Author: ធឿន មករា

សញ្ញាដាស់តឿននៅពេលដែលស្នេហានេះ…មិនមែនសម្រាប់រូបអ្នក
បើអ្នកមិនប្រាកដក្នុងចិត្តថា មនុស្សដែលកំពុងសេពគប់គ្នានោះ គឺជាមនុស្សដែល “មែន” ឬ “មិនមែន” សម្រាប់រូបអ្នកនោះវាមិនមែនជារឿងចម្លែកទេ ព្រោះដំបូងៗថ្មីៗ អ្វីៗក៏មើលទៅល្អគ្រប់យ៉ាង តែលុះពេលវេលាកន្លងទៅ អារម្មណ៍ដែលថាដូចជាមិនមែនជាមនុស្សដែលអ្នកត្រូវការនោះ ក៏លេចភ្លែតឡើងនៅក្នុងខួរក្បាល។
– មិនអាចទទួលយកអតីតកាលដែលកន្លងមករបស់អ្នកបាន
យើងគ្រប់គ្នាសុទ្ធតែមានអតីតកាលដូចគ្នាទាំងអស់ បើគូសង្សារបស់អ្នកជាមនុស្សម្នាក់ដែលមិនអាចទទួលយករឿងកាលពីអតីតរបស់អ្នកបាន ជាពិសេសក្នុងរឿងស្នេហាកាលពីអតីតដែលបានបញ្ចប់ទៅហើយនោះ ក៏សាកល្បងគិតទៅមើលថា តើគេនៅបារម្ភ និងចង់នៅថែទាំអ្នកតទៅទៀតដែរឬទេ?។
– មានអារម្មណ៍មួម៉ៅដាក់អ្នករហូត
បើគេតែងតែមានអារម្មណ៍មួម៉ៅ ឆេវឆាវដាក់អ្នករហូតដល់ថ្នាក់ហួសហេតុពេក មិនថាតែពេលអ្នកសើចសប្បាយ យំ ត្រេកអរ ឬពិបាកចិត្តនោះ ចូរដឹងទៅចុះថា អ្នកមិនគួរសេពគប់ជាមួយមនុស្សប្រភេទនេះយ៉ាងដាច់ខាត។
– បង្ហាញពីភាពគ្មានសុជីវធម៌
បើគូសង្សារបស់អ្នកជ្រើសរើសក្នុងការបង្ហាញពីទង្វើគ្មានសុជីវធម៌ដាក់អ្នក និងគ្មានសញ្ញាណាមួយដែលថា គេ(នាង)នឹងបញ្ឈប់ ឬផ្អាក ឬគ្រប់គ្រងវាបានមិនថាតែក្នុងទីសាធារណៈ ឬក្នុងកន្លែងដែលគ្មានអ្នកណាឃើញនោះ អ្នកគួរតែនាំខ្លួនឯងចេញឱ្យឆ្ងាយពីគេ(នាង)ជាបន្ទាន់។
– ភូតកុហកអ្នកជាប់ជានិច្ច
តើអ្នកដែលសង្កេតមើលដែរទេថា ពេលដែលអ្នកសួរគេនូវសំនួរដែលថា តើគេធ្វើអី? នៅឯណា? នៅជាមួយអ្នកណា? នោះ តើប្រតិកម្មដំបូងដែលគេ(នាង)មានចំពោះអ្នកយ៉ាងណាដែរ? តើគេច្រើនតែប្រើពេល 2 – 3 នាទីក្នុងការរកនឹកចម្លើយដែរឬទេ?
បើេវាជារឿងតូចតាច ក៏ល្មមអាចទទួលយកបាន តែទីបំផុតទៅមនុស្សយើងក៏ត្រូវតែជ្រើសរើសយកការនៅជាមួយការពិតច្រើនជាងរស់នៅជាមួយភាពកុហកបោកប្រាស់។
មុនអ្វីទាំងអស់ អ្នកត្រូវតែទទួលយកឱ្យបានជាមុនសិនថា នៅលើពិភពលោកនេះ គ្មាននរណាឥតខ្ចោះនោះទេ តែបើអ្នកមានអារម្មណ៍ថា គេ(នាង)គ្មានភាពសហការចំពោះសម្ព័ន្ធភាពលើកនេះជាមួយអ្នកទេនោះ វាក៏មិនមែនជារឿងអ្វីដែលអ្នកត្រូវមកខាតពេលវាលានៅជាមួយមនុស្សដែល “មិនមែន” សម្រាប់អ្នកតទៅទៀតដែរ៕
July 17, 2020
លោកជំទាវ ឱ វណ្ណឌីន ថាហានិភ័យឆ្លងអាចនឹងខ្ពស់បើការឈប់សម្រាក 5ថ្ងៃខាងមុខប្រជាជនធ្វេសប្រហែស
មិនយូរទៀតទេ ប្រជាជនទាំងអស់នៅក្នុងប្រទេសកម្ពុជានឹងត្រូវដល់ថ្ងៃឈប់សម្រាកដែលរាជរដ្ឋាភិបាលប្រកាសឱ្យឈប់រហូតដល់ទៅ 5ថ្ងៃ ដើម្បីសងថ្ងៃឈប់សម្រាកកាលពីបុណ្យចូលឆ្នាំថ្មី។
ពាក់ព័ន្ធនឹងបញ្ហានេះ មន្ត្រីជាន់ខ្ពស់ក្រសួងសុខាភិបាល បានព្រមានថា ប្រសិនបើប្រជាជនយើងទាំងអស់គ្នាមិនប្រុងប្រយ័ត្នក្នុងការការពារខ្លួនឱ្យបានខ្ពស់នោះទេ អត្រាឆ្លងមេរោគ Covid-19 អាចនៅតែមានខ្ពស់។ លោកជំទាវថា នៅថ្ងៃទី 17 ខែកក្កដា ឆ្នាំ2020នេះ ក្រសួងសុខាភិបាល បានរកឃើញអ្នកឆ្លងជំងឺ Covid-19 ចំនួន 5នាក់បន្ថែមទៀត។ ការរកឃើញចំនួនអ្នកឆ្លងថ្មីនេះ បង្ហាញថាកម្ពុជាមិនទាន់ឆ្លងផុតហានិភ័យដែលកើតឡើងដោយសារតែជំងឺ Covid-19 នៅឡើយទេ។
លោកជំទាវរដ្ឋលេខាធិការក្រើនរំឮកថា ថ្វីត្បិតតែកន្លងមកអ្នកដែលរកឃើញថ្មីថាមានផ្ទុកជំងឺ Covid-19 សុទ្ធតែជាករណីនាំចូល តែប្រជាជនគ្រប់គ្នាមិនគួរធ្វេសប្រហែសនោះទេ។ ហានិភ័យនៃការឆ្លងជំងឺនេះនៅតែខ្ពស់ ព្រោះយើងមិនអាចមើលនឹងភ្នែកទទេដឹងថាបុគ្គលណាមានផ្ទុកមេរោគ Covid-19 ឬមិនមាននោះទេ។ ហេតុនេះសម្រាប់ប្រជាជនទាំងអស់ដែលទៅស្រុកកំណើតនៅថ្ងៃឈប់សម្រាកនាពេលខាងមុខនេះ ចាំបាច់ត្រូវតែអនុវត្តនូវវិធានការពារខ្លួនតាមការណែនាំរបស់ក្រសួងសុខាភិបាល និងប្រុងប្រយ័ត្នឱ្យបានខ្ពស់ចំពោះរាល់ការជួបជុំនានា៕
