Author: ធឿន មករា

ធនាគារជាតិនៃកម្ពុជា សុំឱ្យគ្រឹះស្ថានហិរញ្ញវត្ថុយោគយល់ និងកុំពិន័យកូនបំណុលរហូតដល់ចុងខែធ្នូ
ធនាគារជាតិនៃកម្ពុជា បានចេញលិខិតស្នើរសុំឱ្យមានការអនុគ្រោះបន្ធូបន្ថយការយកកម្រៃសេវារផ្សេងៗពាក់ព័ន្ធនឹងឥណទាន និងលើកលែងការផាកពិន័យផ្សេងៗចំពោះអតិថិជន ចំពោះមុខការរីករាលដាលនៃជំងឺ Covid-19។
នៅក្នុងលិខិតរបស់ធនាគារជាតិនៃកម្ពុជា បានបញ្ជាក់ថា សូមជម្រាបជូនដល់គ្រប់គ្រឹះស្ថានធនាគារ និងហិរញ្ញវត្ថុឱ្យបានជ្រាបថា ធនាគារជាតិនៃកម្ពុជាសូមធ្វើការវាយតម្លៃខ្ពស់ចំពោះកិច្ចសហការរបស់គ្រប់គ្រឹះស្ថានធនាគារ និងហិរញ្ញវត្ថុ ដែលបាន និងកំពុងអនុវត្តវិធានការនានាដែលបានដាក់ចេញកន្លងមក។ ក្នុងស្ថានភាពដែលពិភពលោក ក៏ដូចជាកម្ពុជាកំពុងប្រឈមនឹងការរីករាលដាលនៃមេរោគ Covid-19 ធនាគារជាតិនៃកម្ពុជាស្នើរសុំការយោគយល់ពីគ្រប់គ្រឹះស្ថានធនាគារ និងហិរញ្ញវត្ថុ ផ្តល់ការអនុគ្រោះបន្ថែមដល់អតិថិជនដើម្បីសម្រាលបន្ទុករបស់គាត់មួយកម្រិតទៀតក្នុងគ្រាលំបាកនេះ ដូចជាការបន្ធូរបន្ថយកម្រៃសេវាផ្សេងៗពាក់ព័ន្ធនឹងឥណទាន និង/ឬ លើកលែងការផាកពិន័យផ្សេងៗចំពោះអតិថិជនរបស់ខ្លួនចាប់ពីកាលបរិច្ឆេទនៃលិខិតនេះ រហូតដល់ដំណាច់ខែធ្នូ ឆ្នាំ 2020៕
April 24, 2020
វិធីសាស្ត្រសន្សំសំចៃអគ្គីសនីក្នុងរដូវកាលភ្លើងឡើងខ្លាំង
មួយរយៈនេះមានបងប្អូនប្រជាពលរដ្ឋជាច្រើនបានលើកឡើងស្រដៀងគ្នាថា តម្លៃភ្លើងក្នុងផ្ទះចាប់ផ្តើមកើនឡើងខ្លាំងជាងខែមុនៗ។ កត្តានេះត្រូវបានស្ថាប័នអគ្គិសនីកម្ពុជាបញ្ជាក់ថាអាចបណ្តាលមកពីការកើនឡើងនូវបរិមាណប្រើប្រាស់អគ្គិសនីក្នុងខែក្តៅ ឬអាចបណ្តាលមកពីបញ្ហាឧបករណ៍អេឡិចត្រូនិកនានាដែលឆ្លងភ្លើង ឬខូចជាដើម។
ដើម្បីជាវិធីសាស្រ្តក្នុងការជួយឱ្យការប្រើប្រាស់អគ្គិសនីសម្រាប់ប្រជាពលរដ្ឋមានភាពសន្សំសំចៃ និងចំណេញច្រើនជាងមុន អាជ្ញាធរអគ្គិសនីកម្ពុជា បានបង្ហាញវិធីសាស្រ្តមួយចំនួនដើម្បីជួយកាត់បន្ថយការចំណាយលើការប្រើប្រាស់អគ្គិសនីដូចតទៅ៖
1.ឆ្នាំដាំបាយ
– គួរជ្រើសរើសទំហំដែលសមរម្យសម្រាប់គ្រួសារនីមួយៗ
– ជៀសវាងបើកគម្របឆ្នាំងពេលបាយមិនទាន់ឆ្អិន
– ដកខ្សែភ្លើងចេញពេលបាយឆ្អិន
1. កង្ហារ
– សម្អាតកង្ហារឱ្យបានញឹកញាប់
– ជ្រើសរើសទំហំកង្ហារដែលសមល្មមនឹងតម្រូវការ
– ដកខ្សែភ្លើងពេលឈប់ប្រើ
1. អំពូលភ្លើង
– គួរប្តូរមកប្រើអំពូលដែលស៊ីភ្លើងតិចដូចជាអំពូល LED ជាដើម
– សម្អាតអំពូល ចានអំពូល ឱ្យបានញឹកញាប់
1. ម៉ាស៊ីនត្រជាក់
– ធ្វើការសម្អាតម៉ាស៊ីនត្រជាក់រាល់ 6ខែម្តង
– កុំយករបស់ក្តៅចូលក្នុងបន្ទប់ម៉ាស៊ីនត្រជាក់
– កម្រិតសីតុណ្ហភាពកុំឱ្យត្រជាក់ពេក អាចត្រឹម 25អង្សារសេ
– ជ្រើសរើសទំហំម៉ាស៊ីនត្រជាក់ដែលសមស្របនឹងទំហំទីតាំង ឬទំហំបន្ទប់
– បិទទ្វារ និងបង្អួចនៅពេលដែលម៉ាស៊ីនត្រជាក់កំពុងដំណើរការ
1. ឆ្នាំងអ៊ុត
– អ៊ុតខោអាវច្រើនតែម្តង កុំអ៊ុតខោអាវតិចៗច្រើនដង ហើយពេលអ៊ុតកុំបាញ់សើមពេក
– រលាស់ខោអាវមុនហាល ដើម្បីកាត់បន្ថយកុំឱ្យមានភ្លឺច្រើនដែលធ្វើឱ្យអ៊ុតយូរ
1. ម៉ាស៊ីនបោកខោអាវ
– ដាក់ខោអាវឱ្យច្រើនតាមដែលម៉ាស៊ីនកំណត់
– ត្រាំខោអាវមុនដាក់បោកជួយឱ្យសម្អាតបានស្អាតល្អ
7.កុំព្យូទ័រ
– បិទម៉ូនីទ័របើមិនប្រើលើសពី 10នាទី
– ជ្រើសរើសកុំព្យូទ័រសន្សំសំចៃអគ្គិសនី
– បិទកុំព្យូទ័រនៅពេលមិនប្រើប្រាស់រយៈពេលយូរ (ច្រើនជាង 30នាទី)
1. ទូទឹកកក
– ដាក់ទូទឹកកយ៉ាងតិច 15សង់ទីម៉ែត្រពីជញ្ជាំង
– ជ្រើសរើសទំហំទូទឹកកកដែលសមរម្យ ហើយកុំក្លាស្សេរបស់ដែលមិនចាំបាច់
– ជ្រើសរើសកន្លែងដាក់ទូទឹកកកដែលឆ្ងាយពីរបស់ដែលមានចំហាយក្តៅ
– ជៀសវាងបើកទូទឹកកកញឹកញាប់
1. ទូរទស្សន៍
– កុំបិទទូរទស្សន៍ដោយប្រើតេឡេ ត្រូវចុចប៊ូតុងបិទទូរទស្សន៍តែម្តង ហើយដកខ្សែភ្លើងចេញបើឈប់មើល
