Author: ធឿន មករា

មែនឬ? ដែលថា មិនគួរញ៉ាំទឹកក្នុងដបដែលទុកចោលនៅក្នុងឡាន…
មិនថាអ្នកមានរថយន្តផ្ទាល់ខ្លួន ឬអត់នោះទេ តែពេលណាក៏ដោយដែលអ្នកជិះនៅក្នុងឡាន អ្នកតែងតែឃិញមានដបទឹកនៅក្នុងឡានជានិច្ច មិនថាតែដបតូច ដបធំ ឬមានទឹកទាំងដបៗដែលជារង្វាន់បានមកពីពេលចាក់សាំងឡាននោះទេ ក្នុងអំឡុងពេលធ្វើដំណើរ បើស្រេកទឹកក៏នឹងស្រវារាវរកពីក្រោមកៅអីយកមកញ៉ាំ។ ការពិតទៅ តើទឹកពិសាដែលទុកចោលនៅក្នុងឡានបែបនេះ នឹងមានគ្រោះថ្នាក់ចំពោះសុខភាពដែរឬទេនោះ ឡារ៉ែនសូមនាំយកចម្លើយមកជម្រាបជូនមិត្តអ្នកអានដូចខាងក្រោម។
តើទឹកពិសាដែលទុកចោលនៅក្នុងឡាន មានគ្រោះថ្នាក់ចំពោះសុខភាពដែរឬទេ?
តាមរយៈជំនឿដែលថា ទឹកពិសាដែលទុកចោលនៅក្នុងរថយន្តនោះ ត្រូវចំហាយក្តៅដុត ឬត្រូវពន្លឺថ្ងៃចាំងចំ រហូតធ្វើឱ្យដបជ័រផ្លាស្ទិកឡើងក្តៅ រលាយលាយឡំជាមួយទឹកពិសាដែលនៅក្នុងនោះ ការពិតទៅបច្ច័យប្រថុយនឹងគ្រោះថ្នាក់បែបនេះក៏ត្រូវមកមើលថា តើវាមានតិចច្រើនប៉ុនណា ដូចជា ៈ
– សីតុណ្ហភាពកំដៅនៅក្នុងរថយន្តក្តៅខ្លាំង តិចប៉ុនណា?
– ដបទឹកពិសាផ្លាស្ទិក ជាដបជ័រផ្លាស្ទិកប្រភេទណា ធន់កំដៅបានខ្លាំងតិចប៉ុនណា?
តើដបទឹកពិសាបរិសុទ្ធក្នុងប្រទេសយើង ជាដបផ្លាស្ទិកប្រភេទណា?
ដបទឹកបរិសុទ្ធក្នុងប្រទេសយើងនេះ ការពិតទៅមានច្រើនប្រភេទណាស់ តែភាគច្រើនៗតែជាដប PET (ដបជ័រថ្លាៗ) ឬ PETE ដែលចាត់ទុកថាជាប្រភេទផ្លាស្ទិកលេខ 1 អាចការពារការជ្រាបចូលរបស់ហ្កាសផ្សេងៗបានយ៉ាងល្អ ទើបត្រូវបាននាំយកមកដាក់ទឹកពិសាបរិសុទ្ធ ទឹកភេសជ្ជៈផ្លែឈើផ្សេងៗ ប្រេងឆា ឬសូម្បីតែទឹកជ្រលក់ផ្សេងៗក៏បាន។ ដបទឹកពិសាបរិសុទ្ធប្រភេទ PET នេះអាចធន់នឹងកំដៅបានខ្ពស់ដល់ទៅ 60 – 95 អង្សាសេលសៀសឯណោះ។
បើដបផ្លាស្ទិកត្រូវនឹងកំដៅ តើវានឹងបញ្ចេញសារធាតុគ្រោះថ្នាក់ចេញមកលាយឡំជាមួយទឹកដែលនៅក្នុងដបដែរឬទេ?
