Author: ធឿន មករា

ព្រលានយន្តហោះសៀមរាបថ្មីអាចទាញភ្ញៀវទេសចរបានជាង9លាននាក់
អាជ្ញាធរខេត្តសៀមរាបបានបញ្ជាក់ថា ព្រលានយន្តហោះអន្តរជាតិថ្មីនៅក្នុងខេត្តសៀមរាប អាចមានសមត្ថភាពទាក់ទាញភ្ញៀវទេសចរបានដល់ទៅជាង9លាននាក់ក្រោយពេលស្ថាបនារូចរាល់នៅឆ្នាំ2023។
លោក លី សំរិទ្ធ អភិបាលរងខេត្តសៀមរាបបានលើកឡើងថា ព្រលានយន្តហោះថ្មីនៅក្នុងខេត្តសៀមរាបនេះមានចម្ងាយប្រមាណ 30គីឡូម៉ែត្រពីក្រុងសៀមរាប ស្ថិតនៅភាគខាងកើតក្រុង ដែលតាមគម្រោងនឹងត្រូវដាក់ឱ្យប្រើប្រាស់នៅឆ្នាំ2023ខាងមុខនេះ។
លោកថា យើងមានក្តីសង្ឃឹមដោយសារតែរដ្ឋាភិបាលអនុញ្ញាតឱ្យមានព្រលានយន្តហោះអន្តរជាតិដ៏ធំនេះក្នុងទឹកដីនៃខេត្តសៀមរាប ដែលវាអាចទទួលយន្តហោះគ្រប់ប្រភេទបាន ខុសពីព្រលានយន្តហោះសព្វថ្ងៃដែលទទួលបានត្រឹមយន្តហោះធុនមធ្យមតែប៉ុណ្ណោះ។
នៅពេលដែលដាក់ឱ្យដំណើរការព្រលានយន្ដហោះថ្មីនេះ ខេត្តសៀមរាប នឹងមានកំណើនទេសចរកើនដល់ប្រមាណ9លាននាក់ ដែលព្រលានយន្តហោះថ្មីនេះ អាចផ្ដល់សេវាកម្មបានក្នុងចំណោមភ្ញៀវទេសចរដែលបានមកកម្សាន្ដក្នុងខេត្ដ៕

June 3, 2020
លទ្ធផលស្រាវជ្រាវថ្មី “សេចក្តីសុខ” មិនធ្វើឱ្យអាយុវែងទេ
ក្រុមអ្នកស្រាវជ្រាវផ្នែកចិត្តវិទ្យាដែលដឹកនាំដោយ អ្នកស្រីវិជ្ជបណ្ឌិត បេតទី លីវ នៃមហាវិទ្យាល័យ នីវ សៅវេលស៍ ក្នុងប្រទេស អូស្រ្តាលី ជាមួយលោក រិឆាដ ផេតូ សាស្រ្តាចារ្យ ពីមហាវិទ្យាល័យអក់ស្វ៉ដ ប្រទេសអង់គ្លេសបានផ្សព្វផ្សាយពីលទ្ធផលនៃការស្រាវជ្រាវថ្មីបំផុតមួយដែលបង្ហាញឱ្យឃើញថា ការធ្វើជាមនុស្សមានសេចក្តីសុខ ទោះវាជារឿងល្អមែន តែការមានសេចក្តីសុខមិនបានធ្វើឱ្យមនុស្សយើងអាយុកាន់តែវែងឡើងនោះទេ និងដូចគ្នានេះដែរ ការធ្វើជាមនុស្សគ្មានសេចក្តីសុខក៏មិនបានធ្វើឱ្យមនុស្សយើងឆាប់ស្លាប់ដូចគ្នាដែរ។
ការស្រាវជ្រាវនោះ គឺជាការប្រមូលព័ត៌មានពីទម្រង់សាកសួររបស់ក្រុមអ្នកចូលរួមស្រាវជ្រាវដែលជាស្រ្តីជនជាតិអង់គ្លេស ចំនួនច្រើនជាង 700,000 នាក់ អាយុជាមធ្យម 59 ឆ្នាំ ដោយក្រុមស្រាវជ្រាវបានសុំឱ្យអ្នកចូលរួុមស្រាវជ្រាវកំណត់កម្រឹតសេចក្តីសុខរបស់ខ្លួនឯង បន្ទាប់ពីនោះក៏នឹងតាមដានការវិវឌ្ឍន៍ទៅមុខរបស់ក្រុមអ្នកចូលរួមស្រាវជ្រាវទាំងអស់ក្នុងរយៈពេល 10 តទៅទៀត។
