Author: ធឿន មករា

វៀតណាម ត្រៀមខ្លួនជាម្ចាស់ផ្ទះវគ្គចែកពូល SUZUKI CUP 2020
គិតមកទល់នឹងពេលនេះ កាលបរិច្ឆេទនៃការចាប់ឆ្នោតការប្រកួតពានរង្វាន់ AFF SUZUKI CUP 2020 ត្រូវបានពន្យារពេល ក្រោយប្រទេសថៃជាម្ចាស់ផ្ទះ ដែលគ្រោងប្រារព្ធពិធីចាប់ពូលនេះ កំពុងស្ថិតនៅក្នុងសភាវបិទប្រទេស។
កាលបរិច្ឆេទនៃការចាប់ឆ្នោតថ្មីនេះ ត្រូវបានគេកំណត់យកខែកក្កដាខាងមុខនេះ ដោយត្រូវប្រជុំគ្នា ជ្រើសរើសប្រទេសដែលជាម្ចាស់ផ្ទះក្នុងការចាប់ពូលសាជាថ្មី ដោយក្នុងនោះវៀតណាម បានបង្ហាញជំហរក្នុងការរៀបចំនេះ ខណៈដែលប្រទេសនេះមានការធូរស្បើយស្ទើរតែ 100ភាគរយ ទៅលើស្ថានភាពកូវីដ-19។
គួររំឭកដែរថា កាលពីឆ្នាំ2018 កន្លងទៅ វៀតណាម គឺជាម្ចាស់ពានរង្វាន់នេះ ក្រោយយកឈ្នះក្រុមម៉ាឡេស៊ី ដោយលទ្ធផល 1ទល់នឹង0 នៅជើងទី2 ក្រោយជើងទី1 ស្មើគ្នា 2ទល់នឹង2៕

June 16, 2020
ផ្នត់គំនិតមានសារៈសំខាន់ខ្លាំងណាស់សម្រាប់ការផ្លាស់ប្តូរជីវិត
នៅក្នុងការរស់នៅរបស់មនុស្សយើងម្នាក់ៗ យើងចាំបាច់ត្រូវតែមានការអភិវឌ្ឍជាប់ជាប្រចាំ តែពេលខ្លះមនុស្សដែលតែងតែខិតខំរៀនសូត្រមិនប្រាកដថាទទួលជោគជ័យក្នុងជីវិតនោះទេ។ បញ្ហានេះបណ្តាលមកពីពួកគេមានផ្នត់គំនិត (paradigm) មិនត្រឹមត្រូវ។
លោក Steven Covey អ្នកនិពន្ធសៀវភៅទម្លាប់ល្អទាំង7យ៉ាងសម្រាប់បុគ្គលមានប្រសិទ្ធភាពខ្ពស់ បានលើកឡើងថា ចំណុចដែលកំណត់វាសនារបស់មនុស្សសំខាន់បំផុតគឺផ្នត់គំនិត ព្រោះវាជាចំណុចចាប់ផ្តើមដ៏សំខាន់ដែលនាំឱ្យមានសកម្មភាពកើតឡើង។ មនុស្សរីកចម្រើន ឬមិនរីកចម្រើនគឺអាស្រ័យលើផ្នត់គំនិតនេះឯង ប្រសិនបើផ្នត់គំនិតមិនល្អ មានន័យថាគាត់ចាប់ផ្តើមពីចំណុចមិនល្អ ហើយបង្កើតសកម្មភាពមិនល្អដែលធ្វើឱ្យគាត់ក្លាយជាមនុស្សមិនរីកចម្រើន។
អ្នកជំនាញអភិវឌ្ឍមនុស្សខាងលើបានលើកឡើងផងដែរថា ចំនុចសំខាន់ក្នុងការអភិវឌ្ឍផ្នត់គំនិតឱ្យបានត្រឹមត្រូវគឺបណ្តុះភាពជាម្ចាស់ការ (proactive) មានន័យថាយើងត្រូវតែជាមនុស្សដែលចេះមើលលើគ្រប់រឿងរ៉ាវក្នុងជីវិតឱ្យបានច្បាស់លាស់ មិនមែនធ្វើតាមអារម្មណ៍នោះទេ។ ហើយបន្ថែមពីលើនេះទៀត យើងត្រូវតែជាមនុស្សឯករាជ្យ ដែលមានគំនិតស៊ីជម្រៅពីខាងក្នុង មិនឆាប់ខឹង ឆាប់ជឿ ឬឆាប់ប្រតិកម្មតបទៅនឹងរឿងរ៉ាវណាមួយដែលកើតឡើងចំពោះមុខ។ ភាគច្រើនមនុស្សដែលមានផ្នត់គំនិតស៊ីជម្រៅ គេតែងប្រមូលហេតុផលឱ្យបានច្បាស់លាស់បំផុតមុននឹងសម្រេចចិត្ត ឬបញ្ចេញសកម្មភាពណាមួយក្នុងជីវិត៕
