Author: ធឿន មករា

លាងបន្លែយ៉ាងណា ឱ្យមានសុវត្ថិភាពចំពោះសុខភាព
ការជ្រើសរើសទិញបន្លែ និងលាងបន្លែគឺជារឿងសំខាន់មួយដែរ ព្រោះពេលខ្លះក៏យើងមិនដឹងថា បន្លែដែលគេយកមកលក់នោះ ជាបន្លៃដែលគ្មានសារធាតុពុល និងថ្នាំសម្លាប់សត្វល្អិតឬក៏មាននោះឡើយ ជំនួសឱ្យការដែលត្រូវមានសុខភាពល្អ វាប្រែក្លាយជាការបង្កសារធាតុពុលនៅក្នុងរាងកាយកាន់តែច្រើនឡើងទៅវិញ ទើបថ្ងៃនេះ ឡារ៉ែនមានវិធី លាងសម្អាតបន្លែឱ្យស្អាត គ្មាននៅសេសសល់សារធាតុពុលមកជម្រាបជូនដូចតទៅ ៈ
ការលាងបន្លែ ៈ ពេលជ្រើសរើសទិញបន្លែបានមកហើយ មុនទទួលទាន ឬនាំមកចម្អិនជាអាហារនោះ គួរយកមកលាងឱ្យស្អាតជាមុនសិន។ ក្នុងពេលបច្ចុប្បន្ននេះមានអ្នកណែនាំពីវិធីលាងសម្អាតបន្លែជាច្រើនវិធីដើម្បីកាត់បន្ថយបរិមាណសារធាតុពុលសម្លាប់សត្វល្អិតដែលនៅជាប់សេសសល់លើបន្លែនោះឱ្យថយចុះ ដោយមានវិធីជាច្រើនដូចតទៅនេះ ៈ
1 – ការលាងបន្លែ ដោយប្រើសូដ្យូមបៃខាបូនេត 1 ស្លាបព្រាបាយសម្រាប់ទឹកក្តៅឧណ្ហៗមួយចានដែក(20លិត្រ) ត្រាំបន្លែទុកចោល 15 នាទី វានឹងកាត់បន្ថយសារធាតុពុលបាន 90 – 95% ជាវិធីដែលមានសុវត្ថិភាព។ បន្ទាប់ពីត្រាំបន្លែក្នុងសារធាតុរលាយសូដ្យូមបៃខាបូនេតក្នុងទឹករួចហើយ គួរយកបន្លែនោះទៅលាងទឹកចេញឱ្យបានច្រើនដង ដើម្បីជម្រះយកសារធាតុពុលដែលនៅសេសសល់ចេញឱ្យអស់ តែវាមានបញ្ហានៅត្រង់ថា វិធីនេះនឹងធ្វើឱ្យវីតាមីន A នៅក្នុងបន្លែបាត់បង់អស់ខ្លះ។
2 – ការត្រាំបន្លែនៅក្នុងទឹកលាយទឹកសាជូរ ដោយប្រើទឹកសាជូររលាយក្នុងទឹក។ ត្រាំបន្លែដែលបេះរួចហើយប្រមាណ 15 នាទី នឹងអាចកាត់បន្ថយបរិមាណសារធាតុពុលបាន 60 – 84%។
3 – ការត្រាំបន្លែក្នុងទឹកថ្នាំលាងបន្លែ ដោយត្រាំទុកចោលប្រមាណជា 15 នាទី នឹងកាត់បន្ថយបរិមាណសារធាតុពុលសម្លាប់សត្វល្អិតបាន 54 – 68% តែវិធីមិនណែនាំឱ្យប្រើឡើយ ព្រោះទឹកថ្នាំលាងបន្លែនឹងជ្រាបចូលទៅក្នុងបន្លែ អាចបណ្តាលឱ្យមានគ្រោះថ្នាក់បាន។
4 – ការលាងបន្លែដោយបើកទឹកឱ្យហូរឆ្លងកាត់ បន្លែដែលជាស្លឹកៗ ចូរដាក់នៅក្នុងកញ្រ្ចែងដែលមានប្រឡោះធំៗ រួចបើកទឹកពីក្បាលរ៉ូប៊ីណេឱ្យខ្លាំងល្មម យកដៃជួយដុសសម្អាតលើបន្លែនីមួយៗ ដោយលាងសម្អាតប្រមាណជា 2 នាទី នឹងជួយកាត់បន្ថយសារធាតុពុលសម្លាប់សត្វល្អិតបាន 54 – 63%។
5 – ការត្រាំបន្លែក្នុងទឹកស្អាត គួរលាងបន្លែឱ្យស្អាតពីវត្ថុកខ្វក់មួយទឹកជាមុនសិន និងបេះជាសន្លឹកៗដាក់ត្រាំនៅក្នុងចានដែកយូរប្រមាណ 15 នាទី នឹងកាត់បន្ថយបរិមាណសារធាតុពុលសម្លាប់សត្វល្អិតបាន 7 – 33%។
6 – ការស្រុះបន្លែដោយទឹកក្តៅ នឹងកាត់បន្ថយបរិមាណសារធាតុពុលបាន 50% ចំណែកការស្ងោរវិញក៏កាត់បន្ថយសារធាតុពុលបានស្មើនឹងការស្រុះបន្លែដែរ តែ 50% ទៀតនៃសារធាតុពុលបានចេញពីបន្លៃមកក្នុងទឹកសម្ល។
7 – ការបកសំបក ឬការបកស្រទាប់ក្រៅរបស់បន្លែចេញ ដូចជា ស្ពៃក្តោប ជាដើម បើបកស្រទាប់ខាងក្រៅចេញនឹងមានសុវត្ថិភាពខ្លាំងជាង។