– ដាក់ទូរទស្សន៍ឱ្យឃ្លាតពីជញ្ជាំង 10សង់ទីម៉ែត្រ និងកន្លែងដែលមានខ្យល់ចេញ ចូល
10.កុំសៀវដាំទឹក
– ដាំទឹកក្នុងចំណុះដែលត្រូវការប្រើ
– ដកខ្សែភ្លើងចេញពេលទឹកពុះ
– សម្អាតកំសៀវដាំទឹកឱ្យស្អាតជានិច្ច ជៀសវាងការថយចុះនៃកម្តៅកំសៀវ៕
April 24, 2020
កម្មវិធី Messenger Kids របស់ Facebook នឹងដាក់ឱ្យដំណើរការនៅកម្ពុជា ថ្ងៃនេះ
Facebook បានប្រកាសនៅថ្ងៃនេះ(ទី23មេសា)ថា ក្រុមហ៊ុន នឹងដាក់ឱ្យកម្មវិធី Messenger Kids ដំណើរការក្នុងប្រទេសចំនួន70 លើពិភពលោក ដោយមានការបញ្ចូលនូវចំណុចពិសេស ថ្មីៗជាច្រើន ដើម្បីផ្តល់ភាពងាយស្រួលដល់ឪពុកម្តាយ ក្នុងការជួយឱ្យកូនៗ របស់ពួកគាត់រក្សាការភ្ជាប់ទំនាក់ទំនងជាមួយនឹងមិត្តភក្តិរបស់ពួកគេ។ ជាមួយគ្នានេះដែរ មាតា-បិតា និងអាណាព្យាបាល ក្នុងប្រទេសកម្ពុជា ក៏អាចទាញយកកម្មវិធីនេះ ដើម្បីឱ្យកូនៗរបស់ខ្លួន បានប្រើប្រាស់ចាប់ពីថ្ងៃនេះ(ទី23មេសា)តទៅ ទាំងលើប្រព័ន្ធ Android និង IOS ផងដែរ។
ខណៈដែលសហគមន៍ជាច្រើនកំពុងតែស្វែងរកវិធីសាស្ត្រផ្សេងៗដើម្បីឆ្លើយតបទៅនឹងវិបត្តិវីរុសកូវីដ-19 និងស្របពេលដែលសាលារៀននានាបានបិទជាបណ្តោះអាសន្ន ហើយប្រជាពលរដ្ឋទូទៅកំពុងអនុវត្តវិធានការ រក្សាគម្លាតក្នុងសង្គម ឪពុកម្តាយជាច្រើន កំពុងតែចាប់អារម្មណ៍កាន់តែខ្លាំងក្នុងការប្រើប្រាស់បច្ចេកវិទ្យា ដើម្បីជួយឱ្យកូនៗរបស់ពួកគាត់ រក្សាទំនាក់ទំនងជាមួយនឹងមិត្តភក្កិ និងក្រុមគ្រួសារ ប៉ុន្តែ ក៏ត្រូវស្ថិតក្រោមការគ្រប់គ្រងរបស់ពួកគាត់ដែរ។
Messenger Kids ជាកម្មវិធីផ្ញើសារ និងជជែកកម្សាន្តជាវីដេអូ។ កម្មវិធីនេះនឹងជួយឱ្យកុមារៗ រក្សាការភ្ជាប់ទំនាក់ទំនងជាមួយនឹងមិត្តភក្តិ និងក្រុមគ្រួសាររបស់ពួកគេបានយ៉ាងសប្បាយរីករាយ ក្នុងកម្រិតមួយដែលស្ថិតក្រោមការគ្រប់គ្រងរបស់ឪពុកម្តាយរបស់ពួកគេ។ Facebook បានធ្វើការយ៉ាងប្រកៀកជាមួយនឹងទីប្រឹក្សាយុវជន ឬ Youth Advisors ដែលជាក្រុមជំនាញផ្នែកសុវត្ថិភាពលើប្រព័ន្ធអនឡាញ ការអភិវឌ្ឍរបស់កុមារ និងបណ្តាញសារព័ត៌មាន ដើម្បីរួមគ្នាបង្កើតកម្មវិធី Messenger Kids នេះឡើង។
Facebook នៅតែបន្តធ្វើការពិភាក្សាជាមួយនឹងអ្នកជំនាញក្នុងវិស័យអប់រំ និងទីប្រឹក្សាផ្នែកសុវត្ថិភាពកុមារ ដើម្បីធានាឱ្យបានថា ក្រុមហ៊ុនកំពុងតែផ្តល់សេវាមួយ ដែលជួយឱ្យមានតុល្យភាពរវាងការគ្រប់គ្រង របស់ឪពុកម្តាយ និងមុខងារទាំងឡាយណា ដែលជួយឱ្យកុមារបានរៀនអំពីរបៀបភ្ជាប់ទំនាក់ទំនង ជាមួយគ្នាលើអនឡាញ ប្រកបដោយការទទួលខុសត្រូវ។
កម្មវិធីនេះ ត្រូវបានបង្កើតឡើងសម្រាប់កុមារ ប៉ុន្តែក្រោមការគ្រប់គ្រងរបស់ឪពុកម្តាយ
Messenger Kids មានលក្ខណៈពិសេសជាច្រើនសម្រាប់ក្មេងៗ ដើម្បីជួយឱ្យពួកគេរក្សាការភ្ជាប់ទំនាក់ទំនង ជាមួយនឹងមនុស្សជាទីស្រឡាញ់របស់ពួកគេបាន។ នៅពេលដែលឪពុកម្តាយបង្កើតគណនីឱ្យកូនៗ កូនៗក៏ អាចចាប់ផ្តើមជជែកកម្សាន្តជាវីដេអូ 1ទល់នឹង1 ឬជាក្រុមក៏បាន។ ជាមួយគ្នានេះ ឪពុកម្តាយ អាចចូលទៅត្រួតពិនិត្យមើលបញ្ជីឈ្មោះមនុស្ស ដែលកូនៗរបស់ពួកគាត់បានភ្ជាប់ទំនាក់ទំនងជាមួយ និងមើលថា តើអ្នកទាំងនោះ បើកអនឡាញនៅពេលណា។
- រូបភាពតំណាងឱ្យម៉ាស់ការពារ រូប emoji ដ៏សម្បូរបែប និងសំឡេងនិមិត្តផ្សេងៗ នឹងធ្វើឱ្យការសន្ទនាមានភាពរស់រវើក។
- ក្រៅពីការជជែកជាវីដេអូហើយ ក្មេងៗក៏អាចផ្ញើរូបថត ឃ្លិបវីដេអូ ឬសារជាអក្សរ ទៅកាន់មិត្តភក្តិ របស់ពួកគេ ក៏ដូចជាផ្ញើសារចូលទៅកាន់កម្មវិធី Messenger ធម្មតា របស់អ៊ុំៗ ពូៗ និងមីងៗ របស់ពួកគេបានដែរ ប៉ុន្តែត្រូវស្ថិតក្រោមការគ្រប់គ្រងរបស់ឪពុកម្តាយ។
- កម្មវិធីសម្រាប់ក្មេងៗដ៏សម្បូរបែប ដូចជា GIF ស៊ុមរូបថត ស្ទីកឃើរ ម៉ាសការពារ និងកម្មវិធី គូររូបផ្សេងៗ នឹងអនុញ្ញាតឱ្យក្មេងៗ អាចបង្កើតមាតិកាជាច្រើន ក៏ដូចជាបង្ហាញពីការយល់ឃើញ របស់ពួកគេផងដែរ។
