ធឿន មករា - La Reine Media

រឿង 12 យ៉ាងដែលទារកទើបនឹងកើតងាយស្រួលចិញ្ចឹមជាងក្មេងវ័យតេះតះ

អ្នកម្តាយថ្មោងថ្មី ឬអ្នកម្តាយដែលធ្លាប់មានបទពិសោធន៍ហើយជាច្រើននាក់អាចធ្លាប់គិត និងទន្ទឹងរង់ចាំថា តើពេលណាកូននឹងធំ? តើពេលណាកូននឹងចេះដើរ?ខ្លះមិនខាន តែបើបានអានរឿងទាំង 12 យ៉ាងដែល ឡារ៉ែនលើកយកមកជម្រាបជូនដូចតទៅនេះរួចហើយ អ្នកម្តាយអាចនឹងប្តូរចិត្តនៅមិនទាន់ចង់ឱ្យកូនធំឡើងចេះដើរតេះតះក៏អាចថាបានដែរ ដោយសារតែទារកទើបនឹងកើតងាយស្រួលចិញ្ចឹមមើលថែទាំជាងក្មេងវ័យចេះដើរតេះតះហ្នឹងឯង។ តើងាយស្រួលចិញ្ចឹមមើលថែទាំយ៉ាងណាខ្លះនោះ សូមតាមដានជាបន្តដូចតទៅ។

1 – ទារកទើបនឹងកើត ញ៉ាំតែទឹកដោះម្តាយ ឬទឹកដោះគោម្សៅប៉ុណ្ណោះរហូតដល់អាយុ 6 ខែ (ពិតជាងាយស្រួលណាស់ មិនចាំបាច់ត្រៀមអ្វីច្រើននាំឱ្យពិបាកនោះទេ) ខណៈដែលក្មេងវ័យចេះដើរតេះតះវិញ ត្រូវញ៉ាំអាហាររឹងដែលអ្នកម្តាយត្រូវផ្ជិតផ្ចង់ធ្វើឱ្យញ៉ាំ ក្មេងខ្លះបញ្ចុកឱ្យញ៉ាំស្រួល ក្មេងខ្លះពិបាកឱ្យញ៉ាំណាស់ ឯក្មេងខ្លះទៀតញ៉ាំនំ ញ៉ាំនេះ ញ៉ាំនោះពេញមួយថ្ងៃមិនឈប់មាត់ក៏មាន។

2 – ទារកទើបនឹងកើតមិនចាំបាច់ពាក់ស្បែកជើងទេ ខណៈដែលក្មេងវ័យចេះដើរតេះតះវិញត្រូវប្តូរខ្នាតស្បែកជើងថ្មីស្ទើរតែរៀងរាល់បីខែម្តង។

3 – ទារកទើបនឹងកើតមិនលេងរបស់លេងទេ តែក្មេងវ័យចេះដើរតេះតះចង់លេងរបស់លេងថ្មីគ្រប់ពេលវេលា។

4 – ទារកទើបនឹងកើត អាចគេងលក់បាននៅក្នុងគ្រប់ទីកន្លែងទាំងលើគ្រែ ក្នុងអង្រឹង ក្នុងខារ៍ស៊ីត ក្នុងអង្រឹងបី ជាដើម ខណៈដែលក្មេងវ័យតេះតះវិញត្រូវតែគេងនៅលើគ្រែតែប៉ុណ្ណោះ ឱបរបស់ដែលនៅជិតខ្លួនមួយនេះតែប៉ុណ្ណោះ ដណ្តប់តែភួយមួយនេះប៉ុណ្ណោះ ជាដើម។

5 – បើនាំទារកទើបនឹងកើតជិះឡាន ហើយបើកទៅទីណាមួយនោះ គេនឹងគេងលក់យ៉ាងងាយស្រួល ខណៈដែលក្មេងវ័យតេះតះវិញនឹងបបួលជជែកនិយាយ សួរនេះសួរនោះមិនឈប់មាត់តាមផ្លូវរហូត។

6 – ទារកទើបនឹងកើត និងក្មេងវ័យតេះតះមួយចំនួនចង់ឱ្យម៉ាក់ពគ្រប់ពេលវេលា តែទារកទើបនឹងកើតមានទម្ងន់ខ្លួនត្រឹមតែ 3 – 4 គីឡូក្រាមប៉ុណ្ណោះ តែក្មេងវ័យដើរតេះតះវិញមានទម្ងន់ 8 – 13 គីឡូក្រាមឯណោះ។

7 – ពេលកូនវ័យទារកទាញសក់របស់អ្នក អ្នកអាចនឹងមើលថាគួរឱ្យស្រឡាញ់ និងគ្រាន់តែស្រែក អូយ! ឈឺ តែពេលកូនវ័យចេះដើរតេះតះទាញសក់អ្នកវិញនោះ ច្បាស់ជាដល់ពេលត្រូវបង្រៀនរឿងសុជីវធម៌ និងអាចត្រូវដាក់ទណ្ឌកម្មខ្លះហើយ។

8 – ទារកទើបនឹងកើតស្ទើរតែគ្មានអ្វីឱ្យត្រូវកខ្វក់ ប្រឡាក់ប្រឡូសឡើយ ខណៈដែលក្មេងវ័យចេះដើរតេះតះវិញស្អាតបាតបានត្រឹមតែវិនាទីដំបូងដែលភ្ញាក់ពីគេងប៉ុណ្ណោះ បន្ទាប់ពីនោះហើយក៍…។