8 – ការប្រើម្សៅខ្ល័ររីនត្រាំបន្លែ ដើម្បីសម្លាប់មេរោគ និងបំផ្លាញស៊ុតសត្វល្អិត (ព្រូន និងដង្កូវជាដើម) ដោយការរំលាយម្សៅខ្ល័ររីនកន្លះស្លាបព្រាកាហ្វេសម្រាប់ទឹក 20 លិត្រ និងត្រាំទុកចោលប្រមាណ 15 – 30 នាទី នឹងសម្លាប់មេរោគបានល្អណាស់៕
June 17, 2020
ក្រសួងអប់រំបើកឱ្យដាក់ពាក្យសុំអាហារូបករណ៍បរិញ្ញាបត្រជាន់ខ្ពស់អប់រំឯកទេសប្រឹក្សាគរុកោសល្យ
ក្រួងអប់រំ យុវជន និងកីឡា បានប្រកាសបើកឱ្យបេក្ខជនដាក់ពាក្យស្នើរសុំអាហារូបករណ៍សម្រាប់ថ្នាក់បរិញ្ញាបត្រជាន់ខ្ពស់អប់រំឯកទេសប្រឹក្សាគរុកោសល្យដើម្បីឆ្លើយតបទៅនឹងតម្រូវការធនធានមនុស្សដែលកំពុងខ្វះខាតនៅក្នុងពេលកំណែរទម្រង់វិស័យអប់រំ និងការពង្រីកវិសាលភាពសាលារៀនជំនាន់ថ្មី។
គ្រូបង្រៀនដែលបានបញ្ចប់ការសិក្សាពីកម្មវិធី នឹងមានការយល់ដឹងជ្រៅជ្រះលើការអនុវត្តក្រមសីលធម៌វិជ្ជាជីវៈគ្រូបង្រៀន ក៏ដូចជាមានសមត្ថភាពក្នុងការប្រឹក្សាគរុកោសល្យជាមួយគ្រូ។ មជ្ឈមណ្ឌលស្រាវជ្រាវគរុកោសល្យជំនាន់ថ្មី នឹងផ្តល់ការបង្រៀនប្រកបដោយគុណភាពខ្ពស់ តាមរយៈការប្រើប្រាស់ការបង្រៀនបែបសិក្ខាសាលា ដោយកំណត់ចំនួនគរុសិស្សច្រើនបំផុតចំនួន16នាក់ក្នុងមួយថ្នាក់។ វគ្គសិក្សាទាំងអស់នឹងត្រូវបង្រៀនជាភាសាអង់គ្លេស ដែលតម្រូវឱ្យបេក្ខជនមានសមត្ថភាពប្រើប្រាស់ភាសាអង់គ្លេសបានល្អ។
បេក្ខជនដែលអាចដាក់ពាក្យបានត្រូវតែជាអ្នកដែលមានបទពិសោធន៍បង្រៀនយ៉ាងតិច2ឆ្នាំ បានបញ្ចប់ថ្នាក់បរិញ្ញាបត្រ និងមានសញ្ញាបត្រគរុកោសល្យពីមជ្ឈមណ្ឌលបណ្តុះបណ្តាលគ្រូណាមួយ។ បន្ថែមពីលើនេះត្រូវតែជាអ្នកដែលមានឆន្ទៈក្នុងការបន្តអាជីពជាគ្រូបង្រៀនរយៈពេលវែងក្នុងវិស័យអប់រំ និងមានការប្តេជ្ញាចិត្តយ៉ាងមុតមាំក្នុងការពង្រឹងសិទ្ធអំណាចដល់យុវជន។ កម្មវិធីនេះផ្តល់សម្រាប់តែគ្រូបង្រៀននៅគ្រឹះស្ថានសាធារណៈតែប៉ុណ្ណោះ។
បេក្ខជនអាចដាក់ពាក្យឱ្យបានមុនថ្ងៃទី 10ខែកក្កដាខាងមុខនេះ ដោយបេក្ខជនទាំងអស់ត្រូវបំពេញពាក្យស្នើរសុំតាមរយៈតំណរ https://bit.ly/37htRwe៕
June 17, 2020
កម្ពុជារំពឹងថានឹងអាចនាំស្រូវចេញបានចន្លោះពី 80ម៉ឺនទៅ1លានតោននៅឆ្នាំនេះ
ថ្មីៗនេះមន្ត្រីជាន់ខ្ពស់ផ្នែកកសិកម្មបានបញ្ជាក់ថា កម្ពុជារំពឹងទុកថានឹងអាចនាំស្រូវចេញបានប្រមាណចន្លោះពី 80ម៉ឺន ទៅ1លានតោនក្នុងឆ្នាំ2020នេះបើទោះបីជាពិភពលោកកំពុងប្រឈមនឹងបញ្ហាសេដ្ឋកិច្ចនាពេលបច្ចុប្បន្ននេះក៏ដោយ។
ឯកឧត្តម ងិន ឆាយ ប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកដ្ឋានកសិកម្ម បានលើកឡើងថា យើងអាចប៉ាន់ប្រមាណថាអង្គរដែលប្រទេសកម្ពុជាយើងនាំចេញក្នុងឆ្នាំ2020នេះអាចនឹងឡើងរហូតដល់ 80ម៉ឺនតោន ឬអាចឈានដល់ទៅ1លានតោន ព្រោះត្រឹមរយៈពេល 5ខែដើមឆ្នាំ2020នេះយើងនាំចេញបានរហូតដល់ទៅជាង 356,000តោនរួចទៅហើយ។
គួរបញ្ជាក់ថា ក្នុងចំណោមទីផ្សារស្រូវអង្ករកម្ពុជាទាំងអស់មានប្រទេសចិនប្រមាណ 25.6% សហគមន៍អឺរ៉ុប 56% និងទីផ្សារអាស៊ាន 45.39%៕
June 17, 2020
រីករាយជាមួយការបើកដំណើរការឡើងវិញនៃភោជនីយដ្ឋានអ៊ីតាលី Do Forni នៅក្នុងសណ្ឋាគារ សូហ្វីតែល ភ្នំពេញ ភូគីត្រា