- Messenger Kids ផ្ដល់ជូនឪពុកម្តាយ នូវលទ្ធភាពកាន់តែច្រើន ដើម្បីគ្រប់គ្រងកូនៗ បញ្ជីមិត្តភក្តិរបស់កូនៗ ព្រមទាំងអាចចូលទៅពិនិត្យមើល ថាតើកូនៗកំពុងតែប្រើប្រាស់កម្មវិធីនេះ ដើម្បីធ្វើអ្វីខ្លះទៀតផង។ លើសពីនេះទៅទៀត ឪពុកម្តាយក៏អាចគ្រប់គ្រងគណនី និងបញ្ជីមិត្តភក្តិ របស់កូនៗបានផងដែរ តាមរយៈប្រអប់ Messenger Kids Parent Dashboard នៅក្នុង Facebook ផ្ទាល់របស់ពួកគាត់តែម្ដង ដែលដំណើរការបាន ទាំងលើប្រព័ន្ធ iOS និង Android។
វិធីប្រើប្រាស់កម្មវិធី
រាល់គណនីរបស់កុមារទាំងអស់ដែលមាននៅលើ Messenger Kids ត្រូវតែបង្កើតឡើងដោយឪពុកម្តាយ របស់ពួកគេ។ មាតា-បិតា អាចបង្កើតគណនី Messenger Kids សម្រាប់កូនៗបានតាម 4ឌំណាក់កាល ខាងក្រោមនេះ៖
- ទាញយកកម្មវិធី៖ ដំបូង ត្រូវទាញយកកម្មវិធី Messenger Kids ដើម្បីដំឡើងលើ iPad, iPod ឬទូរស័ព្ទ iPhone ពី App Store។
- ផ្ទៀងផ្ទាត់៖ បន្ទាប់មក ត្រូវធ្វើការផ្ទៀងផ្ទាត់ជាមួយនឹងឧបករណ៍ដែលកូនលោកអ្នកត្រូវប្រើ តាមរយៈការប្រើប្រាស់ឈ្មោះ (Username) និងលេខសម្ងាត់ (Password) Facebook ផ្ទាល់ខ្លួនរបស់អ្នក។ សូមបញ្ជាក់ថា នេះមិនមែនជាការបង្កើតគណនី Facebook ថ្មីមួយសម្រាប់កូនរបស់អ្នក ឬជាការផ្ដល់សិទ្ធិឱ្យកូនៗចូលប្រើគណនី Facebook របស់លោកអ្នកនោះឡើយ។
- បង្កើតគណនី 1៖ ដើម្បីបញ្ចប់ដំណើរការនៃការដំឡើង លោកអ្នកត្រូវតែបង្កើតគណនី 1 សម្រាប់កូនរបស់អ្នក ខណៈដែលក្នុងគណនីនោះ អ្នកនឹងត្រូវតែបញ្ចូលឈ្មោះរបស់ពួកគេ ក៏ដូចជា កំណត់ និងជ្រើសរើសបន្ថែមនូវលក្ខណៈពិសេសផ្សេងៗ។ បន្ទាប់មក លោកអ្នកអាចប្រគល់ឧបករណ៍ ដែលត្រូវបានដំឡើងគណនី Messenger Kids នោះ ទៅកូនរបស់លោកអ្នកបាន ដើម្បីឱ្យពួកគេអាច ចាប់ផ្តើមជជែកកម្សាន្តជាមួយនឹងក្រុមគ្រួសារ និងមិត្តភក្តិ។
- បញ្ចូលមិត្តភក្តិ៖ ដើម្បីបញ្ចូលមិត្តភក្តិក្នុងបញ្ជីមិត្តភក្តិកូនៗរបស់អ្នក សូមចូលទៅកាន់ប្រអប់ Messenger Kids Parent Dashboard នៅក្នុងគណនី Facebook ផ្ទាល់ខ្លួនរបស់អ្នក។ ដើម្បីចូលទៅកាន់ប្រអប់នោះ សូមចុចលើពាក្យ «More» ឬ «មើលច្រើនទៀត» ដែលមាន នៅឯជ្រុងខាងស្ដាំនៃ ផ្នែកខាងក្រោមនៃអេក្រង់ នៅក្នុងគណនី Facebook ផ្ទាល់ខ្លួនរបស់អ្នក ហើយចុចលើពាក្យ «Messenger Kids» នៅក្នុងប្រអប់ Explore។
ព័ត៌មានបន្ថែម និងផែនការបន្ទាប់
នៅលើ Messenger Kids មិនមានការផ្សាយពាណិជ្ជកម្មឡើយ ហើយព័ត៌មានរបស់កូនលោកអ្នក មិនត្រូវបានយកទៅប្រើប្រាស់ដើម្បីប្រយោជន៍ផ្សាយពាណិជ្ជកម្មឡើយ។ លោកអ្នកអាចទាញយកកម្មវិធីនេះបាន ដោយឥតគិតថ្លៃ ហើយក៏គ្មានការបង់ថ្លៃអ្វីបនែ្ថមក្នុងកម្មវិធីនេះដែរ។ Messenger Kids ក៏ត្រូវបានបង្កើតឡើង ដោយអនុលោមតាមច្បាប់ស្ដីអំពីឯកជនភាព និងការការពារការអនឡាញរបស់កុមារ ផងដែរ (COPPA)។
យើងបន្តធ្វើការជាមួយនឹងឪពុកម្តាយ អ្នកជំនាញផ្នែកសុវត្ថិភាព និងសន្តិសុខ ដើម្បីធ្វើឱ្យកម្មវិធី Messenger Kids កាន់តែមានភាពល្អប្រសើរ ហើយនៅថ្ងៃនេះ យើងក៏បានប្រកាសពីវិធីថ្មីៗក្នុងការជួយឱ្យឪពុកម្តាយ រក្សាការភ្ជាប់ទំនាក់ទំនងរបស់កូនៗជាមួយនឹងមិត្តភក្តិរបស់ពួកគេ ផងដែរ។ កម្មវិធីនេះ នឹងដាក់ឱ្យដំណើរការទូទាំងពិភពលោក នៅប៉ុន្មានខែខាងមុខនេះ។
សម្រាប់ព័ត៌មានលម្អិតបន្ថែមទៀតអំពីកម្មវិធីនេះ សូមចូលទៅកាន់គេហទំព័រ messengerkids.com។
សម្រាប់ព័ត៌មានថ្មីៗ អំពីរបៀបប្រើប្រាស់ Messenger Kids សូមចូលទៅកាន់មជ្ឈមណ្ឌលផ្តល់ជំនួយ ឬ Help Center របស់យើង៕
April 24, 2020
មានម៉ាស៊ីនបោកសម្លៀកបំពាក់ទ្វារលើរបស់Samsung ដូចមានជំនួយការបោកគក់ដ៏វៃឆ្លាតបំផុតក្នុងផ្ទះ…!!