July 17, 2020
វិបត្តិ Covid-19 ធ្វើវិស័យដឹកជញ្ជូនធ្លាក់ចុះ តែកម្ពុជានៅតែព្យាយាមភ្ជាប់ការដឹកជញ្ជូនដោយប្រុងប្រយ័ត្ន
ក្រោយពេលមានការរីករាលដាលនៃជំងឺ Covid-19 បានធ្វើឱ្យសេដ្ឋកិច្ចពិភពលោកប្រែប្រួលយ៉ាងខ្លាំង ដោយក្នុងនោះវិស័យដឹកជញ្ជូនជាផ្នែកសំខាន់មួយដែលទទួលរងផលប៉ះពាល់យ៉ាងធ្ងន់ធ្ងរ។
ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានបញ្ជាក់ថា ជំងឺ Covid-19 បានជះឥទ្ធិពលអវិជ្ជមានដល់វិស័យដឹកជញ្ជូនទាំងផ្លូវទឹក ផ្លូវគោក និងផ្លូវអាកាស។ ជាលទ្ធផលនៅក្នុងឆមាសទី1 ដើមឆ្នាំ2020នេះ អ្នកដំណើរដែលចូលមកកាន់ប្រទេសកម្ពុជាបានធ្លាក់ចុះ 68% ដោយមានចំនួនត្រឹមតែ 1.95លាននាក់ប៉ុណ្ណោះ។ ចំណែកឯការចរាចរណ៍ទំនិញវិញក៏មានការធ្លាក់ចុះរហូតដល់ទៅ 30% ដោយមានចំនួនប្រមាណ 25,000តោន។
បញ្ហាទាំងអស់នេះក៏មានការចូលរួមមួយផ្នែកផងដែរពីការបិទច្រកទ្វាឆ្លងកាត់ព្រំដែនបណ្តោះអាសន្ន ដោយមានការឯកភាពគ្នាពីប្រទេសជិតខាង ដើម្បីទប់ស្កាត់ផលប៉ះពាល់នៃជំងឺ Covid-19។ ទោះជាយ៉ាងនេះក្តីកម្ពុជាក៏ព្យាយាមក្នុងការដោះស្រាយបញ្ហាទាំងអស់នេះ ដោយចេញវិធានការសំខាន់ៗចំនួន3 ដើម្បីធានាថាការដឹកជញ្ជូនទំនិញនៅតែអាចធ្វើបាន ស្របពេលដែលការការពារពីជំងឺឆ្លង Covid-19 នៅតែត្រូវបានអនុវត្ត។
វិធានការសំខាន់ទី1 គឺត្រូវផ្ទេរទំនិញពីរថយន្តដឹកទំនិញរបស់ប្រទេសនាំចេញទៅកាន់ប្រទេសនាំចូលនៅត្រង់ទីតាំងកំណត់មួយ។
វិធានការទី2 ត្រូវប្តូររ៉ឺម៉កសណ្តោងនៅត្រង់ទីតាំងកំណត់នោះ។
វិធានការទី3 កំណត់ចំនួនរថយន្តចេញ-ចូលឱ្យបានច្បាស់លាស់តាមពេលម៉ោងជាក់លាក់ និងការកំណត់ចំនួនមនុស្សច្រើន បំផុតក្នុងរថយន្តត្រឹមចំនួន2នាក់ដើម្បីទប់ស្កាត់ការរីករាលដាលនៃជំងឺ Covid-19៕

July 17, 2020
វេសឡាញ និង ធនាគារ ហ្វីលីព ភីអិលស៊ី សហការដាក់ឱ្យដំណើរការកម្មវិធីបង់ថ្លៃសិក្សាតាមសេវាធនាគារចល័ត
ក្រុមហ៊ុនវេសឡាញ អេឌ្យូខេសិន គ្រុប និងធនាគារ ហ្វីលីព ភីអិលស៊ី បានចុះអនុស្សារណៈយោគយល់គ្នា និងប្រកាសដាក់ឱ្យប្រើប្រាស់កម្មវិធីបង់ថ្លៃសិក្សាតាមរយៈ សេវាធនាគារចល័តដើម្បីផ្តល់ភាពងាយស្រួលដល់ដំណើរការប្រតិបត្តិការបង់ប្រាក់របស់សិស្សានុសិស្ស និងមាតាបិតាសិស្ស តាមរយៈសេវាធនាគារចល័ត (Phillip Mobile) កាលពីព្រឹកថ្ងៃទី 17 ខែកក្កដា ឆ្នាំ2020នេះ។
លោក ប៉ិច បូឡែន អគ្គនាយកក្រុមហ៊ុន វេសឡាញ អេឌ្យូខេសិន គ្រុប បានលើកឡើងថា គោលបំណងនៃកិច្ចសហការនេះ មិនមែនដើម្បីតែបង្កើនគុណភាពបង់ប្រាក់ ឬទទួលប្រាក់តាមប្រព័ន្ធសេវាធនាគារចល័តបុណ្ណោះទេ ប៉ុន្តែក្រុមហ៊ុន ទាំង2 ក៏បាននិងកំពុងគិតគូរពីការធ្វើទំនើបកម្មលើប្រព័ន្ធអប់រំបែបឌីជីថល ជាមួយនឹងបច្ចេកវិទ្យាថ្មីៗ ស្របតាម ទាន់ការវិវឌ្ឍទៅថ្ងៃអនាគត។
លោក ប៉ិច បូឡែន បាននិយាយថា៖ «ប្រតិបត្តិការទទួលប្រាក់ និងបង់ប្រាក់មានសភាពមមារញឹក ដែលបណ្តាលឱ្យមានការរង់ ចាំរបស់មាតាបិតានិងសិស្សានុសិស្សដែលត្រូវចំណាយពេលច្រើន។ ម្យ៉ាងវិញទៀតលោកសំឡឹងមើលថាមិនមានភាពងាយស្រួលទេ សម្រាប់មាតាបិតាសិស្ស សិស្សានុសិស្ស ដែលត្រូវកាន់ប្រាក់សុទ្ធធ្វើដំណើរមកកាន់ទីតាំង របស់សាលារៀន ដើម្បីបង់ប្រាក់នេះ គឺត្រូវឆ្លងកាត់ការប្រុងប្រយ័ត្ន សុវត្ថិភាពនៃការធ្វើដំណើរ សុវត្ថិភាពនៃការបាត់បង់ នឹងប្រឈមនឹងហនិភ័យនានា»។