June 16, 2020
អត្រាប្តូរប្រាក់ដុល្លារអាមេរិកឆ្នាំនេះ និងឆ្នាំក្រោយអាចស្ថិតក្នុងរង្វង់ 4,100រៀល
រាជរដ្ឋាភិបាលកម្ពុជា តាមរយៈសារាចរណ៍ណែនាំស្តីពីការរៀបចំផែនការយុទ្ធសាស្ត្រថវិកាឆ្នាំ 2021-2023 បានបញ្ជាក់ថា អត្រាប្តូរប្រាក់រៀលធៀបនឹងប្រាក់ដុល្លារអាមេរិកអាចស្ថិតក្នុងរង្វង់ 4,100ដុល្លារអាមេរិក។
អត្រាថេរនេះដោយសារតែមានជំនឿទុកចិត្តពីសំណាក់សាធារណជនលើការប្រើប្រាស់ប្រាក់រៀល តាមរយៈការអនុវត្តវិធានការលើកកម្ពស់ប្រាក់រៀលរបស់ធនាគារជាតិនៃកម្ពុជា និងការបន្តពង្រឹងគោលនយោបាយគ្រប់គ្រងសាច់ប្រាក់ក្នុងវិស័យហិរញ្ញវត្ថុសាធារណៈ។
រដ្ឋាភិបាលបានឱ្យដឹងផងដែរថា ទុនបម្រុងអន្តរជាតិសរុបក្នុងឆ្នាំ 2020 ត្រូវបានរំពឹងទុកថានឹងថយចុះមកត្រឹម 16,937លានដុល្លារអាមេរិក ដោយសារការរីកធំនៃឱនភាពគណនីចរន្ត រួមផ្សំនឹងការរំពឹងទុកការធ្លាក់ចុះទុនវិនិយោគពីបរទេស។ ទោះជាយ៉ាងនេះក្តីទំហំនៅតែអាចធានាការនាំចូលបាន 8ខែកន្លះ ដោយហេតុថាការនាំចូលរបស់កម្ពុជាក៏នឹងថមថយចុះដែរ។ ក្នុងឆ្នាំ 2021 ទុនបម្រុងអន្តរជាតិសរុប ត្រូវបានព្យាករថានឹងកើនឡើង 16,981ដុល្លារអាមេរិក និងការធានានាំចូលបាន8ខែ៕
June 16, 2020
សេដ្ឋកិច្ចកម្ពុជាឆ្នាំនេះមានអត្រា -1.9% ខណៈការគ្រោងទុកគឺ 6.5%
នាពេលថ្មីៗនេះ រាជរដ្ឋាភិបាលកម្ពុជាបានចេញរបាយការណ៍ព្យាករណ៍សដ្ឋកិច្ច ដោយបញ្ជាក់ថា សេដ្ឋកិច្ចកម្ពុជានៅឆ្នាំ 2020 ត្រូវបានប៉ាន់ស្មានថា នឹងមានកំណើនអវិជ្ជមាន 1.9% (-1.9%) ដែលមិនធ្លាប់មានពីមុនមក ខណៈតាមច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ 2020 បានគ្រោងទុកថាកំណើនសេដ្ឋកិច្ចកម្ពុជាអាចនឹងសម្រេចបាន 6.5%។
បញ្ហាទាំងអស់នេះកើតឡើងដោយសារតែវិបត្តិនៃការរីករាលដាលជំងឺ Covid-19 ដែលធ្វើឱ្យសេដ្ឋកិច្ចសកលធ្លាក់ចុះយ៉ាងគំហុក និងរុញច្រានឱ្យសេដ្ឋកិច្ចប្រទេសជាច្រើន ជាពិសេសបណ្តាប្រទេសជាដៃគូពាណិជ្ជកម្មសំខាន់ៗរបស់កម្ពុជាក៏ធ្លាក់ចុះដូចគ្នាដែរ។