9 – ក្នុងទីសាធារណៈស្ទើរតែគ្រប់គ្នានឹងយល់ចិត្តអ្នក បើបានឮសម្លេងទារកយំខ្លាំងៗនោះ តែបើក្មេងវ័យចេះដើរតេះតះស្រែកយំខ្លាំងៗ ដេកននៀលទធាក់ដីផងនោះ ច្បាស់ជាគ្មាននរណាសម្លឹងមើលអ្នកដោយខ្សែភ្នែកយល់ចិត្តនោះឡើយ។

10 – ទារកទើបនឹងកើតមិនអាចនិយាយពាក្យថា “ម៉ាក់” បានច្រើនដល់ទៅ 40 ដង ក្នុងរយៈពេល 12 វិនាទីនោះទេ តែក្មេងវ័យចេះដើរតេះតះអាចធ្វើបាន។

11 – ទារកទើបនឹងកើតមិនអាចនិយាយពាក្យអាក្រក់ៗដែលចាំបានមកពីអ្នកនៅចំពោះមុខមនុស្សដែលអ្នកគោរពកោតខ្លាចនោះទេ តែក្មេងវ័យចេះដើរតេះតះអាចធ្វើបាន។

12 – បើដាក់ទារកទើបនឹងកើតនៅត្រង់ណា គេនឹងនៅតែត្រង់នោះ ខណៈដែលក្មេងវ័យចេះដើរតេះតះវិញមិនខុសអីនឹងតុក្កតាមួលឡាននោះឡើយ គឺនឹងមិនចេះនៅស្ងៀមឡើយ គេកម្រើកខ្លួនចុះឡើង ដើរឡើងចុះជណ្តើរ មុជចូលក្រោមតុ ឡើងលើគ្រែធ្វើចលនាគ្រប់ពេលវេលា៕

June 1, 2020

ក្រុមហ៊ុន Google ដាច់ចិត្តបង្ហើបឱ្យដឹងជាលើកដំបូងបំផុតថា YouTube រកបាន 15 ពាន់លានដុល្លារកាលពីឆ្នាំ2019

គិតរយៈពេលពេញ 1ឆ្នាំកាលពីឆ្នាំ2019 ក្រុមហ៊ុន Google បានបង្ហើបឱ្យដឹងថា YouTube រកចំណូលបាន 15ពាន់លានដុល្លារ (15 Billions dollar) ដែលស្មើនឹង 10% នៃចំណូលរបស់ Google ទាំងអស់។ ក្រៅពីនេះ YouTube ក៏មានអ្នកចុះឈ្មោះជាង 20លាននាក់លើសេវាកម្ម Premium (YouTube ដែលគ្មានវីដេអូពាណិជ្ជកម្ម) និងសេវាកម្ម Music Premium រួមទាំងមានអ្នកចុះឈ្មោះជាង 2លាននាក់ទៀត សម្រាប់សេវាកម្មទូរទស្សន៍ផងដែរ។

នេះ គឺជាការប្រកាសលើកដំបូងបំផុត ក្នុងប្រវត្តិសាស្ត្ររយៈពេល 15ឆ្នាំ ដែល YouTube ស្ថិតក្រោមការកាន់កាប់របស់ Google ចាប់តាំងពីពេលដែល Google បានទិញវេបសាយនេះក្នុងឆ្នាំ2006 ជាមួយទំហំទឹកប្រាក់ 1.65ពាន់លានដុល្លារ។

ក្នុងរយៈពេល 3ខែចុងក្រោយនៃឆ្នាំ2019 បណ្ដាញ YouTube អាចរកប្រាក់ចំណូលបានជិត 5ពាន់លានដុល្លារ ពីការផ្សព្វផ្សាយពាណិជ្ជកម្ម។ នេះបើតាមការបង្ហាញរបស់ Alphabet ដែលជាក្រុមហ៊ុនមេរបស់ Google ដែលមានបង្ហាញក្នុងរបាយការណ៍ចំណូលប្រចាំត្រីមាសទី4។

Alphabet និយាយថា ចំណូលពីផលិតផលទាំងនោះ បានដាក់បញ្ចូលក្នុងផ្នែក “Other” ដែលរកចំណូលបាន 5.3ពាន់លានដុល្លារ នៅត្រីមាសទី4 ឆ្នាំ2019 ហើយក្នុងនោះមានរាប់បញ្ចូល Hardware ដូចជាទូរស័ព្ទ Pixel និង Speaker Google Home។ ដូចនេះគេមិនអាចដឹងច្បាស់ពីចំណូលជាក់លាក់នៃផលិតផលនីមួយៗនោះទេ៕

May 30, 2020

ក្រុមហ៊ុន Google ត្រូវគេប្ដឹងថា បានរំលោភបំពានលើភាពឯកជនរបស់អ្នកប្រើ

ក្រុមហ៊ុន Google ត្រូវបានគេប្ដឹងទៀតហើយ ទាក់ទងទៅនឹងការរំលោភបំពានទៅលើភាពឯកជនរបស់អ្នកប្រើប្រាស់ Android ដែលជាប្រព័ន្ធប្រតិបត្តិការដ៏ពេញនិយមដែលមនុស្សរាប់លាននាក់កំពុងប្រើប្រាស់ទូទាំងពិភពលោក ប៉ុន្តែប្រព័ន្ធប្រតិបត្តិការនេះ តែងតែមានបញ្ហាច្រើនជាមួយនឹង ការប្រមូលទិន្នន័យរបស់អ្នកប្រើប្រាស់ បើប្រៀបធៀបទៅនឹងប្រព័ន្ធ iOS ។

