានអារម្មណ៍ស្រស់ស្រាយស្វាហាប់ ព្រោះរាងកាយបានទទួលអុកស៊ីហ្ស៊ែនយ៉ាងពេញទំហឹងប៉ុណ្ណោះទេ ថែមទាំងជួយកំចាត់ជាតិពុលចេញពីរាងកាយបានទៀតផង ហើយនៅជួយកាត់បន្ថយអាការមួម៉ៅ ឆាប់ខឹងបានទៀតផង។ សាកល្បងហ្វឹកហាត់ខ្យល់ដង្ហើម 5 – 10 នាទីក្នុងមួយថ្ងៃសឹនក៏បាន ធ្វើក្នុងមួយថ្ងៃម្តង ធានាថាលោកអ្នកនឹងមានអារម្មណ៍សប្បាយទាំងកាយ និងចិត្តច្រើនឡើងមិនខាន។
2 – ចាប់ផ្តើមថាមពលជីវិតដោយ បន្លែផ្លែឈើ អ័រហ្កានិក
ការជ្រើសរើសញ៉ាំបន្លែផ្លែឈើអ័រហ្កានិក ឬគ្មានសារធាតុពុលឱ្យបានយ៉ាងតិច 5 ពេលក្នុង 1 សប្តាហ៍ លោកអ្នកនឹងប្រាកដក្នុងចិត្តបានតែម្តងថា រាងកាយបានទទួលសារជាតិអាហារដែលបរិសុទ្ធកាន់តែច្រើនឡើង រាងកាយក៏នឹងបានទទួលវីតាមីន និងសារធាតុរ៉ែច្រើនឡើង ភាពប្រថុយប្រថានក្នុងការកើតរោគក៏ថយចុះទៅតាមនោះដែរ។
3 – បែងពេលវេលាឱ្យខ្លួនឯង
នារីៗទាំងឡាយគួរបែងចែកពេលវេលាដើម្បីសាងសេចក្តីសុខដល់ខ្លួនឯងខ្លះផង ដែលវិធីការអង្គុយតាំងសមាធិ ឬនៅស្ងៀមៗប្រមាណជា 15 – 20 នាទីគឺជាវិធីមួយទៀតដែលអាចសាកអាគុយថាមពលជីវិត និងសាងភាពស្ងប់ស្ងាត់ទាំងខាងកាយ ឬផ្លូវចិត្តបាន។ ទាំងអស់នេះ ក្នុងអំឡុងពេលដែលលោកអ្នកកំពុងសាងភាពស្ងប់ស្ងាត់ដល់ខ្លួនឯងនោះ សូមសាកល្បងអុជទៀនក្រអូបក្លិនស្រាលៗ ដើម្បីជួយសាងបរិយាកាសឱ្យធូរស្រាល និងបិទភ្នែកចុះយ៉ាងសប្បាយបានកាន់តែខ្លាំងឡើង ធ្វើឱ្យរាងកាយបានចូលដល់ការសម្រាកបានយ៉ាងពេញទំហឹង។
4 – ធ្វើខ្លួនឱ្យសប្បាយ
សាកល្បងរកវិធីកែសម្រួលខ្លួន កែសម្រួលការតុបតែងខ្លួនឱ្យមានអារម្មណ៍ថាសប្បាយឡើង ដើម្បីស្វាគមន៍ការងារថ្មីៗក្នុងឆ្នាំថ្មីខាងមុខនេះ ដោយការរកមើលសម្លៀកបំពាក់ឈុតក្រណាត់កប្បាស់ ឬអាវយឺតសាច់កូតុងមកពាក់ទៅធ្វើការ នឹងធ្វើឱ្យលោកអ្នកមានអារម្មណ៍សប្បាយ ទាន់សម័យ និងរហ័សរហួនបានកាន់តែខ្លាំងឡើង ឬបើលោកអ្នកមានផែនការនឹងទៅជប់លៀងកំសាន្តជាមួយមិត្តភ័ក្តិនៅពេលល្ងាចរបស់ថ្ងៃធ្វើការ ការស្លៀកសម្លៀកបំពាក់ការងារ ឬសម្លៀកបំពាក់ផ្លូវការទៅនោះ ប្រហែលជាមិនសូវជាល្អមើលប៉ុន្មានទេ ដូច្នេះគួររកមើលអាវសាច់ក្រណាត់កូតុងពាក់បែបសប្បាយៗ ពណ៌ស្អាតៗ ពាក់ជាមួយខោខូវប៊យឡូយៗចេញពីផ្ទះទៅល្អជាង។
តែចុងក្រោយនេះ បន្ទាប់ពីត្រឡប់ពីការងារមកដល់ផ្ទះហើយ រឿងដំបូងដែលគួរធ្វើនោះគឺ ការផ្លាស់សម្លៀកបំពាក់ដែលស្លៀកពេញមួយថ្ងៃនោះចេញ ហើយស្លៀកឈុតសប្បាយៗជំនួសវិញ ដើម្បីឱ្យរាងកាយបានសម្រាក និងធូរស្រាលអារម្មណ៍៕
ក្រសួងអប់រំ យុវជន និងកីឡា សហការជាមួយនឹងភ្នាក់ងារសហប្រតិបត្តិការអន្តរជាតិជប៉ុន (JICA) បានដាក់ឱ្យប្រើប្រាស់កម្មវិធីសិក្សាថ្មីមួយដែលមានឈ្មោះថា Think! Think! ដើម្បីបង្រៀនកុមារតាមប្រព័ន្ធអេឡិចត្រូនិក លើកកម្ពស់ការគិត បង្កើតភាពឆ្លាតវៃ (IQ) និងពង្រឹងសមត្ថភាពគណិតវិទ្យាសម្រាប់កុមារទូទៅ។