ទោះជាយ៉ាងនេះក្តី រាជរដ្ឋាភិបាលបានព្យាករណ៍ថានៅឆ្នាំ 2021ខាងមុខនេះ កំណើនសេដ្ឋកិច្ចអាចកើនឡើងវិញក្នុងអត្រា 3.5%។ ការព្យាករណ៍នេះរំពឹងទុកថាកំណើនសេដ្ឋកិច្ចនៅឆ្នាំ2021 អាចគាំទ្រកំណើនដោយវិស័យកសិកម្ម 1.6% ខណៈឧស្សាហកម្មអាចមានកំណើន 4.1% ដោយក្នុងនោះអនុវិស័យកាត់ដេរ និងអនុវិស័យសំណង់ស្ថិតក្នុងកម្រិតទាប តែអាចមានកំណើនល្អក្នុងវិស័យកម្មន្តសាល និងវិស័យផ្សេងៗទៀត។ ចំណែកឯវិស័យសេវាកម្មវិញ រាជរដ្ឋាភិបាលព្យាករណ៍ថាអាចនឹងមានកំណើន 3.6% ដែលចំណូលពីវិស័យទេសចរណ៍ និងការប្រើប្រាស់ក្នុងស្រុកអាចការកើនឡើងតែស្ថិតក្នុងសភាពយឺតយ៉ាវ៕
June 16, 2020
5ខែដើមឆ្នាំ 2020 នេះភ្នំពេញទទួលការវិនិយោគជាង 1,300លានដុល្លារ លើវិស័យសំណង់
អាជ្ញាធររាជធានីភ្នំពេញបញ្ជាក់ថា ត្រឹមរយៈពេល 5ខែដើមឆ្នាំ 2020 នេះរាជធានីភ្នំពេញទទួលបានការវិនិយោគលើវិស័យសំណង់ប្រមាណ 1,375,050ដុល្លារអាមេរិក។
លោក សារិន វណ្ណា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីរាជធានីភ្នំពេញបានថ្លែងថា ទំហំវិនិយោគជាង 1,300លានដុល្លារនេះ មានសរុបចំនួន 583គម្រោង ដែលសាងសង់ឡើងលើផ្ទៃដីប្រមាណ 2,821,317ម៉ែត្រក្រឡា។
លោកបានបន្ថែមថានៅពេលនេះ អគារខ្ពស់ៗចាប់ពី5ជាន់ឡើង ក្នុងភូមិសាស្ត្ររាជធានីភ្នំពេញ មានចំនួនប្រមាណ 1,292អគារ ហើយចំពោះបុរីវិញមានចំនួន 244គម្រោង៕

June 16, 2020
5 រឿងដែលហាមធ្វើ ក្រោយពេលទើបញ៉ាំបាយឆ្អែត
តើមិត្តអ្នកអានដឹងទេថា ពេលដែលយើងទើបទទួលទានអាហារហើយថ្មីៗ តើមានចំណុចហាមធ្វើអ្វីខ្លះ? ព្រោះថាពេលខ្លះបើយើងធ្វើអ្វីមិនត្រឹមត្រូវនោះ វានឹងហុចផលប៉ះពាល់ដល់រាងកាយរបស់យើងភ្លាមតែម្តង ដូច្នេះដើម្បីសុខភាពល្អ ថ្ងៃនេះយើងនាំគ្នាមកមើលវិញប្រសើរជាងថា តើមានរឿងអ្វីខ្លះដែលយើងមិនគួរធ្វើ ក្រោយពេលទទួលទានបាយឆ្អែតហើយភ្លាម?។
1 – ញ៉ាំទឹកតែភ្លាមៗ
ព្រោះការញ៉ាំទឹកតែភ្លាមអាចនាំឆ្ពោះទៅរកការកើតរោគសរសៃឈាមបេះដូងបាន ដោយសារតែសារធាតុផូលីហ្វ៊ីណូលដែលមាននៅក្នុងទឹកតែនឹងចូលទៅរារាំងការបឺតជ្រាបយកសារធាតុដែកពីអាហារ ក្រៅពីនេះជាតិអាស៊ីតនៅក្នុងទឹកតែនៅបានបំផ្លាញប្រូតេអ៊ីនពីអាហារទៀតផង។
2 – ងូតទឹកភ្លាម
ការងូតទឹកភ្លាមៗក្រោយពេលញ៉ាំបាយរួច នឹងធ្វើឱ្យប្រព័ន្ធរំលាយអាហារធ្វើការខុសប្រក្រតី ប្រសិទ្ធភាពក្នុងការរំលាយអាហារនឹងថយចុះ ប្រព័ន្ធឈាមនៅក្នុងរាងកាយមិនតុល្យការ វិធីដែលល្អនោះគឺ រង់ចាំយ៉ាងតិចកន្លះម៉ោងដើម្បីឱ្យអាហារបានរំលាយហើយសឹមងូតទឹក។
3 – គេងលក់ភ្លាម
ការគេងលក់នឹងធ្វើឱ្យអាហារមិនអាចរំលាយបាន ដោយសារទិសដៅការធ្វើការងាររបស់ប្រព័ន្ធរំលាយអាហារខុសទិសដៅធ្វើឱ្យកើតមានខ្យល់នៅក្នុងក្រពះ និងពោះវៀន រួមទាំងធ្វើឱ្យកើតរោគអាស៊ីតហូរបញ្រ្ចាស់ទៀតផង។