ស្ថាបនិកស្ថាប័នអប់រំខាងលើបានបន្ថែមទៀតថា ចំពោះបុគ្គលិកប្រតិបត្តិការទទួលបន្ទុកទទួលប្រាក់ ក៏ត្រូវចំណាយពេលច្រើនសម្រាប់លើកិច្ចការប្រតិបត្តិការ។ សម័យកាលនៃការរីកចម្រើនលើប្រព័ន្ធបច្ចេកវិទ្យា លោកបានសំឡឹងឈោងចាប់ដៃគូថ្មី ដើម្បីរួមគ្នាក្នុងការអភិវឌ្ឍ នោះគឺជាធនាគារ ហ្វីលីព ភីអិលស៊ី ដែលជាដៃគូដ៏សំខាន់ សម្រាប់រួមជាមួយ WEG ក្នុងប្រតិបតិ្តការបង់ទទួលប្រាក់តាមសេវាធានាគារចល័ត ចាប់ពីថ្ងៃនេះតទៅ ហើយវេសឡាញ និង ធនាគារ ហ្វីលីព យើងមានសហប្រតិបត្តិការរួមគ្នា ក៏បុគ្គលិកយើងទាំងពីរស្ថាប័នក៏រួមគ្នា សំឡឹងមើលចាប់ពីនេះតទៅមានអ្វីខ្លះដែលធ្វើកិច្ចការរួមគ្នាបាន ដូចជានាំ បុត្រធីតាមកសិក្សា ក្នុងលក្ខខណ្ឌពិសេសណាមួយ។ ទាំងនេះគឺជាការគិតគូដល់មាតាបិតាសិស្ស សម្រួលរាល់ការ លំបាកនានា សម្រួលនូវការចំណាយពេលវេលានាពេលកន្លងមក លោកអាចយកពេលវេលានេះបំពេញលើ កិច្ចការផ្សេងៗបន្ថែមទៀត ដើម្បីអភិវឌ្ឍលើគ្រប់កិច្ចការសម្រាប់គ្រួសារ។
លោក ចាន់ ម៉ាច អគ្គនាយក ធនាគារ ហ្វីលីព ភីអិលស៊ី បានលើកឡើងថា ធនាគារ ហ្វីលីព មានសេចក្តីរីករាយដែលបាន ធ្វើការសហការ ជាមួយក្រុមហ៊ុន វេសឡាញ អេឌ្យូខេសិន គ្រុប(WEG) ដែលជាស្ថាប័នអប់រំធំមួយ ក្នុងការដាក់ឱ្យដំណើរការលើ ការបង់ប្រាក់តាមសេវាធនាគារចល័តរបស់ធនាគារ ហ្វីលីព ។ បន្ទាប់ពីពិធីចុះអនុស្សារណៈនេះ លោក លោកស្រី សិស្សានុសិស្ស សិក្សានៅសាលារៀនវ៉េស្ទឡាញន៍ និង សាលារៀនណត្សឡាញន៍ អាចធ្វើការបង់ថ្លៃសិក្សាតាម រយៈសេវាធនាគារចល័ត របស់ធនាគារហ្វីលីព ដែលហៅកាត់ថា (Phillip Mobile) បានប្រកបដោយទំនុកចិត្ត និងសុវត្ថិភាពខ្ពស់ ដោយមិនចាំបាច់ធ្វើដំណើរមកដល់សាលា និងមិនចាំបាច់រង់ចាំយូរនាំឱ្យមានយឺតយ៉ាវ និង ចំណេញពេលវេលា។ ជាងនេះទៅទៀត ដើម្បីអបអរសាទរសម្រាប់ការដាក់ឱ្យដំណើរការកម្មវិធីបង់ថ្លៃសិក្សានេះ អតិថិជនចំនួន500នាក់ដំបូងនឹង ទទួលបានសាច់ប្រាក់ត្រលប់មកវិញចំនួន 5ដុល្លារ នៅពេលធ្វើការបង់ថ្លៃ សិក្សាលើកដំបូង តាមរយៈកម្មវិធី Phillip Mobile និង ទទួលបានមកវិញចំនួន 2ដុល្លាសំរាប់អតិថិជន ទី501ឡើងទៅ។ ការផ្តល់ជូននេះគឺចាប់ពីថ្ងៃទី17 ខែកក្កដា រហូតដល់ចុងខែធ្នូឆ្នាំ 2020។
លោក ចាន់ ម៉ាច បាននិយាយថា៖ «ធនាគារ ហ្វីលីពមានសុឆន្ទៈនឹងផ្តល់សេវាបន្តបន្ទាប់ទៀតដល់អតិថិជនរបស់សាលាវ៉េស្ទឡាញន៍ និង សាលារៀនណត្ស ឡាញន៍រួមមាន ឥណទានសម្រាប់មាតិបិតាឬអាណាព្យាបាល ធានារ៉ាប់រងទូទៅ និង ធានារ៉ាប់រងអាយុ ជីវិតជាដើម»។
លោក ចាន់ ម៉ាច បានលើកឡើងផងដែរថាបច្ចុប្បន្ន ធនាគារ ហ្វីលីព បានយកចិត្តទុកដាក់ផ្តោតលើផលិតផល សេវាធនាគារឌីជីថលជាបន្ត បន្ទាប់រួមមាន ការធ្វើបច្ចុប្បន្នភាពកម្មវិធីធនាគារចល័ត Phillip Mobile ការដាក់ឱ្យដំណើរការប្រព័ន្ធទូទាត់បាគង ដំណើរកាតនិម្មិតមាស្ទ័រកាត(Virtual Master Card) ការចូលជាសមាជិកបណ្តាញដកសាច់ប្រាក់ទូលាយ (CSS) សេវាធនាគារអនឡាញ (Internet Banking) ក្រុមហ៊ុនផ្តល់សេវាកម្មទូទាត់ប្រាក់ (PSP) សេវាធនាគារអទិភាព (Phillip Priority) ជាដើម។ ភាពជាដៃគូនេះបានផ្តល់ឱ្យអតិថិជនរបស់ធនាគារ ហ្វីលីព និង សាលារៀនវ៉េស្ទឡាញន៍ និង សាលារៀនណត្សឡាញន៍ ទទួលបានអត្ថប្រយោជន៍យ៉ាងច្រើននិងឱកាសទទួល បានបទពិសោធន៍ដ៏សំបូរបែបលើសេវាកម្មធនាគារ រាប់ទាំងការសន្សំពេលវេលា ថវិការ ទំនុកចិត្ត និង សុវត្ថិភាព។
