Author: ធឿន មករា

សប្តាហ៍នេះក្រុមប្រឹក្សាអនុវត្តកម្ពុជាអនុញ្ញាតគម្រោង6 ក្នុងតម្លៃជាង 150លានដុល្លារ
នៅសប្តាហ៍នេះ ក្រុមប្រឹក្សាអភិវឌ្ឍកម្ពុជា (CDC) ទើបតែសម្រេចចេញវិញ្ញាបនបត្រចុះបញ្ជីជាស្ថាពរ គម្រោងសំខាន់ៗចំនួន6 ដែលមានទំហំទឹកប្រាក់សរុបចំនួន 151.8លានដុល្លារអាមេរិក។
គម្រោងសំខាន់ៗទាំងអស់នោះមានដូចជា៖
1-“HUA TE BANG (CAMBODIA) CO., LTD.” គម្រោងបង្កើតរោងចក្រផលិតផលិតផលពីប្លាស្ទីកគ្រប់ប្រភេទ ដែលមានទីតាំងវិនិយោគស្ថិតនៅភូមិត្រពាំងត្រប់ សង្កាត់បឹងធំ ខណ្ឌកំបូល រាជធានីភ្នំពេញ មានទុនវិនិយោគប្រមាណ 2.8លានដុល្លារអាមេរិក និងអាចបង្កើតការងារបានចំនួន 216កន្លែង។
2- “PRINTX GP (CAMBODIA) FACTORY CO., LTD.” គម្រោងបង្កើតរោងចក្រផលិតកាបូបគ្រប់ប្រភេទ និងគ្រឿងបន្សំកាបូប ដែលមានទីតាំងវិនិយោគស្ថិតនៅផ្លូវជាតិលេខ51 ភូមិត្រពាំងផ្លុង ឃុំដំណាក់រាំង ស្រុកឧដុង្គ ខេត្តកំពង់ស្ពឺ មានទុនវិនិយោគប្រមាណ 6.6លានដុល្លារអាមេរិក និងអាចបង្កើតការងារបានចំនួន 1,414កន្លែង។
3-“DIZE (CAMBODIA) NONG YE FAZHAN CO., LTD.” គម្រោងបង្កើតកសិដ្ឋានដាំដំណាំចេក ដែលមានទីតាំងវិនិយោគស្ថិតនៅភូមិមាឃ ឃុំព្រែកកក់ ស្រុកស្ទឹងត្រង់ ខេត្តកំពង់ចាម មានទុនវិនិយោគប្រមាណ 17.8លានដុល្លារអាមេរិក និងអាចបង្កើតការងារបានចំនួន 1,900កន្លែង។
4-“SUN & MOON HOTEL CO., LTD.” គម្រោងសាងសង់និងអាជីវកម្មសណ្ឋាគារថ្នាក់ផ្កាយ4 ចំនួន 200បន្ទប់ ដែលមានទីតាំងវិនិយោគស្ថិតនៅដីឡូតិ៍លេខ 285មហាវិថីព្រះនរោត្តម ជាប់ស្ពានព្រះមុនីវង្ស កែងផ្លូវលេខ233 សង្កាត់ទន្លេបាសាក់ ខណ្ឌចំការមន រាជធានីភ្នំពេញ មានទុនវិនិយោគប្រមាណ 35.2លានដុល្លារអាមេរិក និងអាចបង្កើតការងារបានចំនួន 534កន្លែង។
5-“BRILLIANT DRAGON (CAMBODIA) ENTERPRISE CO., LTD.” គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិញរ សង្កាត់កណ្តោលដុំ ក្រុងច្បារមន ខេត្តកំពង់ស្ពឺ មានទុនវិនិយោគប្រមាណ 2.4លានដុល្លារអាមេរិក និងអាចបង្កើតការងារបានចំនួន 700កន្លែង។
6-“VATTANAC BREWERY CO., LTD.” គម្រោងបង្កើតរោងចក្រផលិតស្រាបៀរ ដែលមានទីតាំងវិនិយោគស្ថិតនៅភូមិរបោះអង្កាញ់ សង្កាត់ព្រែកឯង ខណ្ឌច្បារអំពៅ រាជធានីភ្នំពេញ មានទុនវិនិយោគចំនួន 87លានដុល្លារអាមេរិក និងអាចបង្កើតការងារបានចំនួន 899កន្លែង៕

June 11, 2020
កំពូលផ្លែឈើដែលស្ត្រីមានគភ៌មិនគួរខកខាន