នៅមិនទាន់មានការអះអាងច្បាស់លាស់នៅឡើយថា នឹងមានគ្រោះថ្នាក់ដូចដែលគេបាននិយាយនោះដែរឬក៏ឡើយ តែក្នុងករណីដែលយើងទុកដបទឹកពិសាបរិសុទ្ធចោលនៅក្នុងឡាននោះ នឹងគ្មានបញ្ហាអ្វីឡើយ ព្រោះសីតុណ្ហភាពនៅក្នុងរថយន្តនោះមិនដល់ 60 អង្សាសេលសៀសឡើយ។
តែយ៉ាងណាក៏ដោយ ទឹកពិសាបរិសុទ្ធនៅក្នុងដបជ័រផ្លាស្ទិកដែលយើងញ៉ាំរាលថ្ងៃនេះ ត្រូវបានផលិតឡើងជាដបដែលសម្រាប់ប្រើបានតែម្តង រួចបោះចោលប៉ុណ្ណោះ ដូច្នេះបើចង់ប្រើប្រាស់ម្តងទៀត គួរប្រយ័ត្នប្រយែងរឿងភាពស្អាត និងអនាម័យឱ្យបានល្អជាមុនសិន៕
May 29, 2020
ធនាគារជាតិនៃកម្ពុជាបញ្ជាក់ថាក្រដាសប្រាក់ 1ដុល្លារ 2ដុល្លារ និង5ដុល្លារ នៅតែអាចចរាចរណ៍លើទីផ្សារជាធម្មតា
ធនាគារជាតិនៃកម្ពុជាបានចេញសេចក្តីប្រកាសថា ក្រដាសប្រាក់ 1ដុល្លារ 2ដុល្លារ និង5ដុល្លារ នៅតែអាចចរាចរណ៍លើទីផ្សារដដែល គ្មានការហាមឃាត់នោះទេ។
ធនាគារជាតិនៃកម្ពុជាបានឱ្យដឹងថាដោយមើលឃើញថាទាំងក្នុងឃ្លាំងរបស់គ្រឹះស្ថានធនាគារ និងហិរញ្ញវត្ថុ និងធនាគារជាតិនៃកម្ពុជា មានការគរជន់ក្រដាសប្រាក់ដុល្លារអាមេរិកប្រភេទ 1ដុល្លារ 2ដុល្លារ និង5ដុល្លារ ដែលនេះសរបញ្ជាក់ថា តម្រូវការនៃក្រដាសប្រាក់ទាំងនេះ មានកម្រិតទាបក្នុងទីផ្សារ អង្គប្រជុំបានឯកភាពដាក់ចេញ នូវវិធានការមួយចំនួនដូចខាងក្រោម៖
-ធនាគារជាតិនៃកម្ពុជា នឹងផ្តល់ពេលវេលាចំនួន3ខែ ចាប់ពីថ្ងៃទី1 ខែមិថុនា ឆ្នាំ2020 ដល់ថ្ងៃទី31 ខែសីហា ឆ្នាំ2020 ដល់គ្រឹះស្ថានធនាគារនិងហិរញ្ញវត្ថុ ដើម្បីនាំយកក្រដាសប្រាក់ដុល្លារអាមេរិកប្រភេទ 1ដុល្លារ 2ដុល្លារ និង5ដុល្លារ មកធនាគារជាតិនៃកម្ពុជា ដើម្បីដឹកជញ្ជូនចេញទៅក្រៅប្រទេស ដោយឥតគិតកម្រៃសេវា ។
-បន្ទាប់ពីថ្ងៃទី31 ខែសីហា ឆ្នាំ2020 ធនាគារជាតិនៃកម្ពុជា នឹងផ្ទេរការចំណាយដឹកជញ្ជូនចេញ ទៅក្រៅប្រទេសលើក្រដាស ប្រាក់ដុល្លារអាមេរិកប្រភេទ 1ដុល្លារ 2ដុល្លារ និង5ដុល្លារ ឱ្យគ្រឹះស្ថានធនាគារនិងហិរញ្ញវត្ថុ ជាអ្នករ៉ាប់រងវិញ។ ចំពោះការទទួលក្រដាសប្រាក់ដុល្លារអាមេរិកប្រភេទ 10ដុល្លារ ឡើងទៅ គឺមិនមានកម្រៃសេវាទេ ។
-ធនាគារជាតិនៃកម្ពុជា នឹងបន្តពិភាក្សាជាមួយ គ្រឹះស្ថានធនាគារនិងហិរញ្ញវត្ថុ ដើម្បីឈានទៅកំណត់ ពេលវេលាណាមួយសមស្រប ដើម្បីផ្អាកការទទួល ក្រដាសប្រាក់ដុល្លារអាមេរិក ប្រភេទតូចទាំងស្រុងពីគ្រឹះស្ថានធនាគារ និងហិរញ្ញវត្ថុ។
គួរបញ្ជាក់ថា ការពិភាក្សាក្នុងកិច្ចប្រជុំខាងលើ មានការចូលរួមមតិពីតំណាង ក្នុងវិស័យលក់រាយមួយចំនួនផងដែរ។ ធនាគារជាតិនៃកម្ពុជា ក៏សូមបញ្ជាក់ផងដែរថា ការអនុវត្តវិធានការខាងលើ មិនមានន័យថា ជាការហាមឃាត់ចរាចរ ក្រដាសប្រាក់ដុល្លារអាមេរិក ប្រភេទតូចៗទាំងនេះ នៅលើទីផ្សារនោះទេ៕
May 29, 2020
CDC ទើបតែអនុម័តគម្រោងវិនិយោគ5បន្ថែមទៀតក្នុងទំហំទឹកប្រាក់ជាង 200លានដុល្លារ
ក្រុមប្រឹក្សាអភិវឌ្ឍកម្ពុជាថ្មីៗនេះទើបតែបានអនុម័តគម្រោងវិនិយោគសំខាន់ៗចំនួន5បន្ថែមទៀតក្នុងទំហំទឹកប្រាក់ប្រមាណ 252លានដុល្លារអាមេរិកនៅក្នុងតំបន់នានានៅកម្ពុជា។
គម្រោងទាំងអស់នោះទី-1 ក្រុមហ៊ុន POLY TIMPEX (CAMBODIA) ENTERPRISE CO., LTD. ជាគម្រោងបង្កើតរោងចក្រផលិតវត្ថុអនុស្សាវរីយ៍គ្រប់ប្រភេទ ដែលមានទីតាំងវិនិយោគស្ថិតនៅភូមិកំពង់ព្រះ ឃុំតាំងក្រាំង ស្រុកបាធាយ ខេត្តកំពង់ចាម មានទុនវិនិយោគប្រមាណ 2.8លានដុល្លារអាមេរិក និងអាចបង្កើតការងារបានចំនួន 100កន្លែង។