ជាមួយគ្នានេះដែរ សាលារៀនវ៉េស្ទឡាញន៍ មានសេចក្តីសោមនស្សរីករាយ សូមជម្រាបជូនដំណឹងថា សាលារៀនយើងខ្ញុំចាប់ទទួលចុះឈ្មោះសិស្សចូលរៀនសម្រាប់បវេសនកាលថ្មី ឆ្នាំសិក្សា 2020-2021 ពីថ្ងៃផ្សាយដំណឹងនេះទៅ ។ សាលារៀន បាននាំមកនូវវេទិកា មធ្យោបាយបង្រៀនអនឡាញ និង ពីចម្ងាយ ទំនាក់ទំនង គាំទ្រ និង ស្វ័យសិក្សា យ៉ាងសម្បូរបែបដល់សិស្សានុសិស្ស និង មាតាបិតាសិស្ស ដែលជាទម្រង់បច្ចេកវិទ្យាក្នុងការសិក្សាថ្មីមួយក្នុងសតវត្សទី21 ។ បវេសនកាលថ្មី ឆ្នាំសិក្សា 2020-2021 ចូលរៀនថ្ងៃទី03 ខែ សីហា ឆ្នាំ 2020 (កម្មវិធីមត្តេយ្យខ្មែរ ភាសាអង់គ្លេស និង ភាសាចិន) និង ថ្ងៃទី 01 ខែ កញ្ញា ឆ្នាំ2020 (កម្មវិធីចំណេះទូទៅខ្មែរ ពីថ្នាក់ទី1 ដល់ ទី12) ។
ដើម្បីអបអរសាទរបវេសនកាលថ្មី ឆ្នាំសិក្សា 2020-2021 សាលារៀនវ៉េស្ទឡាញន៍ ផ្តល់ជូនពិសេសរហូតដល់ 40% លើតម្លៃសិក្សា និង មិនគិតថ្លៃសេវាចុះឈ្មោះចូលរៀនលើកដំបូង សម្រាប់ការចុះឈ្មោះត្រឹមថ្ងៃចូលរៀន៕

July 17, 2020
ហេតុផលល្អៗ 6 យ៉ាង ដែលស្រ្តីមានគភ៌គ្រប់ខែគួរតែប្រសូតបុត្រតាមធម្មជាតិ
អំឡុងពេលគ្រប់ខែជិតប្រសូត គឺជាពេលវេលាដែលគួរឱ្យរំភើបត្រេកអររបស់ស្ត្រីដែលជាម្តាយ និងសមាជិកក្នុងក្រុមគ្រួសារខ្លាំងណាស់ តែនៅក្នុងក្តីរំភើបត្រេកអរនោះ ប្រហែលជាលាយឡំទៅដោយក្តីព្រួយបារម្ភមិនតិចឡើយ ព្រោះ ឡារ៉ែនជឿថាស្រ្តីមានគភ៌ទាំងឡាយប្រហែលជាធ្លាប់បានឮរឿងរ៉ាវនៃការប្រសូតអំពីអ្នកដែលមានបទពិសោធន៍ខ្លះៗមកហើយមិនខាន ទាំងរឿងរបស់ភាពឈឺចាប់ក្នុងពេលប្រសូត ថែមទាំងនៅមានភាពរារែកស្ទាក់ស្ទើរ ព្រោះមិនដឹងថា នឹងជ្រើសរើសយកការប្រសូតដោយវិធីណាល្អ រវាងការប្រសូតតាមធម្មជាតិ ឬក៏ប្រសូតដោយការវះកាត់ ដូច្នេះបើកំពុងតែរារែកស្ទាក់ស្តើរបែបនេះ ឡារ៉ែនសូមណែនាំស្រ្តីមានគភ៌គ្រប់ខែទាំងអស់មកមើលពី ចំណុចល្អ 7 យ៉ាងរបស់ការប្រសូតតាមធម្មជាតិវិញម្តង។
1. ធ្វើចលនាបានយ៉ាងសេរី
ហេតុផលលំដាប់មុនៗគេដែលស្រ្តីមានគភ៌គ្រប់ខែគួរតែជ្រើសរើសយកការប្រសូតតាមធម្មជាតិនោះគឺ ការប្រសូតបុត្រតាមវិធីធម្មជាតិនេះនឹងបើកឱកាសឱ្យរាងកាយអ្នកម្តាយធ្វើចលនាបានយ៉ាងសេរីច្រើនជាងការប្រសូតដោយការវះកាត់ និងថែមទាំងអាចកំណត់ទិសដៅការធ្វើចលនារបស់ទារកបានខ្លាំងជាងទៀតផង។
2. មានសុវត្ថិភាពចំពោះទារក
ជាប្រក្រតីហើយ បើអ្នកម្តាយ និងកូនតូចគ្មានបញ្ហាអ្វីដែលត្រូវកង្វល់ទេនោះ គ្រូពេទ្យភាគច្រើននឹងណែនាំឱ្យប្រសូតដោយវិធីធម្មជាតិច្រើនជាងការប្រសូតដោយការវះកាត់ ដោយសារតែរាងកាយរបស់អ្នកម្តាយខ្លួនឯងអាចប្រឹងប្រសូតបានតាមធម្មជាតិដោយមិនចាំបាច់ត្រូវពឹងលើថ្នាំ ឬសារធាតុគ្រោះថ្នាក់អ្វីដែលនាំឱ្យប្រថុយប្រថានដល់កូនតូចឡើយសូម្បីតែបន្តិច។
3. រាងកាយឆាប់វឹលទៅរកសភាពដើមលឿនជាង
អាចមើលទៅដូចជាការប្រសូតតាមធម្មជាតិនឹងសាងនូវការឈឺចាប់ដល់អ្នកម្តាយខ្លាំងជាងការវះប្រសូត តែការពិតទៅ ការប្រសូតតាមវិធីធម្មជាតិនឹងធ្វើឱ្យអ្នកម្តាយឈឺចាប់តែក្នុងអំឡុងពេលដែលបញ្ចេញកម្លាំងប្រឹងបញ្ចេញទារកមក និងបន្ទាប់ពីនោះតែបន្តិចទៀតប៉ុណ្ណោះ តែបន្ទាប់ពីនោះមក ក្រោយពេលប្រសូតរួច អ្នកម្តាយនឹងបានទទួលថ្នាំបំបាត់ការឈឺចាប់ និងវិធីការស្តាសភាពរាងកាយផ្សេងៗដែលលោកគ្រូពេទ្យបានណែនាំ ថែមទាំងស្នាមរបួសនៅតូចជាងការវះពោះប្រសូតទៀតផង។
4. ប្រសូតលឿនជាង
ការវះប្រសូត គ្រូពេទ្យនឹងត្រូវចាក់ថ្នាំស្ពឹក និងត្រៀមឧបករណ៍សម្រាប់ធ្វើការវះប្រសូតទៀតជាច្រើន ដើម្បីឱ្យទារកបានបើកភ្នែកចេញមកពីផ្ទៃម្តាយបានយ៉ាងល្អឥតខ្ចោះមួយរយភាគរយ ដែលវាក៏ជាការពន្យារពេលកម្មវិធីការប្រសូតឱ្យកាន់តែយឺតយូរតទៅទៀត តែបើអ្នកសម្រេចចិត្តប្រសូតតាមវិធីធម្មជាតិវិញនោះ រាងកាយរបស់អ្នកម្តាយនឹងបានរៀនយល់ដឹងពីវិធីការផ្តល់កំណើតកូនតូចដោយសញ្ជាតិញាណស្រាប់ហើយនោះ ក៏នឹងជួយសម្រួលឱ្យអ្នកប្រសូតបុត្រយ៉ាងសុវត្ថិភាព និងប្រើពេលវេលាមិនយូរទៀតផង។
5. មានឱកាសបានសិក្សាអំពីរាងកាយរបស់ខ្លួនឯងច្រើនឡើងទៀតផង