នាថ្ងៃចន្ទ ទី15 ខែមិថុនា ឆ្នាំ2020នេះ ភោជនីយដ្ឋាន Do Forni ដែលជាភោជនីយដ្ឋានអ៊ីតាលីដ៏ល្បីល្បាញ ស្ថិតនៅក្នុងសណ្ឋាគារ សូហ្វីតែល ភ្នំពេញ ភូគីត្រា បានបើកបម្រើអាហារអ៊ីតាលីដ៏ឆ្ងាញ់ពិសាជូនដល់អតិថិជនជាថ្មីជាមួយនឹងការផ្តល់ជូននូវបទពិសោធន៍នៃការទទួលទានអាហារដ៏ឈ្ងុយឆ្ងាញ់ អមដោយមុខម្ហូបថ្មី ប្រភេទស្រាវ៉ាញថ្មី និងបរិយាកាសថ្មីប្លែកអារម្មណ៍។ ជាមួយនឹងស្នាដៃចម្អិនអាហារដ៏ជំនាញរបស់មេចុងភៅជនជាតិអ៊ីតាលី លោក Valentino Chirico បានធ្វើការច្នៃបង្កើតនូវមុខម្ហូបថ្មីៗជាច្រើន ដែលធ្វើឱ្យមុខម្ហូបអ៊ីតាលីនៅភោជនីយដ្ឋាន Do Forni កាន់តែពិសេសឡើងថែមទៀត។ លោកបានធ្វើការច្នៃមុខម្ហូបអ៊ីតាលីបែបប្រពៃណី ទទួលទានជាមួយនឹងស្រាជាង60ប្រភេទ ដែលសុទ្ធសឹងជាប្រភេទវ៉ាញដ៏ល្អបំផុត ដើម្បីជួយបង្កើននូវបទពិសោធន៍នៃការទទួលទានអាហារអ៊ីតាលីកាន់តែឈ្ងុយឆ្ងាញ់ និងកាន់តែពិសេសឡើង។
បញ្ជីមុខម្ហូបថ្មីនៅភោជនីយដ្ឋាន Do Forni មានគ្រឿងសមុទ្រស្រស់ៗ រួមទាំងមុខម្ហូបពិសេសប្រចាំភោជនីយដ្ឋានជាច្រើនមុខទៀត ដូចជា ខ្យងស្កាឡប់នៃមហាសមុទ្រអាត្លង់ទិកជាមួយទឹកជ្រលក់សាហ្វ្រ៊ន មីផាស្តាខ្មៅជាមួយបង្កង ត្រីឆ្ពុងចៀនជាមួយទឹកប៉េងប៉ោះ និងស្តេកសាច់គោអូស្ត្រាលីដែលជាប្រភេទសាច់គោកសិដ្ឋានបែបធម្មជាតិនៃតំបន់ Cape Grim នៃកោះ Tasmania សាច់ផ្អែម ឆ្ងាញ់ជាប់ចិត្ត។
ភោជនីយដ្ឋាន Do Forni មិនត្រឹមតែធ្វើការកែប្រែបញ្ជីមុខម្ហូបថ្មីប៉ុណ្ណោះទេ ភោជនីយដ្ឋានក៏បានផ្លាស់ប្តូររចនាបទនៃភោជនីយដ្ឋានថ្មីផងដែរ ដើម្បីទទួលស្វាគមន៍អតិថិជនជាថ្មីម្តងទៀតជាមួយនឹងបរិយាកាសថ្មី កាន់តែមានផាសុកភាពខ្ពស់ មានបង្អួតធំៗស្រឡះល្អ អមដោយសាឡុងស្បែកពណ៌ប្រផេះក្រមៅ និងកៅអីពណ៌ស្លាទុំ ព្រមជាមួយនឹងឈុតសម្លៀកបំពាក់ថ្មីរបស់បុគ្គលិកនៅក្នុងភោជនីយដ្ឋាននឹងផ្តល់នូវបទពិសោធន៍ថ្មីជូនដល់អតិថិជនទាំងអស់។
ស្ថិតនៅក្នុងសណ្ឋាគារ សូហ្វីតែល ភ្នំពេញ ភូគីត្រា ដែលជាសណ្ឋាគារលំដាប់ផ្កាយ5 ភោជនីយដ្ឋានអ៊ីតាលី Do Forni ត្រូវបានគេទទួលស្គាល់ថា ជាភោជនីយដ្ឋានអ៊ីតាលីដ៏ល្អបំផុតនៅក្នុងរាជធានីភ្នំពេញ ដែលជាកន្លែងបម្រើនូវមុខម្ហូបអ៊ីតាលីពិតប្រាកដ ត្រូវបានរៀបចំឡើងដោយប្រើប្រាស់គ្រឿងផ្សំថ្មីៗ និងល្អបំផុត។ នៅក្នុងភោជនីយដ្ឋាននេះក៏មានផ្ទះបាយបែបបើកចំហរនៅចំកណ្តាលភោជនីយដ្ឋាន និងតុទទួលទានអាហារបែបរ៉ូមែនទិកសម្រាប់គូស្នេហ៍ ជាពិសេសសម្រាប់អាហារពេលល្ងាចដ៏រ៉ូមែនទិក និងសម្រាប់ការទទួលទានអាហារជួបជុំមិត្តភក្តិ ក្រុមការងារ ដៃគូមុខជំនួញ និងញាតិមិត្តបងប្អូនផងដែរ។
សូមចូលរួមអបអរសាទរការបើកដំណើរការភោជនីយដ្ឋានអ៊ីតាលី Do Forni ជាថ្មីជាមួយនឹងមុខម្ហូបថ្មី អមដោយបរិយាកាសថ្មីដ៏រីករាយនៅភោជនីយដ្ឋាន Do Forni។
សូមធ្វើការកក់តុជាមុនតាមរយៈគេហទំព័រ http://www.sofitel-phnompenh-phokeethra.com/restaurants-bars/do-forni/ ឬទំនាក់ទំនងមកកាន់លេខទូរស័ព្ទ 023 999 200។
ភោជនីយដ្ឋានអ៊ីតាលី Do Forni រងចាំស្វាគមន៍លោកអ្នកជានិច្ច!