2- ក្រុមហ៊ុន SURE FANCY LEATHER GOODS MANUFACTURER CO., LTD. ជាគម្រោងបង្កើតរោងចក្រផលិតស្បែកជើង ដែលមានទីតាំងវិនិយោគស្ថិតនៅភូមិស្រែជម្រៅ សង្កាត់ចោមចៅទី2 ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ 2.9លានដុល្លារអាមេរិក និងអាចបង្កើតការងារបានចំនួន 433កន្លែង។
3- ក្រុមហ៊ុន CAM M J AGRICULTURAL CO., LTD. ជាគម្រោងបង្កើតរោងចក្រកែច្នៃផ្លែឈើគ្រប់ប្រភេទ ដែលមានទីតាំងវិនិយោគស្ថិតនៅភូមិអង្គ្រង ឃុំអង្គពពេល ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ 5.5លានដុល្លារអាមេរិក និងអាចបង្កើតការងារបានចំនួន 1,216កន្លែង។
4- ក្រុមហ៊ុន HOUNEN SOLAR INC CO., LTD.ជាគម្រោងបង្កើតរោងចក្រផលិត និងផ្គុំដំឡើងបន្ទះសូឡា ដែលមានទីតាំងវិនិយោគស្ថិតនៅភូមិក្តាន់រយ ឃុំដំណាក់អំពិល ស្រុកអង្គស្នួល ខេត្តកណ្តាល មានទុនវិនិយោគប្រមាណ 9.5លានដុល្លារអាមេរិក និងអាចបង្កើតការងារបានចំនួន 250កន្លែង។
5- ក្រុមហ៊ុន SPHP (CAMBODIA) CO., LTD.ជាគម្រោងអភិវឌ្ឍន៍វារីអគ្គិសនីស្ទឹងពោធិ៍សាត់1 អនុភាព80MW ដែលមានទីតាំងវិនិយោគស្ថិតនៅឃុំប្រម៉ោយ ស្រុកវាលវែង ខេត្តពោធិ៍សាត់ មានទុនវិនិយោគចំនួន 231.1លានដុល្លារអាមេរិក និងអាចបង្កើតការងារបានចំនួន 81កន្លែង៕

May 29, 2020
ក្រសួងថា ជំងឺគ្រុនឈាមអាចនឹងកើនឡើងក្នុងពេលខាងមុខ សូមអាណាព្យាបាលប្រុងប្រយ័ត្ន
មកដល់រដូវវស្សានេះ តំបន់ជាច្រើនក្នុងប្រទេសកម្ពុជាចាប់ផ្តើមមានទឹកដក់ និងក៏ជាពេលចាប់ផ្តើមកើតឡើងវិញនូវករណីជំងឺគ្រុនឈាមសម្រាប់កុមារផងដែរ។
ក្រសួងសុខាភិបាលបានបញ្ជាក់ថា ជំងឺគ្រុនឈាមក្នុងអំឡុងពេល 19សប្តាហ៍ដើមឆ្នាំ 2020 នេះបានកើតឡើងចំនួន 2,172ករណី ដែលចំនួនករណីឈឺ នឹងអាចបន្តកើនឡើងនៅតាមភូមិ ឃុំ និងទីប្រជុំជននៃបណ្តាខេត្តនាពេលខាងមុខ។
ជំងឺនេះកើតឡើងលើមនុស្សគ្រប់វ័យ ហើយវាបង្កឡើងដោយសត្វមូសខ្លាញីខាំងបឺតឈាមចម្លងមេរោគគ្រុនឈាមពីមនុស្សម្នាក់ទៅមនុស្សម្នាក់ទៀត។ សត្វមូសខ្លាបង្កើតកូនក្នុងទឹកថ្លា ស្អាត និងចូលចិត្តរស់នៅជិតមនុស្ស ហើយវាហើរបានចម្ងាយមិនដល់ 150ម៉ែត្រទេជុំវិញកន្លែងវាកើត។
តាមការស្រាវជ្រាវផ្នែកបាណកសាស្ត្ររបស់កម្មវិធីជាតិប្រយុទ្ធនឹងជំងឺគ្រុនឈាម បានឱ្យដឹងថាសត្វមូសខ្លាចូលចិត្តបង្កើតកូនចៅ នៅក្នុងសំបកកង់ឡាន និងសំបកម៉ូតូចាស់11ដង ច្រើនជាងវត្ថុសម្រាប់ប្រើប្រាស់ផ្សេង។ ការសិក្សារបស់កម្មវិធីជាតិប្រយុទ្ធនឹងជំងឺគ្រុនឈាមបានឱ្យដឹងថា ជំងឺគ្រុនឈាមក្នុងរដូវវស្សាកើតឡើងច្រើនជាង 2ដង បើធៀបនឹងរដូវប្រាំង ហើយវាមានទំនាក់ទំនងយ៉ាងខ្លាំងជាមួយនឹងកត្តាអាកាសធាតុដូចជាកម្តៅ ចំនួនទឹកក្លៀង និងសំណើម៕
May 29, 2020
ទូរទស្សន៍ សាមសុង Crystal UHD អច្ឆរិយភាពលើសពីការមើលឃើញ និងការកម្សាន្តដ៏ឥតខ្ចោះ
(ភ្នំពេញ) ថ្ងៃទី២៩ ខែឧសភា ឆ្នាំ ២០២០៖ ពេលទំនេរក្រៅពីការងារ និងការសិក្សា អផ្សុកពេកពេលនៅផ្ទះមិនដឹងធ្វើអ្វីក៏មើលទូរទស្សន៍ធម្មតាដើម្បីលំហែរអារម្មណ៍! ប៉ុន្តែលោកអ្នកប្រាកដទេថាទូរទស្សន៍ដែលលោកអ្នកកំពុងទស្សនាកម្សាន្តនោះអាចផ្តល់ឱ្យលោកអ្នកនូវភាពភ្ញាក់ផ្អើល…ភាពងាយស្រួល…ភាពទំនើបទាន់សម័យ និងភាពសប្បាយរីករាយយ៉ាងច្រើនសម្បូរបែប និងមានភាពរស់រវើកដែរឬទេ?