តាំងពីពេលដែលស្រ្តីមានគភ៌សម្រេចចិត្តរួចហើយថា នឹងប្រសូតតាមវិធីធម្មជាតិនោះ ស្រ្តីមានគភ៌ និងស្វាមីនឹងចាប់ផ្តើមសិក្សាពីព័ត៌មាន និងមើលថែទាំខ្លួនយ៉ាងពិតប្រាកដ ហើយការស្វែងរកព័ត៌មានច្រើនៗបែបនេះនឹងធ្វើឱ្យស្រ្តីមានគភ៌ខ្លួនឯងបានទទួលនូវចំណេះដឹងល្អៗ និងវិធីមើលថែទាំខ្លួនឯងទាំងមុនពេលប្រសូត និងក្រោយពេលប្រសូតបានច្រើនឡើងទៀតផង។
6. មានមោទនភាពលើភាពជាម្តាយរបស់ខ្លួនឯង
អ្នកណាៗក៏ដឹងដែរថា ការប្រសូតតាមវិធីធម្មជាតិនឹងត្រូវប្រើភាពក្លាហាន និងភាពអំណត់អត់ធន់របស់ស្រ្តីជាម្តាយខ្លាំងប៉ុនណានោះ ដូច្នេះបើអ្នកអាចឆ្លងកាត់អំឡុងពេលនៃការឈឺចាប់ខ្លាំងក្លាដ៏សែនមានតម្លៃបែបនោះមកបាន វាគឺជារឿងធម្មតាមួយដែលអ្នកនឹងកើតមានអារម្មណ៍មោទនភាពលើខ្លួនឯងយ៉ាងខ្លាំងបំផុត ក្រៅពីនេះ គេនាំគ្នានិយាយថា ការប្រសូតតាមវិធីធម្មជាតិនឹងបង្កើនអារម្មណ៍អាណិតស្រឡាញ់រវាងស្រ្តីជាម្តាយ និងកូនបានខ្លាំងជាងការវះកាត់ប្រសូតទៅទៀត។
ការបានក្លាយជាម្តាយមនុស្ស គឺជារឿងមួយដែលគួរឱ្យអស្ចារ្យ និងគួរឱ្យលើកតម្កើងស្រាប់ទៅហើយ មិនថាដោយហេតុផលអ្វីទាំងអស់ ដូច្នេះមិនថាអ្នកនឹងជ្រើសរើសឱ្យកូនជាទីស្រឡាញ់ចាប់កំណើតឡើងដោយវិធីណាក៏ដោយ សុទ្ធតែគួរឱ្យសរសើរតម្កើងដូចគ្នាទាំងអស់ តែបើសិនជាអាចទៅរួច ការប្រសូតតាមវិធីធម្មជាតិ ជាវិធីដែលល្អបំផុត ដោយសារមានចំណុចល្អដល់ទៅ 6 ចំណុចនេះឯង៕
July 17, 2020
លោក KOJI GYOTOKU ថា ការកោះហៅលើកនេះ សម្រាប់ត្រៀមពាន AFF U19
លោក KOJI GYOTOKU គ្រូបង្វឹកក្រុមបាល់ទាត់យុវជនគោព្រៃជម្រើសជាតិអាយុក្រោម 19ឆ្នាំកម្ពុជា បានបង្ហាញអំពីគោលបំណងរបស់លោក ក្នុងការធ្វើការកោះហៅកីឡាករចំនួន 38រូប មកពីក្លិបបាល់ទាត់ធំៗនៅក្នុងលីកកំពូលកម្ពុជាទាំង 8នេះថា គឺដើម្បីត្រៀមខ្លួនចូលរួមប្រកួតក្នុងពានរង្វាន់ AFF U19 Championship 2020 ដែលគ្រោងនឹងធ្វើឡើងនៅចុងឆ្នាំនេះ មុនការប្រកួត AFC U19 Championship ទៅទៀត។
តែលោកក៏បានបន្ថែមទៀតដែរថា អ្វីៗកំពុងតែស្ថិតនៅក្នុងភាពស្រពេចស្រពិល ដោយសារតែពេលនេះ ពានប្រចាំតំបន់អាស៊ាន AFF U19 Championship កំពុងតែស្ថិតនៅក្នុងការពិចារណាថា គួរលេង ឬក៏គួរលុបចោល ហើយពាន AFC U19 Championship ដែលជាពានកម្រិតទ្វីបអាស៊ីដែរនោះ ក៏កំពុងតែស្ថិតក្នុងស្ថានភាពគ្រោះថ្នាក់ផងដែរ ក្រោយពេលដែល អ៊ូបេគីស្ថាន ជាម្ចាស់ផ្ទះ បានប្រកាសបិទប្រទេសរបស់ខ្លួនទៅហើយ ខណៈដែលការប្រកួតកំពុងតែកៀកខិតជិតមកដល់ដែរនោះ។
គួរបញ្ជាក់ដែរថា ក្រុមបាល់ទាត់យុវជនអាយុក្រោម 19ឆ្នាំរបស់កម្ពុជា ក្រោមការកោះហៅរបស់គ្រូបង្វឹកសញ្ជាតិជប៉ុនលោក KOJI GYOTOKU បានធ្វើការហ្វឹកហាត់ជុំគ្នាហើយ កាលពីល្ងាចថ្ងៃទី14 ខែកក្កដា ឆ្នាំ2020នេះ នៅពហុកីឡដ្ឋានជាតិ ចាប់ពីវេលាម៉ោង 4ល្ងាចតទៅ៕

July 17, 2020
កីឡដ្ឋានមរតកតេជោ របស់កម្ពុជា ជាកីឡដ្ឋានធំជាងគេបង្អស់ទី៤នៅតំបន់អាស៊ាន
កាលពីថ្ងៃទី16 ខែកក្កដា ឆ្នាំ2020 វេបសាយកីឡាដ៏ធំបំផុតរបស់អាស៊ាន គឺ ASEAN FOOTBALL NEWS បានបង្ហោះរូបភាពមួយ បង្ហាញអំពីចំណាត់ថ្នាក់កីឡដ្ឋានដែលធំជាងគេបង្អស់ទាំង4 នៅក្នុងតំបន់អាស៊ានដែលមាន 11ប្រទេស និងប្រជាជនជាង 700លាននាក់។ ដោយក្នុងចំណោមកីឡដ្ឋានទាំង 4នោះ ក៏មានកីឡដ្ឋានរបស់កម្ពុជា 1ដែរ គឺពហុកីឡដ្ឋានជាតិមរតកតេជោ សម្រាប់ធ្វើជាម្ចាស់ផ្ទះកីឡាស៊ីហ្គេមឆ្នាំ2023 ដែលកម្ពុជានឹងធ្វើជាម្ចាស់ផ្ទះ។
1. កីឡដ្ឋាន Bukit Jalil (ម៉ាឡេស៊ី) មានតម្លៃ 112លានដុល្លារ អាចផ្ទុកអ្នកទស្សនាបាន (87,411 នាក់) បើកសម្ភោធនៅឆ្នាំ2017។