June 17, 2020
4ចំណុចដែលធ្វើឱ្យវិស័យស្រូវអង្ករកម្ពុជាឆ្នាំនេះមានសន្ទុះ និងទីផ្សារល្អជាងឆ្នាំ2019
នៅឆ្នាំនេះ ការនាំចេញស្រូវអង្ករនៅកម្ពុជាទៅកាន់ទីផ្សារអន្តរជាតិមានការកើនឡើង ហើយចរន្តនេះអាចផ្តល់ផលវិជ្ជមានយ៉ាងច្រើនដល់ប្រជាជនដែលភាគច្រើនជាកសិករនៅតាមតំបន់នានាទូទាំងប្រទេស។
សហព័ន្ធស្រូវអង្ករកម្ពុជាបានមើលឃើញថាមានមូលហេតុសំខាន់ៗចំនួន4 ដែលធ្វើឱ្យទីផ្សារស្រូវអង្កររបស់កម្ពុជានៅឆ្នាំ2020នេះ មានសន្ទុះ និងកំណើនល្អជាងឆ្នាំ2019។ កត្តាសំខាន់ៗទាំងអស់នោះមានដូចជា៖
កត្តាទី1 ទីផ្សារចិន៖ ការចាប់ផ្តើមអនុវត្តនូវកូតានាំចូលថ្មីចំនួន40ម៉ឺនតោន ដែលបានចាប់ផ្តើមតាំងពីចុងខែធ្នូ ឆ្នាំ2019 ក្នុងនោះកិច្ចព្រៀមព្រៀងបឋមជាមួយក្រុមហ៊ុននាំចេញរបស់កម្ពុជាចំនួន4 លើបរិមាណប្រមាណ125,000តោន នៅទីក្រុងសៀងហៃ កាលពីខែវិច្ឆិកា ឆ្នាំ2019។ កិច្ចព្រៀមព្រៀងនេះ មិនរាប់បញ្ជូលការនាំចូល ដែលស្ថិតក្នុងកូតារបស់តំបន់ស្វ័យត និងតាមបណ្តាខេត្តនីមួយៗរបស់ចិននោះទេ គឺជាកូតារបស់ក្រុមហ៊ុន Cofco តែប៉ុណ្ណោះ។ ការជំរុញផ្សព្វផ្សាយបង្កើនតម្រូវការអតិថិជន នៅប្រទេសចិន ដោយមានកិច្ចសហប្រតិបត្តិការរវាង សហព័ន្ធស្រូវអង្ករកម្ពុជា និង ក្រុមហ៊ុន Cofco បានធ្វើការប្រជុំជាលក្ខណៈបច្ចេកទេស ជាមួយមន្ត្រីក្រុមហ៊ុន Cofco ចិន រួចហើយកាលពីថ្ងៃទី27 ខែធ្នូ ឆ្នាំ2019 នៅរាជធានីភ្នំពេញ។
កត្តាទី2៖ ទីផ្សារសហភាពអឺរ៉ុប៖ ទីផ្សារនេះអាចមានកំណើនបន្តិចបន្តួច ដោយសារការទម្លាក់អត្រាយកពន្ធពីចំនួន175 អឺរ៉ូ ក្នុងឆ្នាំ2019 មកត្រឹមចំនួន 150 អឺរ៉ូ ក្នុងឆ្នាំ2020។ តែសហព័ន្ធស្រូវអង្ករកម្ពុជា ត្រូវបន្តជំរុញការផ្សព្វផ្សាយបន្ថែមទៀត នៅសហភាពអឺរ៉ុបតាមរយៈព្រឹត្តិការណ៍សំខាន់ៗដូច Sail and Anuka។
កត្តាទី3៖ ទីផ្សារអាស៊ាន៖ សម្រាប់ទីផ្សារ ប្រទេសម៉ាឡេស៊ី និងព្រុយណេ គឺកម្ពុជាអាចឈរជើងបានល្អ តែកម្ពុជាអាចចាប់ផ្តើម ពិចារណាទីផ្សារប្រទេសហ្វីលីពីន លើប្រភេទអង្ករក្រអូប ដែលបច្ចុប្បន្នគឺមានតែ អង្កររបស់ថៃ និងវៀតណាមប៉ុណ្ណោះចរាចរណ៍លើទីផ្សារនេះ តាមការអង្កេតទីផ្សារក្នុងទីក្រុងម៉ានីល កាលពីថ្ងៃទី11 ខែវិច្ឆិកា 2019 របស់ មន្ត្រីសហព័ន្ធស្រូវអង្ករកម្ពុជា ។
កត្តាទី4៖ ទីផ្សារផ្សេងៗទៀត៖ សម្រាប់ទីផ្សារផ្សេងៗមានជាអាទិ៍ដូចជា ប្រទេសកាប៉ុង និងតំបន់អាហ្វ្រិច មានហ្កាណា តូកូជាដើម អាចនៅបន្តរក្សាបានកំណើន។ តែទីផ្សារប្រទេសអូស្ត្រាលី អាចបន្តកើនឡើងបន្ថែមទៀត ជាពិសេសប្រភេទអង្ករសរីរាង្គ៕
June 17, 2020
គួរចាប់ផ្តើមបង្ហាត់កូនតូចឱ្យចេះចូលបន្ទប់ទឹកដោយខ្លួនឯងនៅពេលណាល្អ?