(ភ្នំពេញ) ថ្ងៃទី ២៤ ខែមេសា ២០២០៖
ការបោកគក់សម្លៀកបំពាក់ មិនមែនជាការងារងាយស្រួលឡើយ ជាពិសេសក្នុងអាកាសធាតុក្តៅ សម្បូរធូលីដីបែបនេះ គឺថាតិចៗបែកញើសជោគ!ខោអាវទើបនឹងពាក់ឆាប់ប្រឡាក់ និងងាយធុំក្លិនញើស! ប៉ុន្តែឥឡូវនេះលោកអ្នកឈប់បារម្ភទៀតទៅ… ជាមួយនឹងម៉ាស៊ីនបោកសម្លៀកបំពាក់ទ្វារលើរបស់ Samsung ពិតជាអាចធ្វើឱ្យជីវិតរបស់លោកអ្នកកាន់តែងាយស្រួល!
ទាំងនេះគឺជាលក្ខណៈសម្បត្តិពិសេសរបស់ម៉ាស៊ីនបោកសម្លៀកបំពាក់ទ្វារលើរបស់ Samsung ដែលបំពាក់មកជាមួយនឹងបច្ចេកវិទ្យាចុងក្រោយក្នុងការជួយសម្រួលដល់ការបោកសម្អាតសម្លៀកបំពាក់បានយ៉ាងល្អបំផុត៖
1. បច្ចេកវិទ្យា Digital Inverter
ជាមួយនឹងបច្ចេកវិទ្យា Digital Inverter ធ្វើឱ្យម៉ាស៊ីនបោកសម្លៀកបំពាក់ទ្វារលើរបស់ Samsung មានសំឡេងស្ងាត់ល្អ គ្មានសំឡេងរំខាន សន្សំសំចៃថាមពលខ្ពស់បំផុត និងមានការធានារហូតដល់ 11 ឆ្នាំ!
2. Magic Dispenser
ជាបច្ចេកវិទ្យាដែលជួយកាត់បន្ថយការជាប់សាប៊ូលើសម្លៀកបំពាក់ដោយមុខងារនេះអាចវាយបំបែកម្សៅសាប៊ូ ឬសាប៊ូទឹកបោកខោអាវជាមួយនឹងស្លាបចក្រទាំង៦ ធ្វើឱ្យសាប៊ូរលាយបានយ៉ាងល្អបំផុតក្នុងទឹកដោយបង្កើតបានជាពពុះសាប៊ូ ហើយជ្រាបចូលទៅក្នុងសាច់ក្រណាត់បានយ៉ាងល្អឥតខ្ចោះមុននឹងម៉ាស៊ីនចាប់ផ្តើមនូវប្រតិបត្តិការបោកគក់។
3. Magic Filter (Powerful Filtration)
ជាបច្ចេកវិទ្យាដែលបំពាក់មកជាមួយតម្រងពីរជាន់អាចចាប់យកកំទេចកំទីផ្សេងៗបានយ៉ាងល្អ និងធ្វើឱ្យអ្នកអាចបោកសម្លៀកបំពាក់បានស្អាតដោយគ្មានជាប់កំទេចកំទីជាប់លើសាច់ក្រណាត់បានយ៉ាងល្អឥតខ្ចោះ!
4. WobbleTM Technology
ជាបច្ចេកវិទ្យាទំនើបចុងក្រោយក្នុងការកាត់បន្ថយការប្រទាក់គ្នានៃសម្លៀកបំពាក់ ដែលជាមូលហេតុធ្វើឱ្យសម្លៀកបំពាក់ជ្រួញ និងរមួលចូលគ្នា។
5. Smart Check
លោកអ្នកនឹងមិនចាំបាច់ចំណាយពេល ឬថវិកាបន្ថែមក្នុងការហៅជាងជួសជុលទៀតនោះទេ! លោកអ្នកក៏អាចពិនិត្យ និងស្វែងរកដំណោះស្រាយនៃម៉ាស៊ីនបោកសម្លៀកបំពាក់ទ្វារលើរបស់ Samsung បានដោយស្វ័យប្រវត្តិជាមួយនឹងមុខងារជាច្រើននៅលើទូរស័ព្ទដៃបានយ៉ាងងាយបំផុត!
6. Intensive Cleaning
ជាមួយនឹងមុខងារ Intensive Wash លោកអ្នកអាចជ្រើសរើសមុខងារនេះក្នុងការបោកសម្អាតនូវសម្លៀកបំពាក់ណាដែលមានស្នាមប្រឡាក់ខ្លាំង ដែលមិនងាយជម្រះ!
យ៉ាងម៉េចដែរប៉ុនហ្នឹង…? ពេញចិត្តនៅ? ដូច្នេះមានម៉ាស៊ីនបោកសម្លៀកបំពាក់ទ្វារលើរបស់ Samsung មួយគ្រឿងនៅផ្ទះដឹងតែជីវិតងាយស្រួល និងមានពេលវេលាសម្រាកច្រើនតែម្តង!
ដើម្បីជ្រាបឱ្យកាន់តែច្បាស់ សូមអញ្ជើញទៅទស្សនាដោយផ្ទាល់នៅតាមហាងដេប៉ូចែកចាយផលិតផល
សាមសុង ទូទាំងប្រទេសដែលនៅជិតលោកអ្នកបំផុត ឬក៏អាចទំនាក់ទំនងសេវាបម្រើអតិថិជនរបស់យើងតាមរយៈលេខទូរស័ព្ទ៖ 1800 203 232!