2. កីឡដ្ឋានអន្តរជាតិចាការតា (ឥណ្ឌូនេស៊ី) មានតម្លៃ 353លានដុល្លារ អាចផ្ទុកអ្នកទស្សនាបាន (82,000នាក់) កំពុងតែសាងសង់ ហើយគ្រោងនឹងបើកសម្ពោធនៅឆ្នាំ2021ខាងមុខ។
3. កីឡដ្ឋានជាតិShah Alam (ម៉ាឡេស៊ី) មានតម្លៃ 480លានដុល្លារ អាចផ្ទុកអ្នកទស្សនាបាន (80,372 នាក់) បើកសម្ភោធនៅឆ្នាំ1990។
4. ពហុកីឡដ្ឋានជាតិមរតកតេជោ (កម្ពុជា) មានតម្លៃ 150លានដុល្លារ អាចផ្ទុកអ្នកទស្សនាបាន (60,000នាក់) កំពុងតែសាងសង់ ហើយគ្រោងនឹងបើកសម្ពោធនៅឆ្នាំ2021 ខាងមុខ៕
July 17, 2020
Realme ក៏ប្រកាសពីបច្ចេកវិទ្យាសាកភ្លើងលឿនដែរ ដោយ 30នាទី អាចសាកពេញ 100%
បច្ចេកវិទ្យាសាកថ្មលឿនរបស់ Realme បានហក់ទៅកាន់កម្រិត 125W គឺស្មើនឹង 2ដងនៃបច្ចេកវិទ្យាសាកថ្ម SuperDart 65W ដែល realme បានដាក់នៅលើ X50 Pro 5G។ ក្រោយពេលតេស្តសាកល្បងរួច វាមានថ្មទំហំ 4200mAh របស់ X50 Pro 5G ចំណាយពេលត្រឹម 30នាទី អាចសាកពេញ 100%។
ដំណឹងនេះត្រូវគេដឹងភ្លាមៗ បន្ទាប់ពីក្រុមហ៊ុន realme ហៀបនឹងប្រកាសចេញបច្ចេកវិទ្យាសាកថ្មកម្លាំង 125W ដ៏ថ្មីសន្លាងនេះនៅថ្ងៃនេះតែម្ដង។
កាលពីមុននេះ 1ថ្ងៃ(ថ្ងៃទី16 កក្កដា) OPPO ត្រៀមប្រកាសចេញបច្ចេកវិទ្យាសាកថ្មកម្លាំង 125W និងក្រុមហ៊ុនចិនមួយទៀតគឺ iQOO ក៏នឹងត្រៀមប្រកាសបច្ចេកវិទ្យាសាកថ្មកម្លាំង 120W នេះដូចគ្នាដែរ មានន័យថា បច្ចេកវិទ្យាមួយនេះ កំពុងក្លាយជាប្រធានបទក្ដៅគគុក លើបណ្ដាញអ៊ិនធើណិត។
គួរបញ្ជាក់ដែរថា VIVO បានប្រកាសចេញម្សិលមិញ(ថ្ងៃទី16កក្កដា)នូវបច្ចេកវិទ្យាសាកថ្មកម្លាំង 120W ដោយប្រើពេលត្រឹម 15នាទី អាចសាកថ្មពេញបាន 100%៕
ទស្សនាវីដេអូខាងក្រោម៖
https://cdn57.androidauthority.net/wp-content/uploads/2020/07/Realme-125W.mp4?_=1
July 17, 2020
5 វិធីរៀបចំបន្ទប់ទឹកទំហំតូចឱ្យស្រឡះស្រួល
មិនថាតែលោកអ្នកចង់មកជួលបន្ទប់អាផាតមែនត៍ ខុនដូកណ្តាលទីក្រុង ឬទិញផ្ទះល្វែងរាងតូចច្រឡឹងថ្មីក៏ដោយ តែលោកអ្នកប្រហែលជាត្រូវអស់ប្រាក់ក្នុងការរៀបចំកែកុនបន្ទប់ទឹកដែលមានទំហំតូចង្អៀតនៅក្នុងបន្ទប់ទាំងនោះឡើងវិញមិនខាន ព្រោះចូលទៅពេលណាក៏ចង្អៀតទើសទែងធ្វើអ្វីក៏មិនស្រួលជានិច្ច តែថ្ងៃនេះលោកអ្នកមិនចាំបាច់ចំណាយប្រាក់ក្នុងការជួសជុលកែលម្អបន្ទប់ទឹកដែលតូចចង្អៀតនោះឡើងវិញទេ ឡារ៉ែនមានគន្លឹះល្អៗក្នុងការ រៀបចំបន្ទប់ទឹកដែលតូចចង្អៀតនេះឱ្យទូលាយស្រឡះឡើងវិញដូចខាងក្រោមនេះ។
1 . កុំយករបស់របរដែលមិនចាំបាច់ត្រូវប្រើចូលទៅទុកក្នុងនោះជាដាច់ខាត ទុកចំពោះតែវត្ថុណាដែលចាំបាច់ត្រូវប្រើមែនទែនទៅបានហើយ សូម្បីតែវត្ថុដែលលោកអ្នកទិញត្រៀមបម្រុងទុក ដូចជាថ្នាំដុសធ្មេញដែលនៅមិនទាន់យកចេញពីប្រអប់ សាប៊ូដុសខ្លួន សាប៊ូកក់សក់ ក្រដាស់អានាម័យផ្សេងៗដែលមិនទាន់ហែកប្រើក៏ដោយ គួរតែយកចេញមកទុកដាក់នៅកន្លែងផ្សេងសិន ទុកតែរបស់ដែលកំពុងប្រើប្រាស់ទៅបានហើយ។
2 . ផ្តល់ភាពសំខាន់ចំពោះពន្លឺ ដំបូងបំផុតត្រូវសង្កេតមើលថា តើនៅក្នុងបន្ទប់ទឹកមានមាត់បង្អួចដែលនឹងធ្វើឱ្យបានទទួលពន្លឺពីធម្មជាតិដែរឬទេ? ព្រោះក្នុងបន្ទប់ទឹកតូចៗខ្លះក៏មិនបានទទួលការច្នៃម៉ូដឱ្យមានពន្លឺគ្រប់គ្រាន់ដែរ បើសិនជាដូច្នេះ វានឹងធ្វើឱ្យទិដ្ឋភាពរួមរបស់បន្ទប់ទឹកមើលទៅរាងងងឹតស្លុប ទើសទែង។ ពន្លឺនៅក្នុងបន្ទប់ទឹក ទោះជាពន្លឺពីអំពូលភ្លើង ឬពន្លឺពីធម្មជាតិក៏ដោយក៏គួរតែឱ្យភ្លឺដល់គ្រប់ទីកន្លែងដែរ ព្រោះវានឹងធ្វើឱ្យមើលទៅឃើញភ្លឺច្បាស់ស្រឡះល្អ និងស្អាតឡើងផង។