ក្នុងអំឡុងពេលមានគភ៌ អ្នកម្តាយត្រូវថែបំប៉នរាងកាយឱ្យបានច្រើនជាងប្រក្រតី ព្រោះសារធាតុអាហារផ្សេងៗដែលស្រ្តីមានគភ៌បានទទួលនោះនឹងហុចផលទៅដល់កូនតូចដែលនៅក្នុងផ្ទៃផងដែរ។ ផ្លែឈើក៏ជាអាហារថែបំប៉នគភ៌ដែលល្អ និងមានប្រយោជន៍ដ៏ច្រើនមួយដែលស្រ្តីមានគភ៌ត្រូវតែទទួលទានឱ្យបានរាល់ថ្ងៃ ព្រោះនៅក្នុងផ្លែឈើមានសារធាតុអាហារ និងវីតាមីនដែលសំខាន់សម្រាប់ស្រ្តីមានគភ៌ និងកូនក្នុងផ្ទៃ។ ប្រហែលជាចង់ដឹងហើយមែនទេថា តើមានផ្លែឈើអ្វីខ្លះទៅ? សូមតាមដានជាបន្តទាំងអស់គ្នា។
1 – ផ្លែត្របែក
ជាផ្លែឈើដែលងាយស្រួលរកទទួលទានណាស់ សម្បូរទៅដោយវីតាមីន C និងវីតាមីន A ច្រើន ។ វីតាមីនដែលមាននៅក្នុងផ្លែត្របែកនឹងជួយការពារមិនឱ្យកើតជំងឺផ្តាសាយ និងធ្វើឱ្យអញ្ចាញ និងធ្មេញរបស់ស្រ្តីមានគភ៌រឹងមាំល្អ។
2 – ផ្លែដូងខ្ចី
មានគុណតម្លៃខាងអាហារខ្ពស់ ជួយបំបាត់ការស្រេកទឹក ជួយកាត់បន្ថយអាការនឿយល្វើយ មានសារធាតុអាហារដូចជា ប្រូតេអ៊ីន កាល់ស្យូម និងស្ករ។ ស្រ្តីមានគភ៌ដែលជិតប្រសូតជាច្រើននាក់និយមញ៉ាំទឹកដូងខ្ចី ព្រោះជឿថា នឹងធ្វើឱ្យកូនមានសាច់ និងស្បែកសភ្លឺរលោងតាំងពីពេលកើតភ្លាម។
3 – ផ្លែចេកទុំ
នៅក្នុងផ្លែចេកទុំមានសារធាតុអាហារដែលសំខាន់ៗដូចតទៅនេះ សារធាតុដែក ផូស្វ័រ ណៃអាស៊ិន វីតាមីន A, B1, B2, B6 និងវីតាមីន C និងសារធាតុថេបតូភែន។ នៅក្នុងផ្លែចេកទុំនៅមានកាកសរសៃអាហារខ្ពស់ ធ្វើឱ្យប្រព័ន្ធបន្ទោបង់របស់ស្រ្តីមានគភ៌ដំណើរការល្អ បន្ទោបង់បានតាមប្រក្រតី និងថែមទាំងជាផ្លែឈើដែលងាយស្រួលរកទទួលទានបានទៀតផង។
4 – ផ្លែល្ហុងទុំ
នៅក្នុងផ្លែល្ហុងទុំមានសារធាតុប្រឆាំងអនុមូលឥស្សរៈ និងមានកាកសរសៃច្រើន ស្រ្តីមានគភ៌ណាដែលច្រើនតែមានអាការទល់លាមកខណៈពេលមានគភ៌ញឹកញាប់នោះ គួរទទួលទានផ្លែល្ហុងទុំឱ្យបានច្រើនដើម្បីការបន្ទោបង់ដែលល្អ។
5 – ផ្លែភ្រូន (Prune)
នៅក្នុងផ្លែភ្រូនមានសារធាតុដែកខ្ពស់ ជាផ្លែឈើថែបំប៉នគភ៌ដ៏ល្អបំផុតសម្រាប់ស្រ្តីមានគភ៌ដែលមានសភាវស្លេកស្លាំង ក្រៅពីសារធាតុដែកហើយនោះ ផ្លែភ្រូននៅមានកាល់ស្យូមដែលជួយសាងឆ្អឹង និងធ្មេញ ហើយនិងវីតាមីន B2 ដែលជួយសាងគ្រាប់ឈាមក្រហមទៀតផង។
6 – ផ្លែក្រូចពោធិ៍សាត់
មានកាកសរសៃអាហារខ្ពស់ ស្រ្តីមានគភ៌គួរតែទទួលទានជាប្រចាំដើម្បីឱ្យប្រព័ន្ធបន្ទោបង់ដំណើរការតាមប្រក្រតី ហើយផ្លែក្រូចថែមទាំងមានវីតាមីន C ខ្ពស់ទៀតផង ជាផ្លែឈើដែលទទួលទានហើយអាចប្រឆាំងនឹងជំងឺគ្រុនផ្តាសាយបានទៀតផង។
7 – ផ្លែប៉ោម