April 24, 2020
កម្ពុជាចំណាយប្រាក់ចន្លោះ 2,000ដុល្លារ ទៅ 2,500ដុល្លារ សម្រាប់ព្យាបាលអ្នកមានវីរុសកូវីដ-19 ម្នាក់
រដ្ឋលេខាធិការក្រសួងសុខាភិបាល បានឱ្យដឹងថា ការព្យាបាលអ្នកមានផ្ទុកវីរុសកូវីដ-19 ម្នាក់ត្រូវការចំណាយទឹកប្រាក់ចន្លោះពី 2,000ដុល្លារ ទៅ 2,500ដុល្លារអាមេរិក នេះបើតាមការថ្លែងក្នុងសន្និសីទសារព័ត៌មានស្តីពីបច្ចុប្បន្នភាពវីរុសកូវីដ-19 នៅថ្ងៃទី20 ខែមេសា ឆ្នាំ2020។
លោកជំទាវ យក់ សម្បត្តិ រដ្ឋលេខាធិការក្រសួងសុខាភិបាល បានថ្លែងឱ្យដឹងថា៖«ថវិកាដែលនឹងចំណាយពាក់ព័ន្ធនឹងរឿងនេះគឺ ជាង 1ពាន់ដុល្លារ សម្រាប់ចំណាយទៅលើការធ្វើតេស្តរកមេរោគ។ ដោយឡែកជាង 1ពាន់ដុល្លារទៀត ចំណាយទៅលើថ្លៃថ្នាំ អាហារហូបចុក ថែទាំ និងការស្នាក់នៅជាដើម»។
លោកជំទាវបានបន្ថែមថា ការចំណាយនេះអាស្រ័យទៅលើរយៈពេលនៃការព្យាបាល ពោលបើការព្យាបាលចំណាយពេលយូរ ការចំណាយក៏ច្រើនឡើងដែរ ហើយបើការព្យាបាលមានរយៈពេលខ្លី ការចំណាយក៏តិចទៅតាមហ្នឹងដែរ ហើយតម្លៃនេះ ក៏ប្រែប្រួលទៅតាមការព្យាបាលរវាងមន្ទីរពេទ្យរដ្ឋ និងឯកជនផងដែរ។ ការចំណាយនេះ មិនទាន់បូករួមការឧបត្ថម្ភដល់គ្រូពេទ្យអ្នកព្យាបាល 1ថ្ងៃម្នាក់ 20ម៉ឺនរៀល(50ដុល្លារ)ថែមពីលើប្រាក់បៀវត្សរ៍នៅឡើយផង។
មិនទាន់មានការបញ្ជាក់ពីការចំណាយសរុបក្នុងប្រតិបត្តិការប្រយុទ្ធប្រឆាំងវីរុសកូវីដ-19 ក៏ដូចជាព្យាបាលអ្នកជំងឺនៅឡើយនោះទេ។ ប៉ុន្តែលោកស្រីរដ្ឋលេខាធិការ បានឱ្យដឹងថា ក្រសួងបានចំណាយថវិកាប្រមាណ 4.5លានដុល្លារអាមេរិក ជាថវិការបស់រដ្ឋ និងថវិកាសប្បុរសជន 5លានដុល្លារទៀត ដើម្បីទិញសម្ភារនានា សម្រាប់ក្រុមគ្រូពេទ្យប្រើប្រាស់។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ធ្លាប់បានបញ្ជាក់ថា ការព្យាបាលអ្នកជំងឺកូវីដ-19 ទាំងជនបរទេស និងពលរដ្ឋខ្មែរ មិនត្រូវបានគិតថ្លៃពីអ្នកជំងឺនោះទេ។ ការសម្រេចនេះ បានបង្ហាញពីការទទួលខុសត្រូវខ្ពស់ និងទឹកចិត្តសប្បុរសធម៌ដ៏ជ្រាលជ្រៅរបស់រាជរដ្ឋាភិបាលកម្ពុជាទៅលើអ្នកជំងឺ ខណៈបណ្តាប្រទេសជាច្រើនទៀត សុទ្ធតែបានយកថ្លៃព្យាបាលពីជនបរទេស។
អ្នកមានវីរុសCovid-19 ជាជនជាតិខ្មែរ និងជនបរទេស ដែលនៅក្នុងកម្ពុជា អាចចាត់ទុកថា ជាអ្នកមានសំណាងធំណាស់ ដោយសារតែពួកគេមិនតម្រូវឱ្យបង់ប្រាក់ឡើយ ព្រោះប្រមុខរាជរដ្ឋាភិបាលកម្ពុជា តាមរយៈក្រសួងសុខាភិបាល បានបង្ហាញពីការទទួលបន្ទុក និងមានភាពទទួលខុសត្រូវយ៉ាងខ្ពស់ ដោយបានចំណាយថវិកាទាំងស្រុង ទៅលើថ្លៃព្យាបាលអ្នកមានវីរុសCovid-19 ចម្រុះជាតិសាសន៍ទាំងនោះ។
អ្នកជំងឺដែលផ្ទុកវីរុសកូវីដ-19 ដែលសម្រាកព្យាបាលនៅក្នុងប្រទេសកម្ពុជា ភាគច្រើន គឺជាជនជាតិបរទេស ហើយមានការប្រែប្រួលទៅតាមអាការ និងការធ្វើតេស្តនៅក្នុងរង្វង់10 ទៅ11ដង។
លោកជំទាវបានលើកឧទាហរណ៍ថា ដូចជា ជនជាតិបារាំង 2នាក់ប្ដីប្រពន្ធ រួមជាមួយនឹងកូនតូចអាយុ 4ខែ ដែលសម្រាកនៅមន្ទីរពេទ្យកុមារជាតិ គឺពួកគាត់ឈ្លោះគ្នា ពេលពិនិត្យឃើញឪពុកវិជ្ជមាន ម្តាយអវិជ្ជមាន ពេលម្ដាយវិជ្ជមាន ឪពុកអវិជ្ជមានម្ដង អ៊ីចឹងមានន័យថា វាមានការប្រែប្រួលអាស្រ័យទៅលើកត្តានៃការរស់នៅប្រចាំថ្ងៃផងដែរ។
លោកជំទាវបានបញ្ជាក់ថា៖«ក្រោយពេលយើងធ្វើតេស្តម្ដងឃើញមានវិជ្ជមាន គឺតម្រូវឱ្យគាត់សម្រាកនៅពេទ្យពី 5-7ថ្ងៃ បានយើងកុងត្រូល (គ្រប់គ្រងជំងឺ)គាត់។ អ៊ីចឹងពេលដែលកុងត្រូលអវិជ្ជមានលើកទី1 ក្រោយរយៈពេល 48ម៉ោង យើងធ្វើកុងត្រូលលើកទី2»។
ជាមួយនឹងការទទួលបន្ទុកការចំណាយទាំងស្រុង ទៅលើការព្យាបាលអ្នកជំងឺ Covid-19 របស់រដ្ឋាភិបាលកម្ពុជា គឺជាទង្វើមនុស្សធម៌ដ៏ថ្លៃថ្លា ដែលបច្ចុប្បន្ននេះ រដ្ឋាភិបាលបានត្រៀមថវិកាបម្រុងជាច្រើនលានដុល្លារ សម្រាប់ចំណាយរួចជាស្រេច បន្ថែមពីលើការចូលរួមបរិច្ចាគថវិកា និងធនធានផ្ទាល់ខ្លួនរបស់មន្ត្រីរាជការ និងបណ្តាសប្បុរសជននានានៅទូទាំងប្រទេស។