2 . រៀបចំទុកដាក់របស់ប្រើប្រាស់ឱ្យអាចចាប់យកមកប្រើការបានងាយស្រួល ទោះជាយើងយករបស់របរដែលមិនចាំបាច់ ឬលើសតម្រូវការទៅទុកដាក់នៅកន្លែងផ្សេងហើយក៏ដោយ តែប្រាកដណាស់ថា បន្ទប់ទឹកដែលមានទំហំតូចមែនទែននោះ ក៏នៅតែមើលទៅមិនទូលាយស្រឡះដែរ តែយ៉ាងណាក៏ដោយ របស់របរដែលចាំបាច់ត្រូវប្រើ វាក៏ចាំបាច់ត្រូវតែទុកនៅក្នុងទីនោះដែរ និងគួរតែស្ថិតនៅក្នុងកន្លែងដែលយើងអាចចាប់យកមកប្រើបានយ៉ាងងាយស្រួល។ លោកអ្នកអាចនឹងរកធ្នើរថ្នាក់ៗដាក់របស់មកដាក់ ឬប្រអាប់ កញ្រ្ចែងមកដាក់នៅខាងក្រោមអាងលប់មុខ ហើយរៀបចំទុកដាក់របស់របរផ្សេងទៀតឱ្យបានរៀបរយតាមប្រភេទរបស់វា ឬអាចនឹងបំពាក់ឧបករណ៍ព្យួរនៅតាមជញ្ជាំង ក៏អាចជួយសន្សំសំចៃទីកន្លែងបានល្អដែរ។
3 . សាកល្បងកែសម្រួលឧបករណ៍ផ្សេងៗខាងក្នុងបន្ទប់ទឹក ដើម្បីឱ្យមើលឃើញហើយមានអារម្មណ៍ថាបន្ទប់ធំទូលាយឡើង ដូចជា ប្តូរវាំងននបាំងកន្លែងងូតទឹកឱ្យតូចជាងមុន ប្តូរផ្កាឈូកងូតទឹកឱ្យតូចជាងមុន ឬអាចនឹងសាកល្បងបំពាក់ផ្ទាំងកញ្ចក់ឱ្យធំឡើង ក៏អាចជួយឱ្យបន្ទប់ទឹកមើលទៅរាងធំស្រឡះឡើងបានដែរ។
5 . ត្រូវនឹកដល់ភាពងាយស្រួលសប្បាយក្នុងការប្រើការជាចម្បង សម្រាប់អ្នកដែលគិតថា បន្ទប់ទឹកគ្រាន់តែជាកន្លែងមួយដែលយើងចូលទៅបំពេញធុរៈផ្ទាល់ខ្លួនយ៉ាងប្រញាប់ប្រញាល់រៀងរាល់ព្រឹក រៀងរាល់ល្ងចនោះ ការកែសម្រួលបន្តិចបន្តួចតាមការណែនាំខាងលើ ប្រហែលជាអាចធ្វើឱ្យមើលទៅល្អប្រសើរឡើងបានហើយ តែបើអ្នកណាគិតថា បន្ទប់ទឹកគឺជាអ្វីដែលសំខាន់ជាងនោះ ដូចជាគិតថា ជាទីកន្លែងមួយដែលជួយឱ្យបន្ធូរបន្ថយអារម្មណ៍ពីភាពតានតឹង និងការធ្វើការងារដ៏ធ្ងន់ធ្ងរពេញមួយថ្ងៃមកនោះ ក៏គួរតែនឹកដល់ភាពស្រួលសប្បាយផងដែរ អាចនឹងមានកម្រាលព្រំទន់ៗ វាំងននបាំងកន្លែងងូតទឹកស្អាតៗ ឬកន្សែងជូតខ្លួនទន់ៗផងនោះ នឹងមានអារម្មណ៍ថាស្រួលសប្បាយគ្រប់ពេលដែលបានឃើញ និងបានប្រើប្រាស់វាមិនខាន៕
July 17, 2020
ប្រយ័ត្នទុកជាមុន…ជំងឺដែលនឹងមកជាមួយរដូវភ្លៀង
មួយរយៈនេះធាតុអាកាសនៅក្នុងប្រទេសយើង តិចក្តៅ តិចរងា ថ្ងៃខ្លះភ្លៀងក៏បង្អុរចុះមកធ្វើឱ្យទទឹកសើមគ្រប់ៗគ្នា តែអ្វីដែលគួរឱ្យបារម្ភនោះ ក៏ប្រហែលជាចៀសមិនផុតពីរឿងជំងឺដង្កាត់ដែលនឹងមកជាមួយទឹកភ្លៀងនោះឡើយ។ ថ្ងៃនេះទំព័រសុខភាព ឡារ៉ែនសូមនាំមិត្តអ្នកអានទាំងអស់គ្នាមកត្រៀមខ្លួនចាំទប់ទល់នឹងរោគាដែលនឹងមកជាមួយទឹកភ្លៀងដូចខាងក្រោមនេះ ៖
1. ក្រុមជំងឺខាងប្រព័ន្ធដកដង្ហើម
ក្នុងរដូវភ្លៀង ធាតុអាកាសចាប់ផ្តើមត្រជាក់ និងមានសំណើមខ្លាំង ធ្វើឱ្យមេរោគអាចរីករាលដាលបានយ៉ាងឆាប់រហ័ស បើសិនជាមានមេរោគរីករាលដាលនៅក្នុងធាតុអាកាស ហើយយើងដកដង្ហើមស្រូបចូលទៅក្នុងសួត អាចនឹងបង្កឱ្យកើតជំងឺខាងផ្លូវដង្ហើមបានជាច្រើន ដូចជា ជំងឺផ្តាសាយ គ្រុនផ្តាសសាយធំ រលាកបំពង់ដង្ហើម ដូច្នេះគួរចៀសវាងការស្ថិតនៅក្នុងកន្លែងដែលចង្អៀតហប់ ខ្យល់អាកាសពិបាកចេញចូល និងចៀសវាងការនៅជិតអ្នកដែលកើតជំងឺទាំងនោះ ព្រោះមេរោគអាចឆ្លងពីមនុស្សម្នាក់ទៅមនុស្សម្នាក់បានតាមរយៈការដកដង្ហើម ទឹកមាត់ សំបោរ ឬកំហាកស្លេស្មរបស់អ្នកជំងឺ ដោយមេរោគនឹងឆ្លងចូលតាមភ្នែក ច្រមុះ និងមាត់ ឬតាមរយៈការដែលមនុស្សបានប៉ះពាល់វត្ថុដែលលាយឡំជាមួយមេរោគ ដូចជា កន្សែងជូតមុខ ស្លាបព្រា កែវទឹក ការថើប ឬការដែលដៃទៅប៉ះមេរោគ ហើយយកទៅញីភ្នែក ឬយកទៅកាន់អ្វីញ៉ាំជាដើម។
2. ជំងឺគ្រុនឈាម