ជាផ្លែឈើដែលមានវីតាមីន និងសារធាតុអាហារច្រើនណាស់ ដូចជា មានវីតាមីន A, B1, B2, B6, បៃអូឌីន អាស៊ីតហ្វូ៉លិក អំបិលរ៉ែ កាល់ស្យូម ផូស្វ័រ ប៉ូតាស្យូម សូដ្យូម។ សារធាតុអាហារដែលរៀបរាប់មកទាំងអស់នេះ មានប្រយោជន៍ចំពោះរាងកាយស្រ្តីមានគភ៌ និងទារកក្នុងផ្ទៃណាស់។ ស្រ្តីមានគភ៌គួរទទួលទានផ្លែប៉ោមក្នុងមួយអាទិត្យឱ្យបានពី 1 – 2 ដងជាការល្អប្រសើរណាស់។
ផ្លែឈើជាអាហារថែបំប៉នគភ៌ដែលមានប្រយោជន៍ និងងាយស្រួលទទួលទានណាស់ ហើយនៅក្នុងប្រទេសយើងក៏មានផ្លែឈើច្រើនយ៉ាងដើម្បីឱ្យស្រ្តីមានគភ៌ជ្រើសរើសទទួលទានបានតាមរដូវកាលដែរ៕
June 11, 2020
Marseille និង Rennes រួចផុតពីគ្រោះធំ ខណៈដែល PSG គ្រងជើងឯក 3ឆ្នាំជាប់គ្នា
លីកកំពូលបារាំង ត្រូវបានរំសាយចោល ក្រោយពីលោក Philippe អ្នកតំណាងលីកកំពូលបារាំង មានប្រសាសន៍នៅក្នុងសន្និបាតជាតិកាលពីខែមុនថា៖«ព្រឹត្តិការណ៍កីឡាធំ មិនអាចកើតឡើងមុនខែកញ្ញាបានទេ រដូវកាលបាល់ទាត់អាជីព 2019-20 ក៏នឹងមិនអាចវិលត្រឡប់មកវិញបានដែរ»។
ក្នុងនោះដែរគណៈកម្មការរៀបចំការប្រកួតបានគណនាពិន្ទុតាមរូបមន្តពិន្ទុមធ្យមក្នុង 1ប្រកួត ដោយជើងឯកបានទៅលើក្រុម Paris Saint Germain (PSG) ដែលជាបានក្លាយជាជើងឯក 3ឆ្នាំជាប់ៗគ្នា។
គួរបញ្ជាក់ដែរថា ក្លិបចំនួន2 គឺ Marseille និង Rennes ដែលកាន់កាប់កន្ទុយតារាងនៃក្របខ័ណ្ឌនេះមិនត្រូវបានកាត់ចេញឡើយ ខណៈក្លិប Lille ត្រូវទទួលបានកៅអីមួយកន្លែងនៅក្នុងក្របខ័ណ្ឌ Europa League៕
June 10, 2020
ក្រុមហ៊ុនផលិតរថយន្ត Honda ផ្អាកដំណើរការស្ទើរទូទាំងពិភពលោក តែមិនមែនដោយសារ Covid-19 នោះទេ
ក្រុមហ៊ុនផលិតរថយន្តដ៏ល្បីល្បាញ Honda ត្រូវបានគេរាយការណ៍ថាបានបិទចង្វាក់ផលិតកម្មរបស់ខ្លួនស្ទើរពេញពិភពលោកទៅហើយនាពេលនេះ។
តាមការបញ្ជាក់របស់នាយកដ្ឋានប្រឆាំងបទល្មើសបច្ចេកវិទ្យា បានឱ្យដឹងថារោងចក្រផលិតរថយន្តរបស់ក្រុមហ៊ុនហុងដា ត្រូវបានផ្អាកដំណើការស្ទើតែពេញមួយពិភពលោកទៅហើយ តែនេះមិនមែនដោយសារការរាតត្បាតនៃជំងឺ Covid–19 នោះទេ វាគឺជាការវាយប្រហារពីក្រុមជនអនាមិក (Hackers) ទៅវិញទេ។ ប្រព័ន្ធបណ្ដាញ (Network System) របស់ក្រុមហ៊ុនហុងដាត្រូវបានវាយប្រហារ ដែលធ្វើឱ្យក្រុមហ៊ុនមិនអាចចូលប្រើកុំព្យូទ័រសឺវ័រ អ៊ីម៉ែល និងប្រព័ន្ធផ្សេងៗទៀតបាន នេះបើតាមការផ្សព្វផ្សាយរបស់សារព័ត៌មាន BBC។ រោងចក្រដែលត្រូវបានបិទទាំងនោះមាននៅបណ្តារប្រទេសដូចជា ចក្រភពអង់គ្លេស ទួកគី អ៊ីតាលី ជប៉ុន និងតំបន់អាមេរិកខាងជើង។