នៅពេលប្រមូលទម្រង់សាកសួរមកវិញបានបង្ហាញឱ្យឃើញថា 39 ភាគរយនៃក្រុមអ្នកចូលរួមស្រាវជ្រាវបានបញ្ជាក់ថា ខ្លួនជាមនុស្សដែលមានសេចក្តីសុខស្ទើរតែគ្រប់ពេលវេលា 44 ភាគរយប្រាប់ថា ជាទូទៅនោះខ្លួនច្រើនតែមានសេចក្តីសុខ និង 17 ភាគរយទៀតបញ្ជាក់ថា ជាប្រក្រតីខ្លួនច្រើនតែគ្មានសេចក្តីសុខទេ។
នៅពេលតាមដានលទ្ធផលក្រោយពេល 10 ឆ្នាំតមក ក្រុមអ្នកស្រាវជ្រាវបានរកឃើញថា ក្រុមអ្នកចូលរួមស្រាវជ្រាវដែលបញ្ជាក់ថា ជាប្រក្រតីគ្មានសេចក្តីសុខនោះមានសញ្ញាថានឹងស្លាប់ក្នុងអំឡុងពេល 10 ឆ្នាំ ច្រើនជាងក្រុមដែលប្រាប់ថា មានសេចក្តីសុខគ្រប់ពេលវេលាដល់ទៅ 29 ភាគរយ។
យ៉ាងណាក៏ដោយ ក្រុមអ្នកស្រាវជ្រាវបានរកឃើញផងដែរថា សភាវសុខភាពទុរន់ទុរាបានបង្កឱ្យកើតអារម្មណ៍គ្មានសេចក្តីសុខលើក្រុមអ្នកចូលរួមស្រាវជ្រាវខាងដើមនោះ ក្រៅពីនោះនៅបានរកឃើញភាពទាក់ទិនយ៉ាងច្បាស់លាស់រវាងភាពគ្មានសេចក្តីសុខ ជាមួយទង្វើបំផ្លាញសុខភាព ដូចជា ជក់បារី ជាដើមទៀតផង ក្នុងខណៈដែលអ្នកដែលមានសេចក្តីសុខក៏មិនបានបង្ហាញឱ្យឃើញពីការមានអាយុកាន់តែវែងឡើងដែរ។
រីឆាដ ផេតូ បានសរុបថា ការមានសេចក្តីសុខ ឬគ្មាននោះ មិនបានហុចផលដោយត្រង់ចំពោះភាពលឿន ឬយឺតក្នុងការស្លាប់នោះឡើយ៕
June 3, 2020
ទឹកលូនៅក្រុងភ្នំពេញនឹងកាន់តែប្រសើរក្រោយ JICA ជួយឧបករណ៍ស្ទាក់សំរាមស្វ័យប្រវត្តិដែលមានតម្លៃរហូតដល់ទៅ 115លានដុល្លារ
ទឹកលូ និងតំបន់មួយចំនួននៅរាជធានីភ្នំពេញ នឹងមានលក្ខណៈល្អប្រសើរតាមរយៈឧបករណ៍ស្ទាក់សំរាមស្វ័យប្រវត្តិដែលអង្គការ JICA បានសម្ពោធដាក់ឱ្យដំណើរការកាលពីថ្ងៃទី 02 ខែមិថុនាម្សិលម៉ិញនេះ។
ម៉ាស៊ីនស្ទាក់សំរាមស្វ័យប្រវត្តិនេះនឹងត្រូវតម្លើងនៅ4ទីតាំង ដោយដាក់ឱ្យដំណើរការនៅផ្សារកណ្តាល ព្រះគន្លង់ នៅចតុមុខ និងនៅផ្សារចាស់។ ឧបករណ៍ស្ទាក់សំរាមនេះ មានតម្លៃសរុប 115លានដុល្លារអាមេរិក ដែលវាជាប្រភេទអេក្រង់មេកានិចសម្រាប់ឆកយកសំរាមដោយស្វ័យប្រវត្តិ ហើយផ្ទេរចេញទៅក្រៅដោយឧបករណ៍មេកានិចផងដែរ។
អេក្រង់មេកានិចថ្មីនេះនឹងអាចជួយរក្សាទឹកលូនៅក្នុងទីក្រុងឱ្យមានភាពល្អប្រសើរ ផ្តល់សុវត្ថិភាពក្នុងការងារប្រតិបត្តិ ការពារបរិស្ថានទឹក និងលុបបំបាត់សំរាមមចេញពីប្រព័ន្ធលូ៕
June 3, 2020
5ខែនេះ កម្ពុជានាំចេញម្រេច ដំឡូងមី ចេក ពោត ស្វាយ និងស្វាយចន្ទី បានជាង1លានតោន