នៅពេលធ្លាក់ភ្លៀង នឹងតែងតែមានទឹកដក់នៅតាមទីកន្លែងផ្សេងៗ ធ្វើឱ្យកើតមានការរីករាលដាលពូជរបស់មូសខ្លាដែលជាភ្នាក់ងារចម្លងរោគគ្រុនឈាម។ បើកើតជំងឺគ្រុនឈាម អាចនឹងមានកម្តៅខ្លួនឡើងខ្ពស់រយៈពេល 2 – 3 ថ្ងៃ (អាចក្តៅខ្លាំងដល់ 40 អង្សា C ) មិនឃ្លានបាយ ឈឺក្បាល ឈឺចុករួយពេញខ្លួន មុខឡើងក្រហម ចំពោះអ្នកដែលមានគ្រាប់ឈាមទាប អាចមើលឃើញចំណុចឈាមក្រហមៗនៅលើស្បែក បើឃើញមានអាការដូចដែលបានរៀបរាប់មកនេះ ចូរកុំបង្អង់យូរ ត្រូវប្រញាប់ទៅមន្ទីពេទ្យ និងគួរចៀសវាងពីទីកន្លែងដែលមានមូស ព្យាយាមកុំឱ្យមូសខាំ ប្រើថ្នាំបាញ់សម្លាប់មូស បំផ្លាញប្រភពកំណើតរបស់មូស ដូចជា ផ្កាប់វត្ថុដែលធ្វើឱ្យមានទឹកដក់ និងចាក់ដីលុបកន្លែងដែលមានទឹកដក់ជាដើម។
3. រោគប៉េស្ត
ជំងឺប៉េស្ត គឺជាជំងឺឆ្លងដែលកើតចេញពីសត្វកណ្តុរគ្រប់ប្រភេទ ដោយមេរោគនឹងស្ថិតនៅក្នុងទឹកនោមរបស់សត្វកណ្តុរទាំងនោះ ទាំងកណ្តុរស្រែ កណ្តុរព្រៃ កណ្តុរស្រុក កណ្តុរប្រែង និងកណ្តុរប្រមេះ ហើយមេរោគប៉េស្តនេះនឹងចូលមកក្នុងរាងកាយមនុស្សបាន
តាមរយៈស្នាមដំបៅ ឬរបួស និងស្នាមរលាត់ដាច់ផ្សេងៗលើរាងកាយ។ ជំងឺនេះទោះជាមានថ្នាំព្យាបាលឱ្យជាមែន តែក៏អាចធ្វើឱ្យស្លាប់បានដូចគ្នាដែរ បើបានទទួលការព្យាបាលមិនត្រឹមត្រូវ ឬយឺតយ៉ាវ។ អ្នកជំងឺនឹងមានអាការគ្រុនក្តៅខ្លាំងភ្លាមៗ ឈឺក្បាល ច្រើនតែឈឺសាច់ដុំភ្លៅ និងកំភួនជើងយ៉ាងខ្លាំង និងភ្នែកក្រហម។ ប្រមាណជា 5 – 10 ភាគរយរបស់អ្នកកើតជំងឺនេះ អាចនឹងមានអាការធ្ងន់ធ្ងរ ដូចជា ឌីហ្សាន ក្រលៀនលែងដំណើរការ ឬអាចប្រកាច់ទៀតផង ដូច្នេះគួរចៀសវាងការដើរលុយទឹក លុយភក់ដែលប៉ប៉ិកប៉ប៉ាច់។ អ្នកដែលធ្វើការងារប្រថុយប្រថាននឹងជំងឺនេះ គួរតែពាក់ស្រោមដៃជ័រ ពាក់ស្បែកជើងជ័រកវែង ការពារខ្លួនកុំឱ្យកើតមានរបួស ឬដំបៅនៅលើជើង ឧស្សាហ៍លាងសម្អាតដៃឱ្យបានញឹកញាប់ ងូតទឹកសម្អាតរាងកាយក្រោយពេលចប់ពីការងារ កម្ចាត់សំរាមនៅក្នុងផ្ទះ និងកន្លែងធ្វើការចេញឱ្យអស់ ជាពិសេសកាកសំណល់កំទេចចំណីអាហារ ដើម្បីកុំឱ្យក្លាយជាប្រភពអាហាររបស់សត្វកណ្តុរ។
4. ជំងឺឆ្លងខាងប្រព័ន្ធរំលាយអាហារដែលជួបញឹកញាប់
មានដូចជា ជំងឺរាករូសភ្លាមៗ ជំងឺរាកមួល ពុលអាហារ ជាដើម ជំងឺទាំងនេះបណ្តាលមកពីការទទួលទានអាហារដែលមានប្រឡាក់ប្រឡូសមេរោគអតិសុខុមប្រាណដែលបង្កឱ្យកើតរោគនៅក្នុងប្រព័ន្ធរំលាយអាហារនៅក្នុងពោះវៀន ដោយអ្នកជំងឺនឹងមានអាការរាក បន្ទោបង់ចេញមករាវដូចទឹក អាចមានគ្រុនក្តៅខ្លួន ឈឺរមួលនៅក្នុងពោះ និងបើមានឆ្លងមេរោគមួលផងនោះ អាចមានសំបោរ ឬឈាមលាយឡំមកជាមួយលាមកទៀតផង។ ក្រៅពីនេះនៅមានមេរោគវីរុសរលាកថ្លើមប្រភេទ A និង B ដែលអាចឆ្លងបានតាមរយៈការទទួលទានអាហារដែលប្រឡាក់ប្រឡូសមេរោគផងដែរ អ្នកដែលមានអាការរលាកថ្លើមនឹងមានគ្រុនក្តៅខ្លួន ល្វើយអស់កម្លាំង មានអាការខ្លួនឡើងលឿង ភ្នែកលឿង ក្អួតចង្អោរ ដូច្នេះទើបក្នុងរដូវភ្លៀងនេះគួរប្រយ័ត្នប្រយែងរឿងអាហារការហូបចុកជាពិសេស ដោយគួរទទួលទានតែអាហារដែលធ្វើឆ្អឹនថ្មីៗ ស្អាត និងប្រើស្លាបព្រាសម្រាប់ដួសម្ហូបដោយឡែក។
5. ជំងឺភ្នែកក្រហម
ជំងឺភ្នែកក្រហម បណ្តាលមកពីមេរោគវីរុសដែលមាននៅក្នុងទឹកកខ្វក់ ខ្ទាតចូលភ្នែក ការប៉ះពាល់ទឹកភ្នែករបស់អ្នកដែលកើតជំងឺភ្នែកក្រហម ហើយយកដៃដែលប្រឡាក់នោះមកប៉ះភ្នែកខ្លួនឯង ឬបានទទួលមេរោគដែលខ្ចាត់ខ្ចាយនៅក្នុងអាកាស ឬក្នុងអាងហែលទឹក។ ជាទូទៅមេរោគនឹងសម្ងំខ្លួន 1 – 2 ថ្ងៃមុននឹងបង្ហាញអាការឡើង។ នៅលើអ្នកដែលកើតជំងឺភ្នែកក្រហមអាចពិនិត្យឃើញមេ
រោគបង្កជំងឺនៅម្តុំបរិវេណភ្នែក និងក្នុងបំពង់កបានតាំងពីថ្ងៃបង្ហាញអាការ រហូតដល់ 14 ថ្ងៃក្រោយពីចាប់ផ្តើមមានអាការ។ វិធីការការពារគឺ កុំយកដៃដែលមិនស្អាតមកប៉ះ ឬញីភ្នែក លាងសម្អាតដៃគ្រប់ពេលមុននឹងប៉ះពាល់ភ្នែក មិនប្រើប្រាស់កន្សែងជូតមុខ ឬជូតខ្លួនរួមជាមួយអ្នកដែលកើតជំងឺភ្នែកក្រហម សំខាន់បំផុតត្រូវការពារមិនឱ្យជំងឺឆ្លងរាលដាលពីខ្លួនឯងទៅអ្នកដទៃ៕
July 17, 2020