បើយោងតាមក្រុមអ្នកស្រាវជ្រាវផ្នែកសុវត្ថិភាព បានឱ្យដឹងថា នេះអាចជាការវាយប្រហារប្រភេទ Snake Ransomware ដែលក្រុមអ្នកវាយប្រហារបានបំប្លែង (encrypt) ទិន្នន័យរបស់ក្រុមហ៊ុន ឬបិទមិនឱ្យក្រុមហ៊ុនអាចចូលប្រើប្រព័ន្ធកុំព្យូទ័របាន ប៉ុន្តែក្រុមហ៊ុនហុងដាបានអះអាងថាទិន្នន័យទាំងអស់ពុំមានការប៉ះពាល់នៅឡើយទេរហូតមកដល់ពេលនេះ។ បច្ចុប្បន្នគេពុំបានដឹងទេថា តើ ក្រុមអ្នកវាយប្រហារចូលទៅក្នុងប្រព័ន្ធ Network តាមរបៀបណានោះទេ ប៉ុន្តែវាប្រហែលអាចចូលតាមការទាញយកឯកសារផ្សេងៗ ដែលមានភ្ជាប់មកជាមួយមេរោគទាំងនោះ។
នេះជាការក្រើនរំឭកមួយ ដែលទាំងក្រុមហ៊ុន ក៏ដូចជាអ្នកប្រើប្រាស់ត្រូវតែមានការប្រុងប្រយ័ត្នជាមួយប្រព័ន្ធសុវត្ថិភាពដើម្បីជៀសវាងពីការវាយប្រហារនានា ជាពិសេសសម្រាប់ក្រុមហ៊ុនផលិតរថយន្តនេះតែម្ដង ព្រោះថាបច្ចេកវិទ្យានាពេលបច្ចុប្បន្ននេះ គឺមានយ៉ាងច្រើនដែលត្រូវបានប្រើបាស់នៅក្នុងប្រព័ន្ធដំណើរការរបស់រថយន្តដូចជា ប្រព័ន្ធហ្វ្រាំង ប្រព័ន្ធគ្រប់គ្រងល្បឿន ហើយនៅថ្ងៃអនាគតក៏នឹងមានប្រព័ន្ធដែលអាចឱ្យរថយន្តបើកបានដោយខ្លួនឯងផងដែរ៕
June 10, 2020
កម្ពុជានឹងបន្តធ្លាក់ភ្លៀងដល់ថ្ងៃទី16 ខែមិថុនា សូមប្រយ័ត្នចំពោះខ្យល់កន្ត្រាក់ និងរន្ទះ
ក្រសួងធនធានទឹក និងឧតុនិយម បានបញ្ជាក់ថា តាមរយៈនៃការប្រែប្រួលជាបន្តបន្ទាប់ នៃស្ថានភាពអាកាសធាតុ សង្កេតឃើញថា កម្ពុជាកំពុងទទួល ខ្យល់មូសុងនិរតីកម្រិតបង្គួរ។ តែដល់ថៃ្ងទី12-16 ខែមិថុនា នឹងមានប្រព័ន្ធសម្ពាធទាបអូសបន្លាយ កាត់ពីភាគខាងត្បូងប្រទេសឡាវ។
ស្ថានភាពបែបនេះធ្វើឱ្យ ៖
1.បណ្តាខេត្តនៅតំបន់វាលទំនាបកណ្តាល ៖
– សីតុណ្ហភាពអប្បបរមា មានពី 25-27°C
– សីតុណ្ហភាពអតិបរមា មានពី 35-37°C ។
នឹងអាចមានភ្លៀងធ្លាក់រាយប៉ាយពីតិចទៅបង្គួរ និងចាប់ពីថ្ងៃទី 12-16 ខែមិថុនា ភ្លៀងអាចនឹងបន្តធ្លាក់ពីមធ្យមទៅច្រើន ។
2.បណ្តាខេត្តនៅតំបន់ជួរភ្នំដងរែក និងខ្ពង់រាបឦសាន ៖
– សីតុណ្ហភាពអប្បបរមា មានពី 24-26°C
– សីតុណ្ហភាពអតិបរមា មានពី 34-36°C ។
នឹងអាចមានភ្លៀងពីខ្សោយទៅបង្គួរ ។
3.បណ្តាខេត្តនៅតំបន់មាត់សមុទ្រ ៖
– សីតុណ្ហភាពអប្បបរមា មានពី 25-27°C
– សីតុណ្ហភាពអតិបរមា មានពី 33-35°C ។
នឹងអាចមានភ្លៀងតិចទៅបង្គួរ ក្នុងនោះ មានផ្នែកខ្លះ នឹងអាចមានភ្លៀងធ្លាក់ច្រើន ។
ស្ថានភាពអាកាសធាតុបែបនេះ សូមសាធារណជនប្រុងប្រយ័ត្ន ចំពោះបាតុភូតផ្គរ រន្ទះ ខ្យល់កន្ត្រាក់ដែលនឹងអាចកើតមានជាយហេតុ៕
June 10, 2020