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ឯកឧត្តម វេង សាខុន កាលពីពេលថ្មីៗនេះបានបង្ហាញរបាយការណ៍ថា ដាំំម្រេច ដំឡូងមី ចេក ពោត ស្វាយ និងស្វាយចន្ទីរបស់យើងត្រូវបាននាំចេញទៅក្រៅប្រទេសចំនួន 1.4លានតោន គិតត្រឹមរយៈពេល 5ខែដើមឆ្នាំ2020នេះ។
លទ្ធផលនៃការនាំចេញផលិតផលកសិកម្មមួយចំនួន ក្រៅពីអង្ករ/ស្រូវ ដែលបានឆ្លងកាត់ការត្រួតពិនិត្យភូតគាមអនាម័យនៃអគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ ក្នុងរយៈពេល 5ខែដើមឆ្នាំ2020 (ក្នុងដំណាក់កាលនៃការរីករាលដាលសកលនៃមេរោគCovid-19) សម្រេចបានដូចខាងក្រោម៖
1) ចំណិតដំឡូងមីក្រៀមនាំចេញបាន 996,290តោន កើនឡើងប្រមាណ 88,290 តោន ស្មើនឹង 9.72% ដែលធៀបទៅនឹងរយៈ5ខែដើមឆ្នាំ2019 មានចំនួនតែ 908,000តោនប៉ុណ្ណោះ។
2) ម្សៅដំឡូងមីនាំចេញបាន 10,272តោន ថយចុះប្រមាណ 371,428តោន ស្មើនឹង -97.30% ដែលធៀបទៅនឹងរយៈ5ខែដើមឆ្នាំ2019 មានចំនួន 381,700តោន។
3) គ្រប់ស្វាយចន្ទីនាំចេញបាន 190,141តោន កើនឡើងប្រមាណ 38,581តោន កើនឡើង 25.46% ដែលធៀបទៅនឹងរយៈ5ខែដើមឆ្នាំ2019 មានចំនួនតែ 151,550តោនប៉ុណ្ណោះ។
4) គ្រាប់ពោតនាំចេញបាន 35,636តោន ថយចុះប្រមាណ 15,043តោន ស្មើនឹង -29.68% ដែលធៀបទៅនឹងរយៈ5ខែដើមឆ្នាំ2019 មានចំនួន 50,679តោន។
5) ផ្លែចេកស្រស់នាំចេញបាន 121,415តោន កើនឡើងប្រមាណ 76,897តោន ស្មើនឹង 172.73% ដែលធៀបទៅនឹងរយៈ5ខែដើមឆ្នាំ2019 មានចំនួនតែ 44,518តោនប៉ុណ្ណោះ។
6) ផ្លែស្វាយស្រស់នាំចេញបាន 44,099តោន កើនឡើងប្រមាណ 14,885តោន ស្មើនឹង 50.95% ដែលធៀបទៅនឹងរយៈ5ខែដើមឆ្នាំ2019 មានចំនួនតែ 29,214តោនប៉ុណ្ណោះ។
7) ម្រេចនាំចេញបាន 2,527តោន កើនឡើងប្រមាណ 466តោន ស្មើនឹង 22.61% ដែលធៀបទៅនឹងរយៈ៥ខែដើមឆ្នាំ2019 មានចំនួនតែ 20,061តោនប៉ុណ្ណោះ៕

June 3, 2020
តេឡេស្កូបយក្សឈ្មោះ FAST របស់ចិន នឹងចាប់ផ្ដើមធ្វើការរុករក ចាប់ពីខែកញ្ញា 2020 ទៅ
ផ្អែកតាមការចុះផ្សាយរបស់សារព័ត៌មានរដ្ឋចិន Science and Technology Daily បានឱ្យដឹងថា តេឡេស្កូបយក្សឈ្មោះ FAST នឹងចាប់ផ្ដើមធ្វើការរុករកចាប់ពីខែ កញ្ញា ឆ្នាំ2020 ខាងមុខនេះតទៅ។