4 – ហាត់ប្រាណភ្លាម
ការដើរទៅមក និងការហាត់ប្រាណធ្វើឱ្យពោះវៀនកម្រើកចុះឡើង ហុចផលឱ្យប្រព័ន្ធរំលាយអាហារធ្វើការបានមិនពេញទំហឹង វិធីដែលល្អគួររង់ចាំយ៉ាងតិចកន្លះម៉ោងដើម្បីឱ្យអាហារបានរំលាយ និងមិនគួរហាត់ប្រាណធ្ងន់ៗឡើយ។
5 – ញ៉ាំផ្លែឈើ
ផ្លែឈើធ្វើឱ្យកើតមានខ្យល់នៅក្នុងក្រពះ និងធ្វើឱ្យកើតអាការឆ្អល់ ហើមពោះ គួររង់ចាំប្រមាណជា 1 – 2 ម៉ោង ដើម្បីឱ្យអាហារបានរំលាយអស់សិន ឬគួរទទួលទានមុនពេលបាយប្រមាណជា 1 ម៉ោង ដើម្បីឱ្យរាងកាយទទួលបានប្រយោជន៍ពីផ្លែឈើយ៉ាងពេញទំហឹង។
បានដឹងយ៉ាងនេះហើយ តទៅទៀតកុំភ្លេចផ្លាស់ប្តូរទង្វើដើម្បីសុខភាពដ៏ល្អរបស់យើងក្នុងរយៈពេលវែង ព្រោះសុខភាពដែលល្អមិនអាចទិញលក់បាននោះឡើយ ស្ថិតនៅលើយើងត្រូវមើលថែទាំឱ្យល្អតាំងពីថ្ងៃនេះតែម្តង៕
June 16, 2020
សូមណែនាំ Facebook Shops៖ កម្មវិធីសម្រាប់ជួយអាជីវកម្មខ្នាតតូច លក់ទំនិញ តាមអនឡាញ
ក្រុមហ៊ុនFacebook បានប្រកាសនៅថ្ងៃម្សិលមិញ (ទី15 ខែមិថុនា) ថា ខ្លួនបានបើកដំណើរការកម្មវិធី Facebook Shops នៅប្រទេសកម្ពុជា ដើម្បីជួយឱ្យអាជីវករទាំងឡាយ អាចបង្កើតហាងលក់ទំនិញតាមអនឡាញរបស់ខ្លួនបានកាន់តែងាយស្រួលឡើង ក្នុងគោលដៅជួយឱ្យអតិថិជនរបស់ពួកគាត់ អាចចូលទិញទំនិញបាន ទាំងនៅលើ Facebook និង Instagram។ អាជីវករអាចបង្កើត Facebook Shop របស់ពួកគាត់បានយ៉ាងងាយស្រួល និងឥតគិតថ្លៃ។
អាជីវករអាចជ្រើសរើសផលិតផលដែលពួកគាត់ចង់ដាក់លក់ ហើយបន្ទាប់មកពួកគាត់អាចតុបតែងរូបរាងហាងរបស់គាត់បាន ដោយដាក់ក្របរូបភាព និងពណ៌ ដែលបញ្ជាក់អំពីម៉ាកយីហោរបស់ពួកគេ។
ឥឡូវនេះ នៅទូទាំងពិភពលោក អាជីវកម្មខ្នាតតូចជាច្រើនកំពុងជួបការលំបាក ប៉ុន្តែខណៈដែលហាងជាច្រើនបានបិទទ្វារ គេក៏ឃើញមានអាជីវកម្មកាន់តែច្រើនឡើង បានងាកមកប្រតិបត្តិការតាមអនឡាញវិញ។ កម្មវិធី Facebook Shops មានគោលបំណងធ្វើឱ្យការទិញទំនិញកាន់តែប្រសើឡើង ព្រមទាំងផ្ដល់ឱកាសដល់ម្ចាស់អាជីវកម្មគ្រប់រូប ចាប់ពីអាជីវកម្មខ្នាតតូច រហូតដល់ អាជីវកម្មល្បីៗលំដាប់ពិភពលោក ដើម្បីប្រើប្រាស់កម្មវិធី Facebook ក្នុងគោលដៅភ្ជាប់ទំនាក់ទំនងជាមួយអតិថិជនរបស់ពួកគេ។