កម្មវីធីនេះជាកម្មវិធីដ៏ល្អមួយដែលអាចជំរុញកុមារឱ្យមានការគិតស៊ីជម្រៅ និងបណ្តុះបណ្តាលបំណិនជីវិតដល់កុមារបានយ៉ាងល្អថែមទៀតផង។ នៅក្នុងអំឡុងពេលដែលកម្ពុជាកំពុងបិទសាលា ហើយដាក់ឱ្យកុមារសិក្សាតាមរយៈអនឡាញនេះ កម្មវិធី Think! Think! អាចជាជម្រើសល្អមួយសម្រាប់ដាក់ឱ្យកុមារសិក្សារៀនសូត្រនៅតាមផ្ទះរៀងៗខ្លួន។
ដើម្បីរៀនកម្មវិធី Think! Think! នេះអាណាព្យាបាល ឬសិស្សានុសិស្សអាចតាមដាន Facebook របស់ក្រសួងអប់រំ Moeys Cambodia និង Krou Cambodia ដោយមានរយៈពេលបីថ្ងៃក្នុងមួយសប្តាហ៍ គឺថ្ងៃច័ន្ទ ថ្ងៃពុធ និងថ្ងៃសុក្រ វេលាម៉ោង 5:00នាទី ដល់ម៉ោង 5:30នាទីល្ងាច៕
ដោយសារតែក្មេងគ្រប់គ្នាចូលចិត្តលេងទឹក ពេលណាដែលខ្លួនប្រាណទទឹក អារម្មណ៍ធូរស្រាលនឹងកើតឡើងជាសន្សឹមៗ ដូច្នេះហើយទើបការលេងជាមួយទឹក គឺជាកិច្ចការដែលនឹងបានទទួលអារម្មណ៍ល្អៗ ស្រស់ថ្លា សប្បាយ និងរំភើបញាប់ញ័រ មិនថាជាមួយក្មេងក្នុងភេទ ឬវ័យណាក៏ដោយសុទ្ធតែមានប្រយោជន៍ទាំងចំពោះរាងកាយ និងការធ្វើការរបស់ខួរក្បាលទាំងអស់។
1- ការលេងជាមួយទឹកគឺជាកិច្ចការមួយដែលជំរុញការធ្វើចលនារបស់រាងកាយ ដែលល្អចំពោះសុខភាព ធ្វើឱ្យកើតភាពយឺតយាររបស់សាច់ដុំ បណ្តុះសេចក្តីស្រឡាញ់ក្នុងការនៅកណ្តាលទីវាល និងមិនខ្លាចទឹក។
2 – ភាគច្រើនក្មេងដែលចូលចិត្តលេងទឹកត្រូវបានរកឃើញថា មានសុខភាពរឹងប៉ឹង ជាពិសេសក្មេងដែលចូលចិត្តហែលទឹក នឹងបានទទួលការហាត់ប្រាណក្នុងរាងកាយគ្រប់ចំណែក មានសួតដែលរឹងមាំ និងចេះជួយខ្លួនឯងបាននៅពេលកើតឧបត្តិហេតុបន្ទាន់ខាងផ្លូវទឹក។
3 – ក្មេងមានអារម្មណ៍ល្អពីការលេងទឹក ហុចផលឱ្យខួរក្បាលបង្ហូរសារធាតុអេនដូហ្វ៊ីនដែលមានទាំងសេចក្តីសុខ និងភាពក្លៀវក្លា។
4 – ក្មេងនឹងបានយល់លើហេតុផលខាងវិទ្យាសាស្រ្តពាក់ព័ន្ធនឹងការធ្វើចលនារបស់ទឹក កម្លាំងទំនាញរបស់ផែនដី និងបរិស្ថានវិទ្យា ធ្វើឱ្យក្លាយជាក្មេងដែលមានហេតុផល ឆ្លាតវៃ និងមានចំណេះដឹងជុំវិញខ្លួនច្រើន។
5 – ក្មេងនឹងបានប្រើការនឹកស្រមៃក្នុងការលេងជាមួយទឹក ក្មេងៗនឹងបានគំនិត និងការគិតស្រមៃផ្លាស់ប្តូរវិធីការលេងដោយខ្លួនឯងនៅក្នុងទឹក។
6 – ការលេងទឹកនៅកណ្តាលទីវាលក្នុងពេលវេលាដែលស័ក្តិសម ដូចជាព្រឹក និងល្ងាច ធ្វើឱ្យក្មេងបានទទួលវីតាមីន D ពីធម្មជាតិ បានស្រូបយកខ្យល់អាកាសបរិសុទ្ធ និងមានភាពប្រឆាំងជំងឺកាន់តែល្អឡើងទៀតផង។
7 – ការលេងទឹកជួយអភិវឌ្ឍជំនាញខាងសង្គមទៅជាមួយផង នៅពេលដែលត្រូវលេងជាមួយក្មេងឯទៀតៗ ឬប្រើអាងហែលទឹករួមជាមួយអ្នកដទៃ បានរៀនយល់ដឹងពីការធ្វើបដិសម្ព័ន្ធក្នុងទីសាធារណៈបានល្អទៀតផង។