លោក Zhang Tongjie ជាអ្នកវិទ្យាសាស្ត្រជាន់ខ្ពស់ដែលដឹកនាំផែនការស្វែងរកជីវិតក្រៅភពផែនដីរបស់ចិន (ហៅកាត់ SETI) បាននិយាយថា ការផលិតតេឡេស្កូបយក្ស FAST នេះ បានចាប់ផ្ដើមតាំងពីឆ្នាំ2011 ហើយបានសម្រេចរួចរាល់ក្នុងឆ្នាំ2016។ គេបានចាប់ផ្ដើមប្រតិបត្តិការតេឡេស្កូបនេះកាលពីខែមករា ដោយមានបើកឱ្យអ្នកតារាសាស្ត្រជុំវិញពិភពលោកចូលរួមប្រើប្រាស់វាផងដែរ។
កាលពីខែមីនា ពួកគេបានចេញផ្សាយឯកសារស្រាវជ្រាវអំពីលទ្ធផលនៃការរុករកដំបូងៗជាមួយតេឡេស្កូប FAST នេះ។ ក្នុងនោះមាននិយាយអំពីការស្រាវជ្រាវបន្ថែម ដើម្បីពង្រឹងសមត្ថភាពរបស់តេឡេស្កូបក្នុងការលុបបំបាត់រលកហ្វ្រេកង់ដែលមានប្រភពចេញពីផែនដី និងអាចវិភាគដឹងពីសញ្ញាដែលអាចមានប្រភពចេញពីក្រៅភពផែនដីបានយ៉ាងច្បាស់។
បច្ចុប្បន្ននេះតេឡេស្កូប FAST កំពុងស្ថិតក្រោមការកែសម្រួលលើចំណុចនេះ។ ភារកិច្ចរបស់ FAST គឺការរុករកផ្កាយ និងរលកសញ្ញាក្រៅភពផែនដី ដែលអាចឱ្យគេស្វែងយល់កាន់តែច្បាស់អំពីចក្រវាល៕
ប្រភព https://www.abacusnews.com/china-tech-city/china-officially-start-searching-aliens-september/article/3086962?utm_content=article&utm_medium=Social&utm_source=Facebook&fbclid=IwAR323iXMrPMTU3iEhIdhNDjNP2UjeQRksHgE4g9bhnzUbnoEtDX7QR_VDJ0#Echobox=1591006532
June 3, 2020
Chanathip Songkrasin កំពុងចរចាទៅលេងនៅ Premier League
កីឡាករខ្សែបម្រើប្រយុទ្ធមាឌល្អិត Chanathip Songkrasin របស់ក្លិប Hokkaido Consadole Sapporo នៃលីកកំពូលជប៉ុន កំពុងតែទាក់ភ្នែកក្លិបមួយនៅក្នុងលីកកំពូលអង់គ្លេស Leicester City ក្រោយពេលបង្ហាញខ្លួនបានយ៉ាងល្អឱ្យក្លិបក្នុងលីកកំពូលជប៉ុនមួយនេះ។
កីឡាករសញ្ជាតិថៃរូបនេះ កំពុងតែពិចារណាលើសំណើរបស់ក្លិបនេះ ដោយសារតែក្លិបនេះ ក៏ដូចជាក្លិបនៅ Premier League ទាំងអស់ដែរ ដែលតែងតែដាក់កំហិតថា កីឡាករដែលមកពីប្រទេសដែលមានចំណាត់ថ្នាក់បាល់ទាត់ខ្ពស់ ទើបអាចចូលលេងជម្រើសដំបូងបាន ខណៈដែលថៃកំពុងឈរនៅលេខរៀងទី104 ក្នុងចំណាត់ថ្នាក់ពិភពលោក។
Chanathip Songkrasin ត្រូវបានគេចាត់ទុកថាជា Messi អាស៊ាន ដែលទោះជាមានរូបរាង និងមាឌតូចល្អិតក៏ពិតមែន ក៏ប៉ុន្តែល្បឿន បច្ចេកទេស និងភាពវៃឆ្លាត បានធ្វើឱ្យគេលេងបានយ៉ាងល្អ នៅលើទីលានបាល់ទាត់៕