មិនបាច់រកនឹកឆ្លើយច្រើនទេដឹងតែអត់ហើយ…! ជាមួយនឹងទូរទស្សន៍ សាមសុង គ្រីស្តាល់ យូអេចឌី ( Samsung Crystal UHD TV) ថ្មីប្រចាំឆ្នាំ២០២០ នេះត្រូវបានបំពាក់មកជាមួយបច្ចេកវិទ្យាថ្មីចុងក្រោយបំផុតរបស់ សាមសុង ធ្វើឱ្យការទស្សនាតាម YouTube, លេងហ្គេម, ស្តាប់ចម្រៀង, ច្រៀង Karaoke ដោយការបញ្ជាតាមសំឡេងជាភាសាខ្មែរ, និងកម្មវិធីផ្សេងៗទៀតចេញពីទូរស័ព្ទដៃទៅកាន់ទូរទស្សន៍ (Screen Mirroring) ដោយធ្វើការបង្ហាញលើអេក្រង់ទូរទស្សន៍ដ៏ធំ…ច្បាស់ត្រជាក់ភ្នែកបំផុតជាមួយក្រុមគ្រួសារបានយ៉ាងរីករាយរាយ!
និយាយទៅដូចការទស្សនាភាពយន្តក្នុងរោងកុនអ៊ីចឹង! អ្នកណាថានៅផ្ទះអផ្សុកនោះ! មានទូរទស្សន៍ សាមសុង គ្រីស្តាល់ យូអេចឌី ( Samsung Crystal UHD TV) គ្មានពាក្យថាអផ្សុកនោះទេ!
ទូរទស្សន៍វៃឆ្លាតម៉ូឌែល សាមសុង គ្រីស្តាល់ យូអេចឌី ( Samsung Crystal UHD TV) ថ្មីជំនាន់ចុងក្រោយនេះគឺត្រូវបានរចនា និងអភិវឌ្ឍន៍ឡើងយ៉ាងផ្ចិតផ្ចង់បំផុតធ្វើយ៉ាងណាបំពេញតាមតម្រូវការរបស់អតិថិជននាពេលបច្ចុប្បន្នដោយធ្វើការផ្តល់ជូននូវបទពិសោធន៍ដ៏អស្ចារ្យបំផុតក្នុងការធ្វើឱ្យជីវិតកាន់តែទំនើបទាន់សម័យ និងរីករាយជានិច្ច!
ខាងក្រោមនេះគឺជាចំណុចពិសេសនៃការអភិវឌ្ឍន៍បច្ចេកវិទ្យាចុងក្រោយដែលមានតែលើទូរទស្សន៍វៃឆ្លាតម៉ូឌែល សាមសុង គ្រីស្តាល់ យូអេចឌី (Samsung Crystal UHD TV)៖
* Boundless Design
ទូរទស្សន៍ សាមសុង គ្រីស្តាល់ យូអេចឌី (Samsung Crystal UHD TV) ប្រចាំឆ្នាំ២០២០ នេះគឺត្រូវបានរចនាឡើងយ៉ាងផ្ចិតផ្ចង់ជាទីបំផុត ធ្វើឱ្យកម្រាស់ទូរទស្សន៍ស្តើងស្អាតស្ទើរតែគ្មានគែម! ដូច្នេះលោកអ្នកអាចរីករាយជាមួយនឹងការបង្ហាញរូបភាពធំច្បាស់ល្អលើអេក្រង់លាតពេញតួដែលពុំធ្លាប់មានពីមុនមកដោយពុំមានការរំខានភ្នែកឡើយ!
* Crystal Processor 4K
អាចបង្ហាញជូននូវរូបភាពកាន់តែលម្អិត កាន់តែច្បាស់ និងពណ៌កាន់តែដិតជ្រៅក្នុងកម្រិត 4K Resolution
ធ្វើឱ្យលោកអ្នករីករាយជក់ចិត្តជាមួយនឹងកម្រិតភាពច្បាស់ដ៏សែនម៉ដ្ឋ ភ្លឺច្បាស់ត្រជាក់ផ្នែក ពណ៌ដិតជ្រៅដូចស្ថិតក្នុងធម្មជាតិពិតៗតែម្តង!!
* 4K Upscaling
បច្ចេកវិទ្យានេះមានសមត្ថភាពធ្វើឱ្យគ្រប់ប្រភពរូបភាព ឬវីដេអូទាំងអស់ដែលមានលក្ខណៈមិនមែន 4K ក៏ដោយក៏បង្ហាញចេញក្នុងកម្រិត 4K ពិតៗតែម្តង!