ដោយឡែកនៅបណ្តាប្រទេសមួយចំនួន ដូចជាប្រទេសសិង្ហបុរី ត្រូវបានប្រកាស នៅលើគេហទំព័ររបស់ក្រសួងសុខាភិបាល ឱ្យដឹងថា៖«ចាប់ពីខែមីនា ការព្យាបាលការឆ្លងមេរោគ ផ្លូវដង្ហើមធ្ងន់ធ្ងរនៅក្នុងមន្ទីរពេទ្យរដ្ឋរបស់ប្រទេសសិង្ហបុរី ត្រូវបានអនុវត្តលើជនបរទេស ដែលជាធម្មតាមានតម្លៃចន្លោះពី 4,300 ទៅ 4,800ដុល្លារអាមេរិក»។
ចំណែក នៅឯសហរដ្ឋអាមេរិកវិញ សម្រាប់តម្លៃការព្យាបាល ការឆ្លងមេរោគផ្លូវដង្ហើមធ្ងន់ធ្ងរនៅក្នុងមន្ទីរពេទ្យរដ្ឋ ចំពោះប្រជាជនអាមេរិកទូទៅ គឺមានតម្លៃចន្លោះពីជាង 40,000 ទៅ 70,000ដុល្លារអាមេរិក។
សូមបញ្ជាក់ថា មកដល់ត្រឹមថ្ងៃទី22 ខែមេសា ឆ្នាំ2020 កម្ពុជារកឃើញអ្នកឆ្លងវីរុសកូវីដ-19 ចំនួន 122នាក់ ពលរដ្ឋខ្មែរ 51នាក់ ជនបរទេស71នាក់។ មកដល់បច្ចុប្បន្នព្យាបាលជា 110នាក់ ហើយកំពុងព្យាបាល 12នាក់៕
April 24, 2020
PSG ដំឡើងប្រាក់ខែ ចងជើង Neymar ឱ្យនៅបន្តដល់ឆ្នាំ2025
កីឡាករ Neymar JR សញ្ជាតិប្រេស៊ីល ត្រូវបានទាក់ទងឱ្យវិលត្រឡប់ទៅកាន់កីឡដ្ឋាន Nou-Camp វិញ ជាកន្លែងដែលគេធ្លាប់លេងឱ្យ Barcelona រវាងឆ្នាំ2013-2017 មុនពេលចាកចេញមកទីក្រុងប៉ារីស ក្នុងតម្លៃខ្លួនកំណត់ត្រាពិភពលោក គឺ 198លានផោន។
ដោយសារតែនៅលីកបារាំង ការប្រកួតប្រជែងហាក់មិនសូវមានភាពខ្លាំងដូចនៅអេស្ប៉ាញ ហើយ Neymar ក៏ហាក់បង្ហាញកាយវិការដូចជាចង់យកឱកាសនេះដើម្បីទៅកាន់អតីតក្លិបរបស់ខ្លួនផងនោះ ក្លិបបច្ចុប្បន្នរបស់គេ Paris Saint Germaint បានប្រកាសបង្កើនប្រាក់ថ្លៃឈ្នួលរបស់កីឡាកររូបនេះល់ទៅ 64ម៉ឺនផោនក្នុង 1សប្ដាហ៍។
គួរបញ្ជាក់ដែរថា Neymar រកបាន 18គ្រាប់ និង Assist 10គ្រាប់ គិតគ្រប់កម្មវិធីឲ្យ PSG រដូវកាលនេះ និងបច្ចុប្បន្នមានចំណូល 60ម៉ឺនផោនក្នុង 1សប្ដាហ៍៕
April 23, 2020
ជំងឺសួតធ្លុះ កើតចេញពីអ្វី?
សួតធ្លុះ មានន័យថា ជាសភាវដែលមានលេចខ្យល់ចេញពីថង់ខ្យល់( alveoli ) ចូលទៅដក់នៅក្នុងប្រឡោះរុំសួត( pleuralcavity ) ខ្យល់ដែលលេចនោះនឹងកើនច្រើនឡើងជារឿយៗ និងរុញឱ្យសាច់សួតសំប៉ែតចុះ ធ្វើឱ្យមានអាការពិបាកដកដង្ហើម និងអាចកើតសភាវគាំងដល់ស្លាប់បាន តែជាសភាវដែលកម្រជួបប្រទះណាស់។
មូលហេតុរបស់ ជំងឺសួតធ្លុះ
អាចបណ្តាលមកពីការរងរបួសហៅថា ធ្លុះសួតដោយសាររបួស ដូចជា ត្រូវគ្រាប់កាំភ្លើង ត្រូវចាក់ដោយកាំបិត រថយន្តបុក ឬនៅសុខៗក៏អាចកើតឡើងដោយឯកឯងបានដែរ ហៅថា សួតធ្លុះដែលកើតឡើងឯង( spontaneous pneumothorax ) កើតឡើងដោយសារតែមានការបែករបស់ថង់ខ្យល់ដែលខុសប្រក្រតី ច្រើនជួបប្រទះនៅលើអ្នកដែលកើតជំងឺថង់ខ្យល់រីក ក្រៅពីនេះនៅអាចជួបប្រទះលើអ្នកដែលកើតជំងឺ ហឺត រលាកសួត របេងសួត ផងដែរ អ្នកខ្លះអាចកើតដោយមិនដឹងពីមូលហេតុក៏មាន ច្រើនជួបនៅលើមនុស្សដែលជក់បារី។ បើរន្ធលេចមិនច្រើន អាចគ្មានអាការធ្ងន់ធ្ងរទេ និងបាត់ទៅវិញបានដោយឯកឯងក្នុងរយៈពេលតែមិនប៉ុន្មានថ្ងៃប៉ុណ្ណោះ តែបើលេចខ្យល់ចេញមកច្រើន ច្រើនតែធ្វើឱ្យកើតអាការដង្ហក់ធ្ងន់ធ្ងរ បើជួយសង្រ្គោះមិនទាន់អាចបណ្តាលឱ្យស្លាប់បាន។
អាការរបស់ សួតធ្លុះ
មានអាការដែលបង្ហាញឱ្យឃើញបានច្រើនយ៉ាង អាស្រ័យលើខ្នាតរបស់រន្ធដែលលេច និងសភាពរបស់អ្នកជំងឺ អ្នកខ្លះអាចមានអារម្មណ៍ឈឺដើមទ្រូងអួលឡើងភ្លាមៗ និងអាចឈឺរាលទៅរកស្មា ឬដៃ ហើយតមកមានអារម្មណ៍ដកដង្ហើមដង្ហក់ អ្នកខ្លះអាចមានអាការក្អកស្ងួតរួមជាមួយផង។ អ្នកខ្លះទៀតអាចគ្រាន់តែមានអារម្មណ៍ថាណែនថប់ក្នុងដើមទ្រូង ឬឈឺដើមទ្រូងម្តងម្កាលស្រដៀងនឹងអាការរលាកស្រទាប់រុំសួត នៅពេលបណ្តោយទុកចោលយូរថ្ងៃ បើខ្យល់នៅតែលេចចេញមករឿយរហូតធ្វើឱ្យសួតម្ខាងសំប៉ែតនោះ នឹងធ្វើឱ្យអ្នកជំងឺមានអាការដង្ហក់ខ្លាំង ជីពចរលោតញាប់ និងសម្ពាធឈាមធ្លាក់ចុះ។
អ្វីដែលពិនិត្យឃើញ