ហេតុនេះហើយ បានជាក្រុមហ៊ុន Facebook សម្រេចបើកដំណើរការ កម្មវិធី Facebook Shops ហើយខិតខំបញ្ចូលមុខងារល្អៗជាច្រើន ទៅក្នុងកម្មវិធីផ្សេងៗរបស់ខ្លួន ក្នុងន័យជំរុញឱ្យអ្នកប្រើប្រាស់ ទិញទំនិញ ក៏ដូចជាជួយធ្វើឱ្យការលក់ដូរទំនិញតាមអនឡាញ មានលក្ខណៈកាន់តែងាយស្រួលឡើង។
ឥឡូវនេះ ប្រជាពលរដ្ឋកម្ពុជាអាចស្វែងរក Facebook Shops នៅលើទំព័រ ‘Facebook Page’ ឬ ទំព័រ ‘Instagram’ របស់ហាងណាមួយក៏បាន ឬ ស្វែងរកតាមរយៈ story ឬការផ្សាយពាណិជ្ជកម្មរបស់ហាងនោះ។ នៅលើទំព័ររបស់ហាងនោះ អ្នកប្រើប្រាស់អាចមើលត្រួសៗនូវមុខទំនិញទាំងអស់ អាចរក្សាទុកផលិតផលដែលពួកគេចាប់អារម្មណ៍ និងធ្វើការបញ្ជាទិញ នៅលើគេហទំព័ររបស់ហាងនោះតែម្ដង។
នៅក្នុង Facebook Shops ការសាកសួរព័ត៌មាន អំពីផលិតផលរបស់ហាងអនឡាញ គឺដូចគ្នាទៅនឹងការសាកសួរនៅតាមហាងតាមផ្លូវធម្មតាដែរ។ គឺគេអាចផ្ញើសារទៅកាន់ហាងនោះ តាមរយៈ កម្មវិធី WhatsApp កម្មវិធី Messenger ឬកម្មវិធី Instagram Direct ដើម្បីសួរសំណួរ សុំជំនួយ ឆែកមើលការដឹកជញ្ជូនទំនិញដែលបានទិញ និងព័ត៌មានជាច្រើនទៀត។ ហើយនៅពេលអនាគត ពួកគេនឹងអាចត្រួតពិនិត្យ ហាងអាជីវកម្ម និងទិញទំនិញបានដោយផ្ទាល់តែម្ដង តាមរយៈកម្មវិធី WhatsApp កម្មវិធី Messenger ឬកម្មវិធី Instagram Direct។
ក្រុមហ៊ុន Facebook ក៏កំពុងខិតខំបញ្ចូលមុខងារល្អៗ ទៅក្នុងកម្មវិធីផ្សេងៗរបស់ខ្លួន ដូចជា កម្មវិធី Instagram Shop កម្មវិធីទិញទំនិញតាមវីដេអូផ្សាយផ្ទាល់ និងកម្មវិធីផ្សេងៗទៀត។ មុខងារទាំងនេះ នឹងត្រូវដាក់បញ្ចូលទៅក្នុង Facebook Shops ដើម្បីជួយឱ្យអតិថិជនអាចស្វែងរកផលិតផលដែលពួកគេចាប់អារម្មណ៍ និងធ្វើឱ្យការទិញទំនិញ កាន់តែងាយស្រួល និងកាន់តែមានសុវត្ថិភាព។ លោកអ្នកអាចស្វែងយល់បន្ថែមអំពីគោលការណ៍របស់ Shops ស្ដីពីការការពារព័ត៌មានផ្ទាល់ខ្លួនរបស់អ្នក នៅទីនេះ ។
ការឡាយវីដេអូតាម Facebook កំពុងពេញនិយមសម្រាប់ប្រជាពលរដ្ឋកម្ពុជានាពេលបច្ចុប្បន្ន ដោយហាងខ្លះឡាយលក់ស្បែកជើងបាតាថ្មីៗ ហើយតារាហ្វេសប៊ុកខ្លះ ក៏ឡាយវីដេអូសាកប្រើក្រែមលាបមាត់ថ្មីៗផងដែរ។
ឥលូវនេះ គឺកាន់តែងាយស្រួលក្នុងការទិញទំនិញភ្លាមៗ ហើយហាង និងអ្នកផលិតផលិតផលទាំងឡាយ ក៏នឹងអាចtagផលិតផលរបស់ពួកគេពី Facebook Shop ឫ កាតាឡុករបស់ពួកគេបានផងដែរ មុននឹងឡាយវីដេអូ។ ហើយផលិតផលទាំងនោះ នឹងមានបង្ហាញនៅផ្នែកខាងក្រោមនៃអេក្រង់ ដូច្នេះអតិថិជនអាចចុច ចូលមើលបានយ៉ាងងាយស្រួល ដើម្បីស្វែងយល់បន្ថែម និងអាចទិញបាន។