ថ្មីៗនេះ ក្រុមហ៊ុន Google ត្រូវបានប្ដឹងដោយអគ្គរដ្ឋអាជ្ញានៃរដ្ឋអារីហ្សូណា សហរដ្ឋអាមេរិក ជុំវិញការចោទប្រកាន់ថា ក្រុមហ៊ុននេះបានធ្វើការតាមដានទីតាំងរបស់អ្នកប្រើប្រាស់តាមប្រព័ន្ធប្រតិបត្តិការអ៊ែនដ្រយ ដោយខុសច្បាប់ និងគ្មានការយល់ព្រមពីពួកគេ ទោះបីជាពួកគេបានបិទមុខងារតាមដានទីតាំង (Location) នេះដោយខ្លួនឯងហើយក៏ដោយ។ នេះបើយោងតាមការផ្សព្វផ្សាយពីសារព័ត៌មាន វ៉ាស៊ីនតោន ផូស្ត កាលពីថ្ងៃពុធកន្លងទៅ។

ការចោទប្រកាន់នេះទាក់ទងទៅនឹងក្រុមហ៊ុនបន្តតាមដានទីតាំងរបស់អ្នកប្រើប្រាស់ ជាមួយកម្មវិធីអាកាសធាតុ និងការស្វែងរកគេហទំព័រផ្សេងៗនៅលើកម្មវិធី Chrome ទោះបីជាអ្នកប្រើប្រាស់បានបិទមុខងារនេះនៅក្នុងកម្មវិធីនិមួយៗនោះក៏ដោយ ហើយបែរជាតម្រូវឱ្យអ្នកប្រើប្រាស់ចូលទៅបិទមុខងារតាមដានទីតាំងនៅក្នុង Settings ដែលប្រកបដោយភាពស្មុគស្មាញទៅវិញ។

កាលពីពេលកន្លងទៅ ក្រុមហ៊ុន Google ក៏បានជួបនឹងបញ្ហាស្រដៀងគ្នានឹងករណីខាងលើនេះដែរ ហើយក្រុមហ៊ុនក៏បានរងការផាកពិន័យជាច្រើនលើកច្រើនសាផងដែរ ដូចជានៅពេលថ្មីៗនេះ សហភាពអឺរ៉ុបបានផាកពិន័យក្រុមហ៊ុន ហ្គូហ្គល ចំនួន 1.8ពាន់លានដុល្លារ ទាក់ទងទៅនឹងការរំលោភបំពានក្នុងការប្រើប្រាស់ទិន្នន័យដើម្បីផ្សព្វផ្សាយពាណិជ្ជកម្ម។

នាយកដ្ឋានប្រឆាំងបទល្មើសបច្ចេកវិទ្យា ក៏បានក្រើនរំឭកដល់ប្រជាពលរដ្ឋអ្នកប្រើប្រាស់ទូរសព្ទវៃឆ្លាតទាំងអស់ សូមមានការប្រុងប្រយ័ត្នចំពោះមុខងារតាមដានទីតាំងនេះ បើមិនមានការចាំបាច់ប្រើសូមកុំបើកវាអី ឬមុននឹងចូលប្រើកម្មវិធីផ្សេងៗទាក់ទងទៅនឹងអ៊ីនធឺណិត សូមចូលទៅបិទដោយផ្ទាល់ផង៕

May 30, 2020

ក្រុមហ៊ុនចិនធំ 2 និយាយថា កុំព្យូទ័ររាប់ពាន់គ្រឿងរបស់ខ្លួន បានរងការវាយប្រហារ ដោយ មេរោគដ៏ខ្លាំងមួយ

ក្រុមហ៊ុនចិនធំ 2 គឺ Qihoo និង Baidu របស់ប្រទេសចិន បានឱ្យដឹងថា ថ្មីៗនេះមាន មេរោគ malwere ខ្លាំងមួយបានធ្វើការវាយប្រហារទៅលើកុំព្យូទ័ររាប់ពាន់គ្រឿងទាំងនោះ បណ្ដាលឱ្យប៉ះពាល់ដល់ប្រព័ន្ធទាំងមូល។

យោងតាមប្រភពពី thehackernews បានបង្ហើបឱ្យដឹងថា ក្រុម Hacker ចូលហ៊ែកបានទាំងនោះ មានវិធីសាស្ត្រខ្ពស់ក្នុងការវាយប្រហារ តាមរយៈការបង្កប់មេរោគក្នុងវេបសាយ e-commerce ទាំងនោះ។

ទោះជាកើតមានរឿងទាំងនេះមែន តែប្រភពមិនបានបញ្ជាក់ពីផលប៉ះពាល់លម្អិតឡើយ គ្រាន់តែប្រាប់ពីវិធីដែលពួកគេលួច ដែលក្នុងនោះ ប្រព័ន្ធកុំព្យូទ័រដែលរងគ្រោះ ក៏ភ្ជាប់ទាំង Alibaba Cloud storage ផងដែរ៕

May 30, 2020

អ្នកប្រើ អាចនឹងត្រូវ Hacker លួចយកលេខសម្ងាត់ វីនដូ ពេលខលតាមកម្មវិធី Zoom

ដោយសារតែមានតម្រូវការបន្ទាន់នៃកម្មវិធី ដែលមានភាពងាយស្រួលក្នុងការប្រើប្រាស់ជាលក្ខណៈ Video Conferencing ក្នុងអំឡុងពេលនៃការរីករាលដាល មេរោគកូវីដ-19 ក៏បានធ្វើឱ្យ Zoom ក្លាយជាកម្មវិធីមួយដែលទទួលការពេញនិយម ពីមនុស្សរាប់លាននាក់ក្នុងពេលតែ 2 ឬ 3សប្ដាហ៍ចុងក្រោយនេះ បើទោះបីជាកម្មវិធីនេះបានបង្កើតឡើងបានជាង 9ឆ្នាំមកហើយក៏ដោយ។