ដើមទ្រូងខាងដែលឈឺគោះទៅឮរាងស្រឡះជាងម្ខាងទៀត ប្រើប្រដាប់ស្តាប់នៅលើសួតនឹងមិនបានឮសូរសំឡេងដកដង្ហើមឡើយ ឬបានឮ តែតិចបំផុត បំពង់ខ្យល់ធំអាចវៀចទៅផ្នែកម្ខាងទៀត។
អាការជ្រៀតជ្រែក
បើកើតធ្ងន់ធ្ងរ អាចធ្វើឱ្យកើតសភាវគាំងបេះដូងទាន់ហន់( acute pulmonary failure ) ឬកើតសភាវគាំងសន្លប់បាន។
ការព្យាបាលអាការសួតធ្លុះ
1- បើសិនមានការសង្ស័យ ចូរប្រញាប់បញ្ជូនទៅមន្ទីរពេទ្យ លោកគ្រូពេទ្យអាចនឹងត្រូវឆ្លុះអេក្សរេយ៍មើលដើម្បីឱ្យប្រាកដក្នុងចិត្ត ឬប្រើម្ជុលតភ្ជាប់ជាមួយបំពង់សេរ៉ាំងចាក់ថ្នាំចោះនៅកន្លែងចន្លោះឆ្អឹងជំនីទី 2 (ដោយចាក់ថ្នាំស្ពឹកជាមុន) បើសិនមានខ្យល់បាញ់ចូលមកក្នុងបំពង់សេរ៉ាំងចាក់ថ្នាំនោះ សម្តែងថា ពិតជាមានខ្យល់នៅក្នុងចន្លោះរុំសួតមែន ក៏នឹងធ្វើការចោះទម្លាយឱ្យខ្យល់ចេញ។ បើរកឃើញមូលហេតុច្បាស់លាស់ លោកគ្រូពេទ្យក៏នឹងធ្វើការព្យាបាលជំងឺដែលជាដើមហេតុនោះផងដែរ។
2- លើអ្នកជំងឺដែលមានអាការដង្ហក់ខ្លាំង និងរកឃើញថាបំពង់ខ្យល់ធំត្រូវបានរុញទៅផ្នែកផ្សេង តែមិនអាចបញ្ជូនទៅមន្ទីរពេទ្យបាន ចូរធ្វើការជួយសង្រ្គោះបថម ដោយប្រើម្ជុលតចូលជាមួយខ្សែសេរ៉ូមឱ្យណែន ព្រលែងចុងខ្សែសេរ៉ូមម្ខាងទៀតចូលទៅក្នុងដបទឹក ឬអាងដាក់ទឹកដែលមានកំពស់ទឹក 15 – 20 សង្ទីម៉ែត្រ ហើយចាក់ម្ជុលចូលទៅចន្លោះឆ្អឹងជំនីទី 2 ឱ្យធ្លុះស្រទាប់សាច់ទ្រូង នឹងឃើញមានពពុះខ្យល់ចេញមកឱ្យឃើញ រួចហើយប្រញាប់បញ្ជូនទៅមន្ទីរពេទ្យ និងត្រូវប្រយ័ត្នកុំឱ្យចុងខ្សែសេរ៉ូមចេញផុតពីទឹកជាដាច់ខាត។ នៅពេលឃើញថាពពុះខ្យល់ចេញមកតិចហើយ និងអាការរបស់អ្នកជំងឺធូរស្រាលហើយនោះ អាចដកម្ជុលចេញបាន។
ចំណុចណែនាំ
អ្នកជំងឺដែលមានសភាវ សួតធ្លុះ កើតឡើងឯងដោយមិនដឹងពីមូលហេតុ នៅពេលព្យាបាលជាហើយ ប្រមាណជា 50% អាចមានអាការកម្រើកឡើងវិញ និងបើមានប្រវត្តិធ្លាប់ជក់បារីផងនោះ គួរតែតមជក់បារីដើម្បីកុំឱ្យមានការកម្រើកឡើងវិញ៕
April 23, 2020
អ្នកជំនាញថាភ្នំពេញខ្វះទឹកសឹងរាល់ថ្ងៃដោយសារសំណង់កើនគំហុកខ្លាំងពេក
បច្ចុប្បន្ននេះ នៅក្នុងទីក្រុងភ្នំពេញនៅតំបន់មួយចំនួនជាពិសេសតំបន់ជាយក្រុង តែងតែមានបញ្ហាខ្វះខាតទឹកស្អាតប្រើប្រាស់ដោយតំបន់ខ្លះមានទឹកចេញខ្សោយខ្លាំង ខណៈផ្ទះខ្លះបានដាច់ទឹកជាញឹកញាប់។
ឯកឧត្តម ហេង សុខគង់
ឆ្លើយតបនឹងបញ្ហានេះឯកឧត្តម ហេង សុខគង់ រដ្ឋលេខាធិការ និងជាអ្នកនាំពាក្យក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានលើកឡើងថា បញ្ហាខ្វះទឹកប្រើប្រាស់នេះដោយសារតែរាជធានីភ្នំពេញ មានកំណើនសំណង់អគារខ្ពស់ៗយ៉ាងកំហុកទើបធ្វើឱ្យចរន្តទឹកនៅតំបន់មួយចំនួនក្នុងរាជធានីភ្នំពេញត្រូវខ្វះទឹករាល់ថ្ងៃ តែទោះជាយ៉ាងនេះក្តី រដ្ឋាករទឹកស្វយ័តរាជធានភ្នំពេញ កំពុងតែពិនិត្យពិចារណាលើចំណុចនេះដើម្បីរិះរកវិធានការដើម្បីដោះស្រាយជូនប្រជាជន។
លោក សោម សិទ្ធ
ពាក់ព័ន្ធនឹងបញ្ហានេះដែរ លោក សោម សិទ្ធ ប្រធាននាយកដ្ឋានបញ្ញត្តកម្មទឹកស្អាតនៃក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានលើកឡើងថារដ្ឋាករស្វយ័តរាជធានីភ្នំពេញនឹងសាងសង់ជាបន្តបន្ទាប់នូវអាងប្រព្រឹត្តកម្មទឹកស្អាតដើម្បីសម្រេចគោលដៅឱ្យបាន 1លានម៉ែត្រគូបនៅឆ្នាំ 2030 សម្រាប់ផ្គត់ផ្គង់ប្រជាពលរដ្ឋនៅក្នុងរាជធានីភ្នំពេញ និងឆ្លើយតបជាមួយនឹងការអភិវឌ្ឍទីក្រុង៕
April 23, 2020
ដំណាំត្រកួន ងាយដាំ ងាយបានផល តែមានផលប្រយោជន៍ច្រើន
ត្រកួនជាប្រភេទបន្លែដែលងាយដាំ ងាយថែទាំ ឆាប់ទទួលបានផល និងមានផលប្រយោជន៍ច្រើនសម្រាប់សុខភាព។ មិនថាមុខម្ហូបឆា សម្ល ជ្រក់ ឬធ្វើជាអន្លក់នោះទេ ត្រកួនអាចត្រូវបានគេច្នៃ និងចូលរួមចំណែកបង្កើនរសជាតិដល់ម្ហូបអាហារជាច្រើនសម្រាប់ប្រជាជនខ្មែរយើង។ ក្រៅពីនេះ ដំណាំប្រភេទនេះក៏មានតម្លៃគួរសម ហើយសំបូរទីផ្សារផងដែរ។