* Mobile View (Mirroring Screen on TV)
មុខងារ និងបច្ចេកវិទ្យាថ្មីមួយនេះអាចឱ្យលោកអ្នកភ្ជាប់ការកម្សាន្ត ឬកម្មវិធីនានាពីទូរស័ព្ទដៃមកកាន់អេក្រង់ទូរទស្សន៍បានយ៉ាងងាយជាមួយនឹងបច្ចេកវិទ្យា (Screen Mirroring)! ដូច្នេះលោកអ្នកនឹងមិនខកខានក្នុងការប្រាស្រ័យទាក់ទងជាមួយការងារ…ការសិក្សា…និងការកម្សាន្តឡើយ!
* Intelligent Voice Assistants
ជាមួយនឹងជំនួយការក្នុងដំណើរការស្វែងរកតាម Voice សំឡេងដោយ Bixby លោកអ្នកអាចបញ្ជារទូរទស្សន៍យ៉ាងងាយស្រួល។ លើសពីនេះ លោកអ្នកអាចប្រើ មុខងារVoice សំឡេងជាភាសាខ្មែរដើម្បីស្វែងរកវីដេអូ ឬបទចម្រៀងក្នុង YouTube ដែលលោកអ្នកត្រូវការបានយ៉ាងងាយស្រួលជាមួយនឹងតេឡេបញ្ជាដែលផ្តល់ជូនក្នុងប្រអប់ជាមួយទូរទស្សន៍មកស្រាប់!
ជាមួយនឹងទូរទស្សន៍ សាមសុង គ្រីស្តាល់ យូអេចឌី (Samsung Crystal UHD TV) ធានាថាការកម្សាន្តរបស់លោកអ្នកពិតជាអស្ចារ្យ និងឥតខ្ចោះ …! ប្រញាប់ទិញមួយសម្រាប់គ្រួសារឥឡូវនេះភ្លាមទៅដើម្បីបង្កើតភាពសប្បាយ និងសុភមង្គល…!!
សម្រាប់ព័ត៌មានលម្អិតបន្ថែមសូមអញ្ជើញមកទស្សនាផលិតផលដោយផ្ទាល់តាមហាងទំនើបចែកចាយផលិតផល សាមសុង ទាំងអស់ដែលនៅជិតលោកអ្នកបំផុតទូទាំងប្រទេស ឬក៏អាចធ្វើការទំនាក់ទំនងទៅកាន់ផ្នែកសេវាបម្រើអតិថិជនតាមរយៈទូរស័ព្ទលេខ៖ 1800-20 32 32 !
* បញ្ជាក់៖ រាល់ការជាវទូរទស្សន៍ សាមសុង គ្រីស្តាល់ យូអេចឌី (Samsung Crystal UHD TV) តាមបណ្តាដេប៉ូចែកចាយផលិតផល សាមសុង ទាំងអស់កុំភ្លេចសួររកបណ្ណធានា!

May 29, 2020
អាហារពិសេសសម្រាប់កូនសម្លាញ់
ឡារ៉ែន សូមបបួលអ្នកម្តាយដែលជាប្រិយមិត្តអ្នកអានដែលតែងតែតាមដានទំព័រសុខភាពមាតា និងទារកមកសាកល្បងធ្វើមុខម្ហូបដែលងាយស្រួលធ្វើ ងាយស្រួលញ៉ាំ និងញ៉ាំហើយសប្បាយពោះសម្រាប់កូនតូច ដូចជាមុខម្ហូប បបរ និងស្ងោ ដែល ឡារ៉ែនធានាថានឹងក្លាយជាអាហារដ៏ពិសេសមួយនៅក្នុងចំណោមអាហារដែលកូនតូចដ៏ជាទីស្រឡាញ់របស់អ្នកម្តាយចូលចិត្តមិនខាន។
អាហារសម្រាប់កូនតូចវ័យ 6 – 8 ខែ
ស៊ុបប្រូខូលី
គ្រឿងផ្សំ
– ប៊័រ 30 ក្រាម – ទឹកដោះ 1/2 ពែង
– ខ្ទឹមសចិញ្រ្ចាំ 1 កំពិស – ខ្ទឹមបារាំងចិញ្ច្រាំ 1 មើម
– ទឹកស៊ុបសាច់មាន់ 2 – 3 ពែង
– ប្រូខូលីកាត់ជាចំណិតតូចៗ 2 ពែង
– ឈីសសេតតារ៍កោសជាខ្សែៗ 1 ពែង
វិធីធ្វើ
1- រំលាយប៊័រ ដាក់ខ្ទឹមបារាំងចិញ្រ្ចាំ និងខ្ទឹមស ឆាត្រឡប់រហូតឡើងទន់ ដាក់ប្រូខូលីចូលហើយឆាឱ្យឆ្អឹន រួចសឹមដាក់ទឹកស៊ុបសាច់មាន់ចូលឱ្យលិចបន្លែ។
2- ស្ងោឱ្យពុះ ហើយកិនឱ្យហ្មត់