ទោះបី Zoom គឺជាកម្មវិធីមួយដែលមានប្រជាប្រិយភាពសម្រាប់ Online Video Meeting ក៏ដោយ តែវាមិនមែនជាជម្រើសដ៏ល្អបំផុត សម្រាប់ផ្នែកឯកជនភាព (Privatecy) និងសន្តិសុខ (Security) នៅឡើយទេ ដូចជាកម្មវិធីនេះពុំមាន end-to-end encrypted ដូចកម្មវិធីគេផ្សេងៗទៀត ដែលអាចធ្វើឱ្យក្រុមហ៊ុនថតចម្លងវីដេអូរបស់លោកអ្នកបាន ប៉ុន្តែកំហុសដ៏ធំមួយទៀតនោះគឺ ជនអនាមិកអាចលួចយកលេខសម្ងាត់ វីនដូ តាមរយៈភាពចន្លោះប្រហោងក្នុងកម្មវិធីនេះបាន។

ភាពចន្លោះប្រហោងនេះ គឺដោយសារតែ Zoom ដំណើរការនៅលើប្រព័ន្ធដំណើការ Windows ដែលប្រើមុខងារ Remote UNC paths ហើយបំប្លែងនូវ URLs ទៅជា Hyperlinks សម្រាប់អ្នកទទួលនៅក្នុងសារ ជាលក្ខណៈផ្ទាល់ខ្លួន ឬជាក្នុងក្រុម។

ក្រុមអ្នកស្រាវជ្រាវបានផ្ដល់ព័ត៌មាននេះទៅក្រុមហ៊ុន Zoom ប៉ុន្តែក្រុមហ៊ុនពុំទាន់បានធ្វើកំណែទម្រង់លើកម្មវិធីនេះទេ ដូច្នេះពួកគេក៏សំណូមពរឱ្យអ្នកប្រើប្រាស់ គួរប្រើកម្មវិធី Zoom តាមរយៈ Web Browser ជាជាងកម្មវិធីផ្ទាល់របស់ Zoom សម្រាប់ វីនដូ ឬក៏ប្រើកម្មវិធីផ្សេងទៀតក៏បាន។

គេក៏បានដឹងផងដែរថា កាលពីសប្ដាហ៍មុនក្រុមហ៊ុន Zoom ទើបតែធ្វើបច្ចុប្បន្នភាពកម្មវិធីជាមួយប្រព័ន្ធ iOS ក្រោយពីត្រូវបានគេរកឃើញថា ក្រុមហ៊ុននេះបានផ្ដល់ទិន្នន័យរបស់អ្នកប្រើប្រាស់ទៅឱ្យក្រុមហ៊ុន Facebook៕

May 30, 2020

នៅតែខ្លាំង! Nokia កាន់កាប់សិទ្ធិចែកចាយ 5G ច្រើនជាង 2,000ប៉ាតង់

ក្រុមហ៊ុនបណ្ដាញទូរគមនាគមន៍ Nokia អន្តរជាតិ (របស់ប្រទេសហ្វាំងឡង់) បានចេញផ្សាយរបាយការណ៍ថ្មីមួយ ស្ដីពីសមិទ្ធផលដែលក្រុមហ៊ុនសម្រេចបានក្នុងឆមាសទី1 កាលពីឆ្នាំ2019 ដោយលើកឡើងពីការរីកចម្រើនផ្នែកបណ្ដាញទូរគមនាគមន៍ ក្នុងនោះមានប៉ាតង់ 5G ច្រើនជាង 2,000 ហើយត្រូវបានផ្គត់ផ្គង់ដល់ទីផ្សារអឺរ៉ុប។

លោក Marcus Weldon នាយកផ្នែកគ្រប់គ្រងទូទៅរបស់មន្ទីរ Nokia Bell Labs បាននិយាយថា នៅក្នុងរលកនៃបច្ចេកវិទ្យា គឺមានការផ្លាស់ប្តូរលឿនណាស់។ ក្នុងនោះដែរ Nokia ដែលជាស្ថាប័នឈានមុខគេផ្នែកបណ្ដាញទូរគមនាគមន៍ យើងកំពុងប្រឹងប្រែងបង្កើតថ្មី ទាំងបច្ចេកវិទ្យា និង(R&D-Research and development) ឱ្យពិភពលោកកាន់តែជិតស្និទ្ធដូចនឹងពាក្យស្លោករបស់យើង ” Connecting People”។ យើងក៏សូមថ្លែងអំណរគុណដល់ដៃគូ 3GPP និង ETSI ដែលជាស្ថាប័នជំនាញផ្នែក 5G ដែលក្នុងនោះក៏មានបុគ្គលិកពី Nokia ចូលរួមក្នុងការអភិវឌ្ឍបច្ចេកវិទ្យាឈានមុខនេះផងដែរ។