ក្រុមហ៊ុន Facebook បានឱ្យដឹងថា ខ្លួនកំពុងចាប់ផ្តើមសាកល្បងធ្វើតេស្ដកម្មវិធីនេះ ជាមួយអាជីវកម្មនានាលើ Facebook និង Instagram ហើយក្រុមហ៊ុននឹងបើកដំណើរការកម្មវិធីនេះឱ្យកាន់តែទូលំទូលាយបន្ថែមទៀត នៅប៉ុន្មានខែខាងមុខនេះ។
យើងក៏កំពុងធ្វើតេស្ដសាកល្បងប្រើមធ្យោបាយផ្សេងៗ ដើម្បីជួយឱ្យអ្នកប្រើប្រាស់កាន់តែងាយស្រួល ក្នុងការសន្សំពិន្ទុជាមួយហាងដែលពួកគេចូលចិត្ត ដោយយើងបើកលទ្ធភាពឱ្យអ្នកប្រើប្រាស់ អាចភ្ជាប់គណនីហ្វេសប៊ុករបស់ពួកគេ ជាមួយនឹងកម្មវិធីសន្សំពិន្ទុផ្សេងៗ ដូចជាកម្មវិធីសន្សំពិន្ទុនៅតាមហាងកាហ្វេជាដើម។ អ្នកក៏នឹងអាចមើលឃើញ និងតាមដានពិន្ទុ និងរង្វាន់របស់អ្នកបានយ៉ាងងាយស្រួលផងដែរ។ ហើយយើងកំពុងស្វែងរកមធ្យោបាយថ្មីៗ ដើម្បីជួយអាជីវកម្មខ្នាតតូច ឱ្យបង្កើត គ្រប់គ្រង និងដាក់បង្ហាញកម្មវិធីលើទឹកចិត្តអតិថិជនរបស់ពួកគេ នៅលើកម្មវិធី Facebook Shops ផងដែរ។
ក្រុមហ៊ុន Facebook បានឱ្យដឹងថា ខ្លួនសង្ឃឹមថា មធ្យោបាយទាំងនេះអាចជួយសម្រាលបានខ្លះ នូវបន្ទុករបស់អាជីវករកម្ពុជាខ្នាតតូចមួយចំនួន ក៏ដូចជាជួយអាជីវករទាំងតូចទាំងធំ ឱ្យមានលទ្ធភាពត្រៀមខ្លួនសម្រាប់ពេលអនាគតផងដែរ។
សម្រាប់ព័ត៌មានបន្ថែម សូមចូលទៅកាន់៖ https://www.facebook.com/business/shops និង https://www.facebook.com/business/help/2343035149322466?id=1077620002609475

June 16, 2020
ភ្នំពេញនឹងមានស្ពានអាកាសថ្មើរជើង 25កន្លែងទៀតនៅពេលខាងមុខ
ក្រោយបានសាងសង់រួចនូវស្ពានអាកាសថ្មើរជើងចំនួន3កន្លែងនាពេលថ្មីៗនេះ អភិបាលរាជធានីភ្នំពេញបានប្រកាសថានឹងមានការរៀបចំហេដ្ឋារចនាសម្ព័ន្ធជាច្រើនផ្សេងៗទៀតក្នុងគម្រោងរបស់រដ្ឋបាលរាជធានីភ្នំពេញ។
ឯកឧត្តម ឃួង ស្រេង អភិបាលរាជធានីភ្នំពេញបានបញ្ជាក់ថា រាជធានីភ្នំពេញបច្ចុប្បន្ននេះបានអភិវឌ្ឍយ៉ាងឆាប់រហ័ស ដោយមានការអង្រីកផ្លូវ ការរៀបចំហេដ្ឋារចនាសម្ព័ន្ធក្រោមដី លើដី និងស្ពានអាកាសថ្មើរជាងជាច្រើនកន្លែង។ តាមគម្រោង រាជធានីភ្នំពេញ នឹងសាងសង់ស្ពានអកាសថ្មើរជាងចំនួន 25កន្លែងបន្ថែមទៀតដើម្បីដោះស្រាយបញ្ហាកកស្ទះចរាចរណ៍ក្នុងទីក្រុង និងជំរុញឱ្យការរស់នៅរបស់ប្រជាជនកាន់តែប្រសើរ។