3- ដាក់ទឹកដោះចូល ហើយស្ងោឱ្យពុះម្តងទៀត រួចដាក់ឈីសចូល កូរឱ្យរលាយសព្វ។
អាហារសម្រាប់កូនតូចវ័យ 9 – 10 ខែ
មាន់ស្ងោបន្លែ
គ្រឿងផ្សំ
– សាច់ភ្លៅមាន់ 1 ដុំ – ខ្ទឹមបារាំងចិញ្រ្ចាំ 1/4 មើម
– ទឹកស៊ុបសាច់មាន់ 1/2 ពែង – ខ្ទឹមសចិញ្រ្ចាំ 1 កំពិស
– មើមការ៉ុតហាន់ដុំជ្រុងតូចៗ 1 មើម – ប្រេងម្កាក់ 1/2 ស្លាបព្រាបាយ
– ដំឡូងបារាំងបកសំបកហើយ ហាន់ដុំជ្រុងតូចៗ 1 មើម
– ឃឹនឆាយបកសំបក ហើយហាន់ខ្លីៗ 1 ធាង
– ទឹកប៉េងប៉ោះខាប់ 1/2 ស្លាបព្រាបាយ
វិធីធ្វើ
1- ដាក់សាច់ភ្លៅមាន់ចូលក្នុងខ្ទះដែលមានខ្លាញ់បន្តិច ទុកឱ្យឆ្អឹនទាំងសាច់ និងស្បែក
2- ទុកឱ្យត្រជាក់បន្តិច រួចហើយបកស្បែក និងជៀរយកតែសាច់ចេញមកចិញ្រ្ចាំឱ្យតូចៗ
3- ឆាខ្ទឹមបារាំងចិញ្រ្ចាំនៅក្នុងឆ្នាំងមួយផ្សេងទៀតជាមួយប្រេងម្កាក់រហូតដល់ឡើងឆ្អឹនទន់
4- ដាក់សាច់មាន់ ការ៉ុត ឃឹនឆាយ ដំឡូងបារាំង ខ្ទឹមស និងទឹកប៉េងប៉ោះចូលទៅឆាត្រឡប់ឱ្យចូលគ្នា
5- ដាក់ទឹកស៊ុបសាច់មាន់ចូលទៅ ហើយស្ងោឱ្យពុះ បន្ថយភ្លើង និងស្ងោតទៅទៀតប្រមាណ 20 នាទី ឬរហូតទាល់តែបន្លែឡើងទន់
6- កិនឱ្យហ្មត់ មុននឹងយកទៅបញ្ចុក
អាហារសម្រាប់កូនតូចវ័យ 11 – 12 ខែ
ស្ទីវតៅហ៊ូ
គ្រឿងផ្សំ
– ប្រេងល្អ 1 – 2 ស្លាបព្រាបាយ – ខ្ទឹមឥណ្ឌាហាន់ជ្រុងដុំតូចៗ 1 មើម
– តៅហ៊ូដុំហាន់ដុំជ្រុងតូចៗ 1 ដុំ – ទឹកស្ងោបន្លែ ឬសាច់មាន់ 1 ពែង
– ការ៉ុតហាន់ដុំជ្រុងតូចៗ 1/4 ពែង – ស្លឹកខ្ទឹមហាន់ល្អិតៗ 1/4 ពែង
– ប៉េងប៉ោះពុះខ្វេះគ្រាប់ចេញ រួចហានដុំជ្រុងតូចៗ 1 ពែង
វិធីធ្វើ
1- ឆាខ្ទឹមឥណ្ឌា និងការ៉ុតឱ្យទន់នៅក្នុងប្រេងល្ង ដាក់ប៉េងប៉ោះចូលឆាជាមួយ
2- ចាក់ទឹកស្ងោបន្លែ ឬសាច់មាន់ ស្ងោជាមួយបន្លែ ស្ងោឱ្យទឹករីងអស់ពាក់កណ្តាល
3- ដាក់តៅហ៊ូចូលទៅ ស្ងោឱ្យទន់ទាំងអស់រហូតនៅសល់ទឹកខាប់ៗ
4- ដាក់ស្លឹកខ្ទឹមកូរច្របល់ឱ្យសព្វ
អាហារសម្រាប់ក្មេងតូចអាយុ 1 ឆ្នាំឡើង
សណ្តែកគួចំហុយស្រួយ ជាមួយទឹកជ្រលក់ប៉េងប៉ោះ
គ្រឿងផ្សំទឹកជ្រលក់ប៉េងប៉ោះ
– ផ្លែប៉េងប៉ោះបកសំបកហើយ 2 ផ្លែ – ខ្ទឹមសចិញ្រ្ចាំ 1 កំពិស
– ខ្ទឹមបារាំងចិញ្ច្រាំ 1/2 មើម -ការ៉ុតហាន់ជ្រុងដុំតូចៗ 1/2 មើម
– ស្លឹកវ៉ាន់ស៊ុយបារាំងចិញ្រ្ចាំ 1 ស្លាបព្រាបាយ – ប្រេងម្កាក់ 1 ស្លាបព្រាបាយ
– ទឹកប៉េងប៉ោះខាប់ 1/2 ស្លាបព្រាបាយ
គ្រឿងផ្សំសណ្តែកគួចំហុយស្រួយ
– សណ្តែកគួ កាត់កង់ៗ 100 ក្រាម – ស៊ុត 1 គ្រាប់ – អំបឹល ម្រេច
– ផាមេហ្សានឈីសកោស 1/4 ពែង – កំទេចនំប៉័ង 1/2 ពែង
វិធីធ្វើទឹកជ្រលក់ប៉េងប៉ោះ
1- ឆាការ៉ុត ខ្ទឹមបារាំង និងខ្ទឹមសឱ្យឆ្អឹន ជាមួយប្រេងម្កាក់