8 – កិច្ចការងារលេងទឹកដែលភាគច្រើនមានអាណាព្យាបាលទៅជាមួយដែរនោះ ជួយរឹតចំណងសម្ព័ន្ធភាពក្នុងគ្រួសារឱ្យមានកិច្ចការងារសប្បាយរីករាយរួមគ្នា៕
បច្ចុប្បន្ននេះកម្ពុជាបានតម្លើង និងអភិវឌ្ឍហេដ្ឋារចនាសម្ព័ន្ធអគ្គីសនីជាច្រើនដែលផ្លាស់ប្តូរពីការប្រើប្រាស់ប្រេងទាំងស្រុងមកប្រើប្រាស់វារីគ្គិសនី ប្រើប្រាស់ធ្យូងថ្ម និងប្រើប្រាស់ថាមពលពន្លឺព្រះអាទិត្យជាដើម។ ហេតុនេះហើយទើបធ្វើឱ្យអគ្គិសនីអាចរក្សាបាននូវតម្លៃធូរថ្លៃជាងមុន សម្រាប់ផ្គត់ផ្គង់ដល់ប្រជាជននៅទូទាំងប្រទេស តែទោះជាយ៉ាងនេះក្តីបើប្រៀបធៀបជាមួយនឹងប្រទេសជិតខាងដូចជាថៃ និងវៀតណាម ជាដើម យើងឃើញថា តម្លៃអគ្គិសនីនៅកម្ពុជាហាក់នៅមានតម្លៃថ្លៃជាងបណ្តាប្រទេសទាំងអស់នោះនៅឡើយ។
ឆ្លើយតបនឹងបញ្ហានេះ ឯកឧត្តម វិចទ័រ ហ្សូនា អ្នកនាំពាក្យក្រសួងរ៉ែ និងថាមពល បានលើកឡើងថា មូលហេតុដែលនៅប្រទេសវៀតណាម និងប្រទេសថៃ មានតម្លៃអគ្គិសនីធូរថ្លៃជាងនៅកម្ពុជា ព្រោះនៅប្រទេសនោះមានទំហំនៃការផលិត (Scale) ធំជាងនៅប្រទេសកម្ពុជា។ ឯកឧត្តមបញ្ជាក់ថា នៅកម្ពុជា ប្រសិនបើយើងប្រមូលឱ្យអស់ពីការផ្គត់ផ្គង់អគ្គីសនីតាមរយៈវារីអគ្គីសនី ធ្យូងថ្ម និងថាមពលផ្សេងៗទៀត យើអាចផលិតបានប្រមាណត្រឹមតែប្រហាក់ប្រហែល 3,000មេកាវ៉ាត់ប៉ុណ្ណោះ តែសម្រាប់នៅវៀតណាម និងនៅប្រទេសថៃ គឺគេផលិតដល់ទៅប្រមាណ 5ម៉ឺនមេកាវ៉ាត់ឯណោះ។
ហេតុនេះមានន័យថាចំនួននៃការផលិតអគ្គីសនីនៅថៃ និងនៅវៀតណាម មានទំហំធំជាងនៅកម្ពុជាឆ្ងាយណាស់។ ចំណែកឯតម្លៃវិញ គឺផ្អែកលើចំនួន មានន័យថាប្រសិនបើចំនួននៃការផលិតជារួមមានទំហំធំ នោះតម្លៃលក់រាយនឹងធូរថ្លៃ តែប្រសិនបើការផលិតសម្រាប់ផ្គត់ផ្គង់តិច តម្លៃអគ្គិសនីរាយប្រាកដជាមានតម្លៃខ្ពស់។
ម្យ៉ាងវិញទៀត បើសម្រាប់ប្រទេសវៀតណាមវិញ ក្រុមហ៊ុនផលិតធ្យូងថ្មនៅប្រទេសគេគឺមានការឧបត្ថម្ភធន ដោយក្រុមហ៊ុនផលិតធ្យូងថ្មលក់ជូនក្រុមហ៊ុនអគ្គិសនីរដ្ឋក្នុងតម្លៃធូរថ្លៃ។ ឧទាហរណ៍ប្រសិនបើធ្យូងថ្ម មានតម្លៃ 100ដុល្លារក្នុងមួយតោន គេលក់ឱ្យរដ្ឋត្រឹមតែ 40ដុល្លារតែប៉ុណ្ណោះ តែសម្រាប់យើងវិញគឺំមិនមានការឧបត្ថម្ភធនបែបនេះនោះទេ។ ក្រុមហ៊ុនអគ្គីសនីរដ្ឋ ចរចារជាមួយក្រុមហ៊ុនឯកជនក្នុងលក្ខខណ្ឌឯកភាពស្រុះស្រួលគ្នា ដែលអាចឱ្យក្រុមហ៊ុនផ្គត់ផ្គង់ផលិតធ្យូងថ្មចំណេញ ឬអាចទៅរួចសម្រាប់ការលក់ឱ្យរដ្ឋ៕
សហគមន៍អឺរ៉ុប បានសម្រេចបង្វែរហិរញ្ញប្បទានឥតសំណង 56លានអឺរ៉ូពីកម្មវិធីកំពុងដំណើរការមួយចំនួន មកជួយលើវិស័យគាំពារសង្គម ដែលជាការងារអាទិភាព និងបន្ទាន់របស់រាជរដ្ឋាភិបាលកម្ពុជា។ នេះបើតាមសេចក្តីប្រកាសព័ត៌មាន របស់ក្រសួងសេដ្ឋកិច្ច នៅថ្ងៃទី21 ខែមេសានេះ។