ក្រសួងការងារចេញកាលវិភាគចរចារប្រាក់ឈ្នួលអប្បបរមាផ្នែកវាយនភណ្ឌ កាត់ដេរ និងផលិតស្បែងជើងឆ្នាំ2021
ក្រសួងការងារ និងបណ្តុះបណ្តាលវិជ្ជាជីវៈ ថ្មីៗនេះបានចេញសេចក្តីជូនដំណឹងស្តីពីកាលវិភាគនៃការចរចារប្រាក់ឈ្នួលអប្បបរមាផ្នែកវាយនភណ្ឌ កាត់ដេរ និងផលិតស្បែកជើងសម្រាប់ឆ្នាំ 2021។
ក្រសួងការងារបានបញ្ជាក់ថាកាលវិភាគនៃការចរចារប្រាក់ឈ្នួលអប្បបរមាផ្នែកវាយនភណ្ឌ កាត់ដេរ និងផលិតស្បែកជើង សម្រាប់ឆ្នាំ2021 ត្រូវបានកំណត់ដូចជា៖
1. ការពិភាក្សាប្រាក់ឈ្នួលអប្បបរមាសម្រាប់ឆ្នាំ 2021ត្រូវអនុវត្តតាមប្រតិទិនដូចតទៅ
- កំណត់យក ខែកក្កដា ឆ្នាំ2020 ជាការចាប់ផ្តើមពិភាក្សាប្រាក់ឈ្នួលអប្បបរមា ជាលក្ខណៈផ្ទៃក្នុងរបស់ភាគីនីមួយៗ
- កំណត់យកខែសីហា ឆ្នាំ2020 ជាការចាប់ផ្តើមពិភាក្សាប្រាក់ឈ្នួលអប្បបរមា ជាលក្ខណៈទ្វេភាគី និងត្រីភាគី
- កំណត់យកខែកញ្ញា ឆ្នាំ2020 បើកកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមា ដើម្បីសម្រេចប្រាក់ឈ្នួលអប្បបរមាផ្នែកវាយនភណ្ឌ កាត់ដេរ និងផលិតស្បែងជើងសម្រាប់ឆ្នាំ2021
- កំណត់យកថ្ងៃទី1 ខែមករា ឆ្នាំ2021 ជាកាលបរិច្ឆេទចូលជាធរមានប្រាក់ឈ្នួលអប្បបរមា
1. គ្រប់ភាគីទាំងអស់ត្រូវប្រើប្រាស់ទិន្នន័យផ្លូវការស្របច្បាប់ និងការស្រាវជ្រាវបែបវិទ្យាសាស្ត្រ ដោយយោងលើលក្ខណវិនិច្ឆ័យបែបសង្គម (ស្ថានភាពគ្រួសារ អាត្រាអតិផរណា និងការចំណាយក្នុងការរស់នៅ) និងលក្ខណវិនិច្ឆ័យ បែបសេដ្ឋកិច្ច (ផលិតភាព ភាពប្រកួតប្រជែងរបស់ប្រទេស ស្ថានភាពទីផ្សារការងារ និងកម្រិតចំណេញរបស់វិស័យ) ដូចមាន កំណត់ក្នុងមាត្រា5 នៃច្បាប់ស្ដីពីប្រាក់ឈ្នួលអប្បបរមា ក៏ដូចជាបន្ទាត់ភាពក្រីក្រ ដើម្បីធ្វើជាមូលដ្ឋានក្នុងការក្នុងការពិភាក្សា សម្របសម្រួលផ្ទៃក្នុង និងទទួលបានគោលជំហររួមមួយ។
2. គ្រប់ភាគីទាំងអស់ត្រូវអនុវត្តតាមការណែនាំ និងវិធានការរបស់ក្រសួងសុខាភិបាល នៅគ្រប់កិច្ចប្រជុំរបស់ខ្លួន ដើម្បីចូលរួមទប់ស្កាត់កុំឱ្យមានការឆ្លង និងរីករាលដាលនៃជំងឺCovid-19 ក្នុងប្រទេសកម្ពុជា៕
June 10, 2020
15ចំណុច ឪពុកម្តាយត្រូវធ្វើពេលកូនៗរៀនអនឡាញ ក្នុងសម័យកូវីដ
ការដាក់ចិត្ត និងសកម្មភាពក្នុងភាពជាម្ចាស់ការ និងការសហការជាវិជ្ជាមានរបស់អ្នកអាណាព្យាបាលជាមួយសាលារៀនជារឿងចាំបាច់ណាស់ក្នុងអំឡុងពេលសិក្សាអនឡាញ និងពីចម្ងាយនេះ។