តើគួរចាប់ផ្តើមបង្ហាត់កូនតូចឱ្យចេះចូលបន្ទប់ទឹកដោយខ្លួនឯងនៅពេលណាល្អ? ឡារ៉ែនជឿថា លោកឪពុកអ្នកម្តាយជាច្រើននាក់ប្រហែលជាមិនទាន់ច្បាស់ក្នុងចិត្តនៅឡើយទេថា បើចង់ឱ្យកូនតូចចាប់ផ្តើមរៀនប្រើប្រាស់បន្ទប់ទឹកដោយខ្លួនឯងនោះ តើគួរចាប់ផ្តើមនៅពេលកូនតូចស្ថិតក្នុងអំឡុងអាយុប៉ុន្មានទើបស័ក្តិសម?។
តាមរយៈព័ត៌មានដែលឡារ៉ែនស្រាវជ្រាវមកបាននោះគឺ “ភាពត្រៀមខ្លួនរួចជាស្រេចរបស់ក្មេងម្នាក់ៗមិនដូចគ្នាទេ” ទោះជាក្មេងៗទាំងនោះមានភេទ និងស្ថិតក្នុងវ័យដូចគ្នាក៏ដោយ ក៏ភាពត្រៀមខ្លួនរួចជាស្រេច ខុសពីគ្នាដែរ។ បើដូច្នោះ តើធ្វើម៉េចទើបលោកឪពុកអ្នកម្តាយអាចដឹងបានទៅថា កូនតូចរបស់ខ្លួនត្រៀមខ្លួនរួចជាស្រេចក្នុងការរៀនបន្ទោបង់ហើយ?។
ដំបូងបង្អស់លោកឪពុកអ្នកម្តាយត្រូវសង្កេតមើលថា តើកូនតូចមានបង្ហាញសញ្ញាក្នុងការត្រៀមខ្លួនរួចជាស្រេចហើយឬនៅ? សញ្ញាដែលថានេះគឺ សញ្ញានៃការត្រៀមខ្លួនរួចហើយក្នុងការឈប់ប្រើក្រណាត់កន្ទប ឬខោទឹកនោម។ ជាប្រក្រតី ក្មេងៗភាគច្រើនអាចចាប់ផ្តើមរៀនចូលបន្ទប់ទឹកបានក្នុងអំឡុងអាយុពី 18 – 24 ខែ តែក្មេងខ្លះអាចមានសញ្ញានៃភាពត្រៀមខ្លួនរួចជាស្រេចនេះមុន ឬក្រោយអំឡុងអាយុខាងដើមនេះក៏អាចថាបានដែរ។
តើមានសញ្ញានៃភាពត្រៀមខ្លួនរួចជាស្រេចអ្វីខ្លះដែលលោកឪពុកអ្នកម្តាយគួរដឹងថា មានសញ្ញាអ្វី និងយ៉ាងណាខ្លះនោះ សូមអានអត្ថបទនេះជាបន្ត។
– កូនតូចអាចធ្វើតាម ឬប្រតិបត្តិខ្លួនតាមពាក្យណែនាំ និងអាចធ្វើតាមបញ្ជាស្រួលៗបាន និងនៅត្រូវយល់ដឹងថា ប៉ាម៉ាក់និយាយពីអ្វី ដូចជា ប្រាប់ឱ្យក្រោក អង្គុយ ដើរ ឈរ ដោះខោ ចាបយករបស់អ្វីម្យ៉ាងបានដោយខ្លួនឯង ជាដើម ។ល។
– កូនតូចត្រូវតែយល់ពីពាក្យងាយៗស្រួលៗដែលពាក់ព័ន្ធនឹងការប្រើប្រាស់បន្ទប់ទឹក ដូចជា នោម ឬជុះ ឬក៏ការបបួលគ្នាទៅចូលបន្ទប់ទឹកជាដើម។
– កូនតូចអាចទ្រាំទប់អាការឈឺនោមបាន ដោយអាចសង្កេតបានតាមរយៈក្រណាត់កន្ទប ឬខោទឹកនោមដែលកូនស្លៀកនោះនៅស្ងួតរហូតរយៈពេល 2 ម៉ោង ឬយូរជាងនោះ។
– កូនតូចត្រូវតែអាចប្រាប់ពីតម្រូវការឱ្យឪពុកម្តាយដឹង និងយល់បាន ដូចជា កូនអាចប្រាប់ថា ឈឺពោះបត់ជើងធំ ឬបត់ជើងតូចបាន ឬមានការធ្វើទឹកមុខ ឬសម្តែងអកប្បកិរិយាថាចង់ចូលបន្ទប់ជាដើម។
– កូនតូចល្មមអាចជួយខ្លួនឯងបានហើយ ដូចជា អាចដើរទៅបន្ទប់ទឹកបានដោយខ្លួនឯង អាចចេះដោះ – ស្លៀកខោ ឬទាញក្រណាត់កន្ទប ឬខោទឹកនោមចេញពីខ្លួនបាន។
– សញ្ញានៃភាពត្រៀមខ្លួនរួចហើយដែលកូនតូចបង្ហាញពីចំណាប់អារម្មណ៍ក្នុងការប្រើប្រាស់បន្ទប់ទឹក ដូចជា កូនតូចអាចអង្គុយលើបង្គន់បត់ជើង – ក្រោកចេញវិញ ឬចុចទឹកសម្អាតបាន ឬការដែលឃើញកូនតូចព្យាយាមលេងធ្វើត្រាប់ការប្រើប្រាស់បន្ទប់ទឹកជាដើម។
នៅពេលមើលឃើញសញ្ញានៃភាពត្រៀមខ្លួនរួចហើយទាំងនេះ លោកឪពុកអ្នកម្តាយអាចចាប់ផ្តើមបង្រៀនបានហើយ ដោយ បង្រៀនបែបសន្សឹមៗ កុំបង្ខំ។ ក្នុងអំឡុងពេលបង្ហាត់នេះ បើកូនតូចមិនព្រមប្រតិបត្តិតាម ក៏កុំទៅថាឱ្យ ឬបន្ទោសកូនដោយក្តីខឹងមួម៉ៅឱ្យសោះ និងអ្វីដែលសំខាន់នោះ គឺលោកឪពុកអ្នកម្តាយមិនគួរបង្ខំកូនឱ្យចូលបន្ទប់ទឹកដោយខ្លួនឯងនោះឡើយ៕
June 17, 2020
នាឡិកាឆ្លាតវៃ Smart Watch និងកាស Buds Air Neo ដែលបានដាក់សម្ពោធនេះនឹងក្លាយជា ផលិតផលAIot ទី១សម្រាប់យុវវ័យផងដែរ
realme គឺជាម៉ាកស្មាតហ្វូនដែលរីកលូតលាស់លឿនជាងគេបំផុតនៅលើពិភពលោក ហើយនឹងបានដាក់ប្រកាសជាផ្លូវការនូវនាឡិកាដៃឆ្លាតវៃ realme Watch និងកាស Buds Air Neo នៅថ្ងៃទី ១៦ ខែមិថុនានេះ និងបានប្រកាសជាផ្លូវការថាអាជីវកម្ម AIoT នឹងចូលមកទីផ្សារកម្ពុជាយ៉ាងពេញលេញ។
នាឡិកាឆ្លាតវៃ realme – ជំនួយការសុខភាពប្រចាំថ្ងៃ 24/7 ដែលមានរចនាបទទំនើបទាន់សម័យ