June 3, 2020
Rivaldinho បដិសេធវៀតណាម តែចង់មកលេងនៅថៃ
Rivaldinho ដែលជាកូនប្រុសរបស់អតីតកីឡាករជម្រើសជាតិប្រេស៊ីល Rivaldo បានបង្ហើបឱ្យដឹងថា ខ្លួនចង់មកលេងនៅលីកកំពូលរបស់ប្រទេសក្នុងតំបន់អាស៊ី ដែលមានដូចជាថៃ កូរ៉េខាងត្បូង ឬជប៉ុនជាដើម។
Rivaldinho បានចាប់យកអាជីពបាល់ទាត់តាំងពីឆ្នាំ2014 នៅលីកទី3 របស់ប្រទេសប្រេស៊ីល មុននឹងឡើងមកលេងនៅលីកទី2 ហើយផ្លាស់ទៅលេងនៅតំបន់អឺរ៉ុប ដោយបច្ចុប្បន្នកំពុងលេងឱ្យក្លិប FC Viitorul Constanța ក្នុងលីកកំពូលរបស់ប្រទេសរ៉ូម៉ានី។
ទោះបីជា រូបគេជាកូនរបស់អតីតកីឡាកររបស់ក្លិប Becelona ក៏ពិតមែន ក៏ប៉ុន្តែកីឡាកររូបនេះហាក់មិនសូវជាលេចធ្លោដូចឪពុករបស់គេឡើយ ដោយភាគច្រើនបានត្រឹមជាប់ជាកីឡាករបម្រុងតែប៉ុណ្ណោះ៕
June 3, 2020
វិស្វករ Software ម្នាក់ធ្វើការនៅ Facebook មានអារម្មណ៍ខ្មាស់ ពេល Mark Zuckerberg មិនលុបសាររបស់ Trump
លោក Lauren Tan ជាវិស្វករ Software ម្នាក់នៅ Facebook បានសរសេរថា៖ “ការដែល Facebook មិនបញ្ចេញសកម្មភាពអ្វីសោះ ក្នុងការលុបចេញនូវការបង្ហោះសំណេររបស់លោក ត្រាំ ដែលញុះញង់ឱ្យមានហិង្សា វាធ្វើឱ្យខ្ញុំនឹកអាម៉ាស់មុខខ្លាំងណាស់ ដែលធ្វើការនៅទីនេះ” ចំណែកបុគ្គលិកដទៃទៀត ក៏សម្ដែងការមិនពេញចិត្តដូចៗគ្នាជាច្រើននាក់លើបណ្ដាញសង្គមយក្សមួយនេះ។
ជាការឆ្លើយតបនឹងរឿងនេះ លោក Mark Zuckerberg បានបង្ហោះសារលើគណនី Facebook ផ្លូវការបកស្រាយថា ៖ “ខ្ញុំពិតជាមិនឯកភាពនឹងការនិយាយរបស់លោកប្រធានាធិបតីអំពីរឿងនេះ ប៉ុន្តែខ្ញុំជឿថា អ្នកគ្រប់គ្នាគួរតែអាចមើលឃើញរឿងនេះដោយខ្លួនឯង ព្រោះអ្នកមានអំណាចត្រូវទទួលខុសត្រូវ ពេលមតិរបស់គេត្រូវគេមើលឃើញជាសាធារណៈបែបនេះ”
រឿងរ៉ាវនេះកើតឡើងក្រោយពេល លោក ដូណាល់ ត្រាំ បានបង្ហោះសារទាំងលើ Twitter និង Facebook ទាក់ទងនឹងបាតុកម្មដែលកើតមាននៅទីក្រុង Minneapolis ដើម្បីទាមទារយុត្តិធម៌ឱ្យ George Floyd ដែលបានស្លាប់យ៉ាងវេទនា ព្រោះប៉ូលិសក្រុង Minneapolis។
ការបង្ហោះសាររបស់លោកប្រធានាធិបតីអាមេរិក បានព្រមានថា “ពេលចាប់ផ្ដើមមានការលួចរបស់របរ ការបាញ់បោះក៏នឹងចាប់ផ្ដើមដែរ”។ ការសម្រេចចិត្តរបស់ថ្នាក់លើ Facebook បានធ្វើឱ្យបុគ្គលិក Facebook ជាច្រើនបង្ហាញចេញនូវការខកចិត្តលើបណ្ដាញសង្គម។