យោងតាមសេចក្តីប្រកាសព័ត៌មាន បានឱ្យដឹងថាកាលពីថ្ងៃទី20 ខែមេសា ឆ្នាំ2020 ឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានជួបជាមួយលោកស្រី Carmen Moreno ឯកអគ្គរដ្ឋទូត នៃសហភាពអឺរ៉ុបប្រចាំកម្ពុជា តាមរយៈ Video Conference ដើម្បីពិភាក្សាអំពីតម្រូវការរបស់កម្ពុជា និងលទ្ធភាពនៃការចូលរួមរបស់សហភាពអឺរ៉ុប ក្នុងការគាំទ្ររាជរដ្ឋាភិបាលកម្ពុជា ដើម្បីទប់ស្កាត់ និងប្រយុទ្ធប្រឆាំងនឹងការរាតត្បាតនៃវីរុសកូវីដ-19 និងស្ដារសម្បទាសេដ្ឋកិច្ចពីផលប៉ះពាល់នៃជំងឺនេះ។
ឯកឧត្ដមអគ្គបណ្ឌិតសភាចារ្យឧបនាយករដ្ឋមន្ត្រី បានសម្ដែងនូវការស្វាគមន៍ ចំពោះសហភាពអឺរ៉ុបក្នុងកិច្ចសហការដ៏ល្អប្រសើរកន្លងមក ជាមួយនឹងរាជរដ្ឋាភិបាលកម្ពុជា ជាពិសេស ក្នុងកាលៈទេសៈបច្ចុប្បន្នដែលពិភពលោក ក៏ដូចជាកម្ពុជាដែរ កំពុងប្រឈម និងប្រយុទ្ធដោះស្រាយចំពោះវិបត្ដិសកលដោយសារវីរុសកូវីដ-19 (COVID-19)។
កម្ពុជា បាននិងកំពុងគ្រប់គ្រងលើបញ្ហានៃវីរុសកូវីដ-19 បានល្អប្រសើរ ប៉ុន្តែកម្ពុជានៅតែមិនបន្ធូរដៃនោះទេ និងរឹតតែសកម្មកាន់តែខ្លាំងថែមទៀត ដោយបានបង្កើតនូវយន្តការ និងដាក់ចេញនូវវិធានការជាយុទ្ធសាស្រ្តមុតស្រួច ទាំងលើសមរភូមិក្នុងការប្រយុទ្ធប្រឆាំងការរាតត្បាតវីរុសកូវីដ-19និងលើការដ្ឋានស្ដារសម្បទាសេដ្ឋកិច្ច-សង្គមឡើងវិញ បន្ទាប់ពីរងផលប៉ះពាល់ពីជំងឺនេះ ។
សូមបញ្ជាក់ថា វីរុសកូវីដ-19 មិនត្រឹមតែជាវិបត្ដិសុខភាពសាធារណៈប៉ុណ្ណោះទេ តែជំងឺនេះ ក៏បានបង្កផលប៉ះពាល់អវិជ្ជមានដល់វិស័យសេដ្ឋកិច្ចផ្សេងៗ រួមមានវិស័យកាត់ដេរ ទេសចរណ៍ ធុរកិច្ចខ្នាតតូច និងមធ្យមទៀតផង។
លោកស្រី Carmen Moreno បានថ្លែងកោតសរសើរ និងវាយតម្លៃខ្ពស់ ចំពោះជោគជ័យរបស់រាជរដ្ឋាភិបាល ក្នុងការគ្រប់គ្រងបញ្ហាវិបត្តិនៃវីរុសកូវីដ-19 នេះ និងបានថ្លែងបញ្ជាក់អំពីជំហរគាំទ្រយ៉ាងពេញទំហឹងរបស់សហភាពអឺរ៉ុប ក្នុងការចូលរួមចំណែកគាំទ្ររាជរដ្ឋាភិបាលកម្ពុជា ក្នុងការស្ដារសម្បទាសេដ្ឋកិច្ច-សង្គម ដែលរងផលប៉ះពាល់ពីនៃជំងឺវិបត្តិនៃវីរុសកូវីដ-19 នេះ។
លោកស្រី បានជម្រាបជូនថា ក្នុងស្មារតីនេះ សហភាពអឺរ៉ុបដែលមានទីស្នាក់ការកណ្តាលនៅ Brussel ទើបតែបានអនុម័តអនុញ្ញាតឱ្យបង្វែរហិរញ្ញប្បទានឥតសំណងសរុបចំនួន 56លានអឺរ៉ូ ពី កម្មវិធីកំពុងដំណើរការមួយចំនួន ដែលជាហិរញ្ញប្បទានដោយសហភាពអឺរ៉ុប សម្រាប់យកមកប្រើប្រាស់លើវិស័យគាំពារសង្គម ដែលជាការងារអាទិភាព និងបន្ទាន់របស់រាជរដ្ឋាភិបាល ក្នុងការស្ដារ សម្បទាសេដ្ឋកិច្ច-សង្គមឡើងវិញ ពីវិបត្តិនៃវីរុសកូវីដ-19 នេះ។
អគ្គបណ្ឌិតសភាចារ្យ ក៏បានថ្លែងអំណរគុណផងដែរ ចំពោះកិច្ចសហប្រតិបត្ដិការរឹងមាំកន្លងមករបស់សហភាពអឺរ៉ុបជាមួយនឹងកម្ពុជា ជាពិសេសស្វាគមន៍ចំពោះការចូលរួមចំណែកនៅក្នុងគ្រាដ៏លំបាកនេះ។