ជាមួយគ្នានេះដែរ realme បានរក្សារទម្រង់រចនាបថទំនើបទាន់សម័យ ដើម្បីបំពេញតម្រូវការសោភ័ណភាពសម្រាប់យុវវ័យ។ នាឡិកាដៃឆ្លាតវៃ realme Watch នឹងអាចបំពេញតម្រូវការយុវវ័យដែលបញ្ជាក់ពីបុគ្គលិកលក្ខណៈរបស់ពួកគេ។ ជាមួយផ្ទៃមុខនាឡិកាទាំង12 ដែលមានស្រាប់ ហើយអ្នកក៏អាចទាញយកផ្ទៃមុខនាឡិកាជាងមួយរយទៀតបានតាមរយៈ OTA ផងដែរ។
ជាមួយនឹងសម្ថភាពឧបករណ៍ឈានមុខគេ នាឡិកាឆ្លាតវៃ realme Watch មានបំពាក់នូវអេក្រង់ពណ៌ថាច់ស្គ្រីន 1.4 អ៊ីញ និងមានកំរិតបង្ហាញខ្ពស់ 320*320 ភីកសែលរួមជាមួយនឹងសន្ទស្សន៍កំហាប់ភីកសែលដល់ទៅ 323 PPI។
អេក្រង់ត្រូវបានការពារដោយកញ្ជក់ Corning Gorilla Glass ហើយកម្រិតពន្លឺមានដល់ទៅ380 nits។ ទាំងនេះហើយដែលធ្វើអោយនាឡិកាឆ្លាតវៃ realme Watch មានភាពលេចធ្លោនៅក្នុងផលិតផលដែលមានជួរតម្លៃប្រហែលគ្នានេះ ដោយមានគុណភាពខ្ពស់និងមានការងាយស្រួលក្នុងការបញ្ជា។
នាឡិកាឆ្លាតវៃ realme Watch គឺជាជំនួយការសុខភាពដ៏ល្អ វាត្រូវបានបំពាក់ជាមួយអង្កចាប់ ចង្វាក់បេះដូង PPG អុបទិក ដែលមានកម្រិតត្រឹមត្រូវខ្ពស់ ហើយគាំទ្រការត្រួពិនិត្យចង្វាក់បេះដូង 24 /7 និងអាចវាស់ចង្វាក់បេះដូងបានយ៉ាងរហ័សនិងត្រឹមត្រូវ។ វានឹងជូនដំណឹងដល់អ្នកខណៈពេលណាដែលចង្វាក់បេះដូងខ្ពស់ឬទាបពេក។ វាគាំទ្រនូវ កីឡាចំនួន 14 ប្រភេទ, ត្រួតពិនិត្យកម្រិតអុកស៊ីសែនក្នុងឈាម, តេស្តសមត្ថភាពកីឡាអេរ៉ូប៊ិក, គណនាការរាប់ជំហាន, ការរំលឹកក្នុងការអង្គុយយូរ, ការរំលឹកការផឹកទឹក, ការត្រួតពិនិត្យដំណេក និងលំហាត់សមាធិ។
រចនាបទទាន់សម័យដោយប្រព័ន្ធឥតខ្សែពិតប្រាកដ —— កាស realme Buds Air Neo
កាស realme Buds Air Neo ត្រូវបានដាក់សម្ពោធលក់ក្នុងនាមជាកាសស្តាប់ឥតខ្សែថ្មីពិតប្រាកដ របស់ realme។ កាស Buds Air Neo នេះគឺជាកំណែជំនាន់ថ្មីនៃម៉ូដែល Buds Air ដែល realme សម្ពោធលក់កាលពីឆ្នាំមុន។ កាសថ្មីនេះបំពាក់ជាមួយអង្គបំពងសម្លេងធំជាងជំនាន់មុន ដែលមានទំហំ 13mm។ ហើយអ្នកក៏នឹងទទួលបាននូវបទពិសោធន៍លេងហ្គេមដ៏ជក់ចិត្ត ដោយកាសដែលមានភាពរហ័ស កម្រិតយឺតយ៉ាវរបស់វាអាចធ្លាក់ដល់ 119.2ms។ កាស realme Buds Air Neo ត្រូវបានផលិតឡើងក្នុងរចនាបថការពារទឹក ដែលមានវិញ្ញាបនបត្រស្តង់ដារ IPX4-។
មជ្ឈមណ្ឌលកណ្តាលឆ្លាតវៃ នៃ AIoT និងជាដៃគូដ៏ល្អបំផុតសម្រាប់ស្មាតហ្វូនរបស់អ្នក
នាឡិកាឆ្លាតវៃ realme មានមុខងារជាច្រើន។ ជាមួយនឹងកម្មវិធី realme Link វាមិនត្រឹមតែអាចកត់ត្រាទិន្នន័យការធ្វើលំហាត់ប្រាណ និងរាងកាយរបស់អ្នកប៉ុណ្ណោះទេ ជាមួយនឹងកម្មវិធី realme Link វាក៏អាចតភ្ជាប់ជាមួយស្មាតហ្វូនរបស់អ្នក ដើម្បីចាក់ភ្លេង ឬថតរូប។ លើសពីនេះទៅទៀត វាមានមុខងារជូនដំណឹងឆ្លាតវៃ ដែលរួមមានការហៅទូរស័ព្ទ ការរំលឹកសារ ការជូនដំណឹងនានា ការមើលឧតុនិយមនិងផ្សេងៗទៀត ដែលធ្វើឱ្យវាក្លាយជាដៃគូដ៏ល្អបំផុតសម្រាប់ស្មាតហ្វូនរបស់អ្នក។
ឥឡូវនេះ realme បាននាំចូលនូវដុំសាកថ្មចល័ត powerbank 2.0 មកកាន់ប្រទេសកម្ពុជា ជាមួយនឹងមុខងារ fast charge 18W គាំទ្រឱ្យអ្នកមានការសាកថ្មល្បឿនលឿនដូចគ្នាទៅនឹងការសាកថ្មទូរស័ព្ទរបស់អ្នកជាមួយនឹងឆ្នាំងសាកអ្នកដែរ ។ ការការពារសៀគ្វីពហុស្រទាប់នឹងជួយធានានូវសុវត្ថិភាព នៅពេលកំពុងមានល្បឿនលឿនផងដែរ។
នាឡិកាឆ្លាតវៃ realme ដែលមានមុខងារ SpO2 ត្រូវបានប្រកាសលក់ក្នុងតម្លៃ 69$, កាស Buds Air Neo ត្រូវបានប្រកាសលក់ក្នុងតម្លៃ 59$, ហើយដុំសាកថ្មចល័ត 18W flash charge powerbank មានតម្លៃ 22$ ទាំងនេះគឺជាឈុតទី១នៃផលិតផល AIoT សម្រាប់យុវវ័យ ។
ចាប់ពីពេលនេះដល់ ម៉ោង 12 រសៀល ថ្ងៃទី17 ការជាវទិញផលិតផល AIoT ទាំងអស់នៅSmile Shop នឹងទទួលបានអត្ថប្រយោជន៍ជាច្រើនទៀតណា៎!