គួរបញ្ជាក់ដែរថា ទោះជាមិនសូវជោគជ័យក្នុងសហគ្រាសស្មាតហ្វូនក៏ដោយ ក៏ប៉ុន្តែ Nokia ហាក់ផ្តោតសំខាន់ លើវិស័យទូរគមនាគមន៍ ដោយបានបំប្លែងខ្លួនទៅជាអ្នកចែកចាយ ជាពិសេសថ្មីៗនេះ ក្រុមហ៊ុនបណ្ដាញទូរគមនាគមន៍ Sprint បានធ្វើការសហការជាមួយក្រុមហ៊ុន Nokia ផ្នែកបណ្ដាញទូរគមនាគមន៍ ប្រកាសដាក់ឱ្យដំណើរការជាផ្លូវការ នូវប្រព័ន្ធបណ្ដាញ 5G នៅរដ្ឋធំៗចំនួន 4 បន្ថែមទៀតក្នុងសហរដ្ឋអាមេរិកដូចជា New York, Los Angeles, Washington DC និង Phoenix ទៀតផង៕

May 30, 2020

ក្រុមហ៊ុនសិង្ហបុរី SWAN & MACLAREN និង SCA បានចុះហត្ថលេខាលើកិច្ចព្រមព្រៀង សហប្រតិបត្តិការ និងរួមបញ្ចូលសេវាកម្មដើម្បីនាំយកស្តង់ដារសិង្ហបុរីក្នុងការសិក្សាគម្រោងប្លង់មកកាន់ប្រទេសកម្ពុជា

អង្គភាពទាំងពីរបានចុះហត្ថលេខាលើអនុស្សរណៈនៃការយោគយល់គ្នា (MoU) ជាផ្លូវការនៅថ្ងៃទី ៣០ ខែឧសភា ឆ្នាំ ២០២០ ដើម្បីរួមបញ្ចូលនូវជំនាញឯកទេសរបស់ក្រុមហ៊ុនទាំងពីរសំដៅពង្រីកបន្ថែមនូវវត្តមាន និងសេវាកម្មរបស់ពួកគេនៅក្នុងប្រទេសកម្ពុជា។
SCA ចូលរួមនៅក្នុងបណ្តាញរបស់ Swan & Maclaren ដើម្បីឱ្យមានការរីកចម្រើននៅក្នុងតំបន់អាស៊ី។
ការសហការក្នុងភាពជាដៃគូនឹងអនុញ្ញាតឱ្យ SCA ក្លាយជាមជ្ឈមណ្ឌលផ្តល់ដំណោះស្រាយច្រកចេញចូលតែមួយដើម្បីនាំយកស្តង់ដារសិង្ហបុរីមកកាន់ទីផ្សារកម្ពុជាលើដំណោះស្រាយសិក្សាគម្រោងប្លង់ និងផ្នែកគ្រប់គ្រង។
Swan & Maclaren ផ្តល់ជូននូវសេវាកម្មពិសេសនៅក្នុងការសិក្សាគម្រោងប្លង់ និងស្ថាបត្យកម្ម រួមជាមួយនឹងសេវាកម្មពិសេសៗរបស់ SCA សម្រាប់ផ្នែកខាងក្នុងអគារ និងឋបនកម្មសំណង់។
សេវាកម្មរួមមាន៖ ការសិក្សាគម្រោងប្លង់មេ ប្លង់ស្ថាបត្យកម្ម ប្លង់រចនាខាងក្នុងអគារ ប្លង់ទេសភាព ការសាងសង់សំណង់ និងឋបនកម្ម (គ្រឿងឈើ គ្រឿងសង្ហារិម ការបំពាក់ភ្លើងបំភ្លឺ គ្រឿងបរិក្ខារ និងសម្ភារបន្ទាប់បន្សំ) ។

ភ្នំពេញ ប្រទេសកម្ពុជា ថ្ងៃទី ៣០ ខែឧសភាឆ្នាំ២០២០យោងតាមអនុស្សរណៈនៃការយោគយល់គ្នាដែលបានឯកភាពគ្នា ក្រុមហ៊ុន Swan & Maclaren និង SCA នឹងរួមបញ្ចូលគ្នាជាលក្ខណៈយុទ្ធសាស្ត្រនូវជំនាញឯកទេស និងការប្រតិបត្តិល្អបំផុតរបស់ក្រុមហ៊ុនទាំងពីរក្នុងការនាំយកស្តង់ដារសិង្ហបុរីនៃការសិក្សាគម្រោងប្លង់និងឧត្តមភាពនៃការសាងសង់សំណង់ជូនដល់ប្រជាជនកម្ពុជា។

ការអនុវត្តរាប់ចាប់ពីការសិក្សាគម្រោងប្លង់រហូតដល់ការបញ្ចប់គម្រោងជាស្ថាពរនឹងត្រូវធ្វើឡើងដោយប្រកាន់ខ្ជាប់ជានិច្ចនូវក្រមប្រតិបត្តិរបស់សិង្ហបុរី។

វត្តមានរបស់ SCA នៅក្នុងប្រទេសកម្ពុជារួមជាមួយបទពិសោធន៍គម្រោងនៅកម្ពុជាជាង ៧ ឆ្នាំរបស់ Swan & Maclaren នាំមកនូវអភិក្រមនិងសេវាកម្មដែលបំពេញឱ្យគ្នាទៅវិញទៅមករវាងក្រុមហ៊ុនទាំងពីរនៅក្នុងការអភិវឌ្ឍថ្នាក់តំបន់និងអន្តរជាតិដែលផ្តោតការយកចិត្តទុកដាក់ទៅលើអតិថិជននៅក្នុងទីផ្សារកម្ពុជា។ការសហការក្នុងភាពជាដៃគូដែលនឹងមានប្រសិទ្ធភាពអនុវត្តភ្លាមៗនឹងអនុញ្ញាតឱ្យក្រុមហ៊ុនទាំងពីរមានជំហរកាន់តែរឹងមាំនៅក្នុងប្រទេសកម្ពុជា។