បច្ចុប្បន្ននេះរាជធានីភ្នំពេញមានស្ពានអាកាសដែលបានសាងសង់រួចរាល់ចំនួន3កន្លែងគឺ នៅតំបន់ជម្ពូវ័ន្ត ខណ្ឌពោធិសែនជ័យ មានចំនួន2កន្លែង និងនៅតំបន់ភ្លើងស្តុបនាងគង្ហីង មានចំនួន1កន្លែង និងកំពុងស្ថាបនា ស្ពានអាកាសថ្មើរជើង នៅតំបន់ផ្សារដើមគរ និងគម្រោងស្ថាបនាស្ពានអាកាសថ្មើរជើង នៅត្រង់មុខសាលាបឋមសិក្សាសន្ធរម៉ុក៕

June 16, 2020
UNESCO បើកការប្រកួតប្រជែងពានរង្វាន់កម្មវិធីអក្ខរកម្មអន្តរជាតិឆ្នាំ2020
អង្គការ UNESCO តាមរយៈសេចក្តីជូនដំណឹងរបស់ក្រសួងអប់រំ យុវជន និងកីឡា បានបញ្ជាក់ថា នឹងរៀបចំការប្រកួតប្រជែងពានរង្វាន់កម្មវិធីអក្ខរកម្មអន្តរជាតិឆ្នាំ 2020 លើប្រធានបទ “teaching and learning literacy: The role of educators and changing pedagogies”។
អ្នកដែលមានសិទ្ធចូលរួមក្នុងកម្មវិធីនេះបានរួមមានស្ថាប័នរដ្ឋា អង្គការសង្គមស៊ីវិល និងបុគ្គលដែលធ្វើកសកម្មភាពចូលរួមលើកកម្ពស់កម្មវិធីអក្ខរកម្មតាមរយៈគម្រោង ឬកម្មវិធីប្រកបដោយប្រសិទ្ធភាព និងភាពច្នៃប្រឌិត។ កម្មវិធី ឬគម្រោងដែលមានលក្ខណៈសម្បត្តិគ្រប់គ្រាន់ ដែលមានកំណត់ត្រាបញ្ជាក់ពីការងារដោយភាពច្នៃប្រឌិតក្នុងវិស័យអក្ខរកម្មយ៉ាងតិច3ឆ្នាំ ពីក្រសួង ស្ថាប័ន អង្គភាពរដ្ឋ ឯកជន និងសង្គមស៊ីវិល ដោយកម្មវិធី ឬគម្រោងនោះមិនធ្លាប់បានទទួលរង្វាន់អក្ខរកម្មអន្តរជាតិរបស់ UNESCO ក្នុងរយៈពេល 5ឆ្នាំកន្លងមក។
ដើម្បីដាក់ពាក្យសុំ និងធ្វើលិខិតឧទ្ទេសនាមបេក្ខភាពចូលរួម ដំណាក់កាលទី1 ចំពោះអ្នកដាក់ពាក្យអាចសុំបំពេញ និងបញ្ជូនពាក្យតាមរយៈគណកម្មការជាតិ UNESCO ឬអង្គការក្រៅរដ្ឋាភិបាលអន្តជាតិដែលមានទំនាក់ទំនងផ្លូវការជាមួយនឹង UNESCO។
ដំណាក់កាលទី2 គណៈកម្មការ UNESCO ដែលពាក់ព័ន្ធ ឬអង្គការអន្តរជាតិធ្វើការពិនិត្យ និងធ្វើលិខិតឧទ្ទេសនាមបេក្ខជនដែលជាប់ជាជម្រើសទៅទីស្នាក់ការកណ្តាល UNESCO ទីក្រុងប៉ារីស សម្រាប់ធ្វើការពិនិត្យ និងសម្រេចចុងក្រោយ៕

June 16, 2020
តើផ្លែប៉ោមមានប្រយោជន៍ចំពោះកូនតូចយ៉ាងណាខ្លះ?
ផ្លែប៉ោមមានគុណសម្បត្តិក្នុងការព្យាបាលដ៏ល្អ អាចជួយសម្រាលអាការឈឺថ្កាត់ ដូចជា អាការក្អក, រោគក្រពះ, រោគពាក់ព័ន្ធនឹងធ្មេញ និងអាការរាករូសនៅលើក្មេងតូចបាន។ ផ្លែប៉ោមជាអាហារចាប់ផ្តើមដំបូងដែលល្អបំផុតសម្រាប់ក្មេងតូច អាចចាប់ផ្តើមឱ្យញ៉ាំបានតាំងពីអាយុ 6 ខែឡើងទៅ។ តើផ្លែប៉ោមមានប្រយោជន៍ចំពោះក្មេងតូចយ៉ាងណាខ្លះ?