សម្រាប់ព័ត៌មានលម្អិតបន្ថែម សូមចូលមើលតាមតំណខាងក្រោម៖ http://suo.im/5FVCxi
ព័ត៌មានលម្អិតបន្ថែម សូមចូលទៅកាន់ផេកផ្លូវការរបស់realme ៖ https://bit.ly/3cZO4YE
June 17, 2020
អ្នកដែលមានបញ្ហាភ្នែក Microsoft នឹងអាប់ឌែតមុខងារ Accessibility ជូនជាពិសេស
នៅលើ Windows 10 ក្នុងពេលឆាប់ៗនេះ ក្រុមហ៊ុន Microsoft នឹងធ្វើការកែសម្រួលមុខងារមួយចំនួន ដើម្បីជាជំនួយក្នុងការប្រើប្រាស់។
មូលហេតុ គឺបណ្ដាលមកពី ពេលដែលមនុស្សយើងកាន់តែមានវ័យចំណាស់ ភ្នែករបស់យើងក៏កាន់តែអន់ទៅតាមនោះដែរ ដែលធ្វើឱ្យយើងពិបាកមើល ជាពិសេសពេលដែលយើងមើលអេក្រង់កុំព្យូទ័រតែម្ដង ជួនកាលផលវិបាកនេះ ក៏អាចកើតមានឡើងជាមួយអ្នកដែលមានវ័យក្មេងផងដែរ។
ការកែសម្រួលមុខងារមួយចំនួន គឺដើម្បីឱ្យអ្នកដែលពិបាកក្នុងការមើល ឬមើលពុំឃើញនោះ ងាយស្រួលក្នុងការប្រើប្រាស់។
-Text Cursor: លោកអ្នកអាចធ្វើការផ្លាស់ប្ដូរទំហំ
-Cursor និងប្ដូរពណ៌ ដើម្បីងាយស្រួលក្នុងការមើល ដោយវាមានបន្ថែមចំណុច2 នៅចុងៗនៃ cursor ដែលអាចកំណត់ឱ្យវាតូច ឬធំបាន (text cursor indicator) នៅលើវាផងដែរ។
-Screen reader (មុខងារអានលើអេក្រង់): ធ្វើឱ្យកាន់តែប្រសើរឡើងក្នុងការអានលើអេក្រង់ ដោយកែសម្រួលសំឡេងឱ្យស្រដៀងទៅនឹងការនិយាយពិត។
ម្យ៉ាងវិញទៀត វាមានចំណុចពិសេសមួយ គឺ Smarter browsing ដើម្បីចៀសវាងការចូលក្នុងគេហទំព័រខុស មុខងារនេះនឹងអានទាំងអាសយដ្ឋានរបស់គេហទំព័រផងដែរ ហើយវាអាចប្រើបានទាំងនៅលើ Firefox និង Chrome។
-Outlook មែល: វាពិតជាធ្វើឱ្យមានភាពងាយស្រួលច្រើនក្នុងការប្រើប្រាស់ Outlook ដោយវាអាចចាប់យកសារបានយ៉ាងឆាប់រហ័ស នៅពេលលោកអ្នកបើកសារ ហើយវាធ្វើការអានសារទាំងនោះបានតែម្តង ដោយមិនបាច់ឱ្យយើងពិបាកក្នុងការអានសារនោះឡើយ គឺគ្រាន់តែស្តាប់ជាការស្រេច៕
June 16, 2020
វិធីការពារ ពីការឆបោកតាមលេខខលទូរស័ព្ទពីក្រៅប្រទេស ដែលអ្នកពុំធ្លាប់ស្គាល់
បច្ចុប្បន្នយើងសង្កេតឃើញថា ពលរដ្ឋកម្ពុជាមួយចំនួនធំ បានទទួលការហៅចូលទូរស័ព្ទ ពីក្រៅប្រទេស ដូចជា ប្រទេសម៉ាឡាវី អាហ្វ្រិក នីហ្សេរីយ៉ា ប៉ាគីស្ថាន ឬ ប្រទេសរុស្ស៊ីជាដើម។
ទន្ទឹមនឹងនេះ ពលរដ្ឋហាក់មានចម្ងល់អំពីបញ្ហា Missed Call និងមានសំណួរមួយចំនួន ដូចខាងក្រោម៖ តើនរណាដែលបានធ្វើការខលចូលលេខទូរស័ព្ទដៃរបស់យើង? តើអ្នកដែលកំពុងធ្វើការហៅចូលមកនេះ ពួកគេមានបំណងអ្វីពិតប្រាកដ? តើការហៅចូលទូរស័ព្ទនេះ ជាការឆបោក ឬអាចជាការព្យាយាមហ៊ែកគណនី?