សម្រង់សំដី

“ជាមួយនឹងការដាក់បញ្ចូលបន្ថែមនូវ Swan & Maclaren នោះថាមពលនិងសេវាកម្មរបស់ SCA បានកើនឡើងទ្វេដងភ្លាម” នេះបើតាមប្រសាសន៍របស់ លោក Darryl Ong ដែលជានាយកនៅក្រុមហ៊ុន SCA “សម័យកាលនៃការរីកចម្រើនតាមបែបធម្មតា គឺកន្លងហួសទៅហើយដោយ SCA ទាញយកប្រយោជន៍ពីថាមពលនៃភាពជាដៃគូជាយុទ្ធសាស្ត្រ។ ភាពជាដៃគូជាយុទ្ធសាស្ត្រផ្តល់ប្រយោជន៍ដល់មនុស្សគ្រប់គ្នា – ក្រុមហ៊ុនអាជីវកម្ម និយោជិត និងអតិថិជន។ ក្រុមហ៊ុនអាជីវកម្ម អាចពង្រីកការផ្សព្វផ្សាយទៅដល់ទីផ្សារគោលដៅរបស់ពួកគេ និងជំរុញការយល់ដឹងអំពីម៉ាក។ អតិថិជនទទួលបានអត្ថប្រយោជន៍ពីភាពខ្លាំង និងការផ្តល់ជូនដែលអង្គភាពនីមួយៗនាំមកជាមួយហើយនិយោជិតនឹងអាចពង្រីកសមត្ថភាពអភិវឌ្ឍន៍របស់ពួកគេដោយការទាញយកប្រយោជន៍ ពីការឆ្លងកាត់នូវទស្សនវិស័យ និងជំនាញឯកទេសខាងឧស្សាហកម្មថ្មី។លើសពីនេះទៀតទំនាក់ទំនងកាន់តែស៊ីជម្រៅរវាងអាជីវកម្មដែលបំពេញឱ្យគ្នាទៅវិញទៅមកនឹងពង្រឹងកិច្ចសហការឱ្យកាន់តែរឹងមាំ និងយូរអង្វែងដែលអនុញ្ញាតឱ្យ ក្រុមហ៊ុនផ្តល់ជូននូវដំណោះស្រាយ ដែលផ្តល់ថាមពលដល់អតិថិជនរបស់ពួកគេឱ្យទទួលបានជោគជ័យ។ Swan & Maclaren ពិតជាមានភាពស័ក្តិសមបំផុត!”

លោក Ryan Chin ដែលជានាយកនៅ SCA បានមានប្រសាសន៍ថា“នៅពេលដែលអតិថិជនរបស់យើងបន្តជំរុញឱ្យមានដែនកំណត់នៃការសិក្សាគម្រោងប្លង់នោះភាពសម្បូរបែបនៃការផ្តល់ជូនរបស់ SCA អនុញ្ញាតឱ្យយើងពង្រីកបន្ថែមនូវសមត្ថភាពក៏ដូចជាទំនាក់ទំនង។ ដោយការធ្វើដំណើរជាមួយ Swan & Maclaren យើងមានក្តីរំភើបចំពោះ សេវាកម្មជាច្រើនដែលយើងអាចផ្តល់ជូនអតិថិជនរបស់យើងប្រកបដោយទំនុកចិត្ត” ។

“Swan & Maclaren មានការរំភើបយ៉ាងខ្លាំងចំពោះកិច្ចសហការនេះ ហើយនេះនឹងពង្រឹងយ៉ាងខ្លាំងនូវគោលការណ៍ដ៏ល្បីល្បាញគឺការប្រមូលផ្តុំគ្នាជាការចាប់ផ្តើមរួមរស់ជាមួយគ្នាជាវឌ្ឍនភាពនិងធ្វើការរួមគ្នាជាជោគជ័យ។ នេះបើតាមប្រសាសន៍របស់ Matthew Hon ដែលជានាយកនៅក្រុមហ៊ុន Swan & Maclaren “ ដោយការប្រតិបត្តិបែបនេះ យើងអាចឈានដល់កម្រិតសេវាកម្មកាន់តែខ្ពស់ និងផ្តល់ដល់អតិថិជនទាំងអស់របស់យើង។

អំពី Swan & Maclaren

ដោយបានបង្កើតឡើងក្នុងឆ្នាំ១៨៩២ Swan & Maclaren គឺជាក្រុមហ៊ុនស្ថាបត្យកម្មចំណាស់ជាងគេបំផុត នៅក្នុងប្រទេសសិង្ហបុរី។ អស់រយៈពេលជាង ១២៨ ឆ្នាំមកហើយដែលក្រុមហ៊ុននេះ មានការលេចធ្លោ នៅក្នុងកិច្ចប្រតិបត្តិការរហូតបានឈ្នះពានរង្វាន់ស្នាដៃការងារជាច្រើន ដូចជា សណ្ឋាគារ Raffles (សិង្ហបុរី) សណ្ឋាគារ Goodwood Park (សិង្ហបុរី) ធនាគារហុងកុង សៀងហៃ (សិង្ហបុរី) ជាដើម។