អគ្គបណ្ឌិតសភាចារ្យ បានគូសបញ្ជាក់ឡើងវិញថា ក្នុងការអនុវត្តវិធានការស្ដារសេដ្ឋកិច្ចសង្គមពីផលប៉ះពាល់នៃវីរុសកូវីដ-19 រាជរដ្ឋាភិបាលកម្ពុជា បានបង្កើតក្រុមការងារចំនួន4 រួមមាន៖ 1-ក្រុមការងារចំពោះកិច្ច គ្រប់គ្រងការផ្គត់ផ្គង់ និងថ្លៃទំនិញយុទ្ធសាស្ត្រ ក្នុងអំឡុងពេលប្រយុទ្ធនឹងវីរុសកូវីដ-19។
2-ក្រុមការងារចំពោះកិច្ច រៀបចំ និងគ្រប់គ្រងយន្តការជំនួយសង្គម ក្នុងអំឡុងពេលប្រយុទ្ធនឹងវីរុសកូវីដ-19។
3-ក្រុមការងារចំពោះកិច្ចរៀបចំគោលនយោបាយថវិកា ហិរញ្ញប្បទាន និងជំនួយសង្គម ដើម្បីគ្រប់ គ្រងការប្រយុទ្ធនឹងវីរុសកូវីដ-19។
4-ក្រុមការងារបច្ចេកទេសចម្រុះ ចំពោះកិច្ចសិក្សារៀបចំដាក់ចេញនូវកញ្ចប់វិធានការខាងរូបិយវត្ថុ និងធនាគារ ដើម្បីគ្រប់គ្រង និងដោះស្រាយផលប៉ះពាល់ពីការរីករាលដាលនៃវីរុសកូវីដ-19 និងការ ព្យួរប្រព័ន្ធអនុគ្រោះពន្ធលើមុខទំនិញមួយចំនួន ក្នុងក្របខ័ណ្ឌ «ទំនិញគ្រប់យ៉ាងលើកលែងតែសព្វាវុធ (EBA)»៕
កាលពីពេលថ្មីៗនេះ លីកកំពូលជប៉ុន J-League បានបង្ហាញសមាសភាព និងបញ្ជីឈ្មោះកីឡាករ អមជាមួយនឹងតម្លៃខ្លួនកីឡាករនីមួយៗ ដែលលេងនៅក្នុងលីកមួយនេះ ក្នុងនោះគេឃើញមានកីឡាករមកពីតំបន់អាស៊ានម្នាក់បានជាប់ក្នុងបញ្ជីឈ្មោះកីឡាករដែលមានតម្លៃខ្លួនខ្ពស់ជាងគេបង្អស់ទាំង 10ប្រចាំលីកកំពូលជប៉ុននេះ។
Chanathip Songkrasin (ឆាណាធីប ស៊ង់ក្រៈស៊ីន) កីឡាករខ្សែបម្រើ-ប្រយុទ្ធវ័យ 26ឆ្នាំរូបនេះ មានតម្លៃខ្លួន 2.6លានដុល្លារ ដែលធ្វើឱ្យគេបានក្លាយទៅជាកីឡាករមានតម្លៃខ្លួនខ្ពស់បំផុតលេខរៀងទី9 នៅក្នុងលីកកំពូលជប៉ុនរដូវកាល2020 នេះ។ ហើយរូបគេក៏បានក្លាយខ្លួនជាកីឡាករដែលមានតម្លៃខ្លួនថ្លៃជាងគេប្រចាំក្លិប Hokkaido Consadole Sapporo ផងដែរ។
គួរបញ្ជាក់ដែរថា កីឡាកររូបនេះបានផ្ទេរទៅកាន់ក្របខ័ណ្ឌលីកកំពូលជប៉ុនដំបូង មានតម្លៃខ្លួនតែ 70ម៉ឺនដុល្លារប៉ុណ្ណោះ៕
រាជធានីភ្នំពេញ ថ្ងៃទី២២ ខែមេសា៖ នៅខណៈដែលប្រទេសកម្ពុជាកំពុងខិតខំទប់ស្កាត់ការរាតត្បាតនៃវីរុសកូវីដ-១៩ អាជីវកម្មលក់ដូរទាំងឡាយក៏ប្រែជាស្ងាត់ជ្រងំ ដោយហេតុថាអតិថិជនជាទូទៅ កំពុងអនុវត្តវិធានការរក្សាគម្លាតពីសង្គម។
ក្នុងនោះផងដែរ អាជីវកម្មតូចៗដែលត្រូវបានអនុញ្ញាតឱ្យបន្តដំណើរការអាជីវកម្មជាធម្មតានោះ ក៏កំពុងប្រឈមនឹងការលំបាកច្រើនណាស់ដែរ ក្នុងការរក្សាទំនាក់ទំនងនិងផ្គត់ផ្គង់សេវាកម្មរបស់ខ្លួន ជូនដល់អតិថិជន ជាហេតុនាំឱ្យអាជីវកម្មរបស់ពួកគាត់ត្រូវធ្លាក់ចុះ ទាំងមិនមានតម្រុយថាតើ ពេលណាទើបស្ថានការណ៍ត្រលប់មកប្រសើរដូចដើមវិញ។