លោក ប៉ិច បូឡែន អគ្គនាយកក្រុមហ៊ុន វេសឡាញ អេឌ្យូខេសិន គ្រុប បានលើកឡើងថា អាណាព្យាបាលពិតជាសំខាន់ណាស់ក្នុងការចូលរួមជាមួយនឹងការសិក្សារបស់កូនក្នុងដំណាក់កាលនៃការសិក្សាពីចម្ងាយនេះ។ ហេតុនេះអាណាព្យាបាលគួរអនុវត្តនូវគោលគំនិត និងសកម្មភាពអប់រំមួយចំនួនដូចខាងក្រោម៖
1. ក្រៅពីការបំពេញការងារ ឬសកម្មភាពរកស៊ីខាងក្រៅ សូមចំណាយពេលវេលាឱ្យបានច្រើនតាមដាន និងផ្តល់កម្លាំងចិត្តដល់កូន។
2. កាត់បន្ថយសកម្មភាពជួបជុំមិត្តភ័ក្រខាងក្រៅ ហើយនាំកូនដើរកំសាន្តក្នុងធម្មជាតិខាងក្រៅឱ្យបានច្រើន ដូចជាវាលស្រែ ដើមឈើ រុក្ខជាតិបៃតង ភ្នំ សមុទ្ទ ស្រូបខ្យល់បរិសុទ្ធ។
3. ចំណាយពេលលេងល្បែងកំសាន្តផ្សេងៗជាមួយពួកគេ ដើម្បីបង្វែរកុំឱ្យកូនៗចំណាយពេលលើអេក្រង់អេឡិកត្រូនិកបន្ថែមទៀត បន្ទាប់ពីសិក្សាតាមអនឡាញហើយ។
4. នាំកូនធ្វើសកម្មភាពកិច្ចការផ្ទះនានា ដូចជាចម្អិនម្ហូប ឬធ្វើសួនផ្សេងៗ ឬលេងកីឡា។
5. ដាស់តឿនអប់រំកូនជាប្រចាំពីផលប៉ះពាល់ និងហានិភ័យនានាតាមបណ្តាញសង្គម ដូចជាគេហទំព័រដែលមិនគួរមើល ព័ត៌មានដែលល្អ ឬមិនល្អ ព័ត៌មានពិត ឬក្លែងក្លាយ។ ព័ត៌មានក្នុងបណ្តាញសង្គមភាគច្រើននៅជាព័ត៌មានបំពុល គ្រោះថ្នាក់ និងអាចឱ្យយុវជនជំទង់ភាគច្រើនមានការគិត វិភាគ និងធ្វើសកម្មភាពខុស។
6. កាត់បន្ថយការប្រើទូរស័ព្ទដែលឥតប្រយោជន៍ ពេលនៅក្បែរកូន។ លោកអ្នកគួរចំណាយពេលដ៏មានតម្លៃនេះនិយាយលេង ស្ទង់អារម្មណ៍ និយាយលើកទឹកចិត្តកូនវិញ។ ប្រសិនបើលោកអ្នកកាន់ទូរស័ព្ទមកកំសាន្តនោះ កូនរបស់លោកអ្នកក៏នឹងធ្វើតាមដែរ។
7. អាចមើលកុន ឬទូរទស្សន៍រួមគ្នាជាលក្ខណៈគ្រួសារនៅផ្ទះ ជាមួយនឹងអាហារ និងភេសជ្ជៈដែលកូនចូលចិត្តក្នុង1សប្តាហ៍ ឬ2សប្តាហ៍ម្តង នៅល្ងាចចុងសប្តាហ៍ណាមួយ។ វានឹងជាបទពិសោធន៍ដ៏អស្ចារ្យ និងសប្បាយរីករាយ1។
8. ប្រសិនបើលោកអ្នកចេះ យល់ដឹងខ្លះពីសមាធិ ឬយ៉ូហ្កា លោកអ្នកគួរបង្រៀន និងបបូលកូនៗចូលរួមជាមួយលោកអ្នក។ សកម្មភាពទាំងអស់នេះអាចជួយកូនៗរបស់លោកអ្នកគ្រប់គ្រងអារម្មណ៍ និងការពារខ្លួនរបស់ពួកគេពីភាពតានតឹងផ្លូវចិត្តបានខ្លះ។
9. ក្នុងក្រុមគ្រួសារ បង្កើតបរិយាកាសរស់នៅ ជាពិសេសការនិយាយស្តីវិជ្ជមាន ល្អៗ នឹងគ្នា។ ចៀសវាងបរិយាកាសហឹង្សាក្នុងគ្រួសារ។
10. អ្នកអាណាព្យាបាលត្រូវស្វែងរក និងប្រើប្រាស់សេវាប្រឹក្សាយោបល់ ជាមួយសាលារៀន ឬអ្នកជំនាញប្រឹក្សាយោបល់ភ្លាម ប្រសិនបើលោកអ្នកយល់ថាអ្នកមានអារម្មណ៍តានតឹងខ្លួនឯងដែរ។
11. ព្យាយាមកន្លែងកូនរៀនឱ្យបានល្អ។ មានពន្លឺគ្រប់គ្រាន់ លំហូរខ្យល់ល្អ ស្រឡះ និងមានឧបករណ៍រៀនសូត្រគ្រប់គ្រាន់។ បើមានលទ្ធភាព សូមប្រើប្រាស់កុំព្យូទ័រ ឬឧបករណ៍អេឡិកត្រូនិកដែលមានអេក្រង់ធំ (13អ៊ិញឡើង) ដើម្បីឱ្យកូនរៀន។