លោក ខ្នុរ ខាន់ កសិករដាំត្រកួននៅខេត្តកណ្តាលបានលើកឡើងថា ដំណាំត្រកួនជាដំណាំដែលមានប្រជាប្រិយភាព និងទទួលបានការគាំទ្រច្រើនពីប្រជាជនគ្រប់រូបនៅកម្ពុជា។ ផលដែលទទួលបានពីត្រកូនមិនសូវខ្វះទីផ្សារនោះទេ ព្រោះមានម៉ូយមកទទួលទិញដល់ផ្ទះតែម្តង ដែលសម្រាប់គ្រួសារគាត់ អាចទទួលបានចំណូលប្រមាណ 2 ទៅ3លានរៀល ក្នុងពេលប្រមូលផលម្តងៗលើផ្ទៃដីប្រមាណ 70អាដែលគាត់បានដាំដុះ។
ចំពោះវិធីដាំវិញ គឺមានលក្ខណៈងាយស្រួលបំផុត ហើយក៏មិនលំបាកថែទាំដែរ។ ដំបូងកគ្រាន់តែភ្ជូររាស់ ឬកាប់ឆាយជារងទុកចោលរយៈពេល 2ថ្ងៃដើម្បីឱ្យងាប់ស្មៅ ឬសម្លាប់មេរោគនៅក្នុងដី។ ក្រោយលើករងហើយ គ្រាន់តែព្រួសគ្រាប់ត្រកូនដែលទិញពីផ្សារ និងស្រោចទឹកមួយថ្ងៃ 3ដងសម្រាប់រដូវប្រាំង ឬទុកឱ្យត្រូវទឹកភ្លៀងធម្មតាសម្រាប់រដូវវស្សារង់ចាំរហូតដល់រយៈពេល 18ថ្ងៃនឹងទទួលបានផលជាក់ជាមិនខាន។
ក្រោយពេលត្រកូនដុះហើយ អ្នកដាំគ្រាន់តែឧស្សាហ៍មើលថែទាំចំពោះគុណភាពដី និងដកស្មៅ ឬរុក្ខជាតិនានាដែលរំខានដល់ការលូតលាស់របស់ត្រូកួន នោះយើងនឹងអាចទទួលផលបានច្រើនដងលើដីដែលដាំលើកទី1នេះ។ ហើយដំណាំប្រភេទនេះមិនទាមទារឱ្យមានការថែទាំច្រើន ក៏វាដុះលូតលាស់ដោយខ្លួនឯងឡើងមកវិញដែរក្រោយពេលច្រូត ឬប្រមូលផលរួច។
សម្រាប់ទីផ្សារវិញឈ្មួញកណ្តាលដែលតែងតែប្រមូលទិញត្រកូនតាមផ្ទះយកទៅលក់នៅផ្សារ លោក ឆុំ បានប្រាប់អ្នកយកព័ត៌មានយើងថា ខុសពីដំណាំដទៃ ត្រកួនជាបន្លែដែលងាយលក់ ព្រោះវាត្រូវជាមួយនឹងមុខម្ហូបច្រើនរបស់ខ្មែរយើង។ ក្រៅពីនេះចំពោះហាងឆេងតម្លៃវិញក៏ដូចគ្នា វាមានហាងឆេងល្អជាងបន្លែផ្សេងៗ ដោយបន្លែខ្លះឡើងចុះក្នុងរយៈពេលយូរ តែសម្រាប់ត្រកួនចុះថ្លៃមិនយូរទេ ហើយសម្រាប់រដូវប្រាំង ឬរដូវមិនសូវសំបូរទឹកវិញ តម្លៃត្រកួនកាន់តែឡើងខ្ពស់ថែមទៀត៕
April 23, 2020
ខែក្តៅឆ្នាំនេះកម្ពុជាមិនខ្វះអគ្គិសនីប្រើប្រាស់ដូចឆ្នាំមុនទេ
ក្នុងរយៈពេលប៉ុន្មានឆ្នាំចុងក្រោយនេះ ឱ្យតែដល់រដូចក្តៅ ប្រទេសកម្ពុជាយើងត្រូវប្រឈមជាមួយនឹងបញ្ហាកង្វះខាតអគ្គិសនីប្រើប្រាស់ ដែលបណ្តាលឱ្យអគ្គិសនីនៅក្នុងប្រទេសត្រូវដាច់ជាញឹកញាប់ ព្រោះត្រូវផ្លាស់ប្តូរតំបន់គ្នាប្រើប្រាស់។
បញ្ហាកង្វះភ្លើងប្រើប្រាស់នៅរដូវក្តៅនេះ ដោយសារតែឆ្នាំមុនៗវារីអគ្គីសនីនៅកម្ពុជាមានបញ្ហាខ្វះទឹក ដែលធ្វើឱ្យមានភាពរាំងស្ទះ និងគ្មានចរន្តអគ្គិសនីប្រើប្រាស់។ ក្រោយមកដើម្បីជាដំណោះស្រាយ រដ្ឋាភិបាលបានទិញម៉ាស៊ីនផលិតអគ្គិសនីធំៗចំនួន 2 ពីបរទេសដើម្បីផ្គត់ផ្គង់ឱ្យបានគ្រប់គ្រាន់សម្រាប់ប្រជាជនដែលត្រូវការអគ្គិសនីទូទាំងប្រទេស តែម៉ាស៊ីនទាំង2គ្រឿនោះមិនទាន់បានតម្លើងរួចរាល់នៅឡើយទេសម្រាប់ការដាក់ឱ្យដំណើរការផលិតអគ្គិសនី។
ទោះជាយ៉ាងនេះក្តីនៅឆ្នាំនេះកម្ពុជាយើងទំនងជាមិនមានបញ្ហាខ្វះអគ្គិសនីប្រើប្រាស់នោះទេ ព្រោះថ្មីៗនេះថ្លែងក្នុងវេទិកាអ្នកនាំពាក្យរាជរដ្ឋាភិបាល ឯកឧត្តម វិចទ័រ ហ្សូនា អ្នកនាំពាក្យក្រសួងរ៉ែ និងថាមពល បានមានប្រសាសន៍ថា៖ «ខ្ញុំគិតថា ឆ្នាំនេះយើងមិនមានការខ្វះខាតថាមពលទេ ហើយវារីអគ្គិសនីរបស់យើងក៏មានទឹកក្នុងបរិមាណខ្ទង់ 70% សម្រាប់ការផ្គត់ផ្គង់។ ហើយបើតាមការព្យាករណ៍របស់ក្រសួងធនធានទឹក និងឧត្តុនិមយ យើងអាចនឹងមានភ្លៀងឆាប់ជាងឆ្នាំកន្លងមក»។
ចំពោះបញ្ហាម៉ាស៊ីនដែលទិញពីបរទេសវិញ ឯកឧត្តមបានលើកឡើងថាយើងបានទិញម៉ាស៊ីនភ្លើង 200មេកាវ៉ាត់ពីអាលឺម៉ង់ និង200ម៉េកាវ៉ាត់ពីហ្វាំងឡង់ សរុបទាំងអស់ 400មេកាវ៉ាត់ដើម្បីផលិតអគ្គិសនី។ ម៉ាស៊ីនទាំងនេះត្រូវបានសាងសង់នៅល្វាឯម ហើយបានតាមការបញ្ជាក់របស់អគ្គិសនីកម្ពុជា បានឱ្យដឹងថាការសាងសង់សម្រេចបាន 80% ហើយ តែយើងនៅមានឧបសគ្គខ្លះដោយសារអ្នកជំនាញរបស់ប្រទេសទាំងពីរខាងលើមានឧបសគ្គក្នុងការធ្វើដំណើរព្រោះដំណាក់កាល covid-19 នេះការធ្វើដំណើរឆ្លងប្រទេសត្រូវបានរឹតត្បិត។ ក្រោយពេលស្ងប់ស្ងាត់ covid-19 យើងនឹងអាចដោះស្រាយបញ្ហាទាំងអស់នេះ ដោយមានអ្នកជំនាញមកពិនិត្យឱ្យបានច្បាស់លាស់៕

April 23, 2020