ក្នុងនាមជាក្រុមហ៊ុនផ្ដល់សេវាកក់ការធ្វើដំណើរដ៏ពេញនិយមនៅកម្ពុជា ក្រុមហ៊ុន TADA កំពុងផ្ដល់ដំណោះស្រាយមួយជូនដល់អាជីវករចំពោះបញ្ហានេះ ដោយក្រុមហ៊ុនបានបើកឱ្យដំណើរការនូវសេវាដឹកជញ្ជូន TADA Delivery សម្រាប់ជួយឱ្យអាជីវករអាចបន្តផ្គត់ផ្គង់សេវាកម្មជូនដល់អតិថិជនរបស់ខ្លួនបាន នៅគ្រប់ទិសទីក្នុងរាជធានីភ្នំពេញ។
ជាផ្នែកមួយនៃការបើកដំណើរការសេវានេះ ក្រុមហ៊ុន TADA នឹងបើកបម្រើសេវាកម្មនេះជូនដល់អាជីវករប្រើប្រាស់ដោយឥតគិតថ្លៃ រយៈពេលមួយខែពេញ។ ដើម្បីប្រើប្រាស់សេវានេះ អាជីវករគ្រាន់តែចុះឈ្មោះងាយៗ ដោយផ្ញើសារទៅកាន់ទំព័រហ្វេសប៊ុករបស់ក្រុមហ៊ុន (https://www.facebook.com/TADAKHM/) ឬទូរស័ព្ទឬផ្ញើសារទៅកាន់គណនី Telegram របស់ក្រុមហ៊ុន តាមរយៈលេខទូរស័ព្ទ 061555643 ឬ 010555643។ សូមបញ្ជាក់ផងដែរថា សេវានេះ ចាប់បើកដំណើរការ ចាប់ពីសប្តាហ៍នេះតទៅ។
លោក ជីម ប៉ូលី ប្រធានចាត់ការទូទៅក្រុមហ៊ុន TADA CAMBODIA បានមានប្រសាសន៍ថា៖ “ហេតុផលដែលយើងបើកនូវសេវាកម្មដឹកជញ្ជូននេះ គឺយើងចង់ធ្វើការគាំទ្រមិនត្រឹមតែ អ្នកបើកបរប៉ុណ្ណោះទេ គឺយើងចង់គាំទ្ររហូតទៅដល់អាជីវករ និងអាជីវកម្មក្នុងស្រុករបស់យើង ដែលកំពុងជួបការលំបាក នៅក្នុងពេល កូវីដ-១៩ ព្រោះអាជីវករភាគច្រើនមិនមានលទ្ធភាព ក្នុងការជួលសេវាដឹកជញ្ជូនដោយផ្ទាល់ខ្លួននោះទេ។ យើងផ្ដល់ឱ្យគាត់ក្នុង រយៈពេល ១ខែ ក្នុងការដឹកជញ្ជូនឱ្យគាត់ ដោយឥតគិតថ្លៃក្នុង ទីក្រុងភ្នំពេញ អញ្ចឹងសង្ឈឹមថាការផ្ដល់ជូនដោយឥតគិតថ្លៃនេះ អាចជួយអាជីវករម្មគាត់ និងការទំនាក់ទំនងឡើងវិញជាមួយអតិថិជនរបស់គាត់។”
សេវា TADA Delivery ដំណើរការដោយប្រព័ន្ធគ្រប់គ្រងការដឹកជញ្ជូនតាមអនឡាញដ៏ទំនើបមិនធ្លាប់មាននៅកម្ពុជា ព្រមទាំងអាចជួយឱ្យអាជីវករកក់និងពិនិត្យមើលលំហូរនៃការដឹកជញ្ជូនទំនិញរបស់ពួកគាត់បានយ៉ាងងាយស្រួល។ ប្រព័ន្ធនេះ ក៏ជួយឱ្យអាជីវករអាចគ្រប់គ្រងការបង់ប្រាក់ថ្លៃទំនិញរបស់ខ្លួនបានផងដែរ ទាំងការទូទាត់ជាក្រដាសប្រាក់ និងទូទាត់តាមគណនី ដោយថវិកានោះនឹងត្រូវទទួលជំនួស ដោយអ្នកបើករឺម៉កកង់បី ។
អាជីវករដែលបានចុះឈ្មោះរួច បានឱ្យដឹងថា សេវាTADA Deliveryផ្ដល់ជំនួយបានច្រើនដល់អាជីវកម្មរបស់ពួកគាត់។
កញ្ញា ភា ស្រីម៊ុម អ្នកតំណាងហាងលក់សម្ភារៈកីឡា Lifeshion បានឱ្យដឹងថា៖ “តាំងពីពេល កូវីដ-១៩ បានមកដល់ប្រទេសកម្ពុជា ការលក់នូវឧបករណ៍ហាត់ប្រាណមានការធ្លាក់ចុះ ហើយភ្ញៀវក៏មិនហ៊ានដើរចូលមកហាងផ្ទាល់ដែរ អញ្ចឹងដើម្បីបម្រើដល់អតិថិជន យើងមានការសហការណ៍ជាមួយ នឹង ក្រុមហុ៊ន TADA សំរាប់ការ Deliveryជូនភ្ញៀវ ដែលជាសេវាកម្មរហ័សទាន់ចិត្ត”