ក្រៅពី Facebook នៅមាន Twitter ដែលបានដាក់ការព្រមានលើការបង្ហោះសាររបស់លោក ត្រាំ ដោយនិយាយថា ជាការលើកតម្កើងអំពើហិង្សា ហើយក៏បានលុបចោលរួចហើយដែរ កាលពីពេលថ្មីៗនេះ៕
ប្រភព៖ https://sea.mashable.com/tech/10826/silence-is-complicity-facebook-workers-speak-out-after-zuckerberg-refuses-to-take-action-against-tru
https://www.nytimes.com/2020/06/01/technology/facebook-employee-protest-trump.html
June 3, 2020
Premier League និងចាក់សំឡេងអ្នកគាំទ្រក្នុងហ្គេម FIFA 2020 នៅក្នុងការប្រកួតផ្ទាល់
ការប្រកួត Premier League គ្រោងនឹងចាប់ផ្តើមឡើងវិញនៅថ្ងៃទី17 ខែមិថុនា ឆ្នាំ2020 ខាងមុខនេះហើយ។ ក្នុងនោះដែរ EFL បានដាក់គម្រោងចាក់សំឡេងអ្នកគាំទ្រនៅក្នុងកីឡដ្ឋាន ដើម្បីបង្កើនភាពរស់រវើកក្នុងការប្រកួតឱ្យកីឡាករ ហើយការស្នើសុំនេះក៏ធ្វើទៅតាមស្ថាប័នទូរទស្សន៍ភាគច្រើន ដែលចង់បន្ថែមទស្សនីយភាពពិតៗទៅដល់អ្នកទស្សនាការប្រកួតផ្សាយផ្ទាល់ទាំងអស់ផងដែរ។
គម្រោងនេះត្រូវបាន Premier League កំពុងតែរៀបចំដាក់ចូលទៅក្នុងការប្រជុំនាចុងសប្តាហ៍នេះ ដោយសំឡេងនេះអាចនឹងត្រូវបានស្នើសុំក្នុងការប្រើប្រាស់ពី Game FIFA 2020 ជាមុនសិន៕
June 3, 2020
ការពិត ពីមុន Ronaldo ព្រមទៅ AC Milan តែដោយសារក្លិបមួយនេះមានបញ្ហាហិរញ្ញវត្ថុ ទើបត្រូវប្តូរទៅ Juventus វិញ
បើតាមការបញ្ជាក់ពីអនុប្រធានក្លិប AC Milan លោក Massimiliano Mirabelli បានបញ្ជាក់ថា ពិភពលោកប្រហែលជានឹងភ្ញាក់ផ្អើលខ្លាំងជាងកាលនោះទៅទៀត ព្រោះតែកីឡាកររូបនេះ ហៀបនឹងបានមកកាន់ទឹកដី AC Milan ទៅហើយ ព្រោះកីឡាករ ហើយនិងក្លិប Real Madrid បានយល់ព្រមនឹងគ្នាហើយ តែទាស់ត្រង់ថា ប្រធានក្លិបមួយនេះជាជនជាតិចិន មិនព្រមចំណាយលុយទិញកីឡាកររូបនេះ ដោយសារតែគិតថា ក្លិបអាចនឹងជួបវិបត្តិហិរញ្ញវត្ថុ ប្រសិនបើទិញកីឡាករូបនេះចូល។
ដោយសារតែរឿងនេះ វាបានក្លាយជាឱកាសល្អសម្រាប់ Juventus ក្នុងការឆក់យក Ronaldo បាន សម្រេច បើមិនដូច្នោះទេ ពេលនេះ Ronaldo អាចនឹងពាក់អាវក្រហមឆ្នូតខ្មៅបាត់ទៅហើយ ប្រសិនបើប្រធានក្លិប AC Milan ជាអ្នកផ្សេងវិញនោះ៕
June 3, 2020