2- ដាក់ទឹកប៉េងប៉ោះខាប់ និងប៉េងប៉ោះចូលឆា ផ្សំរសជាតិដោយ អំបឹល ម្រេច តាមចូលចិត្ត
3- រំងាស់ឱ្យឡើងខាប់តាមតម្រូវការ ភ្លក្សកែកុនរសជាតិតាមចូលចិត្ត ដាក់ស្លឹកវ៉ាន់ស៊ុយបារាំងចូលច្របល់ឱ្យសព្វ
វិធីធ្វើសណ្តែកគួចំហុយស្រួយ
1- លាងសណ្តែកគួឱ្យស្អាត ជូតផ្តិតឱ្យស្ងួត
2- យកទៅច្របល់ជាមួយស៊ុត ហើយយកមកប្រមៀលៗលើកំទេចនំប៉័ងដែលលាយជាមួយឈីសរួចស្រេច
3+ យកទៅដាក់ចំហុយស្ងួតក្នុងកំដៅ 170 អង្សា ប្រមាណជា 15 នាទី ឬរហូតទាល់តែឆ្អឹន៕
May 29, 2020
ធនាគារជាតិនៃកម្ពុជា ប្រកាសដាក់ចេញវិធានការលើក្រដាសប្រាក់$1, 2$ និង 5$ ត្រឹមថ្ងៃទី31 ខែសីហា ឆ្នាំ2020
ដោយសារតែជួបបញ្ហាប្រឈមដ៏ច្រើនដោយសារក្រដាសប្រាក់ដុល្លារប្រភេទ 1, 2 និង 5ដុល្លារ កាលពីថ្ងៃទី28 ខែឧសភា ម្សិលមិញ ធនាគារជាតិនៃកម្ពុជា ឬ NBC បានជួបពិភាក្សាជាមួយតំណាងគ្រឹះស្ថានធនាគារ និងហិរញ្ញវត្ថុ និងមានការចូលរួមពីតំណាងក្នុងវិស័យលក់រាយមួយចំនួនផងដែរ អំពីបញ្ហាប្រឈមនៃចរាចរណ៍ក្រដាសដុល្លារអាមេរិកប្រភេទ1$, 2$ និង 5$ និងផលវិបាករបស់គ្រឹះស្ថានធនាគារ និងហិរញ្ញវត្ថុ និងធនាគារជាតិនៃកម្ពុជា ក្នុងការគ្រប់គ្រងប្រភេទក្រដាសប្រាក់ទាំងនេះ។
ដោយពិនិត្យឃើញថា ទាំងនៅក្នុងឃ្លាំងគ្រឹះស្ថានធនាគារ និងហិរញ្ញវត្ថុ និងធនាគារជាតិនៃកម្ពុជា មានការគរជន់ច្រើននៃក្រដាសប្រាក់ដុល្លារអាមេរិកប្រភេទ 1, 2 និង 5$ ដែលបានសរបញ្ជាក់ថា តម្រូវការនៃក្រដាសប្រាក់ទាំងនេះ មានកម្រិតទាបក្នុងទីផ្សារ អង្គប្រជុំពិភាក្សា បានឯកភាពដាក់ចេញនូវវិធានការមួយចំនួនដូចក្នុងសេចក្ដីប្រកាសព័ត៌មានខាងក្រោម…៖
(គួរបញ្ជាក់ផងដែរថា នៅចុងបញ្ចប់នៃសេចក្ដីប្រកាសព័ត៌មាននេះ ធនាគារជាតិនៃកម្ពុជា បានបញ្ជាក់នៅក្នុងចំណុចចុងក្រោយថា ធនាគារជាតិនៃកម្ពុជា នឹងបន្តពិភាក្សាជាមួយគ្រឹះស្ថានធនាគារ និងហិរញ្ញវត្ថុ ដើម្បីឈានទៅដល់ការកំណត់ពេលវេលាណាមួយសមស្រប ដើម្បីផ្អាកការទទួលក្រដាសប្រាក់ដុល្លារអាមេរិកប្រភេទតូចៗទាំងនេះទាំងស្រុងពីគ្រឹះស្ថានធនាគារ និងហិរញ្ញវត្ថុ។
និងធនាគារជាតិនៃកម្ពុជា ក៏សូមបញ្ជាក់ផងដែរថា ការអនុវត្ថវិធានការនៅក្នុងសេចក្ដីប្រកាសព័ត៌មាននេះ មិនមានន័យថា ជាការហាមឃាត់ចរាចរណ៍ក្រដាសប្រាក់ដុល្លារអាមេរិកប្រភេទតូចៗទាំងនេះនៅលើទីផ្សារនោះទេ)

May 29, 2020
ឈុត U22 របស់វៀតណាម នឹងហួសអាយុ នៅស៊ីហ្គេមឆ្នាំក្រោយ ពេលដែលខ្លួនធ្វើម្ចាស់ផ្ទះ