ដើម្បីស្រាយចម្ងល់ខាងលើ ក្រុមការងារនាយកដ្ឋានព័ត៌មានវិទ្យា បានធ្វើការពន្យល់ដោយសង្ខេបដូចខាងក្រោម៖
ការហៅចូលទូរស័ព្ទដោយប្រើប្រាស់លេខប្លែកៗ ដែលអ្នកពុំដែលស្គាល់ គឺជាគម្រោងឆបោកប្រាក់ (Money Scam) ដែលមានឈ្មោះថា “Callback Scam ឬហៅម្យ៉ាងទៀតថា One-Ring Scam”។
Callback Scam ជាបច្ចេកទេសកាត់ប្រាក់ពីគណនីទូរស័ព្ទជនរងគ្រោះ ដោយប្រើប្រាស់សេវា ដែលហៅថា International Premium Rate Number (IPRN)។
ក្រុមបណ្តាញឧក្រិដ្ឋជនដែលមានអង្គការចាត់តាំង បានទិញសេវាលេខទូរស័ព្ទ IPRN ពីក្រុមហ៊ុនផ្តល់សេវាទូរស័ព្ទ ធ្វើការខលចេញពីក្រៅប្រទេស ទៅលើគោលដៅនានាជុំវិញពិភពលោក គោលដៅទាំងនោះ ក៏រួមទាំងពលរដ្ឋ នៃព្រះរាជាណាចក្រកម្ពុជាយើងផងដែរ។
តើអ្នកអាចបាត់បង់ប្រាក់ពីគណនីទូរស័ព្ទដោយរបៀបណា? ឧក្រិដ្ឋជនធ្វើការខលចូលលេខទូរស័ព្ទជនរងគ្រោះ ពីប្រទេសម៉ាឡាវី (+265) អាហ្វ្រិក (+27) នីហ្សេរីយ៉ា (+234) ប៉ាគីស្ថាន (+92) ឬប្រទេសរុស្ស៊ី (+7) ជាដើម។ បន្ទាប់ពីខលចូល ពួកគេនឹងកាត់ផ្តាច់ការហៅចូល ដែលនឹងបង្ហាញពាក្យថា Missed Call នៅលើទូរស័ព្ទជនរងគ្រោះ។ នៅពេលជនរងគ្រោះធ្វើការខលទូរស័ព្ទទៅវិញ តម្លៃសេវា គឺមានតម្លៃថ្លៃ និងកាត់ពីគណនីទូរស័ព្ទជនរងគ្រោះដោយស្វ័យប្រវត្តិ។ ក្រុមឧក្រិដ្ឋជន នឹងទទួលបានប្រាក់កម្រៃជើងសា (Commission) ពីក្រុមហ៊ុនផ្តល់សេវាទូរស័ព្ទ។
តើអ្នកត្រូវធ្វើដូចម្តេច ដើម្បីការពារពីការឆបោក (Callback ឬ One-Ring Scam) នៅពេលទទួលបានការហៅចូលទូរស័ព្ទពីក្រៅប្រទេស ប្រើប្រាស់នូវលេខទូរស័ព្ទដែលអ្នកពុំធ្លាប់ស្គាល់?
*សូមតាមអនុវត្តវិធីសាស្ត្រដូចខាងក្រោម៖
-ធ្វើការ Save លេខទូរស័ព្ទទុកនឹងព្យាយាមទាក់ទងតាមរយ:កម្មវិធី WhatsApp, Telegram, ឬ SMS។
-ត្រូវចៀសវាងការខលទូរស័ព្ទត្រឡប់ទៅវិញ ព្រោះលេខនោះអាចជា IPRN។
ចូរប្រើប្រាស់កម្មវិធីសម្រាប់ទូរស័ព្ទដៃក្នុងការស្វែងរកប្រភពលេខទូរស័ព្ទ ដូចជាកម្មវិធី TrueCaller ជាដើម។ ធ្វើការរាយការណ៍ទៅកាន់ក្រុមហ៊ុនផ្តល់សេវាទូរស័ព្ទរបស់អ្នក។ ធ្វើការ Block លេខទូរស័ព្ទសង្ស័យចោល ដោយប្រើប្រាស់កម្មវិធីដែលមានស្រាប់ក្នុងទូរស័ព្ទដៃរបស់អ្នក៕
ប្រភព៖ នាយកដ្ឋានព័ត៌មានវិទ្យា នៃក្រសួងមហាផ្ទៃ
June 16, 2020
លទ្ធផលវគ្គ 8ក្រុមចុងក្រោយ HUN SEN CUP 2020
ការចាប់គូប្រកួតពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី14 ឆ្នាំ2020 (ថ្នាក់ខេត្ត) វគ្គ1/4 ផ្តាច់ព្រ័ត្រ គណៈកម្មការរៀបចំការប្រកួតបាល់ទាត់ជាតិកម្ពុជា ទើបតែបញ្ចប់កាលពីថ្ងៃទី15 ខែមិថុនា ឆ្នាំ2020 ម្សិលមិញនេះនៅពហុកីឡដ្ឋានជាតិអូឡាំពិក។
សម្រាប់ការផ្គូផ្គងក្រុមដែលនឹងបានឡើងទៅវគ្គ 8ក្រុមចុងក្រោយ ដើម្បីឡើងទៅវគ្គពាក់កណ្ដាលផ្ដាច់ព្រ័ត្រ ក្រុមដែលនៅខាងមុខ ដែលត្រូវបានចាប់ឆ្នោតចំ មុននឹងធ្វើជាម្ចាស់ផ្ទះ ខណៈក្រុមដែលចាប់តាមក្រោយ គឺជាក្រុមភ្ញៀវ មានលទ្ធផលដូចខាងក្រោម៖
សៀមរាប ប្រកួតជាមួយ កណ្ដាល
ព្រៃវែង ប្រកួតជាមួយ កោះកុង
កំពង់ស្ពឺ ប្រកួតជាមួយ ត្បូងឃ្មុំ
កែប ប្រកួតជាមួយ កំពង់ឆ្នាំង
ចំពោះពានរង្វាន់ថ្នាក់ខេត្តនេះ ក្រុមជើងឯក, ជើងឯករង, លេខ៣ និងលេខ៤ នឹងទទួលបានកៅអីទៅវគ្គ 16ក្រុម ពានរង្វាន់សម្ដេចតេជោ ហ៊ុន សែន ថ្នាក់ជាតិ ដោយត្រូវប្រកួតប្រជែងជាមួយក្លិប12 ផ្សេងទៀតនៅក្របខ័ណ្ឌ Metfone Cambodian League លើកលែងតែក្រុមយុវជនសាលាបាល់ទាត់ជាតិបាទី ដែលមិនចូលរួមប្រកួតក្នុងពានរង្វាន់នេះឡើយ៕

June 16, 2020