អតិថិជនដែលជាអ្នកទិញទំនិញ ក៏នឹងទទួលបានអត្ថប្រយោជន៍ពីសេវាដឹកជញ្ជូននេះផងដែរ ពីព្រោះពួកគាត់អាចទិញទំនិញបាន ដោយមិនចាំបាច់ធ្វើដំណើរទៅកាន់ហាងដោយផ្ទាល់នោះទេ ព្រោះសេវានេះនឹងដឹកទំនិញរបស់គាត់ ជូនដល់គេហដ្ឋានតែម្ដង។
រីឯសម្រាប់អ្នករត់រឺម៉កកង់បីដែលជាកម្លាំងស្នូលនៃសេវា TADA Delivery វិញ ពួកគាត់យល់ឃើញថា សេវានេះពិតជាអាចជួយសម្រាលបន្ទុកផ្នែកសេដ្ឋកិច្ចរបស់ពួកគាត់ បានមួយកម្រិតដែរ នៅក្នុងកាលៈទេសៈដ៏លំបាកនេះ។
លោក ហែ ផល្លី អ្នករត់រឺម៉កកង់បីម្នាក់ បានឱ្យដឹងថា៖ “មួយរយៈនេះ ខ្សត់ភ្ញៀវហៅកង់បីជិះណាស់។ តែដល់ពេលមានសេវាដឹកឥវ៉ាន់នេះ វាក៏ជួយជីវភាពខ្ញុំបានច្រើនគួរសមដែរ។ បើសិនជាគ្មានសេវាដឹកឥវ៉ាន់នេះទេ វាធ្វើឱ្យអ្នករត់កង់បីនេះ មានការលំបាកយ៉ាងខ្លាំង។”
ក្រុមហ៊ុន TADA បានឱ្យដឹងថា ពីដំបូងឡើយ ក្រុមហ៊ុនគ្រោងនឹងដាក់ឱ្យដំណើរការនូវសេវាដឹកជញ្ជូននេះ នៅពីរបីខែខាងមុខឯណោះទេ។ ប៉ុន្តែដោយហេតុថាវីរុសកូវីដ-១៩ បានរាតត្បាតពាសពេញពិភពលោក ក្រុមហ៊ុនក៏សម្រេចចិត្តពន្លឿនពេលបើកដំណើរការសេវានេះមុនផែនការវិញ ដើម្បីឆ្លើយតបទៅតាមសេចក្ដីត្រូវការដ៏ចាំបាច់របស់អាជីវករ នាទីក្រុងភ្នំពេញ។
លោក ជីម ប៉ូលី ប្រធានចាត់ការទូទៅក្រុមហ៊ុន TADA CAMBODIA បានបន្ថែមថា៖ “[នេះ]គឺជាផ្នែកមួយសំខាន់ក្នុងការចូលរួមចំណែក ក្នុងការសំរេចនូវចក្ខុវិស័យរបស់យើង ថាយើងមិនត្រឹមតែអាចជួយដៃគូរបើកបររបស់យើងតែបុ៉ណ្ណោះទេ យើងចង់ជួយដល់អាជីវកម្ម អាជីវករ ឬក៏ដៃគូររកសុីជាមួយយើងទាំងអស់គ្នា ជាពិសេសហ្នឹងគឺ ចង់បន្ថែមទៅលើកិច្ចខំប្រឹងប្រែងរបស់រដ្ឋាភិបាល ដើម្បីធ្វើម៉េច ស្ដារលទ្ធភាពសេដ្ឋកិច្ចយើងឱ្យដូចដើមវិញ។ មិនតែប៉ុណ្ណោះសេវាកម្មរបស់យើងនៅមានច្រើនទៀត ដែលយើងនឹងធ្វើការប្រកាស ក្នុងពេលឆាប់ៗនេះ ហើយទាំងអស់ហ្នឹងគឺជាផ្នែកមួយដែលយើងព្យាយាមធ្វើដើម្បីរួមចំណែកក្នុងការសំរេចបាននូវ ចក្ខុវិស័យរយៈពេលវែងរបស់យើង”៕
ត្រឡាច ជាប្រភេទបន្លែដែលប្រជាជនខ្មែរគ្រប់រូប ចូលចិត្ត និងច្នៃបានជាអាហារជាច្រើនមុខ ដូចជាស្ងោ ឆា លាយជាមួយបន្លែផ្សេងៗនៅក្នុងសម្លជាច្រើនមុខ និងធ្វើជាបង្អែម ដំណាប់ ឬធ្វើជាទឹកត្រឡាចជាដើម។ បើមើលពីគុណសម្បត្តិរបស់វា យើងនឹងឃើញថាត្រឡាច ជាផលិតផលកសិកម្មមួយដែលអាចមានទីផ្សារខ្ពស់ និងត្រូវប៉ាន់ផងដែរនៅក្នុងកាលៈទេសៈដែលប្រទេសយើងបច្ចុប្បន្ននេះ កំពុងត្រូវការបន្លែដើម្បីផ្គត់ផ្គង់ទីផ្សារក្នុងស្រុក និងស្របពេលដែលប្រជាជននៅទីក្រុងពេញនិយមទទួលទានអាហារគ្មានជាតិគីមី។
ប្រសិនបើលោកអ្នកមានដីជុំវិញផ្ទះ ឬសល់ដីនៅជនបទ អាចសាកល្បងដាំដំណាំត្រឡាច ព្រោះវាជាប្រភេទដែលងាយដាំ ទទួលបានផលច្រើន និងអាចធ្វើអាជីកវម្មបានថែមទៀតផង។