ព្រឹត្តិការណ៍កីឡាស៊ីហ្គេម ដែលជាការប្រកួតកីឡាករចម្រុះដ៏ធំជាងគេបំផុតនៅតំបន់អាស៊ានលើកក្រោយ នៅឆ្នាំ2021 គ្រោងនឹងធ្វើឡើងនៅក្នុងប្រទេសវៀតណាម ចាប់ពីថ្ងៃទី21 ខែវិច្ឆិកា ឆ្នាំ2021 រហូតដល់ថ្ងៃទី2 ខែធ្នូ ឆ្នាំ2021 ដោយប្រទេសនេះ បានជ្រើសយកទីក្រុងហាណូយ និងហូជីមិញដើម្បីធ្វើការប្រកួត។
បើក្រឡេកទៅមើលអាយុកីឡាករទាំង 18នាក់ កាលពីស៊ីហ្គេមកាលពីឆ្នាំ2019 កន្លងទៅនេះ កីឡាករវៀតណាមស្ទើរតែទាំងអស់នោះ នឹងត្រូវលើសអាយុ 22ឆ្នាំនៅឆ្នាំក្រោយ ដោយអាចនៅសេសសល់តែកីឡាករ 2រូបតែប៉ុណ្ណោះ។
គួរបញ្ជាក់ដែរថា ក្រុមបាល់ទាត់ជម្រើសជាតិវៀតណាមបានលើកពានកីឡាមួយនេះ លើវិញ្ញាសាបាល់ទាត់ ក្រោយឈរលេខ1 ក្នុងពូល B នឹងយកឈ្នះកម្ពុជា នៅវគ្គពាក់កណ្តាលផ្តាច់ព្រ័ត្រ ហើយបានយកឈ្នះក្រុមឥណ្ឌូនេស៊ី ដណ្តើមមេដាយមាសបានសម្រេច៕

May 28, 2020
កំពូលកីឡាការិនីស្ន៊ុកឃ័ររបស់កម្ពុជា បើកក្លិបស្ន៊ុកឃ័រ នៅប្រទេសកូរ៉េខាងត្បូង
កំពូលកីឡាការិនីស្ន៊ុកឃ័រកម្ពុជា អ្នកស្រី ស្រួង ភារី បានបង្ហើបឱ្យដឹងថា អ្នកស្រីបានចាប់ផ្តើមដំណើរការក្លិបស្ន៊ុកឃ័ររបស់អ្នកស្រីនៅក្នុងប្រទេសកូរ៉េខាងត្បូងហើយ។
ចំពោះមូលហេតុដែលអ្នកស្រី សម្រេចចិត្តថាបើកក្លិបស្នូកឃ័រនេះ គឺដោយសារតែអ្នកស្រីស្រឡាញ់វិស័យកីឡាមួយនេះ និងដូចជាកន្លែងសម្រាប់អ្នកស្រីហ្វឹកហាត់ផងដែរ ហើយអ្វីដែលពិសេសនោះ គឺអ្នកស្រីចង់កសាងកីឡាករល្អៗ ចេញពីក្រុមពលករខ្មែរនៅកូរ៉េខាងត្បូងហ្នឹងឯង។
គួរបញ្ជាក់ដែរថា អ្នកស្រី ស្រួង ភារី គឺជាស្ត្រីខ្មែរម្នាក់ ដែលបានផ្លាស់ទៅរស់នៅប្រទេសនេះតាមស្វាមីរបស់អ្នកស្រី ដែលបានស្គាល់ និងហ្វឹកហាត់ជំនាញនេះនៅប្រទេសកូរ៉េខាងត្បូង ហើយធ្លាប់ឈ្នះជើងឯកប្រចាំប្រទេសកូរ៉េ ចំនួន 3លើកជាប់ៗគ្នា ហើយជាប់ជាជើងឯកប្រចាំទ្វីបអាស៊ីទៀតផងកាលពីឆ្នាំមុន៕

May 28, 2020
Varane ដាក់អាវឱ្យគេដេញថ្លៃ យកប្រាក់មកជួយប្រទេសបារាំង
Raphael Varane បានធ្វើរឿងគួរឱ្យគោរពមួយ ដោយបានដាក់អាវរបស់ខ្លួនដេញថ្លៃ ដើម្បីរៃលុយយកទៅជួយដល់មន្ទីរពេទ្យនៅទីក្រុង Lens ប្រទេសបារាំង ជាទីដែលរូបគេបានហ្វឹកហាត់ទាត់បាល់តាំងពីកុមារភាព ដោយបានដាក់ឱ្យដេញថ្លៃអាវរបស់គេនៃក្លិប Real Madrid អមជាមួយនឹងហត្ថលេខារបស់គេផងដែរ។
កីឡាករជម្រើសជាតិបារាំងដែលជួយឱ្យបារាំងបានលើកពាន World Cup កាលពីឆ្នាំ2018 រូបនេះ ក៏ធ្លាប់ឈ្នះពាន Champions League ចំនួន 4លើកផងដែរ ក្នុងអាជីពជាមួយ Real Madrid។
ក្រោយពីផ្ទេរចេញពីក្លិបបាល់ទាត់នៃស្រុកកំណើតខ្លួនមកកាន់ Real Madrid កីឡាកររូបនេះបានលេង 196ប្រកួតឱ្យក្លិបខាងលើ នឹងរកបាន 6គ្រាប់ ក្នុងនាមជាខ្សែការពារ៕

May 28, 2020