– ជួយសម្រាលអាការហើមពោះ
អ្នកម្តាយនឹងសង្កេតឃើញថា កូនតូចច្រើនតែជួបនឹងបញ្ហាឆ្អល់ពោះ ហើមពោះញឹកញាប់ ដូច្នេះអ្នកម្តាយអាចជួយសម្រាលអាការនេះរបស់កូនតូចបាន ដោយគ្រាន់តែបកសំបកផ្លែប៉ោមកិន និងស្ងោរ ឬចំហុយឱ្យកូនតូចញ៉ាំ ព្រោះសារធាតុ ផូលីហ្វ៊ីណូល ដែលនៅក្នុងផ្លែប៉ោមជួយកាត់បន្ថយអាការឆ្អល់ពោះ ហើមពោះបានដោយការស្រោបការពារពីលើសាច់ភ្នាសក្រពះ។
– ជួយសម្អាតធ្មេញ និងធ្វើឱ្យអញ្ចាញរឹងមាំ (មានប្រយោជន៍បំផុតសម្រាប់ក្មេងតូចដែលមានអាយុចាប់ពី 1,5 ឆ្នាំឡើងទៅ)
ការទំពារផ្លែប៉ោម មិនត្រឹមតែជួយបង្កើនការហូរវឹលរបស់លោហិតនៅក្នុងអញ្ចាញធ្មេញបានកាន់តែល្អឡើងនោះទេ តែកាកសរសៃអាហារនៅក្នុងផ្លែប៉ោមនៅបានបំពេញតួនាទីប្រៀបដូចជាការដុសសម្អាតធ្មេញដូច្នោះដែរ។
– សម្រាលអាការក្អក
ក្មេងតូចដែលកើតអាការក្អក នឹងធ្វើឱ្យមិនអាចគេងលក់បានស្រួលពេញមួយយប់នោះឡើយ តែផ្លែប៉ោមដែលមានរសជាតិផ្អែមមានប្រសិទ្ធិភាពក្នុងការកាត់បន្ថយអាការក្អក ចូរយកទឹកផ្លែប៉ោមដែលបានមកពីការស្ងោរ ឬចំហុយឱ្យកូនតូចញ៉ាំប្រមាណជា 1សប្តាហ៍ អាការក្អកនឹងបានធូរស្រាល ហើយកូនតូចនឹងគេងលក់បានឆ្អែតពេញលេញមិនខាន។
– ប៉បាត់អាការរាករូស
ជំងឺរាករូសគឺជាជំងឺដែលជួបញឹកញាប់នៅលើក្មេងតូចច្រើនជាងមនុស្សធំ ផ្លែប៉ោមដែលឆ្អិន និងមានរសជាតិផ្អែម អាចព្យាបាល និងកាត់បន្ថយអាការរាគរូសបាន ដោយយកទឹកផ្លែប៉ោមដែលបានមកពីការស្ងោរ ឬចំហុយមកកិនឱ្យហ្មត់ រួចឱ្យកូនតូចញ៉ាំ 2 – 4 ដងក្នុងមួយថ្ងៃ។
– សាងប្រព័ន្ធប្រឆាំងជំងឺ
ផ្លែប៉ោមពណ៌ក្រហមមានសារធាតុប្រឆាំងអនុមូលឥស្សរៈដែលហៅថា ” Quercetin ” ។ តាមរយៈការសិក្សាស្រាវជ្រាវបានរកឃើញថា ” Quercetin” អាចជួយសាង និងបង្កើនប្រព័ន្ធប្រឆាំងជំងឺក្នុងរាងកាយបានទៀតផង។
ចំណុចគួរប្រយ័ត្នក្នុងការឱ្យកូនតូចញ៉ាំផ្លែប៉ោម
-មិនគួរឱ្យក្មេងតូចញ៉ាំខណៈពេលដែលពោះទំនេរនោះទេ ព្រោះផ្លែប៉ោមនឹងពិបាករំលាយជាងប្រក្រតីនៅពេលពោះទំនេរ ឬនៅពេលព្រឹក។
-កូនតូចត្រូវមានអាយុ 6 ខែឡើងទៅ និងត្រៀមរួចរាល់ហើយសម្រាប់ការចាប់ផ្តើមទទួលយកអាហារបន្ថែម។
-លាងឱ្យបានស្អាតមុននឹងញ៉ាំ។
-យកគ្រាប់ចេញមុននឹងឱ្យកូនតូចញ៉ាំ៕
June 16, 2020