បច្ចុប្បន្ន Swan & Maclaren នៅតែបន្តកសាងកេរ្តិ៍ឈ្មោះកាន់តែខ្លាំងឡើងៗនៅទូទាំងតំបន់អាស៊ី លើការរៀបចំប្លង់មេអគារនិងការអភិវឌ្ឍន៍ចម្រុះជាមួយនឹងកំណើនគម្រោងរហូតដល់ឃើញមាន Swan & Maclaren នៅក្នុងបណ្តាប្រទេសជាង២០និងបង្កើតការិយាល័យប្រចាំតំបន់ចំនួន៧នៅតំបន់អាស៊ីអាគ្នេយ៍។គម្រោងដែលគួរឱ្យកត់សម្គាល់នាពេលថ្មីៗនេះរួមមាន៖ គម្រោងពង្រីកផ្នែកវេជ្ជសាស្ត្ររបស់ Raffles (សិង្ហបុរី), GSH ផ្លាហ្សា(សិង្ហបុរី)ផ្សារទំនើបIpoh Parade (ម៉ាឡេស៊ី) មន្ទីរពេទ្យ Raffles ឆុងឈីង (ប្រទេសចិន), Accor Novotel Suites Dalat (វៀតណាម), Euroville ភ្នំពេញ (កម្ពុជា) និងអគារខុនដូ Royal Platinum (កម្ពុជា) ។

ទំហំនៃការអភិវឌ្ឍន៍នេះបានអនុញ្ញាតឱ្យក្រុមហ៊ុន ផ្តល់នូវសេវាកម្មយ៉ាងពេញលេញ ដើម្បីបំពេញទៅតាមតម្រូវការរបស់អតិថិជននៅក្នុងប្រទេសសិង្ហបុរី ម៉ាឡេស៊ី ចិន វៀតណាម ថៃ និងកម្ពុជា។

អំពី SCA

SCA គឺជាផ្នែកមួយនៃសម្ព័ន្ធក្រុមហ៊ុន Soho Living Group (ប្រហែលនៅឆ្នាំ២០០៩)។ចាប់តាំងពីពេលនោះមក SCA បានរីកចម្រើនយ៉ាងខ្លាំងពេញមួយឆ្នាំ។ ទីស្នាក់ការកណ្តាលរបស់SCAស្ថិតនៅប្រទេសសិង្ហបុរីជាមួយនឹងការិយាល័យរណបនៅក្នុងប្រទេសម៉ាឡេស៊ី ថៃ និងកម្ពុជា។

SCA រក្សានូវសេវាកម្មដ៏សម្បូរបែប ជាមួយជំនាញឯកទេសលើស្ថាបត្យកម្មផ្នែកខាងក្នុងអគារការសិក្សាគម្រោងប្លង់ និងសាងសង់សំណង់និងការបំពាក់សម្ភារបរិក្ខារសម្រាប់គម្រោងសាជីវកម្ម បដិសណ្ឋារកិច្ច លំនៅដ្ឋានអាជីវកម្មលក់រាយ និងគម្រោងចម្រុះ។

លើសពីនេះផ្នែកអភិវឌ្ឍន៍អចលនទ្រព្យរបស់ SCA គឺជាសេវាផ្តល់ប្រឹក្សាមួយដែលមានឯកទេសក្នុងការវិនិយោគរួមចម្រុះរវាងម្ចាស់អចលនទ្រព្យ និងវិនិយោគិនក្នុងវិស័យស្ថាបត្យកម្ម។

សម្រាប់ព័ត៌មានបន្ថែមអំពី Swan & Maclaren សូមទំនាក់ទំនង៖

+៦៥ ៦២២២ ៩១១៣ ឬអ៊ីមែល: [email protected]

សម្រាប់ព័ត៌មានបន្ថែមអំពី SCA សូមទំនាក់ទំនង៖

+៨៥៥ (០) ៨៩ ៨៨៨ ៣៩៨ ឬអ៊ីមែល: [email protected]

May 30, 2020

Google នឹងផ្ដល់កញ្ចប់លុយ 1ពាន់ដុល្លារដល់បុគ្គលិកម្នាក់ៗ ដែលធ្វើការពីផ្ទះ

លោក Sundar Pichai ជានាយកប្រតិបត្តិ Google បច្ចុប្បន្ន បានឱ្យដឹងថា Google នឹងផ្ដល់កញ្ចប់លុយ 1ពាន់ដុល្លារ (ឬជារូបិយប័ណ្ណផ្សេងទៀតដែលមានតម្លៃស្មើគ្នា សម្រាប់ប្រទេសដទៃ) សម្រាប់ធានារ៉ាប់រង លើការចំណាយលើគ្រឿងសង្ហារិម ឬគ្រឿងប្រើប្រាស់ចាំបាច់ដទៃទៀតដូចជាម៉ាស៊ីនកុំព្យូទ័រ ខណៈដែលបុគ្គលិករបស់ពួកគេធ្វើការងារពីផ្ទះ។ នេះបើតាមការចុះផ្សាយជាផ្លូវការពី Blog.google ផ្ទាល់តែម្ដង។

ដើម្បីជាការជំរុញទឹកចិត្តបុគ្គលិក ឱ្យបុគ្គលិកមានសុខភាពល្អទាំងផ្លូវកាយ និងផ្លូវចិត្ត Googleក៏នឹងបង្កើតជាកម្មវិធីឱ្យបុគ្គលិកអាចមានសកម្មភាពជុំគ្នាតាមរយៈអនឡាញបាន ដូចជាការរៀនពីការចម្អិនម្ហូបពីចុងភៅ Google និងការរៀនធ្វើលំហាត់ប្រាណតាមអនឡាញជាដើម។

គួររំឭកដែរថា ទំនោរថ្មីនេះ ត្រូវបានក្រុមហ៊ុនបច្ចេកវិទ្យាដទៃទៀតកំពុងតែត្រៀមធ្វើដូចគ្នា ខណៈដែលជំងឺកូវីដ19 នៅតែបន្តវាយលុក ដើម្បីជាការលើកទឹកចិត្ត ដល់បុគ្គលិកទាំងឡាយដែលធ្វើការពីផ្ទះ៕