12. ពិភាក្សាជាមួយសាលារៀន និងគ្រូ ស្វែងយល់ពីកម្មវិធីសិក្សា របៀបសិក្សា និងរបៀបប្រើឧបករណ៍សិក្សាអនឡាញ។
13. ប្រសិនបើមានមេរៀនក្នុងសៀវភៅពុម្ភ សូមណែនាំកូនឱ្យអានសៀវភៅវិញ ជំនួសឱ្យអានក្នុងសៀវភៅអេឡិចត្រូនិច។
14. ជំនួសកាសដាក់ផ្ទាល់នឹងត្រចៀក សូមប្រើសម្លេងផ្ទាល់ពីកុំព្យូទ័រ ឬទិញកូនបាស់តូចៗ ហើយភ្ជាប់ប្ល៊ូទូសឱ្យគាត់ប្រើវិញ។ ហើយលោកអ្នកគួរតែទិញវ៉ែនតាការពារពន្លឺជូនពួកគេ ពេលគេមើលឧបករណ៍អេឡិចត្រូនិច។
15. ចំពោះកុមារតូចៗ សូមស្វែងយល់ និងប្រើប្រាស់ឧបករណ៍ សម្ភារអប់រំតាមបែបល្បែងកំសាន្តឱ្យបានច្រើនបំផុត រួមនឹងសន្លឹកកិច្ចការដែលយកមកពីសាលា។
  វាមិនមែនជាការងាយស្រួលទេ សម្រាប់ទាំងសាលារៀន គ្រូ និងអ្នកអាណាព្យាបាលក្នុងការបង្រៀនកូនអនឡាញ និងពីចម្ងាយបែបនេះ។ វាត្រូវការភាពអត់ធ្មត់ ក្តីស្រលាញ់ និងការយកចិត្តទុកដាក់ខ្ពស់ណាស់ ជាពិសេសវាកាន់តែលំបាកប្រសិនបើពីមុនមកអ្នកអាណាព្យាបាលមិនដែលបានធ្វើ ឬធ្វើបានតិចតួចបំផុតនូវសកម្មភាពខាងលើ។
វាមិនងាយស្រួលទេក្នុងការធ្វើជាអ្នកអាណាព្យាបាលល្អម្នាក់។ តែលោកអ្នកគួរតែអបអរខ្លួនឯងប្រសិនបើលោកអ្នកអាចតាំងចិត្តមើល ស្វែងយល់ខ្លឺមសារជូនយោបល់ដ៏វែងដែលខ្ញុំតាំងចិត្តសរសេរពីលើមកនេះ ដើម្បីយកទៅប្រើប្រាស់ជាគុណប្រយោជន៍ដល់កូនៗរបស់យើង។
លោកជឿជាក់ថាស្ថានភាពនេះ វាក៏នឹងដាស់តឿនទាំងសាលារៀន គ្រូបង្រៀន ឱ្យអភិវឌ្ឍខ្លួនកាន់តែប្រសើរឡើងលើភាពជាដៃគូអភិវឌ្ឍកុមារ យុវជនរបស់យើងទាំងអស់គ្នា។
សូមជូនពរលោកគ្រូ អ្នកគ្រូ អ្នកអាណាព្យាបាល និងកូនក្មួយទាំងអស់ឱ្យមានសុខភាព និងសុវត្ថិភាពល្អគ្រប់ៗគ្នា និងសូមចូលរួមបន្តការពារទប់ស្កាត់ការរីករាលដាលជម្ងឺកូវីដ19ទាំងអស់គ្នា៕
June 10, 2020
Becelona កំពុងប្រញាប់ប្រញាល់ រៀបចំកុងត្រាថ្មីឱ្យ Messi
Messi នឹងត្រូវចប់កុងត្រានៅឆ្នាំក្រោយ ប៉ុន្តែរូបគេមានលក្ខខណ្ឌមួយទៀតដែរលើកុងត្រាចាស់ គឺអាចដើរចេញដោយសេរី នៅរដូវក្ដៅខាងមុខនេះ។ ដោយសារតែលក្ខខណ្ឌមួយនេះហើយ ទើបបានជាក្រុម Barcelona ប្រញាប់ខ្លាំង ក្នុងការព្យាយាមបន្ដកុងត្រាឱ្យវីរបុរសរបស់ខ្លួនទៀត។ ព្រោះបើទុកដល់រដូវក្ដៅខាងមុខ ខ្លាចមានក្លិបណាអន្ទងចិត្ត Messi បានសម្រេច Messi អាចនឹងទៅលេងនៅទីនោះបាត់។
គួរបញ្ជាក់ដែរថា ប្រសិនបើ Bacelona មិនបន្តកុងត្រាជាមួយនឹង Messi ទេ រូបគេអាចនឹងដើរចេញពីក្លិបមួយដែលខ្លួនបានលេងឱ្យអស់រយៈពេលជិត 20ឆ្នាំ ដោយគ្មានតម្លៃខ្លួនអ្វីទាំងអស់នៅឆ្នាំ2021៕