កសិករដាំត្រឡាចនៅក្នុងខេត្តកំពង់ឆ្នាំ អ្នកស្រី ស៊ុន ស្រីពៅ បានលើកឡើងថា នៅប្រទេសយើងនេះជាទីតាំងល្អបំផុតក្នុងការដាំត្រឡាច ព្រោះសីតុណ្ហភាព និងស្ថានភាពអាកាសធាតុអំណោយផលសម្រាប់ដំណាំប្រភេទនេះ។ អ្នកស្រីបញ្ជាក់ថាដំណាំនេះ អាចប្រមូលផលបានក្នុងរយៈពេលចាប់ពី 30ថ្ងៃ ទៅ 45ថ្ងៃប៉ុណ្ណោះ ហើយវាមិនរើសរដូវនោះទេ ទោះក្នុងពេលណាក៏អាចដាំបានដែរ។
វិធីសាស្ត្រក្នុងការដាំត្រឡាចឱ្យទទួលផលល្អ អ្នកស្រីបញ្ជាក់ថាដំបូងឡើងគួរភ្ជួរដីជាមុនឱ្យបាន2 ទៅ 3ដង ដើម្បីឱ្យដីផុសល្អ។ ហើយមុននឹងភ្ជួរលើកដំបូងគួរបាញ់ថ្នាំកំចាត់ស្មៅជាមុនសិន ដើម្បីសម្លាប់ពូជរុក្ខជាតិនានាដែលរំខានដល់ការលូតលាស់របស់ដើមត្រឡាច។ បន្ទាប់មកគួរហាលដីចោលដើម្បីសម្លាប់មេរោគ និងទុកឱ្យស្មៅងាប់ក្នុងរយៈពេល 3 ទៅ7ថ្ងៃសិន។
សម្រាប់ការភ្ជួរលើកទី2 គេត្រូវរាស់ដីឱ្យស្មើល្អបន្ទាប់មកកាប់រណ្តៅទំហំប្រមាណ 4តឹក ឬ 40សង់ទីម៉ែត្រ បួនជ្រុង និងជម្រៅ2 ទៅ3 តឹកដោយរក្សាគម្លាតពីគុម្ពមួយទៅគុម្ពមួយប្រវែង 1ម៉ែត្រ។
ចំពោះការរៀបចំគ្រាប់ពូជសម្រាប់ដាំ គឺគេត្រូវជ្រើសរើសពូជណាល្អ ដែលគ្មានជំងឺដើម្បីធ្វើការដាំដុះដោយត្រូវយកគ្រាប់ត្រឡាចទៅត្រាំក្នុងទឹក ពី6 ទៅ 12ម៉ោង បន្ទាប់មកយកគ្រាប់ដែលត្រាំទឹកហើយនោះទៅដាក់ដាំ ក្នុងកន្ទោងបណ្ដុះកូនជាមុនសិន ចាំដល់ពេលវាលាស់ចេញស្លឹកខ្លះ ទើបគេយកវាទៅដាក់ដាំក្នុងរណ្ដៅ។ ក្រោយពីដាំរួច យើងត្រូវអនុវត្តដំណាក់កាល 3ជំហាន៖+ ជំហានទី 1 ពេលកូនត្រឡាចដុះលូតលាស់បាន 7សន្លឹក យើងត្រូវក្ដិចត្រួយវាចេញម្តង ក្រោយមកយើងនឹងបានទទួលបានពន្លកត្រួយថ្មីចំនួន 3បន្ថែមទៀត។
+ជំហានទី 2 ត្រួយដែលបែកចេញនោះ នៅពេលវាលូតលាស់បានស្លឹក 7សន្លឹកយើងបន្តអនុវត្តដូចជំហានទី1 ទៀត ពេលនោះយើងនឹងបានពន្លកត្រួយថ្មីចំនួន 7បន្ថែមទៀត។
+ជំហានទី 3 យើងនៅតែបន្តអនុវត្តដូចជំហានទី1និងទី2 ដដែល ហើយពេលនោះ យើងនឹងបាន ពន្លកត្រួយថ្មីដល់ទៅ 30 ទៅ 35ខ្នែង។ ដូច្នេះ ពេលនេះវាជាដំណាក់កាល ដែលយើងត្រូវបន្ថែមជីធម្មជាតិ ដើម្បីជួយទ្រទ្រង់ការលូតលាស់របស់វា។
ការដាក់ជីនេះ យើងត្រូវដាក់នៅសងខាងចេញពីរណ្តៅត្រឡាចចម្ងាយប្រមាណ 30 ទៅ 50 សង់ទីម៉ែត្រ មានដូចជាជីកំប៉ុស លាមកសត្វ និងកម្ទេចស្លឹកឈើ និងស្រោចទឹកជាប្រចាំ ធ្វើបែបនេះត្រឡាចនឹងលូតលាស់បានល្អ មានរយៈពេលយូររហូតដល់ជាង 2ខែ ដែលអាចឱ្យវាផ្លែបានច្រើន និងយូរ និងច្រើន។ ក្រោយពីដាំបានរយៈពេល 30ទៅ 45ថ្ងៃ អាចប្រមូលផលបានហើយ។
ចំពោះផលវិញ ក្នុងដីមួយហិកតា គេអាចប្រមូលត្រឡាចបានពី 10 ទៅ 15តោន ហើយក្នុងមួយផ្លែមានទម្ងន់ជាងកន្លះគីឡូក្រាម។ ហេតុនេះប្រសិនបើលោកអ្នកដាំជាលក្ខណៈគ្រួសារ ក៏អាចទទួលបានផលច្រើនគីឡូដែរក្នុងពេលប្រមូលផលម្តងៗ៕