May 29, 2020

អ៊ីស្រាអែល បង្កើតម៉ាស់ពិសេស អាចញ៉ាំអាហារបាន ដោយមិនបាច់ដកម៉ាស់ចេញ

ក្រុមអ្នកច្នៃប្រឌិតជនជាតិអ៊ីស្រាអែល បានបង្កើតម៉ាស់ការពារមេរោគកូរ៉ូណាជាមួយមាត់បញ្ជាពីចម្ងាយ ដែលអាចអនុញ្ញាតឱ្យមនុស្សបរិភោគអាហារបាន ដោយមិនចាំបាច់ដកម៉ាស់ចេញ ជាឧបករណ៍ដែលពួកគេនិយាយថា អាចធ្វើឱ្យការចូលទៅភោជនីយដ្ឋានមិនសូវមានគ្រោះថ្នាក់។

ដង្កៀបច្របាច់ ដែលធ្វើប្រតិបត្តិការដូចហ្វ្រាំងដៃកង់ដែរនោះ នឹងបើកមាត់នៅខាងមុខម៉ាស់ដើម្បីឱ្យអាហារឆ្លងកាត់បាន។ ដំណើរការនេះអាចមានភាពច្របូកច្របល់ ជាមួយនឹងការ៉េម ឬទឹកជ្រលក់ ប៉ុន្តែបើជាអាហារដែលរឹងៗជាងនេះ អាចចូលបានយ៉ាងងាយស្រួល។

លោក អាសាហ្វ ជីតេលីស អនុប្រធានក្រុមហ៊ុន Avtipus Patents and Inventions បាននិយាយកាលពីថ្ងៃអង្គារទី19 ឧសភាថា “ម៉ាស់នឹងបើកមាត់ ដោយប្រព័ន្ធមេកានិច តាមរយៈការបញ្ជាពីចម្ងាយដោយដៃ ឬបើកមាត់ដោយស្វ័យប្រវត្តិនៅពេលណាដែលមានសម ឬស្លាបព្រា មកនៅពីមុខម៉ាស់។ បន្ទាប់មកអ្នកអាចញ៉ាំ ឬផឹកដោយគ្មានការបារម្ភ ហើយពេលអ្នកដកសម ឬស្លាបព្រាចេញវិញ វានឹងបិទវិញដោយស្វ័ប្រវត្តិ ហើយអ្នកថែមទាំងត្រូវបានការពារពីវីរុស និងមនុស្សផ្សេងទៀតដែលអង្គុយជាមួយអ្នកទៀតផង។

ក្រុមហ៊ុនបាននិយាយថា ខ្លួនគ្រោងនឹងចាប់ផ្តើមផលិតម៉ាស់នេះក្នុងរយៈពេលប៉ុន្មានខែទៀត ហើយបានដាក់ស្នើសុំប៉ាតង់រួចហើយ។ ក្រុមហ៊ុនបាននិយាយថា ខ្លួនទំនងជានឹងលក់វាក្នុងតម្លៃពី ៣ ទៅ ១០សេគែល (ប្រមាណ 0.85ដុល្លារទៅ 1.85ដុល្លារអាមេរិក)៕

May 29, 2020

YouTube លុបចោលដោយស្វ័យប្រវត្តិ ឱ្យតែមានពាក្យជា ភាសាចិនមួយនេះ នៅក្នុងប្រអប់ Comment

រយៈពេលប៉ុន្មានសប្ដាហ៍ចុងក្រោយនេះ អ្នកប្រើប្រាស់ YouTube ដែលជាជនជាតិចិន បានបង្ហោះនូវការរិះគន់ខ្លាំងៗ ត្រង់ចំណុចភាសាចិន ដែលមាននៅលើវីដេអូ ឬក្នុងប្រអប់ Comment ដែលត្រូវបាន YouTube លុបចោលដោយគ្មានមួលហេតុ។

យោងតាមប្រភពពីកាសែត The Verge បានបកស្រាយថា ប្រការនេះអាចបណ្ដាលមកពីកំហុសបច្ចេកទេស Machine learning ឬ AI translate ដែលមានក្នុងបណ្ដាញវីដេអូដ៏ធំមួយនេះ ធ្វើការខុសប្រក្រតី។ ម្យ៉ាងទៀត ពាក្យដែលគេសង្កេតឃើញថា ត្រូវបានលុបលឿនជាងគេ មិនដល់ 15វិនាទីផងនោះ គឺពាក្យ “共匪” or “五毛” ឬ “Gongfei” ដែលមានន័យថា communist bandit ឬមនុស្សប្រកាន់ទស្សនៈកុម្មុយនីស្តផ្តាច់ការ។

លើសពីនេះ YouTube ក៏បានលុបចោលដោយស្វ័យប្រវត្តិផងដែរ នូវឃ្លាឃ្លោងណា ដែលមានអត្ថន័យប្រមាថ ឬក្នុងន័យអវិជ្ជមានដល់វីដេអូណាមួយនោះ។

គួរជម្រាបជូនផងដែរថា មុខងារ AI blocked posts ខាងលើ ត្រូវបាន YouTube ទទួលស្គាល់ថា ដំណើរការមិនទាន់បានល្អប្រសើរនៅឡើយទេ បើលោកអ្នកជួបបញ្ហា លោកអ្នកអាច report មកក្រុមការងាររបស់ពួកគេបាន៕

May 29, 2020

Author: ធឿន មករា