June 9, 2020
កម្មវិធី Signal ដាក់មុខងារ Blur ផ្ទៃមុខ បំណងជួយការពារសុវត្ថិភាពអ្នកប្រើទាំង Android និង iOS
Signal ជាក្រុមហ៊ុនល្បីឈ្មោះមួយ មានមូលដ្ឋាននៅសហរដ្ឋអាមេរិក។ Signal ជាប្រភេទកម្មវិធីឆាតផ្តាច់មុខ ដែលមានមុខងារច្រើន និងមានភាពងាយស្រួលប្រហាក់ប្រហែលគ្នា ស្រដៀងទៅនឹង messenger របស់ Facebook ដែរ។
ថ្មីៗនេះ ក្រុមហ៊ុនបានប្រកាសជាផ្លូវការ ពីមុខងារថ្មី (face-blurring tool) ដែលអាចបិទគ្រប់មុខមនុស្សដែលពាក់ព័ន្ធក្នុងរូបថត ក្នុងន័យការពារសុវត្ថិភាពអ្នកប្រើ ទាំង Android និង iOS។ ម្យ៉ាងទៀតវាក៏ជាមុខងារមួយថ្មីមុនគេ នៅឆ្នាំ2020 នេះដែលមិនទាន់មាននរណាអាចធ្វើបាននៅឡើយ៕
June 9, 2020
មកស្គាល់ស្មាតហ្វូនពិសេស មានដាក់ Sensor សម្រាប់វាស់កម្តៅក្នុងខ្លួនមនុស្សបាន
ស្មាតហ្វូន Honor Play 4 Pro របស់ក្រុមហ៊ុន Hornor ដែលជាសាខារបស់ក្រុមហ៊ុន Huawei អាចជាស្មាតហ្វូនដំបូងគេ ដែលអាចវាស់កម្តៅក្នុងខ្លួនមនុស្សបាន ដោយដាក់នៅចំមុខ ឬកដៃរបស់មនុស្ស វានឹងបង្ហាញតួលេខសីតុណ្ហភាពនៅលើអេក្រង់។ Honor និយាយថា Sensor នេះអាចវាស់សីតុណ្ហភាពបានចាប់ពី -20អង្សាសេ ដល់ 100អង្សាសេ ដែលល្មមគ្រប់គ្រាន់សម្រាប់ការវាស់កម្ដៅខ្លួនរបស់មនុស្ស។
Sensor វាស់កម្ដៅអាចជាមុខងារចម្លែកមួយលើស្មាតហ្វូន ប៉ុន្តែក្នុងសម័យកាលជំងឺរាតត្បាតនេះ នៅពេលដែលកម្ដៅខ្លួនឡើងខ្ពស់ វាអាចជាសញ្ញានៃការកើតមានជំងឺកូវីដ-19នោះ វាអាចជាមុខងារដែលមានប្រយោជន៍មួយដែរ។
តម្លៃរបស់ Honor បានបើកទទួលការកុម្ម៉ង់ទិញ Play 4 Pro ក្នុងតម្លៃប្រមាណ 410ដុល្លារ បានធ្វើឱ្យវាក្លាយជាស្មាតហ្វូនប្រើឈីប Kirin 990 ដែលមានតម្លៃធូរជាងគេ។
ខាងក្រោមនេះលក្ខណសម្បតិ្តរបស់ស្មាតហ្វូនថ្មីចំនួន 2ម៉ូដែលរបស់ក្រុម Honor Play 4 Pro
-មានបំពាក់អេក្រង់ LCD ទំហំ 6.5អ៊ីញ
-មានចោះរន្ធ2 លើអេក្រង់សម្រាប់កាមេរ៉ា Selfie មេទំហំ32MP និងកាមេរ៉ា Ultrawide ទំហំ 8MP
-អាចថតវីដេអូកម្រិត 4K/60fps ផងដែរ។
-បន្ទះឈីប Kirin 990 មានសេវា 5G
-មាន RAM ទំហំ 8GB និងអង្គផ្ទុកទំហំ 128GB
-ប្រព័ន្ធប្រតិបត្តិការ Android 10 ជាមួយស្បែក Magic UI 3.1
-ថ្មទំហំ 4200mAh សាកល្បឿន 40វ៉ាត់ សាកត្រឹម 30នាទីបានថ្មដល់ 70%។
សូមទស្សនាវីដេអូខាងក្រោម៖
https://www.youtube.com/watch?v=NBWH5DYLRR0
June 9, 2020